تحميل رواية «شيء من رصيف الدم» PDF

شيء من رصيف الدم

بقلمي: leo Alfatlawi

بارت الرابع والعشرون

***رئال***

هو يحجي وگمزت هبة اجت تركض لزمت عمتي فاتحة عيونها على كبرهن اشرت شنوو

عمتي- بس على كيفج اهدي  ساعة  ويطلكها

- شنوو ساعة وبابا اشلون رضه مو عالاساس تزوجوها لواحد من الحرس

-ماقبل هيذام كال تردون تفضحونا وبعد كم يوم يسولف لجماعته ويطش الخبر ونروح ورا الشمس لاتنسين ابوج مطلعها على مسؤوليته وهم فكرنا صح ؛ وهم نخلص من هوسه هيذام حتى  يترك قضيته لان نعرفه اذا صارت بأسمه حتى لودقيقة وحدة بعد مستحيل  يفكر يردها للحجز

- وتساوون هاي الحثالة بيه

-خدامة مااخليها جوة رجليج يااخليها براسج ولج ساعة بين مايجي الشيخ الثاني يطلكها كل عقلج انتي تدرين ابوج عرض عليه يسجل البيت بأسمه ويعوضه بمنصب يسوى منصبه اضعاف يالله قبل يسوي هيج

رادت تحجي وصاح الشيخ بوية انتم وياي

عمتي - اي شيخنا نسمعك  كمل

- بابا رئال اذا موافقة سمعيني صوتج حتى نتوكل ونلبش بالعقد

شلت راسي لكيت ضي واكفة عالدرج تباوعلي دموعها تنزل وتضحك  سوه اشرت اااي

لاارادي  طلع صوتي واني اكول  نعم

-على بركة الله كالها وبلش يعقد

هو يحجي واني جسمي كله يرجف اباوع لادية اريد اسيطر عليهن اسدهن مااكدر دكات كلبي تريد تطلع من صدري احس روحي بداخل  حلم لحد ماصحاني صوت هيذام وهو يجاوب

غمضت اجه غزوان بعيوني نزلت دموعي همست كلها دقايق راح البسلك الاسود وابجي عليك

حسيت ايد على متني فتحت عيوني ؛ عمتي يمي واكفة تخزر بيه بكره مسحت عيوني اسمع الشيخ يبارك لهيذام وصوت رجال خشن بي نبرة تعصر الروح يگله وهاي رفة گلب ابوها صارت الك كل دمعة مكانها روح

هيذام - بس اثبت لخاطر لاشيل گلبك من الاساس

-خليك مثبت على كلامك لحد مااكملك المهمة  وارد الباقيات ياابن النظام

-اثبت واسحگ روس تتحرك بهدوء حتى  لااخلي طشارك اعلى من روس الخونة

- مو رافد الدغش الي يطشر راسه ولابت رافد التنغصب على شي مارايدته

ديرد وجرتني عمتي مالحكت اسمع شنو حجه اخذتني سحل للتخم دفعتني كالت كعدي هنا لاتتحركين

هبه - منو هذا الرجال اشو يهدد وصوته يخوف

- يمكن شيخ خاص وكيل عن القاصرات الماعدهن اهل وعنده وحده من اهله جوة ايد هيذام الي هيج ديگله

-اسماعيل بالاستقبال

- لاخطية  كاعد بالحديقة منتظر راح يمه ابوج الدنيا ماسايعته منو جان يصدگ هيذام هيج الله يهدي ويوكفله

- كون عاد يلزم لسانه ومو كل شوية يطلگ وتعال هم لزموا حراسة كم شهر وخلي گلبك بشيشة اخاف احد يدخل ويشوفها

- لااليوم يكمل المشتمل  گبل يعقدها ويرحون هناك بعد لايوصلون هنا ولااحد يوصللهم خلينه نرتاح شوية

- مم واني تعوضوني بدل هالموقف سفرة اني وهيذام على حسابكم

-والله على حسابي شهر كامل  بس قنعي

-اقنعه بس مو هلكد عمة دخيلج  شهر وهيذام عزة غير ارد بعربانة معاقين

- ههههه لاتغير هيذام رب الي خلاه يخلي ايده بأيد ابراهيم بعد الحرب الجانت بينهم مايدللج ويغير تعامله وياج

- صدگ بابا راح يسجله هذا المكان  كله اله

-والله شكلج خلي بخلصنا الشغلة هسه وبلكي يقنعه بفلوس لان تعودنا هنا وجماعته ماخذة رجلهم عليه

- لعد شنو عمه قابل نطركم صدگ دتحجين مالج شغل اني اقنعه بس هااا من هسه اكلج اسماعيل ومرته ممنوع يدخلون لهنا الصراحة مليت واني اتعذر لصديقاتي يجيني هم اريد اخذ راحتي

- بس اليوم اتحملي وان شاء الله يتم كلشي ونرتاح اووف صدگ هيج وفضت على خير بينهم الحمدالله يارب

قاطعها هيذام  بدخلته اباوعله ملامحه كلها شر تگول داخل بين شياطين مو بين اهله صاحت امه يمه ها خابرتوا الشيخ

دار وجهه كأنما مايسمعها  اشر لضي راحتله تركض دنگ همس يم اذنها هزت راسها اي وضحكت دمغها ودفعها دخل بدون لايباوعلي راد يصعد

راحت امه ركض صارت بوجهه باسته من متنه وكالتله هسه رضيت عليك صدگ

- هه ومنو گلج اني منتظر رضاتج بعدي عن طريقي

-انتظر تره هبة زعلانة

-سفطيها بصف ابوها انام ساعتين واگعد اراضيهم سوة

-شنو راح تنام لعد والشيخ راح يجي

-ينگبرررر يم رجلج لحد مااگعد راح اصعد اذا حسيت نفسس مو اسمع صوت كفيلج محمد انزل احرگ ابهاتكم سمعتييي

-اي اي اهدأ شبيك هسه اطلعهم بره بس ردت اسألك شسويت ويه عمك 

مارد دفعها وخرها عن طريقه وصعد صوت دبجت رجله عالدرج وحدها تسبب رعب من شوفة وجهه

دارت وجها تباوع لهبة وتهز بيدها ماعاجبها اشترتلهن يلا وندارت طلعت كامن لحگنها  اجت ضي گعدت يمي كوة لازمة ضحكتها اشرت شبيج

- كل هذا الصار وتكولين شبيج

- تغه كلها ساعتين ويطلگني

- صدگ رئال لو جان واحد غيره شنو جنتي سويتي بعد هالحصرة

- مااقبل اكيد

- راح يغصبج

- ماعندي شي اخاف عليه شنو يسوون يهددوني بالحجز عادي المهم ضمنت ابنهم يموت بدوني وبس اطلع منا يتخبل

- تدرين گاعد هسه يم ابو حلگه شاكه من الاذن للاذن الدنيا ماسايعته عينه بالساعة اشوكت يجي الشيخ ويردج اله

- حقه صاغ كم شهغ متاني هذا اليوم يله ماضل هواي كلها ساعتين  خلي يزيد حماسه اكثغ

-حتى تكون الضربة اقوى موو

ابتسمت

- مااتصور اقوى من الضربة الراح تحصليها

-كال ما الي يمج بس منصبي وهياتني كملت شغلي بقه اخغ صفحة من قصتي وياهم اغلق الكتاب وغجع ويا

- وخواتج مافكرتي بيهن

- مااكلج مامشتاقتلهن بالاخص غاية بس حرگة گلبي على غزوان طفت شكو حنية بداخلي

- تكدرين تكملين من غيرهن

- الي گدغت ابعد عنهن كل هالوكت اگدغ حتى اعيش بدونهن واكيد غاية غاح تسامحني من تعغف اخذت حق غزوان وغؤيا غاح تبطل تكول عني ثولة بعد ماتعغف شلت عنها قضية جاسم

-راح تشيلين قضية ابوج

- بعد ماانهزم وادز صوغ لابنهم بالبدلة واتأكد منه اتخبل ودخل المصح اغوح للمغگز اقدم بجاسم شكوة بالتحغش وبالتعاطي  وحتى بالخطف غاح اكلهم خاطفني من جنت طفلة وسجلني بأسمه حتى يشغلني وجان يهددني اذا حجيت يبيعني لاصدقائه  واطلب تحليل دم

- هيذام يحرگج

- لو ماهيذام جان هسه كاتلته وماكله احشائه ولاتخافين على هيذام  اول وتالي غاح اغجعله كلها كم يوم بس خلي يطلگني بالاول حتى اگدغ اتحغك واكمل البديته

