رواية شيء من رصيف الدم الفصل السابع والعشرون 27 - بقلم Leo Alfatlawi

شيء من رصيف الدم

بقلمي:   leo Alfatlawi

بارت السابع والعشرون

بارتين سوة

***رايه***

دانزل وتوقفت على صرخت غيمة وهيه تصيح سويتها يذباح جبتها على راسي بعد ماباعتني وانهزمت

سحبتني فجر نزلتني وهيه مستمرة بالصراخ
اباوعلها الشعر مگصوص ومصبوغ والمكياج طوخ بدشداشة حمرة والذهب تارس صدرها

اندارت عليه صاحت خلصت الزلم ماكو بس رجلي خليتي عينج عليه وين صار غزوان موعالاساس جنتي كاتلة نفسج عليه لو بعد ماتتحملين بدون رجاااال

وانت شنو موهاي الي باعتني للعالم اشلون جبتها لهناااا ماخفت على عرضك منها تعرف وين جانت وشنو مسوية لو شفتها حلوة بعد ماتشوف گدامك

دنگ حك خشمه

- ماتردد لو ماعندك جواب اي شتريد تكول دنت نفسي على مرت اخوي الجان مأمن بيه ونهار وليل يسولفلي على حبه الها لو تريد تكول اني موكد كلمتي

اباوعله على ادنگه اشر اي واتحرك يمشي عالكيف وصل يمها رفع راسه ؛  بجت وهمست بدل ماتجيبلي حقي منها من سلمتني للمشعوذة تاخذ شرفي تروح تستر على قذارتها تدري ويه كم واحد ن…

بعدها مامكملة وسكتها بضربة گعدها بالگاع لزمت خدها وصاحت تكتلنييي لخاطر العاهررررة

واجتها الدفرة گلبت معدتها گلها ركضت فجر رادت تلزمه دفعها بقوة اختل توازنها لزمتها هيام بسرعة جرتها يمها  

وهو دنگ شال غيمة من شعرها وگفها باوعتله بخوف فتحت حلكها استوها دتحجي وهفها راجدي گد ماقوي دگ راسها بالحايط بعدها ماصارخة  واجاها الراجدي الثاني على وجها طگ خشمها دم  لزمته وگعدت لبالي راح يبطل بس من شفته دنگ دفرها مدها بالكاع وفتح حزام السلاح غمضت خفت من شكله حسيته مو ذباح نفسه اتحول انسان ثاني

الكل ابتعد خايف الي ركض يصيح لامه والي تبجي والي طلعت تنخي صكر يدخل يخلصها

صوت اول لسعة ويه صرختها عصرت گلبي   سحبتني هيام بسرعة اخذتني للغرفة دفعتني بيها وسدت الباب واسمع الصريخ بلش وركضتهم مخبوصين ؛ حسيت روحي هبطت گعدت عالقنفة صوت  الضرب والتوسل  رجعني لضربات بابا سديت اذاناتي و لميت رجلية اكثر من ربع ساعة والهوسة مستمرة لحد مااختفى صوتها نهائياً وصوت ذباح رج البيت وهو يصيح شيلوها زتوها  بالحجرة لحد مارد ورحمة ابوي اذا هيست احد محدر صوبها ماهو عاطيها نگطت مي اترس فچه بارودد سمعتوااا

مااسمع شردوا بس حس بجيتها بتوسل من شالوها اخذوها دقايق وشحطت السيارة عرفته طلع

انفتحت الباب كمت مفزوعة دخلت عمتي وفجر لازمة ام ذباح گالت اسم الله يجدة شمالج جفلتي هيج

-راح ذباح ؟؟

- اي وله بطريچه المهجوم

-وغيمة

-زتها بچلة الهوش لبين مايرد ويعيد  ارباها هلبت يخرسها ويخلصنا من لهوچتها الباذرة

سكتت

اخذتها فجر گعدتها خلت وراها مخدمة انتجت باوعتلي وبتسمت كالت ولو مغتاظة ومامواطنة اتنوع لوجهج بس تضلين وصية رفيچه وعزيز كلبه تگربي يجده خلي احبنج

رحت دنكت سلمت عليها وكعدت يمها  مدنگة

- ولو ماهو وكت هالحجي بس يجدة الغلط مايوجع غير صويحبه وانتي صغيرة راد واحد يكف بضهرج ويحميج موش تحمين احد شني الجار بجهامتج وچبرج هيج تعملين

- خفت لاياخذهن مني

- وشني الصار 

نزلت دموعي

- استغفر الله عليش يچدة دوهنتي رويحتج وسودنتي الزلمة وراج هالصارله اشهور لاينام ليله ولايكض نهاره يجلع من مچان لمچان وراجن

- ماردت احمل عليكم اكثر

- اكو احد شاكيلج هسه من اكوم اچسر العصة على جهامتج العايبة هم احد يكضني

- راح يگدر يرجعلياها مو  ؟؟

- ماطوله كض شاربه يردها لاتخافين هدي جانت كبل امانة رفيجه وهو متسودن ماهي هسه عرضه وعلي يبن البدوية يفج الگاع ويسطرهم بيها واحد واحد بس ربج ينجيهم  من شره 

- اندعيلي بيبي فدوة يرجعها لحضني ماضل عندي غيرها بلكي ربي يمسع منج وماياخذها بذنبي

- وشعندج ذنب يبعد جدتج وانتي كليبج حامل دهر الدنيا ومصايبها مسحي دموعج  يجده انرفع الاذان گومي اجددي وتعالي يمي لخاطر نصلي بعون الله مانخلص واله خبرها بشليلج

اشرت اي وكمت مسحت وجهي طلعت ويه فجر اباوع البيت متروس جهال و نسوان بس كلها محجبة ودشاديش طويلة

سلمت حتى ماسمعت منو رد ومنو لا رحت وراها للحمام دخلت غسلت وتوضيت رجعنا للغرفة لكيت الحجية على سجادتها كاعدة تسبح

دخلت مرية متوسطه انطتني سجادة فرشتها ولبست الجادر وگفت اتجتفت صارت عيون ام ذباح عليه  ماحجت بس سحب التربة من سجادتي خلتها على سجادتها

صليت مو تگول ركعتين مااعرف شقريت بيهن اكثر من مرة اكطعها وارد اعيد لحد ماتعبت وسلمت همست تقبل الله رفعي ايديج وانخي ابو راس الحار بأمه يجدة

غمضت همست يارب بجاهم عندك ردهن سالمات اليه ياابو الفضل نخيتك تعرف معزت الاخوه اشلونها  اندعيلي يم ربي لايفجع كلبي بيها بداعة صبر امك

- ملج عليج ذباح

فتحت عيوني

- الحرمة شماقوت وعلت على وجعها تعتاز احد يكض ظهرها ويسندها بحملها من غدر الوكت 

همست مات وخلاني وحدي محتارة اشلون المهن

- صارت عندي فجر ونجتل زلمتي حسيت الدنيا وگفت بعيوني هذا عشگ صباي مانه هين  كملت العدة يم هلي وانه لااكل ولااشرب حتى الفرخة هملتها ماريده بس اغمض لخاطر اتنوعله داخل عويناتي

- تعبت واني اتوسل بس يجيني بالحلم حتى لو مرة كافي

- عبنه يحبج صج لان شوفت العزيز بالمنام تسعر الافاد بجمر ماتهود غير بالموت

- قابلة بس كون اشوفه واشكيله عن الشفته من بعده  واكله اشكد مشتاقتله

- كل شوفه اله جانت وجع يضل ايام تنهش بروحي لحد ماجبرني ابن امي ورحت غصباً على خشمي عطية لابن عمي مجان ياخذ اخيته ؛ماگلج مانحبت  وتمنيت الموت بس من حسيت گليب ولدي داخلي ينبض وبعدها تنوعتله بحضني يرافس حسيته سندي وهذا الي يگفلي بوجه الوكت ويعوضني مجان الچسر العشته

- ماريده عوض بس يردلي خواتي راضية بقمستي

- گبلج كلتها جثير لحد ماوگفت ذيج الوگفة وانه اصيح ييمة تعالوا لية اخوتي  راح ينهبون حلالي وتنوعت صهيب بظهري وذباح كاض تفكته واجف بوجهي شكرت ربي على القسمة

- اخوج راد  ياخذ حلالج

- هاني وستضعفني استگوه عليه بأربعين زلمتي الثاني عبني وحيدة وولدي صغار ؛ وگف مستهزء بذباح مايعرف الزلمة مانه بالعمر طره وصاح بعد عن طريجي هاي الگاع الي واذا تنوعت واصل حدها ادفنك بيها انت والبدوية المستسبعه بجاهل مثلك بعده مامكمل جلمة وطشر ذباح فجه بالبارود

- موته؟؟

- وانسجن ١٥سنة عبنه حداث رفع راسي وخله الديرة كلها تهابني وتعرف الي بظهري زلمة من ظهر حر 

- اني مومثلج

- انتي فوگ الغيم  لا نطرتي زراعتج تعلى ولادورتي المنجل لخاطر تحصدين اجاج الحاصل وراعي لحد رجولج

- مافهمت

- تفهمين يجدة بس كضي عدل صح هو ماينحمل بس زلمة ينشد بي الظهر

دخلت هيام دنكت خجلانة صح عقدنا هيج وعمري ماراح استند عليه غير سند الاخوة بس حسيت نفسي حقيرة وناكرة العشرة

دنكت عليه باستني كالت يردون ان شاء الله لاتخافين

نزلت دموعي

- رفعي راسج لو مااعرف معزة غزوان بگلبج مثل ماهيه بگلب ذباح واعرف زلمتي ماحطج بأسمة لو ماجان حاسبج خيته وحاير اشلون يحميج جان ماگعدت هالگعدة جدامج

