رواية شيء من رصيف الدم الفصل الرابع وأربعون 44 - بقلم Leo Alfatlawi

شيء من رصيف الدم

بقلمي:leo Alfatlawo

بارت الرابع والاربعون

**** رئال****

على صوته دخل الشرطي  كله ازر دهفها راجدي ادفرة من شوكت نزلت عليك هالمحنة ويه المتهمين

دنگ  يگلب بالملف دخل الشرطي اباوعله  نفسه المتوحش الجان يسحل بيه

رجعت باوعت لاازر دار وجهه وكام يريد يطلع وصل الشرطي قريب عليه رجعت ليورا صحت ازززغ لاتصيغ سخيييف

فتح عيونه الحارس بغضب عكس ازر الي مااهتم كمل طريقة

رفع ايده اباوعلها تذكرت السحل والضرب راد يلزمني دفعته وركضت ورا هيذام لزمته من ظهره وصحت والله اعتغف

هيذام- تعال اخذهاااا لك

- لااا  هيذام والنبي اكول شنو تغيد بس لاتخلي ياخذنيييي

- انت زماااال شنو منتظررر

- لااا حبااااب اذا ماعتغفت لو شلعت كلبك بالتحقيق خلي يسحلني

دار وجهه الي رافع حاجبه همست بتوسل والله سيدي غاح اعتغف

هز راسه اخذ نفس واشرله روح

راح طلع وهو جرني من ورا دفعني كدامه شمر الملف واتجتف باوعلي

همست ماكتلته

-مم

- ولا جنت ناويه أذيه

رفع حاجبه

- دوم جنت احسه الامان ماجنت اسوي شي اذا ما اتأكد واكف بضهغي واعغف غاح يسندني؛اذا وكعت يكونلي دغع واذا غلطت ياخذني لحضنه ويگلي لاتخافين اني يمج

-بشنو قصر وياج  

-ماجان يسمع مني ولايصدكني بنى بمخيلته شي ومشى عليه مااكلك حاولت اغيغ تفكيغه اواثبتله العكس لااا بس هو مانطاني وقت ولابيوم شكالي من افعالي  جنت كل مااسوي شي اوجعه بي بدل مايعاقبني يباوعلي بقلق ويسألني اذا تأذيت

-لهيج غدرتي

-لاماغدغته حتى اول مغة من غلطت جانت بدون وعي وصحيت بساعتها واول واحد هو غكضتله تأسفت منه وتوسلت وبجيت بس حتى يخلصني من جحيم هو جان سببه تعغف شنو سوه دفعني خلاني بنصه  وداغ وجهه خلاني اعيش  اسوء ايام حياتي بذنب ماجان الي ايد بي

- مااذكر فد يوم تركج وحدج ولاسمح  لأحد يتقرب منج  حارب اهله وتنازل عن رتبته وترك حتى نومه صارلج حماية حتى من نفسه 

-بعد مادمغني

-ماادمررج كلج مسحي دموعج وخليج بضهري شنو سويتي

-حبيته

-هه ياحب هذا

-غدت انتقم منه لان خلاني اخون نفسي غدت يحس بوجعي واني احاغب عقلي حتى لايفكغ بي؛ يگوم كلبي ينبضله اسكت كلبي غوحي اطلبه خلاني اوكف عاجزة مااعغف المن اهدأ

-غير درع لاغلاطج وانتقامج ماشفتيني

-وداعت كل يوم نمت بحضنك ماخنتك حتى بحلمي ولاشفتك غيغ غوح اكمل باقي حياتي بيها ماحسيت وياك غيغ بلهفة الحب مااعغف اشلون حبيتك ولاااعغف اشوكت بس فجأه لكيت نفسي امااكدغ بدونك

-اروحي رأل ردي لاهلج كملي بداية حلمج وانتي مرتاحة لان ماضل عندي شي اضيعه خسرتيني كلشي واخذتي كل حقج الج يمي

-لاا الي بعد شي

-لاتوهمين نفسج لان ماضلج غير الذكرى خاطفة تنمحي ويه طلعتج منا

-جنت مشتاقه لنفسي القديمة  واني لازمه كتابي وبيدي السواغ واسولف لخواتي عن القصه مو اكثغ وغحت حتى ادوغ على ذيج الايام لان من حقي بس مالكيت منها غيغ وجودك بداخلي ؛افتح الكتاب اشوفك بي؛ اغمض الگاك بعيوني؛ اسولف يكون اسمك بداية كلامي

-روحي رأل

همست والله احبك

-واني مارايدج

نزلت دموعي

باوعلي ساكت مسحت خدي بظهر ايدي ردت نزلت دموعي  غمض بقلة صبر شهكت دنگ مسح وجهه واجه جرني لحضنه حضني بقوه وهمس لاتبجين

-والله ماكتلته

-ذليتي وخسرتي عمر من التعب والحرگه خليتي ينعل كلبه  الف مرة  بالثانية على ذيج الدگة

- هو مايعاقبني ولا يصيح عليه ولا يحاسبني بس يهدد يخليني اغلط  واني مأمنه لان اعغف ميسويلي شي

-زمال ابن زمال اشلون حبج ماادري

رفعت راسي من حضنه باوعتله رفع حاجبه اشر شكو

-صدگ تحبني

- جنت هسه لاا

ـ يعني اذا اجو وخذوني منك غاح تخليهم

- وانصحهم بالطفرة قبل لايتورطون بالطياح الحظ الراح ينعل ابهاتم بي

-لعد ليش خالني بأسمك لسه

-مو اكلج زمال بدل ما ادگج اجتاف واشمرج بتنكة تيزاب واخلص من لدغتج وتنعوصج الردني الف سنه ليورا ضامج بحضني وتسنطلج بس يله ملحوگة

-تغه بعد مااخاف منك

-حلوو

-يله افتح الكلبجات دااغوح خواتي متانياتني

-ياكلبجان ليش منو كلج  راح طلعين منا

-يعني شنو ؟؟

وخرني عنه شال الملف فتحه قرأ بي ثواني شمره عدل وكفته باوعلي  وكال رئال جاسم ال… من منطقة البتاوين

-مم 

-شنو الدوافع الي ادت الى قتل المجني عليه عقيل ومنو جان وياج اثناء الجريمة

-عزه ماكتلته والله

-اهاا كلتي ماكتلتي حلوو

سكتت

-منو ساعدج بالقتل وكم طعنه طعنتوا

-هيذام شبيك

-هيذام شنووو لج

اباوعله شكله جاد ويحجي بصوت خشن كله غضب كأنما هذا المر كله وهم هذا الضابط هيذام نفسه الكل خايف من بشاعة تعذيبه  واني المتهمة  الي يريد يصعد رتبته بيها

خفت رجعت ليورا اشر وين  همست بتوسل والله ماكتلته

دنگ حك گصته وشال راسه باوعلي بنظرة نرعبت منها

-ليش كتلتوا

-غاد يعتدي علينه

-بين اهلجن وبنص النهار وكدام العالم لاهذا صدگ بطل

-ماجنا هنا غيمة دخلته وهو جان شاغب ميحس

مارد جانت عيونه عليه حسيت كلبي يريد يطلع  اخذله لحظات صافن بوجهي واتقدم نفس صوت ضربة بسطاله وحركاته الي تخليك تكتم حتى النفس 

