تحميل رواية «شيء من رصيف الدم» PDF

شيء من رصيف الدم

بقلمي- leo Alfatlawi

بارت التاسع والعشرون

***راية***

هيه  تحجي وهو واكف مامصدگ

غيمة گوة كاتمة فرحتها تباوع لگمرية الي ضحكتها ملت وجها عكس هيام باهته عيونها على ذباح

انتجت بيبي ورفعت حاجبها اشرتله ها

ذباح - شني هاااا لايمة دخيلج

- حلفت يبن البدوية

- انه ادفع الكفارة وعلي البت مناطرتني وهاي وصية غزوان لاتجسرين ظهري مروتج

- وانه ماخليت يمين اذا ماجنت ناويتها  اخذ اخيته وحلل راية

- كضيت شاربي وعطيت جلمة لامها

- والبنوات ماهن بضاعة واگلك خذ هاي وحلل هاي گوم ذباح اطلع من هون انسى البت

- شني هو الي انسى ومن اجابله  شني اگله مانه گد جلمتي يخوي ضيعت اخياتك درت وجهي عنهن وهنه ينخني

- كلت العندي وخليت يمين

دار وجهه باوعلنا يسحب النفس بصعوبة الصدمة واضحه على وجهه ورد يباوعلها باهت مايعرف شيرد صار هدوء مرت دقايق وشمرته بسبحتها اشرتله اطلع

-عطيني رضاتج بس احدر للبت اخلصها ومن ارد الج جلمة يمي احللهن اثنينهن من ذمتي

- اطلع ذباح

- هذاااا رفيجي

- صهيييب كوم طلعه من هون

- يمه

- شگلت انه جني خرفت وبعد مالي جلمة يم حزام ظهري

- يخس اليگول هيج جلمتج تتنفذ على ارگابنا بس هذا مانه موت هاي جسران ظهر وعلي

- خلك هون انه الطالعة

رادت تكوم ركض لزمها دنگ باس راسها دفعته وصاحت غررب لك

كام رجع ليورا وگف  يباوعلها بحيرة

- حدر يجده صگر اسندني لبيت هلي جني ماعرفت اربي

صهيب- گولي يالله ام صهيب

-اكولها من اعرف وراي ازلام اگف اتباهه چدام العالم بصيتهم موش جهال ترچفهم جلمة المحنة وانت يجده صگر حدررر لهون اسندي لبيت هلي واريد واحد يعر لصوبي لخاطر اترس فجه بارررود

ذباح - خليج بمجانك ؛ غيمة يبه انتي طالگ

كالها واندار بغضب  شال سلاحه وطلع ؛كاموا صهيب وصگر لحكوا بسرعة

گعدت  هيام مكانها لزمت راسها صافنة وغيمة لطمت على وجها وركضت نامت  على رجلين بيبي صاحت لادخيلج جدة  ماعندي احد وين اروح اني راضية والله اصيرلكم خدامة بس خلي يردني ابوس رجلج

بيبي- وانه حرمة حاجة بيت الله ورجلية خاطة بالگبر ماظل عمر  لخاطر اخلي ذنب برگبتي

- اتظلميني من تخليني هيج مذلولة بدون اهل الكل  ينهش بلحمي

- يخسى اليگرب صوبج وانتي بين هلج هذا بيتج وذولة اخوتج والج حگ هون گد احگوگهم واكثر تبگين على روسنا لحد مايجي اليگدرج ويصونج بيت من مگامج

- مااريد راضية هيج اني قابلة اضل بدون زواج بس يخليني باسمه ابوس ايدج كليله خلي يردني واني وروح ابوي ماافتح حلگي واطلب كلشي

-  هو لو رايد يخليج بأسمه ماحللج من ذمته

- لاانتي ضغطتي عليه بس احجي ويا هو يسمع كلامج جدة اصيرلج خدامة حتى للحلال اطلع بروح اعزازج لا تكسريني اكثر مااني مكسورة ومذلولة

ماردت عليها جرت ايدها رادت تبوسها سحبتها حيل ودارت وجها لفجر كالتلها گمي اخذي حرمة اخيج وديها لداره الجبيرة

كامت فجر اجت رجعت ليوره اشرت وين

-كومي يمة وياي

- شنو وياج منو گاللكم اني راضية تره ماتگدرون تغصبوني

بيبي - من ازت ولدي للموت واعرف مانه راد اغصبج من اعرف راح يروح تعب ارباي ومايضل اله اسم بين ديرته اغصبج ان جان ولدي صاحب نخوة ومايرد بجلمة انه ام  واريد حگي منه

- شنو يعني؟؟

-تردين ترد اخيتج تصيرله حرمة وتعوضيني مجانه

- شدتحجين انتي

- هذا العندي وماجسرت كلب هيام وهيه اعز وحدة بنواتي لو ماجنت حاسبة يجيني عوض يگر عينها وعيني بي هنه جلمتين ماكو ثالثهن للفجر ضل ساعتين تردين اخيتج ترد تصيريله حرمة رافضة خلي ياخذ هيام و يطلع للبر يسعى وره حلانا الي تاركي لخاطرج وكتها اكون معذورة من اي عتب

همست بكسره والله حرام عليج

- عليش حرام يجدة شعاملة عطيت ابني للموت اريد عوض مجانة شطالبة انه

غيمه - اني اجيبلج طفل بس خلي يردتي

- وهو اختار راية

- شنو رايه ليش بشنو تختلف موهاي مرت صاحبه الكاتل روحه عليه لو دفن مناا خله عينه على مرته مناا

- انكتميي وفارجيني يله الغسل لهيج لسان باذر مايطلع منه بس الجلمة العوجة وانتيي فجررر اخذيهاا يله

جرتني فجر ردت ادفعها اشرت اشش وحركت عيونها على امها سحبتني طلعنا بره وخرت ايدها كلتلها مااروح واختي الها الله مايقصر ربي عشى منه

- اشش يمه صوتج شمالج كل عقلج ذباح يعملها هسه لو تذبحي مايتنوعلج مانه يگربلج

- ماسمعتي انتي شنو رايدة

- اي وحگها هذا ولدها بس انتم هم حگم واخيتج الراح تروح بيها  لهيج شغلي عكلج هم ردي اخيتج وهم ماتجسرين جلمة ذباح العطاها لخويه

- لااشغل عقلي ولا اتوسل بيكم كافي مذلة رايحة لذباح اذا كال مااروح وراها اطلع لبغداد اروح لاهل زوجها مهما يكون هاي مرت ابنهم راح يساعدوها

-ماتلحچين يگلج كلها كم ساعة واختج ياخذوها غير مجان هاي اذا ماجتلوها

- اسم الله على كلبها

- جا شني بفكرج  ولاحسبالج تموت وترتاحين راح يضل الندم ينهش بروحج طول ماانتي عايشة لهيج ييمه سمعي مني تراجن بمعزت روحي صرتن وغزوان اعز منجن عندي بيدي وليدي دفتنه وهو عيونه  عليج  مايعطيني گلبي اخلي يغمضها بكسرة وراج بس  امانه يضل بينه الحجي لان امي غالية عليه ومااگدر على زعلها

- شنو اسوي دخيلج بسرعة اخيتي راح تروح

- تجين وياي لغرفة ذباح  وتخشين جدام الكل وانتي راضية وانه اروح احجي ويا يعمل نفس الشي من تقفلون الباب كلمن يكضه مجين حالكم حال الاخوة من يطر الفجر ودزني لخاطر اسألكم اكلها كلشي تم تاترضه وتخلي يلحگ اخيتج

سكتت

- لاتصفنين استعجلي لخاطر ارد لهيام ابرد گليبها   سوده عليه ماهي گليلة جسرتها

اشرت اي مسحت عيوني رحت وياها فتحت غرفة دخلتني بيها وسدت الباب راحت  تركض

وكفت اباوع غرفة اخشاب كاملة صح قديمة كلش  بس مرتبة كنتور خمس بوب ومن جهه الثانية ميز مراية مفطورة بصفها تعلاگة ملابس معلكة عليها كم شغلة لذباح

جرباية عليها فرشه ام الطاوس اسمع برة صوت غيمة تبجي وتلطم عفتها ورحت كعدت عالجرباية عيني بالباب  صافنه بالوكت شضاملي بعد وين ناويي يوصلني

مر وقت وعيني بالساعة التمشي وذباح ماكو

احس القلق مشنج كل جزء بيه  حتى البيت صار عرفتهم ناموا

مسحت وجهي بعد مااگدر اگعد اكثر گمت مديت ايدي داافتح الباب ولميتها  مااعرف خايفة اشوف ذباح بوجهي  لو خجلانة لاشوف هيام

