تحميل رواية «شيء من رصيف الدم» PDF

شيء من رصيف الدم

بقلميleo Alfatlawi

بارت السابع والثلاثون

بارتين سوه

***راية ****

هزيت راسي ابعد صوته من اذاني غلقت الفون بسرعة وباوعت لرئال دنگت ؛همست ليش هيج سويتي

رئال -والله هو اتصل واني غدت بس امنه علينه

- بابا وثق بينا خله الفون لان جان خايف علينه موحتى نغدر بي

- ماقصدت أذيه كلمة وحدة كلتها وجنت دااسده

- بعديش هسه تلكي حدد موقعنا موتدرين  اذا رديتي راح ينكشف  مكانه

رؤيا - بابا مو غبي حتى يترك يمنا فون بدون لايخلي تغويش عالمواقع وهو لوجان يكدر يوصلنا مااتصل حتى يسامونا

- هسه شسوي اتصل بابا احذره لو اشلع الشريحة

رؤيا - لااا ديري بالج رقمنا اتراقب راح يكدر يوصل لبابا عن طريقنا دوم اسمع دسار يحجي عن هيج شي

ضغطت عالدگمة طفيته اجت رؤيا دنگت كعدت يمي لزمت ايديه باوعتلها ساكته بس عيونها بيهن حيرة وضياع يهد جبال باوعت للمدالية رمشت بكسرة ودنگت ؛ عصرت ايدها حيل وهمست شكو رؤيا

- راحت ماما

- لااسم الله ليش هيج تحجين

ماردت عضت شفتها عيونها مليانه دموع

- لاهيه وعدتني ترجعلنا كالت لمي خواتك وانتظريني

-رادتج تجمعينا وتوكفين على رجليج

-يعني شنو  يعني اذا مالحكت عليها وسلمته هم اخسرها؟؟ لارؤيااا  استونا عشنا وصرنا مثل البشر لا تكوليها

- ضحت بنفسها  حتى تخلصنا من ايد جاسم

- وهو صارله اسبوع كاسر ظهره مدنگ عالسيارة وطلع ويعرف اذا لزموا ينهوا بس جازف لخاطر يجيبلنا شي نتسلى بي 

-ماخابرونا وساومونا اذا مامتأكدين منها منتهية  ويخافون نعرف

رئال - اذا لزموا بابا ماغاح يغحموا

رؤيا - يعني تعرفين الي يلزموا مايخلوا صاحي لعد وين جنتي كل هالاشهر وعمج مستلم ماما يعذب بيهاااا

رئال- مااذكغ شي ولاادغي عندي ام والله

- لاااا لا رئال تدرين لان ماما انسجنت قبل لاتفقدين الذاكرة بس  سألي نفسج شنو الشغلج عنها

- ماادغي يمكن جنت مسافغة لو مانعني اعغف شي عنكم شي مامعقولة اني هلكد حقيغة وانساكم بهالسهولة

- درررع رئال هم سافرت لو طلعت من بيتكم

درع - لا جنت اني وياها كل يوم نروح للحديقة نلعب ونروح يم ضيونة نكعد بس اجو ناس موزينين باكوها وضلت مريضة يوم ويوم وجابها بابا صارت زينة

رؤيا - شفتي يعني جنتي صاحية؛  تدرين اشلون تمرضت ماما وراج لو احنا شسوينا حتى نرجعج تدرررين اخونااا مات بسببج لان مارضه نترك البيت خايف فد يوم تتعاركين ويه زوجج وتجين لبيتنا وماتلكيناا

- منو اخونا ؟؟

- الي خلص عمره ينام جوعان لخاطر ينطيج خبزته ويشوفج شبعتي الجان يواصل ليل ونهار يشتغل بس حتى يشيل عنج التعب ويسد مكانج بالاجرة  الجان يخليج وره ظهره ويتحمل ضرب مايحمله حيوان

نزلت دموعها همست مااذكغه والله

- هذا الي انتي شاطررة بي رجلج دمرناااا رجلج ضيعنااا وخلانا نتمنى الموت كد الذل الشمرنا بييي ولو شترجه من وحدة بدل ماتاخذ حق اهلها ركضت نامت بحضن الكاتلهم

رجعت ليورا ولمت رجليها  لزمت رؤيا كلتلها كافيي

- ولج مامااااا مااااتت ولج ماتتحمل تعذيبهممم ولج امناااا وانتهتتت 

- شسووي اسلم بابااا لو اسلم نفسي واكلهم اني الكتلتتت كليلي شسووويي

دنگت رئال لازمة راسها تعصر بي وهيه كامت دفرت الباب طلعت برة كعدت يم الحايط تبجي

دنكت حضنت رجلية محتارة احس هم على متوني مايحمله بشر؛  غمضت مجرد تخيلت روحي اضحي بواحد نهم ماتحملت فتحت عيوني بسرعة واسمع دبة قويه شلت راسي لكيت رئال واكعة بعد اريد اكوم مااكدر

دخلت رؤيا تركض بسرعتها  عثرت اجت على وجها مالحكت تكوم زحفت زحف الها  دنگت شالت راسها باهته نكثتها حيل و صاحت رااايه جيبي مييي

كمت طلعت اركض مااعرف اشلون جبت مي ورجعت لكيتها تضرب على وجها وتتوسل بيها  تصحى كعدت يمها ردت ادير مي صاحت لالا مايفيد اتصلي على بابا بسررعة هاي مابيها نفسسس

- اشلون اتصل وفونه متراقب راح يلزموا

-  كومييي  فتحي الباااب اني اخذها

-وييين تاخذيهاا رؤيا احنا بالبتاوين لاتتخبلين والله بس نفتح الباب كلنا نضيع

-لعد اشلووون ولج راح تروح مناااااا

-لالا فدوه لاتكولين هيج غسلي وجها بلكي تصحى

ضمتها لحضنها شفايفها بيض ترجف خليت ايدي على كلبي  اتلفت مااعرف شسوي اجه درع كال  لاتصرخون تره تگعد و تكوم تبجي

- شنوو تكوم تبجي؟!  يعني هيه هم يصير بيها هيج بيتكم

-اي من تضوج وبابا ياخذها للغرفة ينيمها على الجرباية

- شنوو ينطيها اشلون يصحيهااا فدوة اروحلك احجيي بسرعة

- كلشي ماكو بس يكول اشش  يخزر علينه احنا نخاف بعد مانطلع صوت وهيه تنام يضل بابا يمسح على راسها شوية وتكعد

جريتها من ايدها خليتها على المخدة وكعدت يم راسها امسح بشعرها ورؤيا تفرك بأيديها وتشهگ بخوف ادري بيها كل الكالته مومن گلبها من گد حيرتها بينهم رادت اطلع حركتها بأحد

مر الوقت وهيه ماكو اي رد فعل منها عيوني تتنقل بينها وبين رؤيا الي دموعها تنزل بكتمة واديها ترجف  خفت هم توگع وساعتها اتخبل من صدگ

لوجه الصبح احنا على فد خبصة الي تغسل بوجها والي تمرغ برجليها بلشنا نيأس؛دنگت مسحت وجها استوها رؤيا دتهمست راحت اخيتنا مو؟؟  واشوفها حركت شفايفها بأس هيذام

غمضت  اخذت نفس وتمددت يمها احس بعد مابية احجي ؛ دنكت باستها رؤيا من راسها وكامت طلعت بره دقايق واجه بأذني صوت باب المطبخ تنقفل  عرفتها خافت منها  لاتطلع بدون لانحس

دخلت سلقت باب غرفتنا شالت الفون وتمددت بصف درع  اخذته لحضنها وصفنت صار هدوء  كلمن عقلها بمكان وكلبها بغير مكان

مااعرف شكد مر وقت ولاادري اشوكت رحنا بالنوم كعدت على صوت درع يضرب برؤيا ويبجي جوعان رفعت راسي لكيتها منتجية صافنة بوجهه عيونها حمر

درت وجهي لرئال كاعده بنهاية الغرفة لامه رجليها لحضنها وتباوعلنه بكسرة الحسرة واضحة بعيونها 

مسحت وجهي دااگوم وانفتحت الباب دخل بابا بيده كراتين كام درع ركضله شمر الكرتين ودنگ شاله بوس خدوده دخل كال شبيكم صاير شي

رؤيا - لا بس ضلينه للصبح سهرانين وراح النوم علينه 

-اهاا كلتي ضليتوا سهرانين  تمام  كومي بابا جيبيلي مي

هزت راسها كامت شمرتله الفون لگفه راحت طلعت وهو دنگ فتح الفون باوع بي وشال راسه باوع لرئال وابتسم  نزلت دموعها

