تحميل رواية «شيء من رصيف الدم» PDF

شيء من رصيف الدم

بقلمي: leo Alfatlawi

بارت الثالث والاربعون

بارتين سوة

***رايه***

هو يحجي واني وخواتي كمنا وحده تباوع بوجه الثانية انتجه بابا وكله وجه السؤال لجماعتك لان على ايدك اليوم طلعت لاالحگت التقي بأحد ولا شايف شكله واعرفه من الاساس

هيذام - مم حلو ؛  اي ذباح

ذباح - وانه ماكرب يم مستخنث وحتى لو جان الي حگ يمه و فكرت اعملها ادگه اجتاف  واسحب روحه بيدي لان تربينا ازلام ناخذ حگنا بذراعنا ماتعودنا نختل وندز الينفذ

- عفية  وانت ابو الليل

دسار - دخيل ربك اجابني عليه وليش احركه كاتل اهلي اريد اضيعه دقيقتين مايضل بيدي اشمره بمصيبة اجيبه اعدام بنفس اليوم وبعدين شوكت احترگ الصبح جان يطفر  مابي شي

- قبل ربع ساعة

- هاي انت كلتها قبل ربع ساعة وهاي كلنا كدامك حتى اجهزتنا مغلقة مانعرف بالخبر غير منك ليش ماتكون انت الحارگه

هز راسه انتجه وخله الجكاره بلحگه

ذباح دار وجهه يباوع للحديقة وبابا دنگ  يحرك بكلاص المي ودسار انتجه يكلب بجفوفه

ضحك هيذام بستهزاء وكال مافيا وضابط  مخابرات وقاتل متجول

بابا - وابن نظام السابق الملقب بالموت الاسود لكثر استخدامه اساليب التعذيب الفرعوني

هيذام - عندما تريد القضاء على الخبيث اوهمه بالتصديق وكثرة الاعداء حتى يكون لك نداً هش يتلاشه بعد سحقه

- ممكن

- ممكن اذا كان فعلاً نفذت الجريمة بذكاء دون ترك اثر او نقطة دم تكون بداية مشوارك للجحيم

- مايخطي بطريق الجحيم غير الغشيم واحنا اسياد اللعب

- حلوو جا اسمع هاي واريدك تحضر نفسك وتستعد انت ونسبانك للجولة الثانية

- والي هو

-جاسم بعد عايش

ضحك بصوت انهزت متونه بيها دنكت رؤيا شالت فونها وصاحت وينه

دسار - وين تردين

- من الك حق دم يم احد وتعيش اسنين بتعب وحلام تحرمك النوم بس لخاطر ترده وبلحظة الترفع ايدك بالذبح وتشوف مستطرق ينحره مكانك؛  تعرف شنو تكون النتيجة؟؟

-  نذبح  الضيع المتعة وانوب نگطع الضحية

- لهيج احمدوا ربكم مامات

رئال- اخذيني وياج

باوعتلهن وهمست محد تاخذ دمه غيري

رئال- انتي ماتعذبتي جوه ايده گدي

رؤيا - محد تحجي بالتعذيب وهيه ماشافة الظلمة وسمعت صرخة موت وتلمست جثه بخوف وهيه تتوسل تكون مكانها

رئال - مانحبستي داخل مخزن وانداغ عليج الزيت ولانمتي بصف شخص بدون عقل ولاحسيتي بوجع خبغ دفنه اهلج وانتي بيعده

هزيت راسي وهمست بس مالفيتن تابوت حلم عمرجن بدلة عرسجن ولا كعدتن ورا الباب محتارات تباوعين لدم الي انكتلت لو تمضمين الي انباعت  لوطلعين ادورين عالطلعت وماردت

بابا  - وحقجن يضيع ويه غمضت عيونه المثل هذا مالازم يموت 

رؤيا -ماراح نموته بس نشوفه

رئال - اذا مات قبل لااشوفه متعذب واسمعه هو ويتوسل اني الاموت

كلتله بترجي بابا كوم ودينا فدوه

بابا - شوفجن زلمجن يقبلون

رؤيا- اذا مارضه خلي يطلگني

رئال- اني هم

اتجتف دسار وهيذام باوع لرئال وضحك بستهزاء كأنما متوقع هذا طلبها من زمان

صارت عيوني على ذباح لكيت منتجي ايده على عالميز قريبه على سلاحه وعيونه عليه يباوعلي بنظره ماعرفت افسرها

كام بابا شال فونه وكال اضن وصلت الفكره والكل عرف حجمه ومقامه شنو يله بابا امشنا

طلع كدامنا  راحت ورا رؤيا صح جنا متوقعين  محد يكدر يعارض غير هيذام بس من دنك ورث جكارته ودار وجهه للجهه الثانية بدون لايباوعها  تأكدت انتهت بينهم

باوعت لرئال على وكفتها عيونها عليه بيهن الم الدنيا عرفتها دتودعه

لزمت ايدها باوعتلي ونزلت دموعها اشرت يله

طلعت فونها  خلته عالميز  وهمست بصوت مخنوگ شكغا على كلشي سويته الي

جريتها صاح درع لا رئووول لاتعوفينا

عصرت جف ايدي ومشت صرخ لااااا حبابه لاتروحين لك هيذام لاتخليهاااا

دارت وجها صارت عيونها بعيون هيذام من يمي اختنگت جانت  نظراته الها  كلها خذلان وندم

نزلت دموعها ابتسم  ودنگ شال ابنه انطاها ضهره راح يتمشي  بي بجت بصوت عالي جريتها  اخذتها امشي عالسريع خايفة تضعف وتردله

طلعنا لكينا واكف يم سيارة سودة ويمها ولد ضعيف مسلح فتح بابا بابها واشر صعدن  ورئال بعدها  ايدها على گلبها  وعيونها عالبيت تباوع بلهفة ودموعها تنزل بكسرة صعدتها عالسريع وصعدت

صعدوا الباقين السايق شغل السياره اتحركت ويه صوت شهگت رئال بألم

درت وجهي للجام مااكدر اباوعلها ؛ على طول الطريق واني عيوني عالشارع وصوت شهكتها الطالع  بهدوء مبينة من صوت البحة جرحها جبير وجعها اكبر ؛ نفس الصوت الخنگة وهمه ياخذون تابوت غزوان من كدامي

دخلنا البتاوين وهنا انفتح شكو جرح اوهمنا نفسنا عالجنا

كل مكان ندخل بي اله ذكره تهمش روحنا لحد ماوصلنا للبيت لكينا ثنين شرطة يم الباب واخت جاسم هيه وابو طبر يم الباب تحجي ويه الشرطة  بصوت عالي

نزلنا شافتنا شهكت وصاحت شرجعجن يالعاهرات

نزلوا الحرس بسرعة صار بوجها همه وبابا واشرولنا دخلوا

مجرد ماشفت الباب انعصرت احس رجلية انشلت رؤيا دفعت الباب دخلت ورئال لزمت ايدي سحبتني وراها

دخلنا ونسمع صرخت جاسم جاي من غرفته بس يصيح بطريقه مرعبة

ركضت رؤيا دخلت واحنا وراها فتحت عيوني واني اشوفه مهروط جلده من راسه لرجلي نايم بالگاع على ضهره يلوج لوجة موت؛ ويمه تنگة دهن جبيره فارغة

عيونه كد مامصلوخة طالع البياض من اللحم انخمشت روحي

باوعلنا مفجوع همس بتوسل كتلني

رؤيا - لاه لاه هاي شصاير بيك منو صالخك وانوب بالزيت اووف ماتستاهل

-دخيلجن رحمني

-ماطلبت غير حقك

كالتها و شالت رجلها خلتها على عيونه سحكتهن وهو صرخ صرخة طلعت من كلبه

اباوعلها يرفس ويدفع برجها بس يريد يوخرها اديه كلها نازل لحمهن

اتقربت يمهم رئال سحبتها وخرتها ؛ خله ايديه على عيونه لعبت روحي واني اشوف الجلد اشلون ينسلخ من وجهه

كعدت يمه رئال نص كعده تباوعله بدون صوت لحد ما هدأ رفعت ايدها خلتها على شعره لزمته همس بتعب كوه يطلع صوته  امروتج بابا رئال خليهم ياخذوني للمستشفى

- دخيلك بابا والله وماصغفت ولافلس هنه ذني كلهن تذكغ هالكلمة  لولااا

-  اتوبه اتوببه اعيدها ابوس رجلج راح امووت

- بابا ابوس ايدك اضغبني موتني بس لاتجويني بالزيت خو مانستهن شوف وين وصلت بيه ابوس ايدك بس حتى تضغبني لعد اشكد موجوعة وخايفة

- مادري ماادري جنت شارب ماحس ولكممم نااار دخيلكم  لحكونييي 

- ومن شهدت عليه باطل وزوجتني لواحد خبل هم ماجنت حاس

مارد فر براسه هو وصاك على سنونه من الالم

عضت شفتها وجرت شعره اجه بيدها كد منتهي من الصلخ صرخ من بين سنونه كامت دفرته بوجهه اطشر دمه

درت وجهي لبالي راح تعوفه مادريت  رئال وصلة مرحله خسرت كلشي ونهت حياتها بموقف

سديت اذاناتي و غمضت واني اسمع اشلون تدفر وتتعمد على مكان الصلخ حتى ينوجع اكثر عكس رؤيا الي تنتقل بين اماكن حساسة وعيونه حسيت خواتي داخلهن اجرام وعدهن طاقه ظلم مكبوته

رجعت ليورا خفت منهن يشوفنه اشلون يتلوع وحالته تفجع وهنه مستمرات اريد اي ملامح للخوف بوجهن لو الضمير ماكو

على صوت صريخه دخلوا الحراس يتراكضون جروهن وهو زاع دم وكام يفر براسه فاتح عيونه على كبرهن  من الالم

رئال دفعت الولد وصاحت امجددد عوفنيي

- اهدي رئااال 

- ماتعغف هذا منو  هذا سبب ضياعي قبل ونهاية حياتي هسه

- وحقج وصل شوفي اشلون ماضال بس الروح تفتر بعذاب البرزخ

- وخغ ماغااااح اكتله بس احجي ويا

- كافيي راح يدخلوون الشرطه لايموت وتتلبس براسج

- مااخلي يموووت بعد ايييدك

- لك احمددد طلع ذيج

كالها ودنگ على رئال شالها طلعها وهيه تكمز وتصيح عوفني  والحارس الثاني جر رؤيا ولحگه الي كامت تتماطل وتصرخ  تريد بس يعوفها حتى ترد تاكله

