رواية شيء من رصيف الدم الفصل الرابع 4 - بقلم Leo Alfatlawi

شيء من رصيف الدم

بارت الرابع

بقلمي leo Alfatlawi

علقوا بين الاسطر

…كأن الحياة تعاقب كل من يعيشها بصدق

رئال***

بعد خبر غزوان حسيت الدنيا ظلمت بعيني عرفت انتهى امره واني البعده وغايته جانت واضحة ردت بس اخلص روحي اقلها اموت نظيفة  من سمع وخر  بعد  شعري عن وجهي  مسح شفتي بطرف اصبعه  كال عفية بالنچرة اشلون كتلتي

همست بالسجينه كتلته

-ليش غدرتي شنو السبب 

-غاد يعتدي على غؤيا دخلت عليه عضيته من متنه جان شاغب ميحس من ابتعد دفع اختي   وسحبني مكانها

-حلو  كملي اشلون طعنتي

-جانت سجينة يمي سحبتها وكتلته

-بس الضربه جانت بظهره

- اي ضغبته بضهغه

-اشلون بظهره وهو جان محاوطج بأيديه يريد يعتدي عليج

-لعد اشلون احجي

-اني اگلج اشلون

كالها ومشه ايده على بطني  كمشتها وشهكت

-والله اگول التغيد بس انت علمني  احجي ماغاح اگول لا

-اختج   شغلته وانتي طعنتي

-اي هو هيج

-شنو السبب الي يخلجن تكتلنه

-شنو ؟؟

-عنده علاقة بيجن وهدد يشهرجن

-اي

-غيمة  ليش حاولتوا تكتلوها

-انت گول ليش واني اگلك اي

-يمكن دخلت عليجن ولگفتجن ويه الولد

هزيت راسي اي نزلت دموعي دنگت مسحتهن بمتني والشهكه بكلبي

-اذا رديتي بأقوالج تعرفين  شنو مصيرج

سكتت

-اتخيلي  كم واحد جوه ايدي اوتركج منهم
المركز بكبره اخليج يتعلم بيج اصول التعذيب

-مااغجع بأقوالي والله

- لاااا واني ماراضي بهالشي احتمال خفتي مني وعترفتي تحت الضغط

-لالا اعتغفت من نفسي  بدون خوف لان هذا الصاغ

دنگ عليه احس بأنفاسه قريبه غمضت همس متأكده

اشرت اي

عصر شفتي وضحك بصوت عالي  سحب ايده الثانيه من بين اديه دگدگ على خدي  وراح كال سدي ملابسج

اتلمست دگمت القميص بسرعة والوجع ياكل بگلبي   على غزوان اتمنى املخ شعري واصرخ اطلع شكو ظلم عشنه بي

فتح الباب كله تعال ابني ردها لمكانها وسحلي السبع ابو قضية الاغتصاب 

دخل واحد كمشني كوه  امشي رغم الضرب الحصلته ورجليه نار تطلع منهن بس ماحس بشي غير دموعي تنزل بدون لاحس ابعد صورتهم عني  وهمه شايلين تابوت غزوان  مثل تابوت محمود

وصلني للزنزانه فتح عيوني دفعني بيها وسد الباب

رحت يم الحايط كوه انتجيت وكعدت اريد اتلمس شعري مااگدر من القهر

شلت راسي للسما همست بحرگه گلب ربي كلشي اتحملت وحمدتك عليه بس هالمرة الظلم جبير كسر روحي وانت ماترضاها ؛اتنازلت عن شكو حلم مااريد غير تراويني عجائب قدرتك بذله ؛اريدك ترد وجع گلبي اضعافه بگلبه وتظلمة  مثل ما ظلمني  وتحرمه من اعز شي على گلبه مثل ماسوه بيه

الدنيا افترت وحلگي مر مااسيطر على سنوني من البرد احس المي الي بملابسي يلزگ عالجرح

تمددت  نار تطلع مني  بس مو مثل نار گلبي تگلب بلكي شي مني يبرد

كمشت شعري عضيت ايدي وصرخت بحرگه  احس جرحت روحي

انكلبت خليت ايدي على  گلبي همست يمه تعالي ليه راح غزوان بعد بيمن ننتخي

نزلت دمعتي بتعب غمضت من گد الحرگه والالم  احس روحي رخت والدنيا ظلمت شي ينسحب من صدري ثواني وماحسيت بعد رحت  مثل الفاقدة

كعدت على صوت فتحت الزنزانة   دخل الشرطي ردت اگوم ماكدرت باوعتله بكسره حسبالي  الي بس امنت من شفته دخل بيده مره شمرها بالگاع  وقفل الباب

اباوع المرة متوسطة بالعمر  شكلها يخوف شعرها منثور  اصابيع اديها تجري دم ورجليها كلها شخوط مال ضرب زحفت ليورا لمت روحها وغمضت صاگه على سنونها

رجعت خليت اديه جوه راسي عيوني عليها اباوعلها ماضال شي بيها صاحي تفر براسها وتون وضعها يفطر الگلب لابيه احجي ولاهيه صاحية وتطلب المساعدة حتى كوملها 

انگلبت اباوع للسگف وكامشة شعري ملابسي عبارة عن قالب ثلج لازگ عليه حتى جسمي بعد ماحس بي ؛ صافنة گلبي بارد اي مشاعر ماعندي 

غمضت صوت ونتها بأذني اتمنيت روحي مكانها واني الي اون واطلع شكو بگلبي  ؛ مرت الساعات وهيه على فد صوت ماهدأت لمن صار الليل والمكان صار صنته خنست من وحدها عرفتها بهتت

درت وجهي لكيتها تباوعلي كوه فاتحه عيونها اخذت نفس بتعب ورجعت عدلت راسي همست اريد مي

انتجيت گمت گوه  اخذت من السفري گلاص المي زحفت شلت راسها شربتها

رديت لمكاني لميت رجليه وانتجيت گالت ربي ينجيج

-هه بعد بيها فايدة حياتي بلكي يعدموني واغتاح

-بعدج صغيرة

-الوجع  بغوحي اخوتي انتهوا اثنينهم ظلم اندعي الله ياخذني بساع   ويخلصني من هالعذاب

-الموت ميريح ييمه الج حق يم واحد طلعي واخذي بيدج ذاك الوكت تكولين ارتاحيت

-حقنا ضاع  بالوكت الدخلنا بي بذاك المكان ابونا صاحب دمنا هدم ابسط احلامنا وكسغ ضهغنا  بعاغ( بعار)يلاحگنا حتى واحنا جوه الگاع

-ماعدجن ام

-عدنا احن واطيب ام ظلمها وحملها اكبرغ وجع بس لان جابتله بنات

-البنات هم وكسران ظهر

-لااا مو هم احنه نصغف عليه  بتعبنا احنه الشلنه غاسه وخلينه ينحلف بأسمه و هو حيوان احنه الي جازفنا بغوحنا وكفنا بوجه الجانوا ناوين يكتلوا وضمينا بينا وخلينا يعيش

همست جنا خايفين الله  بي انشوفه الامان ونتمنى يجي يوم يلمنا بحضنا مثل اي اب ويكول انتن بحماي

-باعجن؟

-ظلمنا كتلنا وسلمنا بيده للذباح  حكم علينه بالموت بعد مامنحنا الحياة

- كلهم الموت هواي عليهم

-اتمنى اطلع ولو يوم واحد بس اكتله واغجع هي موته موته المهم اخلص الباقين منه  

-ماراح اطلعين ماطول دخلوج هنا اقل شي تاخذين عشرين سنة

همست لعد خلي يعدموني شلي بالدنيا المابيها حضن امي وضحكت خواتي

-قتل قضيتج

-والله مو اني بس الضابط خلاني اعتغف غصباً عني

-لان مابيهم شريف صافين ويه الظلم مستعبدينا يردون يصعدون رتبهم بلحم الفقير ليش اعترفتي  والله لو يصلخ مني لحم ماراح اعترف

-هاي اصابيعج دتصب دم

-شلعوا اضافيري نفسهن الي دخلتهن بعيونه وعميته بيهن

-عميتي  عيون الضابط؟؟

-حماي النگس  الي يخلي عيني على بنتي  مو بس  اقلع عيونه واحرگه لا اخلي يتمنى الموت مثل ماخليت اخو  يبوس رجليه حتى اكتله

خفت من كلامها رجعت ليورا صفنت عليه كالت هي هم بعمرج

-منو ؟؟

-اغتصبها  وگلي موشريفة دنت نفسه عالرباها بحضنه ماتت وهيه تعاتبه بكسره

-كتلها ؟؟

-اشهر يمارس  وياها  ويهددها لاتگلي لمن كبرت بطنها وانتحرت راحت بنيتي من بين اديه واني مثل الحيوانه فرحانه اطلع اشتغل واصرف عليه كالتها ولزمت وجها وبجت بصوت

