رواية شريعة العشق الفصل الحادي وثلاثون 31 - بقلم نورا ناصر

شريعة العشق
بارت ٢٨
نورا ناصر

أخذني أحتاجلك منفى ، أخذني
  الوطن مو كلشي أذا مو شابگك
  وأغفى."

عبير: خابرتني مها دتسأل عن صحتي .. وكالت راح نجيج اني وكرار نشوفج ..
كتلها هلا بيكم يمته متجون البيت بيتكم ..

خلصنا حجي ودنسد المكالمة بس هيه بقت مفتوحة واجاني صوت زوجة اخوها لمها تعلعل وتصيح بحيث وصل صوتها لعندي مسموع وبشكل واضح فضول خلاني اسمع كل كلامها ..  ..

هي هاي عبير نفسها بنت عم المخنث الي خطبج؟

اجاني صوت مها تحجي وياها بخوف : اي هاي عبير

جاوبتها : مبينه ارخص من الرخص ماطول قبلت ع صديقته ترتبط بأبن عمها وبعدين اذا هي هيج شكو مااجت بخطوبتكم معناها عدها شي ويمكن تحب خطيبج شتترجين من وحده امها مدرسة اكثر وقتها دايحه

هي من حجت عني مهتميت بس من حجت ع امي تخبلت وتعصبت حيل ...عيوني نطن من العصبيه ..

ظليت اصيح الو الو ماكو مها متسمعني ودتحجي ويا زوجة اخوها ..

كمت سديت المكالمة واتصلت مرة ثانيه ..

جاوبتني مها الو ها عبير ..

نترت بعصبية ؛  بيها مها  مها زوجة اخوج يمج بعدها؟

بتلعثم جاوبتني ها ؟ اي اي يمي ليش دتسألين؟

عيطت عليها :  فتحي سبيكر وسمعيها الكلام الي راح اكوله ..

مها بتعجب : ليش عبير خو ما سمعتيها تحجي ؟
معليج بيها .. فدوه

اشو حسيت التليفون انخمط من ايد مها  واجاني صوت ذيج الثانيه الي اسمها هند .. شكووو ؟ اشو مها تباوع عليه بعدم رضى الظاهر تردين تحاجيني احجي اسمعج عيني ..

جاوبتها بعصبيه : اي اريدج تسمعين هالكلام وتخلينه ترجيه بأذنج أسمعي لج فاقد الشي لايعطيه وانتي فاقدة الاخلاق فلا تكعدين تبيعهن برأسي وبرأس ماما
هاي شغله ...

والشغله الاهم أني لو أريد كرار مثل
متكولين جان اني وهو هسه مو بس مخطوبين لا
جان حتى عدنا طفل افتهمتي لولا بس أنتي وحده
ناقصة اخلاق هواي يرادلج اخلاق يلا ترتقين لصنف البشر ، حالياً انتي بصنف البهائم

وغلقت الخط بوجهن ظليت ادردم وحدي ،
لعبت نفسي مستحيل مها
تكون هيج جبانه تكدر تردها مو صعبه مو صعبة
أبد شلون تسمحلها تحجي ع ماما حتى لو تتجنب
المشاكل تكدر تكول لأمها او لابوها مو حاله هاي ابد .

سمعت صوت ماما دتصيحني من جوه ، جريت نفس بعمق ونزلت جوه اركض واجاوبها .

                               ****

كرار: بعد مخابرة مها الي ماافتهمت منها شي بس
جانت تحجي ع عبير ومقبلت نروح نشوفها ، كمت بدلت و رحت للمحل بس بالي يمها ، طلعت تليفوني  اتصلت بيها جاوبتني وجانت شويه اهدأ ..

شكو مها احجيلي شبيج شبيها عبير؟

_رزلت زوجة اخويه وهي تعرفها كولش زين وحده
حقيرة وتتمنالي السوء وهاي كامت كالت لاخويه
وضربني ..  ورجعت تحجي تبجي

نار شبت بيه من عرفت أخوها الناقص ضاربها
حجيت بهدوء عكس الغضب البداخلي : واخوج شنو مو من حقه يضربج منو انطاه الصلاحية ؟

اليوم اشعل عشيرته هالنغل الكلب الخايس سديت الخط بوجهه ورحت لاخوها لمحله هو من شافني رجع
ليورا..

