♛ ♛ ♛ ♛ ♛ ♛ ♛ ♛ ♛ ♛
"شفاه مخملية"
بقلم: زهراء السلامي.
#شمحلاهة لو جت صوبي ، تشبه سًمار ذنوبي
ولو حدرت يمي وشفت لوعة بياض عيونهة.
(بقلم ithuda )
♛ ♛ ♛ ♛ ♛ ♛ ♛ ♛ ♛ ♛
"هجران"
سمعت صوت رجال ورايه نززني، درت وجهي جفلت من شفته كذلك بالفانيله الداخليه ولابس بجامه بيضه وشعره مخربط ؏ وجهه، گال بصوته الخشن المميز...
-شجاي تسوين؟؟
-گلت بفهاوة: هااا؟؟
ضحك من شاف حالتي، نزلت راسي بسرعة لان استحيت مبگگة عيوني عليه، جر البردة وگال بمكر...
-عميد الدين: ليش جاي تسنطين ؏ بكر؟
يباااووو انلاااصت اللحگني يا حُسيين شأسوووي، ضحك بخفوت وحك مؤخرة راسه، اردف..
-شنو اسمچ گلتيلي؟
رفعت عيوني اباوعله، واگف گدامي مچتف ايده بارزات عضلات ايده العملاقة، اكيد انبنن من وره الذبح والسفح بهالحيوانات البريئة..
-ماگتلك
-عميد الدين: شني؟
-اسمي.. ماگتلك عليه من قبل
-هاا هههه يله هسَّ گولي
-اسمي هجران
-اسم غريب ومميز
-ابتسمت: انته هم اسمك غريب ومميز
ابتسم من گلت هيچ گبر شبيه اني عدت نفس حچايته، تركته ودا اريد اعود ادراجي واروح انخمد بالغرفه قبل لا تصيرلي مصيبه تالي الليل.. گال بصوت هامس...
-عميد الدين: غزاله نايمة؟
درت وجهي اباوعله، هزيتله براسي "اي" ، اردف...
-هالبت سودنتني
-شنو؟؟
ابتسم وحرك راسه بـ "ولا شي" تركته ورحت انام وبعد ماحسيت الا ثاني يوم الصبح جوري تگمز ؏ فراشي وتضحك..
-جوري: هجرااان هجرااان هجرااان هجرااااااان
-هاا هااا شكووو يا صباح خييير شكوووو
-جوري: لچ گوووومي عندي خبررر يسووووه مليوووون
-شكو جوري تره بعدني مطفيه ماستوعب شي
-لچ فيصصل فييييصل
-شبي
-رح يخطببببني اليييوم
-شنو؟
-لچ اصحيييي هجرران فيصل رح يخطبني اليوم!! واساساً همه جايين هنا علمود يخطبووووني اله، رادو يحچون بالسالفه البارحة بَـس ما صارلهم مجال
-انتي صدُك تحچين؟
-جوري بحماس: ايييي ولچ اييييي
-فرحت ؏ فرحتهه: اللله خبر روووعه ؏ الخيير حبيبتي
جرتني تبوسني
-جوري: يوم الالچ وتاخذين اليحبچ ويستاهلچ
-صدُك تعااي انتي شمعرفچ بهالشي؟؟ شمعرفچ جاي حتى يخطبچ؟؟
گامت تمتمت وتبلعم، هددتهه اكول لأمي اذا متحچيلي...
-جوري: اگولج بَـس متگولين لأحد ولا تعصبين
-اللهم طووولچ يااا روح شمصخمممه جووووري
-مامصخمة والله، بَـس ادري بيج معقده وكلشي متقبلين وتگومين تعيطين عليه
-لا ماعيط يله احجي
-اني وفيصل نحب بعض
-شنووووو
-اهوو هجور لتفتحين عيونچ هيچ والله الولد نيته شريفه وشفتي جاي يخطب
-جوري تخبلتي شلون تسوين علاقة ويه واحد!! طبعاً اني چنت حااسه بَـس اجذب احساسي وظنوني
-؏ كيفچ اليسمعچ يكول مسويه سالفه تره هيه كله مراسله وبموبايل فاضل هم
-انوووب
-هجران حبيبتي انتي فدوة رحتلچ لتگولين لأحد حبابه
-لا المن اگول غير حتى يذبحوچ
-يي فدوة استري عليه اني احبه وهوه يحبني ورح نتزوج
ابتسمت بوجهها، چيتت عليه تحظن وتبوس بيه
-هجران: اگولچ جورية تعاي
-ها
-فيصل مو تعارك ويه غزوان ذاك اليوم؟ ؏ شنو تعاركو
-جوري بخجل: علمودي
-ههههه يا ملعوووونه موهدنه ثنين وشلون ثنين
-هههه اووف يارب تصير وانخطب لفصولتي
-دگعدي سوته فصولتهه انوبينه
-ههههه احبه والله هسة تشوفين انتي من تحبين وترتبطين رح تموتين ؏ سمعة صوت حبيبچ مو انوب يگولج جاي اخطبچ
-دخلي احد يباوع لوجهي اول
-هجران ليش دائماً متشائمه
-مامتشائمه جوري بَـس اني موحلوة هيه گوة
-لا شبيچ تخبلين
-هه عليمن نضحك
-خلص عااد فكيهه عگدة حواجبچ ويله امشي نسوي ريوگ
-يله، صدُك لحظة وينهم شنو رجعو للناصريه؟
-لا بَـس طلعو وره الفجر للحظرة هسة شويه ويرجعون
-هاا لعد هم ياله نلحگ
رحت للمطبخ وبديت اشتغل، شفت امي تدگ لحم بالهاون، استغربت شدتسوي من الصباحيات
-ماما شدتسوين؟
-صباح: ادگ لحم متشوفين
-هجران: لا اشوف بَـس منيلنه هلگد لحم؟
-صباح: سيد خليل جاب وياه
-سيد خليل نفسه ابو غزاله؟
-اي
-هاا شعجب؟
-صباح: ماكو عجب بَـس گال مشتهي قيمة كربلائية ويريدني اسويله
-هااا
عفتهه ورحت احظر بالريوگ، شويه واندگت الباب رحت ركض افتحهه صار بوجهي عميد الدين وغزاله وامهه..
-عميد الدين: صباح الخير هجران
-صباح النور.. تفضلو تفضلوو
فتحتلهم الباب ودخلو اجتني غزاله فرحانه وتضحك شايله شعر بنات بأيدهه وتاكل منه.. مدتلي واحد وگالت وعيونهه تلمع
-غزاله: هاچ هجرانه اشتريتلچ واحد وياي
-هههه تسلمين حبي بَـس بعدچ مامتريگه
-غزاله: لا انه هذا ريوگي
اشوفهه تباوع لـ عميد الدين ومكيفه، وهوه يهز براسه ويضحك ؏ سوالفهه، صراحة حتى اني ضحكت هالبنيه سوالفهه مال جهااال ههههه بَـس حيل لايگاتلهه.. دخلتهه ويايه من باب المطبخ واجت تسلم ؏ امي، شو هاي گعدت بالگاع وتربعت اخذت الهاون من امي وگامت تدگ نيابه عنهه..
