رواية سجينة،الظلم والانتقام الفصل السادس 6 - بقلم Renad.m

#سجينة_الظلم_والانتقام 🍂🥀

#البارت السادس عشر

#الكاتبة : سارة الشمري 🖤

تبدو الأخطاء كبيرة عندما يكون الحب صغيرا.
مثل إيطالي

رحت تمددت عالقنفة ونمت
مادري ليش كل ما اتمدد على هاي القنفة اغفى منتبهين لهالشي

كعدني صوتة : ميامين ....

يا ناس فهموني شغلة وحدة ... اني مو اول مرة اسمع اسمي لا ... دوم اسمعة من الناس من ينادوني بي ... زين ليش من اسمعة يطلع من بين شفايفة احس اول مرة اسمعة ... اول مرة احس بأسمي هيج حلو ... كلولي انتو هم هيج من تسمعون اسمكم من الشخص الي تحبوه هيج يصير لو بس اني

فتحت عيوني وشفتة واكف وبيدة علبة الاسعافات
كعدت على حيلي
ردت اكوم ... قاطعني بهدوء وهو يكعد على نفس القنفة: اكعدي خل اعقملج الحرك
ميامين : ماريد ... خاتون عقمتة
غزوان : اكعدي خلي اعقمة .. وبلا حجي زايد
تأففت وكعدت ...
اخذ ايدي ورفع الردان وفتح الشاش
شال مثل المعقم سائل وحطة بالقطن
سحبت ايدي بسرعة : شنو هذا ... لا تكول تعقيم والله ما احطة
غزوان وهو يسحب ايدي بهدوء : مو تعقيم هذا غسول للحروق .. يعني ميأذي
سحبت ايدي اقوى : وانت شمدريك ميأذي ... ماريدة
غزوان : الصبر يا ايوب ... مو انتي التعلميني شنو التعقيم وشنو الغسول
سحب ايدي اقوى وصار يطبطب عليها بالقطنة
ما اذتني ... جاب عصارة وصار يدهن على ايدي وينفخ بهدوء ...
كلبي صار يدك بسرعة واني احس بهوى انفاسة على ايدي ... صفنت بوجهة وهو عاقد حواجبة وملتهي بأيدي يمكن دائما هو عاقد حواجبة ...
مادري وين وصل بأيدي .. مجرد تهت بوجهة

رفع راسة واجت عيونة بعيوني .. رحت ابحر عيونة
... اي بحر ازرك ورموشة طوال وكثيفة ... عيونة ازرك طوخ مجرد النضر بيهن تحس ان بعد متكدر تشيل عينك عنهن

قربت منة واني عيوني بعدهن بعيونة
للحضة نسيت كولشي .. نسيت شنو ممكن يصير اذا تقربت ...
حسيت خشمي لامس خشمة ... غمضت عيوني وباللحضة الي ردت اقرب اكثر
صرخت : اااااه
غزوان وهو يغرز اصابعة بمكان الحرق وعيونة صايرات حمر من العصبية : شعبالج ... من تتقربين مني راح اضعف كدامج ...
ميامين واني اغمض عيوني من قوة الالم : ااااه فدوة والله مو قصدي
غزوان وهو يسحبني من شعري ويقربني منة : اسلوب الاغراء شيلي من بالج ... مو اني اليتمشى علية هذا الاسلوب

ضربني راشدي حسيت خدي اشتعل نار : حدودج وياي اني الاحددهة مو انتي ... سممعتي

هزيت راسي ودموعي تطيح
دفعني من شعري بالكاع وراح

رجعت ضهري عالقنفة ولميت رجلية لصدري وبجيت ...: غبية .. غبية .. غبية .. هيج احسلج ميامين...
كمت من مكاني ولفيت ايدي شلون ما جان

رحت لغرفتي كعدت عالجرباية ...
رجعت راسي عالتاج مالت الجرباية ... طاحت دموعي
مديت ايدي ولزمت الكلادة الي برگبتي .. جان خاتم بس لابستة بكلادة
ميامين ابتسمت واني اتذكر هالخاتم

قبل سنة : يوم ميلاد ميامين

جنت نايمة .. فزيت على صوت شهد وهي تكعد بية بأزعاج : اااافففف شهد اطلعي برة خل انام

شهد : كومي انتي نايمة والدنيا مكلوبة برة
طبعا هاي الجملة تخلي كل شخص عسى ما بسابع حلم يفز من نومة
طفرت : ليش شكو برة .. شصاير
شهد وهي تطلع : كومي وانتي تعرفين ... يلة بسرعة تعالي
طلعت وسدت الباب
اني من العجلة .. لبست بس الشبشب ونزلت بالبجامة مالت النوم

البيت هدوووء ... لعد وين راحو
سمعوت صوت حمحمة وراي : احححمم

طفرت من مكاني ورحت حضنتة : خــاااااااالـــد

خالد : على كيفج لا اطيح ... صايرة شسمنج
ميامين دفتعتة :هي هاي الي اجيت بيها .. وخر
خالد : لا مو هاي الي اجيت بيها ... هسة اشوفج بيمن اجيت
حط ايديه على عيوني ...
حطيت ايدية على ايديه : وييين ماخذني خالد ... شيل ايدك ..ترة مستحيل امشي وياك واني مغمضة ماعندي ثقة شنو ممكن تسوي بية

: واني هم ما عندج ثقة بية

ابتسمت من سمعت صوتة : انت اثق بيك اكثر من نفسي
رائد ابتسم : تعالي لعد

مديت ايدية بالهوى لان خالد لهسة مغطي عيوني بيدة
ايدي لزمت ايدية ومشاني وياه
خالد : اييييه بدة الفرق ... اني ما عندج ثقة بية بس رائد مديتي ايديج كبل
ميامين : اكيد ... انت دوم تسوي بية مقالب ... لهالسبب ما عندي ثقة بيك

دخلت لمكان بارد شوي
رائد بهدوء : جاهزة ؟؟
ابتسمت واني ما اعرف شكو : اي جاهزة
شال ايدة خالد عن عيوني
فتحت واني اشوف الكل كاعد كدامي
ماما .. خالتي ام زياد ... خالتي ام خالد ... وورود وزينب وشهد وزياد وحسان ..
والغرفة مزينة بالنفاخات والشرايط والنشرات
وميز بالنص علي كيكة وعصاير
ما انتبهت للباقي
رحت سلمت على خالاتي
التفتت على رائد : يعني كل سنة لازم تسوون بية نفس المقلب وجملتكم الي دوم انساها انتي نايمة والدنيا مكلوبة جوة
رائد وهو يحضني : لعد شلون نخليهة مفاجأة ..
خالد وهو يحضني من الجهة الثانية : وطبعاً المفاجأة الثانية هي ان اجيت ... احلا من الاولى صح
درت وجهي عنة بلا مبالا : عابت مو صوجج ... اني الغلطان ..
ضحكت من كام يغني : كان يوم اسود يوم ما جيت .. كان يوم اسود يوم ما جيت
رائد وهو يدفعة : والله ماكو اسود غيرك
حسان : يلة عاد ميامين كصي الكيكة خل ناكل
ميامين : انت دومك بس على بطنك
زياد بهدوء وابتسامة : كل عام وانتي بخير ميامين
رديتلة الابتسامة : شكرا زياد ... وانت بألف خير

