تحميل رواية «شيء من رصيف الدم» PDF

شيء من رصيف الدم

بقلمي:leo Alfatlawi

بارت الخامس عشر

***رايه***

وكفت متفاجئة  من كلامها كمشت ايدها ماما دتحجي ودخلن نسوان لابسات عبي  اباوع وحدة بعمري عيونها وساع مكحلة والثانيه شوية اكبر مني بس بيضة دخلت وراهن فجر اخت ذباح  وصوت غزوان وهو يكول اتفضلوا الي خله ماما ترتبك وعمتي تنخبص ماتعرف شتسوي

دخل غزوان صارت بوجهه  عگد حاجبه  قبل لايحجي غشت وجها وطلعت بسرعة راد يلحكها  لزمته ماما  اشرتله  لااا دفع ايدها وراح وراها يركض  

شمرت الجفجير وركضت وراهم بعدني ماواصله للباب صارت ماما بوجهي صاحت رجعي

-شنو رجعي عمتي شرادت وليش غزوان لحكهاا

-واحد فقير يمهم كل فتره تجي تاخذ مبلغ اله  وتعرفين هو مايرضه  تدخل للبيت  يخاف عليجن

-لاجانت تحجي عن زواجنا

-اي لان مريض نفسي ويشور واذا مادزيتله يجي يشمر حجار واسم الله اسم الله يضل يدعي عليكم

داحجي وگالت فجر شني يمه تستگبلون خطاركم نرچع

باوعت  الماما شفافها بيض ترجف خايفة رجعت باوعت لفجر تبتسم خجلت من وكفتهم  تركت ماما  ورحت سلمت عليها حضنتني همست نورتونا عمة

-يبعد عمتج  وطوايفها اشلونج ييمة وعلي روحي تحوم عليج من ذاك اليوم لليوم عاد اليوم ماتحملت گلتله ودني وياك هم ازور وهم اسير عالبتوات

-والله غزوان گال بس افرغ اخذكم ونروح نزورهم

- هلا وجثير الهلا بيج وبغزوان يع وروح ابيي يبن البدوية مايصدچ غير صار اكبر حلم عنده رفيجه ينور ديرته

-ههههه عالاساس مشتاقله هو كل جمعة يمه

-سبحان الجمعهم وزع المحبة الرفچه بينهم.  اشلونج خيه ام رايه البگيه براسج ولو متأخر بس والرضا وچهي مسود مااگدر اچي اخذ من خاطرج واحنا سبت الصارلهن

ماما. -امر الله وجان لازم نشوفه

-و معزة خويي ابوهن طردنا من المستشفى اشگد چلع  ابو صگر بس راد يحصل خبر منهن ماكو تسون علينه زلمتج  كل چلمة يشمرها بحگه تسوى عمره وحگ شمس الله تحملنا جثير منه واخرها ختمها اشتكى علينا وگعنا بسالفة چايدة گوه خلصنا  منها

-الله ينتقم منه ولا يشوفه يوم واحد راحة بحياته كون عيونه ماتغمض وينصاب بوجع بگد ظلمة النا

-دعوة المظلوم ماتگع الگاع ربي ماگومج على ارچولج لو ماجان مسچلج تتنوعين حگج يردلج چدام عيونج 

-مارايده شي بطلت والله بس كون يفك عن بناتي ويخليهن يشوفن دربهن كافي

-لاتخافين ماطول ذباح خاوه غزوان ارتاحي اشحد اليگربلهن بعد وعلي يفصخه نصين

ردت ماما واني بالي مو يمهن يم غزوان الي مارد وشنو جانت تقصد عمتي من حجت هيج فززتني فجر وهي تكول هاي حرمة ذباح  وهاي گمرية اخيتنا الصغيرة

باوعت للبنية صدگ تشبه ذباح سمره و عيونها مكحلة ابتسمت بس ضاعت ابتسامتي من شفتها باوعتلي بطرف عينها  اني هم درت وجهي كلتلها تفضلي عمه جوه ليش واكفين بالباب

دخلنا للغرفة كعدت جبت مي قدمتلهن  وعيني بالباب  اشوكت يردون عكس گمرية عيونها بيه حتى المي بعدني مامقدمته وصاحت مشكوره ماني عطشانه

دخلت رؤيا كفشتها بطولها وعيونها تلمع طابگه تك بجامه والثانية نازله گوه لزمت ضحكتي سلمت قبل حتى لايكومن راحت تتلمس گعدت عالطبلة تربعت تكرط بجزره ضحكت فجر كالتها اشلونج يعمة

-هلا

-ماشاء الله عيوني باردة عليج بس ربي زايد بجمالج

-مم

-زلمتج ماعنه خبر

-يا زلمتي منو گلج اني تزوجت

-ابن البدوية

-يضحك عليج وين اكو واحد ياخذله عمية

-ياع  وشداعيله يجذب

-يمكن راد يحرگ كلب وحده ويصللها حتى العمية تزوجت وهيه محد مگلبها

-مم بس هذا شغل حريم

-گلج رجلها ضابط بالمخابرات

-شني مخابرات؟؟ چا موش تگولين مامعرسة

-اي مامتزوجة بس داشوف شنو مجذب عليكم

گمرية -  اخوي مايچذب كضي حدج ولو ماجنت دايسه عتبت دارج جان عرفت شرد

- شنو هالذبانة الزنت راية كم مره كلتلج رشي مبيد

-من هيج زلمتج زتج على هلج ونهزم

-وتگلك مايجذب بعد شنو گايللكم

-الجذب موش من شيمة العرب واخوي  ازلمه من صدر ديوان موش واحد كضوا مغير بالمهمة وخاين بلده لخاطر حرمة وزتوا حدر الگاع

-ههههه لازم اخوج عنده علاقة بديدان الارض الي هيج عنده معلومات خطيرة

- ثمني چلمتج  لج لا ابتره لسانج وموش اخوي الي يصغر بلغث وحده لو ماگشتها مانعرفت بت وروحي سألي هذا الزتج باب بيتكم هو عطاه اسم رفيجة الي بالدولة؛  مثل ماعرف وين زاتي  عرف ماراح يتنوع للضوه لحد مايسلمها لربه

اباوع لرؤيا اشرت اي ودنكت عيونها تلمع ثواني وكامت طلعت بره عرفتها جانت تستفزها حتى تعرف زوجها وين ؛ فجر گرصت رجل گمريه واني رحت لحكتها طلعت لكيتها كاعده عالدرج  مدنگه بيدها المشط تحرك اصبعها عليه بهدوء وساكته

رحت يمها  خليت ايدي على شعرها رفعت راسها ابتسمت وهمست عرفته مايرد بالعهد ويتركني

-راح يخلص نفسه ويرجعلج

-مو مهم اهم شي عايش بعده

-ماعنده اهل

-مااعرف جنت كل مااسأله مايرد اخر مره گال انتي كل اهلي

-لعد جان يقصدها

-اشلون اساعده واني حتى ماشوف

-بدل العرس اسويلج عملية

-حتى لو رجعلي النظر ماراح اگدر اخلصه

-تحبي

-مااعرف بداخلي شي رافض هالاعتراف بنفس الوقت الي مانع تقبل اكمل حياتي بعيد عنه

-اشلون جان يعاملج

-مثل الطفلة الصبح ياخذني للحمام يغسلي وجهي ويلبسني جواريبي يجيبلي الحليب ويوعدني الف وعد جذابي بس حتى اشربه  وبليل ينيمني على قصه خيالية

-هم يعاقبج من تضوجي

-تحملني  بكل تصرفاتي  بدل ما يعصب  يضحك على صراخي ومكان مايضربني ياخذني لحضنه ويعتذر على الحالة الوصلني الها 

-تذكرين الحلم رؤيا

-لاا مااذكره ولا تذكريني بي لان راح ارجع اشوف واطلع ادوره بكل مكان ومن اتعب اروح لنهر دجلة اگابل نوارسها واگعد منتظرته ادري بي راح يرف كلبه ويجيني

-وتردين تعوفينا

-عمري ماجنت وياكم

-لو تجذبين عالدنيا كلها ماتجذبين عليه

-هههههه يالذكيه تركج مني وعيونج على زوجج من الحيه الجوه وصديقه

-شقصدج

-ماقصدي بس انتبهي للعطر الخالته نفس عطر غزوان وهالشي محد تسوي اذا ماخاله صاحب النصيب براسها

-وشعرفها بعطر غزوان

-اكيد من المشخمط اخوها الي حاسب روحه زلمه صدگ اشلون شكله جان

-اسمر جسمه متروس طويل وعيونه مگحلة

-مو دروغو دااحجي على دسارر

-عزه بعينج  ولج صدگ ذباح يشبه دروغو

-ذكريني من يجي غزوان اتفل بوجه على ذوقه الغبي رايه گومي من يمي

- يوو شبيج هو اني شنو شفت من دسار حتى اوصفه  بس عيونه مسحوبه وحاجبه يمه طبره مبينه اثر ضربة ضخم كلش وايده بيها اثر خياطات وبنطلونه كابوي

-وحجم حذائه

-هاا

-ومرررض كوميي من يمي وخلي عيونج على رجلج قبل لايطير

-لاغزوان ما يسويها يحبني

-بس كاره ضعفه والمنطقة العايش بيها معتاز القوة والاهل الي عاش عمره يتأمل يوكف بسندهم وذني متوفرات بذباح

-والله اذا سواها اعوفه

-هو مايسويها بس اكو الي يخيره بالاعز من روحه

-يعني بالمقابل يرد رئال

-وينهي ابوج وينطي افلوس يسويلج العرس والبيت الجان يحلم يلمنا بي والحماية الي فقدها من ساعة الغمضت عيون اهله

