رواية شيء من رصيف الدم الفصل التاسع عشر 19 - بقلم Leo Alfatlawi

شيء من رصيف الدم

بقلمي: leo Alfatlawi

بارت التاسع عشر

عندما تزداد مبالغتي بحبي لك '
ذكرني بأنك لست لي "

****رئال***

بعدني مامتحركة ودخلوا ملثمين طوقوا المكان جمدت مكاني عرفتهم عليه ماحسيت غير هيذام سحبني خلاني ورا ورفع سلاحه بوجهم  لزمت ضهره وهمست برجفة لاتخليهم ياخذوني

دار وجهه باوعلي وگال مستعده تموتين

اريد ارد مااگدر احس شفايفي نشفت عصرت ملابسه حيل وهزيت راسي 

-سجليها بذاكرتج هاي ثالث مرة انطي روحي لخاطرج ماوصيج حتى هناك خذليني

نزلت دموعي

ابتسم واشر لدسار صار بصفه بسرعة سدوا عليه  ضميت وجهي بضهره واني اسمع صوت الملثم الي رج المكان  وهو يصرخ اررررمي سلاحك وسلم روحك

هيذام -سلاح الزلم يثور ماينرمي والروح ماتتسلم غير لراعيها

-ماعدنا شغل وياك عدنا امر بخصوص البنية سلمها بدون مقاومة لاتجبرني ارميك

-وهاي بالذات ماتاخذها غير على جثتي وحتى على جثتي هم ماراح تحصلهااا

-ترى ماتكلفني شاجور

-وهيه ماتكلفني طلقة؛  دساااار

بعده يحجي ودسار خله السلاح براسي وكله قبل لاترمش عينك اعتبرها يم الباري

الملثم - تتحدوني ؟؟

-ونسحگ ابهاتكم والسبع البيكم يفكر يباوعلها مو يوصلها كفيلك محمد اخلي طشاركم ماله والي 

رفع ايده الملثم وصاح  الك ثانية ماغيرها اسلمها ياتسلم روحكم  لجهنم

-هه الضاهر السرحك منطيك معلومات ناقصة اسمع لك ياتصير سبع وترمي يا  تاخذ ربعك وترد للزمال الدزك  تگله يسلم  عليك ابو درع ويگول من تريد تنجح بمهمتك اختار زلم تلزم شاربها مو خنث تتراجف بالحجي

-واني مااطلع بمهمة اذا مااحسب احساب روحي بيها ؛ابن النظااام اخر فرصة الك روحك معلگة بنزلت ايدي

-خليك كد الرتبة الابسها وسويها اقلها تكون مستحقها  ولو متأكد قاطبتاً مابيكم زلمة مثل المشغلكم

-راح تسلمها وبيدك وفوكاها شاربك يتزين بالحذاء على هذا كلامك

-تخسى دتقدم خطوة لخاطر اعلمك شارب منو الينسحگ وانعل ابوك لابو الساندك

-انطيتك فرصة

-الفرصة للمزعطة امثالك الفحولة تجيبها بيدها

-سلمهااا

-ارررمي

اباوعلة عيونه على هيذام الي واكف بصلابة تكول حجر لاهامه الموت ولا مبين عليه اثر خوف  موجه السلاح ضاغط عالزناد  عرفت هاي نهايتنا ماراح يسلمني

ضغطت على  قميصه ضميت راسي حسيت ايده لافها عليه بدون وعي  لزمتها وعصرها حيل   مثل الي يريد يسحب الخوف مني ويأمني بموته بدون الم صاح الملثم ابنك مقابيلها

-الطالع من ظهر ابو يخلي ابني براسه  مو يفكر يوصله كفيلك محمد عشيرتك بكبرها امحيها كدامك وشرط بيدك تحركهم

-كلمة الثانية انطي الامر بالرمي

-بطل بس قبل لاتنطي انزع اللثام حتى اتأكد زلمة لان تعرف بيه مااكتل نسوان

-ههههههه وعلي لو تمر الف سنه هم ماراح تتغير

رخت ايده فتحت عيوني لكيته يباوعله مثل الشاك بي رد گاله الملثم و ليش ماتجي تجرب خلي انشوف منو ينگال اسمه لخاطر يردد الشعار ويلحگ ربعه

ضحك هيذام سحب ايده ونزل سلاحه وذاك نزع اللثام اباوع ولد شاب اسمر وجهه كله شخوط يباوع لهيذام ويضحك فتح اديه و اتقدم

وخرني هيذام عنه وراح حضنه حيل عصره وهمس عرفت الدگة الناقصة ماتجي غير من الاعزاز

-الك وحشه ابو درع

-من تعرف روحك خنيث جان دزيتلي مسج اجيك تره زحمه جايب فوج وجاي

-هههههه وداعتك هذا عمك ماادري انت كالوا واحد مهتلف وتعرف مهتلفينه هواي ضعت بينكم

ضحك وخر عنه ضربة بمتنه 
-شوفلك غيرها لاعبيها سوه

-هههههه اول ماانذكر اسمك طفرت بس لخاطر اشوف شكلك وانت مذلول بين اديه تتوسل بس خرب بغيرت حيونتك جنك رفش انتحاري لاذمة ولاضمير

-صار هواي مو  ؟؟

-اووو عمر اشلونك يخوي

-هاي كدامك ضابط مستقيل منهزم من المعتقل منتظر الموت بأي لحظة

-وسفة والله ابو درع يوگع هالوگعة شنو السبب ؟؟ ومنو  هاي الي هيج مخبوصة الدنيا بيها وحضرت جنابك مقدم نفسك كبش فداء لخاطرها

-كبش وماكدرت تاخذها منه  يابه انزع الرتبه وعلي خزيتونا

-هههه اذا انتم تكول مدرعات حاصريها بينكم وين احصلها

كالها وندار لدسار كله يابه اشلونهم الخونة

دسار- خاين ولاجبان واكف يتراجف الغسل الك وللدزك بهيج مهمة فاكسة مثل وجهك

-استلم ولكم عندي امر اسلمكم جثث

-وشمنتظر راوينا مراجلك

-اشلون يخليني اربطهم واخذها كدام عيونهم سحل

-بس جرب لخاطر اعلمك الخونة الافين ديرتكم شتسوي باليوصل عرضه

-عرضك عرضي وانه اخوك الله يستر عليها ويحفظها الك

-لعد الزم لسانك حتى تضمن سلامة راسك

-يابه لاتمحي راسي ولااگرب يمها  زلمة  ماصار اسبوع من اجيت نقل وبعد هاي المهمة راح ارد لمكاني دفرات

هيذام- شوصلك مكانه

-اجتنا اخبارية عن طريق مجهول طلعنا

-حلوو يعني احترك المكان

مارد اندار لواحد من الحراس كله بابا تاخذ الولد وتطلع تنتظرني بره شوية وجاي وراكم اي واحد يتصل ماترد لحد مااجي وحذر الولد ياخذون حذرهم

هز راسه الولد انسحبوا طلعوا وهو اندار لدسار باوعله ودنگ حك حاجبه

بسرعة دسار كال تعالي وياي

اريد اتحرك من الهبطة احس رجليه نشلت لزمني   اخذني طلعني من المطبخ وداني  للغرفة كعدني بفراشي وطلع

خليت ايدي على كلبي غمضت شفايفي ترجف اريد اتبلعم بلعومي يابس مامصدگة بعدني عايشة  دخل دسار دنگ كعد كدامي رفع راسي ؛ بيده دبة مي گال هاج شربي وغسلي وجهج

