رواية شريعة العشق الفصل السادس والعشرون 26 - بقلم نورا ناصر

#شريعة_العشق
نورا ناصر
بارت ٢٣

في شريعة العشق ....
سأحدثك عن مقدساتي الخمس..
عيناك ... بسمة شفتاك... دفء حضنك...عشقك....
و خامسها انت و كل ما فيك وحولك....

مديت ايدي لوجهي افركه بكسل اريد اصحصح شويه ، البارحة مانمت زين ابد بقيت اتقلب بفراشي فتحت عيوني مرغمة ، وبنفس الوقت اتمنى انسى الي صار البارحة بس مادا اكدر انسى ، ولو شميصير مراح انسى .

عبالك كلماته بعدهه ترن بأذني وعبالك ديكولها الي
بكل لحظة وثانيه .. وهالشي يعذبني ويدمرني ..

هدوء مو طبيعي بالبيت لان فرغوا النا ، عود عرسان جدد عشتوا وحتى ناخذ راحته ، حسيت بنفسي وحيدة لابعد الحدود واعصابي متوترة شويه ، ظليت متمدده بفراشي مكمت لحظات واني استوعب وين جنت ووين صرت ؟ وشون راح اتأقلم وشسوي
كومة افكار اقتحمن مخيلتي بنفس اللحظة ..

جريت نفس بضيق وألم ، رفعت رأسي باوعت ع السرير ، شفت صفاء نايم على بطنه وباقي بس بالبجامه...

درت وجهي حسيت هالانسان غريب عني
أني شورطت نفسي اذا اول يوم خلص هيج
شلون حتخلص بقية الايام وياه ؟

التفتت عليه مرة ثانيه ، صفنت لحظات واني اباوع اله فكرت بألف شغلة بهاي اللحظة ، حلفت يمين واني بعدني عروس الا اندمه على الي سواه بيه ، سهلة يتدلل اني مو زهراء الي جانت تستجدي النظره منه
لا اني بنت اليوم مو بنت البارحة الي انكسرت بيها..

حسيت بي ظل يحوس وبدا يكح بعدت نظري منه ، ورجعت للفراش ، مديت ايدي فوك راسي سحبت الفون مالتي ..

باوعت للساعه ٩ ونص ، بعده الموبايل بيدي
ظل يرن باوعت للشاشة اشوف ماما تتصل
ياترى دتحسين بألم بنتج يا ماما بهاللحظة لو لا ؟

تنهدت اريد اسحب الغصة الجاثمة على صدري
ماريد ماما تحس انو اني موجوعة ، فتحت خط
سلمت عليه و باركتلي
_ ماما زهراء نكدر نجي هسه ؟

جاوبتها: ماما هسه كعدت بس خلي اكوم من الفراش ..
_خوش ماماتي لعد فد ساعه واجي اجيبلكم الريوك
_ماشي ماما حكوم هسه ..

سديت الخط من ماما سمعت صوت صفاء
حمحم وحجه بصوت نعسان: صباح الخير

ماردت يبين عليه انو اني متأثرة بسبب ليلة البارحة
بس غصب عني جاوبته ببرود وبدون ما اباوع اله
: صباح النور ...

كام من الفراش بكسل و راح للحمام الي بداخل الغرفه سمعت صوت المي ينزل من الدوش ... كمت لملمت الغرفه وطلعتلي دراعة بيضه حضرتها وخليتها ع السرير ..

طلع ظل يباوع عباله محضرة اله ملابس
من شاف ماكو ، راح هو طلعهم ..

اخذت البرنص و دخلت للحمام سبحت وفرشت اسناني ، طلعت لكيته مموجود بالغرفه .. بدلت ...
توجهت للميز تواليت نشفت شعري وسشورته وسويته برم .. مكيجت وجهي .. واني على هذا الحال ..
سمعت صوت ماما جوا هي وعمه استمريت اكمل مكياجي ..

بعدني واكفة كبال الميز ، انفتحت الباب ودخل صفاء
باوعلي ثواني واني مشغولة ارتب نفسي
تجاهلته لحظات ، حسيته ديباوع عليه بتركيز
باوعتله ببرود .. والمعنى شنو تريد ؟

هو كال : اذا كملتي يلا تعالي انزلي يريدون
يسلمون عليج حتى يرحون ..

