شفاه مخملية الفصل الثامن عشر 18 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي.

#موش صوچـك
صـوچ گلبـي اليظـن هاي الناس مثلـه..

كاظم اسماعيل الگاطع

*زازا: عاجبني اتفاعل واعلق وياكم اليوم😉🔥

♛ ♛ ♛ ♛ ♛ ♛ ♛ ♛ ♛ ♛

"هجران"
قريب المغربيه وسمعت صوت جوة، گمزت من مكاني اكيد بكر اجه وفعلاً طلع جاي وياريتني ماشفته بهالحال، تيبست رجليه من منظره مدمى تدمي وقميصه مشگوگ والوجه ميتفسر، وعميد الدين واگف بصفه هم متأذي بَـس مو نفسه، بيبي عطيه لطمت صدرهه وعاطت

-يمااا صوااااب ولكم شصااااير؟؟؟؟؟

محد حچة شي، اجو گعدو ؏ القنفه واني ركضت ؏ بكر اشوفه شبي، لزمت ايده وحنچة درته عليه، همست

-بكرر شبيك شصاار؟؟ متووجع؟؟

هز راسه بـ "لا" وعميد گاعد بصفه ساكت، ياااء ذوله شبيهم شو محد حچة ولا نطق بشي شنوو ما ماتت گلوبهم من شافوهم بهالحال نفسي؟؟ والعحبني سيد خليل من گال ببرود قاتل

-خليل: شمالكم بويه تأذيتو؟

عميد زفر بقوة ولزم فكه

-عميد: عمي صار بينه حادث بالطريج

-هجران: حااادث؟؟؟ شلووون وويننن؟؟

-عميد: يواشچ ماصار شي حادث بسيط

-حجية عطيه: حبوبه وين البسيط شوفوا وجوهكم

ظلوا ساكتين بَـس بكر وجهه ميگصه الطبر، حاولت احچي وياه بَـس ميگول شي، واخر شي ختم اسألتي بـ...

-هجران تعبان

-اسم الله عليك يروحي، شنو يوجعك گلبي گولي؟

-بكر: چتفي اظنه انخلع

وگفت ؏ حيلي اشوف چتفه، انتبهت عميد عيونه علينه بَـس من شافني اباوعله دار وجهه، شويه واجن خالة انتصار (ام عميد) وعمه دلال ورهف وغزل چانن طالعات يتسوگن، بَـس شافنهم هيچ انگلب البيت گلااب

ركضت خالة انتصار ؏ عميد تشوف جرحة ورهف بين ايديهه، اما غزاله گعدت بين بكر وعميد ولازمه ايد كل واحد من جهة

سندت بكر عليه واله شويه ردت اوگع من ثگله بَـس سيطرت عليه، اخذته للغرفه وخليته يتمدد ؏ السرير واني ركضت اجيب الاسعافات الاوليه من عمه دلال

رجعت للغرفه چان نازع قميصه وصدره مجرح والدم ينگط منه، راد يگعد ؏ حيله وصاح بألم مكتوم

-ااااخخخخ

-لا حبيبي لتگعد نام واني اعالجهه الك

سوه مثل ماگتله وكلما اللمس جرحة يشهگ، شگد گتله يروح للطبيب بَـس ميقبل اووف ويه عناده، كملت طبابه جرحه

-هجران: بكر وين چنتو وصار بيكم الحادث؟

-بكر: رادين من بغداد

-شتسوي رايح لبغداد؟

-عندي شغل؟

-وهوه؟

رفع تك حاجب وباوعلي بعدما چان منزل عيونه

-بكر: مو چنچ هواي تسألين هجران؟

-ايي لان متتت واني اتصل وانته مااكوو!!!

-بكر: يواشچ شمالچ انهديتي عليّ

-مو تخبلت والله عقل ماظل براسي انته ليش متجاوب عليه؟؟

-هجران جاوبتچ وگتلچ عندي شغل يعني حتى بشغلي تردين تتدخلين؟؟

-لا بَـس..

