رواية شيء من رصيف الدم الفصل التاسع وثلاثون 39 - بقلم Leo Alfatlawi

شيء من رصيف الدم

بقلمي: leo Alfatlawi

بارت التاسع والثلاثون

***رايه***

هيه تحجي واني عيوني صارت على ماما كمزت فجر من فرحتها ماسيطرت توكف وكعت رجعت كامت من جديد طلعت تركض تبجي وتضحك سوه

دنگت ماما ورؤيا دارت وجها مغمضة
ضحكت وهمست على شنو دتسون هيج ترا اني موحامل اعرف نفسي وشلون صار هو اصلاً مايخلف

هجامة - عطاة ربج جثيرة وهالجبر بخاطره بعد هالسنين

- شنو جبر بخاطره دااكلج موحااااامل

- عليش يمه تصارخين ومغتاضة دهدي وكولي يالله ان زعلانة من ابن البدوية ماطلعي بولدج هذا عوضج من الخالقج بدل الراحوا شكري ورفعي ايدج لخاطر يحمي ويكر عينج بشوفته

- منو كلج اريد اشوفه وانتن ليششش ساكتات داكلكم موحامممل مالكم شغل بيهااااا هاي وحدها تحجي

كامت رؤيا اجت كعدت يمي لزمت اديه وكالت اهدي

- هههه شنو اهدأ انتوا مصدكيين ولج اني اشلون احمل من غير غزوان

- وغزوان مات

- حتى لومات اني وعدته مااصير لغيره انتي دتفتهمين شنو دتحجين

- والله قسملج يصير عندج من غيره ويعوضنه مكانه بواحد ثاني هذا حكم الله وعلينه جاري لازم نتقبله

-شنو يعني

-يعني الف مبروك يروحي هذا الراح يرد ضحكتج ويملي حضنج بمكانهم

همست بكسره رؤيا لاتحجين هيج غزوان ديباوعلي

نزلت دموعها وجرتني لحضنها بجت ونسمع صوت الطلق والهلاهل  ترسن المنطقة كامت هجامة طلعت بره تهلهل وياهم

وخرت رؤيا رجعت للحايط  لزمت مناظر غزوان ولميت رجليه اتسنط للضرب مامستوعبة شديصير احس روحي بحلم

دنكت رؤيا حظنت رجليها تباوعلي ودموعها تنزل بدون صوت  ادري بيها دتودع اخر ذكريات من غزوان ؛ وماما عيونها عليه ما تعرف تسأل اشوكت صار لو تلوم نفسها لان حست وين وصلتني

مر وقت الهوسة والضرب  بره وين واصل عكس الهدوء الي بداخلي صافنة حتى دمعتي ماترضه  تنزل
دخلت فجر سانده بيبي ومرت صهيب تهلهل كعدت يمي گلبها فاحط ماتكدر تحجي عيونها حمر وشفايفها بيض تنفت فتحت اديها شالت راسها ليفوگ همست شلون اشكرك

فجر ضمت وجها بالشيلة تبجي وهيه جرتني لحضنها وشهكت بصوت عالي غمضت وصوت مرت صهيب بأذني تهلهل وتبجي على بجيتهن سحبت روحي من بيبي باوعتلي قبل لاتحجي همست مستحيل اخلي

جرت ايدي رادت ادنگ عليها سحبتها بسرعة صاحت لادخل الله ودخلج يجده

-راح انزله

-يمه دخيل ربج عليش يجده هيج تجتلين فرحتنا ولج اجيت اجلع وتعثر مامصدگة اشوكت اصل واشم ريحة ولده بحضني تكليلي اجتله

- اي لان اني ماعايشة اصلا

-لايجده احب على ايدج ولج تركتهم وراي يذبحون بالحلال وخوية يرمي ويبجي جنه حرمة وانتي هيج تزتين الجلمة بلا وجع كلب

-بلكي اجوي كلبج مثل ماسويتي بيه تذكرين اشكد توسلت بيج واشلون دنكت على اديج ابوسهن وابجي حتى تعتقيني وتخلي يروح لاختي  شنو جان ردج تذكري لواكلج

-حگي ييمه عبرة موت الناويلها واذا گربلها حتى اسم مايضل بعده  ؛ موش حاسة بلجمة الكلب انتي هالراح منج زلمتج مانه ابنج ؛ وذباح شماته جثيرة بس يردون يدفنوا ويدثرون اسمه

- واني مالي دخل بكل هالحجي وماكو واحد يكدر يجبرني اخلي

بهتت روحها ردت جرت ايدي رادت ادنگ سحبتها ورجعت ليورا فتحت اديها وهمست دخلت عندج طلابة وانه بت رسول الله  لاترديني يبعد جدتج

درت وجهي

- شني الطالبته مارايده تعاوديله حگري وخليج بحضن اميمتج رايده دار وحدج الج دار بأسمج راديه حلال وحگ الرفع السما شني عندي حلال اخلي بأسمج شكو حريم عدنا يصيرن خدم حدر رجليج تدللي وطلبي گبل لاتغمض عينج يتم واذا گصرنا الج حگ تعملين الرايدته بس ييمه لاتجسرين ضهرنا بولده تراه مايصير عنده هاي معجزه ربج جبر خاطرنا بيها

مارديت

دخلت هيام عباتها عوجة ودموعها تنزل عالسريع الصدمه مبينه بوجها اجت تسحل بروحها كعدت يمي اشر اشلون

- روحي سألي رجلج كليله وين امانة صديقك اشلون كدرت تدنه نفسك على وحده امنت روحها يمك وحسبتك اخوها

هيام - انتي عطيتيني جلمه وخليتني اثق بيج

- ليششس كلكم محمليني المسؤوليييه والله ماغدرت بأحددد  وولا اذيت بشررر روحوااا اله سألووووا ليش هيج سوه بيييه ليش رد بكلمته وياااي

فجر - هدي ييمه دخل الله ودخلج

- لااا ماهدي والطفل راح انززله

هيام - لااا لاا رايه ابوس رجلج اني هيج الغث وحدي مسودنة مالج شغل بيه تعرفيني هبشه ماعرف اشلون ابارك

- على شنو تباركين هيام ماكو شي تباركين عليه

- مارايدته عطينيا اني اربي وعلي اخلي بروحي واصيرله خدامة طول عمري حالي ومحتالي اخليهن تحت امره  بس لاتحجين هيج  ربي التفتله وعطا لاتحرمي انتي

بيبي - ماكلج من اجيتي وطلبتينا ماگصرت وياج لان عيبة بحگنا واحنا هاي عادتنا نكف للغريب موش للاهل ولاكلج زتيت ولدي بالموت لخاطر يردون دم غزوان ولاعطيت ذهباتي لخاطر يردون نظر اخيتج ولا حلال ذباح الزته بربع السعر لخاطر يخفف الحكم عن اميمتج ذني كلهن وسخ دنيا يرحن ويردن بس  اريدج تذكرين من وكف بوجهي وجسر جلمتي وتحمل غضب ربه حتى لايجسر خاطرج ترانه اعرف جذب عليه وطلع بدون رضاتي بس سكتت لخاطر دمعتج 

همست وكسر خاطري بيبي

- ماجسره ربج مهل الكلوب بينكم حتى يعوضكم  ويگر عينكم بضنه يخفف الحزن عن كلوبكم

-غدرنا بغزوان

-لخاطر يجي غزوان ثاني ومايضيع اسمه وينتسى ذكرى

-مااكدر والله

- تكدرين يجده وعلي وراح تذكرين هذا الحچي من تخلي بحضنج ويدر حليبج عليه من تتنوعين بعيونه وهو ينده عليج يمه لخاطر تضمي ويشم محنتج

- شنو اكله من اشوفه اكله غدرت بيك لو ماصبرت وراك

- كليله اشتاگيتلك اضم شي من ذكره حلمنا بحضني  وحنيت اسمع يندهون بأسمك جدامي

- والله غصباً عني صار

- موش غصب ربج راد يجبر خاطرج ويعوض جسر كلبج بي كولي يالله يجده وارضي وحمدي بماعطاج

ماما -  كد ماصعبة ماكدرت اباوع بعيونج مو احجي وياج بس من كلتي رئال ربي حرمها من الامومة عصرتي كلبي ونهيتي كل عوض متأملة بي لان رؤيا منو يكول يصير عدها بعد الحادث

- يعني شنو

- هذا اني اريده اذا ماتردي جيبي واني اربي  أملي بي مكان رند العافته خالي واصيح اسم غزوان الراح وخلا حسره بكله اكوله

