رواية سجينة،الظلم والانتقام الفصل الخامس عشر 15 - بقلم Renad.m

#البارت الثاني والاربعون

#الكاتبة : سارة الشمري🖤

حبيبتي إن في قلبي أحاسيس ومشاعر تضطرب كلما رأيتك، فكأني أريد أن أختفي من هذه الدنيا، وأندمج في روحك، لأن نفسي تواقة إليك، مولعة بك فأصبحت لا أستطيع أن أستغني عنك فرفقاً بي، بيديك سعادتي.

رحت لغرفة رائد وسمعت صوتهم بالغرفة ...

ردت افتح الباب بس شهكت وحطيت ايدي على حلكي من سمعت كلمة رائد ...

رائد : حسان احبهة ومن خمس سنوات هم .. بس بعد الي سواه اخوهة بميامين ما بقالي امل بيهة ..

حسان : رائد اذا تحبهة من زمان ليش ما خطبتهة من فارس من قبل ..

رائد : خطبتهة وهو وافق .. وحتى بنفس الوقت هو طلب مني احجي وية عمي حتى هو يخطب ورود ... بس قبل لا يحجي لاهلة صار الحادث ... وما لحك يكللهم وانت تعرف الباقي ..

حسان : شلون يعني هسة تريد تتخلى عن حبك .. جرب اخطبهة واكيد ما راح يعارضون لان هسة عرفو الحقيقة ..

رائد : مستحيل هالشي ... لان اذا خطبتهة يعني راح ارجع ارتبط بهالعايلة ... واني لهسة ما مصدك ان همة ما سوو شي لميامين ... واكيد راح يحاولون يرجعون ميامين واني ما اقبل بهالشي ... لان طالما هي رافضة هالفكرة ف اني مستحيل اغصبهة على شي ... وبعدين هي ضحت علمودي وراحت الهم فصلية .. وهسة اني مستعد اضحي بحبي علمود راحتهة واني ما صدكت ترجع لطبيعتهة ...

ميامين نزلت دموعهة وهي تسمع كلام اخوهة ...
يعني رائد يحب وحدة من خوات غزوان .. بس منو بيهن خاتون لو مها ...

كملت وهي تسمعهم ..

حسان : رائد انت مستحيل تنساهة ... يعني طول هالسنين ما كدرت تنساهة .. شلون هسة راح تكدر ..

رائد بسخرية حزن : اني ما عمري نسيتهة وما راحت من بالي ... شلون اكدر انساهة وهي ساكنة بكلبي وبروحي .. جنت كل ما اروح للبصرة اراقبهة من بعيد لحد ما تدخل للدوام ... وهسة احس بالشوك اخذ كلبي ... بس لازم هالحب يبقى بكلبي ... ودير بالك تجيب سيرة لاحد .. ماريد ميامين تعرف بهالشي ... ماريدهة تحس ان بسببهة ما راح اكدر اتزوج الاحبهة ...

ميامين راحت لغرفتهة وسدت الباب ...

كعدت تفتر بالغرفة وتبجي ... ليش تضم حبك بكلبك من وراي ... اني ما سويت كل هالشي حتى انت تتعذب بعدين بسببي ..

بس منو هي الي يحبهة ... خاتون لو مها ...
لازم اعرف منو هي ...

مسحت دموعهة ونزلت للصالة شافتهم كاعدين ...

حسان : وين جنتي الفلم بدى ووصل للنص ..

ميامين بدون اهتمام : اي عادي .. التهيت وية البنات مسوين كروب ..

حسان وهو يباوع للفلم : انتي ويامن ..

ميامين وجهت عينهة لرائد الي مندمج بالفلم ...

: اني وخاتون ومها وبسمة ...

رائد التفت عليهة بسرعة ... ميامين سوت نفسهة ممنتبهة الهة وحطت الهتفونات بأذنهة وفعلا كعدت تراسل بالكروب ... الي دخلت بي بسمة ومها وخلتهن ينطنها وعد ان مينطون الرقم لغزوان وطلعا هنة ايدن هالشي ... ومها علاقتهة صارت قوية بميامين ...

حطت الهتفونات بإذنهة وكعدت تسمع تسجيلاتهن الصوتية ...
بسمة : اكول وين بنات عبدالله اليوم .. اشو ولا وحدة ..
ميامين كتبت : مادري والله وينهن .. حتى اليوم ما خابرتني خاتون ...

مها : اني اجيت ..

خاتون : واني هم ..

بسمة : وين جنتي انتي وياهة ... ليش محد منجن تجاوب ..
مها وتدور حجة : النت جان واكف ..

ميامين باوعت بطرف عينهة لرائد الي كلساع ويباوعلهة وحسان يضحك علي ...

سوت نفسهة ابتسمت بفرحة وحجت بحماس وفتحت التسجيل وكالت : مبروووك حياتي .. عالخطوبة .. شوكت حددتو تتزوجون ...

رائد كمز وكعد وهو يباوعلهة بإهتمام وطابك حواجبة ...
ميامين اخفت ابتسامتهة ودزت المقطع الصوتي ...

بسمة دزت بإستغراب : شبيج ميامين .. مصخنة شنو .. حبيبتي صارلي ٣ شهور من انخطبت ... وانتي باركتيلي بوقتهة ... شنو اكو احد انخطب غيري ..

ميامين ضحكت ودزتلهة : لا حبي محد انخطب بس ردت اباركلج مرة ثانية ...

خاتون دزت سمايل يضحك : خبال ..

مها : تتفطنين شنو ...

ميامين باوعت لرائد كاعد ويهز برجلة بعصبية وتوتر ...
سوت نفسهة دا تسجل بس هالمرة ما سجلت : خاتوونة اذا حددتو العقد كليلي ...

شافتة من سمع اسمهة وجهة انكلب احمر وشرايينة برزت بكصتة ... شمر الخدادية مال القنفة وكام بعصبية ...
باوعت لحسان شافتة يباوع لمكان اخوه وهو يتنهد بحزن لحال اخوه ...

كامت من يمة وابتسامتهة اختفت ...

راحت لغرفتهة ... يعني رائد يحب خاتون ...

بس خاتون متحبة ... يعني هي متحب احد ..

شلون راح اكدر اساعد رائد حتى يتزوج خاتون ...

اهتز تليفوني شفتهن اشعارات الكروب ..

بسمة : جذذذااابة .. شوكت صار هالشي .. وانتو شلون قبلتو ...

استغربت كلامهة ونزلت اقرة المحادثات الفوك ...

شفت مها كاتبة : اليوم بابا حجة وية غزوان وجبرة يخطب نورة بت عمتي
انصدمت وايدية صارت ترجف بغضب ...

غزوان يتزوج .. طول هالفترة يجذب ومسوي نفسة ميت علية ... اصلا ما استغرب منة هالشي ... اكبر نذل هو غزوان ... خل يتزوج ويخلصني من شرة ...

بس هسة المهم لازم اركز على رائد وخاتون ... وهو شيريد يسوي خل يسوي .. اصلا بعد ما يهمني ...

شمرت التليفون عالجرباية وصعدت للسطح ...

شفتة كاعد بمكانة ولازم بيدة السلسلة نفسهة ... هسة فهمت شنو حرف K ...

انتبهتلة حس بحركتي بسرعة عدل كعدتة وضم السلسلة بجيبة ...

كعدت بصفة وكلت : شبيك معصب ..

رائد : هيج ماكو شي ..

ميامين : اكيد ..

رائد بدرن نفس : ايه ..

ميامين وهي الفكرة تجول براسهة .. : اممم رائد ؟

رائد : نعم .

ميامين : هسة انت بما ان متكدر تتزوج الي تحبهة اكيد ما راح تبقى عازب صحيح ؟ يعني لازم تتزوج ..

رائد : ميامين سدي هالموضوع .. اني ماريد اتزوج ..

