تحميل رواية «شيء من رصيف الدم» PDF

شيء من رصيف الدم

بقلمي :leo Alfatlawi

بارت الاخير الجزء الاول

****رئال****

رؤيا تحجي وماما كامت فاتحة عيونها على كبرهن من الصدمة اشرت شنو جاسم

رؤيا - والله هذا الصار وهااا احنا ماجبرناها بس خيرناها مع العلم نصحناها بس هيه ضلت مصرة قابل نكسر بخاطرها ونعترض طبعاً لااا مهما يكون تضل بت خالنا العزيز

ماما -بشنو خيرتيها ولج وخليتها هيج تشمر نفسها

- شمرت نفسها شنو ليش تحسسيني جاسم موخوش ادمي وين محصلة هيج واحد موجانت تتزاود وياج عليه وهاي احنا سلمنا الها على طبق من تعفن وفوگه هدية بيت البتاوين

-رؤياااا بشنو ساومتيهاااا

-بين نشتكي عليها وتدخل السجن واكيد القضية تتسلم بيد ضابط ابو درع او تاخذ جاسم وتعيش حرة

-واشلون صدكت بيج ووافقت

-غصباً عن عشيرتها مااگلج مالطمت وملخت نفسها بس من شافت الشرطة جاين عليها واني وهجامة اتحضرنا حتى نشهد كالت موافقة بس لاتخلوهم ياخذوني

راية - شنو موقفها من شافت جاسم

-نفس موقف جاسم من شافها وتقزز منها وعقد عليها وهو ابو الراهي بحيث اول ماطلع الشيخ تفل بوجها

-اشلون صارت حالته

- يعني هو رايح الالم بس شكله مرعب ومقعد يزحف زحوف عايش بين القذارة؛ اخته ماتوصله غير مرة وماصدكت شافت غيمة عوزها تهلهل خلصت منه

-اخاف كم يوم وتنهزم

-وين تولي مشوهة ومعاقة ولا تخافين اخت الحيوان كاعدتلها كعدة لان تريد تخلص من خدمة جاسم وهاي جمعنا راسين بالحلال يعني شنوو رئوول

همست يعني ضمنا بيت بالجنة

راية - مو بيدجن يضل رسجن يهودي مطعم بالمافيا

رؤيا - والله جنت خايفة من ذباح مايقبل صار اسبوع اتوسل لحد مابدأت ائيس مصمم يجيبها وياخذ حقه عن طريقته الخاصة

- وهذا الجنت متأكده اشلون قبل

- سولفتله اشلون باعتج واشلون جانت تعاملج وذكرته بزواجج من ابوطبر ؛ وحجيتله عن عيشة جاسم والخدمة بذل اشلون تسوه راحة السجن والاكل النومة بأمان بالف مرة

-بس غيمة ماجان الها ايد بموتت هيام لان هيام صدگ ساحبها الماطور وهيه الجلبت بيها

-بس هيه الدخلت الولد على رند وخلته يغتصبها لحد ماماتت

-اشلون خليني هجامة تشهد زور

-انطيتها ثوب رنود وكلتها اخيتي جوعانة تريد خبزه اذا عندج انطيها بلكي تبطل بجي وتنام

نزلت دموعي اخذت نفس مدت ايدها مسحتهن وهمست هاي العيون بعد ماتشوف غير الراحة خلص الكابوس الجنه بي وهسه لازم نعيش ونعوض نفسنا عن كلشي مرينا بي

همست بكسره والراحوا منو يعوضنا عنهم

-الي اخذ منج لوماجان ضاملج عوض يمسح دمعتج ويرسملج مكانها ضحكة ماكسر كلبج عليه

-محد يعوض مكانه

-بس يملي وينسيج بأول كلمة وهو يصيحلج ماما ماراح اضغط عليج ولااگلج شي غير انطي فرصة لنفسج لاتظلمها اكثر وهسه يله لازم نروح لان بابا منتظر

-لاروحوا انتي ورئال اني انتظر عمتي فشلة لازم اسلم عليها

-ههه تسلمين على عمة لو تتشكرين من اخوها وتودعي

سكتت ودنكت

-قررتي ونهيتي الامر مو ؟؟

-لان مااكدر اظلمه وياي

-تعودتي على وجوده بحياتج ماراح تكدرين تبتعدين عنه حتى لوفكرتي تنسي كل ماتشوفين طفل راح تذكرين لهفته لابنه الي خسره علمودج

-لان جان غلطة

-غلطته الوحيده حبج لاماحبج ذباح عاشگج ومستعد يسلم روحه للموت بكلمة منج موبس يبتعد اذا طلبيتي منه؛ بس مايستاهل تعذبي هالشكل

-كافي رؤيا

-براحتج احنا رايحين بس لا تنتظرين ماراح يجي لان مايكدر يشوفج وانتي تهدي بگلب بارد بعد ماهد الدنيا لخاطرج

اباوعلها دارت وجهه عيونها مليانات دموع؛ اشرتلي رؤيا يلااا

هزيت راسي لزمت ايدها سحبتني مشيت وياها تركت رايه وراي بدون لااحجي وياها لان ادري بيها محتارة اشلون تعتذر وتشكره بنفس الوقت

طلعنا لكينا بابا واكف تكول ممثل عصابات هوليود مطبگ رداناته امجتف ومنتجي عالسيارة شخصيته صارمة ولون شعره ويه نظراته غصباً عنك تخليك تفتخر وتحسه الرعب الراح يسحگ الكل لخاطر يحميك

اباوع لعيونه جانت عالباب كلها لهفة كأنما منتظر احد يطلع ورانا من شاف بس احنا اخذ حسره ونگ عدل وكفته فتح باب السيارة وصعد احنا هم رحنا صعدنا شغلها بدون لايباوعلنا لو يسأل مثل المتأكد هالشي

رجعنا للبيت على طول الطريق ساكت لحد ماوصلنا ركن سيارته يم الباب نزلنا دخلنا للبيت استونا دنسأله شوكت يجون وسكتنا على منظر الطارمة

