شفاه مخملية الفصل العاشر 10 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي.

#اي وأنتَ گلش ذنِب
چم ليل عِندك رخص يالحاسبك غالي
مالي فراغك چنت بَس أنتَ مو مالي .

♛ ♛ ♛ ♛ ♛ ♛ ♛ ♛ ♛ ♛

-عميد الدين: بووويه غزززل شمااالچ جوااهر شمالهه غزلل ولكم شصااير؟؟؟

-غزاله: بابا فدووة فدوووة احميني فدوووه

-عميد الدين: ولچ شمااالچ مو والله شگيتي افادي احچييي

-غزاله(هستوني جاي احچيله واشوفن مرتضى طب علينه، الوجه محتقن صاير دم وعروگة ناطه..

-عميد الدين: مرتضى شصاير؟؟؟

-مرتضى: ماكو شي عميد

دار وجهه يعاينلي انوب عاين لـ جواهر الواگفه وصافنه علينه بفزع، عاط بعلو صوته

-عميد الدين: ولكمممم تحچووون لا اجي ارگع راس براااس

-مرتضى: خوية مااااكو شي انته ماتعرف غزللل

-عميد الدين: هوه لان اعرفهه احسهه مو طبيعيه غزل شصار؟؟

وگفت بمكاني اللقط انفاسي، همست بصوت متردد واني اباوع لوجه مرتضى الي شكله واااضح جاي يتوعدلي اذا حچيت

-غزل: ماكو شي عميد بَـس شويه تعبانه

-عميد الدين: تعبانة واجيتي تبچين وتصيحين؟!!

-جواهر: غزل حبي شصاير؟ وليش وجهچ اصفر ولونچ مخطوف؟

-غزل(صحت بجزع): مااااكو شييي عوفوني وحدييييي

ركضت اردن لمخدعي (غرفتي) الي صارلي شهر ونص ما طالعه منهه، نمت ؏ سريري ودفنت راسي بمخدتي وصرخت بأعلى صوت اگدر

دموعي تنهمر من عيوني مثل سيل المطر، گلبي مكسور ترعد بي نبضاتي كـ يوم اظلم عاصف، انفاسي ماگدر اللقطهه بشكل طبيعي.. تعبت من كلشي، كرهت روحي وكرهت عيشتي!!

غمضت عيوني بقووة اريدن احبس دموعي حتى ماتطلع بَـس ماگدر، الموقف المريت بي صعب.. حسيت انجرحت وانخذلت من اعز واكثر انسان احبه بهالدنيا، الانسان الي ربيت ؏ ايده وكبرت جوة جناحه والي وعيت وهوه يگول "فنة اليجيس (يلمس) غزالتي" هيچ يصير بيه وماگدر احچيله واشكيله، ومن منو اشكيله؟؟ منو اخوو الي صار خطيبي؟؟؟!

رفعت راسي من المخده واعاين ؏ غرفتي، صار اكثر من شهر رهف تنام ويه ابوهه بغرفته لان كل يوم تفز مخروعه وتبچي وتونّ ؏ امهه.. وحلا تنام ويه امهه لان مريضة، اما جواهر وشهد عدهن غرفه سوه

وانه گاعده هنا وحيدي آكل روحي بروحي واموتن كل يوم كلما توگع عيني ؏ اصبع ايدي الايمن وانه اشوفن حلقة محاوطه اصبعي، حلقة نهت حياتي ومستقبلي وطموحي واحلامي

حلقة احسهه محاوطه رقبتي وحابسة نفسي دمرتني وخلتني ابتعد ابتعاد كلي عن عميد الدين ولا اشوفنه ولا اسمع حسه اليردلي روحي، صارلي اكثر من شهر لمحة ما لمحته.. ماگدر اعاين لوجهه واتحسر، اموتن من القهر وانه ادري بروحي عاقدة ؏ اخو صارلي شهرر

يوم عقد المهر چان يوم اسود، نحس، كأنه غمامة سودة حطت ؏ راسي وسودت عيشتي.. يوم الي گلت بي "نعم انت وكيلي" عساني انخرست ولا گلتهه، وانه اشوفن دموع امي تنهمر على خدودهه وهيه تشوف حظ بتهه الي خذت اخو حبيبهه، امي الوحيدة الي چانت حاسة بيه احبن عميد وروحي معلگة بي