صارت عيني عليه

شهگ الهوا گوه وباوعلي بترجي

همست اذا خواتي رحمنك بالضرب اني راح اخليك تشوف الموت بعيونك

تفلت عليه وطلعت تركته يفر براسه ويون بتعب لان حيله خلص من الصراخ

صاروا بوجهي بابا واخته وشرطي؛  بسرعة اشرلي بابا بحواجبه دنكت وصرت على جهه دخلوا للغرفة سدوا الباب

رحت يمهن واكفات ينفتن حرگة الدنيا بعيونهن حاجزيهن الولد كعدت يمهن عالدرج همست رئال شكو داخلوا الشغطي  يمه

امجد - يردون ينقلوا للمستشفى حتى يحققون ويا  بس اختى ماتقبل تكول بس يوصل هناك ينتحر لان عقله ضارب صار كم يوم يفتر ويسولف بالموت وهو يگول لا عالم تطلبني ماعندي انطيهم دخلوا داروا عليه زيت ومحد يعرف وين الصدگ

- يعني يعغف منو السوه بي هيج

- لا لان يگول المهدديني هواي والظاهر الي مسوي بي هيج طافر بنفس الساعة واخته مصرة على نفس السالفة مبينه ادور تعويضات ورواتب معاقين

رؤيا- اشكد فكرت بطرق لكتله بس ما خطرت بالي هيج طريقة شيطانية اويلي لواكض المسويها اله ابوس عقلهم على هالذكاء

- جا سمعي هاي تعرفين قبل لايصلخوا طاگين ضهره وكاسرين العمود الفقري يعني ضامنين يعيش عاجز عمره بطوله ياالله مبلشين بالزيت

رؤيا - وليش ماشلعوا لسانه

- والله اني مستغرب ديله راح يطلع الشرطي مسحن احذيتجن بسرعة

- وعلى شنو نمسح احذيتنا غير ابونا عزيز وحضنا

- الله يبعدنا عن هيج حضن

ثواني ونسمع صوته رج الغرفه ورد العياط من جديد طلعوا سدوا الباب وراهم سلم الشرطي على بابا انطى ورقة استدعاء لعمتي وطلع ؛ عفستها واجت يمنا كالت حسبالجن مااعرفجن انتن ورا سالفة خباله وهيج راد ينهي حياته بدون عقل

رادت تردله رؤيا لزمتها وكمت كلتلها واحنا ورا السالفة شتردين

- راح ابو طبر يجيب تكسي ونقله للمستشفى خاصه وغصباً عليكم دفعون كل التكاليف

-شتكولين اشكد يكلف علاجه

- مااعرف سمعي صوته سوده عليه راح يمووت اخوي حسبي الله ونعم الوكيل بيكم وداعت امي لندمجن بس خلي اودي للمستشفى وشوفن شسوي بيجن

- والج اضعاف افلوس المستشفى مرتين يمي بس علاجه يكون بالبيت

-شنوو

-ثلاث

-واشلون اعالجه  هنا والزيت دينهش بلحمه سمعي راح يتخبل

-اربعة

- ومنو يداري

رؤيا - اشكد تاخذ الممرضة بالشهر الج كداها بس بالمقابل ماتوصلي غير كل يوم مره تنظفي وتنطي گرصة خبز وكلاص مي

سكتت

اشرت هاا

- خو اودي لمستشفى الامراض العقليه هم اخلص من صوته وقذارته وهم بلكي يموت وافتك منه

- وجاسم عزيز علينه واحنا نريده يتعالج مانريده يموت واذا عالصوت حتى جوارين بصفنا ماكو وحتى لو سمعوا تكدرين دبريها من يمج هاي اذا معتازه افلوس بعد بكيفج يجوز يزعجج صوته صدگ

- لاعلى شنو يزعجني اني بيتي اكمل شغلي يمه واقفل البيبان عليه وحتى الي يسمعه يدرون بي محترگ  وديعالج

درت وجهي للغرفة  عالصريخ احسه سحب من كلبي شكو الم ابتسمت؛  ضحك بابا وسحبني لحضنه باسني وهمس وهاي انتي احن وحده بناتي

- هههه مو بكيفي الجينات الوراثية اقوى مني يارافد الدغش

عمتي - يله اروح اقفل الباب لان كام يعيط بصوت عالي

رؤيا - انتظررري

- ها شنو تراجعتوا

- لا اكو شغله صغيره النا يمه مانتأخر ثواني وانتي رايه انطيني فونج

اخذت الفون اشرت لبابا اخذوا الحراس و راحوا للغرفة دخلوا لحكتهم عمتي وكفت يم الباب عرفتم راح يتصلون بماما كام ويخلوا يطلكها

صدگ دقايق وطلعوا عمتي قفلت الباب وبابا كال يله منتظريجن بره لاتتأخرن

هزيت راسي عرفته رادنا نودع ذكرياتنا هنا؛ اخذهم وطلع تركوا وراهم يصيح يابويه راح اموت ابوس ايديكم كتلونييي

اجت رئال كعدت يمي  همست اتمنيت اموته بيدي

- سمعي عياطه هاي انكس من الموت تذكرين من جان يجوينه اشكد نضل نتعذب وهي اماكن صغيره مو هسه مصلوخ كل جلده

-بس مدااحس صوته يشفي غليلي

-لان وجعنا اكبر من هالشي

شلت راسي صار حبل الجنه مسوي مرجوحه لرند كدامي  غمضت عيوني

حسيت رئال تلزم ايدي فتحت عيوني اشرتلي كومي كمت وياها جرتني وصعدت  كل درجه اصعدها احس ذكرى الي بيها لحد ماوصلت للسطح  باوعتله نزلت دموعي وضحكت

رئال - هنا جان يكعد يباوع للكمر ويعيونه عالباب بلكي يحن كلبج وطلعيله

- هههه وانتي دخلين تضحكين عليه تكليلي لحگي غزوان اختنك اتخليني اطلع ركض

-لعد هو يطمعني يگلي اجيبلج كتاب 

-  كلي بس احضنج مره وحده والله اخاف اموت وتضلين حسره بكلبي

باوعتلي ونزلت دموعها

-دااسمع صوت ضحك بالغرفه بالكي يطلع هذا حلم ونفتح الباب ونلكاهم

هزت راسها لزمت ايدي رحنا دفعنا الباب دخلنا لكينا رؤيا كاعده بنص الغرفه خاله لعبه رند بحضنها وصافنة

باوعت للغرفة خالية  من اصواتنا

درت وجهي  ادور مكان ماما وصوت ضحكتها وهيه تلاعب رنود 

ومنا صوت غزوان طالع من المطبخ بيده الصنية يطگطك بيها ويغني 

هناك رئال خاتله بيدها كتابها وتصيح اشلون اليوم مااقغه

اي ذوله اهلي موجودين دااشوفهم

درت وجهي على مكان عود غزوان لكيته بمكانه  تركت ايد رئال ورحت كعدت يمه ردت اشيله  شفت التراب مغطي لجمني كلبي ؛خليت ايدي عليه وغمضت صار هدوء

دقايق واسمع الباب انسد فتحت عيوني رئال واكفه تتلمس بشعرها باوعت لرؤيا ابتسمت وهمست بصوت مخنوگ  اليوم اني اول وحده ماما تمشطلي

رؤيا - هههه حتى اگطع شعرج

- اكول لغزوان اخلي يكتلج

- واني مااخلي كتاب صاحي عندج

-صدگ وين كتابي لج غنوود

سكتت ماردت عليها اخذتلها ثواني وهمست بكسرة رنود ماتت

اشرت لا

حسيت راح افقد خواتي ؛ حضنت العود رجعته مكانه وهمست ماجان لازم واحد يحب الثاني هلكد حتى لانتفارگ  مع السلامه يااعز دگه عصرت كلبي

خليته وكمت جرت اللعبة من ايد رؤيا  رجعتها للكاع وكومتها لزمت رئال طلعتهن وسديت الباب ويا طوية اخر صفحة ذكريات النا ورا

نزلتهن لكيت بابا واكف يم الدرج شافنا ابتسم وفتح اديه اشر تعالن

نزلن ركض لحضنه شمرن روحن عليه وبجن بصوت عالي 

نزلت عالكيف تكول خايفة يخلص واني ماشبعانه منه ؛ امنيتي احضن كل مكان بالبيت 

وصلت يمهم سحبني وياهن باس راسي وكال لهنا كافي يلا امشنا

اخذنا وطلع كل خطوة اخطيها احس عيون غزوان وراي لحد ماصار الاستقبال بوجهي درت وجهي ماردت تذكر اخر حضن بينا واخر كلمة كالها

طلعنا من البيت غلقنا الباب على صوت صراخ  جاسم

صعدنا بالسياره شغلها السايق طلع بينا خليت راسي على متن رئال وغمضت ابعد كل موقف وحدث مريت بي بهذا المكان مافتحت عيوني لحد ما طلعنا من البتاوين

اخذت نفس وانتجيت عالجام اباوع للشارع اكثر من ساعة ونص بالطريق حتى مااعرف وين رايحين لمن ماسمعت امجد يصيح لا يمعوود والسيارة شحطت

درت وجهي لكيت بابا خال السجينة بركبة امجد وعيونه على السايق الثاني اشرله اشمر سلاحك

رئال- بابا ذولة الحماية مالتي حبابين

- اشش صوتج وانت نفس واحد انحر صاحبك اشمر سلاحك والجهاز وانزل بدون شطارة

امجد - لاعمي دخيلك ومحمد ابن النظام  يرمينه

- لاتتحرررك لك

- تمام اشمر سلاحي بس اخذوني وياكم اتبنوني  وعلي خوش ولد اني حتى اسأل رئال بس لاترجعوني اله

-مالفي ثولان بيتي

-دجربني وعلي افيدك اجيبلك مسواك اطلع اشتغل مكانك حتى تجدي اعرف اجدي والله تكسب بيه ثواب يتيم واهلي متبرين مني

- جهاز التتبع البيدك شمره وصير حباب وهاي سوالف  كسب الوقت نصيحة  لاتستعملها ويه كل واحد خليك نبه وانقذ روحك لاتفدي نفسك لخاطر واحد مستعملك كبش وسلملي على الدزوك ويانه كلهم عييب اني الدغش 

ضغط على ركبته بأيد وسحب السلاح بيده الثانية شمره اشر للولد شمر سلاحه نزل من السياره شمر ورا امجد وضغط الدكمة قفل البيبان

اندار بخفة طفر  لمكان السايق شغل السياره باوع لرئال من الجامة  الامامية وكال يابه اعتذر بس حمايتج ثولان