وكفنا متفاجأين على كمية الهوسة مگلوبة كله كراسي وطبلات باوعت الهن رؤيا وردت باوعت لبابا ؛ رفع حاجبه واشر شكو

-اصلاً جنت اتشاقه وياكم انتوا ليش هيج صدكتوا بسرعة بابا جذب ماريد تزوج

ابتسم ودنگ راد يروح للمطبخ ركضت صرت كدامه رفع راسه باوعلي بحسرة همست شبيك بابا

- مابيه شي راية ليش مااجت

-تريد تودع ذباح

-هه ماخذه طبع امها بالانانية وصلابة الگلب

- بس بعدهن عيونك عليها

-وادري ماترد واسنين واني اسولف لگلبي بس جيبي اليقنعه

-مجغوحة منك

- ماجرحتها ولاعمري فكرت أذيها ضحيت بنفسي حتى احميها ضيعت عمري بمكان موالي بس حتى ارضيها و يبرد كلبها عني

-شنو سويتلها

-وداعتها الي ماعندي اعز منها بگلبي مااوصلت يمها؛ ماكو واحد يأذي روحه وهيه موبس روحي عيوني الي اشوف بيهن

-لعد ليش هيج كاغهتك وبعدتنا عنك

-لشغلة مالي ايد بيها وهيه متأكده منها بس صفت ويه الغريب عليه وشمرتني بتهمة وعاقبتني بالموت بس لان حبيتها من صدگ وسلمتها رگبتي

-بعد كل هذا ولسه تحبها ومتأمل تغجعلك

-ماكدرت اكرها سنين واني عيوني بالباب كل يوم اكول هسه يرف كلبها وتجيني اغمض عيوني اتخيلها اجتني وتلكيتها ضميتها بحضني وشكيتلها فراكها شسوه بيه

-هلكد تحبها

-ماحبيتها اني دخلتها روحي وتقاسمت وياها العمر

-جانت تحبك بكد ماتحبها ؟؟

هز راسه ماادري

-غاح تجي وطلع كل الي بخاطغك كدامها

-اطلعها من كلبي اسهل

-شنو يعني

-يعني من تجي لاتخلوها تروح خلوها يمجن اني الي اطلع

-وتعوفنا من جديد

-اشلون اعوف اميراتي صح ابعد شوية بس قبل لاتعتازني تلكني بظهرجن واشوكت ماشتاقيتلي تعالن تلكني منتظرجن

-يعني هاي هيه حسمتها

ابتسم وهمس من زمان انحسمت بس الواحد كد مايشتاگ يغشم نفسه لحد ماينصدم صدمة من قوتها تصحي وترده لحساب اسنين ليورا

وخرني عن طريقه ودخل وهذا الثاني هم اخذ قراره وبدأ يحاسب نفسه على سنين جان عايش بيهن بالوهم

انداريت لرؤيا الي تاكل بشفتها اخذت نفس واشرت شنو هسه

رؤيا - جان المفروض حتى احنا نحاسب ماما عالسوته بينا واشلون خلتنا نعيش كل هالسنين بذل وظلم

-ماتعغفين شنو البينهم

-ولااريد اعرف حتى لا اكره ماما مهما صار جان المفروض تفكر بينا مااكلج بابا ملاك لا واحد غاضب ربه بكلشي محرم بس الي يحب بهالشكل هذا مستعد يضحي بروحه موبس ينعدل ليش ضيعته وضيعتنا ويا

-لو جنتي بمكانها واكتشفتي دساغ نفس شغل بابا تقبلين تضلين ويا

-وانتي ليش مقتنعة انو زلمنا انظف من ابونا اذا بابا يغلط لخاطر يعيش ذولاك لااا لخاطر يرضون غريزتهم الحيوانية ويشبعون طاقة الشر داخلهم تره هيذام اكبر مجرم بالتاريخ مضروب بي المثل بشاعة تعذيبه تدرين كم واحد ميت جوه ايده لولا

سكتت

-ودسار مو اقل منه شر اذا هيذام كدام العيون يشتغل دسار بالخفي تعرفين على كم منظمة بيع للاعضاء ساكت عنها وكم واحد ديموت كل يوم بسببه بس لخاطر يوصل عن طريقم للاكبر منهم انوب عود يرجعولهم من تگليله ليش ساكت يكلج لازم نسيطر عالراس الجبيره حتى نقضي عالباقي

- وذوله اثنينهم ما يأذون الماعنده ذنب وكل اليموت جوه ايدهم يستحق الموت جنتي بنص البتاوين وتعغفين شنو همه اذا احنا فقدنا اثنين هناك اكو ناس فقدت عوائل

-مااگلج مايستاهلون بس داكلج لاتحكمين على احد انتي ماتعرفين عنه شي وبابا ما اشتغل لا بالكتل ولا بالتسليب ولا حتى بالممنوعات وهذا شغل الرجولة والشطارة محد يقربله غير الزلمه وساحگ بالموت لهيج ضيعوا لان مثل هذا يوقف شغل حثالة هواي

-هسه شنو نسوي

-ابوج جذاب لان اليحب ماينسى ولا يتنازل لو تخلين السجينة على رگبته وهسه اثبتلج

-مافهمت

-راح اتصل برايه اتفق وياها احنا نطلع وهيه تجيب ماما بوقت الي يرد بابا وتحبسهم جوه داشوف اشلون واحد راح يدير وجهه عن الثاني

-وين نغوح

-انجدي لو نبيع مي بالكبور اي مكان

-امداج بلكي اعيالج يشوفوج حتى يغسلون وجه دساغ بالتفال على هاي القسمة

- تركي التجدي وتعالي نسلب والله بيها خوش افلوس

- مو بيدج اتحبين التلطلط بالشواغع عوفج من هذا عقلج المعفن وتعالي وياي لبيتي ناخذ ضي ونطلع نشتغي كم شغله النا ولماما وهم اعدل شعغي