وچنت مصدومة لان سكتت ومافد يوم هددتني لو حاسبتني ؏ مشاعري الي مو بيدي والي ماكدر اتحكم بيهه بَـس ليش تحاسبني شفايتلهه يصير عدهه نسيب مثل عميد هيبة وشهامة ورجولة اوووف يالقهر

الصبرني قرار ابوي وشوي ريحني من گال العرس بعد مو هسة حتى عوود نتعود ؏ بعض

بَـس وين نتعود ؏ بعض وانه كلما احطن راسي ؏ المخدة اتخيل عميد يحاچيني ويلعب بشعري ويضحك وياي وينكت عليّ وع رهف

اوووف المفروض هوه بدال مرتضى يكون هوه اليغازلني ويحارشني واتدلل عليه، غمضت عيوني بقوة من تذكرت شنو سوه بيه مرتضى اليوم اريد انسسى ماريد اتذكر شنو حاول يسوي وياي من صاحلي وانه گاعده بغرفتي احوك لفاف اگظي وكت بي

-مرتضى: غزاله تعاي شوي

-غزاله: مرتضى مابيه

-مرتضى: ولچ گومي شمالچ اريدن احاچيچ

-هففففف خيررر

-شمالچ تأفأفين

-ماكو شي گول شتريد؟

-مرتضى: هااا اءء تعاي لغرفتي نسيت شغله هناك

-خوش جيب شغلتك وانه اوگف انتظرك بالصاله

-مرتضى: غزل شسالفتچ تعاي ما اتأخر

رحت وراه من لا چارة اريدن اخلص منه ومن نگه، صعدت الدرج ووگفت بباب غرفته اشوفه شجاي يسوي

-مرتضى: تعاي شمالچ تنحرتي بالباب

-مرتضى يلهه بسااع ترا عندي شغل

-وين عندچ شغل وانتي حتى ماتطلعين من حجرتچ

-اي عندي شغل بالحجرة

-ليش ما اجيتي ويانه البارحة من رحنه نصيد؟

-ماريد مابيه حيل

-مرتضى: ترا اخيچ عثمان زعل رجع للانبار وماشافچ

-لا شفته وودعته من طلع

-امممم

احس بنظراته عليّ اكلتني، درت وجهي من الجهة الثانيه ماريدن اشوفه ولا اشوف نظراته المليانه حب ولهفة

جفلت من تقرب عليّ وسحب ايدي ودخلني للحجرة

-غزل: مرتضى شمالك ليش سحبتني جوة؟؟

-مرتضى بهمس: غزاله احبچ

-گلت بفهاوة: هاااا

-ههههه اي احبنچ وعلي

سكتت ونزلت راسي، انه ادري بي يحبني بَـس ولا مرة گايلهه.. ماحسيت اله جرني ؏ صدره وشبگني بقوه حسيت صدري انخفس وتكسرت عظامي

-غزاله: ااه مرتضى شمالك

-ولچ احححويي من اغدي سبع فدوات ؏ هالريحة يبعد بيتي

حاولت ادفعه عني بَـس ماگدر، جسمه نفس عميد ضخم ومعضل، اخيراً زاحني عن صدره بَـس لسه لازگة بي باوع بعيوني وهمس

-مرتضى: وانتي تحبيني؟

-هاااا

-هههههه احچي ولچ

-احم شگول؟

-تحبيني لو لا؟

ظليت ساكته وانه اعظ بشفافي هاي عادتي من اتوتر املخ شفافي تملخ، رفعت راسي اعاين عليه اشوفه يبلع بريگة وعيونه على وجهي

ماحسيت اله كظني حيل ودفعني ؏ سريره ونزل عليه يبوسني، يا بويه شاغت روحي وهوه يلتهمني بوحشيه ظليت اصرخ وابچي واول صوت طلع مني "عميد الدين" ظليت اصيح بأسمه واستنجد بي اريدنه يجيلي ينقذني مثل كل مرة اوگع بمصيبه