شغلو الشموع وصارو يغنون : سنة حلوة يا اموون
طفيت الشموع
وبدت الهداية
اجة دور هدية زياد ... فتحتهة سلسال مالت كلادة ناعم بدون مدالية وبي لمعة حلوة ...: يجننن ... شكككررراً زياد ... هاي احلا هدية لحد الان

فتحت هدية رائد ... محبس ناعم وبي نبض يجننن
لبستة : جبير على ايدي
رائد وهو يحك راسة : اممم .. خلص عوفي اني اجيبلج غيرة
سحبتة بسرعة .: لا هذا هدية ما يترجع ... حتلو جبير
اجت ابالي فكرة ...: للللحضضة
سحبت السلسال الي جابة زياد وفتحتة دخلت المحبس بي
مديتهة لرائد : لبسنياهة
رائد وهو يضحك : والله عمي مدبرة
ضحكت علي : لعد شعبالك .. اختك اني
خالد : ترة ما ينرادلهة ذكاء ... شافتهة بالمسلسلات وطبقتهةً

خالد ايكون ابن خالتي واخوية بالرضاعة نص طفولتة عاشهة يمنة ... لحد ما شالو اهلة لاربيل صارو كل فترة يلة يجون

رجعت من هالذكرى واني اتلمس الكلادة : شنو وضعك هسة رائد ...
اني لازم اسأل غزوان علي ... اريد اعرف شلون صار

طلعت من الغرفة
نزلت لكيتة كاعد بالصالة
لابس دشداشة ومرجع راسة عالقنفة وحاط الجراوية على وجهة

ردت احجي بس مالي عين من بعد الي سويتة مساع
قويت نفسي وحجيت : احم .. غزوان
غزوان على وضعة ما تحرك : همممم

ميامين : ااا اكدر اطلب منك طلب
غزوان هم ما تحرك ومغطي وجهة: احجي

ميامين : بس فدوة لا تعصب ..يعني هو طلب ... اذا انت ما وافقت اني اروح يعني لا تعصب فدوة ..

نزل شوية من الشماغ وطلع عيونة وباوعلي وصار مغطي باقي وجهة وبس عيونة طالعة

عززة وادور يريدني ما اضعف ... اذا عيونك تسطر ..

نزلت عيني عنة
غزوان : احجي من الاخير شرايدة
ميامين : اممم ... يعني اذا تكدر الله يخليك اريد اتطمن على رائد ...
بعدة ما حاجي قاطعتة : فدوة يعني مثل المرة القبلها ... بدون ما احجي بس اسمع صوتة

غزوان : اكول ... كومي من يمي لا اطيج دفرة ببطنج هسة
خفت لا صدك يسويهة وكمت من يمة : فدوة غزوان ... والله بالي يمة ... بس اتطمن
غزوان ببرود : لا تخافين العار ما يموت ... وهو كلشي ما بي وطلعو من المستشفى ورجع للسجن

كمت على حيلي : وليش يرجعونة للسجن اكيد بعدة مريض .. شنو بهالسرعة رجعوه
غزوان بعصبية : بعد تعاي الزميني من ياختي وصيحي بوجهي ... وخخخخرررري من وجهي ... سويتيهة سالفة هي ضربة واجت بفراغ البطن ... لا تسوينهة مفخخة ولي يلة

كام من يمي وطلع من البيت

تأففت وكعدت عالقنفة
مرت دقايق الا خاتون داخلة علية ...

خاتون :كومي وياي
ميامين بأستغراب : وين اكوم وياج ..شبيج داخلة علية هيج

خاتون بأبتسامة : الحجية خاتون دازة عليج

خالد👇🏻

الكاتبة : سارة الشمري🖤

#البارت السابع عشر

#الكاتبة : سارة الشمري🖤

نستطيع رسم زهرة، لكن من أين نأتي بالرائحة؟.
مثل إيطالي

مرت دقايق الا خاتون داخلة علية ...

خاتون :كومي وياي
ميامين بأستغراب : وين اكوم وياج ..شبيج داخلة علية هيج

خاتون بأبتسامة : الحجية خاتون دازة عليج
انصدمت : منو ؟؟؟
خاتون وابتسامتهة مالية وجهة : الحجية خاتون ...يعني حبوبتي وحبوبة غزوان
ميامين : ادري بيها حبوبتج ... بس ليش دازة علية ... خاف اكو شي ... ترة خايفة والله
خاتون وهي تكعد يمي : من شنو خايفة ميامي لا تخافين اني وياج
ميامين بهدوء : خاتون القصة مو هيج... انتي منتبهة .. كل ما اشوف شخص من عائلتكم اول مرة لازم وراه يصير بية شي ... اول مرة انتي ... وبعدين مها الي اول مرة شفتها تعرفين شصار بية ... والبارحة امج هم اول مرة اشوفهة وهاج شوفي ايدي شصار بيها ...
... خاتون خليني هنا احسلي ترة اني ما اكدر الزم الساني وهم بس يحجون على اخوي اني ما اسكت ... واذا حجيت غزوان ما يحمني ... ترة والله اني ما ناقصة اي شي وتعبت
خاتون وهي تحضني : ميامي .. صدكيني الحجية خاتون غير عنهم ... تتذكرين من كتلج اكو شي ثاني هم حلو بهالبيت والي هي الحجية خاتون ... هي من البداية رادت تدز عليج وتشوفج بس غزوان رفض هالشي وكاللهة تطلعين عينها ... يدري بيها ما شايلة عليج
ميامين : يعني هي مثلج
خاتون ضحكت : اني مثلهة مو هي مثلي ... ويلة كومي تريد تشوف العروس الجديدة ..

كمت وبدلت لبست دشداشة سودة بس بيهة فيكة ... مخصرة عالجسم والردان يصير للعكس ضيك والباقي كلوش عريضة
لبست شال اسود وبي ورد نيلي لان ماعندي شال اسود سادة
لبست عباية ورحت وياهة
دخلت من باب المطبخ لاكانة مؤيد يريد يطلع الي اعرفة من الصورة ... ومها كاعدة على كرسي المطبخ
مجرد ما لمحني نزل عينة
خاتون بأبتسامة : مؤيد هاي ميامين مرت غزوان
مها بسخرية : قصدج الفصلية بين قوسين خدامة

مؤيد التفت على مها وانطاهة خزرة : مهااااا لسااانج ... رجع التفت لجهتي وهو منزل راسة ... هلة بيج خوية شلونج
ابتسمت واني اشوفة مستحي ومدنك .. صدفة تلاكون هيج شخص هسة يستحي : الله يسلمك الحمدالله بخير انت شلونك
مؤيد : الحمدلله .. يلة اترخص منكم عندي شغل
خاتون : الله وياك

مها وهي تشرب من الجاي : وبكل عين صلفة جاية للبيت ...
خاتون بعصبية : مهاااا ... مادام شفتيها وياي تسدين حلكج وتسكتين مالج دخل بيها
مها وهي تكوم وتريد تطلع : دافعي بعد دافعي عنها ... خليها تغسل مخج علينة
ميامين بهدوء : مها اريد اسألج سؤال ... شنو الي سويتة اني الج شخصياً
مها وهي تتقرب مني وقربت وجهة مني وتحجي بهدوء ونبرة حقد : الي سويتي انتي هو انج صرتي اخت لاكثر شخص اكرهة بالدنيا ... اخت للشخص الي حرمني من شوفة اخوي ... وطول ما اني اتنفس مستحيل بيوم انقهر عليج لو على اخوج النذل

جريت نفس قوي ما ردت ارد عليها لان ادري اذا رديت راح تصير مشكلة وهي هذا الي تريدة

خاتون : مهاااا وخري من وجهي مو وقتج هسة
مها بهدوء : ليش شنو الي سويتة اني ... هي سألت سؤال واني جاوبتهة
طلعت من المطبخ
خاتون : معليج بيها ... امشي اكيد الحجية تنتضرنة

دخلت وشفتة كاعد على القنفة ويباوعلي صفح يعني ان ما راضي بس شسوي ماكدرت ارفض

شفت مرة جبيرة كاعدة على القنفة ولابسة شيلة
بس ملامحهة حلوة ... اي والله مها تشبهة ... سبحان الله عيونهة صفر وبيضة وملامحهة رغم كبر السن بس حلوة مبينة جانت حلوة بشبابهة ...