اشرت مااريد

- بابا راح توگعين وجهج تغير لونه

-صدگ غدت تكتلني؟؟

-اكيد لان الموت ارحم من الراح يسووا بيج اذا لكفوج

-بس هيج غاح يكتلوك

-العرض اهم من الهوا صح راح اموت قبل لاانفذ وعدي الها وتضل حسرة بكلبي شوفتها  بس اهون من عيشة بقذارة

-مافهمت

-لاتفتهمين وتخلين براسج غير اشوكت ماحسيتي خايفة ومعتازة شي اذكري وراج من الي  يفديج بروحه

-ليش دتحجي هيج منو انت ؟؟

-اني اخوج يله شربي مي وخليج هنا لاتتحركين مانتأخر عليج

لزم ايدي خله الدبة بيها ابتسم خربط شعري وكام طلع

حطيت المي بصفي لزمت راسي صافنة احس نفسي بحلم وذولة ماموجودين اصلاً

صوتهم برة وصوت سيارة الشرطة الي اشتغل
شلت اديه يرجفن  يعني اني موجودة وكل هذا صدگ

اي اني الي جان ابوها  يستلذ يتعذيبها اركض انضم ورا غزوان صوت صرخة راية متوجعة تتوسل لايدير الزيت عليها وايد غزوان الي محتار يسحبها لو يحميني
هاي رند بحضني ورؤيا لازمتني تهمس بخوف رئال لاتخلي ينطيني الهم

عگدت حاجبي لعد ليش انضميت بظهر هيذام وخفت من الموت ؟؟

مسحت دموعي لاماخفت على نفسي خفت اتركهن وراي تحت رحمته ؛ جازفت وطلعت لان ادري بيهن  منتظراتني؛ غزوان وراية ضحوا  بسعادتهم لخاطرنا صار الوقت يرتاحون واني اصلا حياتي مخربطة متانية نهايتي بأي لحظة اقلها اسوي شي  يذكروني بي

شلت المي غسلت وجهي اجت صوت ضحكته العالية من بره رف كلبي ضربته حيل ورفعت ادية شلت شعري لفيته نزلت كم خصلة  على عيوني  داخليهن ورا اذني واسمع صوت ضربة بسطاله الي قوتها تنبهني لطريقي العثر الراح اواجهه ويا

عدلت شعري انفتحت الباب دخل بيده سلاحه مدنگ يطبگ بردانه  باوعلي خله سلاحه بظهره واشرلي يله

قبل لااسئله وين راح؛  كمت رحت ورا طلعت لكيته يسولف ويه دسار عالكيف البيت هادء  كلش مبين ماكو احد شافوني مشوا مشيت وراهم دخلنا بدولان ضيگ جانت بنهايته باب صغير تقريباً نص باب
وصلنا يمها شغل دسار الفون وفتح الباب نزل اندارلي هيذام كال يله

-شنو يله هذا گبغ

-اي وهذا المطلوب مو تردين تلحگين محمود  شنو الجديد

-هيذام تغه بعدها خوفة الصاغ بيه ماطلعت منها

-رأل نزلي افضل مااشمرج بدفرة

-المكان صغيغ ما يكفيك غاح تحشغ بي وتموتنا وياك

-اجريدي واحشر بت القندررة رئال كدامي عدددل

-ماانزل

-اووو اشلون شغلة هاي لج باباااا ماكو وقت لثولج اذا ردوا لو يجي الحر الرياحي مايخلصج منهم

-وانت شنو حتسوي هم غاح تدفني ماغوح غوح وحدك

-ليش منو وصلنا لهاي المرحلة رأل كفيلج محمد اهفج كله اعدل لسانج النعل ابو ابوي يله لجججج

هزيت راسي لا رجعت ليورا

سكت يباوعلي وياكل شفته اخذلة شوية وسحب نفس بيأس  اجه انداريت ردت اركض مالحكت لكفني من شعري لزمت ايده  باوعتله بتوسل وهمست والله هذا مكان مسكون

-لاتخافين ماكو جني يتلبس وحدة لدغة كلبها يلعب حتى عالبشر

-لبالك هذا مكان امن  تغه  غاح يلكونه

-سهلة من يجون عود غاغي تلقائي راح ينهزمون يله بنيتي

-اشكد اكغه هاي الكلمة بالاخص منك

-بكد كرهي لسماع صوتج امشييي يله

ردت احجي صاح دسار وينكم يمعوديننن

سحبني للسرداب دخلنا بي مكان ظلمة درج ضيگ  كله عناكب نزلت اول بايه حسيت اجه شي جوه رجلي رجعت صعدت رجلي  بسرعة انظربت بي خله ايده وره ضهري كال لاتخافين كملي طريقج

-والله حسيت شي

-اشيلج

-لا بس ضوي الگاع والزمني حيل حتى اذا اكو شي مااطفغ واوكع

-سهلة بس فضينه

-هيذام

-اشتعل ابو هيذااام

-لاصغخ يسمعوك الجن

-انعل ابو الجن لابو دسااار

دسار-  ابن الكلببب دسااار شكو مدخله بالنص لو هم صدگ وين اكو ناقص تارك عرضه بيد واحد مهتلف وانوب يوفرله اجواء

-عفيه الحگ حلله قبل لااسحگ بنص عرضك وصخم وجهج اكثر ماهو منعلول اصله

رفعت راسي باوعتله مامفتهمة شنو يحجون دار راسي ونزلني كل بايه ادوسها احسها طگطك كد ماقديم المكان

دسار مضوي من جوه وهيذام لازمني من فوگ واني كوه اتحرك عيوني تتجول بالمكان شي مرعب وخنگه قبل لانوصل رن فون دسار رفضه واشرلي كملي  

نزلت اخر باية طفه فونه وكال بس ضربة بسطالك بروح ابوك السرداب تايخ والكعبة يطلعونه من جوة الانقاذ مثل البريعصات مسحوكة تريلة

هيذام -اشوكت تولي

-وصل ضبع طالع ماتأخر بس أمن المكان انطيك رنه تطلعلي

- طالع تأمن المكان لو تطفر  لخرزتك

-لازم احصلها قبل لايوصلون للدغش

-شغلة الدغش يمي ربع ساعة وامحيلك كل الطرق التوصلهم اله

-حي الله ابن النظام لعد اني اجع للبر  بلكي الگف اثر الها

-قبل لاتروح شوفلك صرفة للمشعوذة وخلي الولد يراقبون المنطقة وانتبه لنفسك لاتثق بأحد اي حركة غلط تحس بيها انطيني اشارة

-افاا واني اخوك حسبالك مشت عليه سالفة صاحبك بس عبرتها بمزاجي الغشيم مايدري نص عمري خلصته بين السرابيت والنواقيص جايني تالي عمري يطگطگهن عليه

-دسار تعرف وين دخلنا وويامن جاي نلعب

-بطريق جهنم ويه ابليس نتزاود ويا عالكرسي

-عفيه البطل الغلطة بعزيز

-واليوصل يمها والخلق رب العز اطلع احشائه بسنوني لاتخاف على خرزتي اعرف اشلون احميها حتى لوجان قارات بينا عيونك برتبتك

-اتوكل يخوي وستعجلي بالشيخ لخاطر أمن عليها   واروح اشوف ابني قبل لااطلعلهم

اشر على عيونه طلع من جوه بلوزته لثام اسود وجفوف وكف اتلثم ولبس جفوفه خله سلاحه بظهره كال اندعولي

