شفاه مخملية الفصل الثاني 2 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي

#جمالهة يشبه سماور بغداد ، يشبه فرحة البعاد ، التقت بعينيها روح التُراث القديم ، ريحه الچاي المهيل، وسوالف دافيه تشبه سمار جفونهة🤎. (بقلم الشاعره ithuda )

♛ ♛ ♛ ♛ ♛ ♛ ♛ ♛ ♛ ♛

الليل كله مانمت اخاف تغمض عيني ويروح الوقت عليه، غايصة بالكتب والملازم حايرة بضيمي.. اووووف يا امتحان الفيزيا قهر وبلاء مدري ابتلاء المهم أذية،، لو يجي نيوتن بيدي املخه تملخ ما اكلت التفاحة وانجبيت الا تتفلسف وتسويلنه نظريات وصخام بوجهك، بَـس تدرون مو صوچه صوچ الغرب اخذو افكاره وطبقوهن، بعد كفار ما عليهم عتب..

وبين ما اني ادردم وحدي، حسيت بباب السطح ينفتح شهگت بخوف...

-شنو ليش گاعدة هنا؟

-اووف ماما خرعتيني

-صباح: ههه شكو شبيج خاروعه هسه كولي شعندج هنا گاعدة؟

-ماما جاي اقره

-صباح: هجران كم مرة اگولج لتقرين لهيج وقت لچ ماما تگومين تنسييين شبيج انتي!!!

-ماما حبيبتي انتي عوفيني براحتي حبابه هذا اخر امتحان اكمله واشبع نوم

-ديلا بَـس لتتأخرين هجور موزين عليج بنيتي

-اي اصلاً مابقالي شي

نزلت امي وظليت اقره اخاف يروح عليه الوقت، خلص مو وكت ادردم وانگ خليني اخلص واشبع دياحه، اقره مسأله انوب اروح ؏ التعاريف.. سحبت الدفتر المقدره بي درجاتي بالامتحانات المتحنتهن بالايام السابقه..

-اممم يعني لو اجيب تسعين بالفيزيا معدلي يصير حوالي 85 اي حلو خوش معدل ياارب اجيبه بلكي ابويه يقتنع ادخل كليه

نزلت جوة بعدما شفت الساعه قريب السبعة يمممما يگلبي يرگع يرگع رحت ركض سبحت حتى اصحصح وسويت الريوگ وبين مانتظر الچاي يفور خليني اعرفكم ؏ نفسي..

اني هجران فارس ابراهيم، عمري 17 سنه اليوم اخر امتحان اليه واتحرر من ظيم السادس، ابويه فارس وامي صباح وعندي تلاث اخوان فاضل الچبير، وحيدر، وندى الصغيرونه، اما جوري تصير بت عمتي وراح افسحلهه المجال تعرفكم عن نفسهه..

ماريد احچيلكم عن شكلي لان اكره هالسالفه، بين قوسين اختصرلكم الموضوع اني موحلوه مو جگمه بَـس موحلوه ومتعقده من شكلي وبشرتي وجسمي الناعم وگصري بأختصار بكلشي!!

امي وجوري دائماً يحاچوني ويگولون خلقة الله ميصير احجي عليهه واني مو بشعه لدرجة اكره نفسي بَـس من اقارن روحي ويه جوري اكون غوله گدامهه، بَـس عندي مميزات حلوه بشكلي يعني ؏ الاقل نگدر نگول انجرع، شعري حلو وطويل وشفايفي حلوه ادري لا تضحكون بَـس هاي جورية تضحك عليه وتقنع بيه تگولي شفايفچ حلوه شلون تگولين ماكو شي حلو بيه واني الخبله اصدگهه واگعد اسوي حركات بيهن واغور خواتي هههه خباال

مشكلتي الازليه ثقتي بنفسي مهزوزة واكره هالشغله بيه لان دائماً تخليني ارضى بالقليل خوفاً اخسره وماحصل شي وراه، واني فاهيه وفطيره وفقيره وبسرعه ينضحك عليه اوووف ويه شخصيتي الزباله اكرهها اكرررههااا وسالفه الخجل مالتي هاي سالفتهه سالفه استحي احچي لو اتناقش ويه وحده من بنات المدرسة خوفاً يحچون عليه ويگولون عني جگمه (بشعة) فَـہ اظل ساكته حتى لو تجاوزو عليه، المهم يللله كافي تعاسه من الصباحيات خليني اروح اگعد اخواني ليروح علينه الوقت...

