تحميل رواية «شيء من رصيف الدم» PDF

شيء من رصيف الدم

بقلمي: leo Alfatlawi

بارت الثامن والعشرون

بارتين سوة

***رؤيا***

رفعت راسي  ساجدة هلهلت وهو خله اصابيعه بلحگه گام يصفر

طلعت البنات يسألون شكو رجعت ليورا اباوع لشفايفه بلحظة جسمي ثلج منتظرة يجذب الخبر لميت روحي عيوني عليه يضحك بفرح بعده ماراد ومانسمع غير سيارة الشرطة  ترسن المنطقة وصوت الباب تندفرت بقوة

درت وجهي على صرخة ساجدة تصيح كلجنن صعدن فوووگ

عرفتها مداهمة اباوع صارت خبصة  الي تركض  محتارة اتلم البنات الصغار والي تصرخ راح يدخلوون

ناس دخلت بناس طفوا الاضوية  الكل يركض وصوت الحرس يصرخون طوقوا المكان 

السجينة بعدها بيدي رفعت راسي ماصار گدامي غير الطابق الثاني صعدت اركض بكل حيلي حتى مانتبهت منو صعدت وياي  بسبب الهوسة والصراخ فكري كله يم الشرطة اذا لگفوني اضيع بسبب قضية القتل من غير الادمان  وبيت دعارة

كملت الدرج شفتهن يدخلن للغرف اجه حجي دسار براسي من ينبه ضبع اشلون يفلت اذا حصروهم  تركتهن كملت ركضتي  صعدت للسطح؛ الدنيا ظلمة   وگفت اتلفت الحياطين عالية وماعندي وقت اشوف ورا بيت عرصة غميقة لواگدر اطفر

اباوع المكان خالي حتى ماكو شي انضم بي

درت وجهي محتارة صارت  البيتونة گدامي  ركضتلها اتشلبيت عالحايط استوني صعدتها واسمع صوت رجليهم عالدرج يتراكضون شمرت نفسي على وجهي انبطحت وفتحت اديه مغمضة كاتمة حتى النفس 

اسمع رگضتهم عالسطح واصواتهم مخبوصين غمضت حيل نزلت دموعي لادسار مايموت گال اكو تاريخ نكتبه سوة

لميت جف ايدي وهمست وعدتني  هاي ثاني مرة ياللفو  تغدر بيه وتخليني بنص الطريق وحدي

مر شريطة من اخذ الجكارة من ايدي متفاجى وبعدين ضحك عضيت شفتي حيل من القهر صرخت بكتمة شكت گلبي

واسمع واحد صاح سيدي هذا الجهاز الي وصلت منه الرسالة والسوار

- حلو وهيه لگيتوهااا

- ماكو نفضنا نفض لاهيه ولاساجدة ذني لكيناهن يم وحدة من البنات تكول اخذوهن منا اثنينهن من زماان   

-منييين طلعوهن المنطقة كلها متراقبة

- مااعرف سيدي الظاهر مغيرين مكانهن قبل لاتوصلنا الاخبارية

-الضابط عرف بالسالفة

-لا انطانا امر الاقتحام وطلع هو والحرس للمقر الرئيسي راح يحصروهم مناك

- نزلوا بسرعة سحلوهم كلهم  للمركز بين مااخابره حتى نشوف التعليمات الجديدة

- تمام سيدي كالها ونزل بسرعة؛ اخذله ثواني الضابط الواگف يخابر ولحگه يركض

غمضت بدون حركة احاول اسيطر على رجفتي حتى الدموع نشفت بعيوني اكثر من ساعة وهمه على نفس الهوسة مطوقين المنطقة

الساعات تمر واني على وضعي تكول جثة بطرگ النفس يصعد وينزل بهدوء ؛ كلماتهم تردد براسي السوار والجهاز موجود وهيه لااا ونخابر الضابط  يعني الرسالة واصله وجاين عالموقع

دسار وين معقولة موته خطة؟؟

لادسار مايسويها يضحي بيه كل هالاسابيع حتى مايلزموا من خلالي 

غمضت راسي بده يشوش وصوت السيارات مستمرة احس روحي بدت تضيگ مااكدر حتى انگلب لحد مااسمع هدأت المنطقة واني ماصدكت انكلبت  بسرعة اخذت نفس كلمات انتجيت ردت اگوم وتذكرت دسار من يگول مايخلون المنطقة اذا مايزرعون كم شخص لخاطر يلكفون شكو واحد يتردد عالبيت

رجعت انكلبت على بطني سحفت لنهاية البيتونة مديت راسي ماكو هادئة رفعت نفسي شوية اباوع داير مدايري ثلث جهات مهجورة والرابعة سطح شبه واگع

كمت بسرعة طفرت البيتونه ركضت اتشلبيت الحايط ماگدرت رجعت ليورا استعديت وجيت بكل سرعتي لزمت نهاية الطابوگه اتشلبيت صعدت الحايط طفرت عالسطح  الثاني وگفت اباوع المكان على كبره نفايات وطابوگ  واكو جزء من السگف خاسف طالع الحديد 

مشيت لمكان الخسف  مديت راسي كلشي مامبين مكان ظلمة وخنسة كلش درت وجهي لجهة باب الدرج الينزل للبيت حسيت كلبي عصرني من ذكرت كلام البنات على بيوت اليبيعون اعضاء

ماگدرت اجازف رحت للحايط رفعت رجليه اباوع للبيت طارمة حتى ضوة مابيها شكلها مرعب لو اصرخ لباجر محد يخلصني

اخذت نفس حتى لوخلصت نفسي من البيت هسه اشلون اطلع من المنطقة

سمعت طكطكة اجت من داخل البيت جمدت مكاني من كثر الخوف طلعت السجينة من ظهري وكعدت مكاني لميت رجليه عيوني تتجول داير مدايري؛  كلشي انمحه من راسي عقلي ركز بس على تجار الاعضاء

رجفة جسمي اريد اسيطر عليها من الخوف مااگدر رجع صوت الطكطكة نزلت دموعي بخوف همست ماما اندعيلي

عصرت رجليه بحضني حيل ولزمت السجينة بقوة  احس لساني صار مر وطرافي بردت اردد بدون شعور يارب خلصني يارب خلصني …

موساعات مرت اسوء لحظات ممكن تمر عالانسان الموت اهون منها اضعاف شفايفي تهتز بدون وعي فاقدة شكو احساس عيوني تتنقل من باب السطح للسما  لحد ماسمعته گال اللهُ اكبر شهكت النفس بعجز وغمضت خليت رسي بحضني اقل الساعة واسمع صارت حركة بالمنطقة

شلت راسي همست الحمدالله مسحت وجهي وگمت رجعت دنكت داخل المكان المخسوف شبه ضوة داخله عرفته الطگطگة تابعة لحيوانات

خليت ايدي على گلبي رؤيا ماعندج غير هالطريقة اذا طلع النهار راح يلگفوج

لالا مااگدر

غمضت بين اشجع بنفسي وبين خايفة مثل الطاقة اجتني مااعرف اشلون بدون تفكير شمرت نفسي  داخل المكان وگعت على  رجلي احس روحي شاطت دنگت اعصر بيها واسمع صوت حركة قريبة ماعرفتها لحيوان لو بشر

من گد الهبطة گمت طلعت اركض نسيت حتى الالم طفرت من الشباج وگبل للباب بدون لاالتفتت فتحته وطلعت اركض بكل سرعتي خلصت الشارع درت عالثاني طايرة وصلت نصه واحس النفس خلص بريتي وگفت دنكت على رجلية صارت مرة گدامي استوها تطلع من بيتها وكفت صافنة عدلت نفسي لازمة خاصرتي همست خاله فدوة سنديني داوصل للحايط

- شتسوين هنا بهيج وقت شنو شاردة من اهلج

- لاطالعة للشغل بس كليتي اذتني لان نسيت علاجي

- وين اهلج اول مره اشوفج هنا؟؟

- جدد بالشارع الثاني استونا كعدنا ايجار فدوة بس شوية مي جيبيلي

- دتعالي غسلي وجهج صاير طماطة اذا هيج مريضة ليش اطلعين للشغل

مارديت اجت سندتني وصلتني يم بابهم بالبداية خفت ادخل لبيتهم بس شفت اطفال عدها هواي امنت ؛  دخلتني يم حديقتها فتحت البوري المي دنگت غسلت وجهي وگعدت نزلت دموعي مامصدگة خلصت من الكابوس

- ليش تبجين يمة

- موجوعه خالة

- عوفي الشغل كومي اوصلج لاهلج

- لا لازم اطلع للشغل لان ماعدهم معيل غيري  بس خلي ارتاح دقايق

- بدون ريوگ موو

سكتت كامت المرة دخلت جوه واني دنكت دموعي نزلت افرگ برجلي مااعرف افكر بدسار لو براية اشصار بحالها بعدي؛  كلبي احسه بعد مايتحمل كل هالاحداث والالم

اجت المرة بيدها خبزة لافتها دنكت كالت ولو على گد الحال بس اكلي يخالة شفايفج ترجف

ابتسمت مسحت عيوني اخذتها منها اباوع ابطنها شكر ودهن ذكرت غزوان من يسويها النا الصبح

رفعت راسي همست بخنكة ياررب امتحانك صعب هونها شوية

- شبيح يخالة

- هه ماكو شي تبطر تعرفين البشر اشكد ماينطي ربه يضل طمع

-ماشاء الله حلوه انتي بس ليش جوه عيونج اسود شنو فقر دم

- اي يله اني اكوم اخاف اخرتج عن الشغل

-نهارنا كله شغل

همست الله يرزقكم وسكتت لان عرفت تجدي

اكلت اللفة صح اباوعلها تريدني اطلع بس اشلون مجان كمت اسولف ويها واكل  حتى اضيع وقت بين مايطلع النهار