ميامين : ليش رائد فدوة ... زين بس اسمع مني .. واذا ما عجبك الكلام بكيفك بعد ...

رائد بملل : احجي بسرعة؟...

ميامين : شوف .. خاتون اخت فارس جانت مخطوبة لابن عمهة ... وبعدين هذا ابن عمهة طلع عندة سوالف مو زينة واهلهة فسخو الخطوبة ..

رائد بإهتمام : اييي .. ادري بهالشي ... واني الي كشفت ابن عمهة وكلت لفارس ..

ميامين بصدمة : اننت ...

رائد : اي اني .. شبيج مستغربة ... جان لازم احذرهم منة ..

ميامين بكذب : اي تمام ... بس هسة هذا ابن عمهة رجع يحاول يتقرب منهة وهي ما تريدة ..

رائد بعصبية : هالحيوان ما تاب شنو ....

ميامين : لا ما تاب ... رائد خل اطلب منك طلب ..

رائد : كولي ...

ميامين بترجي : الله يخليك اخطب خاتون ... والله متلكة مثلهة ...

رائد التفت عليهة بسرعة : شنوو .. ميامين انتي واعية للي جاي تحجينة ... انتي تردينة نرجع نتقرب من هالعيلة ...
ميامين : اي واعية واعرف شجاي احجي ... وبعدين شبيهة هالعيلة وماتريد تتقرب منهم .. يعني اني كتلك همة ما سوولي شي .. انت ليش تكرهم لهالدرجة ...

رائد : ميامين لا تحاولين تقنعيني ان غزوان ما ضربج لو احد منهم تعرضلج بشي ...

ميامين : رائد انسى كلشي وعوف الي فات ... المهم هسة خاتون ... الله يخليك وافق على هالشي ... والله خاتون تستاهل واحد مثلك ...

رائد وهو يكوم ويعوفهة: ميامين سدي الموضوع ولا تفتحينة مرة ثانية ..

ميامين تأففت وكالت بقهر ... شسوي هسة .. ماكدر اشوفة هيج واكعد ساكتة وماسوي شي ... لازم اتصرف بس شسوي ؟...

$$$$$$$

بالمستشفى ... مكتب غزوان ..

كاعد بالمكتب ويقرا مواعيد العمليات الي عندة بهذا الاسبوع ...

دخل علي مؤيد وكعد عالكرسي الي كبالة ...

مؤيد : غزوان كافي ما تعبت بس تشتغل ...

غزوان بدون ما يرفع عينة الة ويشتغل : اذا جاي اتكلي هالحجي ف مو وكتة .. واذا عندك شي كولة بسرعة وخليني اكمل شغلي ...

مؤيد : شراح تسوي بموضوع الزواج ..

غزوان على نفس وضعة : شراح اسوي يعني .. مضطر اوافق ...

مؤيد : وتكدر تنسى ميامين ...

غزوان رفع راسة لمؤيد وذب الاوراق وتنهد وجر حسرة من كلبة : شسوي اذا هي حتى ما تطيق تسمع صوتي ..

مؤيد : والله مالومهة على هالشي ... الي انت سويتة بيهة مو قليل ... بس هم نورة شنو ذنبهة اذا انت راح تتزوجهة وكلبك وية وحدة ثانية ...

غزوان بعصبية : لعد شتريدني اسوي .. ابوي فرض هالشي علية وماكدر ارفض .. واني بالنسبة الي الموت اهون من ان اتقرب من وحدة غيرهة ...

مؤيد : زين حاول تتصل بيهة وتحجي وياهة ...

غزوان : مؤيد اني شحجي ... اكلك ما تطيق حتى تسمع صوتي ... ومحذرة البنات وحلفتهن ان ما ينطني رقمهة ...
مؤيد : والله مادري شسوي بعد .. يعني اذا انت كلبك قافل على ميامين ..

غزوان رجع ضهرة عالكرسة ورفع حاجبة لمؤيد وكال : وانت بعدك تحبهة لو نسيتهة ..

مؤيد ابتسم وكال بصدق : صدكني شلتهة من كلبي وما اعتبرهة غير اخت الي من اللحضة الي عرفت بيهة تحب اخوي ... مستحيل افكر احبهة بعد وهي كلبهة يحب اخوي ...

غزوان تنهد وحط راسة عالمكتب : شلون كدرت تنساهة .. اطيني هالطريقة خل انسا اني هم ... كل ما جاي احاول اتهرب من ذكرياتة جاي تزيد بكلبي اكثر ...

قاطعة صوت التليفون ... رفعة وشاف المتصل ابوه ...
غزوان : الو .. ها يابة الله يساعدك ..

ابو غزوان : هلا غزوان .. شوف دكيت عليك حتى اكلك ان بيت عمتك رجعو خبر الموافقة على الزواج ... وردت اكلك ان بعد ٣ ايام نروح نخطب ونعقد عقد شيخ ..

غزوان طفر بسرعة : بهالسرررعة ... يابة شدعوة هالكد مستعجل ... همة يمتة عرفو بالموضوع ويمتة لحكو يرجعون خبر .. شنو ما صدكو ...

ابو غزوان بعصبية : غزووان ثمن حجيك ... وخير البر عاجله .. ادري بيك تريد تأخر السالفة حتى تلطشهة ... سد التليفون بوجه غزوان ...

غزوان يباوع للتليفون مصدوم ...

رفع عيونة لمؤيد وكال بصدمة : يريد يعقدلي بعد ٣ ايام ..
مؤيد : عاد هذا الوالد وتعرفة ...

غزوان شمر التليفون بعصبية عالطاولة ... وكعد وهو ينافخ بعصبية ...

////////

بيت حافظ (ابو احمد)

جانو بيت ابو حسنين موجودين يمهم عالعشا ...
بسمة كاعدة تسولف وية البنات ..

دخلت عليهة مرام وكالت : بسمة حسنين يريد يشوفج .. وينتضرج بغرفة الاستقبال ...
بلعت ريكي وكمت ... شيريد مني ...

رحت للأستقبال .. وكفت كدام المراية الي بالباب .. عدلت شعري وتأكدت من شكلي ...

فتحت الباب بهدوء ... دخلت وشفتة لازم تليفونة وكاعد عالقنفة ... تحمحمت وهو انتبهلي .. ذب التليفون وكاملي ...
حسنين بإبتسامة : بسمتي ...

سحبني من ايدي وقربني منة وطبع بوسة رقيقة على جبهتي ...

غمضت عيوني واحس كلبي راح يطلع من كثر ما يدك سريع ...

فتحت عيوني وحطيتهة بعيونة ... ايد لازم بيهة ايدي والايد الثانية يلعب بخصلات شعري وهو يكول بهدوء : شلونج ... شسويتي اليوم ... وين رحتي وين اجيتي ...

بسمة بإرتباك : تمام .. ما رحت لمكان .. بس بالبيت ...
حسنين بإبتسامة : شااطرة ..

قرب مني واصابعة على فكي برقة وقرب وجهي منة .. حط شفايفة على خدي يريد يبوسني ...

بس فجأة طفرنة اثنينة من سمعنة صوت شي انكسر ...

الكاتبة : سارة الشمري🖤

هلو حبايبي انشالله تكونون بخير ... طبعاً اريد توقعاتكم للبارت الجاي .. شتتوقعون راح يصير ..

💔💔

الكاتبة : سارة الشمري 🖤

مرحبا حبايبي ...

ادري ان البارتات قصيرة الي دا انزلهة ... بس والله ما الحك ..
بكل بارت جاي احلفلكم ان ماجاي الحك اكتب شي والله ... واني كلتلكم قبل خلوني اوقف القصة هسة واكملهة بعدين لان مشغولة .. بس انتو رفضتو هالشي .. وجاي احاول اكتب شكد ما اكدر وانزللكم بشكل يومي حتى متملون ... بس والله العضيم الرسائل الي دا تجيني عالخاص كلش تضوجني ..
واليوم اجتني وحدة خلتني كمت اطفر والله .. اتكلي شنو انتي شايفة نفسج علينة ومتنزلين بارتات طويلة .. عود هم تردين تصيرين كاتبة بيج خير براسنة .. وكامت تغلط علية وحجيهة ابد مو حلو ..