بس دخلت كلت بهدوء : السلام عليكم
التفتت علية بترحيب : هلة حبوبة .. تعاي لية اكعدي يمي
ابتسمت على كلامهة ورحت سلمت عليها وكعدت بصفهة : شلونج حبوبة
ميامين بأبتسامة : الحمدالله بخير ... انتي شلونج عساج بخير
الحجية : الحمدالله يحبوبة ... جا ليشوف هالوجه شلون ما يصير بخير ... اللهم صلي على محمد وال محمد هي بس نگرة (حفرة) الحنج ترد العافية

ضحكت على كلامهة وهي تتغزل بية .. كولش حبيتها .. يمكن شكو وحدة اسمها خاتون هيج حبابة
اني طبعا بس دخلت من المطبخ ورة ما راح مؤيد ذبيت عبايتي ... والشال جنت لابستة شلون ما كان

الحجية وهي توخر كذلتي عن وجهي : هاي شنهي حبوبة ... شبي خدج احمر
التفتت لجهة غزوان وشفتة رافع حاجبة : لا بيبي ماكو شي بس لان اكو بگ وكرصتني وحكيتهة وصارت هيج
غزوان وهو يأشر على نفسة ويحرك شفايفة (بــگ) ؟
حصرتني الضحكة على شكلة بس حبستهة لان اذا اطلعهة تنكلب علية
الحجية خاتون : شلونة غزيوان وياج
غزوان بقهر واضح : حجية شني غزيوان ... ترة كبرت اسمي غزوان
الحجية بدون اهتمام : دكوم كوم .. يمتة كبرت ... مو البارحة اني لازمتك وافلي بيك من الكمل جايتك عدوة
غزوان بصوت : هووووووب حجيييييية ... شني السالفة ... هاي صارلهة بالعشرين سنة يا البارحة

اني هنا ما تحملت ومتت من الضحك ...

غزوان //من ذاكرة غزوان

من وصلتني رسالة صديقي عن رائد فرحت ... ردت اكللهة مات واني ادري بي ما ميت .. بس ردت اعيشها الي اني عايش بي ... بس من شفتها هيج وتأذي نفسهة .. كلبي ما انطاني وبلحضة خليتهة تحجي وياه .. اكثر شي خفت منة لا تسمع دكات كلبي لمن حضنتني حسيت كلبي يريد يطلع .. عصرت ايدي حيل وهي وخرت .. طلعت من يمهة قبل لا انسى نفسي واضعف كدامهة

طلعت ورحت لاكثر مكان اطلع حرگة كلبي بي ... كيس الملاكمة ... صرت اتخيلة رائد ... اضرب من كل كلبي ... هو الي وصلني لهاي الحالة هو الي خلاني اعيش هالعذاب وية نفسي ...

احبها اي احبها وكل ما جاي احاول اطلعها من عقلي جاي تستوطن بروحي وبكلبي بالزايد .. نضراتهة .. حركاتهة .. بــــرائتــها تعذبني ... الي اريدة اني هو ان تخاف مني وتكرهني .. بس ليش كل ما اشوف نضرة الخوف بعيونهة احس نار بكلبي تحرگني وتخلي غضبي يزداد .. اوووف وربي متندم بكد شعر راسي ان ما قتلت رائد وعفت سالفة الفصلية

... ارتاح غزوان .. جبتها تعذبهة مو .. انت الي جاي تتعذب مو هي .. انت الي جبت العذاب لنفسك لهالسبب ما يصير تتراجع .. كمل هالشي ولا تهتم لنضراتهة ... اخوك اغلى منهم .. اي اي اغلى من كلشي
بقيت اقنع نفسي بهالكلام .. واني مادري اذا راح اكدر انفذة ..

ثاني يوم اجت امي والتقت بيها ... سمعتها تصيح على امي واني عقل ما ضل براسي ... حركتهة بالشمعة واني عاصر عالشمعة بكل قوتي ماريد اضعف... اي خليهة تتعذب .. خليهة تضوك الويل .. نسيت كلامي لمن حطت حلكهة على كتفي
وانفاسهة الحارة على رگبتي .. صرخت بأسمي فزيت مثل الملسوع ووخرت الشمعة .. ردت انسى كلشي واخذهة لصدري واداوي كلبهة وعلتهة .. بس لا ماكدر انسى .. دير بالك غزوان .. دفعتهة للكاع وطلعت واني اردد لا ترجع امشي انت سويت هالشي عمداً لا تضعف هسة
بقيت افتر بالصالة رايح جاي واني اسمع صراخهة ..
سمعت شي انكسر بالمطبخ وكفت لا مو هي لا ... اختفى صراخهة وصوتهة
دخلت للمطبخ تخبلت من شفتها بهالحالة .. نايمة بالكاع والكزاز حوالينهة وشامرة ايدهة ووجهة احمر وكلة دموع ونفسهة يصعد وينزل بسرعة

رحت بسرعة وحطيتهة بحضني ومو واعي شجاي احجي : ميامي .. فتحي عيونج فدوة .. حبيبي اكعدي فدوة ميامي تسمعيني .. والله اسف

ماكو اي حركة منهة وهالشي خبلني بالزايد
شلتهة وصعدتهة لغرفتهة
رحت للصيدلية مالتي الي بالمكتب وجبت منها ابرة ضد التسمم .. حقنتهة بأيدهة وهي ونت بس رجعت نامت
عقمت ايدهة ولفيتهة وكعدت يمهة ...
اباوع لشكلهة الذبلان ... ضعفانة عن اول مرة اجت بيهة ... وجهة تعبان واصفر
وخرت خصلة من شعرهة جانت طايحة على وجهة ...
حطيت اصبعي على جبهتهة وصرت انزل عالخفيف وصلت لجفونهة الواسعة وحمر ورموشهة المبللة من الدموع منطيهن منضر احلا

نزلت لخشمهة احمر من البجي ... دنكت وطبعت بوسة خفيفة على طرف خشمهة
نزلت عيوني لشفايفهة .. اصابعي لامست شفتهة الناعمة ...
نسيت كلشي ودنكت وطبعت بوسة دافية على شفتهة الباردة
مغمض عيوني وحسيتهة تحركت .. وخرت شفتهة تطبك حواجبهة بأنزعاج
طفرت بسرعة .. غبي غزوان شجاي تسوي .. خفت خاف شافتني
صارت تردد : رائد
عرفت ان جاي تشوف حلم .. تنفست براحة ان ما انتبهت علية
كامت بسرعة تريد تطلع واني تمسكت بيهة
صارت تصيح .. عفتهة وطلعت

رحت لغرفتي .. تمددت على فراشي وحطيت ايدي على شفتي وغمضت عيوني وجريت نفس
اجة ابالي مقطع من اغنية وصرت اردد بي

.. روحي مخنوكة ..وبنار محروكة
لك وكت ..اخذ من حبيبي .. بوسة بالبوگة

ما كدرت انام بيومهة .. بقيت كاعد للصبح .. بدلت ملابسي .. بدون ما اخرب الغرفة مثل كل يوم مادري ليش عفتهة نضيفة .. مع ان اني اكره الهوسة .. بدلت وطلعت للمستشفى ..