خليت الاغراض الي بأيدي ع الميز واني ساكته مانطقت ولا حرف ..

هو تقدم باتجاهي لزمني من اكتافي ودارني عليه
حسيت بالاثارة للحظات ، تنفست بعمق وتصلب جسمي حاولت كبت الاحساس ، رفعت راسي اباوع بوجهه بمرارة ..
رفع حاجبه وكال : مثل موصيتج البارحه
وشدد ع كلامه ..

باوعتله بطرف عيني وخرت ايديه من على اكتافي وحجيت بقلبي : هه هذا هم مصدك بنفسه
انتظر اذا ما اخلي هاي عجرفتك عدم ادلل ..

كام اخذ خصلات شعري النازلة على صدري
وخلاهن وره اكتافي .. كال بنبرة اقناع ..
_ زهراء انت مزعلانه مني صح ؟

باوعتله وهزيت راسي بمعنى لا ..

كال احجي لتبقين ساكتة .. مايعجبني سكوتج ابد والي دا اسوي اني علمودج ترا

تمتمت : ماكو شي ينحجي صفاء اني مقدرة موقفك خلص لتظل تلح ..

كح وكال : .. انت بنت عمي واني صدكي احبج وراح ادللج بس محتاج وقت .. واي شي يصير بهاي الغرفة حيبقى وميطلع هيج اريدج ..

باوعتله بعدم تصديق وركزت بنظرات عيونه بتحدي..
حجيت بداخلي : كذاب انتَ ماتحبني انما تحب حبي الك وعلى هالاساس تقدمت الي وخطبتني ..
تمنيت اكول هذا الكلام بوجهه بس ماكدرت لا يكول اني مهتمة اله .. خلي مفكر انو هو اخر همي ..

_ اعرف واني مو طفلة حتى كلساع توصيني مو على مودك بس علمود ماما وبابا ماريد اشغلهم وبالاخير هو هذا اختياري محد جبرني عليه ..

تنهد وبقى ساكت ..

رجعت اني اكمل مكياج ، اخذ الفرجه من ايدي وخلاها على الميز كال كافي عاد ترا صرتي حلوة ... ورجع دارني عليه وكرصني من خدي ..

خليت ايدي على خدي افرك مكان الكرصة وتركته بدون اجابة ونزلت شفت ماما حسيت اني محتاجه حضنها مع انو البارحه اني مفاركتها حضنتها وكمت ابجي اني ماحجيت بس دموعي حجت كل شي ..

رفعت راسي تباوع بوجهي وهيه مستغربة ..
همستلي: شبيج ماما مو هذا اليوم الجنتي تتمني
وهياتج تزوجتي الي تحبي شبيج يوم لتخوفيني
عليج زهراء ؟

ظليت اباوع الها وامسح بدموعي سلمت على عمه وبوستها ، عمه كالت شبيج داده ام زهراء مابيها شي جنهه العافية ..

همست اني
: بلي ماما بس اشتاقيتلج ..

التفتت صفاء ايده بجيبه ومضيق عينه يباوعلي

ماما ضحكت: نزول عليج يوم عبالي بيج شي هياتني يمج شوكت متريدين تعالي اكيد صفاء
ميمنعج مو صفاوي؟

ظل يحمحم : لا عمه شلون امنعها هذا حقها شوكت متحب تروحلكم براحتها ..

_ اي بعد علويش هالبجي يا امي ..

تنفست بعمق : ماكو شي والله ماما ..

بعدها كعدنا تريكنا وخلصنا ، طلعنه من المطبخ
ماما كالت تعالي زهراء واخذتني ع جهه
باوعت شفت عيون صفاء جانت محاوطتني يباوع علينا من بعيد ..

درت وجهي منه وبقيت يم ماما وهيه ظلت
توصيني كالت ديري بالج ع صفاء وع نفسج .. وصتني اهتم بنظافتي الشخصية ..
بوستني حضنتها حييل عبالك بس افرغ قهري بهالحضن الدافي ..

يلله ماما اني اروح مثل موصيتج تمام ..
عدلت شعري بيدها .. هزيت راسي بمعنى اي ..
وطلعت راقبتها حد ما راحت ..