نزل درع واجه يمها اخذها لحضنه باس راسها وهمس على شنو تبجين يبعد ابوج

- والله هو اتصل واني ماحجيت شي ويا ابد بس امنته علينه

-تردين ترجعيله

دخلت رؤيا صاحت لاااا

بابا- وانتي شكو يجوز ترد ترجع لرجلها

- موبكيفها غصباً  عنها تضل ويانه واذا حجت نص حجاية افلش حلكها

-رئول مالج شغل بيها بابا اذا تردين ارجعج كولي

رئال -  ذاك مو بيتي ولاهمه اهلي اول مغه اضحك من كلبي واغمض واني مأمنه هو بينكم -صح مااذكغكم بس حسيت بحنيتكم عليه وشفت بعيونكم الخوف الجنت ادوغ عليه

- اذا احنا نحبج هيذام مستعد يخلي الدنيا بين ايديج

- بس اني احبكم الكم واغيد اعيش بينكم

-رئال ليش تبجين ؟؟

- ليش ماجنت اسأل عن ماما وخواتي اشلون قبلت انام بحضنه وهو سبب الصاغ بينا

- انتي اكثر وحدة حاربتي وتأذيتي بخواتج بعتي نفسج وذليتيها واتحملتي ظلم محد حمله منهن جنتي تكعدين تشكليلي اشلون تتمنين تنتحرين بس خايفة يعاقبوهن مكانج

- لعد ليش ماسألت عنهن

- لان  انتي محكومة مطوقة من كل مكان مع هيج جنتي تحاربين وانتي بينهم وتتحملين اسوء انوع التعذيب النفسي والجسدي بس حتى تحميهن من بعيد

- وانت  ليش ماجنت تساعدني

-جنت واكف محتار المن اخلص كل وحده بيجن واكعة بمكان اسوء من الثانية  افتر بينجن مااعرف المن امد ايدي بالاول  كل وحدة منجن شايلة معزة بكلبي تخليني عاجز حتى عن التفكير 

دنگت لازمة راسها تعصر بي

-شبيج يروحي

-هوسه بغاسي صوغ هواي تغوح وتجي بس كلها تخوف وشي مثل الدم حاغ احسه ينزل بين عيوني

-هسه  ادز الولد لنفس الدكتور الجنتي تتعالجين عنده واجيب علاجج

-بابا كلمااغمض اشوف جثه كدامي والولد ابو النظاغات حاضني ويبجي وخواتي يتوسلن بخوف لااعوفهن 

- كلها كم يوم وهذا المشهد راح ينعاد بس الفرق انتن الواكفات وصاحب الجثة يتوسل بخوف حتى ترحمنه بالنحر

رؤيا - ماما مانعرف عنها شي

- لاتخافين عاليهودية ماطول روحهم بيدي يحموها بعيونهم لان يعرفون مكان كل خدش منها احرمهم سنه من شوفتجن

- ماراح تتحمل هناك

- واني مااتركجن اذا مااردها لحضنجن وأمنجن بمكان يربيهم همه اهلهم بي

-يعني هم راح تعوفنا

-من تعرف نفسك مامرغوب بيك تبعد بكرامتك وتضل تراقب حلالك وتحمي من بعيد افضل

-هيذام  ساومنا بينك وبين ماما

-وليش ماسلمتني

- غبيااات

- لهيج انتي اول وحدة راح اسحل رجلها واكتم نفسه شرط اخلي كلما يشوف هذا وجهج يتفل عليه

- هه مبين  ساحلك

- جنه قرد تافل بوجهه الشيطان ؛ لايفكر يلگف ولايخاف ينصك  ؛ عقله ضارب  يطفر من بيت لبيت بالثواني تلكي على راسك مثل القدر المستعجل  لاتعرف منين اجه ولاتكدر تلكفه تكول غبار بلحظة يحرگ المكان ويتبخر

- اكو جهاز يشكله بمتنه ينبهه اذا اكو احد قريب وبنفس الوقت اذا انحصر يدوس يلحكوا ربعه انت اذا عندك شغل مشي بالنهار لان هو مايطبع بس بليل

-  اذا رجلج الشيطان  تافل بوجهه رجل رئال هو التافل بوجه ابليس يلاعبك عالموت اقل غفلة تلكي نفسك صاير وجبة لاهل جهنم

- يله ربي عوضك برجل راية

- اي كلش خبل وخذوا معشوكته منه؛ كاض سلاحه ويفتر ومسودن جماعته ويا لاينام ليل ولا يهدأ بالنهار اعترضوا اهل المنطقة لان كثرت دخلاته وكف بنص الشارع صاح تنوعوا يبه جلمة ماثنيها تبعدون عن طريجي وتخلوني ارد الراح مني  واتوكل بدون خراب حي الله بيكم ؛ تكفون بوجهي امحي المجان على البي والزلمة ابن ابو يطلعلي

- اكيد يحجي بزود هو بدون سند مخلصها يترادم ويه العالم باطل تكول ثور مختل عقله مو انوب يعرف الربع ساندي

-وهذا الرايده 

- بس خوش جبنالك انسابة مو؟؟

- انعل ابوجن لابو نسباني  صفوا سوه اولاد الكلب كلمن يريد دمي من جهة تكول كاتل ابهاتم موماخذ بناتي منهم

- مو وجه نعمة وين محصل هيج نسبان ضباط وشيوخ شرايد بعددد

- وذولة ماخذوجن لو ماجانوا يعرفون بنات منو انتن

- ليشش عيني منو انت لاتكول ابو عكرب الدغش تره ثنين بالمنطقة مايعرفوك

- اهاا متأكدة ياخرزة البتاوين

- اي وهذا ابو الخرزة لو ادري بي ضابط جان ماگلبته غشني ابن التافهه لبالي صدگ زلمة بالمافيا وراح اغط ويا لراسي بالكتل والدم

-  موبيدج يبعد ابوج دم اليهود يحوم عالحرگ ؛ رؤيا اذا سألتج سؤال راح تجاوبيني صدگ

- جرب

- اذا انطيتج سلاح بي طلقة وحدة وجمعت العرفتيهم على طول حياتج بغرفة براس منو راح تخليها

- براسك لان لو ماانت تتخلى عنه ماصرنا لحمة سهلة  بحلوگ الجلاب

هز راسها اخذ نفس ابتسم  وكال يله كومن وياي اليوم اليوم اني اساعدكم بالطبخ وانتن تساعدني بتصليح السيارة هاا شتكولين رئال

مسحت دموعها واشرت اي خدودها حمر وشفايفها تلمع  كز على سنونه بابا وكال انعل ابو لابو اليردج لهج حيوان

رئال - تغه هو حباب

- بس اني لاااا

رؤيا - ديله اشلونها عاد احمد ربك اكو واحد قبل بيها جنها هامستر اثول

- هاي الهامستر الماعاجبتج هسه من اطلب ثكلها ذهب يوصلني وفوگه يجيني راكع على رجلي

- شقصدك رافدددد

- مااقصد ينبض رافد يله كدامي عالمطبخ

باس راس رئال وشال درع كام كمنا لزم رؤيا من بلوزها جرها ويا رحنا للمطبخ  شمرها كدامه ونزل درع جر التخته ذب قميصه واشر جيبن السجينة

جبت المخضر والتمينا داير مدايره كلمن لزمت شغلة

اباوعله شلون مدنگ يثرم وكل شوية يا دامغ رؤيا يايبعد ايد رئال حتى لاتنجرح ودرع على ظهره حاضنه من رگبته

رئال لزمت الطاوة تكلي واني اغسل بالمواعين  وبابا يسوي زلاطة اما رؤيا لاحظ ولاثمر خاله درع  وتتسابق ويا ياهو التفلته توصل اسرع للحايط؛ 

اخذت نفس يائسة منها عرفت هذا الولد اذا ضل عدنا بعد اسبوع تعلمه حتى عالبوگ

كملنا سوالنا لفات اكلناهن عالسريع؛ كام اخذهن راح للسيارة واني وكفت انظف المطبخ

ايد بالموعين وعيوني وياهم صافنة عليه مااعرف شنو نوع الصبر الشايله الي متحملهن هيج اباوعله بس فتح البنيد بعده مامبلش ورؤيا غطت لراسها بالدهن من غير رئال دخلت للكشنات اطلع وتشمر بالحديقة للغسل ودرع يطفر بينهم

ابتسمت ودرت وجهي بين  مانظفت المطبخ والغرفة اسمع اصواتهم صعدت طلعت لكيت بابا لازم صوندة المي ويرش عليهن وهنه يطفرن

ضحكتهن وكفت يم باب المطبخ اتجتفت واباوعلهن وابتسم  اشلون متونسات وهو يضحك على ضحكتهن ؛ صار كدامي منظر جاسم لازم الصوندة وهنه لامات روحن خايفات منتظرات وين هالمرة  تصير اللسعة