-گدهاا ابو الليل

-نبرة صوتك يمعود وعلي السگف گوة مجلب

-دطلع لاهفك دفرة الزگك بي

-اخاف اتأخر ويجفتوك عود لاتبجي بس كلهم اني صاحب دسار

-من يحصروك وتضبط نفسك ماتبلل بنطلونك ذاك الوكت عود استند بأسمك يالفو

-لفو ولامهتلف

-بول تيري مهتلف لو سمحت كالها وخله جكارته بحلگه باوعلي رافع حاجبه

رجعت ليورا همست والله مواني هاي غؤيا  لقبتك

دمغني دسار  وندار لهيذام اشرله عالطلق

دنگ هيذام رفع بنطلونه طلع مخزن رابطه برجله انطاه اخذه وصعد عالسريع

خله الفون هيذام على ميز محطم وصعد ورا  تركته يسد الباب وكفت اباوع للسرداب كله اشياء قديمة اكثرها تحفيات غريب شكلها

درت وجهي للجهة الثانية ابتسمت واني اشوف مجموعة مال كتب بس متروسات تراب وعناكب

اسمع صوت جداحة وراي درت وجهي لكيت هيذام مدنگ يورث جكارته اخذ نفس منها نفخه وباوعلي اشر شكو

-ذنيج كتب

-اهلا وسهلا واني هيذام

-دتصنف

-لابابا على شنو اصنف بس المطلوب شنو

-يصيغ تغوح تجيب واحد

- وليش تجازفين بيه ماترحين انتي

-تغه ماكو شي بس تغاب وحشغات صغيغونة

-وتغه ماعليج حضغ تكدغين تغحين

-هسه الله يشوغ بيك

-اكثر من هيج موعدل هذا ظلم

-هسه تغوح لولااااا

-لاا وصوتج لاتعلي حتى لاخليج تكملين حياتج بالاشاير

سكتت ماتلام بيك رؤيا من سمتك بول تيري صدك مجلوب

درت وجهي باوعتلهن كلبي مانطاني اتركهن احس روحي متعطشة للقراءة وشكلهن يجذب مبينات قديمات كلش

اخذت نفس قويت روحي رحت امشي عالكيف كل شوية انضرب بشغلة كد ماهوسة كل ثانية اندار اباوعله بلكي يكول تعالي ولاكأنما واكف ايد بيها جكاره والثانية بجيب بنطلون يباوعلي بعدم اهتمام  شايلين هرمون الاحساس منه نهائياً

دنكت اباوع للكاع متروسة غراض كمت اشيل رجلي اقدمها ادوس باطراف اصابعي اتحسس ماكو شي يالله اتحرك لمن وصلت وكفت   اباوع كتب اشكال دادنگ اخذ واحد كال تركي

درت وجهي اشرت ليش مارد شمر جكارته داسها واجه يمي وخرني دنگ شال واحد طلع شي مثل الحية ام سليمان من جوا يمشي سريع بدون وعي جريته حيل وصرخت ديغبااالك  

رجع ليورا صاح شبيج بابااا

-حية دخلت جو الكتب

-خرب ببليسج جفلتيني لو لادغتني ولاهاي الطفره

-تعال مااغيد عوفهن غاح تغجعلك

-وليش هيج خايفة عليه

-مااخاف عليك اصلا اتمنى تموت بس مو هسه اخاف اضل وحدي

رفع حاجبه

-لاتباوع هيج يله وخغ منا هسه تجي

-تجي لو تغجع

ابتسمت ضحك خربط شعري كال روحي اوكفي هناك جاي وراج

سحبت ايدي من قميصه جعت لمكاني وكفت وهو ضل يكلب بالكتب اخذلة دقايق وشال واحد نكثه من التراب اشرلي هذا

هزيت راسي رد دنگ طلع بعد واحد جابهن واجه انطانياهن
ندار لجهة جان بيها ميز شاله شمره على صفحة زاح كم شغلة بسطاله سوه مجال سحب خشبة خلاها بالگاع كال يله تعالي كعدي

رحت كعدت وهو رجع للدرج كعد مقابيلي طلع باكيت الجگاير دنگ يورث وحده لخ

فتحت الكتاب اوراقه قديمة صايرات صفر قريت الصفحة الاولى يحجي عن علم النفس اذكرت غزوان من جان يسألني شنو الطريقة التقرين بيها بلدغه لو عادي ابتسمت

غمضت صارت صورته كدامي وهو يفتح اديه ويهمس حتى لاتسمعه راية - بروح خالج هاي الشخوط مال نگل الحديد  هم تأثر على عقلي بالمستقبل لو لا

-اي بعلم النفس يكول التعب يسوي خلل بالدماغ
يعني غاح تصيغ مخبل وغاية تعوفك

-حلو زين وبخصوص لدغتج ماگايل شنو سببها

-يكول لان تصبحين بوجه واحد بأغبع عيون انتي بس اخذي اختج وابعدي عنه غاح تحجين عدل

-ولج ماصار ساعة من اكلت  كتله بسببج لعد اشكد انتي بذات

-القانون لايحمي المغفلين منو گلك تصيغ بوجه بابا

-خفت تموتين واني استوني مشتري كتاب كلت وين اوديه

-جيبلي بعد كتاب واني اخلي غايه تحبك مغتين

-كولي والله

-والله  وحتى اخليك اسمي بتك على اسمي

-كومي سويلي لفه خلي اولي للشغل احصل كم دينار افضل ماكابل وجهج

-مو صوجك صوجي اني عايفة كتاب مليان معلومات ومضيعة وقتي ويه واحد عيونه تكول لمبات سياغة عطلانة

ضحكت واني اتخيل اشلون شالني من شعري وكام اخذني سحل  للمطبخ شمرني وسد الباب

ردت نزلت دموعي واني اشوفه من بعيد يصعد  بعربانة الطابوگ التعب هاد حيله كوة يدفع بيها وصل نص الدرب وفلتت من ايده نگلبت عليه احس روحي  شاطت ويه صوت وگعته وهو يصيح اخ ياابوية

حسيت ايد تمسح دموعي فتحت عيوني لكيت هيذام كاعد كدامي نص گعده اشر شبيج

شهكت

لزم وجهي بين اديه مسح دموعي بطرف اصابيعه رفع راسي وگال وكلام الله بدل هاي الدموع لبجيهم دم

- اشتاقيتلهم

-بس انطيني كم يوم واجيبهم الج

-مااغيد اشوفهم

-رأل الي براسج انسي

- ماغاح اعوفه غاح اطلع شكو يوم نامت بي غاية وهيه  تشهگ من الالم غاح اعذبه مثل ماجان يعذب غزوان اخذ عيونه مثل ماسوه بغؤيا واختمها بموتت غند

-وانتي

-ضيعني بتهمة مالي ذنب بيها باعني بلاش خلاني اتمنى الموت بكل لحظة

-تعرفين ابوج منو ؟؟

-واحد جبان عايش بس حتى يظلمنا

- اكبر شيطان مايشوف بعيونه غير لون الدم لعبته المفضلة الموت اذا ضهر يحرگها بجثثها مايخلي ورا اثر ينذكر

