إنتي مستوعبة حجم المُصيبه العملتيها ؟ عشان ما يجيني واحد اهبل وحيوان ويقول لي الحق اُختك بترقص في التيك توك ؟ انتي واعية ف روحك بتعملي ف شنو ؟ ارفعي التلفون دا سريع وافتحي زفت النمط دا عشان م اهد البيت دا فوق راسك ٠٠كان مُتعصب شديد وعروق يدينو ظاهرة ٠٠وهو بأشر علي التلفون الكان مرمي في الأرض وبعاين لي اُختو بنظرات حادة شديد٠٠٠عاينت ليو ببرود وقالت ليو ابيت داير تعمل لي شنو مثلآ؟
٠٠٠عايز يضربها أُمو مسكتو وكانت واقفه قُصادها ك درع حمايه ليها عشان م يتهور ويقتلها بالجد ٠٠٠قال ليها امي عليك الله المرة دي م تتدخلي بس ٠٠قالت ليو شوف هنا ياسُفيان لو هبشتها ساي ماعافيه ليك ٠٠قال ليها نعم ؟
٠٠انتي عارفه بتك بتعمل ف شنو لكن ورجع عاين لي اختو التانيه الكانت واقفه قدام أختها برضو وجمب امها وظاهر انو هي وامها بحاولو يحموها منو ٠٠٠كانت كُل لوحات الغضب مسيطرة عليو٠٠٠قال ليها سامعة ي عائشة امي بتقول ف شنو قالت لي لو هبشتها م عافيه ليك ؟
٠٠٠إكتفت بأنو تهز ليو راسها بيئس ٠٠٠رجع وعاين لي اختو تاني وقال ليها واقسم بالله ي هديل لو ماحذفتي زفت التيك توك دا وحذفتي كل مواقع التواصل العندك بدفنك حيه ٠٠٠عاينت لي بجرأة وقالت ليو تقدر تعملها ؟
٠٠اندفع عليها تاني نسبة للكلام القالتو دا بعد م قلبو ولع نار وعايز يضربها تاني امو مسكتو وقطعت فيو كف لمن يدها علمت ف خدو ٠٠٠ اكتفي بانو يعاين ليها وفتح الباب وطلع وقفلو بقوة لمن اتخلعو كلهم ٠٠٠٠ هديل عاينت لي اُمها بعد م رفعت نظرها من الباب وقالت ليها بحبك ي امي ٠٠قالت ليها اسكتي ولا حرف وطيري غرفتك سريع ٠٠٠رفعت تلفونها من الأرض ودخلت جوا٠٠٠٠رجعت و عاينت لي عائشة وقالت ليها اسمعي هنا الشي الحصل الليلة دا ما يصل ابوك فاهمة ما لازم يعرف نهائي ٠٠٠قالت ليها عفوا ي امي ؟
بس انتي لو مُلاحظة الموضوع دا بقا حساس شديد وهديل دي كُل يوم ماشه وبتنحرف أكتر ولو جينا لي الصح سفيان كلامو صح وبعدين هو اخونا وليو كُل الصلاحيه انو يرجع ليها عقلها البدأ يفك منها ولو مُلاحظة برضو يا امي ٠٠٠هديل أصبحت مجنونة ميديا بطريقه م طبيعيه وال24ساعة بتكون ماسكة تلفونها بتعمل شنو الله اعلم دا غير الطلعات البقت بدون سبب والطرحة البقت في الكتف وحاليا جايبه ليها رقيص في التيك توك ؟ يعني دا آخر ما اتوصلت ليو ؟
انو تقلد وتتأثر بالميديا والحاجات البيعملوها الناس؟
وبعدين انتي عارفه ي امي أخلاق سفيان ضيقه شديد وعادي يتهور ويقتلها ليك ف يوم من الأيام ٠٠ف تسترك عليها م ح ينفع نهائي ولازم ابوي يكون علي بينة من الشي البيحصل دا لانو بكرة بعد بكرة حتجيب لينا مُصيبه كلنا وانتي عارفة قصدي هنا طبعا ٠٠وقبل اي شي ابوي ولي أمرها ودا حق من حقوقو انو يعرف ٠٠وريدتك ليها م بتنفعا كدا يا امي بالعكس انتي ح تضُريها ٠٠٠حمرت ليها شديد وقالت ليها عايني هنا ي عائشة م تتفلسفي لي كتير وأبوك م لازم يعرف وانتهينا من الموضوع دا ٠٠٠عايزه ترد ليها سمعت صوت زول بيضرب ف الباب شالت طرحتها وغطت شعرها ومشت فتحت الباب كان واقف ومُربع يدينو وكُل لوحات الزعل مرسومة ف وشو ٠٠٠قالت ليو خير قالب خلقتك من صباح الرحمن كدا ؟