وصل يمي رفع ايده بسرعة حميت وجهي

ماحس غير بحركة سريعة سحب شي من ضهره جر شعري بتره صرخت ليششش

لزمني من وجهي عصره ودنگ سحب شفتي ردت ادفعه كمش اديه خلاهن على صدره وقربني منه عصرني بحضنه وضغط على شفتي اكثر ؛ اشكد مارد اخلص نفسي ماكدرت لحد ماحسيت اكلها والنفس انگطع شهكت

حس بيه وخر ينفت ؛ نزلت دموعي متألمة  رفع ايده وخر شعري عن وجهي عالكيف خلا وره اذني ونزل اصبعه مسح شفتي عالكيف وهمس القضية الخسرتني كلبي قبل رتبتي

-ليش كصيت شعغي

-لان هيج احلى

-تغه كمت اضوج منك ومااحبك

-وماريدج تحبيني بس لاتغدريني واني امحيلج  شكو بشر يوصل  ضحكتج

-غاح ينتقدوك بشغل بابا

-شغل الذيابة مايقربله غير الزلم الوكفتها اطگ الظهر

-غاح تتعب وتمل من تصغفاتي اغلط هواي بدون لاحس

-لعبي وغلطي اشكد ماتردين احملج بكلهن بس لاتختلين وتشكين خوفج بغير حضني

نزلت اديه طلعت رتبته من جيبي  باوعلها واشر شنو هاي

-داغجعن لمكانهن حتى تفتح اديه واغوح اخلص من تسلطك و فغعنتك

ضحك وخربط شعري دنگ رد باسني وخر راد يروح لزمته

-مااريدها مرتاح بشغلي

-واني اغيدها لان احبك وماغيد اخسغك بهيج مكان مابي بس الموت

-ماموت لاتخافين

-هيذام امنيتي اخليها على متنك لاتخليها حسغة  بكلبي

مارد

اباوعله شكله ماراضي لزمت ايده وهمست فدوه حتى ماحس بخنگة  كلما اشوفك طالع بنص الليل لهيج اماكن بسببي وتخيل بعد ماتغجعلي

سكت وباوعلي هو وياكل بطرف شفته

-بس هااا من هسه اذا سمعتك محقق ويه ابنيه اشوه وجهك 

رفع حاجبه

-اي والله انت مهتلف والجو باغد وهدوء وتالي تجيني تكلي هاا والله مااعتغفت كلت ابدل الاستجواب شوية حتى تحجي

ضحك ضربته على صدره لزم اديه  وكال اشلون اتخليني اعدل لدغتها بكف

-بس خلي اغجع غتبتك الي خبلوني بيها كلما شافوني وكالوا هسه انتي تسوين واحد يفقد منصبه علمودج

-وانتي شتكولين

-احمد الله الي خلاك تعصب بذاك الوكت وتتنازل عن منصبك حتى تضل تعاديني  واكون الك

دنگ اشتم اديه بلهفة وباسهن 

سحبتهن ورفعت رجليه  فتحت الدكم الي بمتنه خليت قسم 
رجعت للمتن الثاني خليت الباقيات بسته من صدرة ووكفت عدل

-شنو هاي عود تهنئة لو طولج مااسعفج لغير مكان 

-هاي تتسمى افتح اديه دااغجع لبيت بابا وانت تجي مثل الحباب تتفاهم ويا بعد ماتسد قضيتي

-اتفاهم ويه رافد الدغش ؟؟

-اي والله شفت اشلون انقلبت الموازين وهااا مو هنا المصيبة ؛المشكلة اني اعز وحده ابناته وانت قيس شنو غاح يخلي عليك شغوط ومهغ

-رأل شناوية تسوين بيه بعد

-اول شي اشبعك عضات اطلع شكو شي سويته بيه تذكرغ هاي الزوية لو اذكغك بيها

باوعلها رافع حاجبه بستنگار  ضربته بصدره وعفست وجهي انداريت  دااطلع

كز على سنونه وسحبني حضني من وراي خله راسه بركبتي باسها وهمس مااذكر غير  كعداتي بالحديقة وطن الجكاير الصرفتهن بسببج و كلبي الينعل بيه اشلون ورطته بهيج مصيبة وحضني اليسعر ويشتم بيه اشلون بعدتج منه

-صدگ ماتذكغ هذا المكان وكفتي واني خايفة بي

-اشلون ماذكره واني گوة مصبر روحي لااخذج لحضني وگطعج بسنوني

رفعت راسي عض شفته دنگ استوى يريد يعضني ورن فونه اخذ نفس ضغط عليه بحضنه وجر فونه باوع بي عگد حاجبه رد خير ابو الليل

…ذباااح ويين … جايين دساار اطلع كدمناااا … لاتخلي يوصلهااا - يله ابني مانتأخرر جايكممم

غلق فونه ونگ عالمكتب مخبوص يدور عالمفتاح مال الكلبجات

همست خواتي بيهن شيي

-لامرت ذباح وبت خالج ماخذهن ماطور المي وحده منهن ميته

-بفعل فاعل لو هيج

-مااعرف

-هيذام اختي 

-وين المفتاااح

نزلت دموعي عرفت رؤيا سوت الي براسها وضيعت روحها

ركض يدور عالميز ويخابر بأزر لكاه اجه فتح اديه لزمني وطلع يمشي عالسريع صعدنا السيارة اجه ازر اول ماصعد حرك هيذام وداس بكل سرعته…

***رايه****

هوسة صوت صريخ خبص الدنيا  الي يفزع العالم والي يصيح لحد يكرب والي يلطم هذا كله مو براسي اتلفت  عيوني ادور على الي طلعت وناوية ضيع نفسها

احس روحي بهتت ورجلية بعد ماتعيني ردت الزم ايد ماما افترت الدنيا ظلمت الدنيا ماحسيت بعد

كعدت على ايد تضرب على وجهي وصوت بجي وعياط  فتحت عيوني صارت رؤيا بوجهي خاله راسي بحضنها وتباوعلي بقلق حركت شفايفي بتوسل مو انتي

حضنت راسي وكالت حسبت حساب هاي اللحظة  عشت الم الفرگة وشفته اشلون يوجع وانتن اغلى عندي من انو اخلي دمعتجن تنزل وراي كلما تشوفن مكاني فارغ بينجن

-بروح غزوان

-وروح اخوية الراح وهو بحسرة العرس مواني بس اني الراح اكون سبب بأخذ حق دم وحدة انغدرت بوحده ماتت موتت ربها

-شنو قصدج؟؟

-كومي خطية ذباح راح يجي حضريله ملابسه اخاف يرحون للمغتسل

-منو ماتت منهن

دنكت

-لالاااا مو هيام بعدها ماشافت طفلها ولا لحكت تحس بي بداخلها 

-من كد طيبتها ربي كال هاي مومال هيج دنيا اخذها يمه

-ولج بعدني ماشكرتها عالسوته وياي  ولا اخذتها لحضني اشاركها فرحتها لاتكولين هيام اعرفها ماتروح وتعوف ذباح وحده 

-وهاي عافته مثل ماعافج غزوان

همست اني قهرتها موو

-محد انقهر  ولا راح ينكسر گلبه غيرج

-جنت جاية اشوفها حتى اودعها وگلها سامحيني عالصار وطلب الطلاگ من ذباح گدمها 

-مكتوب علينه كل اعزازنا يتركونا بدون وداع

- يعني هاي هيه بعد مااشوفها

حضنتي وبجت اريد ابجي مااگدر حسيت روحي بحلم شي خانگني مايرضه يصدگ

وخرتها وكمت طلعت واشوف النسوان تارسة البيت وعالم تفوت روجات كلها تعيط ؛ الي تلطم والي تشگ ملابسها