- دتعرفين انتي شنو دتطلبين مني

-اي واذا تحبين غزوان صدگ رديلنا اسمه وسندي اخياتج بي

-راح يزعل مني

- مايزعل لان ماصار بأرادتج يزعل اذا نسيتي مو جبتي طفل تلتهين ويا وماتردين بوعدج اله وتصيرين لغيره

دنكت محتارة اولا كمية الصدمة خلتني حتى مااعرف افكر  ردت دنكت بيبي باستني وعمتي كعدت يمي لزمت ايدي تباوعلي بتوسل؛ كلها ساكته حتى لهفتهم وفرحتهم اتلاشت خايفين 

مر الوقت اي صوت ماكو لحد مانسمع صوت صهيب صاح يالله يابه اهل البيت تستگبلون ضيوف

كامت مرته تلكته دخل يضحك  سلم شافني صافنة حتى ماكمت اجه دنگ باس راسي وكال بالمبارك يحرمة سند الديرة

سكتت

- ولو الوكت متأخر وموش خوش زيارة بس فرحتنا ماخلتني اصبر للفجر واچيكم ربي يعطيج ويسر خاطرج بگد ماجبرتي بخاطرنا وفرحتينا

هزيت راسي لا

- امبين تعبانة يبه حگج بس هلةً هلا بوليدنا ولو مارادلها وصية لان انتي بت اصل وراح تحافظين عليه بس هذا يتسمى جاهل المعزه اجه بعد صبر جثير

فجر - ربي يگر عيونك بشوفته وفرح گلبك بحمله بين ايديكم

- امين يارب بس هااا يبعد عمج تهدي موش تتنوعين لابن البدوية جثير مامعوزين خبل ثاني نريده عليج هادي تكفينا مصايب ابو البزعتنا بعيشتنا

بيبي - وهالجايكم ابن ذباح الراح يوكف ديرتك على تگ رجل ويخليك ماتلحگ تفصل بين طلايبه وطلايب ابو

- ههههه يامحلات طلايبهم هو وابو  حلالي وجاهي يغدي تراب حدر رجليهم بس خليهم طيبين

هجامة - وين ناگتي يبو صگر

- ابشرري من هالشارب باجر قبل طر الفجر تلكيها حدر دارج وانتوا يله كومونا لاتعبون البت بچثر الحجي تركوها ترتاح بس وحده منجن تضل كربها تشوف طلباتها

بيبي- وين خويك

-ماعرف ولاتنوعته من اهد ماجت فجر باركت اختفى هسه اخبره 

- تركه ييمه حدر لصويحبه

- يله كومونا ماضل شي للفجر هم يالله تلحگون تهيرون حالكم الديرة باجر كلها زادها يمنا اوفي نذر عليه من اسنين واني مناطرة يجبرني بي

- روحوا انتم انه اضل يم حفيدي اليوم

-جا خلي يمج فجر وانت يله يبه هيام كومينا ويه اخياتج تستگبلين اهلنا وتاخذين البشارة منهن بعوض ربج

اشرت هيام اي وكامت هيه زوجته   جر راسي دنگ باسني منه وكال الف رحمه على روحه الطيبة وربي يعوضج مجانة باليسر خاطرج مثل ماسريتي خاطرنا وبچيتينا بهيج عطية

دنكت كلم سلم اخذهن وراح ضحكت بستهزاء اباوع الكل عيونه عليه درت وجهي سحبت مخدتي وكمت عزلت نفسي خليتها وتمددت ؛ كامت رؤيا شالت الغطة واجت يمي  غطتني وكعدت خلت ايدها على راسي تلعب بشعري ساكته ماتعرف شنو تكول؛  غمضت احس راسي فارغ ومشاعري باردة

لاذان الصبح ولاواحد نايم صح اسمعهن يبجن والفون ماسكت كل شوية واحد يتصل يتأكد من الخبر مامصدگين  بس  بالي مو يمهن بالي ابطني المااعرف اشلون اخلص منه

اذان كاموا صلوا الي سجدت شكر والي تشهگ  والي تندعي صعدت الغطه ودرت وجهي للجهة الثانية لميت روحي مااريد اسمع احد احس هوسة بروحي حتى صلاة ماكمت اصلي

كملوا صلاتهم بين التعب عليهم كامت هجامة  فرشتلهم اتمددوا  بس فجر ضلت كاعدة عين بيه وعين بالفون تباوعله بقلق  تتصل وماكو جواب لوجه  الصبح واسمعها تهمس بروح اصويحبك لاتغلق النقال … وينك يبعد اخيتك … ياااع تبجي يذباح شمالك يخوي…

مااسمع شنو رد بس نزلت دموعها ونغلق الجهاز؛  غطيت وجهي مااعرف منين اريد اضم نفسي

مر كم يوم واني على وضعي من كد مانفسيتي مصفرة حتى رئال ماتجي على بالي بعد ولافكرت بيها وين صفى بيها الدهر ؛

ذباح لاشفته ولاسمعت صوته عكس اهله  كل يوم صبح وعصر يجون مايخلون شي مايجيبوا وياهم مع العلم يشوفوني مااكل شي لان الاعراض بدت تضهر عليه  ؛من غير مرت صهيب الثانية مگابلتي بس تريد تخدمني حتى المي قبل لااكوله يصير كدامي

اشكد تجيني اوقات  اريد امد ايدي على بطني اتلمسها مااكدر احس روحي مامتقبلته 

حاضنه مخدتي وصافنة على ماما خاله رؤيا بحضنها وتسولف ويه هجامة على شغل وذيج معترضة لحد ماكالتلها تره اخذ بناتي واروح

هجامة- على شني خية تهاجسين اذا مضايگج الزاد الي يجيبوا بيت البدويه نكلهم بسكم واذاعلى لگمة الخبزة الراح تاچليها بداري  اشو اخبزها بتنوري والطماطة والمخظر نحشهن من الكاع بعد شمالج

- ميخالف احنا شغلتنا مطولة لازم اشتغل خومو تضلين ملتزمة بينه وانتي يادوب مدبره لكمتج

- كولي يالله اشو من خشيتوا لسه الخير اجه وياكم هالحلال بالوهاد  والمواجيل تارسة الدار

- واني ذني بعد مااريدهن ولاتاخذين منهم شي وهسه من تجي فجر اكلها كافي لان ماقصروا ويانه والنعم منهم بس بناتي عدهن من اليصرف عليهن

- جا خيه تركج من شغل البره اعلمج على درگ الاعشاب لان ادياتي يرجفن وبعد مانه كادره اعمل شي والخبزه عليج وحش المخضر عليه وهاي انه وياج وحده تسلي الثانية ونتكاسم اللكمة بينه ومشيه عليج الكفل زينب لاتعترضين لان الحين استانست وكمت اتحجه ويه بشر  بعد ماجنت اتصفن بحدي

- هم اعتاز كم دينار بيدي اريد اروح اشوف بنيتي ذيج اسأل عنها

- جاهمي ايدج بالدرگ وانه اخذ الاعشاب ابيعها على حريم الديره وربي يبعث رزگه

رؤيا - ماما حسبي حسابج على شغلتين اول وحده اخلي محامي لبابا والثانية  ارجع للمدرسة

ماما -اي موابوج داخل السجن على باكيت جكاير ومنتظر محاميج حتى يطلع و يامدرررسة ماتشوفين وين كاعدين وشلون حالتنا

- راح يطلع بمحامي اولااا هالشغله لاتشغلين عقلج هواي وتعبين روحج بالتفكير بيها وبالنسبة للمدرسة  اكو وحدة  بنهاية القرية واني اشتغل عصريات وبالنهار اروحلها

-وشنو تشتغلين يمه

-وحده جميلة وكيوت  مثلي شنو تشتغل اكيد ابيع ورد مثل جمالي

- انعل ابو جمالج الماشفت منه بس الطياح الحظ وماكو هنا مدرسة بنات بس وحده  يعني مختلطة

- عزززة ويشوفني ولد ؟؟ومو هيج لااامراهق شايل على وجه سرب نمل واني وحدي بدون محررم ؟ وفوگ هذا عندي ارهاب اجتماعي من الاختلاط؛ لقد ادخلتني في صدمة ياماه

-تصدمين بلد يبت الدغش والمدرسة شيليها من راسج لان بعيده وماكو خطوط هنا

- وليش خطوط واحنا عدنا بعير

- بت الكلب رايحة للمدرسة لو لمكة

- لاتصرخين عوفي الناگة اخذ حصان ذباح وأذهب  لاطلب العلم كل صباح

- لاليش حصان اكو مطي شفته مادري المن روحي استأجري منهم

-والله فكرة

-يبوووو يبووو كومييي من يمييي

دفعتها دخلت فجر تضحك كالت شمالج وياها

- خيه خبلتني راح انجلط

رؤيا - عمه بس لان كلتلها اريد ادرس رئال انطتها لرجلها وهاي صار عدها طفل بعد ماتكدر تحاجيها واني ولا تكول بتها مو بعيده بعد كم يوم تبيع اعضائي