-هجران: غزل شدتسوين؟
-غزاله: ادگن باللحم
-اي ليش؟ ماما شلون تنطيهه تدگ وهيه جايه تعبانه
-صباح: هيه تريد اكلت راسي الصبح تحب تدگ باللحم
-غزاله: ههههه اي احب اطلع حرگه گليبي بي
-هجران: هههه والله تضحكين اليسمعچ يكول عجوزة وكاتلهه الضيم
رفعت عيونهه تباوعلي وابتسمت ابتسامه حزينه مافهمت معناهه، رحت فرشت السفره وتريگو بَـس هالمرة الزلم وحد والنسوان وحد، اباوع لجوري تاكل بأظافرهه بتوتر عرفت بيهه خايفه من وره خطبتهه..
مشه الوقت سريع واني گظيتهه كله تنظيف وغسل مواعين خطيه غزاله ابد ماعافتني تركض ويايه من مكان لمكان وجوري مختفيه كالعادة وندى گظتهه كله نوم وفنه اليحاچيهه لو يسخرهه.
-غزل؟
-غزل: ها حبي
-هجران: انتي مخطوبه؟
-لاء ليش تسألين؟
-هاا مادري عبالي مخطوبه لأبن عمچ
-غزل: ياهو منهم؟؟؟
-اني ماعرف غير عميد الدين
-لا عندي مرتضى هم، يصير اخو عميد
-هااا، اي هوه اقصد ؏ عميد الدين انتو مخطوبين موو؟
صفنت بوجهي ثواني ودارت عيونهه، ظلت ساكته وماجاوبت، حسيت بيهه ضاجت ليش شكو اني شگلت
-اسفه لان تدخلت بَـس توقعتكم مخطوبين
-غزل: لا حبي ماكو داعي تعتذرين
توقعتهه رح تحچي بَـس ظلت ساكته، واني هم اللتزمت الصمت وماحشرت روحي بسوالف متخصني ولو الفضول عماني..
صبينه الغده وسيد خليل ماات ؏ القيمة ظل يذب بسامير ويسمع مرته وهيه تعوج بحلگهه ماعاجبهه متنه ضحك عليهم.. طارت عيوني ؏ بكر الگاعد وصوته ما طلع وعميد الدين گاعد بصفه كل شويه تجيله مكالمه يفز من مكانه ويروح للاستقبال يحجي بالموبايل ويرجع وعيون غزاله تركض وراه، لحدما حسيتهه طگت روحهه وصاحت بجزع
-غزل: اففف موتننني بموبايله
-هجران: شنو؟
-غزل: ولا شي انسي
گمت اسوي الچاي واجت جوري ويايه
-جوري: هجراان هجرااان
-ها ها شبيچ
-جوري: اكولج شو ماحچو شي شبيهم
-شيحچون؟
-يخطبووني لفيصل شبييچ نسيتي
-هاا لا مانسيت بَـس يجوز امه تحچي ويه امي من يطلعون الزلم
لهناك وسمعنه صوت سيد خليل يلعلع بالاستقبال يحچي بـ فيصل ويحمد بي سواه نبي عرفت هاي يردون يخطبون، جوري گامت تگمز زبگت بسرعه گدامي تريد تسمع
-لچ جوووري وين موليه
-جوري: اششش اريد اروح اسمممع
-لچ عييب اثگلي وظلي هنا اكيد امه گاعده بالصاله وتحاچي امي هم
-ما مااا مااا ونبي اله اسمعهم
وراحت تركض بالصاله، واني شسويت عفت الچاي وركضت وراهه اريد اشوف شلون تصير الخطبه بنفسي اجربهه، همزين چانت الصاله فارغه مبين كلهم گاعدين بالاستقبال..
-سيد خليل: اخوي ابو فاضل انه صارلي يومين ببيتك وانته ماگصرت غرگتنه بكرمك بعد اخوك
-فارس: لا خوية شنو السالفه هـلا بيكم شوكت متحبون تدفرون الباب وتطبون
-سيد خليل: بعد روحيتي ماتگصر، بَـس انه اليوم اريدن طلبه منك واريدنك ماتردني خايب
-فارس: حشه اردك تفضل سيد اسمعك
-سيد خليل: وحگ هوه علي احبنك واعزك مثل اخوي
-فارس: الله يحفضك ؏ راسي والله
-سيد خليل: انه اليوم وجدام كِل هالجوه الخيره اريدن الگرب منك، اطلب ايد بنيتك جوري لوليدي فيصل
-فارس: هاااا
-لا تستعجل بعد اخوك فكر ودوشمهه بعگلك (بعقلك) شاور البت بلچن وتصير غسمه (قسمه) الوليد شاري البت ويريدنهه ؏ سنة الله ورسوله واحنه ساده من صلب الرسول
-ونعم منكم سيد
-الله يعزك خوب انتم هم ساده وع الراس
-الله يسلم راسك
اسمعهم واحس بأبويه مامقتنع بالسالفه مبين من نبرة صوته عبالك ضاج لو انصدم ماعرف شنو بالضبط، ظل سيد خليل يحچي ويحمد بفيصل وبأخلاقه وشلون خوش وليد ؏ گولته وجوري واگفه بصفي تگمز،، لهناك وطلعت غزاله من الاستقبال
-غزاله: هااا مبروك يا عروس
-جوري بخجل: يبارك بيچ حبي
-هجران: ياا شوف هاي تبارك وهاي خجلانه ليش هوه شصار
-غزاله: ههههه يصير يصير لا تخافين، اخوي فيصل عاشگ جورية وماكل روسنه بالبيت صارله شهرين يحن ؏ راس ابوي يريدهه وميت عليهه
-جوري: اوووي حبيبي فديته
-غزاله: هااا هاا هاا هااا ههههههه
-هجران(ضربت جوري ؏ راسهه): ولچ اثگليي لتصيرين خفيفه
-غزاله: عيفيهه هجران شوفيهه شلون فرحانه اغدي فدوة لهلوجه الحلو
-جوري: يروحي تسلمين يوم الالچ
-غزاله: بعد چبدي
-هجران: اييي انتن ظلن وحده تدعي للخ واني لابساتني تردني أعنس وابور ؏ گلب امي
-جوري: اي انتي مو تستحين وتگولين عيب يله روحي عيب روحي
-غزل: هههههه لا يچبدي شني السالفه چا انتي الاصل
-هجران: يممه اروح فدوه للـ چا شگد احبهه
-غزاله: وهيه تحبچ هههه
رحت احمي الچاي مرة ثانيه لان ماطببته، جوري طايرة من الفرح وغزاله همات فرحانه، وديت الچاي واشوف عيون عميد الدين عليه، من تلتقي نظراتنه يبتسملي ويدور وجهه، حسيت بأحساس غريب بَـس حلو هاي اول مرة واحد يباوعلي بهالطريقه
طلعت للطرمة اغسلهه هاي عادتنه لو الدنيا مگلوبه لاازم الطرمة كل يوم تنغسل والبيت ينكنس وره كل وجبه، لهناك وطلعو اخواني فاضل وحيدر يرحون لشغلهم، فتحت البوري وگعدت انگع بيهه مديت راسي من شباك المطبخ چانن جوري وغزل يسولفن وضحكهن ليوين موصل
وبين ما اني حايرة اغسل بيهه وحسيت واحد ورايه، نزيت من شفته
-؏ كيفچ شمالچ كل ما شفتيني وفزيتي شني انه فزاعه
-هجران: يمممه خرعتني شسويلك اذا انته تسّحَب من تمشي
-انه اتسحب لا وعلي امشي بكل اريحيه بَـس انه حركتي خفيفه(وابتسم)
ابتسمت ؏ ابتسامته ونزلت راسي
-عميد الدين: شجاي تسوين؟
-اغسل الطرمه
-اممم
حسيت بنظراته عليه طلع جگاره شعلهه وبده يجر نفس منهه، انطيته ظهري وظليت ارش بالطرمه اتحاشى نظراته الغريبه هفف اني شبيه فرحانه من اشوفه يباوعلي شنو سالفتي
-عميد الدين: شگد عمرچ هجران؟
-(رفعت راسي): ليش تسأل؟
-فضول
-هاا اذا فضول ماشي عمري 17
-اممم
-شو عبالك ماعاجبك
-عميد الدين: شني السالفه وليش مايعجبني
-مادري حسيت هيچ
-لا احساسچ غلط
-وانته شگد عمرك؟ (سألت وتندمت انيييي شعليييه من خرب يووومي، ابتسم وگال...