-لااا حيوان مايستحق حتى يعيشش

-شنو الرايدته

-اشوفه مذلول  گدامي يتوسل الموت

-وبعد

-ماما تاخذ خواتي وتعيش بعيده عن الجحيم البي

-غيره

-اشوف غزوان حتى اشكغه على كلشي سوا علمودنا

-اعتبري كلشي تم

-ليش هيج دتسوي وياي وانت ماشايف مني بس الاذيه

-حتى ارد رتبتي  تذكريها

-وانت خو مانسيت شعغي

-عود شنو هيج تساوينا

-حتى لوماتساوينا تغه بعد مااخاف منك

-متأكدة ؟؟

-امم

-رأل شنو تشوفيني

-متناقض

-اشلون

-ساعات مثل الوحش بدون ضميغ تاكل حتى بشغ وساعات لاحباب

-تعرفين اشوكت اتحيون وانسى نفسي منتمي لفصيلة البشر

-امم من تشوف احد تضوج منه لو يغلط وياك

-شسويله

-تأذي بدون وعي

-اذيتج

-لااا

-هم سألتي نفسج ليش

-لان اني غتبتك منصبك  متعلق بحياتي  اذا تأذيت يضيع مستقبلك

باوعلي ساكت اخذله ثواني وخر شعري عن وجهي  خلا ورا اذني وهمس ليش انتي

-شنو اني ؟؟

مارد گام رجع لمكانه كعد طلع جكارة ورثها ودنگ انتجه على رجلي عيونه بالكاع اتحسه غير عالم 

همست غاح تغجعني للحجز

رفع راسه باوعلي بدون لايرد

-تغه وعدتني اغوح لزواج غزوان 

هز راسه اي

-صح  منعتني اغوح اكتل بابا  بس هم اول مااوصل للحجز قبل لااعتغف غاح اشتكي علي

-بعدج تحبي ؟؟

-وضاله على وعدي ويا

-من شفتي جثته شطلبتي منه

-يضل متانيني بنفس اللهفة  لحد مااجي

-لوجان صدگ داكله كلبج جان ماطلبتي منه غير مايتركج

-وعدته ماصيغ بحضن من بعده

-وصرتي

-لااا

-وبأكثر من مره كلما تحسين راح تفقدين حضني  تركضين بدون وعي؛ نفس الدموع بنفس الطلب

مارديت مسحت دموعي بضوجة لميت رجليه درت وجهي عنه كارهه نفسي لان كل الديكوله صدگ

صار هدوء مر وقت لاهو حجه بعد ولااني باوعتله؛ احس ضهري طگ والجو بارد  يصل من الرطوبة حضنت نفسي اكثر خليت راسي على رجليه دقايق واسمع ضربة بسطاله غمضت عيوني مااريد اشوفه 

وصل يمي احس شي داره عليه  شلت راسي لكيته نازع قميصه العسكري وضال بطرگ البنطلون ؛دااسحبه اوخره لزم ايدي خزرني وحجه بصوت يكتم النفس لاتعاندين الجو باررد

-لاتخاف ماموت

-ولاراح اسمحلج تموتين الي هواي يمج

-مالك يمي بس منصبك

-وتعب السنين الضيعتهن بالتحدي وسهري واني مگابك المشتمل

-لاااااا

-على شنو معصبة

نزلت دموعي

خله جكارته بلحگه ورفع حاجبه

همست الله ياخذك

ضحك بستهزاء ودنگ ورثها اخذ نفس نفخه بوجهي

-هسه تشوف اشلون غاح اندمك

- ليش  تبجين ؟؟

- لان اكغهك

-هاي هيه

-واتمنى ماشايفتك بذاك اليوم ولادعيت عليك

-دخيل ذاك اليوم وذيج الدقايق  وكلام الله مستعد ادفع نص عمري بس ترد لحظة منها

-هم ماغاح اشوفك غيغ عدوي

-واني ماشوفج غير قضيتي

-خليني اغوح

-ماراح تتحركين خطوة قبل لااخليج بأسمي واضمج بين ضلوعي  غصباً عنج

ردت احجي قاطعني رنت فونه لبالي دسار كمت  بسرعه لزمت اديه وصحت بس لالزموا

خله جكارته بحلكه  مسح دموعي لفني بقميصه عدل ورح ؛شال جهازه عيني بي خفت لكفوا ماعونت يجاوب اخذت نفس براحه واني اسمع صوت ضحكت درع وهو يصيح  بابااا

اخذت نفس ورديت مكاني اباوعله  كعد  عالدرج فتح كام ورد هلا يروح ابوك اشلونه ابني الذيب

-زين هواي

-هذا جهاز ضيونه شجابه يمك

-جدو ضربني كمت ابجي هواي ضيونة جابتني لبيتها حتى اسكت بس اني مااسكت لمن تجي وتعيط عليه

-جاي يبعد ابوك وداعتك لمده جوه رجليك مااطلع ابن ابوي اذا ماخليتك تسحك على راسه

-عمو اسماعيل صار مخبل كام يضرب راسه بالحايط والطبيب ضربه ابرة

-لاتوصل يمه خليك بيت ضيونة لاتطلع منه

-رئول راحت بعيد وعمة رحمة كامت تبجي وجدو كام يعيط كال للحرس روحوا طلعوها من جوه الگاع بابا راح يضربها خطية تعال لاتخلي يكتلها

-لاتخاف يروح ابوك مااخلي

هو يحجي واجه صوت ضي كالتله اشلونك هيذام

-هلا بالبطلة

-تره مو اني الهربتها

-ضي ردي لجهاز لدرع

-بس اسمع

-انطييي الجهاززز

-ماارده هيذام صح اعزك بس رئال مالها ذنب بالدتسوي عندك ثار وياهم لاتدخلها بالنص

-كملتي

-لااا واني هربتها لان عرفتك دتلعب بكلبها حتى تعلقها بيك ونتنقم  من خلالها بأسماعيل بنفس الطريقة السواها بسحر  …

***رايه***

مازال قبلي يرتجف حين اذكرك ؛
كشعور كفيف يقرأ بأصبعه رسالة حب "

رؤيا تحجي واني فتحت عيوني لزمت ايدها عصرت جف ايدي وگالت لاتعبين روحج وتحجين لان ماراح اسمع

همست بتعب ماعندي غيرج

-ولارئال عدها غيري لهيج لازم اجازف لان ماضل شي عندي اخسره لو هيه الصايبة ومخلصتجن لو هيه الخايبة وساكنة المصح هم اخلص من الهم وهم اخلصكم من عجزي اقلها يخف حملكم

-وهيج ينطيج گلبج تعوفيني

-حتى لو ماعفتج راية بعد ماترجعين انتي ماعايشة انتي ميته اقتنعي بهذا الشي ماراح تصحين ولاتوكفين بعد خليني اجرب ترا ماتفرق ظلام العايشته عن ظلام الكبر 

-وماما

-وينها امج تعرفين اشلونها اني عمية وعاجز ومامني فايده انتي هم فگدتها ترا ماما فاقده من ساعة الجابوا ملابس غزوان وحضنتهن

درت وجهي صدگ لكيتها حاضنه قمصلته ومغمضة

رؤيا -ورئال لاصدگتي اتزوجها ضابط وعايشة سعيدة اصحي وتذكري احنا اليهوديات  بنات البتاوين الي حتى نسب ماالنا من غير سمعة ابونا السابقتنا  واكيد هو يعرف كل هذا يترك مركزه ويجي ياخذ هيج وحده لوماجان عنده مصيبة براسه ينفذها بيها لان يدري محد يسأل عنها ولاواحد يگله وينها