فززني بابا بشره المي على وجهي صاح مردودة يبعد ابوج 

- راحت بابا هاي ربي عوضنا بيك بس عوزنا ماما بعد مانريد شي من الدنيا

- يله روحن سبحن وتحضرن حتى اخذجن للامام ازورجن

-انت شيعي؟؟

-اذا ماتردن ترحن ماكو اشكال بس ترا ماكو فرق بين المذهبين ماطول الدين واحد

-  لابابا بلعكس والله كلش احب احفاد الرسول وارتاح من ادخل ضريحهم

- ديله اخذي خواتج  سبحيهن بالاخص الخرزة مطلنها وجلفن وجها واذا اعترضت هفيها كله وصلخي جلدها  غصباً عليها بين ماجيب كم شغلة وارد

- اشلون نطلع اخاف يلزمونه

- مادامني بظهرج مااريدج تلفضين هالكلمة سمعتي

ابتسمت واشرت اي

شمر الصوندة  وجر رؤيا من تشيرتها تخر مي وفاتحه عيونها على كبرهن صاحت هددد لك وييين ماخذني

بابا - رؤيا كدامي للحمام

- منو كلك اريد اروح وياكم وخررر ايدك

- بت الكلب وين ماخذج للمصلخ امشييي

دفعته لزمها حيل ؛ ضربته جرها جتفها جابها يمشي ويسحل بيها وهيه ترفس وتصيح  والله الي يخلي صابون على وجهي اشرررحه لك رافددد عوفنييي

- لابت الجرووو صوتج

- عوفنيي

- وين ماخذج بت الكلببب ولج النبي اسماعيل من اخذه ابراهيم للذبح  ما سوه سوايتج

- بس دخلني للحمام ابلغ عليك

دنگ شالها من بطنها وهيه تكمز وتصيح ياعالم تعالوا ذولة خاطفينيي

اخذها ودخل ليجوه ورئال ميته ضحك؛هزيت ايدي رحت لميت الطارمة عالسريع دخلت على هوستهم لكيت بابا طالع يطبك برداناته ويضحك ورؤيا بالحمام متربعة بملابسها  كفشتها منثورة وعيونها تلمع كلها صابون والشهگة بكلبها

دخلت للغرفة بسرعة مالي خلگ لسانها ادري تذبها براسي حضرت الملابس بين ماسبحن دخلت وراهن طلعت لكيت بابا راجع وكاعد عالدرج لازم المشط يمشطلهن

كمل ضفيرة رؤيا دنگ باسها ودفعها اشرلي تعالي

كعدت كدامه خله المشط على شعري بلش يمشط غمضت همس شنو تتمنين يحنية گلب ابوج

-نضل بحضنك وماما ترجعلنا

-شنو تشوفيني راية

- الدفو والامان الي جنت احلم بي

- هم يجي يوم وتصدگين اني اكدر أأذيجن

- الي يحارب الدنيا ويشمر نفسه بالخطر وهو يعرف وراها موته بس لخاطر يحمينا مستحيل يسويها

- جالاتصدگيهم وتغدريني مثل ماسوت بيه

- انطي روحي الك بابا مو اغدرك

- روحج وفرحتج محد اله حق بيها غيرج ولاراح اسمح لواحد يتقربلهن ؛ وكلام الله احركهم حرگ بس يفكرون يلمسون شعره منجن مو يوصلون لگلوبجن

-لعد اخذنا خلينا نبعد

-الضيع اجمل سنين عمرة بين  اربع حيطان ظلم محروم من اخر نفس ممكن يحميهم من شره لايجون يطلبون منه الرحمة وكت الصارت ارواحم بيدي

-راح يأذونه بيك

-هههه دخلي يحمون نفسهم بالبداية ويطلعون يمشون مشية زلم مو يتلفتون مثل الخرفان المضيعة راعيها

هو يحجي وصاحت رؤيا لك رافددد تعال اخذ بتك من وجهي مو بعدين اكتلها وتصير براسي عنتر ابن شداد

بابا- كون صدگ وتمدين ايدج عليها وداعت اليهوديه اردج للحمام واجلفج جلفة اطلع العرامة كلها من عيونج

-ويجيج الكلب ابن الكلب يكول هذا ابوج ولازم تحترمي

-سوالف الشوارع طبقيها برة لااكوم اسحلج انتي واللفو النعل ابوي بيج وطفر

ماردت ثواني وجانه صوت رئال تصيح بابا غلطت عليك

رؤيا- بت الحيوان اشوكت غلطت عليه؛  بابا اجذب هاي لاتصدكها

- استغفر وكال كومي بابا رايه جبت عبي ونقابات انطيهن خلي يلبسن

- ودرع اشلون

- جبتله شفقة وكمامة لاتخافين اطلعكم مكانات محد يشوفكم  بيها

اشرت اي سحب ضفيرتي اخذ نفس طويل منها ورد دنگ باسني من راسي وكام

كمت ورا شلت العلاگة دخلت لكيتهن مكملات  وزعتلهن العبي  لبسنا عالسريع طلعنا

اباوع صاير الليل والمنطقة تخنگ خفت حتى اباوعلها صعدت بالسيارة بسرعة وكعدت بحضني درع

صعدن اول ماسدوا البيبان تحرك بابا واشتغل الضحك على لبسهن طلعنا للامام؛  بكد مافرحانة اسمع شقاهن ويه بابا وسوالفهن بگد ماكلبي عاصرني لايلكفونا ونرد نفترق بعد هالمة وتصير ضحكتنا ذكرة تنضاف  لباقي الذكريات

وصلنا للامام دخلنا بابا من جهة النساء وراح فتنا جوة  اباوع ازدحام لزمتهن همست خلي نندعي منا

رؤيا- لااني ادخل من زمان نفسي افوت واشوف شنو اكو جوة

-مكان الضريح بس مزدحم اخاف اضيعجن

رئال - انتي ضلي هنا كل وحدة تزوغ وتغجع وبعدين انتي غوحي زوغي

-تمام بس مو تتأخرن لان بابا يضل قلق

هزن راسهن رؤيا لزمت رئال راحن واني گعدت عيوني على المكان يلمع وريحته تزيل شكو هم من الكلب باوعت لمكان الدخول رفعت اديه اريد اندعي مااعرف سكتت صافنة

مر وقت واني على گعدتي بس دموعي تنزل لحد ماسمعت  صوت رئال تبجي كمت  مفزوعة واشوف رؤيا حال الضيم حالها العباية عوجة والنقاب صاير مشمر  بيدها رئال تسحل بيها ركضت لزمتها صحت شكو

رؤيا- اختج ثوله كلتلها ازدحام لطشت اله تحب الشباج مثل العالم  تالي جعصنها النسوان

- عزة يمه شبيج شو رفعي راسج داشوف وين تعورتي

-ياتعورت راسها صار طخماخ فلشنه بالشباج اني اجر وهنه يضغطن اخر شي اجيت اعوفها واحسبها نذر

- اشكد حجيت وكلتلجن هوسه بس اتحداجن اسمعن الكلام

- يله بلكي تعدلت اللدغه شو لج كولي كركر يكركر كركره

رئال- بالامام مااكدغ اغلط عليج

رؤيا -هاي شوفي رجعت كلشي مابيها يله نطلع قبل لايلزموها العتبة وجها مشبوه حسبالهم داخله تنهب الضريح

لزمت وجها شلته همست اكو شي يوجعج

رئال- اي غاسي داحسه يغيد ينفجغ

- سوده عليه  دتعالي كعدي لاتوگعين

- لا صاغ كم يوم نفس الالم يجي عادي شوية ويغوح خلي نطلع  خطية بابا

-ولج خدودج صايرات حمر كلش

-لان جعصوني يله نطلع داحس دخت

استغفرت لزمتها  طلعنا صدگ لكينا بابا  منتظر انوب گوة لزمتني الضحكه شكله كلش مومال زيارة الشفقة براسه  دكمته الفوگ مفتوحه والردانات مطبگه  ؛ واكف مجتف جكارته بحلكه و عيونه تتنقل بمكر ذاك وينه شكله تابع للمشاكل حصراً

شافنا اجينه ابتسم عدل وكفته وصلنا اله دنگ علينا باس روسنا وحده وحدة خله اديه ورا ضهرنا اخذنا للكورنيش القريب يم الامام على نهر دجلة كعدنا بي جابلنا لفات وكولا وزعلنا وكعد بينا منزل الشفقه على عيونه همست رؤيا جان جبت شفقة تغمق هالبياض شوية طالع جنك مساحة طفل روضة