مرت ساعة ودخل زوجها گمت بسرعة قبل حتى لايسأل لان مامعوزه عطلات بقسمتي وهو من غير شي مسحتل وگف فاك حلكه

اتشكرت منها طلعت اكزل برجلي العالم استوها طالعة للشغل

مكان اوسخ من مكان بيت اسوء من بيت عالم تعبانة الي يحك والي بيده بطله والي واكف بالباب يسولف ويه وحدة واصوات ضحكهم وين واصل

اسوء مكان بالعالم محد يگدر يعيش بي غير المولود ومتربي على قذارته

امشي وبعدني ماواصلة للشارع اكثر من ساعتين كل شوية اكعد ارتاح وارجع امشي طلعوا شامريني بنهاية البتاوين بمنطقة حتى مامسكونة غير كم بيت مطشر ويمكن تابع الهم ؛ من غير الحجي الي اسمعه كل اليمر يشمرلي كلمة گوة الزم نفسي لاهفه بتفلة

مو شفت الشارع صار قريب احس رجعت لحضن راية وخليت راسي اشكيلها على كل المريت بي

ركضت للشارع وگفت انفت احس كلبي يريد يطلع من ظلوعي بين مامصدگة وبين التعب اخذ من حيلي

اجت سيارة من لهفتي اشرتله بثنين اديه وكف بدون لااحجي فتحت الباب وصعدت هو هم ماحجه استغفر لباله مجدية حرك خليت راسي عالجام وغمضت براحة

لاجذب مو براحة جسمي ياكلني ومفعول الادمان بلش يتلاشى  بس احاول اشيل الفكرة من راسي لحد مااوصل واشمر نفسي بحضن ماما بلكي من اشوفها انسى وضعي

السياره تمشي بعد ماوصفتله المكان واني اكل بجسمي وافرك براسي وصلنا المنطقة اشرتله عالمكان من شارع لشارع لحد شفت البيت من فرحتي فتحت الباب ونزلت اركض تركته وراي يصيح الكررروة

دفعت الباب دخلت اضحك ضاعت ضحكتي من لكيت المره تقفل باب غرفتنا والمكان هدوء دارت وجها صاحت يارجعتيي

-وينهم

-وين جنتي خبلتيهن وراج سودة عليه امج اتسودنت بعد ماتعرف شتسوي

-وين راحن؟؟

- والله يخالة مااعرف اختج راحت ويه زوجها الجنوبي وامج عالاساس تسلم نفسها بس طلعت مااعرف وين راحت

- راية تزوجت

- غير ابوج اجه سواها هوسة وراد ياخذها ويشمر امج بالسجن لوما الولد الجنوبي يجي يخلصها جان راحن

- زين مااجن سألن اذا رجعت لولا ماخلن عنوان الهن

- لاوالله من ساعة الراحن اختفت اخبارهن

- يعني شنو تركني وحدي

- منو تركج  غير اختفيتي

همست بعبرة  لااني ماختفيت همه اتخلوا عني

- لاوالله ياخالة  امج اتخبلت عليج واخيتج وكعت وراج بس شواكع بيدهن

- لهيج راحن بدون لايسألن عني وماخلن اي خبر وراهن حتى لااوصلهن هيج جنت مثكلة عليهم ماادري

- استغفر الله دتعالي خاله فوتي ارتاحي

كعدت مكاني انتجيت الحايط باوعتلها ضحكت وهمست جاية اركض متلهفة لحضن ماما واحسب الثواني اشوكت اوصل لراية واكعد اشكيلها من الصارلي

- وين جنتي

- بمكاني الصح خالة جان المفروض اروح وياهم ماارد لهنا لان اني عمري ماجنت منهن اشكد حاولت ادخل بينهن واشاركهن محبتهن بس ماتقبلني والله ماالي ذنب بالصار ليش هيج كرهني

- ماتندلين بيت زوج اختج

- اختي من قررت دوس على كلبها وتقبل تتزوج معناتها تكول ابتعدي شوفي قربج اشسوه بيه

- يجوز امج بعدها دادور عليج

- جان اجت سألت هنا وراي يمكن ارد بس روحها اكتفت من مشاكلي وجودي يمها

مسحت عيوني ابتسمت - هم صدگ اني موقليل السويته بيهن هديت بيت كامل كتلت  ابن حضنها وبناتها الي كسرت گلبها والي ضيعتها والي موتتها وهيه بحسرة اللكمة شمنتظره ارد الكاها منتظرتني وتاخذني بحضنها

- اكو واحد اجه ويه الفجر  سأل عنج جسمه كله مظبر گوة يمشي بس مثلم ماشفت وجهه

- ههههه وين جان هاي المدة كلها لو جان مستعر وخايف ينعرف مرته بهيج بيت لهيج نشر خبر موته حتى يخلي مسؤوليته مني

- زين انتي ماعندج احد

- ههه عندي الي رجعلي النظر وگلي يله شوفي هاي الدنيا الجنتي كاتلة روحج عليها

رادت تحجي وندگت الباب راحت طلعت اسمع صوت السايق يحجي وياها عالكروة وهيه تبررله ماعندي اهل ويتيمة لان تدري ماعندي افلوس

غمضت اشگد حسيت بحياتي رخيصة مااسوى  حتى الذل الداعيشة هواي عليه

لميت رجليه صافنه  اريد بس اقنع روحي راية گدرت تتخلى عني

نزلت دموعي دخلت المرة كالت دفعتله الكروة ترا

باوعتلها بكسرة

- عندج مكان ترحيله

اشرت لا

- لعد اشلون جان خليتج هنا بس ابوج شراني اخاف هم يسويلي مصيبة واني مرة ماعندي احد  منو يحميج

- هسه اروح خالة بس خلي ارتاح شوية

- وين ترحين دخليج هسه لان اريد اطلع للشغل  بين ماترتاحين حتى من ارد نشوف شنو انسوي

اشرت اي

شالت غراضها وراحت طلعت دنكت لزمت راسي احسه يريد ينفجر گمت رحت للبوري فتحته دنكت جوا اغسل بي اريد  بس يبرد

سديت وگمت رفعت راسي للسما اباوعله بتوسل

احس مثل الشي الحار ينزل بمخي غمضت عصرته بين اديه زاد عرفت  اذا تاخرت شوية راح افقد السيطرة

فتحت الباب طلعت امشي وتلفت مثل الخبلة بس اريد واحد من الجهال يصير گدامي وصلت راس الشارع لكيت ابن جورارينا جاي من الاسواق  اشرتله اجاني يركض صاح هاي رجعتي

- لاتكول لاحد اني رجعت وركض تروح لسعد طاسة تكله رؤيا تريدك بسررعة

اشر اي وراح يركض رجعت يم شجرة النبكة كعدت افرك براسي اللوج مااعرف شسوي الالم ماينحمل احسه يگطع لحم من جسمي

انتجيت عالنبكة رفعت راسي اضربه بالجذع بس صوت الونة تطلع مني مااحس بأي شي

دقايق واجه سعد يركض قبل لايحجي كمت كلتله الحگني اخيتتتك

- وين جنتي ولج گلبت عليج الدنيا ماخليت مكان

- سعد اريد  …

- شنووو؟؟

- ولك راح اموووت بعد مااتحمل

- منين اجيبلج

- دبرني راسي راح ينفجر مو شرط … حتى لو حبوب  اي شي سعد  مروووتك دموووت

- اشوكت ادمنتي

- ولك راسيي راح ينفجرررر

- انتظري هسه اشوف سيف سلبوحة يتعاطة منين يجيب ماتاخر دكمشي هاي جكاير بلكي يهدئج لحد ماارد

اشرت اي واتبلعمت اخذتها منه ايدي ترجف راح يركض واني ختلت جوه النبگة من الجهة الثانية ورثت وحدة دخنتها ماحسيت بأي تحسن رجعت ورثت الثانية

اسحب النفس احبسه لمن احس روحي اختنكت يالله اطلعه وراد اكرر العملية

تخلص الجكارة اسحب الوراها خلصت نص الباكيت وهو ماكو ؛ الگاع رطبة يمي خليت راسي عليها ولميت رجلية غمضت طابگة على سنوني وافر براسي بصوت مكتوم

اكثر من ربع ساعة استوني اوصل لمرحلة الانهيار واسمعه اجه يركض فتحت عيوني لكيت بيده كلنس عاصره

كمت اخذتها منه طلعت الحباية من گد الالم بلعتها بدون مي  رجعت كعدت مكاني لازمة راسي منتظرة مفعولها

اجه گعد يمي- اشلون صرتي مدمنة

-بسببه

-منو ابوج

-اااخ يمه اللوحه لولا وروح الماتت بحضني قبل لااشوف شكلها وداعت الراح وهو بحسرة العرس لربطة بنفس الغرفة الجان يعذبنه بيها اصلخه بتنكة زيت بعد مااقلع عيونه واگعد يمه اشلع من لحمه واوكله اذا ما طبقت عليه اجرام اليهود مااطلع بتهم

- كال عليج قضية قتل صدگ

- لواعرف اكتل مجان خليته عايششش لسه

- كومي انروح نشتكي

- مااستفاد شي بس يشمروني بالمصح

- دريتي اهلج راحوا منا

- كوم اكو افلوس جوة النبگة الجبيرة بصف الحايط بس احفر شوية اخذ منهن افلوس الحباية وديله وجيب بالباقي شريط 

- راح اتضلين هنا لو ترحين وراهم

مارديت اخذت الباكيت الجگاير وگمت رجعت للبيت دخلت  للغرفة شمرت نفسي احس الهلوسة بدت تشتغل براسي غمضت دقايق ورحت بالنوم بدون لاحس

ماكعدت غير على صوت المرة فتحت عيوني الصبح صاير باوعتلي وضحكت كالت گومي سويت ريوگ تريكي