- هيذام غاح يعاقبهم

-دشمري الميدالية الي بركبتج لا يلگفني بسببها ويسفطني بالسرة اردد الشعار بالمگلوب وانوب فكري بالباقين

-يعني بعد ماغاح تغجعني اله

-حذرته بس الضاهر كثرة فرعنته خلته ينسى انتي بت منو واستهان بدموعج

- صح السياغه مالتي  بس مااغيدها غجعها اله

- راح اردها بس اوصلجن

-وين غاح تاخذنا

-للمكان الجان مفروض تعيشن بي قبل لا اغلط ذيج الغلطة واثق واني واسلم رگبتي الها

حرك السياره طلع بينا من طريق لطريق  عيونه بالشارع منتجي البسمه مرسومة على شفته ويباوع بمكر عرفته ديلعبهم  لحد ما يضيع مكانه

وصلنا منطقة راقيه شوارعها نظيفة وهادئة  وكف يم بيت صح صغير بس بناء حديث

نزلنا فتح الباب دخلنا بي اباوع طارمة طويلة توصل لباب المطبخ  ومن الجهة الثانيه حديقة  مرتبة بيها مرجوها وعلى صفحة مثل المسبح صغير عليه نافورات

باوع لرؤيا ضحكت خرب شعرها وكال هذا الجانب مخصوص  الج اريدج تغطين بالمي اشكد ماتكدرين

دخلنا جوه مطبخ أغراضة كلها بالكارتون مجهز من كلشي

- وهذا لراية

ضحكت جر راسي باسه واشر تعالن

طلع كدامنا رحنا ورا دخلنا للصالة اباوع مربعة مابيها بس فراش وتلفزيون على جهه درج وبصفه صحيات وداير مدايره غرف

اتمشى فتح الغرفة الاولى جانت خالية مابيها بس دوشك سفنج وبطانيه همس وهاي الي مؤقتاً لحد ماأمنجن واسلمها لصاحبة المدالية تكمل وياجن باقي احلامجن

دنگت ابتسم وراح فتح البات الثانيه اباوع بيها ثلاث قريولات وكنتور ابو ثلاث بوب وميز مرايا

- وهاي غرفة لاحلى اميرات انخلقن من نسل اجمل يهودية

ضحكت ومسحت دموعي

اتحرك للغرفة الثالثة فتح الباب واشر لرئال تعالي

راحتله ركض وكفت باوعت بيها ونزلت دموعها جر راسها لحضنه كال ادري تأخرت عليجن هواي

رئال - ماجنا عايشين بابا

- لو اقدم اعتذار الدنيا بكبرها ادري ماراح يشفعلي يمجن

-خليك ويانا بابا لاتعوفنا بعد

-ماسويت كل هذا حتى اعوفجن صح العشتنا  ماينسى بس راح حقق كل احلامجن واعوضجن عن كل لحظه اعتازتني بيها وراح اخليجن تشكراً رب العالمين على حجم  مكافأته الجن بعد العشتنا

-مكتفين بيك انت عوضنا وجودك بينه ولمتنا سوه بيهج مكان هاي مكافئة صبغنا

-هاي تكولنها من تجني خطار من بيت ازواجن  وتتلكني انتن واحفادي ادخلن حضني وتشكلي من ارجولجتن حتى املص اذاناتهم

-خسغت كلشي بابا ماضل بس حضنك عندي

-مو بت الدغش التكول هالشي ؛ كلشي ماخسرتي بكد ماراح اخلي مقدارج يزود وبدل نضرة الشكر التباوعيله بيها تصير نظره منية وتهديد تخلي يحسب حساب الكلمة قبل لايحجها بس لخاطر تضلين ويا

-بابا ماصدكت انجمعنا شدتحجي انت

-وراح اضلن مجموعات العمر بطوله مدللات بيت ابوجن واكبر شارب مايكدر يتنفس كدامجن مو يحجي

رؤيا - وهاا قد اعلنا الحرب

- انكتمي ام الوسخ دخلي امشيج بالبداية وانوب افكر احارب

رؤيا - شنوو يعني راح ترجعنا للذل مره لخ

-مو بناتي الينذلن ولايطلعن من بيتهن اذا ماراسهن مرفوع ورجليهن فوگ ظهورهم قبل لايفكر يمل يطكنه بالنص ويوكفن على جتافه كاتمات نفسه

-مااريد اصدمك بس احنا بحضن الدولة

-والدولة  تحت امري يخرزة البتاوين

رئال - واحنا تعبنا ونغيد نغتاح اذا تكول هذا بيتجن لاتخلينا نغجعلهم  واحنا نوعدك نشتغل  ونساعدك مانضوجك وانخليك تصغخ وغانا  ابد

- نعواصتج وجهج مايساعدن عالدمغات وانوب اخاف اجرب ويطفر بعد حرف وتلاص السالفة اكثر وتعال قعنه محد واصل يمج حتى لاننسحل وينعل والدينا اكثر ماهو منعول

برطمت

دمغها ضحك وجرها لحضنه باسها وكال اشتغل مكان اربع ازلام واواصل الليل ويه النهار وتزاود ويه الذيابة عالرزق بس ماخليجن تعتازن شي  خلص وقت التعب ماضل بس العز بحضن ابوجن 

-شكغا بابا

-اني الي اشكرجن اتحملتن كل هالظلم وصبرتن على هم يهد متون بس ماوطيتن راسي بكد ماخليتلي اسم اتباهه بي واوكف بكل هيبه واكول ذني اميراتي نفسهن البعدتوهن من حضني لخاطر تكسرون ضهري

-هذا تعب ماما وحنيتها علينه الي علمتنا اشلون نصاغع الدنيا ونتلاوه ويه الوكت بدون لاننخدش او انذل نفسنا لاحد

ابتسم خربط شعرها وكال يله راح اروح اشمر سيارته واكمل سالفة صار سنين احلم بالإفراج لخاطر اسويها  وارد اخذجن لحضني ونگعد نسهر سهرة طويله تسولفلي بيها على كل امنايتجن واحلاجن من ساعة الوعيتن للدنيا لهاي وكفتنا

-غاح ننتضغك

-شنو تنتظرني لااا يروح ابوج نعوصتج ودلالج هاي يم ابن النظام هنا ماكووو اريد ارجع الگي البيت يلمع والاكل جاهز وياويلجن اذا سمعت صوتجن لو عرفت بيجن متعاركات شايفات هذا جنگال الي بالسكف  التاركه بدون مروحه اعلگجن مكانه

- انت بس جتف غؤيا هو البيت يصيغ نضيف واحنا مايطلع صوتنا

رؤيا- لابت الحيوووان اشوكت وصخت لوطلع صوتي

-اسمع بابا دتشتمني

-بت القندرره اشوكت مشتمتج بابا اجذب لاتسمعلهاا

-بابا اخذها وياك ماغيدها هنااا

-من اكعد بيت ابوج عود طرديني وهذا التموع مالتج بطلي لاامسح بيج البيت وهاا صدگ بابا هاي موبتنا  جانت تجدي بالتقاطع وماما جابتها تكسب بيها ثواب شغلناها خدامه عدنا اشمرها  خلي تولي

-عزه بابا والله بتكم حتى شوف لون عيوني مثل عيون ماما بس هيه غعنه مانعغفها منين

-اني رعنة موو دخلي يطلع بابا وعلمج الرعونه اشلون اذا ماخليتج تفقدين باقي الاحرف مااطلع بيت ابوي

-سمعت بابا يله اكتلها وهاا صدك ذكغتني مغه ضغبتني بقنينه الغاز اكتلها اثنين

باوعلي بابا عضيت شفتي ضحك وهز ايده جرهن اثنينهن لحضنه بوسهن وكال التصير حبابة منجن وماتتعارك اجيبلها وياي ملابس حلوة ونساتل

رئال- وجبس

-وجبس وكرزات بعد شتردن

رؤيا- جكاير

دمغها ودفعها عليه ضحك و كال يله يروح ابوج راح اطلع رايده شي

-لا بس مشتاقيلك 

-اووف دخيل الله اشلون تخليني اروح ارمي الزمايل وارد اخذهن وانهزم بيهن

-ههههه لا عوفهم خطيه كافي اخذتنا منهم ركز تفكيرك هسه عاليهوديه شراح تسوي وياها

اخذ حسرة وكال  لاتتقربين للطباخ بس رتبي البيت اني اجيب اكل حاضر

-تمام بس لاتتأخر علينه

-يبعد ابوج وهله ماتأخر عينج بخواتج وقفلي البيبان وراي عدل

هزيت راسي شال مفتاحه وطلع 

وكفنا نباوع للبيت رجعنا وحده باوعت بوجه الثانية  نزلت دموعنا مامصدكين فتحت ايديه اجن يركضن حضنني همست صدگ هذا التركنا يصارع الموت جاسم

رؤيا- وكلها كم يوم وغيمة تكون ويا نفس البيت ومكان صرخة رند تتوسل بخوف تكون صرختها تترجى الرحمة

- رند وغزوان يم رب العالمين هو ياخذ بحقهم اهم شي رجعجن لحظني

رئال- صاغ عدنا بيت خاص بينا وگدام الكل ؛ غؤيا  غاح تغجع لمدغستها وانتي تجهزين الاكل واني اعدل مكتبتي حتى ننجمع بليل بحضن ماما اقغالجن القصة

رؤيا - بس هالمره بابا ويانا

- يعني اتحقق حلمنا خلص بعد ماكو نتأمل ونبجي تالي الليل

نزلت دموعي هزيت راسي اي وهمست بعد ماگعد كدام الكمر كل ليلة اتوسل يحميجن

- ولا اختل من اشتاقلجن حتى محد يشوف دموعي

- راح نام من جديد على مخدة وحدة

- ونتعاغك منو اتمشطلها ماما اول

رؤيا - وراية تضحي بدورها حتى تسكتنا

شهكت  حضنني حيل تكول خايفين حلم ونكعد منا

وخرت رؤيا مسحت دموعها وكالت اليهوديه اشلون

-ماراح تجي اعرفها وراح تخيرنا بينها وبين بابا

-لعد تركيها لاتحجين وياها حتى الفون غلقي خليها تحس بالوحده غصبا عنها تشتاق وتحس بروحها ثگيله بدونه وبدل ماتقايضنا اضل منتظرة منا نحجي وياها حتى تجي تعيش يمنا

-لعد ماعرفتيها بعدج

-ولااريد اعرفها كافي العشنا مامستعده ارجع للذل بسبب غلط همه اختاروا واحنا انجبرنا نكمل بي