-رجعت بعهدي لغزوان وكسرة گلبه  لخاطرهن

-مارديتي وان جان على العقد حسبي عقد دم لخاطر تخاوينا وتخشين بحمايته

-راح يلحگ يردها مو

-ماطول صارت عرضه مايتركها غير بموته يله گومي خلينه السفرة اجلي لگمة ويانه

- مااشتهي بس اريد انام شوية راسي راح ينفجر

ام صهيب - وين شريجتج المعثرة

هيام - مشمورة بالحجرة  ماضال بيها شي صاحي اضن مجسورة ايدها كاضتها وتنحب

- وديلها اچل خلي تتسمم

- حدها گمريه هسه ياجلن سوه

- خوش گومي جيبي الاچل لاخيتج هون تاجل اروحلها

هزت راسها وكامت  نزعت الجادر لميت السجادة  خليتها بصف الحايط وكعدت باهته روحي كلبي يم رؤيا وتفكيري يم ماما

الحجية دنگت تقرا قرآن وفجر دخلت فرشت سجادتها تصلي من بعد ماصبت الاكل الهم وتركتهم ياكلون مبينة هيه لازمة البيت

احس راسي يفتر عدلت السجادة تمددت نغزتني المناظر طلعتها من صدري ماكدرت اباوعلها خليتها يمي عالسجادة وغمضت

صنته  بس صوت الحجيه تقرا بهدوء والتعب والتفكير كل واحد ماخذله حيز مااعرف اشلون رحت بالنوم

ماكعدت غير على صوت ذباح يگح وحدة يمي تبجي

فتحت عيوني لكيت ذباح گاعد بصف امه عالقريولة سلاحة يمه مدنگ على جليه بيده جكارته وهيام  يم راسي لازمه مناظر غزوان وتشهگ بكتمة

كمت بسرعة جريتها من ايدها شال راسه ذباح عيونه دم  يباوعلي بحرگة وجهه گد الغضب يحسسك ماكو رحمة بعد   ؛عصرت مناظر غزوان وهمست لكيتها

- وين امج يحرمة غزوان ؟؟

سكتت

- تدرين راح تسلم نفسها ونخرسني مووو

- لان ماراح تحصل رؤيا غير بهالطريقة

ضغط على سنونه وگام كلها گامت ويا دفر الترمز فلشه بالحايط واجاني ركضت فجر لزمته والحجية صاحت ذبااااااج

عصر جف ايده وگال هين يراية هاي الثانية

- هيه مارضت اگول

- وهيه ياهووووو حتى ترضه لولاااا شني عگول ماكووو بروسجن بس فهمينييي شعمل لخاطر اكضجن

- حتى يجي بابا للمركز ويلزموا

- وهو هيج زمااال جلع بدون فهم لخاطر يرضي عقلجن المحجر ولج هاااي قضية قتتتل تعرفين شنييييي اشلووون طاوعتيهاااا

-يعني ماحصلتوا رؤيا

دار وجهه صفگ ايد بأيد وگعد لازم راسه مدنگ

-شنوو يعني راحن اثنيهن

رفع راسه يباوعلي بقلة صبر عيونه دم كلها حيرة

شهكت

استغفر ومسح وجهه

فجر - بسج ييمه الازلام  غادي محاوطين المجان لابد مايطيح بديهم  وذباح اجه على شيخنا لخاطر ياخذه للمركز هلبت يگدر يحلها ويطلع والدتج من غير امج سجلت دعوه بختفاء رؤيا وتهمت ابوج بيها يعني مايگدر يعمل شي لاتخافين

- بابا ماعنده مكان بس عمتي

ذباح - وانه وين اطيح على غضب الكائنات اذا نبشت المجان نبشش ماخليت طير تابعلهم ماكضيته موش بشر

- غيمة تندلهم

- ندهولي استغفر الله

مسحت عيوني احس وجهي يحركني ورحي رايحة زلمت النظارات حيل وغمضت

خلت هيام ايدها على وجهي فتحت عيوني بتعب كالت صخام بوجهج موچرة يالمعثرة

- شنو يعني؟؟

- ياع وانه اكول شمالها البت زهرمت على ساعة ولج شني ماتحسيت حتى شفتج طاكة من گد الصخونة

-مابيه شي هسه تروح

دخلت گمر ساندة  غيمة  الي كلها منفوخة زرگة لاضال وجه ولاشعر شافت ذباح ركضت دنكت على رجليه تبجي وتصيح اسفه والله مااعرف اشلون طولت لساني

شالها من شعرها لزمت ايده باستها سحبها بسرعة ورفع رجله خلاها على صدرها دفعها  رجعت ليورا گعدت

- تنوعي  لج  جلمة وحدة ماثنيها ان جذبتي وروح الراح بعز شبابه ادفنج حدر رجلي

-  مداافتهم على شنو تحجي

-وين بيت رضيعة جاسم

- شوية عن بيتنا بالفرع الثاني بصف الاسواق

- البيت مهچور

-لاموجودين لان گاعدين بالسرداب كلما يسوي مصيبة عمي يختلون هناك ويغلقون البيت حتى لاواحد يلزمهم حتى اكلهم يشمره الهم ابوطبر من الحايط تالي الليل

- خوش حجي ابو طبر وين گاعد

- ماعنده بيت باعه كام يبات ويه عمتي بنفس المكان

- ولزمتها

- عادي يقبل مأمن منه حتى من يطلع للشغل ويبات بره ابو طبر يضل مكانه لان الجهال تخاف وحدها

- لاكفوو صاحب وكفات العرض واحد ؛ المهم غير ابو طبر المن مرافج الگرن

- هواي كل يوم جان  يدخل عدنا واحد واكثرها جماعة المركز لان جانوا يتلوكون اله حتى يقبل ينطيهم بناته

دنگ ياكل بشفته 

فجر - وين شايفيهن وهنه حتى من يطلعن متنگبات

- لارايه جانت دوم تطلع ويه امها توديها للمستشفى لو تطلع تشتري الرند حتى رؤيا كلما تتعارك ويه عمي يكتلها ويطلعها يشمرها بره لحد مايرد غزوان ويرجعها

- واخيتهم المفگودة

- رئال ؟؟ لا هاي جبانة ماتتحرك ولاتطلع بدون نقاب حتى من يكتلها تسكت تبجي بالختلة لخاطر لايطلعها برا

- وانتي من يانوع سافطج

-اني مايكتلني لان مااعانده واسمع كلمته وهم غزوان مايخلي

- مم الله يرحمه 

اباوع  لذباح يباوعلها بشيطنه وبنفس الوقت القرف  واضح على شكله  ضحك بستهزاء  وشال سلاحه وباكيت الجكاير وگام طلع كامت طلعت تركضت ورا همست هيام ذلي بروحج بعد خرب بهيج كرامة

- اشوكت ازوجها

- بعد مااختفيتوا بفترة وذباح مخبوص يدوركم بيوم اتصلت الغرب على نقال گمرية تصيح الحكني طلع يجلع حسباله بيجن شي رد بليل وهيه بيده زتها علينه وگال لصگر بس تتحرج ارميها ؛ عليش وشني الصار مانعرف بس تسودن كام يغرب وينحدر  يتحلف اذا كضج يخليج نصين

- لاسمعتها من دخلت كالتله هاي الباعتني بدل ماتكتلها تجيبها على راسي

- جسر راسها ياهو المعتبرها حرمة لخاطر جاب مرة على راسها غير زاتها حالها حال البهيمة مامواطن شوفت وجها موش يكرب منها

-يعني بس عقد؟؟

-هذا الشي عنده بس هيه لا هالصار اشهر لاتستجن ولاتركد نهار وليل تجلع ورا بس تريد يتنوعلها خو من نطلع الصبح من غرفتنا عوزها ماتاچلني شگد يذل بيها ولاوياها

- وزوجته الجبيره وينها

- تخارب ويه ابوها وصارت بالتفگ كوه فضوها وهسه ناس  ماتحجي ويه ناس وكون ربي يخلها للكبر

- تعرفين غيمة شنو سوت بينه

-بدون لاتگولين نعرف وسخها ولو مامعزة غزوان وصيته هو ويأمنجن عنده جان سحگ راسها وتفل بوجها من زمان موش يخليها بأسمه ويجيبها بينا

-وينه راح للشيخ

-اي خيه راح ياخذه ويعر لبغداد هلبت الله ويجينا بخبر يبرد كلبج

-يارب

-خليج گاعده خلي اجيبلج شي تاكلي

-مااشتهي اريد  انام

-شمالج خيه احجي اكو شي يوجعج

مارديت لزمت خاصرتي ورجعت نمت استحيت اكلها كافي هم ولدهم شامريهم بالموت بسببنا

شوية واجت هجامة بالبداية بجت زعلانة وبعدها بلشت بالعتاب شافتني مابيه نفس بس لازمة مدالية امي وابجي گامت راحت لبيتها سوتلي اعشاب واجت شربتها صدگ ارتاحيت رحت بالنوم بدون لاحس

مر اربع ايام اي خبر ماكوالكل متوتر رغم صخونتي وجع كليتي بس ماعندي گلب اهدأ  لااگدر اطلع برا جماعة ذباح تارسين المكان وكلها مسلحة وشكلهم يخوف ولااگدر اگعد خاصتاً من اسمع ذباح يخابر يريد زلم وسلاح بعد

احس عيونهم كلهم عليه محمليني المسؤوليه  بس يخافون من الحجية محد يحجي كلمااشوف اشلون مخبوصين وسادين الشارع  تگول بتهم الي انخطفت موامانة اعض اصابعي ندم طاوعت رؤيا وطلعت منهم

فجر من كثر صبرها وحنيتها تفتر منو مااكل منو تعبان اخاف واحد معتاز  شي عكس اختها مراهقة وخلاقها تعبانة واجتها غيمة كملتها خانسات سوة اربعة وعشرين ساعة

گاعدة يم الحجية كملت صلاة الصبح وهيه تقرأ قرآن عيني على نسوان صهيب رغم عيشتهم  الصعبة والوضع يخوف بس تحسهن صلبات لثامهن على وجهن ويتنقلن بين الشغل  والنوگ

دخلت هيام بيدها صنية الريوگ خلته گدام بيبتي واجت كعدت يمي وخرت اللثام عن وجها و كالت شلونج اليوم