والنبي اجيت امسحهة للقصة كلهة وبعد ما اكتب .. لان كلش ضوجتني وصارت تغلط علية .. وطبعا اكو اكثر من وحدة هم اجو يحجون علية بالخاص بس هاي اكثر وحدة غلطت وتجاوزت علية ...

واني شكد احاول ارضيكم وابقى كاعدة بليل اكتب بارت حتلو زغير بس المهم انزللكم بارت وما اخليكم تنتضرون ... وتالي هيج ترد علية ...

وهسة عندي اقتراح الكم حتى ارضي الجميع ...

تردون التنزيل يكون بين يوم ويوم ويكون البارت طويل .. لو تردون التنزيل يكون يومي بس البارت مثل كل يوم ...
وهالمرة خليت القرار بيدكم وانتو قررو .. حتى بعد لحد تجي وتغلط علية ...

لان ماكدر اكعد ليل ونهار عالتليفون وبس اكتب .. اكيد عندي حياتي واشغالي ...

رأيكم حبايبي 🖤

#سجينة_الظلم_والانتقام 🍂🥀

#البارت الثالث والاربعون

الكاتبة : سارة الشمري🖤

أحبك جداً وأعرف أني أعيش بمنفى وأنتِ بمنفى وبيني وبينك ريحٌ وغيمٌ وبرقٌ ورعدٌ وثلجٌ ونـار وأعرف أن الوصول لعينيك وهمٌ وأعرف أن الوصول إليك انتحـار ويسعدني أن أمزق نفسي لأجلك أيتها الغالية ولو خيروني لكررت حبك للمرة الثانية

نزار قباني 🖤

قرب مني واصابعة على فكي برقة وقرب وجهي منة .. حط شفايفة على خدي يريد يبوسني ...

بس فجأة طفرنة اثنينة من سمعنة صوت شي انكسر ...
دعاء بشهكة طاح الكلاص من ايدهة وحجت بفهاوة : شدتسوي .. مو عيب عليك ..

درت وجهي عنهم وعضيت شفتي بخجل ... وجهي صار احمر من الفشلة ...

حسنين ضرب رجلة بعصبية بالكاع .. وكال بقهر : دعاااء .. شلون تدخلين بدون ما تدكين الباب .. وبعدين شنو العيب غير مرتي هي ..

دعاء بغباء : شلون مرتك .. منين اجتك ..
حسنين يتنهد بصبر : اني مو عقدت عليهة عقد شيخ .. يعني صارت مرتي شرعاً ..

دعاء ميلت راسهة وكالت : وقانوناً ؟؟؟
حسنين راحلهة بعصبية ولزمهة من ضهر بلوزتهة وطلعهة برة : انتي احد مسلطج علية .. امشي ولي من يمي ..
سد الباب والتفت علية شافني اضحك : اي ضحكي انتي مكيفة ..

هزيت اكتافي وكلت : بس فشلة .. هسة خاف تروح تكول لاحد ..

حسنين رجع قربني الة وكال : وخل تكول .. شمسوي اني .. مرتي وبكيفي .. وهسة خليني اشبع من عطرج ..
حضني لصدرة وحط خدة على شعري ...

حطيت راسي على صدرة واني اسمع دكات كلبة ...

غمضت عيوني واني اتنفس عطرة الرجالي .. حسيتة دخل لريتي ... مادري شكد مر واني بحضنة بس سمعت صوتة وهو يكول بهمس : بسمتي ..

حجيت واني مغمضة عيوني وما منتبهة : هممم ..
حسنين بإبتسامة : شنو نمتي ..

فتحت عيوني وانتبهت على نفسي .. وخرت بسرعة .. واني اعدل شعري بإحراج ..

حجيت بتوتر : اااء .. اسفة .. اني تأخرت عالبنات ..

ردت اروح بس سحبني من ايدي بسرعة وباسني بخدي .. شهكت وباوعتلة بصدمة .. ما توقعت هالحركة ...
فلتت ايدي منة وطلعت اركض واسمع صوت ضحكتة ...

رحت لغرفتي مباشرةً .. اباوع عالمراية وجهي احمر .. صرت اهفي على نفسي لان احس صخنت من الاحراج ...

عطرة صار بملابسي ... كلبي يدك سريع ... وحاطة ايدي على خدي ...

انفتح الباب ودخلت جوري ..

شافت وضعي وضحكت بقوة : وييين الي جانت اتكول ماريدة هاا ؟ ... احجي شسوالج ..
باوعت عليهة وبعدين كمت ..

حجيت بغرور : معليج هاي خصوصية ..

جوري فتحت عيونهة : شنو هاي ترة ميلوك عليج الغرور والله ...

عفتهة ونزلت جوة للبنات ...

€€€€€€€€

بعد مرور ٣ ايام ... يوم خطوبة غزوان ..

طبعاً كعد من الصبح وراح للمستشفى وولاعبالك اليوم خطوبتة ..

البيت مخبوص .. طبعا المخبوصة ام غزوان .. تفتر منا ومنا .. وتحضر الغراض حتى يرحون لبيت اهل نورة يخطبونهة ..

الحجية رغم ما قابلة بس شتسوي ..

مها وخاتون يساعدن امهن .. وهنة ما عاجبهن الوضع ابد ...
كل وحدة راحت لغرفتهة تجهز نفسهة حتى يرحن للخطوبة ..
مها لبست فستان اسود ضيك عالجسم وما حطت مكياج هواي لان هي اصلا حلوة بدون مكياج ..

وخاتون لبست جامب سوت كابوي ازرق وجواه بدي نص ردان لونة ابيض ولبست وياه شوز ابيض رياضي .. وهم نفس الشي ما حطت مكياج هواي .. لا اصلا الحفلةكلهة ما عاجبتهة وما داخلة مخهة ..

عالساعة ١١ دخل غزوان للبيت لانو ابوه كلة تجي من وقت ..
صعد الدرج وهو مالة خلك شي ... توجه لغرفتهة فتحها وتنهد من كلبة وهو يباوع عالغرفة ..

نزلت دمعة من عينة .. ااااااه الله يعلم شكد مشتاقلج .. مشتاق لصوتج .. مشتاق لعطرج ولكلشي بيج ... ميت بدونج ... روحي مو عندي ..

حط ايدة على كلبة وطلعت حسرة جبيرة من كلبة ... مسح دمعتة بسرعة وقفل الباب وتوجه لغرفتة ...

سبح عالسريع ولبس دشداشة لونهة نيلي .. اخذ المحفضة وطلع صورتهة باسهة ورجعهة لمكانهة ..

نزل وهو يحس بخنكة بصدرة .. ما يريد يروح بس رضاة ابوه مهمة .. مجبر ومو مخير ..
نزل ولكة ابوه واكف يم السيارة وهو ومؤيد وينتضرونة يطلع ..

ابو غزوان عصب من شافة : انت تريد تفشلني .. شني هالبهذال هذا ..

غزوان بقهر : هذا حالي .. تريدني اروح بي .. اذا ما تريدني هيج ف خليني بالبيت احسلي .. وانت تدري بية اريدهة من الله ..

ابو غزوان : ولك اليشوفك ايكول رايح لعزا مو رايح يخطب .. لحيتك مبهذلة وطولانة ولابس دشداشة نيلية ...
غزوان : هذا العندي اني ..

ابو غزوان استغفر ربة بقهر من غزوان .. سحب الجراوية الي على كتف مؤيد .. تقرب من غزوان ولفهة الة على راسة بطريقة خليجية وصار احلا ...

