رواية سجينة الظلم والانتقام الفصل السابع والعشرون 27 - بقلم طبيبة الاحساس

#سجينة_الظلم_والانتقام 🍂🥀

#البارت_الثاني_والثلاثون

#الكاتبة : سارة الشمري🖤

أحبك.. لا أدري حدود محبتي.. طباعي أعاصير.. وعواطفي سيل.. وأعرف أني متعب ياصديقتي.. وأعرف أني أهوج.. أنني طفل.. أحب بأعصابي، أحب بريشي.. أحب بكلي.. لا اعتدال، ولا عقل.

نزار قباني🖤

التفتنة على صوت صرخة بالحديقة ورانة وبأتجاهنة .....

لاول مرة من ذاكرة مها // مها

اسمي مها عبدالله الجاسر عمري ١٩ اني اصغر وحدة بالعائلة .... ادرس علم النفس ... ماراح اطول بالحجي ...

اني من فقدت اخوي فارس حقدت على الي قتلة وعلى كل شخص الة علاقة بي ... اني مو مثل تفكير خاتون وان هي مالهة علاقة بأخوهة ... لا هي اختة يعني دمة المجرم يمشي بعروقهة ... كرهت ميامين صح .. صرت اتجبنهة ... صح اني اكرهة بس هم ما احب اسبب مشاكل لاي احد اين كان .. ابتعدت عنهة وصرت بالصدفة اشوفهة ... مرات اروح لبيتهم بشغل لغزوان واشوفهة .. هي تتجنبني واني نفس الشي ... جنت اضوج من علاقة خاتون بيها ... ماكلة عقلهة لخاتون ... مو ليكول فصلية عبالك ملاك ونازل من السما ...

واليوم الثاني من رمضان ... طبعاً الحجية متعودة كل سنة بهيج يوم توزع اكل على بيوت الفقراء والمحتاجين بثواب جدي ... وهالسنة امي سوت نفس الشي وياهة بثواب فارس ...

طبعا اني جنت تعبانة من عزيمة البارحة واليوم كعدتني الحجية من الساعة ٩ الصبح ...
دخلت عليهن للمطبخ ... الحجية كاعدة عالكرسي وعوجيتهة بصفهة وتطلع الاكل من الكراتين ...

امي كاعدة بالكاع وترتب بالاكل وتحجي وية حبوبتي ....
دخلت واني افرك بعيوني : صباح الخير ..
الحجية : هذا يا صباح .. دنيا الضهر ...
فتحت عيوني عليهة : حبوبة احنة رمضان .. المن اكعد من الصبح ...

الحجية : دكعدي اكعدي ... تعاي جيبي الكراتين ذني وحطي بيهن الاكل ...

اباوع عالاكل الي مو شوية ونصة موجود برة بعدة ...
اكياس تمن الصغار المكبوس ... بطالة دهن .. شعرية وعدس ... اكياس التمر العراقي وكراتين بطالة لبن ... وانواع المونة والأشياء الي يحتاجهة الشخص برمضان ...
جبنة كراتين وكعدنة بكل كرتوني نحط من كلشي واحد لو ثنين وبعدين نلصقهن ...

اباوع للحجية تشتغل .. ابتسمت واني اسمعهة ما سكتت تستغفر وتدعي ...
مها : يمة لعد خاتون وين ليش ما كعدتيهة تساعدنة ... لو بس اني تكعدوني ...

الحجية : خاتون احسن منج .. كعدت من الساعة ب ٨ وراحت لبيت عمج تجيب منهم فلوس الصدقات الراح نوزعهة ... وكالت تريد جم حاجة من السوك تمر بدربهة تجيبهن وتجي ...

مها : وليش ما كعدتوني غير هم اريد كم شغلة من السوك .. جان وصيتهة تجيبهم وياهة .. خل اكوم اخابرهة ...
اخذت تليفوني وخابرت خاتون .. وصيتهة على كل شغلة ...
رجعت للمطبخ وكملت شغل وية امي والحجية ...