درت وجهي ادورها بين الناس ماشفت غير عمتي فجر كاعدة لازمتها ماما يبجن وبصفها بيبي لازمتها جهامة ويمهن امها  تملخ بروحها

هنا حسيتها صدگ راحت خليت ايدي على صدري  طلعت الشهكة من روحي كعدت يم الباب وبجيت بحرگة گلب اودعها بيها من اول ساعة دخلت لبيتي لوكفاتها بموتت غزوان لملكاتها وضحكها وياي 

لحد ما حسيت روحي بهتت وسمعت صوت ذباح يصيح يالله ؛ مسحت دموعي وكمت افترت الدنيا لزمتني رؤيا وخرتها ورحت للباب فتحته لكيته مدنگ التعب والحزن واضح عليه شال راسه عيونه دم اشرت راحت

مارد دنگ

- جان اخذتني وياك اعتذر منها هواي اذيتها ونزلت دموعها

غمض

- دفنتهااا واجيت خلص بعد مانشوفها بينا ولا اسمع صوتها وهيه تشكيلي منك

- لاا امنتها يم غزوان كلتله يخوي صح مااستاهل اكلفك لان مانه گد جلمتي ورديت بيها  بس عينك عليها لبين ماارد دمها واچيك

ردت احجي وسكتتني فجر بجيتها تركض وصلت يم ذباح شافت ملابسه كلها تراب وهيه شكت ثوبها وصاحت دفنتهااا يخوي خذوا حرمتك غدررر جتلوهااا راحت وهيه بحسرت الجاااهل 

لزم الباب مثل الاختل توزانه اجوا دسار و صهيب يركضون  سندوا صاح صهيب سووا طررريج 

وخرت النسوان دخلوا لغرفته راحت وراهم  مرت صهيب تركض

رجعت للغرفة كعدت لميت رجليه عيوني عالعالم وبالي بكلامه منو الكتل معقولة جانوا رايدين رؤيا وخطوها لو عداوة ويه ذباح

للعصر واني بالغرفة حتى الحزن نسيته لان حسيت  بعد راح يفقد احد وابجي فرد بجية بالاخص من ماسووا فاتحة للزلم بس النسوان يدخلن يمنا وعمتي فجر تملخ بروحها وعيونها على غرفة ذباح  مثل الي تودع مكانه

صار الليل خفت العالم الي تعشى وراح والي دخل  لوحدة من الغرف يرتاح دخلت ماما وهجامة يسحلن بروحهن كعدن كمت رحت يم ماما كعدت يمها باوعتلي ونزلت دموعها همست راحت ام گلب الطيب

-جانت ضايجة مني مو

-لاجانت منتظرتج اشوكت  تجين حتى تشاركج فرحتها هيه وتراويج ملابس ابنها الجابتهن

-ماجنت قاصده أأذيها والله احبها مثل خواتي

- وهالحلگت ابن حضني وخلت مكانها وضحكتها خالي

دنگت مغمضة احس الدنيا تفتر گالت شبيج يبعد امج ليش هيج وجهج اصفر

- راح اخذ رؤيا وارجع لبيت بابا

-ليش اكو واحد سمعج احجاية

-رؤيا رادت تكتل غيمة وكعت بهيام موو

-لااا رؤيا صح كلبها شايل هواي بس ماتكتل

-لعد ليش ذباح كال لغزوان صح مااستاهل اكلفك لان رديت بكلمتي بس عيونك على مرتي لحد مااخذ دمها واجيك شنو جان يقصد 

-يقصد لازم ياخذ دم مرته مايكدر يضل مكابل امانته لان هنا اليكتل ينكتل

-ماادري بس كلبي يكول غير شي لان طول مايحجي ماباوع بعيوني وسكوته عن الشكوة مرعب خايف لا ناوي يكتل رؤيا غفل

-يمه اسم الرحمن على كلبها وينها اخيتج ولج

-اختي تشتغل بالمطبخ بس ماشفت نزلت دمعتها  وحتى جهازها غلقته

-خابري ابوج خلي يجي عليجن بسرعة اخذها وروحي محد يكدر يحميها غير رافد

-تعالي ويانه فدوه اروحلج

-من اشتاقلجن اجي للامام وهناك اشوفجن

-ليش ماما لحدمن نضل هيج مشتتين كل واحد بمكان

-لخاطر تعيشن مرتاحات قربي منجن ماراح يفيد غير بضياعجن ؛ رايه ماما لمي خواتج داخل حضنج وديري بالج عليهن لخاطر لاتنوجعين بفراكهن من جديد

سكتت مااعرف شرد لاكلبي ينطيني اكلها اي وعوفها ولا اكدر اتخيل تابوت رؤيا كدامي

حسيت صدري ضاگ دنكت خليت راسي على رجلها وغمضت دقايق واجت رؤيا دخلت بدون لاتحجي راحت يم هجامة تمددت يمها وعيونها علينه  زادت عصرات كلبي

مر الوقت رغم تعب النهار وكبر الفاجعة بس محد يكدر ينام كلمن بجهة؛ الي صافن ودموعه تنزل والي مامستوعب اشلون راحت بهالسرعة والي عيونه ورا ذباح ومنتظر يعرف شنو ضام

لازمه ايد ماما ومغمضة كل شوية اخذها لحضني اشتمها وردها اعصرها اشلون مااريد اقنع نفسي اتركها مااكدر  دااجرب ارجع اتوسل بيها واسمع صوت رئال مشدوها  بره تصيح وين رؤياااا

بعدني ماكايمة واندفعت الباب دخلت تركض شافتها مثل الي جان نفسها  مگطوع وشهگت بلهفة

وكفت ايدها على كلبها تباوعلها ودموعها تنزل
درات وجهه رؤيا للجهة الثانية مامهتمة تفلت عليها واجت لماما دنكت حضنتها بجت بصوت وصاحت بناتج موتني مامااااا

- تعبنج

- لاشلعن كلبي ودمغني خلني اتمنى اني الميته مكان غزوان وخلصانة منهن

- مكتوب عليجن ما تعيشن غير بالخوف وماتضوگن غير المر

- لبالي خذوها وبعد ماشوفهاااا

- اشلونج يبعد امج

شالت راسها عيونها مليانات عتاب وحسرة همست منين ابلش ؛اشكيلج اول لو اسولفلج  لواضم نفسي بحضنج وابجي على شكو وقت احتاجيج بي

- متغيره رئال كبرانة  الشعر رايح والحجي اتغير

- ايام واني اتخيلج يمي واغمض عيوني بحضنج وابجي من وجع كلبي بسبب  بعدكم عني

- اكثر وحده بخواتج  جنت خايفة عليج انتي ماادري ليش كل مااشوفج احس راح ترحين من بين ايديه  وتتأذين

- غيابكم اخذ من عمغي سنين  خلاني اعض اصابعي ندم على كل لحظة جنت اكول اشوكت تخلص ونغتاح لو ادغي هيج البعد  يكتل جان سجدت بكل صلاة احمد الله على لمتنا  بحضنج

- اگلب بكتبج اشتمهن واحضنهن مايخففن نار الي بصدري  بكد مايزيدنه

- كلما اشتاقلج اخلي ايدي على شعغي وباوع للسما اتوسله واكله بعد مااكدغ اغحمني

- خفت لاعيوني تغمض قبل لااشوفج 

- اشتاقيتلج  هواااي ماما

ردتها لحضنها  لميت روحي حضنت رجليه عيوني عليهن بين اعتاب وبين بجي وبين لهفه ملگة بعد البعد الي انجبرن عليه