-لا بَـس ولا شي بويه شمالچ انتي لا تظلين تلحين هالطبع مو حلو

سكتت وماحچيت شي بعد، ماريد انفره مني بَـس نهايتي اعرف اعرف لو اضطر اروح اسأل عميد الدين المهم اعرف شعنده ببغداد صارله يومين

نام ؏ صفحته اليسره ومدد اطرافه براحة، رحت تمددت بصفه صرنه وجه بوجه، همست

-بكر خفت عليك اني

-لا تخافين مابيه شي

-اني بَـس ردت اتطمن ليش اختفيت هيج

-هجران اريدچ تتعلمين شنهو الاحبه وشنهو اللا انه ماحب الي يلح عليّ، اني شوكت ما ارتاح اسولفلچ خوش؟

هزيت براسي اي ونهضت روحي تچيت ظهري ؏ تاج السرير، جريت راسه لصدري، باوعلي باستغراب

-هجران: اريد اللعب بشعرك الحلو

ماحچة شي غمض عيونه واني اللعب بشعره الاسود، گعدت اسويله مساج لفروة راسه حتى يرتاح، فاجأني من گال وهوه لسه مغمض عيونه

-بكر: هجران تحبيني؟

ابتسمت بحياء وگلت بصوت ناصي

-اموت عليك

-ليش؟

-ياااء بكر هذا هم سؤال وليش ماحبك يعني؟

رفع راسه يباوعلي، تنهد ولزم شفايفي ضحكت

-بكر: تدرين شفافچ مال عظ

ابتسمت ونزلت راسي، وهوه بقه يجعص بيهن حتى أذاني بَـس محچيت لان فرحانه ان يشوف شي بيه حلو

-بكر: انتي خوش بنيه تدرين؟

-وانته خوش رجال

-لا غلطانه

-شنو؟

سكت وماجاوبني، نهض روحه وظل يباوع بوجهي بَـس عيونه ؏ شفايفي

-بكر: احب اللون التحطينه ؏ شفافچ ليش ماحاطه اليوم؟

ابتسمت وگمت بسرعه جريت قلم الحمرة ورسمت شفايفي، ابتسم واردف

-شنهو اسمه هاذ كللش حلو

-هجران: ام الصالون گالت اسمه ماروني مخملي

-يعني اذا اروح لأي محل اگلهم اريدن قلم حمرة ماروني مخملي؟

-اي هيه هيچ كالت، بَـس تعاال ليش تريد تشتري منه؟

-لا ماشتري بَـس سؤال

-هااا

ظل يباوعلي واني ابادله النظره، هاي اول مرة يصفن بوجهي لهدرجة، راحت عيونه ؏ شفايفي للمرة المادري شگد وسحبهن ببوسه عميقه خلت جسمي يرجف واندار عليه و....

**

"غزاله"
الوب بحجرتي اروح وارد، اريد اشوف عميد گلبي شاب نار عليه!! هفففف نيالهه رهف حتنام عنده، لا لا غزل فشله شني هالتفكير گبر لا تصيرين غمة وتدخلين بسوالف الحرام

مديت راسي من باب حجرتي اشوفن عمه انتصار وحلا طلعن من حجرته لو لساهن؟؟ بَـس شو ماكو حس يعني اكيد طلعن وكملت عمه انتصار تداوي جروحه

طلعت اتسحب خاف يشوفني مرتضى ويچلب بيه مثل كل مرة يلززگ لزگه اعمى وعع ولا جاي اگدر ابلع هالزلمة عكس اخوو بكلللشي، بضحكته برزانته وحتى بتحشيشه

وصلت لباب حجرة عميد وگلبي يطربگ اخاف يفشلني ومايطببني الحجرة، خلص انه ادگن الباب واذا ما گالي تفضلي انسحب بكرامتي وبلا ما اسحل برويحتي الگاع

دگيت الباب واجاني صوته اليطيح گلبي ويگطع نفسي

-عميد: تفضل

مديت راسي من الباب وباوعتله بنظرات بريئه حتى يطببني الحجرة، گام ؏ حيله ووگف جدامي ولسسه ما گال تفضلي جوة

-عميد: ها باباتي محتاجة شي؟

-غزل: هااا ايي اجيت اشوفن رهيفه

-نامت شوفي

اشر عليهه وهيه غاطه بسابع نومه، ونايمه نومتهه الفضيحة مفلگحة رجليهه واديهه وفنهه اذا تغطت لو احد غطاهه تگلب الدنيا وعلي

