شفاه مخملية الفصل الثلاثون 30 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي.

#لاتعاتبنـــــــــــي وتـــزيد جرحي نار
آنـي كـلشي لخاطـــــــــرك سويتة
انتة امس كدام شـــــــماتي نطيت
بية وآني الشوف عينـــــــي انطيتة
جرحي بيدك فوك بيبان الـــــــدروب
كبال شماتي أمس طشيـــــــــــتة
يل تطش بجروحي خلف الله عليك
عمي آني أنسان مـو جكــــــــليتة.

♛ ♛ ♛ ♛ ♛ ♛ ♛ ♛ ♛ ♛

"هجران"
بعدنه بباب الفرع مال بيتنه ونشوف الامة العربيه مگلوبه بباب بيتنه وبيت جوارينه واصواتهم عاليه وهوووسه ومبين عليهم الحيرة، نزلنه وبابا راح يركض يشوف شكو واذا انصدم من اشوف البيت عبارة عن فحم من السواد، دخل بابا لداخل البيت يدگ ؏ راسه واني وخواتي بقينه بالباب واگفات..

الفرع انخبص وامي گامت تبچي ؏ حالة بابا وحيرته واني وخواتي ؏ الواهس نبچي وياهه وعمه سلمى صافنه ومتحچي شي، اجت خالة ام عمار ؏ امي تصير جيرانه..

-ام عمار: خية شجاكم ليش ماطفيتو شحن العاكس قبل لتطلعون؟

-صباح: سودة بوجهي مصارله كم يوم من مشتريهه الرجال لان الكهرباء موزينه

-ام عمار: الله يعوضكم حبيبتي

ركضت ماما لداخل البيت وبابا طلعهه وعيونه صايرات دم من وره الدخان، ماقبل تدخل ماعرف شنو السبب وميگول غير...

-فارس: صباح االله كريم حبيبة لتبچين

ماما انهارت بالبچي وطلعت بره گعدت ؏ الرصيف، وبابا صار يبچي من شاف حالتهه اووف شلون متعلقين ويحبون بعض..

رحت گعدت بصفهه وظليت ساكته بَـس دموعي تحچي وتعبر عن استيائي للموقف الصار..

-هجران: ماماتي حبيبتي لتزعلين كلشي يتعوض

حچت بصوت تعبان مليان حسره..

-صباح: ولچ شيتعوض دشوفي البيت شوفي الاثاث منين نجيب متگوليلي

-هجران: الله كريم الله مينسى عبده

گامت تدگ ؏ رجليهه وتبچي..

-صباح: ولچ مادري شبينه وشنو هالضيم الي لاحگنه، حتى العاكسة اشتراهه بالدين علمود ابن جوري لا يحتر بالليل من تنطفي الوطنيه وتالي احترگت وحرگتلنه البيت وبعد كم يوم عماتچ يردن حصصهن ولازم نعرضه للبيع وين ننطي وجهنه وين نرووح

حطيت راسي ؏ چتفهه اواسيهه وهيه مستمرة تبچي بالسكته والجوارين يهدأون بيهه، جوري وندى چانن متكترات ويباوعن لأمي ويبچن وياهه اما عمه سلمى طلعت طلعة كُلش حلوة راحت بسرعه اتصلت بعمو خليل والولد كلهم حتى يجون من الناصريه..

ابو عمار حاچه بابا حتى نبات ببيتهم ويضيفونه الليله وبابا مچان بيده شي غير يقبل لان ماعدنه لا عمام وبس خال واحد الي هوه ابو غزوان ودندگ عليه وميشيله اكيد حاير بزفه ابنه، رحنه لبيتهم صاير مقابيل بيتنه بالضبط ودخلنه صار بوجهي عمار ابنهم، كُلش استحيت ونصيت راسي، ابتسم وسلم عليه...

-عمار: هجران شلونچ

-زينه

-عمار: هاي شنو بعدچ هيچ صغيرونه ههههه شنو انتي متكبرين؟

ابتسمت وبقيت منزله راسي، عمار من قبل چان دائماً ندزه يشتريلنه من العطار وصمون وهالسوالف من چانو بابا وفاضل ينشغلون فَـہ هوه خطيه ابد ميقصر ويحبنه هواي..

دلونه ؏ غرفه صغيره صايره بالطابق الثاني وگالو ارتاحو بيهه، نزعت عباتي ومددت ؏ الفراش الموجود، احس ظهري انكسر وعظامي ترجف والهبطة لسه بيه.. شوية واجت عمه سلمى تدردم..