وراها جتي عمه جانت يم صفاء بوستني
وكالت ديري بالج على نفسج وعلى زوجج بنتي ولو انت حبابه متتوصين فدوة لهلخلقه اخذوا راحتكم بالبيت تمام ..
هزيت راسي وهمست ان شاءالله عمه
طلعت وسديت الباب وراهه ..

رجعت دااصعد حسيت احد
ديمشي سريع ورايه عرفته هو ماللتفت وكملت طريقي ..

اجاني صوته يحجي بشك : أمج شرادت منج؟

التفتت عليه باوعتله لحظة ودرت وجهي قبل لا اجاوبه واني اصعد ع البايات ببرود حجيت : مرادت شي بس وصتني وراحت ليش تسأل؟

_ماكو شي روحي بدلي هذا ثوبج من يمي اختنكت منه ثكيل شدعوه عليج ..

التفتت عليه تنهدت وتركته واني صدك اختنكت من الدراعة ..فتت للغرفة قفلت الباب و نزعتها
طلعتلي دشداشة خفيفه ولبستها ..

رفعت شعري و نزلت خصل منه اباوع لنفسي
كلش لايكلي شعري ميش ثلجي يعكس على لون عيوني ورغم الحزن واضح بنظراتي لكن منطيني منظر كلش حلو .. تنهدت اتمنى اكدر اخفي هذا الحزن ومو هاي صباحية العرس الي جنت اتمناهه ابد بس شسوي هذا نصيبي ماكدر اغير بي شي ..

طلعت من الغرفة ونزلت جوه شافني صفاء ظل صافن عليه ابد منزل عينه حسيت نظراته دتخترقني

باوعتله بنظرات بمعنى شكو ليش تباوع ..
هو حس على نفسه و انتبه هز راسه ودنك يلعب بالموبايل ..

سويت نفسي ممهتمة بس احس الحزن يتدفق بداخلي وقلبي مليان ثقوب وينزف ، فتحت التلفزيون طلع كارتون نيلز كعدت اتفرج شويه انتبهت صفاء يباوعلي ويبتسم ..

باوعت بعيونه ابتسمت ابتسامة جانبيه ودرت على التلفزيون .. واجاني صوته ..

_عبالي بس اني أباوع كارتون وذني اخواتج غرفتهن بصف غرفتنا دائما اسمع صياحهن مريم
تريد كارتون وعبير تريد طوبه ..

عكدت حاجبي شبي هذا بعدين تذكرت غرفة عبير
ومريم بصف غرفتنا عززززا شكد عيب معناها
سامع كل سوالفهم وهاي عبير اذا غردت تنسى حتى نفسها ..

كمت على حيلي باوعلي من فوك ليجوه ، الدشدشداشه شويه لازكة على جسمي ، حسيت بنظراته كمت اسحب بيها واعدلها ..
هو كال اي هاي حلوة مو ذيج المدرعة ..

خليت ايدي على صدري وحجيت : مدرعة ؟ تره اسمها دراعة ..

_ اي شمدريني هيه من كد ماثكيلة جنها مدرعة مال الجيش ..

ظل يباوعلي يتأمل ملامحي جنت كاتمة ابتسامة درت اريد اروح لزمني من ايدي ورجعني ع التخم ..
كال وين رايحة كُعدي هنانه ..

كمت على حيلي مرة ثانيه : لا اريد اروح للغرفة اتمدد شويه تريد شي ؟

_ تمددي هنانه يله وباوعي ع الكارتون ..

_ لا اريد اصعد اخابر ماما ..

_ تخابريها شتكوليلها هستوه جانت يمج ..

_ وانت ليش خايف شعبالك اكوللها يعني ؟

قبل ليجاوبني مشيت فتت للمر ودا اريد اصعد فوك
حسيت خطواته ورايه يمشي ..
واجاني صوته : تره مخايف من شي خليها ابالج هاي ..
وعبرني وصعد قبلي ..

وكفت بنص الدرج ترددت بين اصعد وبين انزل بعدها قررت اكمل طريقي واروح للغرفة احسن دااشوف اخرتها وياه ..

فتت للغرفة شفته واكف يم الشباك على صوت باب الغرفة التفتتلي باوعتله ونصيت وتوجهت للميز باوعت على روحي شويه وباوعتله بالمرايه شفته واكف يم الشباك منطيني ظهره ..

