تحميل رواية «شيء من رصيف الدم» PDF

شيء من رصيف الدم

بارت السادس

بقلمي leo Alfatlawi

بارتين مثل ماطلبتوا

كانت جميلة لدرجة ان الارض لن تستطيع حملها فأاحتضنتها بداخلها …

***رؤيا***

وصلت يمها  اخذت راسها بحضني اتلمس  اجت فتحت عيونها على كبرهن بيدي  بدون نفس 

نكثتها حيل وصحت بلهفة رنود گعدي يروح اختج

صفنت صار هدوء اريد بس اسمع نفس لو احس حركة منها ماكو ؛خذتها لحضني بدون وعي  وصرخت صرخة طلعت من روحي

جرتها غيمه من ايدي دفعتها وصرخت تركيهاااا

-ولج ميته هاي لاتسوين بيها هيج

-شنووو ميته لاهسه تگعد  اي اعرفها گومي رنود ماما راح تصحى اول وحده تسأل عنج انتي گومي يروحي

-شو جيبيها اصخام هاي منتهية ساكت كلبها

دفعتها ورجعتها لحضني  غمضت وعصرتها بداخلي اخذت منها نفس احسها خنگني همست بأذنها كومي رنود رايه راح تجي تاخذنه راح نروح منا بعد محد يكدر يأذينه راح تشتريلج الثوب الجنتي تحلمين بي   

-ولج شسوي وين اروح يبووو لحكونه ولك عمييي ولك كوووم راحت بتتتك

كالتها وطلعت تركض واني حاضنتها حيل

اشتميتها بستها وهمست -جسمج بارد راحت الصخونة بعد مااخليج تبردين راح اضمج بحضني واسولفلج قصص حلوه مثل قبل حتى بابا مايسمعنا  بعد مااصرخ بوجهج ابد اخليج تلعبين مثل ماتردين اني اكعد ورة الباب احميج مااخلي احد يدخل علينه حتى العاب راح اكول لرايه اتجيبلج بس گومي

مسحت وجها نزلت ايدي على جسمها وصلت ليجوه حسيت الدم مسبحها مثل الشي صحاني

اريد اتنفس مااگدر خليتها على رجليه گمت اوخره عن جسمها باديه عالسريع مثل المخبلة متأمله  تصحى  احس روحي داخل حلم مشاعري كلها مثلجة

دخل بابا گال بصوت ثگيل  شكو شبيها

رجعتها لحضني همست مابيها شي وخررر

-شمسويه بيها بت الكلبببب

-مصخنه سوتلها  كمادات هسه تصحى صوتك لاتگعد خليها ترتاح

-جيبيهااا ولك بويه هاي ميته ولج اشلون كتلتيها

-نايممممه ماماااتت هسه تگعددد

دنكت عليها كلتها بتوسل رنود حبيبتي گعدي داسويلج ريوك كومي يبعد روحي موكلتي جوعانه البارحة وكلتلج الصبح انطيج اكل يله صار الصبح

حسيته خله ايده عليها راد ياخذها دفعته  ضربني بكل قوته  وگعني على ضهري وعتها مني حيل سحبها وكام بسرعة؛   سندت روحي وكعدت عالسريع  بس اريد الحگ ازم رجليه واردها لحظني مالحگت طلع يرگض و يصيح يابوييه لحكونييي ولكم بتي راحتتت ياهل الرحمممم

كمت طلعت ورا اهمش وصلت للدرج  اسمع فتح الباب وطلع للشارع  لزمت الحايط ونزلت ركض بدون  تفكير ماحس غير رجلي راحت بالخالي عثرت  ردت شي اجلب بي ماحصلت لمن اجيت على راسي احسه انفجر من قوة الضربة  افترت الدنيا بيه لزمته ورفعت روحي احس شي حار نزل على عيوني

ردت اكوم ماعانني رجلية رجعت ازحف لمن وصلت لباب الشارع واسمع هوسة العالم كمشت الحايط وكفت طلعت اتملس  مثل المختل عقلها  ادورها بينهم  كل الي اللزمه اكله بتوسل  رجعها الي وينها  لاتخلي بابا ياخذها هاي تخاف

ابوس ايدكم  ردولياها راح تبرد مريضة اخيتي

هيست احد لزمني من وراي انداريت صاحت غيمة كافي لج تخبلتي  وين نردها اخذوهااا للمستشفى

-لالا ليششش ليشش اخذوها مابيها شييي راحت صخونتهااا

-رررجعي

-وين ارجع  هسه تجي راية امنتها يمي شكلها وين رنود

-شنو تگليلها قابل گولي ماتت

-ماتموووت ماتموووت  اشلون تموووت هسه گالتلي جوعانه ابوس ايدج بس رجعيها اوكلها والله من البارحة مماكلة

-شتوكليهااا اگلج راحت

-لالا رنود ماراحت  ولج حتى شكلها بعدني ماشفته ولكم رجعوهاااااا اختيييي ويييين

-اي عيارررة كتلتيهااا وتبجين عليهااا لبالج راح يصدكون الله ياخذجن اشكد منحطات

من همشت روحي دفعتها بكل قوتي وركضت واني اصيح ولج يمه وينج ولج يمه خذوا اخيتي من حضني ولج يمااااااا اخيتي رااااحت 

مااسمع غير غيمه صاحت  ولكم كمشوهااا  لاتشررد واحد جرني من ملابسي ردت ادفعه جتفني و سحبني لحضنه

حسيت مثل الكهرباء سرة بجسمي وضاگت روحي بلحظه مر شريط بذاكرتي  الولد وهو ياحاول يعتدي عليه ويه احساس التعذيب داخل السجن  وصوت رند وهيه تتوسل بي

هوسه صارت براسي خدرت رجليه گعدت بالكاع  شعور بالظلام  وخوف صراخ مرعبة  غمضت لزمت راسي بين دايه  عصرته صارت صورة جام السيارة يتكسر بوجهي لميت رجليه لحضني

صوات مختلطة الي يكول كتلت اختها وتخبلت والي يگول متلبسه والي يگول ابتعدوا عنها لاتأذيكم  ؛ اشياء تروح وتجي صار ظلام غمضت بعدها ماحسيت 

***رايه***

طلعت اركض من البيت واتلفت وراي لان النهار بعد موكلش طالع خلصت المنطقة طلعت عالشارع العام عبرته  احس كليتي وگفت من التعب عصرتها ورحت گعدت يم الحايط غمضت افرك بيها اريدها تهدء بس احس الام يزود ماينقص

لاعندي افلوس اصعد ولااگدر اكمل مشي المستشفى بعيده الدرب ؛  غمضت رفعت راسي  للسما همست ماعندي غيرك باوع لحالنا

رديت دنگت انتجيت عالحايط العالم استوها تطلع للشغل والهوا بارد  اباوع بتعب احس گلبي مهضوم محتارة شسوي واشلون راح احافظ على خواتي

واشلون راح اعوف ماما وراي

رئال وين ادورها ؛

غزوان نبضاته توجع بگلبي اعرف روحي مااگدر اكمل بعده-

اخذت نفس مسحت وجهي همست يارب وكمت

عدلت اللثام ومشيت اكثر من ساعتين كل كم دقيقة اكعد شوية ارجع اقوي روحي بخواتي واكوم اكمل لمن وصلت للمستشفى اخر نفس

دخلت  كبل رحت لغرفة  ماما جنت متأملة حالتها متحسنه وراح تتلكاني تشيل جزء من حملي وصلت للغرفة وكفت اباوع لاخت ذباح واكفه تصلي وماما  لاحول ولاقوة شبه الميته

من كثر تعبي وجع گلبي ركضت لحضنها دنگت خليت راسي بصدرها ضغطت عليها حيل وصحت كومي نصحيني گولي شسوي والله تعبت

رئال ماكو مختفية غزوان مصيره مجهول خواتي كسرن ظهري كل وحدة همها اكثر من الثانية

اخذت نفس منها وشهكت بقهر بس اريد اذب شوية من همي ؛حسيت ايد على راسي رفعته لكيت الحجيه كالت كفي بجي عليش هيج تنحبين

-تعبانه خاله والله ماضلت عندي طاقة اتحمل بعد

-تهدي يعمة وصبري هذا امتحان ؛اخياتج وين؟؟

-ضلن هناك

-وين بگن يالمعثرة صخام بوجهج تركتيهن غادي يم فاگد المرجلة

- يخاله حبسنا ماگدرت اطلعهن كوه طلعت وحدي حتى اجيج لان ناوي يزوجنا لجماعته ابوس ايدج خلصينه

-دگفي خلي افهم شماله الميخاف الله وياجن

-معتاز افلوس ويريد يبيعنا لخاطر يسدد دينه دخيلج خاله تركت خواتي وحدهن منتظراتني حتى اكل ماعدهن  دخلت يمكم خلصوني

-الله يغسل حظه عار الزلم انطري يعمه بس اخبر صهيب لخاطر يجي يسحگ  راسه للنجس

-ماريد لايدوس راسه لا يحجي ويا بس اخذونا منا قبل لايضيعنا

-هلبت والله يروطه ويعملها وعلي ياابن البدوية يتفگه تفگ چنه هذا اعماله مصخمة الي هيج ربه بلشه ويه وذباح

-راحت وحده امروتج لحگيني لايرحن الباقيات

-مايرحن كفي دمعج لايگف گلبج الحين اخبر صهيب  لبين متغيرين لامج بس همي ايدج شوية

هزيت راسي هيه طلعت تخابر بالممر واني عالسريع  لكيت مشتريتلها حفاضات اخذت وحده وگفت اغيرلها وعيني بالساعة غسلت وجها عدلت راسها عالمخدة وغطيتها عدل احس روحي تنوخذ مااكدر اباوعلها ؛ دخلت الحجيه كلتلها بشري