رجعت عالساعة ١٢ تقريبا .. شفتهة نايمة عالقنفة والتعب مبين بوجهة اصفر وسواد جوة عيونهة .. بس رغم هالشي ما نقص من جمالهة شي ..

كعدتهة ووصرت اداوي ايدهة
رفعت راسي شفت عيونهة علية .. صفنت بعيونهة .. سود ناعسات ..

شفتهة تقربت مني .. خشمهة لامس خشمي ..
رادت تتقرب من شفتي ..
لا لا تسمحلهة غزوان .. انت من بوسة البارحة وهي نايمة ما تحملت وبقيت كاعد للصبح .. شلون اذا هسة اجت منهة .. والله يروح الاول والتالي وانسى كلشي
ضغطت على ايدهة وهي صرخت .. ضربتهة وهددتهة ..

طلعت رحت يم حمزة .. الشخص الوحيد الي يعرف ان اني احبها ... الحجية خاتون لهسة ما تعرف ان نفسها الي حجيتلهة عنهة وكتلهة احبهة هي نفسهة ميامين ..
كعدت يم حمزة عالشط وبعدين رجعت للبيت هم تعاركت وياهة وطلعت رحت لبيتنة
بس دخلت استقبلتني الحجية : تعال اجيت بوكتك..
غزوان وروحي طافرة : ها حجية امري شرايدة
الحجية : روح جيبلي مريتك خل اشوفهة
غزوان : خاتونة ما مليتي من هالسالفة
الحجية وهي تضربة بالعصا : خاتونة شني ولك .. شو ما تحترم
غزوان : جا مو زين ادلعج
الحجية : شكالولك علية بت اربعطعش .. دروح جيبلي البت خل اشوفهة ولا تليوف السالفة
خاتون الي هستوهة دخلت : حبوبة ولا يهمج اني اروح اصيحهة الج
غزوان انطيتهة خزرة : خاااتتتتوووون
الحجية : روحي حبوبة روحي معليج بي .. صيحيهة وجيبيها وياج لا تجين بدونهة
خاتون بفرح : صار حبوبة دقايق وهي يمج

ردت اسحب نفسي واكوم حتى امنعهة من الجية .. لان ادري بالحجية خاتون راح تجيب العيد بالحجي مالتهة وتطلع مكسراتي كدامهة ..

الحجية خاتون شافتني اريد اكوم : ويييين ... اكعد
غزوان : حجية اريد اطلع عندي شغل
الحجية : اكعد ماكو طلعة .. عوف الشغل لبعدين ..
تأففت وكعدت واني اهز برجلي
الحجية : بعدك تحبهة شني
غزوان : حجية بربج هسة وكتهة .. شني شذكرج بيهة ..
الحجية : دروح روح .. جا وجهك شمالة مصوفر .. بلوشي شني
غزوان: حجية رحمة لاهلج سدي السالفة ... ترة والله اكوم
الحجية دسكت اسكت .. عود هم كايم يهدد .. هذا حضي .. هي هاي ادور المزعطة علية
غزوان بقهر : حجية يا مزعطة .. هسة انتي شايفتني زعطوط واني شكبري راح اطب ال ٣٥ وانتي اتكولين زعطوط
الحجية : جا الكبر بالعمر .. لا يحبوبة بالعقل .. واذا نرد للعقل انت المزعطة احسن منك
طلعت عيوني : حجييييية .. صدك جذب .. وتلوميني من ما اجيبهة الج .. غير تطلعيني بكد الفصمة كدامهة واني صاكرهة
قاطعني دخولهة هي وخاتون .. سلمت وكعدت تسولف هي والحجية
الحجية كالتلهة : هي بس نگرة ( حفرة ) الحنج ترد العافية
اني هنا فركت وجهي .. اسكتي حجية لا تزيدين الطين بلة
ادور اتكول علية بگ .. ليش ما كالتلهة اني الضربتهة ...
ومثل ما توقعت الحجية بدت تجفص بالحجي ...

هي ضحكت لو اني كلبي طار من مكانة ...
صفنت عليهة ... صارلي هواي ما شايفهة هيج ضاحكة
رجعتلي لحضة الي شفت ضحكتهة بالمكتبة ..

قاطعني ضربة الحجية بالعصا مالتهة : غــــزواااان

مؤيد 👇🏻

الكاتبة : سارة الشمري🖤

#سجينة_الظلم_والانتقام 🍂🥀

#البارت_الثامن_عشر

#الكاتبة : سارة الشمري🖤

يستجيب الله دعاء الانسان بثلاث ...
اذا قال لك نعم ... يعطيك ما تريد
اذا قال لك لا ... يعطيك الافضل
اذا قال انتضر ... يعطيك الافضل بكثير

هي ضحكت لو اني كلبي طار من مكانة ...
صفنت عليهة ... صارلي هواي ما شايفهة هيج ضاحكة
رجعتلي لحضة الي شفت ضحكتهة بالمكتبة ..

قاطعني ضربة الحجية بالعصا مالتهة : غــــزواااان ..

طفرت اني : ها حبوبة شني السالفة ..
الحجية بنغزة وتباوعلي صفح : ها حبوبة انة الشني السالفة لو انت .. احجي وياك وانت مدري وين
صافن
حجيت بكلبي اففف الحجية ابد ما يفوتهة شي : اسف حبوبة امريني
الحجية : دجيب من وراك هاي العلاكة ..
درت واطيتهة العلاكة
فتحتهة وطلعت من عدهة علبة خشبية حلوة

انصدمت واني اشوفهة طلعت السوار من العلبة
كمت من مكاني وحجيت بعصبية : حجيييية هذا السوار
قاطعتني بعصبية : ايي هذا السوار .. هو من حقها غير جنتنة
كلت بعصبية : هاي مو جنة .. هاي فصلية ..
الحجية بعصبية : لا جنة وغصباً ما عليك ..
غزوان : حجيييية .. ماخذة السوار من امي علمود تطينة لهاي ...
الحجية : مثل ما انة شلتة من ايدي ولبستة لامك بيوم عرسهة .. هي هم جان لازم تشيلة وتلبسة الهة
بس ما يهم انة البسة الهة
غزوان : هذا السوار من حك الجنة التجي معززة مكرمة .. مو فصلية ... تاخذين سوار امي وتطينة لفصلية .. هذا السوار ما تلبسة الا برضاة امي
الحجية وهي تريد تلبسة الها
ميامين بخوف : بيبي مو لازم خلص عوفي اني اصلا ما احب الذهب
الحجية صاحت بيها : جيبي ايدج .. لا تعاندين
ميامين بترجي : فدوة بيبي والله ماريدة
الحجية بعصبية : اطيني ايدج كتلج .. ارد اشوف شلون يعاندني هذا ويمشي كلمتة علية
لبستة الهة والتفتت اطتني خزرة
الحجية وهي تصيح لخاتون : تعاي خاتونة
خاتون : ها حبوبة
الحجية : اخذي مرت اخوج وديهة لبيتهة
خاتون : حاضر .. امشي ميامين
ميامين باوعتلي بنضرة خوف واضحة .. اشرتلهة براسي بمعنى امشي
طلعت هي واني كعدت بعصبية اريد اشوف تاليهة وية الحجية خاتون
الحجية كعدت ببرود وولاعبالك مسوية شي
غزوان بقهر : حجية هذا تصرفج اكبر غلط .. شنو معناهة تاخذين السوار من امي وتنطينة لهاي