الظاهر رعبته لان احس عيوني جمر واعصابي تجدح نار و هيج مبين عليه عصبي..

رحت عليه لزمته من ياخته وركعته كله..

وكع بالكاع دايخ ..

عيطت بوجهه بعصبيه وصياح  : شووووف لك  انت لو رجال متضرب اختك بس انته واحد عار ،  الاخ دائما يكون سند لاخته المفروض اني ااذيها وهي تلوذ بسدك مني مو تجي انت تضربهاااااا...

كام على حيله ، وظل يسب ويغلط بيه
ويصيح ماادخلك انته اختي اكتلها اموتها اذبحها معليك انته ..

لزمته من ركبته صاك على اسناني واحجي ..
لك تضربها مووو ؟ داشوووف شوون تضربها مرة ثانيه لزمته دميته طلعت كل غضب الي بداخلي بي ، اتذكر صوت مها وهيه تبجي وارجع اضربه..

ومو مهتم لضرباته جان كل ميضربني ارجع الضربه اله اضعاف ، ضربني ببطني ، ضربته على وجهه ، لويت ايده ودفرته وكع ع الكاع .

نزل يتأوه ويسب ويغلط بيه يريد يكووم من ع الكاع  باوعت ومهتميت للالم الي بيه شلت الكرسي وركعته ع ظهره..

دخلوا الناس عود  يفاككونا ظل يغلط
ويتوعد ويسب بيه ، فلتت نفسي من الكم واحد الي لازكيني ورجعت عليه ضربته جلاق .

كوة لزموني وطلعوني من يمه .. تركتهم اعدل بنفسي وامسح وجهي ،  خابرت مها جاوبتني حاجيتها وانفاسي متسارعة .

كلتلها اقفلي الباب عليج وابد لتطلعين لو تحترك الدنيا اني هسه جايكم ..

جاوبتني بقلق : شبيك حبيبي صوتك تعبان صار شي ؟

سدي هسه جايكم للبيت ومثل مكتلج سوي .. سديت المكالمة شغلت سيارتي اسوق واتنفس بسرعة فور دمي هالناقص .

وصلت  لبيت أهلها دكيت الباب  تلكاني ابوها
وجهه ثكيل الظاهر واصله خبر ..
سلمت عليه وكتله عمي من رخصتك عندي وياك موضوع مهم .

اشرلي وكال تفضل ، جتي ام مها واخوها الثاني
وهم كعدوا ..

بديت احجي وحجيت كل الي صار وكلام مرة اخوها الي جنت اسمعه من لمن اخابر مها جنت بوقتها اغلس بس هسه  مدام طعنت ببنت عمي ومرة عمي بالاضافه لهذا بسببها انضربت مها بعد ماكدر اسكت ولازم اخلي حد الها .

حجيت الهم انصدموا ، رجعت خابرت ع عمتي أم زهراء حجيت وياهه و وطلبت منها احجي ويا عبير..

محبيت اتصل ع جهاز عبير وهاي السز من غير شي طاعنه بعبير ..

جاوبتني عبير  طلبت منها تحجي الكلام الي كالته زوجة أبنهم عنها وعن عمتي وكل هالكلام بحضور ابنهم الثاني وابوهم وامهم ظل وجهم ينطي الوان وعمي ظل يعتذر... والله يا ابني اعتذر مااعرف بهذا الكلام ومها ماكالتلي .

_ عمي ياريت تخلي حد لهالمهزلة ومها ماريدها تنضرب بعد ترا اتصرف غير تصرف .

اخوها كال : لا هذا هو كرار اني اتصرف ولا يهمك .

امهم كامت تبجي وتعتذر : والله سود وجهي لو
ميت بالولادة ولا مخلفته انوب حتى زوجته مثله
ومثل اخلاقه اني شسويت وهيج يصير بيه .