- بديت اخاف منج داحس اكو اجرام بداخلج رئال شصايرلج

دااحجي وقاطعني صوت هيذام وهو ينزل بيده الفون مخبوص  اجه بسرعة دنگ شال السلاح جان عالميز وطلع يركض ويصيح بعلوا صوته اخذواا الولد وطلعوا گدامي احموووااا

دخلت عمتي تركض على صوته بعدها ماحاجية ودخل ازر يركض صعد فوك بكل سرعته ثواني ونزل بيده سلاحه لزمته امه صاحت وين ولك

- گلتله لااااا طلعه كلتله راح يحركهااا بيناااا

-منو هذااا الطلعه

- سألي ابنج اخاف عايز اجرررام كملها بالدغششش

-ولك شكووو لاتوكف گلبييي

- ماكوو شي بس وخرري عن طريقيي رحمة لدينج خلي الحگ

- يمه سودة بوجهي وين تريد واخوك ليش هيج انخبص وكلام الله ماخليك تطلع اذا ماتكلي شكوو 

- لازمين اكبر خلية بمساعدة الدغش والخبل ابنج رايحله يساندة وحده واذا لگفوا حتى جثة مانحصله بعد

لطمت على وجها وهو طلع يركض همست ضي دساار

-شنو دسار ؟؟

-دسار صاحب شكو شغلة عوجة يخنس ويصيد الروس الكبار صارله يومين مختفي وهيذام مخلصها مخابرات بالختلات عرفت ديحضرون شغلة جبيرة والي ساندهم ويزودهم بالمعلومات هذا الديحجي عليه ازر

-لعد موتكول عمتي هذا شيخ يكفل الماعدهن اهل

- ها اي وگد مايفتر بالبيوت ويعقد بنات قاصرات صارت عنده معلومات عن شكو بيت  مشكوك بأمره

- واذا ماكدغوا يلزمون الخلية شنو يصيغ

- كلشي ماكو بدل مامطلقة تصيرين زوجة شهيد

- عززة

دخل عمي وورا اسماعيل والبنات كال شصاير

عمتي- هذا شيخ دغش الجبتوا  يكفل رئال منطيهم مكان خلية مااعرف شنو راحوا يركضون 

-دخيل محمددد بعده ماطلع الله ينعلك هيذااام

- شكو شصاير غير تفهموني منو هذا وليش هيج اخبصتوا بي

- ازرر ويننن

-  راح يركض ورا اخو  يمة سودة بوجهي يعني هيج  خطرة

- يكلولها الدغش تكول منووو يكلها خلية تكول خطررة صدگ تحجييبن اشلون خليتي يرووح انتي والكلببب اذا ماضيعتواا ابني ماترتاحوون

- دخيل الله ابراهيم فدوة اروحلك خابر سوي شي لحگ مابعدوا يمه ولدي راحوااا اصخام بوجهي

هبه - فكررر بعد ماخلاها بأسمه دخلته للموت

اسماعيل- شنوو بأسمه هسه يطلكها غصباً عننننه اسحگ راسج اذا عدتيهااااا

ابراهيم- يابه كافييي هسه وقت عركاتكممم

اسماعيل - ماسمعتهاااا شتلغي القندررة تگلك باسسسمه هسه تردهاا الي ولا وكلام الله افلش البيت على روسكممم

- اهدأ ااابني كلها ساعة بس يرد هيذام وتردها لذمتك كافي لايصيرلك شي

- عسى ماارد عسى راد بتابوت محمل الله يحرگ جثته ويخلصنا منه وااانتيي لج حيوااانه شكوو ضاله هناا كومي صعدي لغرفتيي يله

اشرلي عمي كومي وكمشه خايف يهدأ بي لان كام يرجف كامت ضي جرتني وياها رحنا لغرفة عمتي رحمة دخلنا واسمع صوته عاط بره ليش ماصعدت وعمتي تكله مايصير تگعد بغرفتك اصبر اشبيك اسودنت

-شنوو اسودنت شنووو اصبرر اضحكون عليه انطيتوها لهيذام حتى يردها للحجز

-ياا صدگ تحجي يااحجز  ومنو يكول يرجع عدل انطي مجال

بعدها تحجي وهو اتخبل موتكول كالت انطي مجال تكول كالتله مانردها ؛ اسمع العياط والتكسير وين وصل من غير صراخهم يحاولون يسكتوا لان انجن رسمي

ثواني واسمع الهوسة علگت الي يهدأ بي والي يتصل يريد هيذام يرد حتى يرمي اليمين والي يدعي عليه

اكثر من ساعتين وهمه على نفس الصراح لاا هيذام رد ولا اسماعيل هدأ حتى صوته راح گد ماصرخ وكسر لمن انطوا ابرة مهدأ  شوية وصار هدوء اخذت نفس براحة همست ضي ان شاء الله ارتاح كلبج

- مايجي واحد بالمية من التعب البذلته حتى يوصل لهاي النقطة

- اذا اختفيتي شراح يصير بي

- تدغين شنو جانت امنيه غزوان

- يشوف راية بدلة العرس وانتن داير مدايره اطشن جكليت

- وتدغين اسماعيل شنو سوه بدل البدلة لبسها اسود ومكان لمتنا و الجكليت خلانا نحلم نوصله و نغش مي على گبغه مو نزفه

- جان تگدرين تختصرين كل هذا وتكتلي

- واني مااغيده يموت لااا الموت هواي عليه المثل هذا يعيش حياته بمصح عالصدمات حاله حال  الحيوان النكس

- انتي حوبة سحر بي

- منو هاي

سكتت ودنگت  اباوعلها بلحظة تغير وضعها من الفرحة للانكسار

رحت گعدت يمها شلت راسها بيدي عيونها كلها دموع اشرت منو

- طفلة كل حلمها تلعب بالمرجوحة بعد ماترد من المدرسة تنتظر امها تكمل شغلها حتى تنطيها الاكل الزايد من الهمج ذولة

- شصاغلها

- نهى طفولتها بحيونته دنت نفسه على طفلة عمرها ثمن سنوات اخذها لشقته  اعتدى عليها ومو هيج لااا ماتركها لمن انتهتت بيده

- اشلون ماسمعتوا صوتها زين ماافتقدتوها امها وين عنهااا

- استغل الكل نايم الظهر وامها بالبيت متعودة مثل كل يوم تخليها تلعب بالحديقة لحد ماتكمل شغلها؛  وهيه طفلة مخوفها وكاتم صوتها صح فكدتها امها بس لكتها منتهية اخذوها للمستشفى بساعتها سوولها قلع رحم لان جان متملخ لبالهم يلحكون بس ماتحملت ماتت بدل مايشمروا بالحجز حتى ياخذ جزاته  اتكتموا عالسالفة وهددوا الاهل اذا حجوا يضيعوهم

- لهيج هيذام جان يعذب بي

- لان هو الرباها كبرت على ايده جان رايح بمهمة  من رد تكول كلبه حاسه اول مادخل سأل عنها كالوله تكهربت ضل شهرين مايكدر يدخل للحديقة حتى لايشوف مكانها خالي

- انتي كلتيله

- لا امها ماكدرت تتحمل بعد تشوف اسماعيل كدامها يطلع ويدخل وضحكه ولعبه ودم بتها اندثر

- هيذام  خبله ؟؟

- اااوف بوية من عرف شسوه لاخله حرگ بالتيزاب لا خله سحل لاخله لسعات كهربايئه عذبه اسوء انواع التعذيب اخذه هو واهل سحر بدون علم اهله لبيته كعدهم  وعلكه گدامهم كام يشلع منه لحم ويخلي بحلگه  بعد مانهى رجولته بالتيزاب ماتركه لمن اختل عقله ماتحمل كد التعذيب رده شمره كدام اهله يرجف ويتصفن محد يعرف شبي اشكد عالجوا مافاد لحد مانقلوا للمصح النفسي وهاي سنين هو هناك علاج واحسن دكاتره گوه ردوا للطريق وطلعوا وهم شمروا بالمشتمل لان يخافون منه على ساعة تجي الحالة وهم يقرفون منه لان حاجته جوا

-واهل البنيه وين

-الابو صار بي جلطة ومات والام راحت محد يعرف وين ناس تكول اتخبلت وناس تكول تمرضت وماتت من وكتها اختفى اثرها

- يعني جنت عايشة ويه واحد نفس الحيوان الكتل اخيتي

- وهاي انتي اخذتي حقها وحق اخيتج

- ههه جانت امنيتها تلزم لعابة حقيقية مو خياط من ايد ماما ياما نامت بليل تبجي جوعانه؛ تتلكانه  للباب عيونها بأدينه بلكي جايبين ويانه چبس لو حتى خبزة