الحجية بحزم : اكلك شو طولان لسانك علية .. مو انت التعلمني الغلط وين اني اعرف الصح .. وهاي التكول عليهة عدهة اسم وتصير مرتك ..
غزوان بعصبية : حجية رحمة لاهلج .. هم حاسبتهة مرة علية .. انتي تدرين بية ليش اخذتهة .. ليش تماطلين بالسالفة
الحجية وهي تباوعلي صفح : اليسمعك ما يكول هذا يموت عليهة ويعشكهة
فتحت عيوني بصدمة وفهاوة : هاااه .. احم
الحجية بأبتسامة : شنهي ال هااه حبوبة .. جا مجذبة عليك ..
غزوان بتوتر : حجية منين تجيبين هذا الحجي ... هو اني جبتهة اريد اخذ حگ اخوي .. هذا يا عشك الطلعتي صفح
الحجية وهي تنغزني بعصاتهة عالخفيف : دكعد راحة حبوبة .. جا شني عبالك مادري بيها
التفتت عليها بأستغراب : شنهي هاي التدرين بيهة حبوبة
الحجية وابتسامتهة اعتلت : ادري بيها نفسهة بت الكوت الخذت عگلك وخلتك تفتر وما تعرف ليلك من صباحك
فتحت عيوني بصدمة والتفتت عليهة بعصبية : حجييية .. منين جايبة هذا الحجي .. غلطانة اني نسيتهة ذيج البنية .. راحت بدربها .. هاي غيرهةً

الحجية بهدوء وابتسامة : غزوووااان ... راح اعيدهة الك مرة ثانية ... انة اعرف الصح من الغلط .. واذا انت تعرفني زين جان المفروض تعرف هاي السالفة ما تمر علية
غزوان واني اكعد بالكاع بعصبية : بس كليلي شلون عرفتيها وانتي ما شايفتهة ابد
الحجية بضحك : جا موش من عبث سموني خاتون
غزوان ضحكت على كلمتهة : هسة عوفي خاتون وكليلي شلون عرفتي
الحجية : حبوبة هاي ما يرادلة ذكاء ... انت شفت روحك من اجيتني اول مرة من شفتهة بالكوت .. كعدت توصفهة الي وفصلتهة تفصيل
صارت تقلدني بالحجي : حبوبة عيونهة ناعسات وسود مثل الليل .. وضحكتهة تحط فوك العمر عمرين ... طولهة يسطر سطر ..
نغزتني بالعصا بخاصرتي وهي تكمل : ونگرة الحنج ترد العافية
التفتت عليهة : بس المواصفات عادية واكثر البنات عدهن هاي المواصفات ... شمعنى هاي
الحجية : حبوبة كالولك علية غمة وما افتهم
غزوان : لا حشاج خاتونة .. هو انتي تفوتج فايتة .. تلكطينهة وهي طايرة
الحجية : هااااه وهذا الحجي العدل ... جا يالاغم نسيت انت شوفتني صورتهة
غزوان حطيت ايدي على راسي : اووووو نسيت الصورة كلش ... بس حجية هي ما جانت مبينة بالصورة كلش مغطية نص وجهة بالكتاب ..
الحجية : هاااا كتلي ... جا شمعنة هي هم من الكوت من نفس المحافضة البيهة عزيزة كلبك ... وانت جنت خابصني اسمهة اموني .. وانت تعرف هذا اموني مو اسمهة ... وانة يحبوبة قارنت ... ميامين هم يصير يصيحولهة اموني
صفكت ايدية وحدة بوحدة : يعني شكول حجية ... ماشالله عليج ... لا هي فيزيا لا هي كيميا .. ما اكول غير الله يطينة شوية من ذكائج
الحجية : هسة عوف التصنف وكلي شراح تسوي ...

حطيت راسي على ركبهة وحجيت بضعف : شسوي حجية ... انتي كليلي شسوي ... والله روحي احسهة تريد تطلع يومية
الحجية وهي تمسح على راسي : سمالله عليك يمة ... انت بيدك تكدر ترد روحك ... انسى حقدك عليهة ... ما اكلك لا تحقد على اخوهة ... بس هي مالهة ذنب ... انت تحبهة وتكدر تخليهة تحبك ... انسى حقدك عليهة وخلي بكلبك بس الحب

كمت بسرعة وخرت راسي : لو اموت ما انسى ... اخوهة ذبح اخوي بدم بارد ... ماكدر انسى ..
حطت ايدهة على فكي وقابلت وجهة بوجهي : حط عينك بعيني وكول مو نص انتقامي منهة لان شفتهة وية واحد ثاني
نفسي صار يصعد وينزل
عفتهة وطلعت واني نار تاكل بكلبي ... ليش تذكريني حجية ... ليش تحركين روحي ...

طلعت من بيتنة وتوجهت لبيتي واني متحلف بيهة... حركة كلبي اطلعهة بيهة

دخلت للصالة وصحت بصوت عالي : ميييييياااااميييييين

البيت هدوء ... دخلت للمطبخ ماكو ...
صعدت فوك ... توجهت لغرفتهة وفتحت الباب

مغطية نفسهة باللحاف من راسهة لرجليهة ومبينة رجفتهة من ورة اللحاف
رحت بسرعة وسحبت اللحاف
ميامين وهي مغمضة عيونهة ولامة نفسهة وحجت بخوف : فدوة غزوان والله اني معلية ... لا تضربني فدوة
سحبتهة من شعرهة واني معمي عن كل كلمة تكولهة : انتيي تلبسين سوار من بعد امي ...

سحبت ايدهة وطلعت السوار من ايدهة وحطيتة بجيبي
سحبتهة من شعرهة واخذتهة لغرفتي
شمرتهة بالكاع واخذت الحزام وصرت اضرب بيهة
بكل ما عندي من قوة ... اريدهة تحس بالالم مثل ما اني احس بي ... كلبي احسة يتهشم من وراهة ... خل تتعذب .. خل تتدمر ..