غمضت عيوني واني اشوفها اشلون اتعضض بديها بحرگه والدم ترس حلكها من اصابيعها

نزلت دموعي بقهر نسيت حتى قهري عرفت عايشين بدنيا ماتصلح بس للحيوانات

ردت اكوم الزمها بس شفتها غمضت رجعت كعدت مااعرف نامت لواغمى عليها

مسحت عيوني عدلت كعدتي  وسحبت المتبقي من  المي غسلت وجهي صار شعري على عيوني لميته ليورا بسرعة انلم كمشتني العبرة احس بلعومي مجروح ذكرت من امي تمشطه الي اشكد جانت تتعب بي يالله اظفره

اخذت نفس  وهمست حسبي الله ونعم الوكيل بيك كون تنحرم حتى من النوم

مسحت دموعي ولفته كبايه بس كعدت انفتح خليت راسي بحضني عيوني عالمره اشلون متملخه بدون رحمة وبالي يم رؤيا شلون حالها هسه

مر الوقت واني على كعدتي كلما تجي صورت غزوان بعقلي اهز راسي ابعده عن تفكيري لحد مانفتحت الباب دخل الشرطي اشر كومي

زحفت ليورا كلتله شنو  بعد

-اشعل امج كوميييي بت الحيوان 

-بداعت  امك والله بعدني  مابيه  اكوم

-انعل ابوج لابو امج طاري امي لاجيبي على لسانج القذر بت العاهره

-بس شويه اغتاح والله غجليه دتموتني 

-من راحت روحج وخلصوا العالم من سقوطجن كومييي لج طالبج الضابط هيذام  وهااا نصيحة لاتجادلي استوى متعارك ويه اللواء بسبب قضيتج   يعني يعدمج وهو مايدري  نصيحة اعترفي وخلصي روحج وخلصينه من هالروحه والجيه

-اعتغفت بعد شنو اسوي

- هذا يسموا استجواب الاعترافات هسه راح اتبلش   كومي من انعل ابو شرفجن متكلنا اشوكت نخلص من امثالجن

جرني من شعري  حسسني صدگ رخيصة كمت  ماادوس عالگاع لاتكول كزاز جوه رجليه

كعدت المرة على صوته  ردت تتكلب من الوجع واني حتى النفس انكطع من الخوف حسيت راح ارد هالمرة مثلها 

ربط عيوني جرني شمرني گدامه طلعت يمشي ويدفع بيه لان امشي بطيء  لمن وصلنا للغرفة من ذكرت الوايرات والراجديات كمشتني الرجفه

فتح الباب دخل دخلني ويا كله اوامر ثانية سيدي

اجاني صوت الضابط ضرغام  ردت روحي گله لا  اتفضل

ضرب تحيه وطلع سد الباب استوني اسحب النفس وكمزت على صوت صرخة واحد رجت المكان وصوت ضرغام صاح ولك هيذام مااااات

رد هيذام الي  بس نبرة صوته وحدها تاخذ الروح مو كلامه وهو يگله لاتخاف مابي قز القرط فتحه صغيرة بالراس

-دخيل ربك يافتحه ولك طلع مخه هذا انتهى

-مانتهى بي نفس  صيح الولد خلي يسحلوا بوجهم عدل للمستشفى لليل اريده صاحي

-انت ماتكلي اشوكت تبطل هالطريقة  ياااخي

-من تترك شغلة التحقيق وتنقل اوراقك على المطلقات والارامل يله لك صيح الولد خلي ياخذوا منا وانت تاخذ الملف وتطلع گدامي ربع ساعة والحگك

- وين تلحگني يمعود ثاني عقوبة هاي

-اهاا ذكرتني بي صدگ بطريقك مر على مكتبة وصله سلامي كله منا لليل اذا مانسحبت العقوبة خلي يدير باله على روحه

-انوب تهدده انت صاحيييي

بعد يحجي وحسيت بي رجع ليوه وفجأه تغيرت نبرة صوته عرفته خنگه لان كوه طلعت من الكلمة وهو يگله بتوسل  اشبيك اهدأ يمعود

-اسمع لك وثبتها براسك عدل القضية صارت الي  والعقوبة تنسحب غصباً على اكبر شارب هنا خلي الروح طيبه  احسن ماخيسكم جو الگاااع

-هاي هيه مثل ماتريد اني حبيت انصح من باب الاخوه

-انعل ابو خوتك  لابو معرفتكم روح گله خليني يراويني رتبته ومراجله  وجه لوجه لايضل يتختل  لان كفيله محمد  اللگفه لو يطير للسما وعصره بجف ايدي لمن اطلع روحه من اذنه سمعتتتت

-هاي هيه بس اهدأ

سمعته دگدك على وجهه وهمس يله حباب بوجهك عدل تاخذ هالجثة تشمرها  على اي مشرحة وتمر عليه تكله هيذام يگلك الزلمه بأفعاله والكلام والتهديد هذا شغل مزعطة

-ماتبطل لمن تضيع روحك

-عود من اضيع لاتصيرون بوجهي لخاطر لاطشركم يله ابني ولي كالها ودفعه حيل سمعت حركته راح بسرعه للباب فتحها ثواني ودخلوا شرطه شالوا الولد طلعوا سدوا الباب

صار هدوء اسمع حركة بسطاله تتجول بالمكان راح وكف صوت ماي انفتح عرفتها مغسله ديغسل الدم الي بيديه اخذله شويه سد البوري وكف مااعرف يباوعلي لو ينشف اديه اريد اسحب النفس مااگدر

اسمع خله شي على ميز صوت حديده لو سلاح ماميز اجه يتمشي وصل يمي مجرد شعور انو قريب مني هاي كلش كافي اشاهد عليها دنگ همس  بنبره  تعصر الروح

-اي رئال اشلونج

هزيت راسي تمام

-شنو صوتج وين اختفى

-مااختفى هياته

-ليش ترجفين

-اني مو اعتغفت بعد ليش جبتوني هنا

-وين هاي اشوكت بس لاهاي الكلمتين الحجيناهن بهدوء حسبتيهن اعتراف ؟؟

-لعد شنو

-هاي تتسمى حفلة تعارف

-انت شنو تغيد اني غاح اگول

-لاهيج يتسمى اعتراف تحت الترهيب

سكتت لازمتني العبره وخر شعري عن وجهي همس شبيج ليش ترجفين

-خايفة

-من شنو

-منك

-واني مااكل بشر الي يعترف بهدوء ماأذيه بس الي يستسبع  ويريد يعرف اشكد قوته تتحمل ضغط مثل الجثه هالمغتصب الجان خو ماخليها بنفسه

-اذا اعتغفت غاح ياخذوني يعدموني

-احتمال واحتمال يردوج الي اعيد التحقيق اذا اكو تضارب  بالاقوال

-لاغاح اكول مثل ماعلمتني

-علمتج شنو بنتي

--لاقصدي مثل ماسويت

-بطلة

- اشوكت تحققون وياي

-بس توصل اوراقج اقل النص ساعة وتردين زنزانتج هاي اذا ماجان الج رأي اخر

اشرت لا

انفتحت الباب دخل واحد گله ها كالوا طالبني

-هلا ازر الاوراق كملتها

-اي ذني بس عدنا اجتماع بالمقر لازم نطلع

-جيبهن ماطول ربع ساعة بالاكثر طلعتلي ورقه تصريح بالمداهمة

-هيذااام المكان خطر يمعود

-خطر على امثالك الخنث جيب الاوراق وروح طلعلي التصريح بسرعة وخابر الولد خلي يحضرون روحهم

مارد دخل اسمعه انطا الاوراق  صار هدوء عرفته ديكلب بيهن اخذله ثواني وگله رحت للبيت اليوم

-اي عمتي كالت اتصل بي ليش مايرد

-خير درع مسوي شي

-لابس تره صارلك اكثر من شهر ماداخل البيت

-سهله بليل اخابرهم تاخذ ذني الورقتين تحولهن لمكتب ضرغام وتجيبلي دعوة التسليب

-تمام شصار بسالفة البصمات

- هسه اكمل التحقيق وحول اوراقها ناوشني الحبر

اسمع اتحرك راح لغير مكان جاب شي خلاه قريب شاله هيذام اجه يمي سحب اصبعي ضغطه بالحبر وبصم على ورقة لزم ايدي وگال اي رئال هسه نبلش ونگول يالله

اشرت اي

-تعرفين بعد التحقيق  وين راح ترحين

-اي بس من اعتغف و اغوح غاح تغجعولي سواغي

-شنو يابه ؟؟

-يعني اتغجعوا

-هو اني شفتهمت  من هذا التغوغي جان طلب لو سؤال

برطمت

-احجي بس على كيفج حتى افتهم شتلغثين

- اكو سواغ جان عندي وانتم اخذتوا

-ياسوار ؟

-الفضة الجان بيدي والله مال خطيبي قبل لايموت حلفني ماانزعه

-اوف مخطوبة امم وهذا السبع  اشلون مات شرب ادمان لو هم كتل

-مايشغب ولامدمن مات حادث بيوم حفل التخغج (التخرج ) من كلية الضباط هو واهله

-ضابط مره وحده؟؟  لااا موخوش سالفة

-والله مداجذب

-شنوو من ضابط هذا الي يروح يخطب وحده من البتاوين

-ماجنه بالبتاوين جنه عايشين بأحسن منطقة بيتهم لان هو ابن خالي يصيغ اخو غزوان

-هو غزوان هويه ماعنده اخوه ضابط اشلون

-والله دااحجي صدگ اسمه محمود صاحب جان يدوام بال… حتى اسأل الضابط الي حقق وياي هسه يگلك اشلون مات بالحادث هو وجايني للمدغسه