-بس بشرفج خلينا ندخل اريد اسلم على شريجتج ذيج المره مالحكت اخذها لحضني

- شكد شفت ناس ماذية بس مثلج هيج ينتعش على المشاكل ماكو

- وقز القرط غير ادافعلج ضايع بيج المعروف صدگ من كالوا اتفل بوجه قبل لاتسويله شغلة حتى اذا نسى وكفتك تذكره التفلة

- امشي لج دناخذ فلوس من بابا هم يالله حتى نلحگ نغجع ونظف

-روحي انتي بين مااخابر راية

هزيت راسي دخلت جوه هدوء ماكو صوت رحت لغرفه بابا دخلت لكيته كاعد منتجي على رجليه مدنگ بيده مثل القراصة يحرك بيها

على صوت دخلتي رفع راسه عيونه حمر والهم واضح عليه؛ بسرعة ضم القراصة بجيبه وكال ها يروح ابوج رايده شي

- اي اغيد افلوس اطلع اشتغي كم شغلة

- تأمرين بس انتظريني دقايق اروح واجيكم

- لاا اذا ماعندك افلوس مااغيد لا تداين مابيهن شي ملابسنا

- بناتي مايلبسن غير من احسن الماركات ومايعيشن غير اميرات

صاحت رؤيا جنك حميت ياابو البنات

- بلكي تذكرني بخير وتكولن ابونا سوه كل الگدر عليه ماقصر ويانا

همست والله مانذكغك اذا عفتنا من جديد

- لاتذكرني بس لاتكرهني ولاتصدكن اي كلمة تنگال بحقي لان جنت خالجن بين عيوني بكل خطوة اخطيها؛ وانطيت روحي واعترفت على شغلات تكسر الضهر بس لخاطر احميجن

- حتى لو جنت اسوء واحد بالدنيا انت بعيونه احسن اب وعمغنا ما غاح نحاسبك على شي غيغ بعدك عنا

-امجن احق بيجن مني

نزلت دموعي ابتسم كام حسبني لحضنه دخل رؤيا اجت طايره ضربته وصاحت اصلاً احناا انكرهك ومانريدك يمنااا

بابا -حتى اني مختنگ من شوفت وسخ وجهج كدامي

-لعد ليششش رجعت

-غلطة

- اتمنيتك مو ابوي جان علمتك اشلون تكول غلط روح لك ولا ترد بعد

- هههه رايح يالخرزة تأمرين بس قبلها اكرص اذن الزمال الراح يبتلي بيج واسلمج بيده

-هم راح يستضعفني و يظلمني

-اشوكت ماحسيتي بي تغير مو سمعج كلمة هفي دفره وردي لحضن ابوج وانعل ابو اليطلع ورا لابو اليردج اله

باوعتله صفح ضحك وفتح ايده ركضتله لحضنه ضمنا دنگ بوسنا وهمس اووف يبعد ابوجن اشمعزتجن

رؤيا- اوعدنا ماتعوفنا حتى لانرجع ننكسر

-بنات ابوجن حتى بغيابه قويات وهسه يله وخرن لاتأخرني وجهزن نفسجن حتى اول مارد اوصلجن لان عدنا هواي شغل

- هسه نرتب الطارمة

- لاتركن كلشي راح اجيب عمال يرتبون بس حضرلي لكمة لان ميت جوع بدون ريوگ لسه

- رايه واليهودية راح يوصلن خلينا نستغلهن لان شكلهن مو مال دلال مال واحد يكرب عليهن ويسحل بوجوهن هذا المتباهيات بي الگاع

- بطلت لاطبخون اني اجيب وياي بس اتحضرن

- لايا ابو گلب الحنين سمعت راح اتعبها بسرعة انسحبت لا سبع خوش هدات بيك ابو عكرب

كز على سنونه عصر وجها دنگ باسها ؛ دمغها وطلع هزت ايدها وهمست والله هواي على ماما بس شنسوي حظ عدها اليهودية

اخذت الفون دزيت مسج لامجد يجينا ورجعت اتصلت بضي تحضر نفسها

وكفت اتلفتت بالبيت كله نظيف ميعتاز شي انداريت دفعت رؤيا طلعتها بره حتى لاتوسخ بين ماسديت باب المطبخ درت وجهي لكيتها بالحديقة مدنگه تشلع بالثيل اني هم گعدت خانسة عيوني عليها لان ادري بس احجي انكتل ومحد يفزعلي

مر الوقت واني على گعدتي عيوني تتنقل بين الحديقة الدمرت عشيرتها وبين هوسة الكراسي والطبلات المطشرة شايله همه اشلون راح يرتبهن وحده لمن انفتحت الباب دخل هو ويا واحد افريقي ضخم شكله يخوف مبين من جماعة المافيا

طفرت رؤيا تلكت بابا كمت رحت وراها اباوعله انطاها افلوس دفعت ايده و همست مااريد افلوس اصلاً الزواجة كلها كنسلها بس شغلني يم هذا والله افيدكم ايدي خفيفة بالبوگ حتى بالتسليب شاطره

بابا - اي يروح ابوج بس بالبداية ضمي الحكومة بجيبج حتى طفرتج تصير اخف

-هيج تكول

- اي ويله طلعي لان حماية اللدغه منتظركم ولاتتاخرون وعيونج بأختج لاتخلين رجلها يضحك عليها بكم كلمة ويدخلها لبيته قبل لاينسحل

- افاا ابو عكرب بدون لاتوصيني غير الله جابه اذا ماطلعت ايام التحقيق من عيونه مااتسمى خرزه البتاوين

- مزبلة البتاوين يبعد ابوج

- هذا نفسه وجهي الوسخ الماعاجبك وگع اشطر واحد بالمخابرات

- نفس الوسخ ونفس اللسان منين اطلبيها يبت اليهودية

- عزه والله عرفتك من كل دقيقة تغسل وجهي جنت مضطهد بوساخة وجها

- وياريت غزر وياها صرفت عليها نص نهر دجلة تالي سلمتني تسليم اهالي

- امسحها بوجهي هيه دوم مفشلتنا كدام الغرب

-وجهج مامعوز قذاره يبعد ابوج يله انقلعي

دفعها صاحت موصوجك صوجي اني الكلت خطية يجوز عنده مشاعر خلي اواسي

دنگ شال الكرسي طلعت تركض هز ايده شمر الكرسي جرني دنگ بوس خدودي ودفعني وراها

طلعنا وهو عيونه ورانا يباوعلنا ويبتسم احس حنية الدنيا كلها بعيونه صعدنا بالسيارة حركها امجد بدون صوت طلع بينا يمشي بلا نفس لحد ماعبرنا الشارع باوعلنا بالمراية واشر سلااام