غمضت انداريت انتجيت عالباب وگعدت خليت ايدي على صدري لزمت المدالية همست وينج تركتي الحمل على ظهري ورحتي تعالي گليلي شسوي انهزم اروح لاختي ادورها  لو الحگج للمركز أكلهم اني الكتلت لو اروح لگبر غزوان احضنه وانهي روحي يمه

ولج يمة تعالي ليه لاتخليني بهالحيرة وحدي والله خلص حيلي بعدهم بعد مااگدر احمل اكثر

لميت رجليه لحضني خليت راسي عليهن اكثر من نص ساعة واني صافنة بس دموعي تنزل بدون صوت حسيت يدة الباب اتحركت گمت وخرت دخل ذباح باوعلي مسحت موعي بسرعة همست راح تروح مو

مارد اندار سد الباب

- ذباح دااحجي وياك 

-شتحجين وين انگلع تعرفين امي شمناطرره تكض يالله تخليني اطلع

-عمتي راح تحلها

-يبه تراها البدوية هاي ماهي جاهلة ولا غشيمة لخاطر تضحكن عليها بشغلة ماتخش راس طفل

- يعني شنو راح تعوف رؤيااا

شمر سلاحه وگعد على طابوريه لازم راسه محتار

كعدت يم رجليه لزمته همست بترجي ماعدنا غيرك مو تكول انتن اخياتي ذباح رؤيا منتظرتك لاتتخلى عنها 

رفع راسه عيونه دم باوعلي بعجز

- ماضل عندي عدي غيرها كلهم راحوا اخر امل ضل عايشة علموده

- حالي حال المجتف ويصارع الموج يتنوع لجرف بترچي

- اموت وراها والله

- الموت اهون من غدره

- وهو مادخلك بيتنا وامنه يمك لوماثاق بيك معتبرنا خواتك

- شعمل رايه وعلي همجن جسر ظهري

- كللها معذورة واني احلف مكانك واحمل اثم الحلفان والله ربي راح يسامحنا ادري

سكتت

نزلت دموعي باوعتله  بتوسل مسح وجهه دنگ مغمض بحيرة  شهكت فتح عيونه اخذ نفس خله ايده على راسي وهمس  بسج بجي يبه   انه احلها

- راح ترجعلي رؤيا

- اليوم هيه بحضنج

- الله عليك ذباح لاتجذب عليه وتحرگ كلبي

- افاا انه احرگ كلبج وعلي احرگ الديرة بكبرها بجلمة منج يحرمة غزوان

- كوم لعد روحلها

- گبل لااكوم اكو كلام لازم تسمعي

هزيت راسي شنو

- بس گبل كلشي خلي براسج غير نظرة الاب لبنته ماراح اتنوعلج وغير حرمة لاخويي مااحسبج سمعت اسمج وعرفتج گبل لاشوفج كد ماجان يسولفلي عنج تعرفين شني بعني

- لا

- يعني اعتبرني موش اخو لا روحه ويفضفض وياها امني على عرضه وشكالي من تعبه هو واثق ماراح يجي يوم واغدر بي

- ماراح تغدره

- جدامج وداخل هالغرفة بس

- يعني شنو

- بعد طلعتي من هاي الغرفة جثير اشياء راح تتغير اولها اسمج راح يكون جدام الكل مرتبط بأسمي تعرفين شني معناتها

- هئ

- كل دمعة وضحكة راح تكون رجعتلي اي تصرف وكلام ينحسب عليه

- والله راح اصون اسمك واسمع كلامك واكونلك اخت تفتخر بيها

- وانه واثق بيج بس اسم غزوان بعد ماينذكر بره مااكلج انسي لااا ذكري بكل لحظة وعيشي ويا وكل ماضاگ كلبج وفكدتي گليلي اخذج لكبره بس كلشي تعملي يكون بداخلج  لاتجسريني جدام هلي

- اي والله

- الخوة بداخل الغرفة نعبر الباب تتغير المعاملة وانه وداعت امي ان جان جدامهم او هون غير اخيتي الصغيرة مااعتبرج

- وروح غزوان ماراح اخليك تندم ابد شنو تريد اسوي بس رجعها الي

هز راسه وكام دخل للحمام دقايق وطلع مطبگ ردانه وعاصر ايده بخاولي وصل يم الجرباية وخر الخاولي سحب الفرشه مسح الدم  ورجعها

اندارلي كال صرخي

-شنو

-صرخي يبا  شبيج ثوليتي

- وليش اصرخ

- رايه ماضل وگت لاتنعلين ابوي بغبائج

سكتت صافنة عليه مامفتهمة شيريد بالضبط

هز راسه واجه رجعت ليورا

همست بس اهدأ لاتصير عصبي وكلي اصرخ حيل لو قليل لو اشلون

- اي شي بس طلعي صوتج رحمة لديننج

- يعني اصيح يبوو لو انخي احد

باوعلي بقلة صبر احسه گوة متحمل واكف

-اشبيك معصب

-انه اكلج

كالها وماحس غير الراجدي اجاني من قوته هيه صرخة وهي شمر اجيت ترس عالجربايه لزمت وجهي وشهكت

مسح وجهه استغفر واجاني رجعت ليورا بسرعة  لزمني وهمس اتأذيتي يبا

- تضربني وتكووول تأذيتي

- شعمل خلص الوقت وانتي الغباء يمج بلادي من المصنع  لراسج گبل

- ليش ضربتني

- لخاطر هالصوت الجنه صوت فارة جاتلها الجوع

وخرت ايده ضحك مسح راسي - تهون يحرمة غزوان تكبرين وتنسيها ان شاء الله

راح للكنتور طلع ملابس رجع للحمام سد الباب ثواني واسمع المي مسحت دموعي اباوع الفرشة كلها مدمرة والمنشفة هم مشموره بالگاع

مسحت خدي ودنيت على جهه گعدت لميت رجليه دقايق وطلع بطرگ البنطلون ينشف بشعره اباوعله شگله يخوف جسمه متروس ندبات وامتونه مبينات مال شغل وحمل اوزان جبيرة من غير صدرة علامة ضربة سجينة ماخذة حيز جبير

رن فونه راح رفعه باوع بي فصله بسرعة لبس تيشيرته وكف  مشط بستعجال وربط حزام السلاح شال باكيت الجگاير وفونه راد يفتح الباب وبطل اندارلي كال خربطي شعرج  وعيشي اللحظة دخيل ربج لاتضلين هيج مصفطة

-يعني افتح ظفيرتي

- دخيل الحمزة راية فچي عقلج لاا افچه بچيلة

-والله فهمت

-اذا احد سألج ماتردين ابد والحجرة لاطلعها لحد ماارد سمعتي

اشرت اي فتح الباب وطلع اسمع بره صگر يركض  وصوت صهيب يستعجله يكلهم الربع طلعوا جدامكم وانه ساعة والحگكم  اتوكلوا عين الله ترعاكم

صوت سيارات وعمتي تندعي وراهم رفعت راسي للسما همست يارب ونزلت دموعي

حضنت رجلية استوني اندي وانفتحت الباب دخلت فجر رادت تحجي شافت دموعي والوضع سكتت مثل الي تأكدت من شي

سدت الباب واجت يمي دنكت باست راسي كالت يجعلها العوض وزواجت الدهر

هزيت راسي

-تگدرين تكومين لو اسندج للحمام

-هيام وين

-صهيب وصلها لاهلها

-سمعت صرختي مو

-لاتحملين هم احد كافيج الهم الحاملته يله كومي للحمام خلي اجيبلج هدمة نظيفة لخاطر تجين يمنا بين مانصلي صلاة الصبح يحطون الزاد

اخذت نفس وكمت رحت للحمام دخلت سديت الباب وراي شمرت ملابسي سبحت عالسريع بدون فكر كل تفكيري ولهجت لساني يارب ردلي اخيتي سالمة

جابتلي ملابس  لبستهن وطلعت لكيتها شايلة الفرشة والمنشفة خالتهن بعلاگة  شافتني سحبت منشفة لخ  واجت لفت شعري وكالت الحجيه مناطرتج

اني هم ماعاندت نسيت حتى كلام ذباح مشيت وياها للغرفة لكيتهن كلهن گاعدات الي تصلي والي تلم الفراش بس غيمة على گعدتها بعدها تبحي دخلت داسلم وسكتت على صرختها ولطمتها على وجها لزمتها گمرية حضنتها تسكت بيها