-يعني شنو

-يعني هذا بيتنا اكسر واطفر بعد محد يكلي وين

ضحكت

اندارت ضربت رئال على ضهرها وركضت ؛ باوعتلي رئال صافنة لبالي عقلت وراح تكتفي انتقاد تصرفها بس من شفتها دنكت نزعت حذائها وركضت وراها هزيت ايدي عرفتهن بلشن

عفتهن  ورحت لمطبخ  وكفت اباوع ماخال شغلة ماجايبها شلت همه عرفته مداين حتى ايجار البيت وراح يشمر روحه بالشغل لخاطر مايقصر علينه 

اخذت نفس بگد ماجنت يائسة يجي يوم ويطلع بابا ويلمنا بگد ما الفرحة احسها تريد تطلع من گلبي   طبگت رداناتي وبلشت ارتب بالاغراض كل ثانية دموعي تنزل ارفع راسي للسما اشكره وارجع اسمحهن ويردن ينزلن

افتر بالمطبخ الضحكه تارسه شفتي  مثل الطير المطلوق سراحه وعيوني على خواتي الي فرحتهن ماتقل عن فرحتي خبصن البيت بطفرهن وضحكهن  تگول ردن لعمرهن ايام بيت خالي حسيت بحبهن شكد  وشوگهن وحده للثانية الي مالكن طريقة يعبرن بيها غير هاي

كل شغله اشيلها احضنها وابوسها كد السعادة الاحس بيها وردها لمكانها بتأمل

واكفه امسح بالكاونتر وعيني بالساعة صار الليل وبابا ماكو استوني دااندعي واسمع انفتحت الباب وصوته وهو عاط بصوت رج البيت وهو يصيح لج رؤياااااا

طلعت ركض وكفت منصدمة كش جلدي من منظرهن ؛  بذاك البرد رؤيا  غاطه لراسها بالمي وتعدل بطين الحديقة وياها النعواصة لازمه السطل متروس حشيش وجها كله وسخ

على منظر وكفت بابا متخصر ويباوعلهن بغضب شمرت رئال السطل وبرطمت عرفتها مجبورة؛ صاح بابا ادري زعاطيط رب الحلوو اشلون وياجن فهمني

رئال- بعد مانعيدها بابا

- لاااا سمعتها هوااي انتن اذا ماتتعاقبن ماتنعدلن وتسودنني

رؤيا - هااي فوگ مانظفنا الحديقة

- شنضفتي لج ناعلة اهلها هاي ليشش مشلعة الثيلة

-حتى نزرع مكانه ورد

- لاحتى اطلعين الطين الجوا وتغطين لراسج بي تعلميني بيج كولي لااا

هاا -كالتها وحكت خدها

- يله بله خلي يجون يشوفون الزمايل  الكل واحد رتبته بكد عمره مرتين على شنو كاتلين نفسهم ويمشي ويسحگون بخلگ الله من الصبح لسه

رؤيا - يله هسه شنو تكتلنا لو ندخل

رئال-  لابابا باجغ اكتلنا لان هسه باغده

صحت وين دخلن ماكوو تغسلن هنااا البيت استوني نظفته اذا لكيت وسخة وحده اسحلجن واشمرجن بالشارع

رئال - عززه اني اتمغض وانوب اغجع انساكم

رؤيا - ايي حتى انگلج انتي الخدامة مالتنا ونظل نكرب عليج

- وين اكو وحده وسخه عدها خدامة اليشوفج يكول جانت ادگ اماسة باابو غغيب دغوحي غسلي وجهج وانوب احجي

- سمعتتت بابااا حتى من اكتلها كول ليششش

بابا- اشلون راح اربطهن وعلگهن للصبح بالحديقة يله دخلن سبحن

اتخصرت وباوعت لبابا بخزه  گال يروح ابوج يتمرضن خطية بارده

- مالي شغل  بهاي قذارتهن ماادخلهن جوه شوف صرفة لبناتك

رؤيا - لج مولبالج بحالج بيت ابوج وخايفين منج وانت شبيك ساكت ماتحجييي

- يحجي شنوو شو تعالي

رؤيا - شبيييج ماتتحملين شقه اهدي اعصابج اصلاً هسه بابا يشيل رئال يوصلها للحمام

بابا - وانتي تكتفين بمسح وجهج اكيد قابل جديده عليج

رؤيا - ابوي الجبير مااريد اتجاوز عليك وهمزين ماعدنا ملابس

- انعل ابوج على هاي القسمة جبت ملابس دخليج بمكانج لاننكتل اني وياجن وننشمر بالشارع

انطاني العلاليك وراح  جرها باس راسها ودنگ شالها دخلها جوه دقايق واجه اخذ علاگه الملابس خلاهن بيد رئال لزم خدودها بوسهن بحنية ضمها بحضنه ودنگ شالها  راح جوه

شلت العلاگة الثانية رحت ورا دخلت سديت الباب لان برد الجو كلش

خليت المسواگ عالسنك  وكفت اصفي بي اجه وكف يغسل اديه باوعلي ضحكت كال ربي يديم الضحكة على اجمل وجه شفته بحياتي

-اشتاقينالك بابا

- كد ماسولفت بيجن للمحجوزين صاروا يحسدوني على صبري اشلون اذكرجن بلهفة واتأمل كل حرف بأسمجن من انطقه

-صح ماكدرنا نوصلك بس جنت بكل فرض اتوسل بربي يرجعك النا

- ويلوموني اشلون احبجن  ولو زعلان لان ماحافظتي على اخيتجن وصفيتن سوة عليها بس تهونن

-لا مانريد نهون واريدك تعرف اذا تركتنا هالمرة مو بس رئال اعوفها لا حتى رؤيااا لان احنا لاشيء بدونك الكل يستضعفنا

- صفت ماضل شي كلها شغلة وحده تكمل ونستقر؛ اي يبعد ابوج ليش مامشغلة الهيتر

- منتظرتك حتى اسد الباب فرد مرة ويدفه البيت

- سمعيي الهوسة خرب غيرتهن اشكد ماذيات

- ههههه هنه اروسيه اشكد جانن شالعات كلب غزوان

-الله يرحمه

اخذت نفس ودنكت اكمل تسفيط المسواك جر راسي باسه كال كلشي يتعوض بس العمر

-غزوان مايتعوض

-ادري واعرف متملك كلبج بس وماراح تحبين غيره بس اذا حابه تسمعين هاي اصواتهن وضحكهن لازم اتسحكين على مشاعرج

-لا تتركنا

- اشلون اترك عيوني والنفس بس ماكو واحد ضامن عمره والبشر وحوش يتلاون بينهم ياهو الينهش اسرع

-هيج دتگلي انهي حياتج

- لااني اريدج تعيشين مااكلج انسي لان الي بالكلب مايحرگ مكانه غير الموت بس اگلج عيشي بابا انتي بعدج حتى العشرين ماداخله العمر لحد الان مابده وياج

- مكتفية بيكم

- هسه مكتفية بس من يرحن خواتج كل وحده بيت رجلها ومن اني وامج نتوكل راح  تحسين بالنقص  بالاخص من تجيج وحده من خواتج داير عليها الزمن وتبجي بحضنج هنا موبس تندمين عالسنين الضاعن لاا راح تتمنين الموت بوقت انتي ماتكدرين توصلي لان مابيج تركيهن وراج

-يعني شنو

- من يكون عندج شخص يتمنى يتمرض نيابه عنك  ويشيل كل اوجاعك ويفني حياتك لخاطرج وهو يعرف انتي مومن نصيبه بس حتى يشوفج مرتاحه من بعيد  هذا الشخص خسارته هو الندم الحقيقي

- مااستحقه لان راح ينظلم وياي ويتحمل اشياء تهين حتى رجولته وتخرب مكانته بين اهله و بالمقابل مارح يحصل مني غير الرفض والكسر

- واذا اكلج هو قابل بكل هذا ومستعد يخوض حرب وينطي روحه للموت  بس حتى شوفج كاعده بلمة اهله

- واني مامستعده ولاراح يجي يوم اكون مستعده راضية بحكم رب العالمين وحمدته على عوضه وهو عنده زوجه تحبه ومستقر مااخرب حياتهم علمود ابني حياة لخاطر اضمن احمي خواتي مستقبلا

- سوي اليريحج بس خليها براسج العوض مرات يدزه رب العالمين على شكل قوه تخليك تكدر تبدي من جديد

-بابا

-يروح ابوج حضري الاكل بين مااعلگ الهيتر ادفي البيت قبل لايطلعن توم وجيري وانوب تعال اتحمل نعوصته مرضهن  فوك وشيطنتهن

ضحكت جر راسي باسه وراح اباوع ورا يمشي بثكل شخصيته وهيبته زايداته وسامة ؛اتمنيت مامبتعد عنه وعايشين بحضنه من ذاك الوقت

اخذت نفس ورجعت انظم بالمسواگ يمكن هاي سعد لحظات حياتي واني اسفط بالثلاجة  المخضر وافكر الصبح شنو اطبخلهم

كملت طلعت عشانه خليته بالصنية طلعت لكيت بابا مشغل الهيتر ولاف رئال ورؤيا بحضنه بالبطانية كل وحدة من جهة ومنتجي ماد رجلي ويباوعن كارتون وياهن

شافني لم رجلي خليت الصنية كدامه وكعدت شالت راسها رئال همست تغه بغدانه لاتوخغ ايدك

بابا -يعني مناكل

رؤيا- لاخلي رايه تسويلنا لفات

-رايه البنغالية  مال الخلفوج وخري يله اكلن حتى تنامن وراجن كعده من الصبح

-ليش راح تسرح بينا

-لانطلع نلم قواطي بلكي يشوفونه المنظمة  الانسانيه ويسجلونا ويه العوائل المتعففة

رئال - عزه ذكغتني مغه اجوي المنظمه للمدغسه وسألونا منو يتيم حتى يساعدوا كامت غؤيا كالت اني امي ميته وابوي مقطعه غجلي

رؤيا- جذابة بابا

- والله بابا حتى انطوها جنطة  وحذاء وموبس هيج جانت كسلانه ماتدغس وكلما ياخذوها للاداغة تكلهم اني يتيمة وزوجه ابوي خاله شغل البيت عليه كله

رؤيا - وانتي مثل الجلب رحتي فتنتي خليتي المديره تكتلني صدگ من كالوا اول جريمة بالتاريخ هو غدر الاخ لاخيه تف عليج