ازر -محمود صاحب ال…

-اي

هيذام - هو شنوو اي يابه بيج شي انتي لو مشتغلتني

سكتت

-ليش هالشي مامدون بأقوالكم

ازر- كل التحقيق مدون  تعرف ضرغام دقيق بهيج شي اكيد اكو غلط

-على اي اساس مرتين قريت القضية مولوده  بالبتاوين بيت دعارة عليهم اكثر من شكو بالاخص اسمها مدون بقضيتين شرف

-هسه اخابره ونشوف مامعقولة يغلط هيج غلطة جبيره  بس خطيبها اسمه محمود صاحب اشلون  اخو غزوان محمد

همست وداعت ماما  مدا جذب صح مو ابن خالي بس  هو خطيبي شوف اسمه ومواليده  واول يوم دخل بي للكليه ويوم الخطبني كلها خلف السواغ مكتوب

هيذام -مو ابن خالج بس اخو غزوان ؟؟ وماموجود  اسمه بالتحقيق بس هو خيبطج حلو  ؛  رئال اشلون وصلج السوار ؟؟

-والله  محمود جابليا وهو مو ابن خالي الح لا ابن زوجته  بس ابو شهيد وخالي الي غباه  (رباه ) مثل ابنه اصلا جنا عايشين نفس البيت قبل لا يصيغ  الحادث وبابا ينقلنا للبتاوين

-الحادث صارله  اشكد

- غاح يصيغ ثلاث  سنوات سنه ال--- يوم الاحد وكت الظهغ (الظهر )

-بس بهذا الوكت چنتي طفلة

-موطفلة  ١٤ سنه وبس خطبة واتفق ويه ماما من ادخل ١٦  نتزوج

مارد اخذ ثواني  حسيته يباوعلي  عصر جف ايدي  دااسحبها  ضغط عليها اكثر وكال شنو طلب منج ضرغام

-كلشي ماكو بس سألني عن حياتي القديمة والحادث

-هم ضربج

-لابس كال اعتغفي واني اساعدج

ازر- شصاير هيذام

-انباعت والاوراق اتبدلت

-لابربك

هيذام -وين جنتي تشتغلين؟؟

دنكت همست بخجل قغيب على الشاغع العام

-الملثمه التبيع بنزين

-يي اني واختي

-كم مره داخله للمركز

-هاي اول مغه

-من وصلتي لسه غير ضرغام منو حجه وياج

-بس انت

-مامر عليج صوت عرف لو سمعتي احد گال اسمج اثناء مجان يحقق وياج

-لا بس واحد خابغه من جان ديحقق وياي شويه وفصله وكمل تحقيق

-بأي مدرسة داومين

-مااداوم  لامن نقلنا بابا للبتاوين بطلنا كل احنا  وشغلنا

-الولد الكتلتوا منين تعرفوا

-ماعغف يمكن صديق بابا  لو واحد من ذولة اليبيعون اشياء ممنوعة

-ابوج مشترك وياهم بالممنوعات

-لابس صديقه ابو طبغ واحد اسمه سعدون وكم واحد مااعغف اسمائهم همه يبيعون بابا مصاحبهم

-يعني يتواجدون بيناتكم داخل البيت

-لا والله ابد منختلط بيهم صح  يدخلون للاستقبال يم بابا بس ولا يوم حجينا وياهم لو خليناهم يشوفونه

-وابوج غير الرعاية شنو يشتغل قبل لاتجذبين تره دزيت الولد  ملف حياتج اقل الربع ساعة ويكون يمي

ازر - ملفها هسه شفته جابوا اني وادخل  بس اخذه ضرغام  كله اني انطي الهيذام ويه الاوراق

-حلو خوش فره

-اخابره

-لااا اصلا لاتجيب طاري السالفة خلي براحته وانتي كملي واذا حسيتج بس مفكره تعبرين حرف واحد مواجذبين كفيلج محمد ادگج اجتاف وارفعج فلقة

-والله ماجذب اصلا اتمنى تبلش بالتحقيق وياي حتى اعتغف واخلص من بابا  لان واحد حيوان عايش علينا بس يشغب وو

-وفاتح البيت للدعاره

-لااقصد يكتلنا  وهذا الشي الدتكوله  ماعغف عنه شي  لان نقفل الباب علينه بعد مانشوف شي بس هو يتزوج هواي كل مده يجيب وحده ياخذله بالاسبوع ويطلگ

-غيمة علاقتها  اشلونها بيكم

-والله احنه مالنا شغل بيها بس هيه عاصيه الله  ودوم تزن على بابا حتى يزوجنا لجماعته وهسه ناويه تبيع اختي الصغيغه  لناس متخلف

كلب ايدي ردت اسحبها ضغط عليها حيل وصعد ردن القميص شويه مشه اصبعه على معصمي

-هذا الحرك البيدج شنو سببه

-صلخني بالزيت جان  ناوي يبتغ ايدي من المعصم لان صخنت   وماقبلت اطلع للشغل

-من اشوكت ابوج يشرب

- من وعيت عالدنيا بس جان كلش قليل لان يخاف من خالي بعدها زاد بالاخص من دخلنا للبتاوين صاغ ليل ونهاغ مايبطل

ا-عمارجن متقاربه كلش بس الصغيره بعيده عنكم

-اي بينه سنه سنه  بس وقت الحمل بس غند  لاصاغت قبل الحادث مو هواي

-متأكده هذا ابوجن ؟؟

-اشلون يعني؟

مارد صار هدوء اخذله شويه احس ايده صارت على خدي  وخر شعري عن وجهي  خلاه وره اذني  تركني وصاح احمدددد من قوته صوته رجعت ليورا عثرت لزمني بسرعة وكفني عدل

انفتحت الباب دخل واحد كله نعم سيدي

- تاخذ الولد و ترحون اسحلون جاسم من نص بيته تجيبوا

-حاضر

-ساعة والگي على مكتب شكو معلومات عنه هو وابو طبر حتى غيمة  تنبشون كبر ابوها من صارت لحد هاي اللحظة

-تأمر سيدي

-قدم ورقة طلب قبض بحق كل من ابو طبر وسعدون وتروح تخبر ضرغام يترك شنو بيده ويجيني گله الك خمس دقايق  السادسة تختفي من بغداد بكبرها

ازر -شناوي

-الك الصافي وتعلم الغلطة البسيطة تكلف اركاب ومن تفكر تكتل اول شي دبرلك گبر لان ريحة الجثة تطلع لو تضمها بروحك والزمال الدون التحقيق دباري يمي

-متأكد الاقوال بيها تغير

-متحورة الف درجة

-حسيت اكو سالفة جبيره من ضل ساكن مكتب اللواء ابراهيم  ومصر على القضية خوش حجي تركه اني اعرف اشلون اطلعها واعرف شنو ورا وهم اشوف غزوان شصار ويا

-استعجل ودزلي واحد من الولد ياخذها يردها لمكانها 

مارد اسمعه طلع  ضليت واكفة بكد مافرحت غزوان بعده عايش بگد مااسيطر على سنوني من الرجفه بسبب البرودة وملابسي  الي لحد الان مانشفن

شوية ودخل الشرطي اخذني رجعني للزنزانةدخلت تركني بدون لايفتح عيوني لبالي نساني دقايق واجه دخل بيده  شي شمره يمي  فتح عيوني وخر الكلبجات  طلع قفل والباب  اباوع يمي ملابس شلتهن لكيت بلوزه وبجامة بس مال زلم

ماصدگت بس ردت شي يدفيني دنكت اباوع من جوه الباب  ماكو احد  والمرة تون مغمضة بغير عالم  بسرعة غيرت ملابسي احس صدگ دفيت صح البلوزه وصلت جوه الرگبه والبجامة شكبرها طبكتها من جوه هواي بس حسيت بحريه واني اتحرك

شلت قميصي  شلعت من نهايته خيط رفعت  شعري  ليفوك ربطته نزلت خصلة على عيوني سحبتها خليتها وره اذني وتذكرت حركته

رجعتها لمكانها ابن الكلب گصه وضل يحرگ بكلبي كل شويه وذكرني بي

اخذت نفس انتجيت عالحايط غمضت اجه بالي تصرفاته الي تغيرت فجاه معقوله عرف محمود لو حس  بيه بريئة  بس همه كالوا ماعنده رحمة حتى ويه البريء  يحقر وصدگ جربت هالشي

لميت رجلية لحضني اكلت شفتي اباوع للمرة  وعقلي ويه اسئلته شنو جان مكتوب بالتحقيق الي  خلاه يفكر اني مو زينة وتصرف وياي بحيونة بس رادني اعترف على نفسي