رؤيا - هلا بالسبع اليسلم بالختلات

-اذا ابوج رافد الدغش ورجلج ابو الليل ناقص بس امج تكون من جماعة الويب

-مابعدت هواي اترك سوالف الكبار اشمرلي جكارة

- من گبر جدي اشمرلج بهذا وجهج المصندح حتى ثواب مابي

-امجد اطلع بالنظيف

-ورقي الجكارة بالف لان السوگ صاعد هالايام

- خايب ماتنجب جاي تسفطهن علينا واحنا ولد المنطقة

- ماطولج هيج يله وهاي السياره وكفت نزلي اشتري

- حتى تصورني حيل اشكد قديم انت لخاطر ربك كمل طريقك وحافظ على ملامح وجهك افضل مااخليهن بجيوبك

- انوب اسمها رؤيا انتي محيسن هواي وياج بربج شكاتبين بهويتج

- كسارة روس الزم

-من هيج جنج كرك مزنجر

-اني لوعندي وجهك اختل بالحمام مواطلع واسولف خرب بالثقة الخلتكم اطفرون جنكم ذيل بريص مطبور وانتوا واحدكم هواي عليه اسم فرخ طراح

- مال اتفل بوجه اللدغه على كد النعوصة السطرت راسي بيها وهيه تصيح اين اهلي من هم اخوتي امداج بين الثولان يله هاي اختج لو ضاله على فقدان الذاكره مو احسلج

- حقها تلطم اذا فتحت عيونها شافت زرافة ضاربها شرجي شتريدها تكمش سبحة وتسجد شكر اكيد تلطم على قسمتها وبعدين يله لك راح نوصل اشمرلي جكارة

- ماعندي ولي لج

-تمام بس خليك متذكر راح تعتازني

-وكتها تفلي بوجهي

هزت راسها سهلة وانتجت ساكته عيونها بالشارع مااعرف ليش حسيتها دتحضر مصيبة بس جذبت نفسي اتجتفت اباوع للطريق لحد ماوصلنا يم بين ضخم يمه طفل يرش بالباب عدلت گعدتها بسرعة و صاحت اوكفف

امجد - خير

رؤيا - هذا بيت صديقتي نزل صيحها تريد تجي ويانه

-اشلون اصحيها زحمة نزلي انتي

- شنو زحمة ذاك الطفل كله روح صيح للحبابة يله خلي تجي وهسه اصلاً تلكيها منتظره لان انطيتها خبر قبل لااطلع

-اسمها حبابة ؟؟

- اي لايكون هم ماعاجبك

هز ايده ركن السيارة ونزل تركها مشتغلة ؛راح يم الطفل يسولف كمزت للكشن الثاني سدت البوب وقفلتها عرفتها ورطته

اباوع دخل الطفل يركض وهو اجه راد يفتح الباب لكاها مقفولة دگ الجام وكال ماعدهم وحده اسمها حبابة

رؤيا - ياحبابة هاي ابني انت ماتستحي صدك جذب راح للعالم وتحجي بشرفهم

- انعل ابوووج ولج رؤيااااا فتحي البااااب

-روح لك

-لج دخل يصيح لابووو

-اي خلي يطلع يأدبك شاب جيس اسمنت ماتخجل على نفسك من رحت دكيت الباب وتكلهم صيحوا للحبابة على منو تقصد امهم لواختهم

- خرررب بضميررج اذا عندج ضميررر لج راااح يطلع رؤيا فتحي لاتصيرين زعطوطة

- اني زعطوطة موو؟ يله خلي اشوف الزلم شتسوي

- لااامروتج اخيج اني

- الجكاير والجداحه بسرعة

هز راسه دنك يطلعهن وعيونه عالبيت دك الجامة فتحتها شوية اخذتهن من

اندار يركض لجهه السايق دگ الباب حيل انتجت صاح لج رئااااال فتحييي

رؤيا - كون صدك وتفتحها حتى امرعطها وانت كافي صوتك لاتزعجنا

- لج قندرررره

- كلت اذا اعتازيتج تفلي بوجهي وللاسف ماعندي تفلة هسه انتظر بين مايصير عندي

دفر الباب شفت الولد طلع فتحت الباب بسرعة دفعها عالكشن الثاني وصعد بدون لايسد الباب داس بانزين

سده هو ويشتم عدلت كعدتها خلت الجكارة بحلگها ورثتها وانتجت ادخن وتباوعله بشماته

استغفرت هيه بدون كلشي اشلونها انوب اكو من اليعلمها ويسندها عرفتها انغسل حظها

وصلنا للبيت نزلنا دخلنا جوه صارت كدامنا ضي صاحت صارت طلتج علينه تنحسب

-اعوض ايام الحبس

- هم صدگ اني منج حتى مااجي بعد

-لااكو بعد ناس هنا لازم اغثهم

ضحكت واجت حضنتني ورجعت سلمت على رؤيا داكلها يله واسمع امجد كال شوفي منو جبتلج

انداريت واشوف عمي ابو امجد واكف يمه لاارايدي نزلت دموعي وركضت لزمت ايده سحبني باس راسي ضحك وكال بعدج ام دميعة

-اشكد مشتاقتلك عمو

-من هيج اجيتي وسألتي كلتي خلي اروح اشوفه هذا العلقته بيه وعفته

-والله دوم على بالي بس هواي اشياء شغلتني

-اشلونج شموسة

-زينه بكد شكغي الك على ذيج الايام وحنيتك العوضتني عن حضن اهلي بايام جنت ناسيتهم

-ادري تأذيتي هواي بيتي ومالي عين اجي اشوفج بس والله ماكدرت اشتاقيتلج هواي

-لوماانت جان هسه اني ويه الاموات تفضل عمو جوه

- لابابا مايصير ممنوع ادخل بيته بس كلبي طگ كلت بس اشوفج حتى لومن الباب اطمئن عليج واروح