-سلمى: اوي هاي شجاكم شنو هالمصايب سوده عليه شفتو ابوكم شلون حالته

-جوري: شلون بينه عمه هذا حظ بابا وحظنه الحمد لله

-سلمى: يعيوني يكسر الگلب، هسة اتصلت بخليل گال رح يجيب الولد وياه

-جوري: حتى فيصل يجي؟

-سلمى: لا بَـس عميدي وبكر وعثمان

-ندى: عثمان منو؟ شو اول مرة اسمع بي

-هجران: يصير اخو بكر من نفس الام

-ندى: هااااا زين احم خاله عميد الدين هم يجي؟

-سلمى: اي مو گلت هسه

-ندى: اي بَـس انتي گلتي عميدي ليش تصيحوله هيچ اني منتبهه حتى جواهر وغزاله والولد كلهم يصيحوله هيچي؟!

-سلمى: ياااء هوه من الصغر يصيحوله عميدي غير هذا دلعه

-جوري: صدُك والله؟؟ ولا ادري عميد هم يدلعو ههههه

-سلمى: وليش ميدلعو بالعكس هوه روحه كُلش رياضيه ويتقبل كلشي

-هجران: اي صح الله يحفظه

سكتنه وكلمن اخذت مكان وگعدت حاطه ايدهه ؏ خدهه ننتظر الفرج، كل شويه امد راسي من الشباك اشوف وصلو لو بعد، هوه اكيد مستحيل يوصلون بهالسرعه بَـس گلبي يدگ من عرفت بكر هم رح يجي معقوله يريد يرجعني؟

اجتنه ام عمار وسولفت ويه عمه سلمى ووره شويه اجت ماما تگول متگدر توگف ؏ رجليهه ضغطهه ارتفع.. حرنه بيهه وبابا تخبل وهوه بنص الضيم واله ياخذهه للمستشفى يخاف عليهه، ابچي ومبتسمه من سمعته يحاچيهه بالموبايل حتى يطمن عليهه ويگولهه..

-فارس: صباح لو الدنيا كلهه تحترگ ولا ينجرحلچ اصبع

-صباح: مابيه شي فارس التهي ويه العالم

-فارس: معليچ بيهم طز بكلشي انتي شلونچ؟؟ لچ دا الوب عليچ

-صباح: والله عيني مابيه شي كمل شغل انته

-فارس: خوش لعد مع السلامه

-الله وياك

اخذتهه تمدد وجوري تفرك برجليهه وابنهه يلوع من البچي وعمه سلمى حايره بي وتسكته هيه زينه تحبه لعلاوي حتى بالعرس كم مرة اتقيأ عليهه لا حچت ولا گالت شي بعدهه مكيفه بي..

نامو الكل بَـس اني وجوري گاعدات وندى تلوب تگول باردة ومجاي تگدر تنام..

-هجران: تعاي حبيبتي حطي راسچ بحظني واغطيچ اني

-ندى: اوف هجران مشتاقتلچ ومشتاقه لحنيتچ

-هجران: هههه لچ مو صارلي شگد يمكم

-ندى: لا اقصد اريدچ طول العمر يمنه

-جوري: ياا ولچ بيش طالبتهه خو ادعيلهه بالسعادة ويهدي استاذ ثلجاية عليهه

-ندى: ياااارب الله يهدي وتعيشين احلى عيشة وياه

-هجران: ههه امين

غفت بحظني واني اللعب بشعرهه هالحركة دائماً اسويهه لبكر يگول يرتاح من انيمه بحظني وامشط شعره بأصابيعي، جوري گالت رح تنام اله اني، صاير عندي ارق ولا اگدر انام اظل الليل كله اتگلب وافكر بحياتي.. سمعت الاذان بَـس مطلعت اتوضه خفت واحد من ولد ام عمار گاعد وتصيرلي سالفه فَـہ بقيت گاعده گلت اني هسة معذوره..

صارت السته الصبح واذا اسمع صوت هورنات مال سيارة، گمت اباوع واشوف سيارتين وحده حمرة رياضية والثانيه سودة عاليه عرفت هاي سيارة عثمان وعميد.. چانو يدگون هورنات لان متدخل سيارتهم بالفرع لان اكو سيارات من الجوانب محاصرتهن فَـہ حركوهن ودخلو..

طلعو من السيارة عمو خليل وعميد الدين وبكر، وغيث ومرتضى وعثمان من سيارته.. كلهم لابسين كاجول (بنطرون وبدي) عيوني تعلگت ببكر وشلون طالع بالسترة الزيتونيه والبنطرون الاسود.. راحو لبيتنه واشوف بَـس عميد يحچي ويه بابا مبين جاي يواسي، واگفين ؏ جهه وبابا سودة بوجهي منزل راسه مكسور..

وراهه اجو عثمان وعمو خليل هم حچو وياه ودخلو للبيت، ظليت مرابطه الشباك واباوع منه.. بكر چان لازم موبايله ومبين جاي يدگ ؏ احد ومدا يجاوبه لان رجع الموبايل بجيبه ضايج، اجه ببالي معقوله يدگ ؏ جواهر؟

ركضت لموبايلي ودگيت عليهه ماهتميت ساعه بيش ولا اهتميت اذا چانت نايمة لو گاعده، جاوبتني بصوت ناعس...