ماما - مواني ابوج يبت رافد الدغش

- وشبي الدغش فوگ مانفگج وكال خطية بارت يم اهلها هذا اليدور ثواب هالايام يشبع مسبة

-غلطت عمري

-امراية اليغلط مره مو يسطر ثلاثة دبريلج غيرها

تفلت عليها عفست وجها رؤيا كامت اجت يمي كالت لاتباوعيلها هواي لاسامح الله تالي ابنج يطلع عليها كومي نطلع بره

همست مابيه حيل

- لج كومي عصرية الجو بارد خلي نشم هوا شوية راح تعفنين هنا

فجر - كومي ييمه عرن  للبستان مابي احد تاخذن راحتجن بي وصدگ هالنسيت اسألج علاجج بعدج تاخذي

اشرت لا

-عليش يعمه هلبت من تولدين بالسلامة نعمل العملية ماطول كلشي طلع مطابق والتحاليل كلها كملت

- مااسوي شي ووفروا افلوس العملية وانطوا المتبرع حقه خلي يروح يدورله على مشتري ثاني

-بس هدي لاتعصبين كلشي رايدته يجرالج يله كومي ويه اخيتج حدري لغاد وعلي ريحة الزرع ترد الروح و تشيل  الهم من الكلب

باوعت لرؤيا اشر اي حسيت صدگ عوزي اطلع اخذ نفس حتى اعرف افكر كعدت لميت شعري اشلون مجان كمت طلعت وياها دخلنا للمزرعة ظلام الليل ويه بروده الجو وهدوء المكان صدگ راحه نفسية

رحنا نتمشه صنته ماكو احد نفس ماكو غير صوت الضفادع جاية من يم البحيره كعدنا يم الشجرة كعدت يمي خليت راسي على متنها وغمضت همست شوفي ذاك منو كدامنا

فتحت عيوني اباوع بره المزرعة يم السياج ذباح كاعد يم سيارته منتجي عليه بيده جكارته ومدنگ بغير عالم

- كومي نرجع

رؤيا- مايشوفنا بعيد هسه يروح خلينا كاعدين هنا راسي طبل من سوالف امج وهجامة

اخذت نفس وغمضت اخذتلها شويه وهمست
تره يحبج

-رؤيااا

- شنو رؤيا دنحجي الحقيقة ذباح يحبج ومو بس يحبج لاعاشگج وخايف يعترف حتى لنفسه

-اشلون كدر

-ماكو واحد دگ كلبه لاحد بأرادته وبعدين حتى لودگ تره ذباح علاقته بغزوان محدوده تعرف عليه بالسجن معرفه ايام ونخاه وهو لان  ابن عرب  مارده ونجي للصدگ  وكف وكف اخ ويانه ابد ماقصر

- شقصدج رؤيا

- قصدي غزوان معزته بروحي مايضاهيها احد بس انتي من حقج تعيشين تره عمرج بعد ماصار حتى ١٩ مامعقولة دفنين احلى سنين عمرج بالحزن والقهر

- اي ادفنهن لان هذا غزوان

- وغزوان مايرضاها راييه منو الج رئال راحت واني هم اروح وماما مادايمتلج يعني تضلين وحدج بدون سندد تعرفين شنو؛  ضايعة بدون سندد بهيج دنيا

- تعوفيني رؤيا

- محد ضامن عمره ولاواحد يعرف شمكتوبله بس دااشوفج تنتهين كدامي يوم عن يوم حزنج يكبر عمرج ينگص لاتشوفينا نسولف ونضحك احنا بدونج لاشيء والله مانكدر انعيش

- والله كارهه الطفل مدااتقبله

- راح تتقبلي مااكلج حبي ذباح لااا بس هذا الطفل لازم يضل لان محد الج بهالدنيا غيره وماراح تحصلين سند كد سنده اني لومااحبج والله مااحجي وياج هيج

- يعني شنو

- ذباح ماراح يجبرج على شي بس احنا تعبنا هواي   ومبينة الدنيا ماترضه تنصفنا ولاتذكرنا بغير وقت الذل والقهر

- اني منتظره انهي روايتي مو اعيد كتابتها من البداية

- واني ماكلتلج عيديها ولارجعيله بس ردت ابنج يربه بينا ونحس اكو شي عايشين لخاطره تره ماما الحجته صدگ رئال انحرمت واني مستحيل بعد الحادث يصير عندي ومشتهين نفس بينا نبني ويا احلام جديده

- تعرفين شنو بداخلي شنو داحس

- ادري والله وحاسة بيج مثل ماحاسة بذباح لان حتى فرحه ماكدر يفرح ؛ يعرف بيج كارهته مثل مامتقبله ابنه بداخلج

-كرهته رؤيا والله كرهته

-وهو متأكد من هالشي والندم دينهش بي بس صار بعد لازم تتقبلون هالشي ثنينكم لان الطفل ماله ذنب

مارديت غمضت رجعت راسي على متنها لان ادري شمااشرح ماراح تحس بالنار العايشة بيها  صار هدوء دقايق  و رن الفون فتحت كام واسمع صوت دسار كال جوعان

رؤيا - ومنو لازمك ماتروح تاكل

- وعلي مشتهي اكل بيت ولج

- وين امك ماتكللها اتسويلك

- غير طردتني وضال متلطلط بالشوارع يوم رئال تحن عليه بلفه يوم ازر يحن عليه بسفري؛  اعرف وصل بيه الحال انتظر ضبع يسويلي مخلمة وانتي قيسي وين وصلت بيه

-وين انت

دار الكام ونشوف مسافة حدود العشر طوابق جوا رد الكام على وجه كال ان شاء الله تأكدتي مسموط جدي ونعول والديه وحدي

-وعالاساس ماكو هيج جمال وغار عليك وضل افكر اخاف تروح يمها ابني اصحى تره ملامح وجهك مال ركبه وبعدين شكو كاعد هنا

-طلعت مهمة ونحصرت فوك ردت انزل منا شفت الشغلة مومال رجولة احترمت نفسي كعدت منتظر الزمال رجل اختج يدزلي دعم

-الله شكد اتمنى اني يمك

-حتى دفعيني وجه الجوب مو

-بابا اشلونه

-يم هيذام اخباره واوراق براءته يم اللدغة

-حصلت  اوراق براءته؟؟

-وضمتهن بحمام الجلب بت الاثول شفت ثول مثل ثول اختج مامر عليه

-لعد  ماتروح تاخذهن

-شاخذهن وبيتها منخول حرس ولج هاي اذا ردت احجي وياها امر بالف لجنة تفتيش ؛ واذا طلعت يحاوطوها مثل خليت النحل حول الملكة  تكول رئيس كوريا  مو بت الدغش

-هاي رئال النعواصة  دتحجي عليها

-هاي النعواصة الماتعجبج جوه ايدها املاك وحرس ابوي برتبته ماعده ربع عددهم  وعدها سيارات من تسلبين عشيرتج بكبرها ماتجيبن تاير وحده منهن الج اكلج سعر جلبها اغله من سعر بيتج

-تستاهل عبنها عرفت تختار زلمه صدگ

-احبج وانتي اجيبيها من الاخير

-وشناوية ست رئال

-خلفت ابو عگرب محد يعرف شكو براسها

-صدگ راح ارجع للدراسة مو كلتلك لان اريد استأذن لاااا بس دبلغك

- شتردين تكملين

-ماكمل اروح للجيش وشرط اشد رتبة واعلمكم منو اسياد الشغل

-مااتركين الدراسة وتاخذيني وانطيج وحدة من رتبي

-هذا الحجي تحجي  من اشوف بابا كاعد بينا وانت جايب اهلك وكاعد كدامه ومنفذ كل شروطه يله روحي لك

-بس لحظة

-شكو

-شكد نسبة الماء عالارض

-يمكن سبعين بالمية

-جا ماتغسلين وجهج

غلقت الفون وهيه ادردم كوه كتمت  ضحكتي خزرتني ضايجة سكتت بسرعة واسمع حركة قريبة شلت راسي لكيت ذباح جاي اتجاهنا اديه بجيوبه يمشي مدنگ التعب واضح على ملامحه اباوعله گد مامهدود حيله وجهه تعبان وجوه عيونه صاير اسود 

وصل يمنا  كمت ردت اروح لزمني من ايدي وهمس وروح الدفنته بيدي ما أأخرج بس جلمة وحده موش اكثر