-لافدوه رؤيا لاتحجين هيج والله اموت غزوان يحبني بس الي ومايحلم بغيري

-لعد روحي خلي ايدج على عيونه حتى لايفتح ويشوف الواقع شنو

دااحجي واسمع صوت الباب انفتح وغزوان يصيح يالله

درت وجهي على دخلتهم ؛ اباوع لغزوان عيونه الملونه مگلوبه  حمر والتعب ماخذ من حيل گوه يجر النفس  وذباح تكول ملك الموت وجهه محتقن  عاگد حاجبه عيونه تتنقل بيني وبين رؤيا مثل اليشوف بينه شي مايريد يصدگه ؛ اخذ نفس طويل استغفر ودنگ يعصر بسبحته  گال غزوان عمتي وين

-بالغرفة يم اهل ابو في رايدها بشي

-اي صيحيلها خلي تجي بالاستقبال عندي شغلة وياها

رؤيا.  -وشنو رايد منها

-هيج يبعد اخوج  شغلة مو يمجن

-گلت مو يمنا امم اسمع غزوان  الي يوصل يم ماما والي يسمعها احجايه وحده ممكن تكسر خاطرها بعد ماانخلق

-شبيج بنتي

-خلي ااكمممل  صح مااعرف شنو سمعت والصراحة ماهامني اصلا ولا اريد اعرفه بس يا تنسى وتعيش مثل ماانت يااا تاخذ صحابك وتروح تكمل حياتك بعيد عنه اترك الظل من عائلتي  لان ثق بدين محمد مستعده اكتل اي بشر كائن من يكون يفكر يلمس شعره منهن مو يخدش كلبهن

-يروحي شنو صايرلج

-نفس الصارلك بس الفرق اني عضيت ايدي طلعت شكو وجع من كلبي بأذيت نفسي ماوصلت يمهن تعرف ليشش لان عشت شعور الفرگة وعرفت الوجع  ماينحمل

-ابوج احتمال يطلع هالايام

-واحنا بعهدة اخونا

-راح ياخذج مني بسبب عمرج

-ههههه حماررر واحد يستعجل قدره بيده شسويله يطبه مررض

ذباح- حدري لمي شعفتج ونوب تحجي بالگدر

-لميتها قبل شوية بس مو كفشتي اختك

-شني يبااا

-ماكو شي سلامتك بس نصيحة اذا حبيت تحافظ على كلمتك ابتعد عن النسوان  واذا ردت دوم الصحبه ابتعد عن النسب

- خذوا الحكم من افواه المجانين

-ماارد لان مهما يكون دايس بساطي

-والنعم من بنت الاچاويد

-لابد مايطلع للدم اصل موو شتكول ؟؟

-ونعم من اصلكم يباا  حي الله الحضن الربتج

غزوان-. حي الله اصلك تفضل خويه تريد جوه بالاستقبال لو نگعد هنا بالممشه

-لاوالله ارخصني اندهولي رضيعتي هم يالله نتوكل

-والله ماتطلع اذا ماتتغده

-لاتحلف يخوي وعلي اريد اعر للبر

-اترك الشغل غير ماصدگت اجيت حتى نطلع نشتري غرفة النوم سوه

-بربك تحچي صدچ

-اي والله صار يومين محتار عندي هواي تحضيرات ومااكدر وحدي

-افااا انه اخوك تحير وانه حدك لاماهگيتها يبن العم

-لعد يله راويني مراجلك هاي بعدني بأولها

-ههههه مايعگب ضوة ربك واله وكلشي چاهز  والخميس بحيل الله الذبايح  وامور الزفة كلها تامة غادي اچي بس اخذكم واروح

-لا هنا اتزوج

-غزوان لا تهدرس وتخليني ارميك امكث مچانك وتحجه بشلاچه گلتلك زواجك عليه ماخلك تبطي غادي يومين واردك

راد يحجي غزوان رفع حاجبه اشر شكو بعد ضحك كله هاي هيه

دگدك على ضهره ورد بالمبارك يخوي

-الله يبارك بيك مااكدر اكلك يوم الالك لان الحكومة موجوده

-هههههه لادخيلك مارايد اكتفيت اندعيلي ربي يرزقني بجاهل اكوم ممنون منك

-انت بس انذر تسمي غزوان راح يجيك

-يابه وحگ علي اسمي غزوان بس خله يجي

-ان شاء الله اثنين طبگ  يله تعال اكعد وانت رايه عمري صبي الغده اذا كامل

اشرت اي رحت للمطبخ  واكفت اصب وعيني بيهم اباوع لغزوان اشلون طاير بي  فرشله حط مخده وراح للحمام يجلف عالسريع مهدود حيله من الشغل والعوز بس يخجل يگعد گدامه والدهن تارس ايديه وجهه

خلص كام نكث اديه نزع نظارته صارت عيونه عليه   ابتسم وجهه بهتان الارهاق ماخذ منه دهر اخذت نفس امنيتي اخلي بروحي  واشيل شكو تعب منه

دنگ مسح نضارته لبسها ورد باوعلي همس احبج ضحكت درت وجهي

صعد للغرفة جاب سلاحه ورد  گعد يم ذباح  حتى يعلمه عليه

اشتغل وعيوني على ذباح رغم شخصيته ماتنحمل وشكله مبين مايتفاهم  بس تصرفاته ويه غزوان جانت يثبت غير شي اسمعه اشلون يحجي ويا برزانة ويحاول يعلمه على كلشي حسيته يريد يصنع منه شخص ثاني تكون نسخة منه

دخلت زوجته كالت اساعدج بشي

-لا حبيبتي كملت ماعندي شي بس اسوي الخضره

-چا عطيني اني اعملها الج احسن ماچاعده غادي اتصفن لان دخلن بدرب الحسد والمكايد وانه اضوج من هالشي

-ههههه ماما كلش تأمن بهيج اشياء ماصدكت لكت وحده تشاركها

-اشكد عمرج انتي

-استوني دخلت  ال١٨

-مبينه اصغر ماشاء الله حلوه حتى اخيتج هاي تكول لعابة بس مبينه راعية مشاكل  ماهي مثلج هادئة

-هيه لسانها متبري منها لهيج احنا مبتعدين عنها عكس رئال ذيج صوتها مايطلع

-عدكم بعد اخت

-امم شنو ماحاجيلكم عليه ذباح

-هو ذباح شني يحجي لابعقلج  ذباح يچعد هالچعده حولنا مثل الحين ويشاركنا بسالفة وداعت نظر عيني مانسمع منه غير المكاون والاوامر  طبعه مرر مررر مايتعاشر

-لعد اشلون كمريه عرفت كل هالمعلومات عن زوج رؤيا

-تتسنط من يخش يم اميمته وابو صگر بس وروح ابوي اذا كضها اله يشلع اذانها لان كم مره حذرتها عمتي فجر بس هيه تربات حرمته الاولى مسمومة مثلها ماتركد 

-عايشات سوه انتي وزوجته

-اي بس انه فوگ وهيه چوه

-شعجب مااجت وياكم

-ضلت يم جدتي وانه جيت لخاطر انخى ابو الجوداين  لان ملينه من العلاجات اريده يرزقني بجاهل من يمه

- شنو تعانين من شي

- لاموش مني الصوج راح اكلج بس امانه بينه الحجي

-منه ؟؟

-اي نسبته جثير گليلة بسبب الطگه التعرضلها  اشكد عالج تصعد نسبته وترد تنزل حتى مايلحگ يصير الجاهل

-ذباح ابن البدوية مگتول

-هيه لخاطر هالجلمة جتل نص الديره وضيع ١٥ سنة من عمره بالسجن وهاي من طلع اكتشف حتى بزره منتهي

-سووا انانبيب

-ما يرضى يكول لو يجي وحده لو مارايد وهسه  جدتي تزن براسه تريد تاخذله بت اخوها الصغيره تكله تشيل بساع ماهي مثل ذني عمرهن كاضي وخايفة لايرخه

-هو يحبج لولا

-ذباح مايحب غير الطگ والمكاون اكو طلابة وجتل يگف اول واحد وللامانه مايظلم احد وعادل بينا بس انه احبه ومااگدر يمه مجرد اتخيل يخليها بحضنه تالي الليل ويضحك وياها اتخبل موش انوب تصير صدگ

-مادام مايظلم احد ويعرف هالشي يأذيج مايكسرج بمرة ثانية

-هاي يمكم ماهي يمنا احنا مايعتبروها جسر لااا حگ وهذا اخو ابو صكر گاضي شرع ربه  وابو مثلث ولد عمه وخواله كلها مثنيه ومثلثه  حتى اخواتي

-عززه شنو هاي وذولة هيج متمكنين يسطرون نسوان لو مثل بابا جان يجيبها ويشمرها ويانه نفس الغرفة

-لا مايثني اذا مايعرف راح يكفيها من جميعه ويعرف نفسه مايگصر على الگديمة وافريخاته صح نفس البيت يخليهن بس يعدل بينهن

-واكيد المشاكل واصله للستار

-اشحدها التفگ حلگها  لخاطر ينجسر ضهرها كلمن غرفتها ويومها وهو مايفرگ بينهن ومايخلي گصور على وحده وهنه غصباً عنهن يتخاون لان التنعوج منهن ينفصم راسها

-هاي لو اني مكانجن والنبي لو اضل طول عمري بدون زواج بس مااخذ واحد هيج عزه اگعد منتظره اشوكت يجي سراي وهو نايم بحضنها