-الوو

-هجران: جواهر بكر جاي يدگ عليچ؟

-جواهر: شنو؟

-بكر بكر يدگ عليچ؟؟؟

-جواهر: هجران هاي شبيچ وين يدگ واني نايمه

-بله شوفي موبايلچ خاف محسيتي عليه

-جواهر: لعد شلون حسيت عليچ؟! روحي داده مدا يدگ اني نايمه

-هااا يله اسفه لعد

-عادي حبي، باي..

سديته منهه وفكرت خاف ديدگ عليه ويشوفني فتحت الحظر عليه لو بعدني، فتحت الحظر ماطول خمس دقايق ودگ، فتحته...

-بكر: الوو هجران وينچ انتي؟؟؟

-موجودة

-بكر: چا شمالچ حاظرتني!! حرگت الموبايل ويطلعلي مغلق وماموجود اصلاً!

-هجران: شتريد بكر؟

-بكر: شني هالاسلوب ليش تحچين من طرف خشمچ؟؟؟؟

-لان تعبانه ومنايمة بنتك دتعذبني بَـس تتحرك

-بكر: هااي شني هاي فوگما تكيفين البت بصحتهه ونشاطهه زين!!

چان يحچي معصب، ماعرف ليش استفزيته هيچي وفعلاً اني افرح من زنوبة تتحرك معناهه هيه بخير ومو خامله، رجع يحچي بنبرة اهدئ...

-بكر: هاا ماتردين وياي اليوم؟

-لاء

-شني بويه؟؟ ليش عووود؟؟؟

-هجران: لان زعلانه ومارجع ويه واحد يحب غيري

-انعل ابوووي ولچ هيه وينهي الاحبهه

-هه فوگاهه هيچ تگولهه

-بكر: اقصدد ما اشوفهه ابددد انتي شمالچ ماتصدگين واصلاً گلت ما اندگ بيهه بعد

-خوش

-بكر: ولچ هجرااان شني هالبرووود لا تسودنينيييي

-گتلك تعبانه وماعندي طاقه احچي

-بسچ عاد لخاطري ردي ترا تعبت والزهرة

-روح بكر بعدين نحچي

-بكر: خوش بَـس مو تردين تحظريني ترا والله تصير مو حلوة بعد

-ماشي باي

سديت الخط بدون ماسمع شيگول، برطمت شفايفي وهستوني اريد ابدي بنوبه بكائي وحسيت بجوري تدفرني برجلهه وتضحك..

-هجران: شكو شعندچ گعدتي تتمضحكين

-جوري: خرب يومچ هم يطلع منچ هههههه والله وكفوو شلون حرگت دمه

-وانتي شلون سمعتينه

-جوري: سماعه موبايلچ عاليه والغرفه هدوء گدرت اسمع

سكتت وماجاوبتهه رجعت تگرص بيه وتدغدغني تريد تضحكني حتى مابچي وفعلاً نجحت وره ما زرفت بطني من التقرقر..

گعدن البنات وماما صبحت احسن ونزلت لبابا تشوف شسووا وعمه سلمى هم راحت وياهه واني وندى وجوري لزگنه بالشباك نشوف شصار، هوسة جوة وولد المنطقه ديطلعون بالاثاث الي تصخم وقسم لازمين صوندات وماسحات ويغسلون بره البيت والقسم الثاني جوة..

مليت وتعبت واني اباوع رحت تمددت اريح ظهري، صعدت عمه سلمى نافشه ريشهه ماعرف شعدهه..

-جوري: عمه فيصل ليش ما اجه وياهم؟

-سلمى: اني ادري زوجچ لو زوجي؟!

-جوري: هااا مو شسمه ماتصلت عليه گلت اعرف منچ احسن

-سلمى: شمدريني اني حايره بضيمي

-جوري: يا ستار يا ضيم؟

-سلمى: اووف ولچ هاي غزل شلون بيهه ويه رجلهه المسودن

جذبني الحديث وگعدت ؏ حيلي خفت ؏ غزاله، سألته...

-هجران: عمه شبيهه غزاله؟

-سلمى: اويلي ؏ حظهه مصخم ملطم

-جوري: ايي شبيييهه؟؟؟

-سلمى: مرتضى مسودن ساعه احبچ واموت عليچ وساعه يتعارك وياهه ويعصب

-هجران(حچيت بأستهزاء): هه عادي عمه عادي

-سلمى: يااا وين العادي اني خليل مينام اذا اني زعلانه

-هجران بأستهزاء: اويلي بكر طالع بالضبططط نفس ابو

-جوري: ههههه والله يا عمه مو كل الناس مثل خليلچ احنه حظنه مصخم وميتحمل رومانسيه وراحة

-سلمى: ااخخخ اخخخ ماصارت لعميد الدين شوفنه شحلاته كله هيبه وركازة وثگل

-هجران: عمه تحچين صدوك چذب عميد ابووهه!!!