- الفقير كون مايعيش

- لاا ليش موذنبنا انخلقنا هيج ولاذنبنا يحكمون علينه بصفة الضعف

- تردين تعيشين صح كون تسحكين وتظلمين والاهم تفلين على كلبج

- وذني كلهن سويتهن وصلت للنهاية

- اول ماطلعين منا راح احضر اموري انتظرج بس تنطيني اشاره انو راح تسلمين نفسج اخذ بابا واروح لغير محافظة بلكي  نعيش اخر ايامنا بكرامتنا

- يعني بعد ماشوفج

- لاا عود اسويلج كليجة ام التمر وخبز عروگ كل فترة امر عليج للسجن

- اذا طلبت منج دوغين خواتي غاح تسويها

- ومااكعد لحد مااحصلهن واجيبهن يشوفنج هاي اذا مارحت گعدت يمهن لان راح احبهن على محبتج

ابتسمت نزلت دموعها  سحبتني لحضنها  عصرتني وهمست ليش دنتوادع

- لان وصلنا للنهاية

- لالا رئال جذب والله مااكدر بدونج

- قبلج كلتها لغزوان وغاية وهاي گدغت

- اني ماعندي گلبج ولاعندي صبر رايه لاتشوفيني هيج اسولف والله جذابة  اموت بس ابعد عنج

ـ غاح تعوضين مكاني بيهن

- خلينه ننهزم سوة هو راح يتخبل والله هاي اذا ماانتحر

- وهيذام

- راح يسامحج والله

- واني مااتعودت اعوف دين وغاي هاي هيه عشت هواي اكتفيت خلي انطي مجال للبعدي

وخرت عني مسحت دموعها تباوعلي بضوجة ضحكت تفلت عليه ودارت وجها

- تغه اني صديقتج مو امج

- وسم وانعل ابو هيج صديقة ولي يله اكوم اشوف شنو صار احسن مااكابل خلقتج

ضحكت گامت طلعت واني تمددت عيوني بالسكف عقلي يم هيذام اشلون گدر يقنعهم ويخليني بأسمه واشلون انهزم بعد مايطلگني

لليل واني مكاني لا هيذام رد ولا اسماعيل استقر بالاخص من غلق جهازه هيذام  اتخبل كام يروح ويجي مايعرف شيسوي اسمع صوت ابو يتوسل بي يهدأ وهو يصيح بس اشوفها شوية

مر الليل ماگعد ولادقيقة كلما اسمع صوته يمر بالي نومة غزوان يم الصوبة لام روحة من التعب غافي بمناظره  احس گلبي يرفرف؛  ماصار الصبح واله  اسماعيل وروحه بهتت من البجي  غمضت براحة اول ليلة انام بهيج فرحة

يومين على هاي الحالة البيت دخل انذار لايگدرون يهدوا بعد ولايگدون يصيحولي يخافون من هيذام

كاعدة العصر بيدي الفون ادگ برقم غزوان القديم واصفن متأملة تفتحه رايه واسمع صوتها اخذ عزا منها وابجي الغصة الكاتمتها قبل لااختفي وتضل حسرة بگلبي الدموع عليه ؛ انفتحت الباب دخلت ضي گالت هاا مامليتي

- انطيني غقمة الجديد بلكي تغد عليه منه

- والله ماكو مغلق وخواتج منهزمات اكيد مايفتحنه  حتى لايراقبوهن منه

-شنو سويتي بالطلبته منج

-ولو هيه مجازفة بس كلشي يهون لخاطرج  حضرت ذهبج وشكو افلوس جامعتهن وكم قطعة ملابس خليتهن ابيتنا يم الشباج حتى اول مايرمي اليمين هيذام اطفرين وهسه يله كومي تعالي وياي

- وين ؟؟ وشو صوت اسماعيل اختفى ليش

- لان عمتي طلعتله بجذبة بس رادت تهدأ الوضع لان شافته انهار وابراهيم اتخبل على ابنه ذب الصوج كله بيها كالت لاسماعيل رئال تكول غير مكان الغرفة للثانية حتى شباجها يكون عالحديقة واكبر شوية ناخذ راحتنا وذيج الصغيرة سويها للاطفال

-ومشت على عمي

-لا بس أيدها لان اسماعيل تعب تالي من سمع هيج طار ماصدگ  اخذ الولد وراح للمشتمل  يركض وهاي صار كم ساعة فلشوا الغرفة ودينكلون وعمي وصه الولد يجيبون صبغ للثانية حتى يحضروها للطفل وهم تشغله شوية بين مايرد هيذام

- اشلون وضعه

- حالياً طاير مثل الفراشة من غرفة الغرفة بعد رئال طلبت منه وهو مايصدگ يفرحها وعمي هم كيف خلص من نگته وأمن عليه لان عنده خفر عاد تركه يم الولد بالمشتمل يشتغل بنشاط  وهو طلع راح بلكي يحصل خبر عن هيذام حتى يتصل بي ويطلگ عن طريق الفون

-اكو بشغ يستعجل نهايته اعزازة بيده

- كون صدگ بيج حظ وتكملين للاخير بدون خوف هسه تركج من هالزبايل وگومي وياي خلي  نظف غرفه الافندي حتى يقتنعون متقبلة الوضع لان حسيتهم بلشوا يشكون بهدوئج اخاف يحبسوج وانوب تخرب كل خططنا

- تمام وغغفة منو منهم ماشاء الله كلها هنا افندية

- المهتلف

- بول تيغي ليش زوجته وين

- طلعت زعلانة اخذت ابنها وراحت لبيت امها  عالاساس تلوي ذراع هيذام لان اتصلت بي بدل مايرد هفها بحضر

- وعمتي وين مو ماتقبل اطلع منا

- انطمرت  اخذت علاج ولفت  راسها من هوسة اسماعيل كالت حتى للعشا لحد يگعدني

- مم وهسه شنو المطلوب

-تكومين وياي ياحلوة  نرتب الغرفة مالته لان السنيورة عافتها مزبلة والمهتلف اذا رد وشافها بدل مايطلگ يوكف عالدرج ويصيح شكو واحد اكول  اسمه  يردد الشعار ويلحگ ربعه

-وليش مايغوح يسحلها احنا شكو

- لااشلون اذا مايعلن طبول الحرب ويسويها اباده جماعية مايرتاح عود بعدها يروح وراها يخلي طلقة براسها ويرمي اليمين  كومي لج قبل لا تصير الغروب عود لاتخلين ايدج بس تعالي وياي اضوج وحدي

اشرت اي شمرت الفون وگمت وياها طلعت؛  البيت هدوء ماكو نفس صعدنا فوگ دخلنا للغرفة عطره تارس المكان بكد مزبلة مرته

سحبت الكرسي وكعدت وضي ترتب وتباوعلي صفح ماتحركت لمن شفتها شالت كل غراضها يالله كمت اساعدها كسرت خاطري لان تتماطل بالفرشة اماطل ماتكدرلها

غيرنا الفراش رتبنه  الغرفة هيه راحت للميز تعدل واني فتحت الكنتور اعلگ ملابسه

اباوع كلها عسكرية ماعنده مدني صفنت على الكمية  صاحت ضي شبيج

- هذا مايطلع مثل البشغ يعني ماعنده اصدقاء

- لا عنده ليش

- لعد شنو يلبس اشو كلها جيشي وانوب عدد اللثامات بگد بالة باب الشغجي هذا يطلع يتونس لو يغتال

- حياته كلها مراكز  وخفارات  اذا فكر يطلع كلش للشمال وهم بمهمة يجيبله واحد ويرد بي لبغداد سحل

- واني اجيت عالجاهز طيغت المنصب

- الرتبة الرررتبة وعوفج منها تعالي ماطولنا خلصنا خلي نلعب بهذا المكياج ولج كله ماركه بت اللذينه

- بفلوس المهتلف مامصدگ عنده وحده وجهه مصفح

-عدها وجه مصفح ومكضيتها تدلل بحضنه احسن ماوجه حلو ومخلصتها راجديات  وزنزانه  دتعالي كافي تعبنا خلي اتسلى بيج شوية  والله عاجبني افتح كوافير