-جوري، فاضل، حيدر، ندى گعدو يله!!!

-فاضل يتثاوب: آآه ساعة بيش؟

-صارت السبعة يله عيني گوم هم ياله تلحگ ؏ كليتك

-فاضل: خوش

-هجران: جورررري ديله گومييي لچ يللله مو حيروح عليج الامتحاااان

-جوري: وجعععع چنچ جاموسة جاي تجيييب

-انچبي وكومي يله

-جوري: ماريد امتحن هوه اول وتالي مندخل كليه شكو بعد هالشلعان گلب والتعب

-حتى لو بلكت ابويه يقبل ديلاااا شلعتي گلبييي

-جوري: اي اي جاية نعله علاااا

تركتهم ورحت ابدل اللبس القميص واقره تعريف انوب اروح ؏ الصدرية واراجع اشتقاق، اجتني جوري گالبه وجهها...

-جوري: تره لعبتي نفسي كاافي شگد تلحين

-انتي شعللليچ ليش هيج مضغوطة!!

-جوري: لا مضغوطة ولا ابددد بَـس رعونيه هاي شدعوة حتموتين روحج

-لچ صعبه والله اخاف ماجاوب

-جوري بغرور: ايي عيني منو گلچ ترحين علمي چان اجيتي ويايه تجارة سهله وبسيطة وتونس

-اي عينييي وشسوي بيهه بعدين؟؟

-جوري: انتي بالحالتين كاعده بالبيت وساكته لا كليه ولا ابد فَـہ على شنو هالتعب

-هففففف دروووحي لو قاريه بهالوقت مو احسلي

لبست شالي وعباتي صحت لـ جوري وطلعنه، طول الطريق ادعي ربي اجاوب بالامتحان وما اچفص ويروح التعب والسهر.. دخلت للقاعة وزعو الاسأله تشوووي لعنت نيوتن الف مرة عسى يشتعل بگبره وينشوي ؏ هالدگة الناقصة، اووف خاف حرام احجي عليه الرجال مات وشبع موت.. رغم الاسأله صعبه بَـس جاوبت زين لان هواي قريت بس لا والله اني شاطرة هيه گوة تباً للتواضع..

طلعت من المدرسة ورحت لمدرسة جوري التمتحن بيهه، وگفت بالباب انتظرهه شو هاي طلعتلي لابخة روحهه لبخ الحمرة والكحله جارتهه موصلتهه لأذاناتهه طالعه چنهه جنيه، بس نعلا علا ابليسهه حلوة حلوووة شما تلعب بروحهه، صحت...

-هجران: ولللچ شنو هالمكيااااج

-جوري: هاا اشتغلت غيرتج حتموتيييين لان اني احلى منچ

-خللص عاااد ذبحتينييي شبيچ كلما حچيتي غرتي ما غرتي

-جوري: ههههه حبي اتشاقه شبيچ هجرانه بسرعه تزعلين

-عوفچ من الشقه والله لو ابويه يشوفج يگطع الصوندة ؏ ظهرچ!!

-جوري: وين يشوفني وهوه بالدوام، ديله امشي خلينه نرجع للبيت اريد انام

-شلونج بالامتحان؟

-جوري: مصخمة

-هجران: يعني نتلاگه بالدور الثاني؟

-جوري: شنوووو انتي هم مامجاوبه؟؟؟

-لا اسم الله عليه مجاوبه زين، بَـس جاي اكول عليج انتي دور ثاني

-انجبي هجراان الله لا يگولهه

-ههههههه دمشي امشي خلينه نرجع عيوني رح ينطبگن من النعس

وصلنه للعطار القريب بيتنه جوري دگت رجل الا تدخل وتشتري اندومي..