-سلمى: اهوووو يا ابوهه عوفو هالكلاوات يصير ابن عمهه

سكتنه لان مبين عليهه قافله ورح تموت بحسرتهه لان ضيعت عميد الدين وما اخذ غزاله، مرت نص ساعه واحنه وحده تتصفن بوجه الثانيه، اجت ام عمار وجابت ريوگ اكلنه شويه وجوري گالت تنزل تشوف شكو واني هم رحت وياهه..

نزلت ؏ كيفي الدرج خفت اوگع لان درجهم صاير مسطح ومحفر يعني بيت قديم مال ولاية فَـہ اكيد هيچ، بعدنه بباب البيت واجانه غيث ونظرات المكر والتلمز تنبع من عيونه...

-غيث: خاب هلااا بالخوات هلاا ومية هـلا

-جوري ببرود: هـلا

عافته وراحت واني بقيت واگفه ادور بعيوني ؏ بكر خاف موجود ماريد التقي بي لان شفته راح ويه مرتضى بسيارة عميد الدين ماعرف وين، قاطع سرحاتي غيث من انتچة ؏ باب البيت وعيونه كالعادة ؏ حلگي كلما اشوفه ويحچي ويايه يباوعلي بنظرات مو مريحة...

-غيث: گالو زعلانه العلوية

-هجران: وين بابا واخواني؟

-غيث: طلعو يجيبون صبغ

-ها ماشي..

عفته ودرت وجهي ارجع لبيت ام عمار وصاح...

-غيث: خيولي بكر ما يستاهلچ

اللتفتتله يباوعلي ورافع تك حاجب وابتسامه مكر مرسومة ؏ شفايفه، تقدمت عليه وسألته...

-ليش تگول هيچ؟

-غيث: هههههههه لييش؟؟ لساچ تسأليني لييش؟؟ ولچ خايبه انتي شگد غبيه

-انته شبيك ليش تحچي ويايه هيچ؟؟!

عصبت من اسلوبه واستفزني حسيت الحماوة صعدت لوجهي وعرگ گام ينبض بگصتي، رجع ضحك بخبث وهزلي راسه متحسف وعيونه ؏ شفايفي، همس بفحيح...

-شوفي يام شفايف حلوة، بچر الي تحچين بي....

قاطع كلامه جيت عثمان، صفن علينه وعگد حاجبه وكأنه مستغرب من وگفتنه رغم واگفين گبال باب بيتنه واكو كم رجال واگف وامي تطب وتطلع، تحمحم وحچة...

-عثمان: غيث ابوي يريدك

-غيث: ماشي ضلع

عافني وراح وعثمان لسه يباوعلي، بَـس نظراته ابد مو طبيعيه، تنهد قوي وظل واگف بصفي.. كل شويه يتلفت حسيته يريد يحچي شي بَـس متردد، اخير شي تقرب عليه وهمس...

-شبيكي واگفه هينا بالزگاگ؟

-هجران: شنو؟؟

سحب نفس وعاد حچايه بلهجة افهمهه...

-عثمان: اقصد ليش واگفه هنا بالفرع

-هجران: هااا انتظر بابا

سكت بَـس ملامحه تحچي واضح ضايج من شي ويريد يحچي بي وميگدر، رجع همس...

-عثمان: علاقتكِ قويه ويه اخوي غيث؟

جاوبته بسرعه نافيه...

-لا طبعاً اصلاً نادر نلتقي ونحچي

عيونه عليه وكأنما ديگول "متأكدة" هزيتله راسي وضحكت بأستهزاء...

-سيد شبيك؟؟ اكو شي؟؟؟

-عثمان: سلامتِك بَـس خفتو من شي

-شي مثل شنو؟

ابتسملي وهز براسه..

-عثمان: انسي

سكتت وهوه هم سكت، انتبهت عليه كاف بنطرونه الاسود ولابس بدي هم اسود وبارزه عضلات ايده لدرجة شرايينه منططه مبين چان يشيل شي ثگيل لان حتى وجهه عرگان وشعره الاسود متبعثر ؏ وجهه، صفنت بي وهوه چنه انتبه ؏ صفنتي لان اللتفتلي ولمحت طيف ابتسامه ؏ ثغره بَـس بسرعه خفاهه، حرك راسه وگال...

-عثمان: شبيكي خازرتني؟

ضحكت بصوت بدون ماحس ؏ روحي هوه فتح عيونه وكتم ضحكته وبسرعه عظ ؏ شفته السفلية واشرلي بعيونه اكو زلم حتى اسكت، كممت حلگي بأيدي وحچيت بهمس بوسطهه ضحكة..