-انه 35
-هاااا
-عميد الدين: شو چنچ انتي ماعاجبچ
-ههههه لا والله بَـس ممبين عليك
-اي الكل يگول هيچ
درت وجهي اكمل غسل وحااولت اتحاشى نظراته الغريبه، انتبهت عليه يتلفت هواي هذا شبي؟ لهناك وتقرب عليه اكثر، يممه جفلت بمكاني
-عميد الدين: هجران اريد اسألچ سؤال
-هجران(بلعت ريگي): تفضل؟
-اذا انه...
گطم حچايته من شفنه غزاله واگفه بباب المطبخ تباوعلنه وعيونهه تجدح
-هجران: ها غزوله حبيبتي محتاجة شي؟
-غزاله: لااع
نظراتهه مو طبيعيه ساعه تباوعلي وساعه ترجع تباوع لـ عميد الدين
-عميد الدين: شمالچ بويه محتاجة شي؟
-غزاله: ليش من ادگن عليك حاگرني وماتجاوب؟
-عميد الدين: يمته دگيتي؟
-غزاله: گبل شوي
-عميد الدين: چا گبل شوي مو گاعدين سوه شكو داگه؟
-قبل لا نگعد سوه چنت ادگن وانته لابسني
-لا ما لابسچ بَـس ماسمعت الموبايل
-گول والله
-والله
-بعد احلف
-غزل شمالچ
تقربت عليه وگالت بهدوء
-غزل: حسبالي مزاعلني
-وشكو ازاعلچ
-من وره رهف
-وشمالهه رهف؟
-انسى خلص انه اروحن جوه
-عميد الدين: تعاي تعاي شمالهه رهف؟
-والله مابيهه شي
-چا ليش جبتي سيرتهه؟
-بابا انسى ماكو شي
يباوعلهه بنظرات كلهه شك وهيه منزله راسهه گدامه، ذوله شنو سالفتهم ومنو هاي رهف اليحچون بيهه، لهناك اجاله اتصال
-عميد الدين: ها بويه ايي زين لا باچر اردن بعده الفصل ماكمل، محتاجين شي من كربلا؟ شاوري الحجية شوفي؟ خوش يله الله يحفظچ
سد الموبايل وعافنه ورجع جوه، وغزل لسه عيونهه عليه ماهتميت كملت غسل الطرمه ورحت للمطبخ اشوف شنسوي عشه، دقايق واشوف غزاله فوگ راسي
-غزل: عميد حلو؟
-هجران: نعم؟
-غزل: عميد الدين حلو؟
-شهالسؤال الغريب
-غزل: اسألچ جاوبي عادي هوه سؤال طبيعي
-يعني ماعرف شأكول؟
-گولي حلو لو لا
صفنت بيهه مبين عليهه زعلانه والدمعه بعينهه، بَـس ماگدر انكر واكول عنه موحلو لان هوه حلو ومهيوب
-اي زين شكله
-غزل: يعني حلوو؟؟
-اي
-عجبچ؟
-غزل شبيچ عيب هالحچي
-هجران ابوس يدچ ريحي گلبي وجاوبيني
-ليش هوه اني شمعرفني بي حتى يعجبني!!
-شفتكم اكثر من مرة تحجون ويه بعض
-عادي وشنو المشكله حاچيت اخوچ فيصل همات شنو أي واحد احجي وياه معناهه يعجبني
-يعني مايعجبچ؟
-هجران(تنرفزت من اسألتهه، بَـس ردت اخلص): لا ميعجبني
-صگد؟؟
عيونهه تلمع وابتسامه مرسومه ؏ شفايفهه
-اي
-هااا زيييين يله اساعدچ بالشغل
وبدت تشتغل ويايه وتضحك وتسولف عبالك وحدة ثانيه، هاي شبيهه والله ذوله الناس غريبين
-هجران: غزل شنو ابوچ شيخ عشيره؟
-غزاله: لا
-هاا
-غزل: چا ليش تسألين؟
-هجران: مو سمعت عميد الدين يگول عنده فصل هنا فَـہ توقعت ابوچ شيخ العشيرة
-غزل: لا هوه الشيخ
-منو؟
-عميد الدين
-صدُك تحچين؟؟
-هههه اي شمالچ فكيتي عيونچ
-ماصدك مستحيل
-وليش ما تصدكين؟
-هجران: غزل يعني عميد الدين شيخ عشيرتكم؟؟ شلوون وابوچ يصير عمه واكبر منه!