-هااا اءء انته شونك؟ متوجع؟

-لا الحمد لله زين

-غزل: عميد اريدن احاچيك شوي

-عميد: ماشي امشينا نگعد بالهول اخافن تگعد رهوفه

طلع وياي بَـس گوة يمشي مبين عليه متوجع بَـس مايگول سوده عليه، گعد ؏ القنفة وگعدت بصفه، تنهدت بعمق وانه اباوع بالفضاء ليگدام، حسيت بي گرص خدي وهمس

-عميد: شمالهه بنيتي

ابتسمت ؏ اسلوبه فديته حتى من درى بيه احبه ماغير طريقة كلامه لان القهرر هوه يشوفني مثل رهف بالضبط

-غزل: عميدي اگلك بَـس ماتزعل؟

-لا بويه اكو واحد يزعل منچ؟

-غزل: مو ترا السالفه تخص مرتضى

-شماله؟ كدرچ بشي؟؟ (ضوجچ بشي)

-لا لا بَـس مادري يختلف عنك هواااي

جر حسرة وفرك وجهه قوي، صاح

-اخخخخ اوووف نسيت!!

طگن شفته وحنچة دم لان مجروحات ويبوو صار عبالك سباق گامت تنزف هواي، ركضت اجيبله كلينكس واجيت انطي

-عاشت ايدچ بابا

رحت لغرفته اجيبله معقم حتى ما يلتهب الجرح لان انفتح، گال

-عميد: جيبي بويه انه اسوي

-غزل: لا انه اعقمهه

-لا لا انه اسويهه

-غزل: عمييد ازعل عليك انطيني

هز راسه واستسلم لمطلبي، تگربت عليه صرت كُلش گريبه ويبووو عطره سطرني ينعل ابليسه هالزلمة حتى وهو مسوي حادث وحالته بالضيم مرتب ونظيف

عقمت جرحه وانتبهت صايره طبره بخشمه

-غزل: بابا هاي شني الطبره؟ (واشرت ؏ خشمه)

-ايي جاي يوجعني

-اخافن كسر؟

-يجوز بعد مادري، المهم تعاي گولي شمالچ متكدره؟ شمسوي مرتضى؟

-عميد شوف انه گتلك ماريدك تزعل

-اهووو احچي بوويه بطي الجربه

-انه ما جاي احبن مرتضى مااگدرر وعلي شگد حاولت بَـس ما جاي اتقبله وانه لان اشاركك بكلشي جيت اگلك

-بويه غزاله شمالچ بعدكم بسم الله انطي لنفسكم فرصه

-مااا مااريد انطييي اريدن اتطلگ

-شنهييي بويه انتي جاي تفكرين شني جاي تگولين لو نسيتي؟؟ ترا مرتضى ناهي عليچ ولو اوذن ما يفك النهوة

-انته مو ضد هالعادات مال نهوة وفصليه مادري شنهي ليش ماعندك سلطه ؏ اخيك

-بويه انه ضد هالعادات بَـس ماگدر اسوي شي وانتي تدرين من صارت سالفتي مروان الله يشعله انطاني فصليتين بدم بارد ورفضتهن شني نسيتي؟؟

-لا مانسيت بَـس انه ماريدن مرتتتضىىى

-بسچ حبيبتي لا تبچين انطي فرصه ترا والعباس مرتضى عاشگچ هو حچالي شكثر روحه معلگه بيچ

-اففففف مااريدنه يتعلگ بيه انننه ماااعاشگتتته انه عاااشگه اخوووو

-لا اله الا الله ردينه ؏ هالسالفه!! بووويه حرراااام مايصير تحچين هيچ

-لااا يصير ومايهمني شي راح اظل احبك واعشگك لو مو مرتضى وراح اروح هسَّ واگله

گمت وجرني عليه بسرعه، صار ورايه وهمس بأذني خلاني انصاب بقشعريره

-صيري حبابه ترا اذا حاچيتي انتي التخسربن!

