تحميل رواية سكنني الخطر بقلم زهرة الربيع pdf

بص لفرحه اللي كانت واقفه بتوتر شديد وقال ....فرحه انتي كنت مع لؤي صح... ممكن تحكي لي الموضوع يا بنتي

فرحه بلعت ريقها بتوتر ومعرفتش ترد عليه تقول ايه

عند سهيله بدات تفتح عينيها بتعب شديد لقت نفسها في حضنه بقت تفتكر اللي حصل وقلبها وجعها قوي على الحاله اللي بقت فيها والالم اللي في كل جسمها وقعت دموعها على صدره بحسره

بقلم....زهرة الربيع

منتصر فتح عيونه ورفع وشها ليه بلهفه وقال ....فوقتي دلوقت ...احسن شويه حاسه بايه اعمل لك حاجه سخنه

سهيله كانت بتتحاشا نظراته مش قادره تبص في عيونه بسبب اللي عملته واللي طلبته منو قالت بحرج...احم....انا ..انا كويسه

منتصر اتنهد وقال...طب مش بتبصلي ليه...سهيله انا مش طفل...انا عارف ان اي حاجه بتقوليها وانتي محتاجه المخدر بتبقى غصب عنك...مفيش داعي تنكسفي ابدا انا متوقع اكتر من كده

سهيله قالت بدموع....صعب...صعب قوي...اللي حساه صعب والوجع اللي انا فيه صعب والحسره اللي جوايا اصعب بكتييير

منتصر اتنهد بحزن عليها وقال.... انا عارف انو صعب جدا... ا

بس هتبقى بخير صدقيني ربنا كبير ..وانا متأكد انك اقوى من كده وهتستحملي

سهيله هزت راسها بالرفض وقالت بدموع...لا..لا انا مش قوبه ابدا انا ضعيفه ومش قادره اكمل ابدا يا منتصر مش قادره...منتصر ممكن اطلب منك طلب وتوعدني تنفذه بدون نقاش

منتصر قال بسرعه... انتي تؤمري أمر وهاعمل كل اللي انتي عايزاه قولي

سهيله قالت بدون اي مقدمات.... ارجوك طلقني لو ليه اي خاطر عندك طلقني

في مكان تاني كانت نيره طالعه مع صاحبتها من الجامعه وقفت عربيه جيب ونزل منها اثنين شباب واخدوها بسرعه قبل ما حد يلحق يمنعهم وطلعوها في العربيه بالقوه ومشيو بيها

البنات صحابها بقم يصرخوا وجم امن الجامعه والدكاتره جري بس كانت العربيه طلعت بسرعه البرق حتى حاولو انهم ياخذوا رقم العربيه بس مش مترقمه

عند فرحه كانت واقفه بتوتر بسبب سؤال عصران وقالت....ها اللي حصل ..ابدا يا عمي ...كل الحكايه ان لؤي عرف ان اكمل اتخانق مع سهيله الصبح

عصران قال بشك...اتخانقو ليه

فرحه قالت بتوتر...عادي يا عمي مهم على طول بيتخانقو

عصران مصدقهاش خالص. وفهم انها مش هتتكلم وقال..تمام..روحي انتي

فرحه صدقت ما قال كده وطلعت جري

عند اسيا كانت بتحاول تضبط اعصابها عشان تفهم حاجه من كلام لؤي اللي كان بيزعق جامد مع اكمل ومش راضي يهدى

واكمل زي العاده بيقابل الكلام ببرود مستفز

قالت بغضب ونفاذ صبر.... طيب ممكن تهدى شويه علشان نفهم ....ده هيشلك ده ما تحاولش معاه واحد مستفز وانت اللي هتتعب

لؤي اتنهد وقال ...بس المره دي اتخطى كل الحدود انا كنت بحاول اعذره بقول مظلوم غلبان الدنيا جايه عليه بس بجد ده مريض مريض وخطر على الناس وخطر على نفسه اصلا

اكمل تنهد بنفس البرود وقعد وولع سيجاره وقال....انت عامل الحوار ده كله ليه ومضايق نفسك كده ...اصلا انت مالك ومال سهيله

لؤي بصلو بزهول وقال....مالي ومالها ازاي يا بني ادم انت سهيله بنت عمي وزي اختي ...قولي بس اذتك في ايه عشان تعمل فيها كده ما تتكلم هتشلني

اسيا نفخت بغيظ وقالت... هفضل كده زي الاطرش في الزفه وسطيكو طب ما تقول انت هو اتزفت عمل ايه المرادي