اكثر من ساعتين وهنه مامصدكات انجمعن لحد ماصار هدوء والعالم نامت اجت رؤيا كعدت يمها جرتها من شعرها وخرتها من حضن ماما همست ليش تأخرتي

رئال -جنت ويه  بابا بالمستشفى

-شبي بابااا

-من اتصلوا على هيذام غحنا للمستشفى دنشوف شكو وصلنا لكينا ذباح ملابسه كلها دم؛  استوى هيذام ديگله اشلون ماتت وهو دخل يغكض من شافني وكف مايكدغ يحجي عيونه مايشوف بيهن يأشغ وين اختج  حسباله  غاية اسم الله عليها الماتت من كلتله لابابا هاي زوجة ذباح الثانية كعد بالكاع لازم كلبه

- يمه اسم الله عليه بس لاصار بي شي

- لا الحمدالله غكضت جبتله الطبيب قاس ضغطه طلع صاعد وگلبه شوية تعبان  انطوا علاج و اغتاح هسه صاغ زين

-اي وشنو الاخبار

-بالبداية هوسه كلشي ماافتهمت بس بعدين من شفت دخلوا غيمة للعملية وهيه تصيح عوفني خلي اشتكي اول غادوا يموتوني ؛ وشغلة زوجته ذباح  المايقبلون يسلموها اله بدون تشغيح فهمت القضية متعمدة بعدين ازغ كمل ملف هيام انطا لذباح وكله غوح اني استلم القضية

- منو جان وياكم

- محد بس بنيه اسمها كمغ هيه وحده عجوز اجن بعد ماطلع ذباح ضلن يم غيمة لحد ما بابا وضعه اتحسن وجابنا هيذام لهنا

-هم شفتيها طلعت من العمليات

- اي وجهه مشوه وايدها ماكو وحتى صفحة من لحمه غجلها الفوگ مشلوعة تخوف

- وازر شنو كال عن القضية

- ماكال بس سمعته يحجي ويه هيذام يكله ذباح  يكول هيام حياتها كلها عايشتها هنا وهذا شغلها من هيه طفلة مال تكولون مكينة المي لكفتها شوفولكم سالفة تفيدكم دم زوجتي  واني اعغف منين اجيبه 

-صح لان مالكفتها المكينة اكو من الدفعها واني جنت واكفة بس يفتحون القضية اشهد

-منوو؟؟

-غيمة

-يا غيمة ولج غيمة ضالة بس نفس مابيها شي صاحي

-اي هيه دفعتها وهيام من همشة روحها لزمت ايدها وسحبتها  رادت تخلص نفسها بس مالحكت لان الماطور جبير سحبهن اثنينهن لوماتنتبه فجر وتلحگ تشلع واير الماطور جان حتى غيمة ماتت

-انتي وين جنتي

قبل لاترد صاحت هجامة  يمي وانه شاهدة وياها اتنوعتها من زتتها عالماطور

فتحت عيوني على كبرهن وباوعت لهجامة دارت وجها لفت خشمها بالشيلة وغمضت

رن فون رؤيا فصلته ثواني اجاها مسج قرته  وهمست بابا يكول خليكم هنا لاطلعون لمكان ولاتحجون ويه احد لحد مااخابركم

رئال- شنو يعني ؟؟

ماما - عزه بعيني يعني معناتها شاكين برؤيا ورا السالفة وماكو طريقة يخلصوها بيها غير يخلوها بيته امانة لان يعرفون ما يوصل للامانة لحد ماتطلع منهم

رئال- صدگ غؤيا هيج ضيعتي نفسج

ضحكت بستهزاء شمرت گصيبتها ورا ضهرها وكامت رجعت لمكانها تمددت؛ ضميت وجهي هالبنية ضايع وياها كلشي ماهامتها حتى روحها

انتجت رئال على ماما وعيونها عليه كأنما تكلي خلصت ياكلنا نعيش سوه يانموت بعد مابيها اماطل  ويه الدنيا

اخذت نفس بحسرة وغمضت لوجه الصبح واني عيني ماخذت نوم لحد ماگعدوا ودخلت عمتي فجر كالت كومن اديجن ويه البنات راح ينصبون فاتحة هنا؛  غمضت عرفت حدد مصير القاتل الي محد يعرفه منو غير ذباح وهجامة

كامن البنات ويه العالم واني وياهن صح مابيه اشتغل هيج شغل بس افتر وراهن بين دموعي تنزل على صوت البجي ومكانها الفارغ  وبين خايفة لاوحده من الداخلات تخلي شي لخواتي بالمي لو تأذيهن بدون لا واحد ينتبه لان العالم تدخل اكثرهم مانعرفهم اعدائنا هواي واليردون الخراب لبيت ذباح اكثر

دخلت بحرب نفسيه اخذلي ساعات اكعد عالدرج عيوني على غرفتها اتسنط للملة وابجي من كلبي وارجع المح وحده من البنات الجاية بيدها فون وتراقب رؤيا الي تفتر وتوزع بالضيافه كلبي يلكشني ارجع اكوم

مرت اربع ايام  بتعب وحزن ؛ ذباح ماشفته ولادخل البيت حتى ملابسه يغيرهن بيت صهيب

بابا ودسار ماتركوا ولالحظة ليل ونهار ويا حتى يباتون يمه ؛  اشكد دسار مامتصافي ويا بس بهيج وقت اثبت وكفته وخوته اله

البيت هدوء كلمن خانس بغرفة كئابة وخنگة وصوتها اله وحشة بينا

اشكد حزنها بكلبي جبير بس خوفي من تصرفات ذباح وهدوئه اكبر لان صرت اعرف هذا الهدوء والامان اليزرعه بالبشر شنو ورا وادري وصل مرحلة من التعب والحزن قرر يختمها بدم هيام ويروح

كاعدة يم الباب لامة رجلية منتظره بابا شوكت يتصل ويكول يله وعيوني تتنقل بين ماما الي كاعده عالسجادة  تندعي  وبين خواتي كلمن بيدها فون تسولف ويه رجلها

رؤيا مگلوبة على بطنها رافعه رجليها ونفس سوالفها تراسل لحد ماتشوفه شاط گلبه تحضره وترد تاخذلها شوية تفتح الحضر وترجع لنفس التفاهه وعركاتهم وين توصل

عكس رئال مستلمة فون فجر فاتحة كام وياهيذام بمكتبه مانسمع غير نعوصتها وهو يحجي وياها بهدوء تكول خايف يخدشها بصوته

اباوع كلمن عيونها شايلة امنية ولمعه تسولف قصة حب تحسها نابعة من داخلها ؛ تذكرت كلام بابا صدگ كبرن ماعادن نفسهن اليتعاركن على حضن  ماما مو قلة محبتهن لا بس كلمن شافت حياتها بحضن خاص بيها

فززتني رؤيا هيه وتكمز اجت تركض سدت الباب  وكعدت ورا  فتحت البصمة  من دسار غمضت واني اسمع اشلون نزل بحرگة  لاخله ابو لا عشيره لا يوم سدتها بسرعة لمت حلكها وباوعت لماما وهمست اتگليلي ليش تحضري

ماما- شنو مصخمة ويا

-كلشي ماكو بس هو يستفزني حتى اتجاوز يكول مامترباية

-رؤياااا

-كال تره تعبت كد ماشايلج بروحي كلتله هذا نعالي ثگيل تعبك؛  سمعتي  كدامج كال هذا النعال نفسه نزعي خلي بحلگج وحلگ اليحجي وياج بعد