نبره صوته سامعتها قبل مو غريبة بس وين

فززني صوت الباب ينفتح عدلت كعدتي مسحت وجهي الي بس هو طالع من الملابس دخل الشرطي شمرلنا اكل وطلع قفل الباب

جريته وزحفت يم المره مسافة قليلة بينا خليت الاكل وندستها  همست خاله كومي

فتحت عيونها بتعب باوعتلي اشرت شنو

-جابوا الاكل كومي من الليل  انتي مماكلة

همست بتعب مااگدر

-اني اوگلج  بس ساعديني اخلي شي جوه غاسج

-  وين خذوج  شو بسرعة رجعتي

-نفس المكان بصموني على وغقة وسألوني كم سؤال

-اشكد عمرج

-بعد شوية وادخل ال١٧ بس بالهوية لا دخلت

-مامبين عليج ناعمه لبالي اصغر

-جبيغه صغيغه بدأ العدد التنازلي خلي اخلص

-مااخلصتي انتي استوج بلشتي

-غاح اعتغف ومحاكمتي بعد كم يوم

-منيلج  هاي الملابس

-واحد حاغس  شاف ملابسي بيهن مي انطاني منه

-بس ذني مو ملابس حارس

-اني هم شكيت لان هو ناعم وذني كباغ يمكن بايگهن  من واحد هنا عزه بعينه بس لامال واحد ميت

-شفتي الضابط الي حقق وياج

-لاابس صوته يشبه صوت بول تيغي

-شنو بول تيري

-ماعغف بس اكيد تشبيه لفد حيوان قذغ لان هاي اختى ماتكول شي بي حظ

-اذا سمعج تعرفين شنو يسوي بيج

-اي يشمغني بالتيزاب

-سبحان الخالق منطيج جمال وبراءه ومكملها بكسرة لسان

-بس شايل الحظ وهذا اهم شي

-الضابط شنو حجه وياج

-كال انتي معوزه حنان تعالي يمي اخذني بحضنه دگدگ على ظهغي وبوسني بخدودي من كد لطافته  اتندمت مادخلت السجن من زمان

-رئال بنتي انتي تعرفين وين واكعة

- بقضية قتل وبعد كم يوم غاح يعدموني

-مايعدموج راح ياخذوج اذا اكو اختلاف باقوالج يرجعوج لهنا يعيدون التحقيق واذا مطابقة يرحلوج للتسفيرات قبل لايودوج للاحداث وهناك ملمومة اسوء ماخلق الله من بشر راح يخلوج تترحمين على عذاب الاعتراف

-مو علينه حغاس

-ياحراس مكان وسخ  ناس تتستر على ناس راح تلكين الشواذ وتلكين المجرمات وبنات الليل والي ميخافن الله ويتعافن على المنكر والذل

-خوفتيني

- الخوف مو هنا الخوف الصدگ هناك من توصلين بين اديهم ويعرفون محد يسأل عنج

-اني اعتغفت بس حتى احافظ على غوحي عزه بعيني شنو اسوي

-كلشي لاتسوين بس خلي نومج بالنهار ولاتاكلين اي شي ينطنه الج حتى المي لاتشربين غير الوجبة الي يقدموها بيد الشرطيه ودوم انعزلي لاتتقريبن يم احد

-يعني اكو بنات مو زينه جوه

-كلشي يجي براسج اكو  بالاخص اذا شافنج  هيج حلوه وصغيره وماعندج احد  ماراح يتركنج

سكتت اباوعلها متفاجأه من الحجي

بدت تسولفلي عن فتره من حياتها دخلت للسجن شنو الظلم البي واشلون جانن هناك وحده تتعرض للثانيه احس نفسي انسدت عن الدنيا بكبرها مو بس عن الاكل

سويت لفه صغيره انطيتها اكلت نصها وماكدرت تكمل تمددت موجوعة

رجعت لمكاني لميت رجليه عيني بيها اباوعلها شلون تتلوه وبراسي كلامها غمضت همست رايه وينج شنو الصار وياج وهيج ماسئلتي عني

رفعت راسي للسما نزلت دموعي داهمس يارب وقاطعتني بصوت گحتها العالي مثل المختنگة مسحت وجهي ردت اگوم انطيها مي وبطلت واني اشوفها تتقيء دم 

خفت من  منظرها لميت رجليه  اباوعلها اشلون كامت تذب جبود دم ودموعي تنزل بخوف مااعرف شسويلها ؛ اقل الساعة وفتحوا الزنزانه دخل الشرطي حتى ماسأل شكو دنگ لزم ايدها وطلعها سحل عرفت احنه صدگ بين شياطين مايعرفون من الرحمة حتى اسمها

مسحت عيوني قررت بس يطلبني الضابط اشيل التهمة وحدي هم اطلع رؤيا منا وهم اني انعدم بسرعة قبل لااحد  يتقربلي

حضنت رجليه عيوني عالباب ؛مرت الايام  وماكو اي نفس غير المرة يجيبوها تالي الليل وياخذوها الصبح زاد خوفي اكثر على رؤيا لان اعرفها مثل عنادها ماراح تنطي بنفسها وتعترف على اهلي

اكوم افتر مثل المخبلة لساني مابي بس ياربي خلي الضابط يطلبني بعد ماجنت اندعي ينساني

…كاعده مقابيل الباب تالي الليل متانية اشوكت يفتحوها ويدخلون المره حتى انام ؛رفعت راسي اباوع  للسكف اسود مابي اي شي يدل عالحياة  همست وينك اشوكت دز احد شنو اغتالوك  لو هيج عاجبك تجرب بيه نوع جديد من التعذيب

اخذت نفس استوني داامسح عيوني واسمع صوت شخطة بصفي كمزت مفزوعة  اباوع داير مدايري  ماكو شي

خليت ايدي على گلبي ستغفرت ورجعت بعدني ماكاعده واجه صوت  باب الزنزانة اليمي ينفتح عالكيف بطريقة تعصر الروح حضنت رجليه وغمضت ثواني وانطبكت حيل وشي وگع سديت حلگي بأديه وفتحت عيوني على كبرهن

اندفرت باب  الزنزانه مالتي طفرت حتى النفس كطعته واشوف الشرطي دخل

اريد احجي بعد مااكدر  انربط حتى لساني هز ايده  ودخل دارني كلبجني وسد عيوني  جرني وطلع يسحل بيه امشي واحس گلبي يريد يطلع من صدري؛ اخذني لنفس المكان اليحققون بي  دخلني ضرب تحيه تركني واطلع

الباب انسد ودمعتي نزلت من جوه العازل دنكت مسحتها بمتني اجاني صوته وحده يزيد الخنگه بصدري كال ليش تبجين

-ها

-اكو واحد تعرضلج

-لابس لبالي الجني  دخل عليه

-اووف جني؟؟ وشعنده الجني يدخل يمج

-والله سيدي السجن مسكون

-كولي غيرها

- مداجذب كل يوم من تظلم الدنيا يبدي يفتغ بالمكان

-يفتغ ؟ لاه همزين خبرتيني 

سكتت حسيته يستهزئ

-اي رئال طلعت البصمات وللاسف والادله الجنائية كلها ضدج

هو يحجي واني غمضت  صح جنت ناوية اشيل القضية بس من سمعت وعرفت الموت قرب انعصرت روحي

سحب الكرسي كام اجه يمي كال بيج شي

طلعت الشهگه غصباً عني

-ليش هالبجي بس لاخايفة من الموت

مارديت

-غزوان هم جان يشرب ؟

مسحت دمعتي بمتني واخذت نفس اشرت لا

-وين يودي افلوس شغله  وهو يشتغل شفتين

-نص لبابا وقسم  يضمهن بسكوت حتى يتزوج  بيهن 

-وانتي هم تضمين

-لاوالله اصلا كوه نجمعهن لبابا بس انضم الف لو خمس مية  انلمهن نجيب بيهن  اشياء النه لو نعوض الخساغه اذا تعغضولنه (تعرضولنه) حتى لا يكتلنا

-اشلون يتعرضولكم

-دوبات يسطون علينه  ياخذوهن  ودوب اتصيغ مشاكل بالمكان  مثل قبل كم يوم ثنين شباب اخذوا كل شغلنا ماخلوا بس البنزين وهم بدون قصد ضغبت سياغة واحد  تالي نزل داغ البنزين بالكاع عاد همزين عدنا افلوس ضامين جبنه  بيهن وهم كتلنا بابا لان قليلات

-وهاي كل الي ميشري منكم تشخطون  سيارته

-لاوالله ابد بس جنت بيومها خايفه على اختي  لان سمعت ناوين  يبيعوها  فوگ المصيبه  اجوي شباب كتلوني واخذوا افلوس تعبي  ماعغف اشلون طلعت غضبي بي 