صارت الساعة يمكن ب١٢ حسيت نفسي متت من التعب لان ما نايمة زين وعطشانة لان الجو حار وصايمة ...
ردت اكوم لغرفتي وصاحتني الحجية : تعاي ولج ..
مها : ها حبوبة .. والله تعبت اريد انام ..

الحجية : جا حاطتج بسجن ابو غريب شني .. دتعاي هاج هذني الفواكه وديهن لبيت اخوج ..
مها : حبوبة تدرين بية ماحب اروح هناك ..
الحجية : دهاج اخذيهن لو خاتون هنا جا خذتهن بس هسة ماكو احد بس انتي ...

مها اخذت الكلاكة منهة : ترة اوديهن وارجع كبل انام .. لا تطلعيلي شغلة صفح والله تعبت ...
الحجية : امشي ولي يالصلفة الله لا يعوزني الج ...

ضحكت ومشيت .. حطيت شال على راسي لاكاني مؤيد بالحوش : ها مهاوي شبي وجهج احمر ..

مها : فدوة اسكت وخليهة .. الحجية كرفتني كرف ... كل ما اكعد وصاحت بية ... مكعدتني من التسعة الصبح ... وهسة اريد اودي ذني لبيت غزوان واشرد انام ...
مؤيد : اي امشي اني هم اريد امر على غزوان عندي جم شغلة وياه وانتي سويلي طريق بدربج ...
فتحت بابهم الي بنص حوشنة ودخلت للحديقة ...
سمعنة صوت ضرب مال كيس الملاكمة ...

مها : اخوي ابد مو عاقل والله ... حتى برمضان والشمس تحرك طالع يلعب حديد بهالحر ...
مؤيد ضحك : دروحي لا يسمعج اتكولين مو عاقل حتى يحطج ابمكان جيس الملاكمة ...
خفت صدك ودخلت لبيتهم ... البيت هدوء .. اكيد المسعدة نايمة ...

صحت بصوت عالي واني واكفة ببداية الدرج : مياااامييين ... وييينج يابنت ..
هاي بس لا سوتهة صدك وكامت ما ترد علية من اصيح ... اني اعلمج يبنت اللذينة ...

صعدت الدرج بعصبية وبيدي العلاكة ....
فتحت غرفتهة استغربت ... الغرفة مرتبة يعني مو هنا نايمة ...
توجهت لغرفة غزوان يمكن نايمة بيهة ...

فتحت باب الغرفة ... طاحت العلاكة من ايدي وشهكت واني احط ايدي على حلكي ...
نايمة على بطنهة وضهرهة كلة طالع ... والجرحف مغطي من اسفل ضهرهة لوجوة ...
شعرهة الطويل منثور على وجهة وبالكاع ...
ضهرهة ما يبين منة شي من كثر الاثار البي ...

تقربت منهة خطوتين اكثر ... انصدمت واني اشوف الجرجف كلة دم ... ايدية كامت ترجف واني اشوفهة بهالحالة ...
الكاع باردة وهي نايمة بدون اي ملابس وخدهة عالكاع وحالهة ما يفرح لا صديق ولا عدو ...
قربت منهة ونزلت على ركبي كدامهة ... حطيت ايدي على كتفهة هي ارتجفت بس ما تحركت ...

رفعت شعرها عن وجهة وشهكت بصدمة وطحت ليورة ...
وجهة كلة احمر ومزورك واثار الضرب واضحة ماراحمة بيهة ... شكلهة متغير ١٨٠ درجة ...
فاتحة عيونهة وتباوع بالفراغ .. حتى ما باوعتلي ...
يمكن لو ما رجفت من لمستهة جان عبالي ميتة ...

نسيت كرهي الهة واني اشوفهة بهالحالة ... هاي جريمة .. هي زغيرة بعدهة على هالعذاب الي هي بي .... نزلت دموعي على حالهة .. ليش هيج غزوان .. ليش سويت هيج ... ليش صرت مثل اخوها المجرم ... ليش تعذبهة بهالطريقة ... ليش ما خفت من الله ...

اخذت تليفوني من جيبي وكمت طلعت من الغرفة ... اتصلت على رقمهة ...
خاتون : الو مها فدوة لا تكولين نسيتي شي .. ترة والله تعبتيني ...

