♛ ♛ ♛ ♛ ♛ ♛ ♛ ♛ ♛ ♛
"شفاه مخملية"
بقلم: زهراء السلامي.
#انام انهزم منك تمر بأحلامي
افتح عيني من النوم و اتخيلك جدامي
شمسوي لألله وبيك جازاني
يمتعب معانيي علي بهدايي
عليك الله ودخيلك شيبتني هواي
بقلم narAli905
♛ ♛ ♛ ♛ ♛ ♛ ♛ ♛ ♛ ♛
"هجران"
سمعنه صوت هوسة جاي من الصاله صياااح وعبالك فدشي انرگع بالگاع بقووة، يا ستار گلبي وگف من الخوف، گامن البنات ركضض يشوفن شصاير بره واذا انصدم من اشوف 3 جنط كبار مشمورات بنص الصاله وبيبي عطيه تصيح
-حجية عطيه: ولچن يالمسودنااات شنهييي طاحت غنبله (قنبله) ؏ روسنه لو شنيي
نزلت عمه فتوح وبتهه نرجس من فوگ، لابسات عباية وحجاب عبالك متحظرات يردن يطلعن، فتحت فتوح عبايتهه وبينت دشداشتهه الفسفورية المشعشعه ووگفت بنص الصاله تصيح بعرامه
-فتوح: اييييي يبييييييت الگصااااب هاااي تاااليتهه انباااگ وانه بشاررربك سيد عمييييد
-حجية عطيه: وسممم وينه سيد عميد وجاعدة تچوعرين (تجوعرين) بنصنه چنچ خنفس وليچ يالمسلوعه ياهو وياچ؟
تصفگ اديهه وتصيح بعياقه
-فتوح: انباااگيت يا يمممه انباااگيت يالشيييخة انه تااالي عمررري انبااااگ وبنص بييييتي
بيبي عطيه لطمت صدرهه وعمه دلال ركضت عليهه تجرجر بيهه تدخلهه وحده من الغرف لان گاعدين خطار وانفضحو، وهيه مااكو واگفه بمكانهه وتصيح
-فتوح: وييينه الشييييخ انه بشاااربك ويييين تحطني بعينك ومن هالچلام!!!! ندهولي الشييخ (صيحولي الشيخ)
الخطار حسوا ؏ نفسهم وگامو طلعوا، وركضت رهف تصيح لأبوهه گاعد بالديوان، وهاي نرجس وفتوح وحده مگابله الثانيه ويلطمن ويصيحن
-نرجس: يمممماااا ماااكو غيرررهن وعلي هننه ماكووو غيرهن البووواگااات الحرااميه
-فتووح: ايي يمممه اييي يبعد حيلييي انه اعرف ياهي الدشت الحجرة چا شنهي انه هيچ خوثة وماحسيت عليهه امس تحوم وراي
-حجية عطيه: ياهي هاي ولچ؟
-فتوح: لاا يممه انه چلامي ويه الشيخ هوه الدگ ؏ سدره (صدره) وگال انتي بعيني وييينه وييينه اريدن اخشن بعينه اليووم
لهناك وسمعنه صوته القوي بَـس مبحوح من المرض
-عميد الدين: هذا ياهو تردين تخشين بعينه؟؟؟
-فتوح: تعاال يبعد عمتتتك تعااال يبعد هلييي يبوووووو تخزيييت يبووو تهجولتي يفتوووح يبووووو
-عميد: عمممه شمااالچ تولولين وتصيحين هو ياهو داس ؏ طرفچ؟؟؟
-فتوح: اااخخخخ لو المرحوم عااايش مايخليني بهالمهانه والحيرة اااخخخ لو عندي وليييد هيچ يصير حااالچ يفتوووح
-بكر: عممه ذكري الله حنه كلنه وليداتچ شني القضية حاچيني گولي!
-فتوح: تعااال يبچررر ترضااهه تنباگ عمتك بيوم عرسك
-بكر: افااا شنهيي؟؟ يمته هاي؟
-فتوح: امس مادري اليييوم مااادري ولكم مااادري يبووووووو
ورجعت تصيح وتدگ ؏ وجهها، جوري راحت تهدئ نرجس بَـس دفعتهه عنهه وخزرتنه، يااء هاي شبيهه مخبله!! اجتني جوري تهمسلي
-جوري: امدانه ثاني يوم عرسنه وصارت طلابه
-هجران: ولچ ايي شنو هالحظ العدنه
-جوري: اندري خيه
علت الاصوات وناس تحچي ويه ناس، بَـس عميد ساكت وواگف ؏ جهه ميحچي شي، استغربت يعني كل هالصياح واللوصه ومگال شي
-فيصل: عممه غير نفتهم يمته صارت البوگه؟؟
-احمد (اخو بكر): استغفر الله ربي واسأله التوبه عمه فهمينه لا تظلين تونين
-فتوح: مااادري مااادري يبوووووووووو يبووووووو
-نرجس: يمممااا هاااذ حال الماعدهن سنددد يبووو ؏ حظنننه شگد مگرودااات
لهناك وعميد الدين صاح بصوت احسه اخترق طبله اذاني من القوه والرهبه
-عميد: بسسسسچ!!!! فهمييينه شنهيييي الساااالفه!!!