-هذا الحچي ماهو يمنا يبت بغداد

-هههه بس لايسمعج احد ويصدگ يابغداد هاي

التحجين عنها

-صدگ اشو منطقتكم تخوف حتى ذباح مارضه يجيبنه لو ماعمتي فجر ضلت تلح وحتى من خشينه گال تغشن

-ماجنه هنا بس بابا الله ينتقم منه جبانه وخلانه نعيش غصباً عنه بيها

-چا ماخذاكم زلمتج وبعد بيكم

-الاجارات غالية وماما واني عدنا علاجات وغزوان بروحه مايكدر على كل المصاريف يادوب مصرفنا يوفره هاي من غير دنفكر انلم نسوي عملية لاختي هسه بطلنا راضين بعيشتنا بس اندعي كون مايطلع بابا

-عليش هيج خايفين منه

-ماخايفين منه بس خايفين على رؤيا لان قاصر وعقدها عالورق وحنا حتى نسخة من العقد ماعدنا يعني ياخذها منه بالقانون غصبا عنه وهذا مايعرف شنو حرام وحلال يطلكها يم شيخ وينطيها لواحد من جماعته لخاطر كم دينار 

-حرمات مثل هاي عد ابوج وكمريه عد ذباح سبحانك ربي يعطي الحسن والجمال لواحد مو كفو نعمة

-ههههه شبيها كمريه هيج مضوجتج

-سامعه عن سم العربيد هيه تنگط خبث وحقاره واخوها مدللها وهيه مامصدگة  تتبغدد بهذا وجها الي ماينوجل  خبزه يمه

-يله هسه يزوجها وتخلصين

-ياهو ناذر روحه للموت ويتورط ويه ابن البدويه غير اذا ردتله زعلانة يحرگ البيت بعياله ويعلگه بالنخله بس لخاطر يروح ويرد يطگ بي

-هههههههه شو مامبين عليه هيج متعصب

-والله حتى انه صافنه متعجبه الي يتنوعله هيج يسولف ويضحك ولايكول نفسه ذباح مبين يحب غزوان جثير وهيج مرتاح ناسي نفسه ويا يله خلصت الخضرة بعدي حتى اغسلها

غسلتها واني عدلت تراكي شمرت گصيبتي وره ضهري و شلت السفره طلعت كام  غزوان اخذها فرشها ونكل المواعين

اخذت اكلنا للغرفة تغدينا سويت الجاي شربوا طلعوا واحنا ضلينه كاعدين هنه يسولفن واني عيني بالباب احس گلبي يرف مامصدگة اشوكت يدخل غزوان وبيده غرفة زواجنا

اباوع للكتاب كل  شوية تنزل دمعتي وامسحها لاواحد ينتبه اتمنيت رئال وياي وتشاركني فرحتي ياما سهرنا واحنا نسولف ونحلم بهذا اليوم

اخذت نفس وانتجيت صارت گدامي رؤيا  متربعة تتسنط حتى اول  ماتسمع كمريه تحجي  تشمر كلمة تخليها اطفر ابتسمت مااعرف  ليش هالحقد الي صار بينهم على ساعة

عمتي فجر كوه تلزم ضحكتها ومرت ذباح اتحسها مي بارد ينزل على كلبها

تأخر الوقت صار وكت الصلاة وهمه ماكو كمت فرشت السجادات تركتهن يصلن واني والبنات طلعنا صعدنا للسطح فرشنا وگعدنا على ضوة الكمر استونا  بلشنا  نسوالف وجانه صوت غزوان جوه يصيح لحد يطلع وصوت اشياء تنزل

عدلن عبيهن اتلفلفن عدل عكس رؤيا فتحت كفشتها وانتجت ماهامها شي احسها تريد بس واحد يسمعها كلمة حتى تستلمه 

اقل الربع ساعة وصار هدوء من لهفتي  گمت بسرعة داانزل وصعد غزوان باوعلي عدل نظارته وابتسم عيونه تلمع نزلت دموعي ضحك وفتح اديه ركضت حضنته ضمني بقوة همس واخيراً راح تنزوج 

-مامصدگة

-صح الراحوا منا عزاز وتعبنا هواي بس ربي عوضنا 

-ماعوزنا بس رئول ترجع وكتها صدگ اگول عوضه جبير

-راح اردها  واشتري الفستان الوعدت رنود بي اخذه ونروح نزور كبرها

كالها وباس راسي لزم وجهي دنگ مسح دموعي همس ادري موجوعة لان داحسه نفسه بداخلي بس اطلب منج طلب بس اليوم لاتبجين لخاطر احس حتى لو بالجذب گدرت افرح گلبج بشغلة

اشرت اي

-راح اسويلج عرس تحلم بي كل بنية

-ههه مامعقولة احلى من الچويات والضربات الجنت تحصلهن من بابا علمودي

-اي وروح ابوي شبعت كتل ابن الناقص خلاني مخبل اشتغل مثل الساعة كل عقلي يمج لايأذيج عناد بيه فوگ الدگ يحرمني من الاكل  واني مخلصها صفنات مثل الزمال خايف ياخذج مني

-مم واذا اخذني  شنو تسوي

-والكعبة الشريفة اكتله واكتلج  وانتحر

-عزه لعد تكتلني ليش

-لعد اخليج عايشة واني ميت كل عقلج

-غزززوان وين الغرفة داشوفها

ضحك سحب ايدي باسها وجرني نزلني لكينه ذباح داخل بالاستقبال وماما وفجر بعدهن يصلن

وكفنا بالممر اباوع غرفة الاخشاب بيضه تلمع ويمها دوشك ضغط وجنطة بيها فرشة بيضة

اريد اسيطر على فرحتي مااگدر  حضني من وراي دنگ باسني عالكيف وحجة بصوت ناصي  احبج 

- بنفس المكان جان بابا كل يوم يضربنا ويحلف راح يفرقنا

-بس الفرق  وكفت رئول وهيه تأشرلي بتوسل ماارد

-وعدتني تحضر زواجنا

-مثل ماوعدتج اخذج غصباً عنه

- غزوان اليحب  يثبت

-شنو تردين طلبي الج من اول دگه بگلبي لاخر نفس اشهگه

- اريد تنطيني كلمة ماتتزوج عليه عمرك كله

-كل عقلج هيج تحجين

-اوعدني غزوان حتى اذا سويتها اتركك بدون لا اسمع تبريرك

-ماراح احلفلج لان ماكو شي اعز  من رفت  گلبي عليج وداعت كل يوم نمت واني احلم بيج وداعت ضحكتج الي اسرة گلبي  اسمي مايصير بعد عقد زواجنا غير بشهادة الوفاه

-اي موت ميخالف بس لاتتزوج عليه

-اشتعلووا

-ههههه صدگ ليش الغرفة بيضة

-لان اميرتي تحب هاللون

-مم واميرتك مقرره  اول ليله تكون بحضنك بغرفتها

-لا دخيلج وروح اخوي يذباح يسويني منصبة

-محد گلك وافق وكله اي تتحمل كلشي يصيرلك والله يا غزوان اذا فكرت بس تفكير تتقرب مني هناك اصرخ وافضحك

-هه عود سهلة

-غززوان

-يا حلم  غزوان الي خلص عمره يترجاه

-اوعدني

-اوعدج باول رفة گلب واخر دگة تكونين اجمل امنية الي راح احميها بروحي وحافظ عليها مثل عيوني ماراح ارفضلج طلب ولااخلي بيوم تنزل دمعتج

ردت احجي وتحمحم ذباح باسني  عالسريع وخر راح يمه رحت للمطبخ واسمع ضربه قويه وياها ضحكة خجلت عرفته شافنا

لكيت جايب كومه اكل حضرته  عالسريع  طلعت شايلة الصنية شافتني ماما صاحت غززوان يمه تعال لرايه هاي ثوله لاتوكعها

باوعتلها فاتحه عيوني

-وجع اي فاهيه لعد بيج حظ تصعدنها ليفوگ

-شكرا ماما

-على شنو تشكريني على فهاوتج لو عرامة اختج

-بعد على صوتج خلي يسمع دروغو حتى اخاف مفكر ينطي اخته  انوب يقرر

-بعد عمري ويطلعون جهاله عيونهم مكحلة وبيهن لون اووي فدوه

-روحي ماماااا صعدي

هزت ايدها وراحت صفنت هاي ذباح واهله نشروا الوباء بالبيت  نزل غزوان ا  اخذ مني الصنية صعد واني اخذت ترمز الجاي ولحكته لكيتهم كلهم كاعدين

البنات على جهه يم ذباح ورؤيا من الجهة الثانية منتجيه لامه شعرها صفح تلعب بي صافنة بغير عالم

گعدت يم غزوان  بلشوا ياكلون واني عيوني على گمرية الي ماشالت عينها عن غزوان ويمها غيمة تبسبس وياها ويبتسمن بخبث

درت وجهي اباوعله مدنگ  ياكل بترافة كل دقيقة وعدل نظارته ويبعد شعره

غزوان جماله مبالغ بي هواي يشبه رؤيا حتى لون عيونه من غير طريقة شغلة الي خلت جسمه مرتب الي يشوفه بسرعة يحكم عليه بلوگر ميصدگ عامل الدنيا لازمته تسحل بي

اخذت نفس رجعت عيني بيها باوعتلي بطرف عينها وندست غيمة الي هاي جانت مسبلة على ذباح امنيتها تكول تاكله

دارت وجها وعضت شفتها من حرگت روحي كرصته حيل بسرعة لزم ايدي متفاجأه همس شبيج حبيبي