مها وهي تبجي : عوفي كلشي وتعاي بسرعة ...
خاتون بخوف : شكو مها شصاير ... احد بي شي ..
مها : اي .. ميامين ..
خاتون بصياح : شبييييها ... مها احجي شبيهة ...
مها : تعاي بسرعة فدوة وشوفيهة ... حالتهة مو زينة ...
سديت التليفون من خاتون لان ادري بيهة راح تبقى تسأل .. رجعت للغرفة ..

كعدت يمهة وحطيت ايدي على شعرهة وكلت بهدوء : ميامين ... كومي وياي فدوة ...
ما تحركت وعبالك ما تسمعني ...
حاولت اسيطر على نفسي وما ابجي ...

لزمتهة من اكتافهة ودرتهة على ضهرهة ... ماكدرت ما ابجي من منضر جسمهة ... اثار التعذيب والضرب والخراميش ... ليش يا غزوان ليش ...
رفعتهة من اكتافهة وبالكوة كعدتهة ...
لا اراديا حضنتهة وكمت ابجي وعبالك من وراي الي هي بي ...

صرت اعتذر منهة لان غزوان اخوي : اسفة .. والله اسفة ...
هي على وضعهة ما تحركت ... رفعت ايدهة وكلت : ميامين كومي وياي فدوة ... لا بقين هيج كاعدة الكاع باردة ...
ما تحركت ابد وعيونهة لكدام حتى ما ترمش ...
سميت بالله ولفيتهة بالجرجف ...

حطيت ايدهة حوالين ركبتي .. وايدي الثانية حاوطت بيهة خصرهة ...

كدرت اكومهة لان جانت خفيفة ...
جانت مثل الجثة ... اني احرك بيهة وهي ما تحركت .. تسحب برجليهة سحب وكلساع تريد تطيح ....
دخلتهة للحمام وكعدتهة بالبانيو ... فتحت المي دافي على برودة شوي ...

هي شهكت من المي الي نزل على جسمهة ... بقت ترجف وتتنفس بسرعة ومغمضة عيونهة ....
خفت عليها .. كمت اقرا ايات قرءآنية بصوت عالي حتى تسمع هي ...

حطيت ايدي على كتفهة هي انتفضت بسرعة وكامت تصيح : لا ... عوفني الله يخليك ... لا تقرب مني ... غزوان وخر فدوة ... لا تلمسني .. لا لا ...

اخذت نفس وضربتهة راشدي حتى تصحى هي شهكت ومثل الي رجعت لوعيهة صرخت بيهة : اصصصححيي .. ميامين ..
حاوطت وجهة بيدية واني احط عيونهة بعيوني وكلت بهدوء وحنية : شوفي ماكو احد هنا ... غزوان مو هنا .. اني هنا مو غزوان ...

ميامين وهي تأشر عالباب وتنهار من البجي : وين راح .. هو جان هنا ..

ميامين انتبهت على ايدهة الي مادتهة ... وكالت وهي تمشي ايديهة على جسمهة ... حجت وعبالك تشكيلي منة : شوفي شسوة بية ... اثارة بقت على جسمي ... ضربني ودمرني ... بس لان كتلة احبك ... شسويت اني .. شهالذنب الجبير هذا ... خلص والله اكرهة ماريدة .. ليش هيج يسوي بية ... خلص ماريدة ...

كمت ابجي عليهة واني اشوفهة منهارة لهالدرجة : اسفة والله اسفة ميامين ... والله ماجنت ادري هيج يسوي بيج ...
ميامين وولا عبالك تسمعني ...

سحبت الليفة وكامت تمسح بجسمهة بكل قسوة وعصبية وحقد : ماريدهن .. خل تروح اثارة مني ... خل تروح ريحتة مني ... ماريد لمساتة على جسمي ... كرررهههتة ... خلصوني منة ... ماريد منة شي ..
لزمت ايدهة وصحت : مييااامين اهدددي ... اني راح اخلصج من ريحتة بس اهدي ..

