رواية شائت الأقدار الفصل السادس عشر 16 - بقلم نور الشمس

يله عذريهم يروحي
واحنه حبينه العلينه

باچر اطير الحمامه بلايخوف
وترجع الوادم حنينه

دلال..
الليل كله مانمت افكر ليش انه حبيت شخص ماشايفني ليش اليحب يتعذب والله كلشي سويته جي احبه ادري انه غلطانه بس مو بيدي حبي اله خلاني اتخبل صار كل عقلي يمه اريده وبعد ماريد كلشي مااريد منه حب بس اريده يتقبلني
احبه وادري بي يهوه غيري انه حاسه بعذابه
بس هوه مايحس لو يحس ماخلاني وراح بدون مااشوفه انه اتحمل عواقب حبي واختياري
وشمايسوي بيه ابقه احبه واطيعه ومنتضره اليوم الي انام بحضنه شوكت يتحقق هذا اليوم اصير اسعد انسانه.

جعفر ..
رجعت وجني ماعاقد ماكو لافرحه ولا اي شعور يمكن گلبي مات واختفت كل مشاعري بس ليش گلبي ينعصر من اذكرها ريم ياريت مامتعرف عليها شسوي حته انساها گاعد افكر واسمع ضحكهم وصوتهم عالي كل ضحكه اسمعها رصاصه بگلبي صارت ..

شمالني وبسكوت رحتي
هي قسمه..الماخذج يتهنه بيج
بس احسنچ قسمتي

اووف من احساسي هذا كل ماأگول مات يرجعلي اقوى خليت ايدي بشعري وسحبته الي وره حيل تنفست قوي وگلت احسن شي انام تمددت جبت المخده خليتها على راسي وغطيت حته اذني مااريد اسمع شي وكل هذا ومانمت للصبح
اتگلب تگلب ..مشتاق الهفتها ذيج مشتاق الصوتها مشتاق الأسمي اسمعه بصوتها
والله هاني غالي واغلى من الهوى والله مو قصدي اخون مو بيدي غصبا عليه

ودتني خطواتي الوين
كل الشوارع خاليه
كل الوجوه تغيرت
حته الحبيبه الغاليه

غصبا عليه افكر بيها
كابوس صارتلي ريم جانت احلى حلم صارتلي كابوس..شلون افكر بيها وهيه حلال اخوي
الله يعينج يروحي شتحملين .
ثاني يوم الصبح رحنه ومشينه ابوي گلهم فكوها الخاطر دم الشهداء الولد واگف ع الساتر يحامي عنكم وعنه تحرمونه يعيش ايام حلوه ليش
هاني گلهم والله سبع وشجاعته وقوته هيه الخلتني اساعده الينطي مره مايندم علاء سبع واخو اخيته
ضلوو شويه يماطلون والكل مقتنعين بس الناهي
گتله من رخصتكم احجي گتلهم البنيه ماتنجبر على شي الله مايرضه بكسران خاطرها النهوه شنهي من ناهي عليها تاخذها انت حته لو اخذتها تگدر تاخذها وهيه مارايدتك الله مايرضه بيها والولد حاط دمه بشيشيه ومتمسك بيها .
اجينه نطلبها منك طلبه اعتبر نفسك اخوها ابوها وجايين نطلبها منك على سنة الله ورسوله
ليش هالعادات متمسكين بيها يعني تقبل تعيش بجحيم انت وياها البنيه مارايدتك فكها الوجه الله وامامك علي لا الله ولا رسوله ولا ابو الحسنين يرضيهم الجاي يصير
السيد هم حجه ويانه اخر شي وافق الرجال وگال الخاطركم النهوه طاحت ..
طلعنه فرحانين حيل وحسينه مسوين انجاز
رجعنه للبيت وهاني حيل فرحان وبشر الولد
انه من يمي فرحتله .
ضليت افكر بهاي سالفة دلال وشلون تاليها
گلت انه بت عمي ماعوفها بس انه احطلها حد اول.
وانه افكر وارجع اگول والله ماتحلالي مره غيرها
ريم شلعت گلبي وراح تضل دوم وياي صارتلي مرض مزمن انه اتگطع بس هيه مو يمها لهفتها على هاني غير وانه هم مااخليها تشوفني بس اراقبها من بعيد وادعي الله يسعدهم وينسيني حبي الوحيد
گلت بلكي وي دلال انسه ماكو غير اتزوج هسه حته بالي ينشغل .
نزلت الأبوي وگتله بويه انه اريد العرس الشهر اليجي
بلغ عمامي وخل امي تحضر روحها
كيف ابوي وگال الله يهنيك وليدي الله يعوضك خير
صحت هاني واجه وسولفتله گتله على اجازتك الجايه انه اتزوج انتضر جيتك ونسوي العرس
هم فرح وگلي خاف اتأخر عليك
..اتانيك العمر كله خويي فرحتي مااتم بدونك ولو ماكو فرحه بس هوه بعد عرس
..ليش خويه انت مارايدها
..هاني انه مو ابالي العرس كله لا رايدها ولا رافضها
بس الموقف الي نحطيت بي صعب مو انه الي انجبر على شي هيه ماجبرتني بس الضروف جبرتني اوافق حته احميها
..جعفر لاتضلمها وياك تحميها من اهلها وانت من هسه كارها حمايتيش هاي
..هاني انت تعرفني انه مااضلم بس روحي اكيد راح اجي على روحي ومااحسسها بشي بس مو گبل مااسوي البالي .
..الله كريم خويه الله يسهلك