رجعت غمضت مااعرف شجاوب الحيرة وبعده هدني هد  ضلت عمتي تسأل بهجامة شنو اضرارها واخاف يأثر عليها لان بعدها صغيرة ماتدري ماحدتنا شايلة هم والم يعادل عمر شايب  ماضي عليه دهر من الحجزن 

هيه تحجي وسكتتها سناء مرة ذباح  بدخلتها كامت عمتي صاحت شجابج   اهني ياهدامة  الدور موش حرم عليج صهيب انتي شني مالج رداد

سناء - انه هدامة الدور جا ذني شنييي انتي ماتخافين ربج مرة جبيرة اريولج تخط بالگبر جلعتي حلتي صهيب خليتي يدفگني لخاطرهن الما يسون دينار بسوگ الحريم

-ياهو المايسون دينار تنوعيلهن ذني مداسهن براسج انتي وهلج وانگلعي منا لاقسما برب العز اطلع بوجهي لذباح وتعرفينا انتي مايحتاج اگلج

-عليششش هاا  شعملتت هاي بس لخاطر  دافعت عن زلمتي وبيتي عاجبج رگدته  بالحجوز وياريت لشي يسوه

-عليش يمه اول مرة ذباح يخش الحجز ماهو گضه نص عمره بالسجن يمتى ذباح لفه داره وركد لخاطر تسودتني علينه

-زلمتي من حگي ادافع عنه ماصدگت طلع بعد هالعمر يجن مثل ذني يزتنه بالسجن والله اعلم اشوكت يطلع وانوب من مصايبهن حملهن ومصرفهن واحنا عالم على گد حالنا

-حمل ياهو شتلغثين يالناقصة تربية

-مانه ناگصة  انه بت عمج وابوي شيخ العرب صيته كاضه الديره واي حمل جا منيله زلمتي يصرف على اربع حريم

باوعتلها عمتي  ولطمت على وجها صاحت سناء على شني تلطمين  كلنا ماعدهن اهل لفن ديرتنا بس لاحوة ولاگعوة  موش يضلن يعلفن بروسنا هاي عمية والثانية خبلة ماعرفن تمثل هم انكتمنا اقلها امهن خلي تطرگ البزايز والسدور  وتعر للگاع ويانه لخاطر تحلل لكمتهن موش زتن زلمتي بحلگ الموت وكاسمنا حتى باللگمة

- يمه يمه وعلي يذباح اذا سمع ينحرج وكلام الله يطشر دمج

-شني مالي اهل ويتفگني خله يچيس شعره مني وتنوعي اخوتي شيعملون بي

-وروح عريس المنية  يخلي الدم للرچاب يخش داركم يسحلج من نص ازلامكم  يدوس فجج جدام عويناتهم والاشج من اخوتج يفچ حلگه ماهو يكف بويهة كفي الشر ونهجبي يبت عمي

-ماانه ناشده عنك ولاانه الرادة لبيت زلمتي اذا مايرد ويعر لدارنا  يشوفلي حل لمصايبه موش تالي عمري اشتغل ليل ونهار وانه بت الشيخ لخاطر اعلف بحلوگ بنوات منهزمات من ديرتهن محد يعرف مصيبتهن شني

هيه تحجي وعمتي سطرتها راجدي وجرتها من عباتها سحلتها تريد اطلعها وهيه انهدت مانعرف تصرخ لو تغلط وعمتي تسد بحلگها بس تريدها تسكت

گامت ماما كوه سانده روحها همست بتعب تركيها لاتتخاربن ويه اهلكم لخاطرنا

دفعت عمتي ودخلت هاده على ماما صاحت تنوعتي اشلون هديتن بيتي وضيعتن زلمتي الله يلعنجن منين اجيتن انتن

-حقج ييمه احنا خربنا حياتكم بدخلتنا وكلفناكم وثكلنه عليكم هواي 

-اي چا ماتاخذيهن وتولين لو تعودتوا على الچداوة عيشه براس العالم لاحسبالج مااعرفن شني براسج عليش هيج زاته نفسج بس لو تموتين مااخلي ذباح ياخذ وحدة من بناتج حدجن تخدمن جوه رجلينه موش تخلن راسجن براسنا

اباوع لماما دنگت بكسره نزلت دمعتها  لو شكت كلبي نسيت كل حزن مااعرف منين اجتني القوة وخرت رؤيا وكمت سحلت مرة ذباح  دفعتها على عمتي حيل وصرخت مو احنا الرخاص الي نشمر روحنا على واحد خبل مثل زوجج ولا احنا الي ضالين هنا حتى ناكل براس عالم مثلكم لو ماعمتي دتتوسل وذرعت طريق من الجنة بعيشتها الي حتى عيشة الحيوان ابونا افضل منها مااجينا
ولو ماالخبل رجلج يسوي روحه رجال براسنا ويدگ صدر مافكرنا نوصلكم ابد

-ذباح مانه زلمة

-اي لو زلمه صدگ ماخلى وحده ناقصة تربية مثلج بأسمه  وهاي اللگمه الي تعيرينا بيها مانريدها ماعاش الي يعير امنا بخبزه واحنا عايشات 

-ماطول هيج طلع عندج لسان وكرامه خذي هلج  ونكلعي من هون

-واني مايشرفني اكعد بمكان بي امثالج وامثال الي حاويج وراضي بطياح حظج وقلة تربيتج

انداريت لماما كلتلها يله كومي ركضت عمتي لزمت ايدي كالت دخل الله ودخلج يعمة امسحي بوجهي الصخمته بت الفكر وكلام الله يذباح يصلبنا على جذع النخلة ويرمينا بدون رحمة

-لاحقها عمه احنا هواي وثكلنا عليكم

-ثكلتي على ياهو وروح ابوي اشلع من لحمي واخلي جدامكم دخليج  ييمه وعلي خويي يروح بيها ولج يجتل حرمته ويضيع رويحته بدون عگل مسودن هذا

-مايكتلها من يرد كليله هنه راحن ورايه تكول  كفيت ووفيت ماقصرت سويت العليك واحنا نعرف ندبر نفسنا

-يبووو يبوو على حضج يافجر راح خويج ييمه احب على رجلج  لاا اجيب صهيب يدنگ على ايدج امج ويعتذر عن صخام هالعگربة الي ناويه  على الدم شني الرايدته اعمله بس لاترحين امشيه عليج رسول الله

مارديت وخرت ايدها ورحت كومت رؤيا ورجعت لماما دنگت اخذت قمصلة غزوان من ايدها مارضت تنطي عتيته عت شمرته على رؤيا ورديت امسح بدموعها والف بشيلتها

طلعت عمتي بره تركض عرفتها راح تصيح لصهيب ومرت ذباح وكفت تباوع بشماته اخذت دقايق شافتنا صدگ انلم بغراضنا كالت اي هيج من البداية اله تنهانون

مارديت

هزيت ايدها وطلعت كمت لميت شكو شي النا خليتهن بعلاليگ وصلت لقمصان غزوان غمضت شلتهن خليتهن بالعلاكة بدون لااباوع اتمنيته يمي واكوم اضربه لمن يبرد كلبي عالذل والكسرة الحسيتهن بغيابة

سديت العلاكة داكوم ماما واسمع صهيب صاح يالله يباا

ردت هجامة خش يبو صگر

دخل سلم رديت بهدوء واني مدنگ على ماما اعدل بعباتها

-اشلونج خويه ام رايه

هزيت راسها زينه

-دوم ان شاء الله وانتي يبوي رايه

-بخير عمو

-وعليش تكوليها بضيگ خاطر وشني هاي الهندام البيج  وعلى وين العزم ان شاء الله

-ارض الله واسعة ماكو بشر يضل محتار ورحمه ربه موجوده

-والنعم بالله دعنا من العتاب والزعل وكلام الحريم المالها رداد اسألج سؤال جاوبيني علي بروح عريس  المنية وبعدها وكلام الله عملي الرايدته واچسر ريول اليكف بويهج