- مااجه احد سأل عني

- اي سعد انطاني هذا العلاج وكال تطلع للشغل كلتله شوية وتعال بعدها نايمة

رجعت غمضت

- كومي تريكي خالة حتى دورين امج واختج تره كلبهن وراج

- وين ادورهن وهنه يندلن مكاني

- لامايندلن يدرن بيج ماتردين هنا  يخالة ماكدرت احجي وياج البارحة لان شفتج تعبانة بس لاتلوميهن تره ابوج شراني واندل هذا المكان غير ربج ستر عليهن وخلصهن من ايده گوه

- وين راحت ماما؟؟

- والله علمي علمج كعدت الصبح على صوتها بارتني الذمة وكالت اذا ردت رؤيا خلي تلحگ اختها ويدورن رئال

- واني وين اندل اختي

- الي يسأل مايضيع واليدور يلگه

- شسوي هسة

- دكومي اتريكي وسبحي غيري ملابسج طلعي وياي للشغل هم تحصلين كم دينار لان مبينة شغلتج طويلة وهالتشوفين اني گوة مدبرة لكمتي  وهم اتسألين بلكي احد شافهن لو مرن على طريق وتركلج خبر

سكتت

- بس لبسي عباية وطلعي من باب الحيوانات وره البيت حتى لااحد يعرف رجعتي وحتى سعد  هم نبهته اخاف واحد يوصل خبر لابوج لو هو يرد

-هو اني اريده يوصل غير ظاملته شوگ واحضان بگد دلاله النا اووف شراح اسوي بي

- دتركي وگومي هسه تلكين اخيتج كلبها مفرفح على شوفتج والله لوتشوفيها اشلون طلعتها منا اخر نفس بس دموعها تنزل  عينها بالطريق وراج بلكي رجعتي

- ماادري اشلون فكرت اتخلت  عني اخيتي اعرفها اكثر من نفسي تنطي روحها النا مو دير وجها 

- اي والله يخالة تكسر الگلب وراج تمشي وتتوسل حتى لاياخذوها تكلهم  هيه وعدتني ماتعوفني هسه ترد

- واني عد كلمتي مااتركها لحد ماارد رئال لحضنها وابلش بالجنت اغمض عيوني بس لخاطر اتخيل اشلون راح اغضب ربي بتقطيع جثه

-صدگ ذكرتيني من رجعت عارضني واحد ملثم بس ضخم وصوته خشن مبين جبير بالعمر  كال كولي للخرزة خلي تحضر نفسها لبين ماجيب الباقيات لان سقط حقهم بيهن

- منو هذا النوب ؟؟ وحق منو السقط

- والله يخالة مااعرف حتى مالحگت اسأل بس دنگت انتجيت عالگاع گمت لكيته مختفي

-كلش وقتها عاد حضي واعرفه شكو عطل ساحلته الدنيا  ربي يذبه بطريقي

- اخاف واحد موزين ويأذيج

- غير الله جابه خليني اتسلى بي لبين مااحصل مكان اهلي

- اي هيج ردي ولج البارحة حتى ماعرفت اشتغل كلبي يمج وين رؤيا الرعنة ام الجكايره الفالته

- شكرا الج ماتقصرين والله الفاضج تزيد الطاقة الايجابية بداخلي وتحسيني اشكد اخلاقي حلوة

- دگومي يلة

كمت بسرعة غسلت وجهي قبل لامفعول الادمان يروح وارد لحالتي وقتها حتى لو اكتل واحد ماحس بنفس

كعدت تريكت اشلون مجان فتحت شعري ضفرته عدل كمت وياها انطتني عباية هيه طلعت من الباب واني من وره البيت بس وصلت الشارع العام لكيت سعد  منتظرني بالتكتك مالته  نزعت العباية  لفيتها وصعدت طلعنا على مكان شغلنا القديم

يومين واني افتر بين شغل وبين ادور متأملة تاركات خبر وراهن كلما تجيني النوبة الم روحي واخنس اخذ حبايتي وغمض بدون نفس لحد مااتخطى الالم وارجع اگوم اكمل منين ماتوقفت

… لازمة الورد وواگفه عيوني عالشارع صافنة خلص النهار وهم كلشي ماحصلت محتارة وين ادورهن رفعت راسي للسما وكت الغروب غمضت يائسة روحي تعبانة عرفت مابيه بعد افتر اخذت نفس وانداريت رحت  ورا مجمدة المي شمرت الورد وگعدت 

سحبت باكيت الجكاير طلعت وحده ورثتها اخذت نفس ونتجيت عيني عالمسطبة الجانت تكعد عليها راية  ابتسمت على نظراتها اشلون جانت تراقبني بخوف

شدتحسين هسه وانتي تنامين  وحدج بعد ماجنتي تلمينه بحضنج

ماما يمج لوهم فقدتها حالها حالنا

مريضة صاحية تذكرينا لو تعبتي من همنا

دنكت مسحت وجهي عدلت گعدتي  صاروا گدامي بعد مسافة ثنين بنات نزلن من سيارة مضللة وياهن حرس هواي

اباوع وحدة مرتبة شعرها طويل وكفت تشتري مي  والثانية صغيرة حلوة كلش شعرها قصير هيه هم  قصيرة مبينة من لبسها ودلعها تابعة لمسؤول محاوطيها الحرس داير مدايرها  ؛ واكفة تتصفن كل دقيقة  ينزل شعرها على عيونها وتوخره

صاح واحد من الحرس ضيي ؛ التفتت ام شعر الطويل اشرلها تعالي انطت افلوس للطفل واجت وكفت يمها

سحبت نفس من جكارتي نفخته

عيوني عليها اشلون الحرس مخبوص بيها  هسه هاي هم عدها هموم  لو اصلا ماتعرف شنو هذا الاختراع

مسحت شفتها بضهر ايدها وبعدت شعرها مدنكة تحجي بهمس ويه صاحبتها اباوعها تلمع لمع اخذتلها ثواني ونزلت دموعها

ضحكت بستهزاء ودرت وجهي عالم فايخة لاحها اثر حر بجت 

طفيت جكارتي شلت الورد ورحت امشي ماادري وين بس حسيت نفسي بعد مااتحمل اشتغل اكثر صوت السيارات براسي

امشي لاعلى التعين الجكارة بيدي  وفكري بغير شي  اشكد مشيت ماادري ماشفت نفسي غير كبال نهر دجلة

نزلت جوة شمرت الورد وكعدت  مكان هادء وصوت المي يشيل الهم عن روحك

طفيت الجكارة لميت رجليه باوعت للمي وينك تعال شوف شسويت بيه صفيت مدمنة  لابيت ولااهل  سايبة بالشوارع اتختل من الامن مطلوبة بقضية دعارة

سحبت شريط الحب طلعت وحدة حسيت احد گعد يمي غمضت صارت ايده على ايدي عصرها جريتها حيل  خليت الحباية بحلگي وضغطت على سنوني  رفعت راسي ضربته بكل قوتي بصدره صاح ااااخ ودنگ عاصر نفسه

- انوجعت لااااا شنو معقولة عندك احساس

رفع راسه متألم باوعلي بتعب مارد

- هههه اشكد جذبت روحي وحاولت اقنعها ماتندلني ردت بس ابررلها افعالك حتى لو بشي صغير بس حتى تقلل من كمية الندم الداحس بي

- جنت بالمستشفى طلعت بيوم المداهمة ورجعت فقدت الوعي

- وعساك مارديت وماطلعت لاتحجي ولاتبررر لان انت لاشيء وماضلك يمي غير الحقد

- كلتلج حياتي خطر كلتلج ماراح تتحملين عيشتي

- لاااا كلتلي راح احميج  كلت راح اترك كلشي واخذج وابعد كلت راح اعوضج شنوو سويت؟؟

-كلهن بس ماخلوني عاقبوني بيج

-شنو عاقبوك ؟؟ لك شوفنييي اشلون صرت شوف شنووو سووا ولك صفيييت بالشارع مدمنة ضايعة ماادري وين اوووولي

باوعلي بكسرة ساكت

- ههه ليش ماترد ولو شتكول تسليت بمشاعرج كم يوم؛  جنت ضايج كلت خلي العب بعقلها هم اخلص وقت وهم اسلمها مكاني الهم

- انطيت اسمي وگمت اطلع بدون حماية بينهم ضهرت روحي وادري راح اموت بس ردت ابعدج عن الخطر

- ياخطرر دسااار انت دتشوفني لولااااا

- نفسج الخرزة الي خنت وطني ورديت بعهدي لربعي بس حتى تقبل بيه

- انت دمرتني انت خليتني احقد  على نفسي اكثر مااني حاقدة على صنفكم القذر اااااخ اشلون استثنيتك منهم واني ادري بيكم كلكم حيوانات ماعدكم كلمة ولا مابيكم شريف

- قذر اي وحيوان لااا انكس من الحيوان بس كلمتي مارديت بيها وياج وداعت دگاتج بين اظلوعي ماخنتج ولالحظة

-كلمتك ؟؟ ياهيه منهن هنه هواي عن شنو دتحجي؛ الحماية وهاي اني صفيت حالي حال بنات الشارع  لو الامان واني صرت اتمنى عيوني تغمض ساعة عن شنو تحجي عن الخيانة ليش طلكتهاا لااا كلت لاهلك هاي الحيوانة مرتي هم لاااا عن شنو تحجي فهمني يجوز اني مداافتهم يله

باوعلي مارد

دفرته اجت بصدره لزمه بسرعة ودنگ عصار نفسه صرخت احجييي

لم روحه دنكت كمشته من شعره رفعت راسه عيونه حمر دم ينفت بصعوبة ؛اشرت شنو

همس رؤيا تعبان والله

- ياتعب تحجي عنه تعرف التعب اشلون يصير من انت مشمور بغرفة تتكلب  بالساعات  مثل المخبل تتوسل الموت لان وجسمك متشبع بالادمان ويجون يسحكون على راسك يضحكون وانت مو بس تقبلها على نفسك لااا تبوس حتى رجليهم حتى تحصل الجرعة

