رواية ﻣــ؏ـشوکت الــشـــيــﺨ لــيــث🔒🔑مكتملة الفصل الاول 1 - بقلم طفلۂ اوم السان

♥شـــهــد♥

هلووو شلونكم قلبوشاتي اني شهد عمري 18سنه شكلي كولش عادي يعني بشرتي حنطيه ع بيضه وعيوني سود مثل الليل وشعري لنص ضهري اسود ومخصلته ثلجي

اني كضيت عمري عايشه بسطنبول ويا ماما امي اصلها عراقيه بس عايشه كل حياتها بتركيا من انولدت يعني مثلي وهي همين تحجي عراقي بس هي من بغداد وبابا من البصرة

طبعا مع انه بابا وماما منفصلين بس بقو اصدقاء وكل فترة بابا يجينه طبعا ماما الزوجه الثانيه لبابا بابا عندة قبلي ولد 2 الجبير اسمه علي اجه ويا بابا كم مرة هو صح عصبي بس طيوب وحبوب كولش والاخ الثاني اسمه حسين. وبعد عندي اخت وحدة اصغر مني بسنه تقريبا

من خلصت امتحانات السادس علمي جنت ناوي اكمل جامعه بس بيوم اجت ماما بالليل لغرفتي وكعدت يمي اني من النوع الي احب اكتب كل شي يصير بيومي كل شي اصغر شي اكتبه ولما اتفوت شهور ارجع اقرا واضحك اعرف خبله 😂😂

ام شهد:هلوو حبيبي

شهد:هلووو مامي ادخلي

ام شهد:شنو داسوي اميرتي

شهد:ولا شي كل العادة

ام شهد:اممممم انتي تعرفين انه صرتي جبيرة والسنه الجايه راح ادخلين للجامعه وصرتي بالغه

شهد:اي مامي اعرف امممم كولي شنو الي ناويه اتكولي

ام شهد:الصراحه انا جايلي عريس

شهد بتفهم:وانتي اموافقه

ام شهد:ماعرف

شهد:لا تعرفي انتي همين تردي صح عمو عمر الي طلب اييدج صح

ام شهد:صح مين كالج

شهد:احساسي كالج انتي فكري واذا اموافقه تزوجي مامي كافي كل هاي السني الي ضيعتيها من عمرج علمودي

ام شهد:بس انتي تعرفين شرط والدج انه راح ترحيله اتعيشين ويا اذا تزوجت

شهد:صح مامي واعتقد اجه الوقت الي لازم ارجع للعراق ارجع لبلدي الي انحرمت منها وارجع لحضن ابوي الي بكل حياتي ما نمت ولا مرة بحضنه اعتقد هذا حقي

ام شهد:هيج سهله عندج اتعوفيني

شهد:وانتي من قرارتي تزوجين وانتي اتعرفين شرط بابي سهله عندج اتعوفيني

ام شهد:بس اني

شهد:اعرف جنتي امتانيه اصير بال18 حتى ابلغ واذا بابي رفع دعوة ما يكدر يربحها اذا اني قرارت ابقى عايشه وياج صح

ام شهد:ههههه طول عمرج ذكيه وابمتياز

شهد بغرور مصطنع:اعرف اعرف

ام شهد:كافي عوبه يله تصبحي ع خير

شهد:فكري مامي وانتي من اهلوو يا حياتو

بعدها مامي طلعت واني ضليت افكر بمستقبلي شلون راح ايصير امي راح تستغنه عني وتزوج لو اتكول ابقى كل عمري وياج يابنتي

شنو اسولف الكم صح اني عايشه ويا مامي بس هي شخصيتها تختلف عني بكل شي هي تحب الحفلات والتجمعات دائما اني صح احبهن بس مو بهل الشكل احب الهدوا الاسترخاء احب اقرا كتاب لاجاثا كريستي او اقرا قصص لعبير واكو هواي كاتبات

فد مرة عجبتني مقوله لجاثا كريستي

♥الانوثة يا صديقتي ان
تنجبي طموحك وان
تهذبي فكرك وان ترتبطي
بالكتاب قبل اي ارتباط♥

ضليت افكر الى ان نمت كعدت ع صوت مامي اتصيحني

شهد:Günaydın Mami
(صباح الخير مامي)

ام شهد:Günaydın, benim küçük olan
(صباح الخير صغيرتي)

شهد وهي تكعد ع الطاوله:مامي

ام شهد:يا عيونه

شهد:فكرتي

ام شهد:اي حبيبي

شهد وهي اتخلي اكلاص الحليب ع الطاوله: اي وشنو جوابج

ام شهد:تعرفي انه المراة ما الها غ ....

شهد قاطعتها:من الاخير شنو جوابج اعرف هاي المقدمه

ام شهد:موافقه ع عمر

شهد وهي كايمه من الطاوله:مبروك لعد

وراحت لغرفتها

دخلت شــهــد لغرفتها وهي بالكوة كاضه غصتها اتريد تبجي وتشبك امها واتكلها خليج وياي بس الي منعها هو صوت امها من ردت ع فونها سمعت اتكول اهلين حياتي عمر

كامت اخذت فونها واتصلت ع اب......