لؤي قال بغضب.... اسأليه هو نفسه مش هيقدر ينطق اللي عمله

اكمل قال بمنتهى البرود والهدوء.... و منطقوش ليه بيشوك في اللسان مثلا ...انا اجرت عليها عيل بلطجي كان بيديها حبوب مخدره وقالها انها للتركيز ولانها معاقه زي اللي خلفها صدقت...وبعدين انتو مزعلين نفسكوا ليه هو اصلا طلع اغبى منها والظابط كشفو واخدها ومشيوا ولحد دلوقتي ما حدش عارف مكانهم

لؤي اتصدم من البساطه اللي بيتكلم بيها بص الصدمه الاكبر كانت لسهيله اتجمدت مكانها من اللي سمعته وقعدت على الكرسي بصدمه شديده

عند منتصر اتضايق من كلام سهيله ومردش عليها وقف وفتح شنطه وطلع منها هدوم وقال.. الشنطه دي اشتريتها علشانك فيها هدوم حلوه هتعجبك... انا رايي تاخدي دش دلوقتي وبعد كده هنطلع نتمشى في الجنينه الدكتور بيقول الهوا النظيف كويس قوي علشانك هيغير من نفسيتك و

بس قاطعته لما قالت بغضب وزعيق....مش هتنيل في اي مكان هو انا بتكلم صيني قولتلك عايزه اطلق ما بحبكش يا اخي مش طيقاك سيبني في حالي هو بالعافيه

منتصر غمض عينه وضم ايدع بقوه بيحاول يتمالك اعصابه عمره ما كان ليه اي صبر على حد ولا بيقدر يستحمل وبطبيعة شغله ما عندوش صبر على نفسه حتى حاول يضبط اعصابه عشان ما يضايقهاش واتنهد وقال .....طيب هنبقى نتكلم في الموضوع ده بعدين

سهيله صرخه جامد وخبطت الحاجات اللي على الكومود وقعتها على الارض وقالت بزعيق ....ما فيش بينا كلام بقول لك عايزه اطلق خلي عندك دم

منتصر حاول يضغط على نفسه اكتر وكان لاول مره في حاله انهيار تام من جواه كل ما بيشوف عصبيتها وجنونها وحالتها وهو مش قادر يساعدها وحاسس بعجز شديد بيبقى في حاله من الضعف متتوصفش

حاول يقوى اكتر ومردش عليها ونزل على الارض بقى يلم القزاز اللي اتكسر لاحسن يأذيها

سهيله اتسعت عينيها بدهشه وهي مش مصدقه ازاي بيستحملها كل ده ازاي واقف جنبها كده من غير اي مقابل نزلت دموعها بألم وقربت جنبه على الارض وبقت تشيل القزاز معاه ودموعها بتنزل بحزن شديد

منتصر اتنهد ووقفها بالراحه قعدها على السرير وباس كفه ايدها بحنيه وقال ....انا جنبك ماشي ...مفيش داعي للدموع دي كل حاجه هتتصلح

سهيله بصتلو بدموع وقالت ....مش عايزه اوجعك اكتر من كده...انا عمري ما وجعت حد ..ارجوك طلقني انا مقدره احساسك اللي ما فيش منه... يا ريتني كنت اقدر...

↚

حط ايده على شفايفها وقال بسرعه... انا مش منتظر منك اي حاجه يا سهيله مش عايز منك غير انك تخفي وتقومي علشان خاطري عايز اشوفك زي الاول مش قادر اشوفك بالمنظر ده انا مش موجوع من تصرفاتك انا موجوع على حالتك دي حاسس بعجز وضعف

وقام بسرعه لما حس بالدموع بتتجمع في عيونه و لسه هيمشي بس سهيله مسكت ايده

اتنهد و التفت لها وقبل ما يتكلم صدمته لما اترمت في حضنه بقوه وبقت تحضنه بكل قوتها وهي بتبكي جامد وبتقول.... اسفه انا اسفه قوي

منتصر غمض عيونه ونزلت دموعه على خدوده و رغم كل الوجع اللي جواه لكن كانت اجمل حاجه عملتها في الوقت ده محتاج لحضنها قوي ضمها بقوه شديده كانه بيخبيها بين ضلوعه هو بيتعافى من جواه بقربها اللي بيعشقه

اما اسيا وقفت بزهول وقربت من اكمل وهيه بتبصلو بصدمه والدموع بتلمع في عيونها وقالت...طب... طب هيه ذنبها ايه...دي..دي زي الاطفال بالظبط ما تقدرش تأذي حد ابدا

اكمل اتأثر جدا بنظراتها لاول مره يشوفها مصدومه من تصرف ليه وزعلانه بالشكل ده اتخلى عن هدوءه وبروده وقال ...احم....انا لما عملت كده كنت لسه مجيتش البيت... كان كل همي اضايق عصران وادمره ما كانش عندي هدف غيره