- ماكو حجي بينا

اندار باوع لرؤيا هزت راسها  وراحت؛  وخرت ايده ردت الحكها صار كدامي بسرعة سد الطريق بوكفته  رفعت راسي اشرت شكو

- اذا اگلج ندمت تصدگيني

-لاا

- يبه سبحان المايلغط وحگج اي شي تعملي بس وعلي فگتج

- شرايد ذباح اذا على ابنك امن قررت اخلي واول مايصير انطي الك واروح لان ماشوف بي غير الحقد وكرهي الك

- اذا كربه بعدج مارايده

- ماتريده ليش موهذا الكسرتني علموده مو هذا حلمك

- ماعدت احلم  صارت النومة حسرة وكلام الله كمت احسج مرض وينهش بيه روحي ماتهود اذا ماخش غرفتج وتنوع لفرشتج وتخيلج لسه كاعدة وتتحجين وياي

نزلت دموعي وهمست انت دمرت كل هذا؛  جنت اشوفك السند ليش خليتي احسك عدوي

دنگ مارد

- فرحت مو

شال راسه عيونه حمر يباوعلي بندم

- ليش ساكت رحت لغزوان كلتله راح يجيني طفل من حبيبتك الامنتها يمي

غمض

ضغط على سنوني ضربته بصدره و صحت ليشش ساكتتت احجيي كول اشلون كدرت توكف كدامه واشلون كدرت تنطقها

دنگ خله اديه ورا راسه رجعت ضربته بكل حيلي لزم ايدي  باوعلي عيونه متروسة دموع همس بسج رحميني دخيل ربج

- وانت ليش مارحمتني

- عطيت روحي الج  وكفت بوجه الكل الخاطرج   ماخليت شي ماعملته  بس حتى ارضيج شعمل بعددد كولي تردين اجتل روحي وداعت ابني البعد ماشايف الضوه اعملها اذا هذا يريحج

حجيت بشهكه كلبي يوجعني ذباح

جرني لحضنه بجيت بصوت عصرني بقوة دنگ باس راسي  وهمس لاتبجين ورب العباد مانه حمل اسمع صوت شهكتج بسبتي

-وجعتني وخليتني اتمنى ميته ولاجايه اطلب منك تردلي خواتي

-هيج كارهتني

-بكد وجع كلبي على غزوان

- خلص لاتبجين الج الرايدته

- اطلكني

- هاي هيه

- ماتوكف بوجهي ولاالك شغلة بيه وماتراويني وجهك منا لمن اولد

- مثل ماتردين

- اول ماجيب  تاخذ ابنك وتروح وهنا نكون متصافين بكد ماوكفتلي رجعتهن الك بي  نرد اغراب مثل اول يوم التقينا بي

اشر اي

رفعت راسي اباوع بعيونه نظرة ماعرفت شنو بس حسيت خوف و لهفة الدنيا بيهن

وخرته عني استوني اتحرك افتر المكان بيه فقدت توازني غمضت لزمني بسرعة ردت ابعد ايده ضغط عليه وكال بس خليني اوصلج لاتعثيرين وتتأذين

دفعته  وكملت طريقي تركته واكف وراي يباوعلي  بطريقة تكسر شكو عهد اخذته ويا؛ نزلت دموعي لان حسيت بي شكد يحبني وهذا الشعور الموتني

مرت الايام وصدگ  ماشفت وجهه صح اسمع صوته بالباب يسولف ويا رؤيا ويسألها عليه بصوت ناصي حتى لااحد ينتبه ويجيب شكو شي نعتازه بس ماتعده حدوده

اكثر الاوقات اختنگ  مااكدر انام اطلع للبستان اشوف جمرة جكارته وكعدته يم البحيرة ؛ اوكف دقايق اباوعلة اشلون صافن وتذكر من جان هيج وقت يلزم شعري وينام بدون شعور من كد ماتعبان اختنگ بلزايد ورجع

كلياتي زاد تعبهن بعد حتى بالنهار مااكدر انام لاعلاج اكدر اخذ ولااعشاب؛  عمتي وبيبي مكابلاتني ليل ونهار  يسولفن اشلون راح يجهزن  وشنو صهيب ديحضر من غير كل يوم ذباح داز بيدهم شغلة ياممة مال طفل ياملحف ثوب صغير 

مرات اضحك على لهفته وفرحته لطفله ومرات اضوج لان ماراح اتواجد ويا بتربيته

كلما تمر ايام تزيد حالتي لحد ما بعد مااكدر اتنفس يمر الليل ويصير الصبح واني عيني ماتغمض اتگلب من الالم احس شي طابگ على ضهري حتى  رؤيا محتارة بيه

…لازمة ايد رؤيا وضامة راسي بالمخدة احاول اكتم الالم احس روحي تطلع مو اجر النفس دخلت  ماما  بيدها علاگة كالت كومي شوفي ابن البدوية شنو محضر الابنه

عدلت راسي على المخدة بهتانه كعدت يمي فتحت العلاكة طلعت عگال وجماغ ودشداشه صغيرة  ابتسمت ونزلت دموعي كالت اسم الله عليج ماما شكو

- بعد مااتحمل ماما  وين ذباح

- هياته هجامة ديحجي ويا على ابن اخوها مسوي طلابة وتريده يروح ويا يحلوها 

- صحي  راح اموت

- يااا رايه شبيج ماما

مارديت لان رجع الالم لزمت المخده عضيتها وكتمت النفس حيل  صرخت  ذباااح ولك يعمة الحكناااا راحت بنيتييي

على صوتها اجه يركض  دفر الباب ودخل بسرعة شاف حالتي وكف متصنم  كال شمالهااا

ماما- مااعرف  صار كم يوم تلوج بس شو هسه زادت ولك الحكها لاتروح منييي

دنگ عليه وخر شعري عن وجهي باوعلي فتحت عيوني بتعب وهمست راح اموت

كام بسرعة جر الجرجف دنگ لفني بي ضمني بصدره وشالني بدون ماايحجي ؛ طلع يركض حتى ماما مالحكت تلبس عباتها بس رؤيا صعدت السيارة ويانه خلاني بحضنها وصعد شغلها شحطها بكل سرعته

عصرت راسي بحضنها وغمضت من كد الالم حتى مااسمع شنو يحجون ولا اكدر ارد لحد ماوصلنا للمستشفى نزلني ودخل يركض بيه حولوني عالطوارئ بسرعة بس جيكوا حالتي انطوني مهدأ رحت بالنوم

كعدت على لمسات اصابع فتحت عيوني لكيت الليل صاير انتبهت الغرفه خالية ماكو غير ذباح يمي ؛ بحلگه جكارته اباوع لايده ترجف كوه لازم جكارته وعيونه دم ويباوعلي بخوف بسرعة لم جف ايده سحبها  وعدل وكفته ودار وجهه للجهة الثانية  همست ليش ماكو احد

- غادي بالاستراحة يتعشون

- ليش عيونك حمر ذباح صاير شي

- ههه لايبه قابل شصاير هاي من گلة النوم

-اشوكت نطلع

رد باوعلي -عليش يبه  مستعجلة

- داحس روحي زينه بعد مااعتاز وايدي توجعني من الابر

- ماضل شي كلها كم يوم بعون الله وتگضي

سكتت هو هم ماحجه اخذله شويه وكال هم تحسين بحركته

-شنو ؟؟

-الجاهل

-لابعده صغير

-اذا اگلج رايد اتلمسه ترديني

-الطفل بي شي

-لا بعيد الشر عنه بس ضل بنفسي اتحسس مجانة يمكن يحس بيه ويرف

-لااا

دنگ ماحجه رد اندار ويدخن

انفتحت دخلوا دكاتره ثنين وياهم مساعدات واحد وكف يمه يشلع السيروم والثاني يقره بالملف شوية وسده كال كله تمام مستعده بابا

-لشنو

ذباح  - ماكو شي يبه لاتخافين عملية بسيطة ماراح تحسين بيها

- لاذباح لاتموته خطيه هذا ابنك

- وانه مارايده

- اني اريده ذبااح ابني ماانززززله

اشر للدكتور ردت اكوم لزموني بعدني حتى ماصارخة وحده منهن ضربتني ابره رجعت راسي للمخده اباوعله بتوسل ودموعي تنزل عرفت بعد مااكدر اخلص نفسي

همست وروح غزوان عمري ماراح اسامحك

دار وجهه للجهة الثانية غمضت ثواني وبعد ماحسيت بشي

بين صاحية وبين نايمة حركة يمي وايد لازمة ايدي احد يلعب بشعري دقايق ورجعت دخلت بغير عالم