-ابويه ميقبلللل گولي لحيدر هوه يجيبلچ

-جوري: هجرااان تره اهلچ لعبو نفسي شكد معقدين

-اني اعلمچ اني اهلي معقديين ما غزر بعينج انكسر ظهرهم وهمه يربوچ وانتي لحمه بكبر چف الايد

-جوري: اهووووو تره كرهتيني عيشتي تعيرين بيه شسوي اذا اهلي ماتو واني بت انفاس

-ما اعيّر بيج والله، بَـس انتي متستحين دائماً تحجين ؏ ابويه

-لا حبيبي بابا ماحچي عليه اصلاً اني اموت عليه وهوه الرباني اني حچيي كله ؏ هذاك حيدرو المصخم مسوي روحه سبع البرمبه ويسترجل ؏ راسنه

-هجران: ديلا امشي لنتأخر

وصلنه لفرعنه استغربنه من شفنه سيارتين مظلله سافطات قريب بيتنه...

-جوري: هاي شكو؟ شعدهم ذوله هنا؟

-شمدريني امشي امشي نطب جوه

وصلنه قريب البيت شفنه غزوان بباب البيت واكو رجال واگف شويه بعيد عنه جاي يدخن، غزوان بَـس شافنه فك حلگه ؏ جوري، تقرب علينه...

-غزوان: ها بنات اجيتو من الامتحان؟

-هجران: هلو غزو اي اجينه خير صاير شي؟

ماهتملي ولا باوعلي عيونه ؏ جوري گصگصهه، وهيه عيونهه ؏ اظافرهه تلعب بيهن مامهتمه لوجوده

-غزوان: شلونج جورية؟

-جوري: اسمي جوري مو جوريه هاي واحد!!! ثنين اني زينه، يله هجران نطب جوة

ذبلت ملامحه اكيد انقهر من اسلوب جوري وياه، ساحلته سحلل وهيه ولا يمهه عبالك يحاچي الحايط.. جاي نريد نطب واجه رجال يحاچي غزوان

-الرجال: غزوان وينه فاضل شو ليهسه ما جه؟

-غزوان: هسه شويه ويجي اكيد تأخر بالكليه

-الرجال: چا فگدته مشتاقله هالاثول اخافن نرد وماشوفنه

-غزوان: هههه هسة شويه ويجي لتخاف

عيون هالرجال مااانزلت من جوري، باوعت الهه سايحة البنيه صارت بيناتهم تبادل نظراات وابتسامه وحركااات وبركااات واشكال بهارات هاي شكوو؟؟ غزوان حس بالسالفه نتر بينه...

-غزوان: طبننن جوووة روحن شوفن امچن!!!

رحنه ركض جوة، طبينه من باب المطبخ استقبلتنه امي مخبوصه، سألتهه...

-هجران: ماما شبيج؟ منو ذوله الزلم البره؟

-امي: هاا بنات اجيتن من الامتحان؟؟ شلونچن جاوبتن؟؟

-هجران: اي حبي بَـس ما جاوبتيني منو ذوله الزلم؟

-امي: هذا ابن خالي خليل جاي هوه وولده

-جوري بأستغراب: منو ابن خالچ خليل؟ شو اول مرة نسمع بي

-امي: ايي مو هوه بالناصرية عايش لهيچ متعرفو

-هجران: زين وشذكره بينه؟

-امي: يعني شلوون اجه يزورنه شنو نطرده، شبيج بنتي هجران!

-هاا لا اسفه ماما

راحت امي تحاچي اخواني واني وجوري رحنه نبدل.. غسلت بسرعة ورجعت للمطبخ اشوف شمسويه غده چانت منگعة دجاجه وجاي تطبخ التمن، مطلعه خضرة وخس وهالسوالف مال زلاطة وگفت اسويهن خطيه اكيد هيه تعبت.. اجتني جوري بتراكهه الظيگ كالعادة، عطت بيهه...

-هاييي شنووو شلابسه انتي

-جوري: شنو شبي؟

-دباااعي شلون ضييگ ولونه فاتح امي مو كالت ممنوع تلبسين هيج گدام الولد؟؟

-هجران شسالفتچ هسه شلابسه اني!! حيدر وفاضل اخواني شكو بعد

-اوووف جوري شلون بيچ انتييي مو اخواااانچ ميحلووون عليييچ اصلاً لازم تلبسين حجاب گدامهم بَـس ابويه عايفچ ؏ راحتچ وگال ميريد يضغط عليچ

-اي خلص لا تضغطين عليه انتي هم، ديلا يلا گولي شتردون اسوي؟

-روحي طلعي الطرشي وگطعي الليمون

-خوش

كلمن گعدت تسوي شغلة..

