رواية شريعة العشق الفصل الثالث والعشرون 23 - بقلم نورا ناصر

في شريعة العشق
بارت22
نورا ناصر

زهراء : كاعدين نتفق على تجهيز العرس
دا اكوللها لماما انتي تعبانة كولش اروح ويه خالة اجهز اكيد مابيج على فرة السوك ...

_ لا بنتي اني الحمدلله ع العلاج احسن نطلع اني وياج وخالتج او رنا بنت خالتج واذا احس نفسي تعبانة نرجع ما اكدر والله اتركج وحدج اريد كل خطوة ابقى وياج ..

لزمت ايدها وبست راسها ؛- والله ماما اخاف عليج صدكيني اني ادبر حالي واذا احتاريت بشي بالسوك اخابرج عود واخذ رأيج ...

_ الله يسعدج ياعمري واول فرحتي انتي .. ان شاءالله كل شي يصير مثلما تردين ..
اخذت راسها وبسته ..

طلعت من المطبخ وتوجهت للصالة
مااحس الا بابنا تكسرت من الدك ..
طلع بابا من الغرفة وماما جتي من المطبخ واخواتي نزلن من فوك على هالصوت الي اقتحم بيتنا فجأة....

طلع بابا ديفتح الباب واحنا ركضنا للطرمة
دنشوف شكو ومنو هيج يضرب ع الباب بهمجية ..
انفتحت الباب شو شرطه تارسة الشارع ، فز قلبي من مكانه ومتت خووف ...

نسمعهم يسالون بابا عن اسمه كاللهم الاسم وظل يحجي وياهم ، باوع علينا واحنا واكفين واشر علينا نفوت جوة ..

اخذت امي الي جانت تتنفس بصعوبة وميتة خوف
عبير اجت تروح لبابا بس ماما جرتها وحاجتها بتوسل
لحتى متروح ورا بابا هيه استسلمت وفاتت وهيه تتلفتت للباب ..

فتنا جوا ميتين خوف ومدنعرف شكوو ديصير ويا بابا ، دقايق وفات بابا تلكيناه مرعوبين ..
لزم ايدها لمامل وبنبرة اطمئنان تكلم وياها؛- لتخافين ام زهراء هسه رايح للمركز طالبيني اشوف شكو وارجع ..

بسرعة امي لطمت على صدرها وعاطت المركز ؟ ليش شكو ؟؟ هو اخذ ايدها وهدأها ..
_ لخاطري لسوين بنفسج هيج اكيد مشتبهين ..
والتفتت علينا وكال ديرو بالكم على امكم بنات
وفات جوة بدل ملابسه وطلع يطمأن بأمي ويباوعلها بنظرة حزن ..

طلع بابا من الباب ومقبل نطلع وراه ، بقينه حاضنين بعض وميتين قهر ومحتارين ، ورا ساعتين اندكت الباب ، كمت اني فتحتها لان ماما مكدرت حتى تمشي وعبير من كد البجي على بابا فاصلة ومريم نخاف عليها كتلهم اني راح اطلع ..

فتحتها شفتهم كرار وصفاء ، توجهت بسرعة لصفاء احجي وابجي ؛- صفاء الحك بابا اخذوه الشرطة
لزمني من ايدي وفوتني جوة كال اعرف اعرف هسه اجينه من يمه ، ظليت امسح بدموعي وكرار فات قبلنا
هو ظل يهدأ بيه لحد ما فتنا جوه ..

فوتتهم لماما بالصالة كاعدة ع التخم ومابيها تكوم بس دخلو سألتهم ماما : شنو السالفه ليش عمكم اجوا عليه
الشرطة واخذوه شنو صاير ؟

جاوبها كرار وهو منزل راسه: عمه ذوله اهل البنية
الخطبتها مبلغين على عمي لان مكدروا يبلغون على
ابويه ..

تريد امي تجاوبه نطت عبير وظلت تصيح ..
_واحننننه شعلينننه تخطب تنكشر احنه شكووووو حتى يعتقلون بابا ميجي منكم شي بي
خيررررر ..