-تدري انته نسخة من بكر

ضحك خفيف وگال..

-عثمان: عجل غير اخوان

ضحكت وكملت...

-يربي حتى نفس الاسلوب بكر هم من اصفن عليه يگولي شمالچ خازرتني ههههه

-عثمان: بَـس أَنا گلت شبيكي خازرتني مو شمالچ

-نفس الشي مجرد اختلاف لهجات

ابتسم خفيف وهز براسه، نصيت راسي خجلانه هاي شبيه اني خفيفه بَـس يربي عجيب هيچ شبه بَـس فعلاً نفس مگالت غزاله عثمان احلى وملامحه أحَد من بكر وحتى اضخم واطول شويه..

مالي نفس ادخل للبيت واشوفه اخاف انهبط وتسوء حالتي فَـہ ظليت بمكاني واگفه ؏ صفحة انتظر بابا يرجع اريد اشوفه واتطمن عليه وعثمان بقه واگف بصفي، ابتسمت ذوله كلهم يغارون كُلش وميحبون احد يشوف نسوان تابعه الهم..

شويه واجه عميد الدين علينه ابتسم من شافني وگال...

-سلام عليكم علويه

-هجران: عليكم السلام، شلونكم سيد؟

-عميد: الله يعزچ بخير

-رهوفة شلونهه؟

ذبلت ملامح وجهه وهز راسه بتعب بمعنى "زينة" اندار ؏ عثمان يحاچي...

-عميد: عثمان تعال محتاجك

جره وراحو بُعد كم خطوه يحچون وعميد شكله كُلش منفعل وعثمان ساكت ويسمعله كمل كلامه وعثمان دخل للبيت بَـس هوه ظل واگف ومبين حاير، استحيت ابقى واگفه لان رجعو الزلم يلتمون وبكر لسه مارجع، اخيراً اجه بابا وسولفت وياه شويه بَـس شكله تعبااان والقهر ماخذ من حيله، ماعرفت شنو اگول بَـس دموعي تنزل ؏ حالته..

ردت ارجع ادخل للبيت وبابا صاحلي..

-هجران: ها حبيبي

-فارس: هجرانه هذا بكر يريد يرجعچ وياه

-هجران: لا بابا مارجع

-فارس: هاا شعجب؟

-مارجع لحدما نگعد اني وياه ونتفق ؏ كلشي

-فارس: تتفقون ؏ شنو بالضبط؟

-هاااا لا هيچ يعني ؏ سوالف بيناتنه وهسه مو وكتهه خليني ابقى هنا ويه امي واساعدكم بالبيت بعدين نحچي بموضوعنه اني وبكر

-فارس: براحتچ باباتي يعني هسه اگوله يرجع؟

-اي

-فارس: هذا هوه بنيتي اهم شي راحتچ

-هجران: بعد عيني بابا يله اني اروح جوه تعبت من الوگفه

-فارس: روحي ارتاحي..

رجعت للبيت وبعدني بالباب وسمعت صوت عميد الدين عالي، چان لازم الموبايل ديحچي ويه الطرف الثاني وصاح...

-عميد: شني شمالهه؟؟؟.. ولچ احچييي شني تخربطت؟؟؟ لييش؟؟.. جاي جاي هسه مسافه الطريچ..

راح طاير ؏ سيارة عثمان اخذهه وطلع لان سيارته عد بكر، عرفت السالفه تخص رهف اووف هالبنيه مسكينه وابوهه متأذي وياهه..

ثواني وطلع عثمان من البيت يسأل ؏ عميد وبابا گاله رجع للناصريه، دگ عليه وتخبل بالموبايل ظل يلوم بي شلون ترجع وحدك وچان گتلي و و و و...

عفتهم ورجعت للبيت وگبل ؏ الفراش نمت وماحسيت ؏ روحي اله وماما تگعدني، تثاوبت ومددت اطرافي براحة، باوعت ؏ الساعه واذا انصدم من اشوفهه بـ 8 بالليل وبكر حارگ الموبايل بأتصالاته واني مسويته صامت مادري..

گالت ماما نرجع لبيتنه حتى نكمل تنظيفه لان اهل الناصريه رجعو عدهم شغل بَـس تگول ماقصروا ابد وخوش وگفه وگفولنه، دخلت لبيتنه واشوف الحيطان مصخمة والارضيه هم والاثاث كله اسود.. بابا وفاضل چانو ديجلفون بالقنفة مال الاستقبال بالطرمة، رحت عليهم مبتسمه...

-هجران: هاا اساعدكم؟؟

رفع راسه بابه ورجع دنگه...