-جوري: هجراان؟

-ها؟

-جوري: منو ذوله الزلم برأيچ؟

-امي گالت گرايبهه

-اي خوب ادري سمعتهه بَـس شو مادري احس اكو سالفه لجيتهم

-الله يستر

-جوري: شبيج خايفه؟ ليش صاير شي واني مادري؟

-لا اسم الله شصاير مثلاً بَـس دا اگول اسم الله ؏ حچايتچ

-هاا

-ءء هجراان؟

-خييير

-شبيج گوة تحچين؟!

-مو گوة احجي بَـس تعبانه والله گولي حبي شرايده

-هذا ءء الرجال الي چان واگف ويه غزوان شنو رأيج بي؟

-شنو رأيي؟

-اني دا اسالچ!!

-نترت: جورية شبيج شعليه بي اني

-وشكوو شبيج عطتي بيه

-لان اني ضايجة من موقفكم شلون توگفين هيچ مبوسمه وفاكة حلگج ؏ الرجال هسة شيگول علينه!!! ماشفتي غزواان نگلب طماااطة من العصبيه

-يي وشعليه بي اني

-جورررري لا تغشمين روحچ كلنه ندري غزوان يحبچ وميت ؏ اسمچ، لچ هوه بَـس ذيچ السنه تلاث مرات خطبج

-واني ماحبه شنو هيه گوة

-ولچ خوش ولد وخالو ناهض خوش رجال وامه ذهب وعدهم خير وميتين عليچ تدرين شگد خالو توسل بماما حتى تقنع بيچ تقبلين، انتي مو تردين تطلعين من الفگر الدنعيشه؟؟؟

-ايي اطلع من الفگر اتزوج واحد احبه ويحبني مو غزوااان الفااهي

-وشبي غزوان ماعاجبچ؟؟ شو خوش ولد ومرتب لا عنده زايده ولا ناقصه وابن خالي ونعرفه وهوه هالگدوته لو الا تردي ملعب وابو بنات

-لا مو ابو بنات بَـس ماريده ثور الله بأرض الله كلشي ميعرف

-اوووف جوري اوووف والله تتندمين وگولي هجران ماگالت

-اخذي الچ اذا هيج كاتله روحج عليه

-ماكول غير مالت ؏ وجهچ

-دخلي يولي عوفينه منه تعاي شوفي التمن فار

عفتهه ورحت اصفي التمن، امي كل شويه تروح للاستقبال وترجع للصاله انوب تجينه للمطبخ تشوف شنسوي.. اجتنه اختي ندى تفرك بعيونهه...

-هجران: هااا گعدت الحلووة

-ندى: ههه اي صباح الخير

-جوري: لج خيه يا صباح مو صار الظهر

-ندى: خطيييية مو انتي يوميه للظهاري تگعدين بَـس عمن اليوم امتحان گعدتي من وكت

-جوري: اي والله صح ههههههه

-ندى: تعالن شلونچن بالامتحان؟ مجاوبات؟

-جوري: دعوفينه من الامتحان لو تشوفييين شنو شفت اول ما دخلنه للبيت

-ندى بلهفة: شنو؟؟؟

-جوري: لچ واااحد مصكصك تصكصك يبوووو شلون واحدد چان يحاچي غزوان

-ندى: عزززه منو هذاا؟؟!!

-جوري: يبووو شنو من بياااض شااايل

-هجران: ولچن عييب كافي تحچن بالزلم

-جوري: درووحي اهخخ سودني، فرّ عقلي الابيضاني

گعدت تفصل بالرجال وتحچي بملامحه شلون انتبهت وگصته بهالطريقه مادري خرب عقلچ جوري قناااص تگولون شايله مو عيوون، جفلنه من سمعنه صوت رجال جاي ورانه...