وعلشان كده بدأت باولاده لانهم اكتر حاجه توجعه ...دخلت لعدي عن طريق القمار والحفلات..واجرت ععلى سهيله واحد يعمل اللي عمله..طبعا مش هتصدقوني لو قلت اني لما دخلت البيت وعرفت كل واحد فيه..ولقيت فعلا فيه ناس متستاهلش العقاب ما بقتش مبسوط باللي عملته معاها بس ده اللي حصل مش هقدر ارجع فيه

لؤي قعد بيأس وقال... بقالها كثير بتاخذ الزفت ده

اكمل اتنهد وقال.... للاسف فتره كويسه ....صعب التعافي منه بسهوله

اسيا حطت ايدها على بقها وقالت بدموع.. يا قلبي يا سهيله يا حبيبتي ...يارب كون معاها انت عالم بيها وبقت تبكي لاول مره

لؤي حاول يهديها واكمل نزل راسو بحرج وندم لاول مره

اسيا حاولت تهدى و التفتت لأكمل بحده وقالت بانفعال... انا قبل كده قلتلك انك شيطان دخل على بيتنا.... بس برافو عليك يا اكمل..اثبتلي انهارده انك اتخطيت اللي ممكن تعمله الشياطين بكثير.... وانا خلاص ما بقاش عندي طاقه اني افضل مربوطه بواحد وسخ زيك....انا قرفت منك بكل معنى الكلمه عايزه اطلق كفايه عليك قوي كده

قالت كده بمنتهى الغضب ومشيت

واكمل اتفاجأ بردها وقال بزعيق....اه انتي بتلككي بقى عايزه تطلقي علشان بنت عمك ولا علشان ابنه....استني هنا انا مش بكلمك

ولسه هيمشي وراها لؤي مسك ايده بغضب وقال.... استنى هنا ما خلصناش كلامنا

اكمل قال بضيق ...عايز ايه تاني بعد ما خربتها عاجبك كده

لؤي ضحك بسخريه وقال...لا والله...هو المفروض كنت اسكت بقى...اسمع يا اكمل ...

بس قاطعو وقال بسرعه...لا اسمع انت انا قلت لك اللي حصل كله من اوله لاخره ...وكمان انا ما جيتش جنبك انت بذات ..يعني طلعتك من قائمة شري ..و حتى مزتك اللي بره بعد كل اللي عرفته عنها ولسه ساكت

لؤي قال بضيق. ..عارف...كتر خيرك والله...اقدر اعرف بقى ايه اللي تعرفو عنها بالظبط

اكمل قال بسرعه ....كل حاجه اعرف عنها كل حاجه... اكتر من اللي انت تعرفه بكتير... بس ما تخافش انت بالذات مستحيل اذيك انت بالذات امان قوي انت وكل اللي ممكن يخصك او ياثر فيك حلو كده

قال كده ولسه هيمشي لؤي قال .... راجع نفسك يا اكمل انت بتأذي نفسك اول واحد ونهاية الطريق دي مش هتبقى كويسه ليك.... اللي بتحاول انك ما تأذنيش علشانها وعلشان متخسرهاش ....مسيرك هتخسرها باللي بتعمله ده.... لان روحها مربوطه بكل اللي في البيت مش انا وبس ده شيء اسمه حب العيله

اكمل ابتسم بسخريه وقال .....ما اسمعش عنه للاسف ...ولا عن العيله حتى.... بس ما تقلقش قريب ما هيبقاش في عيله اصلا

قال كده ومشي ولؤي قعد ومسح على وشه بضيق وهو مش عارف يعمل ايه ولا ازاي يوصل لسهيله ويطمن عليها

عند علي كان قاعد مستني مكالمه من الراجل بتاعه اللي امره بخطف نيره

اول ما جاتلو مكالمه منو رد بلهفه وقال.... ها البنت معاك مش كده ...هاتها على هنا على طول

بس اتسعت عينيه بزهول شديد والتليفون كان هيقع من ايده وقال.... ازاي..... يعني ايه اتخطفت قبلكم مين اللي خطفها انت مجنون بتقول ايه ولا عايز تجنني في ليلتك السوداء دي

بس قطع كلامه لما جاله اتصال تاني واول ما شاف الاسم غمض عنيه بغضب شديد ورد وقال..... لا ملعوبه يا اكمل باشا ...مش انا قلت لك قبل كده انك جبت ورا ما سمعتش كلامي