-مرتضى: اششش صوتچ لا تفضحينه

-مرتضىىىى فدوووة عوفني فدوووة ابوس ايدك مرتضىىىى

-ولچ انه حلااالچ واعشششگچ ليش ماتحسين بييييه

-اي اي احس والله احس ادري تحبني فدوووة گوم عني

كل هذا ورجع يبوسني بهمجية، يعظ برگبتي قوي، انوب نزلت ايده ؏ افخاذي ونهضني گعدني بحظنه.. شال دشداشتي يريد ينزعني وانه ؏ صريخة الوحدة اصيح بأسم منقذي "عميد الدين" بَـس صوتي مايطلع لان كمم حلگي بأيده بعنف

ظليت ادفر بي بكل قوتي ملخت وجهه بأظافيري عاط

-مرتضى: چللللبة لييييييش شبييييه ماترديني شبييييه

-وخرررر عني مرتضى اله اگولن لعميد عليك

-حتى اشگ حلگچ نصيييين وعلييي

-شترييييد منيييي

-مرتضى: اريدن گلببببچ!!!

گوة ملصت روحي منه وركضت بره غرفته نزلت الدرج طبگت كل بايتين سوه وهوه يركض وراي، وصلت للمطبخ استنجد بأحد وشفت جواهر جاي تحچي بالموبايل وعميد هستوه طب للبيت لابس لبسه الگصابه والبوت مالته كله دم

ردتلي روحي من شفته ميته عليه وع طلته، وانتو شهدتوا شنهو الصار بعدين ماعرف ليش ماحچيتله يجوز خفت من قرار ابوي اذا يفتهم ويخلينه نتزوج بساع وانه ماگدر اتخيل روحي بغرفة مرتضى وانام واگعد ؏ وجهه

نفضت راسي بقوه اريدن انسى الصار ورحت ؏ الكنتور خذيت ملابس وگبل رحت للحمام اسبح، جلفت جسمي جلف اريدن اشيل عطره عني وعن جسمي

وگفت جوة الدوش وبچيت بكل قوتي هلكت اريدن اموت روحي واخلص من مرتضى، كملت ولبست تراك وردي قميصه طويل ولفيت الخاولي ؏ راسي

باوعت لوجهي بالمرايه صاير احمر وانه بيضه حيل فَـہ يبين مصلوخ، راحت عيني ؏ رگبتي يممماااا مزورگة وكلهه اثر، همزين جايبه شال وياي ماعرف شكو جايبته بَـس اجه بوكته

لفيته حول رگبتي وتوجهت لغرفتي، وگفت ؏ الميز تواليت امشط شعري البني الگصير يوصل لـ چتافي، سبحت بالعطر اريدن انسى ريحته واطلعهه من خشمي..

رجعت ؏ سريري ولزمت اللفاف احوكة، نقشت اسمي عليه وحواليه نجوم وحرف العين وبصفه دال صغير بالزاوية (يرمز لـ عميد الدين) اريدن احس بي حتى من اللبس ملابسي هوه اماني واستقراري ومُهجة گلبي

سمعت باب غرفتي اندگت..

-غزل: نعم؟؟؟

-تسمحيلي ادخل؟

يمماا گلبي هذا صوت عميد، گلبي يرگع بقوة واحس معدتي خبطت.. شجابه لحجرتي؟؟ صارله اكثر من شهر يحاول يحاچيني وانه اصده وماريدن اختلط وياه، دگ الباب اقوة

-عميد الدين: غزل نايمه؟؟

-گلت بصوت يرجف: تفضل

طب للحجرة وطبگ الباب وراه، تقدم ناحيتي وانه اشوف ابتسامه مرسومه ؏ ثغره وشعره مبلل ومخربط ؏ وجهه واضح هستوه سابح، وگف گبالي وانه نزلت راسي ماريدن اعاينله

-عميد: شلون كيفچ؟

اللتزمت بالصمت، ظل واگف ينتظر اجابتي بَـس چنه يأس اجاوبه، گعد ؏ سريري حك رگبته واحس نظراته عليّ، همس بصوته الخشن

-غزاله عاينيلي

مارفعت عيوني ولا كأن اله وجود، تنهد تنهيده شگت صدره شگ وبنفس الوكت شگت روحي وياه

-عميد: انه ادري ليش زعلانه عليّ وماتحاچيني، بَـس يا بويه انه شنهو البيدي؟ عركة وعاركت مرتضى ومزاعل اخوي وعضيدي لخاطرچ من يوم الهوسة لسه چا شسوي بعد؟!