خنس الكل وظلت فتوح تدگ ؏ رجليهه وتبچي بالسكته، زفر عميد بقوه وفرك وجهه، رجع لهدوأه المعتاد
-عميد: عمه لخاطر الحمزة گولي شني الموضوع؟؟ فهميني يمته انبگتي وشنهو الراح منچ؟
-فتوح: لا لا انه اروحن من البيت انتو مبين ما تردوني وصايره عظمه بالزردوم ولا تحشموني ولا تحبوني
-حجية عطيه: انطمييي طمچ الله لا تظلين تهوبزين مچسورة الچلوة (مكسورة الكلوة) صيري خوش حُرمة وجاوبي ابن اخيچ لا أيي (اجي) اهفچ بهااذ (وشالت عوچيتهه)
-فتوح: هاااا يممه شمااالچ گابه عليييّ ولچ تعااالي نرجسسس ذول مايردووونه امشييي نطلع من الدار (البيت)
-دلال: ولچ وين تولين خيه يواشچ وفهمينه
-فتوح: مااااشي افهمكممم بَـس شنييي ما ابقى بهالدار موش تگولن ماگليتلك سيييد
زفر عميد وهز راسه بقلة حيلة مبين گوة متحملهه، يممه شگد عايقه
-فتوح: اييي شوف انه اليوم صبحت مادري شوني حسيت رويحتي موش تمام رحت اسبح گلت عسى اصيرن احسن بَـس شو صرت اسوء و...
-عميد: عمه اختصري انه گتلچ احچيلي شسويتي بيومچ اريدن الزبده!!
-فتوح: شفتووو انتوو ماتردونني هدوووني ولكمم اطلع من الدار واريحكم
-فيصل بضحك: عمه هو ياهو كاظچ
-فتوح: هااااا هيييچ يعننني وعلي ما ابقى دگيگة وحددة امشي نرررجس
-حجية عطيه(عاطت بيهه): ولللچ استچنييي لا أيي احرگ شيب الخلفوچ يالغمى ولچ هوه موش صوچچ صوچ السيد ما لطچ ؏ حلچچ لسااه
-عميد: لا حجية محشومه عمتي انه بَـس اريدن اوصل لسالفه البوگة كملي عمه شصار وره ماسبحتي؟
طگينه ضحك لان حچاهه بأستهزاء، گوة كتمنه ضحكتنه وجواهر همست
-جواهر: اييع شگد اكرههن
-هجران: اگولچ ذني شنو فلمم
-جوري: اگولچ جواهر ذني دائماً هيچ؟
-جواهر: يبووو هاي اذا مو يوميه وخطيه عميد واگع بيهه يگعد يراضي فلانه وشلتانه
-فتوح: اييي يهيبتي شوف شصاار، طلعت من الحجرة واجيت تريگت وياكم بَـس نرجس ماهي ما يت (اجت) گلت اروحن اشوف بنيتي شمالهه لان چانت متخربطة البارحة بالعرس سودة بوجه ريلهه (رجلهه) فَـہ شنهي شو اشوفن بنيتي خربانه وواگعه لا ايد ولا رجل، ظليت حايره بيهه اشوف شمالهه وهيه ماكو گووة تجر النفس
-حجية عطيه: عمممى بعيينچ يالچذااابه وينهي متخربطه شوفيهه چنهه صل واگفه چدامي (گدامي)
-فتوح: يوم صارت زينه
-حجية عطيه: وليييچ سلبووحه انتي بنيتچ صاحت ااخ جيتيني تركضين شو ماشفت چهرتچ (وجهج) اليوم كله!!