- حلوه خوش شغله لعد ماتفتحين

- اخاف مادبرها

- لا والله مغه سويتيلي جان شغلج كلش حلو

- دتعالي خلي العب واعيش الدور ماطول ماكو احد خليني اطلع المواهب المكبوته

- وينهم صدگ ماكو احد

- ازر اخذ مرته لاهلها وراح وره هيذام  لان دسار محصور بمكان كلش خطر ووضعة تعبان

- عزة وهسه

- مااعرف من شوية سمعت ازر يكول لابو مااتصور يطلع منها ورطة الدغش ورطة بس ربي يخلصه منها اذا عنده بخت نحصل جثه كامله مو نطلعه عدل

-يعني شنو غاح يموت

-لااسم الله على گلبه الله لايگولها بس هيذام كلش تعبان ومحتار حتى من خابره ابراهيم و

-وشنو گله مااغد اطلكها بالفون مو ؟؟

سكتت

ابتسمت ؛ عضت شفتها اباوع لعيونها دمعت دنگت بسرعة سحبت الكرسي واشرتلي يلا تعالي

ضحكت ورحت كعدت خليت ايدها على شعري وهمست بغصة اعدله الج شوية

- سوي الي يعجبج هو بعد ما يسوى اطوله

- راح ارتبه الج بگصه حلوة  بس گومي غسلي لان معفن

- ههههه دگصي وبعدين فد مغه اغسل لان منو يگول بعد احصل مكان بي مي

اخذت نفس وسحب المگص اعرفها مقهورة وتريد اطلع حرگتها بشي؛  رغم السويته بي وادري بي ضايج مني بس ماتوقعت هيج رخيصت بعينه

بلشت من شعري واخذت ايدها لوجهي نسينا نفسنا بين سالفة وضحكه صار واهس اكثر  رحنا لغرفتي نضفنا جسمنا لزمنا سرة عالحمام جلف؛  رجعنا لغرفة هيذام اتربعنا يم الميز نرسم  بخلقتنا ونمسح عشنا الاجواء الضحك اللعب الي يشوفنا مويگول يتوادعن لا يكول ماكو هم على گلبهن  لحد مارن فونها فصلته ودزت رساله اشرت شكو

- ماكو بابا ديكول وينج كلتله راح ابات يم رئال ماكو احد بلبيت

- يله اني هم تعبت و نعست صدگ اكوم اغسل وجهي

- ولج والله حرمات حلو خلينه نستمتع شوية ونعيش عيشة هوانم كم ساعة عود من يأذن  الصبح نغسله

- هم صدگ يله لمي الهوسة قبل لايجي احد

- محد يجي ومالم شي واسهر اليوم هنا الفرشه جديده و احنا فرشناها خلينه ناخذ حقنا منها

- واذا اجت المصفحة

- ولج زعلانه ماترد وهيذام اقل شي اسبوع يالله يكمل مهمته دكومي خلينه نهوس بغرفته الي تكول قصر السلطان ممنوع واحد يوصلها قحط ميدري كن الدجاج براسها الف مره

راحت شمرت نفسها على الجرباية ردت الم الهوسة صاحت كوميي تعالي كعدي يمي شوفي هاي الكتب الجايبها صاير مثقف ابو الجرائم

تركت الاغراض رحت يمها واشوفها فاتحة الجرارة مليانه كتب بعلم النفس لوتكول شفت كنز؛ بدون شعور تربعت عالفرشة  اشيل واحد اشوف الثاني احلى ضعت بينهن ونسيت روحي؛اكثر من ساعتين   واني غاطة راسي بيهن حسيت صارت خنسة شلت راسي  لكيتها غافية مديت ايدي دااگعدها كسرت خاطري فاتحة حلكها من التعب

المكان هدوء  والسبلت يضرب والكتاب بعدني مامخلصته اباوع للساعة بعد عن الاذان ساعتين طمعت اكمل الكتاب للاذان

درت وجهي عدلت المخده اتمددت رديت اقرأ من صفحة لصفحة مر وقت مااعرف شكد بس رحت بالنوم بدون لاادري

بين نايمة وبين گاعدة حركة خفيفة على بشرتي دفو ونفس بركبتي حركت راسي احست انطبعت بوسة خفيفة على شفتي فتحت عيوني داصرخ وانسد حلكي

اباوع هيذام بطرگ البنطلون مدنگ عليه وخر شعري عن وجهي باوع لعيوني وهمس دخيل محمد اشكد ركضتيني وراج …

***رايه***

غيمة  تستعجلهم واني اتلفت  من الرهبة حتى نسيت الالم ماصار كدامي بس الغرفة ركضت دخلت بيها دنكت شمرت المخدمة طلعت نظارات غزوان  وفونه شلتهن وطلعت اركض بكل سرعتي صار الولد كدامي ديسد الباب ضغطت على سنوني واجيته من ضهره سحبته حيل بكل وحشية ودفعته عثر متفاجأه لباله مختله عقلياً

جريت الباب وطلعت مثل المخبلة اركض حافية مااعرف وين رايحة  العالم تباوع واني مستمرة بدون عقل دخلت الشارع الثاني احس نفسي انگطع وشي اجه بخاصرتي وگفها فجأة ؛ لزمتها حيل ودرت وجهي وراي خايفة احد لحگني واحس الالم شل روحي عصرته حيل ودنگت مغمضة بقوة متأملة يخف شويه واكمل

ثواني ورفعت راسي ليفوگ دااخذ نفس وانتبهت الناس عيونها عليه  خفت من نظراتهم رغم الشارع متروس اطفال بس المنطقة ترعب ضغطت على كليتي ودنكت مشيت اسحل بنفسي بس اريد اوصل دعبر الفرع واكفت واني اشوف ماما جاية تمشي سريع وتتلفت  احس امن كلبي رحت يم الحايط كعدت اجتني تركض دنگت عليه صاحت سوده بوجهي شطلعج هيجج وين رؤيااا

- ماما راح اموت لحكيني

- من عمري على عمرج  كومي وياي بسررعة بس هسه ادز رؤيا اتجيبلج علاج بس خلي نرد قبل لايشوفج احد

- ماما غيمه باعتني

- يمه صخام بوجهيي رؤيااا وين ولج يمه بنيتيي

- لالا مو بالبيت  طلعت تشتغل وهيه باعتني للمشعوذة ماما باعت شرفي اخت غزوان بفلوس

وكفت وجه باهت تريد تحجي ماتكدر همست بترجي وصلولج

هزيت راسي لا وشهكت دنكت اخذتني لحضنها وبجت بصوت عالي فززنا طفل وهو يكول خالة هاي مخطوفة

مسحت عيونها بسرعة وردت لاخاله مابيها شي  مريضة

-اصيحلكم بابا

-لاحبيبي هسه اني اخذها للمستشفى بس روح منا

مارد اندار راح يركض رد بين الجهال لزمت ايد ماما وهمست راح يعرفونه كعدتنا تجيب الشك فدوة كومينا بسرعة

اشرت اي سحبت شالها  دنكت لفت شعري وجهي  كومتني نزعت شحاطتها خليتها يم رجليه وگالت لبسي يله دنروح

- لاماما متعودة امشي حافي

- ولج الگاع كلها گزاز وخيسة اخاف تصعدلج رطوبة يله لبسي لاتعانديني

- كلتلج ماالبس متعودة ولاتكولين لرؤيا عالصار والله ترد تكتلها وتضيع نفسها

- الله قبيلها هاي هيه العلية سويته حتى اخوي مايكول قصرتي ويه بنتي يله يبعد امج لاتفتين كلبي

اشرت لا

استغفرت ولبستها لزمت ايدي سندتني تمشيني ودموعها تنزل ادري كلبها ماينطيها تعوف غيمة مهما يكون هيه مربيتها وحاسبتها وحده منه

وصلنا لنهاية الشارع شوية أمن لان عالم هواي خلتني وراحت جابت طابوكة واجت حطتها گعدت عليها لميت نفسي غطتني بعباتها وكفت عيونها بالشارع  منتظره رجعة رؤيا

اكثر من ساعة واحنا على كعدتني اباوع للمنطقة بؤرة مختنگة مقطوعة عن العالم شكلها مرعب افرع ضيگه قذره؛ الجهال رغم صغر عمرهم بس اي براءه ماعدهم  الي بيدها جكارة  والي بيده سجينة من غير الشباب تحسهم من غير عالم نضراتهم موخالية حتى حركاتهم مشبوهة

اخذت نفس درت وجهي واني انعل الوكت الشمرنا هنا دخلت رؤيا تمشي مدنگة ناثره شعرها لافه اللثام بداية جفها والباقي يسحل وراها وايدها الثانية  بيها سجينه صاحت ماما رؤيااا

شالت راسها عكدت حاجبها عيونها دم وخدودها حمر شافتنا شمرت اللثام واجت تركض صاحت ليش واكفين هنااا