رفعت عيوني اباوعله شكله واضح عليه الحزن وملامحه ذبلانه عكس كل مره من يجيني ويلتقي بيه وجهه وگفاه يضحك ومبتسم، رجعت نزلت راسي واسمعه يحاچيني بهدووء

-غزاله انه ماگدر ؏ زعلچ وعلي صارلي شگد لا ليلي ليل ولا نهاري نهار، احسن رايحة روحي ماتحمل هالجفه (الجفاء) منچ

ظل يعاينلي وانه احس نظراته تچويني والدمعه بعيني گوة كاظتهه ماريدن ابچي جدامه، بَـس ما گدرت اقاوم اخر كلمات همسهن واحسهن شگن گلبه وطلعن

-عميد: غزاله طرّ گلبي الشوگ

رفعت عيوني اعاين بعيونه چانن بيهن شگد حچي، دموعي غرگت وجهي، ينزلن وحده وره الثانيه كأنما بسباق، مد ايده يمسح خدودي

-عميد: لا تبچين يرويحتي وحگ هوه علي كل دمعه تنزل منچ تزرف افادي

گمت ابچي بحرگة، بقهر، بتعب، بعتب.. شهگتي علت وهوه عيونه عليّ ويمسح دموعي

-عميد: بسچ بنيتي لا يوگف گلبچ بسچ غزالتي لا تكدريني

-غزاله: عميد انه تعبانه

-عساهه بعدوينچ يبعد ابوچ

-ليش رضيت مرتضى ياخذني

-شبيدي غزل؟؟ والله مليت وانه اتوعدله واهدد بي حتى يتركچ وهوه راكب راسه مايرضى

-عميد انه ماريدن مرتضى انه اريد...

قاطعني بساع

-عميد: لا بويه تتعلمين عليه هذا زلمتچ لا تحچين هيچ

-انه ماحبنه ولا اريدنه عميد ما اطيقه!! انته لو بَـس تعرف شنهو الي بگلبي

-غزل انه ادري شنهو البگليبچ، والي جاي تفكرين بي ما راح يصير بويه خلص عقدتي ؏ اخوي وانتهى الموضوع

-وانته تسكتتت؟؟؟ ليييش؟؟؟ عميد انته تدري انه احبك واموتن بيك ليييش ترضى عليّ ليش تأذيني؟!!!

-غزل بسچ انتي ماتعرفين شنهو الحب وهاي مشاعرچ موش حب

-ايي صح مو حب هاي عشگ!!!

-عميد: غزززل لاااء انه ربيتچ ولچ انه ابووچ

-انته مو ابوي انته ولد عمي وانه اريدك الككك عميد فدووة اندارلك سوي شي گللهم انته تريدني وخلينه نتزوج

زفر بنفاذ صبر، وگال بتصميم

-عميد: انتي ما تحبيني انتي مجرد تحبين اهتمامي!! تحبين من ادللچ واللعبچ واونسچ انتي ماتحبيني مثل الحب الي راسمته بمخيلتچ بووية العشگ شي چبييير وما نوگع بي بسهوله

-بَـس انه اعشگك

-لا بنيتي غلطانه ومتوهمة

-زين ميخالف انه غلطانه ومتوهمة انته مو ماتريد تزعلني وتريدني ارجع مثل گبل اضحك واعيش حياتي؟

-اكيد

-حاچي مرتضى گله غزاله ماتحبك ولا تريدك خليني افسخ منه واكيد ابوي راح يزعل ويعصب انته اخطبني بداله حتى يرضى

-غزلل شهالحچي شمالچ شني لعب جهال عدنه؟!!