- بهاي عيونج جنها لايت خربان

- زلمة قلم تصحيح اني منك مااحجي

- دعدلي اللثام جنج وداعشيه مغسول حظها

- انت منو الضحك عليك وشغلك بالمافيا مجدي بالتقطع مااشغلك

- شوفي ذاك الكدامج الي يكلب بفونه

دارنا  وجهنا اباوع ولد شاب ناعم همست شبي

- راح يبوگ جوزدان  ذيج المرة العجوز

- شدراك

- تركج من هالسؤال وخلي عيونج على ذولاك الشرطة الي مراقبي اشلون راح يلكفوا

- يعني هذا حرامي

- لامدمن ومتوازي على افلوس ابره

-عزه اشلون عرفت

-لاتسأل المجرم كيف قتلت بل اسأله ماذا بعدها

-اموت على الخلقك  عملني

-دخلي اعلمج اشلون تغسلين وجهج

-راح اكوم ابلغ عنك

-اذا انتي بت ابوج كومي

-والله دااشك خال بالعبي مخدرات وراح ادگ بينا الناقصة  انت تكمز بالنهر واحنا نبتلي

- واني اموت على الخلقج

همه يحجون ورئال مدنگة تفرك براسها لزمت ايدها همست متكليلي شبيج كل شوية ولازمته

رئال - شي حاغ ينزل بي  وتصيغ هوسه بداخله 

-شنو تاخذين علاج خلى اكول لبابا يجيبه

- ماكو بس مهدئات ومن اخذهن حتى بعد ماافكغ يصيغ غاسي خالي مااغيدهن

- لعد اشلون تضلين هيج

- غايه اشياء كومة وخبصة بغاسي

-تگومين نرجع

-لالااا ماصدگت اطلع هسه يهدأ الوجع

- اوووي فدوه شوفي ذاك البيبي

شالت راسها باوعتله عود ردت الهيها بلكي تنسى بس شفت بعيونها كسره تباوع لامه تلكف بي عيونها عليه بيهن لهفه فطرت كلبي لزمت ايدها

- شبيج رئول

- ههه تدغين جنت حامل  ومات ابني من كد التعذيب واني ماضجت بلعكس كيفت لان جنت ادعي عليه لبالي ابن حغام

- ربي يعوضج مكانه

هزت راسها ودنگت

-مشتاقة لهيذام مو

-اشتاقيت لصوته من يعاقبهم لان يضوجوني اشتاقيت لصبغه عليه من اعيط بوجهه اشتاقيت حتى لصوت ضغبة بسطاله من يدخل والكل يوكف خايف يباوعولي لااشكيله منهم

-تردين ترجعيله

-لااا لان مأكدغ اعيش بدونكم

-تدرين شنو مسوي وراج هسه

-اعغف متخبل وعيونه ماغمضت ولايكدغ يدخل البيت  لان اني ماموجودة بي وادغي اذا لكف بابا ماغاح يغجمه

كلبي ماينطيني اكلج رجعي لان ماتعرفين شنو معزتج بکلبي  بس بنفس الوقت مااكدر اغصبج علينه

-واني بعد مابيه ابعد ولا اكمل بمكان مابي انتم

دااحجي وقاطعتني المرة بصوتها درنا وجهنا لكينه الولد يركض والشرطة التمت عليه لكفوا دار وجها بابا لرؤيا غمزلها فتحت عيونها على كبرهن همس قابل اغشج

-رافد  اريد افلوس

بابا -اني هم

- باباااا

- وجع منين اجيبلج فلوسي صرفتهن على حلگج الاعوج

- لعد اشلون اريد اشتري كولا ثانية هاي خلصت

- ماكو كدامج غير خيارين يااجدين ياتسلبين

- والثانية اسهل جيب السجينة

- بهذا نقابج جنج صرصر مضيع بلوعته

- راح اعبرها الك بس حتى تعرف اني اشلون مترباية واحترمك

- وجه الفكر اجيتي للدنيا طفرتي مرتي وشمرتيني مؤبد

- هم شفت ماما بعد ماطلعت من السجن

دنگ وهز راسه لا

- املاكك وين راحن

- اتصادرن للدولة ونصهن ضيعوهن

- هاي النكسة الجبيرة واحد يكتل ويتعب تالي يجي واحد عالحاضر ياخذ الجثة ويستمتع بالدفن

- على منو طلعتي هيج ؟؟

- المشكلة ضاعت اني سنية وابوي شيعي و اصلي يهودي

سكت صغر عيونه وهيه صفنت مثل التفكر اجتهم لحظه ادراك الهم صله باليهود

لزمت وجهي ودنكت يائسة  من وضعهم ضحك بابا  كال رايه شيلي النقاب

رفعت راسي اشرت ها

-يروح ابوج شيلي النقاب اختنگتي

-اخاف واحد يعرفنا

-گلنا شيطان بس مال يفكر اجيبكم للامام لاا ماتوصل  يله بابا رفعن النقاب اشتمن هوا دجلة

رفعنا النقاب كامت رئال وكفت عالحديد تباوع للمي ورؤيا وياها صدگ المنظر حلو والهوا بي برودة

ضلينه لتالي الليل اخذلنا بابا صور بفونه شوية وجاع درع رد بابا جابلنا مره ثانيه لفات من غير الحبشكلات والضحك وشقاهم الي وين واصل

العالم عيونها علينا كل ضنهم مخابيل يشوفوهن عبي ونقابات وتالي يتفارسن  ويتراكضن بالدائرة مثل الجهال من غير  وبابا خال درع على متونه يلاعبه اليشوفه ولايكول ابن عدوه

تاخر الوقت رجعنا للبيت شمرنا نفسنا بفراشنا درع نام يم بابا بالصالة وهنه كل وحده لزمت ايدي من مكان خلت راسها على متني استوني اغمض ورؤيا دفعت ايد رئال وصاحت وخري نامي على مخدتج لاهفج اطراك

رئال - اذا بيج حظ مدي ايدج  

- الرفق بالحيوان واجب

- انجبي حتى لاكول لبابا واخلي يسحگ غاسج

- امداج وجه لو دعاية لعبان نفسس 

- محد كلج باوعلي انعكاس صوغتج بعيوني

- شنو؟؟ المهم اعتذر ماافهم لغة الكلاب

- لعد اشلون دتحجين بيها

-احاول اقلدج

-دخيل محمد اشكد اكغهج

-قاعدة الخدم دائماً يكرهون اسيادهم

- باباااااا

بابا - لج رؤيااااا

رؤيا -بابا  كلشي ماسويتلها هيه جلبببه

- ادري يبعد ابوج مظلومة

- من زمان بابا ما اتجمعنا  مرة يم  ماما اذا ماجنت اني اليهودية الي افكر اشلون افجر بيهم عبوة واقتل اولادها الابرياء

صحت جذابه بابا والله هيه جانت جنها جريذي مشلوع اذنه بس دور مشاكل خو رئال شابعة كتل منها حتى الحيوانات ماخالصه جانت تكهرب بالبزازين وتموتهن

رؤيا - عزززه يعني هاي انتي الگلتي لخالو وخليتي يبسطني

- اي خبلتي الرجال لباله بيتنا بي شي كل يوم يشوف بزونة ميته ويضل للصبح يقرا قران خطية

-ومشاعرري

- انتي منيلج مشاعر ولج الاطفال طيور الجنه انتي جنج بريعصي مشلوع ذيله يركض وره الشياطين بجهنم

رئال - عيع ماتشوفين وجها ممسوخ من كد اعمالها الوسخة

رؤيا - سمعت رافددد خو ما حجيت اني هنه يعيلنن بيه

بابا - كااافي ولجن النوب التحجي منهجن اشمرها بالحديقة  تكمل نومتها

رئال - بس غؤيا بابا اشمغها بالحمام

رؤيا - غغغ بيج حظ احجي عدل

- بابااااا

شفته كام جريت روسهن لحضني غمضت بسرعة  وضحكتنا تارسة روحها تكول نايمين بالجنة اكتشفت اشكد احلامنا جانت بسيطة

…بعز نومتي واسمع المنبه يدگ  بين اريد اكوم استعد للصلاة وبين نومتي عزيزه لان ماصار هواي نايمة

انگلب واحس صوت ونه خفيفة  يمي عرفتها رئال ردتلها  الصخونة ؛  فتحت عيوني لكيتها لامه نفسها وتنزنز مثل الدتحلم خليت ايدي على راسها حارة كلش نزلت ايدي على جبينها فتحت عيونها بتعب باوعتلي وصفنت بوجهي

- شبيج يروحي ليش هيج مدتفارقج الحرارة

مدت ايدها تلمست وجهي عالكيف نزلت لزمت ايدي رفعتها شتمتها باستها  وخلتها على كلبها ونزلت دموعها