- الحمدالله

-ربي يصبرج ويردهن لحضنج

-ماخابر ذباح

-لاوالله وهالكلها تتكاوت مانعرف شكو

-يارب دخيلك بس لارؤيا صايرلها شي

-لااسم الله گولي ياالله شمالج بس حجيت نزلت دموعج

-شايفة من تغمضين حاضنة اخياتج كل وحدة من كتر وانتن تسولفن على امنياتجن وعيونج بحلم الطفولة  وفجأه تگعدين تلكين نفسج وحدج تتلفتين ضايعة شتحسين

- اعرف خيه عشت بينكم وكلت من خبزتكم نفس معزتهن بكلبج وعلي هنه بكلبي بس شنعمل هذا امتحان من ربج يقيس صبرج

- امتحانه صعب والله ماضل صبر روحي خلصت من الوجع

دترد و شحطت سيارة يمهم صاحت بيبي ياالله ردوا ازلامنا

من لهفتي گمت قبلهم طلعت بدون حجاب لكيت صهيب وصگر ثنينهم  داخلين اسلحتهم  بيديهم  وجوهم محتقنة وعيونهم حمر احس رجليه جمدت وكفت مكاني ايدي على گلبي عيوني على صهيب لحد ماوصل باوعلي بتعب وگال شلونج يبا

اشرت شنو الصار

- ماكو شي ان شاء الله ذباح وصل

- رؤيا انتحرت مووو گول تره ادري والله گلبي حاسني

- لايبا گولي يالله شهالفال من فجر الله كلهن بخير وين الحجية

- ماما بيها شي

- دتعالي چوه غادي نحجي

باوعت لصگر دنگ گلبي لكشني اكثر ؛ بعدت عن طريقهم دخلوا جوه اريد امشي مااكدر اجت هيام سندتني دخلتني وراهم  لكيتهم يسلمون على الحجية دنگ صهيب گعد يمها وصگر رجع للباب سد ووگف ورا  عرفت اكو شي ميردون احد يسمعه  

اخذتني هيام گعدتني يم فجر باوعلي صهيب نزلت دموعي اشرت احجي

صهيب - بالاول اريدج تعرفين انتي بنيتنا وهذا بيتج من گبل لايملج عليج ذباح موش هسه كلتها من گبل وارد اكولها انه ابوج وهاي جدتج الي يسمعج جلمة اطر راسه والي يفكر يغثج ادفنه بگاعه

- منو بيهن راحت هالمرة

- خليني اكمل كلامي يبا من خشيتي هذا الدار وصرنا هلج تنسين الغادي نهائياً والكل بدون استثناء من هاي اللحظة انتي حرمة ذباح ال…والي يفكر يوصل حدج لو يداعي بيج نرده محمل قبل لاينده اسمج

- مافهمت

- ابوج ولو جثير عليه هذا الاسم طاح بيد ولدنا وطلع الخسيس بايع اخيتج لعالم اعوذ بالله لخاطر وسخ دنيا ومن كضينا هدد يشتكي ويطالب بيج

- رؤيا وين ؟؟

-  بخير حصلنا اسم الزلمة الشاريها دزيتله طارش لان ماگدرنا نطيح عليه واحد سوء ومراوغ  طلب فدية مجانها اخذنا جلمة منه وان شاء الله خير

ام صهيب - اشكد مايطلب دفعوا حتى لو تبيعون حلانا كله المهم ترد البت سالمة

- المشكلة ماهي بالفلوس ذباح ماهو راضي يكول  بس اسحبوا وكضوا وكت منه لحد مااصلهم

- عليش ماتعطون وتفضوها

- شغلتهم موش يم البت يم زلمتها الضاهر جانوا ناوين يصيدونه بيها وماجت عدل بيدهم  لان اغتالوا

صحت يمه مات دسااار

- لا بس حالته تعبانة فاقد البارود چاي بصدره لهيج فاقدين الامل منه وقبلوا الفدية و ذباح يكول ذولة نواگيص ماعدهم چلمة بس يستلمون الفلوس تضيع البت علينه 

- اي صح كم حالة صارت يمنا هيج يساوموهم بفلوس وبس يستلمون يكتلوهم حتى لايفتنون عالمكان لو يردوهم بدون اعضاء

فجر - استعجلوا فدوة اغديلك يخوي  البت رعنة ماتركد ساعة وطكوها وماتت

صهيب - مايكربون صوبها لان المبلغ الطالبي مانه هين وطلبنا منهم مانسلم الفلوس اذا مانسمع صوتها

- جا شني راح تعملون

- ذباح طلع لزلمة اخيتها ابو درع لخاطر يتفاهم ويا ويحدد موقعها اسرع وانه هالرديت اهير الفلوس بين مايتفگ وين الضابط حتى من اسلم الفلوس يجفتوهم بس هذا الحجي مايعر من هون سمعتوا

اشرت اي عرفته شاك بغيمة

رد باوع الامه يحجي ويها شكد ضامة وشگد  يگدر يدبر هو من غير يروح للشيخ يطلب منه

صحيح ماكو شي يطمن بس حسيت شي بداخلي ارتاح المهم عرفت بيها عايشة وبعدها بخير

كامت عمتي فجر طلعت افلوس بيبي وذهبها انطتهيا اخذهن وگام راح والبقية طلعوا  گعدو بالممشة

لميت رجليه وانتجيت عيوني بيهم الجو صح حار  لان تقريباً صحراء بس المنظر تحسه بي روح نظيفة  دنگت فجر طلعتلي ملابس واشرتلي كومي بسرعة ابتسمت عرفتها تستعجلني للحمام قبل لايبلشن نسوان صهيب بجهالهن

كمت بدون اعتراض لان صدگ جنت معتازة رحت وياها دخلت جلفت جلف مال اكثر من اسبوع لمن حسيت روحي بهتت طلعت لكيتهن ملتمات كلهن يم الحجيه كاعدات بالممشه يسولفن شالت راسها شافتني حسيتها مارضت على تراكي بس ماحجت دنگت على سبحتها

رحت يم فجر كعدت باوعتلي صلت على محمد وكالت شني شمالهن خدودج مصلوخات لو ردت الصخونة

- لا لان تعبت هسه يردن طبيعي فدوة تكدرين تمشطيلي

- هههههه دجيبي وعطيني ضهرج وعيونج على حريم صهيب هالبت تتعلمين اتنوعي شلون يجلعن من الحلال للشغل تكولين بنوات الاربع طعش موش انتي سبحتي معتي بعد مابيج تمشطين

- هه الله يحفظهن لاا لان شعري طويل تعبت شوية

- ولج جااشلون راح تواطنين عيشتنا واحنا كل يوم بديرة وحلانا جثير من غير اراضينا رادلها نسوان حوك ياله تكف الزرعات

- بس خلي اسمع خبر عنهن كلشي اتحمل عادي حتى نرجع  لبغداد المهم ير…

بعدني احجي وانفتحت باب غرفة بقوة طلع ذباح يطبگ بردن تيشيرتة باوعلي بنظرة خلتني تلقائي اعدل گعدتي طلعت ورا هيام بيدها سلاحه اجه يمنه عدل تيشيرته من ورا ودنگ على راس امه باسها  وگعد گدامها نص گعدة لزمه ايدها وكال دعواتج يالبدوية

- ها يسند الديرة نويت تعر للموت

-وادوس بنصة  مارد اله واخيتي بيدي

- ربي وگلبي راضين عليك بس جان ارتاحيتلك شوية اخاف تگع ويكولون كضته رجفت الموت ماحسبالهم من التعب

- لاه ماهگيتها منج ياام صهيب موش انه الي اگع من تعب ولانه الي اسلم الروح گبل لارد امانتي وأمنها حدج

- ان لحگت تردها او ربگ گاسم تروح گبل لاتصلها راية واخياتها  صارن بنواتي  لو عرف اخسر ازلامي بولدهم ماتركهن؛ لاتحمل هم الموت اتوكل

- حدروا الربع گبلي دگايگ والحگهم  من يرد صهيب خلي يطلع عالمركز الشيخ غادي ناطره لخاطر شغلة عمة غزوان  لايبطي عليه

- وهذا المركز وهيبته ماگادر  لهيج منطقة وهيج حثالة

- المجان مبيوع كله مافيات جبيرة ومنظمات محد يعرفها منين مدعومة الي يخش بينهم مايطلع سالم

-زلمة البت  شني وضعه

-تعبان والله مااتصور يطلع منها

-ربي يحمي لشبابه ويرده لحضن امه گوم يبعد امك امهونة ربي يگويكم

رد باس ايدها وكام اخذ السلاح من ايد هيام خلاه بالحزام متنه  شلت راسي باوعتله وهمست  رحت لزوج رئال 

- انتي بالذات مااريد اسمع صوتج

- ليشش محملني المسؤوليه شتريدني اسوي كالوا جاي ويا الشرطة وانتم ماكو كلكم

- انه شني لغثت وياج  قبل لا اولي للحجز  من انتي زعطوطة وعگل ماكو براسج تورطيهن عليش يبا ؛يله هاي صار اسبوع اجلع مثل الزززمال  ماخليت مجان وراي افتر مثل المسودن من المركز للبتاوين ماعرف المن اكض كل هذا عليش تركتهن بيد ثولة مثلج ماتعرف تلبس هدمة بيها حظ موش تحمي اخياتها

- شقصدك اني مامستوررة

- لاتكوليني شي مانه گايله ولاطفرين بالحجي البت متروس ازلام لبسج عدلي وشغلت ردتج لبغداد اذا هيستج تهجسين بيها انوب اهطر جهامتج رگدي يحرمة غزوان افضل ماربطج بگصيبتج وزتج حدر الدرج

- اخاف لبالك تتجاوز اسكتلك والله هسه اكوم اشكيك لصهيب ودااشوف اشلون تحجي وياي

- شني لج

كالها واجه طفرت عمي ؛ كمت وراها بسرعة لزمت ضهرها فتحت اديه تحميني و صاحت هدي يخوي وعلي ماتقصد 

