شفاه مخملية الفصل الأربعون 40 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت كُلش طويل لعيونكم♥️.

"شفاه مخملية" 💋

بقلم: زهراء السلامي.

اريدكم تحزرون بلسان مَن هالكلام برأيكم؟👇🏻
#ما كان هجرًا ولا كِبرًا وليس أذى
أستغفر اللهَ ، هل أقوى فأؤذيكَ ؟
كانت ظروفًا ثقالاً لو علمت بها
تبكي عليَّ كما أبكي، وأبكيكَ♥️.

♛ ♛ ♛ ♛ ♛ ♛ ♛ ♛ ♛ ♛

-عميد اگدر احاچيك؟

رفع راسه بعدما چان مدنگ يحسب الفلوس البيده، ظبهن ويه بعض وحطهن بجيبه وهزلي براسه بمعنى "تعال"...

-مرتضى: عميدي عندي سالفه وياك

ابتسم خفيف وضيگ عيونه، هذا اخوي فطن ومتأكد يدري بسالفتي ويه غزاله وعركتنه بَـس لو افتهم منين يعرف ارتاح، اجيتله انخاه اريده يحلي الموضوع واخلص من العذاب الجاي اعيشه وانه بعيد عنهه، جر نفس عميق وزفره بروية...

-عميد: انته مو آدمي

-مرتضى: عميد ماعرف شسوي لخاطر الله ساعدني البت ماترضى تنام بحظني وتتهرب مني عبالك جني ويلاحگهه شسوي ترا والعباس طگ افادي

-عميد: گتلك انته مو آدمي

-يعني شلووون شلوووون شسووووي اييي انته سنعني وعدلنييي انته مو اخووووي

نتر بيه بَـس بنفس النبره الهادئة...

-عميد الدين: اشگ حلگك اذا حاچيتني بهالطريقه بعد مرتضى لا تنسى رويحتك ترا والعباس گوة كاظ روحي عنك لخاطر امي حتى ماتموت علينه تدري هيه روحهه معلگه بيك

-مرتضى: شسوووي ساعدني والزهرة نگظت

-عميد: انطم لا تبچيي لا تبچي ولكك گتلك اعالجك واجيبلك احسن الاطباء بَـس انته ماترضى!! بله گلتلهه ماتصير عندك خلفة لو لااا

-مرتضى: لاااء طبعاً اخاف تعوفني

-چا ظل ظل يوميه عركة وحبوبتك تذب بهالبسامير لغزاله عبالهه المشكله منهه

-مو اخاف عميد شمالك انته

-اووووف استغفر الله لك انته ليش ماتفهم غزاله بنيتيييي تعرف شني بنيتييي والعباس تصيح ااخخ احسهه بگلبي وانته معذبهه ومأذيهه وانه ساكت ومو لبالك انته اخوي واسكت ؏ خياساتك

-تبت والله ليش ماجاي تصدگني

-عميد: ولا اصدگ لانك مو كفو چم مرة حلفتلي بروح ابوي بطلت سوالف الگو*** وتردلهن بسسسك تعبتتت تعبببت شمالك انته ماتحسسسس

نزلت ؏ رجله ابوس بيهه ودموعي تنزل مثل الجاهل..

-مرتضى: والعباس بطلتهن والله عميد والله بطللت صارلي فترة اببد ماتدنه لأي شي يغضب الله كله لخاطرك ولخاطر غزاله

-گوم بساع

-عليك الله ساعدني

-گوووووم

گمت ؏ حيلي وجرني حظني لصدره افيييش هالريحة ريحة الاخوة، لو اللف الدنيا كلهه مستحيل اللگه اخ مثل عميد الدين ومثل حنيته وكثر ما كفو والوادم تحچي بي وبأصله صرت اغار منه لاني عااار وطايح حظ الله يطيح حظي اذا أذيته بعد لو خجلته هذا سَندي وقوتي منين اجيب اخ نفسه...

-عميد: اسمعني ولك وره عرس سلمان اخذك لطبيب نعالج حالتك الهمجيه التصيرلك بالعلاقة الزوجية وبعدين نشوف سالفه الخلفه خوووش؟

-اي اي والله هذا هوه ابوس ايدك

-عميد: مرتضاوي بوية انه اعرفك خوش زلمه وكفو بَـس لو تعوف غيث الساقط ترتاح انه ادري هذا الي مطيح حظك بسوالفه السرسريه وانه من طردته من البيت وبوكتهه عمي زعل عليّ لان ماردت احد يتأذه منه خصوصاً انه عندي بنيه حديثه ونظراته وصخة عليهه

-مرتضى: زين اعوف غيث وغزاله شلون تردلي؟

-ترد لا تخاف بَـس صير آدمي بويه المرة شتريد غير الحچاية السمحة والريج الحلو دلعهه غازلهه صيرلهه جاهل تموت عليك اي اي لا تعاينلي هيچ شمالك ولك ههههه

-شني هاي اصير جاهل شني

-اي اسمع حچايتي خرب حظي صرت اعلمك ؏ سوالف النسوان الله يطيح حظك

-هههه خويه انتك بكلشي تفتهم

-لا بويه مو بكلشي بَـس طبيعتي اللگفهه وهيه طايره ماحب اصير ثور الله بأرض الله

-والعباس ماكو منك

نزلت ؏ ايده وراسه وچتفه وحتى رجله وهوه مايرضى يوخر عني، جرني من ايدي وطلع فلوس من جيبه ومدهن ليه...

-عميد: امشي روح لسوگ الذهب اشتري لغزاله فد شي حلو تستاهله وراضيهه بچلمة حلوة تنسيهه زعلهه بَـس مااتتگرب الهه لحدما اعالجك فهمتت

-مرتضى: زين يصير ابوسهه؟

-عميد: ههههههه لعنت الله ؏ ابليسك اي يصير بَـس كظ روحك عليهه ولا تتدنه ؏ الطفله فهمت وليدي

-اي فهمت والعباس هذا هوه

بست ايده مرة ثانيه وعاط بيه...

-عميد: شنهيي شمالكم انتو تموتون ؏ التمطگ

-مرتضى: هههههه احبك والله

رفع تك حاجب وحچة بغرور بوسطهه ضحكة متلاعبه...

-عميد: خاب ياهو مايحبني بَـس مروان وخلفته

-مرتضى: اي والعباسس هههه

-عميد الدين: خوش هسّ اسمعني حبيبي باچر حنه اخوك اريدك توگفله وگفه حلوة ولا تحسسه هوه مو اخوك من ابوك انته تعرف سلمان شكثر يتحسس من هالموضوع

-مرتضى: بعيني چا چم اخو عندي هوه بَـس انته وسلمان ورضا الله يرحمه راح بعد

-عميد: الله يرحمه ويله ادعبل عندي شغل

-ههههه صااار شيخ

گمت اطلع للبراني وعبدالله مدلي الگهوة عيب اردهه، شربت الفنيان (الفنجان) وطلعت لباب الحوش واذا اشوفن زلم متجمهرة بالباب، تقدم عليّ شيخ حاتم...

-الشيخ حاتم: السلام عليكم

سلمت عليه وباوسته وسأل ؏ عميد الدين گتله جوة، بعدهم بالباب ما طبو وشفت مروان وستار وابنه الثاني نبراس بووية غير شطت، هجمت ؏ ستار وعاركته بَـس ما لحته حرمات وگفو جدامي...