-الاكل مرر

-شنو ؟؟

-مر ليش مدتحس بي

-لا يمكن خاله نومي على ماعونج هواي

- بدله ويه ماعونك

هز راسه غير المواعين  رد دنگ ياكل وهيه بعدها تفصل بي تفصال مو تباوعله كرصته حيل صاح شصايرلج بنيتي

-هذا هم مر

-حبيبي تره والله مابي شي اخاف عندج سخونة

-مو مريضه واصلا مااريد موجوعانه

-تركي هسه اخلص اكلي واطلع اجيبلج غير شي تاكلي

رؤيا - جيبلها سم لولااا جيب بطنج افضل

-شنوو؟؟

-الاكل يغث يااخي متگلي منين جايبه  لو صدگ كلمن على سعره وماكو ارخص من لحم الكنغر

غزوان باوع  لذباح مامفتهم شي وذاك  باوعلي رفع حاجبه درت وجهي ضايجة  رد باوع لرؤيا تارسه حلكها اكل كوه سادته تاكل هز راسه بيأس ضحك ورد ياكل

دنگ غزوان سوالي لفه مد ايده اخذتها بدون لااعتراض لان عيونها بيده  بسرعة اكلتها قبل لاكمل رد سوالي وحده اخذتها  ضحكت عمتي گالت هاا راحت المروره

رؤيا-  لاا زادت بس انتظري شوية وشوفي الزهر الراح تبثه

كمرية-  بس على كيفج لاتختنگين

-من اكل بيت ابوج عود احجي

فجر.-  ياااع  اشمالجن ييمه

رؤيا- ماكو شي بس اكو تسس دتنفخ اذا مابطلت اطبق اسم واحد  بيها

-يا ساتر  ترگج من هالسوالف اريد اسألج بس موتزعلين يمه

-هه عالاساس ملكة المشاعر كدامج انطيني صمونة ودوسي بالغميج

-گضي الصمونة وصارلج كم سنة ماتشوفين

-من يوم ابليس قرر يسبح بمي زمزم حتى ينظف

-شني گاللكم الدكتور

-گال انتي حلوه متأكده بت ذوله الناس؟؟ شو مايشبهوج

-فتحيهن خلي اتنوع

خلت اللكمه بحلكها  وفتحت عيونها على كبرهن تقربت يمها باوعت بيهن دخلت اصبعها قبل لاتبزها غمضت بسرعة ورجعت راسها  ليورا

-تشوفين ؟؟

-لااا

-چا شلون عرفتي قربت اصيعي

-حسيت خيال قريب

-الضربة براسج صارت

-اي وعمليتي سهلة بس الجلب من كد مااعضه انجلب عليه

-اكو حبوبة يمنه من تجين اخذج

كمريه- . ماتنفعها تگلج طافية عوزها عملية

رؤيا.- ومنو كلج رايحين علمود عيوني

-چا عليش رايحين تسهل بخت

-عفية تسهيل بخت لناس ضالة عالة على اهلها

-هاي وانتي ولاطگة

-ولاطگة  وخذتلي واحد بس اسمه يرجف اثخن شارب تاركة النظر الضالين بطرك الاسم

-كملتي

-اي بس حاولي لاتخلين شاربج يبين حتى لايخربطون بينكم

هيه كالتها وذباح غص دگ غزوان على ضهره كام يگح حيل نطاه مي اخذه من ايده مسح وجهه وباوع لرؤيا تاكل وتحرك براسها دندن ويه الاكل ماهامهه شي هز ايده وشرب مي كال الحمد الله والشكر سفره دايمه بيا

غزوان- . شكلت متكلي

-الي يشبعني سنه لچدام كوم يله خلي انشد الغرفة لخاطر نرد تأخرنا جثير

-وين ترد اليوم تبات هنا

-وعلي مااگدر سمعت كم مره اتصل ابو صگر عدنا مشية باجر ماترهم ما احضر

-العصر المشيه واني  اروح وياك اريد اشوف الاجواء وتعرف عليهم قبل العرس

- وراعي المسية  تنور ديرتنا بس هم لازم اعر اليوم وانه ادز الولد باجر لخاطر يجيبوك

-دكوم هسه زين اذا خلصنا للصبح شد

-لاان شاء الله مانبطي بس كض السلاح ضمه بمجان امن لان اكو عالم مخها ضارب ما تتأمن

ضحك عرفه يقصد على رؤيا  كاموا انطوني السلاح ونزلوا  اني هم خفت منه شكله مرعب اول مره الزم سلاح بيدي بسرعه انطيته لعمتي

ماما خذت عمتي للغرفه واحنا ضلينه لمينه السفره واسمع التكسر مال كزاز جاي من بره وصوت ضحك عالي  باوعتلي هيام مرت ذباح كالت شكو

-ماكو شي كومن ندخل للغرفة

كمرية- شني هرج اليمكم

رؤيا -. ويشربون يبيعون اعضاء شكو شي نكس يخطر بالج همه يسووا بس مايخلون عينهم على حلال غيرهم

-انتي شني قصتج وياي

-هو اني وين شايفتج حتى اسويلج قصة وبعدين لاتعيطين نبرت صوتج تجيب التايهه والعالم يعرفون ماعدنا غير غزوان

-شقصدج لج

هيام.- كولن يالله شمالجن  كمريه كفي تره اخوج گوه كاض روحه عنج وانتي خيه رؤيا فدوة اروحلج اتحملي لخاطري

سكتن اثنينهن وهيام غيرت الموضوع شنو نحضر للعرس وشنو نسوي وكمريه تاكل باضافرها وتحجي ويه غيمة شكيت يتفقن على شي؛ عفتها ماهتميت لان حسيتها صدگ حقوده عكس هيام تخليها بگلبك على هدوئها ولسانها الحلو

تأخر الوقت واحنا بعدنا نخطط ونسمع صوت ضحكتهم من جوه وين واصل  كمنا نزلنا لكيناهم تقريباً مخلصين ذباح كاعد عالجربايه بيده جكارته وغزوان يمه يسولف شافنا  گال اي الله جابكم سوولنه جاي

ذباح- كمريه يبا  روحي انتي عملي الجاي وانتن حدرن لچاي  كفن هالهوسه لخاطر نربط الكنتور

غزوان - لايمعود وينهن وين الهوسه ذني

-چا المن خاليهن  لمضارب التفگ بعد لك وانتن يله لاتفهننن

راحت كمريه للمطبخ وهيام ربطت عباتها دخلنا يمهم همه يناوشونا اغراض واحنا نطلع بكل حاجة لازم غزوان  يجرني من ضفيرتي لو ينتظر ذباح يدير وجهه حتى يكرصني من خدي

كوه افلت نفسي منه عوزي ابجي  مرتين لگفه زمخ بي وبالثالثة  اجه جره من يمي شمره بالغرفة گله خش چوه انت لاتركد ولاتخلي البت تشتغل

اخذله دقايق ورد يتحرش دمغه وضحك  من اسعد الساعات المرت بحياتي عين بي  اشلون فرحان ويضحك ويه ذباح وعين بغرفة احلامي الي ياما غمضت عيوني  واني اندعي يتحقق

ضلينه للفجر نشتغل قبل لاتطلع الشمس كملنا كلشي وكف غزوان مسح گصته بظهر ايده واتخصر يباوعلها اندار باوعلي يبتسم شفت لمعة بعينه محت شكو الم  مر بيه

نزلت دمعته دنگ يمسحها دگدك على ضهره ذباح گله صبرت وربك عطاك بالمبارك يخوي

-هه تدري لسه  مامصدگ

-لاتبجي يبا وعلي زحمة

-من حبل المشنقة لغرفة عرسي ويه التمناها گلبي

-تستاهل عبنك ازلمه اشچ وگفت بوچه الموت وجبتها بذراعك ماطخيت راسك

-خلصت عمري اتوسل بالنوم خايف ياخذوها مني خايف اغمض عيوني قبل لا شوف هذا اليوم

-الك طولت العمر وهاي تنوعته وحرمتك گربك والخميس الزفة وحگ الي چابك بطريجي وزرعك معزتك بروحي لعملك عرس يعوضك على تعب عشته

-هم يجي يوم واردلك وكفتك هاي

-افااا وانه اخوك انت بس اتشطر وجيبلي بنوته هيج ملونه مثلك اخذها لصگر نعدل النسل بيها وخلي وكفاتك  الك هم يالله تسند  طولك لان شكلك راح تهنتك گبل وكتك على هاي  لهفتك

-ههههههه لا تخاف عليه والبنيه غير لابنك مااتصير

-ان شاء الله يخوي اندعيلي ربي يرزگني بس واحد مارايد غيره وعلي

-رب الفر الدنيا وكفني هالوكفة مايرزقك بطفل يصير يخوي وطهوره عليه نذر بس انت كون تضل على كلمتك وتسمي غزوان

-يابه وحگ فحل الفحول لاسمي غزوان  بس سويلي جاي لان راسي طگ

ردت اتحرك دفعتني رؤيا لجهة غزوان  وجرت كمريه للمطبخ لحكتهن غيمة كوه كتمت ضحكتي عرفتها خلتها براسها

راحوا كعدوا بالممشه  واني شغلت الصوبه لان الجو الصبح بس لسعة  برد واحنا سكف ماكو رجعت لكيتهم متلفلفين بالبطانيات يسولفون  خليها بالنص ورحت يم غزوان دخلت ويا بنفس البطانية

اجن غيمه وگمريه گعدت تصب جاي وتوزع دقايق نزلت ماما وعمتي شافن الغرفة  هلهلت عمتي  اندارلي غزوان ضحكت كرص خدي دمغه ذباح كله اثكل يبا