نزلت شعري وتوجهت للسرير تمددت وكلبت صفح ..
سمعت حركاته اجه تمدد يمي جريتها حسرة ..

لزمني من خصري ودارني عليه ، قشعريرة لزمت كل جسمي على اثر لمسته ..

ظل يباوع بعيوني عاكد حواجبه : شنو هاي الحسرة بعد ؟

بلعت ريك كوة قاومته خليت ايدي على زنده
دفعته وكعدت حاجيته بنبرة احتجاج ؛ شنو تريد تحاسبني حتى ع النفس ؟

رفع ايده لراسه كال لا يابه على شنو احاسبج على النفس اخذي راحتج .. وطلع من الغرفة ..

تأفأفت وشمرت روحي على السرير ..

كرار:جنت يم اصدقائي ورجعت بوقت متأخر من الليل دخلت للبيت شفت امي كاعدة تنتظرني بالطرمة رحت الها بسرعة
_ ها يوم شمگعدج هنانه بالليل ؟
ضربتني على زندي وحجت بنتر : وينك انت اتصل بيك متجاوبني ؟

مديت ايدي لجيبي طلعت تليفوني ، خليت ايدي على راسي : اووو دشوفي طافي شحن .. وخليت الفون بوجهه دتشوفه ..

دارتلي ظهرها تريد تفوت وحجت بنبرة زعل ..
_ لعد ماكولك شنو عندي الك من بشارة ولي نام والصبح احجيلك ..

لحكتها ع البيت لزمت ايدها : لا ابووس ايدج احجي والنبي ما اصبر للصبح .. تدرين بيه مثل عباس المستعجل ..

_ مشكلتك هاي حتى مرة ثانيه متخليني قلقة عليك وانت دايح بره ويه جماعتك واني قلبي عليك عبالي شو شصار بيك بس اني صوجي تعبت نفسي ع الخالي بلاش ..

اجانه صوت ابويه من الهول : اي والله صوجج صارلج ساعة تتحلطمين وضغطج ارتفع من القلق وناسية العار ميصير عليه شي ..

كتفت ايديه وكفت باحتجاج حاجيتهم : ها انوب اثنينكم عليه اني اطلع اشوفلي اهل غيركم احسلي .. اصلا اني كلبي حاس انو توا مو اهلي ولاكيني اباب الجامع ومربيني ..

كال ابويه لا حتى يم الجامع هم ماشامريك اصلا لكيناك بالزبالة ..

_ هلو هلو لعد خوش كيفكم لتحجون اني ارجع احسلي وانتوا انسوا عدكم ابن ..

امي كالت وين مولي بعد ؟
ابويه : للزبالة تلفي .. ديلله لاتصير عود زعطوط فد نوب حضر نفسك الجماعة دزولنه خبر موافقتهم ..
وباجر روح استأذن من عمك تحسين اتصل بعمامك واخبرهم ..

حسيت الفرحة ماسايعتني واخيرا حصلت الاريده
مها اهم واحلى حلم بحياتي .. تعبت وهيه بعيدة عني .. ممصدك بوست امي من ايديهه وراسها ورحت لابويه بوست راسه ..

صعدت فوك لغرفتي لزمت تليفوني وابتسامتي ماكدر اخفيها حسيت نفسي محتاج اتصل بيها ، طلعت الرقم وظليت اباوعله متردد ، بعدين تراجعت ، أخاف عليها الصبر حلو خلي اصبر وهيه كم يوم وتصير حلالي ..

نمت واني طاير من الفرح واحس نفسي محلق فوك الغيم يوم ثاني كعدت من الصبح وكبل لبيت عمي تحسين الحك عليه قبل يطلع لدوامه ..

وصلت لبيتهم شفته ديروح لدوامه ..
استوه طالع من باب البيت .. سلمت عليه وهو شافني مبتسم .. حس بيه هم ضحك
كال ها اكيد على موضوع موافقة الجماعة ابوك خابرني البارحة ..
_ اي والله عمي جيت استأذن منك ..
خله ايده على كتفي .. الله يوفقك ابني شايف كل الخير ان شاءالله ..
_ تسلم عمي .
_ يلله اني رايح ممحتاج شي ؟
_ لا عمي سلامتك الله وياك اني فايت اسلم على عمتي والبنات ..
_ اي تفضل جوه ..