غمض

- التعب من تكعد تحسب الايام  اشكد  المتبقية ويكتمل السم بجسمك حتى يبلشون بيعون لحمك وانت مثل الحيوان بين اديهم مومن حقك حتى تحجي موتعترض

فتح عيونه مليانة دموع

- هاي الدموع المفروض مو انت تبجيهن لاااا هاي اني من عرفت غبائي خله  اختي تكسر  كلبها وتبيع نفسها للذل لخاطر تحميني  ومن عرفت امي نهت اخر امل الها حتى تخلصني

- حميتج بعمري صفيت ويا الموت وطلعت متهم  وجودة اكبر غلطة  بس لخاطر اشغلهم عنج واضيع مكانج ضحيت بالي وكفتلي  سنين حتى انسهيم اسمج

- اي وشصار

- غدروني

- تعرف ليش غدروك لان انت واحد حيوووان ونكسس

- لا لان تحديتهم وكفت بظهر اختج وساندتها تاخذ حقها

- ذباح دلاهم مكاني؟؟

- لاابراهيم عم رئال

- رئال وينها شسويتوا بيها

-محد يتجرء يتقرب يمها وبظهرها واحد مستعد يهد الدنيا بأشارة منها

- حمايته جذابة مثل حمايتك واختي راح اخذها من نص عيونه وراح انهي شكو واحد وجع كلبها  مثل مانهيتك من حياتي

- وعلي احبج

- ههههه وفر كلماتك لزوجتك طلكني دسار

- هالكلمة حتى بالحلم ماراح تسمعيها  وراح اردج لحضني غصباً عنج

- وين بيت ذباح

- مااندله

- كلت لفو خاين كلت حيوان ماعنده كلمة بس اتجذب لا هاي واكفة جان حسبت حساب لشواربك لو للرتبة  الشايلها

ضحك بتعب ودنگ

- راح اسئلك للمرة الثانية وقبل لاتجاوب شيل من راسك عود اذا ماعرفت مكانهم  راح انجبر ارد وياك لو راح ابطل ادورهم  لو يضل يوم واحد يعمري هم راح ادورها كول وين مكانهم

باوع لعيوني بحيرة وهمس كم جرعة  تاخذين باليوم

- وين بيت ذباح

- منو الجان ينطيج الابرة

ضربه بصدره صرخ ولزم ايدي دنگ  ضاغط عليها  حسيت شي حار نزل رفعت راسه بأيدي الثانية

اباوع مغمض يحاول يكتم الالم ملابسه كلها دم سحبت ايدي فتحت  القميص بسرعة شهكت واني اشوف صدره كله مضبر والدم ينزل عالسريع

احتاريت وين اخلي ايدي اسد الجرح اتقربت

يمه اكثر لزمت وجهه همست  برجفه دسار شبيك

فتح عيونه گوه ابتسم اشر ماكو شي

- شنووو مابيك شي دتنزف عالسريع 

- حتى تعرفين اشكد مأذيتني ومتحملج

- كوم كوووم راح يخلص دمممك

دنگ شاف صدره ورد غمض روحه باهته

تركته  گمت ركضت ادور احد يساعدني  صعدت فوگ  الدنيا ظلمة ماكو احد ردت اروح للشارع وگلبي مانطلني اعوفه وحد

رجعت نزلت بسرعة لكيته مدنگ على رجليه كعدت يمه لزمت راسه رفعته مغمض نفسه ضعيف همست بتوسل لادسار اتحمل لخاطري

فتح عيونه بتعب ماحجه ولاكلمة بس لزم ايدي ورد غمض مثل الغاب عن الوعي

- لالاااا لا دسار افتح اعيونك لاتغمض فدوه اروحك

سحبت ايدي ضربته على وجهه ماكو صوت حتى دنگت شلت ايده اشوف النبض صارت كدامي قراصتي مربوطة يم  التواريخ نزلت دموعي

رجعت باوعت لوجهه باهت سحبت راسه لحضني همست كوم كلي شسوي دسار لاتسوي بيه هيج تعرفني جذابة ومنتظرة اكتب اخر تاريخ اكثر منك دسار ماضل عندي غيرك  كوم لخاطري عندك

وخر شعره عن وجهه رجعت عصرته بحضني -هسه جايتك اتحمل

خليت راسه عالگاع  گمت ركضت صعدت شفت سيارة جاية من بعيد استوني دأشرلها واصرخ مااحس غير انسحبت من وراي والسجينة صارت بركبتي

صوت واحد  خشن همس بأذني ولانفس …

***رئال***

عمي عيونه على هيذام يباوعله بشماته وعمتي عاضة شفتها 

رفع راسه باوعلي بنظرة عمري ماراح انساهه من وكتها عرفت انتهي كلشي بينا

نزلت دموعي  ضحك بستهزاء جر عمتي عن طريقة شمرها على عمي بقوة وصعد جر الاوراق مني شمرهن بوجهم  و سحبني  ويا صعد من هلگد ماضاغط على ايدي حسيتها  انملخت فتح باب الغرفة دفعني گدامه ودخل دفر الباب سدها

وگف باوع للكنتور بعده مفتوح ورد باوعلي ردت احجي اشر اشش  

همست والله هددني بماما

- كلتلج مااريد اسمع صوتج

- هيذام

- اختج حلت شغلتها وامج باجر لو بعده تطلع كملت اوراقها وانتي راح تضلين هنا لنهاية الاسبوع ان طلعتي حامل احولج على حجز خاص ان لااا ارمي اليمين  وتردين منين ماجيتي

باوعتله بأسف وشهكت 

دار وجهه  راح للخزنة فتح  جرارة بيها طلع ورقة دنگ غير الرمز  سد الكنتور فقله اخذ المفتاح وطلع رد الباب بقوة رج الغرفة رج بطبكتها 

اسمع ضربة بسطاله ينزل عالدرج  بحرگة غمضت  اني شسويت اشلون رجعت غدرته

لاماغدرته ردت اخلص ماما اي ولامرة انطيت بي علمود نفسي كل مرة جانت حتى احميهم عمري مافكرت احمي روحي دوم جنت اني الضحية

فتحت عيوني واسمع صوت صرخته عالحرس  يستعجلهم يطلعون  گعدت بالكاع  نزلت دموعي بألم وهاي وصلنا للنهاية

خليت ايدي على گلبي صدگ هيذام  خلصت قصتنا راح نرجع غربة ومن اشوفك ادير وجهي بدون لااحن لحضنك لو اضوجك حتى اشوف كمية صبرك عليه

خليت راسي بحضني صارت ملابسه كدام عيوني ابتسمت

تدري اشكد  اتمنيت اعترفلك بشعوري من اشوفك لومن تخليني بحضنك واحس بخوفك الي

تكول الغدر يمشي بدمج وماتعرفين تحبين لاا اني عمري ماغدرت غير نفسي حبيتك بدون لااحس اعرفك مو الي ولااني اكدر اكمل وياك بس كلبي غصباً عني نبضلك

رفعت ايدي باوعت لمكان السوار - اشلون گدر يخليني انساك واحبه هيج  معقولة ماجانت احبك صدگ وجنت ماخذتك حلم طفلة اريد اشرد بيك من الواقع لو هو استغل مشاعري ولهفتي للحضن الدافي والحماية

بس دااحسه يدگ ويه دگات گلبي وهالشي ماحسيته وياك جنت اغمض اشوف ضحكتك من بعيد بس هسه كل مااسد عيني احس بدفو همساته واشتم عطره ؛ جنت اشوفك سند  صرت اشوفه حلم ؛ من سمعت خبرك مااجه براسي غير اشلون راح اخلص الوقت واللحگك بس من باوعلي  حسيت كلبي نعصر واتمنيت احضن نظراته وتوكف الدنيا بينا

رجعت راسي بحضني صافنة بقصتي الماترضى تنتهي الاوراق قربت تخلص كلما اكول هاي اخر جزء وراح اغلق الدفتر ترجعني للبداية بوجع گلب اكبر وبمشاعر تفتح شكو جرح احاول انساه

…مر الوقت بدون لااحس بي حتى ماسمعت شوكت رد ولااشوكت صعد لحد ما انفتح الباب دخل رد برجله شمر سلاحه دنگ نزع بسطاله اخذ المنشفة وراح للحمام بدون لايباوعلي

مسحت دموعي گمت رحت للجرباية  وخرت الغطة دخلت بفراشي درت وجهي للجهة الثانية خليت راسي بالمخده وغمضت

دقايق واسمع طلع من الحمام اجه سحب الغطة تمدد يمي  شوية واسمع صوت جداحة اخذ نفس  صار هدوء

احسه قريب غمضت اتمنيت اندار لحضنه مثل كل ليلة اخلي راسي على صدره وهو يلعب بشعري

انفتحت الباب دخل درع يركض اتلكاه شاله حضنه بوس خدوده وكله ليش لسه مانايم

- جنت دااسولف ويه ماما بالفون وسمعتك اجيت

- موكلتلك لاتصعد الدرج بعد

- لعد انت مااجيت اليوم واني اريد اشوفك حتى اكلك بابا صرت زين وبعد مايوجعني راسي

- يروح ابوك انت  بس هم جان خابرتني اني انزلك

- مرات هواي اتصلت ماترد بيبي كالت عوفه عنده شغل اني ضجت وكمت ابجي هيه كالت باجر اوديك يم امك حتى تلعب وياها لحد ما بابا يكمل شغله ويجيك

- ماتطلع منا تريد امك باجر اجيبها الك واني ماضل عندي شي يومين بالاكثر اكمل شغلي واخذكم سفرة للمكان التريده مااردك لمن تشبع لعب وتمل من وحدك