-منو هذا الابيضاني؟

-جوري بخوف: هاااا؟؟

-غزوان بعصبيه: الابيضاني التحچين بي منووو؟؟؟؟؟

-جوري: لا لا مو اني احچي بي هاي ءء هاي هجران تكول ؏ هذا الشفناه ءء.. هذا الواگف وياك بره قبل شوية

-غزوان بحده: شبي؟؟؟؟

-جوري: نسأل عن اسمه لان ءء يشبه ءءء يشبه....

جوري تباوعلي تريدني اكمل وياهه الچذبه، گلت بسرعه...

-هجران: يشبه ممثل هندي يطلع بمسلسله نتابعهه

-جوري: اي اي يشبهه هواااي

-غزوان: ديلااا عوفچن من هالسخافات عمة صباح تكول صبو الغده

هزيتله براسي، يمممه چان انلگفنه ربي ستر، ندى عافتنه وشردت تخاف انوب تنلاص عليهه، وغزوان هم عافنه وطلع..

-هجران: طايحة الحظظظ فضحتيييينه يا عوووبه

-جوري: يممممه والله ولا ادري غزوان واگف ورانه، گبر شگد ملگوف

-حتتتى لو جوريه ميصير تحچين برجال بهالطريقه! وگدام نددى!!

-جوري: هجران شبيچ تره ندى چبيره

-هجران: لا ندى بمرحلة عمرية تخوف بسرعة تنجرف وبسرعه ينضحك عليهه

گلبت وجهها وراحت عني، صبينه الغده وگعدنه ننتظر الزلم يكملون غداهم حتى نغسل الماعين مالتهم، اجالنه غزوان الكشرة شاگه حلگه...

-هجران: ليش ماتغديت وياهم؟

-غزوان: ماريد ماشتهي

-ممم

-غزوان: جوري تعاي اريد احاچيچ

-جوري: خيير حاچيني هنا مابيه اگوم وياك

-غزوان: جوري شبييچ تعاي موضوع مهم

جوري تباعولي حتى اتدخل، گلت بلطف...

-هجران: غزوان احچي هنا هاي اذا عاندت بعد لو يجي الحمزة متگوم وياك

-غزوان: اوووف منهه اووووف

-جوري: هااا شو صاير تتضجور حجي غزواان

-غزوان: لا ماتضجور بَـس انتي تستفزيني متگوليلي شبيچ وياايه!!

-جوري: ماعندي شي وياك، وهسه يله گول شبيك؟

حك مؤخرة راسه وابتسم خفيف، گال وعيونه تلمع...

-غزوان: اشتريت قطعه ارض

-جوري: اي بيهه الخير

-غزوان: اي وراح ابدي ابني بيهه حتى من اتزوج اگعد مرتي ببيت وحدهه حتى تاخذ راحتهه

جوري دايره وجهها عنه عبالك يحاچي الثلاجة، انقهرت عليه شلون يحچي بحماس وفرحان عبالك مسوي انجاز چبير.. ادري بي ديسوي كل هذا لخاطرهة لان يعشقهه موووت وكم مرة رادني اتوسطله حتى تقبل بي...

-هجران: ؏ الخييير غزوان ان شالله بيت العامر ويوم زواجك من البنيه التستاهلك وتحبك

غزوان يباوع لجوري، رفع ايده وگال بحرگة...

-غزوان: اميييييين!!!!

اجو اخواني فاضل وحيدر وامي هم وندى وياهه، اجتمعنه سوالف وضحك وفاضل وغزوان واحد يصنف ؏ الثاني لأنهم ضلووع وكلُلش قريبين.. شويه وطلعو اخواني وجوري هم طلعت من المطبخ اكيد انزعجت من موضوع غزوان هالبنيه متفتهم وين تحصللهه واحد مثله يحبهه ومييت عليهه ومتحمل خبالهه وعنادهه ويريد بَـس يرضيهه..