♥♥♥♥♥

خلي اروح لمكان اول مرة اروحه الي هو العراق محافضه البصرة لمنطقه راقيه اباحد الافرع جان اكو ثلاث فيلات الاوله بالواجها والثانيه ع اليمين والثالثه ع اليسار

خلي اروح للفيلا الي بالواجها ندخل من الباب مقابيلنه حديقه كولش جبيرة (طبعا الثلاث فيلا نفس التصميم بالضبط بس ثنين كبار وحدة صغيرة بعد اشوي اتعرفون السبب)

بعد ما نتعدة الحديقه الي مليانه حشيش وزرع من كل الانواع والورود الملونه ندخل من الباب الفيلا الداخلي صاله جبيرة ومقابيلها درج يصعد لطابق الثاني والثالث

نروح للمطبخ جان اكو مرة عمرها قرابه60سنه بس من شكلها يوحي عمرها بال40 جانت اتحضر الريوك اسمها ام ليث هيج ايصيحوها واشوي ودخلت عليها مراة ثانيه عمرها بال52سنه واسمها ام سارة

ام سارة:صباح الخير خيتي

ام ليث:صباح العافيه عيوني

هسه تردون اتعرفون القرابه الي بين ام ليث وام سارة هنا خوات ام ليث عدها هاجر عمرها42سنه(بعدين احجيلكم عنها) وبعدها ليث عمرة30سنه بس ماعدها غيرهم لان زوجها توفه وهي ما تزوجت بعده

اما ام سارة ما عدها غير سارة وعمرها 25سنه مطلقه (لسباب بعدين تعرفوها)ابوها عاف امها بعد سنه من ولادت سارة وسافر وبعد ما سمعو شي عنه ابد

ام ليث تحجي ويا اختها:خذي خيتي صبي الجاي وانا رايحه اصيح اليث والسارة

ام سارة:ماشي راح اصب

راحت ام ليث وكفت يم الدرج وصاحت:ليث يمه ليث يا سارة يله انزلو اتريكو

نزلت سارة وهي اتصبح ع خالتها :صباحو خالتو

ام ليث:صباحو حبيبه وين ليث ليش ما نزل

سارة :امممم اعتقد بقى يم بيت هجورة كل عادة

خلي اسولفلكم عن ليث شاب عمرة30سنه شيخ عشيرة ال..... هو ورجل اخته هاجر ..طوله185 كتافه عريضات وبشرته حنطي وعندة سكسوكه تخـــبل 😍عيونه كبار وحادات لونهن رصاصي
يلعب حديد وعدة صاله ابيت اخته هاجر هو تقريبا كل وقته يم اخته هاجر هنا الثلاث فيلا كولهن ايدخلن ع بعض طبعا ما عدة الباب الخارجي

نترك الناس اتكمل ريوكها واروح للفيلا الثانيه الي ع اليمين وهي الفيلا الثانيه الجبيرة تقريبا بكد فيلا ليث ونفس التصميم همين حديقه بالاول وبعدها تدخل من الباب الداخلي لصاله وهمين درج بالمقابيل وع اليسار المطبخ انروح نلكه هوسه بالمطبخ

مراة حلوة وانيقه جسم وشكل رائع ما ينطيها ال42سنه
صح هاي هاجر اخت ليث كاعدة اتسوي ريوك الاخوها والولدها والزوجها خالد

عدها اولاد 2 ولد الابن الجبير علي عمرة 23 سنه والابن الثاني عمرة 19سنه واخر العنقود بنوته اسمها عليا كلش حبوبه عمرها17سنه تاركه المدرسه اخذت الخامس ادبي وتركت لان اتموت ع النوم وتتعاجز اسوي شي

اما علي ف هو حباب بس عصبي مثل ابو خالد وخاله ليث ....اما حسين ف هذا سرسري بشكل هو قبل لا يدخل جامعه جان احسن واحد بالعائله بس التم ع اصدقاء حقيرين حشاكم ولعبو بعقله وخلو يمشي وياهم بس يعني ما ايسوي شي مو زين بس هامل دراسته ويطلع هواي للمولات وللمطاعم واذا ما عجبه الحجي يعوف البيت اسبوع ويرجع وما يحترم امه بس يخاف من خاله ليث بشكل مو طبيعي يعني متمرد بشكل

اروح بالصاله الي بالطابق الثالث من ادخليت تلكين مركز لجيم كل انواع الاجهزة مال الرياضه واجهزة الحديد جانو علي وليث كل العادة يتنافسون بالركض

ليث جان لابس بنطرون رياضي طويل لونه رصاصي وفالينه اونها اسود اصلوخ وشعرة نازل ع كصته من الحر والعب (فدوةةة 😍😍اريدة 😂😂)