درت وجهي عنها رحت يم الحجية كاعدة عالسجاده دنكت بست راسها  وكفت مااعرف شنو احجي شالت راسها باوعتلي لزمتني الرجفة خفت تسألني واخربط بالحجي وادري بذباح راح يجرب اسمه بيه بس تنكشف جذبة 

ابتسمت واشرتلي كعدي

گعدت يمها شالت ايدها خلتها على راسي- عليش  ترجفين يجدة

-هاا مو شسمه

-تهون وتعگب يجده لاتشيلين بكلبج عليه وعلي لومااحبج وتنوع بيج حنية الدنيا وصبرها ماجبرتج وراح يجي يوم وتذكريني وتترحميلي عبنج نظيفة وتستاهلين تكونين بحماية واحد مثله

- مارايده شي بس كون يرجعلي اختي

- ترد يجدة ترد وتنام بحضنج وتشكيلج وتذب همها عليج وترد لزلمتها

- ميخالف والله قابلة اضل عمري كله وحدي اباوعلهن من بعيد اهم شي يكونن سعيدات وعايشات براحة

- لهيج الدنيا فرتج وجابتج گرب ابن البدوية ربي يكر عينج بيهن ويعوضج بعوضه ويسترج بستر زينب

- اندعي كون مايرجعلي والله تعبت

- كومي صلي صلاة الفجر وبعدها صلاة الشكر وانوب صلاة طلب حاجة

كمت بسرعة فرشت السجادة وسويت مثل ماكالتلي خلصت سجدت بست الكاع وكمت لفيت السجادة  كعدت يم عمتي فجر  گالت- اتقبل الله يعمة

- منا ومنكم بس يرجع ذباح نروح اني وياج لهيام

- اشكد حجيت وياها بس فتت كلبي خليها ترتاح كم يوم يم اهلها

- حقها اني لومكانها وشايفة غزوان داخل كدامي جان موته بيدي

دنگت

- جذب والله راضية حتى من جنت اكله كون تموت ولااشوفك متزوج جنت اجذب ردت احسسه اشكد اني احبه مو قصدي ادعي عليه 

دمعت عيونها

-بس هو استعجل بالموت موو

سبحتني لحضنها شهكت عصرت راسي وبجت على بجيتي ماصدگت الگه حضن اذب حملي بي بجيت شكو الم جنت كاتمته بروحي وخانكني لحد ماكالت بيبي بسج يجده ترا جايج تعذبي بگبره مسحي دموعج ورفعي اديج بالدعاء يرد اخيتج ويعوضج بزلمتج 

وخرت مسحت دموعي دنگت وعمتي انتجت مغمضة ايد لازمه سبحتها وايد تندعي

الوقت يركض وماكو اي خبر بس  غيمة تكوم وتكعد تتوسل بأم صهيب  ذلت روحها ذل حتى نسوان صهيب متعجبات ماخلت لاايد ولارجل لبيبي ماباستها  ماتركتها لمن  اخذت منها كلمة من يرد ذباح يرجعها لذمته

خلص النهار صار الليل واحنا على گعدتنا من گد القلق حتى شعري مامنتبهتله لحد ما مرت صهيب الصغيرة مشطتلي 

لامه رجليه گاعدة وسهى مرت صهيب الجبيرة مكابلتنا صافنة اعرفها  خايفة على ابنها من غير  عمتي فجر متمددة ضغطها صعد عگس گمرية  الدنيا ماسايعتها تباوع بالفون وتبسبس ويه غيمة بالخنسة

استغفرت ودرت وجهي سبحان الجمعهن احسه وراهن مصيبة بس ربي يسترنه منها

دخل صهيب طفرت سهى اتلكته باس راسها واجه دنگ باس راس بيبي كالتله بشر ييمه

- رادين بالطريج

- خير ان شاء الله وام رايه شني اخبارها

- الحمدالله اذا موش هالاسبوع تطلع الاسبوع البعده

- يالله هيج وتكف مصايب ذباح ويركد

- هههه وعلي لايكن ولايركد تخلص يضل يفتر اذا ماحصل احد يتكاون ويا  يكض ازلمة بالطريج ويطگه باطل بس لخاطر يرد بطلابة تشغله

- اهاا وترا ابنك هم طالع نفس الطگة

- والله يحجيه ابني ماجان هيج هذا ابنج السودنه وابشرج صار نسخته يشري المشاكل بفلوس

- ربي يحفظهم كوم يمه اتسبح لخاطر يزهبون العشه

- خلي يرد ذباح وناكل سوه

دنگ باس ايدها وكام كعد عالقنفة اباوع لكمر بسرعة عدلت حجابها وكعدت عاقلة حتى الفون قفلنه وضمنا جوة المخدة

اقل الساعة واسمع صوت ذباح صاح يالله كمزت طلعنا اني وسهى نركض لكيناهم دخلين اثنينهن التعب مبين عليهم  هيه راحت تركض حضنت ابنها  واني وكفت بوجه ذباح عيوني تتنقل ادورها باوعتله اشرت وينها

-طفرت بت ال…

-شنو طفرت؟؟

-جنها زيبك جيش ازلام ماكدرولها فلتت مثل ماالله واحد

-يعني شنو هم راحت

-لاماراحت حصلها زلمتها وأمنها ماتركتها لحد ماضمنتها يمه واخذت منه جلمة بسلامتها

-صحى دسار ؟؟

- الحمد الله

-الله عليك ذباح ماتجذب عليه

-اشلون راح اهفها بدفرة افر فجها بعدي يبه فكيني خلي اخذ نفس شليتن روحي خرب بلشتجن

- شنو مداافتهم اشبيك عصبي يعني ليش ماجبتها

- هاي شلغث وياها لخاطر تفهم ياعلي يبه البت يم زلمتها كال يومين وانه اجيبها بيدي

-يعني شفتها زينة

- لاماتنوعتلها دفنها بمجان أمن لخاطر يحميها لان الوضع بعده مگلگل يله الحمدالله على سلامة اخيتج ان شاء الله تنذكر ماتنعاد سمعتي شني كلت

ابتسمت ونزلت دموعي -شكرا

- ماعملت شي يستوجب الشكر بس ركدي

- توبة والله الحمد الله على سلامتكم

- الله يسلمج البدويه وين

- بالغرفة صهيب يمها

- گربي لج

- شنو ذباح والله ماحجيت

- شمالج  طافره تراني مااكل بشر

- وترا خدي بعده يوجعنييي

جرني من گصيبتي لزمت خدودي بسرعة دنگ همس شني حجت عليه البدوية

- ماحجت بس كالت مايبطل مشاكل وصهيب كال طلع ابني مثله

- وبعد

- كالت بس يرجع اخلي يرد غيمه لذمته

- اي

-هاي هيه

-ماحجت شي منا منا

-لا

ترك شعري عدل سلاحة  وملابسه كوه كتمت ضحكتي هاي هوسته كلها تالي يخاف من امه

راح للغرفة سلم دخلت ورا صاحت بيبي بشررر ياسند الديرة

- الحمد الله فضت والبت بخير يحماية زلمتها

-بشارتك ياعلي كرت عينج يجدة

دمعت عيوني اجت فجر حضنته وبجت دنگ باس راسها ضحك وخرها ودخلت جوه دنگ باس راس امه كاللها رضاتج يالبدوية

- الله يرضه عليك ويهون طريجك ويجبر خاطرك  بولد يحمل اسمك

- امين يارب بس اندعيلي يالحبيبة 

- بكل فرض ارفع ايدي بهدايتك وبسند يجبر صبرك بي

باس ايدها وكام  سلم على صهيب راد يطلع صاح صهيب وين يخوي توه الناس

- وعلي  تعبان ويه طر الفجر لازم اعر للبر

- ميخالف اگعد اريده انخاك بشغله

- ابشري تاخذها من هالشارب يبا رايه روحي ندهيلي هيام

فجر-  ماهيه

عكد حاجبه  اندار لفجر خزرها اشر شنووو

- بس اهدأ ماراحت مجان غريب لاهلها  ابوها طرشلها خبر  رايد يشوفها اجه اخيها اخذها

-طلعت مغتاضة لو مسيرره

-كلتلك ابوها طرشلها

- فجرررر

صهيب - شبلاك يخوي اعصابك البت راحت تشوف اهلها مابيها شي

-واشلون تغرب بدون لاتعطيني خبرر 

- انه سمحتلها  باجر ان شاء الله من اطلع الصبح اجيبها بطريجي

-لا محد يوصلهاا  وهذا اخوها هينه شغلته ياخذها بدون شوري موو ؟ اذا مافجيت راسه بالنص مااطلع تربات البر 