-غزوان: ولچ هاي شنو هجران شو حليانه

-هجران: ههههه ادري تضحك عليه

-غزوان: لا والحُسين صدُك حليانه مو عمه؟ شتگولين

-صباح: اي لعد شبيهه هيه من الاول حلوة

-هجران: هههههه انتو ظلو ضحكو ؏ رواحكم منيلي حلوة يحظي خاف تيهتو ويه جوري

-غزوان: لا خوب جوري تشگ شگ

-صباح بصياح: ولككك غزوااان متستحي تحجي عليهه واني واگفه

-غزوان: ااااخخ عمه هاي البنيه سودنتني ماگدر اووف يگلبي

-هجران: ههههه ماما عوفي هذا العاشق الولهان

-صباح: عمه غزوان لا توهم روحك وتتعلق زايد انته تعرف البنيه متريدك خاف ينكسر گلبك يا عمه

-غزوان: عممه وحق ربچ غيرهه ما اخذ

-صباح: لعد ظل هيچ طول عمرك

-ندى بضحك: غزوان اذا جوريه ماقبلت بيك تزوج هجران بدالهه ههههه

-هجران(حسيت وجهي بوخ من الخجل والعصبيه): ولچ ندددى اني اعلمچ يا ادبسززز

-غزوان: ههههههه وشبيهه هجران چنهه ورده هوه بَـس طيبة گلبهه كافيه

-هجران(نزلت راسي بخجل): تسلم غزوان

-غزوان: يلله اذا فد مره اتزوجچ شسووي هههه

-هجران: ههه

ظليت ساكته استحيت وانجرحت من الموضوع بكامله، هالحچايات الممكن تطلع بعفويه وضحك تأذيني وتحسسني بالاهانه وبأني انسانه غير مرغوب بها، ومو قصه احب غزوان لو عندي مشاعر تجاهه لاا ابد اشوفه مثل اخواني فاضل وحيدر بالضبططط

طلعو الخطار واني رحت انام چفي ؏ وجهي، دورت بالغرفه جوري ماكو، هاي البنيه ماعاجبتني هالايام دائماً سرحانه لو مختفيه لو بس اعرف وين تولي اني ارتاح، سألت ندى...

-نداوي جوري وين؟

-ندى: مادري ماشفتهه من الغده لسه

-ياااء وينهه هااي؟؟؟

طلعت من الغرفه ادور عليهه سألت امي عنهه تگول متعرف وماشافتهه، انوب اجاني ابويه يسأل عنهه يبووو لو يدري بيهه ماكو يگلب اللبيت ؏ روسنه..

دورت بكلل البيت حتى بالسطح بَـس مالهه أثر، گلت لأمي جوري ماكو گامت تدگ ؏ وجهها وتبچي...

-صباح: وين رااااحت وييينننهه يبووو والله لو ابوچ يدري بيهه ماكووو يشيشنه كلللنه

-ماما شبييچ شهالمبالغه شنو السالفه!!

-صباح: ليييش انتي متعرفين ابووووچ!!!

سكتت من شفت حالة امي شلونهه، صدُك ابويه مانعنه نطلع لباب الحوش وحدنه، كُلللش يخاف علينه لان صاير حالات خطف واسم الله يغتصبون بنات، هوه المدرسة وگوة يسمحلنه كم مرة راد يحطلنه خط بَـس اني اگوله متسوه

اجه غزوان وجهه اصفر ويتراجف، گام يصيح عليه لان غفلت عنهه..

-هجران: اني شعليه شنو جااهله اني شكوو كلما جوري سوت شي ذبيتو براس هجران

-غزوان بعصبيه: بنييه شاابه مثل الوردة العيون تطاير عليهه شلووون تسمحولهه تطلع وحدهه متخافووون عليهه اوووف يااابه وعلي اذا صارلهه شي اگلب الدنيا اليووم

-صباح(الام): عمه غزوان اهدأ حبيبي ميصيرلهه شي ان شالله، طلعو ابوهه واخوانهه يدورون عليهه

-غزوان: منوو اخوانهه شو حيدر بالشغل وفاضل الله اعلم وينه!!

-هجران: غزواان شبيك كلبت الدنيا خوب انته روح دور عليهه

-غزوان: طااالع انعل يووومي طاااالع

طلع والبيت مشحون، امي ترجف وميته خوف.. فوگاهه قبل يومين اجت عصابه وخطفو بنيه بفرعنه ولعبو بيهه لعب واخذو من اهلهه فدية تكسر الظهر تالي رجعوهه مكسورة خطية، گلبي يطربگ بصدري من الخوف هاي جوري حلووة ومثل ميگول غزوان العيون عليهه تجيب راس اكبر واحد..