-غزل(گمت ابچي بحرگة): ماريدن مرتضىىىىى ماريدنه!!!

-حتى لو ماتردينه وصگد فسختو وكلمن راح بطريج انه مستحيل اصيرن الچ

-ليييش شبيه؟؟؟

-لچ بويه مابيچ شي بَـس انه ماگدر!!! اتخيلچ مثل رهف شلون ترديني اتزوج بنيتي؟!

-انه مو بنيتككك

-ادري والعباس ادري بَـس انه اشوفنچ هيچ

-تتعود صدگني من تشوفني جدامك رح تحبني والله انه اگلك

-لا غزل ماراح احبچ

-لييييش

سكت وسحب شعره ليوره، گام عني

-عميد: خلص انسي

-لا مانسى!!!

-اوووف غزل اوووف

-شمالك تذب حسرات عميد حاچيني

-عميد(گلت بحسرة): لان گلبي مو ليه

-شنهو؟

صفن بوجهي ثواني وهز راسه بقهر

-عميد: اي بويه هذا (اشر ؏ گلبه) مو الي

-غزل: عميد!!! انته عااااشگ؟؟!!!

-حسسسچ غزل عااالي

-اذا گصدك ؏ شيلاء الله يرحمهه عادي ادري بيك تحبهه ولسه براسككك

-الله يرحمهه لا بويه مو شيلاء هاي اجت ضربت گلبي وعگلي وكل نسمه بجسمي

-منهييي هاااي الماخذه گلبكك وموهدنتك؟؟؟

-حسسسسچ نصيييي

-وشنو يعنييي واذا صيحت!! خلي الكل يسمعععع انته مو حالف ماتزوج وره شيلاااء مو حالف عميييد

-اييي حالف وانه ماگلت رح اتزوجهه

-چا من تگول عاشگهه شني تظل تباوعلهه وتتحسر

-بالضبط

-شنهووو عميد انته مصخن؟؟؟ بيك شيي؟؟

-عميد: لا بويه صاحي

-چا ليش ماتزوجهه؟؟؟ وهيه هيچ امدولبتك؟!!

-ماگدر غزل وكافي تعيطين ترا وصلت حدهه!!!!

قاطع نقاشنه دخول رهف للغرفه، ظلت صافنه عليه وع ابوهه

-عميد: ها بابا رهف شمالچ؟

-رهف: بابا اريدن احاچيك

-عميد: خوش جاي

گام عني وراح وراهه، يممممه گلبي يفور متتت اختنگت اريدن اعرف منهي هاذي العامية عينه وگلبه وتفكيره!!!

**

"رهف"
چنت گاعده بغرفة ابوي اللعب بموبايله واباوع يوتيوب وانقفل الموبايل بالغلط، رحت ادور عليه طبيت لغرفه حبوبه عطيه چانت نايمه، رحت للهول اشوفه خاف هناك بَـس شفت جواهر جاي تدرس وبكر گاعد ؏ القنفة يلعب بموبايله

-رهف: بكر شفت باباتي؟

-بكر: لا من جينه ماشفته بعد

-رهف بحيرة: چا وينه؟

-جواهر: رهوفة خاف طلع؟

-رهف: لا هذا موبايله عندي شلون يطلع ويعوفه

-جواهر: لتخافين حبي اكيد گاعد بالديوان

-رهف: اي يجووز

تركتهم وطلعت جاي اريد ارجع للغرفه وسمعت حسه عالي طالع من غرفه غزاله عبالك جاي يتعاركون

ردت اطب عليهم بس سمعت شي يبس رجليه وماگدرت اتحرك، ابوي گال بالضبط

" گلبي مو ليه!!"

وگفت وره الباب اريدن اتأكد من السمعته، وفعلاً طلع احساسي صححح انه حاسه ؏ ابوي مو طبيعي ودائماً باله شارد وهواي يسهر ويفكر

دخلت للغرفه سكتت غزل من شافتني، بَـس بعديش وره ماسمعت حديثهم كله، طلع ابوي وياي ودخلنه لغرفته وانه گوة كاظه روحي، انفجرت بوجهه

-رهف: بااابااا شنهووو الحچي السمعتتته؟!!!!