غزوان بقهر وعصبية : ماريد البس جراوية ..
ابو غزوان بعصبية وامر : غزوان شنهي هاي سوالف المزعطة .. امشي لسيارتك يلة ..

صعدو بسياراتهم وغزوان طابك حواجبة ومقهور ...
طلعت السيارات وجانت منتضرتهم سيارات بيت عمامهم وانطلقو سوة ..

الصمت جان مخيم على كل سيارة ..

بسمة كوة اجت لان ما تريد تحضر بس خاتون اصرت عليهة ان تحضر لان ما تريد وحدهة هناك ومالهة خلك لنورة ..
خاتون ومها جانت مطنكرات ما يردن نورة زوجة لاخوهن ...
مها كلساع تتأفف ...

التفت عليهة مؤيد وكال : شبيج تتأففين ومادة بوزج شبرين ...

مها بقهر : ياخي ماطيقهة .. ياريت ترجع ميامين ..
مؤيد : الي يشوفج مو ايكول انتي جنتي كارهتهة وما تطيقين تشوفينهة ...

مها بندم : شسوي والله ما جنت ادري .. يعني جنت مقهورة على اخوي ...

\\\\\\\\

وكفت السيارات اباب بيت ام نورة ...
استقبلوهم ودخلوا ... طبعا القهر جان مبين على وجوه الكل ..
استقبلت النسوان ام نورة ..

البنات سلمن عادي يعني ما يردن يبينن شي .. ما عدا بسمة سلمت من ورة خشمهة لان ما تكدر تضم قهرهة منهم ..
شافو نورة كاعدة بكامل اناقتهة وزينتهة ولابسة فستان اخضر ..

بسمة شهكت وهمست لمها : ايييع خزززي .. شني هاي شوفي فتحة الصدر تفضح اكثر مما تستر ...

مها ضربته بعكسة : اسكتي يمفضوحة لا يسمعنج صوتج شعلوة ...

بسمة بدون اهتمام كعدت عالقنفة ...
اجت خاتون كعدت يمهة بهدوء ...
طبعا ولا عبالك خطوبة ... الديجي مشتغل بس محد يركص غير زينة وزينب بنات خالة العروس ..

بسمة تباوع بملل عالكاعدات وكل وحدة تسولف وية الثانية ...

التفتت على خاتون وكالت بقهر : هسة لو ضالة بالبيت مو احسلي ... بس انتي حضرتج جبتيني بالغصب ... يعني تدرين بية ماطيقهة ...

خاتون بنفس القهر : لعد ترديني اجي هنا اكابل نورة واكعد ...
بسمة دارت وجهة عنهة .. شافت دعاء تحضر نفسهة تريد تكوم تركص ... باوعت عليهة بخزرة ...

دعاء باوعت على بسمة ببراءة وهي تهز راسهة بمعنى شكو ..
بسمة اشرتلهة براسهة بمعني اكعدي ...
دعاء بوزت وكعدت بمكانهة ..

خاتون ضحكت وكالت لبسمة : حرام عليج .. شوفيها اشلون انخلست ...

بسمة : خل تكعد لان مالي خلك هوسة اني ...

////////

عند الرجال ...

كاعد ويهز رجلة بتوتر وهو يسمع سوالفهم وضحكهم وفرحتهم ... كاعد بصفة مؤيد من جهة ومن الجهة الثانية حمزة ..

حمزة ضربة بعكسة وكال بهمس : اعدل خلقتك العالم تباوع عليك ...

غزوان بعصبية : خل يباوعون بلكي يفتهمون اني ماريدهة ...
حمزة : غزوان مو هيج .. ترة عيب بحق ابوك هيج تسوي ...
غزوان تنفس بعصبية وقهر وهو يسمع ابوه بدة يحجي وية ابوهة ويطلبهة منة ...

مؤيد انتبه لحمزة الي كل شوي يباوع عالباب ..
استغرب منة وكال : شبيك كلساع وماد راسك عالباب .. شنو منتضر احد ..

حمزة ابتسم : هسة نشوف انشالله خير ..
مؤيد عقد حواجبة وهو مو فاهم شي ..
غزوان الي ما مهتملهم وبالة مو يمهم ...

£££££££

بيت ابو رائد

لازمة تليفونهة وتفتر بالغرفة وخايفة من الي راح تسويه ... متوترة من الخطوة الي راح تخطيهة ...

لازم اتنازلة واطلب هالشي منة علمود رائد ...
اني لهسة ما اطيق اسمع صوتة ...

ميامين ماجانت تدري ان اليوم خطوبتة ...
رفعت تليفونهة واتصلت على رقمة الي اخذتة من مها وخلتهة توعدهة ان متكول لاحد ...

رن رنتين وبعدين فصلة هو ...
عصبت اكثر وضغطت على ايدهة ...

اهدي ميامين اهدي ... انتي راح تسوين هالشي علمود اخوج واذا وافق بعدهة خل شيريد يسوي خل يسوي يتزوج يتطلك يخطب معلية بي .. بما ان هوة هسة ما يريدني وراح يشوف حياتة ف اكيد ما راح يهتملي ومن اطلب هالشي منة ما راح يطلب ه
شي بالمقابل ... اكيد هو يريد يعيش حياتة .. واني اريد اشوف سعادة اخوي ...

ذبت التليفون وقررت تتصل ورة شوية لان هسة فصلة بوجهة ...

$$$$$$$

الخطوبة ...

كاعد على حالة ويسمع ابوه يطلب نورة الة .. ورجل عمتة فرحان وانطاه الموافقة ..

ابو غزوان : ما دام انتو موافقين والعروس موافقة .. ماكو داعي للتأجيل بعد ... نخلي هسة الشيخ يعقدلهم ..

ابو نورة : ابو غزوان البنية بتك والي تريدة اني حاضر بي .. وهسة اطيهم خبر يحضرون نفسهم حتى الشيخ يعقد ...
كام ابو نورة ودخل للبيت ..

غزوان فتح دكم الدشداشة من فوك بعصبية .. وصار يفرك بركبتة ويحس نفسة مخنوك .. صورتهة صارت تمر كبالة .. عيونهة .. شعرهة ... حركاتهة ..

مؤيد قرب منة وحجة بهمس وهو مسوي نفسة يبتسم : غزوان شبيك .. ترة الناس كلهة بدت تنتبه عليك ..

غزوان بعصبية : اسكت رحمة لاهلك .. ترة روحي ما طايقهة .. كوة متحمل اكعد .. على دقيقة هسة اكوم منا وما ارجع لو يجي مدري منو ..

دك تليفونة ورفعة ... شافة رقم غريب .. مالة خلك لاي احد لان بس يحجي وياه احد هسة يفرغ كل قهرة بي .. فصل الخط ورجع التليفون لجيبة

دخل ابو نورة وكال : شيخنا تفضل ..
الشيخ وكف واشر لغزوان ان يكوم وياه ...
غزوان جر نفس وكام وياه ...

وصلو وغزوان يمشي بقهر ويحس نفسة رايح للموت مو رايح يخطب ...

وصل للباب بس انضرب بشخص بقوة ..
رفع راسة وشافة واكف ويباوع علي بكل عصبية ..
طبك حواجبة غزوان وهو يشوف نضراتة الة ...

حط ايدة على صدر غزوان ورجعة لورى بخفة وصارو بنص الديوان ..

صاح بعلو صوتة : بت عمي ما اطيهة .. اني انهي علية واخذهة .. يعني هذا الزواج ما يصير ..

غزوان فتح عيونة على اركان الي واكف يحجي بكل حدة ..
ابو غزوان وكف بعصبية : شهالحجي هذا .. اركان انت مستوعب شتكول ..