- وانه اريدها تقصد بعد عنها خلي اعدل فجها لخاطر تروحله تشكيني عدل

- يااا ولك مريضة البيت تهذي شمالك

- والمريض يستجن بفرشته لحد ماالله ياخذه مايفتر بكفشته ويلغث وانتي تنوعي لج اروح ارد اذا لكيت بنفس اللبس احركج بيهن وهااااي كفشتج تخفيهاا نهائياً قبل لااخفيج واخلص من عقلج المحجرررر سمعتي

درت وجهي  بعدم اهمية

صگ على سنونه لزمته هيام بسرعة وبيبي صاحت ذباااح

دفع هيام دفر صنية الجاي وطلع يريد ينفجر؛ هيام باوعتلي صفح وعمتي استغفرت حسيت روحي صدگ زودتها فوگ مامجازف بنفسه ويركض ورا اهلي اني طالعة گدام جماعته واهله بدون حجاب خجلت منهم گمت رجعت للغرفة

كلما تمر الايام اكثر كلما ابلش ايأس وانعل روحي على الثول الضيعتهن بي

ذباح اعصابه منهارة يجي ساعات قليلة بس يسبح وغير ملابسه ويرد لايگول شكو ولاواحد يتجرأ يحجي ويا  اني هم من اسمع صوت صهيب اكوم اتلكاه وسئله ووكت جية ذباح  اختل يم عمتي مااراوي وجهي لان اعرفه متحلف بس يريد يستفرد بيه حتى ياكلني

ساعات اندعي لماما ربي يفرجها عليه ومن اذكر  الورطة الورطتني بيها بهذا الخبل وانوب خلته يلزم شاربه حتى تغسل حضي بالزايد تلقائي اسكت

متمددة  يم ام صهيب واذني بره اتسنط لصهيب رجع اشلون تلگنه نسوانه يسولفن ويا وهو يرد ولاتكول عنده ثلاثه بكد ماهو عادل بينهن تحسهن وحدة

مديت ايدي اباوع لحلقتي بأصبعي واسمع صوت ذباح صاح بالبيت طفرت ضحكت امه وستغفرت ردت دنكت تسبح

دخلت فجر بيدها صنيته الجاي وراها صهيب وصگر مسلحين والتعب تارس وجوهم ؛ هيه گعدت يم القنفة وهمه اجوا سلموا على بيبي باسوا راسها وگعدوا

ردت اسأله وبطلت حتى گمت اخجل گد مااسأل  واسمع نفس الجواب صبت جاي فجر  گام صگر وزعه وگعد بلشوا يسولفون ويه بيبي على گاع يردون يبيعوها لعمهم لان معوزين افلوس للدية وماضل غير يوم عن التسليم  وهيه تنطيهم رايها  اباوعلهم اشلون يهابوها ومنتظرين موافقتها حتى يتوكلون

دقايق ودخل ذباح دنگ باس راسها وگعد يمهم كال  لفجر خويه صبيلي جاي

صهيب - بشر شعملت

- كل خير ام رايه ان شاء الله هذا الشهر يفرجون عنها

- جهزت  ازلامك للتسليم ؟؟ تراه باجر مانگدر نتأخر  دگيگة البت وضعها خطر

باوعلي لميت رجليه لحضني دنگت

ذلاح - كمل كلشي حددنا المجان  دزينه واحد من الربع يخش بينهم لخاطر نتأكد اكثر والباگين محاصرين باجر ويه طر الفجر نجفتهم ونجيبها  منهم

- يالله خيير شتعتاز ازلام وسلاح گول

- اي والله معتاز ثنين سباع يخشون وياي كونهم مايهابون الموت لان الخلية  جبيره ماهي هينة

صگر-  ابشرر يعم  انه اول واحد

صهيب - وهسه اخبرلك رشيد

ذباح - ان شاء الله خير يله انه اكوم وانت عمي صگر اتهير قبل الفجر نتوكل

شال سلاحه كام كالتله امه وين ريح

- انام كم ساعة مهدود حيلي وعلى سالفتج اخاف اطگني جليه واگع ويگولون كضته رجفت الموت

- مم انطر وانت يمه صگر اطلع اندهلي غيمة بساعك

اشر اي كام طلع يصيحلها وذباح گعد يباوع لامه مامفتهم السالفة

شوية واجه صگر والبنات ويا من ضمنهن غيمة وكفت كالتلها امر جدة

- كعدي يمج وانت كلت وين ناوي تروح

ذباح - شني وين لبغداد لخاطر اسلم الدية

-كلت اسلم الدية يعني احتمال تنجتل ماترد وتاركلي ثنين بنوات وراك لاهنه محللات ولاهنه صدگ حريمك

- شرايده  بالضبط ياام صهيب

- وحده منهن تصير حرمتك هسه تدخل عليها  والثانية تحللها من ذمتك

- گولي ياااالله

- كلت يالله  من جبتهن وكلت عقدتهن محد وگف بوجهك وگلك عليش هيج عملت وبنات العالم ماهنه لعبة بيدك تجيب وتركن بكيفك خايف من حجي العالم  وكعدتهن بينا حگك وحدة منهن تضل بأسمك لخاطر نگدر نجيب اهلهن هون ونگص لسان اليتحجه

- ههه صدگ تتحجين انتي

- هنه جلمتين ماعندي غيرهن وحده تحللها من ذمتك جدامنا هسه والثانية تاخذها بيدك لحجرتك
تنفذها الطلبته تطلع من هون وربي مهونلك تكول لا الباب ماتخطي وتنسى سالفة البت نهائياً واذا فكرت تعملها بعلمي لو بغير علمي الله شاهد عليه جدام الكل متبرية منك ليوم الدين

باوعلها مصدوم

- نباركلك بيمن راية لو غيمة …

***رئال****

صوت الرصاص وصرخت هيذام جانت كفيله ندخل بحاله انهيار

التموا الحرس والسيارة داست بينه رجعتنا داخل البيت اباوع وراي عيوني على دسار دمه تارس المكان اريد استوعب الاسم الهمس قبل تغمض عيونه

حاوطوا ازر وهيذام الي صوته رج المكان وهو يصيح جيبوا السيااارة ؛ شالوا وركضوا بي انتبهت شي وگع من جيبه واحد من الحرس دنگ عليه

سدوا باب البيت اجوا الحرس  فتحوا باب  نزلونا طلعن عمتي والبنات من جوا يركضن على صوت الهوسة صاحت عمتي شصار ولكم

الحارس- عملية اغتيال عمه اخذي البنات ودخلي جوه خلي نأمن البيت بسرررعة

- ولك تأذه واحد

- الضابط دسار انصاب  دخلواا احتمال يرجعوون وانتم طوقوااا المكاااان

لطمت على وجهه رجعت تركض والكل انخبص  صاروا داير مدايرنا دخلونا للبيت ونتشروا على كبر البيت حتى عالسطح صعدوا

كعدنا بالصالة عمتي بيدها الفون تخابر وهبة تصيح خابروا هيذام خلي يدزلنا بعد حرس لايدخلون علينه وهالة حاضنه جهالها وتبجي؛ هاي كلها واني لحد الان داخلة بصدمة مامستوعبة  الاسم السمعته صار الحارس كدامي بيده شي يلمع مثل الي أكدلي شكي  گمت رحت يمه مديت ايدي باوعلي اشر شنو

-هاي مالت دساغ

-اي

-جان ديهمس بأسم بنيه سمعته

-لا لان جنت جوه طلعت وره الحادث

-بس اني جنت موجودة وسمعته كال اسمها

-مافهمت

اجت يمي ضي لزمتني درت وجهي لكيتها تبجي نزلت دموعي همست كل هالوقت جان يسولفلي على عنها  غاح بدون لايگلي وينها لو اشلونها

- دسار سبع مايموت هيج موته فاشله

- جان يشكي من عنادها ولسانها الطويل جان دوم يسألني اشلون جانت عايشة اشلون ماانتبهت اني شنو من اخت زين من جنت اشوف الهم بعيونه  كلما يسمعني احجي بيها ماسألت نفسي ليش

- منو يكول نفسها رؤيا

- ههه ملقبته الحيوان اللفو مثل مالقبت هيذام بول تيغي
شلت ايدي - باوعي هاي القغاصه جانت كل وحدة عدها منها ماما ماتقبل ننزعها حتى لاينحسد شعغنا

-يعني موجودة يمه

- لامن اجا الاتصال  شفته يباوع لهيذام بخوف ويكله غؤيا يعني بيها شي اخيتي

-لااسم الله

-اتصلي بي دااشوف بأي مستشفى بلكي الحگ عليها

-رئال مانكدر نطلع منا

-واني مااضل واگفه لحد ما تغوح مني مثل غند بعديي عني

-وين تردين كل عقلج

دفعتها ردت اطلع لزمني الحارس كال ممنوع اطلعين

-موبكيفك ماتكدغ تمنعنييي بعد ايدددك

-البيت مستهدف الاوامر محد يطلع ولايدخل لحد مايتأمن المكان بالكامل

-واني غاح اطلع وغوخ للمستشفى وداشوف اشلون توكف بوجهي

دفعته وگف گدامي حاجز الباب جريته وصرخت  صاحت عمتي شكووو

الحارس - تريد تروح وراهم للمشتسفى

- خليهاا وخر عنها

- عمه تعرفين الاوامر المكان خطر واني الراح اتحاسب

- ماتتحاسب اني احجي وياهم اذا واحد كال ليش طلعت اتركها تررروح

خرته ورحت اركض تركته وراي يحاول يقنعها بالاوامر ماكو بعيوني بس رؤيا هيه لازمة ايدي عالدرج تتوسل لاعوفها ودسار هو ويهمس بخوف بأسمها

طلعت لكيت الحرس تارسين المكان صاح واحد منهم رجعي جوه شكو طالعة

رد الحارس مرت اللواء سمحتلها اني رايح وياها بس طلعوا سياره كدامنا وانتي تعالي لهاي السيارة