- لابابا والله مافتنت هيه عغفتها وحدها لان بتك غبية قبل يوم كومتها ام العلوم وكالتلها ليش كسلانه ماتخلين امج تساعدج بالدغاسه كالتلها ست ماما النهاغ والليل تباوع مسلسلات هندية حتى اكل ماتسويلنا ناكل خبز وجاي

- هم فرح ابوج من بشروا بجيتج

بابا- لافرحت من بشروني برعونتج

- الله يحفظك تخجلني بأخلاقك

- بس اريد افتهم شحب بيج الزمال

- والله كل الي يشوفني يحبني بس انتم كد حقدكم تسقطون بيه ؛اصلاً خلص نص عمره يقنعي حتى اقبل بي

- ونصه الثاني يتفل على نفسه  اشلون اتورط

- الاهل عزوه للبنت ؛ اهلي ؟؟

دمغها رن فونه وخرهن من حضنه كعد عدل عيونه بالمتصل يباوع للاسم ويبتسم بتحدي؛ اتحمحم بخشونه اشرلنا صوتكم وفتح المايك كال حي الله ابن البدوية

ذباح - حي الله اعزازك ابو رايه

- امر اتفضل  خدمة

- مايأمر عليك ظالم البنوات وين

-الي هنه بناتي ؟؟

-وبناتك حريمنا بأسم ازلام موش زعاطيط لخاطر تاخذهن شوكت مااجت براسك

-مااذكر اجه واحد منكم طلب مني بنيه للزواج وانطيته  

دسار - اهااا انت من هذا النووع على كولت الرعنة

- عفيه اني من هذا النوع وهسه ياشطار تروح للزمال الي انطاكم نسوان تلكوا مشمور بيته تفاهموا ويا يلااا ولدي اتوكلوا اريد اتعشه

ذباح- انطرر ماهو هيج الحجي

- ومنو كلك بينا حجي لخاطر تعترض وهاا ذكرتني لموا زلمكم من الشوارع اني لو اريد اختل جدك من طلعه من كبره مايحصلني مو شامريلي كم زمال يفر بذيله وداكها صفنه واذا على عنواني هسه ارسله الكم واريد ابن ابو  البيكم يوصلني مويطالب بوحده من بناتي لخاطر اعلمكم الرجولة اشلون تصير

دسار - من الاخير طلباتك ابو عگرب ولاتكول اطلكوهن هالشي امحي من راسك لان التربى على الموت مايهمه الخدش والنخليها بأسمنا غير ربك ماياخذها منه

- من تشوفون نفسكم صدگ كدها وكلمتكم كلمة زلم عود تعالوا نتفاهم

-المطلوب

- مشيه كباريه اهلك باليوم الي احدده من غير اهل بيتك يرحون لامها يطلبوها منها  ومهر بكد قيمتها اضعاف وماتطلع من بيتي اذا ماعقد محكمة بغايب يكسر ضهر اكبر واحد بعشيرتك اذا فكرت تحجي وياها كلمة

-تم

- اسلمها بيدك لمره وحده الثانية ابترها ومااخليها بيها تعرف شنوو يعني اذا اجتني بيوم من الايام زعلانه ماتطلع من بيتي غير على بيت تاج راسك وابن ابوك تعال اوكف بوجهي

-صار بعد اي اوامر

-وماتاخذوهن منا لحد مااردهن بأسمي

رؤيا - بابا لاتنسى تسأل عليهم بالمنطقة

دسار- يسأل عن منو لج

- سمعت بابا اعترض بسرعه يعني سمعتهم زفت اطردهم كلهم ماعدنا بنات للعرس

قبل لايرد سحبت الفون وغلقته  باوعلها بابا لمت حلكها و رمشت براءه

هز ايده واخذ الفون وصلت رساله فتحها قراها وباوعلي كال شنو العلاج التاخذي بابا

-هواي مااعرفهن ليش

- هذا ذباح يكول اكو علاج لازم تاخذه رايه دزلي العنوان بس انطيكيا واروح

- مااعرف بكيفك بعد

- هو موجود هنا لو طلب من غير بلد

- مااعرف بس الي اعرفه كلش غالي ولازم اراجع كل اسبوع

هز راسه شمر الجهاز وسحب الصنيه بلشنا بالاكل

شكد جنت فرحانه بكلام بابا واشلون سوالنا قيمة كدام  العالم بكد ماجانت مقهموره على رئال من ساعه الاتصال لحد ماكملنا العشه وهيه عيونها تلمع جانت متأمله تسمع صوت هيذام  بينهم

مرت الايام  مرتين خابرنا ماما واتوسلنا بيها تجي ويانا  ماقبلت  اني هم تركتها متأملة تحن وتجي وحدها ؛ بابا زاد التعب عليه بالاخص من شدوا عليه النسابة  بسبب كثر المهر وطلباته؛كلما يحاربوا من مكان يزيد بالمهر شوية لحد ماصارت حرب بينهم مع هيج جان اشكد مايكدر يحاول يكفينا من كلشي وميخلي شي ينقصنا

بالنهار يجيب سيارات يوكف بالساعات بطرگ البنطلون بذاك البرد يصلحن صح كل دقيقة قاطع شغله يا يدمغ رؤيا ويطلعها من الحديقة يا يبوس رئال ويبعدها حتى لاتتأذى؛ وبليل ينظف اسلحة مجازة حتى بيعهن بسعر اكثر من غير طلعاته الي مااعرف عنهن شي بس احسهن خطرات من طريقة تلثمه وجماعته السمر اليجون عليه وبنفس الوقت متعبات لان يرجع اخر نفس يشمر نفسه بحذاءه ينام كد ماتعبان 

رؤيا  منطلقة  بين طفر بين رجلي بالشغل  وبين مسويه دسار لعبه تشوط كلبه وتحضره  عكس رئال الي حزنها على درع  كاسر فرحتها صارت تعزل نفسها تكعد بمكتبها تخلي راسها عالكتاب وتصفن  النهار بطوله لحد مايكعد بابا يسحبهن غصباً عنهن يشغل التلفزيون يخلي الحبشكلات  ويلمنا بحضنا نسهر نباوع ياخذولهم شوية ويشتغل الشقة واللعب وصدگ ننسى  همنا ونظل للصبح على فد ضحكة

…كملت غسل مواعين العشه طفيت الاضوية وقفلت الباب المطبخ ورحت لغرفتنا دخلت لكيتهن صافات القريولات سوه

رئال بيدها كتاب ورؤيا بيدها الفون مسوية دسار لعبة تفتح الحضر تطلب شكو شغلة ما يرضى بابا يدخلها من ضمنهن اندومي وكولا وانوع جبس حار من هالسوالف حتى يشمرهن من فوك السياج الها بسكوت عن بابا اول ماتشوفهن كدامها ترد تحضره

سديت الباب رحت بينهن تمددت  كل وحده شمرت البيدها واجت خلت راسها على متني من كتر سحبنا الغطه تغطينه صار هدوء شوية وهمست رؤيا ماتحسن حضنا بعد بارد

- كل يوم اريد احجي بهذا الموضوع وابطل

رؤيا - اذا  على غيمة انتي وعدتيني بس اطلع وياج من بيت جاسم ماراح يجي يوم وتمنعيني من الراح اسوي بيها واذا عالسوينا بجاسم هذا جان اقل بهواي من السويتي انتي

- اني عاقبته من بعيد بس انتن جان داخلجن شي مرعب خفت من منظرجن وتصرفجن عيونجن جان بيها اجرام مونفس البراءه الداشوفها هسه

- لان مادخلتي حجز ولاسمعتي اصوات التعذيب ولاحسيتي بالموت يتخطى بين رجليج

رئال- مانحصغتي بزوايه وانتي تسمعين يتزاودون عليج ولاصغتي جوه ايدين حيوانات على ه‍يئة بشر ويتغالبون ياهو اليتعلم بيج التعذيب اسغع ولاشفتي الدم كدامج اشلون ينزل من متهمه وانتي متانيه سغاج بعدها

-برد كلبجن؟؟

رؤيا- لاا كلبي جمر بالاكثر

رئال- زاد الحقد تحول من تعذيب لصغخات موت

-بس هذا مايرجع الراحوا ولا يرد ذيج ايامنا

رؤيا -بس من تذكرهن تبتسم بدل ماتختنگ

رئال- ومن تغمض عيونك تحس نفسك القديمة موجوده وشغفك لحلامك نفسها

-يااحلام منهن ؟؟

رئال - المشكله مااعادت عندي احلام  حتى الاشياء الجنت اخاف عليها خسغتها صغت اني اتنازل عن كل شيء لان من صدگ فقدت نفسي

-اشلون ينجبر الخاطر

رئال-يكولون النسيان بس جذب صعب تنجبغ

رؤيا- استاقيت لماما

- هاي كدامج لاترضه تجي ولاتقبل نوصل الها كلما اتصلنا تكول خليجن يم ابوجن

رؤيا - لان غيمة محضرة مصيبة بس ربج يعلم بحجمها وماما خايفة نوصل ويغافلون بابا بينا

- شتكدر تسوي مثلا هو جاسم وانتهى

- رب الي اشتريتي روح جاسم بكم فلس من اخته ماتكدر هيه تبيع ارواحنا  لاعداء بابا  بكم دينار حتى ترد توكع على رجلين ذباح بحجت خايفة لايوصلوها ويردها

- واني ماأمن ماما يمها اذا ماحصلتنا توكع بماما ماطول كالت لاتجن يعني امنت علينه و ضحت بروحها

- ماتلحگ لاتخافين

- من يرجع بابا احجي ويا اخلي باجر ياخذنا الها نشوفها وبلكي نقنعها تجي ويانا

- ليش مااتصل بدسار اخلي يخطفها ويجيبها

- اي وبطريقه يجيبلج جكاير وسجينة وشرب

- هااا لاا مااشرب حرام

- لج بابا هذا ضااابط مو دلفري يشتغل عندج الرجال راح يتخبل كل يوم معرض روحه للخطر حتى يخلص من نگج وياريت على شي يسوه حتى فشله موته اتصير بسبب اندومي

- يله بعد مااطلب شي بس هالمره لان راح يوصل بعد حرمات اكله ارجع

- يله بله وفوگ هذا حاضرته

- طبعا اكو واحد كلج بت شوارع واحجي ويه ولد

- لاانتي واصلة مرحلة  مستحيل تنعدل حالج حال بول البعير كلما جايج ترجعين ليورا

- هاي عود انتي اختنا الجبيره بدل ماتعلمينا عالصح تحجين هيج اشياء موزينه  كدامنا

رئال- هذا يتسمى  النضوج من تكوم تحجي قليل وتغلط هواي

رؤيا - والي يختصر الرد بزيج لاي مرحلة واصل

- بمناسبه الزيج اسمع صوت دغاجه وغه البيت

- كومي اوكفيلي يم الباب اخاف يجي بابا واخليج تاكلين اندومي وياي

- اذا جذبتي عليه مثل الباغحة افتن لبابا 

هزت راسها اي وكامت جنها جنية خدودها وشفافها حمر وشعرها طويل وكيرلي بسبب الضفيره اليشوف براءه شكلها ولايصدك هيج شايلة مذاوه