،٠٠عاين ليها ببرود وقال ليها ليك نفس تسألي كمان ودخل طوالي جوا البيت ٠٠٠لقى خالتو قاعدة ف الكنبه٠٠سلم عليها وجا قعد جمبها ٠٠٠قفلت الباب وجات قعدت قُصادهم وقالت ليو تدخل كدا ساي بدون إذن حركتك بايخة شديد ٠٠ قال ليها نعم ،؟
دا بيت خالتي لو ناسيه٠٠٠قالت ليو م علينا اها الجابك شنو صلح قعدتو وقال ليها عائشة انتي عارفة انا جاي لشنو ٠٠قالت ليو أبدا والله م بعلم علم الغيب انا ٠٠ مسح وشو بيدو وقال ليها ي بت الناس انتي عارفه انا بحبك قدر شنو صح ؟ وعارفه حاليا ميتين روحي طالع عشان نتلمي بالحلال والأسرة كُلها شاهدة علي كلامي دا ٠٠بس احسن تبطلي عنادك دا فاهمه ٠٠قالت ليو بسم الله عملت شنو انا ؟ قال ليها مُنشطة للساعة 3مساءٍ عندك شنو ؟
٠٠عاينت ليو ببرود وقالت ليو أسي انت جاي عشان تسألني من موضوع تافه زي دا وقاطع ليو المسافه دي كُلها وأسي انا افهم دي غيرة ولا شك منك ولا عدم ثقة مثلا ؟؟ قال ليها ولا واحد وياريت تجاوبي على سؤالي من غير ما تكتري كلامك٠٠قالت ليو تمام جدا كُل مافي الموضوع نسيت الشبكه فاتحه بس ٠٠ قال ليها تمام تاني م تنسيها اتفقنا؟ ٠٠قالت ليو لو مُلاحظ ل روحك بقيت تفرط نفسك علي كتير ؟
قال ليها عائشة انا بحبك كتير وأقل حاجة انتي بتعمليها بتخليني افقد اعصابي على الآخر وانا نهائي مافارض عليك نفسي وأنتي براك شايفه كدا٠٠٠بس بعدين لمن نتزوج نشوف عنادك دا حدو وين اسي اتفسحي فيني ساي وفكري فيني زي ماعايزة ليك كُل الحرية وقام علي حيلو ٠٠وعاين لي خالتو وقال ليها بتك دي انا يوم بكسر ليها راسها لو مابطلت العناد البتعمل فيو دا٠٠٠٠طلع وقفل الباب بقوة شديده لمن إتخلعو ٠٠عاينت لي امها وقالت ليها والله ي امي الباب دا لو ما إنكسر علي يد سفيان ح ينكسر علي يد محمود ٠٠٠ عاينت ليها بجدية وقالت ليها عائشة عملتي ليو شنو انتي؟
٠٠٠قالت ليها والله ي امي م عملت ليو اي شي الانسان دا منفسن ساي ٠٠ قالت ليها بالله لو مامتذكرة اذكرك محمود دا اختيارك انتي ٠٠٠قالت ليها عارفه ي امي ولي بكرة ح اختارو هو وبغض النظر عن كل شي بيعملوا انا مستحيل إتزوج غيرو ٠٠قالت ليها طيب مُطلعة عينو كدا لي؟
ابتسمت وقالت ليها بحب انكد ليو عيشتو. ضحكت. وقالت ليها اي نكدي ليو عيشتو سمح عشان بكرة تلقي طار منك ي هبلة ٠٠٠ضحكت وقالت ليها م بيعملا ي امي بعرفو انا …قالت ليها تمام وين دبلتك طيب؟