-مروان بصياح: مرتضضضى حنه جايين وگاصديكم عيب هالحركات

-مرتضى: انته اااخر واحد تحچي سد حلگك لا بعلي اطلع حرگتي بيك

گوة جروني عنه وغافلني وطب للديوان، جايب كومة شيوخ وياه وحتى عمايم، ركضت جوة واشوف عميد واگف ؏ حيله وگوة جاي يباوس شيخ حاتم وجهه صاير احمر رح ينفجر..

سمحلهم يگعدون بَـس شني ؏ اعصابه ومنطي گفاه لمروان وحتى ماسلم عليه ومروان حيل اندگر وخجل جدام الشيوخ بَـس الكل يعرف حنه عداوة ولا هم يدنولنه ولا حنه نروحلهم..

اجه عبد الله يگهويهم وشيخ حاتم رد الگهوة وگال...

-شيخ حاتم: شيخ عميد الدين حنه جينه وتعنينه لدارك ومانشرب گهوتك گبل لا تنطينه مُرادنه

-عميد الدين: بيك خير وتدلل

-شيخ حاتم: حظرتي وحظرة هاي الوجوه الخيره جينه نريد الگرب منك كل الگاعدين هين يعرفون ياهو سيد عميد الدين وياهو ابو سيد عباس الله يرحمه

-كلنه گلنه: الله يرحمه

-عميد الدين: نتشرف بيكم

اتصلت بعثمان حتى يجي من موبايل عميد لان ماعرف موبايلي وين، ظليت ادگن هواي ومايجاوب، توقعت وعميد هم توقع يهدوله بت واكيد عميد يرد الهدية لو يهديهه لأحد ثاني كالعادة بَـس الغريب بالسالفه ماكو شي يستعدي يهدوله بت علموده..

-شيخ حاتم: مولاي انته سيد ابن رسول الله وموش بَـس سيد نَسب لاا سيد اخلاق هم وكلنه نشهد ها بويه شتگولون

الكل ظل يزامط ويحچي يعني گوة مروة يخجلون عميد حتى مايرد سالفتهم

-عميد الدين: الله يسلمكم ؏ راسي وهسّ شيخ حاتم خلينه ندخل بالمفيد بلا امر عليك وترا العشه ينتظركم

-شيخ حاتم: اكييد بَـس اول تنطينه الموافقه هاا شتگول مولانه

-عميد الدين: تفضل

-شيخ حاتم: انه ادري حظرتك وحظرة شيخ مروان ماتتحاچون من سنيين وهسّ جايين هين نريد الصُلح بيناتكم عن طريق الگرابه، بأسمي وبأسم كل زلمة معدل چاعد هين نطلب ايد كريمتكم بنيتك لشبل شيخ مروان الشيخ ستار ؏ سُنة الله ورسوله.

حسيت طرگاعه ووگعت ؏ راسي، عميد وجهها صار ازرررگ حتى النفس اظنه انگطع منه، ماتحملت اشوفن اخوي هيچ وذول العارات گاعدين بكل صلافة جدامنه ومتبوسمين..

عميد نتر بغضب گوة كاتمه...

-عميد الدين: شيخ حاتم جيتك ؏ راسي بَـس طلبكم مرفوض ويله سيد مرتضى گم جيب العشه

گمت من مكاني وماعرف شلون اخوي گال هيچ وشلون تمالك روحه يعني چتال مريته گاعد جدامه والي اغتصب بنيته ودمر حياتهه وكل عين وكحة جاي يريد يخطبهه منه!!

-شيخ حاتم: افاا شيخ مارجيناهه منك

واخيراً طلع صوت عميد اندار ؏ مروان النگس وعاط بعلو صوته...

-عميد الدين: احتراااماً لهلوجوه تطلللع مناااا بكرااامتك لووو اطلعك من دووونهه مروووان

-شيخ حاتم: هااي شنيي شيخ شهالتصرف

-عميد الدين: شيخ حااااتم انته وكل زلامك ؏ عيني وراسي بَـس مااال هذا (يأشر ؏ مروان) يگعد بيناتنه لااا اعذرونني

مروان مبتسم بخبث ولا انهزله جفن وستار انگلب احمر بَـس ما حچة احتراماً لأبو، بهالاثناء طب عُثمان يركض من شاف مروان عيونه صارت بگصته بَـس هم كظ روحه مايگدر يحچي شي عيب بحگنه هذا...

-شيخ حاتم: سيد ببخت جَدك اذا السالفه تتعلق بمموته اخيك المرحوم (يقصد رضا) انتو خذيتو فصل زلام ثنين وسكت الزلمه وماحچة وصارت گعده گبل سنتين بسنوية ابوك بعدما اجه شيخ مروان وراد منك فصليتين ودم وفضيناهه ومروان گال لخاطر عشرتكم وصحبتكم ويه بعض تنازل وانطيتو فصل فلوس نسيت لو لا؟

عميد تسودن وعثمان گب وتلاطمو بالحديث وناس تصد وناس ترد وانه فرت وماحسيت ؏ روحي اله وانه اطلع مسدسي واسحب اقسام صارلي چم يوم اشيله وياي ماعرف ليش ناغزني گلبي واخافن يصير شي، وجهته ؏ ستار اريدن اذبحه وارتاح منه..

-عُثمان: لاااااء مرتضضضى لااا ترمييي لاا ترميي يووول استر عليننه

-مرتضى: والعباس ابو فاضل اذا ماطلع من هين اله اخلي دمه بطووله

عاط بيه شيخ حاتم بَـس عميد ماحچة يتنفس سريع وفتح ازرار الدشداشه حتى يجر النفس اختنگ، ومروان لسه هادئ ماحچة شي..

-ستار: اذا انته زلمه تعال وياي بره

وجه چلامه الي، عطت بي وطلعت بره، انطاني ظهره ومشه جدامي وانه رحت وراه وطلع وياي عُثمان وچم زلمه من طرفهم، ردت اخذه غدر ووجهت السلاح ؏ ظهره ورميت چان صارت بي لولا عُثمان چيت عليّ ودفر ايدي صارت بالگاع...

-عُثمان: يووووول تخبللللت تررريد تقتلووو هيناا

ستار اللتفت عليّ وهجم گمنه نتصارع دميته وهوه دماني هاي المرة الثانيه نتعارك ويه بعض وتوصل لهدرجة، ماوگفنه لحدما سمعت صوت عميد يرعد جاي بأتجاهي...

-عميد الدين: والچفلل زينب اذا ماخذيت وليدك وطلعت من داري اخلي الدم للرچاااب

-مروان: هيچ عميد هاي نهاية الرفجة

ايا مشعول الصفحة يحچي ببرووود قاااتل خله عميد يگمز من العصبيه وراد يهجم عليه وانلاصت ناس تترادم ويه ناس، اخير شي گوووة كظونه وفاككونه بعد عركة دامت فوگ الساعه ونص وعثمان حچة ناهي الحديث...

-عُثمان: شيخ حاتم جيتكم ؏ روسنه واجيتو وتعنيتو بَـس ماحبينه جيت مروان وابدد ماتوقعنه تطلع منك هيك طلعه يا شيخ

-شيخ حاتم: سيد انه ردت اصفي النفوس!!

-عُثمان: شيخنه انته زدت النار حطب بجيتك هااي ابوس ايدك حاكي يطلع من هينا وهذا الموضوع ينسد نهائياً ومانفتحو ابددد واعيد جيتكم ؏ روسنه من فوگ

هز براسه وتعذر من عدنه لان هوه التعده علينه غلطان هوه يدري حنه عداوة وماتفيد هالسوالف واكثر من مرة گعدنه گعدات حتى نتراضى بَـس عميد يرفض ومروان الچلب يتسفزه ويحچي ببرود وياه..