-احبك

-وراح تحبي هوه هم

درت اباوع بوجهه، مادري منين اجتني الجرأة وحاوطت رقبته بأيدي، همست

-اريدك انته ليش ماتحس بيه؟

وخر ايدي عن رقبته وابتعد عني، تنهد قوي وهز راسه

-ماعرف شگلچ وعلي تعبت

-من شنهووو

-من كلشي غزلل كلكم ضديي كلكمم ومحد يهتم لمشاعري عبالك صخر جدامكم

-يعني صرت ماهتم لمشاعرك لان كتلك احبك واريدك؟؟ عميد شمالك انته؟؟

-اييي لانچ انانيه راح تروحين لمرتضى وتحچيله عن مشاعرچ وتخلينه نتعارك حنه الخوان وبالتالي ابوچ راح يزعل وهاي اذا ما أذاچ لو كتلچ وانه اكيد ماراح ارضى بهالشي واطلبچ منه خاطر ما تتأذين

-ايييي خوش فكرررة

-من اشتعل مروان وخلفته وااحد وااحد بجاه ابو فاضل ؏ عگلچ الجاهل

-شمااالك عمييد وين الجهل بالموضوع؟

-لاا ابدد ماكو جهلل لچ بوويه شنهي انتي ماتفكرين؟؟ عيفي مشاعرچ ؏ جهة چا وانه شنهي ماتفكرين بيه شمالكم انتو ولكم

-هوه انه افكر بيك ووالله اريحك صدگ

-ماااريد هالراحة والله حلووة اتزوج بنيتي هي هاي العايزه بعد

-اهووو انه مو بنيتك

-لااا تعيدين هالچلمة لو تصيرين مرت اخوي وتخلفين منه وويلادچ يتزوجون وهم يخلفون راح تبقين بنيتي سواء عجبچ او لاء، لچ بويه انه احبچ من كل گلبي يشهد ربي عليّ بَـس ماتقبلچ كحُرمة ليه

-لان عاااشگهه صححح؟؟؟

-ايييي صححح ولو تجي الف حُرمة جدامي ماتهز شعره مني بَـس هيَّ اعاين بعيونهه انسطر سطرة العباس

(زازا: شلون حُب😔♥️🔥)

-غزل: اووووف لو اعرف منهي وعلي اگطعهه بيدي

-اششش عيب عليچ ماحبيت هالچلمة انه گتلچ ماراح اتزوج البت وبسچ تفكرين بيهه

-لااا انه راح ابقى افكر لحدما اعرفهه منهي

-كيفچ مايهمني حتى لو دريتي لان ما راح اخذهه

-وهيه تحبك؟

-مادري

-ليش ماتدري انته مو تگول العاشگ تفضحه نظرات عيونه!!

-اييي بالضبطط وانه ما اعاين بوجهها يالخوثة حتى ما تحس عليّ!!

-هه اصلاً انه متأكده عاشگتك همات هيَّ ياهي تشوفك وماتحبك بَـس المخبله

-هههههه ولچ شنهي انتي ماتستحين

-لااا ماستحي منك وانته تدري

-ايي لان انه منطيچ عين زايده يالسلبوحة

-عميييدييي احببببككك

-من اشتعل مروان ولچ بسسچ هسة انده لأبوچ

-مايهمني صيحه احسن حتى يطلگني من مرتضى وانته تاخذني

-ما انلام من اگولن عگل جاهله

-اففف اكرررهك ليش تحچي عللليّ

-ايي ايي عفيه هاي الچلمه اريدن اسمعهه منچ

-ههههههههه انته فد واحد لوووتي

-وانتي فد وحده زعطوووطه

-اممم يله انه اروحن انام تصبح ؏ خير حبيبي

-افرك حلگچ اذا عدتيهه

-مااااا اله اعيييدهه

-ولچ حرااااام

-لا موش حرام انته مو تگلي حبيبتي انه همات اگلك حبيبي

-انه اگلچ لان اگول لرهف هيچ وصگد ذكرتيني لزم انتبه لروحي وماگولهه بعد وتتغير كل تصرفاتي وياچ

-لا لا حبااااب لا تتغير اندارلك فدووه

-لا مايصير بعد مو... اووووف روحي عن وجهي لو اظل اليوم كله افهم بيچ ماتفهمين

-اييي ماشي تصبح ؏ خير حَبيـ....

