رواية سجينة الظلم والانتقام الفصل التاسع 9 - بقلم طبيبة الاحساس

#سجينة_الظلم_والانتقام 🍂🥀

حجة بعصبية :هالكلب لا تجيبين اسمة كدامي مرة ثانية ... ورب الكعبة احسب الله ما خلقج
رديت علي واحاول اخفي الخوف : الي دا تحجي عنة هذا اخوية شلون اتكولي ما اذكرة
قرب وجهة مني وحجة بفحيح : اخوج مو ... من اليوم وجاي تنسين شي اسمة اخوج وامج واختج شيليهم من راسج
انصدمت من كلامة : شنووو ... هذولة اهلي شلون تريدني انساهم ... تريد تحرمني من اهلي
حسيت اصابعة انغرزت بخصري بكل قوتة صلبت ضهري من الألم
سحبني من شعري وقرب وجهي منة : اهلللج ... وربي وجلالة اذا ما حركت گلب اخوج عليج وحركت كلبج على اخوج واهلج مثل ما حركتو كلبي على اخوي ما يطلع اسمي غزوان الجاسر

#sara_zead

#البارت التاسع

#الكاتبة : سارة الشمري 🖤

الرجل الذي يعامل المرأة كملكة دليل على أنه تربى على يد ملكة أخرى.
وليم شكسبير

شفت تليفون موجود عالمجرات
اجت فكرة ابالي بس خفت ... : اففف ميامين لا تخافين هو مو هنا
شلت التليفون ومجان بي رمز فرحت

دخلت رقم اخوية حسان لان بس هو حافضتة

ردت اتصل بس فجأة : ااااااااااه

حسيت شعري اتكطع والتليفون انسحب مني

غزوان بفحيح وراسة يم اذني : عرفتج راح تحاولين تتصلين لهالسبب رجعت

ميامين : فدوة بس احجي وية امي ... اكيد قلقانة علية
غزوان بعصبية : اني مو كتلج انسي شي اسمة اهلج

ميامين وعيوني مغوركة : واني كتلك هذولة اهلي ومستحيل افكر انساهم
غزوان : خوش لعد اني انسيج ... بس مو هسة ... من ارجع يصير خير
طلع واخذ التليفون
اني كمت اكمل تعزيل
فتحت الكنتور اريد احط بي الملابس الي عزلتهن بس جان فارغ بس بس كم قطعة وكلهن قوط مبينات جديدات لو كم لبسة ملبوسات
لعد وين باقي ملابسة
شفت بردة بيضة بصف الباب
رحت فتحتها طلعت غرفة بدون باب... دخلت استقبلتني ريحة العطور
اباوع عالغرفة وبكل مكان وافتر بيها واني فاتحة حلكي
جنت اشوف بس عالنت وبالمسلسلات شي اسمة غرفة تبديل وبهالشكل
جانت غرفة ملابس رجالية ... الملابس بجهة معلكات وبترتيب حلو

الاحذية (تكرمون) يلمعن واكثرهن باللون الاسود ومسطرات على رفوف والرفين الاخيرات موجودة بي شحاطات رجالية .. يلبسوهن هنا بالبصرة هواي وية الدشاديش
ومراية طويلة موجودة بالنص

ورف بصفة مملي عطور كلة رجالي جذبني كم عطر اشوفهن بالاعلانات والباقيات ماركات ما اعرفهن

التفتت شفت مجرات فتحت اول واحد بي ساعات وبألوان مختلفة ... اسود وفضي وذهبي وابيض
فتحت المجر الوراه بي بروشات وكبكات مالت الدشاديش ... جنت اشوف منهن عند رائد ومن اسألة ايكول من فارس هدية
كمت احجي وية روحي : شنو من ناس ذولة .. زناكيل لو اكو كلمة بعد اكثر منها جان كلتها ...
رتبت ملابسة وطلعت من غرفة التبديل
رتبت جربايتة
غرفتة جانت باللون الابيض كولش حلوة الحرباية حيل واسعة ومن فوك التاج مالتها بي فيكات حلوة