طلعو مروان وولده وجماعته وعُثمان توسل بشيخ حاتم وجماعته حتى يبقون ؏ العشه بَـس گال وراهم طريچ ومايگدرون والفور دمي والخله ضغطي يعلگ من ستار همس گبل لا يطلع عباله ماسمعت...

-ستار: اذا انه ماخذيتهه ياهو ياخذهه والبت موش بت بيت (مو عذراء)

طختتت ببالي هووه الاغتصبهه وجاي عود يكحل عملته ويخطبهه، ايا عااااار طلعت بمسدسي وراهم وعثمان كاظني مايرضى، صرت اعيط مثل المخبل وعميد تخربط وحتى مايگدر يفتح عينه..

طلعت وراهم بَـس مالحگت ومن حرگتي ظليت ارمي بالجو واعيط...

-مرتضى: عااارااااات جاااايين تذلووونه فوگما سودتووو وجوهنه والعبااااس مايطلع اسمي مرتضى لوما اخذ حگ اخوي منكم وابرد گليبه

-عُثمان: كافي مرتضى امشي جوة اخوك تخربط يول امشيييي

**

"هجران"
نسمع بَـس صياح وعراك والكلام ممفهوم، خاله انتصار وجهها مخطوف لان سمعت اسم مروان گالت معناهه مصيبة اكو، صعدت فوگ بَـس نزعت زنوبه ونزلت بسرعه اشوف شصار..

دخل عُثمان للصاله ملهوف ؏ خاله انتصار وصاح "عميدي تخربط" ركضوله بالديوان ورهف تبچي، اخذت بنتي ورحت وراهم چان نايم ؏ الگعدة العربيه وعثمان فوگ راسه ورهف وغزاله يم رجليه ومرتضى بَـس يعيط ويتوعد ماعرف شسالفته..

-انتصار: خااب عُثمان ماتحچييي شماااله

-عُثمان: ينعلو يوموو مروان الصخاام اجه وخطب رهف لأبنو ستار

لطمن ؏ صدورهن وكأنما جني خطبهه مو رجال، خاله انتصار وبيبي عطيه اشتغلن بالدعاوي يشيييلن مروان ويشعلن بي ويلعنن سلفه سلفاه..

-دلال: لك عثيمن چا شماله طاح عميدي؟؟

-عُثمان: عجل عمه هذا هم سؤااال شنو هالاهااانة جاي هينا وجايب شيوخ كلو حتى يهينو لعميد ويگلو ماكو احد غير ابني يرضى ببنتك

-فتوح: اشتعلووو مروااان وخلفته بنااار ونفطط

راسي افتر ومجاي افهم أي شي، رهف وجهها مبلوع وصاير اصفر خايفه وغزاله حاظنتهه وتمسح ؏ راسهه وعثمان شايط حتى عروگ رگبته ناطه..

صحى عميد الدين شويه وگال مابي شي بَـس ضغطه هبط وراحو يجيبوله خيار وملح، عفتهم وطلعت رحت لغرفتي ارتاح وهم گبت عيطه، مديت راسي من محجر الدرج چانو هستوهم سلمان واحمد جايين وانعادت نفس العركة..

ماعرف شبيهم ذوله وشنو سالفة هذا مروان، مانزلت بعد ظليت بغرفتي لحد ثاني يوم الصبح مخبوصين بحنة سلمان ولا كأنه البارحة عركة شكبرهه صارت والله ذوله الناس غريبين...

الرگص والفرح مله المكان والاغاني تنعر صبينه غده للزلم وللعصر بدت حفله الحنه وجررررت لحد الاربعه الفجر همه ؏ نفس الرگص والدبچ والهوسات والاغاني وهاي زنوبه تسمع الاغاني وترگص وياهم..

-هجران: ماما زنوبه كاافي تعالي نامي بنيتي ماتعبتي

جريتهه حتى ارضعهه وانيمهه وهيه متقبل تبچي تريد ترگص، جريتهه گوة وحاصرتهه حتى متگوم وكل شويه توخر صدري من حلگهه وتضحك من تسمع دبچاتهم واني اضحك وياهه...

اباوعلهه ومبتسمه، بنتي جميله ؏ ابوهه وعمامهه الحمد لله اخذت شكلهم بَـس ان شالله يطلع گلبهه نفسي بَـس ماريد شخصيتهه مثلي حتى متنداس اريدهه قويه ونچرة واني متأكده لو ظلو عُثمان وعميد هيچ يحبوهه ويربوهه لحدما تكبر رح تكون احسسسن انسانه..

نامت واني هم نمت وياهه، شويه ورجعت گعدت تبچي متگدر تنام من صوت الهوسة، انزعجت وتنرفزت كُلش دزيت رساله لغزاله اسألهه شوكت يخلصون بَـس مجاوبتني يمكن نامت..

دزيت رساله لعثمان اسأله كتبت...

-💬عُثمان فدوة شوكت تخلص الحنة؟

ظل فتره ياله جاوب، كتب...

-💬عُثمان: بعد، ليش؟

دگيت عليه بسرعه لان ماگدر اكتب زينب تلوع بيدي، هوه انطاني رفض وكتب...

-💬عثمان: لا تدگين

تفاجأت ليش ميقبل ادگ عليه، ضجت وذبيت التلفون توقعته رح يصعد ياخذهه ويفرفرهه بَـس ما اجه انوب تنرفزت اكثر..

گعدت الصبح ضاايجة وراسي يموتني، اتصلت بأهلي وبجوري وافتهمت اليوم رح نروح لبغداد علمود حنة شهد، بدلت الي ولزنوبة ونزلت چان عُثمان بالباب چان يم سيارته ديسوي بيهه شي رحتله اعاتبه ليش ما اخذ زينب البارحة...

-هجران: صباح الخير

رفع راسه يباوعلي وگال...

-صباح النور

-هجران: توقعت البارحة تجي تاخذ زينب تفرفرهه

-عُثمان: ماگدرت لان هوسه

-هاا زين احنه نركب بسيارتك لو بسيارة عميد

-عُثمان: لا بسيارتي

اخذهه مني وبوسهه وهيه تناغي وتلعب وياه، عفته ورجعت للبيت جبت باقي الغراض وطلعنه كلنه متوجهين لبغداد..

عانينه بالطريق والسيطرات توگفنه كل شويه وينزلونه وزنوبه كل ساع تتقيأ انلعب بينه طوبه، بَـس حسيت عُثمان ضايج ومعاجبه وكل شويه يتأفأف ومتضجور..

خجلت لان زينب من صدُك اذته وبآخر مرة تقيأت راد ينزلهه واني ماقبلت...

-لا عوفهه هسه تصير زينه

-عُثمان: جيبيهه

-عمه دلال: يمه انطيهيا خطايا شوفي وجهها احمر

-زيد: اي هجران شوفيهه مسكينه هاي شصاير بيهه

-هجران: لا لا تعبنه عُثمان كافي

باوعلي بنظره ماعرف بشنو افسرهها، هز راسه معاجبه وطلعنه، وصلنه لبيت العرسان وبالباب استقبلتنه ام جواهر وحجي اسماعيل بوسناهم واول شي سألت عليه هيه جواهر امهه گالت...

-فوگ بغرفتهه روحيلهه اذا تحبين

هزيتلهه براسي واخذت زينب وصعدت لغرفتهه تفاجأت چانت نايمه وغرفتهه هندس من الظلام..

فتحت الضوه وذبيت زنوبه ؏ فراشهه وراحت عليهه تكفش بشعرهه وجواهر صاحت...