- الحين چاي بالطريج بس كال لاتتحرجن لحد مااصل لخاطر اذا شغلت افلوس اعرف اشلون احلها  ويا واذا عناد وگلة امروه افلش فچه واخذهن من بين عيونه

-كون مايتأخر

-لامايبطي شفايفج زرگ يعمة شمالج

-مابيه شي بسبب كلياتي هسه ارتاح يردن طبيعي

-عليش مخروسه اصير نجره واخذ اخياتي واروح اشتكي وخيس  چهامته المعفنه بالحبوس

-مانگدر ماعدنا اثبات ومحد يصدگنا بسبب المنطقة العايشين بيها وحتى لوصدگونه يطلبون شهود والمنطقة كلها ويا توكف من غير عنده جماعة بالمركز كبار  يوقعوا على تعهد ويطلعوا مانحصل غير الكتل والندم  ماكو غير العشاير تحمينا منه

-ولج جهرتج كلها محطمة يالمعثره بس هذا يكفي 

-اي يكلهم يدخلن ولد عليهن عالاساس ديربينا ويجيب شهود يحلفون بكتاب الله يشوفونه بعيونهم

- اااولغسل للشوارب هذا وين طامسه غيرته

- بمنطقة مبيوعة للكفرة امثاله تعالي وشوفي الظلم الديصير بيها خاله فدوه خابري انطي العنوان كليله احنا نروح وانت تعال ورانا مااكدر اضل اكثر خايفه عليهن

-يله چا بس الف عصابتي جلعي لمي سچادتي ونخبره بالطريج

اشر اي  والعبره لازمتني صعب تنخى  الغريب يحموك من اهلك

رحت ركض لميت سجادتها رجعت دنگت على ماما داابوس راسها واسمع وراي غيمة  تكول عرفتج هنااا

انداريت متفاجأه واني اشوفها وراي واكفه ويمها ابو طبر لكشني كلبي اشرت برجفه شكو

-هذا السؤال اني  اسأله  ماخفتي من الله من دخلتي واحد على خواتج واجيتي هنا لبالج مانحصلج

-شنو شنو  واحد

-والله گولي لروحج هالحجي

- صخام بوجهيي رؤيااا يمه اخيتيييي

-يارؤيا ورند يالمتخافين الله اشكد دفعلج وهيج سويتي يله هاي ماتت خلي انشوف شتفيدج الفلوس

-منو ماتت ؟؟

-هسه تكولين منو ماتت لعد من دخلتي واحد وهيه طفلة شنو جان بعقلج  راح تعبر ومحد يدري ولج اغتصبها وخنكها ماتت مخنوكة

هيه كالتها واني كعدت بالكاع احس روحي بهتت  اباوع لحلگها  بعجز اريدها تجذب الخبر ركضت الحجيه دنگت كمشتني

ردت اكوم خانتني قوتي سندتني كمت كوه همست بكسره  اثنينهن مو؟؟

غيمه - لارؤيا شخطت فاقدة بالمستشفى بس الصغيرة ماتت يمه سودة بوجهي يعمي راحن بناتك

اريد اسأل وينهن مااگدر احس خدر احتل كل جزء مني غمضت  صاحت يله امشي لاتضلين تمثلين عود متأثره جبناهن بالطوارئ اوصلي يمهم وراوينه محبتج الله يبليج مثل مابليتينه

كالتها وطلعت فتحت عيوني بتعب باوعت للحجيه نزلت دموعي بس اريدها تساعدني حتى  امشي ؛تركتني  غمضت حيل جرت شيلتها اتلثمت بيها وصاحت بصوت عالي  يبووو

عاط ابو طبر حجية جيبيها الشرطة راح توصل اشرت اي وجرتني هيه تبجي بصوت عالي عكسي دمعة الي نشفت دمعتي طلعنا  امشي بضياع وعيوني على ماما اريدها تحس بيه وتگوملي 

نزلت جوه الطوارئ واشوف بابا كاعد بالگاع شاگ قميصه يبجي ردت اوكع ردت سندتني عدل كاللها ابو طبر وديها  يم اختها

باوعتله مهضومه حتى ماگدر اسأل وينها دنگ طلع كدامنا رحنا ورا وصلنا  لمكان كله اسرة مال مرضة صايره هوسة

دخلت وياهم لكيت رؤيا فاقده بس تون  ملابسها كلها دمايه دفعت الحجيه وركضت بدون شعور جريتها من شعرها وصرخت  وين رنددد  امنتهااا يمممج ولج وين وديتيهااا

لزمت اديه وفتحت عيونها  دم همست بشهگه اخذوها من اديه بابااا اخذها 

-شنووو اخذها ولج وين اخيتي ولج اشلون ماحميتهااا ولج امنتها يمج اخيتي ويننن

شهكت بصوت

-لاتبجييين ولج رنودد وينهاااا

- حميت نفسييي ونسيتهااا وراي اني سلمتها اله بيدي ؛رايه انطيتها للموت

-ليششش هاا ليشش  موهاي اختنا  الصغيرة اشلون انطاج گلبج

-كلتله تعال والله ماراح امنعك بس اتركها اتوسلت وصرخت نخيت بابا بس محد خلصها

-يمه سوده بوجهييي  يمه اخيتي بعدها صغيرة يمه بنيتي وينهاااا ولج وين خذوهااااا

-جانت تتوسل وتصرخ اتكله عمو حباب واني ادك بالباب احلف راح اخلي يسوي اليريده  بس ماجان يسمع رايه مارحمها 

-يعني راحت هاي الثانية هم انتهت  ولكم وين اختي ولكم وين وديتوهااااا

تركت رؤيا وركضت جريت ابو طبر من ملابسها صرخت وينهااا

-كعدي بالطب العدلي يمها الشرطة تحقق ممنوع واحد يوصلها

-شنو بالطب العدلي هسه تركتها مصخنه جانت جوعانه منتظرتني اجيبلها اكل

-تركي ذيج ولحگي على الثانية راح ينفجر راسها

درت وجهي واشوف رؤيا لازمه حديدة السديه بثنين اديها وتضرب براسها بكل قوتها من كثر شدهتي حتى ماسمعت صوتها

ركضت ردت امنعها  دفعتني حيل رجعت ليورا ماسيطرت وكعت بالكاع وهيه ردت لزمت الحديده اباوعلها رفعت راسها وضربته بكل ماعدها غمضت عيوني واني اسمع صوت الضربة رجت المكان

ركضت الحجيه لزمتها رجعت گمت رحت يمها رادت تدفعني جريتها لحضني حيل عصرتها وهمست برجفة رؤيا گلبي يوجعني يخيتي

حضنتني وشهگت بصوت غمضت اريد ابجي مثلها مااگدر  فاقدة شكو شعور  احس روحي بحلم مبنجة كلي

اكثر من ساعة واني صافنه بس ونتها تنسمع  بألم وصوت بجيه الحجيه على حالنا

دخلوا الشرطة اشرولي كومي منا ؛ اجت الحجية سندتني وخرتني عنها  اتحرك بيدها مثل الدمية وكفتني قريب عالباب وكفت يمي لازمتني من ايدي تفرك بيها

اباوع لرؤيا ضامة راسها بين رجليها وتهمس كتلها كتلها كتلها مثل الصحتني لوقتي كلمتها خطفت  روحي كعدت بالگاع اريد احجي لساني ثگيل و شفايفي ترجف

غمضت ماحسيت بعدها غير على صوت ونه  يمي فتحت عيوني بتعب  لكيت ابو طبر واكف يم راسي  شافني صحيت هز ايده يسب  گال بعد وكت لو ضاله لباجر كومي من انعل ابوجن على هاي المصيبة

حجيت بصوت كوه يطلع وينه

-بره ضغطة هابط من دفن  الطفلة لسه مايگدر يتحرك

كعدت مفزوعة لزمته من ملابسه صحت  -ياطفله اشوكت طلعها ليش ماكلييييي

-وين اكلج اذا انتي من البارحة فاقدة وهاي اختج ضرب عقلها محد يگدر يلزمها گوميلها لاتشرد وتبلينه

-ولكم شنوووو انتم حيوانااات ولكم ماتت خايفة وحدها وهسه دفنتوها وحدهااااا

-كافي لغوه صوتج بت الكلبب شيلي ايدج وكومي  گولي لاختج  ابوج يكول خلي اتغير اقوالها

- يااقواااال والله كلكم اذبكم سجن اطلع حق اخيتي منكم ياحيوانااات

دفعني وصاح اششش العالم نايمة و اني مالي شغل ابوج كال عود روحي احجي هذا الحجي كداااامه

-ليش هم اخذ مقابل دم بته افلوس

-لاراح تصير راس براس غزوان هم كاتل اخوهم حتى لايفصلون ابوج يكول اذا ماتغير اقوالها يعرفن شنو نهايتهن

صفنت بوجهه اريد استوعب الديصير

-لاتصفنين مثل الثولة فضنهااا يله وهاي اختج اذا ضلت هيج مسودنه كال ابوج بطريقنا نشمرها بالمصح خاف تكتل واحد بدون لاتحس

كالها وطلع انداريت لرؤيا لكيتها كاعده بالگاع  لامه روحه تهز بنفسها و تباوع للباب عرفته بهذا كلامه يهدد اذا ماتنازلت راح يضيعها حتى يخلص نفسها مثل ماسوه برئال

انتجيت وگمت احس نفسي مو صاحية وكل هذا وهم ؛ رحت اسحل بروحي  بعدني مامدنگه يمها  كمزت رجعت ليورا