اركان : عمي ابو غزوان اني احترمك واقدرك.. بس عمي ما اطانة خبر من انتو خطبتوهة وجان المفروض يسألنة بالاول ... وبت عمي ما اطيهة واني اريدهة .. اتمنى هالشي ما يزعلكم منا ...

الولد اجو وكفو يم غزوان ويباوعون بعصبية على اركان .. لان هاي تعتبر اهانة الهم من اجو وتعنو وتالي يرجعون بهالطريقة ويتفشلون ..

ابو نورة حجة بعصبية : محد منكم من قبل حجة بهالموضوع ليش هسة يلة حجيت ...

اركان : عمي لا تغشم روحك .. اني قبل سنة اجيت وكتلك .. بس انت كلت البنية بعدهة زغيرة ..

حمزة ضرب غزوان بعكسة وحجة بهمس : سنونك راح تطيح بحضنك .. ضمهن فشلتنة العالم تباوع عليك ..
غزوان انتبه لنفسة واخفة فرحتة .. تحمحم وكال بعصبية اصطنعهة : امشينة يابة .. بعد ما نبقى هنا .. هاي اهانة النة .. بعد ما ناخذ بتهم لو شيصير ..

ابو غزوان انطاه خزرة .. التفت على ابو نورة وكال بعصبية : اذا ابن عمهة جان رايدهة ليش تطينة الموافقة وتفشلنة كدام العالم .. مؤيد خابر الاهل  خل يطلعون .. مالنة ضلة هنا بعد ..

مؤيد طلع تليفونة وراح يخابر برة ..
طلع ابو غزوان من الديوان ووياه اخوانة وولد اخوانة والي جايين وياه ..

حمزة التفت على اركان وغمزلة .. اركان ابتسم وهز راسة بمعنى اوكي ..

طلعن النسوان وصعدن بالسيارات .. وطبعا البنات والحجية فرحتهن مو سايعتهن ..

سيارة مؤيد ... صاعد بالسيارة وينتضر خواتة يجن ..
انفتح باب الكدام وصعدت مها بالسيارة ..
بس سدت باب السيارة وعاطت بفرح : ييييييسسسس ...
مؤيد كمز بسرعة والتفت عليهة بصدمة ...

شافت الفرحة بعيونهة ومتحمسة ...
تحولت عيونة للعصبية ورفع ايدة وضربهة على راسهة حيل ..وحجة بعصبية وهو حاط ايدة على كلبة : الله ياااخذذج بجاه الحبيب محمد .. طيحتي كلبي ..

مها حطت ايدهة على راسهة وتفركة بألم : اااي .. شنو هاي ايد لو جاكوج .. شبيك شنو ما يصير افرح ..
مؤيد بعصبية : عليمن تفرحين واحنة راجعين متفشلين كدام العالم ..

مها رجعت ضهرهة براحة : والله خل نتفشل .. المهم نويرة ما تصير مرت اخوي ...
مؤيد ضحك عليهة وحرك سيارتة ...

سيارة غزوان .. كاعد يسوق وابوه كاعد بصفة ..
طبعا حالتة وحالة ابوه متناقضة جداً ..
هو جان فرحان بس ابوه جان معصب ..
يباوع للطريق ويضحك بدون سبب ..
كمز من حس بلسعة السبحة على ايدة ..
التفت على ابوه الي ضربة بسرعة ..
ابو غزوان بعصبية : عليمن مكشر ... مو ليكول هسة متفشل كدام العالم ...

غزوان التفت على ابوه : بوية انت تدري بية ماريد هذا العرس كلة .. بعد تدري بية ليش مكشر ..
ابو غزوان هز راسة وتنهد من حالة ابنة ..
غزوان وكف السيارة والتفت لابوه بسرعة ...
غزوان بترجي : يابة فدوة طالبك اني ...
ابو غزوان باوع علي مستغرب : احجي شبيك ..
غزوان : اريد تخطبلي ميامين ...

ابو غزوان هز راسة : ولك مو تدري بية جم مرة خابرت اخوهة .. وكل ما اكلة اريد اجيكم يكلي عمي ميامين رافضة هالشي .. وكتلة اريد اجيكم وية شيوخ ونعتذر منكم وكال ما يحتاج اعتذاركم واصل .. بعد شبيدي اسوي ولك ..
غزوان : فدوة بوية بس حاول هالمرة .. والله بعد ماكدر .. كلبي طاك عليهة ..

ابو غزوان : جا مادري بيك .. اعرف حالك زين ..
غزوان : يلة فدوة بوية دك هسة ..
ابو غزوان بعصبية : غزوان لا تصير خفيف .. هسة واصلة لخشمي ترة .. خليهة لجم يوم يلة ..
غزوان دار وجهة بفرح وشغل السيارة وكمل طريقة ..

بسيارة احمد اخو بسمة ..
كاعدة بسمة لورى وطلبت من اخوهة يشغل اغاني .. وكامت تصفك وتركص ..
جوري وهي تضحك عليهة : ولا عبالك نفسج من اجيتي ..
بسمة ما مهتمة وتهز بإيديهة وتركص ومندمجة ..

جوري ضربتة على كتفهة وكالت : اذا هيج تركصين ليش مساع فشلتي دعاء خطية وما خليتيهة تركص ..
بسمة : ياروحي دعدوعة .. لو ادري مخليتهة ذابة لحم .. والله تندمت لان ما ركصت اليوم ..

احمد : اريد افتهم شغلة .. اذا تزوجهة لو لا .. انتي شعليج بالموضوع .. ليش هالكد فرحانة ..
بسمة : لا عيني .. اني ماريد نورة .. اريد ميامين ترجع .. لان احبهة وماحب نورة ..

احمد : والله انتن يالبنات اذا كرهتن بنية تطينن عيشتهة ..
بسمة بعصبية : الي يسمعك ايكول اني الخربت خطوبتهة .. شمسويتلهة حتى اطين عيشتهة ...

€€€€€€

ميامين كاعدة بالصالة وتليفونهة بيدهة وتهز برجلهة ..
التفتت شافت ان خالد اجة كعد يمهة ..

(للمعلومة.. اهل خالد رجعو انتقلو من اربيل للكوت لأسباب هواي واهمها من صارت الحادثة وانحبس رائد .. ام خالد حبت تكون يم اختهة وقريبة منهة .. وصار بيتهم يبعد تقريباً شارعين عن بيت ام رائد .. )

خالد وهو يكعد بصف ميامين : اموني شبيج متوترة ..
ميامين بإرتباك : ولا شي ..
خالد : مو علية هالحجي .. شوفي التليفون راح ينكسر بيدج من كثر ما راصة علي ..

ميامين كامت عنة لان ماتكدر تضم اكثر ..
دخلت غرفتهة شافت الساعة ٩ بليل ...
اكيد هسة رجع للبيت ...
رفعت تليفونهة واتصلت على رقمة ...

//////////

بيت غزوان ..
رجع من المستشفى بعد يوم طويل ..
مباشرة صعد وتوجه لغرفتهة وشمر نفسة على جربايتهة بتعب ..

حط راسة على مخدتهة وغمض عيونة وهو يتنهد بتعب ويشم ريحتهة بالمخدة الي تعود كل يوم ما ينام الا بغرفتهة ويشم ريحتهة  ...

فتح عيونة وقاطع راحتة صوت تليفونة الي دك ...
رفعة وشافة رقم غريب ونفسة الي اتصل علي مساع ...
تأفف لان مالة خلك لاحد هسة ... بس خاف شي مهم ..
رد عالاتصال : الو ؟...
ماكو رد ..

عصب وكال : الووو ...
ميامين بتردد : الوو غزوان ..
غزوان بثانية وحدة كمز وصار واكف بالكاع على طولة ...