-اشتتتعل مروااان هااي منووووووو

-هجران: وجعععع شهالصوووت وين الانوثه وين الكياته هههههه

نهضت ؏ حيلهه وباوعتلي وابتسمت ببرود، ادري بيهه لسه زعلانه او نگول مدگوره، رحت عليهه ادغدغ بيهه حتى تضحك وبوستهه واعتذرت منهه وهيه تگول اني مغلطت حتى اعتذر بَـس مادري حسيت روحي مقصرة وياهه..

-جواهر: اهووو كافي عااد يله اني جوعانه هم ياله نآكُل ونروح للصالون اكيد انتي تجين ويانه صح؟؟؟؟

-اگولج لا اني ماجي شو مابيه حيل

-جواهر: انچبييي شنو تظلين هيچ!!!

-لا لا عود بالعرس اروح صالون ماكو داعي بالحنه

-جواهر: هاا اووّك ماشي يله انتي ارتاحي هنا واني اسوي اكل واصعده (نزلت جوة اتسحب اخاف اشوف واحد من الزلم بَـس همزين گاعدين بالاستقبال، سلمت ؏ خاله انتصار والباقيات ورحت للمطبخ صبيت غده واجتني رهف، حظنتني من وره وبچت جفلت من تصرفهه اللتفتت عليهه وبعدتهه عني...

-جواهر: رهف شبيچ؟

-رهف: انتي زينه؟

-جواهر: اي گلبي شوفيني شحلاتني

-رهف: جواهر انه زعلانه من يوم بكر كتلچ لسه

-جواهر: لا حبي ماكو داعي خلص خيولي الله ياخذ حقي منه

هزت براسهه وراحت تگعد ؏ الكرسي الي بالمطبخ، حسيتهه مو طبيعيه وكأن اكو حچي بلسانهه...

-جواهر: حبيبي اصبلچ ويايه تاكلين؟

-رهف: لا ماشتهي

-ماشي لعد اريد اسولف وياچ مشتاقتلچ انتظري بَـس اصعد الصينيه لهجران واجيچ مو ترحينن

-رهف: لا اظل هنا شعندي

-ماشي حب

صعدت الصينيه لهجران وچلبت بيه حتى آكُل بَـس كذبت وگلتلهه ماشتهي، گلبي يلعب واحس اكو شي غلط ديصير ويه رهف لان نبرة صوتهه وشلون حظنتني وبچت خوفتني..

نزلتلهه چانت بعدهه گاعده وبيدهه موبايلهه اخيييراً ابوهه اشترالهه موبايل من بعدما اني قنعته قبل تقريباً كم شهر وگتله كبرت وتستاهل موبايل...

-جواهر: ايييي تعاي شكووو ماكووو

فجأتني من گالت بدون مقدمات...

-رهف: گبل يومين ستار ابن مروان خطبني

-كذاااابه

هزت راسهه بـ اي وظلت ساكته، الصدمه اخذتني وحتى ضاعت الكلمات ماعرف شنو اگول، شلوون يتجرأ ويخطبهه وشلون حالة عميد هسه ولييش رهف هيچ زعلانه من الاساس؟! كل هالافكار تتناطح براسي وختمت تفكيري بـ....

-جواهر: ورفضتو اكيد؟

-رهف: اي ابوي رفضه

-اي احسن خيولي

باوعتلي بنظره فوراً عرفت معناهه لا رهف يارب اطلع غلطانه، جريت نفس وحچيت...

-جواهر: تدرين مروان وولده مو زينين ويعادون ابوچ

-رهف: ادري بَـس ستار خوش زلمه

-وشمعرفچ؟

-لان اعرف وبس

-جواهر: عندچ علاقه وياه؟

رفعت راسهه بعدما چانت منزلته وتلعب بأصابعهه، چانت متفاجأة من كلامي وگالت بسرعه نافيه...

-رهف: لااا لااا والله لاااا ماكو شي بيناتنه

-جواهر: رهوفه صرتي چبيره وبعد عيب تكذبين گوليلي بيناتكم علاقه لو لا؟

-رهف: وراس ابوي ماعندي شي وياه

-لعد شبيچ زعلانه هيچ؟

-رهف: لان... لان هوه يحبني

-ياا الله وانتي شمعرررفچ!!!!

-رهف: جواهر عليچ العباس صوتچ نصي خاف يسمعون

-جواهر: اسكُت اذا گلتيلي شلون عرفتي؟!

حچيت وياهه بحدة لان گلبي انشلع وخايفه كُلش تكون مسويه شي غلط ولو رهف متسويهه...

-رهف: جواهر الزلمة كل يوم يوگفلي بباب المدرسه

-وشنو يعني!!

-رهف: لتعصبين رح احچيلچ كلشي

-يله نسمع

سولفتلي واني مدهوشة معقوله ابن مروان يحبهه!! وواضح من كلامه ومواقفه ان فعلاً يحبهه خصوصاً من گالت...

-رهف: والله صارله اكثر من سنه يوگفلي ومايرضى يحاچيني جدام الوادم يگول الناس لساناتهه ماترحم ويگول اخاف عليچ واحبچ وماريد تمسچ چلمه سوء

-جواهر: واذا انتي متحچين وياه شمعرفچ بكل هالحچي؟!

نزلت راسهه وبلعت ريگهه، ضيگت عيوني وبحركة سريعه سحبت موبايلهه رأساً انخطف لونهه وصارت تتوسل حتى مافتحه، ماهتميت وفتحته لان ماحاطه رمز دورت بكل البرامج مالگيت شي اخير شي رحت للانستگرام..

هم اني قنعت ابوهه تسوي واحنه كلنه حساباتنه خاصه وماعدنه متابعين غربه فَـہ الشغله سهلت عليه، دورت بين متابيعهه ماكو ممتابعهه رحت ؏ الرسائل ادور ولگيت بخانة الطلب اكو رساله ممفتوحة.. رحت عليهه وانصدمت من شفت حسابه وكاتبلهه كووومة حچي..

اقره واني مدهوشه هوه صح رهف مغلطانه من هالناحيه لان ابد ممجاوبته وميبين اصلاً شافت الرسائل لان باقي بالخانه بَـس عَجبني كلامه..

كله كلام غزلي واشعار حُب ومشاعر حلوة بَـس مُحترمة ومكاتب شي قليل ادب، معرفهه ؏ نفسه وكاتب تاريخ حياته كله اسمه ستار عمره 26 سنة چبير اخوانه، خريج هندسة ميكانيك جامعه بغداد وديطمح ياخذ ماجستير او ممكن شهادة ثانيه..... اقره وراسي افتر معقوله هذا من خلفه مروان!!

رفعت راسي عليهه شفتهه چانت تبچي وتمسح بدموعهه، گالت بغصه...

-رهف: والله ماسويت شي انه

زفرت بقوه ومسحت وجهي، هزيت راسي بـ اي مغلطتي، حظرته ونترت بيهه...

-انتي صح ماغلطتي من هالناحيه بَـس غلطااانه لان محچيتيلي لو گلتي لأي وحده وقسماً بالله اذا فتحتي الحظر عنه رهف لا اعرفچ ولا تعرفيني واصلاً اگول لأبوچ يروح يطيح حظه وترا ابوچ ميرحم بهالسوالف وحتى الموبايل ينسحب منچ فهمتيني!!

-رهف: بَـس انه ماسويت شي

گالتهه وبچت، رحت عليهه حظنتهه لصدري واهدأ بيهه هسه المشكله مدا اعرف هيه هم تحبه لو لا وصراحة خايفه اسأل هالسؤال لا انصدم لان اذا چانت تحبه هاي كارثه!!