ماما - منتظريج وين جنتي وليش هيج حالتج

- شطلعكممم وغيمة وين

- جاسم وعمتج جاين لبيت المشعوذة لخاطر سحر كوة كدرت اطلع رايه وانهزم منهم

- متأكددددة

- اي ويله سندي اختج تعبانة خلينه نطلع بسرعة قبل لايشوف غيمة وتكله يجي ورنااا

اباوعلها صغرت عيونها مامصدگه عصرت سجينتها خفت من تصرفاتها حسيتها متوحشة

جرتها ماما من زندها ودفعتها كدامها لان ماعاجبها وضعها  دنگت كومتني سندتني مشينة واني عيوني عليها تمشي وتلعب بسجينتها عيونها تفتر منا ومنا بس تريد احد يشمرله كلمة حتى تفترسه

على طول الطريق ماما مابطلت دعاء ورزايل بيها بسبب خوفها عليها متمردة  لاترضه تتلثم ولا تمشي مثل البشر  ادري اكو حزن جواها وماتعرف اشلون تعبر عنه بس وضعنا جان تعبان مومال كلام واسئلة بس نريد نخلص نفسنا

ماصدكت وصلنا للمرة حتى افلوس تكسي ماعدنا صعدنا كية اكثر من ساعتين  واحنا بالطريق حتى ماعندي علم  وين رايحين خاله راسي على متن ماما  لحد مادخلنه منطقه كلها خضار نزلنا السايق عالطريق طلع  گبل

وكفت اخذت نفس حسيت روحي صرت احسن تركت ايد ماما وفتحت اللثام كالت المرة يله خالة منا تعالوا ؛

مشت ماما بصفها ورؤيا يمي بس تتحرك بغير عالم اني هم سكتت اعرفها تجي تحجيلي وحدها فكري كله بالمره الي  تمشي وتكول ليكدام  بعد ؛ رجلينا وكعت وهيه مستمره لمن دخلنه مكان مثل المنطقه الريفيه بيها نخل وزرع بيوت تعبانه يمها حيوانات ناس لبسها يختلف وجهال تارسه المكان تلعب

وكفت يم بيت صغير بابه من جينكو بي سنسله  فتحت القفل دفعت الباب وكالت تفضلوا

دخلنه بيت ململم ممر  ضيگ على كل جهة غرفة ومطبخ مكان معزول الكاع تراب

راحت فتحت باب وحده من الغرف كالت هاي الكم يله دخلن اخذن راحتجن

ماما- الف رحمه على اهلج ان شاء الله ماتسمعيلنا صوت

- ياخية عالاساس ماكو هيج المنطقة اشلونها دخلي خلي احضرلكم لكمة تاكلوها

- لاتزحمين نفسج اني اطلع اجيب شي للبنات بس اذا عندج شي نكعد عليه لحد مااجيب فراش

- هسه انطيكم فريش ولاطلعين لان ماتحصلين شي هسه سوكنا بس الصبح خليها لباجر اليوم انتم ضيوفي يله اخذي بنياتج خلي يرتاحن

اتشكرت منها شمرت عباتها وراحت للمطبخ واحنا دخلنا للغرفة صح تعبانه ومابيها بس حصير بس من التعب شمرت نفسي

طبگت ماما عباتها خلتها جوه راسي وراحت ويه المره تساعدها  اجت رؤيا كعدت يمي مددت رجليها ساكته اخذتلها دقايق وهمست كلهم حيوانات

-شفتي

-اشكد احتقرت نفسي وكرهتها

-شنو الصار؟؟

-حتى مابرر لعد اشكد رخيصة بعينه

- كلتي مااوصله ليش رحتي

- ردت اثبت لنفسي كلهم نفس الحيونه مابيهم شريف والي مايدوس على روسهم تستحق تنداس

-خلصنا عمرنا جو الرجلين

-الحظ مثل الزرع ماينبت بكل گاع

-شنو يعني ؟؟

-يعني الغلط منه من البداية  وهاي  اصافينا ويه الدنيا صار الوقت كلمن ياخذ حقه

- غيمه راح تبلغ عن مكانه

- لا ابشرج امج طلعت انغل منه تعرف سوالف غيمة ومغلسه بايعتها علينه فقيرة الهيودية

- يعني مو هاي ام الخضره الجانت تحجي عنها

- لامو نفس الصوت الجنه نشتري منها اصلا ماسمعته بحياتي وين ام خضره تبيع عرگ وجگاير 

- اسمه منكر رؤيا انتي بنية ميصير تكولين هيج اللفاظ وبعدين تعالي شنو هاي كفشتج و سجينتج اليشوفج يكول تربية شوارع

-منو هاي تربية الشوارع لاااا مع الاسف عليج هيج تحجين وهاي اني بت اليهودية البدون نسب مخلصتها بالبتاوين ويه كرن وخدمتها بواحد حيوان لفو خاين

- رؤيا لاتشمرين الصوج بعيشتنا هاي رئال عاشت اسوء منج اشو ماتأثرت بالمحيط ولايوم سمعتها لفظت كلمة غلط بذيئة

- وانتي شمدريج رئال اشلونها هسه ولا طلعن براسي انبياء وانتن اسوء مني اذا اني اشتغل بالظاهر انتن خانسات بالغدر من جوه الجو رب الي لعبت براس ضابط وخلت مهرها دم الحيوان هاي مو بس ماعدها مشاعر لاواصلة اخطر مرحلة بالاجرام وانتي هم مواقل منها لاتكولين جنت فاقده من شفتيني اكتل بالقذر لااا بس اكو جواج سواد اذا طلع اثر منه يحرگنا كلنا بدون رحمة

- مامنعتج لان جان يستاهل الموت

- بس موته جان وصلنا للاعدام

- جنت ناويه اشيل القضية عنكم

- رايه لاوحدة تضحك عالثانية احنا دمنا مونضيف ولاراح ينضف  واذا امج ضحكت عليج وكالتلج عدجن ابو وختفى  فاحب اكلج جذذب

- ليش هيج تحجين

- مااكلج حالفي امج احنا خوات لولا لان ماتفرق عندي بس سأليها رند اشلون صارت والحيوان ماجان يوصلها ابد واشلون من ماتت ماتأثرت عليها كلش لج رئال الي بتلفات الدنيا من خابرتج جانت الخنگة الي بصدرها بعدال حزن ماما الف مرة

- رؤيا شبيج خية

- اكرهكم بكد كرهي لعيشتي بينكم اتمنى لو ماطالعة من ذاك الحادث ولا رادلي النظر ولاشايفة وجوهكم اتمنى الطلقة  عابرة غزوان وداخلة بصدري

- راح يردلج ندمان

- ماراح يگاني

- شناوية رؤيا

- راح اخلي اكبر حلم عنده شوفتي راح اسوي سوايات تسحگ راسه قبل رتبته  اذا ماخليته يتلفت داير مدايره بس حتى يلگاني ويحررني من اسمه مااطلع بت اليهودية

-ترى هذا دسار ضابط المخابرات

- واني رؤيا تربية البتاوين

- راح تغيرين  مكان شغلج ؟؟

- بنفس الوقت الي راح اتواصل شغل ليل ونهار بس حتى اجمع افلوس ارد رئال لحضنج وارجع  لجاسم وغيمة

-شنو تسويلهم 

ماردت شمرت اللثام وكامت طلعت بره دخلت المرة وياها ماما بيدهن صنية خلتها بالكاع  بيها طماطة حمس  وخبز سوت ماما لفة لرؤيا وطلعت وراها؛  باوعتلي المرة خجلت مكلفة نفسها واني مدده كمت كعدت دقايق ودخلت ماما لازمة مداليها وجها محتقن عرفتها مسمعتها حجي بخصوصها  ؛ كعدت خلت اللفة يمها سمت ومدت ايدها

بلشت المره تسأل عنه منين وين اهلنا وشنو مشكلتنا اتسنط لردود ماما صدگ تراوغ بالاكلام تدخل من درب وتطلع من درب ماانطت لزمة

ثواني وفرت الحجي تسأل المرة عن اكثر شغل يمشي هنا ؛ لليل وهيه مستمرات بالكلام ورؤيا برة مادخلت؛  لااگدر اگوم الالم رد ولااگدر اگعد عيني عليها  لحد ماراحت عيني بالنوم  بسبب التعب مااعرف شگد مر وقت وحسيت ايدها على شعري هيه وتهمس  بس اتحملي بين مالم افلوس العملية وداعت رئال انطيج روحي مو بس كليتي