-ليش ترجفين بردانه

-اشوكت تعدموني

-خايفة ؟؟

هزيت راسي اي  ونزلت دموعي

مد ايده مسح دموعي بطرف اصابعه وسحب شعري خلاه وره اذني كال احجيلي عن حياتج

مسحت خدودي
-مثل شنو

-كل التذكري من وعيتي للدنيا لهاي اللحظه اي شي يخطر بالج كولي بدون خجل كأنما جاي تكتبين بدفتر مذكراتج

-يعني اكو امل اطلع

-وليش لا اذا بريئه

-انت تقبل ؟؟

-رب الفلتج مرتين من اديه مايكملها ويطفرج بالثالثة

رفعت راسي ماشوف كلشي منه بس اريد افتهم شنو يحجي

-اسمج رأل لو رئال

-غأل بس بدلوا  من طلعونه هويات بتقديغ عمغ

-اسم غريب مثل طريقة حياتج

-شنو احجي وانت عغفت عني حتى اسمي الي خواتي ميعغفنا

مارد اسمع طگت الجداحه وريحة دخان جگاير اخذ نفس نفخه وگال احجيلي رأل

هزيت راسي
وبديت احجي مثل ماگلي  جان يتسنط بهدوء مااسمع غير حركت البسطال  قريبة يفتر يمي التوتر والخوف صارن واضحات بطريقة كلامي مااعرف المن يريد يوصل لو شنو غايته وصلت  علاقتي بمحمود اختصرتها بعدني مامكملة وماحس غير نفخ الدخان بوجهي كال كافي

-بعدني ما كملت

-الي اعتازه سمعته

-تغه ماجذبت

-بس طفرتي

-مثل شنو

-شتكولين انتي

-مااعغف اذا تعغف شي واني ناسيته ذكغني بي دااگوله

قرب يمي جر ايدي لزمها طبگ الردن رد للثانيه هم طبگها تركهن وسحب البلوزة عدله من فوگ گال هدوئج يكرص الروح اكثر من البرد

صفنت هاي احجاية محمود

مد ايده مسح شفتي بطرف اصبعه درت وجهي همس  شنو شاف بيج على شنو حبج

غمضت گد ماقريب احس نفسي داخل حضنه دااسحب روحي وانفتحت الباب وخر عني بسرعة دخل واحد  من صوته عرفته ازر كله ها هيذام  ماخلصت

-ضال ساعتين عالخفر ماعندي شي

-اجتنا اخبارية طالعين بيها واللواء يكول  خلي ياخذ الولد ويروح للسرية  شنو هاي شسوي هنا موخلصت القضية 

سكت شويه ورد كال بصوت خافت راح اعيد التحقيق

-هيذام  صدگ تحجي هيه شضال بيها صاحي وتعيد التحقيق خربطت ابو خلقتها واعترفت  حتى عالجوارين بعد شتريد منو تجيبه

تركه و صاح للشرطي كمشني طلعني رجعت لمكاني نزعني الشي الغالق عيوني   شفته مو نفس الشرطي الي ياخذني لاواحد جبير بالعمر  ومبين حباب راد يطلع كلتله سيدي اكدغ اطلب طلب

-خيرج بويه

-عندي اخت اجت وياي بس مااعغف وينها

-رجعي مكانج مايصير تحجين وياي راح تعرضيني لعقوبة

-الله يخليك والله كلبي ناغ عليها بس كلي بعدها عايشه دخيلك عمو كلمة وحده

-استغفر  الله ربي لابوية مابيها شي طلعت براءه ماعليها اي تهمة  لان غزوان اعترف والبصمات طلعت ضدج

-صدگ  تحجي الف الحمد الله والشكغ الله يحفظلك بناتك مثل ماطمنتني

-ويحفظج بنيتي يله ردي لمكانج اني اليوم خفر   كاعد هنا لاتخافين اي شي تعتازي بس دگي الباب

اشرت اي  واشكرت منه ابتسم  وقفل الباب  اشكد حنون لعد اشبي هيذام جنه واحد مجلوب من عضة مسودن  بس يريد يفترس انوب يكلي اشاف بيج  ديله من زينك

رجعت مكاني  سمعته سحب كرسي وكعد بداية الممر  تمددت خليت ايدي جوه راسي اسمع صوت الاذان ابتسمت وكت گعدتنا  اجه بالي راية شدتسوي هسه  بعدها تطلع للشغل 

هم تذكر مكاني يمها بالبسطيه لو نستني هم يجي يوم ونرد نلتم بحضن ماما لو هم صار حلم ونضاف لبقية الاحلام

مسحت دموعي وغمضت سلمت امري لله و رحت بالنوم  اول يوم انام براحة

كعدت الصبح على فتحت الباب لبالي جابوا الاكل بس دخل الولد كال كومي بسرعة

-شكو سيدي

-طالبج اللواء ابراهيم  استعجلي بنتي قبل لايرجع الضابط هيذام

-ليش

-استعجلي يابه هناك تعرفين

كمت بسرعة حتى ماسد عيوني اخذني  هيج رحنا مونفس الطريق الكل مره نروحه عبرنا ممرات كلها شرطه صعدنا درج وصلنا يم غرفه يمها حارس دگ الباب ودخل دخلت ورا

اباوع  غرفة ضخمة وادفية تخم على جهه ومقابيله مكتب كاعده  واحد جبير بالعمر بس هيبه وشخصيه لابس زي عسكري مدنگ على اوراق يكتب بيهن  ضرب تحيه الشرطي شال راسه باوعلي وابتسم

اتبلعمت بسبب هيذام انزرع بيه رعب و كرهت شكو واحد لابس عسكري

- رئال جاسم

-هزيت راسي اي

-هلابيج بابا اتفضلي كعدي

صفنت شنو يحجي هذا

-ههههه  لاواضح شغل هيذام  كعدي بنتي لاتضلين واكفه وانت ابني اطلع جيبلها ريوگ والي وكوب كهوه 

-حاضر سيدي

-خليك يم الولد وافتح عيونك عدل مثل ماوصيتك قبل لايوصل تنطيني خبر

-تأمر سيدي

كالها وضرب تحيه طلع سد الباب اشرلي المقدم كعدي خجلت اكثر من مره طلب مني هالشي رحت كعدت على طرف القنفه  وهو دنگ يكمل توقيع

نظافة ودفوا احسه دخل بعظامي عيني تتجول بالمكتب وترجع عليه مستغربة وبنفس الوقت كلبي مامأمن من تصرفه لمن سحب الكرسي وكام كتمت حتى النفس  اجه قريب كعد مقابيلي وانتجه كال اي رئال وصلج الخبر كل الادلة طلعت ضدج

همست اي

-وانتي معترفة وموقعة على اقوالج

-نعم سيدي

-تعرفين شنو الحكم بمثل هيج قضية

-والله العظيم اني ماكتلتهم

-جا ليش اعترفتي

سكتت

-حتى لومامعترفه البصمات طلعت الج والحمض النووي الي باضافير المجني عليه الج

-جان ناوي يعتدي عليه والله جنت ادافع عن نفسي

-واني اتحريت عنج وعن عائلتج وعرفت خطيبج وخالج  منو  بس يابنتي هذا مايمنع انو القانون ياخذ مجرى والامر  انحسم  حتى لوحاولت الضابط هيذام  راح يوكف بوجهي لان القضية اله وهذا المعروف عنه مايطلع من القضيه اذا ماينهي امر المتهم اذا موعدام مؤبد

-بس هو گلي غاح اساعدج

-واخذ منج معلومات بعد عن الباقين مو

هزيت راسي اي

-امم مثل ماتوقعت سمعي بنتي ماطولج دخلتي هنا واخذوا اتعترافاتج وبصموح  لاتتصورين واحد بعد يكدر يساعدج بس كولي عن طريقج يجيب متهمين اكثر ويترقه اسرع نفس الوقت انتي ينتهي امرج وامج وخواتج يضيعن اكثر ماهنه ضايعات

مجرد ذكر الاعدام كدامي وصورت خواتي وهو يضربهن بابا اختنگت

- صغار والموت بعد وكته مو ؟

-ماشفنا كلشي من حياتنا خلصناها شغل وتعب و

-كملي وبعدها وكعتوا بيد هيذام

دنكت

-طريقة عملجن ودفاعجن عن شرفجن خلتني افكر امد ايد المساعدة الج بس تضل مصير حريتج وتعويض عيشتكم السابقة بحياة افضل  بيدج 

-اشلون ؟

-اوراقج تختفي والاعتراف يتغير وبدل السجن تكونين بنيه الها قيمتها بالاضافة الي حياة الرفاهيه الي راح يعيشنها والدتج وخواتج

-مافهمت؟

-سمعي بنتي حتى لاتكولين ظلمني اني الله رزقني بأبن مصاب بالتوحد  بس بنسبة قليلة وهسه كبر صار يعتاز مره بحياته تساعده بأكله وشربه فقط لان هو لاغي فكرة الزواج من راسه اشكد حاولت ويا ماقبل قافل ومحد ترضى تقبل تعيش ويا بهيج وضع  ولااكدر اخلي مساعده ويا بيت واحد لان هومستقل هم ماترهم كدام العالم