هزت راسهة وهي دموعهة تنزل ...
اخذت الليفة وحطيت بيها صابون وكمت افرك بجسمهة على كيف ...
هي صافنة وعيونهة لكدام وبس دموعهة وشهكاتهة تطلع ...
غسلت ايديهة وضهرهة وكل جسمهة واني ابجي وية بجيهة ...

رحت لغرفتهة واخذت البرنص مالتهة والشامبو والخالولي ..
دخلت للحمام واخذت الشامبو .. حطيت على شعرهة الاسود الطويل ...
هدئت من صرت اقرالها ايات ... غسلت شعرها بالشامبو ... غمضت عيونهة من غسلت وجهة ...
اني اغسل بجسمها ووجهة بكل حذر حتى لا تتأذة اكثر من هيج ...

طلعتهة من البانيو .. نشفت جسمهة ولبستهة البرنص وهي واكفة بهدوء حتى دموعهة وكفت ...
لفيت شعرهة بالخاولي وطلعتهة وياي ...

سحبت وجهة ودرتة عن جهة الجرباية والمكان الي جانت بي حتى لا ترجع تتذكر ...
طلعتهة من الغرفة ... وصلنة للنص الطريق ووكفنة صوت خاتون وهي تجي بسرعة : مياامين ...
انصدمت وهي تشوف وجه ميامين ...
حطت ايديهة على خدودهة وميامين بسرعة وخرت راسهة بألم : شصار .. شسوالهة ...

نزلت راسي ماكدرت احجي ...
خاتون : مها احجي ...
مها : خاتون مو وقتج ... شوفيهة شلون تعبانة .. خل ناخذهة لغرفتهة ...
لزمتهة خاتون الي نزلت دموعهة وهي ما تعرف السالفة شنو ...

دخلناهة لغرفتهة وكعدناهة عالجرباية ...
جبت مشط ووخرت الخاولي من شعرهة ...
خاتون وهي تسحب مني المشط : ما راح تفهميني شنو الموضوع ... شسوالهة ووصلت لهيج حالة .. هو مو اول مرة يضربهة ...

مها حجيت واني اروح لجهة الشباك وافتح البردة ... شفتهم متحاضنين مؤيد وغزوان ... وغزوان يبجي ... استغربت اكثر ...
مها : دخلت عليهة للغرفة وو .......
حجيتلهة كلشي ... هي شهكت بصدمة والتفتت على ميامين ...

تحولت نضرات خاتون للعصبية ...
خاتون : وين هو هسة .....
جاوبتهة واني اشر عليهم ...: هذولة هو ومؤيد كاعدين يم مكان تدريب غزوان ...
شمرت المشط بالكاع وطلعت من الغرفة بعصبية ... هاي شتريد تسوي ...

رحت وراهة بسرعة ...
نزلت خاتون من الدرج بكل عصبية ...
فتحت الباب البرة وتوجهت الهم ..
صاحت بكل عصبية : غزززززوووووااااان ...

الكاتبة : سارة الشمري🖤

اليوم نزلتلكم البارت من وقت ... بنات والله دا احاول اطول البارت بس ما الحك اكتب ... يعني لو اكدراكتب اكثر قابل اقصر وياكم ... اعذروني حبايبي 😘 .. قراءة ممتعة .

#البارت_الثالث_والثلاثون

#الكاتبة : سارة الشمري🖤

أبكيتُ إنسانآ رُغم أنه أحبني... وأحببتُ إنسانآ رُغم أنه أبكاني
وليم شكسبير

نزلت خاتون من الدرج بكل عصبية ...
فتحت الباب البرة وتوجهت الهم ..
صاحت بكل عصبية : غزززززوووووااااان ...
غزوان التفت عليهة بسرعة هو ومؤيد ...

اجتة بسرعة وكامت تصيح وتضرب بي بقهر : شلون كدرت تسوي هيج ... ما خفت من ربك .. ما خفت علينة الله يبلينة بزوج مثلك ... ما خفت عليهة ... ما كلت بعدهة زغيرة شلون راح تتحمل عذابي لهالدرجة ... ما تخاف الله انت ... هي شعليهة بحقدك ... ليش هيج ياضالم ...