-وشنو يعني
-مو المفروض الچبير يصير الشيخ؟
-لا ماكو هيچ شي، المشيخه تنزل بالنسل يعني عمي عباس(ابو عميد الدين) چان شيخنه ومن توفه نزلت الشيخه لـ عميد
-مامبين عليه شيخ ابددد
-اي هوه سبورتي وفري هههه
-اي والله وحتى اسلوبه وطريقه كلامه مو مال شيخ
-ليش؟
-مادري يعني عميد الدين مبين عليه حباب وهادئ ومتواضع كُلش حتى البارحة من چنت افرش السفره اخذ المواعين مني وماقبل ادنگ گدامهم
-اي هوه غيور بَـس رغم هذا شخصيته گوية ومحد يگدرله
-اي بَـس ماتوقع اكو شيخ مسويهه من قبل يشيل مواعين بدل المرة
-وانتي شمعرفچ بالشيوخ
-داده صديقاتي يحچن بالقصص ونايمات بيهن ويحچنلي اكثر شي ؏ الجنوبيات
-غزل: هههههههه خيه مو كلشي ينحچي بالقصه حقيقي
-اي ادري بَـس دائماً يبينون الشيوخ شخصيه ظالمة وحقراء وماعدهم رحمه واسلوبهم فض ويه النسوان وميحترموهن وسبحااان الله بالنهاية يصيرون ماكو احن منهم ويطلع ديعامل مرته هيج من حبه الهه وغيرته العمياء
-غزل: هههههههه خرب ببليسچ هجران، بَـس لا لا عميد ابدد مو هيچ رغم كل الالم المر عليه والاذيه الشافهه والظرف الجراله الي هد حيله بس ماخله هالشي يأثر ؏ شخصيته بالعكس كِلش هادئ ورزين وما يگلل ادبه ويه احد، يكول حتى لو جنت شيخ مو معناتهه الناس عبيد عندي والمريه ؏ راسي احطنهه فوگ لانهه ام واخت وزوجه وبت
-هجران: الللله شلون حچي حلوو فدوة
صفنت بوجهي عبالك ماعجبهه كلامي، اردفت
-هجران: اءء اقصد يعني مثقف ويعرف يحجي
-غزاله: اي هوه مثقف
سكتت وماحچيت شي بعد، واضح غزاله عدهه شي وياه، لان كلما احچي بي تنغز واني عيني ماسكت لازم انطي رأيي واحمد بالانسان خصوصاً اذا چان زين، بَـس گب عندي الفضول من گالت رغم الاذيه الشافهه يعني هم شيخ وهم اكو احد يسترجي يأذي
كملنه العشه وصبينه وكذلك گعدنه زلم وحد ونسوان وحد بَـس فتره الچاي گعدو سوه.. طببت صينيه الچاي صار بوجهي عميد الدين ابتسم مثل عادته وابتسم لـ جوري وغزل ورانه شگد بشوش هالرجال بس غريب ومينفهم شبي، قدمت الچاي وطلعت اگعد بالصاله والنسوان هم طلعن.. بَـس صوت الزلم چان عالي ويسمع للصاله
جفلت من سمعت سيد خليل يگول لأبويه..
-سيد خليل: سيد فارس بعد اخوك بما ان جينه من الناصرية حته نخطب بنيتنه جوري لوليدنه فيصل، گلنه فرد نوب نزيد الفرحة ونطلب ايد بنيتكم هجران لوليدي "بكر"
-بكر بصدمه: شنهيي؟؟؟
-هجران(فتحت عيوني بدهشة بَـس سرعان مانزلتهن بخجل من شفت البنات يباوعنلي وامي وام فيصل وغزاله واضحة الدهشه ؏ وجوههن خصوصاً غزاله عبالك انسعقت من الخبر، عفتهم وركضت بالغرفه گعدت ؏ فراشي واني سايحة من الخجل، اجتني جوري تضحك
-جوري: هااا للللچ انخطبتي انتي هم
-جوري اسكتي اني گوة واگفه
-جوري: هههههه شبي وجهچ احمر مستحيييه هههههههه
-هجران: صوووتچ لتفضحينه شبببيچ
-طلع بكوري حاط عينه عليچ ومخيل
-جوري اسكتييي
-ههههه ولكم شوفو وجهها شون احمر، الللله هجران شگد حلو حنصير نسوان حمه
ابتسمت من فكرت بالموضوع، جوري گرصتني وگالت بغمزة...
-جوري: فرحانه هجور
-هههه جوررري خلص وخررري استحي
-اوووي يا عيني تستحييي بَـس تصدگين عبالي حاطه عينچ ؏ عميد الدين ماتوقعت بكر
-ياا شوف هاي شجاب عميد الدين
-والله شبيچ تره مبينه نظرات عميد الدين الچ
-هجران: لا مستحيل چان مو بكر خطبني
-جوري: اي هم صدُك، المهم هسة گوليلي عاجبچ الزلمة هههه؟؟
-ههههه مادري
-نزووول مبين عاجبچ چان ماطرتي من الفرح هسة
-تردين الصدُك جوريه
-ايي؟
-ايي يعجبني هوه وعميد الدين ثنينهم
-ياا شوف هاي البايعه حاطه عينهه ؏ ثنين
-هههههه لا ولچ اقصد هيبه وشخصية اني احب الزلم الرزنه
-ايييي كلنه نحب الزلم الرزنه
-هجران: زين گوليلي شنو يحچيلچ فيصل عنه
-جوري: امممم ماعرف شحچيلچ؟
-هجران: مادري فيصل ميحچيلچ عن اهله؟
-شوفي فيصل ميحچي عن اخوانه هواي بَـس يگول بكر وعميد الدين ضلوع وقريبين كُلش ؏ بعض
-مبينين حتى ؏ الاكل اله يگعدون بصف بعض (تنهدت بعمق) افف ياربي
-ههههه هاي شبييييچ تتنهدين اليشوفچ يكول عاشقه وذايبه بالعشق هم
-هههه لا والله مو هيج بَـس تردين الصراحة جورية
-شنو؟
-هاي اول مرة احد يخطبني لهذا السبب هيج فرحانه
-ديلا اليسمع دخلت بالعمرين
-لا مو هيچ قصدي بَـس صراحة توقعت ماتزوج طول عمري
-هجران لتحچين هيج ليش ماعندچ ثقه بروحچ انتي
-مادري مادري
-جوري: لا ان شالله تزوجين ونفرح ونرگص للصبح بعرسنه
-هجران: يارب ان شالله
-جوري: عاد ان شالله يصير نصيب
-ليش حچيتيهه هيچ؟ عبالك خايفه؟
-مادي بَـس اكول يعني خاف يصير ميصير
-هجران: هفففف خرعتيني عبالي شو شنو
احس گلبي طاير من الفرح ابد ماتوقعت بكر يريد يخطبني لو حته حاطني بباله، هوه صح مبين مغرور وشايف روحه بَـس شخصيته مبينه حلوة وشلون ابوه يحاچي وياخذ رأيه شوكت يطلعون وشوكت يطبون حلوو بانيله شخصيه صرمة
چنت گاعده ؏ نار واني انتظر امي تجي تسولفلنه شصار وشنو رأي ابويه، لان واضح ممقتنع بأم السالفه.. اخيراً اجتنه امي مبتسمه، گمزت عليهه جوري وگالت بلهفة...