جريت رئال كعدتها خفت عليها الجو بارد. وكمت مكانها طلعت ورا رؤيا بعدنا بالباب وسمعنا دبه عرفته طفر طلعت تركض واني وكفت يم باب المطبخ

عيوني بالساعه اندعي ربي يهدي بابا ويكول لدسار يله جيب اهلك واخذها خايفة عليها من عقلها كلما تصفن احسها دبر سالفة  لغيمه اعرفها ماراح تتركها بحالها وادري ناويه تضيع نفسها لهيج دتشوف دسار كل يوم حتى تشبع منه

الوقت يمر وهمه مستمرين يسولفون بالحديقة لاوالله يتضاربون ساعة اسمع كفخته وساعة ضربتها؛ ياخذولهم دقايق مكافش ويردون يهدأون لحد ماصارت الوحده

طلعت ظلمة مامبين بس ضوه الكمر داگلها يله دخلي واسمع صاح اااخ  اباوع لازم صدره ويباوعلها بغضب لبالي راح يكتلها  اشو هذا فرك صدره وكال يله دخلي جوه

دنگت شالت الماسحة  رفعتها وشرت طلعهن

- شطلع بت الكلببب مخابراتني حتى تسلبيني

- دسار كلمة الثانيه اهفك على وجهك واصرخ حرامي اخلي كتلك ماله والي بالمنطقه  ذب كل الي بجيبك بسررعة

- بعد طگي الموس من حلگج وشرحيني

- عود شنو انت حاسب روحك سبع المنطقة وجاي تمشيهن عليه يله طلع باقي الفلوووس

- انعل ابوج لابو الورطني بيج بت السطل شطلع  ياافلوس شنو طلبيني

- كلتلك جيب خمسة اندومي واربعه  جبس حار ذني بس اربعة اندومي وثلاثه جبس  وين الباقي شنو تضحك عليه

- بنتي مطيتني افلوس واني ماادري اشلون اضحك عليج بله فهميني يجوز اني زمال بهيج سالفة

- اهووو اشلون شغله هااي اضحك عليج بكم كلمة وافرهاا بيج واطلع بالنظيف دساار من الاخير تشمر الفلوس لواشوف شغلي

- هواني لوبيه خير جان اجيتج هيج وقت

-يله لاتأخرني

هز راسه دنگ طلع محفظته سحب الف اجه يمها رادت تاخذه وبحركه سريعه لكف الماسحه رادت تصرخ سد حلكها جتفها جرها الحضنه ودنگ عضها من خدها

خجلت درت وجهي واسمع صوتها تهوس مخبوصه بس تريد تخلص نفسها ماتكدر بكلبي اكول حيل كون يملخج على هاي الرعونة

دقايق واسمع صوت سيارة عرفت بابا وصل

انداريت اشرت لدسار دنگ شال رؤيا اجه شمرها عليه وكال عود ربوا بناتكم مو بس شاطرين طلبون مهر يكسر الضهر

رؤيا - لاياحيوان يالفو اني مامترباية

عض طرف شفته باوع للباب ورد باوعلها اجه يركض رادت تلفت مالحكت لكفها لزم وجها عصره دنگ عضها من شفتها بكل حيله لمن شلعها رد باسها حيل ودفعها شال جفوفه وركض للسياج الثاني بخفه طفره ثواني واسمع صوت الدراجه شحطت

جريتها بسرعة دخلتها سديت باب المطبخ واخذها ركض للغرفة دفعتها وقفلت الباب انفت

وكفت مسحت حلكها بظهر ايدها تباوع بحقد  غميتها

رؤيا - العلاگه بقت هناك

-بلكي يشوفها بابا

-واذا شافها اصلاً مانعرفها المن يجوز واحد يريد يسممنا

-هاي من يكون ابوج جاسم مو الدغش ولي لفراشج يله وكون على الله الكيج مخابرته بعد حتى گبل اكول لبابا

رجعت لفراشها وهيه تمسح بخدودها الي مسويهن خرايط كد مامعضعضهن

سمعت بابا دخل لغرفته وسدها امنت يعني ماحس  اجيت يم رئال لكيتها حاضنه مخدتها وصافنة  كعدت يمها خليت ايدي على شعرها همست شبيج يروحي

-اشتاقيت لدغع

-لدرع لو لحضن ابو درع

-ليش هيج گلبه قسى عليه اشلون گدغ مايسأل عني كل هالايام 

-الانسان من يخلي ثقته باليحبه وينجرح منه يبعد لان كد مايحبه مايكدر يعاتبه

- لا عغف شنو اليوجعني عاقبني بي

-تحبي رئال

نزلت دموعها

- ليش مامكتوبلنا نكمل ويه النحبهم

- يعني هاي هيه بعد ماشوفه زين هو مو يعغفني اني غداغه  ويعغف غاح يعوفني ليش خلاني اتعلق بي  هلكد

-اتصلي بي سألي

-اخاف اسمع صوته بغغفة هبه وكتها موبس اكغه نفسي لا اموت والله

-عوفي اتصلي بضي وشوفي درع راح ترتاحين

سكتت

-انطيني رقمها اني اتصل والله كلبي عنده كل يوم اريد اتصل وابطل بسببج مااريد ازيد وجعج عليه

-اخاف مايقبل هيذام

-ماراح يدري على سالفتج هسه غاط بحضن مرته يله انطيني الرقم

اخذت الفون كتبت الرقم دخلته واتساب اتصلت كام دقايق وردت ضي رجعت لفون لرئال لزمته تباوعلها  بدون صوت اخذتلها شوية وصاحت ضي  مبين عاجبج الصمت زين اشتاقيتلج اشلون تنكال بهيج مواقف

- دغع اشلون

- شتكولين انتي اشلونه تدرين بي تمرض وراج لااا تدرين صار كم يوم ماياكل وحتى ويه ابو مايحجي هم لااا تعرفين ساكن المكتب مالتج ويبجي نهار وليل هم لااا تدرين ليش لان ماتستاهلييي

-هيذام وين

-شنو كلتيله رئال وهيج خليتي يبعد  عنج ومايريد احد يذكرج كدامه بعد

-شي انگال بالغلط وبدون قصد حسباله جنت اجذب عليه من اگله احبك بس والله ماكو بكلبي بس هو ومن حجيت هيج  ماجنت اقصد غيغ  اشتياقي لايامي القديمة وسوالفي عن احلام اتلاشت ويه والوكت وانست ماضل منها اي شي ولا حتى احس بيها بعد

- ياغلط ياماتقصدين تدرين هيذام اشلون صار من بعد ماعفتي البيت انتي موبس انطيتي درس بغدر النسوان لاانتي كرهتي حتى بنفسه وخليتي مايثق بيها  صار عبارة عن مخبل يمشي ويسحگ بدون شعور اي صله بينه وبين البشر بعد ماكوو انتهى

-يعني نساني

- شينسى وهو الليل ماينامه كدر مايفكر بيج تردين  تشوفي وين هسه اطلع واراويج اشلون لازم كجارته وكاعد بالحديقة هذا وضعه من طلعتي لسه صافن مااعرف على قسمته مااعرف على دكت كلبه الاجت لوحده ماتستحقها ولج البارحه احجي ويا يكلي اشكد ذلتني واذتني بس ولايوم حاجيتها لو عاقبتها جنت اشري زعلها بروحي جاليش هيج جازتني

-والله احبه

-كم مره كلي ضاله وياي بس لان ماعدها احد وتريد تاخذ حقها وادري بيها بس يردون اهلها تعوفني لو اخلي الدنيا بين اديها مو احققلها احلامها بس ماجنت اصدگه

-انتي اكثغ وحده تعغفين اشلون احبه وشنو سويت علموده

-كلشي ماسويتي غير خسرتي رتبته وكلبه وهو هم جان متأكد من الراح يصير ومستعد لهيج صدمه  روحي رئال مااريد احجي وياج بعد

غلقت الفون وباوعتلي

دنگت همست موكلتلج نهى كلشي

رؤيا - او يمكن استعمل مقولة ان احببت شي بقوة اطلق صراحه ان عاد اليك فقد ملكته للابد

-يعني شنو

-روحيله يجوز منتظرج

-ديگلج مانع دخولي للبيت

-روحيله للمركز

-مايدام هنا ومكانه محد يدخل بي بس الشايل باج وصحاب المناصب

-غير مكانه وين يتواجد

-ازغ

-اشلون تعرف الله مطيح حضك من يخلقك الدغ ويخلي الي بحياتك كلها بالراء

-شنو اگله

-لاتگليله اوكفي باب المركز صيحي الله واكبر وفجري سيارته

-اغيد اغجع علاقتي مو انعدم

-اتصلي بي وكليله شاكه بأهلي يشتغلون بالتنظيم همه من يجون يكرفونه اكيد يكرفوج ويانه

-يدخلون علينه يصفونه واحنا بالبيت مالحگ اوصل للمغكز

-اكو سجينه بالمطبخ اخذيها وجفتي بابا شوهي وجهه

-وليش مااشوه وجهج الاعوج ولي اني اعغف شنو اكله عوفي افكاغك العوجه الج تفيدج بالمستقبل بس دبغني اشلون اطلع منا

-باجر احنا مو نروح نشوف ماما نطلع سوه نشمرج بالمركز ونطلع لماما عود اذا ماشمرج بالحجز لحگينا وانتي رايه كومي وياي انجيب العلاكه ماطول ابوج نام

هزيت راسي وخرت الغطه وكمت فتحت الباب لكيت بابا مسدود اشرتلها يله

طلعنا نمشي على طراف اصابعنا  تركناها تتصل بي وصلنا لباب المطبخ فتحناها عالكيف  طلعنا  ركض للحديقه نزلت دشيل العلاكه ونسمع بابا ورانا كال لاتكن على عجلة كلما عليك هو الهدوء واقناع صاحب الاجرام بذكائه حتى يعود لساحة  الجريمة

عضت شفتي ورؤيا خلت العلاگه ورا ضهرها

اشر تعالي

رؤيا - هاي اول مره وشكد عيطت عليه ورزلته كلتله مااريد بس هو لح حتى ما دخل شمرهن من ورا الحايط وراح