اشرت شبيج

صارت عيونها على رؤيا كعدت زحفت يمها وخرت شعرها عن وجها خلت ايدها على عيونها همست بشهگه  كامت تشوف مو

- رئال

ضحكت وشهكت سوه دنكت شالت المخدة طلعت النظارات باوعتلها مسحتهن وهمست بكسرة مو كلتلي انتظريني جايج اشلون اطاك كلبك تعوفنا ماكلت اخياتي اشلون اعوفهن وغاي مكسوغات

لزمت ايدها رفعت راسها - غاح غزوان  بعد ماكو  واحد يكعدنا الصبح على صوته بعد ماكو واحد يگلي يبعد اختج موجان يحلم بيج لعد ليش  عافج  وغاح

- مالحكت البس البدلة ولا اسمع واخيراً صرتي الي

- ليش ما تاناني اجي اودعه

-غمضت عيونه وهو يباوعلي حسيته يوصيني بيج

-معقولة  ماشوفه  بعد

-كل ليله اتوسل بي يجيني بالحلم حتى لو بس اشوفه من بعيد اشكد حلفتله وكلتله ماراح اعاتبك ولا كلك اشون خليتني بدلت العرس بس مااجه

-يعني غاح غزوان هاي هيه

-تعبت واني انتظرج حتى اشكيلج من وجع كلبي انتظرتج هواي حتى ابجي بحضنج واكلج راح الجان يگلي عايش بيج راح الجان ماينام اذا مايگلي صبري ماضل شي

-انهد بيتنا

-دفنوا رنود بدون لاشوفها وخذوا غزوان بدون لااودعه  بعدوهم من حضني  واني اتوسل بيهم بس يخلوني احضنهم لاخر مره بلكي عطرهم يصير بروحي

-بعدوكم كلكم من حضني مغه وحده حبسوني بمكان وكاموا كل فتغه يجيبولي خبغ واحد منكم

-باوعي بعيوني راح تشوفيهم كلهم

-باوعت مالكيت بس غزوان

-هه تذكرين من يگلج انطيج عيوني

-واگله لاخليهن الك هم يالله يكفن تضم بيهن غايه

-وهسه هو ماضل منه ذكره غير صورته بعيوني

عصرت مناظره وخلتها على صدرها جريتها لحضني وبجيت بصوت ماصدكت رجعت رئال وخلتني بحضنها وكالت ابجي

طلعت شكو وجع بگلبي من ساعة  الوگع يم باب البيت وهو عيونه عليه  يودعني باخر نظرات بينا لحضناتي لقمصانه وتوسلي بكل ذكره بينا ترده الي

رؤيا تبجي من جهة وبابا لام رجليه مدنگ بس يتسنط  صاح الاذان لو صاح برواحنا كلنا على فد صوت بجية

مر وقت واحنا نسترجع ذكرياتنا المابيها بس الم لحد مااجه بابا كعد لمنا بحضنه وكال والي ترأس عرش السماوات السبع لاخذ حق كل دمعة نزلت من عيونجن لخلي جوه رجليجن مثل الذبيحة يتمنى رحمه المووت بلسانجن

رئال- شكيتلك وكلتلك خايفة هيذام غاح يموتني واني مااعغفك اشلون انطاك كلبك تعوفني بين اديه

- جان خالين ايديهم على نفسي بس اتحرك يكتموا وخواتج بعازتي

- محد جان معتازك كدي بابا خسغت كلشي

-راح اعوضج

-محد يكدغ يعوضني جنت ميته بعدي عنهن وكملتها بأخغ امل ممكن اعيش اله

باوعتلها وهمست ليش تحجين  هيج شنو الصاير وياج 

ابتسمت ومسحت دموعها اشرت ماكو

-احجي رئال شصايرلججج

-دااقصد على شعغي جنت اذكغ محمود بي حغمني منه وهذا جان اخغ ذكغه منه

-تگدرين اطولي ومحمود بكلبج موجود

هزت راسها اي

دنگ بابا اشوفه مامقتنع اخذ حسره طويله وكال يله حضري نفسج دااخذج للطبيب

رئال - لابابا والله مابيه شي

-راسج تعبان اخاف على ساعة يرجعلج فقدان الذاكره لازم اخذج

- لالااا هو كال هذا موفقدان ذاكغه بس ازمه اثغ ضغط نفسي بس تغتاح ونفستها تتعدل تغجع طبيعي

- ميخالف بابا أمن عليج

-موو اليوم خليني اشبع من خواتي اخاف اغوح وينطيني شي اغجع مثل قبل واني ماصدكت اشوفهن واخذهن لحضني فدوه بس اليوم خليني

اشر اي جرنا كلنا لحضنه اخذ نفس منه طويل  وكام شال سويجه وللثام وطلع بدون لايسأل شمعتازين بس راد يطلع لان الخنگة بينت بعيونه عرفته مايتحمل يشوفنا بعد السمعه منا اشلون جنه عايشين ويه جاسم وشنو جان يسوي بينه

رجعنا نسولف بين عتاب وشتياق للصبح ماخلينه وجع ماطلعنا بداخلنا

كعد درع اجه يركض حضنها كال رئول جوعان

رئال - ماكو غئول تكول ماما منا وجاي اوك

-وهبة

-انت منو تحب

-انتي النعواصة وهيذام الحيوان  وبيبي رحمه العقجه ؛ورؤيا الجميلة الحلوه وراية الفاهية وجدو السماعه الايربوت العطلانه

اندريت لرؤيا رفعت راسها فرحانه بتعلومها غميتها ورجعت باوعت لرئال مااعرف وين تريد توصل بهذا سؤالها كالتله لعد اني امك

درع- لعد مو بابا كال اصيحلج ماما ماقبلتي

- جنت ضايجة منه هسه لا وكمت احبك هواي

هز راسه فرحان كامت رؤيا خذته وطلعت باوعتلها اشرتلي شكو

-مو اني انتي شكو 

رئال -هاي  اول خطوة بأخذ حقي من السووا بيه

- طفل هذا لاتاخذي بذنب اهله

- منو كلج أذي لا طبعاً لان هذا ابني بدل الموتوا الي والثانية بهيذام

-شنو هيذام

-موغاد ماتغجعلي الذاكغه وجان ينطيني علاج حتى تضل هيج خاملة  واني ماغاح اخليها تغجع بس غاح اخلي يتمنى تغجعلي

- رئال انسي سلمي كلشي لرب العالمين هو ياخذ حقنا خلينه عايشين ماصدگنا رجعنا التمينا ماضل عدنا غير ماما بس ترجع ونروح منا لغير محافظة نعيش مثل ماجنه نريد

هزت راسها

-يله كومي خلي نسوي ريوگ اليوم اريد انتي تكلين البتيته مثل قبل

-ماتصيغ لان ماهمه الجانوا يوكفون على غاسي غند تصيح جوعانة وغزوان يكول فضيها وماما تكلهم لاتستعجلوها لاتنجوي

- مكان رند عدنا درع ومكان غزوان بابا وماما راح تطلع وترجع بينا لاتبجين رئال فدوه اروحلج  لاترجعين لنفس المرض وانوب مانعرف شيصير وياج

مسحت دموعها واشرت اي

كمشت ايدها ضحكت وجرتني لحضنها ضمنتي بقوة واشتمتني بلهفة  تكول اول مره تشوفني مامصدگة

مر اليوم  بين ضحكنا ومامصدكين وبين عركات رؤيا ودرع ياهو يكون صاحب اخر تفله بوجه الثاني

الي يشوف جمالها ولايصدگ هيج شايله عرامة شعرها مفتوح وعيونها تلمع جاي ويه لون شفايفها الحمر تكول لعابة بس اخلاقها مغسوله من غير بجامتها تك مرفوع وتك يسحل ؛  هيه تكمز واني احس راسي صار شكبره دفعتها  داخل الصاله وكلتلها اذا دخلتي للمطبخ اللبس الجفجير  براسج

- ديله اشلونه مطبخكم اذا دخل الفار بي يطلع سكران كد الوسخ

- دروحي غسلي وجهج وتعالي احجي بالوسخ

- المهممم اني اخر وحده تفلت على الورع الوراج خاتل

هو سمعها وصاح لااانيييي

ضحكت وراحت يم الدرج تشد بلكيمونه من يم البطن و تباوعله بشماته

استغفرت وشلت درع اسكت بي دخلت للمطبخ كعدت يم رئال همست بأذنه عوفها مخبلة هاي

درع - هسه اكول لهيذام الحيوان  يكتلها

- استلم بعد ماكو بابا

رئال - بول تغي مهتلف حبيبي مو حيوان

- يله انوب هاي الثانية انتن شبيجن ويه الالقاب متكللي

- ديله عالاساس ماخذين فلاسفة زمانهم

- المثل يكول اخذي الفارس ولاتاخذين الدارس

اجاني صوت رؤيا من جوه صاحت والتاخذ المجلووووب الافيي  شنووو

كالتها وسكتت مثل الي اختنكت شمرت ردع كمت ركضت وكفت واني اشوف واحد مثلم بأسود يم الدرج ساد حلكها خال السجينة على ركبتها اشرلي ردي وراج