مر كم يوم واني على وضعي تعبانه ماينطوني مجال حتى اصحى لواحجي  مخلصتها بين مهدأت وسونارات  جسمي احسه تهشم من گد الابر والتحاليل اغيب عن الوعي وارجع اصحى ؛ اسمع صوت بجيهن واحس ينقلوني  من مكان لمكان بس مااكدر افتح عيوني

… ظلام محاوطني من كل مكان اصوات هوسة قريبة ؛ صوت ماما تبجي ورؤيا تهدأ بيها ؛راسي يفتر وبطني توجعني  رديت دخلت بالظلام دقايق وردت الطگطگة   فتحت عيوني غواش قوي نايمة وداخل واقية وأجهزة هواي عليه واسمع صوت رؤيا جاي من ادخل جهاز صاحت واخيييرا صحت

درت وجهي واشوفها واكفه ورا جامة استغربت ليش هيج معزولة  حتى مااذكر اشوكت غيروا المستشفى

هزت ايدها تضحك وماما كالت الحمد الله على سلامتج يبعد امج

عيوني صارت على رؤيا بلعومي يحركني اشرتلها راح ابني مو

- هههه موكلتلك الدنيا خالتنه براسها تنطينا الشي تعودنا عليه وبم تاخذه

همست اذا جنت كارهته هسه اتمنى يموت

- وهو هم راح يحقق امنيتج

غمضت اريد احرك ايدي مابيه حيل كوة مديتها وصلتها لبطني  صار باندج ملفوف واكو صوندة قريبة عليه فتحت عيوني درت وجهي الهن

رؤيا- شبيج تباوعيلنا  عندج ثنين كليات واحنا بيت ماعدنا اشلون قابل  نضل هيج ملطلطين بالشوارع ؛بعت وحده

هيه تحجي وصارت هوسة واصوات زلم تركض لطمت  ماما على وجها وصاحت يمه سودة بوجهي راح الولد

باوعت لرؤيا دنكت

همست بتعب ذباح الي تبرعلي  بكليته …

***رئال***

اريد اتحرك اوصله مااكدر احس رجلية انشلت درت وجهي لامجد واكف يسولف ويه الحرس اخذت نفس احاول اصرخ شي كابس على نفسي كعدت بالكاع انتبهلي واحد من الحرس دفع امجد من كدامه واجه يركض كعد كدامي كال شبيج خوية

درت وجهي لدرع ونزلت دموعي اندار على المكان الي اباوعله وفتح عيونه على كبرهن من كد شدهته كام وعثر رد كام ركض شمر روحه يمه دنگ شاله باوع بوجهه ورد باوعلي اشرت لاااا

ضمه لصدره وصاح لايبوووية

خطفت الدنيا  بعد ماحسيت

شي ينغز بأيدي؛  ايد تمشي على وجهي فتحت عيوني ضي كاعده يمي تبجي وازر واكف مجتف يباوعلي بقلق خليت ايدي على كلبي همست بتوسل لاتكولون مات

اخذ نفس ازر براحة وعدل وكفته وضي لزمت ايدي وبجت

- يمه ابنيي غاااح

ضي - لااسم الله على كلبه من عمري على عمره

-كتلوا ضي غاح دغع

ازر - والله مابي شي صح تعبان بس الحمد الله حالته استقرت

- لعد ليش تبجون لاتجذبون عليه

ضي - عليج لان ردت حالتج تعبت صار ساعتين فاقدة مانعرف عنج شي  والدكتور كال احتمال جبير تصحى ماتذكركم

- كوميني ضي وديني اله

ازر - وين تردين هيذام والاهل يمه خليج مكانج لاتردين توگعين

وخرت الغطة شلعت السيروم دانزل ودخلت هاله وراها هبة؛  ركض ازر لزمها صاحت عوفنييي وداعت ابني اموتهاا اليوم

ازر - كافي لج طلعي يله

هبة- شنوو اطلع ولك هاااي رادت تموت ابنييي وانتي شنووو من بشررر هااا اشلون انطاج كلبج تسممين طفل

هالة - موكلتلج بعدي ابنج هاي موعاقلة والحقد عاميها تريد الكل مثلها ماعنده بزر

- ليشش هاي كلها بس لان سمعتي هيذام رجعني ويرد طفل تكومين تكتلييي لج شنو هالحقد والسم ولج  حتى الحيوان ماسوه سوايتج

هالة - شنو حيوان واحنا اشلون نضل هيج لحد ماتموت جهالنا ماكوو شوفولنا صرفة وياها اني بعد مااضل بهذا البيت من جهة اسماعيل ومن جهة هيه شنوو بيت غابة

- وداعت درع اذا ماطلعت  حق حركة كلبي على ابني من عيونج فلا اكون هبة اذا ماخليت بابا يشمرج بنفس الزنزانة الخايسة الجابج منها ويخليج تتمنين ماواصله يم ماكون امه

- وين هيذام خلي يجي وانتي ضي كومي روحي  كليله صحت الرادت تموت ابنك خلي انشوف شيسويلها لو بس خبص المستشفى على روسنا وخله الكل واكف على تك رجل خايفين يموت ابنه ويحركهم 

ازر - هذا هيذام وراج ميعتاز تصيحي

درنا وجهنا لكينا جاي ملامحه وهيئته وحدها تخليك تعرف كمية الغضب الشايلة ؛ رادت تحجي هالة  اشر اشش يله بره

دخل اجه يمشي گوة مبينه الحرگة والتعب على وجهة وصل يمي خله ايده على راسي دنگ باسني وكعد يمي دنگ لازم راسه همست بي شي موو

اخذ نفس مسح وجهه ورفع راسه باوعلي

-كول مابي شي فدوه

مد ايده مسح دموعي شهكت جرني لحضنه ضغط عليه يحرك بشعري

هبة - يعني شفت تربية شوارع بس مثلج لااابد على شنوو تبجين لان ما مات لو تردين تقنعينه مو انتي ورا السالفة

هالة - شنوو موهيه ليش منو سواله اللفة ومنو اوصل يمه غيرها تره الكل شاهد هيذام شوفلنا صرفة هالمرة ابنك طلع منها منو يكول مره ثانية تلحگ عليه

هبة - واني ما اضل لمرة ثانية هو بس هذا عندي مااضيعه يم وحدة مثل هاي تريد اطلع انتقامها من هيذام بي شنو ذنبي انحرمة من الامومة؛  اني شكو حتى تموت ابني اخذه وارجع لماما اذا مااخذلي حقي منها لو طلعها من البيت ماارجع

- اني هم كمت اخاف على ابني راح ارجع لاهلي لحد ماازر يشتريلي بيت وحدي الي تكدر تكتل ابن زوجها مو بعيدة تكمل عالباقين اشو هيه عقلها ضارب حتى ماتحس ولاتذكر التسوي

وخرت راسي من حضن هيذام باوعلي همست والله العظيم مو اني اذيته لاتصدگ اسوي هيج بدغع

مارد دنگ

هالة - الحمدالله الخدم موجودين والكامرات هم موجودة كلها تشهد جان هم شمرها هيذام براسنا

باوعت لهيذام على كعدته مدنگ منتجيي على رجلي وعيونه عالگاع بدون صوت

لميت نفسي ورجعت ليورا اجت هبة كعدت يمه خلت راسها على متنه وتبجي وهالة كعدت شوية عني وتباوعلي بحقد

مر وقت الكل ساكت نفس ماكو عيونهم على هيذام الي مارفع راسه محد يعرف شيفكر بس كل شوية يفرك راسه يباوع بساعته ويرد عيونه بالگاع  لاذان الصبح وانفتحت الباب

درت وجهي واشوف دخلوا عمتي رحمة و دسار شايل درع على متنه كوه فاتح عيونه من لهفتي نسيت حتى المشكلة وخرت ضي نزلت من السديه ركضت اخذته منه حضنته حيل وغمضت دموعي تنزل مامصدگه بعد عدل

وخرته  مسحت وجهة رمش بتعب و همس رئول بطني توجعني

رجعته لحضني وشهكت بصوت

- ضربوني ابر هواي واني بجيت ليش عفتيني

- بعد ماعوفك ولادقيقة اتوبة

- خلي نروح لجدو ذولة بعد مانحبهم فوتوا صونده بحلگي وجعوني خلوني اصرخ

- هسه جدوا يكتلهم لان اذوك

- بعد لاتخلين بابا ياخذنه منهم نضل يم رايه بعد مانرجع

هزيت راسي اي وبجيت

هبة - عززه اشلون مالية عقل الطفل سم 

دسار- موبس عقل  الطفل حتى عقل ابو

رفع راسه هيذام گله كملت الاوراق

دسار- اي وصلن هسه

- ازر اخذ رئال ودرع انتظروني بره

ازر - هيذام اهدأ بعدنا مامتأكدين

- ازررررر

رحمة - ييمه الحمدالله ذولة ثنينهم مابيهم شي كول ياالله

صك على سنونه وخزر ازر ؛ بسرعة خله ايده وره ضهري وجر مرته سحلها  كامت هبة اجت تركض ورانا