المراية تقريبا جانت ماخذة نص الحايط
وميز تلفزيون من ضمن الغرفة
شفتة حاط صورتة بأطار ومحطوطة عالميز ...  شلتها واني اتأمل بشكلة

هستوني انتبه ان حلو ... للصراحة مو بس حلو ... عيونة ازرق داكن .. وبشرتة سمرا على حنطي ... وخشمة زغير ... ومحدد لحيتة بشكل دقيق وكولش لايكلة ... جسمة عريض ومبين رياضي لان عندة عضلات بارزة ... وطابك حواجبة : حتى بالصورة معصب ما عندك شي اسمة ابتسامة
نزلت الصورة ... شفت صورة ثانية شلتها

جانو كاعدين هو واخوانة بديوان ولابسين دشاديش ولافين جراويات ويضحكون اول مرة اشوف ضحكة غزوان ... عرفت فارس لان شايفتة قبل ... وبصفهم واحد يشبه فارس هذا الي شفتة وياهم البارحة الصبح اكيد هذا مؤيد
حلوة صورتهم كاعد غزوان بالنص وهمة كل واحد من جهة وتلاثتهم يضحكون
عفت الصورة

خلصت تنضيف غرفتة وطلعت ...
نضفت البيت وكملتة
وسويت غدا
صارت الساعة ب ١٢ وهو ما اجة
صبيت شوية وكعدت اكلت وبعديت لميت المواعين وغسلتهن
انتضرتة يجي بس ما اجة
رحت للهول كعدت ... ورة شوية هو دخل

صبيتلة غدا بدون ما احجي ولا شي
حطيتة كدامة وانتضرتة يخلص اكل
شلت الصينية اخذتهة للمطبخ وجبتلة جاي
غزوان وهو يشرب من الجاي : ليش الجاي بارد
استغربت هستوني مطفية القوري : شوكت لحك يبرد
غزوان بعصبية : جنج ممصدكة ست ميامين

ميامين : لا مو قصدي بس استغربت
شال الاستكان وذب شوية منة على ايدة : بارد مثل الثلج .. تعاي شوفي
تقربت اريد اخذة وهو شمرة بالكاع وكسر الاستكان
وكال بعصبية : المرة الجاية الجاي ماريدة بارد ... واني كتلج اي شي الكاه مو نضامي اعتبرة بمعني عقاب ...
جرني من شعري وشمرني بالكاع طاحت ايدي على الجاي بالكاع ... شلت ايدي بسرعة لان الجاي حار
لعد ليش كال بارد وشلون ذبة على ايدة
شال الحزام من خصرة وصار يضربني مثل المرة الي قبلها
ابجي من الالم
غزوان وهو يشمر الحزام بالكاع : بعد نص ساعة ارجع الكى المكان منضف وماريد اشوف خلقتج

كمت بالكوة نضفت المكان وكعدت ابجي بالصالة

ورة شوية دخلت خاتون اني بسرعة مسحت دموعي وابتسمت

خاتون من الباب وهي تمشي بأتجاهي : صباااحو

رديت عليها بأبتسامة : هذا يا صباح ... كولي مسائو دنفوش .. شنو هستوج كاعدة

خاتون برطمت : لا تكولين دنفوش ع اساس انتي عايزة .. وبعدين عبالج اني كسولة وهسة يلة اكعد
... لا حبيبتي كعدت من ال ٩  وية الحجية خاتون
استغربت :منو هاي حجية خاتون
خاتون بأبتسامة : بيبيتي ام ابوية ... كولش احبها ... وخاصاً غزوان ايموت عليها وكل يومية قبل لا يطلع يمر عليها
ابتسمتلها : الله يحفضها الكم انشالله
خاتون : تسلمين .... اي مكلتيلي شلون صرتي

ابتسمت بتصنع : الحمدالله احسن
خاتون : بما ان اليوم غزوان يطول يلة يرجع
تعالي نكعد بالبلكونة شوي
ميامين فرحت واخيرا راح اشم هوا : ماشي يلة
خاتون : خلي ناخذ جاي ونطلع
صبينة جاي واخذنا وطلعنا كعدنا على كراسي بالبلكونة
حلو المنضر جان خضار المنطقة الي كدامهم ينطي منظر ربيعي يجنن التفتت علي بيت اهل غزوان الي جان مبين علي مو اقل من بيت غزوان