بعدتهه عني ومسحت دموعهه وهيه رجعت حظنتني وتبچي اقوى خلص وصلت الفكرة البنيه واگعه بي يبووو يا حظك يا عميد الدين منين تجيك المصايب بنتك يجوز تحب المغتصبهه او اخو الاغتصبهه!!

ظلينه ؏ هالحال الى ان اندگت باب المطبخ بطرقات سريعه مبين خايف الطارق، اجانه صوت عميد الدين من وراهه وحچة ملهوف...

-عميد: هذا صوت رهف تبچي؟؟ رهووفه بابا تسمعيني؟؟ يا الله.. اكو احد بالمطبخ راح اطب يا الله يا الله...

ظل يكرر يا الله واني عفت رهف وشردت جوه، مديت راسي من الباب شفته طب عليهه ويسألهه شبيهه وبعد ماعرف شنو الحديث الدار بيناتهم لان حسيت بگرصه قويه اجت بخاصرتي ؏ اثرهه صحت...

-آآآيييي

ضحكت بدلال وگلبت شعرهه بطريقه مُستفزة...

-انتي لشوكت رح تظلين هيچ تراقبي من بعيد لبعيد شبيچ ثوله طلعي ؏ اختچ قويه وتجيب راسه

-جواهر: هففف فردوس روحي مابيه حيل

-فردوس: دولييي غبيه ترا اذا ما اخذتي انتي اني اللوف عليه ههههه اي اي لتباوعيلي هيچ لتنسين اني رح اتطلگ وبعد ماعندي رجال ابقى وحيده فريده

-جواهر: أشك تبقين وحيده حبايبچ مكفين وموفين

خزرتني بقوه ودفعتني ؏ الباب وعاطت بوجهي...

-فرودس: ادبسززز اطيييح حظچ اذا عديتهه فهمتتتيي لو لاااا

-لازم خايفه احد يسمعنه

انطتني راشدي سطرني، لزمت خدي ونزلن دموعي وع اثر صياحنه اجت امي وعمه سلمى تسائلن شبينه وعفتهن وصعدت فوگ..

چانت هجران نايمه ؏ چربايتي وزنوبه دترضع منهه، گعدت بصفهن افكر شسوي وهاي فردوس رح تتطلگ من طلال لان بآخر فترة كثرت مشاكلهم وكثرو يجون حبايب فردوس للبيت طبعاً اني مادري بالموضوع بَـس هيه تحچيهه بفخر..

تنهدت ورحت اسبح بدلت ملابسي وطلعنه اني وشهد وعمه سلمى واكيييد فردوس للصالون اخذنه قيس يصير اخو طلال ونگدر نگول عنه خطيبي..

صارله فترة حاچي بيه ودينتظر جواب مني واني اماطل ويوميه اگوله اي ولاء الى ان الرجال مل بَـس محچه وگال انتظرچ..

هوه صح اخو طلال بَـس خوش رجال وهالشي موگف بطريقه وخطبني كذا مرة من بابا واهلي مچانو يگولولي بسبب مشاكل فردوس وطلال بآخر فتره، بَـس بابا اقتنع بالنهاية وگال خوش قسمه لانه طبيب ومعروف ومالگه احسن منه وبعد ماعرف صدُك هالحچي لو بَـس يردوني اتزوج..

وصلنه للصالون وكملنه كلشي الطريق كله قيس مشال عيونه عني وكولش انزعجت من نظراته حسيته اكلني اكل وشگد ماضجت ردت اصيح بي وماما گرصتني حتى اسكت وهمست بأذني...

-ام جواهر: وهسه شكو واذا باوعلچ ترا هوه خطيبچ اله عقد سيد

جريت حسرة وظليت ساكته، شهد طلعت تجنن لبست بدله ذهبية جايه عدله وشعرهه الطويل رفعولهيا بتسريحة حلوة ومكياج خفيف..

وصلنه للبيت وبدت المراسيم والحفلة ورگص واغاني وطربگه، خو من سلمان دخل عليهه لعبو لعب الادبسزيه هههه بوسهه يمكن مية بوسة هم اگول قليل، كل شويه جارهه وبايسهه من مكان يأما من رگبتهه يأما من راسهه لو خدهه لو ايدهه لوو... وهيه مكيفه وفرحانه وتباوعلي وتمد بلسانهه...

**

"هجران"
خلصت الحنه بسلام وره ما تونست كُلش بسوالفهم وحركات سلمان وانوب وگعت الكيكة بالنهاية وتفلشت عمه سلمى گامت تصيح من عيون الناس وجوري أيدتهه تگول شهد طالعه تموت والنسوان تخبلن من عرفن سلمان دكتور وشلون مكيف بشهد وكل شويه يبوسهه يصيح افييييش احبهه، اموت عليهه، اعشقهه موتنه من الضحك...

گعدت ثاني يوم متسائله يا ترى هم بكر يجي للعرس؟ لان لا بحنه الولد اجه ولا بحنه البنيه ماعرف شسالفته ومن سألت جوري تگول يوميه يطلع للمحل ويرجع بنفس وقته المعتاد يعني ميلف ويدور وتگول تحسه ضايج ومقهور ؏ فراگي..

دست ؏ گلبي وتظاهرت باللا مُبالاة وطلعت للصالون ويه البنات ذبن لحم هناك وشهد ام الصالون تسويلهه بشعرهه وكل شويه تاخذلهه هزه وترجع لكرسيهه واكيييد زنوبه اخذتهه فرصه ومن البارحة لليوم هيه بوضع الهزاز..

توقعت عُثمان يدگ يريد يشوفهه بَـس ماتصل ولا دز رساله ماعرف ليش احس مَلّ من عدهه رغُم من طلعنه گال يحبهه هواي بَـس معقوله تندم ؏ حچايته وتراجع؟

كملنه مكياج وشعر ولبسنه بدلاتنه بالصالون لان گبل رح نطلع للقاعه، لبست بدلتي السوده الشتريتهه من صدُك طلعت حلووة يعني حرفياً اني الاكره شكلي اگول عن نفسي طلعت اجنن والمكياج يمووت خلولي مكياج سموكي وحمرتي اكيييد الاعشقهه واكسسوار بسيط جواهر رهمتليا ولبست حذاء كعب عالي منهه لان نسيت حذائي..

اتصلنه بحلاوة وگال هوه وعُثمان ومرتضى طالعين وهسه يجون علينه، انتظرنه علما شهد لبست بدلتهه البيضه چانت عدله وتنزل حورية من جوة اكيييد تختار هيچ بدله حتى تبرز جمال جسمهه،، وجواهر نفس الشي بدلتهه گصه عدله لونهه بنفسجي طووخ بارز بياضهه وطالعه تفوقنه كلنه بالجمال..

سمعنه صوت هورناتهم ودگو علينه حتى نطلع، شلت زينب بَـس تبهذلت لان لابسه بدله وحتى ماتغشيت ظليت بمكياجي وهاي زينب تجرجر بحجابي ونص شعري طالع وماگدر اظمه لان شايله جنطه بأيد وزنوبه بالايد الثانيه..

تندمتتت كُلش لان لبست البدله هنا وظليت محتارة اكمل الطريق واروحلهم لو ارجع للصالون وانزع البدله، نزيت من سمعت هورن سيارة عُثمان باوعت عليه چان مطلع ايده من الجامه بحركة "شبيچ واگفه"..

رحتله وصعدت بالسيارة وهوه ابد ماللتفتلي وچان ضااااليج كُلش كُلش ومن سألته گال راسه حيطگ...