استونا دنطلع وكام هيذام جره هبة من شعرها اندارت قبل لاتحجي شمرها داخل الغرفة من قوة الدفعة ماسيطرت وكعت على وجها؛   عدلت روحها باوعت لهيذام وكف مدنگ على رداناته يطبگ بيهم
رجعت ليورا وهمست بخوف والله مواني اسماعيل السواها

بسرعة عمتي دفعت ازر رادت ترجع لكفها دسار جرها شمرها علينه وسد الباب فقلها

لطمت على وجها وهالة صاحت  شراح يسوون بيها

ازر -كلها دقايق وتعرفين شكو

- تره اني مالي شغل لادخلوني بمصايبكم

ضحك بستهزاء وندار راح طلع برة الجناح

ركضت ورا تحلف مالها ايد وعمتي كعدت مكانها  لازمه راسها محتارة  شتسوي همست ضي وعلي اليوم يخلي الموته تكعد على صوت صريخهم تردد الشعار

- اشلون انطاها كلبها تكتل ابنها

- الي قنعت ابوها يكتلكم كلكم بيوم اليهربكم الدغش يصعب عليها طفل

- ميخالف احنا بعاد عنها مو هذا من گلبها

- حبت تضرب عصفورين بحجر ان مات وقتها هيذام يردها غصباً عنه حتى يصير عنده غيره وان عاش انتي تنقلعين وتظل الساحه فارغتلها وترد لحضنه

-عزه شنو من كلب عدها

-ولاحسبالج جانت ناوية بس تموت ابنهاا لااحبيبتي متفقة هيه وهالة من ياخذون درع للمستشفى  ويخله البيت ادخل عليج اسماعيل بس ماجت عدله وكعتي وامجد ركض بيج للمستشفى بعد عركة شكبرها ويه ام هيذام لان ماقبلت ياخذج

- يمه شنو ذولة العائلة

- نفسهم ذولة الي ضموا طفلة هيه وتنزف لحد ماماتت بس حتى يطمون السالفة ابنهم ونفسهم الي كم مره رادوا يكتلون هيذام بس حتى ياخذون راحتهم بالعب الاعوج بأعمار العالم

- ونفسهم استغلوا طفلة وحاغبوها بأهلها علمود تخدم ابنهم ومن حاولت توكف بوجهم سلموا اخوها للموت وضيعوا الباقين حتى يكسغون ضهرها

- مثل ماراح يكسر ظهرهم هيذام ويخليهم يزحفون ويتختلون جوه القنادر بس حتى يخلصون من ايده

دااحجي ونفتحت الباب طلع بيده ورقه يطبگ بيها ورا دسار مدنگ يحك بخشمه  صارت عيني على هبه خانسة يم الحايط لامه رجليها لحضنها صافنة ترجف و دموعها تنزل بكتمة

اجه يمي جر راسي باسه واخذ مني درع شاله ؛  خله ايده وره ظهري سحبني رحنا تركنا عمتي كامت تركض تريد تلحگ عليها

طلعنا بره  اتلكانه امجد فتح باب السياره صعدنا رجعنا للبيت على طول الطريق خال ابنه على كلبه عيونه بوجها اشلون نايم بتعب وشفايفه بيض

وصلنا للبيت نزلنا دخلنا جوه لكينا الكل ملتم  عمي بيده الفون  يخابر بصوت عالي وعمتي شايله ابن ازر واكفه يمه تهدأ بي

من دخلنا سد الفون وصاح انت شحاسب نفسك هااا مالاكي واحد يكسر راسك لو حسبالك العالم صدك خايفين منك

مارد اندار انطاني درع وكال روحي صعدي

- وييين تصعد درع تركه هنااا وتطلع برره مثل هاي ماتدخل بتي بعد

هز راسه طلع باكيته سحب جكارة دنگ ورثها اخذ نفس رفع راسه نفخها واشر كمل

- شكمل بس اريد افتهم انت شناوي وبيا حق اتخلي بنتي تتنازل عن ابنها واملاكها وفوكاها تعترف هيه الحاولت قتله

- شنو املاكها وياابنها هذا من منوو

- هيذام  التنازل والاعتراف هذا ينلغي وهسه درع يرد الامه وهاي طلعها لاورح ابوي تعرف شنو ضام عليك وشنو  اكدر اسوي بيك

- واني اريدك اطلعهن وتسوي كل اليطلع بيدك بس ياريت تستعجل لان ماعندي وقت انتظر ولااحب الانتظار

- شقصدك لك

-  كدامك اربعة وعشرين ساعة دقيقه ماغيرهن قضية رافد الدغش تنسد وقضية رأل تتحول بمكتبي واوراق املاكك  تصير بيد ازر وستقالتك تكون على مكتب ال…

- لاانت تخبلت

- عفية

- اسماعيل انت جبته وكلت ممنوع واحد يحبسه وتعرف عقله موتمام بعد ليش محملنا المسؤولية

-فرعنة

-وين تريد توصل فهمني

-لغرفتي اناملي ساعتين مو اكثر الي عنده نفس بعد بالدنيا يختفي منا واريد كلب ابن كلب  يجي يكول انت موخوش ادمي وتشتغل بدون تنبيه

عمتي - اووكف يمه  خلينه نحجي

- يمه ههه تدرين نسيت هالكلمة اي يمه تردين تكتلين ابني ؟؟

- منو كلك

- منو كلي هذا الهامج؟؟ ليش يمه تموتين وليدي وانتي تدرين روحي بي

-  ماردت اموته ردتك بس تحس بمعزة البزر واشلون حارمني من ابنيتي وخال عيوني خضر على الباقين ردتك تحس اشكد انت باطل وكد ماخليت الكل يكرهك يأذون طفل ماله ذنب بسببك

-والج بالمثل

-لاهيذام لايبعد امك ماتسويها وتأذي اخوتك

مارد خله ايده وره ضهري جرني دنصعد ودخلت عمتي ورحمة وهبة تركض شمرت روحها بحضن ابوها تصيح دخيلك بابا خلي الحگني

كملنا طريقنا خلينا ورانا يهدأ بيها ويتعهد يرده ابنها الها وصلنا لغرفتنا فتحنا بابها اتفاجأنه بوضعها منبوشه نبش بسرعة اجت براسي اوراق براءة بابا خليت درع عالجربايه وطلعت اركض دخلت للمكتب اخر نفس ومثل ماتوقعت لاضال كتاب بمكانه ولا ميز مامطشرين أغراضه

خليت ايدي على كلبي اخذت نفس واني اشوف بيت الجلب مامتحرك من مكانه

دخل وراي هيذام كال ها يبت الدغش ضيعتي  الاوراق

- لا الحمد الله ماواصليهن خليتهن بمكان لو يضل عمغه كله يشتغل بالمخابغات مايندلهن

- مم دروحي جيبيهن لا المنظفة تشمرهن ويه الفضلات وتصير براءة ابوج بالحاوية

- عزه شعرفك هناك ضامتهن

- مثل ماعرفت مستعده دفعين نص عمرج لخاطر تعرفين على شنو وقعت هبة

- اذا سألتك غاح تكلي

- جيبي الاوراق وتعالي يله تعبتي لايصيرلج شي

دخلت طلعت الاوراق خليتهن على كلبي ونفخت ضحك

-تغه ذني الشي الوحيد الي يشفعلي يم بابا وخواتي

-تتمنين ترديلهم رأل

-لو يگلولي تردين لذيج الايام الي تتقاسمين بالخبزه بليل وياهم واطلعين من الصبح للشغل اقبل مو انوب اعيش الدلال الجنت بي ويه خواتي وبابا

- ماضل شي هانت

-شنو غاح اتخليني اغجع اعيش وياهم

-ردت اوصيج على درع بس الشفته جان كافي يخليني أمنكم بيد اكبر اعدائي وروح واني مأمن

-وتعوفنا هيذام

-للاسف خلص العقد بيني وبين عزرائيل وصار الوقت اسلمها

همست بسببي غاح تغوح مو

- ههه لامو بسببج واكيد  ماننكر جان الج ايد بتعجيل الشغلة بس تهون الروح وراعيها لدغتج