صرت اضرب بيها .. بس هي ساكتة وبس دموعها تجري ... وايديهة محاوطة وجهة تحمي من ضربات الحزام
دنكت عليهة .. ورفعت راسهة من شعرهة ... وجهة صار مقابل لوجهي
حجيت واني صاك سنوني من العصبية : ليش ما تصرخين ... وين راح صوتج
ميامين ودموعها تجري : ما يفيد اذا صرخت .. مجرد اهدر بصوتي
شديت على شعرهة بعد اقوى وقربتهة مني : وين راحت ترجياتج والتوسل مالتج ... صراخج وين راح

ميامين : شنو الفايدة ... شنو فايدة اترجاك واني ادري بيك ما ترحمني ... كل ما صرخت تزداد بالضرب ... وعبالك دا انطيك قوة بصرخاتي
غزوان : زين وعرفتي ان ما الج خلاص من مني ... محد يكدر ينقذج مني
ميامين بضحكة قهر : لا غلطان ... رائد راح يجي ياخذني ... وراح تشوف هذا اليوم من يجي .. راح تشوفة ياخذني كدامك وانت واكف وما تكدر تمنعة ..
غزوان ضحكت ضحكة قوية على كلامهة وبعدين تحولت نضراتي للغضب : محد راح يكدر ياخذج مني ... تتحررين مني بحالة وحدة .. وهي من تشوفيني ميت كدامج
حطت ايدهة بسرعة على حلكي : اششششش .... اخذة وعد مني ... راح يجي هذا اليوم وتشوفة بعينك وانت واكف على طولك وما تكدر تمنعني ان اروح
وخرت ايدهة من حلكي وعصرت اصابعها وهي تألمت : هواي واثقة بأخوج مو
ميامين وهي عاقدة حواجبهة من الالم : اكثر مما تتصور ... اثق بي اكثر من نفسي ... وعمري ما راح اصدك اي جذبة انتو تلفقونهة على رائد ...
كمت وشلت الحزام وصرت اضربهة بجنون ... ومع ذلك ما صرخت ... اني الي جنت اصيح
اضربهة واني الهث واصيح : ما يكدر ياخذج مني ... محد يكدر ياخذج مني ...
رفستهة على بطنها .. جريتهة من شعرهة وطلعتهة من الغرفة وشمرتة بالباب ودخلت وسديت الباب
رجعت ضهري عالباب واني الهث ... صرخت بكل ما عندي من صوت ... يمكن لو ما البيت والغرف بيهن عازل للصوت جا هسة كلهة التمت علية ... صرت اصرخ بغضب ...
: راااااااائــد يا ريتني موتك بيدية وخلصت منك ... لو تموت ما تاخذهة مني ... محد ياخذ مامين مني ... محدد ياخذهة مني

مر ٣ شهور واني تغيرت .
.. صرت مثل المخبل ... كل ما تذكر اسم رائد اتخبل بالزايد ... مجرد فكرة هي عدهة امل ان ياخذهة مني تخبلني ... اضربهة انهيهة بالضرب ...
تعودت على ضرباتي ...
رغم هالشي ثقتهة برائد ما نهزت ولا ذرة ... كل يوم تزيد اصرار ...
وكلمتهة الي دوم تكولهة مع ان تعرف راح اضربهة اذا حجتهة : راح يجي اليوم الي رائد ياخذني بي منك ... راح يخلصني من جحيمك
بهالشهرين هي تغيرت ... ضعفت كلش .. عيونهة دومهة حمر من البجي ... جسمهة دوم احمر من كثر الضرب
تعلقت بيهة كلش ... ومجرد فكرة ان تروح مني هاي تدمرني ...
اذا مر علية يوم ما شفتهة احس روحي مخنوك ... ارجع من المستشفى بسرعة بس حتى اشوفهة ...

مثل كل يوم رجعت للبيت ... شفتهة تنضف ودخلت خاتون وراي
كعدت عالقنفة وكتلهة : روحي حطيلي اكل ترة ميت من الجوع
راحت بدون ما تكول كلمة ... اجت خاتون وكعدت يمي : غزوان .. مو كافي
عقدت حواجبي : شنو الكافي
خاتون : غزوان لا تغشم نفسك ... ترة تعبت البنية .. لو منتضرهة تموت كدامك يلة ترتاح ... غزوان ارحمها وارحم نفسك
غزوان : خاتون انتي لا تتدخلين بهذا الموضوع
خاتون بعصبية : تعبت واني اسكت واشوفهة تذبل كدامي وهي بعدهة زغيرة ... شنو الدنب الي سوتة هي ... ذنبهة ان الله رادهة تكون اخت مجرم .. هي مو مجرمة ..
غزوان : خاتون كتلج كافي وسدي الموضوع
خاتون ودموعها طاحت وحجت بعصبية : انت شنو من بشر .. عمرك ما جنت هيج ... وين غزوان الحنون الي يخاف على الناس قبل لا يخاف على اهلة ... وين الي جنت افتخر بي واكول اخوي ينقذ ارواح ويفرح اهل ...
غزوان : غزوان هذا مات وية فارس
خاتون وهي توكف : صدكني غزوان ... اذا صار بميامين شي .. خطيتهة بركبتك ... ما راح تشوف الراحة ... كل قهر وعذاب سببتة الهة الله راح يعاقبك علي ... راح تتندم .. وبوقتهة كول خاتون كالت

عافتني وراحت
ميامين وهي طالعة من المطبخ وبيدها الاكل : خاتون لحضة وين رايحة
خاتون كملت طريقهة وركعت الباب وراهة وما التفتت
ميامين حطت الصينية كدامي وكالت بقهر : ارتاحيت هاي خاتون هم راحت ... يعني اني انتضرهة شوكت تجي .. وانت تتعارك وياهة وتطردهة
كمت ولزمتهة من شعرهة : اشوف لسانج طولان هاليومين ... يرادلج تأديب
ميامين : اساساً اشفت منك اني غير التأديب ...
غزوان : بس ما يفيد بيج التأديب
ميامين : وعمرة ضربك ما راح يخليني اتراجع عن الامل الي بداخلي
غزوان : هذا الامل الي بداخلج اني الي راح اشيلة
ميامين : الانسان ميعيش بدون امل حتى ثانية ...
غزوان : راح نشوف ... وما ارتاح اذا ما حطمت كل ذرة امل باقية بكلبج
ميامين : اذا بيوم صار هالشي ... ف اعتبر ان ميامين ماتت والي وياك مجرد جثة متحركة

رخيت اصابعي واني اسمع كلامهة : الي معيشني ومصبرني عليك هو هذا الامل الي باقي بكلبي .. اذا انتهى اني انتهي وياه

عافتني وطلعت واني واكف اريد استوعب كلامهة ....

اولاد عائلة الجاسر 👇🏻

الكاتبة : سارة الشمري🖤

#البارت_التاسع_عشر

#الكاتبة : سارة الشمري🖤

كنت أظن أن أسوأ شيء في الحياة هو أن تكون وحيدًا، لكن أسوأ شيء في الحياة هو أن ينتهي بك الأمر مع أشخاص تشعر معهم بالوحدة.
روبن ويليامز

رخيت اصابعي واني اسمع كلامهة : الي معيشني ومصبرني عليك هو هذا الامل الي باقي بكلبي .. اذا انتهى اني انتهي وياه

عافتني وطلعت واني واكف اريد استوعب كلامهة ....