-يمه شبيج انتي بس فهميني الغلط وين ولج تعلمي من البنات شوية شوفيهن اشلون يدلعن ويسولفن ليش انتي من دون الخلق  الله غاضب عليج جنج بربري وسخ  غير الاعناد ورفع الضغط ماتعرفين

-ومن اشرب جكاير كلها تنتقدني وتكول ليشش خلي يجون يشوفون اهلي اشلون يحاجوني ومتعبين نفسيتي

-كومي من كدامي  لااتفل بهذا الوجه القذر واكص ايدي اذا باوع بوجهج بعد مو يجيب مشية وياخذج

مااهتمت رجعت  دنكت على فونها دزات بصمة اذا انت رجال اطلع من البيت ماطلع بت ابوي اذا ماگلبت وجهك سطلة معقجه خليك بحضن امك نصيحة

ثواني واجاها مسج - بت الكلبب دخليج مكانج واني الجايج هذا وجهج الجنه وجه قرد غاط بخيسة اذا مامسحت ملامحه تفلي بوجهي

-يصير اتفل مقدماً

- رؤياااااا

-اووو هم صرخ وهم تعالي سوي روحج خايفة وخلي يحس برجولته لايبجي

- واني مااريدج تخافين وهذا لسانج اريده نفسه من اوصل

-شنو لسانج لايامنحط ماتخجل تعلمني هيج سوالف تشوف نفسك لفو ابن شوارع حسبالك كلها مثلك تره اني  مترباية واهلي تعبانين عليه

-اني مو بس لفو لااا  وكلب ابن كلب من اترك شغلي واتصل بوحده مامعروف جنسها شنو

-قصدك رجال موو اي اكيد لعد التاخذ مثلك شنوو لازم واحد بينه يكون زلمه ويلا لك لاتزعجني وهاك بلوك

دزتها وحضرته انتجت مرتاحه غمتها ماما

رئال- هذا دساغ ديتصل عليه

رؤيا- ردي وكليله رؤيا كاعده دتسمع لشيرين انا بالغرام وتبجي

- ماجذب

-وكلام الله يرئال اكوم انظف بيت ذباح بذني شعراتج الجنهن مكنسة هجامة

-انجبي تغه والله اتصل على بابا واخلي يجي هسه يكتلج

-حتى امرعطج وبدل هالغوغه اخليج تأتئين بسبعة وعشرين حرف لان واحد طاير من الاصل

-تف عليج

-تف على ابوج الحيوان يابت الجلب

-اله اكول لبابا دتغلط عليك

- بت القندرررة اشوكت غالطة عليه بت الحذاااء لج ماما مدتسمعها اشلون دترتكب لوبس كدرتج عليه

جرت ماما  الفون من رئال دخلت عالاسماء اتصلت لبالنا لدسار ثواني واجه صوت بابا صاحت دنعل يومك لابو اليوم الي فكرت اقبل بيك شنو جان براسي اشلون رضيت

مارد

- تسكت موو اي طبعاً تعرف نفسك مابيك شغلة زينة وخلفتك مثلك رافد تعال اخذ بناتك لااذبحهن الك

ضحك بصوت عالي

- على شنو تضحك لاحسبالك ماسويها رافد تجي تاخذهن لواشمرهن بالشارع

اخذ حسره وصل صوتها النا كد ماطالعة من روحه   

-انت دتسمعني لولاااااا

حجه بهمس يالله اشكد مشتاق لصوت اصراخج وانتي تشكيلي منهن

غلقت الجهاز شمرته على رئال -هو الابو سكط شطلعن انتن

رؤيا- سگط وجبتني منه ثلاثه بسنتين لو خوش ادمي جان شسويتي

- جبت اول ثنين لكيتهن عسل كلت عوضي ذني على مصيبتي بلكي الثالثة هم هيج طلعتي الفشل بعينه

- تخجليني بأخلاقج

-تف عليج وعلى ابوج

-رحمه الله والديج هذا من اصلج الطيب

رئال- هم اتصل دسار

رؤيا- كليله خلي يجب اندومي وكرزات

ماما- كليله سم بكلبها وكلب ابوها

رؤيا- فدوه شوف حنية الامومة العدها وبعدين انتي ليش مشخصنتها ويه ابوي شنو سالفتج مرايه

رئال- معقولة جان مقصغ وياها  لو لابابا سبع  عززه بس لاجان مصاحب عليها

رؤيا- والله اني شكيت بابا حلو مومال يضل على هيج وحده مشگلبة يله ميخالف لاتضوجين تكبرين وتنسيها همه الزلم كلهم عوج  كلص هبيبي كلص لاتسعلين هسه نلم مهرنا ونسويلج تجميل نبدلج كفر تصير بيج شوفة  

دنكت ماما وهمست ياصبر ايوب

شالت فونها رئال لكت دسار يتصل دترد رفعت رؤيا المخدة شمرتها بيها اجت براسها

خلت الفون رئال بالكاع وكامت جرتها من شعرها وركضت ختلت يم ماما

مدت نفسها رؤيا سحبت الفون دزت مسج لهيذام بول تيري مهتلف صير رجال وطلكني

لطمت ماما على وجهه ورئال نزلت دموعها ؛ رمشت بخبث وكامت رجعت لمكانها تباوعلها  بعدم اهمية تمددت فتحت الحضر ردت تعيل بدسار

ضحكت وكمت طلعت سديت الباب وراي تركت ماما ترزل بجهة ورئال تتصل بهيذام لازمتها الشهكة وهيه ملتهية تشوط بدسار

كعدت عالدرج ظلمة وهدوء ياخذ الگلب لميت رجليه اباوع للگمر شنو جنت تفكر من عفتني وحدي ويه كل هالحمل تعرف كد مامخنوگة وخايفة ماعندي وقت افكر بيك

اخذت نفس دنكت ردت اكول الله يرحمه بس احستها لجمة بكلبي غمضت خليت راسي عالحايط عقلي فارغ كد الحزن والهم بعد مااعرف حتى افكر

اقل النص ساعة واسمع الباب اندفعت فتحت عيوني لكيت ذباح داخل مدنگ بيده غترته والحزن ماخذ من حيله حيل

طلعت عمتي فجر تركض تلكتها حضنته وبجت لمها لصدره دگدگ على ضهرها وباس راسها وخرها اتجه لغرفته 

كمت وكفت عيوني عليه مااعرف اشلون اواسي
باوعتلي فجر بتوسل عرفتها تريدني ابعده عن غرفة هيام لان وضعه كلش تعبان ومبين جايها متعني

اشرت اي رحت بسرعة لزمته من ايده دار وجهه باوعلي عيونه دم  همست تعال حضرتلك الحمام

-لايبه اريد ارتاح شوية

- ميخالف تعال بذيج الغرفة لان هاي  عماتكم بيها

- وعليش خاشات هالحجرة

-الغرف كلهن محجوزات ماعدنا مجال وصوتك فشله لايسمعن هسه هنه شوية  ويطلعن وروح نام براحتك

هز راسه رجع دخل للغرفة دخلت ورا سديت الباب شمر غترته وكعد عالطابوريه ودنگ لازم راسه
رحت  كعدت يم رجليه مسح وجهه  وباوعلي بتعب

-مااكدر اكلك الله يرحمها لان هاي اكثر كلمة توجع بس اكلك جانت تحبك وماترضه هيج تسوي بنفسك

-ظلمتها جثير

-لا ماظلمتها اشكد عشت وياكم ماشفتك تعاملها غير بحنية ودوم تباوعلها بخوف لاتنزل دموعها لوتقهرها