-كول يالله

-يالله وكلت العندي واذا عرفت رايح ليها اتخارب ويااااك

-يبن البدوية بسك شررر

- خليتووا بيها ابن البدوية انتمم

-ذبااااح

مارد شال سلاحه وطلع تكول باردو صاحت بيبي الحگ اخيك ولك راح يهد على اهلها

طلع يركض ورا هو وابنه صاحت كمريه خربيتها ارتاحيتي هاي اخيي راح يطگ اخوتها ويطلگ حرمته

بيبي - انكتمي حسج ماهيسه

- يمه تره بس مشاكل وفكر هاي واذا ضلت حتى اخوي تريحه

-جن ترباتج انعوجت يبت البدو فجررر كضيها سحليها لجااااي  

-لايمه دخيلج والله ماقصدت

-لج فجرررر

كامت فجر وكمرية رجعت ليورا تتوسل ؛ دنكت عفتهن وطلعت صاحت وراي سهى مارديت واسمع صارت وراي هوسة الي يحاول يحمي گمرية ومأيدها والي يرزل بيها

وكفت محتارة وين اروح نعلت ابونا الخلانا ننجبر على هيج ذل ونسكت

صعدت اصواتهن وصوت ضربة ويه صرخت گمرية هيه وتصيح الله ياخذهاا بت اليهود

بدون تفكير دخلت  لغرفة ذباح  سديت الباب وراي  گعدت عالجرباية اشكد محتقرة وضعي؛  لزمت المدالية وخليت راسي على رجلية غمضت ساعتين واني على گعدتي لحد ماانفتحت الباب شلت راسي لبالي فجر اتفاجأت من لكيت ذباح داخل

اباوعله گد مامعصب عيونه صايرات حمر وجهه غاضب ذكرت رؤيا من تكول دروغو

سد الباب شمر سلاحه بدون لايحجي فتح  الكنتور طلع ملابس وراح للحمام دقايق وطلع غاسل ومغير ملابسة سحب الدوشگ شمره بالگاع بظهر الجرباية تمدد خله ايده على راسه وغمض كال كومي طفي الضوه

كمت طفيته رجعت اتلمس للجرباية ردت انام عدل  شفتها مااترهم رجلية يصيرن عليه حولت المخده تمددت  صار هدوء شوية واسمعه انگلب واتحسر همست  تعاركت ويه اخوتها

- عليش يبه اكو واحد كلج مسودن امشي وتكاون ويه العالم

- لابس شكلك معصب ودوم تصرخ

- كولي خبل وفضيها

- شبيك انت

- رايه كتمي نفسج خلي انطمر كم ساعة لخاطر انگلع للبر

- تره حقها والله اني لو بمكانها مو بس ازعل لا حتى ادخل وراك واكتلك

- شني لج

- يعني موقصدي اضربك كف لاا قصدي اموتك وشبيك شوف عصبت بسرعة

- استغفر الله ربي نامي يبه

- باجر اروحلها اني وعمة فجر حتى اعتذر منها وافهمها

- اذا سمعتج معتذرة من احد اطر راسج نصين

- حتى لو هيام ؟؟ ترة  حبابة ماتستحق الصارلها

- نامي راية

- راح انام بس عادي اسألك سؤال واحد

- وعلي مابيها شي بخير هيه واخيتج الثانية

طفرت -منوووو الثانييية

فتح ضوه الفون وباوعلي عاگد حاجبه

- وين شفت رئاااال

- اهدي يبه يم زلمتها البت

- يمه كلبي صدگ دتحجي يعني سألت عني هم ماكالت اجي اشوفها زين هيه اشلونها

- بس على كيفج لايصيرلج شي لاماكالت لان ماتعرفني والحمدالله باينه حالتها فوگ وزلمتها صح كلب ابن كلب بس مبين عاشكها من اطفرها  وكمية الحماية الحاطهم الها

- هههه يمه اخيتي رجعت مدااصدگ وصفلي شكلها اشلون صايرة هم متغيرة. لوبعدها نفسها على نزاكتها

- ههه يبه مايصير احجي بحلال العالم

- لاحباب صارت اختك بعد يصير احجي فدوة اشلونها واشلون عرفتها

-هيه مو عدها لدغة

هزيت راسي والعبره لازمتني

- ناعمة وحليوة تشبهلج جثير  بس شعرها گصير

- لا طويل كلش اطول من شعري

- جا باترته لاتكولين مانو هيه  لان نفس الفهاوة والصفنة وبسج اسئله لان راسي صاير طخماخ وعلي اريد انطمر 

- اذا موجوده بالعراق ليش ماسألت عنه لو يجوز  ماتندلنا

-العلم يم ربج

-ميخالف حتى لوماسألت المهم عايشة وسعيدة كافي

مارد

رجعت راسي عالمخدة صار منظرها كدامي لامه روحها يم الصوبة مدنگه على كتابها نزلت دموعي همست مشتاقتلها هواي

- حتى انه اشتاگيت للنوم وحگ ربج

ضحكت مسحت وجهي وغمضت خليت ايدي على گلبي  من گد السعادة احسه يريد يطير  مامصدگة امنت عليهن ثلاثتهن بنفس الوقت احس روحي بحلم ؛كل شويه اعظ ايدي عالكيف حتى اعرف هذا موحلم

مااعرف شگد مر وقت بس رحت بالنوم بدون لاحس گعدت على صوت هوسة جهال صهيب شلت راسي الساعة عشره ونص من گد مامتفاجئة بالوقت طفرت گمت بسرعة غسل وجهي وطلعت صارت بوجهي غيمة وجها متروس مكياج كاعدة تصبغ بأضافيرها والضحكة شاكة حلكها من الاذن للاذن

درت وجهي رحت للمطبخ طلعت هيام من فرحتي ركضت حضنتها ضحكت كالت صباح النور

- ههههه ولج ردن خواتي ثنينهن وماما راح تطلع

- گرت عينج گد مانخيتي ربج تنوعلج

- اووف الحمد الله ولج مامصدگة

- مم ولاانه

- اشوكت رجعتي

- شني مارايدتني ارد

- لاوالله حتى سألي ذباح كلتله باجر اروح اعتذر منها واسولف وياها  ولو المفروض اني ازعل منها لان اشلون هيج فكرتي بيه

- خيه والله عذريني گلبي وجر مااعرفت حتى افكر بس من رحت لاهلي صفنت ويه روحي كلت انه وين عگلي لاذباح ولاراية يعملوها ماعونت يطر الفجر واطلب من اخيي يردني وياريتني مارديت

- ليش شنو صار بعد

- جدتي طلبت من ذباح يرد غيمة لذمته وطلبت منه يعدل جدام ربيه بينا

- يعني شنو ولج

- يعني كل يوم عد وحده ولج رايه خيه لحگيني كليلي شعمل هاي غيمة تعرفين شني يعني حتى لومامواطنها بعيشته هيه ماراح تفوت حاله

- اول شي كليلي حجه وياج عرفتي على شنو اتفقنا

- حتى لو ماحاجي وعلي انتي اخيتي وثاقة بيج مثل ماثاقة بذباح مستحيل يتنوع لحرمة رفيجه

- وهاي غيمة ربي جابها الي بالوقت المناسب وروح غزوان لطلع كلشي سوته بينا من روحها لخليها تتمنى ماواصله البيت ولاصايره بأسم ذباح

- خو كليله العملته بيكم هو ياخذ حگج منها

- بعدج ماتعرفيها هاي مستعدة تحلف بكتاب الله جذب وحتى لوماصدگها شنو يسوي يطلكها واني هالشي مارايدته اريد اذلها وادوس على راسها تعرفين شنو

-شني راح تعملين

-من اشوكت راح يبلش التقسيم

-من الليلة

- ياليلة واني عروس من حقي يضل يمي شهر مو لواني غلطانة

-خيه هو شهر يخلص

-وقبل لايخلص اخليها ممسحة جوة رجليج مايخلص الشهر وارد لبيت هجامة ويه ماما اذا مااخلي كلما يشوف وجها يتفل بي

- ترا ذباح صبره گليل ومايحمل سوالف الحريم اذا عصب مانه بعيده يربطنا ويعلگنا بالنخلة

-محد گله يردها وبعدين هو اخوي الجبير مايعرف مصلحته بگد مااني اعرفها اويلي يمه غير متفرغة وجتني للايد

- صدگ راية راح تخلصيني من شرها

- الصراحة ماتستاهلين على موقفج البارحة بس بيج بخت بيها احبها حب كد ضيعت خواتي ودم رند خو الصوندات الي اكلتهن بسببها ذني مالهن عد

-وايدي على ايدج والله عسى ماانطگ عادي احمل بس كون انطين عيشتها ونخلها تهج بليله سودة