مؤيد لزمهة من ايديهة وهو يبعدهة عن غزوان ...
مؤيد : خاتون اهدي مو هيج تنحل الامور ...
خاتون ودموعهة تنزل وتحجي بكل عصبية : ليش هذا خلة بيهة حل ...

التفتت خاتون على غزوان وكالت بحقد : تتذكر من كتلك مرة حرام تكون خاتون اخت هالمجرم رائد ... وكتلك بوقتهة ترة خاتون صارت اختي لا تأذيهة ... بس هسة لا اتراجع عن كلمتي ... مو حرام تكون اخت رائد لا ... حرام يكون اسمهة مرتبط بأسمك ... حرام تكون على ذمة مجرم مثلك ... ماكو فرق بينك وبين رائد ... ترة حالك من حالة ... ويمكن انتة مجرم اكثر منة ... لاول مرة بحياتي اكرهك يا غزوان ... لاول مرة اتمنى اني مو اختك ... لاول مرة ما اكدر اباوع بوجه ميامين من الي انتة مسوي بيهة ...

نفضت ايديهة بتعب وزادت بجيهة : حرام عليك .. هسة شنو استفاديت من سويت هيج ... ارتاح كلبك لو خف حقدك لو بعدة انتقامك مستمر ...

حطت ايدهة على حلكهة وكامت تبجي ودخلت للبيت ...
مشيت وراهة بدون ما اباوع على وجه غزوان .. لان حتى اني خجلانة من فعلة اخوي هاي ... الي جان طول الوقت يباوع عليهة ببرود ...
دخلنة عليهة للغرفة لكيناهة بعدهة على كعدتهة مثل ما عفناهة ....
خاتون كعدت يمهة وحضنتهة بس هي صافنهة وما تحركت ...

اخذت خاتون المشط وكعدت تمشطلهة ... انتبهت على دمعة نزلت من عينهة ووكعت بالكاع .. حتى ما رفعت ايدهة ومسحت دمعتهة ...
تنهدت من كلبي على حالهة ...
خلصت خاتون من شعرهة ... جبت ملابسهة واجيت كعدت يمهة ...

كامت خاتون سدت الباب ... ذبيت البرنص منهة وخاتون شهكت من شافت جسمهة وكامت تبجي بالزايد ...
خزرتهة وكلت بصوت خفيف : خاااتووون ...
اشرت عليهة بمعنى لا تبجين كدامهة ترة هي مو ناقصة ...
بدلتلهة ونومتهة وغطيتهة ... خاتون كعدت يمهة عالكرسي ...

نزلت للمطبخ اسويلهة شي تاكلة لان هي بهالحالة ما عليهة صيام وتعبانة ...
باوعت للساعة صارت ب ٣ تقريباً ...
رحت للبيتنة ودخلت بهدوء للمطبخ ... البيت هدوء اكيد نايمات امي والحجية ...

شفت جدر الشوربة عالطباخ لان امي دائما تسوي الشوربة من وقت ... اخذت جدرية زغيرة وحطيت بيهة شوربة واخذت خبز حار من الجدر ورجعت لبيت غزوان ...
حطيت الشوربة بماعون وشرحت خيار وطماطة ... سويتلهة فواكه من الي جبتهن بماعون ..
اخذت الصينية وصعدتهة لغرفتهة ...

شفت خاتون كاعدة يمهة وتلعب بشعرهة ...
شافتني خاتون وكامت .. عدلت كعدتهة وحطيت مخاد ورة ضهرهة ...
انطيت الصينية لخاتون لان يمكن ما تاكل من ايدي ...
خاتون حطت الصينية على رجليهة وكالتلهة ..: ميامين حبيبي .. فدوة اكليلج لكمتين .. انتي من البارحة على لحم بطنج ...

بما ان اني ادرس علم النفس واعرف ان هي هسة بحالة صدمة ويرادلهة احد يهديهة ويعاملهة بهدوء وحنية ...
لزمت ايدهة بحنية وكلت بهدوء : ميامين ... لا تخافين مستحيل اخلي غزوان يدخل لهاي الغرفة ... حتلو اضطريت اقفل الباب ونبقى ثنينة يمج ...