-جوري: هاااا ماما بشررري شصااار؟؟؟
-صباح: هههههه شبيچ بنتي عيب هالسوالف والله بنات اخر وكت
-جوري: اخر وكت اول وكتت المهم حنموووت من الفضول احچييييلنه شصااار؟؟؟
-صباح بفرحة: كُلش خوش قسمه اجتچن يا بناتي
-جوري بفرح: صدوووك يمه؟؟ يعني موافقه انتي حتى ؏ فيصل؟؟
-صباح: ايي اكيد بَـس ابوكم احسه مامقتنع
-جوري: ليييش؟؟؟ لا ماما حبااابه انتي قنعي فدوة فدوة
امي دارت وجهها تباوعلي، ماتحملت نظراتهه المليانه مكر نزلت راسي بخجل، تقربت عليه وگالت...
-صباح: انتي هجران شنو رأيج؟
-هجران: بكيفكم ماما
-صباح: بنتي تره انتي الحتزوجين مو احنه
-ءء ماما.. ءء اني ماعرف بهالسوالف انتو بكيفكم
-صباح: شوفي حبيبتي اذا ؏ كيفنه ابوچ مامقتنع كتلچ ويگول لنستعجل الناس مو مثلنه وعيشتهم ووضعهم يختلف اختلاف جذري عنه بَـس الولد ميعيبهم شي واني صراحة اشوفهه خوش قسمه لنطيرهم من ايدنه خصوصاً واضح ولدهم شايفيچن ويردوچن
جوري تگمز بفرح واني غايصة بهدومي من الفشلة والخجل، اجتنه ندى تهز رگبه متت ضحك عليهه مامصدگه البنيه، سألتهه عن غزاله گالت كاعده تسولف ويه امهه همزين حتى احنه ناخذ راحتنه
-هجران: ماما ماعرفنه شي عنهم احنه
-صباح: هاااا ايييي شوفن خلونه نبدي بواحد واحد ههههه
-ندى بضحك: ماما ماعدهم واحد الي حبابه شوفي بلكي عميد الدين يتزوجني
-صباح: انچبي انتي بعدچ صغيره
-جوري: ههههههه شوف هاي البايعه هههههه
-هجران: فوگاهه امي تگولهه بعدج صغيره هههههه
ضحكنه كلنه ؏ فرحت امي وشلون متحمسة، حچت لجوري مواصفات فيصل طبعاً جوري مثلت هيه كلللشي متعرف عنه سودة عباتي، انوب اندارت عليه...
-صباح: هسة نجي ؏ سيد بكر
چنت منتبهه ؏ كل حچاية تحچيهه...
-صباح: هوه خريج علوم حاسبات بَـس ميشتغل بشهادته لان متوارثين مهنتهم گصاصيب (قصابين)، هوه چبير اخوته وامه متوفيه
كملت امي التفاصيل الگدرت تعرفهن من مرت ابوه، بَـس طبعاً من اسألهه ؏ شغلات تگولي متعرف
-جوري: ماماتييي يعني انتي تعمدتي تطلعينه گدامهم البارحة من اجو لبيتنه؟
-ندى بحماس: ايييي وتعمدتي نگعد سفره وحده موووو؟؟
-صباح: انچبننن لا ماكو هيچ حچي بَـس اني ادري بفيصل يريد جوريه وام فيصل اتصلت بيه قبل ليجون وگالت تريدهم يتشاوفون فرد مره
-هجران: امممم يتشاوفوووون هههههههه
-جوري بهمس: هجران انچبي
-صباح: شكوو شبيچن تتبسبسن
-هجران: سلامتچ حبي، ايي فيصل راد يشوف جوريه اني وندى ليش طلعنه گدامهم؟
-صباح: مو ابوچ حيسويهه قصه عنتر علينه ليش جوري طالعه وحدهه وليش مو البنات كلهن
-جوري: تدرون اني متفاجأة اصلاً بابا شلوون قبل نطلع گدامهم؟!!
-صباح: اني حاچيته گتله ذوله اهلنه وعادي شنو حياكلوچن قابل، بَـس اني عبالي بَـس فيصل يريد جوريه ولا ادري بـ بكر حاط عينه ؏ هجران
بوخت من الخجل وامي تلاشيني وتضحك عليه وخواتي استلمني يسونهه بالعمدني يعرفن بيه استحي من هالسوالف، شويه واجانه حيدر عافس وجهه
-شبيك حيدوري؟
-حيدر: ماكو شي
-صباح: يمه شبيك مگلوب وجهك؟
-حيدر: ياام اني هاي الخطوبه معاجبتني
-صباح: ليش عود؟
-حيدر: شنو هااي گالبين وجوههم عبالك شو شنو صاير
-جوري: منو گالب وجهه؟
-حيدر: بكر وعميد الدين
-ندى: يااا ليش شبيهم؟
-حيدر: مادري بكر وجهه ميگصه الطبر عبالك غصب وعميد الدين گوه گاعد چان
-جوري: صدُك جذذب ذوله شبيهم؟
-حيدر: اني ادري
-صباح: يمكن اكو سالفه مضوجتهم امي لنفكر ونگعد نفسر بكيفنه
-حيدر: يوم خوب يگولون صار عدهم ظرف همه لااا بكر گمز وطلع بره وعميد الدين وراه
عافنه حيدر وراح، ماغمضت عيني بليلتهه واني افكر بالسالفه معقوله اكو إنَّ بالموضوع؟ ليش هيچ معصبين ومعاجبهم؟
گمت الصبح شفتهم ماموجودين وين راحو
-ماما وين راحو؟
-صباح: طلعو من الصبح
-ها يعني يرجعون ؏ الغده؟
-صباح: لا النسوان عافوهن بالحظره والزلم راحو گالو عدهم فصل لازم يخلصو
-جوري: فصل شنو؟
-هجران: ليش متدرين بـ عميد الدين شيخهم
-ندى بصدمة: شنوووو؟؟!!!
-هجران: ههههههه نفس صدمتي والله
-ندى: اووف هم شيخ وهم صاك تره مايصير چذي
-ماما: انچبي لچ شو انتي فد مرة ماعندچ حياء
-ندى: ماما دعوفي الحياء اليشوف وجهه يفكر بالحياء چنه العافيه
-جوري: ههههه اي والله اذا اني بدال الشيوخ الي يگعد وياهم والله اتنازل لخاطر ضحكته بَـس
-هجران: ولچن ادبسزيات ههههه
-صباح: اني الچن اليوم
گامت امي وشالت سلاحهه (النعال) وبده الشغل الحقيقي، بَـس حرمات ماگدرت تلوح أي وحده لان طارن للغرفه..