-فارس: لا بابا روحي ارتاحي مو زين عليچ

-هجران: شدعوه هسة شنو رح اسوي اني قابل

اخذت منه الاسفنجة وصرت اجلف القنفة وفاضل ويايه وبابا گعد ؏ الدچة گبالنه بَـس حسيته مو طبيعي ويضرب صفنات وحاير، همست لـ فاضل..

-فضولي بابا شبي ضايج؟

-فاضل بهمس: انحرج كُلش لان عميد الدين انطاه واجب

-واجب مال شنو؟

-فاضل: يعني كمساعده علمود نرجع بيتنه مثل قبل

-زين ليش منحرج عادي المساعده حلوة

-فاضل: مو انطاه ميلغ چبير، تخيلي هجران انطاه مليون دينار

-عزااا حيييييل شدعووه

-فاضل: حتى عثمان انطاه بأسم بكر

-شلون يعني بأسم بكر؟

-فاضل: مادري هوه گال هاي فلوس من بكر وطلع

-هااا

فرحت لان سمعت بكر هم مساعد وكبر بعيني وعميد الدين ماكو داعي يكبر بعيني لان هوه بالاساس چبير بعين الكل ورجال صاحب غيره ونخوة..

كملت الي بيدي ورحت اشوف ماما وجوري وندى شديسون، چانن بالمطبخ يجلفن بالارضيه وعمه سلمى بقت حتى تساعدنه هم عجبني موقفهه وعرفت ليش من دخلت علينه نافخة ريشهه طلع لان انطو واجب لبابا وبحساب رفعو روسهم..

**

خلونه ننتقل للشباب ومرتضى رح يحچيلنه شصار وياهم...

"مرتضى"
طلعنه من بيت سيد فارس والجو محترگ بين عثمان وبكر، شوي وواحد يثرد بدم اللاخ، خذينه سيارة عميد الدين لان اخذ سيارة عثمان وراح يشوف رهف متخربطة فَـہ گعدنه كالتالي..

اني وغيث وعمي خليل ليوره لان مايگدر اله يمدد رجلينه وعثمان بالصدر وبكر يسوق.. اول مادخلنه للسيارة وبكر عاط...

-بكر: ابن الحلووة ياهو گال تدفع واجب نيابة عني؟؟!!

-عثمان: هه اذا أنَا مادفع انته تدفعو؟

-بكر: انته شيخصككك بَـس فهمنييي ياهو عاتب عليك

عثمان نتر بي...

-انته لو عندك ذرررة احساس ماخليتو لعمك واگف هيك ومكسور ظهرو وسمعتو شَنو گال ؏ الديون العندو يول انته من شَنو مصنوع؟؟

-بكر: اسمممع هالمرة سويتهه المرة الجايه اكسر ايدك فهمت لو لا!!!

-عثمان: نعلو ابو الي يسوي خير وياك انته شكول واحد يساعدك

-بكر: ماااريد هالمساااعده ورح ارجعلك الفلوس مو تگعد وتذل بيه

-عثمان: يول أنَا من يمته وأذل فيك!؟!

-بكر: من يوم يومككك واذا موش انته تذل خوالي يذلون بيه

-عثمان: لانك واحد مهمل ومايهمك احد عندك نفسك وبسسس

-بكر: انطم ولا تظل تتفلسف ؏ راسي فهمت ترا البيه مكفيني

-عثمان: انته لو بَـس تفتحو لدماغك المحجر وتطلع شكو تبن بي ترتاح

-بكر بحدة: عثمااان هواي تجوازت ترا

-عثمان: تدري مو صوچك صوچي أنَا الي تا احكي وياك

اشتدت الملاسنه بيناتهم وعمي كالعادة ولا يمه الموضوع احسه اصلاً يستمتع من يشوف ولده واحد معادي اللاخ، اخيراً غيث تدخل...

-غيث: خوه بسكم شنهي وين گاعدين حنه

-بكر: انچب انته گو** انه الك بَـس نرد للدار وعلي اله اطلع حليب امك من خشمك

-غيث: هاااا عثمان گلتله ماتحملتت تسكت

-عثمان: نعلو ليومك ويومو أنَا شكو بمشاكلكم واصلاً شنو الي اگولو غير تفهموني

-غيث: ؏ سالفه مرت فيصل

-بكر: محد گالي انه شفت عيونك الوسخة شلون تعاينلهه ادبسززز هاي عرضك مرت اخوك هيچ تعاين لجسمهه گو** سا*** سرسرييي

-غيث: شوف ياهو يحچي بالعرض وهوه كل يوم من حظن بت لبت ثانيه ما عدى فردوس والنظرات الخر** البيناتكم

-بكر: ولك انه اعلمك...

وگف السيارة وراد ينزل يكتل غيث وعمي عاط بي..