-حرمتها من الخلفة

-لان جنت خايف تنفذ كلمتها وتروح للمستشفى وتسمع كلمه تكسر كلبك ورجولتك كدام اهلك والدليل من عرفت يصير عندك اطفال رضيت اتسوي انابيب

-غدرتها ماعدلت بكلبي ولا بمشاعري وياها غضبت ربي بيها

-ماجانت تدري والمشاعر موبدينا وانت ماقصرت وياها ولاحسستها بهذا الشي

-هيج البعد يوجع

-ماكلك يتشافة ولا ينسى بس يجي الي يخفف ويشغلك او يمكن يعوضك ويخليك تذكر الراح بضحكة بدل الدموع

-رايه تعبان

كالها ودمعت عيونه كمت اخذت راسه لصدري حضنته بقوه ونزلت دموعي مااكدر اذكر اسمها واواسي بيها

وخر مسح وجهه راد يكوم كمشته شال راسه همست ذباح لاتوجع كلبي بوحده من خواتي

مارد راد يوخر اديه ضغطت عليه اكثر وكعدت على ارگبي كدامه - تريد تاخذ حقك مامنعك بس اخذه مني حتى ما غمض واني كارهتك

-ماتلحچين تكرهيني

-لاا ذباح ماتعوفني ولاتجوي كلبي ادري بيك ؛تعرف ليش لان علمتني احتمي بيك واكول اسمك بدون وعي بكل مره احس بالخوف

-رجعت بجلمتي گبل واتندمت

-تره اكدر اروح لبابا واكدر اطلب منه ومتأكدة يخلصنا بس ماتعودت اطلب غير منك لان انت الوحيد الي بدل مااحس بالذل احس بقيمتي واحس نفسي مسؤوليتك واعرف ماتأذيني لو تخذلني

-اااخ لو يلوحج اثر من جمر كلبي

-وينطيك كلبك تحركني بنارك وتخليني وراك ضايعة بعد ماضميتني بحضنك وعلمتني على حمايتك

-يكفي جسرتها وظلمتها بدنيتها 

-ظلمتها من انطيت لغزوان كلمة بيه ظلمتها من دخلت غيمة بسببي ظلمتها من خسرت كل افلوسك وابنك لخاطري يعني حقها يمي اخذه مني

-ياريت اكدر

-تكدر والله لان بعد مابيه احمل شوفت تابوت احد  مو ارد اعيش وجع موت اعز اثنين على كلبي؛ ذباح راح تخليني احقد على نفسي لان راح دخلني صراع ويه داخلي ابجي على فقدانك لو من كد كرهي الك

-اكو كلام لو تعيشين اسنين جثيره تتنوعيله وتتأملينه ماراح تفهمي ولاتحسين بي

-مولبالك موتت هيام هينة عليه لاوروح غزوان  وحده من خواتي واتمنيت اني مكانها ولا اشوفك بهذا الحزن وراها بس مو رؤيا السوتها

-بس جان  الها ايد بدمها

وخرني وكام راح للحمام  غمضت احس روحي بهتانة واعرفه ماراح يتنازل

دقايق واسمعه طلع فتحت عيوني لكيته  غاسل وجهه جايه ناحية افراشه دنگ بعد المخده وكعد  سحب باكيت الجكاير اخذ وحده دنگ ورثها

كمت كعدت يمه حسيت بغربته وضياعة بهيج موقف خليت راسي على متنه وغمضت صار هدوء

كل واحد بينا حامل حيرة تهد جبال  مرت الساعات واحنا  على  كعدته  محد حجه  لاذان الصبح سمعت اذن نزلت دموعي ادور صوته وين وهو يفتر علينا يگعدنا للشغل

دنگ ذباح  فرك راسه اخذ حسره وكام راح توضى
حسيت العملية نغزتني سحبت المخده خليت راسي عليه غمضت ولميت روحي لازمتها  

طلع من الحمام فرش سجادته وكف راد يصلي وبطل اجه يمي كعد نص گعد وخر شعري عن وجهي يباوعلي بقلق همست مابيه شي روح كمل صلاتك

- شمالج يبه

- شوية وجعتني يمكن لان وكفت هواي وصار كم يوم مانايمة هسه اصير زينة

- عليش تعملين بيه هيج

- يمكن  حتى تأكد من معزتي عندك اخاف تقل لوتروح لغيري 

- لواگدر اعملها جان مانطرت ولاحملت كل هالذل والحرام

- لعد لاتنهيها بدماري  

مارد اخذ نفس وكام رد لسجادته وكف واني غمضت احس مكان العملية يسعر عصرته حيل وخنست

كملت صلاته كعد عالسجادة رفع اديه يندعي وعيونه تلمع  نزلت دموعي عرفته ذكرها لان هيج وقت توكف يمه

رجعت غمضت  اخذله شوية واسمعه يستغفر كام لم سجادته خلاها عالميز واجه يمي غطاني وكعد  طلع جكاره ورثها وانتجه همس بصوت كوه يطلع نامي يبه

عدلت راسي رد صعد غطاي دفاني وخله ايده بشعري يحرك بي عالكيف وعيونه بغير مكان كل دقيقة  تنزل دمعته ويمسحها بسرعة حتى لاواحد ينتبه

غمضت صح أمنت يمي ماراح يطلع لو يأذي وحده من خواتي بس حرگه هيام تاكل بروحي

تعب والم  النعسة بعيوني رحت بالنوم بدون لاحس

مااعرف شنو الصار لحد  ماكعدت على صوت عمتي تبجي طفرت طلعت اركض صاروا بوجهي صهيب وصگر  لازمين ذباح مطلعي من غرفة هيام  وهو مدنگ عيونه دم كوه يمشي مهدود حيله ؛ خليت ايدي على كلبي اخذ نفس

راحوا طلعوا وبيبي قفلت الباب خذت المفتاح  واشرتلهم يلا لحد يوصل هنا

نزلت دموعي على مكانها الظل فارغ عكس محبتها وطيبتها  التركتها بكلوبنا 

مسحت وجهي ورحت غسلت رجعت لغرفتنا  لكيت رئال خالة درع بحضنها تبوس بي ورؤيا خانسة تراسل وعاضه شفتها؛ شافتني بسرعة غلقت الجهاز  وابتسمت

-المن تراسلين

رؤيا -هااا لا ماكو بس بابا جان ديحجي وياي كال تجن لو تضلن يم امجن

- لااكيد انتي ورئال ترحن بس اني اضل يم ماما لمن يطلع السابع

- بابا مترخص من صهيب بعد العاشر تجي المشية لازم تكونين هناك

-اهل هيذام

-وليش اهل هيذام مو دسار

-بعد الكلام الصار بينكم البارحة الصراحة أيست

- لعد سمعي المشية اهل دسار وفوگ عشيرته  جايب الضباط وعلى هاي كلمتج راح اخلي يدفع ضعف المهر

- لو مامتأكده من تفاهتج جان كلت مسويتله سحر بس اعرفج انتي افشل من هيج سوالف

-صدگ عرفتي بالخبر

-خير

-غيمة طالبه يفتحون تحقيق تريد تشتكي عليه

- رؤيا بروح غزوان احلفج مرة ثانية الج ايد

- كل عقلج انتي اشلون اكتل وحده ماكله وياها خبز وملح وماشفت منها غير الخير والوكفات الحلوه

