رواية شيء من رصيف الدم الفصل السابع 7 - بقلم Leo Alfatlawi

شيء من رصيف الدم

بارت السابع

بقلمي: leo Alfatlawi

بارتين سوه

علقوا بين الاسطر ❤️

***رئال***

لايوجد عذاب اقوى من ان تتكلم
بداخلك قصة لاتستطيع ان تحكيها ٠٠٠٠

على صوت صراخ امه والهوسة  اندفعت الباب دخلوا الحرس ترسوا المكان رفع اديه اللواء وكفوا وهو اتخصر عيونه على هيذام وينفت

باوعلهم هيذام ورد باوعله وضحك  راح لجهة الباب جانوا واكفين ثنين حرس شال ايده رجعوا  ليورا جر واحد منهم من ياخته شمره على اللواء گله عود اختارلك حراس زلم حتى يحموكم عدل

فتح الباب وطلع مسح وجهه اللواء وكلهم طلعوا ورا لاتخلوا دقيقة يغفل عن عينكم

طلعوا يتراكضون ومرته لطمت على وجهه صاحت شنو روحوا ورا سودة بوجهي

-جا شسوووي فهميني

-يمه ويلادي لالااا براهيم  هذا مسودن مثل ماشوهلنه هذا يضيعلنه الباقين ميهمه حتى لومات  اهم شي يسوي الي براسه

-هسه اخابرهم ياخذون حذرهم منه لحد مااشوف وين تصفى ويا

-ليشش هيج اتخبل على  شنو  اذا على هاي اخذها ردها  خلي اتولي اني اجيب تاج راسها

-من اشوكت هيذام  عاقل حتى هسه متفاجأه بتصرفه هاي گدامج شفتي حتى من اخلي الولد يشمروا بمكان يتربى  بي ماتعترضين

-شتشمره  هو اشلونه حتى تزيدها عليه هاي عمته كله منها هيه تزيد بگلبه الحقد الله ياخذهاا

-يامره لاتدعيين عالاساس ابنج  ملاك  ولج المراكز والدوائر كلها تصيح من شره لايعرف جبير ولاصغير اذا مايشوف روحه تفرفر بيده يخلي يعترف باليريده مايعتقه

-نزل بي عقوبة مثل ذيج المره ودي عالحدود حتى لو خطر المكان لو شمره بقضية ياخذله كم شهر  اهم شي يبعد لمن يهدأ

-ياعقوبه غير شمرر رتبته استغفر الله  ماتگليلي شسوي ويا والله احتاريت لازواج لزمه لاخلفة عقلته لاعقوبة ربته ااخ لوماابنه كاسر خاطري جان  عرفت اشلون اكسر راسه

-لخاطري روح ورا هدي شنو يريد سويله والله اموت اذا صار بواحد من بزرتي شي

-ولج هسه لوماالله ساترها جان ضربني مخبببل ابنج مخبل مايهاب احد ولايحسب احساب للعمر  عقله قافل مثل الزمااال يعامل الكل مثل العبيد جوه ايده

-هاي هيه وكف الحرس بالباب خلي يمنعوا من دخول البيت واذا يريد يشوف ابنه اني اخذه بيدي  لبيته يشوفه

-روحي قنعي بعد الصار يروح منا  اذا اتحرك قبل لايعلگها اكص ايدي  استغفر الله ها بابا اسماعيل يوجعك شي

اسماعيل - لا مابيه شي

-يالله گوم واخذ مرتك روح لغرفتك  لاتطلع ولاتوصل للبيت الجبير لحد مايهدأ اخيك اي  شي تعتازه اطلبه بالمبايل

-اطلع وادخل مايگدر بحجي نص حجاية وهو موعنده بيت شكو ضال هنا ليش ماطردوووا

-وهذا الراح يصير راح اكسر ظهرة واخلي يتربى من جديد بس اتحمل هالايام  صح هو شغله وياي موياك  بس مانريد مشاكل ويا لحد مايولي

-بابا اذا مابطل يمد ايد عليه والله العظيم  اعوقله ابنه

ام هيذام - يبووو يبوو  حتى يجمعنا بغرفة وحده ويحرگنا بدون رحمه ابوس ايدك لاتحجي هيج والله اذا سمعك مايخلك صاحي

-لعد شمري ابنه بره حتى لايجي بعد هنا

-ولك يمه هذا اخيك ربيتوا سوا  ليش انتم هيج واحد كاره الثاني

-ماعندي اخ غير ازر هذا ابنج انتي حاله حال ابو حيوان

ابراهيم - كافيي بابا كم مرة كلت لاتتجاوز على عمك الله يرحمه وهيذام  راح امنع دخوله للبيت هاي هيه فضينه السالفة اخذ مرتك وروح لغرفتك  وانتي جيبي وحده اتنظف المكان

مسحت دموعها واجت  كمشتني  من ايدي جرتني للغرفة جر  تكول عبدة  بيدها  امشي وحس كلبي بين رجليه لااكدر احجي بعد الصار ولااگدر اكمل البديت بي ؛ استوني وعيت لوضعي  حتى دموعي ماترضه تنزل جسمي مثلج شعور صعب اوصفه

فتحتها دخلنا كالت سمعي لج راح اطلع ساعة وارجع اريد اشوف العلامة وداعت ابني اذا منعتي اطلع ضيم مصيبة الصار من عيونج

هزيت راسي لاا واني ارجف

-شنووو ولج شنو ماسمعتتت  بعد هالهوسة وابني راح يروح من ايدي جايه تكولين لااا  لاصدگ انتي عاهره و بت شارع

-موبت شاغع اني انتوا ضحكتوا عليه كلتوا بس تعيشين ويا موتكونين زوجه اله

-ليشش وانتي شنو حاسبة روحج حمدي ربج قبلنا بيج بهاي سمعتج المغسولة وصرتي مرت واحد كل البنات تحلم بي

-لوجنتوا مصدكين سمعتي موزينة مجان دخلتوني بيتكم ولازوجتوني لابنكم  لاتتهميني بشغفي واني اعتغفت باطل على على نفسي بس حتى  احافظ عليه

-سمعي لج اخاف حسبالج شفتي الهوسة استسبعتي  وداعت ولدي  مثل مارضيت انطي لابوج افلوس واشتريج حالج حال العبيد اخليج تتمنين الموت وماطايلته

-عقدي باطل وحتى لو كان صح اني ماصيغ زوجة وماوافقت بس لان اللواء گال تجين حتى تخدمي مو اكتغ

-ليش عيني معوزه خدم عندي الي براسج منو انتي واوسخ بيتي بيدج سمعي لج كلمتين مو اكثر يا تصيرين زوجته وهسه يا…

-يا تغجعوني للسجن وتعدموني والله تسون فضل

-ياسجن كل عقلج بعد ماتحمل المسؤوليه وغير اوراقج يردج شيليها من عقلج انتي هسه ميته بنظر الحكومة وباجر لوعگبة تطلع شهادة وفاتج ولهيج لازم تفقدين عقلج حتى نضمن سلامتنا ومايطلع السر

-يعني شنو

-يعني تصيرين حبابة وتسمعين الكلام يجيج زوجج تتقبلي وحتى تساعدي لان مالامس مرة قبل او بعد كم ساعة تصبحين بمستشفى الامراض العقلية كم صعقة كهرباء على علاج قوي ماتصور طويلين اكثر من اسبوع هاي من غير بدل بيت نظيف وعايشه بشرف بحضن زوجج تتنقلين بين احضان الممرضين ها شكلتي

صفنت بوجها واسمع اللواء صاح وينج فضيهااا يمعودة

-جايه  ياعينيي بس لحظة داشوفهااا اخاف هم تطلع عقلها مو تمام مثل القبلها كافي الفلوس الي اخذهن ابوها اقلها نتلاحگ من هسه ليش تعب ابني؛ كالتها وباوعتلي صفح وجهه مليان سم

همست بترجي دخيلج خالة

-استغفر الله ربي اشلون شغلة هاي واني روحي طالعة

-كلشي تغدي اسوي بس لاتخليني يمه ابوس ايدج حسبيني بنتج لاتظلميني واني كل ذنبي غدت احمي نفسي

-ياصاحب الصبر بنتي ليش حتى اضلمج وين اعرفج اني وليش خايفه هيج انتي بس سمعي الكلمة وشوفي اسماعيل اشلون يدللج ويغرگج بالفلوس

-مااغيد كلشي حتى اخدمكم بلاش غحمي ضعفي وتوسلي بيكم غلطت بساعة غضب مادغي  اشلون وافقت هيج واني جنت ناويه ماتزوج للموت

-ليش ماتتزوجين ولج اخاف عايبة يالمصخمممة حتى تكمممل يبوو يابراهيم منين جبتها

-وداعت امي  محد لامسني لابالحغام ولاحتى بالحلال

-كافي كافيي بطلي هالاسلوب مال التجدي لعبتي روحي  يله راح يدخل اسماعيل حمدي ربج على النعمة الوگعتي بيها الج نص ساعة مواكثر واله تعرفين شنو منتظرج

باوعتلها بترجي ونزلت دموعي

-اسماعييل وينك يوووم

بجيت بصوت دارت وجها دخل اسماعيل وجهه محتقن يباوعلي بقرف وغل راحت باسته من متنه  كالتله تتهنه يبعد امك دير بالك على نفسك لاتتعصب  موزين عليك الانفعال اتحملها  تره بعدها صغيره وخايفة 

-طلعي يله

-طالعة ومنتظرة البشارة  منك اريدك تثبك للكل قبل ابوك انت مابيك شي وماتعتاز بعد جلسات وحتى علاج

-قبل علاجي تعرفين شريد

-من عيوني اعتبره من هالساعة بعد مايفوت هنا ولاراح تشوف خلقته وهذا حقك اخذه ابوك حتى رتبته خسرها صفه لااهل ولامركز

-انطيني كلمة اتشمرين ابنه واني اعوضكم واحد مكانه

-وعد اشمره عليه وبعد حتى شوفته مااطلبها   بس كون صدگ تعوضني بطفل يملي البيت علينه ويسد الحلوگ

باوعلي بحقد وهز راسه اي باسته واشرتلي عالملابس خالتهن عالميز طلعت اندار سد الباب وراها

وگف ينزع بقميصه  شمرها واسمع انطبكت الباب البره

باوعتله اريد  اتبلعم مااگدر تقدم احس رجليه انشلن واني اشوف اشلون يفتح بنطلونه وجسمه الماضال بي شي صاحي مشوه من الخياط وحرگ