طلع كدامي رحت ورا للسيارة صعدنا شغلها ردت اسدها اجت ضي تركض صعدت يمي باوعتلي كالت هيه موته موته خلينه نموتها بشرف مو هذا كلامها

ابتسمت ونزلت دموعي سدت الباب طلع بينا للمستشفى طاير عيونه تتنقل من الجام الامامية للجانبية كل دقيقة واشر لسيارات الحرس يحاوطونا لحد ما صلنا لكينا الشرطه وسيارات العسكرية  تارسة المكان

فتحت الباب ونزلت اركض دخلت للمستشفى وكفت اتلفت واشوف هيذام گاعد يم باب مدنگ لازم راسه بين اديه ملابسه كلها دم ويمه ازر واكف عيونه حمر

-هيذاااام

رفع راسه شافني عگد حاجبه

همست بتوسل اختي وين  

اخذ نفس وگام اجه شهكت سحبني لحضنه ضم راسي وصرخ بصوت رج المكان هو ويصيح منوووو جابهاااا

الحارس - سيدي هيه اصرت

-دخلي ارد واعملك  اشلون اصرت

- والله العضيم منعتها بس زوجه اللواء امرتني

- منو هااااي وتاخذ الاوامر منهااا  تعرف لو صايرلها شي شسوي بيكم كفيلك محمد اصلخ جلدكم بتيزاب انتم وعوائلكم مااخلي بيكم صاحي واعلمك اشلون اطلعون بيها

وخرت راسي من حضنه - هيذام اختي وينها

-دزيت الولد يعرفون شنو سالفتها

-ياسالفة  غؤيا وين وديتوهاااا

ديرد ورن فونه وخر ايده من ظهري طلع الجهاز باوع بي تركني وراح لغير جهة رد ها بشروا لكفتوااا… اشوكت لحگووو يكتلووا … اخر مكالمة بجهازة منين جايته؟؟

…حلوو لاعبها صح  ابو اسماعيل اسمع ابني تاخذ الولد وتروح تنبشون البتاوين شبر شبر ماترد اله والگرن بيدك … اسبااع ولدي ماتقصرون …  طالع گدامكم اتوكلوا

كالها وسد الفون اندار لازر  اشرله عليه وطلع مستعجل عرفت ابراهيم نفسه الكتل دسار وسلم رؤيا لجاسم

احس حيلي راح اجت ضي لزمتني اخذتني كعدت عالكرسي باوعت لازر همست غاحت اخيتي مو

دنگ

- اشلون ماما خلتهم ياخذوها منها زين غاية وين عنها يعني هاي الثانية تغوح بدون لااشوفها

ضي - هيذام راح  وراها ميخليها تتأذى

- سمعتي كال لاعبيها صح وطلب بس جاسم  يعني انتهت اخيتي  ولج اخياتي غاحن بدون لايودعني  حتى مالحگت احضنهن ولج كلتلهن تاننييي ولج كلتهن اغجع والله ليشش هيج غدغن بيييه

- انطي مجال ليش دتفولين عليهااا يجوز بس ماخذها

- هذا ازغ يعغف والله گومي سألي بلكي يغد عليج ابوس ايدج ضي ماما تموت والله بعد ماتتحمل تدفن واحد لخ گومي فدوة اغوحلج ولج داحسب يوم يوم حتى اشوفها مو حتى اگعد يم گبغها

نزلت دموعها وخرت عني گمت رحت  لازر لزمت ايده باوعلي بتعب - بداعت ضي عندك كول شسوالها جاسم باعهااا موو  وهيه كتلت نفسها ادغي بأختي ماتنطي نفسها

سكتت

- حلفتك بضي كول اني عغفت من شفت التوسل بعيون دساغ من يباوع لهيذام وهو سابح بدمه تأكدت اختي انتهت بس گلي حتى ابجي لاتضل حسغه بكلبي مثل دمعات وغزوان وغند

- هيه بخير بس مانعرف وينها

- يم بابا  جيبوا غاح يكلكم المن باعها

- موعنده مشتريها منه ومسلميها لجماعة نفسهم الي خابروا دسار ومحد يعرفهم منو همه غير دسار

-وووينه

-بالعمليات حالته صعبة

- يعني شنوو يموووت

سكتت

لزمته من ملابسه صحت احجيييي

نزلت دموعه وخر اديه دار وجهه راح للجهة الثانية

انداريت محتارة شسوي لكيت رافد داخل يمشي مثل الاعصار عاصر جف ايده والنار تطلع من عيونه؛  بدون  شعور ركضت لزمته من ملابسه كلتله دخيلك عمو مو انت جنت  تشتغل بالمافيا  يعني تندلهم  غوح جيبلي اختي منهم

- ضيعوهااا الجبنااااء

- لاااا لاتكول عموو والله تكتل نفسها هاي؛ عمو ماما تموت وغاها ابوس ايدك ماعدنا احد يوكفلنا دخل الله ودخلك عمو بداعت بناتك خلصها منهم

-جاسم الكلببب

-باعهااا عموو باع اخيتيي عمووو لحگ عليها قبل لاتذبح نفسهاااا

هز راسه وباوع لازر بحرگة تكول هو الضيعها عصر جف ايدي رفعها باسها واندار ركض صاح ازر اوووكف

مارد عليه فتح الباب وطلع كالهم جيبوااا

طلعوا ورا يركضون حتى بعدني مامتوسله باازر واسمع صوت عياطه رج المستشفى عرفتهم لزموا ثواني ودخلوا مجتفي  يسحلون بي وهو يتماطل مثل الوحش ضاغط على سنونه بس يريد يلوح واحد حتى ياكله اباوع خمسه ملتمين عليه گوة گادريله  جابوا يجرون بي  دفعهم ماگدر اندار لازر صاح گلهم خلي يعوفونييييي لا وكلام الله احرگكم برتبكم

ارز - صوتك انننت بالمستشفى

- انعل ابو المستشفى التلم هيج جبناااااء كلتلكم اساعدكم واخذ اعدام بس تحموهننن سقط حقكم يمييييي كلهم خلي يعوفونييي

- الضابط هيذام استلم المهمة لاتلغي بكيفك

- وداعت بت روحي الضيعت نفسي اسنين بس لخاطر احميها ماارحم واحد بيكم وداعت دموع رفة گلب ابوها اصفيهم من جبيرهم لصغيرهم واردكم الف سنه ليورا عوفوني احسن الكممم

- انت غبيي جاي اكلك هيذام راح لاخربط الدنيا وتضيع علينه مكانها بعقلك الماورا غير الدماررر

- هذا عقلي هو الرفعكم فوگ مثل ماراح يمحيكم اذا اللمست شعرة وحده منهن ؛ هذا اخر انذارر كلهم خلي يتركونييي ارررروح

-اخذوا مناااا

- ولك راح يكتلوهااااا ولكم اولاد الكلب عوفونيييي

هو يصرخ ويدافع وهو اشرلهم خذوا  ؛ جروا يسحلون بي صوته وين واصل بحرگة بين يهدد وبين يغلط  وبين مخبوص متخبل مايعرف اشلون يخلص نفسة ويروحلها لحد مااختفى

رجعت كعدت يم الحايط كالتله ضي- ليش منعته

- مايندل مكانها بس ينبهم صار عدنا علم وهيج راح نموت الوقت بينا ويأذوها

- ديكلك اندلها

- محد يندل مكانهم غير دسار واني مااجازف بتخمين الراح هيذام والنايم جوه دسار  والتحجين عنها مرته و اخت مرت اخوي

سكتت لميت رجلية عيني بالباب وبيدي الخرزة مالتها املي كله صار بي

غمضت ذكرت ضحكته هو ويشمر المحفظة فتحت عيوني بسرعة لااسم الله على كلبه هسه يكوم هو يحبها جان النهار كله يسولف بيها ماكو واحد يخلي حبيبته عيونها ورا ويروح

لااكو مو محمود عافني واحنا بداية حلمنا وغزوان وعد راية الف وعد وتركها مكسورة ورا

ضميت راسي بحضني اكثر من ساعتين كلبي كام ينغزني گد مامحتارة  المن اندعي لرؤيا لو لدسار لو لحال رايه بعدنا كل واحد معزة بكلبي شكل

اسمع الباب انفتح شلت راسي لكيت الدكتور ديطلع كمت بسرعة وازر راحله كله بشر

- والله شگلك صدره متهشم سوينا العلينا والباقي على رب العالمين

- العملية نجحت لولاااا

- جبتوا متأخر نازف كلش هواي وهالشي سبب مضاعفات نسبة النجاح جانت ضئيلة جداً حاولنا قدر الامكان ماراح نگدر نعرف اي شي اله بعد مرور اربعة وعشرين ساعة اندعوله الله يرحم بحاله

ابتسم بكسرة واشر لاا

دگدك على متنه وراح دخل ازر للغرفة  رحنا ورا اني وضي فتحنا الباب مثل الممر وبداخله غرفة بيها جام دخلنا جوه يم الجام ؛اباوع  دسار عالسدية جسمه كله مضبر والوايرات مشكله من جهه گلبه نايم بغير عالم همست صدگ  هذا انت القبل شوية تشاقينا وتضحك

شهكت ضي طلعت المحفظة انطتها لازر مسح دموعه ضحك وكال حسباله ماحسيت بي من اخذها

- كال هاي تعويض عن دموعج النزلن لخاطره بس ماكال منو راح يجيبلي حق ادموعي عليه

- وكلام الله اذا طلع صدگ ابوي ورا الشغلة اول واحد اني اخلي ايدي بموته

- من زمان جان خال دسار وهيذام براسه

- واكبر غلطة غلطها من رمه واحد وخطى الثاني مايعرف فتح باب جهنم على روحه وراح يردها اله بشكو عزيز يجس كلبه

- اتمنيتك مكانه

- ههه تره حالي من حالة الفرق اني واكف على رجليه وهو نايم او يمكن هو احسن لان اكو من الي ينتظره وكلبه ينبض لشوفته 

- حرمات خطتك

- تخطي مرة اتصيب بالثانية يله اخذي رئال وروحي اهله راح يوصلون وتصير هوسة والوضع بعده خطر وخليج يمها لاتركيها وحدها احد مايرد هيذام