-عميد: رهفف شمالچ تصيحين شكووو؟؟

-حچيك ويه غزلل شنهوو هذا؟!!

تغيرت ملامح وجهه للدهشة والحيرة

-عميد: رهوفه بابا تعاي اسولف وياچ

كظ ايدي راد يجرني ناحيته دفعته حيل وعطت بأعلى صوتي وانه احسن بلعومي يطلع ناار

-منهييي هاااي العااشگهه والمدولبتتتتك؟!!!!!

-عميد: رهفففف حسسسسسچ

وچان يدخل بكر علينه بالغرفه اكيد سمع صياحنه، علامات الحيرة ؏ وجهه، گال بأستغراب

-بكر: عميد صگد الحچي السمعته؟؟

ابوي صفن بوجهه وماحچة شي، عطت

-رهف: احچييييي (كمت ابچي بصوت عالي) بااابااا ليششش تعشگ ؏ امييي لييييش حرااام عليييك

-عميد: رهففف شمالچ شنهو الحرااام

-شلون يهلك گلبك تسكنه وحده غييير امييي

-عميد: رهف تعااي افهمچ اسكتي بسسچ

-ماااسكت والله مااااسكت منهي هاي النذللله الحقييره المسودنتتتك

جرني عليه حيل وكمم حلگي

-عميد: ولچ حسسسچ

عيني بعينه ودموعي تجري النفس گوة اسحبه، عيونه صايرات حمر ومبين عليه متوتر، بكر عاد سؤاله ومبين عليه مدهوش من تصرف ابوي

-بكر: عميد شمالك كاظ البت هيچ ولكم شمالكممم؟؟؟

-عميد: ماكو شي ماااكو بكرر اطلع بلا امر عليك

بكر ظل واگف يعاينلنه، دفعت ايده عن حلگي وصرخت

-رهف: ليييش يطلعععع گله يا شيييخ عميييد گله انته عااشگ وطايح چفي ؏ وجهك!!!!

ماحسيت اله براشدي قوي فر وجهي فرر، كظيت خدي وانه دموعي تهمل

-عميد: حسسسچ ماهيسسسه والله ماگول غير تفيي (تفل بالگاع) ؏ هالربايه السززز تعلين صوتچ عليّ ولللچ

ركض بكر عليه چتف ايده من وره يخاف يهجم عليّ بَـس انه ادري ابوي مستحيل يسويهه

-بكر بصدمة: عمييد شمالك ياخويي ليش تطگ البت؟؟

-عميد: بكررر لخاااطر ربك عوفني ولك اتركنيييي شني انه طليي وكاظني هيچ

-بكر: ماعوفك لحدما تهدأ اخافن تأذيهه

عاط بصوت رج الحجرة والي خله جواهر وشهد وحتى حبوبه عطيه وبيبي انتصار تجي

-ولككك انننه أأذيييي بنتييييي آآآآنه هدني ولللك هدنيبيي

اخيراً بكر هده وحبوبه عطيه تگمز وتصيح

-حجية عطيه: وللچ يالسلبوووحة شمصخمة ويه ابووچ ومخليته صاير چبريت

-رهف(گمت ابچي بحرگة): حبوبه ابوي عا....

ماگدرت اكمل الحچاية ابوي عاط بصوت عالي زرف طبله اذني

-عميد: وحگ ابو فاضل رهف اذا حچيتي شي تشوفين شي بعمرچ ما شفتي مني وانه حلفت وچلامي ماعيده!!!

گال هالكلمات وطلع من الحجرة، راح وراه بكر بَـس صده عنه، بقيت واگفه بمكاني سارحة لسه مامستوعبه ابوي يمد ايده عليّ

-بيبي انتصار(ام عميد): ولچ رهف شصاااير؟؟؟ ابوچ شماله معصب؟؟

-حجية عطيه: يااااء ولچ ماتحچين شني خرسيتي شني هالسالفه الي يتبره منچ اذا حچيتيهه؟!!

-رهف(غطيت وجهي بأيدي وحبوبه عطيه تنگ ؏ راسي

-حجية عطيه: ايييي يالمغموگات الله اعلم شمصخمات انتي وغزل ويه الزلمة اله تسودننه!!

