رواية شائت الأقدار الفصل الثامن والعشرون 28 - بقلم نور الشمس

ناصر..جعفر شني اليرضيك گوله حته نتصرف
..أريد الحچي الگلته الكم تفهمونه بيها اريد عمتي تساعدني كل بنيه تسمع من امها .
خل تعقلها السالفه البالها مو ابالي وبعد السوته اعتقد ابوي ماراح يسكت وراح يطلب مني اتزوج ريم
اني مو بس الخاطرها ريم صعبه علي اتزوجها  من اشوفها اشوف اخوي بيها .
صعبه گاعد تجبرني وتجبر ابوي على هذا الشي
حته سنته مادايره شلون افكر اتزوج مرت اخوي وهوه بعده ترابه ماناشف .

ناصر ..من سمعت جعفر يسولف على ريم وزواجه تذكرت شگد جان يحبها وشلون من وراي انه وامي فارگناهم وجانت نيتنه غير بس همه بقوو على خوتهم والوحيد الي اتأذه جعفر ومحد يدري بجرحه
كرهت روحي اشوفه من يحچي مهموم شاب بعمر الورد يزغرنه بسنين بس عقله وتفكيره اكبر من عمره بهواي گتله
..جعفر انت مو اول واحد ياخذ مرت اخوه اكثر مجتمعاتنه هيج اذا البنيه راضيه ليش ماتاخذها انت وابن اخوك يتربه على ايدك محد غيرك يداري مثلك
..ناصر ماأگدر صعبه والله مو بيدي هسه هذا الموضوع مو ابالي بس انه المكدر خاطري والي متعبني دلال خل تعقل هذا الأريده منها تصرفاتها جاي تأثر عليها گبل ماتأثر على غيرها

گالوله لايضل بالك احنه نفهم امي تحاچيها

دلال..
من طگني وطلع وانه ضهري وبطني موتني
گلت من الرعبه بطني خبطت غسلت وجهي ماكو اثر بس قليل شفتي مشگوگه وجسمي مزورگ انه حميت وجهي بأيدي من راجعت نفسي عرفت الغلط مني بس من اشوفها افقد مااحس بروحي اتذكر ذاك حبهم واتذكر شلون چان متأثر عليها
يمكن انه غبيه واتصرف بغباء بس هذا الشي مو بيدي اتخبل من اتخيله يروح مني
ضليت شويه تمددت زاد الوجع عليه
حسيت برطوبه شفت ملابسي كلهن دم حيل خفت وگمت اصيح مرعوبه
..عمه الحگيلي عمه .شويه واجت عمتي وتعبانه من الدرج كوه تتنفس
..شبيج يمه اسم الله ليش تصيحين
..عمه ضهري وبطني موتني وملابسي كلهن دم
..فلك طرج ليش هيج

جعفر..
طلعت من بيت عمي وفهمتهم على كلشي وارتاحيت شويه
حاچتني عمتي وگالت انه اعرف شغلي وياها وانت هم اتحملها غيرة المره تكتل وانه هم ماارضه عليها
ومايصير خاطرك الا طيب تريد اجيكم العصر احاچيها
..ممنون منچ عمه لا هسه اكيد ضال بخاطرها وماتتحمل حچي يومين تهدأ وانه اجيبها الكم وفهموها .
شفت روحي وي كل هذا بس خاطري مكسور عليها وخايف عليها واقدر مشاعرها .بس اني منو مفكر بيه
گلت لو شويه تفكر بيه وتحاول تغير اسلوبها وطريقتها جا خليتها اسعد مره .
رحت الكاظم دگيتله هورن طلعلي اخذته وضلينه نفتر
..شلونك جعفر
..من الله بخير
..شعندك اليوم الله عليك مو خالي
..كاظم تعبت والله تعبت سولفتله الصار
..جعفر اعذرها غير تحبك وخايفه عليك
..شعذر يمعوود ياحب هذا الماشفت منه بس مرار
انه بس ارد افتهم كل اليحبون هيج لو بس انه حبي غير ياحب الأطيح بي يطيح حضي
..حشاك يمعوود كلها نفس الشي نسوان شلعان گلب انه هم الهسه متاني يرجعون خبر ماكو انه ادري عليمن يتعززن علينه
..الله كريم ان شاءالله يوافقون وين يلگون احسن منك
..بس ماگتلي ريم راحت لهلها اي راحت
..ها والوصيه
..يمكن ترجع ابوي گال ارجعها
..ولك عمي ناويلك على نيه ماكو غيرها
..يمعوود انه شاك بس لاتخبلني زياده اتخبل والله كلشي ولا هالسالفه
..ولك جعفر انت شتريد تزوجها شحال لو ماجنت رايدها
..هيه هاي المصيبه جي رايدها گبل وجانت عند اخوي وانه گلبي يتگطع عليها بس والله جنت ادعيله الله يهني بيها شلون وره مامات ارجع اخذها
احس روحي ماعندي وفه صعبه والله صعبه
..هم حقك الله كريم الله يحلها
گاعد نسولف ودگ جهازي
..الووو
..هلا يمه
..هلا بيچ شكو يمه صاير شي
..تعال ولك فلك طر امك انت شمسوي بمرتك
..شبيها يمه
..ولك گاعد تصرخ من ضهرها وتنزف
مرتك حامل لو ماتدري
..شنوو يمه منين طلعتلي هاي انوب ماادري والله
سأليها انه شمدريني حضرن ارواحچن جاي
سديت التليفون .
يارب انطيني الصبر يارب شسويت انه
..شبيك جعفر شكوو
..دلال مريضه يمكن مأذيها انه هواي
..امشي امشي ماكو شي ان شاءالله لايضل بالك