-هههه خو انت كاعدلي عالزله

-يخوي ماضل جثير اصبرر

فجر.- وانتي لج گومي  تعالي يمي

غزوان.- وييين يابه تره والله مرتي

-مرتك من تجي تاخذها من ايد خويها مگبعة بعاته

-يعني شنو

-يعني هسه مالك مره عدنا بعد لغاد لك وانتي تعالي حدددي

كالتها واجت جرتني كمت وياها واني اضحك كعدت يمها لفتني بعباتها باوعلها غزوان شالت دبه الشكر گالته لاتتنوع هيج لاهفك على عيونك

-يله يابه كلها ساعتين اتحمل

-ياهو  كالك اروح وهاي على افادك للخميس ماتحرچ

ذباح - وهذا السلاح يمج اذا تنفس ترسي حلكه بارود

-شحده يتنفس دير وجهك لغادد لك وانتي ركدي لاتحوصين

حضنتني حيل وضمت راسي بعباتها ضحكت همست ثكلي لج

-مم

-وصيري مره حوك لاتموين حتى يحسبلج حساب

-اخاف يطير مني

-والله هو حليو والبنوات عيونهن بالفكس بس لايتلهوج الزلمه مايتركج خلج گويه  كضي  من اخوانيگه

-شتكولين يجيب نتيجة

-تجيب حتى راسه

ضحكت دنگت باستني وكالت ربي يهنيكم

مر الوقت بالسوالف والضحك صار الصبح مارضوا يتريكون طلعوا للامام صايمين واني صعدت كبل نمت من التعب

الايام تمر واحنا مشغولين بالتجهيزات صح غراض قليله وغرفتنا مستعملة بس جانت بنظري اغلى من كنوز الدنيا لان من تعبه

بالاخص من گام يشتغل شفتين بليل يطلعون عالحديد ينگلون وبالنهار بالمحل اروح اوديله الغده و اشوفه اشلون امدنگ على الدراجة يصلح بيها والدهن تارس ملابسه و حتى منظارته كد ماتنزل ويصعدها؛  اتمنى افتح كلبي واضمه بي مو اطلب منه اشياء مايكدرلها

على صوتي يرفع راسه يباوعلي يكوم وهو يضحك ويغنيلي اخلي الاكل بالگاع من بعيد وابتعد اشرله باصابيعي ماضل بس هلكد  يعبس يأشرلي سهلة اندار واني اضحك ارد للبيت من كثر السعادة مااگدر بعد اكتم فرحتي

تتلگاني رؤيا واكفه ورا الباب ولازم تسأل نفس السؤال مال كل يوم  سمعتي حركة بيت اليهودي من ارد لا دنگ وترد تصعد للسطح تگعد قريب لجهة بيت اليهودي تتسنط  هواي حجي بعيونها ادري بيها بعدها متاملة يرد وگلبي يتگطع عليها بس مابيدي شي اسوي

ماضل شي عن زواجنا  كاعده بليل ارتب بالملابس

سديت الجنطه سفطتها وكمت طلعت لكيت ماما كاعده عالدرج تمشط لرؤيا الي  بغير عالم وحتى هيه عينها بالحبل الجانت رند مسويته مرجيحة رحت يمها خليت ايدي على متنها همست طير بالجنطة

-ضلت غصة بكلبي مثل الراحت ونگطعت اخبارها

-والله زوجها كال راح اجيبها للزفه

-صدگ رايه اشوف اخيتج قبل لاموت

-اسم الله عليج راح تشوفيها وتزفيني بيدج وتشوفين رؤيا مفتحه وتعوضين شكو تعب شفتي قبل براحه

-الله كريم لميتي الاغراض

-كلشي نعتازه وخابر ابو في كال باجر يدز واحد ياخذهن وكال غزوان اذا اجت رئال وشفت وضعها زين احاجي ذباح يشوفلنا مشتمل صغير حتى نستقر هناك

-اي يبعد امج خلينا نطلع منا والله كلبي خلص من الخوف عليكم

-ماعلينا هانت ام رايه راح نروح ونگابل بيت البدويه ونصير بدو نرعى بالنوگ

-عسى ماخدم المهم نبعد روحي صعدي جيبي كتب اخيتج بلكي تجي حتى تنطيهيا ادري بيهن عزاز على كلبها

-عززه واني من اسألج تكولين ماادري وينهن

دنكت مسحت على ضهرها ضحكت داارد وشحطت سيارة يمنا ثواني  وندگت الباب حيل

كامت ماما  انطتني المشط وراحت بعدها ماواصله الباب اندفرت بقوة  طگت الطلاكه انفتحت على كبرها دخل بابا الي ماضال شي بوجهه صاحي ويا اثنين مخربطين الريحة طالعة منهم گد الشرب

باوع لماما تفل بوجهه وكال بلغتوا عليه يالنكسين حسبالكم  تخلصون مني

-مو احنا البلغنا وشعدك جاي البيت صار لغزوان يله اطلع

-انعل ابو البيت لابوج بت اليهودي مارد عليج جاي اخذ بنتي استرها بدل مشيها البطال يمج 

-تسترر منوو  يالي متخاف الله

مارد اندار على رؤيا اجه طاير جرها من شعرها شمرها عالرجال وصاح اخذها صعدهااااا ----

***رئال***

الطبيب يحجي واني فاتحة عيوني على كبرهن   قاطعته گلتله عملية شنو

-طفل انابيب العملية ان شاء الله سهلة مابيها خطورة

-وليش حتى اسوي طفل انابيب اني مابية شي وحتى هو حالته اتحسنت

-حالته اتحسنت صح بس العملية جان بيها اثار جانبية واحتمال جبير يضل فتره طويلة يالله يرد يمارس حياته طبيعي

-اي ويضل شنو يعني مامستعجلين

ابراهيم-  . لااحنا مستعجلين و نريد لابنه اطفال وهذا انسب وقت واتفقنا ويه الدكتور يسوي اكثر من واحد حتى هيه مره وحده اخاف ترجع حالته تنتكس

-بس اني عندي اختناق ومااكدغ ادخل عملية

-مو عمليه مجرد تلقيح وشغلة كلش بسيطه يله لاتضلين تجادلين روحي ويه عمتج بسرعة

-مااسوي شي غصباً عني

-شنو  بابا هالحجي شصايرلج اليوم تعرفين زوجج تعبانه حالته ماصدگنه  توصل لهيج مرحلة

ام هيذام -. عوفها اني احجي وياها على كيفي وافهمها هاي خايفة حسبالها صعبة السالفة

-يله اخذي راحتج اخذيها

ردت احجي ماخلتني جرتني طلعنا بره بس سدت الباب سحبتني  من شعري حسيت فروه راسي اجت بيدها  دااصرخ حجت من بين اسنونها اششش صوتج وداعت ابني المااعرف وينه عدل لوميت امحيج يرئال

-ليش بس لان كلتلكم مااسوي العملية

-شنوو متسويها بكيفج لاحسبالج ساكت عمج لسه نسى السويتي لااا بس منتظر اسماعيل يطلع حتى يصلخ جلدج

-اي خلي يصلخ جلدي بس طفل انابيب مااسوي

-سمعي لج من الاخير عمج كوه لازم روحه عنج وكلام الله اذا دخلت هسه وكلتله ماتقبل تدرين شنو يسوي بيج وداعت ابني الراح ابره وحده ماتكلفي يخليج عمرج كله تعيشين عاجزه وهااا موبس هيج الطفل ونسوي غصباً عنج واول مايصير ناخذه انشمرج بالمصح ماطلعين منه غير عالكبر

-موتوني ذبحوني سووا الي يجي بالكم العملية ماادخل وطفل مااسوي وحتى لو غصبتوني مااخلي يوم واحد بطني اموته بنفس الساعة

-حلو الدگلج صدر وخلاج تحجين بدون خوف ماگلج مثل ماجبناج انشمرج جوه الگاع انتي واخوج السگط ونجيب اختج اتسويلنه بدل الواحد خمسه

-انتي كلتيها اختج منتبهه شنو حجيتي

-اي وشنو هو عقد كلمة وحده يحللها عليه مكانج وهم افضل اله حلوه وهادئه  ماتتذمر شيكللها ترد تم وهيه ساكته

-انتوا شنو

-احنا الجبناج من الزبالة وسوينه براسج خير وحطيناج بمكان  تستحين تحلمين بي وصار الوقت تتربين واني اعرف اشلون اربيج اذا ماطلعت روحت ابني من عيونج مااطلع اني امه

-اخاف حسبالج اختي مثلي هيج تخاف وغاح تخضعلكم اخاف اني وكفت بوجه لابنج هيه حتى تشوهه وتفتغ عليكم واحد واحد تذبحكم

-ومنو كلج العمية واني ماريد وحده نكسه مثل اختها الي شمرت رجليها بالعمليات وطلعت ويه اخو سلمته للموت لااا اريد الجبيره

- هاي متزوجه

-المن متزوجه اذا على غزوان راح يرد للسجن هو واختج مثل ماراح نشمرج جوه الكاع وهيه انجيبها جوه رجلين اسماعيل موبس اتخلفله لا حتى تخدم حالها حال الحيوانه واذا سمعتها اتنفست اسحك حلكهااا

-هاي كلها بس لان كلتلج ماادخل عمليات اغيد طفل طبيعي

-واني مااريد ابني يتقرب لنكسه مثلج

سكتت صافنه على جبروتهم اشرت هاا

-يعني كلما ما اوافق على شي تهددوني بخواتي

-وانتي منو ونهددج لاكل عقلج راح انخليج مره لابنه لاعيوني ناخذ الطفل ونردج لمكانج تكملين المحكومية العليج تره اوراق البصمات لحد الان بمكتب ابراهيم  القضية مانغلقت اصلا يله ماعدنا وقت شكلتي