وفعلا نزلت عيونهة المغوركة علية ...
كالت بصوت متهدج : شيسوي اذا اجة ... بقى اكثر من هيج ما سواه ...
خاتون : ميامين الله يخليج لا تضعفين ... لا تخلينة يأثر عليج .. لا تخلينة يبتسم ان كدر يكسرج ...
نزلت راسهة ميامين وما حجت شي ...

خاتون كالتلهة وهي ترفع راسهة : ميامين لخاطري اكليلج لكمتين ولا تبقين هيج ...
خاتون اخذت الخاشوكة مالت الشوربة وقربتهة من حلكهة ... ميامين اكلتهة بهدوء ... اكلت كم خاشوكة وبعدين وخرت الصينية لخاتون ...
تمددت وعيونهة للسكف تباوع ببرود ...

مرت نص ساعة تقريبا ... خاتون راحت للبيت حتى ما تبين الهم اكو شي وبعدين ترجع ... اني بقيت يمهة لان اكيد عبالهم صعدت انام ...
كعدت عالكرسي واني ميتة من التعب لان ما نايمة ... مادري شلون غفيت عالكرسي ...

فزيت على صوت انين يمي .. التفتت شفتهة وجهة احمر .. مغمضة عيونهة والعرك يتصبب من جبينهة .. تون بصوت ناصي بكلمات ما مفهومة ...
كمت بسرعة حطيت ايدي على خدهة حرارتهة مرتفعة كلش مثل النار ... جسمهة يرتجف وايديهة لازمة اللحاف عليهة بكل قوة ...

دخلت خاتون ومن شافتهة هيج اجت بسرعة ...: شبيهة ليش ترجف ...
مها : حرارتهة مرتفعة كلش .. بسرعة صيحي مؤيد يشوفهة ... ديري بالج لا تخلين غزوان يجي ...
خاتون : انتي روحي .. اني ماريد اشوف وجهة ..

عفتهة ونزلت الدرج شفتهم دخلو هستوهم للصالة ...
مها : مؤيد فدوة تعال شوف ميامين ... حرارتهة مرتفعة كلش .. وترجف وتهذي من الصخونة ...

غزوان بسرعة : شبيهة .. وخري خل اشوفهة ...
وكفت كدامة وكلت بعصبية : وخر انتة .. اني كلت مؤيد ...
مؤيد وهو يتأفف : مو وكت عرايكم هسة ... امشي مها كدامي ..
صعدت كدامة وتأكدت ان خاتون ملبستهة حجابهة ... وصحتة ودخل للغرفة ...

بس دخل طبكت الباب ووكفت علي حتى لا يدخل غزوان ...
مؤيد : مها روحي لمكتب غزوان جيبيلي السماعة والمحرار ...
فتحت الباب وصار غزوان بوجهي .. اجة يدخل بس دفعتة وكلت بعصبية : غزوان لا تحاول تدخل .. اني انطيت كلمة لميامين ان ما اخليك تدخل عليهة ...

حسيت بدفعة وراي شفتهة خاتون وهي تفتح الباب وتكول بعصبية : بأي وجه جاي عليهة ... شنو تريد تكمل عملتك وتموتهة ...
مؤيد وهو يطلع وكال بعصبية : انتن محد يعتمد عليجن بشي وخرررن .. عافنة وراح للمكتب ...
غزوان بعصبية : وخري خاتون خل اشوفهة .. لا تخليني ادخل غصباً عليج ...

خاتون وهي تدفعة وتحجي بكل عصبية وصياح ...: شوف غزوان وروح فارس اذا ما وخرت منا هسة اتصل على اهلهة واكللهم تعالو اخذو بتكم لان اخوي موتهة .. وارجع اتصل عالشرطة واكللهم اكو جريمة هنا .. وبس يشوفون الاثار على جسمهة ويسحبونك سحب للسجن لان هو المكان الي لازم تكون بي هسة وية رائد ... انت ما تفرق عنة ثنينكم مجرمين ... وخررر منا ترة وربك اسويهة وما تردد لحضة ...