همست بصوت رايح  لاتخافين 

-وخروا عنيي لحد يلمسنييي

- اني اخيتج

-عوفونيييي  طلعووووا مناااا حيوانااات قذرررين

-دفنوا اخيتنا واحنا راح يشمرونا بالمصح

-كتلها مثل ماراح احرگه كتلها كتلها

كعدت يمها خليت راسي على متنها  وهيه تردد بنفس الكلمة كتلها اريد اتبلعم احس بلعومي يابس غمضت يائسه من اي رحمة

دقايق ودخل ابو طبر يركض كال كومن بسررعة

شلت راسي باوعتله عقلي مابي غير الحقد والدم

- قبل لاتتحركن ابوجن تعبان اي شي يگوله  لاتعارضن

مسحت عيوني واشرت اي

-عفية هسه اگول انتي صدگ عاقلة هاي المسودنه احجي وياها تره گوه قنعت ابوج مو صاحبها هذا اذا فكرت بس تحجي حجاية يشمر التهمة عليها ويردها للسجن

هزيت راسي

- سباعية كومي يله جيبيها وتعالي وراي بعد ماوصيجن هذا اخر جنص الها اذا تريد ترد للسجن ماعدنا شي انطي لسعدون افلوسه و اخذج مكانها  وهيه تولي للسجن مثل الفطيسه

همست لا مثل مايريد بابا انسوي

ضحك فرحان اشر يله گومي عصرت ايد رؤيا وكمت كومتها  طلع جريتها ومشيت ورا كل وحدة عقلها بمكان اليجمعنا بس كلمة الدم

لكينا السيارة منتظرة صعدتها وصعدت رحنا للمركز لكينه بابا منتظر هم عاد الحجي وحذرها اني مكانها لابو طبر اذا اشتكت مااعرف  بهاي كلمته شعل  البركان  الجواها وزود والدمار شال شكو رحمة من كلبها وزرع الغل

اشرت اي اخذها ودخل حتى ماعرفت شنو شهدت ولا اهتميت بعد رغبتي راحت من الدنيا بكبرها عرفت نهاية رؤيا شنو وهاي اخر امل جانت ضاله لخاطره 

حتى بجي مابجيت بعد لان حسيت راح ننجمع قريب ؛ وكفت لحد ماطلعوا  رجعنا للبيت دخلت للغرفة غمضت ماكدرت اباوع عكس رؤيا الي راحتت تتلمس گعدت يم افراش رند سحبت مخدتها اخذت نفس منها وصاحت بصوت عالي ااااخ ينار كلبيييي

شي بداخلي گلي وصل الدور الها راح تلسعين بمنظر تابوتها قبل لاتغمض عينج

بدون وعي ركضت جريتها خليت راسها بحضني وغمضت بجيت بصوت طلعت كل وجع لرند مكبوت جواية

تمر الساعات واني عيوني على خبزتها الي ضاله بمكانها بس صوت بحيبنا  ينسمع صار اليل  واحنا شفافنه يبست من العتاب والبجي ؛ اندفعت الباب دخل بابا  كال كومي يله حضري اختج

مسحت عيوني ماشوف كلش همست  بصوت كوه يطلع المن احضرها

- بت الكلب ماكالتلج ماغيرت اقوالها حسبالها تفيدها عرامتها  ماتدري نعلت ابوها بيدها هم راح ازوجها وهم اتغير اقوالها غصباً عنها

-اشلون باوعت لوجها من دفنتها بيدك وانت قابض ثمنها من الكاتلها

-انعل ابوج لابوها  من كتلها غير اختج العاهره رايه روحي علگت بالسما كوميها سبحيها خلى اخلص من شرها قبل لانحرها واغسل عاري بيدي

-تحجي عليها وتارك الي ضيع خواتي

-منو ضيعهنننن غيرها منو دخل الشبااااب وطين راسي وفضحني كدام الجوارييين بنااات الكلب سودتن وجهييي خليتني امشي واني مدنگ من فضايحجن ثنين جنجن فارات مااكدر الزمجن ااااخ بويه

-انت صدگ ابونا؟؟؟

-انعل الساعة الخذت بيها اليهودية وصرتن بيها شوفي ولج الج نص ساعة اروح اجي اريدها جاهزه لاوراس ابوي انتي تنشمرين بالسرداب وهيه انطيها بدون عقد

-من دفنتها وشفتها متملخه بيدك ماوجعك كلبك مامر على بالك وهيه تتلكاك بحضنه وتكلك هلابابا  زين من وقعت تناز عن دمها ماذكرتلها ضحكة سالفة  

مارد ضغط على سنونه واجه عرفته راح ياخذها

ويشمرني بالسرداب كلتله لاااا هاي هيه مثل ماتريد  هسه اسبحها واحضرها بس ربع ساعه انطيني

دفرني تفل علينه وطلع كمشت ايدي رؤيا همست اريد سجينه

-ماراح تگدرين جماعته تارسه البيت 

-كلشي اتحملت وصبرت بس  رنود لا ماراح اتحمل فقدانها  النارر الي بگلبي اذا ماطفيته هسه اموووت واني مااموت اذا مااشفي غليلي بي

-ماراح تلحگين طفين نارج بس تحركينا تردين تشفين غليلج وتاخذين حقها خلي نشرد هيج الدعوه راح تتوقف واهل الولد راح يتخبلون ويجون لابوج يشيلوا فلقه لاافلوس  الفصل ولاتغير اقوال

-مااطلع اذا مامثل بجثته هو وعايش

-راح يسحلج ويشمرج جوه رجلين ابو طبر وراح يجبرج تغيرين اقوالج بالف طريقة رؤيا والله  مااگدر ادير وجهي واباوع لفراشها كلبي ينزف لاتزوديها عليه ولان وحق كتاب الله انتحر ماضل حيل للصبر

-كومي روحي منا مالج شغل بيه لاتباوعين وراج 

-مااترگج وحدج تواعدنا نموت سوه ولو اعرف نگدرله هسه جان ساعدتج تره الوجع العشناه واحد بس لازم نطلع حتى ينذل وتنهد قوته وعد وعد وروح اخيتي اردج بيدي هنا

ماردت  غمضت عصرت جف ايديها  ضليت امسح على شعرها ماكو بكلبي بس الدعاء كون تقبل ودموعي تنزل بحرگه وجع على لعبه رند المحطوطة على فراش ماما

اقل الربع ساعة ونفتحت الباب  دخل بابا كال عرفتج بت مداس هاي ليش بعدها لسه نايمه

مسحت وجهي اخذت نفس گلتله  ماعندي ملابس الها حتى اسبحها

-اي صخام لبسيها فضينه راح يجي الشييخ

-خليها لباجر خطيه عروس اقلها اطلع اشتريلها شي

-اي زمال گدامج كومي سبحيها وحضريها هسه ادز واحد يجيب جفن تلبسيها يلاااا لو قسماً بالله هسه اشمرها جوه رجلي بدون عقد

دااحجي ورؤيا حركت ايدي عرفت وافقت

باوعتله وابتسمت  اتخيلت اشلون راحوا يدوسون راسه من يعرفون صارف الفلوس واحنا اختفينه

صفن بوجهي وخرت راس رؤيا وكمت بهدوء رحت  للمطبخ شغلت  الجوله ترست مي خليته  طلعت اتجتفت باوعلي متفاجئ  اشلون ماتوسلت بي مثل كل مره ؛تفل عليه وطلع

مسحت وجهي صار كدامي دم رند فرگت ركبتي غمضت مااگدر اباوعله ولااگدر اكتل روحي حتى ارتاح من هالعذاب

رحت  يم رؤيا كومتها  اخذتها للمطبخ  سديت الباب نزعتها ملابسها جسمها كله ازرك وشخوط كعدتها  المي بعده حتى موحامي كمت اشيل واذب عليها بدون شعور وهيه ساكته صدگ حسيت دخلنا بازمه نفسيه

اندكت الباب كال ذني ملابس ملات العوبه الولت عود لبسيها

مارديت كملت غسلها فتحت البوري  البارد  جريت الصونده خليتها على راسي ردت تهدأ النار الي بداخلي ولو اثر منها 

لمن جرتني رؤيا همست بتعب كافي ؛اخذت الصونده من ايدي شمرتها وكومتني فتحت الباب طلعت لگيت علاكة مال نفايات سوده جريتها وسلقيت الباب

اجت  رؤيا يمي فتحتها العلاگه  اشكال ملابس كلها جديده عرفتهن مالات مرته الي مااعرف وين اختفت

طلعت بنطلون وبلوزه لبستها بدون تنشف؛  گصيبتها تخر ماي  غيرت ملابسي  اصواتهم بره يسولفون ويضحكون ولاتكول بنته الصغيره  مكتولة

اندفرت الباب دخل كال خلصتي

-بس امشطلها

-خوش راح يجيب عشه حضريها بس نتعشى ونملج

-هاي هيه 

-وانتي هم حضري روحج يجوز سعدون  هسه ياخذج

ضحكت  بأستهزاء

-اطلعن منا مااريد اشوف اوجوهجن بعد تنسن عدجن ابو

-مثل ماتريد 

-كلتلهم صلخوهن اذا مشن اعوج تعرفن اذا اجوا وشكوا منج شسوي بيجن موتن احسن ولاتردن

-ماراح نرجع

-اي هيج خليجن عاقلات يله خلصي بسرعة لا تأخرنا

هزيت راسي   طلع رگع الباب عضيت ايدي حيل ندم عالضعف الخلاني اخسر اهلي

رؤيا - رايه  طلعيني قبل لا افقد ماضل صبر عندج

مارديت لان صدگ شفت عيونها صارن دم وشفافها بيض من الحرگه

رحت فتحت الباب طلعت وكفت يم الدرج اتسنط وبالي يم غيمة الي ماادري وينها اكثر من نص ساعة بالبرد واكفه ماتحركت اله واني  اسمعهم دخلوا للاستقبال ركضت للغرفة كلتلها يله