مرت الايام وام فيصل كل يوم تتصل ؏ امي علمود الخبر النهائي، وبيوم ما ابويه اخيراً اقتنع ووافق بَـس باللگووة طلع روح امي وما خله واحد ما سأله عنهم.. اتصل بسيد خليل وحددو يوم للمشيه، بَـس اصرّ السيد تصير هيه مشيه هوه عقد سيد
وعيني شنو من مشيه چانت غير انگلب الشارع گلاب معگلين وشيوخ معممين وساده واشكال واللوان.. ابويه گال المهر باچر حته نلحگ نتجهز، واني وجوري نحوس ؏ البدلات والصالونات اشترينه الذهب وكلشي جهز
گعدت الصبح تريگت بسرعه وطلعت اني وماما وجوري واجت غزاله هم، رحنه للصالون وسوولي تسريحة نازكة، گتلهم اريد شعري تعوفو مفتوح لان هوه احلى شي بيه ومكياج بسيط بَـس ام الصالون اصرت تحطلي حمرة غامقة حتى تبرز رسمه شفايفي، لبست بدله بصلي وحذاء اوف وايت حسيت روحي كُلش حلوة، كل هذا يصير واني مامصدگه عبالك جاي احلم، بحياتي مامتخيله اتزوج وفوگاهه يكون هيج شكله حلو ومرتب
جوري لبست بدلة ماروني شنو من كيكة طلعت ومكياجهه ثگيل وهيه حنطاوية طلعت تموت.. وغزاله لبست بدله فضيه ومكياج خفيف وشعرهه مفتوح لان كُلش سرح ويوصل لچتفهه متكدر تشيله
رجعنه للبيت وامي خلتنه نتبوش حتى ميبين منه شي، دخلنه لشارعنه ونشوف الزلم كلهم بالباب، عيني شنو من كشخة وشنو من هيبه.. صار بوجهنه "عميد الدين" حسيت بي صافن علينه وما شال عينه لحدما دخلنه للبيت
گعدنه شويه والنسوان تهلهل وتهوس وطبعاً اسألتهن ماخلصت، كل شويه سائلات امي عن العرسان منين ومن يا عائله وحتى ؏ حالتهم الماديه سألن شگد فضوليات
وره قريب النص ساعه صاحو السيد راح يعقد، اني عقدت بالاول وجوري ورايه.. وگفت بالباب واسمعه يحاچي ابويه بعدين اندار يوجه كلامه اليه
-السيد: ابنتي هجران فارس ابراهيم الـ(اسم العشيره) هل تقبلين الزواج من الشاب المحترم السيد بكر خليل منصور القصاب ؏ المهر المحدد من قبل الطرفين خمسة عشر مقدماً وعشرون مؤخر، اذا قبلتي الزواج فَـہ قولي نعم انت وكيلي
ظل يردد هاي العبارة حوالي 12 مره، گلبي يريد يطلع من صدري ويه كل حچاية يگولهه، اطرافي ثلجت واحس هوا بعظامي من الخوف، بَـس انصدمت من كال ؏ المهر لان اني طلبت عشره بعشره(10-10) جوري الي طلبت هلگد.. ابتسمت بيني وبين نفسي هاي معناهه ميحبون يفرقون بيناتنه لان بحساب مثل الخوات..
اخيراً گلتهه "نعم انت وكيلي" وبدت الهلاهل والتبريكات، اكو فرحة بگلبي احس روحي طايره بالسما.. عقدت جوري ورايه وكذلك استلموهه هلاهل ورگص وردح خبصو البيت خبيصه
گعدنه ؏ الكوشه واشتغلت المزيقة والدي جي، اجت غزاله گدامنه وترگص رگصهه كُلش حلو وهيه بيضه ورشيقه وطولهه حلو، گومتنه ترگصنه لهناك واجن بنات ثنين بَـس دخيل الله شكد حلوات النسوان اكلنهن اكل بعيونهن، وهنه اجن گابلن غزاله وبدن بالرگص
عيوني تطير ؏ الواگفه بصفي العيون خضرر عبالك زمردات وبييضة ثلج، لابسه دلع وزنودهه طالعه بس ماحاطه مكياج بس شويه كحل اصلاً متحتاج لان ماشالله الله يحرسهه جميله بشكل، وشعرهه اشقر طويل يوصل لجوة وركهه بَـس من النوع الغجري(مموج) چانت تتمايل مثل الغصن بان خلت كل الگاعدات يتسائلن عليهه
اجتي غزاله تعرفهن علينه
-غزل: هجران جوري ذني بنات خالو اسماعيل الحچيتلچن عنهن
-هجران: يا هـلا گلبي تشرفنه
-جوري: يا هـلا
-البنات: هلوو بيچن حياتي مبرووك
-الله يبارك بيچن
صفنت عليهن تذكرت من غزاله حچتلي عن بنات خالهه اسماعيل وگالت بالتحديد "يطگن بالگاع" بَـس ماتوقعتهن لهدرجة جميلات گالت هنه تلاث خوات بس الثالثه ماشفتهه گالو مجايه، همه عايشين ببغداد، مثل ماذكرت وحده بيضه وشقره والثانيه حنطاويه بَـس كُلش مملوحة.. والزيد حيرتي طلعن توأم بَـس غير متماثل، تقدمت الحلوة ام الشعر الاشقر عليه وهمست
-انتي خطيبة بكر؟
-هجران: اي گلبي
-الله يسعدكم حبي، اني جواهر
مدتلي ايدهه تصافحني، سلمت عليهه وسولفت ويايه شويه چانت كُلش لطيفه وابتسامتهه مافارقت وجهها، لهناك صاحو حيدخلون العرسان
فصلونه كلمن گعدت بمكان اني رحت للاستقبال وجوري بقت بالصاله اجت جواهر ويايه واختهه التوأم گالو اسمهه "شهد" صفنت عليهن ذني شو سفري حتى حجاب ماكو ؏ راسهن بَـس جواهر جابت شال خفيف وشمرته ؏ ايدهه وصدرهه حتى تغطيهن..
دخل بكر بهيبته وطوله الفارع عطره ترس الاستقبال ترس، تقدم عليه وگعد قريب مني وبدت الهوسات وسوالف النسوان..
شگد لحو عليه يبوسني وهوه ميقبل اخر شي حسيته استسلم وباسني خفيف ؏ راسي، مبين خجول لان ميحجي شي غزل ذبت لحم گدامه وتحاول تلاطفه وتلاشي لهناك شويه فك وبده يضحك وياهه، جرته من ايده وصاحت..
-غزاله: مباركلك يا راعييهه مباركلك يراعيهه، بكووري لا تحچي حچي خلي المخده وانتچي
-بكر: هههه كافي اگعدي راحه غزل
-غزاله: شايف خير ومهنه يراعيهه ماينعرف خدهه من تراچيهه كلللوووووش
يضحك عليهه ويفر بأيده واضح علاقتهم كُلش قويه لان كل شويه تهمسله بشي وهوه يحاول يكفخهه، يعني توقعت تروح تگعد ويه جوري وفيصل لان بحساب فيصل اخوهه من الام والاب بَـس واضح تحب بكر كُلش..