-كول عمو

-لاتكولين عمي كولي يبا حالج حال بنواتي لان قسما برب العز ماحاسبجن ولاعزلتجن هون اذا ماحسيتجن بمعزة  بنواتي  المهم يبوي هم طلعت مني چلمه كدرت خاطرج فد يوم لو گصرت وياجن بدون لاحس لاتعرفين البشر خطاء وچل من لايسهو

-لاعمو حشاك والله ماقصرت ويانه ولو ماحسبتكم اهلي ماكعدت بينكم وغمضت عيوني كل هالفترة واني مأمنه على اهلي يمكم

-جا جذبتي يبا

-ليش

-البت التغتاض تجلع تشكي لابوها  وتعاتبه لخاطر يرد حگها موش تاخذ اغريضاتها وتهد ديرتها لخاطر چلمة من وحده ناگصة حشمه وزلام تچسر  فجها

-لاعمو مو علمود الصار بس هاي الحمد الله صارت حالة ماما زينة والشغلة راح وقتها نسونا يعني بعد ماله داعي نضل هنا هم ثگلنا عليكم

-وانه البت ماتطلع من داري غير لبيت زلمتها

باوعتله وهمست بكسره مات

-الله يرحم روحه الطاهر  وماضل عندج غير درب الكبر

-يعني شنو

-يعني تكفين هندامج وتچين بيت هلج يم الحجية چدام عيني حالج حال بناتنا الي اطگج طكيها والي ترفع صوتها جسري فجها والي تسمعج چلمة سحگي چهامتها  وكليلها انه بيت ابوي تحشمين نفسج لو اشكيج اله لخاطر يدفنج بهدمتج

-واني مااريد مشاكل التعب البية كافي ولا اريد منية احد اخذ امي واختي نأجر بيت عسى مالكمة خبز باليوم نحصلها من تعبنا تكفينا ونحمد ربنا

-زعلج چايد يبت الاجاويد

-موزعل بس هذا الصح خسرنا كلشي ماضلت غير كرامتنا اقلها من نموت اكو شي يشفع لعيشتنا المره الجنه متحمليها

-وانه دگيت صدر لذباح اسلمكم بيده مثل ماعطيته چلمة احميكم طول غيبته عنكم

-ماراح اضل

-خلي اتنوع طولج معتب الباب وانه اعلمج الزلم شتعمل ردي بيا  لمجانج وعينج بأهلج بين ماخلهم يحضرولج مجان لخاطر اخذج غادي بين العيال

ردت احجي صاح فجرر تبگين حدهن ماتعرن لغادي ثواني ويكون صگر حدر الباب  اي شي تعتازي خبريني

فجر -تأمر  يخوي بس ابوس ايدك اترك حرمة ذباح

-لاهاي حسابها يم زلمتها

-يبوو يبووو  لامروتك وعلي يجتلها انه احب على اديهن وطيب خاطرهن باليطلبنه بس لاطرشله الخبر  دخل الله ودخلك يخوي

مارد وخرها عن طريقة وطلع ضايج  طلعت ورا مااهتميت دنكت شلت العلاكة اجت هجامة لزمت ايدي گالت  يجده انطري

-مااضل ومحد يكدر يمنعني اروح

-هذا بيتي وانه سكتت وخليتها تزت سمها لخاطر تعرفين عدوج من رفيجج

-واني مااريد اعرف احد اخذ اهلي واسحگ على كسرت روحي أمنهن واروح ادور على اخيتي اردها لحضني لان ماضل عندي غيرهن

-محد يخليج تتحرجين سمعي الهواش بالوهاد بس لخاطر تمنعه يطرش خبر  لذباح تعرفين عليش يجده

-لان تخاف يضرب زوجته ويتخارب ويه ولد عمه

-لا لان مسودن خش للسجن وضيع من عمره ١٥ سنه لخاطر چلمة عطاها بالغلط  موش انتن دگ صدره بيج لرفيج دربه وروح ابوي يچده يحرگ الديره بأهلها  اذا رد ومالگاجن

-تره هو مو اجباري واني الوحيده مسؤولة عن عائلتي

-وتراج  بداري  وين تهونين  بيهن تراها الدنيا ماهي امان وانتن بزر هيه اميمتج صغيرة وراد واحد يحميها انوب تعبانة مابيها حتى دافع عن ارويحتها  وفوگ هالضيم اخيتج عاجزه من غير چسرة روحج لساتها ماحاسة بيها وانه تعودت عليكم اذا على اللكمه صح كليله بس نتكاسمها ونتعاون عليها لبين ما الله يفرجها

سكتت

-يجده وعلي تعودت عليجن بعد ماجنت بس اريدن الليل يجي لخاطر انام لان بحيدي هساع النومة ماتخطي  عيوني وانه اتفگدجن حدي فرحانه بيجن

-عضم بني ادم ثگيل

-ماهو عليه هذا دارج  وانه خطارج لان اهل ولاكريب وعمري ماضال بي جثير حسبيني جدتج وطلبتج يعطيج گلبج اتركيها بحيدها بهذا العمر والي يكرب يمج طردي لان صرتي راعية المجان

اجت رؤيا تتلمس لزمت ايدي همست واني معتازه اتعالج حتى اكدر اوكف بظهرج واسندج لخاطر نرد اخيتنا

باوعت لماما راجعه كاعده خاله راسها عالحايط مغمضه لاحول ولاقوه حسيت بروحي صدگ راح اضيعهن اذا طلعت منا

اخذت نفس

هجامة - ها يچده رضيتي

-اي بس اخت ذباح ماتضل ويانه ونقطع صلتنا بيهم نهائيا اذا على اللكمة اني اشتغل واساعدج بكلشي

دخلت عمتي كالت الحين صرت اخت ذباح يراية

-عمه موقليل السمعته ولاقليل العشه لالبالج واكفه وداحجي وياج واتجادل عناد  ترا وروح 

سكتت ماينطيني كلبي احلف بي نزلت دموعي اجت شبكتني وبجت بصوت

وخرتها ورجعت كعدت مكاني خليت ايدي على مناظره باوعت لقميصة بالعلاكة مر شريطه وهو داخل يضحك شايلة بيده ياشرلي بي واخيرا جاب قميص العرس

رفعت راسي للسما همست بقله صبر  ياااارب

…الايام اتمر بس يمي متوقفة احس النقص بروحي الدنيا بكبرها ماتمليها  كل يوم يمر يزيد شوكي اله اكثر واحس بعده عني وصلت مرحلة بعد ماتحمل اكوم بليل افتر وافرك بكلبي اتوسل بربي بس اريد اتنفس مااريد اصدگ تركني هاي هيه بعد ماشوفه واسمع صوته وهو يغنيلي ويضحك

بالنهار اخلصها اتصفن عين بماما الي مويمنا عايشة بغير عالم ماكو بلسانها غير يمه غزوان بسك شغل ولك تعبت ناملك ساعة

وعين برؤيا الي بلشت بالعلاج ويه هجامة اتخلي الاعشاب اول مايبلش بالالم تجي يمي تخلي راسها بحضني وتلزم ايدي تريد تستمد القوة مني ماتدري اني اضعف منها وماضل حتى طاقة عندي حتى اتحمل اشوف الم واحد منهم گدامي