..قالت ليها ف التوليت جوا ف الغرفه قالت ليها طيب تمام ..مسحت شعرها برفق وقالت ليها ي امي كدي خلينا من دا كلو. يوسف ح تعملو ف موضوع شنو المفروض بعد كم شهر يجي عريس ويلقي بيتو جاهز و وديتو الشيلة لي إسراء ..قالت ليها هو يوسف ولد متين عشان يعرس ٠٠ عاينت ليها بخوف شديد وقالت ليها امي كيف يعني ود متين يا امي يوسف حاليا شقيان وتعبان وسافر مننا ليو سنتين عشان يتلمي مع اسراء بالحلال؟
وانتي عارفة قلبو حار قدر شنو ولو الليلة كان معانا كان سيطر علي الموقف
الحصل بين هديل وسفيان. عليك الله يا امي يوسف اخوي دا م تخذلو والقروش الرسلها دي كلها حاولو رجعوها ي امي تصرُفكم دا غلط شوية ولو استمرينا علي الطريقة دي ح نفقد ترابط الاسرة البينا ..قالت ليها القروش انتي عارفه اتصرفنا بيها وابوك شال نُصها عشان يقدر يستسمر بيها وانتي عارفه الخريف الفات خسر فيو والزراعة م نجحت واخوكي وليد برضو شال منها عشان يتم عرسو وانا شلت منها شوية وقضيت بيها سوالفي ..قالت ليها يا امي بس يوسف قعد
يرسل ليكم حقكم براو يعني هو ما مقصر منكم المفروض القروش الأمنكم ليها دي م تشيلو منها حاجة وتعملوا الحاجة الكلفكم بيها ٠٠٠وبعدين انتي عارفة يا امي إنو هو مادي اهل إسراء وعد انو بعد سنتين ح يجيها عريس امي انتي عارفه الصدمة الممكن تدخل فيو لمن يعرف انو م عملتو ليو اي شي والقروش اكلتوها؟
٠٠قالت ليها حاجة م بتجيو رفعت توبها من السرير لبستو وقالت ليها ماشه ل ناس سعاد وطبعا انتي عارفه بتها طلقوها صح لازم امشي اكفر ليهم وشدي معاك الفطور بعدين وطلعت ..شالت نفس عميق وقالت الله المستعان بجد ومن متين الطلاق قعد يكفرو ليو؟ وربنا يعينك ي يوسف اخوي ٠٠ علي بعدٍ أخر٠٠٠ في إحدى أسواق الخرطوم ٠٠٠ مابين ضجت البشر وأصوات العربات كانت الأصوات مُختلطة بين التُجار والزبائن٠٠٠
ليمون مُركز واحد جنية ٠٠قرب قريب وشوف العجيب ٠٠٠الليه الجرد بي جاي ٠٠٠٠تعالي ي امي واشتري لبسة لي حمودي ٠٠٠٠فرصة يوم ولا كلو يوم٠٠٠٠
كان واقف قدام باب البوتيك ومُدخل يديتو في جيوب السيوتر نسبة للصقعه أو البرد الشديد..جا صحبو ومدا ليو كُباية شاي شالها منو وقال ليو تسلم ي فردة. شرب منها شوية وابتسم .. صحبو عاين ليو وقال ليو شنو يا يوسف ضحكنا معاك ..ابتسم تاني وقال ليو الشاي حقك دا زكرني بي حاجه ..صحبو ابتسم وقال ليو ااااا بالمريودة صح ٠٠٠رفع الكُباية وشرب منها تاني وقال ليو اي كانت بتعمل نفس الشاي دا وتجيبو بيتنا ٠٠٠قال ليو بتحبها للدرجة دي يا يوسف؟
قال ليو حبي ليها م بتوصف متيم بيها عديل انا يا ابراهيم وانا غيرها م شايف ولا عايز هي كُل حاجة بنسبة لي وانت عارف إنو انا مُكثف ساعات شُغلي هنا عشان اقدر اتلمى معاها ف اقرب وقت ٠٠٠ضحك وقال ليو ربنا يجمعكم سريع ياخ ٠٠قال ليو تسمع منك ملائكة امين يارب ٠٠٠ طلع صندوق سجاير من جيبو وقال ليو. داير يا يوسف؟