دنكت باستني وتمددت يمي خلت راسها بصف راسي ابتسمت ولزمت ايدها خليتها على صدري ورجعت نمت

مرت الايام اشكد ماجنه خايفين من وضعنا اشگد  ماارتاحينا ويه المرة  عكس وضع رؤيا الي صارت ماتنحمل صلفة وتربية شوارع من صدگ بعد محد يكدرلها بگد ماالمنطقة زينة بگد ماهيه ماذية اشكد اكو من عمرها  وتربيتهم حلو تعوفهم كلهم  ادور وين المشخمط والگاع زايعته تركض تصف ويا لاتعرفيها عرمة لاتعرفيها مختلة  شخصيتها غريبة

بدينا نتعود على المكان صار عدنا ناس ماما بلشت تخبز بأجرة ورؤيا تطلع ويه ولد وبنات من نفس الشارع  تبيع ورد صح كل فترة تغير المنطقة حتى لايلزمها دسار  بس اتعودنا ماترد ايدها خالية اذا مو مشكلة اكبر منها اضعاف وگوه ماما تحلها اخر شي ملت كامت حتى كتل تكتلها تريدها تهدأ لان حتى صارت ادخن بس تزود ماتنقص تاكل الكتلة وتطلع الحياة طبيعية تمشي ولاكأنما

گوه الزم ضحكتي شكلها حلو الي يشوفها مايحكم عليها هيج خبلة وادري كلش زين كل الدتسوي بسبب اشتياقها لدسار

واكفة يم ماما لازمة قبق التنور الها اباوعلها رغم صار كم شهر ضاغطة على نفسها بالشغل حتى انلم فلوس نخلي محامي يعرفلنا مكان رئال بس ردت لعافيتها وجمالها

ضفيرتها وره ضهرها نازلة ودشداشتها السودة ويه بياضها ولون عيونها خالتها تنگرط محد يصدگ بنص الثلاثين تكول بعمرنا اكتشفت رؤيا ماخذة جمالها منها ورئال كياتتها

صفگت الخبزه بالتنور سديت القبق دنكت شالت شنگة شمرت ضفيرتها وراها وكفت تصفگ اجت رؤيا تركض صاحت لج مامااااا لحكينييي

مااهتمت ضلت على وكفتها تصفگ وصلت يمنه فتحت عينها على كبرها اشرت شنوو

ماما- ومررض شرايده

- مودااصيح لحكينييي مدتسمعين

- وشكو الحگج اكيد مصيبة من مصايبج ولي يله عن وجهي دااشتغل

- راح يجوني الشرطة ياخذوني

- اااي خلي نخلصص وينهم غير الله دزهم

- انتي هممم حاسبة روحج اااام

- لج صخااام ولي عن وجهي لااشمرج بالتنوررر فكينييي شنو ابتليت بيييج

- انعل ابو الدغش البلانا بيج

- تفوو عليج وعليه بساعة وحده وبعدين شكو لاحكيج سمصخمة

- كلشي ماكو الله وكيلج مظلومة هالمرة

- يبوو الهدوء يكت منج احجي ويامن متحارشة

- دامشي مدنگه عيوني بالگاع ويه حيدر صنديحة  وابو علي الشيباني

- منو؟؟

- هذا الولد الشعرة هيج مكصوص على عيونه يشبه ماروكو

- مم كملي

- اي اجه واحد كال هيي  انطيني جكارة

- رجعتي ادخنين رؤيااااا

- لاااا ابد تبت والله وحتى ضربته وكلتله شنو  شايفني ولد كدامك بس وجهه شوية تشوه موهواي بسسس هو نرفزني والله كال انتي بت شوارع

- شسويتي ولج

-يعني ترضين يشبهج بالشوارع

-اني لوماصدگ اخلاقي مال شوارع   مالفيتج عندي رؤياااا طلعيييي من كدامي بسرررعة

- ويننن اروح اكلج امه راح تجيب الشرطة

انطتني الخبزه وندارت بعدها مامتحركة ركضت رؤيا طلعت من البيت راحت وراها وصلت للباب  دنكت شالت نعالها شمرته عليها وسحبت الباب دتسده صاحت رؤيا  لاتسدييي  اخر مرة والله بعد مااتحارششش بأحد

ماما - واني اريدج تتحارشين بلكي ولأنهم ساحليج وكاتليج كتله معدلة

- راح يسجنونيي

- يطبج وجععع كون  اعدام خليج بالشارع اذا دخلتي للبيت اطبر وجهج الجنه وجه شيطان بالنص

- ينطيج كلبج انحجز بالزنزانة والجو حار

- ينطيني كلبي تنامين بجهنم وين حجيج موتكولين اذا تشوفيني الم حطب ويه ام لهب مالج شغل يله هاي ام لهيب منتظرتج هيه وشياطينها ولي روحيلها

- يمه الضباط زبالة راح يتحرشون بيه تقبلييين

- منو الماعنده ذوق يتحرش بصخلة مثلج واي اقبل بلكي واحد يطلع بي حظ ويرفعج فلقة يربيج

- ماكووو. واحد بي حظ اكلج زبااالة تعرفين شنو ازباااالة اتشمري بالتنگه تصيح عيععع من قذارتهم

- خو مواقذر منج رؤيا لاتجين ولي منا

- اني بنتج يمه زين اوعدج بعد مااشرب جكاير واماامشي ويه سعد بلصة بس روحي لامه هاي عرمة ماراح تسكت لااا والله

- اي شنو

- ارجع للبتاوين اشتغل بالتسليب

- شنوو عالاساس ماكو هيج مخلصتها سجادة واستغفار انعمت عينج وهاي انتي گاطعة الشارع بسجيتنج العمية تفوو عليج وعلى االلفو الشمرج على كلبي

- انتي اشلون ضحكتي على الزمال وخليتي ياخذج ويسويح ام بس اريد اعرف

- مثل ماضحكتي عالحيوان الي سحل بيج الكاع ورد شمرج عليه

- ام جيس حببب انتي اگلج راح يشتكون عليييه

- اليسمعج يكول اول مره ولج المركز كامت تصيح الخوث من وره مشاكلج امششي منااااا مااريد اشوفج اتبريت منج سمعتييي ماعرفج بعددد واذا شفتج يم الباب اني اروح اشتكي عليج

كوه سيطرت على ضحكتي شافتها مابيها مجال دنكت هزت راسها براءه وهمست راح اروح صح الزنزانة حارة وراح يعلكوني فلقة واحتمال يشوهوني بس اضل احبكم

سدت الباب ماما ضحكت  اندارتلي ماما تضحك رجعنا للخبز واسمع صوتها صاحت لابوج لابو الخلاني اصير بتج يهودية شترجه منج والله لخزيج

دنگت ماما شالت نعالها الثاني  وراحت تركض

***رؤيا***

واكفة احجي شفتها فتحت الباب ركضت شمرتني بنعالها اجت بنص راسي صارت بوجهي ساگية المي طفرتها رحت للجهة الثانية افرك براسي وادردم تكول قناص بت اليهودي تنشن

لكيت سعد كاعد يم الخيسه يصيد عگاريگ و يدخن رحت ورا هفيته دفرة طفر صاح شبيج لج

- مرررض لاتخليني اشرح وجهك جيب الجكارة وروح شوف العرمة ام الخنيث راحت للمركز لولا

- امج ماقبلت تروحلها

- لاحربكت ام الحثلگ  اسمع تاخذ الخنيث على جهه وهدده كله رؤيا تكول اذا مالزم امه بعد لايطلع للشارع

- هسه رايح شنو اليوم ماطلعين للشغل

- لا اريد اروح اجيب علاج لراية خلص وهاي خوثه ماتحجي حتى توفر الفلوس وهم اشوف شنو سالفة هذا الرجال الي يظهرلي بشكو موقف اعوج اشمر نفسي بي يطفرني منه ويتبخر 

-موتكولين جنت متزوجة اخاف رجلج دازه

- اللفو لو يندل مكاني ماتركني كال هالاشهر اعرفه متحيون وهذا مو شكل واحد دازه مبين جبير من عيونه ومتمرس بالشغلة خرب عرضه على ذيج الخفة بلحظة يظهر وبلحظة يختفي

-خلي فايدنه والكاظم لو ماالبارحة هو يسحبنا ويشمرنا عكس الطريق جان الشرطة لكفتنا

-غير انت غبييي كلتلك طگ السجينة بوجهه للولد هو وحده يخاف ويطلع افلوسه اتشگ خده ليشش