- لاهيذام والله مااكدغ اعيش بدونك

ابتسم ومد ايده رحتله ركض اخذني لحضنه ضمني اله  دنگ باسني وهمس ترد ذاكرتج وبعد مامر على بالج اصلاً مو تذكريني اني مو اعز من الراحوا حتى تتوقف الدنيا عليه

-لهيج جنت تتمنى ماتغجعلي الذاكغه

-مثل ماتمنيت تنحرمين  من الاطفال حتى محد ياخذج مني ولا اشوف بعيونج اي الم مااكدر ابعده عنج

-بس وجع الحغمان اكثغ من الحمل والولاده

- درع صار الج كدام الاهل قبل القانون

رفعت راسي - خليتها تتنازل عن ابنها الي

- اقل عقوبة ممكن اتخذها بحقها ودرع حقج من ساعه الخلوج تفقدين امومتج ماضل الج يمي غير حقج من التعرضتيله وبعدها كلمن يروح بدربه موو

- ماغيد اغوح بغيغ دغب

-شنو بابا

برطمت ضحك وردني لحضنه عصرني حيل باس راسي وجرني ويا رجعنا للغرفة اخذ الاوراق مني خلاهن عالميز وكف ينزع بسلاحه

-غاح يسوي كل الكلتله عليه

-اذا حاب يعيش بعد

-اذا مانفذ الطلبته شنو غاح اتسويله تكتله

-اكو واحد كايلج اني رافد الدغش

-تغه بابا حباب وكلبه طيب كلش

-رضي الله عنه رأل خليلي ملابسي بالحمام بسررعة

هزيت راسي طلعت ملابسه خليتهن اله غسلت وجهي طلعت هو دخل ؛ وكفت غيرت ملابسي لان احس مابيه اتحرك مواسبح

رحت تمددت يم درع مشيت ايدي على وجهه مجرد ما اتخليته يخلوا بتابوت حسيت روحي اختنگت جريته لحضني ضميته وغمضت يمه من عمري على عمره ياربي دخيلك كلشي ممكن اتحمل بس لاتختبر صبري بي

وخرت عنه خليت  ايدي على شعرة وهمست  تدغي اني اكثغ وحده بخواتي جنت اخلي غنوده بحضني ابوس بيها واسولف وياها لان احب الاطفال وادغي محغومة من هالنعمة
من فقدت الامومة صح حسيت انتهى شكو حلم بداخلي بس من شفتك مااعغف شنو حسيت حسيتك ابني صدگ مع العلم جان ابوك عدوي

طلع هيذام يمسح براسه شمر المنشفة سحب باكيت الجكاير خله وحده بحلكه ورثها اخذ نفس باوعلي ونفخه كال منو عدو منوو

- انت عدوي منا لحد ماتاخذنا ونغوح منا وتبطل عن كل الدتفكغ تسوي لان مانگدغ نعيش بدونك

-تحبين درع

-تأذه بسببي لو موكلته بيدي جان ماصاغ بي هيج اني صح  مااستحق طفل مثله بس والله احبه اكثغ من غوحي

-ديري بالج عليه رأل

-اضمه بغوحي اتوبة بعد اخلي وحده  يمه شفته واكع اتمنيت الدنيا توكف عزه ولاحاسه هيج ماخذ معزة بداخلي

- هههه جنت احقق ويه الدغش واتصلوا بيه طلعت اركض وهو يصيح اذا صارله شي لاترد  دمك مايكفيني

-  حاسبة حفيده مو ابن عدوه

- هو راح نسوي تبادل انطي ابني واخد بنته و نحل النزاع الازلي

- يكيف والله هو امنيته يصيغ عنده ولد

اجه دنگ باس راسه و تمدد  صار درع بينا لزم ايدي باسها

- على منو خفت اكثغ اني لو دغع الله عليك كول والله مااضوج

- ماعندي غيركم بهالدنيا خسرت كلشي ضال عايش بيكم

-انت لو بس اتبطل هالعنف والظلم والله انت خوش  غجال

-هاي نصيحة  لو تجدي

- شتحس من تعذب العالم

- والعالم يكتون براءه غير كلاب ولد كلاب اذا هو يجيك شابع كرستال ومغتصب اطفال اعمارهم ماتتجاوز السته وسبع سنوات شتسويله بهالحالة  تكيت عليه و تعزمه على مندي

- تصلخ جلده

- لاانتزاع الجلد صارت قديمة اكو امور مستجدة هواي هم تنمي عقلك بمعرفة شكد مدة تحمل اعضاء الانسان تحت الضغط قبل القلع وهم تكتشف اساليب حديثه تفيد ولدنا بالمستقبل

-هم عدكم مشاعغ  مثلنا

- لوعندي مشاعر واحس ماخليتج نايمة هالنومة وتلدغين براحتج نامي رأل

-اسمي غئال 

-بت رافد نامي

-هيذام مو تعذبه بالتحقيق

-تكلفج الشغلة

-مو يطلع واكله

-خلي اخذ مالاتي وسهل الباقي

-شنوو يعني

-مكان الراجدي بوسة  والدفره حضنه خو الفلقه معروفه مارادلها ذكاء وانتي حسبي على مدار اربع ساعات تحقيق

- خوش والله  هو يكتل بالعالم وانت تاخذ غاتب عالتحقيق اني دخلوني بنصكم شكوو حلو مشاكلكم بعيد عني

اشر تمام  وغمض

-هيذام

- همم

-ماغاح تعذبه مو

مارد

-والله تعبانه

-نامي

- زين اليوم بس غاجديات ودفغات يصيغ

ضحك كمت عدلت نومة درع ورحت يمه فتح اديه دخلت جوه الغطة ضمني بحضنه باسني ضمني بقوة وهمس دخيل الله شمعزتج

خليت راسي على صدره وغمضت من التعب رحت بالنوم بسرعة

كعدت على صوت ضي تضرب على وجهي فتحت كالت صح النوم عيني تره صارت الخمسة العصر

-لعد ليش ماگعدتوني

-والله هو رجلج صار ساعتين لازم الصاعقه وصافن محتار بيمن يجربها 

-عززه وين دغع

-يم عمتي رحمه نزله هيذام كاعدين بالحديقة

-شنو الاوضاع جوه

-الي يحبه كلبج كومي تفوتج الاجواء نزلي شوفي الطياح الحظ الي مسويته ام هيذام النكسه

-شنو

-عدها اخو بالمخابرات مخابرته وعارضه عليه مبلغ بالمقابل يدز جماعة يعوقون هيذام

-منو كاللكم

- واحد اسمه رماح صح هو عدو هيذام بس الضاهر اكو شغلة مشتركة بينهم اجه هو ودسار من شوية اخذوا وطلعوا بس تره محد يدري بالشغله لاتفلتيها كاعدين بالحديقة كل واحد شاگ حلكه من الاذن للاذن وفونه بيده منتظر يوصلهم خبره

- عزه شنو من ام هاي

- لو يكللها ابراهيم الجلب كتلي بزرتج كلها ماتكله لااهم شي ترضي حتى من طلع هيذام كال لازر ترد اسماعيل للمصح خلته بس طلع كامت وكفت بوجهه ازر كالت اسماعيل بعد ممنوع يطلع من البيت حالته استقرت مو حضرة هيذام كلما يشوفه هدأ يرد يسودنه

- لعد همه موخايفين من وجودة ويردون يخلصون منه

- هاي قبل من جانوا مشغولين بتخطيطهم اشلون يخلصون من هيذام موهسه بعد مادزوا جماعة ورا وتأكدوا هالمرة مايطلع منها غير بشلل ؛ والله اعلم شناوين بعدها الي هيج جلبوا بأسماعيل  ويله دگومي ماأمن على درع بينهم اخاف عمتي وامجد يغفلون  عنه

كمت بسرعة غسلت وجهي  غيرت ملابسي لميت شعري شلون مجان نزلنا سويت لفه عالسريع وطلعنا شفنا درع بيد امجد كاعدين يم الحرس يلعبون ويا

أمنه عفناهم  رحنا للحديقة لكينا عمي كاعد كالعادة بحضنه ابن ازر وهبة يمه خالة راسها على متنه عيونها حمر 

ومن الجهة الثانية عمتي بحضنها ابن حسن وبتها جاية كاعده يم هالة

سلمت عليهم محد رد السلام اني هم دنكت بست عمتي رحمة وكعدت همست اشلونج يعمه

-الحمدالله

-خواتج اشلونهن

-والله مااعغف شي عنهن متانية دساغ يجي وسأله

-ماطول امج يمهن ماعليهن لاتخافين

-ان شاء الله اندعي بس يطلع بابا ياخذهم ويبعد حتى أمن صدگ

-وتكدرين بدونهن

-احسب نفسي ماشفتهن وماعندي بس هيذام مثل ماكلتولي

-والله يعمه هيذام الي منعنا نكلج

-يله بعد صاغت المهم شبي عمي يباوعلي  هيج

اتحسرت ودارت وجها خليت اللفة بحلكي صارت عيوني على هالة وامل يتهامسن ويباوعلي بكره وعمتي ماعوزها بس تتفل بوجهي