تركتهم وطلعت بره حجرة ابوي وانه دموعي عشره عشرة حسيت روحي اختنگت وانه اتخيله راح من ايدي وراح يهملني ويتركني وتجي مرة تاخذه ؏ الحاظر محظر..

طلعت گبل للبستان اريدن اشم هوا احس روحي حَ طگ من القهر ابووي الي دومي رافعه راسي بي واغور صديقاتي واگول مستحيل يعشگ ؏ امي ويحبهه ويموت عليهه وحتى وهيه ميته طلع عاشگ وولهان!!!

گعدت ؏ ثيلة ابچي وانه استرجع ذكرياتي وياه، شلون چان يگولي انتي بنيتي وحبيبتي ونفس ريتي وماكو مرة بهالدنيا تگدر تاخذني منچ لانچ الاصل انتي الشيخة يبعد ابوچ انتي امانة شيلاء حبيبتي!!

اووووف يا بابا هيچ تخون الامانه ورح تجيب مرة غيرهه!!

غمضت عيوني عسى اهدأ، فززني صوته

-رهوفة شبيچ؟

رفعت راسي اعاين عليه، مسحت دموعي

-رهف: ماكو شي هلوو زيد

-زيد: هلوو بيچ، هااا شو گاعده هنا وحدچ؟

-هيچ

-زيد: اممم، والدموع الي بعيونچ هم هيچ؟؟

-رهف ببكاء: اوووف زيد احترگ گلبييي

-اسم الله ؏ گلبچ شبيچ رهف شصاير؟؟ ابوچ صايرله شي؟

-لا لا اسم الله بَـس اكتشفت شي موتني

-الي هوه؟

-ابوي عاشگ

ارتسمت ابتسامة فرح ؏ وجهه، هز راسه وگال بفرح

-زيد: حلووو ؏ الخير ان شالله

-شمااالك زيد وين الحلووو وين الخييير؟؟؟!

-زيد: ليش رهوفة فوگما تفرحيله اخيراً طلع من الحزن الديعيشه ورح يكمل حياته

-شنهو هالهجي!! يا حزن انته شجاي تگووول؟!!!

-ليش قليل ابوچ صبر وره وفاة امچ؟؟ وانتي كلچ عمرچ ست سنوات ورباچ وكبرچ ومخلاچ تحسين بنقص؟!

-ابوي يحبني واكيد حيسوي هذا الشي سواء امي ميته لو لاا

-صحح بَـس عميد ماصارلچ بَـس اب حاله حال كل الاباء!! صار ام واخ وحبيب وكلشي الچ، دومه يخاف عليچ وع مشاعرچ وميريد يأذيچ كوومة قدم تنازلات لخاطرچ

-ليش هوه شمسوي حتى قدم تنازلات لخاطري؟

-تدرين رهف ابووچ شگددد زلم هدوله بناتهم!!

-شنهوو؟؟؟

-مثل مسمعتي!! يمكن ابوچ اكثر شيخ انهدتله بنات هههههه

-ليش عود؟

-وليش لا هم صغير وهم وسيم وهم كريم واخلاقة ينحلف بيهه

-ايي چا ليش ماقبل وحده من ذني الهدايا؟

-لخاطرچ

-لخاطري؟؟؟

-اي والله، شوفي اني امي دلال تسولفلي تگول شيخ عميد عنده انتي رقم واحد بهالدنيا يدوس ؏ نفسه ويأذي روحه ولا يأذيچ ويجرح مشاعرچ!! تدرين حتى حچي گام يطلع ؏ ابوچ

-رهف: يمممااا منهو هذا اليحچي ؏ ابوي؟؟ وشنهو اليگولو؟؟

حك رگبته وظل ساكت حاولت اسأله وهوه مايقبل يحچي

-زيد: رهوفة هسة هذا مو موضوعنه اني اريد ابينلچ ابوچ شكد يحبچ ويحترمچ!! متحمل كومة ناس حشاچ زبايل لخاطرچ حتى متزعلين