-هجران: عُثمان شجاك مو گلت حتروح للطبيب

-عُثمان: اي

-هجران: لعد ليش لسه مارحت؟؟

-عُثمان: مابيه حيل

-هجران: وظل تحمل الوجع شوف حالتك شنو انته عاحبك تبقى هيچ مو والله انفت گلبي واني اگلك

ضحك خفيف وتچه راسه ؏ الستيرن بَـس حتى يرتاح شويه، چنه اني وجوري ورهف بسيارته والباقيات متوزعات بسيارة مرتضى وحلاوة...

علاوي يبچي وزينب تسمعه وهيه وياه انفتحت اذاعتهه واحنه حالتنه بالضبم ليوره وعُثمان راسه يوجعه وعاگد حاجبه ومبين ميتحچة وكل شويه يتأفأف الى ان وگفنه بنص الطريق ونزل وگف بباب السيارة اگدر اشوف ظهره...

سحب جگارة وشعلهه وظل يحرگ بيهه، طلع الثانيه والثالثه والرابعه الى ان جوري صاحت بجزع...

-جوري: هجرااان شسالفه رح نظل هناا مو تأخرنه!!

-هجران: يااء شبيچ تصيحين عليه اني شكوو غير هوه يرجع

-جوري: اي حاچي خلي يجي

-وليش مو انتي تحاچي!!

-جوري: اني استحي منه علاقتي مو قويه وياه بَـس انتو ماشالله مبينين حبايب ههههههههه

-هجران: انچبييي جوري الرجال حباب ويحب بنتي ومهتم بينه احسن من اخووو

-جوري: اللهم صلِّ على محمد وال محمد صرتي تقارني ببكر ههههههه

-هجران: ترا تنزفززت كاافي مقصدتهه بهالطريقه

-جوري: ياا هاي شبيچ خو ادري بَـس علاقتكم حلوة وودية

سكتنه شويه وثنينه تباوع لظهر عُثمان، جوري ضيگت عيونهه وهمستلي...

-جوري: شگد حلو لو چان صديقي

شهگت وضربتهه خفيف وهيه ضحكت ملعووونه تفقد ؏ الحلوين هاي اختي ههههه

اخيراً رجع وطلع عطر من الچكمچة ورشه ؏ نفسه وبالسيارة ظل يرش انترسنه ترس هوه صح طيب بَـس صار هواي..

مشينه وحسيت روحي اختنگت بَـس ماحچيت، اخيراً زينب غفت قبل لنوصل للقاعه.. نزلنه چانو اكو هواي زلم واگفين رهف نزلت اول وحده وراحت لمرتضى وعثمان نزل قبلنه وفتحلي الباب، تفاجأت من حركته بَـس فرحت ان اهتم، حسيته يلوب ويريد يگول شي ومتردد اشر لجوري بَـس هاي حايره بأبنهه اليصرخ، اخير شي تحمحم واشر بعيونه ؏ راسي..

-عُثمان: احم احم...

واكيييد الثواله اخذتني كالعادة ومفتهمت ديأشر ؏ شعري لان الخبصه الاني بيهه حتى مخلتني افكر، اخذ زينب من ايدي وتقرب عليه كُلش توترت هذا شبي، همس بنتره...

-عُثمان: هجراان شعرِك شعرررِك

-ها ها اسفه

انطيته ظهري وضميته وانطاني زينب بَـس بعده وجهه مگلوب، وصلنه لباب القاعه وعافنه طبينه وعينييي الرگص والردح من الباب استقبلونه..

عفناهم ورحنه للمنزع نزعت عباتي وعدلت شعري ومكياجي وطلعت، جوري لزمت ايدي لان داخت واخيييراً اعترفت حللت وطلعت حامل طررت من الفرح بَـس هيه معاحبهه وضايجة تگول علي بعده صغير ومو مال طفل ثاني هسة..

گعدنه ؏ وحده من الطاولات نباوع للعروسه شلون تتمايل وجواهر گدامهه وفرودس تروووح وتجي من بدايه القاعه للنهاية ترگص وتهز بخصرهه خلت الكل يصفن عليهه وع جمالهه وجمال جسمهه ولا تگولون هاي جايبه 3 ولد..

گومونه حتى نرگص وياهه وفعلاً نسيت روحي ونسيت ضوجتي وكُلش تونست بيومهه خصوصاً من صاحو لبسو العريس رح يدخل وعينييي العريس ابددد ابددد ماقصر اكللل شهد اككككل الى ان ختم قُبلاته من باسهه بشفتهه قوي وظل ؏ عالحال الى ان امه عاطت بي تضحك...

-انتصار: ولك سلماااان فضحتنه يمممه

-سلمان: وشكووو ترا هاي مرتي وحلال عليّ دخلوني اطلع الخمسه وعشرين مليون من خشمها

-شهد بشهگه: تستخصر 25 عليه حبيبي

-سلمان: لا يرويحتي اليسمعچ يگول خمسه وعشرين الف ولا لبالك مليون بَـس لا والله ولا اغليهه عليچ..

اللتفت ؏ امه وعاط...

-سلمان: يوووم جيبي الصندوگ

جابت خاله انتصار صندوگ احمر وطلع منه گلاده حلوة كُلش فصهه احمر ومحاوطه بفصوصه بيض يلمععن صغار افتهمت بعدين ان الاحمر حجر مرجان والفصوص الباقيه اللماس مشتريهه من الخارج هاي هديته لعرسهم..

(ميجينه واحد مثل سلمان🥲🧿)

علگو اغنيه رومانسيه بالنهاية حتو يرگصون سلو وكل شويه سلمان يگول يله اريد نروح للفندق خلصوني، طگينه من الضحك ؏ سوالفه خصوصاً بالنهاية من صاحو الولد رح يدخلون ماعرف ليش كلهم يطبون هنا غريبه اني اعرف بَـس العريس وكم واحد وياه مو كلهم!!

طبو وعيني بده الرگص والردح اضعاااف مال النسوان خو التصنيف والتحشيش واحد يصد والثاني يرد وعَميد وعُثمان لعبو لعب بسلمان وكل شويه يگولون طولو اكثر حتى ميروح للفندق حتى لو نطول الليل كله..

-عميد: خايبين بالعباس شو عاجبني نظل هنا بعد شو حبيت القاعه شتگول عُثمان

-عُثمان: ترا فدشي مرتب سلمان خلص جيبولنه فراشات ونام هينا شكو ترحون فندق

-سلمان: ايا عارات شنو ؏ گلبكم انتو لا مصاريف ولا ابد

-عميد: افااا تستخصرهه علينه

-سلمان: اييييي استخصرهه عليكم وديلاااا امشونا نطلع طاح حظي هنا وعلي

-عميد بضحك: ليش حبيبي ترا حلوة الاجواء

-سلمان: ولكم حمووووت يله اريد نطللعع حتى زفه ماريد بَـس ودوني للفندق

-عُثمان: هسة عوف الفندق تعال اگلك شو ماعاجبني قاطك مادري شلونو

-سلمان: شني شبي؟!

-عُثمان: مادري مطلعك ازرگ فوگ زراگك وشلاحتك

-سلمان: ولكممممم والعباس رح اجيلك عُثمان

-عميد: هذا شماله تسودن خويه انته اچلح املح چا شنسويلك مو زين البت رضت بيك

تدخلت خاله انتصار وگالت بضحك...