-صهيب اشوكت ياخذ نسوانه ويرد بيته

-الحين چاي يعبرن غريضاتهن للمغرب يرد داره عليش

-لخاطر اخذ راحتي بالعب

-بس تراه دوم هون هو بس باب يفصل بين دورنا

-مايطول يسلم على بيبي ويروح اهم شي وكت مانشتغل محد موجود وينتبه للدنسوي حتى يفتن علينه

- لاحريمة يعرن من صوبهم ونلتگي غادي يم النوگ حتى من يسيرن علينا يچعدن بحجرة چدتي دگايگ ويحدرن دارهم

- حلو وخذا المطلوب هم شي اريد منج تكثرين  محبة وتصنع وتركي الباقي عليه وسكتي لان اجه دروغو

عضت شفتها وباوعتله اجه يمشي  مدنگ يورث بجكارته مطبگ ارداناته وسلاحه بظهره وصل يمنا رفع راسه نفخ الدخان علينه وكال عليش بطلتن لغث كملن

اتجتفت وباوعتله صفح

- شكوو لج اكفي عدل وتنوعي مثل البشر لاطفي  عيونج

- مبروك كالوا اتزوجت

- عندج مانع

- اكيد وحقي وهسه اروح اشكيك لبيبي شنو بس اتجيب وتكوم بنات بدون حقوق لاغرفة ولامهر ولاشهر عسل

- كملتي خوية روحي لمي الفراش لايكضوج من شعفتج ويسحلون بيج الاوهاد

هيام  - ياخويه يمعود الكل مركز حد وحيله ويانه وبعدين حقها بعدها عروس اقلها كمل شهر يمها ونوب فكر بوحدة جديدة

ذباح - اهاا حلو صفيتن سوة يعني اترك شغلي واجابل مشاكلجن

هيام - على شني مشاكل البت اجت تاخذ راي تريد تروح لجدتي لخاطر تتحجه وياها

-تتحجه بخصوص شني يبه

-تكلها عروس والشهر من حگي بعد الشهر الج حگ تقسمين

اندارلي رافع حاجبه درت وجهي بعدم اهتمام واشوف غيمة جاية اتجاهنه بسرعة دفعته على هيام ولزمته من قميصه سويت روحي اعدل بدكمه همست گول حاضر  واضحك بساع

- رايه يبه ركدي

- وروح غزوان يذباح اذا ماسويتها اروح لبيبي اكللها على الاتفاق كله اني ماعندي شي مشكلتي وخلصت  اخذ خواتي واروح وتضل انت شوف اشلون تحلها وياها و…

بعدني احجي وجرني من گصيبتي تركته ولزمت خدودي  بسرعة صحت والله يذباح اذا مديت ايدك افتن

ذباح - وكلام الله يراية جلمة وحدة و اخربط ملامح وجهج مااطلع ابن البدوية اذا خليت بيج شي صاحي بس جربي حضج وياي

-شيل ايدك

-شني لج

كالها وجرني حيل صرخت على صوتي طلعت عمتي فجر صاحت ياااولك شمالك ويه البت

دفعني

-ماكو شي خوية زعطوطة اطفر وانتي لج يله اخذيها وروحن لعبن غادي لاتراوني وجوهجن وعلي اطگ راس براس وانعل اليوم الفكرت ادخلجن للبيت

جرتني هيام كالبة وجها عليه درت وجهي باوعتله بغضب خله الجكارة اشر تعالن

ركضنا للمطبخ دخلنا واسمع ضحكت صهيب علي

…مرن كم يوم وصدگ حجه ويه بيبي اعرفه لكاها حجه لان هو اصلا مارايدها لغيمة عكسها ذاله نفسها ذل اشكد يهينها ولاتكول وياها

بكد ماشايلة فرحة ومنتظرة ماما ورؤيا يردن حتى ابشرهن برئال واخذهن نستقر يم هجامة بكد مااستلمت غيمة تصفية حسابات صفينا اني وهيام گمنا ندور شغلات من جوة الگاع نشمرها حتى ارتكاب كمنا نرتكب من غير العضات اعض نفسي واجي لذباح ابجي وهيام تفلش بالبيت وتجي شايطة تشكيلة منها مايمر يوم اذا ماتاكل كتله وطن رزايل حتى من عمتي

الكل ملتمين بغرفة بيبي عالعشه گاعدة بصف ذباح وبالجهة الثانية هيام كل دقايقه وندسته يخليلي شغله كدامي اخذ شوية منها وارجع اجر قميصه حتى يرجعها؛ صح احسه گوة متمالك نفسه بس من اشوف عيون غيمة علينه اتجرء اكثر لان ادري بس نخلص عشه اول مااشمر كلمة بهمس تنفجر وتنكتل بسبب صوتها العالي وتجاوزها

ضربته برجله باوعلي عيونه حمر عرفته فول  رمشت براءه و همست اريد مي

استغفر ومد ايه شاله من نص السفره خلا كدامي شربت انطيته غمض وهمس الف رحمة عليك على هاي المصيبة

- شنو

- سلامتج يبه شرايده بعد احجي رحمه لموتاج اريد اتزقنب

برطمت

دنگ مسح وجهه وبيبي  وعمتي گوة كاتمات  ضحكتهن

دخل صگر يركض صاح عمي چونه ضيوف طالبيك

- حي الله من چانه دخلهم للمضيف 

اشر اي ورد يركض

بعد الاكل همس بالحمد وكام شال سلاحه وطلع بسرعة رجعت الخبزه عالسفرة كلت الحمدالله

فجر - يعني لاانتي الكليتي ولاخليتي زلمتج ياكل

- عزه اشوكت صدگ هيام

اشرت لا

- والله شمااشوف راح تسودنن الزلمة اكثر ماهو مسودن دكومن لاارگعجن بالمنجاسة يله روحن  حضرن الضيافة وسون الكهوة

-اني تعبانه خلي هيام تگوم

هيام- وانه ضهري طابگ واريد اطلع للنوگ من الفجر مابيه اتحرج الحين

فجر- اهااا گلتن ماتگومن خوش خليجن ولك ذبااااح

هيه تحجي واحنا طفرنا طلعنا نركض تركنا بيبي منتجيه بيدها سبحتها تضحك علينه وغيمة تاكل بأضافرها من الحرگة

دندخل للمطبخ واسمع صوت جاي من المضيف خطف گلبي…

***رؤيا***

السجينة بركبتي وهمسه بأذني يهدد مااتحرك غمضت  اهدا نفسي واسمع صوت ضبع يگله انحرها

فتحت عيوني على كبرهن صار بوجهي نازل من فوگ يفتح باللثام وكف كدامي وكال شوف شغلك ابو عگرب هاي اذا ضلت عايشة ابو الليل ينتهي امره

- ناخذها للمقر ونكتلها

- لاهنا لخاطر تشمرها بالنهر ماطول دسار غايب عن الوعي كلها يومين وتندثر شغلتها حتى اهل ماعدها يسألون عنها

ضغطت على سنوني ضحك بستهزاء ووخر اللثام راح لجهة دسار

دنگ الرجال همس يم اذني بصوت خشن حسيت بي رهبة هو ويكول شو مااشوف اي رد فعل شنو ماخايفة من الموت

- الدربك  ماگلك الموت رحمة يالخنيث

- اتوسلي

- اتخسى انت والدزك  مواني الي اذل نفسي لحيوان مثلك

- اني حيوان وخنيث ؟؟

- الي يغدر هواي عليه هالكلمات لو جنت حاسب حساب للشوارب الي بوجهك جان واجهتني ماجيتني غفل بس تعرف روحك جبان وخسيس

- اهاا يعني اذا تركتج هسه واجهتج ؛تشريح وجهج من حقي  

- ماتسويها لان النكس ماينظف لو يغسلوا بزمزم يضل جبان ومايعرف غير الغدر

-  كد كلامج

سكتت حسيت ايده رخت من ركبتي لزمتها بأيدي ونزلت ايدي الثانية عالكيف سديتها حيل هيه دفعة وهيه دفرة بين رجلي صرخ ودنگ

سحبت السجينة من ضهري انداريتله بسرعة كعد بالكاع عاصر نفسه  خليت السجينه بوجهه اباوعله رجال جبير شعره ابيض بس ضخم مدروز درز وشوم  ؛ صاح صبع حي الله خرزة البتاويين

درت وجهي لكيته ساند دسار مگعده الي يباوعلي بتعب ويبتسم عرفتهم لاعبيني رجعت دفرت الرجال ورديت ليورا

ضميت سجينتي بظهري دنكت شلت الورد وباوعتله همست موكل  الشايل شوارب زلمة مرة ثانية حاول تختار صح