-تمام غاح اسوي

-ورحمة ابوي يرئال اذا طلعتي بلعبة وكسرتي كلب هالمسكين  اندمج اسطر عائلتج كدام عيونج امحيهم كلهم 

-ماغاح اسوي شي امني اني الدخلت نفسي بهالقصة واني اتحمل اغلاطي كلها مااذي احد ثاني

جرتني دفعتني فتحت الباب دخلنا جان الدكتور بعد يسولف ويه الضابط باوعت لاسماعيل  دار وجهه عرفته مابي خير  اندار الضابط كال ها بابا بشروا  وين وصلتوا

هزيت راسي اي

-بيها الخير ان شاء الله الذريه الصالحة اي دكتور شنو الاجراءات هسه وين يرحون واشوكت تبلشون بالعملية

الدكتور- . هسه احولكم على دكتوره اسنام من اشطر الدكتورات  عدنا وهيه تتكفل بكامل التحاليل وتحدد الموعد

راد يحجي عمي قاطعته بسرعه كلتله بس كون اليوم لان باجغ مااكدغ

الدكتور -وليش ماتكدرين شنو العارض

-هاا مو موعد ال--- يعني عادي  يصيغ لولا

-لاا اذا هيج نأجل كلشي وهسه اكتبلج كم شغلة تستمرين عليهن هالايام بدون انقطاع وتجوني بعدها انحدد موعد ثاني

عمي . وسماعيل

-لااسماعيل باجر اتجيبوا للمركز مثل اتفقنا ماطول حالته مستقره لخاطر الفحوصات

-زين ليش مو هسه ناخذهم ماطولنه هنا

رد واني احس رجلية نملن من الخوف اباوع لحلگه  عاصرة نفسي  خايفة يوافق وانكشف گطعت حتى النفس اراقب حركة شفايفه ديحجي ورن فون عمي طلعه من جيبه باوع بي عگد حاجبه

رد ها ابني خير -- شنوووو -- اشوكت انهززم ويين جنتوااا -- شنووو ماتدرون معسكر اشكبره متورس حرس  ماكدرتوا اسيطرون على واحد

مااريد اسمع نفسس  طلعوا من جوه الكاااع --- منوو ويااااا--مايلحكون ينهزمون طوقوا المكااان بسرعة واني جايكم بالطرريق --

ام هيذام. خير شصاير

-اخذي رئال وطلعوا كدامي عالسيارة بسررعة

-شنو اكو ازر بي شي

-لالا واحد من المتهمين منهزم

-اشلون ينهزم والسجن مطوق

-موبالسجن ذولة خونه شامريهم عالحدود  ضابط مخابرات خاين واحد مهتلف كلب ابن كلب صافين سوه ومنهزمين

-عززه بعينهم وهسه اشلون

-روحي بسرعة ودزيلي واحد من الولد ياخذ اسماعيل

-يله هسه بس على كيفك لاتوكع

-درع وووين

-وديته لام هبه من الصبح ليش

-خابررري الولد خلي يرحون يجيبواا بسرعة ويخلون عينهم عليه وحتى رحمة خلي يردوها للبيت اني راح ابلغ الحرس يطوقون المكان بس انتي من توصلين هم اكدي عليهم

-يمعود لاتخوفني شيجيبهم علينه

-هو مايجي بس احتمال  يدز جماعة يأذونه لو يشمرون شي بالبيت

-لعد خلي درع يم اهله احسن

-لاااا لازم يرجع حتى اسماعيل  ماارده للبيت اذا مادخل هوو سمعتييي

-غير اتفهمني ليشش قابل درع راح يحمينا

-من احجي الكلمة اتنفذيهااا بدون اسئلة زايده يله فضينيي اخذي رئااال وطلعي ودزيلي واحد من الولد يجيني بسرررعة

اشرت اي هو دنگ على ابنه مخبوص وهيه كمشتني من ايدي جرتني  تنمشي حيل  طلعنا بره واني مامفتهمة كلشي بس بنفس الوقت مامصدگة خلصت اتمنيت اكمش الي انهزم احضنه اشبعه بوس على هاي السالفة

وصلنا يم السياره لكينه الحرس مخبوصه اكثر منه مبين واصل الخبر لان قبل لاتحجي فتح باب السياره وثنين دخلوا يركضون

عمتي رجعت واني صعدت  بدون لاانتيه سد الباب  ايدي على كلبي دااخذ نفس فزيت على صوت ضي همست  سلامات

-عززه بعينج كمزتيني

-صار ساعتين منتظرتج بره ويين جنتي

-سكتي وكعت بمصيبة ماادغي اشلون خلصت منها وبعدني ماخالصه الصبح انلگف

-خير شنو الصار اشو على ساعة انخبصوا حتى اني صعدوني

-واحد  مجغم منهزم بس مبين يخوف  لان عمي اتخبل من سمع يكول واحد ضابط مخابغات خاين مساعده ومنهزمين سوه؛ اثنينهم عليهم عقوبة نفي يعني موت لان خطغين

-وانتي شكو بهالسالفهة

-لاا اني سالفتي انكس غاح يسوولي طفل انابيب واذا ما وافقت يجيبون وحده من خواتي

-اي مو العبيد مالت اهلهم يلعبون بكيفهم محد يردهم

- لازم انهزم اليوم وقبل لاانهزم لازم اخابغ غزوان ياخذ اهلي ويختفي من بغداد

-سهله رقم غزوان صار عندي اني اخابره بس انتي اشلون اخلصج بعد هالهوسة شوفي الحرس اشلون مطوقينه على سالفتج المنهزم مبين شراني الي هيج خايف منه الجبان

-بس خلصيلي اهلي ومالج شغل بالباقي عسى ماانام بالشاغع ماعليه بس مااطلع اذا ما اتأكد غزوان اخذهم وبعد

-بس اوصل اخابره وهاي فكرت طفل الانابيب من هبه الحيه والله عرفتها هيه قنعتهم بالاخص من عرفت العملية سكطته

-اشلون؟؟

-البارحة سمعت ابراهيم يحجي ويه ام هيذام يكلها لاتجيبين طاري كدام احد لان اشما ضميتي الخبر يوصل لاسماعيل وراح ترد تنتكس حالته واحنا ماصدكنه يوصل لهل مرحلة بلكي الله يرزقه بطفل

-يعني مايخلف لو مايگدر

-ماادري بس بيها وبلياها راح  يستغلوج  منو ترضى اتسويله اطفال بهالطريقة الي حتى الحيوان مايقبلها على نفسه

-اذا مالحكت انهزم غاح يكتشفون اني بنيه بعدني

-حتى يجرمون بيج لان الدكتور مأيسهم  حتى الاطفال گايللهم مااعرف اشلون راح اسحبهم من ضهره

-بس خلي اتأكد اهلي طلعوا وشوفي شنو غاح اسوي بيهم اذا ماخليتهم يلحكون هيذام بس حتى يتفلون بوجه لان ماعدمني من وكت  مااطلع بت البتاوين

-عجبتيني وهاا شكو افلوس الج اخذيهن ذني حقج وانتي تعتازين لان احتمال ماتوصلين لاهلج بسرعة

-غاح اخذ كلشي الي يمهم واخلي يطلكني غصباً عنه واطلع بدون لايحسون

-اشش اجوي

كعدت عدل وصلوا صعدوا شغل عمي السيارة وداس بكل سرعة اباوع داير مدايرنه سيارات للحراسه وعلى طول مااحنا نمشي جهازه ماسكت كل دقيقة يدزهم مكان ويوصيهم يضلون حذرين هاي كلها بجهة واصراره على درع يرد للبيت جانت العجيبة

وصلنا للبيت دخل السياره  لكينه العالم مخبوصة اندار كال لضي تاخذين رئال من الجهه الثانية تصعديها لغرفتها مااريد احد يلمحها هنا سمعتي

ضي- . اي عمو زين ليش مااخذها وياي للمشتمل بين ماتطلع العالم

-لااا مممنوع كلتلج لغرفتهااا اسماعيل معتاز من اليخدمه وانتييي سمعي قسما بالخلق الكون اذا سمعت بيج متنفسة مو متحركة من مكانج اصلخج

-هزيت راسي

-اسماعيل بس يشوفوا الاهل ساعة واصعده لغرفته اريدج جوه رجلي شيطلب تنفذييين افتمهتي شنوو اقصد  اذا سألته وشكالي منج مااكلج اردج نفس الزنزانه لااا ارد اختج واخليج بيدج اجلديهاا

-حاضغ

- يله نزليي ومننوع تعتبين باب الغرفه وكلام الله اندمج يرئال

-مااطلع

نزلت ضي نزلت وراها  وهو كمل دخل السيارة للداخل اكثر  رحنا  من الجهة الثانية لان اهلهم كلها جايه صعدنا للغرفة بعدنا عالدرج ونفتحت باب غرفة هيذام  طلعت هبة عيونها حمر امبينه باجيه شافتنا حتى مااسلمت دارت وجهه ونزلت اندارت ضي غمتها بثنين اديها وهمست من هيج شمرج هيذام

-تغه بعدها زوجته

-قصدج البلا كرامة الساحكها وهيه تبوس بحذائه بلكي يرضى عليها

-حلوه اشلون عايفها

-حلوه وساحله نفسها هم بس وداعتج ماعبرها  يكومها بهجه  ويكعدها بدمغه

-ماحصلوا شي عنه

-لاا لحد الان ازر يدور متخبل وذولة ولا تكول اهله ماهامهم واصلا يتمنون مايرد ولايسمعون خبر عنه يله امشي قبل لاواحد يشوفنا حضرتهم مستعرين من وجودنا