- راح ادزلك ملابس بيد الحرس عود غير لاتضل هيج مبلل تتمرض

ابتسم ودنگ 

- الله ياخذك  وانتي يله امشي حتى نتصل بهيذام دنشوف بلكي الله حصل شي

مسحت دموعي رحت فتحت الباب راد يلزمني ازر اشرتله عالقراصة سكتت

دخلت يمه شكله يخمش الگلب وجهه اصفر وشفايفه بيض وين تصنيفه  وضحكته العالية

دنكت بسه من راسه همست هواي جنت اسمع منك كلمة اخيتي بس ماجنت احس بيها استوني حسيتها كوم لخاطغ الخوة غؤيا متانيتك لاتخليها  مكسوغة وغاك انت لوكايلي جنت التشكي منها غؤيا جان كلتلك هاي تموت عليك موبس تحبك لان اختي احماغه مفهوم الحب عدها بالمقلوب

ههه تعغف انتم واحد لايگ للاخ اثنينكم خفاف ونفس الاخلاق وتقلدون هواي غاح تكونون عائلة تجنن لان اثنينكم حلوين و كلوبكم طيبة

صح القغاصة اعز من نفسي بس ادغي ماتقبل احد ياخذها منك لان الها ذكغيات يمك

دنگ على ايده فتحت التجه لبستها بمعصمه انتبهت للوشم على طول ايده تواريخ مشيت اصبعي عليهن وابتسم حروف واسمها بين تاريخ والثاني ؛اكيد ذني ذكرياتهم سبحان الجمعكم نفس التفاهه  ماخاف على وضيفته تنسحب بسبب الوشم المهم يذكر خبالهم سوة

رجعت دنگت بس راسه وهمست تغه هيذام غاح ياخذ حق دمك قبل لاتفتح عينك گوم علمود تعغف المهتلف ميعيش بدون اللفو

مسحت على شعره مابي حتى روح النفس گوة يسحبه ماگدرت اباوعله شريط ذكرياته كلها تصير عيوني من لزمته للابو بريص لوگفته يغسل السمجة لضحكه علينه هو ويوصف هيذام اشلون يتوسل

درت وجهي وطلعت حتى ماسلمت على ازر رحت گبل استونا نصعد سيارتنا واشوف سيارتين وكفت نزلوا منها كومه ناس عرفتهم اهله

حركت سيارتنا رجعنا للبيت دخلنا بعدهم على هوستهم داادخل ولكيت هبة متخصرة واكفة هيه وعمتي يسولفن باب الممر اني هم گد ماروحي خالصه درت وجهي ورحت ويه ضي لبيتهم دخلت لغرفتها گبل شمرت نفسي على جربايتها

اسبوع كامل وهيذام مادخل للبيت بس يخابر دقايق يأمني على رؤيا ويأكد على ضي لاتخليني اطلع من بيتهم ويغلقه لاعرفنا دسار شنو حالته ولاهو شسوة حتى درع جابوا مالي خلگ اگوم اشوفه

كاعدة عالقنفة بيدي كتاب صافنة عليه وضي يمي تگلب بالفلون ونسمع صوت عياط من البيت جاي وين واصل دقايق ودخل ابو ضي كال گومي بابا هيذام اجه

شمرت الكتاب وطلعت اركض دخلت للبيت الجبير لكيته گاعد عالتخم خال رجل على رجل مدنگ  يگلب بفونه جكارته بحلكه هادئ شكله ولاتكول اكو شي ؛ الكل گاعد عيونهم عليه مثل الخايفين عدا عمي واگف عاگد حاجبه بيده اوراق يگلب بيهن

رحت يمه خليت ايدي على متنه شال راسه لزم ايدي باسها وكال اكو واحد ضوجج

عمتي- هو احنا وين شفنا وجها حتى  نحجي وياها وبعدين منو هيه وحتى هيج خايف على مشاعرها

-جربي تتنفسين كدامها لخاطر تعرفين عدل منو هيه

- شقصدك

مارد ضحك بستهزاء وندارلي گال صعدي بنيتي حضريلي الحمام

عمتي - گومي هبة يمه حضري الحمام لزوجج

رادت تگوم بس خله الجگارة بحلگه وباوعلها رجعت خنست صاح عمي هيذام تره خلصت اللعبة كافي سويت التريده بعد على شنو مبقيها

- امبقيها شنو غير بيتها احمد ربك راضية مكابلة وجوهكم  لحد الان 

- شنووو لك

- الك ماتنگال الي هالمرة حجيتها الثانية اخلي امرك انت والساندج بيدها 

- صدگ تحجي انت شبيييك متكلييي كلت قضيتي وخبصتنا عليها وسكتنا عنك هم حقك صارت شغلة تحدي وخسرتها كلت احللها بس بالاسم ورجعت بكلمتك وكلنا ميخالف مهما يكون رتبته موقليلة هسه شرررايد

- اولا اني مااخسر شي من اول ساعة الدخلت للمركز جانت بحضني ومن تركتها الكم مو خوفاً لو ماكدرت اوكف بوجهكم لااا بس جانت كم شغلة بيدي  لازم اشغلكم  بيها لخاطر اكملها

-وثانياً

-نص كلمة اسمع منكم لو المح واحد غاثها بحرف امحيكم وتضهر گدام الكل على اسمي مثل ما ماراح تضهر مرتك بأسم اللواء السابق صاحب قضية النوادي الليلة

اباوعله فتح عيونه على كبرهن واشر شنو ؟

-رفع حاجبه

-ماعندك اثبات اي  واني رجل نزيه والكل يشهد هذا لعبك لعبة بعيد عني

-هم صح بس نصيحة  من تفكر تضر احد ابتعد عن مكان شغلك لان الجثة اشكد ماحاولت تخفيها تطلع ريحتها

- انت شرررايد فهمني ابني وبعدته عنك بعد ماسگطته وتنازلتلك عن البيت ورتبتك قدمت  برجاع ملفاتك للمكتب

- احلام الزعاطيط ماعندي وقت افكر بيهن واغتيال دسار وصلي حقه واتمنى الموفقين بحياتك الجديدة

- شسويت هيذاااام

مارد سحب نفس من جكارته نفخها وشمرها  گام خله ايده وره ضهري سحبني صعدنا الدرج رحنا للغرفة فتح بابها دخلني ودخل سد الباب

شمر سلاحه وگف ينزع بساعته لزمته من ظهره اندارلي تعبان وعيونه حمر اشر شكو

- اختي وين

- بالبتاوين بس بخير الولد محاصرين المكان وجاي يشتغلون على تحديد الموقع بالخفي لخاطر يتحركون حتى نضمن سلامتها

- هيذام مداتجذب عليه

- مامجبور اجذب ومحد يوصلها لان مو بحالها حاجزيها بمكان منتظرين دسار يصحى لخاطر يساوموا بيها

- الله عليك يعني غاح اتغجعها الحضني مابيها شي

- لالحضن امج هذا الحضن محد ينام بي غيري شغلة مو الج  لا تحجين بيها ويله حضريلي ملابسي لازم ارد

سحب المنشفة ودخل للحمام رحت فتحت الكنتور اباوع لملابسه اشكد تفكيري مشغول برؤيا بس من شفت ملابسه كدامي وذكرت كلامه  شي بكلبي دگ

لزمت الزي وابتسمت ذني نفسهن ملابس الجنت خايفة اباوع بوجهه هسه دااحضرهن

طلعتهن خليتهن على جهه وكفت احضر ساعته وباقي غراضه طلع من الحمام اجه حضني من وراي باسني من ركبتي  دفعته بسرعة كلتله هيذام والله تعبانه

-  لااا شوفيلج غيرها تارك شغلي والهوسة وراي وصاحب عمري يزاگ ويه الموت وجايج مال  تعبانة ابوي استشهد امي اترملت شوفيلج غيرها

- صدگ اشلونه دساغ

دنگ شالني باسني من شفتي دفعت وجهه  - موداگلك اشلونه

- فاق ولاااا  مدخلنا حالة انذار ويا تركت ازر يلزگ بالحجي ويرد ليورا حتى يلمها كدام اهله

-اشلون

-يهمس برؤيا اربعة وعشرين ساعة وخطيبته وامه صافنات عليه ضال ازر يلزگ كل شوية وطلعله سالفة ساعة يكلهم قصده رؤيا منامية شافها قبل  لايغتالوا ضل خايف منها ساعة رؤيا طفلة انقتلت بوحدة من العمليات وضلت براسه

- وليش خايف يعرفون هاي زوجته

- مو خايف بس لسلامتها لان اكيد راح تصير لغوة  ويوصل خبر انو عرفنا البت مخطوفة وجاي نحدد موقعهم

- هو خاطب

- قبل خمس سنوات وبسبب هاي اختج السحلت بشاربه گيعان البتاوين سحب روحه

- يعني جان يحبها لخطيبته

- لا شرط امه مكان يجي لهنا ويباشر بأول مهمة اله يتزوج بت خالته وهو هم ماقصر خلاها بأسمة وطفر 

-لعد اشكد حب غويا الي جان اكبغ امنيه عنده تقبل بي وحتى هو وفاقد يهمس بأسمها

- بس جيبي اليستاهل

- تغه اني غتبتك لاتفكغ تلعب بعقلي لان ماغاح تحصل شي ونزلني داحس نفسي معلگة بالسگف

-رأل حتى گله مابيج

- عفية لهيج صيغ حباب ونزلني لان لو مو تلمح لو تتوسل هم ماغاح اباوع بوجهك

- خلي نشوف ونحكم بعدها

كالها وشمرني عالجرباية اجه گمت ردت افلت مالحكت لكفني من شعري ردني لمكانه لزمني من اديه ودنگ باسني من شفتي درت وجهي ضغط عليه حسيت روحي طلعت من ثگله صرخت هيذاام غاح اموت اختنكتت