-فتوح: يبووووو ماتصدگوووني يبووووووو
-عميد: عمممه مصدگچ كملي اندارلچ فدووه
-فتوح: اييي يبعد عمتك رحت لبنيتي وحرت بيهه، شو انه دشيت للحجرة مرت الثانيه واذا ذهبي الي حاطته ؏ الميز مختفييي يبووووو اربببع معاضد وسلاااح (گلادة كُلش چبيرة وثگيله) مختفياااات يبوووو سييد فوگ التلاثين مثقااال رااحن بغمضة عييين
-عميد: عمه بسچ لا تبچين والله گلبي خلصان خلونه نتدانش ونشوف ياهو الدش البيت اليوم؟؟ وانتي حسب چلامچ اليوم البوگه صارت
-فتوح: اييي يبعد طوايفي اليووم
-عميد: عمه انتي دورتي؟؟ يمكن مناا منااك واگعات
-فتوح: وحگ ابو فاضل دورت كل مچان وعلي ابو الحسن گلبت البيت گلاااب بَـس بنيتي نرجس لگت دليل يجوز هو السارگهن
-عميد: شنهو الدليل؟
رفعت ايدهه شايله ورده صفره صغيرونه، رفعت تك حاجب وباوعت بأتجاهنه
-فتوح: هذااا الدلييل
-عميد: ورده الدليل؟؟
-فتوح: اييي يوم ورده
-عميد: وشدخلهه بالموضوع؟؟
-فتوح بمكر: والله مادري شووف يجوووز اكو وحده من البنيات چانت تلعب بالورد لو لابسه ورد لوو حاااطته بشعرهه!!!!
-بكر: عمه انه كلشي ماجاي افتهم
دلال: ولا انه
-حجية عطيه: بسكم خلونه نستوعب حچي هالغمه وليچ شجاب الورده بالسالفه؟؟ شو انتي گمتي تخربطين يالعوبه
-فتوح: يوووم انه ما اچذبب وعلي لگيت هالورده جار ميز التواليت (بصف الميز)
-عميد: عمه اندارلچ سبع فدواات هذااا موش دليييل يعني شنهي لگيتي ورده بالحجرة يعني لزم وحده چانت تلعب بي ودشت لحجرتچ يا بوييه هذا موش چلااام عگال (عُقال)
-فتوح: شوفو منهي اللابسه ورد اصفر انه شعلي بعد
ظلينه وحده تباوع للثانيه مثل الثولات ندور من كل عقلنه، لهناك وحلا صاحت بصدمه
-حلا: جوااهر حاطه ورد اصفر بشعرهه
اندارت الانظار كلهه ؏ جواهر، وهيه خطيه وجهها صار اصفر وجحظت عيونهه بصدمه
-جواهر: ونبي ونبي مو انييي والله العظيييم اني شعللليه
-فتوح: سمعي ولچ تطلعييين الذهببب لو اجي اهلس شعرچ المفرعته جدام الزلم
-جواهر: والله مو انيييي هاي شبيييكم تباوعولييي
-نرجس: ماكو غيرچ لابس ورد اصفر
-جواهر: وشنو يعنييي؟؟؟؟ اصلاً رهوفة جابته وحطته بشعري
-فتوح: احاااا افادي سمعت سيييد جاي تتهم بنيتك
-جواهر: لا والله مو قصدي بَـس انتو تتوقعون اني اسرق؟؟
ظلت تباوع بوجوه الكل ودموعهه بطرف عينهه، باوعت بوجه بكر چان متفاجئ وعميد نفس الحاله، ركضت جواهر عليه ولزمت ايده حيل وگالت بحرگة
-جواهر: عميييد ونبي اني معليه شبيييك مصدوووم والله مو اني والله انته تصدكنييي صحححح انته مو صديقييي انته تصدگنييي عميييد
يباوع لوجهها وساكت، وهيه مستمره تهز بأيده وتبچي، هز راسه وگال بخفوت
-عميد: لا عمه انتي متوهمه يجوز طارت بالهوا ودشت حجرتچ لا تتهمين البت
-فتوح: منيلي شباااچ بالحجرة؟؟! سيد انه شميت عطرهه اليسطررر بحجرتي يعني هيه الداشه (الدخلت)
-جواهر(باوعت بعيون عميد واحس نفسي انگطع، بكر عاط
-بكر. عمممه مستحييييل انه اعرف جواهر شنهي ماتسويهه وعلييي
-نرجس: بچرر شماالك جاي نگلك شمينه عطرهه القوي بحجرة امي والورده وگعت من شعرهه شوف الله راد يفضحهه هالبواااگه
-جواهر(درت وجهي اباوع عليهم): جيبوو القرااان احلللف اني چنت گاعده ويه البنات بالغرفففه احچن بنااات هجرااان، جوووري حلاووي احچييي
-جوري: اي اي چانت يمنه بالغرفه
-هجران: ايي صدُك چنه نسولف طول الوقت
-جواهر: شفتووو والله اني معليييه اني برييييئة
-حلا(گلت وعيوني كلهه دموع): بَـس جواهر انتي طلعتي من الحجرة گلتي رحتي تشربين ماي
-هجران(تذكرت صدُك جواهر طلعت من الغرفه وتأخرت علما رجعت، بَـس مستحيييل تسويهه، رجعت عاطت والدموع تهمل من عيونهه
-جواهر: ولكم حراااام بيمننن احلفلكم اني برييييئة
-فتوح: سمعي ولچ هاااي دروبچ ماتمشي عليّ انه ادري بيچ انتي الداشه الحجرة والبارحة عينچ مانزلت من معاظدي وسلاحي طلعييييهن يم العين الضيييگة
-شهد: عمممه جواااهر متسويييهه
-عميد: بسسسكم صياااح شمالكم هو هيچ تنحل الامووور!!!