وكف بوجهه ؛- اهدي شبيج ليش دتصيحين

_ انت ردتها وجنت تعرف كولشششش زين
اهلهاا مو خوووش ناس ومع ذلك اصريت وشنو
النتيجه هسسسسسه بابا نايم بالسجن وانت
تسررررح وتمرحح وعمو مكدروله لان عقيييد

ماما ظلت صافنه ع عبير وانفعالها واني ظليت اباوع عليها شون منفعلة وتصيح ظليت ابرر الهه بداخلي هي حقها لان متعلقه ببابا هواي احسها بعد متتحمل يوم امي تنام مستشفى يوم بابا ينسجن كل هذا تراكم
عليها و انفجرت بكرار ..

ماما اشرتلها بحركه اسكتي هي كعدت
وتباوع لكرار بكل حقد يمكن لو بيها تاكله ومترتاح

صفاء وهو يوجه كلامه لامي: عمه اطمأني اني خابرت على محامي كال هسه مااكدر اسوي شي باجر الصبح اروح للمركز ونشوف شنو القضيه..

_ حباب صفاء وانت كرار لاتعوفون عمكم وحده ترة ماعنده غيركم انتوا مثل اولاده وهو ماعنده ولد ..

عبير ؛- عوزهم بس يتركونه وهو السبب بسجنه ..
ماما التفتت العبير وصاحتها بسمها بنبرة تهديد ..

كرار ؛- لا عمة شسالفة نتركه اصلا عمامي وابويه جانو ويانا بالمركز وطلعوا راحو يدورون على ابو مها وان شاءالله يلكونه ويخلوه يتنازل ..

ديطلعون صفاء وكرار صاحني صفاء ورحت يمه تقرب مني وهمس :- ديري بالج على عمتي واي شي تحتاجوه او يصير شي خابريني ..
هزيت راسي موافقةً وطلعت سديت الباب وراهم ورجعت جوة يم امي واخواتي ، كعدت وماما ظلت تحجي ويا عبير وتهدأهه وتنصحها .. لليل احنا ميتين قهر على بابا لا اكلنا ولا عيونه نشفت ولا شافت النوم بس ندعي اله الليل كله ..

يوم ثاني كلساع نخابر على صفاء ويكولون دنحاول نطلعه بكفالة والمحامي ديشوف شغله
الدعوة كيدية او البلاغ كاذب وحتى شهود ماكو ..

للعصر يله خابرونا كالو طلع وحجت ويا ماما واحنا فرحانين نبجي ونحمد الله ونشكره ..
جابوه للبيت كلنا التمينا عليه وحضناه ونبجي
والتمينا عليه وكعد يسولف ويا عمامي وولدهم ...

بعدها ترخصوا عمامي كالو لبابا ارتاح وغير مرة نسولف بموضوع كرار واهل مها ، كرار بس ساكت ويعصر باصابعه ومحتار ...
طلعو واني حضرت الحمام لبابا وطب سبح ....

يوم ثاني تجمعوا عمامي ببيت عمو كريم ابو كرار وراح بابا الهم ومن رجع وسألنا عن نتائج اجتماعهم
كال طلبو من كرار يأجل موضوع الخطوبة بهذا الوقت ...

كرار ؛- اي بس خو مانسكتله هذا واني اعرف عنوان بيتهم بالغزالية ..
صفاء ؛- اي سهلة نروحله نطيح حظه ...
تجمعوا ولد عمامي ورحنا على عنوانه
دكينه الباب طلعلنا واحد منعرفه ...
سألنا على ابو مها واخوها
كال لحظة وطب جوة للبيت ورة ثواني وطلع ابو مها
ظلينا نرزل بي ونهدده ... هو من خوفه نكر انو هو الي مبلغ ...
كال والله اعذروني هذا ابني هجولنا جابنا لهنا وكعدنا ابيت اخوي وتركنا بيتنا والتبليغ مو اني سويته
الله شاهد هذا ابني والبنية بنتكم تعالو اخطبوها مني اني موافق ..

حسيت بكرار الفرحة مسايعته ظل ميعرف شنو يكول
ابو مها طل بوجهي وكال برجاء ها بويه ارجع لبيتي الي الامان ؟
صفاء ؛- اي عمي ارجع لبيتك والك الامان ويله كرار امشي ..