رفع نفسه شوية ورد يعضعض بخدودي

-بس دااحجي  وياااك 

مارد

-احجاية وحدة بس اسسسمع

شال  راسه يباوعلي وياكل بفشته

-شبيك

-شتكولين انتي ؟؟

-هيذااام

اشر شنو

-صدگ الحجيته جوه لو هم جنت دتغيضهم

- اليريد يحارب يحارب بأسوء شغلة عنده حتى من يخسرها مايهمه اما الشي الغالي مايصير غير ورا ضهره لخاطر يضمها عن عيونهم مايوصلوها اذا ماينهون روحه

-اني شنو 

-انتي قضيتي

-وبعد

-ودعوة المظلوم الصابت روحي

-مم وبعد

-ام درر وبرير وميرار ورثار

- عزه كلهم بحغف الغاء وانوب اغبعة شنو هالظلم

-هيج اريدج تلدغين اربعة وعشرين ساعة واذا سمعتج صحتي واحد وتركتي الباقين ارفعج فلقة تعتازين واحد تصحيهم كلهم 

- تغه حغام هذا يعتبغ تنمغ

- شنو بنيتي

برطمت

كز على سنونه

همست هيذام

ماارد وخر شعري عن وجهي نزل ايده مسح شفتي بطرف اصبعه لزمتها عصرها بعدها عنه ودنگ على شفتي غمضت

حسيت كلبي يريد يطلع اول مرة احس روحي اني صدگ زوجته ومن حقي اعيش ويا هيج شعور 

جان لازم اديه حيل  لباله راح ادفعه مثل كل مرة من حس بهدوئي  ضاع بلهفته يتنقل من شفتي لرگبتي جنت بين اديه مثل اللعابة مااعرف ابادله بأي شي بس حسيت بحبه اكثر من گد مايضغط عليه بحضنه ويبوس بلهفه احسه يريد ياكلني لحد ما شفته بده يفقد السيطرة وشفتي بعد ماحس بيها خليت اديه على صدره دفعته وهمست بترجي هيذام كافي

رفع راسه مسح شفتي عالكيف  لزم اديه باوع لعيوني بتعب ينفت ورد ودنگ…

حاضنه مخدتي خاله راسي عليه وهو يمشي ايده على ضهري  مديت ايدي وخرته ورجعت شبكت مخدتي حضني خله راسه بركبتي باسني عالكيف وهمس ومحمد انردها شبيج بابا عمليات ترعب اكبر شارب ونهيناها بخفة ايدينا انتي ليش هيج خايفة

-حقك اخوتك يمك قابل مثلي

- اشلون اخوة همه تكول اخوة يوسف اذا هو ضل قميص منه اني حتى قميصي يحركوا لخاطر يضيعون اثري

انداريت عدل روحه صفح انتجه على ايده  باوعتله وخر شعري عن وجهي كال شرايدة احجي

-تغجعلي اختي

- مثل ماراح ارجع ثقتي بيج بس وداعت ابني يرئال اذا غدرتيني اشوفج لسعة جهنم على اصولها

- ماغاح اسوي شي تبت وهاي مو غغفتي واني مو شامغة نفسي انت الجبتني وغصبتني عليك

- يعني؟؟

- يعني تسويلي مكان خاص تجيبلي وجهاز جديد وتعتغف بيه كدام عشيغتك كلها تكلهم هاي مغتي

-مغتي

-هيذاام

-عيونه

-ماغاح يجي يوم وتستعغ مني

-يجي يوم واسولف لجهالنا اكلهم اجتني طفلة للمركز خدودها حمر وشفايفها تنكرط ترفة لدرجة اخاف المسها مو اتستجوبها وكفت ادور طريقة احجي وياها واني صافن عليها اشلون ترجف خايفة كل حركة منها تثير لهفتي اكثر  مالكيت روحي غير اخذها لحضني وعض شفتها

- هذا فلم اباحي مو ذكغة

- جاشكلهم رفعتها فلقة وهيه خسرتني رتبتي

- صدگ ليش كصيت شعغي

- لان هيج احلى رفعة شفتج ودوره وجهج ويه الشعر القصير تخليج اميرة حلم شكو واحد حالف مايدخل هالدرب

- مم اغيد غغفه خاصه النا موكل ماتطلع لازم ابات يم ضي ممنوع اوصل الها 

- منو يمنعج باجر تشيلين غراضها تشمريهن بوجه ابوها الي دگلج صدر يحميج خو مانسيتي

عضيت شفتي باوعلي مصغير عيونه

شفت نضرته موقانونية تتنقل من  خدودي لركبتي عرفت راح يعيد الجولة دفعته سحبت الجرجف بسرعة ركضت للحمام دخلت سديته وراي صاح خليج جوه لاطلعييين

ضحكت وشمرت الجرف سبحت لفيت روحي بالمنشفة طلعت لكيته شامر نفسه نايم بعمق ماد ايده على جهتي عرض صدرة وصخامة ايده ماحي المكان كله

رحت طلعت ملابسي  لبست نشفت شعري حسيت بطني وجعتني من الجوع اباوع الساعة اربعة الصبح

ردت اطلع وخف بعد الكلام الگال السمعوا منه  رحت يمه هزيته من متنه ماگعد رجعت ضربته على صدره لزم ايده وفتح عيونه بتعب اشر شكو

- جوعانة

-المطلوب

-مشتهيه اندومي گوم وياي

-وخري  رأل عني

-انزل وياي ومن اسوي انطيك نصه

- رأأأأل

-شنو غأل والله جوعانة واخاف انزل اشو انتم ماشاء الله بيتكم كله اغتيالات اوكف عالدرج يشمروني اطلع بالباب يقنصوتي اشلون يعني اضل محبوسة لمن اموت جوع

مسح وجهه

- هيذذام والله جوعانه كوم حباب

- اني جبتها لنفسي

ابتسمت هز ايده وكام  جر تيشيرته لبسه واشر يله

طلعنا نزلنا للمطبخ گعد هو عالميز گوة فاتح عيونه واني عالسريع وكفت اسوي دقايق ودخلت عمتي رحمه شافتنا كالت شتسوون هنا

-دااسوي اندومي اسويلج وياي

-لايبعد عمتج حصتي انطيها لابو درع بلكي يزيل سواد كلبه ويكوم يعامل العالم مثل مايعاملج

-يايحن مانزل وياي اذا ماسمع غاح انطي نصه

رفعت حاجبها دارت وجها باوعتله دنگ لازم وجهه بيأس ضحكت وكالت كملي يعمه وصعدي خطية تعبان وعنده شغل

اشرت اي وكفت اطبخ بي وهيه اتوضت كملته رجعنا صعدنا رد النومته واني اتربعت اكل يمه خلصت خليته عالميز ولفيت روحي بالديباج  حتى النومة رايحة من عيوني مر الوقت واني عقلي يم رؤيا خايفة يجذب يريد بس يسكتني

اسمع صوت الاذان غمضت وهمست يارب 

حسيت ايده على خصري كال ليش كاعده لسه

- كلبي يم غؤيا

- هسه گايم انبشلج البتاوين شبر شبر ماارد اله هيه بيدي بس نامي شوية لاتضلين هيج صافنة

-مااكدغ انام والله

-انتي الخسرانة باجر جمعة والفرة طويلة بالمتنبي اجواء نهر دجلة والكتب غير بالاحلام

- صدگ اتخليني اغوح للمتنبي

- منو مانعج اخذي ضي وطلعي وين تردين بس لاتوصلين لهناك لخاطر لاتجبريني احبسج

- لالا والله بس امغ شوية عالشاغع اشوف مكانه وماانزل اضل بالسياغة

هز راسه اي من فرحتي بسته من خده شلت راسي

رفع حاجبه

- اشبيك تغه بالغلط

- حتى غلطتج عوجه مثل لدغتج هسه شستفاديت اني

- اغيد انام وبعدين ليش هيج مصعد التبرغيد

- عندي بزونه تحب البرد حتى تحشر نفسها دوره دفوا بالختلات

-اشعغفك ؟؟

- نامي رأل خدودج وردن والشفة صارت تغري الزمال گوه لازم نفسي كفيلج محمد اذا ضليتي دقيقة على هاي كعدتج انعل ابو عمرج لابو اليدور وراج عشرة

بسرعة جريت الديباج ختلت جوه سحبني خلاني على صدره دنگ باسني وحضني حيل

…واكفه اتلفت بالمتنبي  مااعرف ادور على لهفتي للكتب لو على غزوان الي يفتر هنا يدورلي على كتاب گد فلوسه

امشي واتملس كل مكان اتخيله مر منه وصلت لنهر دجلة وكفت  نزلت دموعي هنا جانت امنية رؤيا توكف ورايه تقنعها راح يجي يوم يرجعلها النظر وتجي تشوف نوارس دجلة

كرهت المتنبي على لهفة القراءة گد الاوجاع الحسيتها بي  رحت الضحكة تارسة روحي كل عقلي راح اشوف غزوان هناك رجعت حاملة الم الدنيا بگلبي

… الايام تمر شكد ماهيذام يحاول يسعدني مدخل البيت بحالة رعب الكل يخاف يحجي وياي بگد ماروحي مخنوكة صرت اتمنى ذيج كعدتنا يم الصوبة وماما تسويلنا لفات

بالاخص من اسمع عرگات هالة نهار وليل تعيط وتلطم  لان ازر مامعبرها كل دقيقة تقارن تعامل هيذام وياي وبتعامل ازر وياها

عمتي تصعد تباوعلي بغل احسها محضرتلي مصيبة من غير عمي مخبوص محد يعرف شكو يدخل  ثواني يوصله فون يخلي مايندل دربة يطلع يركض واصراخه وين واصل خاصتاً بعد ما رجع بته لبيت امها  لان شاف هيذام مستعملها كشغلة تافهه بس وكت من اضوجه يهددني يحجي وياها من يشوفني ابرطم يشتمها ويرد ياخذني لحضنه حتى لوجنت اني الي مزعلته