ماحسينه اله وگعت جواهر غشيانه بصف عميد، ركضنه عليهه وعمه انتصار حطتهه بحظنهه وعميد يدگ ؏ خدودهه
-عميد: جواااهر اصحييي جواااهر شمااالچ
بكر دفع عميد وراح عليهه وفيصل من جهه وعمه سلمى من جهة الثانيه
-بكر: ولچ جوووااهر اصحيييي مصدگيچ والزهرة مصدگيچ لوو الكلللل يچذبچ انه اصدگچ
استغربت من كلامه بَـس ماعلقت بشي، گمز من مكانه وراح ؏ فتوح يهد ويصيح عليهه
-بكر: زيييين هيچ عممممه خوفتي البببت وطاحت علينه
ظل يتلاسن وياهه، واني وگفت بصف عميد، چان واگف وحاط ايده ؏ خاصرته ويباوعلهه وهمه يصحوهه، دار عيونه يباوعلي وهز راسه وطلع من الصاله، مافهمت ليش هيچ سوه بَـس ماهتميت لان حرت بجواهر
جبنه عطر وشممناهه، الحمد لله بدت تصحى شويه شويه وبكر لسه بعده يتعارك ويه عمته حتى فيصل تعارك وياهه، رجع عميد للصاله هذا وين چان؟، صاح
-عميد: سووا مجااال خلو البت تتنفسسس، يووم شيليهه ناخذهه للمستشفى
-انتصار: اي اي يله سلمى ساعديني
تعاونن ويه بعض وشالوهه بَـس سرعان ما صحت ووگفت ؏ حيلهه، رجعت تعيط وتبچي وتصيح اني بريئة حرام تظلموني، اريد امي وابووية
-عميد: بسكمم لحد يحچي بعد وعمه انتي ذهبچ راح يردلچ لا تخافين بَـس انطونه مجال
-جواهر: عميييد قصددددك يعني اني البايگته وراح ارجعه؟!!!
-عميد: استغفررر الله اااانه مو گلت محد يحچي بعدددد
جواهر تخبلت وشهد واني نهدي بيهه، راحت تركض بغرفتهه سحبت موبايلهه ودگت ؏ ابوهه، ماطولت بالمكالمه هواي لان رأسن سدته وگعدت ؏ فراشهه مكرفصه رجليهه لصدرهه وحاطه راسهه بنصهن وتبچي
-هجران: جواهر حبيبتي كاافي همه مصدگيچ
-جواهر: لا هجراان ممصدگينييي انتي مشفتي عيون عميييد
-شهد: وطُزززز بي واني اعلمهه هاي حلا النذلة وگفت ويه نرجس وفتوح المجعمرات ضدچ
-جواهر: لا هيه معليهه البنيه بَـس حچت شنو صار
-جوري: جواهر كافي يا عمريي خلصت دموعچ كافي حبيبتي
-هجران: اي جواهر سمعتي بكر گال هوه مصدگچ والله گالهه من چنتي متخربطه
-جواهر: اساااساً لو چنت صدُك مسويتهه هوه راح يكذبهم ويصدگنييي
-هجران(صارت الغرفه هدوء من گالت هيچ بَـس نسمع صوت شهگاتهه العاليه، جوري ظلت تمسح ؏ ظهرهه وتصبر بيهه، اما اني مسطوره ليش بكر هيچ گال؟؟ وليش هسة جواهر تگول هوه الوحيد الي راح يصدگهه
مشه الوقت والبيت لسه هوسة، حتى غده تغدينه ؏ الواگف بسرعه بسرعه والخطار طابين طالعين، عميد گال لحد يفتح الموضوع لحدما يفتهم السالفه كامله
وخطية جواهر ؏ حالهه مانشفت دمعتهه المسكينه گاعده ومنتظره ابوهه يجي، وصدُك وره اذان المغرب وسمعنه صوتهم والعياط ماله والي، بقيت گاعده بالغرفه اسمعلهم وجواهر وشهد طلعن بره
-هييييچ تأذوون الامانه وتتهموهه بالسررقه!!!