بعدني كاعد يمهم ودخل وليد أبنهم هو شافني
لو تخبل بعده مواصلني وكام ابوه واخوه لزموه

_بالقرأن لو تجاوزت ع نسيبك وهو داخل بيتنا
بريئ منك منا ليوم القيامه

هو من حجه ابوه هيج تخبل ظل يغلط ويفشر
كل هذا ومشفت مها اخير شي من ردت اطلع
طلبت من عمي اشوفها صاحوها شويه واجتي
انكسرت أيده هذا شمسوي بيها زين ذوله البعران
وين جانوا من ضربها ؟ ظليت احجي بداخلي هيج .

باوعت وجهه عبارة عن خارطة عينها مورمه وخدها مزوركة تزورك كل هذا عمود زوجته ، لو بيدي ادفنه بيدي هيج يسوي بأخته ! عديم الرجولة يستقوي على اخته الي لا حول ولا قوة .

تباوعلي بنظرات كلها انكسار قهرتني وكسرت قلبي عليها ، قربت منها شاورتها لان ذوله كاعدين ولا اكواحساس عدهم ولا واحد منهم كام وتركنا وحدنا ولا عدم احترام للخصوصيه شويه

همست باذنها : حبيبي ديري بالج ع نفسج لان نفسج هي أني .

ابتسمتلي هي أبتسمت لو روحي ردت طفلتي النقية رجعت همستلها : عبير صديقتج تصالحوا
متسوا زعل اثنينجن حبابات لتخلين زوجة اخوج
تدخل بنصكم وتخرب علاقتكم .
هزت رأسها برضى وهمست صار  .

يله اني رايح محتاجه شي  ؟

هزت راسها وابتسامة مليانه الم على محياهه
همست بصوت مبحوح سلامتك دير بالك على نفسك .

انت هم ديري بالج نفسج هانت مابقى شي واخذج يمي اريحج من كل هذا العذاب .

باوعتلي و نظراتها تشع امل وكالت اي والله تعبت كرار
مايصير خاطرج اله طيب .

كمت على حيلي  سلمت عليهم وصيتهم على مها لا يأذيها هذا التافه ، هم اكدولي مراح يخلونه يأذيها بعد اتطمنت عليها سلمت وطلعت .

زهراء : بقيت بالحمام ايديه على إذني وصوت المي يعزلني عن سماع اصوات الي بره ، حسيت بالوحدة والحزن ، الوحدة ملتصقة بأيامي مثل الوشم ، والحزن يتملكني ويعتريني ويسكن كل خليه بيه ، وعيوني ماتنفك عن البجي والدمع ماينشف .

انوب كملتها سالفة رشا وهجومها عليه واكو شي غامض بالموضوع ، وصفاء ضامه عني ، لازم اكو سبب لعركتهم هو ورشا وهو ميقبل يكولي ، ومدام ميقبل يكول معناهه سبب العركة متعلق بيه اني .

كمت سديت المي واستغفر واتحسر ، سمعت صوت كزاز بره ، عرفت صفاء ديشيل بي ، قلبي نغزني خفت لايأذني نفسه واني اموت اذا يتأذى .

كمت فتحت الباب وطلعت ، شفته دينضف بالكزاز ، رفع راسه يباوعلي ظليت اباوعله بعمق ونظراتي تتحداه .

ظل يباوعلي ببراءة وابتسامة بطرف شفته ..
جريت نفس وكرفصت كباله .
ضحك كال شكو هالنظرة هاي ؟

كتله كوم اني انظفه ..

لا اني كسرته اني الي انظفه بس ليش دتباعين هيج ؟

عركتك ويا رشا اول ما اجت بسببي اعرف واكو شي انته ضامه عليه هم اعرف .

لزمني من معاصم ايدي وكومني ، بقى لازم ايد وحدة والايد الخ فلته ورفع ايده وخر خصلات شعر من على وجهي ، وظل يمسح حبات العرق الي تجمعت على جبيني برقه.

اباوعله بهيام وهو متجاهل نظراتي يباوع على شعري  ويسفط بي ويمسح العرك من على وجهي ويحجي : انسي الي صار اليوم وخليه ورا ظهرج .

داخلي يصرخ تعبت صفاء تعبتتتت ..