ريم ..

سمعت بجعفر راح يتزوج وعادي عندي يمكن شويه حنيت بس ماضجت يمكن جي ادري هوه مارايدها
مدري جي انه گمت مااشوفه ماعرف عقلي مو صافي

دلال..
احلى خبر سمعته بحياتي وضليت اتخيل شكله واتخيل انه بحضنه اتخيل عيشتي وياه واخيرا حلم عمري راح يتحقق
بيومها مانمت للصبح رحت بغير عالم وادري بي مارايدني بس عندي وجوده يمي كلش كافي

جعفر..
طلعت بالبستان انه وكاظم والولد وبلغتهم بالعرس عمي هم گايل لبوي گايله هوه وناصر عرسهم سوه يصير نفس اليوم گتله عادي ماهتميت .
ضلينه نفتر انه والولد وكاظم ادري بي عاجبته وحده وگتله لاتنتضر اخطبها لاتروح من ايدك وبعدين تتندم
نسولف ونضحك انوب تذكرت هاني وگلبي انعصر
يارب دخيلك مالي غيره هاني عفت روحي لجله ربي لاتحرمني منه .
حسن اخوي گلي جعفر شبيك وين صافن گتله بالي يم هاني تره هوه بالمتقدم بس اهلي مايدرون
گالو لاتخاف عليه هاني سبع الله ينجي

هاني ..
رجعت للدوام والوضع تعبان وماتسمع غير الهاونات والمفخخات الي كلساع تنفجر البيوت المدارس كلها مفخخه من غير القناصين
گمنه نتقدم بحذر وناخذ مسافات قليله نأمنها كلش يله نتقدم حته نحافض هلى ارواحنه واسلاحنه
بالحرب وانه بالي يم اهلي وريم
مشتاقلهم مريتي حيل مشتاقلها ضلينه نتراسل انه وياها وصرت ماانام اذا مااسمع صوتها صارت كلشي اليه ودنيتي كلها .
وجعفر هم شاغل بالي خاف يتزوج وهوه مامرتاح بس جعفر سبع ماينخاف عليه

ريم .
حسيت بفراغ كلش جبير وتذكرت شلون من اجه وقدرني گلي حضري نفسج نروح لأهلج راح وترس بيتنه هدايه ومسواگ وحب ابوي براسه وامي سلم عليها بكل احترام حيل كبر بعيني وشفت الفرحه بعيون اهلي ماادري الله عوض اهلي بهاني عوضهم عن الحرمان كل اسمهم الفلح محد يسمي ابو ابو حمود كل القريه تصيحله صيهود الفلاح يمكن عدالة ربي خلت الفلاح يناسبه الشيخ ومو نسبه عاديه يقدره ويحترمه ماحسسني يوم انه هديه اله وبت فلاح وفقيره بالعكس يحسسني انه هديته من الله اشوفه شلون ملهوف وفرحان صح جنت احلم بجعفر والهسه احن الأيامه بس هاني حبيته صارت بينه مووده واريد من الله يحفظه الي .