عضت اللفة ودرت وجهي لعمي كال من اكول بت شوارع وماتنزل يمنا رحمة تعترض

رحمة - خير يخوي شصار

- اكو اكثر من  مستوى الانحطاط الي صرنا بي شمتنظره يصير هسه من يدخل واحد علينه ويشوفها بهالمنظر القذر شنو موقفنا

هالة - والله يعمي رادن يجن صديقاتي اعتذرت كلتلهن ماموجوده بسببها خفت تنزل وقتها انفضح واصير سالفة بينهن

ام هيذام - هذا  حضنه غير جبناها من التجدي لخاطر تخدم كام اخذها وسواها شغلة تحدي ويانه اخاف معوزين شلعان كلب يزودها

هالة - عمه شوفولكم حل والله لعبة روحي

- هو منو المالعبانه روحه اني المحرومة من بنتي كل كم شهر يالله اشوفها لو هاي سودة عليه كسر ضهرها  بتهمة مالها ايد بيها واخذ بأبنها خله دمعتها تنزل 

ابراهيم - مو بكيفه غصباً عنه راح  يشگگ الورقة ويمحي التهمة ويرد افلوسها وابنها وهو الممنون 

- واشرط عليه لاتتنازل عن قضية الدغش اذا مااخذ هاي وطلع منا نريد نرتاح جبنا عمرنا وياا ركض كرهنا بعيشتنا

هبة - كله من وراك بابا انت جبت هاي الحثالة النا وخليتها تخرب حياتنا

ابراهيم - كلها مسألة ساعات وكلشي يرد مثل ماهو لاتبجين يروح ابوج مثل هاي بت عاهرة ينتفل بوجها مو ينحجي بيها

هالة - عمي وابو ضي هم كبر بعد مابي فايده ولايشتغل عدل شكو خاله

- حجيت ويا كال بس انطيني كم يوم اجرلي مشتمل واطلع

- خوش واني ادفع اجار كم شهر من عندي خطية ماعده هم اكسب ثواب بيهم

ام هيذام -  وانتي عمه ضي اكو كم حاجه بالمخزن ليش ضالات احسن مانذبهن كومي طلعهين غسليهن  يفيدنكم بالبيت

هبة - على شنو تنطهن تره اكو ناس افقر

- لاثواب خطية ماعدهم وابوها رجال جبير يادوب يشتغل يدبر لكمته وهنه ماييسون كاونتر قديم وطباخ نص عمر

- عاد كون يصير بعينهم ويعرفون شنو  مستواهم

- يصير لولا هو منو مسولف بيهم هيج عالم غير للخدمة ماينفعون ولايفكرون حتى لاينكسر راسهم

اباوع لضي غمضت لزمت ايدها دفعتني وكامت راحت للمشتمل ردت اكوم لزمت ايدي عمتي رحمة اشرت عوفيها

- اذا طلعت ضي منا اني مااضل

هالة - وانتي منو التاركج هنا مصدگة نفسج هه اصحي تره جبناج من التقاطع حدج اتجدين مو تكعدين بينا

رحمة - هذا الحجي اجلي من يوصل هيذام 

- ويوصل شنو مخوفنا بصوته تره ملينااا عمي اذا ماشافلنا حل ويا اني اخذ ابني واروح ومارد لو تطلع هاي منا لو يعزلي ازر

ابراهيم -شكو هيج منفعلة شنو گلت اني وخليها براسج لو مو تتعاركين ويه ازر لو توصل بينكم للانفصال حفيدي دقيقة مايطلع من بيتي مو يروح لاهلج

- عمي دتشوف حالنا انت

- اي وماضل شي كلها ساعات يبعد عمج الضاهر جنت غلطان من سكتت كل هالوكت المفروض انهي السالفة من زمان بس اااخ من ام هيذام

ام هيذام - ندمتت هاي اصابعي وعضيتهااا حسبالي يستعدل ويصير ادمييي اثاري مثل ابو مايعدله غير التراب

رحمة - يمه اسم الله على كلبه

-هيج ميته عليه هاي راح يرد عود اخذي هو وعاهاته وطلعيي فكينااا من شوفة وجهه وشرره

استغفرت عمتي ودنكت  واني عيوني بضي حسيت بكسرت كلبها  حتى مااسمعهن شنو يحجون امنيني اكوم اتفل بوجهم واروح وراها انطيها عنوان اهلي تروح تعيش يمهن وتعوض الذل العايشه بي

دقايق واسمع عمي يحجي بطريقة صدمة - هذا  شرجعه
درت وجهي واشوف هيذام وازر داخلين

اجوي ازر سلم شمر سلاحه ودنگ شال المي يشرب؛ و هيذام سحب الكرسي اليمي گعد بدون لا يحجي اتنجه شال رجله خلاها عالميز وطلع جكارته دنگ يورثها صاح عمي هاي هم معتبرها كعده مال بشر

اخذن نفس نفخ واشر شنو

- نزل رجلك

-البسطال مضايقني رادله تغير

-اشلون رجعت

-بسيارتي ليش

-قصدي وين جنتت

عگد حاجبه اندار لازر اشرله وين

تحمم ازر ودنگ يحك بخشمه

عمي -مو وياااك احجي وين جنت

هيذام -اندور على جواميس قررنا نترك وضايفنا ونشتغل بالحلال

-درع ترده بأسم امه

اخذ نفس من جكارته نفخه واشر بعد

- تصير ادمي وتمشي عدل وهاي طلگها وترد تكمل قضيتها وترد رتبتك وترجع للمكتبك ومركز السابق

رد الجكارة بحلكه

- تحسم امر هبة تريدها ماعندي مانع ارد ايدي بيدك وتردها الك ماتريدها طلكها خليها تشوف مستقبلها

عدل كعدته وانتجه رفع راسه غمض طگ ركبته من الجهتين

-مويااك احجي انيييي

-كم ساعة بقى عن الوقت المتبقي بس ذكرني

صك على سنونه عمي طلع ورق من جيبه شمرها على الميز كدام هيذام اباوع صورة غزوان  بيها ردت اسحبها بسرعة جرها هيذام همست بس اشوفها

طبگها راد يخلها بجيبه لزمت ايده باوعتله بتوسل تركها اخذتها منه فتحتها اباوع صورته بالمناظر على اوراق القضية خليتها  على كلبي وغمضت مااعرف شنو احس بس اكو صرخة مكتومة بصدري تخنگ دنيا بكبرها

فتحت عيوني على صوت عمي وهو يكول ها بابا  اسماعيل شجابك هنا

درت وجهي لكيته واكف يم ازر مبهذل شعره وقذارته وين واصلة  باوعلي بغضب رجعت دنكت باوعت لصورة غزوان

معقوله المثلك يموت وتنتهي احلام بناها وتعب عليها سنين لخاطر مثل هذا يعيش

عدل كعدته هيذام وسحبني لحضنه همست كل حلمه جان يشوف  غايه بالبدله البيضه

-الله يرحمه

-مات وهو عيونه وغاي خايف تغمض عينه قبل لايودعني

-كافي بابا

-غاح غزوان ماشاف من الدنيا بس التعب والكتل  علمود يحمينا

عصرني حيل وصوت ازر صرخ  لاااااا 

بعدني مارافعة  راسي دفعني هيذام ليجوا صار عليه وعمي طفر صرخ ازر  لزززمه

كلها لحظات صوت الرمي مخلوط بأصوات صراخم هوسه ويه وركضت الحرس  عصرني هيذام حيل وضم راسي بصدره محاوطني من كل مكان

لزمت ملابسه غمضت دقايق وصار هدوء المكان تحول من ضوضاء وصريخ لصنته بدون نفس  وخر هيذام فتحت عيوني

ازر وكف صافن على اسماعيل الي مجتفي الحرس يباوعلنا بغضب 

عمي بيده سلاحه  عيونه على ابن ازر بالگاع صدره مزرف بالرصاص وعمتي ام هيذام بصفه فاتحة عيونها وراسها متهشم

هبة واكعه عالميز الدم تارس ملابسها وهالة بغير عالم عيونها على ابنها و تبتسم

رفع عمي سلاحه عليه سحبني هيذام بسرعة خلاني ورا ظهره ؛ دار السلاح على  اسماعيل باوعله بكسرة نزلت دموعه ورمى  …

لاتنسون التصويت❤️