- ناخذ ضيونه ورئول ويانه

- لاضيون عدها دراسة رأل راح ترجع لاهلها

- ليش تروح لاا بابا حباب لاتخليها تروح

- جانت غلطة دخلتها وصار الوقت تتصلح

- لعد انام اليوم يمها بس انت لاتعصب واني ماارفس و اضوجك ابد

- ههه لاعيون ابوك  رفسوا كلبي وماعصبتك اعصب عليك وانت قطعة من روحي تعال جوه الغطة  الجو بارد 

طفه جكارته سحب الغطة نيمه بحضنه وتمدد بده درع يسولف على لعبة يلعبها بالفون وهيذام طابگ ايده على گصته وصافن عالسكف مايرد غير بمم  اعرفه باله مشغول بالراح يسوي واشلون ياخذ حقه مني ويرد هبيته گدام اهله بعد ماهنته بالغدر

لحد مانام درع  گام شاله طلع نزله لغرفة عمتي ورد صعد دخل طفه الضوه واجه رد للفراش تمدد احس ضهري طگ گد مانايمة على نفس الجهة عدلت نومتي اخذ نفس واندار لجهة  الكنتور اتجتف وغمض شكد حسيت روحي رخيصة

رجعت لنفس نومتي صاح اريد انگبرر ياتخمدين ياتنزلين تكملين نومتج بالگاع 

وخرت الغطة بسرعة نزلت بالكاع لميت رجلية انعل نفسي عالذل المايرضه يرحمني

اخذت حسرة احسها طلعت من نص روحي حضنت نفسي حيل وغمض اشوكت تخلص وارتاح؛مر وقت ماسمعتله نفس عرفته نام عدلت راسي  عيوني عالشباج  صار الگمر كدامي ابتسمت غمضت لو تعرف اشكد مشتاقة لكعدت الصبح على ايد راية تستعجلني للشغل

اشكد مشتاقه لصوتك وانت تغني ولمعة عيونك فاضحتك

اشكد روحي لهفانة لريحه جاي ماما وطعم اللفة التسويها النا   اااه ياذيج الايام لو يرجع يوم واحد منها والله لسجد ربي ندم على كل لحضة طلبت منه يعديها

شهكت سمعته اتحرك بسرعة سديت حلكي بأيدية كطعت حتى النفس كارهه نفسي على وضعي وضعفي وظلم الدنيا بيه

مسحت دموعي  على شنو ابجي اني ماغلطت اخذت حق رند غزوان انعل ابو كلبي لابو الذل ارد للسجن اكمل الحكم واطلع ادور اهلي اخذت خواتي لحضني وارجع اعيد الطريق من اول خطوة وعيد الحلم من بداية صرت اعرف شكل الكابوس اسحگه وكمل بدون لااباوعله ارسم كل امنيه باللون الاريده مااسمح الاحد يخلي ايده هالمرة ماافتح عيوني اله واني ماحية كل ضعف بحياتي واكفه بخواتي  بمملكتنا الخاصة متحدين الكل بأسم امنا الخلص عمرنا نخجل واحد يعرفه

شلت ايدي مسحت مكان السوار وهذا انت اول واحد خلصت من ذكراك الجان سبب ضعفي وخضوعي للذل

درت وجهي لهيذام لكيته حاضن مخدته عيونه على ايدي رجعت درت وجهي كل عقله بعدني ذاكرى محمود  واحلم بي مايدري نسيته مثل ماراح انسى وامسحه من ذاكرتي

حضنت رجلية حجه بصوت خافت- تشكيله عن تعب بعده عنج

مارديت

-تتمنين هو النايم مكاني

-اتمنى ماشفتك ولابيوم طلبت حمايتك

-جنت اظن القوة والظلم اقوى سلاح ربح بالحياة ماكو قوة تضاهيهن بس بشوفتج عرفت الندم اكبر خسارة تنهي البشر

-لوجان للندم  تاغيخ فهو يوم لقائي بيك

-بشنو قصرت وياج

-الغلط مو بيه بالدنيا الحملتني طاقة ماجنت كدها

-وكفت بوجه الكل لخاطرج

-كلتلك من البداية طريقنا مختلف

مارد كام فتح الكنتور طلع علبه شمرها قريبه مني  ورد للفراش اتغطه انطاني ظهره ونام

دنكت شلت العلبة فتحتها لكيت كتابي القديم  وظفيرتي والسوار

مديت ايدي مشيتها على شعري من البداية لنهايتها لزمت القراصة ابتسمت ذكرت من سحبتها من ايد ماما وگمت ربطتها لان مستعجلة

اخذت نفس فتحت الكتاب هو وبمكانه  لكيت قلمي بعده بي على اخر شي مأشره عليه غمضت صارت راية كدامي وهيه تكول مامليتي عزة بعينج هاي المرة الالف تقريلي هالعبارة

اجت ضحكت رؤيا بأذني وهيه تكول ياريت فهمنا منها شي  شكلبت الكلمات تشكلب

باوعت لغزوان مبرطمة اشر مالج شغل بيهن استمري اسمعج ورد  لزم خدود رند يبوس بيها

شلت الكتاب  دنكت اشتميته وخليته  على صدري حضنته

خليت راسي عالجرباية بيدي اخر ذكرى منهن غمضت مبتسمة ودموعي تنزل بدون لاحس واني اتخيل نفسي بعدني بيتنا منتظرة اذان الصبح حتى اطلع للشغل اطفر بينهم اقنع  بغزوان يسمي بنته على اسمي

نفس بروده الجو والهدوء وعصر الكلب بمصير مجهول رحت بالنوم بدون ادري

بين نايمة بين صاحية احس راسي صار على مخدة وغطة دفاني من البرد الجان شال حركتي

حسيت الكتاب ينسحب عالكيف حضنته حيل ولميت رجليه تركه ثواني صارت ايده على شعري وخره عن وجهي عالكيف اخذله مشوار گاعد كدامي يباوعلي دنگ باسني بهدوء اخذ نفس طويل مثل اليريد يشبع روحه گبل الفراگ  ؛ كام راح يم الشباج وصوت الجداحة ورث جكارة

درت وجهي لجهة الجرباية حضنت الكتاب رجعت نمت ماكعدت غير على صوت هوسة جوة فتحت عيوني ردت اكوم احس اعظامي طكطكت من البرد شلت راسي التبريد على اعلى درجة

مسحت وجهي تذكرت الغراض بسرعة وخرت الغطة اباوع الكتاب والسوار موجودات بس ضفيرتي ماكو

كمت نكثت الغطة لبالي جواها  مالكيتها رفعت الغطة شمرته عالجرباية

دنكت شلت العلبة رجعت السوار والكتاب خليتهن عالميز دخلت غسلت وجهي شلت شعري  وفتحت الباب نزلت لكيت البيت هدوء  طلعت للحديقة لكيتهم كلهم كاعدين حتى هبة راجعة گاعدهدة يم هاله بحضنها ابنها  وصوت  ضحكهن وين واصل 

تركتهن كملت طريقي لجهة بيت ضي جانت كاعدة عالمرجيحة  وابن ازر يلعب قريب منها رحت كعدت يمها دارت وجها عني لميت رجليه لحضني ساكته عيوني على هبة اشلون تسولف ويه ابنها وطايرة جمال وثقافة  ونسب ليش ميردها

دخلوا هيذام وازر من برة بزيهم العسگري اباوع لهيذام يمشي برزانه الكل يهابه  شكله صارم حتى كلامة اي تعابير على وجهه للمجاملة لو للمحنة ماكو ؛ وصلوا سحب الكرسي گعد انتجه شمر سلاحه  خله رجل على رجل وطلع باكيت الجكاير كامت هبة خلت درع بحضنه و گعدت يمه

اجه ازر دنگ شال ابنه يبوس بي همست ضي ماجذب الگال معزة الطفل من معزة امه

ازر - مم واكبر اثبات هيذام شوفي اشلون يباوعلها ااخ لو مااختي جان كلت شي يمسح اخر گطرة عرگ من گصتي

- طلع من الفجر جابها واجه تگول راح تتحول اذا طلعت الشمس

- اكثر من هالتحول مااتصور اكو تعرف ليش ردها وتعرف ماراح يستعملها غير حشرة لخاطر يكرص بيها عالم بس يااخي الكرامة لعبتها

-على طاري الكرامة ابوك وين

- شنوو لج

- لاتكول لج سمعتت ويله اخذ ابنك وروح مناا اكعد يم اخوتك لان هذا المكان خاص بالخدم مومن مقامك

دنگ

- دخيل الله اشكد متمنيه شوفت تابوتك يدخل منا

ضحك هز راسه  وباوعلي گال اي رئال اشلونج

همست زينة

-كلش من شفته سحل الضابط وداس على راسه عرفت حالتج مريحته كلش

-انفصلنا وهذا الاسبوع غاح يغجعني للمغكز

-ويدفن الباقين

ضي- عفية حتى تعرفون انتم لاشيء حالكم حال الغبار بنفخه يختفي يله اخذ ابنك وروح منااا لاتخليني اسمعك كلامك اخليك موبس تذب رتبتك من الفشلة  لاوتگعد بصف اخوك تتصفن بس حتى تعرف شمسوي بحياتك وهيج الله بلاك

اشر اي اخذ نفس راح سحب الكرسي گعد يم مرته

كعورت ايدها ودنگت عضتها حيل لزمتها وصحت شبيج تخبلتيي

دار وجهه ازر علينا كام بسرعة باوعلها  دفعتني وكامت گوة لازمة نفسها لاتبجي راحت للبيت رد گعد عيونه وراها حتى ابنه نزل من حضنه مامنتبهله