ضبع  - شاف ضفيرتج حسباله صدگ بت

- كملت گوم لحگ عليه لايصير نقص بحيواناتكم

-هاااا لسانج يمعوودة

- ههه ماتقبل على ربعك ولك اني منك اضم راسي على هاي الفشلة مو ادافع؛  مافيا چوم زعاطيط  امداكم

ضحك دسار ودنگ لزم صدره موجوع كام الرجال اجه يمه كال قبل لاتضربين هيج ضربة بثانية هفي كله من الخلف حتى تربكين حركته وما تتأذين

- ديله اشلونك انت عادي كلك ترجف جنك مطوعة يم شباج الحمزة

- ههههههههه

- على شنو تضحك ابني منو ضحك عليك ودخلك هيج شغلة هذا الشغل اله ناسه انت بهذا شعرك حدك يفترون بيك بالروضات علان لبطل الحليب

وكف اتخصر يباوعلي ويبتسم اتنقلت نظراته من الورد الشايلته لظفيرتي لوجهي استقرت بعيوني اخذ نفس بلهفة وهمس  -روياا رافد الدغش

-الخرزة بت البتاوين

- هيج كارهه اسم ابوج

- الي يتخلى عن بناته  مايستحق ينذكر

- يجوز اتخلى عنجن لخاطر يحميجن شر اعماله

- ماكو شر اكبر من يجيبنا للدنيا ويشمرنا بيد حيوانات قذرة نصارع مصيرنا

-أمنلجن عيشة تخليجن ملوك على روس السلاطين وتركلجن اسم ترعب اكبر راس يوصلجن

-ياعيشة بيت البتاوين الي خواتي يشتغلن متواصلات ليل ونهار حتى يدفعن الاجار لو اسمه الي ماعرفته غير عن طريق الغلط كد ما مندثر ومااله اهمية

- جان يشوفجن الضوه بطريقه المظلم  كل وحدة منجن  يخليها على صدره يشم نحرها ويتخيل ريحة الجنه بيها ترافه رايه زال شكو سود بكلبه   وهدوء رئال محى شر تفكيره لون عيونج گطع خطواته بدرب جهنم

-لعد  وينه

-غدروا اقرب الناس  اله خذوجن من حنضنه وبلغوا عنه سلموا لنهايته وخفوجن عنه

-تعرفه

-بكد معرفتي بغدر  اليهودية

- ماما  غدرته؟؟

ديرد صاح دسار بصوت مخنوگ درت وجهي لكيته عاصر نفسه والدم تارس ملابسه ركضت لزمته همس من بين شفايفه روحي لاتباوعيلي 

ركض ابوعگرب سنده من جهه وضبع من جهة الثانية شالوا للسيارة اباوعله خلوا بالكشن الاخير يغيب عن الوعي ويرجع عيونه عليه نظرته مااعرفها تعب لو ترجي عرفته مارادني اشوفه بهيج ضعف خايف يموت ويدري مابيه احمل بعد

صاح ضبع رؤيااا  ضغطي على جرحه بسرررعة

جريت الباب صعدت يمه شلت راسه خليته بحضني شمرلي ضبع لثامه خلتها على صدره ضغطت حيل صاح ااخ ولزم ايدي غمض متألم

صعودا شغلوا وداسوا بكل سرعتها دقايق ورخت ايده عرفت فقد  اباوع لوجهه باهت اريد احجي مااگدر احس مفعول حباية الادمان بلشت تتلاشة  يتلاشى

ضغطت عليه بحضني وخليت راسي عالكشن احرك بي احاول اضيع الالم كارهه روحي على الوصلتله انكس انواع الذل احسن بيهن بأخر ايام مقررة اعيشهن 

روحي ضايعة

الشخص الي حبيته بوقت اتمنى الموت لشكو واحد فاقد بحضني بدل مااودعه حتى ابتعد  اترقب موته  والادمان الي ينهش بروحي خايفة لااللگف قبل لاارد اخيتي لحضن ماما واخليها تسامحني على كل لحظه اتجاوزت بحقها

وصلنا للمستشفى حتى مااعرف اشوكت خذوا من حضني وشوكت دخلنا للمستشفى عايشة بغير عالم اصارع الالم بضعف  مدنگه لازمه راسي  حسيت ايد على متني رفعت راسي لكيت ابو عكرب  دمعت عيوني دنگ كعد نص كعده كدامي - شبيج بابا

همست بعبرة تعبانة

- من شنو

-من الدنيا بكبرها

-شنو شفتي من الدنيا وهيج شكيتي منها

-الذل والحرمات الظلم الفقد دمرتني طلعني من جحيم تمشرني بأسوء بعد ماجنت اخاف من الظلمة  لان مااعرف احمي نفسي صرت احلم بيها حتى اسمع صوت ضحكتهم بأذني واغمض براحة حتى لو ساعة وحده والله راضية

- كلهن زارعات املهن بيج ومنتظرات  تسنديهن

- واني عاجزة حتى اسند نفسي انتهيت همه هدوني؛ الي ضاع بسببي والي مات والي انكسر بس والله غصباً عني والله لو يرجع بيه الوقت اكتل نفسي بنفس اللحظه ومااخلي احد بيهم يتأذه واعيش هالندم

- شنو تتمنين

نزلت دموعي حجيت بشهگه رند اردها دقايق بس اوكلها ورئال احضنها واشيل خوفها بذيج الساعة وبدل مااكلها خايفة ادفعها حتى تخلص نفسها  ؛غزوان اضمه بحضني وهمس بأذنه اخذهن وروح لاتباوعلي لان راح تضيعون

نزلت دموعه مد ايده مسح خدودي - لاتبجين   كلشي يتعوض

- شعوض واشلون اكلك كلهم راحوا رند غمضت هيه وجوعانه ؛رئال هيه وخايفة غزوان هو وعيونه على رايه وهاي اني مدمنة ضايعة مااكدر اعين نفسي منتظرة واحد مايرضه يعترف بيه زوجته لان مستعر مني

- انتي بت ابوج الي راح توكفين  على رجليج تردين خواتج تخليهن وره ظهرج متحدية وراعبة اكبر واحد يحجي بيهن مو يوصلهن

-مااكدر والله

-الخرزه بت رافد الدغش ماتكول هالكلمة كووومي لج اوكفييي

كام جرني باوعتله بعجز  سحبني حيل گمت  باوعتله بتعب وشهكت  جرني لحظنه بدون لاحس خليت راسي بصدره وبجيت لااعرف منو هذا وليش هيج اعترفتله بضعفي وشكيتله

حضني حيل وخر راسي من حضنه عيونه حمر وجهه الشر واضح عليه  مسج خدودي وباوعلي  مثل اليفكر بشي

همست تعرف الحيوان الي سيبنا

- وصاني بيجن

- وينه

- عندج جرعه  لو اجيبلج

- اذا شفته كله اتفه واخس حيوان خلقه ربي هو؛ الي يضحي بناته حرمات بي النفس ولايراويني شكله لان راح اتفل بوجهه

- خواتج عيونهن عليج شبعن مذلة اطغي وظلمي وسحگي لخاطرهن

- كلمن صارت بحماية واحد كبر اسمه يعادل صيتها اضعاف

- وهذا اكبر ذل جاي يوجهنه ماراح يكدرن يعيشن  ويه هيج عالم لان احلامهن صغيرة وبريئة حنية كلبهن موكد الشر الصارن بي

-منو انت؟؟

-واحد حكموا عليه بالموت بس لان راد يتوب

-واني رؤيا الي امنيتها جانت سبب بهدم عائلتها

ابتسم مد ايده -ابو عگرب

خليت ايدي بيده- خرزة البتاوين  

ضحك وعصر جف ايدي سحبتها رحت للحمامات دخلت غسلت وجهي بسرعة طلعت الحبايه لان بعد مااتحمل اخذتها وكفت افرك براسي دقايق واختفى شكو الم اخذت نفس رفعت راسي دخلت وحده وياها طفل بيدها فون تسولف مبين ويه زوجها لان تگله حبيبي خلصنا راح نطلع بس جيب وياك اكل لان مابيه اطبخ

وكفت يم المغسلة تغسل لابنها  اباوعلها بكامل اناقتها اتسولف ويه الفون  عالكيف الفرحة مبينة بعيونها ضحكت لعد احنا اشكد ماعايشين الي اكبر امنيه عدنا نلتم بيت خاص بينا وناكل لكمة من تعبنا بدون الذل