-خليل: استچن ولا تتحرك بالعباس اذا گمت يا بچر لا انه ابوك ولا اعرفك

-عثمان(يستهزأ بصوت ناصي): بعد وكت يابه اله لمن رادو يتذابحو

-خليل: شنهي ولك عثيمن شني گلت؟؟

-عثمان: هيك ماكو شي

-خليل: يله كلكم انطمو وانته بچر سوگ لا افني حظكم ادبسزية گو*** من انعل*** انعل امكم ؏ هالتربيه السززز

-عثمان بعصبيه: بوووية تغلط علينه نمشيهه بَـس مال تدخل امي لاااا ابد ما ارضاهه

-خليل: ديلا چا سكتو حتى ماحچي ؏ المرحومة عمت عيني عليهه

مرتضى(انفجرت بالضحك ماتحملت ساعه يغلط عليهه وساعه يعمي بعينه، الطريچ صار شطوله ومانسمع غير نقر عثمان باصبعه ؏ باب السيارة ومنافخ بكر الي راح يطيرنه..

واكيد مايگدرون يظلون ساكتين ومايتناگرون بطريچ فوگ الست ساعات، بكر گال...

-الله ياخذك عثمان

-عثمان: وياخذك وياي ان شالله ونخي (نصي) صوتك ابوك نام

-بكر: عووع واگابل چهرتك الله لا يگولهه

-عثمان: هههههههه هواي مصدگ روحك يول ترا انته گبل لنار جهنم لا حسبالك

-بكر: غير يستچن يوسف الصديق اليسمع انته للجنه

-عثمان: تدري انته شكثر زعطوط

-بكر: موش اكثر منك

-عثمان: أنَا الي مافهمو شبيك وياي منو داس ؏ طرفك وگعد تحكي عليه؟؟

-بكر: تذكرت شي وفار دمي منك

-عثمان: اكيد هالشي يخص بنت صححح؟؟

اللتفت عليه مغضب وعاگد حواحبه...

-بكر: لان تعرف بنفسك گو*** وحطيت عينك ؏ حبيبتي ورحت خطبتهه

-عثمان: اوهوووو عليه والحمزة ما خطبتهه ديلا حلفت بالعزيز

-بكر: هه عبالك ماعرف انه من جديتك راحت تخطبلك جواهر حاط عينك النگسه عليهه

-عثمان: اييي وأنَا من دريت شَنو السويتو؟؟ مو گلتلهه ماريد البنت؟!!

-بعديش بعدما حچو بالموضوع وفاتحو البت

-عثمان: بكررر بسك عااد مصختهه ماطلعت جواهر شَنو العشيره كلهه حاطه عينهه عليهه، أنَا گلتلك ماحب البنت وماريدهه وجدة عيشه من يمهه راحت وخطبتهه شافتهه حلوة وعبالهه رح تعجبني

رفع تك حاجب وگال بمكر...

-بكر: وتريد تقنعني جواهر مو عاجبتك؟

-عثمان: وبسطال الحمزة لااا والف لااا البنت والنعم منهه ومن تربيتهه وبس جمالهه قصه ثانيه بَـس مال اريدهه للبنت كزوجة لا ولا مفكر بيهه بهالطريقه

گام يضرب ؏ الستيرن قوي وينتر بين اسنانه...

-بكر: اااخخخ اااخخخ لوما عقاب عميدي چا عرفت شغلي

-عثمان: هه شَنو تسوي؟ تروح تخطفهه وتزوجهه؟

-بكر: بالعباس اسويهه لك هاي اشوفهه اسيح واسترسح بَـس اويلي منهه عنوديه وتحرمني من شوفتهه من اشتعلو مروان وخلفته

-ومرتك يول؟

-شمالهه؟؟

-عثمان: ليش تجرح فيها مو حرام عليك؟

-عفت الحرام والحلال الك ولعمييّد انتو مايخصكم بيه زين!!

-عثمان: والله ماگول غير الله يساعدهه عليك وع عقلك الجاهل

-اي اي خوش يله صُم حلچك

سكتنه وبطلاع الروح وصلنه للناصريه، دخلنه للبيت چانت غزالتي واگفه تسوي عشه من فرغ المطبخ رحت عليهه وحظنتهه من وره وهمست بأذنهه...

-مرتضى: تعالي وراي

-غزل: مرتضى اكمل العشه واجي

-لااع هسه تعاي يله منتظرچ

-غزاله(گلبت وجهي): ترا مو وكتهه رهف كللش متخربطه وعميد حيموت طلعت روحه ؏ بنته روح شوف اخوك

-مرتضى: اهييي غزل حنه متعودين ؏ رهف شني السالفه جديده

-غزاله: بَـس عيب من اخوك انته شبيك ترا مصختهه

-مرتضى: وشمالچ تصيحين ولچ موش صوچچ صوچي انه الي معبرچ اصلاً

-غزاله(طلع من المطبج ضايج، ميهمني خلي يضوج وكتهه هالسوالف هسّ.. طفيت الطباخ ورحت لغرفه عميد دگيت الباب وسمحلي اطب، شفت رهوفه نايمه ومچلبه بأبوهه ما ترضى يگوم عنهه، گعدت ؏ طرف السرير واعاين لعميد ذبلان ووجهه اصفر والخوف مبينه عليه...