كمت وراها رحت لبيتها لكيتها گاعدة يم الباب بالكاع وتبجي گعدت يمها صاحت شكوو جاية

- ههه اتحمليني يومين وبعد ماتشوفيني

- تستاهليين وحيل بييج وحتى اليومين هواي وياج المفروض هسه ياخذج يشمرج

اشرت اي

- صدگ من كال الغدر يمشي بدمج عمرج ماراح تنصلحين

سكتت

- ليش هيج سويتييي هاااااا

نزلت دموعي

- هسه جاية تبجين بعديش بعد ماهنتي گدام اهله بعد مازامط بيج گدامهم اتخوني وتبوكين تعبه ليش رئال

- صوت توسل  ماما جبغني اتنازل عن اعز شي على كلبي بدون لاحس

- انتي غبية

- لا موغبية بس الدنيا ماتقبل تخليني اعيش

- موبس غبية وحمارة وماتستاهلين واحد مثل هيذام

مسحت دموعي وضحكت- صح مااستاهل وهواي عليه بعدين انتي ليش ضايجة تغه احنا بيها ولبلياها مانكمل سوة كل عقلج مثل هذا يقبل بوحدة مثلي من البتاوين بت يهودية تكون بأسمه

- اي  وخله الدنيا كلها بين ايديج  سوه المستحيل حتى يرضيج شايفة الصبح من نزل اشلون حاله ولج عيونه حمر من حسرة النومة تعرفين شنو كلي ضحك وكال اول خسارات العمر  توجع اشلون اگدر اتخطاها

- اتخطاها من نيمني بالگاع وغجع زوجته وحسسني بقيمتي هو ويگول ضلي هنا لنهاية الاسبوع حتى احدد وين اشمغج

- جذاب والله وجذاااب مايگدر يتخلى عنج ومن رد جان منتظر منج تعترفيله بغلطج لخاطر ياخذج لحظنه بس انتي شنوو سويتي بدل ماتعتذرين منه رحتى عاتبتي محمود اشلون عافج

-لاااا

-اااي وبكل مرة تنامين بفرشته تفكرين بذاك وكل هالفلم السوا هيذام بس حتى يحسسج ولو واحد بالمية من النار الديحس بيها محد يعرف هيذام گدي

- واني مااغيد  اعغفه تعبت واشتاقيت لاخواتي ولغزوان خليني اكمل محكوميتي واطلع ازوغ صديق عمغي  واغجع لحياتي القديمة بينهن

- واني

- انتي احلى قصة شفتها بهذا البيت الي غاح اسولفها لخواتي وماغاح انساها طول حياتي

- هسه عرفت صدگ ماجنتي حاسبتني وحدة من خواتج لو جنت اختج ماتخليتي عني بهالبساطة ونسبتيني لوحدة من قصصج

- الحياة قصص ولكل وحده نهاية 

-الله يلعنك هيذام منين جابج

ضحكت ضربتني ودارت وجهه ضايجة خليت راسي على متنها  رادت تدفعني حضنتها اكثر لزمت ايدي و شهكت ؛ ابتسمت على محنتها وغمضت

صار الظهر واحنا على گعدتنا اجه ابوها جابلنا لفات وگعد يمنا انطانا وضل يقلد علينا ويضحك بس يرد يطلعنا من الاجواء وصدگ شوية شاركنا وصعدت اصواتنا وضحكنا وين اليشوفنا يكول ماكو هم على گلبنا

اباوعلهم اريد احفظ تفاصيلهم من كثر ما تعرضت لفقدان گمت احس بالاشخاص الراح افقدهم واشتاقلهم قبل لاابتعد عنهم 

لليل واحنا على كعدتنا لحد ماتأخر الوقت كمت كلتلهم يله لازم اغوح 

ابوها رد نوم الهنا وهيه غمتني ضحكت رحت تركتها تسولف ويا دخلت للبيت  لكيت هبة وهالة هالدرج واكفات يسولفن دااتعده وكفت هبة بوجهي كالت وين تردين

- دااصعد وين يعني

- وين فوگ شنو مادريتي هيذام كال للخدم طلعوا غراضج  شمروهن روحي حبابه نامي بالمطبخ يم المساعدات خلصت العرض

- تمام ماطول خلص كليله خلي يطلكني لايضل يدوغ حجج وحابسني يمه خلي يحفظ ماتبقى من هيبته حتى اعغف اغد عليه بالاستجواب

-انتي شنو حاسبة نفسج لاحسبالج  عاملج يومين زين صدكتي نفسج تره كلج حثالة استخدمج يغيض بابا و يكسر غروري وشاف ماكو نتيجة رد تفل على وجهج واجاني من الصبح يتوسل حتى ارضه

- اكو شغلات تنحس ماتنكال اتمنى واصلتلج ولو اشك من شفتج قبلتي تغجعين وانتي تعغفين ليش جابج  ولنفس المكان الغصبني انام بحضنه بي؛   عغفت شنو انتي

- ههههههه لاعرفي من يجي الليلة ينام بحضني ويكعد الصبح يشمر ملابسه عليج تغسليهن ويأمرج دخلين تنظفين الغرفة من سهرتنا

هالة - صدگ دتحجي منو هيه ودتاخذين وتنطين وياها بالحجي كلها وحدة من شوارع البتاوين جابوها بعد ماكتلوا اهلها  وخلصوا البلد من نكاستهم كل واحد يلعب بيها فترة ويشمرها عالثاني وهاي الكل لعبت روحه منها راح يردوها يستلموها الحرس يتسلون بيها لحد ماتلحگ الباقين

- هم صدگ ديله وين المرطب الكلتي عليه راح يوصل هيذام و تعرفي حتى ماينطيني مجال ازيل مكياجي مو ارطب بشرتي

- دتعالي عندي سيت اسود وطلبته طلع صغير يجي على قياسج حتى فرد مره اليوم يسوي حفلة عليج

ضحكت وضربتها صعدن نزلت صات عمتي كدامي  باوعتلي بأسف ابتسمت دنگت ردت ادخل للمطبخ كالت وين تعالي لغرفتي

- لاعمه انام يم البنات

- يااا ولج صدگ تحجين والله جذب يعمة هسه سمعتها تتفق ويا الكوبرا حتى تكله رئال لمت غراضها ونزلت يم رحمة ودرع عالاساس ضل يبجي واضطرت تصعد يمه لبين مايرجع

-لعد ماجذبت اني صدگ جنت ناويه اصعد الم حاجاتي مواني الي اضل لحد مااينزلني بأهانه صح اني فقيغة بس كغامتي بغاسه

دااحجي وجاني صوت ام هيذام من وراي كرامت منوو لج براسه

رحمة - حقها لعد من راح رجع مرته شنوو حسباله تضل تتوسل بي بسكم ظلم عتقوا البنية

- ومنو هيه اصلا وهيج تعيطين لخاطرها لميت زعابيلها شمرتهن يم المساعدات وهيذام مارد هبة لو مالعبانه روحه من قذارتها هنه كم يوم ضلن  تروح  يمهن وجها مااريد اشوفه لحد مايدز وراها  ويردها لخيستها

- ارتاحي راح اخذها لغرفتي وروحي لفقي عليها يمه بالي يرضي ضميرج واني ماراح اخلي يشوف وجها لحد مانتأكد موحامل ونردها للمركز

- گلت يم المساعدااات بسج تعلين براسها خافي ربج واحد خبلتوا وشمرتوا بالمستشفى والثانية خربتوا بيتها وابنها ضال يكسر الخاطر من غير ابراهيم سودة بوجعي وگع بورطة ضال نهار وليل يركض مثل المخبل ويتوسط مايعرف اشلون يخلص منها

-شناويه من الاخير احجي ام هيذام لاتضلين تحفرين

-وعلى شنو احفر ابني الله رده لعقله وعرف منو التصونه وتستحق تكون ام جهاله وهاي جانت لعبة حتى يكسر ابراهيم بأسماعيل بيها لااكثر خلص منها كال اخذيها شمريها لحد ماافرغ واردها لخيستها

- الله واكبر على حقدكم

-الله واكبر عليج خبلتي عليه وترستي راسه شر وخليتي يشوفنا اعدائه وانتي لج رئال گبل على غرفة المساعدات قسما بالله اذا سمعتج حجيتي لو شفت وجهج بره اخلي موبس يردج للحجز لااا وداعت ولدي اخلي يمدج جوة رجلين هبه حتى تسحگ راسج وتعلمج مقدارج شنوو

اشرت اي

-يله ولي من وجهي روحي نامي يم الخدم حتى تعرفين من يامستوى قبل لاتردين لقذارتج اخاف نسيتي تفوو عليج وعلى هيج دخله عوجه ماشفنا منها بس الشر

ضحكت بستهزاء تكول تعيرني بشي موزين مو شي من تدبر الخالق كل عقلها تهيني من تگول روحي يمهن ماتدري ربي رافعهن درجات عنها بالمقام

رادت تحجي  عمتي رحمه شافتني درت وجهي مااهتميتلها  سكتت عفتها ورحت  للمطبخ اكو باب خاص لغرفة المساعدات دخلت لكيتهن كلمن على جربايتها  اتفاجأن بوجودي اباوع ماكو مجال انام كالت وحدة منهن رئال معتازة شي

- اي اغيد مخدة وغطة حتى لوماكو دوشك عادي انام عالحصيغه

- الضابط يدري بالدتسوي

- هههه الطلب ينزلوني يمكم بعدين شبيكم متفاجأين كلكم تغه اني حالي حالكم واتعس من حياتكم جنت عايشة لاتغشكم كم يوم الشفتوهن هنا يله كل وحدة تنطيني شغلة منها حتى يكون بينا مخدة وغطة وتكبغ عشغتنا

ضحكن اتبرعلي كلمن شغلة كامت وحده فرشتلي ديباج  وخلتلي مخده شمرت حذائي ورحت تمددت طفوا الضوه 

عدلت راسي عالمخدة اتجتفت اباوع للسكف  منتظرة رجعت هيذام صدگ  توصل بي الحيونة يخليني هنا وينام وياها كدامي لو كلبه مايطاوعه يأذيني بهالشكل