ولچ وينچ جوري وين وليتي، دقايق ونسمع صوت ابويه يعيط ؏ امي، وبيده جوري خربانه وواگعه..

-فارس(الاب): صبااااح ويينچ تعااالي عاونينيي

اجه غزوان طاير عليه اخذهه من ايده وشالهه، ابويه انطاهه لان عنده تشمع بالظهر وفقرات ناقصة وميگدر يشيل شي.. غزوان تسودن من شاف حالتهه وشلون غايبه عن الوعي..

-غزوان: ولچ جوووري شبيييچ اصحيي جوريه اصحييي

امي تدگ وتلطم وابويه يدگ ؏ راسه، واني گاعده بصف جوريه افرك بصدرهه، فجأة واشوفلكم فيصل الابيضاني فوگ راسنه.. اجه يركض تقرب عليهه وهمس بَـس بلهفة..

-فيصل: جورية گومي لا تموتين گليبي گومي

صفنت هذا شمعرفه بأسمهه وليش هيچ ديحاچيهه عبالك يعرفهه وخايف عليهه؟ هذا مو ؏ اساس طلعو قبل شويه!! كل هالتساؤلات براسي وجوري بعدهه غايبه عن الوعي امي ترش مي بوجهها وتشممهه عطر وهيه فاقده.. ماحسينه الا غزوان چيت ؏ فيصل، ضربه بوكسي فر وجهه

-غزوان: ايااا كلبيبب شسويتلهه

فيصل لزم وجهه وترنح بمكانه اثر الضربه القوية

-فيصل: شماالك انته تسووودنت!!!

-غزوان: ومحمددد اذا صار بيهه شي محد يفكك مني يابن الحرااام

هوه هيچ كال لو فيصل تخبل صارت الصاله حلبه مصارعه، ابويه يحاول يفاككهم وامي تدگ ؏ وجهها وندى تبچي وتنوح، بابا جرّ غزوان من ايده وعاط..

-فارس: احترررم شيبتي غزووان وكافي الله يخليكم كاافي البنيه فاقده خلونه نفتهم الصاار

ابويه يحچي وفيصل وجهه انگلب طماطة عيونه تگولبن من العصبيه شكله صار يخوف، رغم هوه ناعم وشويه گصير بَـس ايده قويه من تصارع ويه غزوان

-فيصل: اذا انته زللمة وابن امك وابوك تعالي بره نتفاهم وانا الك

-غزوان: رجاال غصباً عنك وعن الخلفوك يا عااار

-فيصل بعصبيه: تعاااال بره وعلي اخلي الدم يوصل للرچاب (للركاب) اليوووم

طلعو بره وابويه يدگ ؏ راسه وطلع وراهم، حسيت بجوري تصحى شويه، اجتهه امي صاحت بلهفة

-صباح: يمممه بعد امچ جوووي حبيبتي تسمعيني يممه بنيتي رجعتلي الف الحمد لله يارب الف الحمد لله

-هجران: جورية تسمعينه؟؟

بَـس تونّ وايدهه ؏ راسهه وتبچي، هاي شبيهه شصارلهه!! صوت عياط الولد بره عالي واسمع صوت ابويه يهدي بيهم، وصوت زلم هواي مبين حمت السالفه وهواي تدخلو.. فجأة ومنسمع غير صوت طلق قوي وابويه يصيح...

-ابويه: لاااااااء لاااااااء ليييييش لاااااااء

يتبع☘️...

♛ ♛ ♛ ♛ ♛ ♛ ♛ ♛ ♛ ♛
شلونكم حبايب ئلبي اتمنى تكون عجبتكم القصة كـ بدايه
انطونني رأيكم بيهه؟σ̴̶̷̀₃σ̴̶̷̀

لا تنسون التصويت والتعليقات بين الفقرات حتى تصعد القصة وتنال استحقاقهه من البدايه، وياريت تمنشنون صديقاتكم والتحبون يقروهه وياكم حتى تحمسوني اكتب اكثر واكثر، حبيت هالقصة لان بيهه قصة ببطن قصة واحداثهه قويه ومتأكده رح تعجبكم ان شالله🔥

نتفق ؏ طريقه التنزيل من البارت الجاي ان شالله ورح يكون حسب التفاعل؛

#زهراء السلامي