- من دخلتني بيتك وكلها ماقبلت وكفت بوجهم لحد ماصغت زينة وسلمتني لهيذام وهسه دتكول ممنوع ليش تزعلني منك وبعدين هذا بيتي يعني بيت بنتك اشوكت ماتجي تدخل ماتسمع غيغ التغحيب

ابتسم

-اووف لوتعغف اشكد مشتاقتلك

-وعلي مو بگدي

اخذت نفس ولزمت ايده اخذته للحديقة ركضت عدلت الكرسي واشرتله تفضل

ضحك دنگ باس راسي وكعد كعدت يمه لزمت ايده اباوعله مامصدگة تگول انعادت ذيج الايام مرة ثانية مو اشوفة گدامي

اجت ضي كعدت يمنا ثواني واسمع علت الاصوات درنا وجها لكينا امجد يسحل برؤيا ؛هيه تضرب بي وهو يجر بيها من شعرها لحد ماوصلوا يمنا دفعته علينه وصاحت عموو الزم ابنك لااخربط وجهه

عمو- ههههه عوفها لك

امجد- قصدك عوفه يابه هاي ذكرر ذكر مو انثى

رؤيا- اهووو هسه تكتله يكوم يبجي تركه يضل يلغث

امجد - جنت اسمع القردة قوم متحول بس هسه تأكدت

- امجد وكلام الله امطلك بالكاع ادوفك دوف بيها لم حلگك وكعد يم ابوك لان فشلة اكتلك كدامه

عمو -ههههه ولاوعلي اذا انتي مره كتلي لان صدك عوزه وحده تفرك حلكه

اشرت على عيونها حطت الجكاره بحلكها طبكت ارداناتها واشرتله تعال

امجد- روحي لج لااتفل عليج وانوب تغركين والضابط دسار يحسبج براسي مره

عمو- شنوو الضابط دسار ولك

- غير هاي مرته اخت هالدغة اليمك

كام بسرعة وكال اعتذر ست والله ماعرفتج

رؤيا -لاعمو صدك جذب هو دسار شبيك كمزت دكعد

امجد - استلم وانوب تكولها بستهزاء صدگ هو شنو كله ضابط مخابرات برتبه…

عمو - انجببب واحجي عدل وياها

- مقتنع انت وياها دشوفها اشلون تسحب النفس جدي عطيوة ماوصل لهالمرحلة بالتدخين

صحت صدگ عموو ذكغتني امجد يضم جكايغه يم قفص الدجاج

امجد - لايابت المهلوس

- عززه دتغلط على بابا انت تعغف بابا شنو يشتغل

- اذا الحكومة كلها بحضنه قابل شيشتغل شيخ جامع

- شقصدك

- قصدي اسكتي لان اجت حلاوتهم

شلت راسي واشوف هبة جاية هيه وعمتي رحمة يتمشن بتراك خفيف بعز البرد والشعر شايلته ذيل حصان ومكياج مبينة الترافة على خلقتها همست انعل ابوك هيذام المهتلف

امجد - حمم

وصلن يمنا كمت اجت عمتي سلمت عليه وراحت لرؤيا رجعت كعدت دغتني من ورا درت وجهي اشرت شكو

هبة - شنو ماتعرفين تسلمين لو خرسة

قبل لاارد كامت رؤيا راحت يمها نفخت الدخان بوجها وهمست لاهاي ولاهاي بس ماجاي على بالها اسلم عليج اكو اعتراض

- ومنو انتي بس ذكريني بأسمج

- ليش تردين طلعيلي هوية

-هااا رؤيا ذكرتج

-خرزة البتاوين تاج راس الخلفوج اختهااا شنو لج لايكون ماعاجبج

- اووي شنو هالالفاظ واني داكول ابني اشلون رجع يلفط كلمات بذيئة

- هاي البذيئة تلفيها وتخليها بحلگ ابوج بلكي يسترجل ويجي ويكول لرجلج ليش هيج ساحگ راس بنتي

- انتي اشلون تحجين على بابا بهالشكل

- وليش دتحسسيني ابوج مفجر الجسر لج بنتي العدها مثل ابوج ماتسولف

-داشوف ابوج منو

-مرجف شوارب زلم وموكف رتب على تك رجل الي يسحب بناتك ويتحده زلم بس ذكر اسمائهم قضية هذا يتسمى فحل واسمه فخر مو مخلصها مرجلة عالفاضي وتالي انسحل مثل الجريذي

-مالي حجي وياج يجي هيذام ونشوف شديكول من يسمع هيج درع وينه

كمت اشرت شنو

هبة -سمعتي اكيد

-والله ماسمعت غيغ اسم ابني

-منين اجه ابنج

-بنفس الدقيقة الي اتفقتي انتي وابوج ادزون عالم عليه حتى تخلصون مني وخليتوني افقد امومتي

-يعني شنو؟؟

-يعني ولي من وجهي حتى لاخليج تلحگين الباقين

-ومنو انتي وطرديني

-صاحبة هذا البيت وام دغع والي عنده كلمة خلي يجي يحجي بوجهي دااعلمه اشلون ينكتم

-من شوكت طلعلج السان

-بوكت الدخلتوني هنا غصب وحلفت اضيع لمتكم الوسخة

- هسه اخابر هيذام وداشوف اشلون تتجاوزين على اهله

ضحكت بستهزاء دفعتني بعدها مامتحركة ولسعتها رؤيا بالجكارة صرخت بعلوا صوتها

حسيت صرختها اجت براسي سديت اذاناتي؛صكت على سنونها رؤيا ودفعتها بكل حيلها انشمرت مسافة كوة سيطرت لاتوكع عدلت روحها رادت تحجي خزرتها ورفعت الجكارة بسرعة اندارت راحت وهيه لازمه ركبتها