ذكرت المنطقة العايشين بيها مسحت وجهي وطلعت مالكيتهم رحت لغرفة دسار دخلت لكيت مضبري من جديد ومعلگين بيده سيروم رايح بغير عالم ؛ هزيت ايدي - من اكول عار يعترض

ضبع- احم

- انت انجب ماريد اسمع صوتك

-تم

-اهله وين گلنا لفو بس لقيط هاي جديدة

-وصللهم خبر بالطريق

-موكلتلك انجب اكو واحد سألك

-استغفر الله

-لا هاي نكته اكيد بس كلش مالايكتلك انطيني جكارة

-ميصير هنا

-ضبع راسي صاير طبل انطيني قز القرط خلي ادخن لبين مايگعد اللفو مالتك حتى اخذ عنوان اهلي وافتك من اوجوهكم المعفنة

-شكراً

-هذا اليجبرك تشوه وجهه طلع الباكيت لك لاوكلام الله اكلب وجهك عالابطانة

طلع الباكيت والجداحة شمرهن لكفتهن طلعت وحده دنگت ورثتها اخذت نفس رفعت رسي نفخت وابو عگرب يضحك

خليت الباكيت بجيبي رحت يمه صعت حاشية  الشباج گعدت عليه وباوعتله ؛ رفع حاجبه اشرلي شكو

- اريد اشتغل وياك

- ليش اني شنو اشتغل

- ماطول مرافق الحيوان اللفو كلشي خارج القانون

- حلو بت الدغش  وبشنو تگدرين تفيدينا حتى ندخلج ويانا

- كلشي تسليب  توزيع حتى كتل اكتل شكو واحد تردون تخلصون منه بس جربني

- زوجج ضابط مخابرات

- على نفسه الخاين تركك منه وشغلني وياك والله ماراح تندم

سكتت دنگ حك خشمه  كوة كاتم ضحكته

- لايكون خايف منه تره الله وكيلك واحد تافه ميخوف زعطوط

- هاي يمج  هذا التحجين عنه بجفته وحده يوگع اخطر شبكة وبلزمة يضيع اكبر شارب

-خايف منه؟؟

-لااا خايف عالعدي منه مااريد ارد للسجن قبل لاأمنهن واني خليت ايدي بيده وقدمت اخرتي بس لخاطر هالشي 

-يعني هو الطلعك

-بأتفاق يكسر الظهر اكمللهم شغل واوصلهم لعالم معرفتهم توصلني للاعدام  مقابل حماية هالااشخاص

اخذ نفس من الجكارة نفخته وغمزتله- واذا خلصتك منه تشغلني وياك

ضحك بصوت عالي ودسار همس بتعب شترجى من بت الدغش

- ديله عالاساس اشلونك انت همزين لفو خاين

طفيت الجكارة وكمت رحت يمه وجهه باهت گوة فاتح عيونه لزم ايدي سحبها وباسها

- بعدك متوجع

- رؤيا لاتتقربين منه  زايد

- وديني لبيت ذباح

- بس ارتاح شوية

كعدت يمه خليت ايدي على صدره باوعتله اخذ نفس وگال انتظرتيني

- ونعلتك بكل مرة جانوا يأخرون عليه الجرعة

-دعيتي عليه

-اي

-جنت اندعيلج بكل لحظة بيها واني مغمض صارعت الموت وعاركت جماعتي وتخاربت حتى ويه اهلي لان همه سبب بعدج عني

- ههه دسار كل عقلك نكمل سوه

- غصباً عنج

- تعرف انت شنو تشتغل واني منين ؟؟

- شنو جانوا يصيحولج 

-خرزة الدسار

-ليش خلوج تدمنين

-حتى يعاقبوك

-ليش خافوا يتقربون منج

-لان راجعتلك

-وغير هالشي ماراح تصيرين ؛  انتي الي ان رضيتي اولااا

-مو بكيفك

مارد غمض حرگ گلبي  ردت اضربه لزم ايدي شلت ايدي الثانية قبل لااحركها هم لزمها  فتح عيونه سفطهن بأيد وحدة وعصر وجهي - خلي حركاتج مدروسة بطلي صياعة وتسرع

-شيل ايددك لك

-وكحة ورعنة ولسان زفر ومشيطنه وو

-ووو شنو گول ؛مره وحده صير رجال واحجي بزود بطل سوالف الجبناء٠٠

- واحبج

باوعتله ابتسم وسحب اديه باسهن صفر ضبع وابو عگرب ضحك خجلت سحبت اديه بسرعة كلتله اشلون ادرس الشخص قبل لااضربه

ضبع - استلم يكلها احبج تكله تعال نسلب

ضحك دسار گام بصعوبة انتجه واشرلي تقربي

-شوف لك مال اتقربي وتهفني راجدي غفل شولفك غيرها والكعبة ادججك

- رؤيا شكلج حلو ليش تخليني اخربطه الج تعالي بابا ورفعي ايديج

ادنيت يمه اتربعت لزم اديه رفعهن وبده يعلمني اشلون انطي الامان الكاذب واشوكت ابلش بالضرب وشنو اول شي اضربه حتى اربك العدو بدون لاتأذه

مر وقت وهو مستمر يعلم بيه صح حصلتلي كم ضربة عالخفة مالحگ عليهن بس اتلعمت هواي حركات 

ضبع يصيح كافي لاتجلبها علينه وعلي تكوم تتزاود ويانا حتى بالشغل؛  وابو عكرب منتجي امجتف اديه ويضحك الدنيا ماسايعته لحد ماحسيت بتعب لان مفعول الجرعة بلش يخف شافني بهتت سحبني لحظنه دنگ باسه وكال كافي

-تره ماتعبت

-ميخالف  ارتاحي شوية وبس اطلع منا اخذج لمقري ادربج حتى عالسلاح

-صدگ والله

ضبع - يكلج اخذج لمقر التدريب  موشهر عسل على شنو طفرين 

-انت انجب

- رحمة الله والديج

- صدگ وين الورد مالتي

ضبع - ياورد هذا التقفصين بي عالعالم لج انتي شنو؛ ضميرج وين من تاخذين خمسة عالوردة وهيه بربع

- محد كلهم صيروا كفشته

- ياكفشته ترا سمعتج من تكليله طلع الخمسة لااشرح وجهك

- وهو اشلون زمال وصدگ اشرحه گدام العالم صدگ ذكرتني

رفعت راسي باوعت لدسار بغضب عگد حاجبه اشر شنو

- اطلبك عشرين عود انت شنو حاسب روحك سبع وفرحان مغلس لو امك كايلتلك عفية ابني رجال

- منين عشرين هنه وردتين

- والثالثة الشمرتها بوجهك من جنت خانس يم هاي

- يعني خمس طعش

- لاعشرين خمسة مال تأخير وابن ابوك كول لااا

هز راسه اي

- يله وين الفلوس

- ضبع انطيني عشرين

باوعلي ضبع بكره طلع محفظته سحب عشرين مد ايده  اخذتهن منه وسفطتهن حيل  بصدر دسار صاح اااخ ودنگ لازم ايدي

- صح هنه مايسون بس اغلى منك لان افلوس تعب مرة ثانية لاتستهين بتعب احد  لان هذا القليل المستعر منه جان معيش عائلة

سحبت ايدي خالية وكمت رحت للشباج طلعت الباكيت اخذت جكارة منه وگفت اورثها

طلع ابو عگرب ثواني وطلع ضبع كام دسار اجه حضني من ضهري اخذ الجكارة شمرها ردت ادفعه لزم اديه جتفني وضغط عليه بحضنه صحت  وخر دسار

- مرة جانت عندي مهمة ونحصرت بسطح احنا عندنا اجهزة لهيج ازمات اسمه جهاز الكنود نطلق بي شفر المورس لخاطر توصلنا المساعدة؛ المهم مر اكثر من اربع ساعات منعول اهلي بالسطح والخوف محاوطني والمح واحد من ربعنا على غير جهة بسرعة طلعت الجهاز وانطيته اشارة؛  ماحس غير تجيني طلقة كعدتني بمكاني طلع الافندي من ذولة الربع الدخلوا بالحلقة الاخيرة بدون تدريب  مو يم الشغلة ؛ مثل الزمال الجان هسه واكف وراج  اشرتله ادمغها لان حسيت اشتعلت بلوجكراتج  بدل مايدمغج ويطفي عقلج  طلع الفلوس وخلاني اني انكتل