اجت تتلمس كمشت ايدها شكو خوف ربي سحبه بذاك الوقت من كلبي ردت بس اطلعها من البيت بأي وسيلة مافكرت حتى بالعواقب

نزلنا عالكيف  واصوات سوالفهم جاية من جوه يحجون بالولد الكتل اشلون يكدرون ياخذون افلوس منهم مقابيل يضل غزوان بالسجن

وكفت وغمضت اكتم الغضب همست رؤيا اذا حسوا علينه راح ينتهي امرنا

ضغطت على  ايديها  وجريتها طلعنا نمشي على طراف أصابعنا

اجه صوت واحد  منهم يريد يطلع عصرت نفسي كتمت حتى النفس ؛شديت على ايد رؤيا جرتها وركضت بسرعة فتحت الباب دفعتها وكلتلها ركضي

-منين نررركض

-منااا بسرررعة تعالي

- داسمع صوت واحد طلع راااايه وين نروووح

-مااعرف مااعرف بس ركضي  بسرررعة

سحبتها  حيل وركضنا حفاي الگاع كلها عثرات ووساخة والشارع اظلم ماكو بشر  عبرنا بيتين واشوف واحد داخل للمنطقة بيده بطل يغني بصوت عالي وكفت  شافنا اشر تعالن

درت وجهي اباوع  وراي الباب مفتوح وصوت واحد يسولف جاي من الطارمة رجعت باوعت كدامي الرجال جاي اتجاهنا يحجي بكلمات بذيئة

بعد مااعرف شسوي ماشفت غير بيت اليهودي گدامي تركت ايدها واتشلبيت على الباب  طفرته فتحت الباب ماكدرت كابس دفرته برجلي انفتح طلعت ركض سحبت رؤيا دخلتها وسديته بسرعة كعدت كلبي احسه يريد يوكف كعدت رؤيا واندفرت الباب وصوته يكول فتحي البااااب

اخذت راسها بحضني وغمضت رد دكه صاح فتح   خل ي افو ت لاكسره

لج فتح ي لع---  انطي ج  هذا الج

تعالوا فتحو اا

كالها ودفره حيل عصرت راسه رؤيا ورفعت راسي للسما نزلت دموعي بترجي غمضت استوني اهمس بالدعاء اسمعه راح يغني ضحكت وبجيت بنفس الوقت همست خلصنا

رؤيا-  لا بعدنا دقايق راح يطلعون يدورون

-ماراح نتحرك  لمن يفقدون الامل بوجودنا هنا

-وين احنا

-بيت اليهودي

-المسكون

-بسم الله الرحمن الرحيم الجن اهون من الحيوانات العايشين بينهم

-رايه وين نروح

-مااعرف ولاتسألين

لزمت ايدي وسكتت  

اباوع طارمة واسعة مهجورة نهايتها باب طلاگتين   يمها شباج طويل جام مكسر ومن الجهه الثانية حديقة شكلها يخوف

رفعت راسي طابق ثاني اظلم  كله شبابيج مكسرة داهمس بسم الله وخطف شي من وره الشباج عصرت ايد رؤيا

-شكو رايه

-ماكو شي صوتج

-رايه دااسمع حركت رجلين يمنا

-اششش مداشوف احد

بعدني احجي واسمع صوت ركضة بالحديقة جريت رؤيا وكمت بسرعة دافتح الباب وماحس غير بحركة سريعة رؤيا تنسحب من ايدي

انداريت واشوف واحد ملثم  بأسود ساد حلكها وخال سجينه على ركبتها  همس نفس واحد انحرها  …

***رئال***

فتحت عيوني واشوف واحد  بطرگ البنطلون ؛بحلگه جگارة اخذ نفس نفخه بوجهي وابتسم

كمت دارجع  ليورا كمشني بسرعة رجعني لمكاني  نكث جكارته على وجهي غمضت اجاني صوته بنجني مكاني وهو يگول لاتتحركين

فتحت عيوني على كبرهن متفاجئه ؛طريقة ضخامته المرعبة  وخشونه صوته هيه نفسها يعني الضابط الى ان نهزمت منه نفسه هيذام

رفع تك حاجب  اشر شنو

خنست 

-المركز خالي والاجواء باردة تجبرك گوة عالغلط صح  زعطوطة ومابيج حتى لذه بس كسر الخشوم واجب مو ؟؟

-ليش موعتغفت بعد شنو تغيد

-رأل  موبس اخذ الاريده منج لا افعصج بيدي وخفيج من الوجود

-ماسويت شي

-ولاراح اتلحكين تسوين كفيلج محمد قبل لاتفكرين تصيرين بأسمه تكونين بحضني اوديج اله  حامل بزوج

-ما اوافق وداعت ماما

-واني اريدج توافقين

-ليش؟

-حتى ادفنكم فد گبر  لخاطر تعرفون ويامن لعبتوا

-غاح اكول  مثل ماعلمتني  ماابدل اقوالي

-اكيد سمعتيني من حلفت اخلي رتبتي عالمكتب بس الماسمعتي هو روحج  قبل رتبتي راح تكون

اشرت اي

كز على سنونه عصر وجهي حسيته نشلع لزمت ايديه ضغط اكثر وگال وعلي يرئال ماارحمج بدل ماتنامين بحضنه انيمج بالتابوت مثل  ماتحديتهم ولزمت شاربي بيج ادوس بي ازينه واردج جوه الگاع

-هسه اغوح اكله ماموافقه بس عوفني

-لاحسبالج تفرين السالفة عليه وصدگتي من گلج تصيرين بحمايتي محد يوصلج وداعت ابني  اطلعج من حضنه واعلگج گدامه واخلي يصلخج بيده  

نزلت دموعي همست  والله وجهي غاح يطگ

رخه قبضته وسحب ايده عالكيف  لمن وصل لشفتي عصرها وگام فركت وجهي حسيته حماوة تطلع منه هلگد ماجان ضاغط عليه

اباوعله طوله وعرضه يخوفن تكول ماتابع للبشر من غير الجروح الي بصدرة ومتنه يحسسنك گاعد گدام  وحش مفترس

اخذ نفس من جكارته فززني وهو ينفخه بوجهي غمضت

دنگ خله اديه عالقنفة حاجزني بينهن گد ماقريب احس  گلبي يريد يطلع  ردت ابعده وخفت لميت جفوف ايده وتصنمت منتظرته يوخر اخذله ثواني وحجه بصوت شبه الهمس - فتحي عيونج

-وداعت ماما ماغاح اوافق ولااعتغف

-ماطول هيج ليش خايفة

-اعغفك غاح تضغبني

-مأذيلي اثر مرلي بطيف ولا اسمح لمخلوق  يلمس خياله

فتحت عيونه مامفتهمة شنو يحجي  جانت عيونه بعيوني احس نظراته تخترقني ؛ شال ايده قربها من وجهي رديت بسرعة  غمضت  سحب شعري بهدوء خلاه وره اذني وعدل وكفته

رجعت ليورا لميت رجليه عيوني عليه ؛خله الجگارة بحلكه اخذ نفس طويل وشمرها بالكاع دنگ سحگها وشال راسه باوعلي

-راح اعيد التحقيق وتغيرين اقوالج بالراح اگوله الج بالحرف الواحد

-مافهمت

-ولااريدج تفتهمين تسوين مثل ماامرج بي

-حاضغ سيدي

-لاتگولين سيدي  راح يطلبج اللواء  ترفضين طلبه اي طريق يدخلج بي قبل لاتردين تذكري مصيرج راح تحددي بهالجواب

-غاح اگله ماموافقه

-عفيه ؛محمود

-شبي

-ماتذكرين اسمه گدام احد نهائياً ماريد جنس مخلوق يعرف جنتي خطيبته لواكو صله قرابة بينكم

-ليش

-من غييير ليششش

-بس الضابط يعغف اني جنت خطيبته

-هذا شغلته يمي وحسمتها من زمان بس اذا عرف واحد غيره اطگج اجتاف اعلگج بالسگف وابتر المتبقي من شعرج

هزيت راسي

-عفية بالبطلة اصدقاء محمود 

-شبيهم

-شتعرفين عنهم غير اسمائهم

-ماعغف كلشي حتى اسمائهم

-ماجان يحجي وياج عنهم

-لا مجان يحجي بيهم ولا بشغله ابد

-چا بشنو تحجون كالها ورفع حاجبه

دنكت

حك خشمه اخذ نفس خله اديه بجيوب بنطلونه  باوعلي ساكت اخذله دقايق  وكال بصوت ناصي الاجازة وين جان يخلصها

-بالبيت  مغات نطلع للمدينة لو ياخذنه للكوغنيش

-بس انتي ويا لواكو احد وياكم

-لاكلنا نطلع  عائلة كاملة بسياغه وحده

-عائله كامله بسيارة اسبور ؟

-ها لا مو يجيب سياغة صديقه

-ومن ياخذج من المدرسة اكيد هم يجيب العائلة الكريمه ويا مو؟؟

-شدغاك (شدراك)جان يجي ياخذني من المدغسه ؟

- شتكولين انتي ؟؟

-مجان يجي عليه احنه ماسوينه شي من وغه علم  اهلنا

-شايفتني ابيع طماطة

سكتت

-لاي مكان جان ياخذج لوتخلصوها بالسيارة ؟

باوعتله احس كلبي يفور اتمنى اكوم اسحب السلاح افرغه براسه

اشر شنو

-ماتصوغ  هذا الشي اله شغلة بالقضية وحتى لوجنت امشي  ويا خطيبي وجان يحبني ومحافظ عليه اكثر من غوحه