كملت الدرج فتحت باب الغرفه تذكرت هديه هيذام انداريت للغرفه همست هاا شكو

-اوكفي هنا هسه اجي

-وين رئال

-مااطول دقيقة بس  عينج بيهم اجيب شغلة واجي 

-رئال كلشي ولاغرفته وغراضه والله يطلع من جوه الكاع ويرفعج من شعرج

-لاهو گلي وحتى دلاني مكان الشغلة الضامهه بس اوكفي هسه اجي

قبل لا ترد  ركضت للغرفة  فتحتها اجه عطره بروحي مااعرف شنو حسيت بس شي خطف كلبي  خليت ايدي على صدري استغربت من هذا الشعور  اخذت نفس  دخلت سديت الباب وراي 

رحت للميز باوعت ماكو عليه بس ساعته  وصورته هو حاضن ابنه  درت وجهي ماكدرت اباوعله مااعرف ليش بس حسيت بخنگه

دنكت عالجراره فتحتها كلها اوراق ماكو شي سديتها وفتحت الثانية هم نفس الشي وكفت  استرجع كلماته متأكده كلي عالميز

صار كدامي ميز الجربايه مبعثره حتى محد مرتبها من اهد طلعته اباوع لسلاحه عالميز الصغير انتبهت بي جراره رحت بسرعة دنكت فتحتها لكيت  كتاب شلته فتحت عيوني على كبرهن هذا كتابي المفضل

فتحت مبين مستعمل من الفاصلة واصله قبل النهاية واكو خطوط بالقلم الرصاص مثل ماجنت اسوي

سديت  دنكت اشتميته بي عطره خليته على گلبي  انداريت ملابسه العسكريه معلگه لاارادي رحت يمهن مشيت ايدي عليهن ابتسمت واني اعيد شريط وكفته كدامي وهو ومدنگ عاصر خدودي يهددني اذا غلطت يندمني

لعد وينك اشكد غلطت بحقك شو ماشفت منك كلشي بس اذيتك لنفسك

هسه ارتاحيت من رحت كلتلك عوفنيي كلتلك خليني ارجع كلتلج  گلبي مو ملكي كلتلك راح ادعي عليك كل مااشوفك كدامي كلتلك راح اندمك

سكتت كمشت ردان قمصلته عصرته بيدي همست بس اني الندمت  مو بس ندمت لاكرهت نفسي 

تعرف ليشش لان داحس بمشاعر تخنگني داحس روحي اني خاينة

تذكر من كلتلي ليش انتي بالذات لان اني دعيت عليك بالموت دعيت گلبك يوجر  دعيت ماتغمض عيونك براحة بس ماصارلك شي اني الداحس بكل هذا

انفتحت الباب دخلت ضي باوعتلها نزلت دموعي كالت ليش دتبجين

-اني احب محمود

-اي وشنو

-ليش دحس گلبي يوجعني ليش هيج داحس نفسي مشتاقتله

-منو هذا

-هو خلاني اتعلق بي  والله اني مو خاينة

-رئال شبيج

شهكت جرتني لحضنه خليت راسي بمتنها وبجيت عصرتني همست رئال شصايرلج

-دامووت مخنوكة

-لارئال مو هيذام

-جذبت روحي  عاقبت نفسي سبيتها  عضيت اديه كلشي سويت بس ماكدغت داحسه بداخلي شي دينبض  كل مااغمض اشوفه بعيوني وولج كمت مااانام حتى مااشوفه بسس مااكدغت داحسه گدامي وصوت ضربة بسطالة  بأذنيي

-ومحمود

وخرت عنها اشرت ماادري

-شنو ماتدرين مو جانتي تحبي

-اي بس ماحسيت بهيج خنگه ولاحلمت بي

حتى كلماته جانت تختلف من يجن بخيالي  مايدگ كلبي هيج

-رئال تعرفين شدتحجين

-لااا وبكل مغه اجذب نفسي دعيت عليه بالموت كدام عيونه واتعاغكت ويا عالسواغ  بس حتى اثبت اشكد كاغهته  وخليته ينطي نفسه للموت بس حتى اشفي غليلي  بس بدل مااحس بغاحه حسيت بالخنكة

-ليش ماگلتيله هالحجي ليش خليتي بكل مره يشوف دمعتج نازله ياكل بروحه ليش خليتي يتنازل عن حياته بهالسهولة تعرفين شنو سوه علمودج واشكد تعذب

-غدت بس اطلع منا

-وين ترحين وتعرفين ماكو امان غير حضنه

-غلطت بدون وعي بس غجعت توسلت بي  هو الماسمعني داغ وجهه عني

-دار وجهه حتى يعرف اشلون يحميج ماسمعج لان صرتي مرت اخووو بعد ماوكف بوجه الكل علمود

-غاح قبل لاياخذ حقه مني

-لاراح وهو عيونه عليج  تدرين من تسدين باب  الغرفة عليكم انتي واسماعيل  شيصير بحاله

-غاح يسامحني

-لوجان شايل بكلبه عليج لابراهيم ولاعشيرته يمنعوا عنج بعدج ماعرفتي هيذام  ويله طلعي قبل لايجون لان همه وحدهم اشلون كارهيج مو انوب يعرفون بالسالفة

مسحت عيوني صارت قمصلته كدامي ابتسمت جرتني رجعنا للغرفه خليت الكتاب دخلت للحمام غسلت وجهي وطلعت لكيتها ماكو رايحه وخرت البرده اباوع الحرس تارس المكان عرفت نفسي مااراح اكدر اطلع اليوم

رجعت البرده شلت الكتاب ورحت للجربايه كعدت فتحته اول صفحة مكتوب بقلم رصاص قصة فشل 

كلبتها اباوع  مخطط على كل سطر يحجي عن الاحساس والمشاعر الي تنبعث من الداخل

غلقته خليته يم راسي حضنت المخده صار السوار كدامي شدتكول عليه هسه كلشي تكوله من حقك لان صدگ اني خاينه لهيج ربي عاقبني بفقدانه

انفتحت الباب دخل اسماعيل  سد الباب درت وجهي للجهه الثانية  راح للحمام اسمعه اتقيئ ضميت وجهي بالمخده شوية واجه وخر الغطه كعد يمي دنگ حسيت نفسه قريب رفعت راسي اباوع اثر مي باقي يم حلگه  كوه اتمالكت نفسي  ابتسم كال خو صرت زين بعد ماعندج حجه

-اسماعيل وحق كلام الله اكتل نفسي بعد عني

-شنوو بعد اريد حقي

- مااكدغ عندي عذغ

-خلي اشوف صدك لوجذب

-بيك شي انت

-ااييي اريد حقيي لحدمن اضل صابر عليج لاتستغلين حبي تره خلص صبررري وياج

-دكلك مايصيييغ

-جذااابه اعرفج كولي مااريدك اگلج اي

-استغفر الله اسماعيل  غاجعه تعبانه ونفسي ماطايقتها وداعت خواتي اشمغ نفسي من الشباج بس توصل يمي

-الضاهرر اني انطيتج مجال انتي صدك مال كتل بس راح اعديهاا الج اليوم واكول تعابنه باجر وراس ابوي ادوس راسج واخذ الاريده لو موعذر لوتموتين  سمعتييي

هزيت راسي جر اللحاف تغطه ونام ادنيت بنهاية الجربايه عوزي ما واحد يحجي وياي كلمة حتى انتحر

حياتي مخربطة من ظلام لظلام مااعرف وين تصفى وياي غمضت واني اهدأ بروحي ماضل شي اتحملي راح تطلعين منا  راح تصححين كل اخطائج وتعوضين شكو شي عشتي

مر اليوم الثاني الكل مخبوص ماادري  شكو بس عمي يدخل ويطلع يصارخ يا بالفون ياويه الحرس  حتى الخطار بس اول يوم استقبلوهم ومحد اجه البيت صار تحت حراسة مشدده

درع رجعوا هو وامه گعدوا ويه عمه بنفس الغرفة عالاساس تساعدها لان حالتها تعبانه كلش عايشه عالمغذي 

يوم بعد يوم يمر واني مراقبة الشباج بس اريد احصل مجال اطلع لان بده صبري يتلاشه بالاخص من اسماعيل  زاد علاجه وصار مو بس يوسخ فراشه بليل لاحتى يتقيء وباي مكان مايهمه بس يرتاح شوية يجي يطالبني بحقوقه لان خايف يسون العمليه وينكشف من يشوف رفضي واكله بالعذر  يطلع حركة مرضه بيه بعد مااعرف منين تجيني الدفرات مايتركني اذا مايشوف النفس انگطع

طاقتي بدت تخلص واعذار ماضلت عندي عيوني عالكتاب  مااعرف استنجد بصاحبه مااعرف خايفة اتعلق بالكلمات الي بداخله اكثر من ماداحس بيهن

…واكفه يم الشباج وكت الغروب احس خدودي يحركني من كثر الضرب والدمع الينزل عليهن محتارة شسوي وماضل عندي غير نهار  ولحد الان غزوان جهازه مغلق گلبي عاصرني عليه خايفة صايرله شي

صارت كدامي مرت هيذام بالحديقة تصرخ على  الحرس بصوت عالي وتتأمر بكد  ماحلوه بكد ماوكحه ومتكبره ولسانها مكروه

اتجتفت اباوع لعمتي اشلون تتوسل بيها تسكت واسماعيل  كاعد يم ابو يضحك تكول غول عكس درع الي لام روحه عيونه للباب كلما انفتحت طفر لباله ابو اجه يشوف واحد من الحرس دخل يرد يلم نفسه ويكعد يتأمل