- لعد ليش غيمة مصممة تلبس السالفة براسج وتقنع بيهم

-هيه لوعدها عقلج المحجر جان بعدها لحد الان بيت جاسم ياحبيبتي هاي تفكر لبعيد من شمرت هيام الله يرحمها حسبت حساب تخليها براسي حتى ذباح يكتلني وانتي تركي وهيج تخلص منه كلنا فرد مره ويصفالها الجو

-وهسه شنو تستفاد من تشتكي

-هم تشمرني بالسجن واكيد ذباح مايتنازل عن حق دم مرته وهيج انتي تولين وهيه ترد لهنا لان جان الحادث بسببهم ولازم يتحملوها بكل عيوبها

-اعوذوا بالله من شرها وهسه شنو راح تسون

-الي تريده اكيد دتركي السالفة  وباوعي منو عدنا حبيب خالاته

- منو جابة

- ابو دزه بيد الحماية بعد مااتصلت النعواصه تبجي

- جان صبرت شوية لبين ماترد اخاف يتأذى خطية بين هنا وبيت بابا وانتن عدجن شغل وتحضيرات  منو ينتبهله

ماما - شنو ياخذنه انوب يتعور ابن بنيتي خلي يمي من تكملون شغلكم تعالوا اخذوا

رؤيا - ماطول هيج كلبج ارهيف ماعطف  على ذاك المكرود التاركته يجدي محنة يغسل بملابسه  ويغني ياحريمة

- كملتي يله بعد امج اخذي اختج وكومن ولن دورله على وحده تشبعه محنة وعاطفه وتخلي يغني بيحلى السهر

- عيب هاي سوالف زائد عشرين وابونا متربي خوش رجال مايسوي هيج شغلات هاي افكار بس داخل  عقلج المنحرف

- ابوج متربي؟؟

- اي والله مربي على ايدينا بعد عمري  يكت براءه خو من يحجي عيونه بالگاع ابد مايشيلها وكد مافقير تسألي عن اسمه ياخذله اشكد يالله يذكره ويرد

- رافد الدغش؟؟

- وانتي مامحلفتني غير كد مامؤمن عاد مسلسل المختار  خمس مرات اله اكلج قبل كم يوم مختار المنطقة دگ الباب صاح بابا منو كال اني المختار هلكد ماگلبه طاهر بالايمان راح. عقله لغير مختار كام يصيح اين سيفي اين رمحي حي على الثااار

- ماصلى بطريقة ركعتين فرد مرة

- ليش الجذب لااا بس هاا هو ماينام اذا ما يقرأ دعاء الجوشن الكبير ويكون متوضي بس اااخ الحقد والغل العد العالم بس يردون يسقطون سمعته

-كومي رؤيا لاتخلين اطلع من ديني

-وين طلعين هو انتي يهودية

شالت دبه الشكر ماما ورؤيا طفرت طلعت تركض هزيت ايدها رجعت الدبة مكانها ردت رؤيا مدت راسها وكالت تره بليل  اجي موتنامون بدوني

- اااخ يذباح شكول عليك من رحت فتحت عيونها وخليتها اطفر موجنت خالصة

- اله ازوج ابوي وحده تخبل واشغل خواتي خدامات جوه رجليها  واحرگ كلبج سهلة

-تف عليج وعلى ابوج

رفعت راسها وراحت كامت  رئال بوست درع وصته لايسوي وكاحه ردت باست ماما واجت يمي لزمت اديه وهمست خليج ويه ذباح  لاتخلين كلبج يقسى وينسيج وكفاته وياكم اشكد

-اله يمي كل الوكفات بس ماكو شي ثاني

-ماتعغفين الدنيا شضامة بعد

- لافدوه كافي نريد نرتاح

- ان شاءالله يله اني اغوح خطية بابا متانينه وعيونج على دغع فدوه تغه هذا اخغ امل عندي

- ربي يحفظة الج ويفرح كلبج بي

- امين ويملي حضنج ويعوضج عن كل حزن

حضنتها  باستني وراحت اجاني درع يركض دنكت شلته بوسته  ورجعت كعدت يم ماما انتبهت لعيونها عليه مثل العدها حجي ومتردده اشر شكو

ماما- هاا شسمه

-شنو ماما احجي

-انتي بس لاتعصبين والله ماتأخر بسرعة اخطف رجلي لغيمة اشوفها بلكي اخليها تتنازل عن القضية

- ماراح تتنازل وراح تجي واذا ماسممت وحده من خواتي لو كتلتها بشي طريقة اكص ايدي

- لااني احجي وياها واتعهدلها اداريها طول عمرها بس تفك ياخه من رؤيا

- ادارين منوو تعرفين صار كم يوم اني اشلون حالتي مامااا النوم مداشوفه كلما اغمض اتخيل كاعده يم تابوت وحده منهن حتى بجي على هيام الوكفتلي وگفة اخوه ماكدرت ابجي مثل البشرر

- تره هجامه سولفت ويا ذباح  الصبح عنها وسامحها وكال جيبوها هنا كافي خذت جزاتها

- جذذذب ذباح مايتنازل عن حقه لو تنحري الليل كله اتوسل ذليت نفسي ذل اله ومانطاني كلمة وهو جان بس شاك برؤيا مجرد شك الها ايد بموتتها للصبح ضل كاعد مانام صافن بوجهي مايعرف اشلون يرد عليه ويكول حقي اهم منج

-يعني شنو

- يعني ماتعرفين شكو براس ذباح ولاتعرفين شناوي بعد مايجيبها لهنا  وتردين ترحين كومي ماالزمج وجيبها داريها مالنا شغل بيح بس اعتبري هاي اخر كعده بينا

- هيج يارايه صارت

- اي واكثر الي يخلي ايده على جرحنا وينسى دم اخيتنا وعذاب سنين مايلكه عندي غير النكران

- انتي ليش هيج كلبج مابي رحمة

- لان ماشوف بعيونج تدرين ليش لان مابيهن غير الراحه والعوض ردن بناتج لحضنج وكل وحده راح تستقر بيت وانتي مقرره ترحين يم هجامة وهاي حياتج كملت من نظرج؛ بس لوانطيج عيوني ماراح تشوفين غير رئال فقدت امومتها وكل ماتشوف طفل تنعصر ودير وجها حتى لحد ينتبه الها ؛ورؤيا تختل جوه الغطا حتى تحضن تيشيرت رند  وتنزل دموعها بكتمة تتمنى مارادلها النظر حتى ماتندل وين اضمه كل مره وتاخذه ؛  واني اني اصلاً ماموجودة ضايعة لاطايله سما  ولا ارض انحرمت من كلشي باجر عگبة خواتي كلمن تروح بيتها وارد وحدي اتصفن انتظرهن كل اسبوع يجني ساعة

- وربج اخذ حقجن منها

- لاا  كل الصارلها مايجي لحظة وحده من صرخة رئال هيه تضم نفسها وراي حتى لاتنصلخ ولايجي رجفة من رؤيا هيه وتتلفت خايفه لايوصلها جاسم بدون صوت وكتها تكون ضاعت

دنكت تتحسر دخلت فجر اجت كعدت يمنا انتجت وكالت اووف يايمه شيفضج يادنيا

ماما - شلون ذباح

- ماطوله خش حجرتها وطلع الي بكلبه يعني هود جرحه

- وينه اريد اكوم اخذ من خاطره ماشفته

- غادي واكف يم دسار والخرزة مااعرف هالبت شتلغث ذباح يتسنط ودسار كل شوية وكاتم نفسها اطگه وترد تكمل