-غوحه ؟؟؟ كالها و اتجتف يباوعلي حسيته يريد يستفزني

درت وجهي عنه

-تحبي ؟؟

-اي ولاغاح احب بعده واخذت عهد على نفسي مااتزوج  لحد ما التقي بي بالاخغه

-واعترفتي على روحج بس حتى محد يلمسج وتلحگي

هزيت راسي

-عجبتني ادرامتج من زمان ماحاضر فلم هوليود بس المجني عليه شنو فلمه جان تصبيره لووو

-وسخ ومشتهي يموت وكل واحد باله نفس الشي  غاح يكوون نفسس  مصييغه

بعدني احجي وماحس غير دنگ عصرني من خدودي رفع راسي اله وگال شكلج تماديتي زايد

-ماتماديت دادافع عن نفسي اني متهمة مو بايعة شغفي

-اتثبتين على كلامج

-واني ماتجاوزت

-متأكده ؟؟

هزيت ااي ودمعت

- ليش بچيتي

-بعد ماعيدها واصغخ بوجهك

-واني ماسويتلج شي

-اسفة والله

-جعفرررر

كمشت ايده باوعتله بترجي

-لك زمااااال

-لالا فدوه سيدي والله بعد ماعيدها والله

انفتحت الباب بسرعة جر ايده من بين اديه وكف عدل انداريت اباوع بخوف حتى النفس گاطعته متوقعة اشوف واحد من ذوله اليرفعون فلقة

صارت كدامي شرطية ضعيفة وسمرة كلش لاارادي بتسمت رجعت باوعتله  رفع حاجبه   وخله الجكارة بحلكه  عضيت شفتي دنكت كالتله نعم سيدي

-شصار بسالفة الغراض

الشرطية -جبت كم شغلة لان ماحصلت هنا غيرهن  واليوم من انزل بليل اجيب الباقي

-مواشكال اخذيها غطيها بمي بارد لاطلعيها لحد

ما ترد حرارتها طبيعية

-تمام سيدي

-منو من الربع هنا

-ماكو بس الضابط محمد يم اللواء ابراهيم والضابط ضرغام بغرفة التحقيق يم المتهم

-حلو  يله اخذيها

-سيدي  الحمام مشغول هسه

-بت البسطاااال  وين رايده دخليهاااا

-هاا اه اسفه سيدي حسبالي تقصد العام هسه اخذها للخاص

-اذا عرف بيها حيوان لو لمحها جنس مخلوق اقلع عيونج

-حاضر حاضر

اشرلها يله وراح لجهة الشباج  يورث جكارته اجت  كومتني گوه گمت احس عظامي متكسرة من الصخونة وشي حار يطلع من وجهي كمشت ايدها  طلعت اسحل بروحي  وياها

المكان هادء ماكو احد خلصنا الممر دخلنا بالثاني صارن كدامنا ثنين بيبان عبرنا الاول فتحت الثاني دفعتني بي كالت انتظري هناا

اشرت اي  راحت ضليت واكفه متجتفه ارجف الحمام يصل برد

اباوع مغسلة صغيرة عليها مرايا ويمها مكينة حلاقه رجالية و شامبو

الجهة الثانية دوش يدوي وعلى جهة صحيات

كمزت على صوتها وهيه تكول لزمي ذنييي

رحت اخذت منها جيس مكبوس

-سمعي لج دقيقتين مو اكثر وافتح الباب اسحلج

هزيت راسي اي

-لاتفتحين المي الحار اذا لكيت بخار اصلخج بي

-لعد اشلون اسبح مي بارد

-مثل ماذبحتي  الشاب وغسلوا يله لج انوب معترضة

-تمام بس سدي الباب

-بس لاتبيعين الشرف براسي بت البتاوين استعجلي قبل لايجي واحد والضابط يحرگ اهلنا بسبب قذارتج

-لعد مااغسل

-بعددد تعالي دفريني بت الشوارع شو تعالي اعلمج اشلون تردين عليه

كالتها ودخلت  طايره مالحكت حتى اضم وجهي وجاني الراچدي صلخ خدي

شلت اديه احمي روحي جرتني من شعري سحلتني سحل ليم للدوش دفعتني وكعت بالكاع دنگت فتحت المي وخلته على راسي

من كثر البرودة الشهگة طلعت من گلبي لميت روحي وضميت وجهي بحضني وهيه مستمره تفرك براسي و المي بقوته على جسمي احس النبض وكف من كثر البرد

اقل الخمس دقايق وحسيت النفس انگطع دفعتها  ووكفت اشرتها كافي واني اشهگ بصعوبة شافتني هيج سدت المي وجرتني دفعتني يم الباب وكفت كامشتني الرجفة

جرت الجيس شمرته عليه  وطلعت سدت الباب دنكت شلته فتحته بسرعه طلع تراك صح ردانه طويله بس قماشته بهاري

انتجيت عالباب ونزعت عالسريع بدلت بدون تنشيف بس اريد اكمل اخاف تدخل؛ بعدني استوني اصعد بالبجامة وحركت يدت  الباب انتجيت حيل وصعدتها ماحسيت غير انفتحت الباب ونشمرت مسافة دخلت  غضبانة بدون لاتحجي  تفلت وجرتني دفعتني كدامها طلعت

وكفت ردت اگلها وين ماخذتني مانطتني مجال حتى احجي  كمشتني من حلگ التيشيرت سحلتني مثل الحيوانة لمن وصلت لغرفة الضابط فتحتها دفعتني بيها وسدت الباب

احس روحي انعصرت غمضت عيوني لان ادري بمنظري يخزي شعري يصب مي و ملابسي مبللة لاطشه من غير فتحت التيشيرت اشكبرها ؛ غمضت حيل متانيه اسمعه وهو يهيني كالعادة

مرت دقايق هدوء ماكو صوت وخرت اديه اباوع الغرفه خالية انداريت وراي الباب مسدودة

سحبت ملابسي ابعدها عن جسمي فلتت الخيط من شعري  دنكت بسرعة لويته  وعصرته  عن المي شلت ليفوگ لفيته كباية ربطته حيل  اتناثر نصه من الاصفاح ميلوحن 

رغم دفوا الغرفة بس الرجفة لازمتني مااعرف خوف لو بسبب المرض  اتجتفت عيني بالباب اشوكت يدخل اكثر من ربع ساعة وهو ماكو

مر وقت تعبت من الوكفه اي صوت بالممر مااسمع لمن كمزني صوت رنه  عالميز درت وجهي اشوف تلفون مااعرف اشلونه شبيهه بالارضي بس بدون واير يرن توقعت احد يدخل يرد هم ماكو لمن توقف

اخذت نفس نزلت اديه اباوع للغرفة مرتبه وضخمه ميز ورا كرسي

كدام الميز طبله صغيره ومن الجهتين كراسي وداير مدايره الغرفة تخم جلد

عرفتها هاي غرفته الخاصه ؛ رجعت باوعت للميز  اكو صورة ويمها لعبة مال طفل شدني الفضول اشوف شنو

انداريت للباب على سدته عضيت شفتي تقدمت امشي عالكيف وتلفت اخاف يدخل واحد لمن وصلت للميز رجعت انداريت هدوء

باوعت للصوره بعيدة من الجهة الثانية خفت اجازف اكثر وروح يم كعدته  دنكت ومديت ايدي كوه لحتها سحبتها  درتها واشوفه هو كاعد نص كعده  وبحضنه طفل تقريبا اربع سنوات ميشبهله عيونه ملونه  حاضنه ويضحك 

تذكرت رند لزمتني العبره اشكد مشتاقه اخذها لحضني واسمع سوالفها هيه وتضرب بخدودي وتضحك

رجعت الصوره مسحت دموعي كلبي لهفان احسه ضاگ عليه بعد مااكدر اتحمل انداريت اتأكد من الباب على وضعه  ماكو صوت  بدون تفكير شلت السماعة  خليته على اذني

دگيت رقم جهاز غزوان ودموعي تنزل بشوگ متأملة اسمع صوت رؤيا ترد مثل كل مره رن اكثر من مره ماكو  انتبهت لنفسي شنو الدااسوي شهكت ونزلت السماعة دااخلها واجه صوت غيمة تكول منوو

رديت بسرعة  اني غئال 

-الله ياخذج يالعاهرة منين تتصلين موبالسجن عمت عينج بس لاطلعوج ونهزمتي تكملين اصخام وجهنا

-ياصخام التحجين عنه واني وجهي محد شايفه  معقولة انتي بشغ  مثلنا وتعغفين اكو حساب وغاج

-ليش عيني شمسوية حتى اتحاسب  فوگ مارضيت عيشت الذل بينكم اخر شي حلتن اخوي خليتنه يكتلني لخاطر يضم فضايحجن

-ااخ اتمنيت صدگ  كاتلتج بيدي مكان غزوان بس هم الله ماغاح يعوفج  مثل مادخلتي الولد على غؤيا وضيعتينا غاح يغدها ضعفاف بيج 

- ولك عمي  تعااال شوف بتك مااعرف من يامله تخابرر وتهدد

-عوفي بابا بغوح خالي سوي زين واحد بحياتج  انطني ماما لو غايه بس اسمع صوتها

-ياا ام…

بعدها تحجي واشوف انداست  دكمة بالتلفون شلت راسي لكيته هيذام  وكعت السماعة من مني  رجعت ليورا  - بس افهمك