الكاتبة : سارة الشمري🖤

حبايبي والله مادري شلون اشكركم على الكلام الحلو مالتكم .. واسفة لان التعليقات هواي ومجاي ارد عليكم بس والله من شفت كلامكم الحلو كعدت اكتب بالبارت وحاولت اطولة علمودكم .. بس لان كلامكم شجعني حبايبي 😘
#سجينة_الظلم_والانتقام 🍂🥀

#البارت الرابع والاربعون

الكاتبة : سارة الشمري🖤

الحب جحيم يطاق . . والحياة بدون حب نعيم لا يطُاق.

رد عالاتصال : الو ؟...

ماكو رد ..

عصب وكال : الووو ...

ميامين بتردد : الوو غزوان ..

غزوان بثانية وحدة كمز وصار واكف بالكاع على طولة ...
حط ايدة على كلبة وهو مو مصدك ...

كال وصوتة يرجف ويريد يتأكد : ميامين ؟...

ميامين كلبهة ارتجف من سمعت اسمهة منة .. حاولت تقوي نفسهة وكالت بجمود : اي ميامين ..

غزوان بعتاب : ااااخ ياقوة كلبج .. هالكد حارمتني من صوتج ...

ميامين بلعت ريكها : غزوان مو وكت هالحجي هسة .. ما اتصلت عليك حتى اسمع هالحجي ..

غزوان بعصبية : شتردين احجي لعد .. مو كافي انتي ما تردين تحجين وياي وحارمتني من صوتج واني كلبي ميت عليج ...

ميامين بقهر : بعدك انت نفسك ما تغيرت .. بس تصيح ومعصب علية ..

غزوان انتبه لنفسة وضرب راسة اكثر من مرة ..

جحة بصوت مشتاك ومتلهف : ميامي يروحي انتي .. والله شوكي الج عامي على عيوني .. بدونج ماجاي اكدر اتنفس .. ليش هيج تسوين بية .. والله احس روحي ما عايش بهالدنيا وانتي بعيدة عني ..

ميامين بسخرية : هه واكبر دليل تريد تروح تخطب ..

غزوان بسرعة : ميامين الموضوع مو هيج والله .. بس اطيني مجال افهمج ..

ميامين تذكرت هاي الكلمات هي كالتهن الة ...

قاطعتة بسرعة وكالت : ماااارييد اسمع منك شي ... معلية بهالموضوع .. اني دكيت حتى احجي وياي بشي ثاني واطلب منك شي ..

غزوان بسرعة : امريني .. انتي بس اطلبي ...

ميامين حجت الطلب بدون مقدمات : اخوي رائد اذا طلب ايد خاتون .. انت توافق ..

غزوان اختفت ابتسامتة وهو يسمع كلامهة ... : ما فهمت ..

ميامين تنهدت : شنو الي ما فهمتة .. اخوي رائد يريد يخطب اختك خاتون .. توافق لو لا ..

غزوان وكف بعصبية : طبعا لا .. مستحييل اسوي هالشي ...
ميامين بصدمة : وليييش مستحيل .. شنو الي يخليك ترفض ..

غزوان بعصبية : ماجاي استوعب شلون تكدرين تسوي هالشي بخاتون ...

ميامين بعدم فهم : شمممسسسوووية ...

غزوان بعصبية : شلون شمسوية .. اخوج يريد يخطب خاتون حتى يعذبهة وينتقم مني مثل ما اني سويت بيج .. وانتي تساعدينة بهالموضوع ...
....

ميامين فتحت حلكه بصدمة من تفكيرة ...

تحولت للعصبية وحجت بكل قهر وحقد : غززوووان .. وربي كل يوم جاي تخليني اكرهك اكثر .. ليش تتوقع العالم كلهة مثل حقارتك وتفكيرك الخبيث .. شلون تتوقع مني اسوي هالشي بخاتون وانت تعرف خاتون شنو بالنسبة الي وشنو الي هي سوتة علمودي ... شلون كدرت تفكر بهالطريقة ..

غزوان وهو يمسح وجهة : لعد شنو سبب طلبج الهة لاخوج رائد .. وعفتي كل البنات واجيتي على اختي ...

ميامين بعصبية : لان رائد من زمان جان رايدهة حتى قبل لا يتوفى فارس .. وهو طلبهة من عندة ... وفارس وافق وكالة اني راح احجي وية اهلي وامهدلك الموضوع .. بس ما لحك يحجي بالموضوع وصار الحادث .. وهسة هو بعدة يريد يخطبهة .. والله يشهد علية ان هو ماكالي شي وحتى ما يدري ان اني اعرف بالموضوع .. بس عرفت بالصدفة بهالشي من سمعتة يحجي هالسالفة لحسان .. وكال ماكدر اخطبهة لان اخاف ما يقبلون وميامين ما تقبل .. واني ماكدر اشوف اخوي هيج يفكر ..

غزوان سحب نفس وكال بغيرة : يعني هسة انتي ما اتصلتي بس علمود رائد .. تنازلتي علمودة .. يعني مستعدة تسوين الشي الي متريدينة بس علمود رائد ...

ميامين بهدوء : اني سويت هالشي من قبل .. وضحيت علمود رائد .. ومستعدة اضحي بأي وقت علمودة ..

غزوان : مادام هذا كلامج .. اني ممكن اوافق بس بشرط ..

ميامين عقدت حواجبهة وبلعت ريكهة : شنو هالشرط ..

غزوان : اذا تردين اوافق على زواج خاتون برائد .. لازم انتي توافقين ترجعين لحضني ..

ميامين صارت تتنفس بسرعة من العصبية وحجت وهي راصة على سنونهة : لووو تمووت ما ارجعلك ..

سدت التليفون بوجهة وهي كلهة قهر وعصبية ..
شمرت تليفونهة عالجرباية بعصبية ..

كعدت بالكاع ودموعهة صارت تنزل .. تحس بالذنب يجتاحهة .. يعني بسببهة اخوهة ماراح يحصل الي يحبهة ...
اااااه غزوان يالنذل .. عمرك ما راح تتغير .. اكرررهك .. شوكت ارتاح منك .. يريدني ارجعلة وهو يريد يتزوج مرة ثانية .. عبالة راح نأذي خاتون مثل ما هو اذاني .. عبالة كل الناس مثل تفكيرة .. يريد يرجع يأسرني عندة بس حتى يضمن سلامة خاتون .. ماريدة .. ماريد ارجعلة .. اكرررهة ..

طلعت من الغرفة اريد اصعد للسطح لان احس اختنكت طلعت وصار بوجهي خالد ..

شافني عيوني حمر .. عقد حواجبة وكال : اموني شبيج تبجين ..

ما تحملت ورحت حضنتة وصرت ابجي ..

خالد مصدوم .. حضني وهو يحجي بخوف : اموني شبيج .. منو مزعلج .. ليش هيج تبجين .. احجيلي ..

وخرت عنة واني امسح بدموعي : مابية شي .. بس حسيت ان اختنكت واريد ابجي ..

خالد وهو يمسح بدموعي : ليش مو حرام عليج .. هالعيون الحلوة يبجن .. حتى الله ما يرضاهة ..

ابتسمت على كلامة وكتلة : انت ما تتوب ..

خالد وهو يريد يغير مزاجي : شسوي ماكدر مااغازل عيونج .. ويلة روحي غسلي وجهج وانزلي اكعدي يمنة ..

هزيت راسي .. وعفتة ودخلت لغرفتي رحت للحمام غسلت وجهي وكلام غزوان يتردد بأذني ( اذا تردين اوافق على زواج خاتون برائد .. لازم انتي توافقين ترجعين لحضني) ..

الله ياخذني ويخلصني منك ومن هالحياة ...

باوعت لوجهي بالمراية .. شوية رجعت الروح بية .. سمنت شوية .. يعني اكيد مو مثل قبل بس احسن من لما اجيت .. حجيت بسخرية : هي بس الكعدة يمك تجيب المرض والحزن ..

طلعت من الحمام ونزلت كعدت يمهم ..