اما علي تقريبا بوسامه ليث بس هذا لابس شورت لركبه وفالينه ربع اردان ويمسح بكصته من الحر

مع انه العمر بين ليث وعلي تقريبا 7سنوات بس هما مقربين بشدة يعني اصدقاء واخوة ليث عمرة ما حسب علي ابن اخته بالعكس ايحسبه اخو وصديقه وعلي همينات ما ايحسه خاله لا اخو الجبير الي ياخذ نصيحته بكل شي وافضل اصدقائه لهيج اتشوفون شخصيه علي وليث متقاربين

نزلو ع الدرج بعد ما سمعو صوت هاجر اتصيحهم اينزلون يتريكون

كعدو ع الطاوله بعد ما غسلو وصبحو ع هاجر وعليا وخالد

خالد زوج هاجر وابن عمها يعني خالد ابن عم ليث همين عمرة هسه بال47 سنه اتزوج بنت عمه هاجر وهو ما جان ايحبها وسافر لتركيا ايكمل دراسته واتعرف اهناك ع وحدة ووحبو بعض واتزوجو ومن خلصو رجعو للعراق صح بالاول اهواي ناس رفضو زواجه بس هو وقف كدامهم بس الي تزوجها جانت غيورة بشكل مو طبيعي ضلو كم سنه وبعدها طلبت الطلاق بعد ما اخدت جوازها وسافرت وتركتله رساله انه لو يختارها لو يختار زوجته واطفاله من هاجر وهو ما جان يعرف انه هي حامل

بعدها قرابه ب8 شهور راح الها علمود بنطيها ورقت طلاقها وشاف بطنها جبيرة انصدم كالها شلون

ام شهد:شنو الي شلوون

ابو علي:انتي حامل

ام شهد:الي اتشوفه

ابو علي:ليش ما قلتي ليش ما اتصلتي وكلتيلي ليش سافرتي

ام شهد:ما جنت اعرف انه اني حامل وجنت كل هاي الفترة انتضر قرارك هه وهسه عرفت انه لا اني ولا بنتي النا وجود بحياتك

ابو علي:شنوو هي بنيه -جان فرحان لان هو يحب البنات وجان عندة 2ولد بوقتها-

ام شهد:اي. ليش يهمك

ابو علي:انتي اكيد اتخبلتي لج انتي اتعرفين انه احبج بس انتي ما صبرتي عليه انتي جنتي اتعرفين انا متزوج وافقتي شنو الي تغير

ام شهد ابرود:مو مهم يله وصلت الي تريدة اطلع من بيتي

ابو علي:وبنتي

ام شهد:هاي بنتي انا مفهوم وراح اتعيش وياي اني وامي (جانت جدت شهد عايشه بس توفت من صار عمر شهد 16)

ابو علي:يعني شلون

ام شهد:الي سمعته

ابو علي:اني موافق لان اوثق بتربيتج اخليها عندج بس بشرط

ام شهد بخوف:الي هو

ابو علي:اذا تزوجتي اخذ بنتي لو حتى عمرها سنه موافقه

ام شهد بتفكير:اممممم

ابو علي:هاا شكلتي

ام شهد:موافقه

وراحو وكتبو هذا الشرط عند المحامي وواقعت عليه ام شهد

ام شهد صح جانت مهمله ابعض الامور بس علمت كل شي لشهد من عمرها 7سنوات اتصوم واتصلي وتقرا القران وهمين محجبه نوعا ما

نرجع لبيت هاجر

الكل كاعدين ع الطاوله يتريكون وكال ابو علي الي هو خالد :البارحه اتصلت عليه اختكم

هاجر بفرح:شهود اتصلت شخبارها (تراة مو كل زوجه اب ضالمه)

ابو علي:اي اتصلت الحمدلله بس هي خبرتني شي راح يفرحكم

طبعا جانو كاعدين كلهم ما عدة حسين لان نايم وجه الفجر.

عليا بفرح كولش وهي حلكها متروس اكل:
شنوو هوو بابا

ليث وعلي بصوت واحد:ابلعي ولج الاول

عليا بعد ما بلعت اللكمه :اي اي المهم كمل بابا

ابو علي:.........

(الفيلا الثالثه وهي اصغر وحدة بيهن هاي امخليها ليث للكعدات والخطار تتكون من صاله وديوان ومغاسل وغرفتين بالطابق الثاني بس)

انتضرووني...

شنو رائيكم بالشخصيات

منو تتوقعون الشرير بالقصه

طبعا القصه من خيالي بس احداثها من الواقع

شنو رائيكم بالشخصيات

..ليث..

..شهد..

..علي..

..عليا..

..هاجر..

..ام ليث..

..ام سارة..

..سارة..

..عليا..

..خالد..

..ام شهد..

ااحبكممممم

آمۣۗہ غۣۗہمۣۗہآزۣآتۣۗہ❥❤