-مافهمت اني شنو من كل هذا

-اعقدج بأسمه وبدل دخول السجن تضلين ويا داخل بيت نضيف تهتمين بي وتشوفين طلباته بالمقابل   اهلج راح يكونون بمسؤوليتي من بيت بمكان زين ورفاهيه  من كل النواحي

بعده يحجي واني بهتت 

-جان انطيتج فتره  تفكرين بيها بس للاسف ماعدنا وقت اريد جوابج هسه قبل لا يرد الضابط هيذام لان مانعرف شنو ردت فعله من يعرف انسحبت القضية من جوه ايده

باوعتله اشر احجي…

رايه***

غزوان يحجي واني اباوعله  متفاجأه رد الولد ذباح شمالك يخوي تحجي صدگ ماهو تنگيص من البنت  لاوعلي  اخلها على راسي وتشرف بيها بس اذا لخاطر حمايتهن الروح فداهن اليرشهن بمي ارشه بالدم

-اهلك يرضون يستقبلوهن يعيشن يمهم وهنه ميعودنلكم بشي

- الاهل گبل الدار تحت امرهن للغرب نفزع اتهگي نصل لرفجاني انگصر لاعيب هالچلمة انت ماتطلب انت تأمر الاهل والديره تحت امركم

-عمتي وخواتي عاجزات حتى مصدر رزق ماعدهن اخاف فتره والاهل يملون منهن وحقكم لان عمي صاحب مشاكل

-اليكرب صوبهن انخله بارود وكلام الله اتفگهم تفگ  تراهن بحماية ازلام  العيشه تدبر صح على گد الحال بس بالحلال رضا لاتخلي بالك من هالثانية صارن بظهري حالهن حال اخياتي لحد ما الله يفرج عنك تجي تاخذ امانتك من هالشارب جلمة ماماستهن موش خدش

-خدمه عمر  عاجز عن ردها

-تردها ان شاء الله اطلع بالسلامه  وانه اعرف اشلون اخذها منك بس يخوي تعرف احنه وين عايشين ترانا بدو انعر الصحاري وره رزگنا اخياتك يتحملن هيج عيشه

هز راسه اي والكسره بعينه دگدك على متنه ابتسم وراح وكف يم ناس شكلهم يخوف اكثر منه مبين صدگ مايتفاهمون و الكتل عدهم عادي

انداريت لغزوان عصر ايدي سحبتها منه اباوع عيونه صايرات حمر كد مابيهن قهر ولهفة يباوعلي بحسره لو اعرف هاي نظرته تمر اسنين من عمري واني مغمضة بس حتى اذكرها مجان درت وجهي عنه

همس بوجع اريد اموت واني مطمن  عليج

-انت ترتاح وتعيشيني بجحيم موتك مرتين

-رايه

-لاتكول اسمي على لسانك

-رحمينيييي ولج ماشفت النوم من يوم الدخلت هنااا حسبالج سهل  عليه من كلتله اعقدها  ولج موت اهلي اهون جان عليه داموت عالبطيء وكلام الله

-معقوله انت تحبني ؟؟

-تسأليني احبج واني نهدت امتوني من النگل بس لخاطر  اجمع مهرج واسويلج الزفه الي تحلمين بيها

-جذاااب ماحبيتني

-اي صح  لو جنت احبج جان منعتج من الزواج جان اكتفيت كل اسبوع تجيني ميهمني اشلون تعيشين  بس  اني عايش بيج تعرفين انتي اغلى امنيه عشت حتى احققها ماشفت ولاراح اشوف بعيني غيرج

-لعد وينه وانت دتزوجني  بيدك لواحد  ودتجبرني اروح وياهم 

-لان انتهيت كلها ايام ويصدر امر حكم اعدامي راية اني انتهيت عاجز حتى عن حمايتج رورح اخوي ماخايف من الموت بگد ماخايف اشلون اتركج وحدج شايل بروحي وجع يخلي الواحد يشتهي الموت ويتمنى ماجاي للدنيا

-اجيتك حتى اتحس بيه وتشيل شوية  من همي بس طلعت غلطانه

-ولج جااااي اموووت وحق كلام الله جاي اموووت ولج احبج تعرفين شنو احبببج

كالها وبجه بصوت دنگ خله راسه عالحديده درت وجهي دموعي تنزل دقايق واحس لزم ايدي باوعتله سحبها خلاها على صدره همس كلبي يوجعني رايه روحي موجره نار

-فتحت عيوني واني اتاملك كل دقيقة تمر من عمري احسبها ويه عمرك جنت اضحك واني بنص الوجع بس لان اشوفك كدامي اعد الثواني اشوكت اللبس البدلة الك واصير بحضنك جاي بعد كل هذا تكلي روحي لغيري

-لان اعزج اكثر من روحي لان جنت عايش الج؛عشگي جبير بس عمري قصير

-وبعدك تحبني وراح تعيش علمودي لان اموت بدونك ماراح اروح وياهم  وراح انسه السمعته منك بس وداعت حبك بكلبي اذا عدتها بعد ماتشوف وجهي ماراح اگلك انساك لا بس راح احسبك متت واللبس اسود عليك وانت عايش

-اذا مومؤبد انسجن عشرين سنه

-لو الف سنه اضل انتظرك لااخر نفس بيه حتى لوماتطلع بس خليك عايش واني اجي اشوفك  كافي عندي

-ماراح تكدرين ادبريها وحدج

-اكدر اقوى بصوتك وكمل بنبض كلبي وهو يدگ الك

-عمي بس يصحى لزمانه راح يرجعجن وقتها محد يحميجن منه

-ماراح ارجعله راح اخذ امي وخواتي واروح غير منطقة اعيش واشتغل لحد ماتطلع وترجعلي

-راح تتعذبين وتعبين

-راح تعوضني بيت واطفال راح تخليني انسى كل هم شلته

-اتمنى افتح صدري  وضمجن جوه

-احنا جوه غزوان بس انت اوعدني ترجعلي

-لوعليه اوعدج بروحي بس القدر ماعرف شكاتبلي بعد

-كاتب تكمل المده وتطلع نتزوج ويصير عدنا اطفال ونعوض كل الوجع  المرينه بي

-تضيعين عشرين سنة من عمرج

-اضيع العمر بكبره بس انت انطيني كلمة بعد ماتتخلى عني هيج

-انطيج روحي

-اقوى لخاطري غزوان لاتوجع گلبي بيك حارب سنين السجن بحبنا كل يوم يمر شخطه بأمنيه رجعتك لحضني

-وين راح ترحين اشلون دبريها

-راح اخلي خواتي يم ماما بالمستشفى  واطلع ادور غرفة صغيرة بس تصحى ماما اخذهن واروح نعيش بيها نطلع اني رند نشتغل ورؤيا تضل يم ماما بين ماالله يفرجها

-لاتشتغلين انتظريني بس انتقل للسجن الجبير اني اشتغل اغسل ملابس السجناء واطبخلهم اي شي اسوي المهم اجمع الي يكفيجن كل اسبوع تجين تاخذين مصروفكم كامل

هزيت راسي اي

-غيمة ما ماتت ؟؟

-لابس بعدها بالمستشفى

-وعمي

-طردنا بعد مايسأل عنه وهذا الشي كون من زمان نسوي ماشايله هم الشارع نعيش ماعلينه  بكد هم رئال الي مااعرف عنها شي

-بعدها بالتحقيق بلكي تطلع اني اعترفت بكلشي بعد ليش لسه مافرجوا عنها

-كالوا البصمات طالعة عليها

-حتى لو البصمات طالعة اخاف هيه خافت واعترفت  على نفسها

-مااعرف مااعرف راسي مشوش وكلبي يوجعني عليها رئال فقيره  ومتسرعة دوم ماتفكر بالتسوي الخوف يحركها 

-ماعليها حتى لو اعترفت اني شلت القضية هاي خاليها حتى يعيدون التحقيق وياها ويطلعوها

- من ارجع اخلي المريه تخابر المحامي بلكي هم يكدر يساعدها

-رايه غيري المستشفى اخذي امج وروحي لغيرها ابوج بس يصحي لزمانه تره يردجن

-ان شاء الله هسه من ارجع منك گبل انقل ماما لغير مستشفى واخلي رؤيا يمها واطلع ادور غرفة

-لاتخليني وراج ادري صعبة عليج وداحملج اكبر من طاقتج بس دزيلي خبر بيد اي احد اذا ماكدرتي تجين الاسبوع الجاي بس حتى امن انتي بخير

-احسب الايام اشوكت يخلص الاسبوع حتى اجي اشوفك وانت  تكلي دزيلي خبر هيج بده حبي يقل بكلبك

اخذ نفس طويل وعيونه انترسن دموع همس لو تعرفين شنو بكلبي الج

ابتسمت والعبره كامشتني نزع نظارته مسح عيونه  -اخذيها وياج هاي مفطوره

-لعد اشلون تشوف

-اشوف بيج خليها يمج حتى كلماتشوفيها تذكريني

-وعدتني ماتعوفني  وحدي غزوان 

ابتسم ولمعت عيونه

-والله احبك

-ههههه واخيرا كلتيها اووف شكد جنت اشوفها بعيونج واتمنى اسمع منها و لو حرف واحد اكتفي