رجعت ليورا ورؤيا  اندارت ضربته بوكس بخفة ايده لكفها فرها جتفها دنگ اخذ منها نفس طويل باسها وهمس افاا يول اضربيني

ضغطت على سنونها وصاحت عرفتك ناقص  وحيوان وكلب ابن كلببب من لزمتك العوجة

- هم اعديها الج يبت الدغش

-لك دساااااار

دفعها وخر اللثام ورفع حاجبه اشر هاا

-شوصلك هنااا

-جنت مار اشتري باكيت جكاير منا سمعت لغوتج كلت ادخل اخذلي دفره بلكي يوگع وسخ وجهج

-هااا وانت جاي من بغداد للبتاوين تشتري جكاير تمام لعد اسمع لك ماراح اكلك شدلاك مكانه  ولاراح اتوسل بيك لا تكول عنه لربعك الحيوانات بس قسماً بالي خلقني وعرفني بواحد لفو جبان خاين بلده يدسار اذا وصل خبر عن مكانه لو واحد بس مجرد باوع لبابا مو تعرضه اعتبرني عدوتك ودمك محد يلوحه غيري

-كملتي

-لاكملت ولا راح اترجاك غصباً عنك تصعد الدرج وتروح منا مثل مااجيت وتنسى شفتني هنا ولاكتاب الله اخر مره لساني يخاطب لسانك دسار خليلك ذكرى وحده حلوه بحياتي لاتكرهني بيك اكثر مااني كارهتك

- وكرهتيني شنو يعني ليش منو انتي اصلاً

- اني الخرزة بت البتاوين تاج راسك انت واهلك الي ماراضين بيه حسبالهم ابنهم زلمه صدگ مايدرون اي جلب مار بالشارع براسه

دنگ يحك بخشه

- عيب كل يوم اهينك خلي عندك كرامة شوية اذا مولخاطر اخلاقك المعفنة لخاطر الرتبة الي لابسها

مارد تقدم وهو مدنگ ينزع بجفوفه بعدها مامتحركة ولكفها من وجها عصره ورفعه لفوگ وحجه من بين سنونه صبري ودع وياج اذا جنت اتحمل طياح حظج هسه افلش فجج ؛ اذا سمعتج تجاوزتي بحرف مو كلمة اربطج بلسانج واخذج سحل عدل لبيت اليهودي مااطلع ابن ابوي اذا ماطلعت تعب ركضت الاسابيع كلها من هذا وجهج المخربط

- فرحان بروحك مطلع عضلاتك على بنية انت هم حاسب نفسك رجال وامك فرحت من بشروها بيك

-اعصرج تموتين بيدي اتركج تضلين تكمزين جنج شاذي مشوه روحي بنيتي لمي كفشتج حتى اعرف  شنو جنسج

دفعها عليه هيه خفيفة وهو ماشاء الله تكول حايط؛اجتي ترس كمشتها بسرعة گوة سيطرت ماتوكع  بعدني مامعدلة وكفتها دفعتني وهجمت عليه بعد يريد يسيطر عليها مايكدر

رجعت ليورا عاضة شفتي اباوعله اشلون رافع اديه يريد يهديها وهيه مبلش ضرب بكل قوتها لاخلت صدره لامتونه وهو ساكت منتظرها اطلع حرگتها

كوه كتمت ضحكتي الي يشوف شخصيته وضخامته ولايكول هاي الجنها فارة هيج لاعبة بحاله

احس من يمي خلص صبري مااعرف اشلون متحملها ماتحرك لحد ماشافها بهتت لزم ايديها رادت ادفعه جتفها حيل وصاح  اهدي ابنيتي تعبتي

-قصدك اني مخببببله لك دساااار

-كافيييي لج

-شيل ايدك واطلع منااا يلاااا لاتخليني اسمعك كلام يغثك

-اكثر من هيج مااتصور اكو

-لااكو من اتشوفني انزف لواحد كدامك وانت مثل الحيووان واكف تباوع وكتها تعرف المغثة شنو

-وليش انغث طلقة وحدة براسك واحسب الله ماخلقج شنو من جمالج  وغث روحي وراج الف وحده اكو غيرج

-لعد ماتوليييي شكو لازكلييي

-غبييي على شنو احبج مااردي زماااال ابن زمااال شنو شفت بيج وهيج ماكل قنادر ومتحمل تصرفاتج الرعنة وضال اركض وراج مثل الاثول مااعرف

-لان حيوووان

اخذ نفس دفعها وراح كعد عالدرج اجت يمه دفرته برجله دنگ كوه لازم روحه صاحت يله كوم اطلع منااا

-مااطلع اذا ماتسمعيني

-مااسمع غير انتي طالق

-وهاي الكلمة ماراح تسمعيها حتى بموتج

-واموت ليش لخاطر حيوان مثل ماله ردادددد

لزم راسه  دنگ يائس من وضعها

اجيت دفعتها عنه ودنكت كعدت كدامه لزمت رجليه رفع راسه يباوعلي همست  هيذام اندل مكانه مو

- لابس قرب يندلكم واذا لكفه يحرگه على كد الغضب الشايله

-يعني شنو

-رجعوله ابنه ومرته

رؤيا - ارجعله سطعش مرض بكلبه وشيطلع بيدكم سوه

دسار - رافد الدغش اذا مو اليوم يلزموا باجر نصيحة ارضوا بالعرض قبل لاتخسرون كلشي رايه شغلي عقلج خوية

همست كم سنه يسجنوا

دنگ ساكت

-مؤبد موو

رؤيا - شدتحجين انتييي مالج شغل بهذا ديضحك عليج بس يريدج تسلمين بابا حتى نرد جوه ايديهم

رفع راسه يباوعلها وياكل بشفته

رؤيا - دسار اذا بلغت عن بابا وداعت كل عهد اخذنا سوه تكون هاي اخر لحظه  اخاف يجي يوم واغفرلك الفات بس هاي لاااا تكون  حكمت علينه بالنهاية

-هيذام قرب يوصللكم

- ما يوصل وحتى لو وصل مايجازف ياخذ ابونا لان يعرف و راح يخسر رئال

- ابوج  عنده اعداء اذا فكروا يرحموجن يشمروجن للجلاب تنهش لحمجن

- مااتصور انكس منكم انتوا بس بعدوا عنه احنا بخير عدنا منو الي يحمينا

هز راسه ودنگ منتجي على رجلي

عصرت ايده باوعلي

-هيذام ماراح يأذي بابا مو؟؟

-هيذام اذا شاف دموع رئال يغفر حتى للشيطان  ويكفله بس استعجلوا لان اذا لكفوا الربع لو ابو هيذام يطلع من كبرة مايخلصه منهم

- هيج بابا عنده اعداء

- ابوج العدو بنفسه ؛ بلغ عن خلايا ومقرات حتى ابليس ما يتجرأ  يوصلها اسمه وصل لناس النضرة بوجهم موت مو اللعب وياهم

-تكدر تخلصه

-ذباح يسنده واني وهيذام نلزم القضية بس لازم تسلمنا قبل لايفجر القنبلة الاخيرة ويحركنا كلنا

-واذا ماسلمنا

-راح يحصلوا واذا حصلوا جماعة ابراهيم  قبلنا ينتهي امره

-كم سنه ينحكم كول دسار لاتجذب

مارد

رؤيا- انتي شنووو كل عقلج دتحجين ويااا وانت يله كوم روح وشيل هالمكان من راسك

سكت

- دسااار دتسمع شنو كلت

هيه تحجي واجه صوت من فوك واحد كال يسمعج بس مغلسس

رفعت راسها جان واحد واكف ملثم  وخر اللثام واشرلها هلو؛  تفلت عليه خله ايده على راسه وكال مشكور مرت اخوي

رؤيا -الله ياخذك انت واخوك  والله ماتفتهم غير سندريلا من عافت قندرتها لان تعرف هذا مستواكم

ضبع - واميرنا اندلج بدونها

- اكيد غير استعمل حاسة الشم

وخرني دسار وكام رادت تفلت مالحكت لكفها بسرعة رفعت اديها تحمي وجهي لزم ايديها نزلهن رمشت بخوف