الساعه تمشي وماكو اي صوت  كل ماينفتح الباب افتح عيوني اكول دز وراي ماكدر بدوني  اشوف وحده بيدها مي لو شغلة ويخيب ضني ارجع اغمض لحد مارحت بالنوم

فتحت عيوني الصبح على صوت طكطكة بالمطبخ كعت ماكو يمي احد كلهن طالعات كمت لميت فراشي  سفطته طلعت جانت عمتي رحمة واكفه يم الباب تحجي ويه المساعدة رحت اصبح عليها واسمع صوت ضربة بسطاله عالدرج

رفعت راسي صار كدامي نازل مدنگ يعدل بساعته وهبة ورا تركض مااسمع شنو گالتله وگف عگد حاجبه ودار وجهه باوعلها عضت شفتها وضحكت

بسرعة رجعت ليورا ماردت يشوفني  احس شي انغرس بگلبي رجعني لاول يوم شفته بي اتمنيت اشرد بنفس الطريقة واختفي عن نظره

رديت للغرفة دخلت سديت الباب شمرت الفرشة بالگاع وگعدت احس داخلي مثلج  فركت كلبي رئال اصحي هو من البداية موالج

لاهو كلي انتي الي هو الجبرني احبه

خليت ايدي على كلبي غمضت صارت نظرته الها وضحكتها اله بعيوني حسيتها تذكرة بليلة بينهم

هزيت راسي فركت وجهي اعصابي منهارة وجسمي كله يرجف سمعت مشيته بالمطبخ وصوت جداحته يورث جكارته خليت راسي عالمخدة اتغطيت سديت اذاناتي  مااريد  اسمعها

ثواني وصوته رجع المكان هو ويصيح وين الريوگ وركضت هبة تستعجل المساعدات احس طعم الدم بحلگي گد ماعضيت شفتي

دخلت المساعدة كالت رئال تكومين تتريكين ويانه

وخرت الديباج باوعت لعيوني دنكت ضايجة مسحت خدودي وهمست لا بس اغيد حبايه مهدأ غاسي ديوجعني

- ميخالف اكلي عمتي رحمه دزتني

- هيذام لو عمتي؟؟

- لاوالله الضابط  طلع مبينه اعصابه منهارة محد يعرف شبي واصلاً مايدري انتي هنا وحتى من راد يگعد بالحديقة بسرعة امه مانعته كالتله راح لابنك   كام يبجي خاف من صوتك

- وهبه لحگته مو ؟؟

- ها لا بس من شاله راد ياخذه ويا حتى يسكت مرت اللواء كالتله اخذ امه وياكم  هذا بعده مريض اخاف يتخربط بالطريق

-وهو ماصدگ

-لاوالله رفض وصاح وخري عن طريقي لااللبسج بأمه  بس درع رجع يبجي تالي رد گال لهبة جهزي نفسج بين مااخذه فرة واجيج دخلت تركض

-يكللها جهزي نفسج ومن جنت اگله طلعني وياك مايقبل يگول على ساعة يغتالوني مايگول مستعغ منج مااغيد احد يشوفج وياي

-على شنو حارگه دمج انتي لو شايفة وجهه اشلون حجاها وطلع جان حمدتي ربج ماطلبها منج دخيل الله تكول راح يقبض روحها مو يطلعها لان حس بلعبتهن ويله گومي فدوة عندي شغل هسه مرت اللواء تسويلنه هوسه

اشرت اي

طلعت  اتجيب الاكل نزلت دموعي وضحكت على نفسي

لليل واني مكاني ماتحركت حاقدة على ضعفي اكثر من وضعي گدما النار احسها مشتعلة صرت احسب بالدقايق اشوكت يخلص الاسبوع وارد للحجز

…لامة رجليه لحضني هدوء الكل نايم عيني على كتابي اشكد لامست گلبي  قصص بس ماوجعتني  گد عيشرته  

حسيت نفسي اختنگت خليت ايدي على كلبي فركته حسيته زادت اكثر شلت الكتاب خليته على صفحة وكمت  فتحت الباب دااطلع واسمع نبرة خشونة صوته دخل المطبخ  تگول يهدد مو يخابر  رديت الباب كارهه حتى شوفته مو سماع صوته

ردت ارجع واستوقفني كلامه على متهمة يريد يحول قضيتها ويعلمه اشلون ياخذ  اقولها

وگفت اسمع الطرق الي يعلمه بيهن عقلي اتبنج من بشاعتها مر شريط الزنزانة والمرة الجانت يمي اشلون تجي تنزف من كل كتر حتى اضافيرها قالعيهن

احس اديه ثلجت وجسمي بعد ماسيطر على رجفته بدون شعور فتحت الباب صار كدامي بطرگ البنطلون شافني عگد حاجبه فصل الفون  اشر شكو هنا

همست من تغجعني انت الغاح اتحقق وياي لو تسلم قضيتي لواحد ثاني

- شدخلج بهاي الغرفة

- غاح تسلم قضيتي لغيغ واحد مو

- ليش بس لاخايفة

- هيذام اخذت حقك مني كافي

- ليش ترجفين

نزلت دموعي -اني غاح اعتغف على كلشي تغيده  بس لاتخليهم يأذوني

دنگ حك خشمه باوعتله بتوسل منتظرة اسمع منه يكول اني احقق وياج ماراح اسلمها

دخلت هبه بسيت النوم كالتله شنو ماراح تصعد 

-شنوو يابة

-دااگلك تأخر الوقت واني نعست شوكت تجي

- روحي بس اكمل جكارتي والحگج

- شنو تكمل جكارتك

كالتها واجت جرته من ايده بدلع درت وجهي بسرعة ردت ارجع مااريد اشوفه من گد الحركة ماانتبهت الكرسي گدامي عثرت بي ردت الزم الميز ماسيطرت وگعت اجت حاشية الكرسي بطني حسيت شي طگ بداخلي كعدت بمكانه صحت اخ يمه وعصرت نفسي

دفع هبة واجه يركض دنگ عليه لزمني راد يرفعني لزمت ايده وصرخت تركني ولزم وجهي وصاح لاتگطعييين النفسس

عصرت ايده وغمضت

-وين تأذيتي شنو اليوجعج  احجييي

دنكت احس شي نزل بملابسي لميت روحي بخجل رفعت راسي بسرعة همست بتوسل لاتباوعلي هيذام

-شنووو اليوجعج احجي اصيحلج عمتي لو اخذج للمستشفى

- ديغ وجهك حباب

خله ايده على ضهري ديشيلني وانتبه للدم اتصنم مكانه فتح عيونه على كبرهن وباوعلي بخوف اول مرة اشوف هيج نظرة بعيونة

صرخت هبة هيذاام هاي دتنزف

دار وجهه الها حجه گوة يعني شنو اسويلها

- عززه وخرررر عنها راح تموت

- شنووو اتموووت لج صيحي لعمتي بسرررعة

-عوف عمتي الحگ اخذها للمستشفى

اتلفت وكام ركض سحب البردة  طگها هيه وسكتها

اباوع الگاع انملت شلت ايدي كلها دم مااعرف شنو صعد بعيوني اجه يركض دنگ لفني بالبردة خله راسي على صدره وشالني حسيت روحي انسحبت غمضت ماحسيت غير ركضته بيه وصوت صراخته عالحرس رج البيت رج ؛ رحت بغير عالم

فتحت عيون غواش راسي يفتر ايدي ينغزني اسمع صوت ضي صاحت هيذاام  صحت

درت وجهي لكيته واكف متجتف منتجي عالحايط بعده بلاقميص يباوعلي بقلق واضح التعب عليه 

عصرت ايدي ضي باوعتلها ضحكت وهمست الحمدالله عالسلامة ياام درر

صفنت بوجها ورجعت باوعت لهيذام اخذ نفس مسح وجهه  وطلع

اجت رحمة دنكت باست راسي كالت الحمد الله على سلامتج يعمة ولو زعلانة لان ضامة عليه

- شنو ضامة دتحجون

ضي - خلفة ابن النظام مع العلم جنت ناوية اسميها ضي بس اقتنعت بالاسم من شفته ابتسم وهمس بي

عمتي - عوفي الاسم وروحي لهيذام كليله احنا يمها خلي يرد للبيت سودة عليه غير انهبط هبطة والله من گالي راسي دخن يعمة گلت شكل عنده سكر

- شبي انخبص وداعت بابا على ركضته وصوت صرخته كلت  ميته بيده هاي

- كلبه ملجوم من سحر وانوب هو نو يسوي طفل وخاف من عمرها  ذاك الاسبوع يسألني اذا صار عدها خو ماعليها 

- حيل يله خلي اشوف اشلون راح يحقق وياها

- اهووو انتي سالفتج مطولة اكوم اني اروح

كامت طلعت وضي لزمت ايدي فرحانة اشرتلها شبيج

ضي - كل هذا وتسألين شكو ولج راح يصير عدنا نونو صغير خاص بينه نلعب بي

- تغه ماصاغ شهغ ياطفل هذا

- من تزوجتي شكد صارلج من ناضفة منها

- اسبوعين وشوية

- ميلام دسار من كال هم لدغه وهم ثولة بس يله المهم راح تقلبين البيت بهذا الخبر اووف الفضول فول يمي اشوكت نرجع ونشوف وجوهم من يسمعون بالحمل

-يعني اني حامل هسه

- هاي انتي بجهة مامصدگة وهو بجهة صافن كل شويه واخذ نفس يحمد ربه شبيكم شنو اول العالم انتم تخلفون

يخليت ايدي على بطني اتلمستها؛ بلحظه شعوري كله تغير صار محصور بداخلي حلم انولد من جديد بعد ماتلاشت كل احلامي

ضحكت ضي وكالت خلي اكوم اكله يدز الولد حتى يجيبولج ملابس

كامت طلعت  غمضت نزلت دموعي بفرح- غزوان  اني الراح يصير عندي طفل قبلك يعني اني الراح اسمي على اسمك