رحت اخذتهن اباوعلها صفره كركم وتتلوه
شگد احتقرت روحي وضجت عليها بس ارجع وأگول هيه الجبرتني ماحچيت حچايه وحده
وابوي ضل يلوم بيه مو هيج يابويه عبالي انت تعرف تتصرف عبالي اعقل من هيج حته لو طگيتها مو توصل هيج مرحله سكتت وطلعت  الطريق كله التفت عليها اشوفها وارجع اشوف طريقي احتاريت ياربي انه صح لو غلط يالله ساعدني اريد ارتاح لشوكت انه اضل هيج
وصلنه الطبيب گالت وكعت من الدرج والطبيبه مااقتنعت بالعذر
انه حچايه وحده ماحچيت گالتلها يراد سونار يمكن عندچ اجهاض
شگد چنت ملهوف على طفل تاليها بيدي ضيعته حيل ضجت من روحي
حوولوها ع السونار گلولها الطفل بعده والنبض موجود النزف من الجاره ويرادلچ راحه هالفتره
واكتبولها علاج رحت جبته الها
هيه ابد ماخلت عينها بعيني
واني ودي اسألها من شوكت انتي حامل ليش مامنتبها الروحچ حايره بس بالغيره والعرك والطلايب شگد حبيت اسمع هيج خبر بس مو بهذا الضرف
رجعتها للبيت وصار وكت العصر گبل لاننزل يم الباب گتلهن نزلن انه راجع اخذ ريم للطبيب تعمدت اگلها حته تعرف مني احسن
رجعت مريت بريم وامها واخذتهن للطبيب
ام ريم الطريق كله تسولف وتسلم وتسأل حسيتها تجامل وتريد تتقرب اكثر
وصلتهم يم الطبيب وضليت واگف بره
ساعه تقريبا وطلعوو
ريم ماحچت شي وانه استحيت اسأل
ام ريم گالت
.مبروك يمه جايكم ولد وماباقيله بس شهرين ان شاءالله
..يابويه حسيت روحي ارد اطير والله فرحت اكثر من فرحتي بحمل دلال والولد مني فرحت بأبن هاني واخيرا اسمك مايموت هاني يبقه اسمك ان شاءالله والولد يصيروله ولد الله يحيي اسمك يابعد اخوك عيوني غورگن بالدموع گوه صبرت
گتلها الف الحمدلله
الطريق كله وانه حاير شوكت اوصل ابلغ امي وابوي والأهم من هذا اروح للنجف بعد مابيها مجال ارد ازور هاني ارد اگله خويه راح يصير عندك ولد
وصلتهم ورجعت للبيت

السلام عليكم
..وعليكم السلام هلا بجعفر
..هلا بيك بويه امي وين
..ها يمه هنا انه هلا بيك
..ابشركم مرت هاني حامل بولد وكلشي تمام
ألف الحمدلله الف الحمدلله
فرحوو حيل وبفرحتنه اكوو غصه تمنيناه هوه اليبشرنه تمنينه نشوف فرحته عريس ومات وبشبابه
صعبه مشاعرنه بذاك اليوم فرح ممزوج بحزن بشوق اشتاقيناله اشتاقينه التفاصيله الضحكته السوالفه حته القساوته والجد الي بوجها اشتاقيتله اشتاقيت النضراته الحاده هاجت مواجعي كلهن
أشرتلي امي شوف مرتك
..گتلها انه رايح اغسل وابدل وطالع للنجف اليوم
..يمه خليها على باجر المگبره ليل ماتلحگ
ابوي گالها خلي خلي على راحته
صعدت اخذت ملابسي اباوعلها تشهگ
شيفضها هاي الشغله شلون بيه وبگلبي هذا
اليحن عليها .
اجيت احاچيها گلت لا مو وكتها من ارجع
اخذت الملابس ورحت غسلت وبدلت وطلعت للنجف
الطريق كله اسمع

فارگونه فارگونه فارگونه
بسفر هم يجون لو نسونه
لو نسونه
أه يدمعي صب عليهم
صب عليهم
القاسمتهم فرحتي
الشاركوني ابسمتي
يبعد الهم لمن اشتم
عطر ايديهم
روحي مشتاقه وتحن
تارس عيوني الحزن
بيدي شمعه
بگلبي دمعه
تواسي بيهم
الما ألگه مثلهم وين ماأمشي
لمن ضيعتهم ضيعت كلشي
كل حياتي ابين ايديهم
أه يدمعي صب عليهم

الطريق كله أبچي واتذكر ايامنه من الطفوله
الوكت استشهاده وصلت المگبره بالليل

ألمگبره تخوفني چانت بالنهار
بيها قله عزاز وأكثرهم غرب
هسه اطبها ابليل بيها افرش وانام
عندي اخوي هناك مااخاف من اطب

وصلت وبچيت وحچيت هاني حيرتني
والله محتار امانتك ثگيله عليه
خويه ابنك بعد شهرين ويجي للدنيا
لو كبر وسأل عليك شگله
بقيت للصبح بالمگبره
وبعدها رحت زرت الأمام علي عليه السلام
گتله بجاهك عد ربك ياأمامي اريد الله يخلصني من حيرتي ويسهل اموري
مابيه بعد ماأگدر الكلشي اتحمل
انه هم بشر مو حديد
طلعت وشفت ابوي متصل علي هواي
خليت ايدي على گلبي اكيد صاير شي
ليش ابوي هيج لاح بالمكالمات
من گد ماتعبان مااتصلت خفت لا صاير شي
وماأگدر اسمع كلشي
حركت سيارتي ورجعت وانه مية فكره اجت ابالي
اريد عقلي يصفه ماكو بس احساسي مايخيب
اكيد صاير شي