-فتوح: انه شعليييّ اذا الامانه موش كفووو وباگتنه
-اسماعيل (ابو جواهر): مستحيييييل اني اعرف شمربيييي بناتي متضيگ عيونهن ؏ كم ذهبه
-عميد: حجي اسمحلي...
-فتوح قاطعته: 30 مثقال يا چم ذهبة طلعوووهن يالحراااميه
-عميد بصياح: لهنااا وصلنه عمممه تحچين فوگاي چا انه شنهي واگف طرطووور
-جواهر ببكاء: انته ماوگفت ويايه وصدگت عمتتتتك
-عميد: وياهوو الگااال شو انتي بكيفچ تحچييين
-اسماعيل: دقيييقه منگعد بهالبيت بعددد امشي بابا جواهر، شهد جيبوا غراضكم ويله نطلع من غير رجعه
-فتوح: عساااكم لا رديتووو بَـس جيبو الذهب بالاول موش بگتوا وراح تطلعووون
-عميد: عممممممممه حسسسسسچ ماهييييسة (صوتج ماسمعه) هاااي اخررر مرة اگولهه لا وحگ ابو فاضل تصير موش حلوة بعدد
-اسماعيل: يله بنات بسرعه
-بكر: عميي جواااهر ؏ راسنه نحطهه بعلي ماخلي جنس مخلوگ يمسهه لو يكدرهه
-اسماعيل: عاشت ايدك يابه بَـس انته التفتهم والله
-عميد: افااا هيچ يعني صارت حجي تهيني وتهين كل هالزلم الواگفه!!
-اسماعيل: محشومين من الاهانة، بَـس سيد انته كلشي مسويت!!
-عميد: وشلون تردوني اسوي وانتم مانطيتوني مجال والوادم رايحة رادة علينه، حجي احطك ؏ راسي تعال نگعد بالديوان ونتفاهم حنه الزلام وحيدنه، وخلي البنيات يرتاحن وانتي جواهر بويه اكلي شي من الصبح ماحطيتي لگمه بحلگچ
-جواهر: مااااريد آكُل شيييي بابا يلهه خلينة نطلللع مناااا
-عميد: جواهر بسچ روحي ارتاحي وسمعي الچلمة يله بويه
-اسماعيل: اي بنتي روحي ارتاحي خليني احچي ويه الساده ونفتهم الصار
رجعت جواهر يمنه بالغرفه وتلوب، يا رايحة يا راجعة وتاكل بأظافرهه المصبغه، ماطولوا شويه وابوهه صاحهه وصاح لأختهه وطلعو گالو يرجعون لبغداد
كُلش ضجت معناهه مراح اشوفهه مناا لحد يوم السفره وهاي اذا قبلت تجي لان لسه معانده ومبوزة عليهم، صعدت لغرفتي وسبحت ؏ السريع ولبست دشداشه قصيره لونهه وردي فاتح
گعدت ؏ السرير وفكرت شلون حلوهه السالفه؟ يعني اقتنعوا مو جواهر الماخذتهن؟؟ ماطول تفكيري لان دخل بكر للغرفه، وگفت ؏ حيلي وابتسمت
-الله يساعدك حبيبي
-بكر: ويساعدچ
اخذ منشفه وتوجه ؏ الحمام، اني ركض رحت طلعت ملابسه وحظرت العطر مالته وگعدت انتظره يطلع
هم طلع لاف المنشفه ؏ خصره بَـس درت وجهي بعدني استحي منه، بدل واني دايره وجهي، اجه ؏ الفراش وتمدد
-هجران: حبيبي تاكل شي؟ جوعان؟
-بكر: لا
-عاد فواكه اسويلك؟
-بكيفچ
-ماشي هسة دقايق
ركض لبست عبايه اسلاميه ؏ دشداشتي وشال ونزلت اجيب فواكه، رحت للمطبخ وجبت اشكال برتقال ؏ تفاح ؏ موز ؏ كيوي، وصعدت بيهن فوگ، صدووووك اني هسة ياله انتبهتت غرفه بكر قبل چانت جوة بَـس هسه تحولنه فوگ!! هاي اكيد لان الجوة صغيره ومتكفي
دخلت للغرفه شفته يلعب بموبايله، گعدت ؏ السرير بصفه وگشرتله برتقاله، ابتسمت وحطيت شيف برتقال قريب حلگه، بَـس هوه استغرب
-هجران: شنو شبيك صفنت؟
-ليش جاي توكليني؟
-ماما دائماً تسوي هيچ لبابا تگول بيهه اجر عظيم اذا المرة وكلت زوجهه والعكس صحيح
-امممم
اكل الشيف بَـس ميباوع عليه ابد، ردت اعرف شنو السبب معقوله لسه خجلان مني؟؟
-هجران: بكرر شصار بسالفه جواهر؟