-انتصار: ولكم خايبين عوفوو وهدنتو للزلمة

-سلمان: اي يمه اي شوفي ابنچ عود هذا شيخ بعد عيني

-عميد: انطم وامشي يله نولي لزفتك الطرگاعه

يحچي ويضحك ويه عُثمان وسلمان يگمز يريدهم يطلعون حتى تبدي الزفة، طبعاً هواي ناس طلعو بره ينتظرون الزفه تقريباً بس الاهليه هنا لهيچ ماخذين راحتهم بالسوالف، شهد چانت لابسه كبوس بَـس قرص وجهها طالع وجواهر بَـس لبست شال فوگ شعرهه وظلت ببدلتهه لانهه ردن كامله..

طلعنه بالباب ولمحت بكر واگف وعيونه عليه، درت وجهي مهتميتله ووگفت انتظر عُثمان لان هوه گالي قبل تقريباً اسبوع بزفه سلمان تعالي ويايه حتى ارگص زنايب واونسهه، اخيراً طلع لگيته بصف سيارته ويمه زلم ثنين صحت لجوري گالت هيه تروح ويه فيصل فَـہ اخذت جواهر ورحناله...

-هجران: ها عُثمان نركب بالسياره؟

اللتفتلي وعگد حاجبه، حك رگبته وهز راسه بلا...

-عُثمان: لا اصدقائي رح يجون وياي انتو روحو ويه فيصل

-هجران: بَـس فيصل طلع گدامنه

-عُثمان: اسف هجران ماگدر

انهضمت حيييييل يعني هوه گللنه رح ياخذنه لو محاچي چان رحت ويه فيصل لو احمد بَـس طلعو قبلنه ومرتضى يسوق سيارة عميد لان رح يزفهم هوه يعني مابقه غير بكر اروح وياه ومستحييييل اركب وياه...

حسيت نغزات بگلبي من القهر من وره عُثمان شبييي ليش متغير هيچ حتى شاف زينب تلوع بإيدي چان ؏ الاقل اخذهه مني ويسكتهه ميخليني حايره هيچي..

اللتفت ؏ جواهرچانت هم حايره ويامن تصعد وشلون نروح للزفه لان حلاوة وابوهه ما اجو بحساب من صفحة العروسه وحتى فردوس وامهه رجعو للبيت، طلعت سيارة العرسان واحنه واگفات بالشارع وعُثمان لسه ماراح ينتظر احد يجي ياخذنه چان مبين عليه محتار وعيونه عليه وساعه ع زنوبه، حقدت عليه بهالموقف وكرهت روحي لان طلبت اركب بسيارته..

اجه بكر علينه واخذ مني زينب بدون ميگول شي، هزهه شويه وبوس بيهه سكتت گال...

-بكر: امشينا نصعد بسيارتي

-هجران: وخر بكر

-بكر: لا تعاندين وامشي

-لو اموووت

گلتهه وبچيت بعد ماتحملت هم انهضمت من تصرف عُثمان وهم بكر گدامي شلون موقف صعب بالنسبه اليه..

عُثمان اجه اخذ زينب من عنده ونتر بي...

-عُثمان: روح ماتريد تركب وياك

-بكر: شيخصك انته؟!!

-هجران: رووووح بكررر رووووح

-بكر: امشييي ولچ

-هجران: والله ولا اصعد وياك عسما اظل هنا

-عُثمان: استغفررر الله

اللتفتت ؏ عُثمان وصحت بي من لا وعي...

-هجران: روووح انته همم يللله مو فضلت اصدقائك علينه وخليتني هنا حاايره

فتح عيونه متفاجأ بَـس رأساً رجع طببعي وماحچه شي ولا برر وهالشي ضوجني اكثر، جواهر سحبتني من ايدي وگالت...

-جواهر: امشي هجران الله لا يعوزنه الهم

تركناهم وعيونهم تتابعنه احترگت من جوه ومتت من القهر اوووف تمنيت اصيح بأعلى صوتي واتعارك وياهم، ماتفاجأت من بكر لان هذا اسلوبه من يوم يومه بَـس عثماااان شلوووون ولليييش هيچ متغير صارله يومييين عود اني گلت هوه الوحيد الي رح يصير سَند لزينب بهالسرعه تخلى عنهه!!

اجالنه رجال لابس قاط بيذنجاني انتبهت عليه چان يباوعلنه من اول ما طلعنه من القاعه، تقرب علينه وحچه ويه جواهر شويه واندارت عليه گالت...

-جواهر: امشي هجران نرجع ويه قيس وامه

رحت وراهم وثواني وسفطت سيارة مرتضى گدامنه بَـس چان عميد ديسوقهه ووياه رهف وعمه دلال وغزاله، صاح من الجامه...

-عميد: علويااات هناا تعالن

فرحتي بهاللحظة مانطيهه لأحد من شفته حسيت رجع الدم لوجهي اييي ماكوو من عميد الدين اكيد ظل باله علينه ورجعلنه احسن منهم كلهممم..

ركضت لسيارته وجواهر لزمتني من ايدي حيل...

-جواهر: لو امووووت هجران لوو امووت ماركب وياه

-لعد شلون ويامن نروح

-جواهر: گتلچ ويه قيس وامه اني اعرفهم حبابين

-هجران: جواهر خايفه لاا

هذا الحچي بكر راح بَـس عُثمان لسه يباوعلنه وواگف بباب سيارته وماعندي شك اكيد هوه الي اتصل ؏ عميد وگله يجيلنه بَـس رغم هذا بعدني ضايجة منه وماطايقته..

بعد كلام وتقنيعات من جواهر قبلت اركب ويه هذا الرجال وبعدنه بالباب دندخل وعميد نزل من سيارته صاير ناااار اجه طاير علينه وعاط...

-عميد الدين: اننننه شگلتتت

-هجران: مو الرجال رح ياخذنه

اني گلت هيچ لو انگلبت الدنيا وع اثر صياح عميد علينه اجه عُثمان اخذ زينب من ايدي الي صارت زرگه من البچي واني من خوفي عليهه ومن صعوبة الموقف گمت ابچي وياهه...

-عُثمان بعصبيه: ليييش تبكييين هاااا شكووو ؏ شَنو البكييي

-هجران: من وراااك انته انانييي ومفكرت ببنتي بَـس اهتميت بنفسك وونستك ماگلت هالطفله منو الهه غيررك

-عُثمان: هذا البكي كلو لان ماركبتي وياااي

يرعد ومعصب واصدقاءه يدگون بالهورنات حتى يصعدلهم وهوه اللتفت عليهم ونزل يغلط ويسب بيهم لان خبصو، وعميد من جهة واگف حاط ايده ؏ خاصرته ويخزر بينه اخير شي ختم الموضوع ونتر بيه...

-عميد: هجراان هسسسه تركبين جدامي بسيارتي يله بسااع

اخذت زينب من عُثمان بس بعدني مطنگره وگوة لازمة دموعي وهوه احس بي يباوعلي بس ماعرف شنو نوع نظراته لان ماباوعتله ابد ورحت لسيارة عميد...

**

"جواهر"
اللتفت عليه عميد ونتر بغضب گوة لازم روحه...

-امشي جداامي يله انتي

-جواهر: ماريد اني اروح ويه قيس

انگلب احمممر عاط بيه صوت خله قيس يندار علينه...

-عميد: ويااااهو هذااا صخااااام

بلعت ريگي ولزمت روحي گوة...

-جواهر: قيس خطيبي

انفتحت عيونه بدهشة وعروگ گصته نطت بَـس حافظ ؏ هدوءه ونتر بيه مرة ثانيه...