اخذت كرار وتوجهنه للسيارة خليت ايدي على كتفه
وهو جان صافن وبغير عالم ..
لك ها لاعبالك فرحت وعمامي يوافقون بسرعة

بنبرة احتجاج جاوبني ؛- وليش ميوافقون بلله ؟ ابوها انطاهه الي

_ وحق عمي تحسين ونومته ليلة كاملة بالسجن شنو نسيته ؟
_ لا مانسيته بس مها مالها ذنب وابوهه اعتذر
_ لك اهلها مو اوادم شلك بالهوسة كمل دراستك وبعدين يصير خير ...

_ اسكت صفاء انت ماحاس بيه البنية احبها
فعلا سكتت ظل يباوع بوجهي ثواني وكانه وعى علي كاله اصلا اني اكثر واحد حاسس بي .. بهاللحظة حسيت باصابع باردة جليدية تمتمد لقلبي وتعصره عصر ...

رجعنا للبيت حاجيت كرار ؛- اول شي تسوي تستأذن من عمي تحسين لان هو المتضرر الوحيد من هذي السالفة ..
_ اي اكيد واني احترمه عمي حتى لو ماقبل وراد حقه اني ويا قابل هو عمي يتعوض النسوان بلله تتعوض بس ما اخلي شي يفركني عن عمي ..

رحنا لبيت عمي تحسين وحجينا ويا
كرار ؛- عمو طلع اخوها الي مبلغ عليك وابوها اعتذر ويكول تعالو اخذو البنية عمي اذا انت مو قابل اني ماروح ولا اوصل الهم بعد ولا اخطبها بس انت اذا قبلت ورخصتني البنية اني رايدها ..

_ لا بوية شالقضية انت مدام البنية هاويها ورايدها توكل على الله بالاخير انت راح تتزوجها مراح تتزوج اهلها ..

تسلم عمو وكام باسه من راسه ، طلعنا من بيت عمي وكلمن راح لبيته ..

زهراء .. الايام الي بعدها بديت اجهز للعرس .. ماما جانت تعبانة وخالة هواي زحمتها وجنت محتاجة اكمل شغلاتي ماما كالت اخذي عبير وروحي للاعظمية اشتري ملابس ..

اخذتها ورحنا ، دخلنا لمحل الملابس الداخليه
بي جانبين اكو جانب بي ولد واكو بنات رحت على الجانب الي بي بنية و اختاريت كم قطعه..
من دااريد ادفع الحساب رحت على البنية
كالت لا مو يمي يم الولد..

رحت للولد اخذ مني العلاكة وظل يطلع بالملابس
كل قطعة يطلعها يباوعلي ويضحك...

اني وعبير ظلينا نباوع بعيون بعض منقرفين من تصرفه !! خزرته عبير وحجت ويا بحدية ؛- خير عيني شبيك تباوع ؟

بابتسامة جاوبهه :- لابس شو القياس احس مو ع صدرها لازم تاخذ شي جبير لان مبين عروس و وراها زواج....

صارت عيونه مفتوحة على اوسعها من جرأته ، يمكن لان شافنا صغار بالعمر ووحدنا ماويانا شخص كبير عباله احنا هينات مديدري بعبير بساعة الساعة تكلب المحل على راسه ..

وفعلا شالت الملابس وطشتهم على راسه المكعبر
وصيحت عليه ؛- هاك البسهم انت وشوفهم يكيفون صدرك لولا ؟ لان الظاهر انت حالك حالنا بس متنكر ياعديم الاخلاق....

بقى الولد مصدوم وياخذ بالملابس الداخلية ويوخرهن من راسه وشي وكع على كتفه ..
جرتني وطلعنا خارج المحل ..

كتلها واني اضحك ؛- ولج عززززا بعينج شسويتي انتي؟
_لا والله واكف يحجي بصدرج واني ابقى ساكته
انعل ابوه لابو شرفه امشي نشوف غير محل وخلي ياخذ عبرة من الي صارله ليظل يتجاوز ويباوع على بنات الناس وعباله الكل مثل بعض...

رحنا لغير محل واشتريت وهي اشترت
تراك الها ولمريم ... وكفنا دناخذ تكسي
كتلها ولج اخاف من التكسي اني امشي ناخذ فورتات احسن ..
صعدنا فورتات وقريب دنوصل لمنطقتنا حسيت ايد نخلت على كتفي ، باوعت واشوف ولد ، خزرته ولا يمه
غمزلي وكال : هذا رقمي خابريني ماشي ..