مالحگت اكمل الحچاية جر شفتي حيل ومردهه، رفع تك حاجب وگال بحدة

-عميد: حذرتچ انه

هزيت راسي وفلتت للغرفه، نمت بفراشي وانه افكر بي ادري الي جاي اسوي غلط وحرام بَـس مو بيدي اموت ؏ كلشي بي وخطبتي لمرتضى كلهه غلط بغلط وصارت بالاكراه وحتى لو افسخ منه وماتزوج عميد المهم اترك مرتضى بحاله ويكمل حياته ويه انسانه تبادله مشاعره

فتحت عيوني الصبح واذا اشوفن مرجانه بوجهي يااا بووويه عطت عيييطه يمكن مروان وخلفته سمعوني، اجتني حبوبه عطيه

-حجية عطيه: وسمممم وزقنبوووت وحريييشي شنهي اشايفه ولچ

-غزل: حبوبه شنهي شجاب مرجانه بحجرتي؟

-حجية عطيه: كيفهه بيتهه وتفتر بي شنهي لا يكون ما عاجبچ فرتهه بالبيت ست غزل السلبوحة؟

-غزل: لا جدة براحتهه بَـس خفت

-حجية عطيه: صچيچة كوون مسويه روحهه بزر نستله الصخلة

عافتني وطلعت من الحجرة، غسلت وبدلت ملابسي ورحت اسوي ريوگ بَـس عميد طالع هه اكييد طالع چا ما شفنه مرجانه تفتر بالبيت حالهه حالنه، تريگنه وجوري وفيصل طلعو گالو يفترون شوي گبل السفره

تأجلت السفرة لباچر عساس مانروح بَـس عميد انقهر وگال هو واعد رهف وبكر زين بَـس شوي چتفه يوجعه بَـس گال يگدر يروح عادي

استفگدت هجران مانزلت لسه، رحت أسير عليهه، دگيت باب حجرتهه

-هجران: تفضلل

فتحت الباب وصبحت عليهه چان وجهها مورد واحسهه صايره حلوة

-غزاله: شنهي هالجمال شمسويه هجرانه

-هجران: ههههه ولشي وداعتچ بَـس فرحانه

-الله يديمهه يرويحتي، شلونچ ويه اخوي ان شالله مرتاحة؟

-ايي فديته كُلش مرتاحة وياه، بَـس بعدني اللوب ماحچالي شلون صار الحادث انتو عميد ماگال شي؟

-اي گال، چان ببغداد وتواعد ويه بكر بالكاظم وردوا سوه وطلعت جدامهم تريله وعميدي لاف ؏ العامود وطبو بنصه

-اوويلي سوده عليه بكر البارحة كُلش متوجع

-حتى عميد خشمه مكسور

-اووف

-غزل: يله امشينا جوة نسولف

-هجران: ماشي هسة ثواني وانزل وراچ (نزلت غزل واني ظليت ارتب بالغرفه واعطرهه، اتصلت بأمي وندى وسولفت وياهن شويه، نزلت جوة وصبحت عليهم بَـس عمتهم فتوح من يوم العركة لسه ماشفتهه يجوز صدُك طلعت من البيت وراحت زعلانه

تريگت وياهم وساعدت البنات بغسل المواعين وسولفنه هواي بَـس حلا شكلهه مو طبيعي ومبين عليهه الضوجة، شگد ردت اضحكهه واسولف وياهه بَـس هيه مبوزه، ادري بيهه ضايجة لان شهد مزاعلتهه من سالفة جواهر لان هنه كُلش قريبات ؏ بعض

طلعت ويه غزل وفرتني البستان مالتهم شنووو جنة!!! سبحااان الله كلشي بي ما لذ وطاب وعيينكم وما مدت والخضار والاشجار والورود شي خيالي، وعدهم مثل النهر صاير بالزاويه يجننن ضايف جمال ثاني للبستان وواحد يعجبه بَـس يگعد هنا ويتفرج لأبداع الخالق