- عفية رجال اشلون متحملها ماادري

- هه يحبها خيه هيه صح تزابگ ولسانها باذر بس حليوه وتخشى الكلب بشيطنتها ربي يحفظها ويسعدها ياقادر ياكريم

- لعد ذيج رجلها يحبها اكثر ام دميعة بليل يرد من شغله هلكان وهيه تسولف والله البارحه كسر خاطر عيونه حمر والتعب مبين عليه وماينطي كلبه يعوفها لحد ماتنعس وتكله يله اريد انام يالله يروح

-عوض ربج جبيرر خيه جا عبالج تايهه كلمن يحصد نتيجة اعماله وصفات نيته وتعبه من هالدنيا بعد عدنا وحده لو ربي يهديها جااحنه بخير

- شيهديها اذا اكلها اروح احجي ويه غيمة تبرت مني

- غددي غيمة عوذه ربي يهلكها ولايردها سالمة وعلى شني رايحة هيه بعد كم يوم تجي هون

- يعني رضى ذباح تجي

- خيه انه عارفه شني براس ذباح دز هجامة تضل يمها وكال هيرولها حجرة وهالواكف يم الرعنه والله اليستر لان اثنينهم ربك خالقلهم نفس العگل واحد يأيد الثاني بسوء اعماله

- خايفة تشتكي على ابنيتي وتضيعها الي

-يمه واشلون عندج بت ترفة ولسانها بالعته برري خو زلمتها يجسر الكلب كد مافقير حشا خلقه الله جنهم قروده ضاربهم موجه خبال  خيه شو سكتي رحمه لاهلج

كلتلها صدگ عمه الخميس راح يجون المشية لرؤيا ورئال لبيت بابا اشلون اروح اترخص من بيبي

- مرخوصة يعمه خليهن يروحن بفالهن تكفي وكفتهم بظهر ذباح كل هالايام واخياتج كاضات البيت والفاتحة كفيتوا وفيتوا ماكصرتوا

-والله بابا كد ماحاسبكم اهل  كال نسوان الخطبة  يجن هنا والزلم هناك ماجنا حاسبين حساب يصير هيج

-گدر مكتوب لازم نشوفه عبن ارويحتها طيبة راحت بدون اذيه  مثل فاتحتها كضت بخير وبهدوء   يعمه اخذي اميمتج غادي واستگبلن خطارجن

ماما- وين اروح

- شني وين ترحين لبنياتج تلكي عيالهن ورحبي بيهم ورفعي راسهن وخليلهن مگدار جدامهم مشاكلج ويه زلمتج بعديها

-لازمه عده

-وياهو الكلج جلعي لحضنه كلتلج ترحين لخطارج

درت وجهي لماما باوعتلها وهمست اي فدوه والله  مااعرف اني وحدي شنو احجي وياهن واذا على بابا اني اخلي يطلع مايرد لحد ماترجعين هنا لخاطرهن والله خطية يردن يتباهن بيكم كدام عيالهن

فجر - جا هو بكيفها تروح وغصباً عنها وحتى حرمة صهيب تروح وياجن تساعدجن واي تعتازوا بس طرشيلي خبر ساعة ويكون حدج

سكتت ماردت شلت درع  خليته بحضنها وكمت بسرعه قبل لاتكول لااا

مر كم يوم رئال ورؤيا يطلعن من الصبح يوصلهن صگر وبليل يجيبهن بابا مااعرف شوراهن ولايحجن  ادري وراهن مصيبة لان اكثر الاوقات يحجن بالفون ويه ازواجهن بس مايحجن

ذباح صار انسان ثاني بعد ماينحمل يريد بس واحد يتمشكل ويا الكل كام يبتعد عنه حتى اني كمت اخاف اوصله بالاخص من اشوف شلون معصب؛  نسى شي اسمه حجي غير الزمخ والدمغ مايعرف

بالنهار ماموجود  يدور طلايب يشتم العركة على بعد ميل ويروحلها وبليل يسهر يلزم جكارته ويگعد عالدرج  ينتظر اذان الفجر ياخذ سلاحه ويطلع؛

تظل بيبي لازمه راسها ومدنگه عالسجادة وعمتي تصيح رد ذباح لسوادينه اذا مايجتله احد ويخش السجن مايركد

واني احسب يوم يوم للعاشر مااصدگ يخلص حتى اخذ خواتي وارجع لبيت بابا قبل طلعت غيمة لان اعرفها ماراح تتركهن بحالهن اذا ماشوهت وحده منهن لو تشمرها بشغلة تجيب اخرتها خاصتاً من سمعت راح تجي مشيتهن وهيه سكط

كلما تجي هجامه اتلكها حتى اعرف شناوية ماترد غير ربج يسترجن من شرها عيونج على اخياتج تراها صافة ويه گمريه وناويات نية بس ربج يشكفجن عنها

ماطلع العاشر اله وروحي طلعت كعدنا من الصبح فجر وهجامة راحن يجيبنها واني بين الم  اغراضنا بين عيوني بدرع لايوگع

كملت عالسريع لبست درع خليته يم بيبي يلعب ويه بت صهيب طلعت لكيت رئال تروح وتجي متوتره جهازها بيدها كل شوية تباوع بي وتاكل بأضافرها شرت شكو

- هاا لا بس متانيه غؤيا كالت شوية واجي شو تعطلت

- وين راحت مو تعرف نريد نولي صدك تحجي هااي

- ويه ذباح ودساغ اجيب كم شغلة معتازينها

-رئال وين اختج

-هاا هذا هيذام ديتصل هسه اجي

عافتني وطلعت تركض لجهة الحديقة  استغفرت ورحت للمطبخ جهزت الريوگ وعيوني بالباب خايفة تدخل غيمة قبل لانطلع ؛ مااعرف ليش كلبي ينغشني ويكول راح تصير مصيبة تخليج تتندمين اشلون مانحرتي ركبتج بساعة رجعتج للبيت ولكيتي فارغ  بدونهم

خليت الريوگ وطلعت مالي نفس حتى اكل كاعده عالدرج عيوني عالباب مر الوقت وهيه مامنها خبر

طلعن ماما وبيبي فرشن بالشمس كعدن عالدفوا واني احس بعد ماعندي صبر  بالاخص من اتصل عليها واشوفه مغلق

امسح بوجهي بقلة صبر وارد اترقب الطريق اجت رئال صفرة وباهتة كعدت يمي  صگيت على سنوني  - اااخ ياانتن دخيل محمد اذا استقريتن وريحتني من همجن

دنكت ماردت

-وين رؤياااا مو صار ساعة مثل الحماااارة انتظرررر 

غمضت

-كومي لاتكعدين يمي ساعة واكتلج وابتلي بيج

لزمت ايدي وخلت راسها على متني داادفعها ودخلت رؤيا كمت منتظرتها تجيني حتى اسحلها واطلع حرگت كلبي بيها بس شفتها وكفت تباوعلنا من بعيد ودموعها تنزل

شهكت رئال ورجعت كعدت عالدرج

همست شكو

مسحت دموعها واجت تركض حضنتني وبجت بصوت

-بروح رند احجن شصاير  لاتاكلن كلبي

رؤيا - جنت يم رنود تسلم عليجن وتكول ماقصرتن رديتن حقي وهسه نمت براحة

-رؤيااا شنو سويتي

وخرت راسها مسحت دموعها وضحكت

-وين غيمة

-يم زوجهاا

-يازوجها اشوكت تزوجت

-هاي جيتي منها عقدناها اني وذباح على جاسم…

لاتنسون التصويت ❤️