-غزاله:،عميدي شمالك رهوفه مابيهه شي لا تخاف

تنهد بعمق وظل ساكت ويمسح ؏ شعرهه، غمض عيونه يريد يرتاح وانه گمت حتى يظل براحته، حچة بصوت تعبان...

-عميد: غزالتي تسويلي نومي حامض راسي حيطگ

-غزاله: بعيني اسويلك

ضحك وگال..

-لا بويه لا تنعمي من الحامض

-هههههه يله دقيقتين وهوه يمك

-عفيه برويحتي

ابتسمت وطلعت اعصرله نومي حامض، الحمد لله حتى بعد ما تزوجت مرتضى ظل يعاملني مثل گبل صح مايكظني وشرط عليّ اللبس ربطه جدامه بَـس ميخالف المهم يبقى وياي وگريب عليّ..

كفيت ردن الجبة ووگفت اعصر واتصلت عليّ جواهر تطمن ؏ رهف لان صارلهن چم يوم ببغداد رايحات، طمنتهه وسديت الخط ووديت العصير لعميد چان نايم، حطيته ؏ الميز وطلعت شوكت ما يگعد يشربه..

جريت نفس وصعدت فوگ لحجرتي، مايفيد اهرب منه اليريده ياخذه بالعنف كالعاده واوقات توصل بي يكتلني.. بحثت عن هالشي بالنت واليوتيوب وعرفت يسمون هالنوعيه "سادي" معناهه عنيف ووحشي بكلشي ومايرحم..

اول ماطبيت للحجره وهجم عليّ مثل الاسد المفترس وشاف غزاله جدامه، يلتهمهه بطريقه وحشيه ويترك آثار جريمته ؏ جسمهه الناعم الضعيف لا يبالي بصرخاتهه وتوسلاتهه ولمن يكمل فعلته يغرقهه بالقبلات والاعتذارات بحجة فقدت بجمالچ وانوثتچ..

گام عني وراح للحمام يسبح وانه غرگانه بدموعي وملابسي ممزقة ومشمورة ؏ الگاع، شلتهن مثل كل مرة وذبيتهن بالزباله وطلعت ملابس جديده ولبست.. طلع من الحمام لاف المنشفه ؏ خصره وابتسامة قلق مرسومة ؏ وجهه...

-مرتضى: اسفه يرويحت مرتضى

-غزاله: لا نفتح الموضوع

-مرتضى: غزالتي والله اعشگچ

-غزاله: ادري مرتضى خلص انسى الصار

هزلي راسه مؤيد لكلامي وطلع من الحجرة او من البيت بكبره ومايرد اله تالي الليل من يتأكد عميد نام وغط بنومته حتى يطب براحته لا حسيب ولا رقيب،، گعدت ؏ القريوله وحظنت روحي وابچي بالسكته ماگدر احچي لأحد استحي اگول انه متوجعه وجاي اللوب من الالم..

اندگت باب حجرتي سمحتلهم بالدخول طلعت رهف، گعدت ؏ حيلي وسألت بقلق...

-شلونچ حبيبتي شلون صرتي؟

-رهف: زينه بَـس ابوي مو زين

-اسم الله شبي؟؟

-رهف: احسه مامرتاح

-عادي كلنه ما مرتاحين

-رهف: غزاله اريد اگلچ ؏ شي بَـس يظل بيناتنه فدوه

-گولي

-رهف: مو تحچين لأحد حبابه اذا ابوي يدري يمكن تصير حرب من دم ونرجع مثل گبل

-غزاله: ولچ احچي لا تلوعيني

شهگت وضربت صدري ؏ حچيهه، والزيد خوفي چانت تحچي وتبلعم ومخطوف لونهه ماتدري شسوت بروحهه وشني الي راح يصير بأبوهه وبكل البيت بسبب عملتهه الشنيعه...

يتبع☘️...

♛ ♛ ♛ ♛ ♛ ♛ ♛ ♛ ♛ ♛
لحد يگول القفله تجلط لانهه كيوت واللهي ونهيناهه ويه غزولتنه ورهوفتنه🌚♥️

وسالفه النشر حبايب اني گلتلكم بين يوم ويوم ان شالله وماخلفت بوعدي يمكن بَـس مرة وحده او ثنين بسبب ظروفي+ ترا اني هم عندي حياة واوقات يصيرلي شي وماگدر اكتب او انشر فَـہ اتمنى تعذرون♥️

لتنسووون التصويت والتعليق يحلويين💋.