-بكر: حليناهه
-شلون؟
جر حسره وظل ساكت، واني الفضول اشتغل عندي
-هجران: يعني طلعت صدُك مو جواهر الماخذتهن؟
-بكر: طبعاااااً مو جوااااهر لييييش انتي چنتي شاااكه؟؟؟؟
-لا لا شبيك عصبت لا والله ما شاكه بيهه اني
-لااا عاوزچ تشكين بعد عيني
-بكر شبيك ترا جواهر صديقتي واني احبهه ومستحيل اشك بيهه اني بَـس ردت اعرف انتو اقتنعتو او بالاحرى عميد اقتنع مو هيه الماخذتهن؟
-اي
-تمام لعد شبيك يا حبيبي ليش عصبت هيچ عليه
-لان چلامچ موش مگبووول
-بكر شبيك بَـس تريد تتعارك اني هسة شحچيت
-بسچ هجراان انه راسي منثول اريدن انام وارتاح
-تمام براحتك
سحب اللحاف ونام، رحت بصفه وطفيت الاضويه توقعت رح يسوي مثل البارحة وبأي دقيقه هسة يسحبني عليه بَـس كلشي ماكو، غمضت عيوني اريد اريحهن وماحسيت اله ثاني يوم الصبح هوه مو بصفي
بدلت ملابسي وطلعت من الغرفه صارت بوجهي جوريه
-جوري: صباااح الحُببب
-ههههه صباح العسللل
-جوري: شلووونچ هجوور
-زينه وانتي؟
-ااااه كُلش كُلش كُلش زييينه اني اصلاً طاااايره فووووگ فوووگ عااالي
-هههههههههه الله يديمهه
-جوري: امييين، وانتي هم مرتاحة؟
-اي الحمد لله
-جوري: اييي الحمد لله يعني استاذ ثلجاية گام يتحرك شويه؟
-ياااء منو استاذ ثلجاية؟
-بكررر منو غيره
-هجران: خرب ببليسچ جووريه ههههه ولچ ليش تصيحيله هيچ
-ولج خيه هذا رجلچ باااارد ابرد من الثلج
-ايي هوه صح بارد بَـس اني احبه واحب طبعه
-جوري: هذا اهم شي، يله اني رايحة اسوي ريوگ لفصولتي اسويله مفاجأة بالغرفه قبل ليگعد، تعاي انتي هم سوي
-هجران: وييين اسوي اصلاً گعدت بكر مو بصفي
-هاا ليش وين راح من الصبح؟
-مادري هسة اسأل عمه دلال
-يله امشي سوه
نزلنه وجوري راحت للمطبخ، اما اني رحت ادور بلكي بكر موجود بالهول لو بالصاله، شفت غزاله هستوه دتطلع من الحمام
-صباح الخير
-غزل: هلاا بالعرووس صباح النور
-حبيبتي، اگولچ بكر شفتي وين؟
-غزل: لا والله هستوني صحيت انه، يجوز گاعد بالديوان روحي سألي عمه دلال
-تمام ماشي
جاي اريد اروح وشفنه عميد يطلع من الغرفه، غزل ابتسمت وگالت
-غزل: صباح الخير باباتي
-عميد: صباح النور بنيتي (دار وجهه يباوعلي وابتسم) شلونهه العلويه
-هجران: بخير الله يسلمك، اءء سيد تدري وين بكر؟
-عميد: لا والله مادري بي
-غزل: لا تخافين هجرانه هسة شوي ويرد، باباتي اسويلگ ريوگ؟
-عميد: اي حبيبتي هم ياله اللحگ اطلع لبغداد
-غزل: شعندك ببغداد؟
-عميد: بعد شعندي چا غير اروحن اشتري لعمتچ ذهب
-غزل: صگد تحچي؟!!
-عميد: اي بعلي امس گلبت الديوانيه عليّ تحلف وتتكفر ماكو غير جواهر ماخذه الذهب
-هجران(تدخلت وگلت): سيد جواهر متسويهه اني اعرف هيه شنو وشنو من طيبه شايله
-عميد: ادري يا بويه ومتأكد عمتي سرحت ومضيعتهن شي مچان بَـس ما توب اله تأذي البت
-غزل: اووف لو بَـس اعرف شمالهه ويه جواهر ارتاح
-عميد: وعلي انه الي ارتاح من الطلايب
ابتسم وعافنه، واني رجعت لغرفتي ادگ ؏ بكر الي اختفى.. أيست ونزلت قريب الظهر تغدينه وگظه اليوم طبيعي ؏ الكل، اله عميد الدين وبكر ما بينوا صارلهم يومين ماكو، گلبي مشتعل ؏ بكر لييش ميجاوب ؏ اتصالاتي!!