كامت عمتي گالبة خلقتها لحكتها رجعت كعدت مرتاحه همس عمي ليش بابا هيج تعاملنها

رؤيا - ماسمعت اشلون زعجت النعواصه بصوتها وبعدين بتنا ترفة مربيها عالدلال مامتعوده على هيج كلام يخدش مشاعرها

-ميخالف يا بابا وانت شموسة ليش هيج تراددين تالي يأذوج

- لاتخاف عمو ميگدغون يسوون شي كل قوتهم يتصلون بالمهتلف

امجد - الي هو الضابط هيذام احمم اني اكول ياابتي هيا بنا الى المنزل

رؤيا- اوكف قبل لاتروح اشمرلي جكاره ثانية

امجد - اشمرلج سم ويله تره تأخرنا لازم اردكم قبل لاابوج يتحول

- يله ضيونه كومي وياي وانتي ام لدغه لمي شكو شي تعتازي لان مبينه كعدتج عدنا راح طول

اشرت اي

راحت واني باوعت لعمو ضحك وهز ايده

-شبيك عمووو

- تغيرتي هواي

-لاماتغيغت بس جنت فاقده الذاكغه مااذكغ اشلون اخلاقي

-هههه الحمد الله من جنتي ناسية اذا بت اللواء هيج تحجين وياها جا سعديه شلون

-صدگ اشلونها

-معارك هيه ورجلها نهار وليل كرهونه بعيشتنا ماكاسر خاطري غير امجد كبر ولاعنده امكانية ويطلع ولاهو يقبل يتزوج يمنا كد ماعشرتهم مكروهه

- صدگ تحجي هذا المشتمل خالي هسه بس يجي هيذام اكله يسوي اله

-بروح موتاج

-والله عمو اصلاً يكيف لان اكثغ شغله هو مخلصه وحتى دغع تعود عليه

- مرات ربك يكافأك برزق حتى يشوفك اذا تستحق نعمته وتستاهل يدخلك برحمته وهذا الرزق جانت انتي

ابتسمت ولزمت ايده

ضلينه نسولف نسترجع ايام زمان ساعة نضحك وساعة نتحسر لحد مامر الوقت وكال ويله لازم اكوم لان عندي واجب

- فدوه دوم تعال وكلشي تعتازه اتصل عليه امانه من افلوس شغل واحد مضوجك مكان ماعاجبك اي شي اذا صدگ حاسبني بنتك

-واعز والله انتي شموسه الي اخذت كلبي برائتها ولدغتها

-لعد بعد مااحلفك وامجد لاتشيل همه هذا اخوي

-وهو هم حاسبجن خواته الهيج ماخذ راحته بالشقه وياجن يكلك الكلب مايرتاح غير يم اعزازه يله بابا اني كايم ديري بالج على نفسج ولاتگطعين بيه

كمت سلمت عليه باس راسي وراح

رجعت كعدت انتجيت المكان هدوء ووحشة اي صوت ماكو تحسه فارغ بدون روح ؛اخذت نفس اتجتفت صار المشتمل كدامي مر شريط وكفتي والرجفة لازمتني واني اتوسل خايفة من شكل اسماعيل

فتحت عيوني انداريت عالحديقة هنا جانوا كاعدين وصوت ضحكهم وين واصل واني بينهم لامه نفسي امسح دمعتي قبل لاتنزل لايشوفوها ويعاقبوني بأهلي

ابتسمت هذا هيذام يدخل يسحب الكرسي ويكعد يخلي رجلي عالميز كدامهم بعدم اهمية وعيونه عليه نظرته بيها انواع الانتقام بس ماشفت منهن غير الحماية والتضحية

انداريت للبيت منا دخلت اخطي خطوه اول تحدي واني اوعد نفسي راح انتقم منهم

غمضت - شيصير لو منهزمة وماداخله ؛ يمكن جان غزوان بعده عايش وجان مافقدت امومتي جان ماعشت كل هالوجع

اخذت حسرة طلعت من كلبي رفعت راسي باوعت للسما شنو جان عوضي من كل هذا

فززتني عمتي وهيه تكول جان حسبتي حساب الي واحترمتي وجودي

مسحت وجهي وكعدت عدل اجت كعدت يمي باوعتلي بزعل

اشرت شكو

- لاماكو شي وهاي اني من الصبح لسه اتوسل بهبة حتى تحجي وياج وتصيرن خوات لخاطر نعيش براحه اشو البيت ماضل بي بس انتن شرايده بعد

-واني الله كافيني بثلاث خوات ماغيد بعد

-ياا عود شگد حجيت وياج وترجيتج بلكي الله يرزقجن وتخاون درع

-قصدج تخاوي هيه لان اني حغمتوني من هالنعمه

-انتي وهيه واحد لان ابو هيذام ماكو فرق

-عمه شغايده

-اذا تحبيني ترحين تراضين هبه ومن يجي هيذام تحجين ويا تره هيذام ينفسه طفل بس يخاف على مشاعرج

-هيذام غايح الها بغيابي مو

-يعمه هيذام يحبج الج وحتى لو رايح انتي تعرفي موبحالها بس لخاطر يخاوي درع

-ميحتاج بعد احجي هاي هيه الله يهنيهم وصدگ ليش حتى احغمه من الاطفال

-والله يعمه بس اول الايام صعبة هسه تشوفين بس يجي الطفل وتلتهين بي حتى هيذام بعد مايهمج دخل يمها لولا

- هو اصلاً ماغاح يهمني لان ماغاح اشوفه بعد

- شنو قصدج

مارديت سحبت الكرسي كمت رحت للبيت دخلت احس النار تسعر بكلبي صعدت فوگ صارت بوجهي طالعه من غرفتها بيدها فونها تهمس بهدوء وتضحك شافتني عضت شفتها درت وجهي

دخلت للغرفة سديت باوعت لغراضه وملابسه المعلگه غمضت صارت صورته كدامي وهو يأشرلي على اديه ويضحك بمعنا ماتركج اذا مارد اكلبجج