رفع حاجبه وعدل بلوزته من جوه دنگ شال السماعة رجعها مكانها رد باوعلي اشر شنو

همست والله غدت بس امن على ماما

-اي وأمنتي

- بعد ماعيدها

شال ايده بسرعة ضميت وجهي كمشهن نزلهن ردت اسحبهن من بين اديه ضغط عليهن نزلت دموعي

-خدج ليش احمر ؟؟

-هاا

-منو ضاربج

-الشغطيه  بس والله والله ماتجاوزت حتى اسألها  بس كلتلها طلعي دابدل ملابسي

-مم وبعد الكتله شصار ؟

هزيت راسي كلشي ماكو

-متأكدة

-والله

-ليش ضحكتي من دخلت

-هاا مو شسمه

-شنو هو الاسمه  عالاساس انتي احلى منها

-لالا والله لان انت صحت جعفغ و

-وانتي رأل شنو الفرق 

دنكت  لم ادية بأيد وحده ومد الثانية غمضت حيل وخر شعري عن وجهي  ورفع راسي باوعتله  بخوف

-ليش ترجفين

-غاح تضغبني ؟؟

-شسويتي حتى اضربج

-حتى قبل كلشي ماسويت وانت ضغبتني

-وشخطة السيارة

- اعتذغت منك هواي

-لااا انهزمتي

-لان عغفت غاح تعاقبني

-او يمكن اسألج شنو الجابرج توكفين بهيج  منطقة مقطوعة بوكت متأخر 

-وثاني يوم خليتني اغجع وتوگع الجغيمة بغاسي

- يعني هسه اني سبب كل الصارلج

دنكت مارديت

هو هم سكت صار هدوء مرت ثواني عصر جفوف اديه وكال - اذا طلعتي منا اول مكان ترحيله منو

- صدگ اطلع

-مو تگولين بريئة

دمعت عيوني لازمتني العبرة

-ابوج وغيمة وابوطبر وسعدون بعد منو تردي يطير بدل الكتل الحصلتي

-متنازله عن  كلشي بس خليني طلع منا 

-اشعدج طالعة المن تردين

-شنو المن اغجع لاهلي

-واذا اهلج ميردوج

-ليش ميغدوني ماسويت شي

-افترضنا ابوج ماقبل يدخلج للبيت وامج لخاطر خواتج تسكت

-مااعغف زين مو كلت غاح اطيغه مكان الكتل الحصلتي

-كم واير انضربتي

-هواي كلش

-ثلاثة

-واثنين غاجديات

ضحك عصر خدودي وندار صاح جعفررر

-غاح طلعوني منا

اشر لا  ورد صاح جعفرر

سمعت فتحت الباب نزلت دموعي بتوسل بس اريده يگلي كلمة اعيش متأملة عليها 

اشرلها اخذيها اجت كمشتني جرتني  انداريت عليها منطيني ظهره يعدل بالصورة انطاني امل وسحبة بلحظة

شهكت بقهر داسحب النفس شرگت مثل الشي دخل خنگني گحيت ردت اشهگ النفس ماكدرت رجعت گحيت زادت الخنگه ؛ وكفت رفعت راسي ليفوگ اريد الهوا مااكدر اسحبه رفعت ايدي  افرك بصدري والشرطية تكول شبيييج ولج

مااكدر احجي بس أشر خلصيني احسه انگطع بالزايد  كعدت بالگاع  اندار على صوتنا  شافني  اجه بسرعة  يمي دنگ-  شبيج بابا

نزلت دموعي كاطعة النفس

كمش وجهي رفعه ليفوگ

- اخذي النفس لاتكطعييي

غمضت ضرب على ظهري رخت روحي كام بسرعة  كومني دار ضهري لصدره ورفعني من  بطني وعتني حيل غابت روحي

رد نكثني وصاح  سحبيي النفسسس

بديت افقد ماحسيت غير ضربة بداية بطني خلاني اشهگ الهوا بقوة

نزلني للگاع كعدت تعبانة ايدي على صدري  اتنفس سريع

وكف يباوعلي متخصر اخذله شوية  ومسح وجهه  اخذ نفس وهز ايده  وصاح بصوت يرعب رجعيهااا لمكانها ورديلي بسررررعة

دنكت الشرطية كومتني عالسريع  طلعتني رجعتني  للزنزانة وراحت مستعجلة

مشيت گوه للحايط سندت روحي وگعدت مابية حتى افتح عيوني دقايق ورجعت بس وجها متغير مثل المرتبكة لو خايفة شمرتلي بطانية فرو وقفلة الباب عالثواني وراحت تركض

شفت البطانية كدامي ماصدكت سحبتها لفيت نفسي بيها  احس الرجفة بعضامي والخنگة بصدري تمددت  غطيت حتى راسي بس اريد ادفه

الساعات تمشي والخنگه مستمره مااعرف شنو صارلي كل شوية لازمتني الگحه والشرطي الجبير يم الباب يصيح هاا بويه صارلج شي

اكتم نفسي واندعي  حتى ماتنعاد الحالة كوة ارجع اجر النفس واسمعه يلعن بيهم

مر كم يوم واني على وضعي محد دز عليه بس معاملتهم اتغيرت وياي الف درجة ؛ الاكل اكثره سفري مبين من مطعم والمي بدل الكلاص صار بطالة تگول يحضروني اللااعدام

النهار يخلص ويجي الليل ماشوف بس الحيطان  كلما يمر وقت اكثر احس برعب اكثر  صار بيه مثل التوحد لااعرف ماما  ليش لحد الان ماسألت عليه  ولاادري مصيري شنو

كمت اشرد داخل احلامي غمض واتخيل روحي بعدني گاعدة بينهم كتابي بيدي و اضحك على ضحكتهم

ابوس بخدود رند واتجاكر ويه غزوان

بعدني اتعاجز امشط شعري اخذ المشط واركض ادفع رؤيا وگعد مكانها حتى تمشطلي اول

نزلت دموعي شهكت بصوت احس صدري بعد مايتحمل اكتم اكثر اجه الحارس على صوتي فتح الباب كال بيج شي بنيتي

-داحس نفسي مخنوگه اشوكت تاخذوني وتخلصوني  منا والله دموت قابلة  حتى لو تعدموني بس خلي اخلص من هالعذاب

-ماتنعدمين  الضابط هيذام  ديشتغل بيها  طلب بأرجاع  اوراق التحقيق لمكتبه  حتى يعيده

وان شاء الله بصالحج هالمره

-وغزوان؟؟

-مااعرف والله بس اكيد هيه قضية وحده انتي اندعي كون تفض ويه اللواء  لان عالگه بينهم للستار

-ميقبل اللواء مو؟؟

-ساحب  القضيه ومسلمها للضابط ضرغام  وصايره حرب بينهم الضابط هيذام داخل لمكتبة شاگ الملف بالنص وذاك يريد يعيد التحقيق وهيذام يكول ماتاخذها غير على جثتي والله يصلح الحال بينهم

-اللواء  ديدزلي هذا الاكل

-لاا مو هو المهم بويه  اني هنا اي شي تعتازي من اكل مي حمام كولي لاتخجلين تره والله حالج حال بنياتي

-بس طلب واحد  بداعت خواتك  لاتكول لا والله كلبي خلص بعد ماتحمل بس كلمة وحده اسمعها اهلج زنين بعدها ميهمني عدمن تصفى القضية حتى لو يعدموني

-وداعت بنتي  مااكدر ممنوع اذا انلكفت راح اتحول للتحقيق وهم مااكدر اتركج هنا وحدج اخاف بأي وقت يجي عليج واحد ياخذج لغير مكان وكتها صعب انرجعج اصبري  ماطولين ان شاءالله وتردين بيناتهن

-لشوكت بعد كم شهغ  وشنو نهايتي اذا كلمن يغيد يصعد مكانته  على حسابنا

-كولي يالله تفرج ان شاءالله

لميت رجليه خليت راسي عليهن نزلت دموعي اسمعه استغفر وطلع قفل الباب مر الليل حتى الاكل الجابوا مااكلته حسره بكلبي خانگتني احس اكو شي صاير بيهن

لثاني يوم واني خاله راسي على ايدي اباوع للباب ودموعي تنزل بوجع شي صدري مقبوض  مااعرف ليش لليل وانفتحت الباب لبالي جابوا الاكل شفت الشرطي دخل بش شكله تعبان كال كومي طالبج الضابط

-غاح يعيد تحقيق

-هاا لا يريد يحجي وياج

-شنو  هم يعيد الحجي ويهددني  والله ماابدل  اقوالي بس خلي يكمل القضية قابلة  بكلشي خلي انسجن مؤبد بس المهم اشوف اهلي

دنگ عيونه تلمع لگشني كلبي من وضعه كمت رحت يمه همست شصاير

رفع راسه باوعلي نزلت دموعه

-غزوان مات بالتعذيب لوماما ماتحملت غيابنا

-لابابا  محد مات منهم امشي وياي

-اعغف  واحد مات داحس گلبي يوجعني بس كول منو منهم عليك الانبياء  ماما موووو كلتها وشهكت

-استغفر الله ربي لابابا صح فاقده صار فتره  بس عايشة وداعت جهالي وحتى غزوان مابي شي

-غؤيا لو غايه  اي دوم بابا جان يكتل بيها وهيه مغيضة ؛ يمه اخيتي غاحت والموت الي ليشش ماتت هيه وعدتني ماتعوفني اشلون سوتها  وتعغفني غوحي بيها