لا لا غزوان ... هي تريد تضحك عليك بهذا كلامهة ...
طلعت من البيت ورحت للشط .. المكان الوحيد الي يسمع كل همومي

دك تليفوني وشفتة .. رقم غريب .. ما رديت لان مالي خلك لاحد
رجع دك اكثر من مرة .. رفعت الجهاز

غزوان : الو
: الو .. غزوان الجاسر وياي
غزوان : اي تفضل .. منو حضرتك
: تريد تعرف منو اني ... اني الي انت دمرتة
غزوان : لو ما كلت اسمي جا كلت الرقم غلط ... منو انت احجي بسرعة وبدون حجي زايد
: زياد
رصيت سنوني وعرفتة بس ما بينت : زياد منو
زياد بسخرية : زياد ابن عم ميامين ... لا تكول ميامين منو
ضغطت عالتليفون بعصبية : اسم ميامين لا تجيبة على لسانك
زياد : هه ليش ... ميامين اسمها ما جان يطيح من لساني ... وهسة انت تريدني ما الفضة
غزوان بعصبية : انت كلتها جـــان ... وهسة اختلف الوضع ... انسى ان انت عرفت وحدة اسمهة ميامين ... والا والله تجبرني اتصرف تصرف ما راح يعجبك
زياد : ليش سهلة عبالك ... حب طفولتي هاي .. عشت علمودهة ... منتضرهة تكبر حتى تصير الي .. وانت اجيت بكل بساطة واخذتهة مني ... ما يحقلك تطلب مني انساهة
غزوان وعيونة حمر من كثر العصبية : راح تنساهة غصباً عليك ... واذا ما نسيتهة اني اخليك تنساهة بطريقتي ... مثل ما هي نستك انت انساهة
زياد بقهر : ميامين مستحيل تنساني ... مستحيل تنسى حبنا ... هي تدري بية اني احبهة

غزوان تخبلت واني اسمعة .. سديت التليفون وصرت اصيح بعلو صوتي
ركبت سيارتي وسقت بأقصى سرعة عندي للبيت

فتحت الباب ودخلت للصالة شفت خاتون وميامين
كمشت ميامين من شعرهة واني اشمرهة بالكاع
خاتون بعصبية : غزوان شبيك تخبلت ..
غزوان ما اهتميت لكلام خاتون ودفعتهة .. نزلت لمستوى ميامين وسحبتهة من شعرهة وقربت وجهة مني وحجيت بفحيح : بعدج تحبينة ؟ .. ما نسيتي لهسة ... والله والخلقج راح اخليج تنسينة غصباً عليج
سحبت الحزام من خصري وطبكتة وصرت اضربهة
خاتون وهي تحاول تدفعني : بس غزوان كافي حرام عليك والله ...
صرخت بيهة : خاتون وخري عني
خاتون وهي تبجي : ما اوخر والله ... واذا تريد تضربهة اضربني وياهة
حاوطت جسم ميامين بيديهة الي شبعانة بجي بس بصمت وبس شهكاتهة تطلع : يلة اضربني ... مو تريد تضربهة ... اضربني بمكانهة ...
سحبت خاتون بالكوة الي لازمة ميامين بكل قوتهة
صرخت بيهة ميامين : خلص خاتون روحي ... خليني اواجه مصيري وحدي ... مو غريبة علية عوفيني
خاتون تبجي : ما اعوفج ... ميامين والله يموتج
سحبت خاتون من ايدهة وطلعتهة من الباب وقفلتة وهي بقت تضرب بالباب
توجهت لميامين وسحبتهة من شعرهة
صرت اضرب بيهة بكل ما عندي من قوة
سحبتهة من شعرهة وضربتهة راشدي ... حلكهة صار ينزف ...
حجيت يم وجهة بعصبية : وهسة نسيتي ... لو بعدج تحبينة
ميامين وهي صوتهة كوة يطلع وتون : ما انساه .. راح يجي وياخذني منك ...
رصيت على سنوني من العصبية : تحلللميييين ... محد ياخذج مني ... محد يخلصج مني ...
صرت ارفس بيهة بكل مكان بجسمهة وهي حامية وجهة بيدهة
عفتهة وصعدت لغرفتي
سديت الباب وكمت اتنفس بسرعة شمرت الحزام بالكاع .. واني اتذكر كل كلمة كالتهة ...
كعدت بالكاع .. وبجيت .. اي بجيت ... زاد البجي مالتي وصار بصياح : لييييش .. ليش هيج يصير وياي ... ليش ما تريحني يربي ... تعبت والله تعبت ... ما نستة لهسة ... تحبة الة .. وااااانننييي والله احبهة ...
صرت احجي وعبالك هي واكفة كبالي ...: ما اريدج تحبين احد ... ادري ما راح تحبيني ... واني ماريدج تحبيني ... بس ما اريد تحبين احد ثاني ... اني بس الي احبج .. انتي ما يحقلج تحبين احد

صرت ابجي واشهك ... حتى على اخوي ما بجيت هيج ...
مادري شكد بقيت على هالحالة ... بس كمت من مكاني مسحت دموعي : اصحى غزوان ... لا تضعف .. هذا مو انت ... لا تخلي كلبك يحكمك

دخلت للحمام وغسلت وجهي اكثر من مرة ...
طلعت من الغرفة ونزلت ...

حيلي باد وكمت ارجف واني اشوفهة بعدهة على نومتهة بالكاع وبدون حركة ...
سويت الدرج خطوتين ووصلت الهة
شلتهة بحضني ... وجهة احمر .. وشفايفهة صايرات باللون البنفسجي ...
صرت اضرب على وجهة بخفيف اريدهة تتحرك ماكو
شلتهة بسرعة للمكتب مالتي : ميامين فتحي عيونج ... ما اخليج تموتين ... والله اموت وراج ... فتحي عيونج فدوة ...
حطيتهة عالقنفة الطويلة الجلد بالمكتب اخذت مي وصرت اذب على وجهة بس ما تحركت
تخبلت بالزايد
اخذت تليفوني واتصلت على خاتون
خاتون ردت : ها غزوان ... خلصت عقابك لو بعدة ... ارتاح كلبك لو بعدة ..
غزوان : خاتون مو وكتهة تعاي بسرعة للبيت ... ميامين مدري شبيهة ما ترد علية
خاتون بصياح : شبيهة ،.. شسويت للبنية غزوان ... موتتهة بيدك مو ...
غزوان : خاتون تعاي بسرعة فدوة
سديت التليفون ونزلت ركض فتحت الباب واجت خاتون وهي تصيح
ركضت خاتون لميامين وتريد تكعدهة : ميامين اكعدي ... والله ما اسامح نفسي اذا صار بيج شي ...
التفتت علية بعصبية : سوي اي شي ... حاول تكعدهة ...مو انت دكتور ...
غزوان وخانكتني العبرة ماريد ابجي : شسوي ماكدر اتحرك ... نسيت كلشي .. مالي حيل بعد
خاتون وهي تدور على عطر : هسة مالك حيل ... ومساع من تضربهة ...حتى المجرمين ما يضربون نفسك بس ولو على اساس انت مو مجرم
رحت جبت السماعة الطبية ... وحطيتهة على كلبهة ... احس كلبي صار يدك وية كل دكة من كلبهة ... يدك بشكل سريع
خاتون اخذت العطر القوي مالتي لان رجالي ... وحطتة على خشمهة ...
عقدت حواجبهة وونت
قربت منهة واني احاوط وجهة بيدي : ميامي تسمعيني .. فتحي عيونج
همست وهي مغمضة عيونهة : غـ..زوان ... غـــزوان
كلبي حسيتة يريد يطلع من مكانة ودموعي نزلت ونسيت وجود خاتون ...: يمج يروح غزوان ... ميامي فتحي عيونج يروحي
خاتون حطت ايدهة على جبهتهة : مصخنة ... غزوان انطيهة علاج من الي عندك ... لا تخليهة تبقى اكثر خاف يصير بيهة شي
كمت بسرعة واني ادور بين رفوف الادوية الموجودة ... التفتت على خاتون : ماكدر اضربهة الابرة ... ايدية ترجف
خاتون وهي تتأفف : اصلا ما راح اخليك تضربهة ... راح اتصل على مها تجي تضربهة هي تعرف