ابستمت ونزلت دموعي

وهاي رجعتلك رتبتك ماضلك شي يمي

مسحت دموعي عالسريع فتحت الكنتور طلعت الحافظه اخذت ضفيرتي والسوار وكتابي خليتهن عالميز طلعت ركض للمكتب دخلت اخذت كتاب بابا ودفتر مذكراتي فتحته باوعت واصله اخر صفحة اجه صوته بأذني هو ويكول مااعرف ليش خايف منها شتكولين لونشلعها وتختمين لهنا

همست لان جنت تعغف غاح يكون نهايتنا بيها

سديت الدفتر وطلعت رجعت للغرفة خليته ويه غراضي بداخل الجنطة واسمع دبجة بسطاله على الدرج مسحت عيوني بسرعة وسديت الجنطة شلتها انفتحت الباب صار بوجهي وكف متفاجئ من وجودي قبل لايحجي دفعته دااطلع لزمني واشر وين

رفعت راسي باوعتلها غصباً عني نزلت دمعتي عگد حاجبه -شكو بابا

- ماكو شي وخغ داغوح

- منو وياج

- محد وخغ هيذام

-وين تردين

-لاهلي

-يااهلج انتي منتبها لروحج لو لاا ؛ماتحسين نفسج زوتها ليش اجبريني اتصرف غير تصرف وياج

- كلشي ماتكدغ تسوي

- وكلام الله راجدي واحد خلي روحج ترفرف ويه الملائكة رأل لاتختبرين صبري

- طلگني هيذام

-شبيج بنتي

-لاتكول بنتي اني موبنتك دااگلك طلگني

-تعرفين ماحب اعيد السؤال منو وياج احجي

-وتعغف ليش لان عمغك ماغاح تحسبني غيغ المتهمة مالتك

- اهاا هناا الحجي وصلج الخبر

- لعد انت شكد حيوان وبدون احسااااس

-وهسه المفروض انكتم

-غصبا عليك تسكتتت لان انت موبس حيوووان لااا وبدون ضميغ ومنحط وسافل وبلا احساسس

رفع حاجبه

حرگ كلبي بالزايد ضغط على سنوني وضربه بكل قوتي لزم ايدي رجعت ضربته بالثانية وصرخت الله ياخذذك

ضحك وجرني لحضنه بقوه دفعته ضغط عليه اكثر وهمس اشش كافي بابا

-وخغ هيذذاااام

-على شنو كل هالحرگة

-لان طلعت حماغه وحبيت واحد مثلك

- هاي شنو ورا كل السويته بيج بعدج تحبيني

-لان حماغه

-هذا الشي مانختلف عليه

-وخغ هيذام اغجع لزوجتك الله يهنيكم صدگ اني دخلتي جانت غلط وجه الوقت اصلحها

-انتي الضاهر من كثر ماالغدر يمشي بدمج بعد ماتفرقين بين المعاشرتهم هو المفروض هسه اربطج وارفعج فلقة بس راح اعبرها الج واسوي روحي ماسمعت وارد احلفلج بمعزتج مانيم بحضني ولا احضن غير التراب بعدج

-لاتجذب عليه هيذام

-وليش حتى اجذب شنو بس لاخايف منج لو مصدگه بكلام ابوج يكدر ياخذج مني كفيلج محمد مايطول بيده دقايق مكالمة وحده اهفه مؤبد واشمرج بحضنه وشوفوني قدراتكم الخارقة

-تهددني هيذام

-والله هو غير التهيد والاجباري مايجي وياج

-شنو يعني

-هسه تعرفين

كالها ودنگ شالني شمرني عالجربايه اجيت ترس على وجهي انگلبت بسرعة لكيته يفتح بدگمه ويباوعلي بنظره مابيها اي ملامح للبراءه

رجعت ليورا وهمست تغه اختي متانيتني

هز راسه اي

-بابا كال ممنوع يوصلج لحد ما ينفذ الطلبته

نزلت عيونه من شفايفي لركبتي عض شفته الجوه ياكل بيها

عرفت نفسي ماراح اخلص طفرت من الجرباية ركضت للباب مالحكت لكفني دفعته جتفني و شالني رجعني للفرشه ردت اصرخ سد حلكي ودنگ على ركبتي…

واكف يم باب الكنتور يدكم بقميصه واني ضامه جسمي بالغطه واباوعله بضوجه غمزلي ونكث شعره من الماي

همست منحط

رفع راسه اشر شنو

صعدت الغطه ورجعت ليورا دفع باب الكنتور واجاني رفعت اديه بسرعة احمي روحي كعد كدامي لزم ايده نزلها واشر شنو كلتي

-مو وياك

-رأل شايفة هذا وجهج المفهي اذا هفيته رجدي اشلون يصير

-افقد الذاكغه وعوفك

-بكل مره تفقديها اخليج تحبيني اكثر وماتنطقين غير اسمي

-شنو هالثقة

-خلي انجرب

شال ايده بسرعة ضميت راسي بصدره ضحك لمني بحضنه دنگ اخذ نفس وهمس دخيل هالضمه الركضتني اشهر وراها

-بابا منتظغك

-كل عقله هذا

-اي طبعاً لعد شنو ماتغيد تجي

باسني و لزمني من خدودي بعد شعري عن وجهي وباوع لعيوني - انتي عندي اغلى حتى من روحي موبس مركزي بس والله ماراهمه اخذ جماعتي واروح لابو عكرب اكو طبقات لازم نحترمها

- جان فكغت قبل لاتخليني بأسمك لو كلت بالختلة خليها هنا اخلص وقت بيها وذيج اطلع بيها كدام الناس

- اطلكها ومااطلع غير وياج والج بكد المهر الطالبه اضعاف بعد شرايده

-هيج تشوفني غخيصه

-تعرفين ماشوفج غير قضيتي الخلتني امشي واجرم بالعالم مثل الخبل بس لخاطر احميها

-لعد تخليلي قيمة كدام اهلي حالي حال خواتي وتسوي كل الطالبه منك بابا واذا مستعغ مني طلگني