رجعنه للبيت بعدما عمه سلمى اتصلت بـ غزل وگلتلهه هم ياله نحظر غراضنه لسفرة باچر، كُلش متحمسه ورحت ارتب جنطتي، حطيت ملابس بكر ويايه بَـس ماعرف هوه شنو يريد ياخذ فَـہ اخذت ؏ ذوقي، كملت كلشي ورتبت نفسي وحطيت من الحمرة اليحبهه وانتظرته يجي

مليت من الانتظار وتأخر الوقت وهوه لسه ماكو اهووو شنو سالفة هالرجال اليختفي فجأة، دگيت عليه دزلي رساله "جاي بالطريق" وفعلاً ربع ساعه واجه مبوز

-الله يساعدك گلبي

-بكر: هـلا

-يله حبيبي روح اسبح واني احضرلك العشه

-ماريدن اتزقنب

باوعتله وجهه محتقن احمر وشرايين رگبته ناطه عبالك چان يتعارك لو معصب، سكتت وما لحيت عليه جراء طلبه ان ميحب احد يلح وياه

راح يسبح واني جبت حبشكلات وكرزات وببسي بلكي شويه يغير جو ويفك من عصبيته الي اتمنى شي يوم يهدأ منهه، طلع من الحمام ولبس ملابسه ما حچة حچاية، فَـہ اني بديت بالحديث

-بكر أكُل ويايه

ماحچة شي گعد بصفي ؏ الشازلون الموجود بغرفتنه وسحب الحب وبده يكرز

-هجران: بكر باچر ساعه بيش نطلع؟

-بكر: طيارتنه بالعشرة

-بالليل؟

-اي

-هااا زين حبيبي اني حظرت ملابسك بَـس ماعرفت شنو....

قاطعني ونتر بغضب مكتوم

-بكر: شيخصچ بهدومي!!!

-هااا؟؟ لا بَـس غير اني احضرهن؟

ظل يباوعلي وفاتح عيونه خازرني قوي، خفت من نظرته هذا شبيي وليش مجاي افهم شنو يريد بالضبط عبالك محمل ويريد بَـس يتعارك!! هم سكتت وماحچيت شي اخذت نصيحة امي من الرجال معصب لا تحچين وياه حتى ميطلع حرگته وقهره بيچ

راح ؏ الفراش وتمدد، ثنه ايدي وحطهن جوه راسه وكالعاده بَـس بالبجامه، گعدت من جهة راسه ؏ السرير وحاولت اتلاطف وياه اريده يفك

-بكوري حبيبي

-امممم

-گلبي منو يجي ويانه باچر؟

-الف مرة گتلچ هلي كلهم

-ايي ادري اهلك كلهم بَـس ماعرفت منو بالضبط؟ يعني حتى احمد وغيث ونسوانهم يجون؟

-لاء

-لعد شلون تگول اهلك كلهم

رفع عيونه يباوعلي ورجع دار وجهه، طگت روحي من اسلوبه وگمت عنه كافي اسحل بروحي، جاي اگوم من الفراش وجر ايدي سحبني عليه، حظني من وره ودفن راسه برگبتي يشمني، رجف جسمي ودگات گلبي زادت، همس

-لا تگومين اريدن انام

-اي نام ملازمتك اني

-عدلي اسلوووبچ هجرااان

-بكر اني شحچيت

-اششش اريدن انام تعبان

سكتت وظليت ثابته بمكاني بَـس حاصرتني بچيه واحس روحي راح انفجر من القهر، لييش هيچ اسلوبه شو جوري من تحچي ؏ فيصل تگول كُلش يحبهه وميريدهه تنام اصلاً يظلون كل يوم يسهرون للصبح يسولفون ويقضون وقت ويه بعض، ليش بَـس بكر هيچ همه مو اخواان ولازم نفس الاطباع عدهم؟!!