اجت بنيه شابه حليوة ودمهه محبوب تطلع بگصه غزل، اجت تسلم ؏ بكر بَـس شنوو مبين عليهه غايصة بالخجل مدنجة راسهه وگوه تحجي
-رهف: مبروك خوية بكر
-بكر: الله يبارك بيج تسلمين رهف
راحت ويه غزاله ورجعن يهوسن وحده گابلت اللخ ويهلهلن چانت لحظات تجنن متنسي، وطبعاً الكامرات ماوگعت يصورون كلشي حبيت اهتمامهم وشلون حايرين بيه ويحاولون يرگصوني.. طارت عيوني ؏ بكر مبتسم بهدوء وساعه يضحك ؏ غزاله وهاي البنيه الصاحلهه رهف لان صدُك سوالفهن تضحك شلون يگمزن ويسون حركات ، تقدمن علينه اشكاال البنات ذوله شگد عدهم بنات شابات وبدن بالرگص بَـس شنوو مخازي رگصهن ولبسهن يبووو وعووود لابسات حجاب الشعر نصه طالع ولابسات بدلات دلع
ابتسمت من شفت جواهر تغمزلي وتضحك وشهد وغزاله ورهف ذبن لحم، درت وجهي اباوعله عيونه تجدح والوجه احمممر وغادي مي يمسح بي وماملحگ، مد ايده يشرب من العصير الگدامنه، اخيراً حسيت بي يباوعلي، همس...
-بكر: شني اسمچ؟
تعجبت هذا ديسأل عن اسمي معقوله ميعرف اسمي وشلون عقدنه لعد!!
-هجران: اسمي هجران
ضحك خفيف وهز راسه، همس بصوت علساس ماگدر اسمعه
-بكر: حتى احرف الاسم متشابهه
-هجران: نعم؟
-بكر: هيج، عاشت الاسامي هجران
-تعيش ايامك
گعد شويه بَـس مبين ؏ اعصابه گوة لبسني الذهب ايده ترجف، صاحت مرة عجوزة مبينه هيبة طويله وجندله بَـس مدگدگه كل مكان حتى حواجبهه، چانت گاعده ؏ الكرسي
-شمالك يمه بكر صاير بايد (فاهي) بعد حبوبتك
-بكر: لا حبوبه مو بايد
-چا شنهي يرادلهه كل هالرجيف حسبالك نانسي عجرم واكفه جدامه ومايكدر يكض روحيته عليهه
-بكر: حبوبه شني السالفه
-بعد حبوبتك بسك لا تحجي زايد لبس البت مو نشفت ريجنه وحنه ننتظرك
بكر ابتسم وكمل يلبسني الذهب وهاي العجوزة تدردم، متت ضحك عليهه
-غزاله: حبوبه شسالفتچ شو چنچ كاعده گوة
-انطمي انتي يلغمه مابيچ خير
-غزاله: هااا انه مابيه خير
-اي چا ياهي لو بيچ خير اشوفنچ چاعده ويه زلمتچ ويلبسچ بالذهبات مو جاعده ؏ گليب ابوج يالبايرة
-غزاله: حبوووبه شمالچ وياي اليسمعچ مو يگول دخلت بالعمرين هاي
-اشش ولا چلمة حسچ لا تعلي بت خليل لا اروحن ارفس ببطن امچ السحليه
-غزاله: سكتت حبوبه
-قصباً ؏ الخلفچ تسكتين چا انه ماعيدن حچايتي موش هيج حبوبه بكر
-بكر بضحك: اي حبوبه هيج ونص
-يممه من اغديلك فدوه بعد هلي شني هالضحكة التجيب العافيه
صفنت عليهم ذوله شبيهم لا وفوكاهه تغلط وتسب بأهلهم وهمه يضحكون ويماشوهه، ماتحملت اسكت همست لـ بكر
-هجران: ممكن اسألك سؤال؟
-بكر: تفضلي
-هجران: هذي منو المريه
ماكملت الجمله عاطت مرة ثانيه
-شنهييي انه ياهييي يلغمه بكر حبوبه شو هاي مريتك ماتعرف الاصول شمالهه
-بكر: لا حبوبه بَـس ناسيتچ(غمزت لهجران)
-هجران: هااا اي بيبي العفو ناسيتچ اني
-چا ذكرهه يبعد هلي ذكرهه هالمسعده
-بكر: هاي حبوبه عطية تصير ام ابوي
-هجران: هاا تشرفت بيچ بيبي
-حجية عطية: قصباً عليچ
ضحكت وظليت ساكته، كل شويه مصيحه ؏ واحد والنسوان يضحكن ؏ سوالفهه.. تعدت من يمهه جواهر رجعت تعيط..