-راح احبك اكثر من قبل و نتظرك بهلفه اكبر  يله  خلص الوقت اوعدني تقوى علمودي

-راح اجمعلج بدل المهر عمر راح اشتغل ليل ونهار هنا ماراح اخليكم معتازين شي بس انتي ديري بالج عليهن

هزيت راسي اي

عصر ايدي سحبها دنگ عليها اخذ نفس منها طويل  وباسها

-يله رايحه

-مودعة  بالله ياعز من روحي

سحبت ايدي ودرت وجهي مااكدر ارد احس العبره جرحت بلعومي كمشت ايد رؤيا ورحت امشي ودموعي تنزل بكتمه طلعت ماشوف كلشي كدامي احس روحي تركتها وراي

وصلنا بره وكفني صوت المره وهيه تصيح اكفي يمه

وكفت انداريت نفسها الي جانت واكفه يم ذباح مسحت دموعي اشرت اتفضلي

-اني رضيعة ذباح  السجين ويه خويج

-مواخوي هذا خطيبي

-ربي يفج ضيگته ويستر عليجن يمه اشو مهونه وماخذ الطريج سيده  على خيركم

-رايحين

-وين ويعمه موش گال ذباح تعگب وياكم

-لاخاله امي مريضه بالمستشفى مااكدر اتركها وحدها

-الله يشفيها الكم ميخالف ييمه  نطرگ اميمتج ونأمن عليها وتعالن ويانه وعلي نخليجن بعيونه واذا هيستن بتگصير الج حگ تردين

-لاخاله حشاكم من التقصير بس دتشوفين خواتي صغار وامي كون اكابلها اربعة وعشرين ساعة مااعرف اشوكت تصحى  اذا صحت ومالكتنه تتخبل

-حگها من تاركه هيج وجوه تضوي وراها موش بس تتسودن بس يعمه انتن ثلاثتجن حديثات وكال ذباح ماعدجن احد والعالم ماترحم لامن لسان ولامن مخافة الله واذا على امج مانتركها بحدها كل يوم يطركوها زلامنا وهم نوصي عليها لخاطر من تصحى يبلغوها وهم يبلغونه ها يمه شكلتي

-ماعرف شكلج خاله

-كولي يالله بالعباس ياذباح يتسودن ويسود عيشتنا اذا رحتن يعمة حملني مسؤوليتج هالچم يوم بين مايطلع لان دگ صدر لرفيجه وهجس بيج خايفة لكشه كلبه لا تعاندين وتهونين وهو كض شاربة بيجن

- خاله مو خايفة  وغزوان لومامتأكد ما يأمنه يمكم بس لحدمن انضل مزحميكم تره احنه هواي

-لوجيش بحمله انحطكم على روسنا ييمه قابل جاعدين على كلبي اشو الدار واسع والرزگ رحمه من ربي وبنواتنا طيبات يكيفن بالخطار وانتن ان شاء الله موش خطار انتن من ريحة رفيج ابن البدويه  يعني اعز من بناتي

اخذت نفس محتاره

-انتي وين رايحه بخواتج موش يگول ابوهن غاضب الله بيهن وامج راگده ماهي واعيه

-اي هو رايحه للمستشفى يمها

-يامستشفى دتنوعي لاخياتج وجوهن يصد الكمر من ضواهن ماتخافين عليهن من العيون النجسه وحتى انتي بس لاحاسبه روحج جبيره تراج حديثه واكثر العين عليج استهدي بالرحمن يعمه وحدري وياي يمتى ماتضايگتي انه اردج بيدي ها شكلتي

باوعتلها اكل بشفتي

-يله  انوب الغشيمه  تعض شفتها ولج انه المره الجبيره وتنوعتلج  موش الازلام وتردين تحافظين على اخياتج هو انتي رايده اليحميج يله يعمه وعلي  ماتتندمين وهم عدنا حرمة ذباح من حلج وطيبة راح ترتاحين وياها

-يعني متزوج ؟؟

-ثنين عنده ابن البدوية موش وحده زاتهن على افادي ومخلصها بالسجون اوو سوالفه  تعل الگلب  تركج منه  امشي خلي نگعد غادي لبين مايرد صهيب  لخاطر نروح يم امج على ماتقررين

راحت كدامي كوه تمشي كمشت ايدي رؤيا كالت نروح وياهم

-وماما ورئال اشلون

-هو لخاطرهن حتى اني ورند نضل يمهم وانتي دورين رئال اذا ضلينه هيج ماراح نگدر نخطي خطوة وحدة رايه ادري حملنا جبير عليج بس والله العجز دياكل بروحي اتمنيت لومعترفة على نفسي ولازيدها عليج

-اي حتى اتخبل فرد مرة تركوني كلكم

-وهسه عالاساس  وجودنا بي فايدة اشو بس هم وتعب هاي وكفتنا محتارين وين نروح بعد حتى بالمستشفى مايستقبلونه

-اخاف نروح وياهم يعيقون حتى حركتي لان مبينه من لهجتهم صعبين وحياتهم اصعب وحتى هذا ذباح ماارتاحيت لنظراته وهو يباوع لبسنا  وليش هيج مصر ياخذنا عدهم

-لان احنه تقريبا مصلخين بذني ملابسنا من غير شعرنا طالع بدون حجاب  وهمه عرب واذا واحد نخاهم مايردوا يعتبروها عيبه وغزوان حاجيله علينه يعني يعرف اشلون ضالين بالشارع تلكي الف سالفة اجت براسه

-دتعالي المريه  كاعده وحدها فشله وبعدين اقرر

ماردت عرفتها فرحت من سمعت عايش بالبدو وايده والكتل  حسيتها اجاها من الله تزيد مرض الاجرام بداخلها  بي ماتدري اني اتنازل حتى عن روحي بمقابل احافظ عليهن

كمشت ايدها رحت يم المره كعدتها وكعدت لازمه رند دنكت المره باست رند كالتها شني اسمج ياحلوه

-رند

-صدقة لمحمد خطف الخضر عليجن احنه هم عدنا بنوته بت عمج صهيب حلوه مثلج وعدها لعيبات راح تحبيهن وتصير اخيتج

-غزوان هم جابلي لعابه بس حلوه كلش عيونها مثل رؤيا وهسه راح يجيبلي ثوب

-اووف ربي يحمي الجن وتدللن بجاهه وانه هم  راح اشريلج ثوب واجيبلج لعيبات يشبهنج بس نصل غادي

هزت راسها اي وضحكت كرصت خدها وهمست ربي يستر عليجن بستر الفواطم

كلتلها شكرا خاله

-عدجن بعد اخت كال ذباح

-اي هم متهميها بالكتل بس مانعرف اي شي عنها

-هم كال تگضي يعمه لاتخافين تركته يعطي معلومات لصهيب لخاطر يشوفلها محامي زين لبين مايطلع هالجم يوم ويكض قضيتها

-صدگ خاله والله اخدمكم عمري كله بس كون نعرف اختي وين

-البت مگدارها جبير مهما اعتازيتي يعمه لو زتتج الدنيا لاتنگصين من روحج وتكولين اخدم البنت خلقت تاتصير تاج يلمع ماترضه بمجان  غير فوگ راس السلاطين واليعرف مكدارها 

-ذني العدهن اهل واليعرفن اكو من اليسندهن ويعيشهن بعز يصيرن هيج مواحنا دايستنا الدنيا

-الدنيا ماتدوس بس اليرضه ينداس خلي كلبج گوي وتحدي الظلم واكفي بوجه الوكت  راح تتنوعين روحج بالمكان اليليگ بيج  محد انخلق ابن عز ولااحد انخلق بكرامة هالشي انت التزرعه بروحك

-مارايده لاعز ولارايده مقدار اهم شي عندي الم اهلي وارد مثل قبل حتى لو اعرف اشتغل وانظلم اضعاف الجنت عايشه بي

ضربتني على كلبي كالت هذا كلبج الرجيج اذا ضل هيج موش بس تنداسين لا ماراح يكونلج گيمة لابين الناس ولاحتى بداخلج   تضلين خاضعة للذل

سكتت لزمت ايد رؤيا الي صافنة وادري عقلها مشغول اشلون تنتقم من بابا عصرت ايدها مثل الفزت همست والله راح اخلي يتمنى الموت

اخذت نفس واشوف الولد جاي يمشي كدامنا مدنگ تقريبا نفس اوصاف ذباح بس اكبر منه بالعمر هم اسمر وطويل ضخم عيونه مكحلة لابس زي عربي  شاف المره اشر كوموا وراح لجهة السيارة

كمنا سحبت رؤيا مشينا كلبي لاجمني مجرد شوفته وهو يمشي خلاني احسب الف حساب اجي وياهم مو اعيش ؛ احس روحي بحيره من جهة كلام رؤيا صح ومن جهه خوفي عليهن بين عالم غربة