دخلت ضي كالبه خلقتها مسحت دموعي اجت كعدت يمي لزمت ايدي همست شكو لاتكولين ماكو حمل استوني داحلم

- كلهم وسخين ماكو بشر نظيف بيهم قاطبتنا

-شكو

-الكلبه عمتج تكول لهيذام لاتكول رئال حامل اتخاف على مشاعر بت اخوها وتگله هسه عوفها لاترجعها للمركز حالتها تعبانة عوزها مدار هواي خليني اخذها للمزرعة لحد ماتولد  اني اخذ الطفل وانت اخذها كمل القضية

- وهيذام شنو كال

- مارد اصلاً دار وجهه وراح للغرفه الدكتور تكول يطلبه طلابة ليش وجهج اصفر مارد لونه لسه

- والله لواعغف اموته بطني ومااخلي احد ياخذه مني

-لخاطر هيذام يعلگ روحج ويا واشش اسمع عمتي اجت خلي اشوف وين تريد توصل

سكتت فجأه تحول شعوري من فرح لخوف وتفكيري من هيذام لحمايتي لابني مو تكول ثواني  من عرفت الخبر تكول صارله عمر بداخلي ومنتظرة جيته

يومين بالمستشفى صح هيذام ملازمني ماتركني ولالحظة بس ماحجة وياي اي كلمة حتى الغرفة مايدخلها اذا ما يتأكد نمت اشگد مايريد يخفف ضربة بسطاله حتى لااگعد اعرف هالمرة جرحه جبير فوگ الغدر كل ضنه بعدني احب محمود بس بنفس الوقت مااعرف شنو الي خاله لحد الان ساكت عني

يوگف يمي بالساعات احس بلمساته على وجهي يوخر شعري ياخذله فترة يباوعلي يدنگ ياخذ نفس طويل مني بس يحس اتحرك يبوسني عالكيف يغطيني ويطلع

شعوري مخربط بين احس بحبه وحنيته عليه بين رافضة تصرفاته وبعده عني

كاعدة لامه رجليه عيني بعمتي تصلي دخلت ضي بيدها الفون وخشونه صوت هيذام طالعة من السماعة وهو يوصيها مااتحرك وتاخذني للسيارة بالكرسي المتحرك وضي ترد حاضر اخر شي صاحت تره افتهمت هيذام

- ومرررض صوتج لج

- شكرا

- عينج بيها وتاخذيها گبل على الغرفة وتخليج يمها لحد ماارد

-وانت وين رحت لازم ماخذ المصفحة تونسها

- هو اكو تصفح بالموضوع من اوصل اشوفلجيا اشلون يصير ولي يله واني ماتأخر اكمل شغلي واجي

- تمام بعد اوامر

- هههه اندعي ماتطلع لدغة

ضحكت وسدت الفون كالت عمتي هاا لعد وين راح

ضي - اجته خبارية طلع حسباله يكدر يكملها ويرد طلعت شغلة جبيرة عالحدود هاي اتصل  كال خلي عمتي ترد ويه الحرس وانتي اخذي رئال فريها شوية حتى ترتاح

- ولج البت بعدها ماتوقف كلش النزف ميصير تتحرك

- مااتعبها نظل بالسيارة ناكل لفات ونشرب عصير ونجي ويانه الحرس لاتخافون مااشردها

- والله لو موتشردها يهيذام يطلعج انتي وياها من جوة الكاع ويعلگجن من شعرجن

- عود ميخالف خلي بالبداية نجوي كلبه وانخلي يطفر المهتلف بول تيري وسهل الباقي

- اووف كون يلكفج وانتي تحجين

- احلف مو اني رئال طلعت هذا اللقب عليه

- هيه رئال غير ضال بيها اتجر النفس انوب توكع بيد هيذام ديله يمه اخذيها للحمام  غيري ملابسها خلي المن الباقيات حتى نطلع قبل لاتصير ليل

- اني اتأخر بين مااسبحها روحي انتي لاتنتظرينا وحضريلنا اكل زين هناك تره مانتعشه نعتمد عليج

اشرت اي اجت ضي سندتني اخذتني للحمام دخلنا سبحتني عالسريع ادري بيها جذبت وراح تتعاقب بس حبها الي خلاها تتحمل كلشي حتى طلعني من هاي حالتي

لبستني طلعنه لكينه عمتي صدگ طالعة  مشطت شعري دنكت لبستني حذائي  وكالت يله ابتسمت ضربتني ولزمت ايدي طلعنا الحرس محضرين السيارة صعدنا كالت هسه وين نروح اول

- للشاغع العام بلكي اغتاح شوية

- رئال والله مابيج بجيه بعد

- ماابجي بس اكللهم على حملي بلكي يحسون بالداحس بي 

- اتبشريهم لو تشكيلهم من هيذام

- كلبي مختنگ

اشرت اي انطت العنوان للسايق اخذنا وصلنا لمكانه هوسة السيارت والجهال تركض بالبداية  ماقبلت ننزل من شافتني اصريت نزلت

وكفت اباوع لمكانه فارغ ابتسمت هنا جانت تگعد  تأشرلي عدلي اللثام

درت وجهي منا جان يجي غزوان بيده الكتاب يكلب بي يباوعلي ويضحك رجعت عيوني على مكان بطالتنا احسبهن اشكد ضل منهن

نزلت دموعي احس روحي داودع شكو ذكرى الي تكول گلبي حاسني هاي اخر مرة اجي مثل ماراح  ينمحي شكو شي مريت بي من ذاكرتي

رن هيذام فصلته بسرعة ضي  وكالت يله يمكن عرف رجعنا صعدنا بالسيارة اتحرك بينا واني عيوني بعدها عالطريق احسهم موجودين بعدهم  ويشوفوني اتمنيت اركض انضم بحضنه وكله احميني اني وابني منهم

الدنيا ظلمت الطريق طويل وهيذام كل شوية يتصل خلصنا الشارع العام دخلنا عالترابي رجع اتصل ردت ضي  نعم. واجاها نبرة صوته خلاها بسرعة تعدل كعدتها همست ها هيذام

- موو سهلة توصلييين لولااا ويصيررر خير

- والله هاي وياي قضيتك لاتخاف عليها  كلشي مابيها

- ومنوو سائل عنهااااا ويازمااال كاللجن اطلعن

- شفت ابنك بحالة نفسيه كلت افره شوية وهياتنا راح نوصل دخلنا الشارع المگطوع 

- حظج وحظ ابني ويااج درجعي واعلمج اشلون تتصرفين من راسج يله ولييي

كالها وسد الجهاز بوجها باوعتلها ضحكت

- على شنو تضحكين

ضي - على الراجديات الراح انحصلهن راجديات ومن هيذام وحسبي انتي بعد

- لاتخافين هسه يدخل لغغفة  المصفحة  وينسانه

- دوصلي خلي ياخذ المقسوم من هاي الخدود  المنفوخ  ويعدل اللدغة وسهلة شغلت المصفحة 

عبست وجهي غمتني ودارت وجهه للجام  ابتسمت

مرات ربي يرزقك بشخص گد مواقفه وياك  تحس روحك ماتكدر بدونه يوم  وفجأه تلكي روحك غريب عنه ماتذكر حتى اسمه …

دانتجي وكمزني  السايق هو ويصيح نزلن جوووه الكشششن بسررعة

درت وجهي واشوف سيارات مضللة تتسابق ويه سياراتنا

اتصلت ضي بسرعة اجه صوت هيذام مبين ديورث جكارته من صوت الجداحة اخذ نفس وكال امري ست ضي

- الحكنااا اكو سيارات سود دتتسابق وياناااا

- شنوو سياررااات وين انتتتم

- مااعرف هيذام مضللة واحنا بالشارع المقطوع دنرجع ماكو عالم

- كلت لاتقندرررون وحدكم كلت لاتولووون لج انطيني حمزززه وسحبي رأل جوه الكشننن

انطت الفون لحمزه وجرتني نمنه جوه الكشن واسمع صوته رج السيارة رج وهو يصيح اطلع عالترابي بيهننن راح اتلكاك مناااك

حمزه - سيدي الحماية محاصريني

- انطيهم اشارة خلي يشغلوهم واطلع من بينهم جايييك  اطلعلي على الجهه الثانييية

- حاضر سيدي

- حمزه اذا صار برأل شي لاتردون

مارد انغلق الفون مد ايده من الجام اشرلهم  اباوع لايده ترجف

دار السيارة للجهه الثانية داس بانزين يمشي  بكل سرعته دخلنا الشارع الترابي ومانحس غير ضربة بنهاية السيارة من قوتها اجت تنكلب بيه كوه سيطر

كلها لحظات حمزه دنگ سحب سلاحه ؛  ملثمين يتراكضون ؛ البيبان  تنفتح  واحد سحبني وخله سلاح براسي  

عيوني على ضي الي لامه روحها تباوعلي بخوف بعدني حتى ماصارخة واجتني الضربة بنهاية راسي فقدت عن الوعي مثل مافقدت كل حلم وحداث مريت بي بحيلتي

فتحت عيوني الشمس بوجهي الهوا حار  وصوت حيوانات قريبة

اباوع بيت قديم شوية عني مرة جبيرة تعجن وعلى جهة شايب كلش مدنگ يطحن بطاحونة من حجر

شي بارد على گصتي اتلمست قطعة قماش مبللة وخرتها ردت اكوم حسيت ركبتي شانطه رجعت مكاني عيوني تتجول بالمكان اريد اذكر اني منو

وشنو هذا المكان

احس راسي خالي مابي اي حدث ؛ انتبهتلي المرة ضحكت وكالت ابو شمسس صحت شموسه

صفنت كأنما اول مرة اسمع اسمي واشوف اهلي…

لاتنسون التصويت ❤️