همست والله العظيم اكتلك واكتل نفسي بس تفكغ  تلمسني

مارد تفل عليه واسحب الحزام شمره

شهكت صار الحايط وراي اتلفت اريد مكان اروح اخلص وروحي ماكو

صار قريب مد ايده عليه دفعته بكل قوتي  وركضت مالحگت جان اسرع مني جرني من شعري شمرني عالجرباية

ردت اكوم اجاني الراجدي رجعني مكاني  وصار عليه من كثر الرعب حسيت هاي اخرتي؛  گمت اضرب واصرخ  اريد ابعده مااگدر ثگيل جسمه

كمش اديه ثبتني عصر وجهي ودنگ راد يبوسني بس قرب لامس شفتي   ماسيطرت اتقيأت على وجهه

تفل عليه وخر  يمسح بحلگه  باوعلي بغضب صگ على اسنونه وصاح بصوت جمدني مكاني

وكف يتلفت داير مدايره متخبل ماادري شيريد  بلحظه انگلب حيوان

ركض شال الحزام واجه بسرعته  اريد احجي لو الحگ اشرد ماكدرت بعدني استوني كمت  واجتني الضربة صلخت جلدي

بسرعة رفعت ادية احمي وجهي واحس الحزام اجاني بنص بظهري سواه نصين شهگت بوجع دنگ جر رجلي حتى يضرب براحته من همشت روحي  ودفرته بين رجليه عاط بصوت رج الغرفة  شمر الحزم وكعد بالكاع عاصر نفسه و يصيح يابووويه الحكنيييي

من كثر الخوف بعد مااعرف شسوي بدون وعي گمت طفرت الجرباية من الجهة الثانية فتحت الباب وركضت صار الباب الرئيسي جريتها انفتح بسرعة طلعت كملت طريقي من غير مااعرف وين رايحة

خلصت المشتمل وكفت اتلفت صارت كدامي حديقة جبيره ظلمة دخلت بيها اركض بكل سرعتي  ادور على باب البيت 

مو بيت صار شكبره اريد اركز منين الباب واسمع صوت صرخته وراي ماشفت گدامي غير  شجرة صغيرة منثورة بلا تفكير  دخلت  بيها لميت رجلية دنكت عضيت ايديه حيل ندم عالسويته بروحي

رفعت راسي للسما نزلت دموعي بتوسل غمضت عيوني واني اسمعه يصيح راح راح اموووت   وينج بت الكلبببب

طلعت الشهگه من گلبي سديت حلگي  باديه بسرعة اباوع للدرب الرجفة لازمتني حتى لساني عاجز عن الدعاء منتظره اشوكت يجي ؛ وقتها  مااعرف شنو مصيري 

فجأه صار هدوء بعد ماجان يصرخ توقعته  طلع من الشقة واجه يدورني لميت رجليه لحظني عيوني تترقب المكان مستعده لنهايتي

تعده اكثر من ساعة واي نفس ماكو هدوء فضيع    ماينسمع غير دكات كلبي  ورجفة جسمي الي بعد ماحس بي من البرد 

احس روحي بتهتت من گد الخوف والترقب واطرافي جمدت ؛ اخذت نفسي دنگت خليت راسي بحضني اريد دگات كلبي تستقر غمضت اردد لاتخافين راح تگدرين تنهزمين راح تخلصين نفسج

مرت دقايق حسيت روحي هدأت اخذت نفس حتى اگوم اشوف اشلون اگدر اطلع منا واسمع حركة بالحديقة عرفتهم اجوي حتى النبض توقف

رفعت راسي عالكيف واشوف جمرة جگارة ركزت اكثر الضابط هيذام  يفتر مدنگ على فونه

سديت حلگي اباوعله بخوف اخذ نفس من جكارته شال راسه نفخه باوعلي ابتسم ورد دنگ يراسل 

احس النفس صار صعب اشهگه عيني بي اريد ردت فعل منه ماكو؛  جسمي بعد ماسيطر عليه شفايفي ترجف جفوف واديه انشلن اريد احركهن مااگدر

اخذله دقايق غلق الفون خلاه  بجيبه اجه اتجاهي وصل يمي رجعت ليورا دنگ كمشني من حلگ تيشيرتي عتني منه حيل كومني

شهكت

رفع حاجبه وحجه بصوت هادء ليش تبجين

-والله اتندمت والله ماعغف اشلون سويت هيج بدون تفكيغ

-اتندمتي على شنو بس لااسماعيل ماعجبج  ؟؟

-غجعني للسجن ابوس ايدك شنو اتغيد غاح اسوي اي شي اطلبه من اعتغاف ماغاح اكول لااا حتى لوتعدمني راضيه بس طلعني من---

بعدني احجي صعد ايده خنگني حجه من بين اسنونه خشونه صوته وحدها عصرت روحي  وهو يگول سمعي لج وحگ الكفل زينب  اذا دره جنس مخلوق انو  حاولت اتحارش بيج  لو مجرد حاجي وياج كلمة مو خوش راسج قبل لسانج ينبتر

كمشت ايده باوعتله بتوسل

-شيلي اديييج  اريدج تختلين زين بحضن الدگلج صدر وجابج هنا وهو حتى ماحامي نفسه لان  راح اخليج تحلمين بالزنزانة الجنتي بيها

اشرت لا

-ركزي زين بالنغل الاخذتي شوفي  اشلون مشوه خلقته النكسه مثلها تماما راح اخلي حياتج

عصرت جف ايده  ضغط بالزايد باوعلي عيونه حمر نظرته ترعب  مليانه ندم غمضت

اسمعه ضحك بستهزاء وهمس فريت الدنيا كلها عثرات عبرتها ماخطت رجلي  ولعبت ويه عالم شوفتها تگص ارگاب  طلعت خدش مابيه  دخلت بمتاهات مايخلص منها السبع فريتها بخفه ايدي تاليتي اخسر رتبتي على ايد وحده مثلج وسسفة والله

نزلت دموعي  دفعني وكعت بالگاع لميت رجليه  وبجيت بصوت

-كومي ردي للنغل ماضل شي وتوصل هدية مباركتج

-كله بسببك  خليتني اعتغف على نفسي  ماتت اختي والبقيه ضاعننن

-وهيج انتقمتي ؟؟

-اااي  اخذت ثاري  بغتبتك

-لهنا خلصت ؟؟

-لا لان ضيعت نفسي ماعغف اشلون هيج سويت كد الوجع الي بداخلي تصغفت بدون لاحس سوي الي يغضي غضبك قابلة بس لاتخليني هنااا

-واني اريدج تكملين حياتج بحضن المسودن مثل ماشمرت رتبتي راح ازين شاربي اذا خليتج تعدين هذا الباب قبل لاشوف الموت بعيونج 

-ليششش اني مو حيوااانه بشغ  حالي حالكم ليش هيج دتعذبوني اني ماغلطت انتوا استعملتوني  لمصالحكم

-مصالح ؟؟ليش انتي  منو

-وحده مالها اي قيمة مومن حقها لاتعيش ولاتحلم حدها تكون تسليه بين اديكم تضل تحاغب لحد ماتنهي حياتها وتلحگ العافها بينكم وحدها

-لااا راح تحقيقن احلامج وهم تلحگي بس بطريقة گلش مريحة

همست قابلة  بكلشي تسوي بيه بس طلعني منا  ماعندي (غيغك)غيرك خلصني منهم

باوعلي بنظرة ماعرفت افسرها بس حسيت هواي اشياء بيها دنكت ماحجه دار وجهه  مشى  نزلت دموعي بيأس لميت رجليه ضميت راسي بجيت بعجز عرفت  البيت مطوق وكله كامرات ماراح اگدر اخلص نفسي انتهيت بلحظة غباء

حسيت بخنكة  عصرت نفسي اخاف اكح يسمعني احد  شلت راسي فركت صدري الدنيا بارده ثلج  ظلمة هندس اتلفت كلها شجر صوت جلاب جايه من ورا السياج واي اثر للباب ماكو  زاد خوفي اكثر

حشگت نفسي كاتمة النفس احرك ايدي على صدري بس اريد تروح الگحه ارجف بدون شعور

استوني اغمض واسمع حركة ضربة بسطال قريبة  شلت راسي لكيته جاي اتجاهي جكارته بيده  شكلة يخنگ عيونه دم عرفته صاير بركان من الحرگة من طريقه مشيته ونظراته المابيها اي رحمة  باوعلي خله الجكاره بحلگه  واشرلي گومي

زحفت ليورا خفت حتى احجي مو اتوسل ؛ اجه دنگ سحبني من زندي كومني دفعني گدامه بخفه ايده انشمرت مسافة اجيت اوگع كوه سيطرت عدلت وكفتي وصل يمي جرني وكمل مشيته يسحب بيه ورا لحد ماشفت باب المشتمل صارت بوجهي كمشت ايده  وشهكت وخر جگارته  ودفر الباب دفعني جوه

صار اسماعيل گدامي كاعد ويمه الحزام  شافني  جره وگام طبگه واجه ناحيتي فاتح عيونه على كبرهن

درت وجهي  لهيذام  بعد بره نزلت دموعي بترجي 
رد اخذ نفس من الجگاره  وشمرها دنگ داسها بحذائه

دفع الباب  دخل  وسد برجله جرني شمرني ورا  اباوع اسماعيل رجع ليورا همس شرجعك

رد بنبره من يمي خنست منها وهو يگله رجعت لخاطر اباركلك يبن عمي

-اطلع يله

-اطلع قبل لاانطيك هديتك لااا عيب  هالشي مااسويها ويه العدو مو ضلعي

-هيذام والله اخليك تندم

-واني جاي مخصوص اسمع هالكلمة

-ماسويتلك شي مشاكل بينك وبين ابوي اني مالي دخل بيها

-كاتلهااا ؟؟

-هيه حيوانه ماتمشي غير بالكتل خو انت تعرفها من ياقذاره جابها ابوي

مارد دنگ طبگ اردانه ؛  شمر اسماعيل الحزام بسرعة وگله ترا الحرس تارس المكان

-ليش شمرته شيله

-ماردت اضربها هيه جبرتني لان تمادت

-حلوو شيل الحزام

-ضربتني وانهزمت  ماخلتني المسها وهي مرتي بكيفي الي اسوي انت مالك حق تحجي

-كملت شيله وتعال 

-هيذام  اني اخوك

وصل يمه رفع راسه
- وانه اشهد كالها وجر راسه رگعه كله من قوت صوتها كلت اتفلش رد  بحركه  سريعه ضربه اقوى منها  كعده بمكانه 