هبطت روحي كعدت بالكاع مسح. دموعه دنگ كال والله مابهن شي

-زوجها بابا الحيوان وهيه وماقبلت كتلها موو

-مو رايه اختج الصغيره انطتج عمرها

-غند؟ لا اكيد دتتشاقه هيه اشوكت انولدت حتى تموت

باوعتله بجه كمشت ايده كلتله كول جذب زين اشلون ماتت خواتي وين عنها  ؟ لو هنه هم ماتن وياها كول گول بعد ماتفغق( تفرق ) وياي هيه وجعه وحده

-لاوالله صح  ماهنه مختفيات بس عايشات

-شنو مختفيات ؟ شنو ماتت ؟شنو فاقده ؟؟

-كومي وياي هناك تعرفين كلشي

صفنت عليه احس روحي بحلم اباوعله شفايفي يابسه جسمي خدر وثلج بلحظة برد احتل كل اجزاء جسمي كمشني كومني رجليه اثگال  مشاني اتحرك بيده بدون شعور

عقلي متبنج مامستوعبة شنو كال يمشي واني اباوعله اريد يكول جذب هذا نوع من انواع التعذيب بس عيونه تحجي غير هالحجي يبجي بقهر وصلنا للغرفة اول مشافنا الشرطي  فتحها

صار كدامي الضابط هيذام  واكف يدخن يم الشباج طفه الجگارة وندارلي

دخلنا اجه يمي دنگ للگاع حك گصته اخذ نفس ورفع راسه يباوعلي

مثل الصحاني ضغطت على سنوني وضربته بكل قوتي اجت بصدره صرخت   اغتاحييت ماتنننن ماتوووا  كلهم

رد دنگ  جريته من ملابسه بثنين اديه راد يكمشني الشرطي اشرله اتركها

عتيته حيل وصرخت ليششش يعوفنيي هاااا لان تعغف  نفسك بااااطل  الله ياخذك  مواعتغفتتتت اشوكت تعدمني يله اعدمنييييي ولك ماتن خواتييي ماتن  كلهنننننن

كمش اديه دفعته ورجعت ضربته بصدره

- يله داجاوززز عليك اعدمنييي  ليشششش ساكتتت موانت السويت كل هذا حتى تصعد  غتبتك الله ياخذذك اكتلنيييي

اشر اي بس هدي

صرخت بصوت  انت هم  بشرررر واحس روحي رخت كعدت بالكاع كلبي يدگ بتعب  دنگ كعد گدامي نص كعده باوعتله همست بكسره غاح اندمك والله

-ميخالف

-هديت عائلة كلها حتى تعلي مكانتك  شنو انت

-يرجعون

-وكلام الله غاح اخليك تفقد غتبتك( رتبتك )بعد ماصعدتها بدمنا

اشر اي وكام جاب كلاص مي فتحه دنگ مد ايده

باوعتله شفايفي يبسن والدنيا افترت راد يحجي ودخل واحد ضرب تحيه كله سيدي  القوا القبض على المغتصب 

-عفيه شمروا بالغرفة واني جاي وانت ابني اخذها رجعها لمكانها انطيها مهدأ وخليك وياها لاتتركها ولالحظه لحد ماارجع

كام جر سلاحة وطلع بسرعة كومني الشرطي كال الله يصبرج بوية والله حسيتها وحده من بناتي انزرف كلبي من ساعة السمعت الخبر

كمشت ايده مااكدر اسند روحي حجيت بتعب اشلون اعتدى عليها وين خواتي عنها

-يكولون اختج الجبيره رايحه للمستشفى لامج وهو مستغل غيابها داخل على الثانية

-وجايبني هنا حتى يگلي هاي انتن

-لاوالله راد يعرف منج بلكي عدجن مكان خاص تنضمن بي لان داز دوريه من البارحة يدورون وماكو حتى يعرف اشلون يشتغل

-لوماملبسني القضية  مجان امي فقدت ولاغايه تركتهن وغند عايشة هسه 

-كله مقدر ومكتوب الله يصبرج يبوي

-وديني للواء

-شتسوين يمه

-اندل مكانهن خلي يلحگ عليهن

-اي هسه اندز خبر للضابط هيذام

-لا ماغاح اگله لان غاح يظلمهن ويلبس اختي القضية مثل ماسوه وياي وديني اله ابوس ايدك

-راح توگعين دتعالي كعدي وجهج انخطف لونه حتى حجي ماتكدرين تحجين

-بس وديني قبل لايحصلهن بابا  وافقدهن هنه هم دخيلك سيدي احسبهن بناتك ونخنك

-امشي وياي اذا بعده موجود ماطالع وقبل يستقبلج خوش واذا ماهو نخابر الضابط هيذام لان هو لزم قضيه الطفلة

ردت امشي ماكدرت سندني عليه كوه اتحرك امشي ماكو براسي بس انتهت ذيج اللمة وصوت الضحكة التطلع ابراءة؛ بلحظه وكلشي صار حلم بسبب حيوان بلا ضمير

وصلنا لغرفة اللواء  كال للشرطي الواكف بالباب رد  انتظروا دخل شوية وطلع فتح الباب دخلنا لكينا كاعد وره المكتب ضرب تحيه الشرطي اشرله اطلع

كام كال البقيه بحياتج بابا

-الضابط هيذام  هم يغد (يرد) بكلمته

-لاكلمته على كص رگبته بس ليش هالسؤال

-اني موافقة على الزواج 

-خير ان شاء الله ليش غيرتي رائيج  بعد هالمده

باوعتله ونزلت دموعي 

- جان من البداية ليش هيج ضيعتي اهلج  مو كلتلج هيذام ماراح يتركج لمن يهد كلشي وهسه بعده ماصدگ من البارحة لليوم متخبل بس يريد يحصل الباقيات

- يعني انتهن غاحن كلهن

-لااكو امل نحصلهن قبله ويصيرن بحمايتي وبدل القضية التي مفكر ترفعه يخسر رتبته جزاء جبروته

دنكت ساكته هو يحجي مااسمعه شنو ماكو غير رند  بعيوني غمضت گال يله رجعي بين مااكمل اوراقج وهم واكو شي لازم نضيفه على الاتفاق

همست ضيف شنو تغيده ماضل شي عندي حتى اعتغض عليه

-الله يصبرج بابا يله روحي خلي اكمل امورج قبل لايرجع

اشرت اي وختل توازني كعدت بالكاع

صاح الشرطي دخل دنگ كومني سندني على متنه  رجعني لمكاني  كعدت يم الحايط لميت رجليه طلع  دقايق ورجع بيده حبايه انطانياها كال اخذي راح تهديج شويه

-عمرها اغبع سنوات تخاف حتى تنام وحدها

-استغفر الله ربي اخذي بويه  الحباية

-مالحكت اشبع منها كمشت ببلوزتي  وكالت لاتعوفيني وحدي جان كلبها حاسها

-كولي يالله

-ضيع عائلتي كلها علمود  يصعد غتبته

-كافي رحمه لاهلج يبويه

-والله غاح اخلي يتنازل عنها والله غاح اندمه

خله الحبايه بحلكه وشربني مي مسحت حلكي بظهر ايدي وتمددت غطاني مسح على راسي وكام وهو يتحسر  طلع  

غمضت اريد ابجي مااكدر شي خانكني خليت ايدي على صدري  افرگ بي اريده يطلع مااعرف شنو السويته  ولاحاسه وين شمرت نفسي بدون وعي

دقايق والدنيا افترت رحت بالنوم ماادري اشگد ضليت  بس ماصحيت  غير على صوت وحده تضرب بوجهي فتحت عيوني لكيت مرة متوسطه گالت واخيراً صحيتي ماتگليلي شنو ماخذه وهيج مسطورة

عكدت حواجبي مامفتهمة شي اباوع نايمة على جرباية  داخل غرفة مرتبه

-لاتصفنين يله كومي  خلي ارتبج قبل لايدخل اسماعيل

-شنو سماعيل وين اني ؟؟

قبل لاترد واسمع صوت بابا بره

مو تكول صوت هذا الي جان يجرم بيه حسيت شي بداخلي فرفح الها وخرت الغطة وكمت بسرعة  فتحت الباب طلعت لكتيه كاعد  ركضت اله دنكت على اديه كمشتهن وكعدت گدامه  اريد احجي مااكدر الشهگه بكلبي باوعلي و  همس الله ياخذج ويخلصني من عارج

حجيت بكسره  ماتت اخيتي بابا

-كون كلجن ميتات فد ساعة

-كلبي يوجعني بابا الخنگه ذبحتني شي بصدغي ديموتني بابا

-رادلها حظ واخلص منج انتي واخواتج بنفس تابوت امجن كومي لاادفرج

- عيطت بخوف مو؟ بجت بتوسل ؛اترجته مغعوبه ( مرعوبه) ؟  من دفنتها شنو جان مبين عليها

-فضحتيني بت الكلب كومييي

-خواتي وين بابا  غؤيا  ماتت  اعغفها ماتحملت اتشوفك وانت تدفن بت كلبها بيدك ؛ غايه شصاغ بيها من شالتها بحضنها وهي بلا نفس

-مثل ماراح ادفنهن بيدي وانعل ابو فضايحهن ااخ ياليهودية ولت وبلتني بقذارتجن

كالها وجرني راد يدفعني وبطل صارت عينه وراي   انداريت لكيت اللواء  ويمه المره گاله يله ابو رايه كوم اخذ ملاتك وتوكل  تطلع منا تنسى  هذا المكان قبل بنتك نهائيا

بابا- اصلا ماعندي بنت

-اخاف تفكر يوم من الايام تكول عقدت بنتي لفلان خلي براسك قبل لاتجيب اسمي لسانك يطير