-حجية عطيه: ولييچ يلمسلوعه ماسلمتي عليّ لو انه كخه وخديداتي ماتلوگ تحبهن (تبوسهن) براطمچ (شفايفچ)
-جواهر: لا العفو بيبي حبيبتي بَـس مشفتچ
-حجية عطيه: ماشفتيني يالمنافقه چا صوتي يلعلع لياهو
-جواهر(تقربت عليهه بست ايدهه وراسهه): بعد گلبي بيبي مشتاقتلچ عمري
-الحجيه: يا يمه بعد حبوبتچ من غديت فدوه لهلشعر يبعد حيلي
-جواهر: يا روحي بيبي ماكو احلى من شعرچ تذكرين من تسولفيلنه شلون چان مثل محابس الذهب قبل
-حجيه عطيه: اييي ااخخ شلون ايام چان المرحوم يلعب بي وما ينام لوما شعري بوجهه الله يرحمه وين رحت وخليتني منصور اهئ اهؤ اهئ اهؤ
-هجران(شو هاي گامت تبچي انوب اني حسرتني الضحكة تبچي مثل السنفونيه تصعد وتنزل راحتلهه جواهر تسكت بيهه واجت اختهه شهد همات
-حجية عطية: يممه حبيبات بعد امچن شني هالحسن چا شمالهن بنياتنه مو بهالجمال
-شهد: ههههه بيبي مو هستوچ تبچين ؏ المرحوم
-حجية عطية: حبوبه بعد راح وشبع موت چا هيه وليه كل ما اتظكره (اتذكره) اشبع بواچي
-غزاله: جده وين البواچي شو ما شفت دميعه نزلت من عينچ
-حجية عطية: انلصمي يالتفيسه غير مسحت دميعاتي بشيلتي اااخخ منچن يبنيات هالوكت تحتاجن ربايه من اول وجديد بكرررر سكت اخيتك لا اجي اطلع ظيم المرحوم كله بيهه
-بكر: غزل بسچ احترمي الحجية، يله بويه تأخرنه
بدينه بمراسيم المهر والحجية عطيه ماسكتت كل شويه معلقه ؏ واحد لو ؏ حركه، بكر ابددد ميباوعلي ولا حتى لمحه عذرته وكلت اكيد مستحي مني، بَـس اني ماكدرت اتغاضى وماباوعله شكله وملامحه الجذابه وطوله وبنيه جسمه الضخمه، وضح فرق لون البشره بيناتنه خصوصاً من لزم ايدي حتى يلبسني السوار، هوه مو ابيض بَـس حنطاوي واني سماري شويه طوخ
كملنه السوالف وطلع حتى ماحچه شي، اجتني غزل تضحك ومكيفه بوستني
-غزاله: الففف الف الف مبرووك يروحي تتهنون وان شالله يوم النشوف جهالكم
-حياتي تسلمين يوم الالچ ونفرح بيچ
-يگلبي، هاااا انتي ماخذه بكرر وترا بكر خوش بكر انه اكلچ
-هههه ان شالله يطلع خوش بكر
-لا لا تخافين يخبل اخوي شفتي شلون صاك(وغمزت)
-هههه اي
-غزل: هههه اسكتي هسه تسمعچ حبوبه عطيه وتگول مامصدكه تزوجت
-حجية عطيه: سمعت اسمي من حلوجچن (حلوگجن) شمالچن تبسبسن
-غزاله: ماكو شي حبوبه انه رايحة اشوفن عميد الدين خبصني خبيصه الله يدگدگ بالتلفونات مادري شعنده
-الحجيه عطيه(لطمت ؏ رجليهه): يمممه عميّيد بعد رويحتي هاذ العزيز ابن العزيز اندهيله (صيحيله) خليني اسلمن عليه مشتاگه ليه
-غزاله: ياااء حبوبه وين اصيحه بين النسوان وثانياً مو شفتي الصبح چا هوه شبع
-حجية عطيه: انطمي وانتي شكو لو بدت القيره (الغيره) عندچ
-غزاله: لا ما اغار يله انه اروحن(رحت للغرفه لبست جبه اسلاميه وذبيت شال ؏ راسي رحت للمطبخ اشوفنه گليبي طاگ عليه وشلون طالع هوه اليوم اووف بوويه هذا لوعه گلبي وحلم دنياي، دگيت عليه وگتله واكفه انتظره بالمطبخ.. اجه عليّ
-عميد الدين: ها غزاله وينهه؟
-غزاله: ياهي؟
-عميد الدين: رهف چا صار ساعه عليمن انده
-هاا بابا هسه اصيحهه نسيت
رحت اصيحلهه وجهها اصفر ومبين عليهه تعبانه
-عميد الدين: ها بويه شون كيفچ
-رهف: زينه
-عميد الدين: شمالچ الوجه اصفر والشفايف بيض بعدچ تعبانه؟
-رهف: لا تخاف مابيه شي
-عميد الدين: لچ بويه شلون مابيچ شي وانتي حالچ بالضيم جدامي
-رهف: حبيبي مابيه شي لا تكبر الموضوع
-عميد: اووف منچ رهف لچ بابا گتلج لا تجين گلبج تعبان ماتتحملين طريچ
-رهف: والله زينه لا يظل بالك
تقرب عميد عليهه وتلمس وجهها، گرص خدهه خفيف وهمس
-عميد الدين: شمالهه بنيتي
-رهف(ماتحملت ابقى هيچ شمرت روحي بحظنه): اااه بابا حموووت
-عميد الدين: اسم الله عليچ يروح ابوچ شمالچ بعد عيوني
-رهف بدموع: حلمت بيهه
انگلبت ملامح عميد للحزن، همس بعبره
-عميد: يمته؟
-رهف: بالطريق من جينه نمت بالسياره وشفتهه
-بويه هذا حلم لا تتكدرين (تضوجين)
-ادري بَـس مليت من الاحلام اريدن ارتاح
-غزاله(تقربت عليهه وحظنتهه لصدري): گلبي رهوفه انتي هواي تفكرين بيهه حرري دماغچ ارتاحي شوي
-رهف: مو بيدي غزاله كل يوم تجيني بالحلم وزعلانه
-عميد الدين: اوووف شبيدي عليچ، تعالي ليه احظنچ
شمرت روحهه بحظنه وتبچي وهوه يطبطب ؏ ظهرهه وعيونه مغورگه دموع، حالة رهف كعد تسوء يوم بعد يوم ومانعرف شنسويلهه..
-عميد الدين: حبيبتي غزاله عينچ عليهه امانتچ رهوفه
-غزاله: بعيني لا يظل بالك
طلع بره للزلم بَـس مبين عليه الحزن والقهر، ردينه گومنه هجران گعدناهه ويه جوري ورجعنه نردح عبالك مفطومات ؏ الرگص، جده عطيه واگفه ومحنيه ؏ العوچيه وتبسبس وتنفخ ادري بيهه تقره علينه تخاف من الحسد.. انگلبت الصاله ديسكو الصغار والكبار يرگصون اليوم فرحتين هم فيصل وهم بكر الحالف مايتزوج
-حجية عطيه: ولچن بسچن چنچن مصروعات ماتسمعن الوذان يوذن انتن شني ماتخافن ربچن
-صباح(ام هجران): حجية تردين تصلين
-حجية عطيه: اي يبعد چبدي اريدن كرسي ماگدر اصلي ؏ الگاع
-بعيني
راحت عمه صباح واحنه طفينه الاغاني وفتحنه مواليد اسلاميه ؏ الائمه هم اهون ظلينه ؏ هالحال نرگص ونرد ليوره، فضت الدنيا والعالم گامت ترجع لبيوتهه، چان احلى يوم وبنات خالي وبنات عمي كلهن موجودات ونضحك ومتونسات.. چان بقينه ؏ هالحال لوما سمعنه عياط زلم بره.. طفينه المسجل وراحت عمه صباح تشوف السالفه
-جواهر: خاف عركه بنات؟
-جوري: يا ستار عركه بيوم مهري
-غزاله: بسچن خلونه نفتهم
رجعت عمه صباح والحيره ؏ وجهها، فجأة مانشوف غير باب الصاله اتفلگحت (انفتحت) طب زلمه ايده مظبره وعيونه تجدح، شرايين وجهه ناطه ووجهه گالب ازرگ من العصبيه، عاط بصوت هز البيت هز
-تزوجتي وعفتيني يا خاااااينه
يتبع☘️...
♛ ♛ ♛ ♛ ♛ ♛ ♛ ♛ ♛ ♛
هذا البارت طويل لعيونكم 5000 كلمه طبگت بارتين ببارت عجبني ادللكم😌 انتو هم دللوني بالتفاعل😎🔪
+
لتنسون التصويت والتعليق بين الفقرات😎♥️
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!