-بت الدغش

-اي اني بت الدغش وغيغ اليكول عليه بابا مايصيغ

-جاخليج بحضن ابوج

باسني حيل من شفتي حسيته شلعها ؛رد لخدودي عضعضهن دفعني وكام

دنگ لبس بسطاله اخذ الجنطة فتحها طلع كصيبتي رجعها للعلبة ضمها بكنتوره قفله اخذ سلاحه وطلع

وخرت الغطه من الحركة كمت دفرت الباب ورا رجيت البيت بسدته شلت المنشفة ودخلت للحمام سديت الباب بدفرة اقوى من القبلها

شمرت ملابسي ودخلت جوة الدوش حتى مااعرف اشلون سبحت طلعت عالسريع وكفت داانشوف شعري حتى لحد ينتبه واگدر اگول لبابا مايردني اله؛ فتحت عيوني اباوع ركبتي صاير قوز قزح عضيت ايدي حيل وهمست الله يغسل حضك يالمهتلف شسوي هسه

اخذت نفس طلعت البودرة ترست ركبتي عيوني بين الساعة وبينها الي ماترضى تخفي الاثار، غمضت عرفت مامنها ستر مفضوحة مفضوحة نشفت شعري لميته شلت جنطتي ونزلت ركض طلعت للحديقة لكيت رؤيا امجتفه واكفه يم امجد وعيونهم اثنينهم على الجهة الثانية

درت وجهي واشوف ضي واكفه تسولف ويه ازر بس شكله تعبان يباوعلها بكسره ويرد بتوسل

مافهمت شكو رحت يم رؤيا وامجد داكلهم يله واسمع صوت الضربة ويه سدت عيون رؤيا درت وجهي لكيت ازر لازم صدره وضي جايه اتجاهنا تمسح بدموعها

طلعت قبلنا لحكناها طلعنا برة لكيناها صاعدة بالسيارة صعدنا وراها شغل امجد بس حرك كالتلها ورؤيا والله هواي عليج

ضي- لهيج تركته

- لان مومال نعمة صار ساعه يتوسل على وكفتي مرتين سحب ايدج باسها شرايده يدنگ على رجلج لوشنو

- واحد اكله مااريدك يااخي مااحبك ماطايق اباوع بوجهك ليش مايحس

-لان يعرف بيج جذابه

-ومن يعرف بيه جذابببه ليش هيج يحب يعذبنيي

-شسوالج بت الاوادم موحتى زوجته طردها وسمعتي بأذنج اشلون عيرته بعجزه يعني ماجان يوصلها وديتوسل ويكلج ندمتت وكله من وراج السويته ياغضب ربي

-خلي يرجعلي السنين الخلصتهن بدموع واني اراقبه من بعيد ولاتكولين غصباً عنه هذا هيذام كلها اجتمعت عليه وماسوه غير الي براسه اخذ رئال من نص حضن رجلها بعد مادمرهم كلهم لخاطرها اشكد هانته وغدرت بي ولايوم صاح بوجها لو زعلها بكلمة؛ حمل المايتحمل ليش لان يحبها صدگ

همست وهاي نهاها هسه كال ماغاح اجي لابوج غوحي ضلي يمه

رؤيا - نواقيص مابيهم شريف

ضي - لا لان عمتي دتزن براسه تريد يرجع هبة حتى يخلف مثل ماترجع هالة وتلم عائلتها من جديد ليشش لان اخوها انتهى امره راح يحاكموا

رؤيا- مرات كد ماتمدح بشخص تخجل تكول طلع جلب

- متخبله اشلون ابراهيم مريض وكاللها يخويه راحت هيبتي وعائلتي

-ربج مايگطف بحجار لعد السوا بينا قليل حييل بس ليش حكموا

- لان هيذام قدم الاوراق عليه كلها اغتلاس وممنوعات من غير النوادي الليليه الجان داعمها

- واني اگول معقولة بول تيري يتنازل عن هيج جثة بسهولة

- موبس هيج خلا يتنازل عن بيت ابو ويسفر هبة واسماعيل لخارج البلاد ممنوع يدخلون العراق بعد حتى لايشوفهم بزيارة طول ماهو عايش بس عمتي ماعاجبها الوضع دتقنعهم يردوهن من جديد يمها لهيج راح اخذ بابا ونروح غير محافظة

- وعلى هاي صار ساعة يتوسل ازر مايريدكم ترحون

-اي حتى يضل يذل بيه انعل ابو الحب لابو اليحب

امجد - تردن الصدگ اوجوهجن مومال ضباط مال كل وحده تكض كونية وبوجها عالزبل تلم قواطي

- وليش حتى نلم قواطي خو نكمل دراسه ونشتغل ونصير بروسهم

-اشتغلن ويه الدغش مو بس اتصيرن بروسهم لاا وعلي تركضنهم ويه خيل الحمزه بس حتى يسيطرون عليجن

رؤيا - والله لعبتها بس نعتاز جثه ندرب بيها

- بت الواوي ليش تباوعيلي

- كلت جثه مو ماسحة انت حتى ملامح خفاش ماكو بوجهك ولاتخاف شكو واحد يدخل بيتنا مانأذي

- لاتقتلوا طفل ولاشيخاً ولاتقلعوا شجره كل من دخل بيت الدغش فهو امن

همه يسولفون واني مجتفه عيوني بالطريق وبالي مشغول بهيذام معقولة راح يكسرني بعد كل هذا بس لخاطر مومن مستواهم

واني مو رخيصة ولاضعيفة مثل مادخلته بكلبي اكدر اطلعه واكمل بقيه حلمي مثل ماجنت مخططتله بين اهلي وداخل مكتبتي

وصلنا للبيت لكينا الشارع مسدود من بدايته لنهايته كراسي وطبلات اضطرينا ننزل بدايته

اخذنا غراضنا رحنا للبيت جانت الباب مفتوحة دخلنا صارت رايه كدامنا دنحجي واشرت اشش واجانه صوت عياط ماما من جوه …

يتبع

نزل الجزء الثاني …