بس جان مبين البيت هوسة يعني بي ناس هواي
التفتت على خاتون : اممم خاتون ... انتي ليش تجين هنا ... يعني قصدي بيتكم بي ناس هواي وفاتحة اخوج بعدها ما فاضة من الناس ... شعجب تعوفيهم
خاتون بهم : احاول اتهرب من كلشي يذكرني بفقد فارس ... مادري اذا راح اتعود على هالشي بس ماريد اتهود هسة ... اني لحد الان ممصدكة ان هو خلص مموجود بهالدنيا ... وبالاضافة اني اكره جو الحزن ... واجي يمج لان هدوء وحلوة الكعدة وياج
ابتسمتلها : والله اني هم احب الكعدة وياج ... اتمنى لو تبقين يمي
خاتون : ايي حتى ننكتل ... نحتل البيت وتالي اثنينة ننطرد
ضحكت وبعدين سكتت : امممم خاتون احجيلي عن غزوان
خاتون بهدوء: شنو تريدين تعرفين عنة
ميامين : اممم مثلا طبعة
خاتون : ماشي ... شوفي غزوان صح عصبي بس حنووون بشكل ... ويحب يساعد الناس ... يحب يضحك ويسولف
ميامين طلعتت عيوني : يضحك ويسولف وحنووون ... خاتون ترة جاي اسألج عن غزوان مو احد ثاني

خاتون : ميامين لا تحكمين على غزوان من يومين ... ترة وفاة فارس اثرت علي وخاصاً فارس اصغر واحد بالولد وجان يحب غزوان كولش ... غزوان هسة كلبة بعدة محروك على اخوه ولهسة عصبيتة وحقدة مسيطرات علي ... ولا اصلا غزوان حنون والكل يحبة ومعروف بطيبة كلبة عند كل الناس ... بس انتي هسة للأسف دا تواجهين ذنب مو ذنبج ... انتي اعذري اذا سوة شي ... صح مو من المنطق ان اطلب منج هالشي ... بس حطي نفسج بمكانة هو من عرف ان فارس مات مقتول وهو ماكو بكلبة غير الحقد وما على لسانة غير كلمة اخوي شذبة ينقتل وهو بعدة زغير

شالت كوب الجاي ودخلت حتى تنطيني المجال افكر بكلامهة

صفنت بكلام خاتون وفكرت بي
اني جنت اشوف تعاملة وياي من ناحية ثانية
... هو هم حقة اخوه الي انقتل ... اني من احاول اقنعة ب ان رائد ما فارس ... زين هو شمدري هو بس شاف ادلة وثبوتات تثبت جريمة رائد ... اني عندي ثقتي برائد ما تكسرهة اي ادلة وثبوتات ... بس هو ما عندة هالشي وما جان يعرف رائد اصلا ... كل الي عرفة هو ان اكو واحد قتل اخوك واكو ادلة على هالشي ... وهو جاي ياخذ حق اخوه ... اصلا هو زين منة وما قتل الي قتل اخوه ... بس هو يريد يعذبة وهو عايش ... ويعرف هو ان العذاب النفسي اقوى من العذاب الجسدي

... كل الي جاي يسويه لان فقد اخوه .... وفقد الاخو مو شي سهل ... اني مجرد ما سمعت ان رائد تصوب سودت الدنيا بعيني وحسيت فقدت الامل
شلون اذا هو دفن اخوه بيدة

كمت من مكاني ونزلت ملكيت خاتون : اكيد راحت

كعدت وكلامهة ما فارق عقلي
رجعت طلعت للبلكونة حطيت ايدية عالسياج وصفنت عالمكان
كمزت على صوتة وراي : مـــيــامـــيــن

بالوقت الحالي قاطع سلسلة ذكرياتي هم اسمي بس هالمرة بهدوء : ميامين وين صافنة

الكاتبة : سارة الشمري🖤