قبل لايصرخ رگعه دفره جوه بطنه بكل قوته فتح عيونه على بألم وكتم النفس

دنگ شال الحزام وكف يلف بي على ايده  صارت عيني بأسماعيل  اشوف الشورت مالته بي نقط مي تنزل عالسريع ويتلوه بوجع صاگ على سنونه

لفه الحزام لفتين وجره حيل ضبه راح سحب كوشه وتقرب يمه  وهو بجه مثل الطفل

-رأأأال ديري وجهج 

-شغاح تسوي بي

-بت الزمااااال انداررري

رجعت ليورا غمضت بسرعة واني اشوفه اشلون  دفره مده ودنگ خله الكوشه بحلكه سحگ عليها وبلش بالضرب  صوت اللسعه عالجلد ويه صرخته المكتومه تقشعر البدن 

كلما يدفعه ويطلع صوته  يكتمها بدفره  بنفس المكان ويرد يسحگ على حلكه

جنت اسمع ماعنده رحمة بس استوني تأكدت واني اشوف اشلون يعذب بطريقة وحشية حتى الحيوان مايسويها ولاكأنما هذا بشر بيده يتلوه ماكو تعابير على وجهه غير الاجرام  ماتركه لمن  اختفى الصوت نهائيا 

وكف حرك وجهه بحذائه ماشاف اي رد فعل منه بس النفس يسحبه بصعوبة

كعدت يم الحايط لميت روحي اباوعله  فاتح عيونه وملابسه كلهن مي متدرر على نفسه

شهكت بخوف اندار باوعلي  فتح الحزام شمر  ودنگ جره من رجله   اخذه سحل للغرفة فتح الباب دخله صار هدوء  اريد اسمع صوت ماكو اقل من عشر دقايق وطلع يفتح برداناته اديه بيهن اثر  دم

اجه اتجاهي حتى النفس گطعته رجعت ليورا رفعت اديه بسرعة احمي روحي  عبرني طلع ركع الباب ورا رج البيت بي

حسيت بلعومي يبس  من الهبطة  اريد ارد النفس مااكدر فرگت صدري مااعرف شنو صارلي حسيت نهايتي دقايق مواكثر والدنيا ظلمت غوشت عيوني بعد ماادري شصار

…فراش ناعم شي ينغز بأيدي اصوت خفيفة تروح وتجي هدوء ودفو 

فتحت عيوني غرفة بيضة سيروم معلگ ؛انداريت للجهة الثانية مره  جبيرة كاعدة يمي مشيلة بشيلة بيضة باوعتلي ابتسمت وكالت الحمد الله على سلامتج اي هيج فتحي عيونج  خلينه انشوف هالجمال

-وين اني

-بغرفة القسمة  الكشره وليش يمه تسألين شنو  ماتدرين وين انتي

-لا والله نمت كعدت لكيت نفسي هنا وعاقديني لابنهم

-يمه والله كلبي حسني من تفتر على راسي تكول ملك الموت وكل شوية وتريد طلعني منا دگومي خلي افتهم شنو الصار منين جابوله ضحية هالمرة

نزلت دموعي بيأس

-لاتبجين گعدي فهميني شنو سالفتج قبل لاتجي الكوبره تدفن ابيضها وتگف عليه وطمطم السالفة

-دخيلج خلصيني منهم

-منين اخلصج من جحيم ربه عالگاع لو من الماعنده مخافة الله دعوفي البجي واحجيلي بسرعة منين انتي

-من السجن وزوجوني زواج باطل

-الله  لايوفقهم  ليش اهلج وين  اشلون رضوا  ينطوج لواحد مثل هذا  وانتي جنه فلگت كمر

-ماعندي اهل كلهم ضاعوا وبابا الي باعني الهم

-استغفر الله وهذا الحيوان منو سگطه وربطه مثل البهيمه

-واحد دخل كتله  ماعغفه

-مم ماتعغفي كلتي خوش حجي وهو نفسه هيج سوه بيج 

-لالا اسماعيل  السوه بيه هيج والله

-الله يكسر ايده ولو ماضال بي عظم صاحي حتى ادعي بس هم الله لايهني لاهو ولاالي يورط بنات العالم ويا

-خاله ابوس ايدج بس ساعديني اطلع منا

-لاتكولين خاله  اكره هالكلمة گولي عمه ومسحي دموعج واحجي عالكيف لخاطر اعرف قصتج شنو

مسحت عيوني انتجيت سندتني گعدت شافت جسمي شهكت ردت استغفرت واشرت احجي

بديت اسولفلها ودموعي تنزل من ساعة الحادث لهاي اللحظة اخذت نفس وغمضت عيونها بقهر كمشت ايدي كالت الله يكوم امج بالسلامة ويرد يلمجن بحضنها

-غاحن خواتي واني ضيعت نفسي

-حسبي الله بيهم على گد ظلمهم كافي لاتبجين يعمة ماطولني موجودة اعتبريني امج وهذا بيتج والي يوصل يمج ينفرك حلكه

-لو اعغف اكتل نفسي هم مااضل هنا

-منو يخليج اطلعين بعد الصار غير  دخلتي بيتهم وتفرجتي على حياتهم ومصايبهم الماتخلص

-يعني هاي هيه  فقدت خواتي وماما انتهت

-خواتج لاتخافين عليهن اعرف المن انخى يدورهن ماراح يردني  وامج هم تتعالج وانتي هنا

- اللواء ابراهيم ؟؟

-لانفسه الي شايل گلبه ومركب حجر اسود من حياته حالف  يدمر شكو واحد مرتاح  بس حتى يرضي عقله المريض

- مااعيش هنا غجعوني للسجن

-ياسجن يعمة  اذا تكولين سحبوا اوراقي غير معناتها بنظرهم صرتي ميته  اي غلطة لو واحد عرفج بيج بعدج عايشه وجنتي يم  ابراهيم يروح بيها

-واني وين من كل هذا انتوا ليش هيج مستضعفيني ونهيتوا حياتي بكلمة طلعت مني غلط

-حتى لو ماگايلة راح تجين ماطول خلج براسه ولاحسبالج انتي اول وحده يجيبوها لابنهم المسودن ربي ياخذ حق كل وحده دمروها بجبروتهم

-يعني لو تموت احقغ انواع الموت لو تقبل تكمل حياتك بذل وظلم

-وليش تكولين هيج شعرفج ماربج خله سبب جيتج حتى اشوفج واگدر اساعدج  بدل ماتنحبين فكري اشلون تصيرين ذكية وتستغلين نيتهم القذره لمصلحتج وتخلصين باقي خواتج من الضياع

-اشلون ؟؟؟

-دمسحي وجهج لان صدرج تعبان عندج صاير مرض مزمن على ساعة تختنكين وتموتين وخياتج  عينهن بيج اشوكت ترديلهن

مسحت دموعي مامفتهمة التحجي بس احسها حيتني من جديد بعد ما يأست  وخرت شعري عن عيوني  باوعتلي وابتسمت وهمست صغيره بعدج الله لايربحهم على هاي كلوبهم المحجرة

-تركيهم وكليلي اشلون اخلص اهلي فدوه احجي  انطيني امل والله دافكغ  انتحغ كوه لازمه نفسي 

-استغفري ربج تخلصين من مشكلة ترحين لعذاب اكبر لوكل حل بالانتحار ماضلت دنيا وكولي انتحرتي من توصلين لربج شتكليله يأست من رحمتك استعجلت ماصبرت للعوض

-الضاعوا اهلي وعائلة واحلام انهدت بثواني

-المات بيد الاحن من امه والباقين تگدرين ترديهم بس هدي خليني اعلمج شسوين قبل لاترد الحيه تاخذج لغير مكان تكتم نفسج

-هاي هيه بعد ماابجي والله ماابجي بس احجي ابوس ايدج

-سمعي بنتي عدل وخلي كلامي حلقة بأذنج انتي ماطول دخلتي بهذا البيت بعد طلعة منا ماكو لاتحاولين لان  مادخلوج هنا لو ماعرفين عنج كلشي ومتاكدين  ماعندج احد يسأل وراج حتى اذا عارضتيهم يدوسوج ويمشوج عدل غصباً عنج

-ضحكوا عليه گالوا زواج بس بالاسم

-اي وضغطوا عليج وخلوج توافقين ودخلوج هنا لان يدرون ابنهم ماتاخذه حتى الحيوانه واذا انتي سباعية عارضي حتى يخلوج تندمين على اليوم الصرتي بي

- گالي غاح اكون مسؤول على امج وخواتج وحتى بيت اشتريلهم

-دگومي وكليله هالحجي وسمعي الجواب هسه يگلج منو فارغ يدورهن كعدي يم رجلج وانسيهن هنه يدبرن روحن همه ماصدكوا يخلصون منهن حتى تتفرغين لخدمة اسماعيل

-ميخالف قابله كلشي يطلبوا اسوي بس…

-بدون بس لوتشعلين العشرة شمع محد راح يسمعلج ولايعتبروج غير خدامة حالج حال الخدم مالج كل حق غير اللگمة

-لعد اشلون  شسوي هسه

-اسماعيل

-شبي؟؟؟

-صح ابن اخوي مابي شي زين وعليل بس اخوث وعزيز اهله اي شي يطلبه ينفذوا  اله  بس يردون يشوفوا سعيد  وانتي عاد حليوه جنج لعابة تلمعين تكدرين تفرين عقله وتخلي يتعلق بيج  مايكدر يردلج طلب ودوم يضل خايف لاتعوفي

-لو اعغف اموت وامااسلمه نفسي

-واني ماكلت سلمي نفسج وحاليا امني شهر مايكدر يگوم بعد كتلت البارحة صيري ذكيه ونبهه استغلي ابنهم مثل مااستغلوا ضعفج وحاجتج لعبي  بعقله خبلي وخلي محبس بأصبعج  تربحين الصوبين هم ماياذيج وهم اتخلي يجبر اهله يأمنون خوتج  لان يابنتي البجي واللطم مايفيد بس تعمين على نفسج ماطول دخلتي هنا بالخفيه ماطلعين بس للكبر

-يعني انحكم عليه بالمؤبد وياه

-لعد شعبالج من رضيتي حتى لوجنتي موبوعيج تره يمه لعبتي لعبة موگدج وانتي طفلة مافاهمة من الحياة شي رحتي اتحديتي الخبل وخليتي يفقد منصبه وخليتي ابراهيم يخاطر ويلعب باوراقج حسبالج  راح ترتاحين هاي شمر رتبته وشنو يعني الف وشغلة يلكه بس انتي شسويتي بروحج