وكف يباوعلها بحيره اخذله شوية وجرها لحضنه ضمها بقوة ودنگ غمض اخذ نفس مال واحد ذابحته  اللهفة 

طلع درع يركض من المطبخ ويصيح عمووو

ضحك باس راس رؤيا وخرها  ودنگ شاله شمره بالهوا ولكفه باسه وگله خاتل هنا ابن الكلب وخال ابوك يفتر ويسحگ بالعالم جنه مدرعة  اليهود

-هيذام الحيوان

-العب انتشر الوباء وين ام لدغه

طلعت رئال اتجتفت اتباوعله بغضب غمزلها واشرلها بأصابيعه

تفلت عليه

فتح عيونه قبل لايتحرك صاحت والله بس تلمس شعغه مني اخلي هيذام يسحلك

دار وجهه لرؤيا - هاي انتي شلاطمه بيهم

رئال- وانت الي مخلصها ادمغ واتجعص بوجهي عالاساس اخوي طلعت زوج اختي المسكينة الساحل بيها الكاع

دسار -بذمتج وضميرج هاي شكل وحده مسحولة

- اي دشوفها سودة عليه هيج  جان شكلها

صغير عيونه وكال وشدراج بشكلها قبل اشلون جان

- غيغ اختي اكيد تشبهلي بس كول اني مااخاف الله استغليت بغاءة  طفولتها وخوفها لان ماعدها احد لعبت بحالها وشمغتها

كلتلها موبس هيج علمها حتى عالجكاير والغلط

دسار - وبعت كليتها وطلعتها اجدي بيها  شفت نقوصية ورتكاب مثلجن لابالله مامر عليه

رؤيا- شقصدك لك

- خوو انتي اسوء شي عرفته بعد مال اليتيم

- شوف لك من الاخير وخليها بعقلك اخاف الشيطان يلعب  براسك ويخليك تروح تخبر زلمهن وتستضعفونا والي اسمه الله مثل مانزلناكم من السما بتفاحة انصعدكم دفرات

ضبع - حي الله الرتب

- انت انجب

- اتشرف بيج مرت اخوي

عض شفته دسار ياكل بيها رن فونه اخذ نفس وطلعه من جيبه باوع بي وعگد حاجبه فصله بسرعة بنفس الدقيقة رن فون ضبع رفع راسه اله اشرله منو

ضبع -ابن النظام 

-لا ترد  راح يحدد مكانك

-يعني اغلقه

-لااا اطلع كدامي انتظرني يم الشارع العام بسررعة

اشر اي ولف لثامه راح يركض اندار دسار لرؤيا  -وهذا اخر شي ضل اخسره بسببج

- ميهمني

- جاخلي انصحج ابوج خلصت ايامه استغلوا الفرص لان ماتجي غير مرة وحدة

-يرحون ثنينهم ولا نضحي بواحد منهم لخاطر الثاني

-تمام درع راح اخذه وياي

درع - لااا حباب عموو

-حبيبي ابوك صار عبارة عن موت متنقل اذا ماحصلكم منا لباجر يسوي تحديد بتعداد السكاني ويبلش بالتصفية

-لااا مااروح اضل يم رئول هيه تبجي خطية

-انعل ابو رئال لابو الحظ الجابها وخلاها كدام هيج واحد راحته بصلخ البشر ؛حبيبي يومين وتجي وراك

-لااا ماروح وخر عني رئول لاتخلي ياخذني

كالها وبجه باوعلي دسار  كلتله ماعليه تره

-رايه انتم شجاي تلعبون ويه منوو 

-شنو الاب اذا لم بناته يسموها لعبة هيج صار الشارع والضياع هو الصح

-ابوج ايامه معدودة

-اسم الله عليه لاتكول هيج

رجع رن فونه باس درع اجه انطانيا وكال للامام بعد لاترحون

فتحت عيوني على كبرهن دار وجهه راد يصعد الدرج لزمته رؤيا باوعلها همست لاتغدر بينا دسار

-صفيت كل اموري وكملت كل التحضيرات ماضل غير احجز القاعة واجي اخذج

-مو بكيفك

-ماجاي اخذ رايج جاي انطيج خبر

مد ايده لزم وجها عصره دنگ باسها حيل ودفعها صعد الدرج ركض هو ويلبس بجفوفه صاحت لوتموووت مااخذك

مارد كمل طريقة صرخت لك دسااااااار  فتح الشباج طفره بخفه بلحظه اختفى حتى صوت لدبجة  رجلي عالسطح ماكو

كعدت عالدرج صافنة راحت رئال كعدت يمها لزمت ايدها وهمست بابا مستحيل يسمحله

رؤيا- حتى لو ماسمحله اني ماراح اصيرله مواني اخذ وحد مستعر من اهلي

- شبيهم اهلنا

- لامابيهم شي بس ابونا مانعرف شنو شغلة وليش هيج العالم تركض ورا  وامنا يهودية مسجونة بتهمة قتل

- يعني همه يعغفون هالشي ومحد غصبهم علينه

-شتكولين يسوها ويبلغ على بابا

-حتى لومابلغ  ماغاح يغحمون ماما انتي ماسمعتي صوتها وهيه يعذبوها وهيذام ماغاح يسكت وغاح نضيعهم ثنينهم ونغجع كل وحده بمكان

-محد يضيع راح نروح منا

هيه تحجي ودخل بابا بيده لثامه شمره واشر شكو

رؤيا -  دسار جان هنا مو بعيد بلغ هسه

-ههه مايسويها

-ليش حتى مايسويها

-اخر شغله ممكن تشفعيله بيها مستحيل يضيعها 

-خلينا نروح غير محافظة

- وهذا الطلعت الصبح علموده حصلت بيت بالجنوب واتفقت ويه ابو تريلة مال مواشي راح  نطلع ويا

-وحقنا الي هنا

-مانتحرك خطوة اذا ماحقجن يكون بحضنجن وانتي بابا رئال شبيج ليش وجهج اصفر

رئال - ماكو شي بابا بس خفت لايگول لهيذام ونغجع نضيع من جديد

- محد تضيع كلها  كم يوم واخذجن ونروح منا واليوصلجن لسه الله ماخلقه كومي يبعد ابوج تعالي يمي

كامت حضنها باس راسها وهمس ماطولج بحضن ابوج ماتخافين من جنس مخلوق

-تعبنا بابا هواي

-وصار الوقت ترتاحن وتعيشن مثل ماتردن

-ههه تعغف شنو جان حلمنا

-بيت صغير رؤيا ترجع للمدرسة وانتي تصير عندج مكتبة خاصة وراية تسويلجن الاكل التحبنا وتلتمن بحضن امجن بليل

-وهسه انضاف شي لخ

-وهذا الشي مستحيل حدي وياجن لاخر حلم أمنهن وسلمجن لحضنها وروح بطريقي اضل  اباوعلجن  من بعيد

-لا فدوة بابا

-اااخ يبويه هاي الكلمة الكسرت ظهري

- ويهون عليك ماتسمعها لوتشاغكنا يومنا مثل كل ليله وانت خالنا بحضنك  وتحل مشاكلنا

- مشاكلجن  نابعة من داخل روجهن من كد محبتجن تتلاشن  وحدة بالثانية حتى تملي داخلها بحنية صوتها بي يصير الاذان يتحول صراخجن لهدوء وحده تزم ايد الثانيه وتغمض وهيه تحسب الساعات للصبح حتى تصبح بوجها

-هاي قبل هسه مانام اذا مانشوفك كدامنا ونحس على ايديك وهيه تمشي على خدودنا تتلمس اخاف وحده منا نازله دمعتها بدون لاتشكيلك همها

-قربي خطر عليجن

-واحنا قابلين عشنا بدونك ماشفنا بس الظلم استونا ضحكنا لاتحغمنا منها بابا لخاطغنا لاتعوفنا بعد

ضحك مسح دموعها واخذها لحضنه عصر راسها باسه وباوعلنا فتح ايده ركضنا دخلنا بحضنه كلنا كال اوووف يبعد ابوجن شمعزتجن بروحي

رؤيا - بابا اني مااعرف اشلون اصارحك بس تريد الصدگ كلش ماارتاحلك

- شترتاحين حمدي ربج لافج بيتي وين اكو وحدة تهف رجلها جلاق لج بابااا انتي شكو براسج هذا

- باباااا هو يعيل ويكلي اخذج غصباً عنج شنو والله هو ضابط ترضى

- لااشلون ارضه انعلج ابو لابو الرتبه الخالها على متنه بت الدغش اذا مومشيتها تسد الشارع شيوخ ورتب وشرط اذا مو مهرها ثكلها ذهب وبيت وحدها لايوصلون بس غسلي وجهج بابا حتى اكدر احجي بزود