-لاسيدي ابد

اشرله يله كام بسرعة دنگ اخذ رزه مال افلوس وطلع بسرعة باوعت للواء اريد افتهم شكو وين اني ؛ كمت تركني وندار للمرة گاللها اريدج تغيريها تغير جذري

-دزيت الولد يجيبون الكوافيره نص ساعة وتكون جاهزه

-ابو درع هم اتصل

-اي كال ديروا بالكم على درع احتمال مارد اليوم  يعني أمن

-شأمن زارع الدنيا  عيون اكيد هسه خبروا استعجلي واسماعيل وين اختفى 

-اول ماكملتوا عقد طلع للبيت الجبير بس شكلة مقتنع بالاخص من گلتله حتى علاجك ابوك راح يوقفه اذا ضليت مصر لان مل منك

-وشنو رد

-مارد بس كال ليگدام مااجي واعيش وياكم بالبيت الجبير اضل بشقتي هنا شكله رخه مبين خاف صدگ توقف العلاج وترده لهناك

-وراح يغير تفكيره اكثر من يشوفها  يله همي ايدج وانت بابا رئال مااوصيج بعد عليه هذا صار زوجج ومسؤوليج من هاي الساعة

داارد ورن فونه طلع مستعجل انداريت للمره كلتلها يا زوجي  وشنو هذا المكان اشوكت جبتوني

-اذا انتي مااعرف شنو متسممه وين تحسين المهم جابوج الولد قبل لايوصل الشيخ واجه ابوج ملجج لابني اسماعيل وهذا المشتمل الي راح تعيشين بي

-اشلون عقدني بدون موافقتي

-موافقتج شنوو مو كلتي لابراهيم موافقه وبعدين ماحتاجوح بالعقد قاصر ابوج ملجج

-العقد باطل

-شنو ولج شنوو منو انتي واكفه معترضه وتعلمينا على الحرام والحلال كلج خلگ وسخه جبناها من نص السجن حمدي ربج قبلنا ندخل وحده مثلج للبيت كافي خلصناج من مكان اقذر من اهلج هاي من غير الفلوس الي اخذها ابوج مكانج وياريتج تسوين

-يعني شنو

-يعني ترحين كدامي للحمام نفس مااسمعلج خلي الحگ انظفج قبل لايرد اسماعيل بلكي صدگ يغير تفكيره ويتقبلج زوجة

-ماجان هيج الاتفاق

-اتفاق شنووو شو انتي جنج صدك بت شوارع مثل ماكال ابراهيم واذا شفتي مجال تاكلينه شو تعالي واخلي اشوف اشلون تعترضين

كالتها واجت بسرعة حتى مالحكت احجي جرتني من شعري سحلتني للحمام دفعتني وصاحت شوفي لج  ربع ساعة وارجع وداعت ولدي اذا لكيتج مكملة شغلج وسابحه اغسلج بمي الجفن واسلمج لابراهيم  وانتي تعرفين وين يشمرج لخاطر تتربين وتمشين عدل

طبگت الباب حيل وكفت صافنه اريد استوعب  وين شمرت روحي

من كثر الهبطة گعدت ورا الباب اباوع للحمام  اشسويت بنفسي اني

كمشت راسي -ويامن ورطت روحي منو راح يخلصني شحصلتي وجعتي گلبه منو يكول اصلا منتبه لغيابج

مر وقت واني على گعدتي متبنجة صافنة مااحس بنفسي ؛ندكت الباب وصوت مرت ابراهيم تستعجلني

مسحت عيوني وكمت داافتح الباب حتى اصرخ بوجها واكلها هاي هيه خلصت اللعبة اخذت ثاري ميهمني بعد حتى لو تعدموني

استوني احرك اليدة واسمعها تحجي ويه وحدة تكلها استعجلي عدلي  شعرها وجها قبل لاتصير مصيبة اتخلي يرد بكلامه

-شنو العريس ماموافق

-لا هو وافق بس جهنم ربي بالدنيا ابو درع  الماراضي  مره عشرته مرة هالولد الكل يصيح ويستريح من ظلمه مااعرف الله اشوكت يتوب عليه

-مرته  ماردت

-شترد ماعونت تطفش اتخلص روحها كد  ما باطل وماينحمل

-خطية الطفل اشلون انطاها كلبها تتخلى عنه هيج 

-يمتى سوده عليه لحگت تشوفه حتى اتخلت عنه   من اول ساعة صار راح جابه غصبا عنها وهذا  شمره على كلبي لايسأل عنه ولايعرفه منين

-الله يهدي

-ماتصور ينهدي هالولد اعرفه وراح يجي يوم يسوون بي  مثل ما سووا بأبو كدام عينه وابنه يتخبل ورا 

-لااسم الله الله يحفظه لشبابه

هيه تندعي واني طلعت شافتني بطلت گال. شنو هاي شوطلعتي بملابسج ؟؟

-اي لان جان اتفاقنا بس عقد مثل ماانتم غجعتوا بكلامكم اني هم اغجع

دترد وندفعت الباب دخل واحد  اباوعله طويل شكلة مكروه لحيته طويلة  وجهه نصه محترگ والباقي باهت 

طلعت البنيه بسرعة وهو اتقدم گال هيه هاي الخبصتوني بيها

- اسماعيل  يمه شحجينا ليش اتخلي ابوك يحلف عليك

-لاهاي هيه بس مالكم شي يمي بعد

-ابد واني اوكف بوجه ابوك اذا حجه بس فرح گلبي يبعد امك

-شهر ماكو غيره

-ميخالف بلكي ربي ولن معوضنا بأبنك بهذا الشهر دشوفها جنها كمر

-كمر اصخام گلتلج اخر تجربة هاي وبعدها اليوصل يمي احرگ نفسي كافيي سودتوا حياتييي

-اهدأ اهدأ يبعد امك لاتتعصب ميخالف التريده يصير اخذها وروح لغرفتك حضرتلك كلشي وانتي يله يمه ويه زوجج

باوعتلها بهتانه اريد اتبلعم مااكدر

-اشبيج ولج

-شنو شدتحجين انتي

-شحجيت يمه گلتلج زوجج روحي ويا لغرفتكم وربي يسعدكم سبع سعادات اكو شي غلط حجيته وماادري

- اي عقدتوني بدون موافقتي وجان بس كلام بالبداية على انو اخدمه بس لان تعبان مو هاي الاشياء الدتحجون بيها 

اسماعيل -. يااشياء  وشنو تعبان قصدج مخبببل 

-ماكلت مخبل بس زوجة مااغاح اكون الك

-لا اشو تصيرين وغصباً واذا تنفسيتي اكسر ضهرج

-ماتگدغ تغصبني على شي بعد عن الباب داغوح لاوالله افضحكم 

-طلعييي يمه مناااا خلي اشوف اشلون تمشي كلامها وتمنعني

شفتها تريد تطلع وهو  اتقدم شكلة يخوف رجعت للخلف كلتله والله بس تلمسني اذبح نفسي و…

اني احجي وسكتني  براجدي من قوته  كعدني  بالكاع دنگ جرني من شعري ومانسمع غير صوت  رعد بالبيت  وجمدني بمكاني

دفعني اسماعيل وركض ورا امه بعده مالازمها يحتمي بيها وندفرت الباب دخل هيذام  اباوعلة النار تطلع من عيونه گمت بسرعة اتقدم عيونه عليهم صاگ على سنونه

صار قريب مني من گد الرعب مالحگت ارجع ليورا وخرني عن طريقه بدون لايباوعلي راحلهم رفعت اديها امه و صاحت ولك هذا اخيك

جرها شمرها عالباب واشرله تعال

طلعت تركض تصيح ابراهيم الحكنااا  راد يشرد اسماعيل لزمه من ياخته سحبه يمه گله شنو كلتلك

-وو

بعده مامكمل واجه البوكس من قوته دگ راسه بالحايط اختل توازنه لزمه عدل وكفته و اشر شنو 

بجه بصوت راد يحجي ورگعه بوكس ثاني من يمي احس راسي انفجر  كعد بالگاع شبه فاقد

دنگ شاله من رگبته ودخلوا ابو وامه يركضون الام كامت تلطم والابو  دنگ شال جامة مال الميز فلشها بظهره

لبالي راح يتأثر اباوعله ولاهامه كمش اسماعيل بثنين اديه رجع راسه ليورا وهفه كله بكل قوته كعده بالگاع بحركه سريعة دفره بطنه  انطوه عصر روحه وكام ينهز كله مثل الي لزمه صرع

تركه واندار للواء الي رجع بسرعة ليورا وصاح اطلع منااااا

هيذام - هه هاي كل قوتك حسبالك ربحت الرهان روح ابوي  لخيلكم تتناطحون بينكم

-انجبببب لاتتجاوز ويله اطلع قبل لاخليهم يسحلوووك

-انت البديت  استعد للراح يوصلك

-ماتگدر حتى ترمش موتسوي شي

-خليك مثبت على كلامك وهذا  الخنيث عود ضمه عدل وعينك على ولدك

-اطلع منااا يله

-قبل لااطلع الك شي يمي

كالها ونتر الرتبة من متنه جر ايد اللواء خلاها بيها  وسدها دگدك على متنه بخفه  كله حافظ عليها زين راح تسليك بالگبر

-كلب وبدون تربية

ضحك بأستهزاء واندار باوعلي

-وانتي اريدج ترتاحين اليوم اشكد ماتكدرين قبل  لاتشوفين الشمس  هديتج  راح تكون بين ايديج …

لاتنسون التصويت❤️