-ماما جانت دوم تكول انتي ثوله من دون خواتج وخايفة  يجي يوم وتضيعين نفسج بدون عقل وهاي صدك سويتها

-لاموثوله بس گلبج ابيض وحنين  والگلبه ابيض  ربي يوگفله المثله بس انتي صيري حبابه وخليج وراي صبري لاتعاندين حتى نگدر نشتغلهم صح

-خايفه مالحگ عليهن

-امج سهله  شغلتها هسه ادز واحد من الولد بدون لايحسون يضل يمها  وخواتج يومين لوثلاثه واجيبلج خبرهن

-ليش  دتساعديني؟؟

باوعت بوجهي لمعت عيونها مثل الي تذكرت شي دنكت مسحتهن واستغفرت عالكيف ردت شالت راسي گالت

-رئال بنتي مااريد مشاكل وسمعي الي اگوله الج وتنفذي بدون لاتسألين لاتخليني اتندم واعوفج اتخبطين بينهم وحدج

-لالاوالله شنو تكولي اسوي ابد ماغاح تسمعين صوتي ولا اسأل عن شي بس لاتعوفيني  فدوه اغوحلج

-ماعوفج يمه لاتخافين بس اندعيلي ربي يرد عقل عطيته وحمي الي ويبطل سوادين وظلم بالبشر

-الضابط هيذام؟؟

-مكسور الرگبه مشهور بس نجيب طاري السواد يلالي اسمه

-انتي عمته نفسج؟؟؟

باوعتلي وضحكت  دااترد  ودخلت ام هيذام كالت ها صحت وجه الفكر

- شرايده من البنيه تره حوبة المكسور جبيره يم الله

- رحمة لاتقللين من قيمتي كدام اليسوه والميسوه   وكومي يله ابراهيم  يكول خلي تجي تتريك ويانه

-روحي يمه الله يهديج  خلي تسبح البنيه اجيبها واجي

-يابنيه  صدگ تحجين  هاي تضل هنا احنه اندزلها اكلها  لو تروح بالمطبخ تتسمم يم الخدم

-استغفر الله ربي اشوكت يتوب علينه من هالعيشه روحي كلتلج اجي وراج

طلعت رگعت الباب باوعتلي المريه ضايجه كالت كومي سبحي بسرعة وخليني اگلج  شتسوين والله بلفظ الجلاله اذا عاندتي لو اعترضتي اعوفج بديها تسحل بيج كيعان وتنسين اهلج نهائيا

اشرت لااا وكمت بسرعة خايفة صدك تتركني واني حسيتها طوق النجاه ردتلي شكو امل  فقدته

رحت للحمام اركض حرگت گلبي على رند بكد لهفتي لحلم  ردت خواتي 

دخلت سديت الباب نزعت ملابسي علكتهن سبحت عالسريع  استوني اسد الدوش اندكت الباب سديته وفتحت الباب مدت ايدها كالت لبسي ذني

اخذتهن  سديت الباب اباوع تراك قذيفة صح مبين مستعمل بس كلش حلو و ملابس داخليه جديد

نشفت عالسريع لبستهن كوه سديت الاتراك مع العلم ارداناته ورجلين البجامه نازلات اكثر من الازم بس حاصر جسمي وبارزه  من كل الاكتار

طلعت خجلانة  لكيتها تفتر وتخابر اسمعها اتگلهم لاتردون خليكم ورا شوفوا شجاي يصخم …يمه والله كلبي نغزني عرفت سواد كلبه مايخلي ينعدل … ديروا بالكم لايشوفكم … ربي يحميكم ييمه الله وياكم

كالتها وسدت الفون باوعتلي ابتسمت كالت
ماشاء الله يله اكو وحده منتظرتج جوه ترتبج شوية

-بت كلبي ماتت استوها

-وحتى لايلحگنها الباقيات وانتي هم  مثل مااخذوا ابنهم للمستشفى  وترگوج مشموره لاحول ولاقوة  يگدرون ينهون امرج ويجيبون الاحلى واصغر منج بدون وجع كلب لاتشلعين كلبي ياامي

سكتت كامشتني العبره  بس حسيتها صدگ تحجي اجت جرتني للغرفة دخلنا واشوف  بنيه يم الميز واكفه ترتب بالغراض من عمري تقريبا  نازكه كلش  گالتها عمه ضي  شوفي شغلج

شالت راسها باوعتلي واتحسرت سحبت الكرسي اشرتلي گعدي

راحت يمها گعدت شالت المشط والمگص بلشت بشعري غمضت جمره بكلبي تلسع بس دموعي تنزل   خايفه اي تصرف اغلط بي ارد افقد وحده منهن بعد ماانطتني امل برجعتهن

اكثر من ساعة تشتغل واني مافاتحه عيوني عقلي كله يم رايه اشلون حالها هسه  لمن كالت ضي  كملت ترتيب اخليلها مكياج

فتحت عيوني اشرت لا

رحمة -  متعتاز حليوه بس ليش هيج كصرتي شعرها تره هاي مرت اسماعيل وهو يحب الشعر الطويل مو هيذام الخبل

-واني خبلة  مثل هيذام اكره الشعر الطويل وبعدين شوفيها طلعت تجنن بي فدوه جنها لعابه

-دروحي بسرعة وديري بالج احد يعرف انتي العدلتيها

-لاوحتى ملابس تركيها اني اطلع ويه بابا اجيبهن الها

-عفية بنتي كولي لابوج عمتي تكول اذا سألوك وين طالع كلهم اجيب شتلات للحديقة وانتي يله كومي فضيني

طلعت هيه واني مسحت دموعي وكمت وياها كمشت ايدي  ابتسمت واشرت يله

طلعنا فتحت الباب  كل عقلي ايام وتعدي لو اعرف هاي اول خطوة راح اخطيها نحوا الجحيم ماجان طاوعتها …

اجتني هوية جمدتني عصرت نفسي تركت ايدها واتجتفت  امشي وياها بعالم غريب مكان اغرب

حديقة جبيره كلها خضار مرتبه خلصناها دخلنا حديقه بعد اكبر خاصة بالبيت الجبير بيها كراج سيارات يمه غرفة واكفين يمها حرس

صار كدامنا ممر مشينا بي دخلنا للبيت موبيت تكول قلعة وصلنا لمكان مثل الصالة بي ميز طعام الكل ملموم بي

اللواء كاعد وبنيه كاعدة يمه عيونها ملونه من جهة الثانيه  ولد متوسط بالعمر و يمه وحده بيضة بعدها صغيره

على  الجهه الثانية الضابط ازر مدنگ على ماعونه ماشال راسه ويمه وحده سمره كلش بس ملامحها حلوه ؛

واكو طفل نفسه الي بالصورة كاعد وحده صافن عليه مستغربني

راحت عمتي  كعدت يم الطفل واني ضليت واكفه سلمت رد اللواء هلا بابا جان ضليتي مرتاحة بيتج وهمه يجيبون الاكل الج روحي واني جاي وراج عندي كلمتين وياج

ام هيذام - مو خلصنا من السالفة ياعيني هذا مابي شي الحمد الله وانتي موكلتلج لاتجين يله روحي للمطبخ هناك اكلي يم البنات

رحمة-. اني كلتلها يخويه تجي

ابراهيم - شنو هاي رحمة  من اشوكت احنه نگعد غربة بينه

-موغريبه صارت مرت اسماعيل  ليش كاعد وحده خطية وهو عريس مو ازر مرته يمه وبتك حسن  يمها  لعد هذا  شيختلف  مواخوهم  لو لان حالته هيج

-مابي شي واني ماافرق بينهم  كلهم ولدي بس اكو امور لازم تتعلمها  قبل لاتشاركنا المكان

-تتعلم هيه حبابة وذكية هسه حجيت وياها وفهمتها خلي تكعد يم زوجها وتركها وراي اني اعلمها كلشي ها شكلت

باوعت للواء اشر اي انداريت  لاسماعيل يبوعلي بقرف لام نفسه ايد خالها بين رجلي ومدنگ عليها  وايده الثانيه  مشكلة برگبته مكسورة وجهه كله ملصقات

رحت سحبت الكرسي كعدت يمه كوه لازمة نفسي امنيتي اسحب السلاح من ابراهيم واصفيهم كلهم   فززتني عمتي وهيه تكول  للبنيه ام عيون ملونه ها عمة هباوي اشوكت اجيتي

هبه - قبل شوية هم اشوف درع وهم ابارك لاخوي على الزوجة الي مادري اشكد عددها

-تره هيذام على ساعة يجي

ابراهيم- واجه شنو هاي بنتي غصباً عنه يسكت شطلعت هاي مايولي لبيته تره زادت اختنگنه

- ها يخوي جني اشوفك تريدني اروح

-ماگلت روحي هذا بيتج مثل ماهو بيتي بس يخويه كرهت دخلت البيت من گد مشاكله شذنب بزرتي هاي ساكنه عد امها وهذا مشمور بمشتمل بنهاية المزرعة وهاي الثالثه واكفه استعداد هيه ورجلها والله شنو الافندي ماعاجبه وجودهم

-انطي حقه يروح

-ياحق الف مرة كلتله انطيك حصتك بس قافل لو البيت كله لو ضال هيج فرعنة وابن ابو اليحجي ويا تره مليت وطلعت روحي لحدمن اضل متحمل هالوضع

-لعد طرده

-دخلي احصل الملفات اليمه اذا مادست على راسه وخليته عبره للجبناء اكون معتب سهلة ماضل شي

اخذت حسره وگالت يمه هباوي صبي جاي لاخيتج

هبه - منو هاي اخيتي شدعوه نزلت المحبة على كلبج فجأه

-ليش يعمة كارهه احد قبل حتى متفاجئة ومرت الاخوه  شفرقها عن الاخت

-اذا اضل على مزاج اسماعيل مالحگ اخاوي

-لاان شاء الله استقر هاي صارت مرته وام جهاله مستقبلا 

ام هيذام - من حلگج لباب السما ونذر عليه بيوم الي يبشروني بالحمل اعترف بيها كدام الاهل كلها

همه يحجون واني عيني صارات بالولد الصغير كاعد يباوع للطفل الي گدامه بكسرة اشلون اهله يوكلوا ويسولفون ويا