ظل فاتح حلكه مبتسم ويغمز ، استفزني كلش اريده يوخر ايده ماكو معلكهه بالكشن الي اني كاعدة عليه نزعت حذائي ومااهتميت للمكان الي اني بي وضربته ع راسه وظليت اعيط

_انت تعرف انيييي منووو شلون تتحرش بيه ادبسز ماعندك اخوات انت ؟

كبت العيطة بالسيارة ظلو يحجون عليه طيحو حظ حظه العبرية ..
السيارة تمشي من خوفه فتح الباب وكمز ...

انتبهت على عبير مالها صوت درت وجهي باوعتلها لكيتها
خربانه ضحك عكدت حاجبي وخزرتها
دنكنا وسكتنا لان كلش خجلنا من الناس ظلت تباوع علينا ويحجون ابيناتهم..

من نزلنا بمنطقتنا بعدها عبير الضحكة مافاركتها
_ولج زهراء انصدمت صايرة قوية شكد فرحت
تحجي وخربانة ضحك ..

_ثول فوك مترزلي ويايه تضحكين وينها سباعيتج

_يا حبيبه وين صارلي مجال انتي انهديتي بالولد
حتى ظليت مصدومه كلت هاي اختي لو لا اني متوهمة .
.

غميتها ؛- كبر خبله والله متصيرلج جارة
طكتها ضحكة ..
وصلنا للبيت وعبير راحت تغرد لماما كل الي صار ويانا وما اسمع بس صوت ضحك ماما وتكوللها خبلة لو تموتين متعقلين ..

ثاني يوم خابرني صفاء يسأل
كتله رحت حجزت صالون واليوم اروح اجر بدلة ..
_ لا لتأجرين اشتريها شنو كم مرة متزوجه انتي واني اليوم العصر اخذج نروح لمحل بي بدلات كلش حلوة ..

حبيت اهتمامه من هاي الناحية والعصر بدلت ورحت ويا دخلنا للمحل باوعت للبدلات تجننن ظليت حايرة شنو اختار...

اجه وتدنى يمي كال هاا صار نص ساعة اشو مختاريتي معجبنج ؟ نروح محل لاخ ؟

باوعت عليه مذهولة ورجعت اباوع ع البدلات وجاوبته
_ لا بس محتارة كلش كلهم حلوات الصراحة مجاي اكدر اختار ..

راح ظل يقلب بالبدلات ، وكف يم وحدة كولش منفوشه وردن بس بيها دلعه ونص الظهر
يطلع ... ظليت اني همين اباوع ع البدلة ورة ثواني انطيته رأيّ
_صفاء هي حلوة بس ممستورة
_وشنو يعني انتوا بس نسوان محد يشوفج
باوعتله جان يضحك عبالك عرف ليش اباوعله

همسلي :واني هم بس اني يعني زوجج يحجي
ويبتسم
نصيت راسي راح حجه ويا البنية ع البدله واتفقوا
ع السعر

طلعنا رحنا للمول وصلنا يم محل ملابس نوم
اشرلي براسه بمعنى ادخلي

استحيت منه كلش وظل اعض بشفتي وجاوبته
_لالا اشتريت اني صفاء وين وين ادخل وياك
_هاي شبيج ترى اول وتالي حشوفهم عليج لو
انتي تريدين بدون ملابس وعوج حلكه مبتسم ويغمز

انصدمت من جرأته اول مرة يتجرأ هيجي ويايه
خزرته ومشيت بعيد عنه ...

دا امشي اجه ورايه يحجي بصوت
ناصي : ولج زهراء خررررب يومج تعالي دااحجي
وياج...

مهتميت لكلامه ، بسرعه طلعت ورحت للكراج اجه ورايه بس محجه شي جان معصب فتحلي الباب صعدت وسداه وركعه حيل فزيت من مكاني وخليت ايدي على قلبي ...

فات هو للسيارة تقرب مني كال انوب من اصيحج تجين تجاوبين مفهووم ؟

درت وجهي عنه صوب الجامة ومجاوبته ، دغني بيدي قوي كال بحدية ؛- دا احاجيج اني جاوبي ولتغلسين ..