بده جعفر يحضر للعرس وجهز كلشي واختار كلشي مثل مايريد اختار الغرفه من احلى الغرف وجهز كلشي يجهز وهوه باله انو مايضلمها مهما يكون بت عمه بس بعد اكو غصه بگلبه وهوه نفسه حاير مايعرف جي دلال خلته بهيج موقف
لو هوه بعده ماناسي ريم ومايحس بلذه وفرحه للعرس ..بينه وبين نفسه گال الله يجبر بخاطري والخاطر الله انه مااقصر وي دلال بس هم ماافوتلها الصار واشوفها هيه تحبني من صدگ لو حب مراهقات وورطتني وياها .
مرت فتره على هالحال الى ان صار موعد العرس وجانو مجهزين كلشي منتضرين بس هاني يوصل

هاني

بلغوهم فوجهم يتحرك للموصل اتحركوو وهوه ممبلغ اهله خاف يقلقهم وهمه يحضرون العرس اخوو
جان يتقدم هوه والجنود ويسولف ويضحك مايتعامل وي الجنود بعنجهية ضابط وهمه جنوده لا جنهم صدقانه واخوته يسولف ويگل العلاء شوكت العرس گله سيدي بهاي اجازتي وادعيلك ربي يحفظك ويهنيك وينطيك خير الدنيا والأخره
يمشون وهمه مضحين بكلشي الوطنهم والضحكه ماتفارگهم .
وهمه يمشون سمعوو صوت ناصي ومتعوب صوت ام گلبها متگطع على ابنها تريد تخلصه من بين الأنقاض
بس الحيل خان بيها جسمها خاوي من الجوع والتعب والخوف هذا الباقيلها من عائلتها ماتگدر تخلي ولاتگدر تطلعه سمعوو الصوت ركزوو منين يجي الصوت عرفوو الصوت يجي من البيوت الي مقابيلهم بس كلها انقاض وميكدرون يحددون منين بالضبط
هاني بتركيز منه وحذر عرف مكانها واتحرك بكل شجاعه لگه حالتها تعبانه وراسها مكشوف نزع قميصه العسكري وگلها خيتي غطي راسج بي وابنج انه اطلعه .
الجنود تخبلوو سيدي تعال احنه نطلعه البس الدرع سيدي لاتخاطر بنفسك يصيحون ويردون يوصلوله ميگدرون جان اكو قناص يحاول يعيقهم
مابقه بيدهم بس ينبهونه ويصيحون
وهوه باله مو يمهم كل تفكيره يم الطفل
وشلون يطلعه جر الصخر بيده وصارت كلها دم من جفه الي تشگگ ضل يحفر شويه شويه الحد ماطلعه شاله وخلاه بحضن امه
جان الطفل بحاله صعبه وامه منهاره متعرف شنو تسوي ولاشلون تتحرك باوع للطفل شاف رجله تنزف تلفت يمنه يسره مالگه شي يشد رجل الطفل علما يسعفه ويوصله للمفارز الطبيه
مابقه بس فانيلته الداخليه نزعها وايده مليانه دم وتنزف بس جان نزيف الطفل ومنضر امه يوجعه اكثر مافكر بأيده كل تفكيره شلون ينقذهم .
جان حيل مقهور وغيرته ماتسمحله يشوف عراقيه بهالمنضر شافها مكسوره .
گلها خويه گومي اخوج انه
..گلنله مااعرف شلون اشكرك واجازيك
..واجبي هذا انتي اختي اكو اخت تشكر اخوها على حمايتها
..ونعم منكم الله ينتقم منهم الي وصلونه الهالحال
..الله كريم خويه الله يستر عليكم ويقدرنه على حمايتكم .
حاول يطلعهم شلون والمكان مسيطر علي قناص داعشي قذر يحاول يمنع اسعاف الأبرياء حته الأطفال مخلصوو من فكرهم القذر
فكر شلون يطلع نزع الخوذه وخلاها ع الرشاشه حاول يرفعها شويه شويه من بين البيوت والأنقاض
حاول يوصل فكره للقناص انو اليتحرك جندي رفعها حركها شويه انضربت الخوذه .
باوع عليها بحزن گلها الضاهر تحاصرنه بهالمكان خويه حاولي تنتبهين للولد لاتحركي زياده خلي على مستوه واحد لأن مبيين عنده كسور وخاف حالته تتأزم شافها بچت صعب علي الموقف وغيرته ابد ماسمحتله يشوف هيج منضر گلها خويه دموعج غاليه ليش تبجين هسه ابنج بحضنج وانه اطلعج بس تجينه امدادات واني اتصل بالضباط واخليهم يعالجون القناص
..اخويا اني ورطتك اكيد وراك زوجه وجهال وام تنتضرك بسببي انت هسه باي لحضه ممكن تموت
..لا اطفال ماعندي متزوج من اشهر بس شفت حالتج والطفل تخيلت مرتي وابني بهالموقف اي عراقي غيور يسوي السويته واكثر وهذا واجبي انه هنا الحمايتكم انتو اخوتنه شلون تگولين هيج
صفن واباله اجت هذي الأبيات الي عجبته ومن سمعهن حيل تأثر بيهن وجانت عنده فرصه ينقل المكان أمن لكن غيرته الي خلته يروح للجبهه
ضل يرددهن الأبيات.