خالد اشرلي براسة بمعني انتي بخير .. اشرتلة باي ..

اباوع على رائد كاعد وصافن والهم مبين بوجهة ..

نزلت راسي بحزن .. 

>>>>>>>>>>>

بيت غزوان ..

كاعد بالبلكونة وحاس ان الروح ردتلة من سمع صوتهة .. حس بإشتياقة يزداد الهة ..

جان متأكد ان رائد مستحيل يسوي هيج شي او حتى يفكر ان ينتقم من خاتون ..

اول شي لان يدري بميامين تحب خاتون وهي لحد الان تتواصل وياهة ..

وثاني شي والاهم ان خاتون تكون اخت فارس وهو هستوة يلة عرف رائد شكد يحب فارس والدليل ان كل فترة يخابرة حارس المقبرة ويكلة عن شخص يجي يزور قبر فارس كل اسبوع او اسبوعين وهو عرف ان هو رائد عن طريق مواصفاتة ..

وهالشي اكدلة ان رائد مستحيل يفكر ان يأذي خاتون ..

بس هو حجة هالشي من سمع ميامين كالت مستعدة اضحي علمود رائد .. يعني اكو امل ان ترجعلة وتكون عندة الفرصة ان ينسيهة الي عيشة الهة من عذاب ..

بكد ما متأكد من حبج لرائد متأكد ان راح توافقين ترجعين الي ..

رفع صورتهة الي جان لازمهة بيدة وباسهة ونزلهة وهو يتأمل بوجهة .. تنهد بتعب واشتياق ..

&&&&&&&

بيت ابو غزوان ..

كاعد بالحديقة مؤيد وحمزة وابو غزوان .. فارشين مدات وحاطين مخاد مال ديوان ..

مؤيد : بوية يعني ناوي ترجع تخطب ميامين من اخوهة مرة ثانية ..

ابو غزوان : اي .. ما تشوف اخوك شلون نايم على عينة .. اجرب واشوف بلكي يوافقون .. واني ادري بأبني يروح مني اذا ما اخذ ليحبهة ..

حمزة بإستغراب : عمي لعد اذا تدري بي يروح منك ليش رحت خطبتلة وحدة ثانية ..

ابو غزوان بقلة حيلة : كلت بلكت الله وتملي علي كلبة وينسا ميامين ..

مؤيد : بوية انت مجرب العشك شني وشايف لوعتة .. وانت هم بالكوة يلة حصلت على امي .. يعني بوكتهة ليش ما فكرت تتزوج وحدة ثانية حتى تاخذ مكان امي بكلبك ..

ابو غزوان بسرعة : شنهي تاخذ مكانهة جا هي لعبة ..

حمزة بضحكة : جا عمي بعد شلك بيهة وتريد تزوج الولد وانت تكول جا هي لعبة .. يعني تدري بيهة مو هينة علي ..

ابو غزوان وهو يكوم : انة اروح انام احسلي .. انتم طلعتوني هلكدوتني .. عود باجر يصير خير .. يلة تصبحون على خير ..

حمزة ومؤيد وكفو : وانت من اهل الخير ..

مؤيد يباوع على ابوه .. خلاه دخل للبيت .. كعد وسحب حمزة وكعدة وياه بسرعة ..

حمزة كمز : سمالله شجاك ...

مؤيد بحماس : عوفك مني هسة وكول شلون كدرت تقنع اركان ...

حمزة وهو يرفع اكتافة بغرور : بعد السالفة وبيد ابو اسد .. يعني ما تعدي اذا مو محلولة ...

مؤيد بملل : هسة غير يفضهة ويحجي ...

حمزة : والله تريد الصدك .. الولد تفهم الموضوع بسرعة ... وكال عمي شو ما اطانة خبر ويدري بية اريدهة .. وبعدين كال عوف السالفة علية اني احلهة ..

مؤيد بنص عين : وهي هاي ونفخت روحك وابو اسد ومدري شني .. شمسوي بلة بس حجيت السالفة للولد .. اني كلت على هاي النفخة مالتك ايجوز حاط السلاح براس الولد ومهددة يجي ينهى على بت عمة ..

حمزة : لا خوية انة زلمة مسالم .. مو مال عرايك .. العرايك خليناهة لاخوك ..

مؤيد بضحك : اسكت لا يسمعك والله هسة صدك يكلبهة عركة علينة ..

حمزة يتصنع العصبية وحجة بشجاعة : وينة دخل يجي حتى امدة بالكاع مد ..

قاطعة دكة تليفونة .. جاوب وتحول صوتة من العصبية لصوت ذايب .. : هلا يبعد رويحتي..

مؤيد ضحك على حمزة الي بس سمع صوت مروة تغير مودة ...

حمزة وهو يرجع راسة عالمخدة مال الكعدة : امريني يروحي .. مو تدللين .. جا اجم مروة عندي ..

حمزة يأشر على مؤيد ويكول : يبعد هلي وناسي وربعي كلهة ...

مؤيد فتح عيونة على حمزة .. رفع ايدة وغمة وهو ايكول : هي هاي الخوة .. زلم اخر وكت ..

كام من يمة وعافة يخابر ومشى ...

/////////////

ثاني يوم  ... بيت غزوان ..

كعد الصبح بنشاط .. بدل ملابسة وتوجه للمستشفى وهو يدور على خطة تخلي ميامين ترجعلة ...

دخل للمستشفى وتوجه لمكتبة ..

خلص شغلة وية المراجعين وكعد يفكر بيهة ..

طلع تليفونة ودخل على رقمهة الي سجلة (دنيتي)

كتبلهة رسالة وهو على شفايفة ابتسامة ..

( صباح العافية.. ما غيرتي رأيج )

ما ردت علي .. ابتسم لان جان متوقع ان مترد اكيد ..

كعد يشرب الكهوة مالتة وهو يفكر بخطة لازم ينفذهة .. بس يحتاج لوحدة من خواتة تساعدة واكيد خاتون مستحيل تساعدة وماكو غير مها ..

طلع تليفونة واتصل على رقمهة ..

اجاه صوتهة النعسان : الو غزوان ..

غزوان : كومي صحصحي الساعة ب١١ ..

مها : يعني شتريد مني حتى اكعد ...

غزوان : عندي خطة لازم اسويهة واحتاج مساعدتج  ..

مها بإستغراب : خطة لشنو ..

غزوان بهدوء : خطة تخليني ارجع ميامين الي ..

مها : غزوان اني ماكدر اسوي شي لان وعدتهة ان ما انطيك رقمهة ..

غزوان : ما يحتاج رقمهة لان هي بنفسهة دكت علية ...

مها : لعد شنو الي تريدة مني بالضبط ..

غزوان : ........

£££££££

بيت ابو رائد ...

كاعدة بالصالة وتتفرج عالتلفزيون وتفكيرهة ابد مو وية التلفزيون ...

قاطع تفكيرهة صوت المسج .. شافت رقمة .. قرت المسج ( صباح العافية .. ماغيرتي رأيج ) رصت على سنونهة .. اني شورطني وخلاني اتصل عليك ...

ورة شوية هم رجع اجاهة مسج .. عصبت وعبالهة هو الي دزلهة...

رفعت تليفونهة شافت الرسالة من مها ..

مها: صباحو .. عندج الج خبر بمليون ..

ميامين : صباحو .. شنو هالخبر ..

مها : هنة خبرين مو واحد .. خطوبة غزوان التغت البارحة ... وخاتون انخطبت ..

ميامين وكفت بصدمة .. انخطبت .. معقولة غزوان كاللهم ..
ميامين : انخطبت لمنو ..

مها : عمران ابن عمي .. رجع خطبهة مرة ثانية واهلي يمكن راح يوافقون ..

ميامين : شلون يوافقون وهمة يدرون بسوالفة ..