جاوبته واني لازمة ايدي الي دغها وافرك بيها
لان طخني بقسوة ؛- اي اي خوش بس بعد لتحرجني ...

_ وهاي مابيها احراج لاتبنين حواجز بيناتنا انتبهي لتصرفاتج ..

_ شبيها تصرفاتي بلله ؟
_ لا مابيها شي سلامتج ، اصيح عليج بنص الشارع متجين عايفتني ومخليتني وراج وطالعة كبل شيسموها هاي بلله ؟ ..

جاوبته بتلكأ_ ما مما سمعتك ..
_ جذابة سمعتي
_ مو جذابة ، يله وديني للبيت ..
_ اكيد راح اوديج قابل راح اخطفج ..
تبادلنا النظرات هو مخنزر واني اباوعله متوترة..

سكتت عنه وهو حرك السيارة وطول الطريق ساكتين وبس صوت انفاسنا تطلع بانزعاج..

بيوم الحنة لبست اول بدلة لون ماروني وشعري سويته ويفي (مموج) مفتوح واكسسوار بسيط
ورحنا للقاعة ..

الكل جان حاضر ، نزلوني اركص ، حسيت السعادة غامرة قلبي ، وصلت للاريده واخذت الي احبه ومايفصلني عن انو اصير ملكه غير يوم واحد ..

ركصنا اني ومريم وبنات خالاتي وصديقاتي والبنات كلها ، عبير وماما جانو ملتهيات بالتوزيع ..

شويه وكالوا اجه العريس حتى يحني العروس
رجعت لمكاني و احس الدنيا متوسعني من الفرح
شفته دخل باوعتله ، حبيبي خجول رغم هو وكح وجريئ بس هسه مبين خجلان استقلبوا عماتي وخالاته ...

ظلن يهلهلن يمه ويبوسن بي ، زاحمنه كلش كوة وصل يمي ، كعد بصفي وجابوله الحنة وظل يحني ايدي
وارتسمت على ملامحي ابتسامة مشرقة ..

تالي طلع واستمرت الحفلة ، لبست ٤ بدلات ذهبي وسمائي واحمر ، حتى تعبت من الركص الوناسة طلعت من خشمي ..

رجعنا للبيت سبحت ونمت ..
ثاني اليوم العرس كعدت ع صوت هلاهل مجنت
مصدكه هالهلاهل تخصني طلعت من الغرفه مبتسمة رحت للصالة ، ماما من شافتني انهزمت
حبيبتي عرفتها جانت تبجي وماتريدني اشوف دموعها . ..

رحت وراها وحضنتها من وره وخليت راسي على ضهرها هيه لزمت ايديه قوي ودموعها بللت بشرتي ..
صرت ابجي وياها ، درتها عليه احتضنت وجهه بكفوف ايدي واباوع الها ؛- ماما اني يمج وين رايحة هنا قريلة عليج ..

اخذتني لحضنها حسيت نفسي طفلة ، ظلت تهمس
_ الله يسعدج ......

اخذتني خالتي للصالون سويت التسريحة والمكياج ولبست البدلة ، الظهر اجوي عليه عمه وصفاء وماما واخواتي ، رحنا سوينه جلسة تصوير وبعدين للقاعة ...

بلشت مراسيم العرس بس جنت احسه ضايج ويباوعلي بحيرة ، ومن تتقابل عيوني وعيونه يتصنع الابتسامة ، تمنيت اعرف شنو الي يدور براسه بهاي اللحظة ..

خلص العرس وزفونا للبيت لان بابا مقبل نروح فندق خاف عليه ..

زفوني للغرفه وراهه دخل صفاء
باوعتله حسيت بي متضايق ..
واني كاعدة ع السرير بالبدلة وبس اباوعله ..

اجه وساعدني انزع البدله وراها فتحلي
التسريحه ...

كل يله خلي نصلي ، كمت وراه هو توضى واني هم توضيت وصلينا ...

جابو العشى وكعدنا نتعشى بس احنا الاثنين ساكتين اباوع بعيونه ويباوعلي اشوف بيهم هواي كلام اتمنى اعرفه ..