-عميد: تمشين جدامي مثل الشاطره لا وروح ابوي اكظ قيسچ ال**** واطيح حظه يله امشيييي

رحت گدامه وركضت لسيارته من الخوف حسيته شويه وينطيني راشدي، شفته يحچي ويه قيس بَـس كلامهم ماسمعه شنو، انداريت ؏ هجران الي لسه دموعهه تصب وحاولت شگد اسكتهه انوب اني صرت شحالني من الخجل شلووون اركب بسيارة عميد الدين اني شگلت لروحييي لو منطيني راشدي اهون عليه من اركب بسيارته واگابله والحظ الزفت مكاني صار وره الكرسي مالته بالضبط..

اجه للسيارة وطلع بينه وعُثمان هم تحرك يمشي سريع حتى يلحگ بيهم وهجران همزين هدأت وسكتت من زنوبه نامت، رهف وغزاله مكيفات ويصفگن وعمه دلال تهلهل وياهن وسون عرس بنص السيارة...

انوب عمه دلال من يوم يومهه تخربط بأسمي واسم شهد فَـہ كل شويه تسوي هوسه لشهد وتغلط وتگول اسمي وعميد يصيح...

-عميد: عممممه اسمهه شهددد شهدد مو جواهر العرووووس

-دلال: هههههه يبعد عمتك عادي جواهر هم راح تعرس گريب

ورجعت تضحك وتصفگ وعميد شايط من مادري شنو بَـس فرحت لان حسيته يغار عليه، ضحكت بيني وبين نفسي من تذكرت شلون صار شكله من گتله قيس خطيبي..

الزفه طولت والولد كل شويه ينزلون يرگصون والتفحيط بالسيارات والهورنات والرمي يبووو انگلبت الدنيا..

وصلنه لبوابه الفندق وكلهم نزلو حتى هجران ردت انزل وعميد قفل باب السيارة...

-جواهر: عميد افتح الباب اريد انزل

-عميد: چؤؤ ماكو

-ليييش افتحهه اريد اشوف اختييي

-عميد: اششش راسي يوجعني

-جواهر: هاااي شبييييك اريد اودع اختي افتح الباااب افتحههه

ماتحملت گمت ابچي وهوه ولا اهتم عبالك فرحان من يسمعني ابچي وانوح ؏ شهوده، ينقر بأصبعه ؏ الستيرن ويباوعلي من المرايه واني فحطانه من البچي متتتت احترگت من اسلوبه ورجعت اعيط...

-جواهر: شبييييك متگوليييي افتح البااااب هاي ليش مينفتححح ليييش مابيهه قفل واگدر اتحكم بي منااا

قهقه بخفه وگال بمكر...

-عميد: سيارة مرتضى حديثه وهيچ موديلهه

-جواهر: خربببب افتحهه اكرررهك لتصيير لئيييييم

أيست تنفتح وأيست احد يسمعني لان صوت الهوسه والاغاني والدنابگ عالي ومشفت احد اعرفه اكيد كلهم دخلو للفندق، نمت ؏ الجامه واباوع وابچي، عميد حچة بهدوء...

-عميد: لو بَـس افتهم علويش البچي؟

-جواهر: لان اكرهك

-ههههههههه هاي احچيهه للدبة

-والله اكرهكككك هففف مزعججج

-عميد: ولچ ما اوصل لربع ازعاجچ انه

-جواهر: اي خوش عود

-عميد: من يمته مخطوبه؟

-وانته سيييخصك

-مايخصني بَـس فضول عندي

-معليك

اباوعله وهوه عيونه عليه من الجامه من گلت هيچ خزرني ونتر...

-عميد: اصلااً هذا منوو وتنخطبيله شوووفي چهرته چنه ابو بريص

-جواهر: اصلاً صااك

اللتفت عليه وفاتح عيونه ورجع خزرني اقوى هوه صح خلسني ويبس الدم بجسمي بَـس نحن لا نهزم رجعتله الخزره وهوه شاط...

-عميد: بحيااااتي ماشايييف مثل صلااافتچ جوااااهر

-جواهر: اي يله اني مو صلفه يله خليني انزل

-استچنيي ماتنزلييين وهذا السلبوح واگف بره

باوعت من الجامه صدُك چان قيس واگف ويباوع لسيارتنه عززاا فد فرحتتتت هيچ نعنشت من الفرررح عمييييد يغااار منه عليه اااخخخ يا فرحتييي، حبيت استفزه اكثر واگول...

-جواهر: هسه بَـس فهمني انته شعليك باچر عگبه اني ببيته وهوه زوجي انته شيخصككك

-عميد: جواااااهر انطميييي وسلمي ؏ رويحتچ ورويحته

-اني ماسمحلك تحچي ؏ زوجي

-انعلللل ابوو زوجچ لابو **** ولد ال****......

يغلط ويسب ويفشر ؏ قيس واهله وهوه اصلاً ميعرفهم، لو چان يعرف هذا اخو طلال يمكن يكفر بيه هنا، سكتنه وهوه يتنفس بغضب يجر نفس ويزفره قوي رح يطيرني..

-عميد: بللله اكو واحد يلبس قااط بهاللون وين الرجوووله بَـس فهومنني همجييي ومرعبللل

-جواهر: اصلاً يجنن حبيت لونه

-انتي صگد ماعندچ ذوووق وين اكو زلمه يلبس قاط بنفسجييي

گالهه وسكت واني هم سكتت وفجأة اللتفت عليه وفتح عيونه وگال ببهته...

-عميد: شنييي هاااي منسقيين!!!!

صفنت بوجهه هذا شديحچي بعديين طخت عندي اني هم لابسه بدله بنفسجي بَـس درجة اللون تختلف شويه شلوون صدفه غريبه بَـس غير گلبي گام يهز خصر من الفرح، حچيت ببرووود مستفز...

-جواهر: اي عادي لعد غير احنه كبل

-عميد: هذااااا جواااهر مالگيتييي غير هذا المسلوووع

-شبي بَـس فهمني

رحع وجهه ليگدام وظل يضرب ؏ الستيرن بيده خفيف، مسح وجهه وگال...

-عميد: ماعجبني ماعجبني مادري شكله مو راحة چنه ذبان مهلس

-لا اصلاً هوه دكتور

-واذااا ثووور جاي اگلچ مو راااحة حنه الزلم نعرف بعض وانه اول ماشفته مارتاحيت ماحبيته جواااهر ماحبييته واكررره اللون اللابسه

-هسه شدخل اللون

-لااان اكرررهه فهمتتتتي ماحب البنفسجييي

-بَـس اني احبه وهذا لوني المُفضل

-وااانه اكرههه

-عميد شبيك تخبلت هاي كله لان الرجال لابس بنفسجي؟

-انتي گلتيهه وين اكو زلمه يلبس بنفسجي

برزت شفايفي ليگدام وگلت بمياعه...

-جواهر: ختيبي يلبس

هم اللتفت عليه وعاگد حاجبه لااا هناا صدُك حسيته رح يحطني ويكتلني خفت كُلش من نظرته بَـس فوراً تغيرت لنظرات متوسله، همس بترجي...

-عميد: انتي مو تحبيني شلون يهلچ تروحين لغيري؟

يتبع💋...

♛ ♛ ♛ ♛ ♛ ♛ ♛ ♛ ♛ ♛
البارت تعويض عن البارحة دمجت بارتين ببارت لان مگدرت انزل البارحة مو سالفه تغلييس واريد اشلع گلوبكم مثل ميگول كم شخص🙄 بَـس نفسيتي تعبانه لان صديقتي كُلش مريضه لدرجة توقف گلبهه دقيقتين ورجع ينبض بفضل الله اتمنى متنسوهه من دعائكم لان حالتهه كُلش كُلش تعبانه🥺❤️‍🩹.