كمل هو كلامه واني ساكتة : حنسافر لدبي نبتعد شويه نتونس ونغير جو حترتاحين انت واني همين متأكد .

باوع لي درت وجهي منه ماريد يشوف نظراتي اله ..
تحسر ونزل ع الكاع ينظف الارض واني ساعدته ونزلنا جوا .

شافتني عمه صاحتني رحت كعدت يمها ..
ظلت تحجي بحنيه خو مزعلانه مني بنيتي .

بدون مااباوع عليها هزبت راسي بمعنى لا .

كالت هيه هاي رشا وسوالفها شنسويلها الظاهر معرفنا نربيها .

خليت ايدي على ابدي الثانيه واباوع صوب الباب واتحسر اجه عمو وهم نفس كلام عمه .
كال اعذريني ومسحيها بيه هاي رشا متتغير وتحب المشاكل تعبت واني اوجهه وانصحها وهاي شوفة عينج اليوم طردتها وراحت دمعتها على عينها واحنه نحبج وانت بنتنا وخابرت زوجها بعد متجي اذا تريد شي احنه نروح عليها .

هزيت راسي برضى ، وبداخلي اكول الله يعينه ع السعلوة الي عنده .

واتقرب موعد سفرنا أني وصفاء لدبي اجوا اهلي
بالليل سلموا عليه وودعتهم  بس عبير..
مااجت لان زعلانه من صفاء ..  

رحت دا اقدملهم ضيافه ، اجه ورايه للمطبخ
اكولج زهراء اشو عبير ماكو ويه اهلج خير ؟

باوعتله وابتسمت .. رفع حاجبه زعلانه مني عمود ذاك اليوم ويا رشا صح ؟

هزيت راسي وجاوبته اي هي اتصلت بيه تودعني وكالت متكدر تجي ويه اهلي لان زعلانه عليك..

كال تمام وطلعنا كعدنا يم اهلي شويه و  طلعوا
وراح صفاء وياهم .

صفاء رحت وياهم لكيتها بالحديقه جانت دتقرأ لان الدوام حيبدي وهي دتحضر رحت يمها
باوعتلي  ورجعت تقرأ متجاهلتني ..

حمحمت باوعتلي كالت ترى شفتك مو عميه

_اي ادري شفتيني متعرفين تسلمين ترى مو بس
أبن عمج نسيبج هم

ضحكت وهمست اي عاد شلون نسيب يتفلس ع
الباكله

نترت بيها: لجججججج شنو قصدج؟

همست ماقصدي شي ودنكت

_اشو مكلتي لعمي مو تحلفتي تكوليله ورفعتلها
تك حاجب

_ردت اخوف اختك
_همممممم يلا تعالي سلمي عليه باجر اسافر
وضكت
سلمت عليها وطلعت بنات عمي تحسين الهم معزة
خاصه عند كل ولد عمامي وهن مالهن اذية وحبابات حييل .

رجعت للبيت لكيت زهراء وأمي كاعدات ع التلفزيون ويركزن حب وخربانات ضحك  بس
شافني عدلن كعدتهن وسكتن ..

كعدت يمهن شكو ضحكوني وياكم ..
زهراء : بيناتنا اني وعمه ليش تصير فضولي ..

كرصتها بخدها ابتعدت عني متوجعه ..

كلتلهن تصبحون ع خير  وصعدت

زهراء: ثاني يوم موعد السفر كعدت الفجر صليت
وحضرت نفسي ورايه كعد صفاء باوعلي مغثوث..

تمططت وكال ليش مكعدتيني؟؟ ...

سكتت مجاوبته ..  ظل يدردم لان مغلسه كام
كمل تبديل واجه باتجاهي اني مخلصة كال حضرتي كل شي وخليتي بالجنط هذا هو انزلهن ؟

همست اي هذا هو نزلهن ..

اخذ  الجنط يريد ينزل قبل لينزل كلتله الريوك جاهز عود اتريك ..

باوعلي معصب ومجاوبني ..