وصلنا يم سيارة بيكب صعدنا  شغلها سأل عن مكان المستشفى هو ومدنگ انطيت العنوان طلعنا الها مرينا عالسيطرة صار كدامي  مكانه اني ورئال تذكرت من تركض ورا السياره وتندار تضحكلي تأشر حصلت افلوس نزلت دموعي  شهكت اسمعه استغفر

شلت راسي للسما ربي ماضل عندي غيرك اخيتي امانتك؛ مسحت عيوني وكمشت ايد رؤيا الي اتعس من حالتي بس تكابر

وصلنا للمستشفى نزلت خواتي رحنا جوه وهمه وياي دندخل للغرفة وتوقفت بالباب واني اشوف بابا وهو وابو طبر يم امي كام  كال شرفتي وين جنتييي لج

-ها بابا يم رئال

-شوداج يم العااار

-غير اختناا

- انعل ابوج لابو اختج العاهره  تنسيها نهائيا وهذا منووو وياج

قبل لارد دخل صهيب مد ايده كله انه ابو صگر رفيج ابنكم

اتصافح ويا وكله -منو ابنه تره تبرينا منه

-هاي امور عائلية بينكم تنحل بس حريمه جبناهن بطريجنا لان نخانه بيهن

-اكلك مو ابنه وهذا مايعودلي لامن قريب ولامن بعيد منين اجن حريمه واحد لقيط عطفنا عليه ربينا بس كبر خله عينه على بناتي وكتل اخته لان  لكفته يتحارش بيهن

-استغفر الله گول يالله حجي الشاب نظيفه تربيته وبي شهامة تسد ديره مانخانه  ولاترجانه اذا ماجانن صدگ اخياته وخايف عليهن

-ليشش ماعدهن اهل وينخاك لوماناقص مايطلب من الغريب ويحرضه على ابوهن لو كول باعهن النا خو مو بعيده عليه

-لاحول الا بالله يعم لاتظلم الزلمه تراه معدل وصاحب غيره خاف عليهن من الماعدهم مخافة الله راد يحميهن

-ليش وين هنه حتى يخاف عليهن هاي لان تركتهن يم امهن كم يوم بين مافضيت المصيبة السواها ورا
ويابه هم رحمه على والديكم  ماقصرتوا والنعم منكم  من رخصتك لان تأخرت والمركز طالب البنات اريد اخذهن الهم

اباوعله اخذ نفس متضايق وكف يباوعله بنظره من يمي خفت منها عكس بابا الي واكف تكول خنفسانه قذره يتخاز ويا رفع صهيب  ايده بسرعة بابا رجع راسه  ليورا

حگ خشمه وابتسم بسخرية  دگدگ على متنه كله عينك بناتك لاتخلي گلة المروة تاچل عگلك البنيه ملاك ربي يرزگنه بي من صانهن رفعه ومن عزهن عزه

هز راسه اي

-كل يوم والثاني  اچي  ازور رضيعتي لخاطر ولدها الوصاني بيها وسأل عن حال البقية

-تهددني

-لاعطيك خبر

اندار اشر للحجيه اجت يمي كالت اضل مناطرتكم هون يعمه لو اروح ويه خويي الم اغريضاتي وارد هلبت مخلصات شغل المركز لخاطر اضل حدجن مجان اميمتجن لبين ما الله يفرجها وتكوم سالمه  لان ابوج حضر بعد مالنا حگ ناخذجن ويانه

-بكيفج عمه بس ديكلج طالبينا والله اعلم اشوكت نرجع يمكن لوجه الصبح

-هاي هيه چا بين ماتكملون شغلكم لاني لامه حويچاتي وچايه حتى لوبطيتوا راح اجابل اميمتج لحد ماتجين واحدر وياجن اضيف يمكم لحد مايطلع ابن البدويه ونشوف شنعمل

-هلا بيج عمه والله اكيف اقلها بليل نأمن اكو احد يمنه 

- تفرج  ماتضل هيج يله ييمه عينج بخواتج ديري بالج عليهن

-ان شاء الله 

جرتني باستني وراحت دنكت باست راس امي سلموا وطلعوا بس نزلوا واجه بابا كمشني من ايدي گال تردين تشردين وياهم ولج

-لاوالله بابا همه اصدقاء غزوان وموصيهم علينه

-وشعرفجن بيهم بس لارحتي للنكس

-ها لالا رحت لرئال همه نفس السجن وشفتهم هناك اجوي  يشوفون ماما وهم امهم كالت اضل وياكم حتى يساعدونا بفلوس علاج ماما وعيشتنا لبين ماتصحى ونرد للشغل

-الله ياخذجن انتن وامجن بساعة وحدة يله بسررعة كدامييي عالمركز اكمل شغل وارد اعلمج اشلون اطلعن بكيفجن

-احنه ماطلعنا انت طردتنا

فتح عيونه بكبرهن رجعت ليورا على حضي حتى الغرفه خالية بس بنت المرة نايمة بعيد  جرني من شعري صگ على سنونه كال شنو حجيتي لج

ركض ابو طبر سحبني منه -  مووقتها ردوا للبيت وربيها هناك

-الضاهر صدگ ماعرفت اربي اني بس سهلة خليج هناااا نكبري يم امج لحد مانردلج

-شنو يعني

-يعني تنگمعين يم اليهوديه لان ماطالبين شكولج الزفره  لحد ماكمل شغلي وارد اسحلج للبيت اعيد تربيتج القذره وانتييي رؤيا اخذي اختج وطلعي كدامي بسرررعة

قبل حتى لااحجي لو اعترض دفعني بقوه على ماما وكمش رؤيا جرها وابو طبر  دنگ شال رند وطلعوا بسرعة

عين بخواتي وعين بماما نزلت دموعي محتاره شسوي كالت بنت المره  روحي وره خواتج  خطية يجوز يخافن من منظر المركز والشرطة

-خاله فدوة ديري بالج على ماما اخاف تصحى كليلها مانتأخر 

-ميخالف لاتخافين عليها امي  هسه تجي بالحمام وانتي هم لاتجاوبين ابوج مبين عصبي من يحجي سكتي اخاف يأذيهن وهنه يكسرن الكلب لاحول ولاقوة

اشرت اي ورحت بست ماما من راسها همست يم اذنها دخيلج كومي  راح نضيع بدونج كومي لخاطر رئال الي مااعرف عنها شي

مسحت وجها من دموعي النزلن عليه صارت مداليتها تلمع كدامي دنكت بستها و دخلتها بداخل ملابسها

طلعت اركض لبالي تركني  لكيته بعده واكف  يصعد برؤيا رحت بسرعه يمهم سد الباب تفل عليه وندار صعد

مسحت وجهي بظهر ايدي وفتحت الباب احس العبره تاكل بكلبي  صعدت يم رؤيا لكيت رند تبجي بخوف وابو طبر يبوس بخدودها سديت الباب وجريتها من ايده باوعلي بغل تفل وصاح قذره مثل امج

دارد ولزمت ايدي رؤيا عصرتها غمضت اهدأ نفسي دار وجهه حرك السياره ؛ ضمت رند راسها بحضني تشهگ برجفه  اخذت نفس ولميتها دنگت بسها وهمست لاتخافين يروحي

-بعد لاتخلي ياخذني

-مااخلي بس كافي لاتبجين

-كولي لغزوان خلي يبسطه لان عضني

-الله ينتقم منه الحيوان

حضنتني حيل احس جسمها كله يرجف ضميتها بقوه وغمضت ؛ رؤيا خلت  راسها على متني همست  لبالي ماتجين

-اشلون اعوفجن

-راح يكتلج لان محد يلزمه راح غزوان جان ضليتي ماعلينه احنا اندبر روحنا

-لو اعرف اموت مو انكتل مااتخلى عنجن هو اني شبقالي غيرجن 

-اول مانخلص من المركز ننهزم

-اخاف اضيعجن

-مانضيع اكثر من هيج

مارديت حسيت كلامها صدگ عدلت راسها على متني وسكتت اكثر من نص ساعة واحنا بعدنا بالطريق اباوع هذا موطريق المركز

السياره تمشي واني عيني ويه بابا اريد اسئله يامركز طالبينه واخاف لان يدخن  وكل حسره يذبها اشطولها روحه طالعه مبين واكع  بمصيبه جبيره

ثگل راس رند دنكت لكيتها غافية خليتها على صدري عدلت نومتها وكمشت ايد رؤيا كلبي يريد يطلع ماعرف ليش طلبوا رؤيا من جديد

السياره تمشي واني اندعي لمن دخلنا منطقه زراعيه مابيها بس بيوت مطشره حتى ناس بالشارع ماكو

وصلنا يم بيت مفلش وكفت السياره دگ هورن فتح الباب واحد مخربط اشرله هلا

ابو طبر-  وهاي وصلنا يله نزلوا

بابا - شكو كلها نازله خليهن هنا بس العروس

-هم صدك اندار لرؤيا كاللها يله ياحلوه فضينا نزلي .....

لاتنسون التصويت …