- لان متعاطي مايحس اله يشوف الدم ويله همزين طفرنا محد شاف

-دجيب جكارة وتزحلگ من وجهي اريد اطلع

شمر باكيت الجكاير والجداحة راح واني انداريت اباوع للبيت بلكي حن گلب اليهودية واجت وراي

شيحن كلبها غير الله حلل كتلهم من گد سوادهم  لابوها لابو دسار

رحت يم النبگة اتشلبيت عليها صعدت كعدت على الجذع طبكت رجل ومديت الثانية انتجيت طلعت جكارة خليتها بحلكي ورثتها اخذت نفس دنفخها وجت العرمة طايرة تهفهف بعياتها عرفتها لماما تشكيلها مني

نفخت الدخان ودندنت ضوء لمع وسط المدينة رسم نداء لمنادينا يحن ويختفي حينا تلك اشارة بات مااان

رفعت راسي خازرتني درت وجهي سويت روحي مووياها  اخذت نفس من جكارتي غمتني وكملت طريقها

انتجيت رفعت راسي انفخ النفس مااحس غير واحد جر الجكارة بدون لااباوعله؛ هيه سحبة سجينة وهيه طفره رافعتها بوجها

دسار واكف ملثم بعده على ضخامته ونفس لمعة عيونه ولهفته هو ويباوعلي

درت وجهي نزع اللثام رفع الجگارة وهمس ادخنين رؤيا ؟؟

- وانت شكوو

-سجينة وجگارة بعد شنو ياخرزة البتاوين

- وگطع طرق واسلب وابوگ ومطلوبة بقضية قتل

-شكو شي اشتغل ضده

- عفية حتى تعرف مقامك شنو عندي

ابتسم واخذ حسرة طويله مال واحد مخنتگ بالشوگ 

نزلت السجينه خليتها بظهري ردت امشي لزمني انداريت ضربته بكل قوتي لزم ايدي تفلت عليه دنگ مسح وجهه بمتنه وسحبني لصدره دفعته ضغط عليه اكثر عصرني بحضنه حيل وهمس كافي مابرد گلبج عني كال هالاشهر  

- لازاد حقدي على نفسي اشلون نزلت روحي وثقيت بحقيررر  مثلك

- ليش ماتنطيني مجال احجي

- وخرررر دسار

- ورحمة ابوي ماغدرتج عقد عابر بينه صار اكثر من خمس سنوات حتى ايدها مالمستها وعيوني ماصارت بعيونها من يوم الدخلتي بيهن

- واني بعد مااريدك

- تعرفين وين شمرت نفسي ويامن اتورطت بس لخاطر احصل مكانج واجي اشوج

-عسى مابجهنم الحيوانات امثالك هواي عليهم  الدنيا وخر عني دسااار

- يول وكلام الله على وعدي مستعد اترك حتى اهلي لخاطرج

- دتفتهم شنوو احجييي

- مو بكيفج غصباً عنج ماغلطت وياج انتي الي اجيتي عليها وانتي الي اخذتي گلبي وخليتني ارد بوعدي الها

- ارجعلهااا

- مااكدر والاسمه علي ولج صار اشهر ليل ونهار ادور ماخليت وراج مكان النوم ماجفاني كلما اغمض اشوف ضحكتج بعيوني ؛الف فكرة صارت براسي دقيقة ماگدرت اگعد مااعرف وين ادورج صرت مثل المخبل افتر داير مدايري محتار شسوي

- غدرتني

- لااماغدرتج دفعت نص عمري لخاطرج جازفت  بالموت قبل مركزي اتحملت اقذر انواع التعذيب بس حتى احميج وهاي ختمتها دخلت للجحيم  برجلية بمقابل احصل مكانج

-ليش ماجاوبتهم من سألوك عليه

-خفت عليج منهم خفت يخدشوج بكلمة تكرهج بيه خفت يكلولج  منو وليش خفت يبعدوج من حضني اكثر ماانتي بعيدة

- دسار طلعتك من كلبي

-جذابه روحج ترف بكل مرة اتسمعين نوارس دجلة وكلبج ينبض بكل ظلمة لان تذكرج بأسمي

سكتت

حضني حيل ودنگ اخذ نفس طويل و همس ياعلي شكد حلمت بهذا الحضن

- كلها كالت مات الكل كال ماراح يرد بس ماجنت اسمع الهم اشهر واني واكفة ورا الباب منتظرتك مايأست ولا لحظة شي بداخلي يكلي موجود وراح يردلج تدري اول ماردلي النضر ركضت للمرايا تكول راح اشوفك مو اشوف وجهي من كد لهفتي اتخيلتك كدامي وهمستلك رجعلي النظر بعد مااتعبك وياي

- مستعد اتعب العمر بكبره واترك الدنيا بأهلها و اتخلى حتى عن حلم الخلصت اسنين واني اركض ورا بس تخليج وياي

-ليش ماكلتلي متزوج

-لان ماحسيت بيها ولالحظه تابعتلي  بگد ماجنت اشري حضنتج بعمري

-طلكها

سكت

وخرت من حضنه باوعتله عيونه حمر اشرت شنو

-احبج

-دسار طلكها

-مااكلج  انتي اول امنية لا بس انتي اخر حلم حلمت بي

-ليش اجيت

-خلص صبري واني ادورج من شفتج ماگدرت اضل اباوعلج  من بعيد كلبي ذلني وغدرني اشكد ماردت امنع روحي عنج ماتحملت  لهفتي جابتني لحضنج بدون شعور

-يمكن اسامحك على كلشي بس كسرة كلبي واني اشوفك يمها وانت تنكر وجودي لاا روح دسار وانساني اني مارايدتك بعد

- شنو انسى ضربة الدراجة واول لقب وانتي اتأسرين كلبي بي  انسى دخلتج للبيت عليه وانتي تتلاوين وياي لو نومتج بحضني وانتي تسولفيلي على احلامج

- كلهن

- كل عقلج انتي وكلام الله الموت اهون 

- روح دسار اني مو الك من البداية ولاراح اصيرلك

- انتي خرزتي الربي عوضني بيها بعد تعبي وركضتي وره الموت لخاطر عبادة صح بعدت بس ماغلطت

انتي الي من ساعة الدخلتي للبيت وجبرتني على حبج رؤيا من الاخير انتي الي  لاراح تنامين بغير حضني ولاتشوفين غيري

- سويتها وعضيت ايدي ندم ماراح اعيدها

- مالكيتج حتى اضيعج

- طلكني

- انطق الشهاده وماانطقها

- روح دسار لاتجوي گلبي اكثر ماضل مكان للوجع خلصوا اهلي لاتكملها

- اطلكها والله

- ماراح اطلكها  ولاراح تعترف بيه كدام اهلك انت حياتك تختلف عن حياتي  حتى لو انت رضيت بيها اني مستحيل اقبل على نفسي اعيش ويا واحد في يوم من الايام استعر من وجودي  لاتخليني اكره نفسي اكثر مااني كارهتها

- اني مراقب ردت احميج بيها ماگعدت يمها بس حتى اوهم الكل هيه انتي خفت تنكشفين من خلال ردت فعلها  وساعتها افقدج من صدگ لان مااكدرلهم

- الي مايعرف يحميني  غير بالاهانات مايلزمني

- انطيني فرصة

- انطيتك واثبتت انتى موكفو ولاكد كلمتك

مارد فتح دكم رداناته صعده ليفوگ  اشر شوفي

اباوع اربع تواريخ مكتوبة كاملة  بالتسلسل  والخامس بس السنة ماكامل

دسار - الاول اول مرة اشوفج بيها واكيد ماتذكري والثاني  بنفس اللحظة الصرتي بيها بأسمي  الثالث ويه اول دگة الج بروحي  والرابع اول  ليلة ابتعد عنج خفت اموت وهو مامذكور خليته يكتبه واني اصارع الموت بيها وهذا الخامس تعرفي المن جنت ناوي

- مااريد اعرفه لان ماراح يصير روح دسار لاتخليني اسمعك كلام مااتمنى لعدوي

- هاي هيه رايح والج كل الوقت بس وكلام الله ماتصيرين لغيري حتى واني جوة التراب

- ههه روح ولا ترد بعد وتجبرني اهينك خليلك ولو اثر قيمة بعيوني

- المفروض احطم وجهج بس على سالفتج اخليلي ولو اثر قيمة يمكن مااطلع منها  بلكي تذكريني بيها  ويجي يوم تشفعلي يمج  وتجين تزورين گبري

- ماراح ازورك وعساك ماطلعت ولو اعرفك عار  وحيوان لفو مايصيرلك شي يله روووح

ضحك دنگ حك گصته

- على شنو تضحك اضحك على نفسك حرمات على الرتبة الشايلها ضاعت هيبتها بواحد لفو خاين بلده مخلصها ختلات  يله امشي مناا لك