الليل كله متغمض عيني اخاف يدگ لو يدز رساله وماحس عليه، گعدت الصبح واليوم رابع يوم الي بهالبيت الغريب الي واضح متروس مشاكل وناس حاطة عينهه ؏ ناس خصوصاً عمه فتوح ونرجس فَـہ خليني اتحاشاهن من هسة احسنلي
رحت لغرفه جورية اشوف وينهه بَـس شو ماكو مختفيه، اتصلت بيهه گالت طلعت هيه وفيصل يتريگون بره خطيه خليهه تتونس الله يهنيهم، نزلت للمطبخ چانت عمه دلال جاي تگلب بگدر المرگة
-صباح الخير عمه
-دلال: يا هلااا صباح النور ؏ ويهچ الحلو يالعافية
ابتسمت ؏ كلامهه، ورحت ؏ الثلاجة اشوف شنو آكُل لان ميته جوع والبارحة ماتعشيت وياهم
-دلال: هاا بنيتي اسويلچ ريوگ؟
-لا عمه عاشت ايدج اني اسوي شبيه
-دلال: لا يرويحتي انتي عروس مايصير تشتغلين
هزيت راسي واكتفيت بأبتسامه، گعدت ؏ الكرسي الي وره الميز صاير بالمطبخ واشوفهه تشتغل، تعحبت من هسة دتطبخ الغده وريحة مركة البيتنحان تفووح، شفت كومة كراعين وراسين باچة ؏ السنك مبين جاي تنظفهن
كملت گلي البيض وجابت زعتر ورشته ؏ البيضه، استغربت من السوته، ومن شافت علامات الدهشة ؏ وجهي ضربت راسهه بخفه وگالت
-دلال: اخخخخ نسيييت عبالي جاي اسوي لـ عمييّد هو يحبه بالزعتر
-هجران: هااا طيب؟
-دلال: انه ماحبه وعع حشة نعمة الله يصير حامض بَـس بعد هذا عميدي وسوالفه
-هههههه سيد عميد هم اله اسم دلع
-دلال: چا شوون هذا عميدي مدلول البيت بچر سيد عباس اول فرحتنه
-الله يحفظه
-ويحفظلچ بچر يبعد امچ
جريت حسرة وسألت بحيرة
-عمه بكر ماهوه صارله يومين ظل بالي، دزلي رساله البارحة وگال راح يتأخر بَـس گلبي ناغزني
-اسم الله ؏ گليبچ لا تخافين ياام هاذ بچر من گبل مايعرف يگعد راحة
-ايي بَـس هسة الوضع تغير يعني هسة هوه مسؤول عن مرة ولازم يلتفتلي ويطمني هاي واني بعدني عروس وهيچ شلون بعدين، هسة لو بَـس يريح گلبي ويگولي هوه وين ارتاح والله
ابتسمت ورفعت چتافهه بحركة ماعرف، صبتلي چاي وگعدت آكُل صدُك كُلش طيب البيض ويه الزعتر، ضحكت هذا عميد عنده ذوق بكلشي حتى بالاكل
كملت وطلعت بالحديقه اتمشى، حديقتهم كُلش چبيرة ومليانه خضار وورود واشجار، چان اكو بالزاويه مثل الغرفه المبنيه طلع منهه ولد شاب بَـس مبين عليه گوة يمشي، ابتسم من شافني واجه ناحيتي
-زيد: السلام عليكم
-عليكم السلام
-زيد: بالخير والبركة خيتي اكيد انتي هجران زوجة بكر صح؟
هزيت راسي وابتسمت، عرف عن نفسه وگال هوه زيد ابن عمه دلال، مبين عليه حباب وهادئ، شويه واجت رهف للحديقه تفرك بعيونهه تقرب عليهه وگرص خدهه
-زيد: هاا سنجااب گعدتيي
-رهف: اوهوو زيود لا تصيحلي سنجاب
-زيد: ههههه شسوي يلوگلچ الاسم
-رهف: عووع شنهي سنجاب شوف حلاوة (اخو جواهر) يندهلي لوز شوف شگد حلوو وشلون ذووق
-زيد: اهووو هم جابت طاري حلاوة
-رهف: هيوو ترا هوه هم صديقي
-زيد: اي اي خوش
-هجران: ولچ رهووفة شو ما صبحتي عليه؟
-رهف: عااا ماشفتچ وعلي ياااء ولچ انتي هلگداتچ ماتبينين ترا
-هجران: هههه ايي اني نعومة
-رهف: تضيعين بيناتنه
-هجران: شسويلچن اذا انتن كل وحده شطولهه
-رهف: ههههههه اييي چا غير ؏ اهلنه نطلع طوال، المهم زيود جبتلي الكاسيت؟
-زيد: اي وترا اسمه راام مو كاسيت