…واكفه ويه ضي بالمول تشتري رن فونها ردت ها ارز وعگد حاجبها صاحت جااين

- شكو

- مارضه يكول بس اظن دسار فاق امشي بسااع

طلعنا بسرعة للسيارة اخذونا للمستشفى دخلنا ركض صرنا  قريبن عالغرفة ونشوف صايرة هوسة الي لازم وجهي ويشهگ بصوت والي يكول مايستاهل ابو الليل  والي يصيح بعده صغير

لزمت ضي  باوعتلي اشرت لااا نزلت دموعي  اريد امشي بعد مااكدر جرتني ضي گوة اتحرك وصلنا للغرفة فتحت الباب سحبنا حارس  بسرعة وسده

دخلنا للغرفة الجوة ؛ هيذام منتجي عالحايط مجتف بملابسه العسكرية  ودسار مكلبجي بالسدية   يجر بيها ويسب بيهم بحرگة شهكت بصوت شال راسه دسار باوعلي بتعب اشر شكو

- موكالوا متت اشلون گاعد

- هسه انت تبجين لان متت لو لان بعدني عايش

- يعني متت و غجت لو شنو تغه كلها دتبجي عليك

-  شفت غباء بس غباء ويه لدغة لاهاي جديدة  وانتتتت لك كلببببب افتح الكلبجة

اباوع لهيذام مارد دنگ  طلع جكارته

- شنو يعني عود هيج راح تمنعني ؟؟

- كلتلك اكل حذاء وانجب مكانك لحد مايطش خبر موتك ولي لجهنم

جر ايده مجلبة حيل رد باوع لهيذام بغل دخل واحد من الحرس يركض بعده ماحاجي ودخل واحد ورا ضخم شكله هيبة عيونه مكحلة بي سمار لابس اسود  شال الحارس من ملابسه  دفعه على هيذام وصاح كض ازلامك عنييي ياابن النظام 

هيذام  - صوووتك لك

- البت رادتلييي  ان جان الغاثل جثرة ربعي هاي انه جاي اخلي ايد بيدك بس كف ازلامك عني وخليني اجفتهم گبل لا يعملولها شي

- اهدا ابني لاتكمز وتخليني اعيد ترتيب وجهك  تريد تموت يطبك مررض اوكف مكانك انتظر ربع ساعة ونطلع الولد حاصروا المكان

- البيت بي زلام جثيرة والبت راح تنقل مناك قبل لانصل

-مايلحگون دزيت امدادات وانطيت امر بالرمي

صحت شنو بالغميي يعني اختي غاح تمووت

جر ايده دسار حيل وصرخ لك هيذاااام ولكم فتحوهااا اولادد الكلبببب

رن فون هيذام اشرلهم سكتوا ورد بشر… لك كفووو جايكم

غلق الفون صاح ازر اخذ البنات رجعهن بسرعة  وانت ذبااح  اطلع گدامي خابر ربعك خلهم ينسحبون ويسوون مجال للولد راح يدخلووون

اشر ذباح اي ودسار اتخبل صاح وكلام اذبحكم هيذام وداعت الخوة ارميك لك يكتلوهاااااا

مارد هيذام دنگ سلاحه وطلع يركض وذباح ورا اجه ازر سحبنا طلعنا بسرعة تركنا دسار يضرب بالسدية ويصيح ولكم فتحونيي لاجفتوهم ولكم يموتوهاااا شغلهم وياااي راح يكتلوهاااااا ولاد الكلببب  فتحونييي  

المستشفى انخبصت هو يصرخ بعلوا صوته ويكسر والحرس طوقوا المكان يتراكضون ؛ طلعنا بره صعدونا السيارة وازر اشر للسايق روح

داست بينا بكل سرعتها والحماية بيناتنا عرفت خايفين لا يغافلوهم يبنا ويعرقلون شغلهم.

السيارة تمشي واني احس روحي مبنجة لساني مشلول عن الدعاء بس دموعي تنزل  وخيال رؤيا القديم  لامه روحها برعب يم الحايط تتحسس خايفة يتقرب منها بابا ومتكدر تمنعه

لزمت ايدي ضي كالت لاتخافين والله يردها هيذام

- اخاف افقدها هيه وهيذام سوة ديگلولج عصابة جبيغة

-هيذام مايخطي خطوة اذا مادارسها عدل هذا  ابن النظام يلعب وابليس بشيطنة لاتخافين

- اندعي فدوة اني بعد مايسمع مني گد ماغضبته بالبجي واعاتب الفكدتهم

- يارب اول مانوصل اتوضي وكلمن تلزم سجادتها  وهسه تشوفين والله بعدنا مامصلين صلاة الطلب هيذام يتصل يبشرنا ونصلي صلاة الشكر

هزيت راسي ومسحت دموعي اباوع للسما احس گلبي مثلج 

وصلنا للبيت نزلت ضي راحت لبيتهم واني ركضت ليجوة دخلت لكيت عمتي نازلة من فوگ وعمي واگف عالدرج كاللها بشري اشرت ماكو

انبهولي داخله ابتعد عمي على جهة وعمتي وگفت مكانها ؛دنگت كملت طريقي صعدت دااعبرها لزمت ايدي عمتي كالت انتظري

- هيذام كال كبل دخلي 

- لاحگة تصعدين بس خليني اگلج الاخبار الجديدة

- اعغف حصلوا مكان اختي

- لاهاي معروفة اول وتالي يلكفهم هيذام بس الخبر  الضامه عنج ومحذر الكل مايكلج لان يدري ماتطلع من الاعدام لو مو يتوسط بيها

-عن شنو دتحجين؟؟

-امج

- شبيها

- سلمت نفسها وشالت القضية وحدها والي يحقق وياها صديق عمج رجال لايخاف الله ولاعنده رحمة يكلج نهاهيها بالتعذيب

-شدتحجين انتي

-امم مامصدگة  ابراهيم اتصل خلي تسمع امها خطية قبل لاتموت وتضل شوفتها  بنفسها حالها حال الباقين الماتوا  

ابتسم هز راسه ودنگ طلع فونه اتصل فيديو  دقايق  واسمع صوت واحد يكله ابو اسماعيل العلم أمر

- مايأمر عليك ظالم بس ردت اسألك عن المتهمة الجديدة الي كلتلي عليها

- منو اليهودية صاحبة  قضيه القتل

- اي وين صارت

-  هسه اخذتلي بيها كم كيم طلعت تعب اليوم كله نعلت ابو لشتها بت النكس ماترضه تعترف منو شاركها بجريمة القتل  ليش رايد شي منها

- شعجب هيذام ماكدر يبرأها لسه

- شنو هيه لعب وبعدين غير هيذام انتقل لم… ممنوع بعد  يدخل بهيج امور

- تمام يعني فلتت من ايده زين اذا اني طلبت منك تفر قضيتها وتفرج عنها راح تردني

- افاا رگبتي الك اعتبرها طالعة وهسه اذا تريد القضية تحترگ وهيه داخله بالاشتباه تامر ابو اسماعيل انت

- ماتقصر  بس اذا ممكن تجيبها اكو عالم تريد تشوفها

- ثواني خليك وياي

اسمع صوت باب انفتح وصوت صرخته تكول حيوان مفترس احس روحي راحت بعد مااكدر اوگف گعدت عالدرج  اقل الخمس دقايق واسمع بجيته ماما بتعب هيه وتكله دخيلك سيدي والله بعد مابيه روح

غمضت

جاب الفون خلاه گدامي درت وجهي مالي عين اباوعها بس سمعت صوت دفره وصرختها هيه وتصيح بعجز ااخ يمة انكسر ضلعي 

شال الفون گله ماقصرت رجعها

-لاوين ارجعها ماطول جابولي الجلابتين خلي اشلع اضافيرها المتبقية حتى احولها للكهرباء بلكي اخلص منها اليوم لان سالفتها طولت

-الله يكويك اشتغل براحتك يله اترخص

سلم ديغلق الفون واسمع صرختها بألم محت شكو عقل براسي

گمت بسرعة صحت المطلوب شنو اعوف هيذام

- لا اكيد وحتى لو عفتي هو مايعوفج يطلعج من جوه الگاع لاتنسين رتبته متعلقة  بيج لاحسبالج الي جاي يسوي صدگ بحالج تره بحذاء مايشتريج كله هذا يسوي حتى يغثني ومنتظر يسمع اسماعيل اتخبل رسمي حتى  يتأكد بعد مابي امل حتى لونردج اله وقتها ياخذج  يشمرج بالحجز

-لعد شنو

-ورقة  صغيرة بالقاصة تسلميها منا تطلع امج منا وهسه

- بيها اذيت هيذام مو

- لا بيها رقم سيارة مسروقة وهاي السيارة تسببلي متاعب اذا ظهرت وللامانة اكثر  اقريها تأكدي منها و اگطعها كدامج حتى لاتكولين نظره وهو اصلاً ماراح ينتبه

-  ماما ماغاح تتحمل التعذيب اتصل خلي يبطل عنها قبل لاتمووت

- اتصل بعد ماتسلمين الورقه وتتگطع كدامج وكل ناس تروح لدراها  ها شكلتي يله مستعجل اريد اطلع

سكتت

رن فونه رد ها ابو اسعد … شنو اغمى عليها فيقها وشد ايدك عليها اكثر مثل ذني مايموتن بسهولة لاتفرح 

هو يحجي وصوت ضربة ويه صرختها تصيح ااخ يمه يراية احسه خمشت كلبي راد يسد الفون صحت لااا اجيبها بس خلي يعوفها

اشرلي اشش وصعدي يله

دنگ يسولف ويا وهو مستمر بالتعذيب ؛ ركضت بدون تفكير بس صوت ماما بأذني دخلت للغرفة مثل المخبلة بس اريد الحگ فتحت الكنتور دنگت عالقاصة استرجع شنو كلي يارقم دگي اذا اعتازيتي افلوس

غمضت ايدي ترجف تذكرت دكيتهن بسرعة فتحت القاصة لكيت اثنين اوراق سحبتهن بسرعة ونزلت اركض داكله ذني وكفت متصنمة واني اشوف هيذام واكف گدامي …

لاتنسون التصويت ❤️