- وهذا رقم حذاء الغوريلا  المختوم بالحديقة

- بس اريد افتهم هذا منو الخلا  ضابط مخابرات

- ذكائه نفسه الخلا يترك اثر ورا حتى يوصل مسج انو اشوكت مايجي براسي  ادخل بيتك ادخل؛  اختصر السالفة وانطيني بنتك

- اهاا من هيج قفص عليه وغلس الالف

اجه شالها من اذنها صاحت اتوبه انوب اذا اجه ارمي

-وليش ماارميج واخلص من شيطنتج

-يصير البيت موحلو بدوني والله تخسرني منو يساعدك بتصليح السيارت بعد

-خرزه البتاوين اذا ماكعدتي وصرتي حبابة هاي عيونج ابززهن سمعتي

هزت راسها

-هالمره ماراح احاسبج بس ثاني مره اعرف اشلون اتوبج يلا ولي

باسها حيل ودفعها وكفت ضايجة  تفرك بأذنها رادت تحجي دنگ شال طابوكه ركضت دخلت بسرعه ضحكت هز ايده ورد الطابوكه للحديقة

-وانتي هم لازم تتعاقبين

- والله خايفة عليها بس اريدها تتزوج حتى بلكي تعقل شويه لو دسار يكدر يلزمها

- ماعليها رؤيا ذكية وتعرف اشلون تحافظ على نفسها وعليجنن ركزي عليجن

- ربي يستر عليها  من تفكيرها ويهديها وخليها تشيل غيمة من راسها

- اذا شالتها هيه ذيج ماتشيلها ولازم وحده منهن تنطق الشهادة

-يمه اسم الله على اختي

-ان اردت الابتعاد عن خطر يجب ان تكون انت مصدره

-يعني شنو

-يعني ابتعدي عنها وخليها تنفذ الي براسها وهسه يله دخلي وقفلي الباب اجتني شغلة مستعجله لازم اطلعلها

-صدگ الصبح اريد اروح لماما اشوفها مانتأخر بس نأمن عليها وبلكي نقنعها تجي ويانا

-ماراح تجي  ولاتفكر بعمرها تسويها لاتعبين نفسج

-ليش

-من غير ليش المهم تنتظرني من ارد اوصلكم لو ادزلكم تكسي

-لاوالله ياريت ادز تكسي حتى مانتاخر

-تمام اكو افلوس بغرفتي اخذي منهن اخاف تعتازين وهم انطي لامج بدون لاتكليلها هذا مني كولولها من شغلكم

-تمام ربي يحفظك النا

-رايه

-ها بابا

-ترجعلي مو؟؟

باوعتله نظرته جانت بيها قلق يباوعلي بتوسل راحت حضنته دنگ باس راسي همس ماريد اضغط عليجن بس بعدني ماشبعان منجن

-ولااحنا ؛وراح نرد ماما ونرجع عائلة كامله مثل قبل

-ان شاء الله يله يروح ابوج دخلي وقفلي الباب وعيونج على رئال تره مكسوره

-هدمت حياتها لخاطر  تبني حياتنا اشكد حجينا عليها بوكت ماسلمتك

- صارت بعد وبدون قصد يله حبيبي ردي جوه الجو بارد

باسني من راسي رجعت للمطبخ وعيني وراي اباوعله خله سلاحه بظهره وكفت يتلثم عدل

اندكت الباب اشرلي دخلي بسرعة ؛دخلت ركض قفلت الباب اسمعه طلع

رجعت للغرفة لكيت رئال طايره من الفرح اشرت ها بشري

- ازغ كال بس تعالي ومالج شغل بالباقي

- دحضري ملابس حلوه ورتبي خلقتج لا ينصدم وانوب يشمرج بالحجز بدل يحجي وياج

رؤيا - تعالي اعدلج  وانتي رايه حضريلنا اندومي خلي نسهر بين مااخابر دسار يجيبلي مكياج

- منييين يجيب الساعة بالثنين بليل رؤيا

- شعرفني يطفر على محل يبوك امه يكتل ابو كوزمتك هو يدبر نفسه وانتي جيبي الفون خلي افتح الحضر

اخذته كعدت اباوعلها فتحت الحضر دزتله اوك ثواني وتم المشاهده بس مارد

كتبت تعرف اشكد احمد الله انت بحياتي

دسار - افلوس ماعندي

ابوج وبعد مااتوسل بي وجيه بعد مااجي واصلاً العقد راح افسخه يلا ردي الحضر

ردت حضرته وشمرت الفون ولاهتمت طبكت ردن بجامتها وتركت الثاني يسحل اتربعت كدام رئال ناثره كفشتها سحبت العلبة وبلشت بيها ؛ اسرع شخص بتخطي المواقف

عفتها تعدل وطلعت سويت اندومي رجعت لكيتهن بعدهن خليته يمهن اخذت الفون ورحت تمددت بالفراش فتحت الفون استوني اگلب بي وصلت رساله من ذباح فتحتها لكيته كاتب بت الدغش كضي حجابج عدل كفيلج الله اذا لجحتج مرة ثانية  طالعة جدام جماعة ابوج بدونه  اخش ادگج صفر انتي والساندج

غلقت الفون بسرعة وشمرته فاتحه عيوني على كبرهن  هذا وين شافني

نكثت راسي ورديت عيني بخواتي مر الليل واحنا على گعدتنا  بين نحضر وبين رئال تسألنا شنو احجي وترجع رؤيا تعيد من جديد اذا رفع صوته شخطي وجهه اذا كلج شكو جاية تفلي عليه اووو  من هذا الخرط مالتها

تركتها  تعلم وطلعت جهزت غده لبابا وخليته بالثلاجة لحد ماكملن وصلت التكسي قفلنا البيت وطلعنا عالسريع واحنا وحده تضرب بالثانية  وصوت ضحكنا وين واصل مامصدگين عدنا بيت ونطلع ونرجعله شوكت مانريد

ماعرفنا هاي الطلعة راح تغير بحياتنا تخلينا نعيش ايام ماجنه حاسبين حسابها

صعدنا السياره انطينا عنوان المركز بالاول طلع بينا ورئال ورؤيا وحده تتحارش بالثانيه وتعيرها بشغل رجلها والسايق صافن عليهن تكول يسولفن على فيترجي مو ضباط برتب 

عيوني عليه وكوه كاتمة ضحكتي بالاخص  من اتصلت رئال بحماها وعاطت بي كام يتبلعم بعد ماتحملت طلعت ضحكتي غصبا عليه باوعلي بالمرايا ودنگ خجلان

وصلنا للمركز لكينا ازر منتظر واكف يم حماية يسولف  شافنا ضحك و اشر لرئال سلمت علينه ونزلت  راحت تركضله  واحنا كملنا طريقنا عن طريق المخابره بين ذباح والسايق لحد ماصار كدامنا  واكف هو وصگر سلاحه بيده بلبسه الاسود مدنگ عيونه بساعته

على صوت السياره شال راسه ترك السياره بكبرها هيه والبيها واجت عيونه بعيوني جانت لهفه نظرته فاضحته مثل المنتظر حبيبه سنين وشافه بالصدفه مار هيج جانت حالته

اخذ نفس طويل ودنگ ؛اجه صگر دكدك عالسياره اشرلنا نزلن  نزل السايق الجام وهو دنگ عليه گله حي الله بأبن العم

نزلنا تركنا يتحاسب ويه السايق عالكروه وصلنا قريب على ذباح سلمت رؤيا وعبرت دنكت دااعبر سحبني من ضفيرتي وهمس هاي الي يوم ابترها

عضيت شفتي وكملت طريقي دخلنا للبيت تلكتنا عمتي فجر تصيح حي الله من جانه توه نور البيت هلا بأمانة عزيز ارفيجه

رؤيا- رايه  بس ذكريني بيها هاي منو

-تركي اخيتج وكربي لذكرج ياهو انه يالرعنه

ضحكت وراحت حضنتها باسها وكالت اووف ولج الج وحشه

- كلتلكم سوف اذهب وسوف تندمون ماصدكتوا

-ههههه دروحي لاميمتج مناطرتج خلي تعلمج الندم على اصوله

-عزه مانست بعدها

-لاع وعلي ناوينلج نيه كشره اله تقلع ذني عيوناتج التكول خرزه مغثه

-شعدكم ويانه اخوج اتلكانا جر رايه وكاللها الي يوم ابتر راسج وانتي تقلعين عيوني عمي احنا غلطانين بالعنوان وخري خلينا نرد لبيت ابونا

دمغتها  ودفعتها  لجهة الغرفه وندارتلي وكفت تباوعلي رافع حاجبها

-تره اشتاقيتلج

-اي ضحكي عليه بذني سويلفاتج

-شوف اشلون تضنين السوء بيه واني التاركه بابا وحده جايه اتغده يمج كد مااحبج

-ماطولج هيج جا ماتكولين للشفيه  يخف ايده ويتهاون شوية بطلباته الي شيوخ عشاير بصيتهم مايكدرون ينفذون طرف منهن 

صاحت رؤيا هاا عمه قصدج رايه ماتستاهل

- يااع وعلي يعمه تستاهل نعطيها عيونه كربي لج يمه اشكد محتامة عليج

ضحكت وحضنتها باستني وكالت يله روحن لاميمتجن بين ماروح للبدوية يم هجامه ابشرهن بجيتجن

هزيت راسي راحت واحنا دخلنا للغرفة لكينا ماما كاعده لازمه راسها مدنگه ويمها غيمه واكفه  لازمه فونها وتباوع بخبث مثل الجانت تهدد وسكتت  على دخلتنا

شالت راسها ماما عيونها حمر وكلهن حيره ركضنا دنگنه حضناها كل وحده من جهه اخذتنه لحضنها بقوه بوستنا وهمست شجابجن

-اشبيج ماما ليش هيج عيونج حمر

-مابيه شي بس اشتاقتلجن وين اخيتجن

-هسه تجي ماما احجي شبي صوتج جنتي تبجين موو

صارت عيونها على غيمه وسكتت رادت تكوم رؤيا لزمتها ماما دفعت ايدها وكامت  رجعت غيمة بسرعه ليورا لزمتها كالتلها اوكفي ماكتلج

غيمة - ومنو كلج خايفة منج وبعدين شكو جايات لو هم رايه حبلت ورديتن حتى تشمرن عهرجن على ذباح