متمدده عيوني بالشباج اباوع للكمر حسيت رؤيا عصرت جف ايدي عدلت راسي باوعتلها نايمة بعمق وجها اصفر  مو ذيج رؤيا الي كلها حيويه تعبانه شافيفها باهته بلا لون مشيت ضهر ايدي على خدها وخرت گدلتها عن وجها ودخلت اصابيعي بشعرها  ابتسمت

همست گاعده

رؤيا- جان يدخل اصابيعه بشعري حتى اعرف انو گاعد وانام واني مأمنه اكو منو اليحميني

-الراحه من نصيب اهلها احنا مالنا غير الوجع

-وراضيه بكل وجع الدنيا بس كون ارد اختي

-ودسار

-مااريد بس اسمع خبر عايش بعده كافي حتى لو ماشوفه بعد

-تحبي

-مااعرف بس الي اعرفه اريد اشوف بأسرع وقت حتى اروح ادوره واتفل بوجه على الوعد العيشني بي

-تندلين مكانه

-اندل مكان الي ينضم بي صديقه بيت المشعوذه وهذا المكان نفسه راح اخذكم اله اخليكم بي لان مكانه هنا خطر

-ليش

-غيمة وين؟؟

-كاعده بره كالت مااجاني نوم

-غيمة عدها جهاز ودتتواصل ويه عمي وعمتي واكو خطة دتسويها اذا مااجت بأيدها تنطي عنوانه

-مافهمت

-راسمه على ذباح تريد تاخذه  والي تشجعها كمرية

-من هيج لاطشة بيتهم نهار وليل تخدم وصايرة الفتاه المطيعة جوه رجلين امه

-لحد مايطلع تنطي عنوانه حتى يجون يطالبون بينا بنفس الوقت يسلمون ماما للحجز ؛ وبحجت هيه مومن عدنا وتضل بالشارع واكيد اخت غزوان اشلون ذباح يخليها وميصير تعيش بينهم هيج فتروح تطلب من امه يعقدها حتى تگدر تضل يمهم

-رؤيا شنو هالهدوء الدتحجين بي

-بعد السقوط نهوض وبعد النهوض معاملة اليهود

-شناويه

-كل خير راح ادللها دلال  من ساعة الولد الباعتني اله لضيعة رئال لموتت رند لمخابرتها الاخيره وهيه تسلمنا للحاسبين روحهم اهلنا

-جنت اشوفج ساكته لبالي نسيتي

-ساكته حتى انطيها الامان وهم وابعد غزوان عن شرها لحد ماارد نظري  وهذا غزوان راح والامان تحول طريق جهنم اي زله نحترك بنارها

-ورئال

-اجيبها من نص بيت الضباط بعد مااندمهم هلى شكو يوم استغلوا ضعفها بي

-لهيج اصريتي نضل هنا

-حتى اتعالج

-تره البارحه سمعتها وهيه تكلج بس نخلص علاج الاعشاب نبلش بالضربات بنهايه الراس

-واني مستعده

هيه تحجي ودخلت غيمه كالت لشنو مستعده اذا على على النظر شتسوين بي

رؤيا- متشوقه اشوف وجهج

-هههه عود اذا لحكتي صدگ دريتوا ذباح راح يطلع

-مم

-وابو مرته منتظره وحالف مايرجعله مرته اله بشرط يطلعكم من الديره

-وليش فرحانه تره انتي ويانه اطلعين

ماردت عضت شفتها واجت سحبت الغطه تمددت اخذت شوية وكالت خيعونهن نسوانه

-على شنو واحد خبل ساكن الحبوس

انتي طالعة برة وسامعة شنو يحجون عنه غير من نمر اني وكمريه كلها دنگ ودير وجها لعد اشكد يخافون منه

-لان يعرفوا عنده الشرف اهم شي ياااا بت خالي

-شقصدج المن تلمحين

-مالمح بس هيج مرت على بالي طكطكت المخزن

-هههههه تره اني بنيه شعرايه محد لامس مني وهذا حجيج جيبي اثبات عليه ياله تحجي لان ماكو عاقل يصدگ

-كلتي عاقل واحنا نحجي على خبل

-صدگ فجر شنو رادت منج العصر

-فجر حاف المهم شي مايخصج

-اذا تقنعج ماتوصلين خبر عن الصار ويه رايه  لذباح لاتسمعيلها خلي يربيها او لا شنو يربيها خلي يطلكها هالعاهره

-الله بعدنا مادخلنا فكرنا بالتصفية بس تردين الصدگ يسوه مبين من صوته هيبه

-حقج ماشايفته غير طوله وعرض امتونه تسد قرص الشمس خو كحل وجره عيونه ويه سماره يموتن هذا اذا باوع للوحده تخدر مو يسحبها بحضنه وتحس بخشونه ايده على خصرها

-هذا السقوط ورا احد لو مجهود شخصي

-انكتمي

-حبيت وصلنا مرحلة انكتمي يله ماضل شي وتحضنين غترته لان للاسف  مثل هذا حضنه مايسلمه لامثالج وهاي الحقيقة المره الي لازم تعرفيها

باوعت لرؤيا بغضب سحبت الغطة ودارت وجها للجهة الثانية ورؤيا غمضت براحه ابتسمت اشكد اكول الزمن كسرها وعقلها واكتشف نفسي غلطانه

لزمت ايدها اتقربت دخلت راسها بحضني خليت ايدي عليه حضنته حيل وغمضت احس هاي الامل الوحيد الظل خايفة افقدها

مر كم يوم وحالتها تعبت اكثر بالعلاج مافادها بكد ماضرها   اشكد بجيت واتوسلت تبطل ماقبلت مصرة تكمل عكس ماما الي بدت تستعيد صحتها على الاعشاب عمتي فجر مكابلتها اربعة وعشرين ساعة

اني ايد برؤيا وأيد ويه هجامة اساعدها بطحن الاعشاب صح كوه اتحرك وحتى من اشتغل بدون وفكر  بس من اشوف حالتها تعبانه واحنا حملنا هواي اكوم غصباً عني احس غزوان بعده عايش ومراقبني بكل خطوة يباوعلي ويشجعني وهذا الشي الي يخليني مقاومة واتحرك

كم مرة اجه صهيب حجه وياي حتى اروح اگعد يمهم من يشوف رفضي واصراري يتركني اعرف قربت طلعت ذباح وخايفين من ردت فعلة

واني هم تعودت على بيبي هجامه بكد ماطيبه تحسها نسمه تشيل الهم ادري بيها تثكل عليه بالشغل مو علمود لگمتنا لا تريد طلعني من الالم العايشه بي ماتدري  كمت ادوره عطره بكل شغله اشيلها واباوع بعيون ماما بلكي المح ظله

كاعده منتجه عالحايط  اباوع لهجامة تغزل صوف فرته ورفعت راسها باوعتلي ابتسمت واشرت تعالي
كمت رحت كعدت يمها خلت ايدها على راسي گالت شمالج يجده