غزوان حط ايده بشعرة ويجرة حيل .. رفس الطبلة الي كدامة بكل عصبية ..
دخلت خاتون للغرفة واني بقيت واكفة واشوفة يفتر بالصالة .. كلت بقهر : اذا خايف عليهة هالكد.. ليش سويت بيها هيج ...

غزوان ما رد علية .. اجة مؤيد ودخل واني دخلت وياه وسديت الباب وبقيت واكفة علي ...
مؤيد فحص حرارتهة وجيبلهة علاج من الصيدلية مال غزوان ...
حط الحباية بكلاص المي مثل ما اني سويت قبل ...
اخذتهة خاتون وشربتها لميامين ...
طلع ابرة وانطانياهة وكال : اني طالع ... انتي اضربيهة الابرة وخل تنام وترتاح ... بس تكعد ما بيهة شي ...

هزيت راسي واخذت الابرة وهو طلع ... سمعت غزوان يكلة بلهفة : ها مؤيد شبيهة ...
مؤيد بعصبية : عملتك سودة شمسوي بالبنية وجهة ما يبين من الضرب ...
سديت الباب بقوة وقهر .. هي هاي الزلم كادرة عالنسوان وينفخون عضلاتهم عليهن ...
اخذت الابرة وضربتهة لميامين ... خاتون غطتهة وكعدت يمهة ..

ابتسمت على شكل خاتون الي لازمة راسهة وتقرا علي وكلساع ودنكت على كصتهة وحبتهة ...
شكد حنونة عبالك امها مو صديقتهة ...
كعدت شوية يمهة وباوعت للساعة ..
مها : خاتون راح يأذن المغرب ... اني راح اروح شوية وارجعلج حتى لا يحسون بشي وتدرين بالحجية خاتون تلكطهة وهي طايرة ..

خاتون هزت راسهة واني نزلت ...
ما موجود بالصالة ... اكيد طالع ...
رحت لبيتنة ودخلت للمطبخ ... لكيت امي تحضر بالفطور .. : وين جنتي اصيح عليج عبالي فوك وماكدر اصعد ...
مها : جنت ابيت غزوان ...
ام غزوان بإستغراب : شعجب رايحتلهم اليوم ...
مها واني احاول اتهرب واطلع من المطبخ : هيج يمة بس ضجت كلت اطلع شوية ...

دخلت للصالة شفتهة كاعدة عالقنفة ...
درت وجهي اريد ارجع للمطبخ : اووكفي ولج ..
التفتت عليهة بإبتسامة مصطنعة : امريني حجية ...
الحجية : وين جنتي من الضهر لهسة ...
حكيت راسي شمدريهة من الضهر .. لو ضالة يم امي بالمطبخ احسلي : جنت ابيت غزوان يم ميامين ...
الحجية : ياء هيج الله هداج وكمتي تحبين البت .. وتكفين شرج عنهة ..

فتحت عيوني عليهة بصدمة واني اكعد يمهة ..: الي يسمعج ايكول يومية افشخهة لو اهد عليهة بطبر ... هو اني يمتة شايفتهة حتى اسوي شر وياهة ...
الحجية : دكومي وخري شكد تهذرين ... خل اكوم اصلي اذن الاذان ...
كامت الحجية واني رحت صليت ودخلت للمطبخ ...: يمة عادي اخذ فطور لبيت غزوان ...

ام غزوان : اخذي هذا خير من الله ... بس شعدجن اليوم ..
مها : هيج بس ميامين كالت تعالن افطرن يمي وكلت اخذ هم منا فطور ...
ما ردت علية واني جبت صينية وصبيت بيها فطور ...
اخذتة ورحت لبيتهم ... حطيتة بصينية جبيرة وصعدتة فوك .. حطيتة بالكاع .. رحت يمهة حطيت ايدي على خدهة .. لا حرارتهة شوية احسن ...