نزلت وراه مقبل يتريك خابر على  عمو حسين اخوه الجبير (اني اكوله عمو رغم هو ابن عمي لان هو جبير)    خابره صفاء كاله خلصنا تكدر تجي ..
ودعت عمه وعمو وطلعنا بالكراج ، سمعت صوت هورن وطلعنا وصلنا للمطار ، انتظرنا تقريب ٣ ساعات يلا طرنا لدبي ..

عبير: صاحتني ماما نزلت اركض ، صوتها ديجي من المطبخ ، رحتلها ها ماما ردتي شي ؟

بنتي هذا اكل ودي لبيت عمتج هناء خطيه توهم كاعدين جديد هنانه وديرتبون بيتهم خاف متلحك تسوي اكل .

اي ماما صار هسه اودي ..

اخذي مريم وياج هم تساعدج .

تمام ماما هسه اصيح الها ..

اخذت مريم ورحت لبيت عمتي بعد شارع واحد عنه وهاي عمتي كلش حبابه وقريبه لماما .

دكيت لباب طلع ابن عمتي قسور فتحه .

اول ماشافنه ابتسم واخذ الجدورة من ايدي
سلمت وكال تفضلوا جوه .

طبينه للاستقبال اشرلنا نكعد كال هسه اصيح امي
هزيت راسي وهو باوعلي بنظرة تفحص وابتسامة .
حسيت بعيونه نظرات اعجاب .

خجلت ودنكت وقلبي تسارعت نبضاته ، مريم بصفي همست : شبيه هيج يباوعلج ؟

بلعت ريك وقوست شفايفي وهزيت اكتافي بمعنى ماادري .

ورا شويه اجت عمه ووياهه بنتها ايناس بعمري تقريبا ..
جتي سلمنا عليها ، كالت ليش كلفت نفسها امج ..
كتلها لا عمه واجبنه هذا واجب نساعدكم .

باوعت على قسور واكف يسوي بالكهرباء وعينه عليه .
كمنا ساعدناهم شويه ونظرات قسور عليه بس ابد ما ضوجني بتصرف بس نظراته احسها لا اراديه .

قسور مرحلة ثانيه كليه ، بشرته حنطاويه مائله للبياض
وعيونه عسليه  مسحوبة وعبالك مكحله ، شعره ثخيين ولونه جوزي ، جسمه متروس وطويل ، صوته خشششن حيل .

حاولت قدر الامكان اتجاهل نظراته بالاخير انزعجت وصرت اتهرب منه ، صار المغرب اصر يوصلنا ، طلع ويانه مشينه بقى يسولف ومريم تجاوبه واني امشي قبلهم وساكته .

اخر شي سمعته يكول عبير عبير مو دا احجي وياج ؟

التفتت عليه اسفه ممنتبهة ..

ضحك وين بالج ..

ع الطريق غير .

كال ياصف رحتي ؟

رابع ادبي ان شاءالله .

كال الله يوفقج .. ووصلنا للبيت دخل سلم على ماما وطلع .

وراها بأيام ماما طبخت بثواب ضياء ابن خالتي الله يرحمه وهم دزتني على بيتهم اخذت الاكل ورحت .وجان وقت ظهر .. 
دكيت الباب طلعتلي عمتي بجادر الصلاة سلمت عليها وانطيتها الاكل . اريد اروح مقبلت كالت .
وين حبيبتي مسويه دولمه ع ضلوع من هاي التحبيها ومحد هنا بس قسور وانوسه اتغدي و روحي

_لا خاله ماما تنتظرني واني هم بعدني ممصلية
بالعافيه

كالت: هسه اخابر أمج دفوتي يا أمي .

دخلت وهي راحت خابرت ماما وانطتها علم أنو
اني حتغدأ يمهم
كلتلها خاله أريد اصلي
_اي ماما اصعدي يم ايناس صلي

رحت توضيت بالمغسلة وصعدت بعدني بالممر الفوك انفتحت باب وحدة من الغرف وطلع منها قسور .

جان لابس كيمونه سودة وتراكسود اسود بي خطوط حمر ، شعره منكوش شويه عبالك جان نايم وعيونه هم منعسة .

وكفت بمكاني وهو  بس شافني اجه يمشي بلهفه
سلم عليه شلونج عبير ..
جاوبته هلاو قسور اني زينه .