مها : لا ولج غير ايكولون تاب من هاي السوالف .. وهسة رجع مرة ثانية طلب السماح من ابوي وخطب خاتون مرة ثانية ..

مياميت ذبت تليفونهة وصارت تتنفس بسرعة وعصبية .. شلون هيج .. خاتون ميصير تتزوج ... رائد اذا عرف اكيد كلبة راح ينكسر ..

شلون ماكدرت اسوي شي لاخوي ..

كلة بسببك غزوان .. انت السبب بكلشي مو زين جاي يصيرلي ..

دخل رائد الي هستوة جاي من المجمع لان وقت غدا ..
شافني افتر هيج ومتوترة .. عقد حواجبة وكال : اموني بيج شي ..

ميامين التفتت علي بسرعة وكالت : ها .. لا ماكو شي ..
رائد : لعد شبيج معصبة وتفترين منا ومنا ..

ميامين ماتكدر تخفي توترهة .. كعدت وصارت تهز برجلهة ...

رائد كعد بصفهة ..: اموني احجي شبيج ..

ميامين خافت يكشفهة .. ما حجت شي ..

رائد سحب التليفون مالتهة ..

ميامين بسرعة سحبتة منة بخوف وكالت وهي بس تريد تغير موضوع خاتون : معصبة لان غزوان راح يخطب ..

رائد استغرب حركتهة وجوابهة .. رفع حاجبة بشك وكال : وانتي شعليج بغزوان ...وليش خايفة من التليفون ..

ميامين هزت راسهة ب لا بدون ما تحجي شي ..

رائد وعبالك حس بالموضوع .. سحب التليفون من ايدهة وفتحة .. جانت قافلتة وهو عالمحادثة ..

رائد قرة المحادثة وايدة صارت ترجف ..

ضغط عالتليفون بيدة .. صار يفرك وجهة بقهر وهو يقرة بالكلام ..

وكف على حيلة وشمر التليفون بحضن ميامين الي جانت خايفة من ردة فعلة ...

عافهة وطلع من الصالة .. راحت وراه شافتة دخل لغرفتة وسد الباب بقوة ..

شوية وسمعت صيحتة بعصبية وكمزت من سمعت صوت شي انكسر بالغرفة ...

دكت الباب بكل خوف : رائد افتح الباب .. الله يخليك لا تسوي شي ..

رائد بعصبية من ورة الباب : ميامين روحي منا ..

بقت تدك بالباب بس هو معند ما يفتحة ..

فقدت الامل ان يفتحلهة الباب .. راحت لغرفتهة وكعدت تبجي .. كلة بسببي .. كلشي جاي يصير من وراي اني .. اني الي وصلتة لهاي الحالة ..

شلون اكدر اخلي يحصل على خاتون وهي راحت من ايدة ...

&&&&&&

الساعة 12:30 رجع غزوان للبيت ..

دخل للمطبخ شاف خاتون ومها يصبن بالغدا ..

مها ابتسمت من شافتة اجة عليهم لان تعود اصلا ما يرجع للبيت غير لليل ويخلص النهار كلة شغل ..

مها : هلا غزوان .. روح اكعد صبينا الغدا ..
غزوان : هلا بمهاوي ..

التفت على خاتون الي مدنكة وترتب بالخيار بالمواعين وحتى ما التفتتلة ..

راح وكف بصفهة واخذ قطعة خيار من الماعون واكلهة وهو يباوع عليهة ...

حجة بإبتسامة : وانتي يعروسة مراح تسلمين علية ..

التفتت علي ورفعت حاجبهة من كال يعروسة ..

رجعت دنكت راسهة وكالت ببرود : هلا بيك ..

غزوان تعود على هذا اسلوبهة من يوم ما راحت ميامين لليوم .. يعني الله عاقبة بميامين وبأختة ..

خاتون اخذت المواعين وحطتهن بصينية واخذتهن للصالة ..
مها بسرعة التفت على غزوان وتقربت منة : غزوان شنو هالحجي هذا الي خليتني اكولة لميامين .. لا تكلي هالشي صحيح .. وبعدين شنو عروسة .. شوف ترة خاتون مستحيل ترجع تقبل بعمران مرة ثانية .. واصلا انت جنت ما تريدة .. ليش هسة دا تسوي هيج ..

غزوان بأبتسامة : من يجي الوقت المناسب راح تعرفين كلشي .. يلة اروح اتغدى .. وخري لا تعطليني ..

مها وكفت وهي تباوع لاخوهة بقلة حيلة وما تدري على شنو هو ناوي ..

&&&&&&&&

الساعة تقريبا صارت ٩ بليل ..

رائد لحد الان ما طلع من غرفتة ...

ميامين كل شوي تروح تدك الباب علي بس هو ما يقبل يفتح ..

كاعدة بغرفتهة على جربايتهة وبالهة يم اخوهة .. يربي دخيلك ساعدني .. شلون راح اكدر اطلعة من هالشي الي هو عايشة .. يعني ٥ سنوات هو يحبهة وينتضرهة وتالي تنخطب لشخص ثاني ..

&&&&&&&

شط العرب /

غزوان كاعد بسيارتة ورابط تليفونة عالمسجل ..

مشغل اغنية لياس خضر (اه ياليل )ويغني وياهة وهو مرجع راسة عالكشن ..

ورافع صورتهة ويباوع عليهة .. نزلت دمعة من عينة .. الشوك موتني الج .. ما ضل بكلبي حيل على فراكج ..

جا يغني وية الاغنية ويحس كلماتهة تنطبق علي ..

اه يا ليل ... يمتة الراح .. يحن ويعاود لحبة ..
خلاني ... ومشة ياليل .. غربة بديرة الغربة ..
جا شنهو اليصبر الروح ... غير الـ ااه والونة ..
مغرب والطريق بعيد ... ما لحگت اودعنة ..
تاليت الـ...العمر يا حيف .. ضعنة وكلمن بدربة ..

صفناتك حزن ياليل .. وانا يهملن دموعي ..
انت تون على النجمات .. وانا احبابي عافوني ..
ما ابطل دموع العين .. وابقى مساهر ايامي ..
وخل يبقى العزيز بعيد .. بس نعيش بأحلامة ..
سلملي .. علي ياليل .. وكلة احبيبك بغربة ..

قاطعة توقف الاغنية بسبب صوت تليفونة الي يرن ..

كعد على حيلة وهو يشوف رقمهة ...

رد بكل لهفة : ميامي ...

&&&&&&&

بيت ابو رائد ...

ميامين .. هاي المرة الخامسة تروح تدك الباب علي بس هو ما يقبل يفتح ..

دكت الباب : رائد افتح الباب الله يخليك ..

هالمرة ماكو رد ..

دكت الباب اقوى من قبل : راااائد احجي وياك ..

ما رد عليهة ..

خافت وكلبهة صار يدك سريع ..

نزلت الدرج تركض ووصلت للصالة وجان موجود خالد وحسان وامهة ...

حجت بخوف وهي تلهث : الحكو لرائد .. قافل باب غرفتة من الصبح لهسة وادك علي الباب ميفتحة .. وهسة ميرد علية ..

حسان وكف بسرعة : شلون يعني .. ليش قفل الباب ..

ميامين : حسان مو وقت الحجي هسة .. يلة بسرعة روح حاول تفتح الباب ..

صعدو بسرعة وام رائد خايفة على ابنهة ..

حسان حاول يكسر الباب بس ماكدر ..

خالد جان جسمة وبنيتة اقوى من حسان ...

دفع حسان وضرب الباب بكتفة اكثر من مرة ..

بالضربة الخامسة انكسر الباب ..

الكاتبة : سارة الشمري

هلو حبايبي 😘 رأيكم بالبارت .. صدكوني تعليقاتكم تجنن والله ماعرف شنو ارد 😍 الله يخليكم يارب ويحفضكم 😘😘

توقعاتكم للبارت الجاي شنوو ؟؟