اخذت نفس عيني بيهم مجموعة حيوانات بلا ضمير ؛انفتحت الباب دخلت ضي  سدت الباب واجت يمي حجت بصوت مبحوح بعدج تردين تنهزمين

-شنو الصايغ ليش باجيه

-النكس انطاهم امر بأطلاق النار على الضباط الي انهزموا يعني وين ميشوفوهم يكتلوهم بدون مقاومة عالاساس خونه ووجودهم خطر

-واحد منهم هيذام  مو؟؟

-يمه اسم الله عليه من عمرهم على عمره والله ابنه يموت ورا مايتحمل هو نگله سافر وعيونه مانشفت دموعها موانوب يشوف تابوته كدامه دخيل الله

-اذا ابنهم هيج سوو بي اني شنو غاح يسوولي

-مايلحگون لان اليوم راح اطلعين 

-غزوان جاوبج

-ماكو لحد الان مغلق جهازه ومااگدرت اروحله  ادري راح يتابعوني ماراح استفاد شي بس اضركم ولاتخافين تلكيهم مخبوصين بالتجهيز مال العرس

-اخاف هم اطلع واغجع اذيهم من جديد

- اطلعين منا بليل من ينامون وعدل على اهلج علما يكتشفون غيابج انتي واصله ومنهزمين مناك اصلا

-اشلون انهزم والحماية لازمه المكان

-سمعي راح انزل اتوسل بابا يوصلني لبيت عمي واتركلج المشتمل مالتنه مفتوح انتي طلعي منه عالباب الخارجية ماكو حماية مناك

-اذا كشفوكم غاح يتعاقب ابوج

-مو بكد اسماعيل  من يتخبل وراج من يسمع بيج عفتي كل شوية يسأل عمتي بعدلها كم ساعة بس يريد يربطج بي متسودن خايف  يجي يوم وتعوفي

-الصبح موتني كتل لان منعته

-اكيد وراح يضل يضرب بيج لمن ترضين  لان حس مامتقبلته وهو تعلق بيج اكلج ميت  يگلك ماكو غير الطفل يربطها بيه لان يعرف نفسه خيخه لاشخصيه ولاشكل وانتي كلما جاي تصيرين احلى

-وحق الله اكتل نفسي ولااخلي يلمس شعغه مني

-وليشش حتى تكتلين نفسج شوفي اشلون عايشين بدل ماتاخذين ثارج على السووا بيج تنهين حياتج

-غاح انهزم واخذ اهلي منا لمكان محد يوصلنا بي  صح زواجنا باطل بس هم  اغوح لشيخ يطلگني منه وبعدها  ارد اسوي الي لازم اسوي من زمان وادوس على شكو حيوان مثلهم

-هسه اكول صدك بديتي تفكرين ولو متأخره بس بعدها بأولها حسبالهم الدنيا انخلقت بس الهم

- غاح اشتاقلج

-واني راح اشوفج بيهم وهمه يبجون على ابنهم السگط متلوع وراج كون بدل كل كف حصلتي وكل دمعه نزلت من عيون درع يطلعن من روحه وهو يعظ اديه من الحرگه

-امنيتي اخذ دغع وياي وماخلي يم هاي  المعفنه مغت المهتلف

-منو معفنه هبة

-موبس معفنة حتى تلعب النفس  صح عيونها ملونه وبيضه بس مزعجه وشايفة نفسها

-كل هالصفات وموحلوه

-اي موحلوه اصلا ماعغف اشلون اخذها هو وين وهيه ويين

-يجوز يحبها

-لو جان يحبها ماعافها وتغه الجمال مو كلشي سمعي صوتها اشلون يلعلع تعيط على الحماية

-اسمهم حرس 

-اي حغس  حغسس اغتاحي وبعدين وين اكو انثى اتعيط على غجال لو ماهيه مثله

-وليش ماتكولين فرسه وتعرف وراها واحد يكسر راس اليحجي وياها

-انتي اشبببيج هااا اشبيج تغه تلعب النفس انتي مو تگولين  اهله غصبوا

-اعصابج بنيتي خلي تولي على شنو محتره هيج

-مامحتغه ولا مهتمة ومدااشوفها كدامي ومتاكده بس يغجع يشمغها يم امها

-او يمكن ياخذها لحضنه ويكلها مشتاقلج وين اكو واحد غاصبي اهلها على وحده يخلف منها

مارديت اكلت شفتي

- اشم ريحه عطاب

-على شنو لاحسبالج اغاغ منها

-لاواضح كلش وعلى شنو  تغارين قابل جانت نايمه بحضن شخص مرلج بطيف

سكتت شويه وهمست اشتميت عطغه بالحلم

-شحسيتي من گعدتي

-غصه بگلبي حسستني  اني اشكد حيوانه وخاينه

-انتي مو خاينة انتي جنتي عايشه بحلم مراهقة بدون مشاعر 

-داحس غوحي ضايعة

-وهو راح ماضل منه لا روحه ولاحتى عطره خسر كلشي لخاطر دگة كلب غلط روحي رئال ردي لنفس المكان  كملي طريقج منه

-غاح اكمل بس مو نفس الحلم

-راح تنسي ويصير ذكرى حاله حال الذكريات الباقيه

-گلبي ديوجعني

نزلت دموعها رحت حضنتها وشهكت مااعرف عليها لان ماراح اشوفها بعد لو على وداع مكانه الي دخل بروحي فجأه

سمعنا صوت عالدرج وخرت بسرعه مسحنه عيونه طلعت افلوس جهاز عادي  من جيبها كمشت ايدي خلتهن بيها وهمست ديري بالج تضعفين

-غاح اتذكغ كل دقيقه مغت بينا

-تركي كتابه هنا حتى تعرفين تعيشين صح

-وانتي عينج بأبنه بعدي عنهم

-راح اخذه يمي اصيرله الام والاب واعوضه كل كلشي وراح اتمر السنين ويكبر وانطي الكتاب اگله بسبب صاحبة هذا الكتاب ابوك ضحى بنفسه

-وكليله بكد مادعت عليه انوجع كلبها

ابتسمت وهزت راسها رديت حضنتها شبكتني حيل ودارت وجهه بدون لا تسلم اعرفها ماتكدر صح فترة قليلة بس حسيتها وحده من خواتي

رحت للحمام غسلت وجهي ضميت الفلوس والجهاز بصدري ورجعت كمشت الكتاب وكفت يم الشباج اباوعلهم واقرا بي كلما اوصل يم كلمات مخطط جواها  اغمض  وابتسم كانما جان يوصلي مسج بيها

تأخر الوقت الكل دخل واني بعدني واكفه الكتاب بيدي ومنتظره رنه من ضي مرت الساعة والثانية لا اسماعيل  صعد ولاضي رنت تعبت رجعت كعدت عالجربايةخليت الكتاب وتمددت اقل الربع ساعة واسمع صوته يصعد عالدرج

سحبت الغطة بسرعة وغمضت انفتحت الباب دخل سدها ورا اجه يمي گعد  همس وخيراً خلصت منه صار فطيسة معفنة

مارديت

-بس الليلة تنامين وحدج باجر تنامين بحضني

غمضت حيل

-ماضل بس ابنه كلها كم يوم واخلي ابوي يخلصنا منه مثل ماخلصني من قذارة ابو ونعيش مرتاحين

عصرت جف ايدي

دنگ راد يبوسني اجت ريحة مكروهة گوه اتمالكت نفسي لا اتقيء استوني ادفعه مااحس غير الدمغة اجت براسي  تفل عليه وكام ضايج

عضيت شفتي حيل اهدأ نفسي ماضل شي اتحملي

نزل تمدد بفراشه وهو يتحلف مالي بس اليوم اخذت نفس لزمت الجهاز اندعي ربي يصبرني ؛اكثر من ساعة وهو يتوعد اشراح يسوي بية لحد مااختفى صوته

وخرت الغطة شهكت النفس بقلة صبر انعل بروحي على السويته بيها ؛ باوعت للساعة عابر نص الليل شلت الفون لكيت اربع مكالمات فائته من فرحتي نزلت دموعي وضحكت سوة

رفعت راسي عالكيف باوعتله رايح بالنوم فاك حلكه

كمت عالكيف صار الكتاب گدامي تذكرت من حذرني اذا طلعت منا راح يخليني اكل روحي ندم

درت وجهي اذا وگفت بوجهك قبل هسه مستعدة احاربك وهم اطلع

نزلت رجلية كمت مشيت على عالخفيف وعيني بي اخاف يگعد  وصلت للباب كمشت اليده صكيت على سنوني فتحته درت وجهي بعد على نومته  رديت عصرت نفسي وسحبته عالكيف سويت مجال قليل طلعت منه ردت اسده خفت يگعد عفته مفتوح

البيت هدوء وظلمة  اتلفتت اي بشر ماكو شلت رجلي نزلت الدرج امشي على اطراف اصابيعي  اذا جنت خايفة من ابراهيم رعبي من جماعة هيذام اضعاف لان اعرفه موصيهم يلگفوني

ايدي على گلبي امشي وعيوني تتجول گاطعة حتى النفس  ماصدگت خلصت الدرج دااعبر الصالة ولمض الفون رديت بسرعة خليته على اذني وهمست نزلت راح اطلع من البيت

بعدني احجي واسمع صوت عمي رج البيت رج وهو يصيح رئااااال

احس الدم جمد برجلية بعدني مامندارتله وفتحت عيوني على كبرهن واني اشوف باب المطبخ انفتحت بدفرة  ودخل هيذام  …

لاتنسوا التصويت…