درت وجهي باوعتله

- والله اريد اكلج احبج بس اخاف تجيني كله

ضحكت سحبني لحضنه گمزنا على دفرة فلشت الباب بالحايط  دخل ابو عگرب صاك على سنونه عيونه دم  يباوع لدسار بنظرة موت ينفت بغضب  يريد يفترس؛  طلع السجينة من ظهرة طگها واجه طاير ؛دخلوا الحرس يركضون لزموا اندار دفعهم ماگدر رجع جر ايده التموا عليه جتفوا صرخ   عوفنونيييي ولكممم ؛ وروح امييي اذبحه ولكم  حيواناااات  كتلتوا بنيتيييي

صاح دسار شكووو

- انت اول واحد اذبحك وروحهااا اذبحكم كلكمممم اولاد الزنااااا موتوهااااا ولك بنيتييي حركوهااااا

وگف دسار مصدوم اباوع لابو عكرب بهتت روحها گعد بالكاع نزلت دموعه واديه نزلهن مثل الماتن باوع لدسار بكسرة وهمس ماخليتوني اضمها واشيل همها ماخليتوني احضنها واكلها لاتخافين يابابا  اني يمج راحت وهيه مهضومة حركووها قبل  لاضمها بصدري واشمها

- هه شنو حركوها هيذام وين ؟؟

غمض  شفايفه يبست  تجه راسه عالباب خله ايده على گلبه فتح عيونه بتعب دموعه تنزل بدون صوت  ولاتكول نفسه هذا الرجال الجان واكف بصلابة بثانية انهار يريد يحجي مايكدر رد غمض وهمس يابويه راحت ابنيتي

ضحك دسار بصدمة واندار لضبع اشر شنو

-خطفوها كتلوها ودزوا فيديو للضابط بجثها همه ويحرگوها

-ههه قبل كم ساعة اتصل يبشرني بأبنهم الجديد

دنگ مارد

لزم راسه دسار وغمض مثل الخفض ضغطه اخذله ثواني ودنگ شال مفتاحه طلع يركض طلعت ورا مامفتهمة شنو الصاير طلعنا من المستشفى صعد سيارته ركضت فتحت الباب صعدت بعدني حتى ماسادتها وحرگها داس بكل سرعته

يسوق بخبال وينفت بحرگة كل شوية يريد يكلبنا   الطريق كله ماحجه لحد ماوصلنا لبيت كلش جبير  الحرس مطوقي  نزل يركض حافي

دخل للبيت نزلت ورا دخلت اشوف واحد ضخم بشكل مرعب  لابس عسكري اسود گاعد يم الحايط طابگ رجل وماد الثانية مجتف وصافن عيونه صايرات قطعة دم ويمه بنية وجهه كله ملخ متربعة يمه لازمه رجله وتضرب بي ودموعها تنزل بفاجعة  شبه فاقدة  

كعد يمه دسار بتعب اشرله بتوسل لااا

ضحك مبينه الكسرة بعيونه رفع راسه غمض

دسار - وينها

راد يحجي وسكت

- وين جنت عنها اشلون خليتهم يلوحوها

فتح عيونه باوع لدسار  ابتسم وهمس بصوت كوة ينسمع عاقبتها  كلتلها راح اطلگج جانت خايفة وتتوسل مااقسي عليه واني ازيد بقذارتي وياها

ههه خليت عقلي ويه طفلة  اشوف دموعها تنزل وادير وجهي عنها

عض شفته دنگ اخذله ثواني ورفع راسه  نزلت دموعه  همس بكسرة  والله ردت احسسها بطعم الغدر  والله ردتها تبطل هالعادة اشلون صدكت اذيها وهيه روحي

- هيذام وينها

- حركوها يخوي حركوا روحي كالها ودنگ لزم راسه وبجه ؛ جره دسار لحضنه شبگه  وبجه بصوت

اباوع لدسار حاضنه حيل ويبجي بحرگة على بجيته والبنية على كعدتها شبه الفاقده بس دموعها تنزل عالسريع مبينه عزيزة عليهم الرايحة

حسيت بخنگة منظرهم يوجع دسار حاضنه وهو ضام وجهه يبجي من كل حليه  رجعت ليورا ابتعدت مسافة گعدت على درجة الحديقة عيوني بيهم نزلت دموعي على الولد  مبين كمية الوجع بكلبه مايكدر يحملها  رجعني لحالة راية من جابوا غزوان كدامها

ضميت وجهي وبجيت على اصواتهم لحد ماحسيت صدري انعصر عرفت روحي بديت افقد السيطرة  لازم اخذ جرعة

رفعت راسي افتر بيه فركته و كمت درت وجهي صعدت الحديقة صاروا الحرس گدامي الي مدنگ يبجي والي گاعد مبين الحزن عليه  مسحت وجهي ورحت يم واحد همست  فدوة اريد للحمام منين

اشرلي على باب  بنهاية الممر تشكرت ورحت كملت الممر دخلت من الباب لكيته مطبخ بي كومة بنات  حالتهن اسوء من البره ؛ كامت وحده منهن كالت تفضلي عيني

-فدوه داريد اروح للحمام 

-اي تعالي منا

اخذتني  دخلتني جوة امشي وياها واني مدنگة خايفة انكشف لان الحالة بلشت تظهر ماعونت تكول هاي دخلت بسرعة سديت الباب ركضت للمغسلة طلعت الحباية خليتها بحلكي ودنكت شربت من البوري وكفت افرگ براسي اعرف لواخذ الشريط كله مايطول ويرد الالم لان جسمي متشبع بالابر

اخذتلي مشوار  واكفة لحد مااشتغل مفغولها شوية  دنكت غسلت وجهي عدلت شعري وفتحت الباب دااشكرها لكيتها ماكو

طلعت مشيت اباوع مو بيت قلعة حتى مااذكر منين دخلت وانوب فارغ ماكو احد صار كدامي باب رحت دخلت بي طلعت صالة واكو باب توصل للمطبخ كملت طريقي دااعبر واسمع صوت جاي من وحدة من الغرف لمريه تتوسل برجال وهو يرد  بعصبيه  يكلها صوتج لج قندرررة راح تفضحينااا

درت وجهي دااكمل الطريق واسمعها رجعت تتوسل وتبجي شدني الفضول ؛وكفت باوعت منا منا ماكو احد مشيت على طراف اصابعي وصلت للباب نصه الصوت خليت اذني علية واسمعها تگله ابنه ماله ذنب هسه لخاطر بنتك مولخاطره

- اذا ماخليته بصف ابني حتى الصدمات الكهربائية ماتنفع ويا وتهدي مايكون شاربي عليه

- اتخبل روح شوفه اشلون كاعد من وصله الفيديو لسه

- بعد ماوصله السرة هذا حصت بت البتاوين حسبالها اسكتلها عن السوته هو جاي سرا اذا ابني انشمر بالمصحى هو اخلي يسكن الصحاري يتفتر بدون عقل

- والله اذا وصلت  لابنه اني اررروح اكله انت ورا السالفة

هيه تحجي وهو عاط بصوت كمزني عفتهم وطلعت بسرعة رجعت للحديقة صار بوجهي ابو عگرب يفرك برگيته ويسولف ويه الحارس يريد يدخل

درت وجهي نزلت للحديقة ردت اصيح لدسار وشوفه بيده فون مدنگ صافن على فيديو جثة تحترگ انتبهلي بسرعه سده خلاه يم بوكس ولزم رجل الضابط  گله هيذام  وعلي مو هيه

داارجع لابو عگرب وانتبهت شعر طالع من البوكس مربوط بخرزة تشبة خرزة راية عگدت حاجبي  ؛

رحت يمهم دنگت ردت افتح العلبة ولزم ايدي دسار دفعتها حيل وفتحته جانت ظفيره طويلة ويمها سوار  وكتاب

شي صار براسي اسم هيذام  صرخت ابو عگرب كلمات الجوه عن بت البتاوين صوت ضابط التحقيق

رفعت راسي عيوني على هيذام عيونه گد مامخلوط لونهم بالحمار  شكيت بي يشوف ؛ شال الجكارة راد يخليها بحلگه مايسيطر ايده ترجف  باوعلي وضحك

تقربت يمه لزمت ايده فتحتها ردت اتلمسها احس خدرن اصابيعي غمضت ومشيت ايدي عليها وصلت للساعة فتحت عيوني نزلت دموعي اشرت لاااا

غمض ورفع راسه انتجه عالحايط

درت وجهي على نفس صوت الرجال الجوه يصيح ها يولد بشروا ماكو خبر من ازر 

كمت اباوعله ضابط جبير لابس عسكري جاي ناحيتنا ويا مرة

خليت ايدي بظهري ضغطت على سنوني دااطلع السجينة بعدني مامتحركة واسمع ابو عگرب صاح ابراهيييم وصوت الطلق ويه صوت صرخت المرة ودم الضابط الترس المكان  …

لاتنسون التصويت ❤️