كال وبعده مبتسم  : اكول اليوم البيت منور شعجب منج من الشيطان جايه يمنا؟

_ ماما دزتني وبعدين اني مصار كم يوم من جيت يمكم همينه .

وكف يحك راسه نسيت شوكت هاي ؟

انت فاقد الذاكرة هستوك كاعد من النوم واني هم متوضيه اريد اروح اصلي .

ضحك اي والله توه كاعد يله روحي صلي .

داريد اروح رجع صاحني جاوبته بامتعاض نعم قسور .

باقيه ع الغده ويانه ؟

اي ان شاءالله حتغدا يمكم .

ابتسم وكال هلا والله .

عفته ورحت يم ايناس . دخلت سلمت عليها فرحت بيه لان وحدها وضايجه ، صليت وكملت وبعدها صاحتنا عمه ع الغده

نزلت كعدنا ع السفرة  قسور كال يا حي الله عبووورة اليوم منورتنا .

باوعتله ابتسمت تسلم .

ظل يجيب ويخلي أكل كدامي .

كتله كافي قسور والله مراح اكله هذا كله .

عمه كلتله: كافي أمي اترك البنية براحتها .

كال قابل شمسويلها اني فوك ما دااداريها .
كالتله خاف تضوج وبعد متجينه .

كال مدام هيج خلص مراح اضوجج عبير .

باوعتله ابتسمت بطرف شفتي وكملت اكل .

كملت غدا وساعدت ايناس بغسل المواعين كعدنا
شويه نسولف ونضحك بعدين اترخصت دااروح

قسور كال : أني اوصلج .
جاوبته لا اني اروح والله لتعب نفسك .
_ لا ابد ماكو تعب بالعكس .
عمه كالتله دير بالك عليها يووم .
جاولها لاتوصين حريص وطلعنا .
اجه ويايه ..

مشيت قبله اتهرب من نظراته الي يوجهه اليه باعجاب كال عبير وين شاردة ؟

باوعتله بدون مااخلي عيني  بعينه وابتسمت ابتسامة جانبيه تداري خجلي : متعودة امشي سريع .

هو جان يريد امشي بصفه وعلى كيف ماعرف شنو اباله بس دااحسه متردد .

وصلنه لبيتنه فتحت النه ماما الباب سلم عليها .

باوعلي وكال هاي الامانه وصلت .
وبعدها نفسها نظراته .

تشكرت امي منه  وراح بعد ماباوعلي نظرة اخيرة .

ماما انتبهت لنظراته دخلنه للبيت اجت يمي ظلت تباوعلي

_بنتي قسور أبتعدي عنه اوك ماما

_اوك بس ليش؟
_الولد عينه عليج افتهمت هالشي من نظراته الج
واني أعرف بيج رعنه ومتأكده تجرحي

باوعتلها بثقة : بس أني ممنطيته مجال هو لزكه روحي
أنتي كوليله هذا الحجي ليش دتحجي يمي

_نصي صوتج ولجججج وع أي اساس اروح اكوله
هذا الحجي تريدين احرجه للولد اشو انتي مدري
شلون تفكرين

_أي يا ماما اني لا اريده ولا شي وحتى بيت عمتي هم بعد مااوصللهم ها هيج تمام ؟ بعد لتدزيني الهم احسن حل

رفعت حاجبها ، هزت بيدها وراحت .. بعدها ماما ابد مادزتني لبيت عمتي . ومرت الايام

فديوم جنت نايمه كعدت على صوت موبايلي  يدك باوعت بالشاشه شفته رقم غريب!

مجاوبت رجعت داانام رجع اتصل كلت خلي أشوف منو هذا الي ديلح ! لزمت الموبايل وفتحت خط ..

صحت الوو الووو محد يجاوب بس   صوت نفس ذكوري متردد  كوة ديحجي حجيت وياه ردت أعرف منو ، بتهديد وعصبيه :  احجي انته منوو؟ لا ترا هسه اسده والله !

بعد تهديدي جاوبني:  عبير أني .......

يتبع ...

شبيه قسور ☺