اتصلت خاتون على مها وطلبت منهة تجي
ورة شوية دخلت مها علينة : شكو شبيكم
التفتت على ميامين : وهاي شبيهة متمددة هنا
شهكت مها : بس لا كتلتوهة وتردون تتخلصون من الجثة
خاتون بعصبية : مهاااا .. فال الله ولا فالج ...
مها : شتردون مني ليش دازين علية
غزوان : ميامين مصخنة ... اضربيلهة الابرة
مها بأستغراب : وليش ما تضربهة انت ... انت احسن مني ... عالاقل انت دكتور .. اني مجربة بس كم مرة وتعلمتهة من درس الاسعافات الاولية
غزوان : مها كتلج اضربيلهة الابرة .. اني ماكدر اضربهة ... يلة لا تضيعين وكت
مها وهي تتخوصر : ما اضربهة ... خليهة بلكي تموت ... انت ترتاح واحنة نرتاح
غزوان : مهااااا ... اضربي الابرة لا ابتلي بيج ... واذا صار بيها اي خطأ انتي المسؤولة
مها اخذت الابرة وهي تتأفف ...
خاتون التفتت علية : اطلع برة خلي تضربهة
مها بأستغراب : وشكو يطلع ... هو مو رجلهة
خاتون : مها انتي التهي بشغلج ... اطلع برة غزوان

طلعت لان مالي خلك اتناقش وية خاتون ...
دقايق وصاحتني خاتون
شلتهة من القنفة وتوجهت بيهة لغرفتي ...
حطيتهة عالجرباية ... خاتون جابت كمادات وصارت تحطلهة على راسهة
خاتون : شلون راح تخليهة تاخذ البندول وهي نايمة
غزوان : مادري بلكي تكعد
مها اجت واخذت البندول من ايدي ... اخذت مي دافي من البراد الزغير مالت الغرفة
ترست الكلاص ربع منة مي وحطت حباية البندول بيهة وصارت تحركهة وهي بالمي حتى تذوب
خاتون وهي عاقدة حواجبهة : مها شجاي تسوين ...
مها ببرود : هيج تكدر تشربهة مثل المي ...
خاتون : يمكن متسوي شي اذا حطيناهة بمي
مها بسخرية : خاتون حبيبتي ماشالله على ذكائج ... على اساس هي من راح تاخذ الحباية متشرب وياهة مي مو ...
خاتون : يعني تفيدهة ...
مها ببرود : اي لا تخافين تفيد ... مجربتهة وية الحجية خاتون من تعاند وما تاخذ علاجهة ...
التفتت علية : اني سويت الي علية ... وهسة تسمحلي اروح
غزوان واني بالي يم ميامين : شكراً ... روحي
طلعت مها واني رحت كعدت يم راس ميامين ..
خاتون : اذا هالكد تحبهة ليش تعاملهة هيج ... ليش ما تخليهة تحبك ...
غزوان : خاتون لا تحجين من كيفج ... اني بس خفت تموت واني السبب ... يعني تأنيب ضمير
خاتون : اها تأنيب الضمير ... ووين جان ضميرك من وصلتهة لهاي الحالة
غزوان : خاتون اذا راح تبقين تحجين ف اطلعي
خاتون : ليش تريدني اسكت وانت الذنب كلة عليك
غزوان بعصبية : خاتون كافي ... ميامين نايمة لا تكعد
خاتون شمرت الخاولي بعصبية وطلعت ...

التفتت على ميامين الي صارت تون وتهلوس ...
صارت تبجي وهي نايمة
همست يم اذنه : ريتهة بية ولا بيج
حضنتهة وهي تهمس بدون وعي : غزوان ...
غزوان بسرعة وممنتبه لنفسي : يروح غزوان ... امريني
حجت بهمس وهي مغمضة : بردانة ..
سحبتهة لحضني وجريت اللحاف وغطيتهة واني امسح العرك عن جبينهة ...
تمسكت بية وحطت وجهة بركبتي وتون ...

غمضت عيوني وانفاسهة على ركبتي ... قربت شفتي من كصتهة الي مشتعلة نار .. طبعت بوسة طويلة على كصتهة وحضنتهة لصدري وغفيت ... ولاول مرة انام وهي هيج قريبة علية

بقيت كل شوية افز من النوم ... اشوف حرارتهة
واشتم عطرهة ... حسيت بهالكم ساعة عشقت عطرهة

مشيت اصابعي على خدودهة القطنية الناعمة ... صايرات حمر من البجي والصخونة ...
كمية البراءة البيهة حتى وهي نايمة تخليني اكره نفسي ... واكره رائد بالزايد ... لان ارتكب الجريمة وخلا هيج طفلة تروح ضحية افعالة
اني ما اكدر اسيطر على غضبي ... وهي كل مالهة تستفزني اكثر ... احبهة بس حقدي وغضبي عامي على هالحب ...
خاتون دوم اتكول .. ميامين اكبر ذنب سويتة بحياتك
قربت وجهي منها وهمست كبالهة وهي نايمة بهدوء : اذا انتي ذنب .. ف هذا احلا ذنب سويتة بحياتي ... مستعد ادخل النار وما اتوب من هذا الذنب
طبعت شفتي على شفتهة وبستهة بهدوء ..
نزلت لحنجهة وبستهة بخفة على مكان الحفرة الموجودة بحنجهة ...
حطيت خشمي بخدهة وسحبت نفس شكد ما اكدر .. مليت ريتي بعطرهة ... : اوووووف ... صبرني يا الهي
حضنتهة لصدري وحطيت وجهي بشعرهة وغمضت عيوني ...

فزيت من حسيتهة تحركت ... شفتهة بعدهة نايمة باوعت للساعة ... اووف بال ٧ الصبح .. شكد مر وقت
بستهة بكصتهة ... ونزلتهة من حضني بهدوووء ... حطيتهة عالمخدة وغطيتهة
دخلت للحمام .. سبحت عالسريع وطلعت بالمنشفة على خصري بس
قربت منهة وحطيت ايدي على جبينهة ونزلتهة لرگبتهة ... تنفست بأرتياح لان حرارتهة انخفضت

رحت لغرفة التبديل .. بدلت عالسريع وتعطرت
غطيتهة زين وطلعت من الغرفة
بعدني عالدرج اريد اتصل على خاتون تجي يمهة
وهي دخلت حجت ببرود وبدن نفس : صباح الخير .. شلون صارت ميامين
غزوان : احسن .. حرارتهة نزلت ..
خاتون وهي تحط جدر زغير عالطاولة : الحمدالله .. تكدر تروح .. اني يمهة .. وجبتلهة شوربة من تكعد تاكلهة
طلعت من البيت وتوجهت للمستشفى ...

منو مثلي تمنى ان ميامين تبقى مصخنة حتى غزوان يبقى هيج

حبايبي كلمن يقراء يعلق 20 تعليق للدعم والاستمرار بنزول البارتات بسرعة

الكاتبة : سارة الشمري🖤.

اسفة بنات عالتأخير اتمنى تعذروني ...