خلصنا وكمنا رحت غسلت وفرشت اسناني ورجعت للغرفة ، فتت لكيته كاعد ع السرير ، باوعتله ونصيت كال تعالي زهراء تعالي ..

تقدمت باتجاهه ببطئ وكعدت يمه وعيوني للامام اباوع ايديه بحضني ومشبكة اصابعي واضغط عليهن ..

اجاني صوته هادئ وحسيت بي غصة ومرارة ..
_زهراء انطيني مدة اتعود على وجودج يمي
وبعدها ان شاءالله يصير خير اما هسه مااكدر اتقرب منج ، واذا تحبين حتى ماانام وياج نفس الغرفه خاف
يزعجج وجودي....

انصعقت من كلامه ، حسيت سهم اخترق قلبي
طرفت عيوني من فرط الصدمة والذهول...
لساني تجمد بحلكي والكلام مات بحنجرتي ومكدرت حتى انطق كلمة او حتى اهز راسي ، استسلمْتُ لسكونٍ عميقٍ عرفْت انو اني مجاي أحلم ، هذه يقظة ، وهاي الحقيقة ..

سمعت صوت اشبه بتنهيدة صادقة صادرة من قلبه
رفع رجليه عن الكاع ومددهن ع السرير ، واني ولا حتى نفس احس تجمدت بمكاني ، وعيوني تحركني الدمع مايهله ينزل ...

ثواني حسيت ايده تحط على كتفي ، ويحجي يم اذني بنبرة صارمة...
_ اي شي يصير هنا بغرفتنا ماريده يطلع من هاي الغرفة وحتى هذا الموضوع الي كتلج عليه خليه بيناتنا
واذا سألوج وخاصة امي كوليلها كلشي تم احسن ماريد احد يتدخل بيناتنا وانت مو زغيرة جبيرة وتفهمين عليه تمام ؟؟

مجاوبته بقيت صافنة ثانية وحدة بلعت لعابي بدون صوت وهزيت راسي موافقة ..
كال :- تمام اتفقنا وهسه تصبحين على خير اني راح انام وانت هم نامي لتظلين كاعدة اكيد اليوم تعبتي ..

مااعرف شون طلع صوتي وهمست هسه حنام بس شويه ..
كال ؛- طفي الضوة اذا خلصتي ..
جاوبته بغصة ؛- خوش ..

رحت للمراية وهو دار وجهه ونام ، باوعتله ثواني جانت امنيتي ادس راسي بصدره واحس بالدفئ والامان حتى لو ماكو خطر يهددني بس احس بدفو صدره ...

باوعتله واحتدمت المشاعر بيه حسيت انو اني احبه بس ما اريده تعبت من هذا الحب صعب هذا الشعور ما اعرف شلون يجتمع شعور الحب والكره بنفس القلب
....

مسحت دموعي الي تجمعت على خدي
ورحت اباوع ثواني شون راح انام بصفه
كبريائي ميسمح الي ابد ..

جريت مخدة وشمرتها ع الكاع ، فتحت الكنتور شفت لحافات جديدة بجنطه اخذت واحد شمرته ع الكاع
واخذت بطانية وتمددت ع الارض ، باوعتله شوية ورجعت خليت راسي ع المخدة ، يمكن لو غامرني بضمة لصدره او حضنة جان عوضني عن كلشي ، دا اطلب قربه لاني احبه مو عمود اي شي ثاني .

نمت بعد صراع مع الم الخيبة المبرح نمت ...
والالم يغمرني والحزن مغركني ....

يتبع .....
نهاية الجزء الاول ...

اعتذر على التأخير ، حقكم عليه ...

الفديو تغشيش لاحداث راح تصير بالجزء الثاني
فهل ياترى سيبقى الحب القديم يطارد صفاء ام سيتخلص منه ؟

الفديو تصميم عبير حسناوي AbeerAL_Hussnawy

طلب دعاء للاخت خطية محتاجة دعائكم 😔ماشُرِع زواج المثنى والثلاث والرباع لهدم الاسرة الواحدة مستحيل 😔شون ديتصرفون الرجال بمجتمعنا والله ماادري 😔ادعولها فدوة حتى لو بقلبكم

الى اللقاء 😘😘😘😘😘