- والله بابا حتى لو غسلته هاي طلباتك يعفطولنا بيها وشكلنا راح نعنس على كلبك

-اهااا نقلل شوية

- لاهواي بابا اني بالنسبة الي مارايده غير الستر

- وباكيت جكايرر موو رؤيااا منو الي مدخن بنهاية الحديقة

كالها ولزمها من شعرها صاحت بس على كيفك انت لاتعصب

- منين جبتي الجكاير

-هاااا

-طفرتي الباب مووو

-انت ليش ماخذ عليه هيج نظره تره اني خوش بنية

-بهذا وجهج المضروب فايروس القرده

-لاتعيب على خلقة الله حرررام

-سمعي لج هالمره راح اغلس واسوي روحي ماشفت الگطف بس وداعت الغدرت بيه اذا لكفتج ادخنين مرة ثانية اعلگج بالسكف واخلي خواتج يرحن ويجن يتفلن عليج

رئال - بابا يصير هسه اتفل عليها

رؤيا - لايبت القرد سمعتهااا بابا هاي كله بسببك راحت شخصيتي

- انعل ابو شخصيتج الماضال منها بس الوسخ واللسان القذر رؤيا ماعيد الحجي سمعتي شنو كلتتت

هزت راسها

دفعها فركت راسها وهيه كالبه خلقتها تباوعله بغضب صاح شكوو ولج

-دسار كال الخميس عرسنا اتصل بي كله خلي يسوي باجرر

-وانتي صدكتي دسار ياخذ وحدة مهتلفة مثلج

- سوف اذهب وسوف تندمون

- روحي فكينااا دخيل ربج

- كل العالم تبني بشخصية جهالها وتعلي بمقامهم  اله اهلي بس اريد اعرف انتوا اهل جيس حببب

- تعالي لج انتي الضاهر كد ماتغطين بحفرة الاخياس صرتي مثلها

- تره هذاااا مسبح مسبح يالجهلة اوووف هذا مصير الي يعيش ويه عائلة مامطوره

- دلبسي نعالج عدل وبعدين سولفي بالتطور

دنگت تباوع صدگ لابسته مگلوب وانوب كل فردة شكل هز ايده بابا وكال راية اكو كم شغلة بالسياره نزليهن بين مااروح للجامع

رؤيا - شتسوي بس لاتبوگ نعل

- لااشوف ناقص ابن ناقص يخلصني منج

- مااعتاز جيب للبايرات العدك اني ماخذه ضابط مخابرات

- لوبي خير ماكلبج

-انت موو جنت مسجون مؤبد منووو طلعك

-الزمايل الخذوجن

لمت حلكها تباوعله بغضب  غمها وطلع كوه كتمت ضحكتي رحت ورا اسمع صوت زلم يم الباب يسولفون عرفتهم منتظري واكو مصيبة

فتح باب السياره طلع شغلة منها  لفها بقطعة قماش باوعلي وغمز ضحكت دزلي بوسه بالجو  رد اتلثم؛   مايگدر الشر بدمه انوب اباوع بعيونه اثر للخوف من الصار ماكو  غير الغدر والحقد ماموجود

جر سلاحه خلاه بظهره  وطلع من البيت

طلعت المسواك وعلاجي واللعاب لدرع دخلتهن للبيت

مرت الايام وبتنا عبارة عن مصارعة  بين رؤيا وبابا جان يحاول يعلمها على كلشي ماخله حتى السلاح دربها عليه احسه يصنع منها شخصية قاسية عكس رئال جان يعاملها بهدوء ويخاف عليها حتى من نفسه تكول شي هش ويخاف تتهشم بيده

بالنهار لعب وضحك بين التصليح ويبن يشاقيهن يايوسخهن بزيت السيارات  ياايشمرهن بركه المي وبليل يسهر ويانا على التلفزيون نطلع كارتون لدرع ويجيب حبشكلات نلتم لتالي وقت لمن ينعسن يغطيهن ويكوم يطلع للصالة

وهنا يبلش يتحضر لشغله بس يعبر باب الغرفة  تتغير شخصيته من حنون الى شخصية  صارمه ماتعرف الرحمة شنو وهذا الشي الجان زارع بكلبي الامان يعني بعد محد يتجرأ ياخذ خواتي مني

واكفة بالمطبخ اسوي بوشار كملته خليته بصنية دخلت للغرفة لكيت بابا متمدد ودرع على صدره عينه تتنقل بين الساعة والتلفزيون جان خال افلام كارتون نليز ؛  رؤيا عكسه  متمددة هم عينها وياهم بس رجليها على بطنه

رحت يم رئال لامه روحها وبيدها الفون وصافنة خليت الصنية وكعدت يمها همست شبيج رئول وين سارحة

-هااا لاهيج بس اذكغت ماما

-اشكد مشتاقتلها

-غاية هم يجي يوم وتكغهيني

-عزة اكو وحدة تكره روحها ليش هيج تحجين

- اني ما أذيت احد كد ما أذيت نفسي بس حتى  مااخليكم تفقدون هالمة

-شصاير هم خابر هيذام

-لا بس هيج احس غوحي مخنوگة

سحبتها لحضني نزلت دموعها رفع راسه بابا كال شكو شبيها رئال

-مااعرف ولاترضه تحجي

وخر درع واكام اجه يمنا سحبها من حضني مسح دموعها كالها شبيج يبعد ابوج

-مابيه شي تعبانة شوية

-كومي اخذج للطبيب

-لالااا بابا بس خليني بحضنك اني اغتاح

جرها لحضنها عصر راسها - تردين  زوجج

-لااغيدك انت

-هاي اني يمج يبعد ابوج ليش هيج تبجين

-ماغيدك تعوفنا

-مااعوفكم خلصت كلها يوم واحد  واخذكم واروح منا بعد ليش خايفة

-خايفة تضوج مني وبعد ماتحبني

- انتي بت روحي العايش بيها شصاير رئال احجي

وخرت راسها مسحت دموعها ابتسمت - اغيد كتاب واعغفك ماعندك تجيبلي واخاف اگلك وتمل من كد مااطلب

- ولو مامصدگ بس انطيج عيوني شنو اسم الكتاب وباجر قبل لاتگعدين من النوم يكون يمج

ابتسمت وكالتله اسمه ضحك على ضحكتها جر راسها باسه وكام كال يله بابا رايه لموا غراضكم وتحضروا احتمال باجر الضهر نطلع

-شنو انت طالع

- اي اسلم هاي السيارة كملت تصليحها حتى استلم حسابها لخاطر انطيهن للزلمه الراح ياخذنا ماتأخر  قبل اذان الفجر اجي موتخليهن يسهرن ورانا طريق وتعب هواي

- لامااخليهن وكملت كلشي ماضل بس الفراشات من نطلع المهن

- يله كومي قفلي وراي الباب

رؤيا - بابا جيب وياك جكاير تره جكايرك خالصة

-كومي غسلي وجهج لاارفس بطنج

ردت حضنت مخدتها وعيونها عالتلفزيون ضحك خربط شعرها وكام اتلثم وطلع رحت ورا قفلت الباب رجعت للغرفة كعدت يم رئال خايفة عليه مااعرف شبيها تباوع لوحدة وحدة بينا احسها شايله هم جبير على كلبها كل شوية تنزل دمعتها وتمسحها بسرعة حتى لاننتبه

تاخر الوقت نام درع خليته بفراشه  طفيت التلفزيون غطيت رؤيا واجت تمددت يم رئال لزمت ايدي باستها وخلتها على كلبها

-اكو شي يوجعج احجي

-اشرتلي لا

-تره مابقى هواي كلها كم شهر وتطلع ماما

هزت راسها اي وضمت وجها بصدري وغمضت

حضنتها مر وقت واني اراقبها اخاف ترد حالتها وهيه ساكته لان ما تريد تكلفنا لحد ماشفتها نامت امنت خليت راسي يم راسها ونمت

بين صاحية وبين نايمة اسمع دبجة قوية عالسطح ثواني وختفت رجعت لنومتي لحد ماسمعت باب المطبخ تنفتح عرفته بابا

كمت طلعت لكيته داخل بيده الكتاب ضحكت دااگله صباح الخير وضاعت الضحكة واني اشوف الشرطة مسلحة دخلوا يتراكضون

بلحظة طوقوا البيت رفعوا الاسلحة على بابا صاح واحد منهم سلم نفسك اي حركه نرميكم …

لاتنسوا التصويت❤️

كثرة الاسئلة كم بارت متبقي

بلشنا بالعدد التنازلي  بارتات قليلة تفصلنا عن نهاية القصة