-لك ؟؟  ماشي بس الج امانة

- مارايدتها خليها يمك وبعد لاتجي

دنكت طلع من جيبه اباوع خرزه زرگة  مثل قراصة راية عرفتها مالتي وياها سوار فتحت عيوني على كبرها

عزل الخرزة ومد ايده فتح ايدي خله بيها السوار وكال ولو متأخرة بس  تكول لادورين على الماسكة امي ضامتها جوه مخدتي

- وينهااا ؟؟

-  عايشة بمكان امن بحماية واحد مستعد يهد الدنيا لخاطرها

- دسار ماتجذب

- صح حيوان ولفو بس ماتوصل بيه اجذب بهيج شي

- ليش ماسألت عنه كل هالفترة

- مافد يوم دخلت لبيتها اذا مااجت تركض تسألني عنكم

- تعرف زوجها

- لااعرفها هيه اخيتي الي أمنتها قبل ساعة بعقد ويه الشخص الراده كلبها واجيتج حتى اودعج

- يعني تحب زوجها ؟؟

- بكد غدرها ومصايبها بي

- راح اردها منكم غصباً على شاربكم واخذهن واروح وانعل ابو التباوع بوجوهكم القذرة

- رؤيا رايح بمهمة يمكن مااطلع منها دخيلج لاتخليها بنفسي بس اشم عطرج وبعدي ولج كلمة بعد مااطلب منج هالطلب لحد ماانتي تجيني

- لو يرد بيه الزمن حتى ذاك الحضن احرمك منه على گد الندم العشته بعده

اشر اي سحبت ايدي ابتعدت ليورا اخذ نفس اشرت يله روح

- ديري بالج على نفسج

- ماطولك بعيد عني اني بخير

- مااكلج احبج لااا الج نبض بگلبي لوتعيشين بكد عمرج عمرين ماراح تعرفين تبادلي بدگة وحدة من لهفاته الج

- مااريد ابادل لااريد اشوفك من الاصل

- لابد ماراح يجي يوم وتذكرين الحيوان اللفو وتحنين وتجين تسألين عنه وين مدفون

- لاراح اذكرك ولاراح اوصل گبر حيوان نذل ماعنده كلمة  مثلك

ابتسم  ودنگ

درت وجهي تركته ورجعت للبيت وصلت قريب على باب المزرعة درت وجهي لكيته بعد على وكفته اديه بجيوبة وعيونه وراي

دخلت رديت الباب انتظرت شوية باوعت بين الخوص شفته رايح لجهة الدراجة وصل يمها وكف خله الخرزه بجيبه شال اللثام لبسه هو الجفوف صعد الدراجة شغلها وانطلق بكل سرعته بدون لايدير وجهه

غمضت  احس روحي انعصرت اتمنيت لو بس جابرني وسحابني غصباً  عني لحظنه جان خليت راسي بصدره بجيت بكد الهم والوجع الي راح اعيشه ورا جان ضربته وعاتبته وشكيتله من كل الراح احسه بفگده 

اسمع صوت ماما تصيحني اخذت نفس مسحت دموعي باوعت لسوار رئال وبتسمت اشكد متمنيه اشوف شكلها اشلون صار

ردت ماما صاحتلي خليته بجيبي ورحت لكيت المره بعدها تعتب وماما تبرر بعصبية  عكس رايه تباوعلي وعاضه شفتها گوه مسيطره على ضحكتها

خليت اديه بجيوبي وگفت منتظره اشوكت تخلص لغوتها اكثر من ربع ساعة وهيه تسرد قصة بعران مكه اشلون هاجرن ويه المسلمين ليثرب اكلت مخ حذائي واخرها اندارت غمتي وراحت

باوعتلي ماما وجهه محتقن  دنكت اني روحي گوه لازمتها احسها مخنوگة  منتظرتها ترزلني حتى اروح سكتت شويه شلت راسي باوعتلها بتعب اجيتي بسرعة لزمت وجهي كالت شبيج ماما 

-ههه كلشي مابيه

-رؤيا مو عليه وجهج تعبان منو وياج يبعد امج احجي

-محد شبيج انخبصتي بس داامثل بلكي اكسر خاطرج وتعتقيني من رزالتج المعتادة

-مريضة لو اكو واحد سمعج شي غثج

- لاماما على شنو انغث بس تردين الصدگ داافكر  قتل اليهود يدخل الجنة وقتل الام النار زين اذا واحد سواهن سوه وين يروح

- اني اگلج بس اوكفي ولج رايه ماما ناوشيني العودة

دفعتها وركضت  صاحت لاتردين للبيت

- ماارد هو اني اريد اخلص بس انطيني افلوس داجيب علاج لرايه  واروح بعد ماارد

-تعالي انطيج

-لاحبيبتي شمريهن  واني اخذهن

-مااضربج لاتخافين تعالي

-امرايه جيبي الفلوس داروح واجي بسرعة والج خبر يمي حلو

- عزه بعينج ماطول كلتي امرايه يعني كتلتي واحد

- شبييج هااا شبيج ليش دتحسسبني مجرمة

- بت رافد شنو مسوية من شفت وجهج باهت عرفت مصيبة

- والله مومصيبة شي من زمان متمنيه تسمعين عنه

عگد حاجبها اشرت شكو

- دنطبني افلوس بين مااجيب العلاج لن انتي مكملة خبز لان سالفة طويلة بس راح تخليج تبوسيني من حلكي

- عيع دتعالي هاج هسه تطلع سالفة من سوالفج التعبانه ولاتبعدين جيبي من هذا المضمد وتعالي بسرعة الدنيا راح تظلم

رحت شفتها تريد تلكفني رجعت ليورا رافعه حاجبي شمرت الفلوس ودخلت ضحكت رايه كالت بسرعه فدوه لاتتاخرين الوقت تأخر

- كضي امج عني تره اني ما مسؤولة عن تصرفاتي اذا شوهتها لاتجين تعتبين

- ميخالف هسه احجي وياها  بس يله روحي راح انتظرج بالباب مو تتحارشين بأحد فدوه اروحلج والله راح يطردونه من المنطقة

- يوو محسسيني خبله وضلي هنا ملزوكه بالباب مثل البريعصي الطاگه الاسهال وين اكو بت شاحبة  تكول الف اصفر 

- رؤياااا الدنيا ظلمتت لاتفتين كلبي روحي داده بسرعة او لاا خلي العلاج مااريده باجر جيبي تعالي دخلي

- اي كمين مسوية  انتي وامج تفكير يهودي خرب يومجن ولاتنعدلن يله فوتي ماتأخر هسه اجي

- لاراح انتظرج هنا الشارع بلش يظلم

- يطبج مرض ولو انتي مامعوزه بطلت هسه تصيرين ربع مشگگ لانفع ولامنفعة

هزت ايدها كاتمة ضحكتها دنكت شلت الفلوس ورحت بسرعة امشي لان ادري بيها غبية تضل بالباب خايفة عليه تكول دازه طفلة

وصلت لنهاية الشارع درت وجهي لكيتها بعدها واكفه غميتها ضحكت واشرت يله

ضحكت على ضحكتها  درت للشارع الثاني صار سد بينه بعد ماتشوفني  ركضت لشجره النبگ اتلفتت ماكو احد گعدت وراها وخرت البلوكة وحفرت اطلع الفلوس الي اجمعهن كل اسبوع بالختلة لعلاجها لان ادري اذا عرفت بهيج سعر ماراح تقبل اشتري الها

طلع اثر العلاگه استوني دااسحبها وشفت خيال وراي بعدني مادايره وجهي واجتني ضربة بنهاية راسي بعد ماحسيت بشي

صوت احد يسولف يمي وطكطكة مثل صوت حديد ينگلون بي

فتحت عيوني غواش راسي مصدع رجعت غمضت شويه وحسيت صار هدوء وايد تلعب بشعري

رجعت دخلت بغير عالم مااعرف شكد مر بس كعدت صوت تريلات قريبة فتحت عيوني اباوع نفسي داخل غرفة شبه مهجورة خالية مابيها بس شباج حديد مغلق

ردت اشيل ايدي حسيتها مربوطة عگدت حاجبي داحرگ نفسي وفزيت مفزوعة على صوت جاسم يضحك

درت وجهي واشوفه واكف يم واحد مخربط شكله  وسخ باوعلي غمز وندارله  گال هااا شكد تدفع بيها …

لاتنسوا التصويت ❤️