دنكت ذكرت رند من تباوع لبابا من بعيد نزلت دموعي شافتني العمه لبالها بسبب الحجي الدااسمعه متدري اكو صرخه مكتومه بكلبي اتمنى اطلعها

بسرعه غيرت السالفة وسألت هبه على السفر وصدگ دقايق وبدلوا الموضوع البنات بلشن يحجن بالماركات والولد  بالسفر  لمن قاطعهم عمي كال شرف الافندي صوتكم مااريد اسمع نفس

صارت صنته شلت راسي مسحت عيوني واشوف هيذام جاي لابس قمصلة سودة جلد وكاسكيته  يفر بمفتاحه

هيئته تخوف اكثر من اللبس العسكري  شكله مثل رجال المافيا ضخامته بارزه اضعاف طريقه نظراته  والشاش الملفوف على جف ايده يحسسنك ماكو امل للحياة بعد 

سحب الكرسي شمر المفتاح وگعد  بدون لايسلم

شال رجله خلاها عالكرسي الثاني طلع باكيت الجكايرة خله وحده بحلگه  دنگ يورثها واشر لحسن  كوم  

حسن  -وين اگوم؟؟

- دخل السيارة جوة

-الحرس موجودين ليش اني

-هيج عاجبني اشوف طولك كوووم لك

ابراهيم . هيذااام شبيييك

اخذ نفس نفخه وكال الك ثانيتين  واكوم اربطك بيها كدام مرتك

حسن - عمي  سمعت

قبل لايرد اللواء وخر رجله راد يكوم طفر حسن اخذ المفتاح وراح يدردم رد هو كعد باوع لاسماعيل رفع حاجبه وكله هاي شنو منو سو بيك هيج

اسماعيل - نتواجه

-شتتواجه وانت كاتلتك زعطوطة الغسل كوم رد الغرفتك ولاتطلع كدام ابني لخاطر لايتعلم الخنوثه  

ابراهيم -ترك اسماعيل وكول وين جنت

-بأرض الله الواسعة

-ياارض الله هاي منو مكسر الضابط ضرغام

-منو ضرغام بس ذكرني

-هيذذاام شرايد بالضبط  وين تريد توصل اشلون جارم بي هيج  لوميت بيدك

مارد انتجه خله الجگاره بحلگه وباوعله بستهزاء

-راد يرفع دعوه بحقك واني منعته

-عفية

-شنو لك عفيه انت شنو مالاگي واحد يكسر راسك

-شتكول انت

-خوش حجي وييين وليت بعدهاااا

-ادور على شغل

-وشناوي تشتغل

-ابيع جكاير هاله صبيلي جاي

اباوع لهاله عرفتها مرت ازر ضحكت وكالت تريد تبيع جكاير  حتى العالم كلها تكوم ادخن اجباري

ابراهيم - هاي انت تبيع جكاير تمام وانت ازر شنو فلمك ليش اليوم مارحت موعندك خفر

ازر-  رحت من الصبح خليت استقالتي على مكتبك 

-وانت شكووو تستقييل

-بيع الجكاير يعتاز جداحات خو مو اخلي اخوي محتار بسطيته

-اسمع لك هيذام  شغلة اسماعيل البارحة وسكتت عنها كلت ضايج على رتبته بس توصل لازر لا هناا يختلف الحجي

هيذام-  شنو الجديد

-لاتحجي ويااااي برررود شناااوي انت متكلييي احجي خلي افتهم وشغلك وياااي طلع اخوتك من راسسسك

-اخوت منو مصدگ روحك بزرتك الخوثان اتخاويني

-احترررم نفسسسك لاتخليني اتصرف تصرف اندمك بي ابتعد عن ولدي واذا على رتبتك موجود محد عرف بالصار

-زيد عالرتبة شاربي

-شقصدك لك

مارد دار وجهه باوعلي ورفع حاجبه :- اي رأل ان شاء الله مرتاحة هنا

دنكت بسرعة احس كلبي يريد يطلع

-ذكرتيني بهديتج امل كووومي لحگي الاخوث رجلج خلي يطلع المبارگه من جنطة السيارة

دابلع الاكل شفتها كامت شحط بلعومي  گحيت كوه بلعت اللگمه مديت ايدي اريد اشرب مي حتى الشحطه تروح مالحكت حسيت اختنكت رجعت كحيت  

صاحت العمة  صحة يمه شربي مي

دنكت مستمره كلما اريد اتنفس تزود حالتي للاسوء خلص الهواء بريتي عيوني كامت تصب دموع وصدري ضاگ  شافتني هيج كامت اجتني  تفرگ بظهري وتنفخ بوجهي

شي بصدري يمنع دخول الهوا حسيت رجعتلي الحاله بدت الدنيا تظلم

شمر هيذام  جكارته وكام  بسرعة سحبني اجيت بيده اني والكرسي كمش راسي رفعه ليفوگ كال سحبييي النفسس لاتگطعي

اشرت مااگدر وغمضت بهتانه

كومني ودفر الكرسي بعده خله ايده على بطني عصرها  وصار يضرب بظهري حيل وصاح شهكيييي النفسسس لج

لزمت  اديه حيل  اريد  احجي مااكدر نبتت اضافيري بي رخه جسمي ماحسيت غير  انسحبت لصدره انرفعت من خصري وضربه قويه بدايه بطني خلتني اشهگ الهوا بقوة

رفع راسي بأيده يتأكد رد النفس  باوعتله بتعب نفخ بقلة صبر ونزلني

كام اسماعيل جرني من بين اديه دفعني  وصاح  هاي مرتي يالنگس

دنگ حك خشمه اخذله ثواني وماشوف غير  شال الكرسي ولبسه براسه  خلاهم كلهم يطافرون

رفعه من ملابسه نيمه عالميز  لم جف ايده وبلش بوكسات بكل قوته  ركضوا ازر وابو واحد يجر  بهيذام  والثاني يجر بأسماعيل

بلمح البصر شالت الام بلم كزاز كسرته بمتنه تركه ورجع ليورا لازم متنه ينفت باوعلها  بغضب ضغط على سنونه  اندار دفر الميز بكل قوته گلبه عليهم  وراح

گعد ابراهيم لازم راسه والام حاضنه اسماعيل  تبجي

صاحت امل بابا شوفلنا حل ويا تره كرهنا روحنا

ابراهيم - ازر بابا اخذ اخوك لشقته والحگ هيذام حاول تهدي لايسويلنا بلوه

ازر - لاتخاف موغشيم ويضيع ملفات بيها كص اركاب لخاطر شغلة يگدر يفرها بخفة ايده

-شقصدددك لك

-مااقصد ورايح ورا هسه

-رئال ترحين ويه زوجج  ممنوع بعد طلعين ماا ريد اشوفج بين الاهل

اشرت اي

-تنفذين اوامر اسماعيل بالوحده اذا سمعت بيج معانده لو مسمعته كلمة اكسر فجج لو يدوس على راسج ماتعترضين

-حاضغ سيدي

-الطبيب الخاص  راح يجي يعلمج على علاجه من هاي الساعة صار مسؤليتج

-اي

هو يحجي واجه حسن  يمشي بسرعه كال شصاير

ابراهيم -  ماكو شي

-شنو ماكو شي هيذام  طلع ثاگب نار  جر المفتاح مني  گلتله  اشبيك لزمني من اخوانيگي لو مالحرس يلحكوني جان كتلني

-وينه هسه

-صعد سيارته شحطها وراح طاير

-ازر بابا استعجل رجع  اخوك واقفل الباب وراك  واللحگه لحد ما اشوف صرفه بهالمصيبة

اجه سند اسماعيل  اخذه گوه يسحل بي  اشرلي  روحي وراهم دنگت بدون صوت طلعت وراهم  وصلنا للبيت دخل ودخلت ورا وگفت يم الباب  راح فوته للغرفة دقايق  وطلع  اجه بسرعة طلع مفاتيح من جيبه فلت واحد سحب ايدي خله بي وباوعلي بضوجة كأنما يگلي استعدي للسويتي

دنگت وخرني عن وجهه  وطلع  قفل الباب؛ باوعت بلحظه حسيت بغربة وخوف نزلت دموعي عرفت تقرر مصيري

صوت ونت  اسماعيل جايه من الغرفة وصوت صرخات وجع رند وعيوني رايه بصدري احس روحي اختنكت خليت ايدي على كلبي ومشيت بخطوات ثگيلة صارن بوجهي بابين فتحت الاول مثل المكتب بي ميز وكراسي

تذكرت لمعة عيون غزوان وهو يوعدني يجي يوم ويسويلي مكتبة

غمضت وسديت الباب رحت فتحت الثانيه مبينه مال مساعده دخلت قفلتها وراي اسحل بروحي سحل كوه وصلت  للسرير  وخرت الديباج دخلت بي خليت راسي عالمخده

اخذت المخده خليتها بحضني حضنتها حيل اتخليها رند من جنت انيمها بحضني غمضت وشهكت بحرگة گلب واني احسب عدد ايام السعادة العاشتهن  وصوت ضحكتها بأذني

…مر كم يوم  محبوسين الكل لازم انذار من هيذام دخلهم بحالة نفسية  هدوءه جان مسببلهم قلق نفسي محد يحزر شناوي

اسماعيل على نومته يدخل كل يوم واحد يعقم الجروح و ساعده يروح للحمام مرات  يلگي مدرر جوا مااعرف بسبب الضرب لو  هو هيج اصلاً لان شكل المضمد طبيعي مو متفاجئ 

عمتي  جانت الوحيده تدخل للمشتمل غصباً عن الكل حتى سماعيل مايگدر  يمنعها تضل يمي شوية بالغرفة تسولف وتفتح اتصال ويه الولد اليم ماما صح مابيها نفس بس شوفتها يجدد الامل وينطيني طاقة اكمل واصبر علمودها

كلما اسألها على خواتي ترد بعدهم يدورون بس انتي ضلي هادءه اني هم اسوي مثل ماتريد حتى اسماعيل بده يتقبل  وجودي ويا كل عقلهم اتقبلت الامر مايدرون منتظره بس اسمع  خبر عن خواتي  بنفس الساعة انهزم 

حياتي صارت عبارة عن حجيم بين خوفي من الراح يسوي بيه هيذام وبين تفكيري يم خواتي الي مااعرفهن وينهن  متنفسي  الوحيد جان الشباج؛