درت وجهي عليه اريد اباوعله وبقيت اتمايز بملامحه لحدما غفيت، حسيت الصبح هوه مو بصفي عادي اصلاً تعودت حيصيرلي اسبوع متزوجة وكلما اگعد ميكون بالفراش

نزلت تريگت وياهم والولد كلهم موجودين ماطلعوا للشغل لان اليوم السفره ومخبوصين، انتبهت ؏ رهف مطنگرة وابوهه گاعد ياكل كل شويه عينه تصير عليهه ويهز راسه بيأس، جوري سألتهه

-جوري: شبيهه الحلوة زعلانه؟

-رهف: زعلانه ؏ ابوي

عميد استمر ياكل وماحچة شي، وهيه من شافت ابوهه ماهتم طگت بچي عبالك بالونه محمله مي وانفجرت، بَـس عميد مانهز شعره وبقى ياكل ولا هامه شي، استغربت من تصرفه لان غزل حاچيتلي هوه شگد يحب رهف ويخاف عليهه من الزعل

-هجران: رهوفه شبيچ حبيبي ليش تبچين؟

-حجية عطيه: ولچ سلبوحة شمالچ تونين!!

-رهف: حبووبه ابووي وعدني ياخذني لشمال ايران وهسه يگول ما راح نروح بَـس لمشهد!!!

-حجية عطيه: فلك طرچ وانه عبالي بيهه شي من صجيجة كون

-غزل: رهففف بسچ عاااد لوعتي گليب ابوچ

-رهف: مااا ماااا لو چانت امي عايشه چان ماصار هذا حالي

گالت هيچ وعميد عاط عيطه خلتني انز بمكاني ورهف فوراً سكتت بَـس دموعهه تجري

-عميد: عسااااني انه النطمرت متت موش امچ زييييين!!!!

-حجية عطيه: يعباس يبني لا يوم موش زين لا تگول هالچلام ؏ رويحتك

-عميد: حجية بزعتتت كلما حاچيتهه وصاحت لو امي ولو امي عبالك انه الكتلت امهه!!!!

سكت الكل ومنسمع غير شهگات رهف، وخاله انتصار حاظنتهه لصدرهه وتسكت بيهه، گام عميد من السفره وبعد محد حچة وكسر الهدوء، جوري همستلي

-جوري: اگولج ترا خطيه يحچي وياهه بهالطريقه تبقى بنته ويتيمه

-هجران: اي والله حتى اني انقهرت متوقعته هيچ

حلا تدخلت بيناتنه الظاهر سمعتنه

-حلا: لا تلومونه ترا رهف تشگ الگلب كل يوم تحن ؏ امهه

-جوري: يي حقهه ترا طفله وتحتاج ام

-حلا: ايي انه ما اللومنهه بَـس ابوهه شني ذنبه كلما حچت وتگول انته ماحافظت ؏ امي وماتت من وراك

-هجران: عززاا ليش ماتت من وراه؟؟؟!

رفعت چتافهه بحركه ماعرف واردفت

-حلا: سالفة شيلاء الله يرحمهه غامضة ومحد يعرف بالسالفه وحتى رهف سامعه هيچ مقتطفات بسيطه وتلوم بأبوهه

-جوري: ماشي افتهم بَـس ليش يعيط عليهه هيچ لازم يتحملهه هيه بنته

-حلا: مو انتم ماشهدتو گبل شوي شصار انه چنت حاظره، راحت لأبوهه اله تاخذني لشمال ايران وتريد تغيب اسبوع عن المدرسه خاطر تبقى اكثر وعميد حاول يقنع بيهه يگلهه بالصيف وعد اخذچ وهيه ماتقبل وهم جابت طاري امهه وگامت تدوس بالحچي وهوه بلع موس وسكت بَـس هسه واضح طگت مرارته وبط الجربه ؏ گولته

-هجران: هاا الله يساعده

گمنه من السفره وصعدت لغرفتي اما بكر بقه جوه يسولف ويه اخوانه وابو، كملت كلشي وصاحو راح نطلع وره الغده، تغدينه ؏ السريع والكل مخبوص نروح منااا ونجي مناا لان حجزنه ؏ مطار بغداد وخاف نتأخر بالطريق

(الخبصة الي الله لا يحرمنه منهه🌚🔥)

بدلت ملابسي ولبست مانتو جوة الركبه لونه بيجي وبنطرون اسود وشال اسود، حطيت مكياج طبيعي، واني جاي احط الحمرة ودخل بكر للغرفه

-بكر: هجران حظريلي ملابس

-ايي صاار

حظرتله بنطرون جينز وتيشرت ابيض وطلعت حذائه السبورت وساعته ومحابسه، بدل ملابسه واني صافنه عليه شگد حلووو يطلع من يلبس بنطرون واصلاً يطلع عبالك غير واحد، راح ؏ الميز يرتب شعره ويرش عطر