يرب الگلب دمنه ونه هده
ولنا زود بزلمنه والنه هده
النلزمه مانطيحه والنهده
يصير رماد اذا لاح الوطيه

ذبوو شيلتج ودموعج يهلن
بيچ شيوخ چانو گبل والهم رن
الكله زادچ يموصل شو مشه وخلاج
وعجايز بالجنوب اعليج مايرضن
من حشم السيد صح ها يولاد هايولاد
علگ بزنودنه من شيالهن شدن
أذا موصل تفرع بعد ماحاچيك
وأگص حته الثدايه اعليك اذا درن

سمعت ابياته وبچت
شگد حاولوو يفرقون العراقيين گدروو يوگعون بعضهم بس العراقي الطاهر ابد مأثرت بي خطاباتهم
حلوو من تشوف شاب بعمر الورد يضحي بنفسه الأنسانه مشايفها ولايعرفها ولايعرف نيتها شنوو وياه مخله اباله احتمال ممكن تأذي او انو هيه متستاهل الشي الوحيد الفكر بي هوه انقاذهم على احساب نفسه وهيه عراقيه وغيرته متسمحله يتركها بهيج حال
الجنود يتواصلون وياه وحيل خايفين شلون يتركونه بهيج حاله محاصر بين الأنقاض الضابط الي جان اخ الهم وسند شلون يتخلون عنه
حاول شخص منهم يشغل القناص وبده ينفذ خطه اله وبلغ الباقين يبلغون الضابط ينسحب
بده يستدرج القناص ونجح باستدارجه
جان الجندي اكثر بطوله وذكي گدر يتلافه رصاص القناص وبفضله هاني گدر يطلع من بين الأنقاض عبر ام الولد واخذ الولد وعبر وصل يم الجنود الي متحصنين بمكان امين وره فتره وصلتهم الأمدادات ونقلووهم للمفارز الطبيه .
الجنود حيل افتخروو بقائدهم من شافو صدره عاري وقميصه مغطي راس اخته العراقيه .

جان يوم كلش متعب الهاني وللجنود وره هذا اليوم بلغوهم بالنزول نزل هاني والكل منتضره حته يبدي العرس ..
يتبع