اوكف بالساعات وره البردة افتحها شوية واباوعلهن وهنه گاعدات يسولفن اشوفهن اشلون عايشات احس صدگ احنا مالنا وجود بالدنيا بالاخص من اشوفهن يباوعلي ويضحكن على وضعي

ارد اسد البردة واكعد جوه الشباج اضل بس اتسنط لان احس بوحشه وحدي حتى السجن جان ارحم لان ماحس بهيج ذل

رغم عازليني عنهم  بس صرت اعرف هواي عن حياتهم بسبب هاي الكعده ؛ هيذام من الام والده شهيد وذوله جهال اللواء  بس ازر وامل اخوتهم المشتركين

زوجته بنت اللواء لحد الان معلگها لا هو الرادها ولاهو مطلكها عناد بأبوها  وهالشي زايد نسبة الكره بيهم من غير تصرفاته مدخلتهم بحالة ذعر  فوگ شكله الصارم اسلوبه وحشي

اشكد اسمعهم  يدعون عليه بس اول مايدخل البيت يصير صنته حتى الحرس يستعدون اني هم  صرت اول مااسمع سيارته من بعيد اركض ارد البردة وادخل للغرفة

واكفة المغرب يم الشباج امجتفه هدوء الكل داخل جوه بسبب البرد  اباوع للباب الرئيسي وبالي شارد  اذا طلعت منا اول مكان وين اروح فززني شي انشمر درت وجهي لكيت هيذام صح لابس عسكري بس اسود حتى بسطالة زايد شكله رعب بيده جكارته خفت من هيئته دااسد الشباج خله جكارته بحلگه واشر شيليها من راسج

همست شنو هيه

دنگ اجه ناحيتي مجرد سماع ضربه بسطاله بالگاع وحدها تكتم النفس مو شوفته وهو غاضب

وصل قريب لزمت الشباج حيل اريد اتبلعم مااكدر  باوعلي نفخ الدخان بوجهي ابتسم وحجه بصوت شبه الهمس اشلونها قضيتي اليوم

-تغه اخذت حقك

-وين وصلتلج؟؟

-ماغاح تلحگ توصلني

- هه وفري ذكائج  بدل العين خالج الف عين وهديتج ماناسيها اجلتها كم يوم اريدج تستقبلها وانتي بكامل حالتج الصحية

-كلتلك غجعني ماقبلت

-تذكرين شنو گلتلج رأل

-اي گلت غاح اجيبلج حقج

-وگلت لاتجربين حظج وياج لان ماراح ارحمج

-غلطت

-والغلط كلفتني تعب عمر

-جنت تستحق اكثغ

-نفس الكلمة الي سمعتها من واحد قبل لاعوقه بالحرگ واشمره بنفس المشتمل

-انت حارگه ؟؟

-مثل ماراح اخلي اكبر امنيه عندج طلعين منا وهو يشوف جثتي

- الله غاح يحاسبك  

-هاي بالذات تكوليها بيوم الي تشوفين هديتج

- ماغاح يهمني شي بعد

-اشلون جنت  محضرلج شغلة تسوه رتبتي اضعاف  بس  شفت اسماعيل اكبر عقوبة الج تستاهلي؛ حضنه يسوه حضن محمود

باوعتله بقهر نزلت دموعي

-ليش تبجين ؟؟

-طلبت من الله  يوجع گلبك ويحغمك من نومة الليل بس اشو وجع گلبي وحغمني من النوم

نفخ الدخان صفن بوجهي خذله كم ثانية رفع ايده راد يوخر شعري ومثل الي تذكر سد جفه وكال- البخاخ لاتستعملي هواي مرة وحده باليوم وقللي وكفاتج هنا الجو بارد

شمر جگارته داس عليها وراح  مسحت عيوني دنكت لكيت بخاخ بالگاع شلته نفس مال غزوان خليته على كلبي تكول رجعلي غزوان

كعدت بالگاع حضنت رجليه وشهكت من كلبي لمن حسيت بخنگه بسرعة فتحت البخاخ استعملته ارتاحيت اخذت نفس انتجيت مغمضة عيوني

مر وقت واني بالي بالهدية شنو ممكن تكون الي هيج يحجي بتشفي وملامحه مابيهن اي رحمه 

مسحت وجهي بخوف واسمع صوت البنات يسولفن داكوم اسد الشباج وسمعت مثل تگلها رئال نفسها

صار فضول شنو رئال نفسها گمت اتسحبت طلعت من الغرفة رحت للشباج القريب من الحديقة الجبيره الواكفات يمها صرت  وره البرده وخرتها شوية واشوف ام هيذام  وهالة مرت ازر تكلها وداعت ابني شفتهم

ام هيذام - والله گلبي حسني من اشوف هدوئه واكثر الوقت مخلصه بالبيت عرفت ورا مصيبة

-لعد اشلون عقلتيها هيذام يتنازل عن قضيته بهيج  سهولة

-يمه ماعونت احصل هيج وحده ثولة و بدون اهل كل عقله هذا يريد يردها للسجن

-والاكثر من هذا اسماعيل بده يتقبلها ماشفتي صار كم يوم بدون صوت خانس

-واني ماراح اخلي يسوي الي براسه

-شنو راح تسوين

-تعالي وراي واني اكلج

اخذتها وراحت خليت ايدي على كلبي ذني شنو يحجن فززني صوت اسماعيل وهو يصيح رئااااال

رديت البردة وطلعت لكيته واكف مدرر على نفسه اجيت اتقيء گال جيبيلي ملابس وتعالي
 
-روح هسه اگلهم  من الشباج حتى يصيحون المضمد يسبحك

-لاانتي سبحيني

-عمتي غحمه غاح تجي ادخل بساع اسبح بين ماشيل الفغاش قبل لا تشوفه

-جيبلي ملابس وقفلي غرفتي اذا عرف احد اشوه وجهج

هزيت راسي راح مستعجل  للحمام  فوك قذارته يتهدد الجبان؛  رحت للغرفة جريت الديباج شمرته بالغساله همزين مالايح الفرشه

طلعت ملابس دكيت الباب بس فتحه شمرتهن رجعت لغرفتي استوني ادخل حتى اقفلها  وانفتحت باب الشقة دخلت  ام هيذام عفت الغرفة  ورحت سلمت عليها  كالت وين اسماعيل

-بالحمام ديسبح

-اي بشري شصار ماصار لو مبين ماكو شي لسه

-بعد مغيض

-لامابي شي من يومين الطبيب كال اتحسنت حالته ويكدر يمارس حياته بشكل طبيعي بس كولي اني
مانعته سمعي اذا عرفت صدگ ماتخلي يقربلج اجيب الخدم يربطوج واخلي يكتلج لمن تتأدبين وهم ياخذ حقه غصبا على راسج

داارد وطلع اسماعيل  بطرك البجامه بيده الخاولي شافها  گال شعدج داخله هنا اني موكلت لحد يوصل لشقتي منكم

-اجيت اشوفك وهم اتأكد من سالفه زواجك

-ماطول ابنج عايش هنا ماراح اسوي الي براسكم

-بساعة التصير رئال مرتك اعتبر هيذام طلع لان خالها  براسه يريد يردها للسجن حتى يرد رتبته

-بكيفه؟؟

ا-ي بكيفه لان بس بالاسم مرتك كلمة وحده تتحلل ويرد يسحلها مثل قبل بس لو متأكد اكو شي بينكم اصلا مافكر لان يخاف شايله طفل منك

-واني راح اخلي موبس يخسر رتبته لا حتى بعد مايدخل للبيت

-يله شوفنا مراجلك وهذا تعبه صار بيدك

باوعتلهم  صافنة حتى مالحگت احجي مو افكر شسوي

عمتي ابتسمت وسدت الباب وهوضحك بخبث رجعت للخلف استوني دااتوسل واجه عتني بكل قوته من شعري سحلني سحل شمرني بالغرفة ودخل

قفلها الباب واندارلي رجعت ليورا سحب المفتاح  وباوعلي بغل…

***رايه***

اتصنمت مكاني فاتحة عيوني على كبرهن واني اشوف اشلون السجينة حازه  برگبتها

اشرلي براسه اتحركي ودخلها زايد گطع نفسها اقل سحبة تنتهي ؛ بسرعة رفعت اديه بدون اعتراض  لان اعرف اذا صرخت محد يلحگني بس هيه تروح مني

انداريت باوعتله مكان مهجور اظلم تگول مقبرة رديت باوعتله بترجي خزرني واشر يلااا وصعد راسها على صدره

اتحركت احس رجليه مشلولة عين بالبيت مرعوبه من شكله وعين برؤيا الي ترجف  كامشه ايده يثنين اديه ودموعها تنزل

وصلت للباب جان شبه مفتوح اباوع داخله هندس وكفت ماتجرأت اكمل

دفعني برجلي

همست البيت مسكون والله

مارد دفر  الباب  فتحها ورد دفعني حيل مالحگت  اشيل رجلي عثرت بالعتبه اجيت على وجهي احس خشمي تفلش دااعدل روحي واسمعه دخل يسحل برؤيا  سد الباب برجله

شلت راسي حتى ضوه الگمر اختفي اتلفت كلشي ماشوف انرعبت بالزايد وگفت بسرعة اتلمس اريد الزم رؤيا فجاه انفتح الضوه اباوع لايده فون بيها شمره بالگاع ورجع السجينة على ركبتها همس من بين سنونه  مثل ماانتي على وكفتج تندارين تجيبيلي ذاك الواير

-والله ماندري هذا بيتك لبالنا مهجور ماكو احد عايش بي 

-كلمة ثانية اطير راسها

-وداعت ماما ماشفنا شي ولاراح نگول اكو احد هنا بس خلينه نروح دخيلك خويه

-مبين  رايده انحرها وهاي ماكو اسهل منها
كالها وضغط على رگبتها صرخت لااا لااا اسوي التريده

-الواير يم رجليج  جيبي

هزيت راسي اي و اتلفت ادوره  داير مدايري  لكيته  مشمور يم بوري حديد ويمه جماغ  دنكت داشيله بحركة سريعة سحگ عالبوري  رفعت راسي خزرني   شلته همست  برجفه  هذا

-دنگي ربطي رجليها وجيبي  ذاك الجماغ

-والله ماتتحمل هاي اربطني مكانها  هيه ماتشوف ماراح تنهزم

رفع راسها على صدره باوع لعيونها ترمش ماصدگ قرب السجينه منهن ماغمضت ضلت ترمش طبيعي