راح عمي واني فتت جوه سلمت على عمتي وطلعت مريم هم سلمت سألتها عن عبير كالت هسه اشوفهع فاتت جوه وطلعت كالت عبير نايمة ..

_ يلله براحتها ..
رجعت لبيتنه الايام الي بعدها حاولت اتواصل ويا عبير
اتصلت بيها اكثر من مرة ماتلقيت منها اي جواب .. اتصل وماترد ، ترددت على بيتهم اكثر من مرة اشوف الكل وما اشوفها ، مليت واني اسأل عنها .. يحاوبوني ياطالعة ويه عمي او ابيت خالتها .. وبكل الاحوال مجانت تطلع اشوفها ابد ..

فكرت يمكن هي متريد تحجي ويايه بس اني مصر لازم اعرف شبيها مااريد افكر غير تفكير واظلمها ..

وراها بأيام نزلت من الدرج بطريقتي المعتادة
تسرسحت من فوك المجر ليجوة
صارت كبالي امي ظلت تفر بديها معاجبها هيج انزل ..
كالت مو راح تصير رجال ؟
جاوبتها لعد اني شنو كدامج هسه ؟ صدك جذب شوفي لحيتي باعي شواربي وظليت الزم لحيتي وشوربي ..

_ لا هسه انته ولد من تتزوج تصير رجال ..
ضحكت : اي يوم شوكت المشية خابرتيهم اتفقتي وياهم ؟ لو اله احجي اني محد مهتم الي عبالك مو ابن....

قاطعتني : لا تظل تلغي حاجيتهم واتفقت وياهم بس باقي تطلع السبعة مالة صفاء ..

_ ليش بلله ..

_ ميصير يوم محجوز تتضررون انتوا ونسوانكم ..

_ شهالسوالف هاي مالة العجايز يوم اني ما اعترف بيها ..

_ محد كالك اعترف بيها احنه نطبقهه ..
حجت هيج وعافتني وراحت ..

حسيت طكت روحي طلعت تليفوني وخابرت
جاوبني العينتين صفاء ، يمكن جان نايم لان حجه وصوته مال واحد مطفي

سلمت عليه هو ظل يعلس هذا من يكعد من النوم
عقله مضروب جلاق بالكوة يميز عطت بي

_أكولك انت شوكت تطلع السبعه مالتك

_عكب باجر شكو تسأل

_ابن المطي من وراك مشتول الا انت تجي ويانه
للخطوبه على حورك انت اصلا لتجي شنو المتحجي
مالتنا انت واني ماادري

صفاء : ها لك شفت شلون امورك متوقفه
عليه ترى وعلي اذا تظل بلسانك الزفر هذا اسويلي
مكسورة بيك واخلي خطوبتك تطول بعد شهر
سد حلكك وانلصم بلا لغوة

اجه يفشر عليه واني اعرف لسانه من يغرد وزهراء
يمي ماريد افشر كدامها زحمه ، سديته بوجهه ..

رفعت جسمي باوعت زهراء ماكو !!
صحت عليها اكثر من مرة .. ماكو متجاوب
بقيت اتساءل هاي وين راحت..

باوعت على موبايلها يمي معناها بالبيت
لعد ليش متجاوب ؟ ..
انتبهت على موبايلها ديدك ، مخليته صامت بس يضوي .. بهالاثناء انفتحت الباب و دخلت للغرفه

انتبهت ع موبايلها و راحت عليه تركض لزمته بيدها وظلت تباوع للشاشة ووجهه ظل يضرب الوان
ونظراتها على شاشة الفون كلها خوف استغربت شبيها ؟ ..

بقيت اباوع عليها مرتبكة واديها ترجف رجفة خفيفة .. هي انتبهتلي باوعت عليه ثواني و اجت تمشي باتجاهي على كيف ، تنهدت و كعدت يمي على الجربايه..

دنكت تباوع لتليفونها ثواني واني انتظر تطلع منها كلمة ، رفعت رأسها باوعتلي مشفت بعيونها
نفس ذيج النظرات المرتبكه والخايفه شفت غير
زهراء ظلت صافنه بوجهي لحظة ..