-رهف: المهممم جيبه ولك ارييدهن
-زيد: ههههه هسة اجيبه
راح للغرفه وخطيه گوة يمشي مبين عنده اصابه برجله، ورهف تگمز بمكانهه بحماس، اندارت عليه وگالت وعيونهه تلمع
-رهف: وصيت زيد ؏ كووومة اغاني وحملهن بكاسيت
-هجران: قصدچ رام
-رهف: ايي يبووو انسى اسمه والله
-هجران: مبينين اصدقاء انتي وزيد؟
-رهف: اييي كللش گريبه عليه بَـس شو ابوي بعد ما يخليني اروح واحاچي
-لعد شلون هسة تحاچي؟
-مو هسة ابوي ماموجود
-لا حبيبتي ميصير ماطول ابوچ نهاچ عن شي ميصير تسوي وره ظهره
-رهف: ترا والله زيد حبااب بَـس ابوي مادري شماله
-هجران: ميهم اكيد ابوچ ادرى بمصلحتچ
سكتنه من اجه زيد مدلهه الرام ورهف هواي تشكرت منه وراحت تركض جوة، درت وجهي اباوع لزيد واشوف عيونه عليهه ومبتسم اممم احس اكو سالفه مو طبيعيه دتصير هناا، ويمكننن افتهمت ليش ابوهه ديمنعهه تتواصل وياه
رجعت للبيت وصبحت ؏ غزاله وحلا واشوفهن يركضن منا ومنا ماشالله شگد سريعات وهبات ريح، بنص ساعه نفضن الصاله والمطبخ نفض، شگد ردت اساعدهن بَـس ميقبلن، قريب الظهر وصاحن اجو الولد لحد يطب للمطبخ
استعربت وليش محد يطب للمطبخ؟ مديت راسي من الباب واشوف شايلين مثل الصدرية بيدهم وكلهه دم ولابسين بواته كلهه ملطخة بالدم وحتى ملابسهم مطفر عليهن، كش جسمي ولعبت نفسي من المنظر، بسرعه دخلو جوه والبنات ركضن يغسلن الارضيه وراهم لان اكيد تنگست من الدمايه
سلموا الولد علينه وكلمن راح لغرفته، تغدينه وصار العصر وبكر لسه ماكو، حسيت الدمعه بطرف عيني وطگت روحي، رحت لغرفتي وانفجرت بچي ليش ميجاوبني وكل ما اسأل واحد عنه يگولون ميعرفون
رجعت جورية وگعدت تواسيني وتگول عذري ويمكن عنده شغل، عطت بوجهها
-هجران: يااا شغللل جورية ترا صارلنه اربع تياام متزوجييين مااكو هيچ شييي يعوفني ويختفي هيچ!!!
-جوري: هجرانه لا تخافين اكيد اليوم يرجع لان باچر سفرتنه نسيتي؟
-هجران: ماااريد كلشييي ماااريد بَـس خلي يرجعلي اريييد اتطمن وارتاااح جوووري
-جوري: كافي هجران شبيچ ؏ كيفچ ويه روحچ اكو عروس هيچ شكلهه لا مبدله لا متمكيجة اله ترديهم يحچون عليچ ويگولون مرعبله
-هجران: شوف انتييي ويييين واني وييين رجلي صارله يومين مااكو وميجاوب ؏ اتصالاتي وولا احد يدري بي وين وحايرتلي بالمكياج واللبس
-جوري: هجور واضح همه متعلمين ؏ غيابه لان محد خايف وديمارسون عملهم طبيعي وحتى فيصل من سألته يگول بكر دائماً يبات بره البيت
-اوووووف لو احچي منااا لباچر محد يفهمنييي
قريب المغربيه وسمعت صوت جوة، گمزت من مكاني اكيد بكر اجه وفعلاً طلع جاي وياريتني ماشفته بهالحال، تيبست رجليه من منظره مدمى تدمي وقميصه مشگوگ والوجه ميتفسر، وعميد الدين واگف بصفه هم متأذي بَـس مو نفسه، بيبي عطيه لطمت صدرهه وعاطت
-يمااا صوااااب ولكم شصااااير؟؟؟؟؟
يتبع☘️...
♛ ♛ ♛ ♛ ♛ ♛ ♛ ♛ ♛ ♛
توقعاااتكم؟؟؟ لا تنسون التصويت والتعليقات الحلووة وانتظرونه ببارت يديد واحداث يديده😎♥️.
+
تعالو ؏ الانستا نسولف بالاحداث والتوقعات الجاية🌚♥️
رابط حسابي الانستا بالبايو وهذا اليوزر zllp.y
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!