- سمعت مقولة تكول من تعطيك الدنيا دورك للانتقام انتقم بحجم اكبر من مما اوذيت بيه كن حيوان تجرد من الرحمة والمشاعر لكي تنام بعدها بعمق

-شقصدج

-ماقصدي بس هالايام نومتي  ماعاجبتني كلت خلي اجرب اذا صدگ الحجي حتى اذا مافادت ادورلي مقولة لخ انفذها 

- كملتي ردي لحضن امج  حاولي تشبعين من محنتها وتملين عيونج هواي حتى تكدرين تغمضين على كولتج

- اهااا لعبة جديده

-نصيحه ابتعدي حتى لاترحين بالرجلين وبدل ماتنزفين للضابط الماعرف منين جبتي تردين جوه رجليه وتحت تترحمين على ايام العمى والكتل

-مااگلج لاتحفريلينه حفره لااا حفري وكبري اشكد ماتكدرين حتى نكافأج بالدفن

- ادفنين منوو؟ ويلا ولي من وجهي ردي لامج خلي تشوفلحن صرفة  للنغل الجديد لان ذباح بعد ماتمشي عليه هالسوالف عرف ابوجن الديتنقل بينجن وهو وجماعته و اليحملجن بالنغولة

ضغطت على سنونها سحلتها من ملابسها كامت ماما  ركضت جرتها ودفعت غيمة لجهة الباب رادت تصرخ رؤيا سديت حلكها واشرت لغيمة طلعي

عدلت ملابسها طلعت هيه وتضحك بشماته دفعت رؤيا عليه وكالت يله خابرن ابوجن خلي يجي عليجن والي تحجي منجن وياها لاهيه بنتي ولااعرفها

راحت كعدت على جهه دار وجهارؤيا طلعت ضايجه واني رحت كعدت يمها خليت ايدي على متنها وخرتها دنكت على ايدها بستها وهمست زعلانه منا موو

-وليش حتى ازعل قابل ضيعتن تعب عمري وعفتني وحدي لو ماصدكتن شفتن ابوجن ركضتن لحضنه ونسيتن حضني الجنتن تتعاركن عليه

-كم مرة خابرناج ردنا نجي ناخذج مارضيتي

- لو اعرف اسكن الكبر واعيش عمري كله بعوز ولاااباوع بوجه رافد

-ليش ماما والله طيب وحنين

-الله يخلي خيمة  على روسجن ويسعدجن يمه يله يبعد امج اخذي اختج ورجعي

- شنو الصاير بينكم الي يخليج كارهه شوفته هيج وهو متأكد ماراح تسامحي فد يوم وبنفس الوقت ماترضين تگلينا حتى لانكرهه

- ماصاير شي احنا من البداية مامتراهمين ولاواحد طايق الثاني

- جذب لوجنتي صدك ماتحبي جان شمرتي مداليته جان ماحافضتي كل هالسنين على نفسج وماخليتي احد يتقربلج بعده وحتى من صارت رند تره اتذكر اشلون صارت بالغصب وشنو سويتي حتى تنزليها

- لاااا موعلموده ردت انزلها لان كبرت واني مابيه بعد حيل خلفة

- مامااا انتي حتى من ماتت مابجيتي عليها ولاحزنتي كد مابجيتي ورا رئال لان دوم جنتي تباوعيلنا بغير نظره ودوم جنت اسأل نفسي ليش هالهفه بعيونج من تشوفينا ؛شكو بوجهنا مميز الي هيج عيونها تكوم تلمع

-لان جنت اشوف التعب بوجوهجن ومااكدر اشيل عنجن

-لا جنتي تشوفينا بينه وحتى شعرج و شعرنا ماكصيتي لان هو يحب الشعر الطويل

سكتت

-ليش خبرتي عليه شنو الخلاج تتخلين عن حب عمرج وهيج تسوين بينا

نزلت دموعها

-يكولون البنيه الجبيره سر امها والحضن التشمر بي تعبها  احجيلي ماما لان نظرات بابا النا ولهفته من نجيب طاري اسمج تعصر كلبي

-لان يعرف نفسه موخوش ادمي ودمرني اني وبناتي ولو يضل العمر كله يعتذر ماراح اسامحه

-شنو سوه

-كلشي ماكووو ويله كلتلج كومي اخذي اختج وردي وحتى رئال خابريها كليلها لاتجي

-هيج صايره شوفتنا تزعجج

-لوعليه اضمجن بروحي واحارب الدنيا علمود سعادتجن بس مااكدر جربت هواي ماحصلتن مني غير الوجع والضياع

-ماما الدنيا ماتسوى شي من غير حضنج

- وحضني ماعاد الامان رايه ماما تردين خواتج يضلن يمج وماتبجين على فگد وحده منهن  اخذيهن وردي لابوج لاتجيني

- شسوت غيمة

- انتي ليش هلكد تلحين تره العالم كافيهم حاملين همي ومصرفي انوب ازودها بيجن  ماطلع ذباح كعد يومين ويه غزوان بالحجز ابتله على عمره

-واني ماراح اكوم اذا ماحجيتيلي شنو المصيبة المسويتها غيمة  وهاي كاعده وحتى ماارد بعد ضاله هنا

-ليش تشلعين كلبي ياامي

-تخافين اكول لرؤيا موو تمام احجي والج كلمة مني مااكول وراح اخذهن واروح وحتى مااجي اكتفي بالمخابرات وياج

ماردت

-ماما اذا هيج السالفة تخوف احتمال خواتي يتأذن  اذا تأخرنا احجي

- متفقه ويه واحد مااعرفه منو بس اكيد من جماعة جاسم عن طريق اخته يجي يكتل رؤيا مقابل مبلغ

- عززه وصلت بيها للكتل زين منين جابت افلوس

- سمعتها تتفق ويه كمريه هيه تنطيها هم يخلصن من رؤيا وهم انتي تعوفين ذباح وتردين لابوج وهيج ينتقمن اثنينهن

-وليش ماكلتلي لذباح

-يماما يكتلهن اثنينهن ويضيع شبابه بسببنا وخطية  هيام فرحانه مامصدگه وافق راح يسون طفل حتى ملابس اشترت اله وكل يوم تحسب لبداية الشهر اشكد ضل اجي اضيع كل هذا بكلمة

- وترديني اتركج يمها واروح هسه من اعرف اموت مااريد اعرف شنو البينكم وحتى بابا اني احجي ويا ماراح يرد للبيت يشوفله مكان يضل بي وانتي تجين ويانا

-رايه اني اتفقت ويه هجامه اروح وياها راسي وراسها نشتغل ونعيش وكل فتره اجي للامام اشوفجن هناك

-لاوتحجي هيج بساطه انتي منو سواج ام اول مره اشوف ام معتازه ام

- كملتي يله كومي لان سوالفها سمعتيها حتى تتهمجن بشرفجن ورؤيا عدها عقده اخاف تزرعها براسها وتكوم تكره ابوج

- لاتخافين علينه وبعدين هيه شرجعها موطردها ذباح

- يبوو لاخلت ايد ولارجل ماباستهن اخر شي هددتهم تروح لشيخ العشيره مالتهم وتشمر روحها عليه وتشكيله اشلون جابها واشلون رد بكلمته كوه فجر لمت السالفة عن لايسمع ذباح ويموتها

-لاهاي صدك واصله مرحلة خطره ينخاف منها

-شفتي حتى تعذريني يله كرمي اخذي اختج وروحي اخاف تخابره ويجي وهاي اختج طلعت للمزرعة اكيد تالي يصير بيها شي

-هسه اكوم احجي ويا ذباح يوصلنا بس انتي ويانا

-لاااا

ماهتميت كمت صاحت وراي مارديت بعدني ماواصله لباب الغرفه ومانسمع غير صرخة اجت من بره البيت وصوت ركض خبص الجو

بعد اريد اخذ نفس مااعرف طلعت اركض ماادري اشلون وصلت للمزرعة وكفت واني اشوف  هيام لافها ماطور الماي الزراعي  ويمها غيمة سابحة بدمها مشلوعة ايدها …

*** رئال***

دخلنا للمركز امشي و اباوع صح  نفس الاماكن الي دخلنا بيها اني ورؤيا بس مو نفس المشاعر احس صدري مليان لهفة

كل خطوه اتخيل اشلون راح يدخل بالزي العسكري وشنو راح تكون ردت فعله من يشوفني 

شنو اول شي اكله مشتاقه لهمساتك لو لحضنك واني احتمي بي منك  لو اشكيله من بعده شسوه بيه

خليت ايدي على كلبي احسه يريد يطلع وصلنا لمكتب ضربله تحيه الحارس  كال ها ابني وصل الملف

- اي سيدي خليته عالمكتب

- الضابط هيذام شنو  اخباره

- اتصل عليك مرتين كلتله داخل غرفة التحقيق

- خوش حجي اول مايوصل انطيني رنه

- تمام سيدي

فتح الباب دخلنا اباوع عرفته هذا مكتب هيذام 

سد الباب راح للمكتب الخشبي فتح الملف كلبه ورده مكانه

طلع من الجراره رتبه وكلبجات اجه يمه جر ايديه كلبجني ودنگ خله الرتبه بجيب بنطلوني كال هسه كله تمام

-شنو هاي

-لاتستعجلين على رزقج لج

-تغيه جاية حتى اعتذغ منه موحتى البس قضية

- اشش وصل روحي واكفي بجهه الباب بسرعة نفس مااريد

اشرت اي رحت وكفت يم الحايط دقايق واسمع ضربة بسطاله غمضت اشكد مشتاقه لهذا الصوت؛  صارت حركته قريبه اخذت نفس وفتحت عيوني على صوت فتحت الباب

دخل اباوع لضخامته بالزي وهيبته بالوكفة امنيتي اركض اشمر روحي بحضنه واسولفله عن خوفي بشوفته اول مرة ولهفتي هسه

قبل لايدير راسه الي صاح  ازر وين تأخرت يااخي

هيذام- عندي شغلة كملتها خير شصاير

- قضية نعلت ابو اهلي لا اعرف اشلون احلها ولاادري منين ابلش بيها

-شنو هيه

-بنيه من البتاوين كاتله واحد هذا ملفها

-اهاا والمطلوب

-شوفلي حل بلكي تنطيني شويه من خبرتك  تساعدني بالتحقيق

مارد تقدم ليكدام شال الملف دنگ فتحه باوع بي  اخذله ثواني ورفع راسه اندار باوعلي

اخذت نفس عيوني عليه اباوعله وجسمي كله يرجف؛  اندار شمر الملف وصاح للشرطي  تعااال ابني اخذ هاي اشمرها بالحجز…

لاتنسون التصويت❤️