-تعبانة

-بعد التعب ماتنوعتي منه شي طريجج طويل وعثر  يچدة

-انطيني شي يخليني انسا

-جاي الي يسندج بحزنج ويحمل عنج هموم جثيره

همست بكسره بيبي مشاتقتله

باوعتلي ونزلت دموعها

-محد يقبل يدليني بكبره

-اااخ يجده نارج ماراح تبرد ولاكلبج يهود

-مالحكت البس البدلة راح وهو بنفسه يشوفني بيها

-كربي خلي راسج بحضني

اتقربت خليت راسي بحضنها  ولميت رجلية غمضت حطت ايدها على شعري تحرك بي وتسولف اشلون الدنيا فانية واحنا عايشين بحلم على ساعة نگعد ونشوفهم كدامنا منتظرينا يتلكونا بضحكة ويسولفونه اشلون جانوا يراقبونه بكل خطوة

هيه تحجي واني اتخيله  كاعد كدامي نفس نظرته يعدل بمناظره يباوعلي بلهفه ويبتسم

استوني اشكيله على بعده شسوه بيه وگاطعتنا غيمه وهيه تكول جده تعرفين تسوين سحر

هجامة - غدي اعوذ بالله من شرج

-لعد هذا التسوي للنسوان شنو

-مااعمل شي وين راحت فجر شو تأخرت

-عدهم خطار والدنيا مخبوصة راح ابو صكر يجيب ذباح اي تركينا منها اذا اجيبلج ملابس احد تگدرين تسوين عمل محبة بينا

رؤيا- المحبه ماتفيد هم تنكشفين خلي تسويلج عمل ثول

-انتي انطمي او ليش تنطمين خليج عايشه نضحك على عجزج

-عاجزه وماخذتلي واحد بس اسمه يرجف عشيرتج  انتي والتتمني يباوعلج

-وينه شمرج وانهزم

-الي ينهزم يجي يوم ويرد بس الصار فطيسه  وترك عفونته بحضن ناس لو يغسلون بمي زمزم ماتروح وينكشفون

-شقصدج

-قصدي ابتعدي ولاتسعجلين اخرتج ترا مو جاسم الاجرب ؛ هذا ابن البدويه يتسلى بالموت ويلعب ويه الشياطين محيبس وشرط يغلبهم

-رؤيا احذرج وهاي اخر مره شيليني من راسج

-للاسف راسي مابي بس الاشياء القذرة نظفي روحج حتى تولين منه

ماردت عضت شفتها باوعتلها بحقد وكامت راحت للباب فتحته دتطلع واسمع وحده صوتها بي هيبه كالت يالله خطار چايكم تستگبلونه لاله

غيمة - هلا جده كالتها وسحبت ايدها دنكت باست

اباوع عجوز ضخمة مشيلة وجها نوراني بيدها عوجية وقرة وشكلها صارم

وخرتني هجامة وكامت كالتلها توى مانور المجان هلا بالبدوية هلا بأم صهيب

اكو اشخاص من تشوف وجهم ترفعك الدنيا لسابع سما واكو من الي تنزلك لسابع ارض  ودوسك اكثر ماالوكت كاسرك؛ وهاي الشوفتها الي راح تقلب حياتي مية وثمانين درجة وتخليني اعيش ايام مامرت على حلمي يوم

وكفت بهيبة مبتسمة باوعت لرؤيا وردت باوعتلي همست بسم الله ماشاء الله خطف الخضر

دنگت

-شني يچده ماتگومين تسلمين

غيمه- كومي ولج هاي جدتي ام ذباح  تعالي جده تفضلي هاي خوثه ضارب عقلها ماتعرف حتى تستقبل احد

-ماهي خوثه الي گدرت تكف على اريولها بعد جسرة ضهرها وتعين اهلها هاي بت بسبع ازلام

-يااا منين حتى سألي جدتي هجامة عايشة عالاعشاب المهدئة شالعة كلبنا كل شوية تريد تنتحر سوده عليه

-شني اسمج يچده رايه مو لو انه غلطانة

اشرت اي

-صح انه بت رسول الله بس هم الج حگ يمي  ماهو واحد لا اثنين واحد حگ صخام الوجه العملته حرمة ذباح  والثانية ماچيت اخذ من خاطرج بعريس المنية

غيمه- لاجده صدگ تحجين كافي وكفتكم ويانه وحمايتكم النا

-لا هاي حرمة رفيج عزيز كلبي وامانته تستاهل اتعناها لباب دارها واعرف گصرت ولهج مغتاضه مني بس وداحي باب خيبر جنت مانه طيبة يجده وماكدرت اصلج وهاي بس نهضت اجيتج

سكتت

-عنده بالعرب لو يحضر جتال ابوك بمضيفك تستگبله وترحب بي بأحسن ضيافة وتنطره من يغرب لاهله تتعناله وتطگه جيله بنص مظيفه والحين انه بضيافتج

استحيت من حجيها كمت  رحت يمها همست اسفه بيبي والله مابيه اكوم

ابتسمت وجرت راسي باسته وگالت البكيه براسج يبعد جدتج

اخذت حسره شكت كلبي صاحت غيمه تفضلي جده

هزت راسها وغيمة ركضت كدامها حطت مخده انداريت ام ذباح لماما راحت دنكت عليها سلمت  وكعدت قريب منها انتجت خلت عصتها كدامها گالت يالمدوهنه جده غيمة عري لصگر كليله چدتك تكول خله يرد انه اجي ويه ام رايه والبنوات

ماما - يابنات ذني

-بنياتنه يكفي تركناهن كل هالمدة هون راعيهن واليوم يعاود والحرمة الطولت لسانها انكص بعد شني حجتكم

-بيت العامر خيه بس اعتذر مااكدر اجي هاي گاعدين هنا والحمد الله مرتاحين

-بس احنا مامرتاحين وذني وصية بزر الاخرى وعلى كص اركابنا نفذها

- واني عمته واحلل وصيته

-عليش يمه اذا عالمچان هيرلكم صهيب مجان واسع ومكتر  واذا عالحماية ولدي حدر ارچولج  وحريمنا يخدمنكم بعويناتهن؛  وعلي اذا نگص عليكم شي نسد مضيفنا

-لاحشاكم من التقصير بس والله مانكدر

-فجر رادت تمنعني وهيه وصگر يجون يترجوكم بس انه وكفت بوجها وهاي اول مرة اعملها واطلع واجي لعالم وادخلهم طلابة وعلي لو ماعزاز على كلوبنا ماعملتها ولو ماواثقه ماراح ترودوني ماجيت

-اذا على ذباح من يجي اني احجي ويا وافهمه لاتشيلين هم

-وحگ يوم المعثر الي رزگني بخباله  يذباح اذا وصل ولكاكم ماكو يحركها بناسها لايحسب حساب صغير ولايهاب شيبه ترضيها  يضيع ارويحته گبل لاياخذ عزا خويه

-ام صهيب انتم والنعم منكم صيتكم سابقكم ناس عشاير وينحلف بيكم بس اني  عندي بنات صغار وانتم ماشاء بيت كله شباب ربي يحفضها الكم ماترهم  من غير شي حجي الدنسمعه  اشكد

-واحنا مانرضه بهالشي  مثل مانرضه بگيتكم هون والعالم مغربه ومنحدره  تجيب طاريهن وهنه بنوات حديثات وصيتهن راد لابن البدويه لهيج اجيت بعد ماطرشت خبر لذباح بالسالفة لخاطر اول مايصل نكتم الحجي والم لحمنا

-مافهمت

-الحرام يتحلل والوصية تتنفذ ودمنا يصير واحد

هيه تحجي وماما فتحت عيونها متفاجأه؛ شلت راسي صارت عيوني على غيمة عضت شفتها ودنگت مبتسمة

ردت گالت هاييمة شني گلتي …

لاتنسوا التصويت