مابينت اي رد فعل وتصرفت طبيعي اريد اعرف شنو عدها ، خاف اكوللها شي وتخاف ومتحجي .. لذلك بقيت على طبيعتي ..

واخيرا حجت : أكولك صفاء البارحه بالليل أتصل بيه رقم غريب ..

حجيت بلهفة : أي كملي ..
_انطيني مجال لتقاطعني

أبتسمت لان دتحجي ويايه نتر ومو عاجبها أصلاً
تحجي ويايه .. رفعت حاجبي الها واني ساكت ..

لزمت موبايلها فتحت الرمز وقدمته
اليه خلته بيدي وحجت : أشو هذا عبالك يعرفني حتى
يعرف أسم ماما وأخواتي ..

أخذت الموبايل من أيدها : اشوو جيبي بلله اشوف
باوعت للتليفون وقريت الرسائل .. استغربت بالفعل الكلام مال واحد يعرفها كلامه جان عبارة عن حب وواحد خسران حبيبه ، أستغربت أني لو مااعرف زهراء شنو معدنها جان كلت عدها حبيب وضربته بوري ..

بس أعرف كولش زين هي فتحت عيونها عليه
رفعت راسي عليها لكيتها دتنتظر ردة فعلي

رفعت حواجبها : ها شبيك شو صفنت تتوقع منو هذا؟

_ما ادري ومااريد أظلم أحد بس سهله هسه أخابر
صديقي اخوه ضابط واخلي يشوف الرقم مال منو
ورفعت تك حاجبي

هي كامت من يمي : أي زين عود رجعلي خبر دنشوف منو هذا ..

تركتني وتركت موبايلها يمي ونزلت

اخذت تليفوني وخابرت دكتور ويايه وانطيته
الرقم الغريب ..
كال سهلة تدلل ..
تشكرت منه .. وبقيت انتظر منه خبر ..

بعد تقريب ٣ ساعات أتصل بيه
جاوبته بسرعة اجاني صوته ؛ الرقم ما مسجل بس حددنا عنوانه ..

_ تمام ..

أخذت العنوان من عنده صفنت حتى ماعدنا احد بهيج منطقه طلعت السيم كارت كسرته وشمرته بالزبالة ونزلت جوة ..

دورت زهراء لكيتها زهراء متمدده ع القنفه دتتفرج فلم لعبد الحليم ، بس حست بيه قريب منها ، باوعتلي ورجعت تباوع ع الفلم وتجاهلتني ..

تقربت عليها ووكفت يم القنفة ، رجعت باوعتلي
و افتهمت أريد اكعد يمها .. كعدت وتعدلت ..

كعدت يمها اباوع عليها وهي تنتظر مني احجي ..
كتلها : زهراء هذا الرقم ممعروف مال منو بس كدرت
أعرف العنوان ..

باوعتلي وملامحها كلها شك عرفت تريد تحجي شي بس مترددة الي اجه ابالي تريد تكولي أختك لو زوجها
دارت وجهه حسيتها دتفكر بعدين كالت
: ايييي وشطلع ؟عرفتهم منو ؟

جاوبتها : ماطلع شي الرقم كسرته وشمرته يولي
وعود اجيبلج خط جديد اليوم ..

كامت على حيلها معصبة وظلت تحجي بنتر وصياح
_ شنو خط جديييييد ؟؟وارقامي ؟؟انت شلون تكسر
خطي بدون متحجي؟؟ منو سمحلك ؟؟واذا زوجي
ششايف نفسك انت؟ ها ششايف نفسك؟؟ ثم منو
يكول مو أحد انت تعرفه وطمطمت السالفه حتى
مااعرف أني .. يله اعترف احجي ؟؟

يتبع ..

هلا 😻... طبعا جيت اخلي البارت للجمعة بس شفتكم تطالبون مكدرت ابد ماانزله اليوم احبكم مو بيدي رغم تحجون عليه 😒بس احبكم😻

الخاطرة الي بالبداية دزاها الدكتور صفاء للبارت 🌹🌹

وشويه اعصابكم غلط على الاهل ماريد ابد ابد رجاءً رجاءً 🌹🌹