-بكر: شمالچ طاگه صفنه مثل ابو الرصاصي

-ههههه طالع حلو حبيبي

دار وجهه وگال بصوت متلاعب

-بكر: انه من يوم يومي حلوو

-هههه تخبللل

-صگد طالع حلو لهدرجة؟

-اي والله طالع جذاب يلوگلك الابيض

ابتسم ودار وجهه يكمل شسوار شعره، چنت متردده اسأله ؏ سالفه العبايه اذا انزعهه لو لا، فَـہ گلت ماطول مزاجه حلوو خلي اسأل

-گلبي

-اممم

-؏ سالفه العبايه شنو اني ابقى اللبسهه هنا؟

-عادي براحتج ما اجبرچ

فتحت عيوني بدهشة، توقعته رح يعصب لو يگول شكو تنزعين ومن هالحچي

-هجران: يعني عادي انزعهه واللبس لبس مستور؟

-كيفچ

-شعجب؟؟

-وين العجب؟

-مادري بَـس توقعتك رح تگول ممنوع انزع

-لا عادي لان غزل وحلا هم ما يلبسن بَـس بأماكن معينه فَـہ انتي حالچ من حالهن، بَـس هاااا اللبس فضفاض وعريض ممنوع شي لزگ

-لا لا شنو لزگ يله ماشي لعد اني انزل اشوف البنات

-خوش

نزلت والحماس ماخذني صادفتني جوري ؏ الدرج وعيني شفتهه شلون طالعه غير توگع الطير من السمه، اتفقت ويه فيصل وچان جوابه نفس بكر عادي تنزع العبايه وهيه طايره من الفرح

گعدت بالصاله اضرب صفنات انتضرهم يكملون، لان واضح من حماسي كملت اول وحده، دگت عليه امي وحاچيتهه ومطرتني بالتوصيات وديرن بالچن ؏ بعض (قصدهه عليه وع جوري) ولا تضيعن هناك وتغطن زين لا تستبردن ومن هالسوالف فديتهه شگد مشتاقتلهه

انفتحت باب غرفه عميد الدين وطلع منهه، بَـس مبين عليه متوتر وضايج بنفس الوقت راح للمطبخ وبقى هناك مادري طلع بعد ماعرف

مليت گاعده وحدي ورحت اشوف غزيلان وينهه هاي مختفيه من الصبح لسه، دگيت باب غرفتهه وسمحتلي ادخل، چانت واگفه ؏ المرايه تخط كحله بقيت واگفه اتأملهه شلون تجرهه بكل اتقان، من شافتني صافنه عليهه ضحكت

-شمالچ مبگگه عيونچ عليّ

-ههههه حلووه تطلعين بالكحلة

-غزل: يححح غير اذوب اكبر زلمه ههههه

-ههههههه شنو متكملين باقي مكياجچ؟

-لاا ويين ليش هو مرتضى يقبل الكحل وبطلاع الروح يگول اغار

-يي حقه يله اني اطلع بره حتى تكملين تبديل

-خوش حب

طلعت من غرفتهه وتوجهت للمطبخ اشرب مي دا امووت من العطش هناا ماعرف شنو سالفتي اشرب بالمي وما ارتوي، ردت افتح الباب وسمعت صوت مميز گعد يحچي ويه احد وواضح امه، استحيت ادخل فَـہ عدت ادراجي وگلت ارجع لغرفتي بَـس وگفتني حچايته وانزرع الفضول بگلبي من گال بصوت مهزوز

-يووم بعلي يعذبني الهوا التتنفسه ريتي تعبت من التمثيل والچذب شون اللزم رويحتي وما اسولف وياهه وحگ الرضا انتهيت شوون امثل انه ما عاشگهه وهايم بيهه شووون؟!!!!

يتبع☘️...

♛ ♛ ♛ ♛ ♛ ♛ ♛ ♛ ♛ ♛
هااا حبايب شونكم🦦🔥 خوش قفلة حلوة مووو؟؟ ديله لتنسون التعليق والتصويت يحلووويات🔥.