دنگ يم اذنها همس قبل لاتفكرين تصرخين اعتبري راس صاحبتج طار

اشرت اي

-راح اتركج اي نفس اكمل العوق بيج

-مم

-عفيه وانتي شمري  الواير وجيبي الجماغ

دنكت شلت الجماغ مديت ايدي اباوعله  سحب ايده عالكيف من حلگها  مثبت راسها على صدره  بالسجينه

اخذ الجماغ بلحظه دفعها  وسحبني مكانها مالحگت حتى اصرخ لف الجماغ كتم نفسي شد حيل كمش اديه

دنگ اخذ الواير جتفني بي سحبني يم بوري عالحايط رايح لجهة تدفأه  شمرني  يمه ودنگ ربطني بي

كام  للباب قفله راح دخل جوه ثواني وطلع بيده واير كهرباء  تقرب يم رؤيا الي لامه رجليها ترجف بدون صوت ماتعرف شديصير

دنگ كمش رجليها دفرته وصرخت سحبها بسرعة لحضنه سد حلكها كامت ترفس عصرها دارت ايدها ضربته على وجهه لزمها حيل وصاح من بين اسنونه تبتييي لج

هزت راسها اي دفعها على الحايط لمت رجليها  مد ايده حست بيها  دفعتها رجعت ليورا حجت بتوسل  لاتلمسني وخر عني

-وكلام الله دفره وحده انيمج جوه الگاع ثبتي يووول

-مااتحرك مااتحرك  وخررر لاتلمسني وخررى عني

-صوتج بت الكلبببب

اشرت اي وسدت حلكها بديها دموعها تنزل عالسريع  باوعلها ساكت اخذله ثواني وحجه بصوت ناصي  منو دخلكم لهنا

همست محد اجينه وحدنا  

-تعرفين واين انتي ؟؟

-هاا اي بيت المسكون

-عفيه المسكون تعرفين معناتها شنو يعني اربطج واشمرج بالسرداب يحتفلن بيج الشياطين للصبح  اذا عرفت بيج اجذبين

-والله  مااجذب

-شاطره اكو احد وياجن بعد

-لااا

-شنو الخلاجن دخلن  لهيج مكان

-لان مهجور لبالنا محد بي

-وهذا اي مكان مهجور مابي احد دخلنا ؟؟

-لاا

-لعد شمرجن على قسمتي

-جنه دنطلع من المنطقة و واحد جان شارب عارضنا  دخلنا بهذا البيت بس ردنا يروح حتى نكمل طريقنا وروح اختي

-من يامصيبة اجيتن

-شنو يعني

-بيتكم وييييين

-مااندل

-ماتندلين خوش؛واشلون عرفتي هذا بيت المسكون

صفنت شويه وهمست سامعه صوتك

-مهزومات من اهلجن ؟؟

-خلينا نروح والله ماراح نگول اي شي راح نطلع من هاي المنطقة كلها ومنرجع ابد

راد يحجي ورن فونه كاللها اذا سمعت نفسج منج  اخلي طلقة براسك

اشرت اي

كام شال الفون رد بصوت ناصي هلا  بالضبع  وين صرت … لكيتوا المكان…ااااي واخيراً … اسباع خابر عساف  كله دسار يگول توكل  كملت الشغلة…

…لامااگدر اجي --  لكفتلي  حمامتين -- لسه مااعرفهن المن تابعات  -- هلا لاتتأخر

كالها وسد الفون رجعه عالشباج  سحب البرده  عدل  اللثام  اباوعله  عيونه حاده سود اكو اثر طبر نازل من حاجبه مبين مال ضربة

لابس قمصلة سودة وتيشيرت وبنطلون هم سود جفوف جلد نص طالع اصابيعة منهن

نزع قمصلته علكها عالشباج طلع مسدس من ظهره شلع المخزن سحب اقسام ضرب بالخالي ورد شكل المخزن خلاه عالجام اندار باوع لرؤيا الي لامه رجليها ترجف بخوف

شال الفون راسل واحد ضل ثواني يكتب ورجعه مكانه    

راح يم رؤيا دنگ كعد نص كعده  رجعت ليورا  شال ايده حركها كدام وجهه ماشاف ردت فعل بس  شهكت  لان حست بي قريب   كاللها وين اهلجن

-ماادري

-شنو هو الماادري  شمسويات  ونهزمتن هيج

-كلشي ماامسوين والله خليني نطلع منا الله يخليك

-تردين ترحين حلو سمعي لج بالله العظم اذا ماحجيتي لو كلتي سالفتجن شنهو اربطج بگصيبتج واصلبج ويه الجثث الجوه احجيييي

- شنو اگول

-منين اجيتن

-بيتنا نفس المنطقة لونه بابه ابيض

-ابيض؟

-والله مداجذب  احنه بنات ابو رايه روح اسئله  هسه تلكي ديدور علينه

صگ على سنونه كال  واكيد اول مصيبه تجي براسه  هنا 

-راح تموتنا 

-منين طلعتن خرب بروح ابوجن

سكتت وهو  خله اديه وره راسه مثل اليفكر قاطعته وهيه تگله انت نفسك  اللفو التركض وراك الشرطه ؟؟

-كملتتتت

كالها وكام دفر الگاع حشكت روحها بالحايط 
راح فتح الشباج و شال  الفون دنگ يراسل ثواني ورن فونه رد حي الله يخوي

اجه صوت واحد عالي  مبين صارم كله حى الله ابو الليل  شصاير ليش داز مسج بهيج وقت

دسار -دزيتلك الامانه

-وصلت خبروني الولد عاشت ايدك

-ديربالكم عليه لايفلت حاول اتعوقه وبعدين اشتغله على كيفك

-طگوا رجلي وهو بالطريق

-عفيه شغلة ثانيه دزلي كم واحد ياخذون الغراض قبل الفجر لان المكان احتركت ورقته

-وسفه ياهو لزمك ولك

-افاا اني انلزم لامارضيتها منك

-لعدد شصار دسااار احجييي

-لكفتلي ثنين داخل البيت مهزومات من اهلهن

-كتلتهن

-كتلهن ميفيد  لان المكان انكشف وصار مو أمن اي دقيقة يچفتونا اهلهن لويحاصرونه الشرطة حضرلي مكان باسرع وقت كون اطلع منا

-ابشر اعتبره المكان جاهز بس دير بالك ينهزمن قبل لاتطلع   دسار  اذا رحت بيها محد يخلصك هالمرة حتى اثر مانحصلك لان حادين سنونهم عليك

-ادبر روحي لاتخاف بس دزلي مخازن رصاص  بيد الضبع سلاحي فرغ  وذني سهلة اعتبر شغلتهن اندثرت

هو يحجي واني غمضت نزلت دموعي على ماما عرفت انتهى امرنا  اشلون بيها من تصحى وتعرف كلنا رحنا فد روحه منها

بجيت بيأس صارت گدامي لرؤيا حاضنه رجليها ودموعها تنزل بكتمه وهاي الاخيره هم راح تروح بدون ذنب وهي كل امنيتها يرد نظرها بس حتى  تشوف شكلنا

فززني صوت جاي من داخل البيت  مثل شي ركض دار وجهه باوع بعدم اهتمام ورد يحجي

ثواني ورجع الصوت اقوى ويا شخطة تاخذ الروح  اباوعله ولا تكول سمع على وضعه مستمر يتفقون برموز ماافتهمها

سلم سد الشباج  شمر  سلاحه يم الباب  وكعد طلع باكيت جگاير من جيبه اخذ وحده رفع شويه من اللثام بين اثر وشم بركبته دنگ ورثها سحب نفس ونفخه

عينه صارت برؤيا انتجه عالباب مد رجله وعكس الثانيه رد سحب نفس وركز اكثر بوجها خفت عليها من نظرته

عاجز كلشي اسوي ماكو بلساني غير الدعاء  وهو مستمر يدخن وعينه بعيونها الي صارن مثل الكزاز لان تبجي وخدودها وشفافها حمر من البرد

اكثر من ساعة حتى روح ماضلت عندي لاهو الكاتلنا ومرتاحين ولاهو العاتقنا

ندفرت الباب گام فتحها دخل واحد ملثم بشماغ احمر بيده علاكه گله الطريق متراقب

-خررررب كلش موقتهاااا

-زلم تارسه المكان  مانگدر نتحرك انت الخابرت عساف

-اي لخاطر يدبرلنا مكان ماعدنا مجال كون قبل الفجر نطلع وانت شسويت

-صورتلك المكان مثل ماطلبت وخابرت الولد يراقبوا

-جيب التلفون  وشوف المصيبة الكملت النقص مستقبلنا  المشرق

انطاه العلاكة وتلفون نزل  اللثام عن عيونه  شويه
باوعلي عگد حاجبه ورد باوع لرؤيا كله متأكد محد شامرهن علينه

-الضبعات منهزمات من اهلهن

- اشلون نخلص منهن

-مالك شغل بيهن شغلتهن يمي  بس  امنلي المكان للصبح لخاطر اطلع الاغراض قبل لايجفتونا اهلهن

-تامر يالضلع اعتبره تأمن بس عبي سلاحك بين ماافكرلك بشغلة تضيع اثرهن

-كلتلك شغلتهن يميييي ضبع لاتخليني ادوس حلگك واترسه رصاص

-ماحجيت شي يابه اعصابك

-اطلع لاترد قبل لاتتأكد من الوضع اي غلطة تروح روسنااا

اشر اي الولد طلع وهو راح گعد يم الحايط يطلع من العلاگة طلق ويخلي بالمخزن مال السلاح

اكثر من ربع ساعة وهو مستمر يعبي بالمخازن ؛ من كثر الخوف نسيت كل مصيبة على كلبي فكري وخوفي كله على رؤيا  لايوكف كلبها گد ماترجف

دخل الولد رفع راسه اشر هاا

-ماكو احد بس واحد واگف عالشارع واحد لاخ هو ومره راحوا يركضون طلعوا المنطقة من ربع ساعة وماردوا

-سد الباب وتعال اترس هذا السلاح لخاطر تصعد عالسطح

-بس خلي يتاخر الوقت اكثر حتى اطلع بوجهي على عساف اتأكد من الموعد لان الموبايل اخاف متراقب

مارد دنگ يكمل بشغله و الولد سد الباب نزع قمصلته  وراح گعد يمه طلع سلاحه شلع المخزن خلاه بصفه وصار يعزل بالطلق باوعله دسار كله شتسوي ولك