-رهف(نزلت راسي بقهر): زيد انه ماتحمل تجي وحده وتاخذ ابوي مني

-ومنو يگووول تاخذه؟؟

-انه احسن يروح مني ويگوم يضوج اذا اجي انام بصفه بالليل

-هههههه لا رهف شنو السالفه

-والله زيد احچي جددد بدال ماينيم بنيته بحظنه خوب ينيم مريته

-هههههههه والله يا رهف عليچ سوالف

-زيد انه ما جاي اتشاقه شمالك

-ادري ادري هههههه بَـس ماتوقعت تغارين ؏ ابوچ لهدرجة

-لا منهو يگول اغار عليه

-ابدد متغارين ابد ههههههه

ضحكت ؏ ضحكته وانتبهت لكلامي، يبووي صكد انه اغار ؏ ابوي واريده بَـس ليه

-زيد: يله رهوفة نرجع للبيت

-اي يله

ردينه بَـس نمشي بطيء لان خطيه زيد مايگدر يمشي طبيعي لان رجله تعرج، وگفنه صوت صياح جاي من رجال

-زيييد الاعررج

درت وجهي اعاينله وعاينت لـ زيد ساكت بَـس وجهه صاير احمر مبين عصب

-الرجال: هاااا شني تتمختر ويه الحب ههههههه

-رهف: انته منوو وشتريد من عدنه؟؟

-زيد بهمس: اششش رهف

-الرجال: احيييي مني انتي يحلوة شكلچ مو غريب عليّ

-رهف: انته شيخصك

-الرجال: ههههههههه لا ولسانچ طويل

-رهف(جاي اريد ارده وزيد كظ ايدي حيل واشرلي بعيونه اسكت، صفنت وانه هستوني استوعب هذا الزلمة شلون دخل لبستاننه؟؟! والحارس وين؟؟

-زيد: شيخ شرايد؟

ظل يباوعلي بنظرات موحلوة مبين عيونه زايغه، ضحك واشر عليّ

-الرجال: هاي منهي؟

-زيد: ستار عوف البنيه كلامك ويايه

-ستار: اوووي داده يبن بغداد ههههههههههههه انه اريدن زلمه واحاچي انته ياهو واحد ورنه (جبان) واعرج فوگاهه

زيد صار كبريت، بَـس ظل ساكت هذا شماااله ساكت ؏ هالدثو

-رهف: انته شمااالك ليش تحچي ؏ زيييد

-ستار: اويلي بويه من اشتعلوو ولچ شني هاي انتي بت لو لعابه؟

-رهف: انته كللش مزعج وعع لعبت روحي

-ستار: هههههه لك زيد بشرفك گلي هاي مني

-زيد: رهف روحي للبيت بسرعه

-رهف: بَـس زيد هذا..

-زيد بعصبيه: رهفففف رجعي للبيييت!!!

اشرت براسي "اي" ورحت اركض اووف يالقهر ردت اطلع لساني ؏ هذا الدثو بَـس حرمات زيد واگف هسه يحچون عليه، وصلت لباب المطبخ واذا اسمعلكم الهلاهل والهوسات ليوين واصله

گلبي وگع ببطني من الخوف بَـس لا لبالي صح!!!!

يتبع☘️...

**

من البارت القادم👇🏻

گاعده بالحديقه ؏ الثيله واللعب بالبزازين.. عيوني كل شويه تصير ؏ باب الحوش ويينه وليش لسه مارجع تأخر الوقت، ظل بالي اخاف صارله شي؟؟ اوووف منه عنودي ومياخذ حچاية!!

رحت ؏ باب الحوش فتحتهه شويه ومديت راسي اباوع، بَـس اجه صوت من وره نززني

-ليش ماده بوزچ من الباب؟

درت وجهي واذا اشوفه بوجهي، ابتسمت من باوعت بعيونه المطفيه، برمت شعري بأصبعي مثل عادتي من استحي، گلت بدلال

-چنت انتظرك..

♛ ♛ ♛ ♛ ♛ ♛ ♛ ♛ ♛ ♛
توقعاتكمممم😎🦦
+
احبكم واايد وااايد😔💕