اشرت لخاتون ان تكعد تفطر ..
كعدت خاتون اكلت شوية وبعدين كامت غسلت .. خلصت فطور ونزلت الصينية جوة للمطبخ ..
غسلت المواعين وحطيتهن بالصينية حتى من اروح اخذهن وياي ...
صعدت فوك كعدت يمهة ... باوعت لخاتون لكيتهة غافية وهي تبدللهة بالكمادات ...

شلت الخاولي عن راسهة بللتة ورجعتة على جبينهة ...
اباوع لوجهة بحزن .. زراك جوة عيونة .. وحلكهة وخشمهة وفوك حاجبهة مجرحات ... جفوفنهة وخدودهة حمر من الحرارة واثار اصابعة معلمة عليهن ...
جريت نفس واني اتنهد على حالهة .. ليش هيج يخوي ... ليش تصير مثل اخوهة ... ليش تصير ضالم ... ليش تنزل لهالمستوى ...

انشالله تكدر تسامحك على الي سويتة بيهة مع ان ما اضن هالشي ... بس الله شلون راح يسامحك ... فارس شلون راح يرتاح بقبرة وانت سويت هيج انتقام علمودة ... الله يصلحك يا غزوان على هالعملة ...
بقيت كاعدة يمهة وكلساع اغيرلهة الكمادات ... خاتون كعدت واخذتهن مني ... كعدت يمهن شوية وصارت الساعة ١٠ ...
مها : خاتون انتي تبقين هنا ...

خاتون : اي طبعاً شلون تردين اعوفهة ..
مها : ماشي لعد اني رايحة ... وديري بالج عليهة .. واذا فزت حاولي تهدينهة بطريقة هادئة مو ترتبكين ... وديري بالج تطفين الضوة ... خاف تفز بليل وتخاف من الضلمة ..
خاتون هزت راسهة : ماشي لا تخافين ...
طلعت من يمهة ... نزلت للصالة وصار بوجهي غزوان هستوة داخل ...

غزوان بسرعة اجاني : شلونه .. شلون صارت ...
مها واني اكتف ايدية لصدري : شلون تصير يعني ... مصخنة ونايمة ..
غزوان : خل اشوفهة بس شوية ..
مها : لا تحاول .. ترة خاتون راح تنام يمهة يعني ماتكدر تدخل ما راح تخليك ...
عفتة وطلعت للبيت ...

دخلت للمطبخ هدوء ... رحت للصالة طبعا الحجية فاتحة التلفزيون وتباوع على محاضرة ...
كعدت عالقنفة .. الحجية باوعتلي صفح : شعندج ..
مها بدت رحمة الله .. بس لا تكشفني : هيج حبوبة شعندي ..
الحجية : جا انتي لو طكة لو اشلع مخة .... لو ما نشوفج ابد .. لو تكرهين البت وتلزكين يمنة ...

مها : حبوبة جا مو انتي اتكولين روحن يمهة وحدهة خطية ... يعني تردين ابقى هنا وما اروح ...
الحجية : لا حبوبة روحي .. الله يطيج العگل والثگل ..
كمت من يمهة لان ميتة من التعب ... رحت لغرفتي سبحت ونمت مباشرةً ...

كعدت الساعة ١٢ الضهر من التعب جريتهة نومة ...
بدلت ونزلت ... لبست شالي وتوجهت لبيت غزوان ...
دخلت ومباشرةً صعدت فوك للغرفة ...
فتحت الباب ودخلت ... استغربت ..
كعدت خاتون .. خاتون كعدت وهي تفرك بعيونهة بإنزعاج ..: ها مها شتردين ...

مها واني أشر عالفراش : وين ميامين ...
خاتون بسرعة فتحت عيونهة وكامت ...
فتحت باب الحمام مابي احد ..
التفتت علية خاتون
وكالت بصوت : وييين مييياااميين ....

الكاتبة : سارة الشمري🖤

شكد فرحتوني بكلامكم الحلو وتشجيعكم الي عالبارت الي راح حبايبي 😘 فدوة لكلوبكم كلكم 🖤 والله حاولت اطوللكم البارت اليوم حتى اكدر اعوضكم كلامكم ولو جزء بسيط😘 احبكم