٠٠ ابتسم وقال ليو للمرة الألف قلت ليك م بدخن انا قال ليو بس ح يجي يوم وتدخن يا صحبي قال ليو مستحيل اصلا انا م بميل للحاجات دي قال ليو بس لمن قلبك يتكسر ح تشرب ولمن الدنيا تقفل ابوابها ف وشك ح تشرب ٠٠ضحك وقال ليو ح تعمل لي شنو مثلا لو شربتها وانا مُكتئب ح تحل لي مشاكلي مثلا؟
انا لو الدنيا ضاقت بي ح الجأ لي حاجة وحده وهو باب الله ي صحبي ٠٠٠ابتسم وقال ليو والله ي يوسف اليشوفك ما يقول زول ملتزم ٠ اول شعرك دا كيرلي عديل مفلفو بطريقة عجيبه واستايل لبسك بناطلين وفنايل وشي شالات وبتاع وبعدن انت عارف ي يوسف اغلب البنات لمن يجو البوتيك هنا بسألو منك كتير ويقولو وين الشاب المُربي شعرو ..ضحك وقال ليو المظاهر خداعة وبعدين انا بحب البس كدا وشعري دا خلقتو زي دا لا مُفلفلو لا تاني بس م بحب احلقو ٠٠٠وأسي انت اليشوفك يقول من اولياء الله الصالحين حلاقه نمرة واحد ولبسك كلو جلاليب وانت عارف انو هنا ف مُجتمعنا الناس بتحكم عليك بالمظهر الخارجي بس واكيد اسي مُطلعني شماسي كبير وضحك …ابراهيم برضو ضحك وقال ليو صدقت ياخ .
قال ليو المهم أسي انا طالع البيت نتلاقة هناك شال تلفونو من الطربيزة وطلع خطوتين ل برا البوتيك ابراهيم ندح ليو اتلفت عليو وقال ليو اها قال ليو الليله الغدا عليك طبعا وشوف باقي الشباب وين عشان ندق شيرين ونتفق ف الحاجة ال ح حتعملها انت ٠٠ضحك وقال ليو ها ابراهيم هوي عدس بس والله غير عدس م بعمل ليكم اي شي وانت عارف قُدراتي ف الطباخه تحت الصفر عايزين حاجة فخمة جيبو من المطعم او خلي اي زول يعمل الاكل قال ليو والله مصارينا
اتهردو عديل بالعدس دا وانا الليلة لو بموت بالجوع م باكل عدس قال ليو تمام ح اكلم مصطفي يعمل ليكم الاكل قال ليو تمام ٠٠٠ابراهيم رجع ودخل جوا البوتيك ويوسف إتوجه علي مكان العربات ٠٠لحظات بس وجات العربية الممكن توصلو محطتو ركب وقعد جمب السواق ٠٠٠طلع تلفونو وبقي سرحان فيو مسافة وبلمسه خفية سحب الشاشه ودخل الواتس بقي يسحب ف الشاشه ل فوق لحدي م وصل إسم مكتوب عليهو وصية الرسول فتح الدردشة وعاين لي آخر الرسالة الكانت مُنذ
12شهر وعشرة يوم وكان مكتوب فيها٠٠٠ عَلي عَهدنا حتي نلتقي ♡ابتسم ورجع التلفون في جيبو بعد ربع ساعة وصل محطتو نزل من العربية ودخل علي الشارع الممكن يوصلو البيت ٠٠ مسافة الطريق لمح من بعيد راجل ومرة كبيرة واتنين بت قرب عليهم وظاهر عليهم أُسرة مُتدينة نسبة للبس الابسنو البنات وأمهم كانو لابسين عبايات سودا ومحجبات بطريقة حلوه شديد حتي عيونهم م ظاهرة وما بتقدر تفرز أعمارهم او أشكالهم عاملة كيف ٠٠٠٠جا ماري ب جمبهم وقال ليهم
السلام عليكم ردا ليو الأب وعليكم السلام بس معليش ي ولدي ممكن تجي تساعدنا ٠٠وقف ورجع خطوة لي ورا وقال ليو اتفضل ي ابوي قال ليو ياريت تنط بالحيطة وتفتح السقاطه حقت الباب من جوا ٠٠لانو المفتاح ودر مننا قال ليو حاضر مشي على الحيطه وتلب ب جوا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!