-نقسم قسمة حق سلاحك يشفط محافطتي بكبرها  ومايشبع

-اكل تبن اترك البيدك وين الوصيتك عليهن جبيتهن

-اي.- كالها وطلع شي من جيب القمصله مثل شيشة الدوه خلاه بصفه اشر على رؤيا

-امأمنه ماتشوف

-حلو شغلتها سهلة ضلت هاي اشلون تكتمها

-هاي الخرزة الماتشوف اذكى وانبه من ذيج الف مره بكلمة وحده طلعك من بين جيش وتلف على رگبتك المشنقة

-اشتعل ابوهن طلع لفات الكص  خلي اتزقنب قبل لاروح

خله السلاح بصفه  فتح الحلاگه طلع لفه  انطاه وطلع وحده فتح بطنها

اباوعله يطلع الطماطة ويخليها بصفه مبين مايحبها  كمل بلش بالبصل اخذله شويه عكد حاجبه ورفع راسه باوع لضبع

اشرله ضبع  شكو

-متأكد لفه گص هاي

-شتشوف انت

-كلشي اشوف  بس گص ماكو

-من تشتري نعال ابو الاصبع ينطوك ويا اصبع لو بس نعال

-الله يطيح حضك وحظ السألك شيل علاگتك وگوم مناااا

-لااكو غيرها طلع وهاي انطيها للخرزه ماتدري

-يالجحش عمية مو طرمه كوم لابعلي اجرب السلاح براسك

-والله لويخيروني اصير ناگه بالحبشة ولاهاي  صحبتك الخره صدگ باجر اطلع للصحراء

-ابن الكلب  الضب مايفتر بالصحراء  گدك  ماتستقر رحمة لدينك

-متفق ويه واحد نروح نصور البضاعة  حتى يشوفهه عساف اذا زينة وعجبنا سعرها ناخذها بس وعلي احس اكو غدر بالسالفة

- افا واني اخوك  گبل لايفكر اطبر راسه حاله حال الانجاس باجر انصبح يمه

-اي والله روح انت واني اضل هنا منتظرك

-ومن تتفل بوجهه يگلولك بدون اخلاق

- ملثم ماتوصل التفلة

-گوم ضبع

-يله رايح بس بروح ابوك لاتكتلهن كافي الدم الي برگابنا

-اتوكل

كام لبس قمصلته عدل الجماغ وطلع اسمع هبده طفر الحايط وهذا رد لشغله حتى مااكل  خلاهن على جهه

كام قفل الباب رجع للدوا  شاله فتحته خله داخل وصله وراح يم رؤيا كعد نص باوعلها هادء وضعه خلاها تأمن وبحركة سريعة  كمش وجها اخذه لحضنه وكتم نفسها بالقماش

هيه تضرب وترفس واني اصرخ ميطلع صوتي دقايق وهدأت وخر ايده نزل راسها بالگاع عالكيف
اباوعلها حتى الدمعه اختفت من عيني لبالي ماتت عيني صارت بطنها اباوعلها بترجي واتوسل بيها تتحرك

كطعت حتى النفس  حسيت روحي بدت تطلع عصرت نفسي واشوفها اتحركت شهكت بوجع مامصدكه بعدها عايشة 

كام جاب قمصلته شمرها عليها رد مكانه تمدد  خله ايده جوه راسه وايده الثانيه كمش سلاحه غمض

حسيت ضغطي انخفض من الهبطة انتجيت عالحايط اتنفس بصعوبة من كثر الخوف والصدمات  حتى مانتبهت شنو المكان الگاعدين بي

اباوع  غرفة صغيرة بنهايتها باب يودي للداخل حيطانها  كلها شخوط سود وكتابات مااعرف شنو حروف مبعثره وطبع اجفوف ادين  مال طفل

انداريت من الجهه الثانيه اكو فتحه بالحايط ظلمة كلش داير مدايرها اسود  مبين دخان حرك مثل السرداب لان بدايه درج  شكله مرعب  لميت رجليه لحضني

رجعت عيوني بي اشلون نايم  متونه عراض وجسمه ضخم  جف ايده عبارة عن وشم جمجمة ودم  مبين من هيئته مجرم متمرس

مسحت عيوني لميت رجلية وخليت راسي عليهن  مرت الساعات من عمري ثانيه ماغمضت عيوني
احسب للصبح بالدقايق مااعرف شمنتظرنا كل شويه اتخيل شي ؛ اتندمت ندم عمري اشلون طلعت من البيت

الدنيا ظلمة وهدوء يحبس الانفاس اصوات طرب شبه مسموعة جايه من بره صافنة على رؤيا احفظ ملامحها تگول اريد اودعها  امنيتي اكوم اخذها لحضني واشمها بكد حسرتي على الراحن

فززني صوت رنه فونه گعد شاله باوع بي ورد فرگ وجهه وكام اجه ناحيتي رجعت ليور وصل يمي حشگت روحي دنگ جرني اتأكد من اديه مربوطه رجع دفعني و كال شوفي لج طلقة ماتكلفيني بثواني انهيج  بس ماعندي شي وياج مكان احترگ ويامسهل تغيره

سكتت

-ماطول ربج مدد بعمرج حافظي عليه اي حركة مو  بمصلحتج العالم توها طالعة وصايرين زمايل من الشرب بس يحسون اكو صوت ترحين بيها

اشرت لا ماطلع صوت

-الخرزة لباجر ماتصحى يعني فريسه سهله بس مو اسهل منج وانتي مربوطة وحاضرة الهم اكدر اسطرج وياها بس اريدج تراقبين المكان لخاطر لاتسرح  وتروح بيها البيت مهدوم من جوه

هزيت راسي

-عفيه اگطعي النفس والتفكير  وعيونج على اختج  افضلج؛ ماتأخر كم شغلة  اصفيها وارد احررجن

اشرت اي

دكدگ على خدي وكام راح يم رؤيا نايمة بعمق دنگ راد ياخذ القمصلة  وتراجع  عدلها على متنها وشال جفوفه وكف لبسهن  ورد اخذ سلاحه خلاه بظهره راح لجهة الشباج سده ورد البرده

شال بقية الرصاص والاغراض  دخلهن داخل البيت مااعرف وين دقايق ورد اجه اخذ فونه وطلع  قفل الباب ورا

باوع صارت هندس اسمع طفرته بره البيت عيني راحت  للباب  الداخليه بسرعة حسيت مثل الشي خطف احس كلبي طلع من مكانه همست بسم الله الرحمن الرحيم

اني اسمي واسمع صوت شخطة من جوه غمضت عيوني من الخوف نسيت ايه الكرسي اشلون تنقرا ضليت اردد بأسم الله بأسم الله شويه واختفى الصوت 

فتحت عيوني كلشي ماشوف درت راسي اباوع لاديه مشدودات حيل جريتهن ضاگ على اديه اكثر

كمت انداريت خليت راسي بالحايط  ثبت اللثام ونترته بقوة ليجوه  ماحس غير انشخط وجهي على طوله حسيت روحي شاطت

غمضت حيل اخذت نفس وفتحت عيوني رجعت كررت الحالة نفسي الشي 

باوعت لرؤيا ماشوفها عدل گمت اضرب بالگاع  حيل بس اريدها تصحى ماكو

رفست  ونيت نفس الشي  اتلمست من وراي البوري ضربته حيل  صار صوت عالي   اتسنط مامنها نفس  رجعت ضربته اقوى هم ماكو ضليت اضرب بي لمن بهتت  اخذت نفس بعجز وگعدت  لاحول ولاقوه مر الوقت الشمس بدت تطلع وهيه على وضعها

عيني بيها  اشلون نايمه بتعب تذكرت رئال من اكعدها هيج وكت حتى نطلع وتگعد رند على صوتنا تجينا ركض تضحك تحضنه  بجت بصوت

خليت راسي بحضني بجيت بصوت اتمنى اكتم النفس واخلص

سمعت صوتها تهمس رايه

شلت راسي بسرعة  باوعتلها لكتها تفرگ براسها ونيت بصوت ردت غمضت اخذت ثواني وگالت  رايه راسي راح ينفجر

صحت بكتمه وكمت ضرب برجلي حيل اريدها تنتبه

كعدت صافنه واني مستمره  اصرخ  واضرب بالبوري حيل اتلفتت داير مدايرها تتحسس وجوده 

حركت اضافيري عالبوري صار يطلع  صوت

همست منو هناا

رفست حيل ونيت مثل العرفت ماكو احد وخرت القمصلة اتلمست واجت عالصوت تزحف عالسريع  وصلتلي  كعدت كمشتني تتلمس راسي جرت الجماغ من حلكي اخذت نفس براحه حضنتني ونزلت دموعها

-لاتبجين راح اخلصج

ماردت شهكت حيل

-لاتبجين يروحي والله راح نطلع منا

-ضيعتكم كلكم

- مو ذنبج هاي حوبة الي سواه ابوج بنات العالم  راح تضل تلاحگنا عمرنا كله

-ماضل عندي بس انتي خايفة لايكتلوج قبلي والله ماراح اكدر احمل وجع فكدج  

-ماراح يكلوني ولاراح اخيلهم يكتلوج بس فتحيني اديه بسررعة

-ماراح يتركونه نطلع البيت معبه اسلحة وجثث

-لالااا نطلع ونروح منااا بس كومي فتحي الواير بسنونج بسرررعه  قبل لايرجع   

-مسحت دموعها وهمست وين شادهن

-بالبوري وراي رؤيااا استعجلي فدوه اروحلج

-بس لاتتحركين حتى اعرف اتلمس الربط منين

-اوكفي ماراح تگدرين رابطهن حيل شوفي  اكو شيشه دوه  كدامي روحي جيبيها لان ماينفتح بدون شي حاد

-ياجهة

-وين جنتي نايمة هناك يم راسج استعجلي  ماضل وقت العالم راح تطلع بعد منكدر ننهزم

راحت تزحف  تتلمس واني اكلها منين تتجه لمن وصلت كمشتها جابتها ورجعت يمي كالت شسوي هسه

-كسريها بس قبل لاتكسريها  سدي خشمج هذا مخدر

-تمام كتمي نفسج

كالتها سدت خشمها طگتها بلكاع  وصاحت اااخ   اباوع لايدها نجرحت والدم كام ينزل بسرعة عصرت نفسها

اخذت نفس مسحت ايدها بملابسها وردت تتلمس عالكيف استوها اتشيل الكزازه والباب اندكت حيل وصوت بابا يكول فتحن البااااب ----

عذروني على الاخطاء الاملائية مالحگت اصحح بسبب طول البارت ❤️