اكمل كان رايح على اوضته وبيكلمه وقال بسخريه ....انا مش مصدق يا اخي انت بالذات ازاي خيالك يصورلك انك ممكن تلعب معايا وتتصرف من دماغك لا ومتخيل كمان اني مش هحس عليك... ياض ده انت حتة لعبة قماش ملهاش اي لازمه انا اللي كنت بحركك بين صوابعي..والاعيبك الهبله دي حافظها ...طبعا رسمت في دماغك انك تخطف البنت وتبقى تحت ايديك وتساوم الظابط عليها ومتخيل اني هسيبك واقف من بعيد اسقف لك ..اللي حصل النهارده ده مجرد درس تفهم منه انك مكشوف قوي بالنسبالي فبلاش تضايقني يا علي اكتر من كده انا نابي ازرق وانت عارفني... واللي اعرفوا عنك مش لصالحك ابدا

بقلم....زهرة الربيع

علي قال بغضب شديد .....ما بقاش يهمني كده كده الظابط بيدور عليا بعد ما عرف موضوع مراته يعني انا ممكن اتسجن في اي وقت او اتقتل بسببك وبسبب لعبتك اللي انت دلوقتي رافض تكمل فيها بس خلاص بعد الحركه اللي عملتها دي ومن النهارده بقيت انت زيك زيهم واستني ردي على اللي عملته ...وقفل السكه

اكمل بص للتليفون بسخريه وقال.... ما كانش ناقصني غير استنى ردك انت كمان ..هو الكل بقى عايز يرد ولا ايه

وراح على اوضتو بس اتفاجئ لما لقي اسيا بتلم حاجتها وهدومها وعلب المكياج بتاعتها وكل اغراضها اللي في الاوضه في كراتين وبتديهم للخدامه ترجعهم اوضتها

اكمل اتنهد بخنقه وقال.... بتعملي ايه يا اسيا

اسيا مردتش عليه وبقت تكمل وقالت للخدامه.... رجعي كل حاجه زي ما كانت وخدي بالك على القزاز

الخدامه هزت راسها بالموافقه ولسه هتمشي اكمل بص لها بطريقه مخيفه وقال.... سيبي الحاجه دي هنا واطلعي

اسيا قالت بغضب.... ما تسمعيش كلامه رجعي الحاجه

الخدامه وقفت بتوتر وسطيهم واكمل بص لها بغضب اكبر وقال ...قولت سيبي كل حاجه مكانها واطلعي

الخدامه بلعت ريقها بارتباك واسيا قالت بغضب اشد....وانا بقول لك...

بس قاطعها وقال باستفزاز .....اسيا سيبيها تطلع وخلينا نتكلم راجل لراجل

الخدامه ضحكت واسيا بصتلو بزهول وقالت.... راجل لراجل

عند لؤي طلع من المكتب لقى فرحه جايه جري عليه وقالت .....كده تسيبني مع عمك يزنقني وسين وجيم

لؤي بصلها بزهول وقال.... شك في حاجه

فرحه قالت بسرعه ...شك في حاجات كتير وبقى يسالني بس مقولتش حاجه متخافش...ها انت عملت ايه الولد ده كان بيعمل فيها كده علشان اكمل باعته مش كده

لؤي اتنهد بحزن وقال ....للاسف

فرحه قالت بغضب...ايه رجاله دي ....طب انت هتعمل معاه ايه دلوقت

لؤي اتنهد وقال ....ولا حاجه هساعده

فرحه اتسعت عنيها بزهول وقالت ...نعم

لؤي قال بسرعه... زي ما سمعتي هساعده اكمل محتاج مساعده...اتأذى لدرجه ما بقاش بيحس بوجع حد محتاج اللي يقف جنبه محتاج علاج مش عقاب

فرحه ابتسمت على قلبه الطيب وقالت... انت فعلا علاج لأي حد

لؤي ابتسم على جملتها و بص لعيونها شويه وقال.... تسلمي انا حتى لو كنت علاج فعلا....بس انا ما اقصدش على نفسي... اقصد اسيا هي الوحيده اللي ممكن ترجعه لعقله ...انا لاحظت ان اسيا الوحيده اللي بيأثر فيه زعلها وبيوجعه

بس انتي عارفه اسيا مش مصدقه ان عمي فاهم غلط ومصدقه حكايه ان عمي ماهر ما بيخلفش معنى كده ما فيش قدامنا غير الحل اللي انتي قولتيه اكمل لازم يعمل التحليل..يا اما اثبت لها انها غلطانه ونقف جمبه...يا اما بقى هما يثبتولي ان كلامهم صح

فرحه لسه هترد عليه سمعو زعيق شديد من بره

جريو بسرعه واتفاجأو بنيره بينزلوها اتنين جاردات من العربيه بالعافيه وهي بتزعق وبتقول.... انتو جايبيني هنا ليه اوعى انت وهو ....طب انا عايزه اتخطف في مكان تاني انا حالفه مش هدخل البيت ده و

بس قطعت كلامها لما شافت لؤي جاي عليها بتوتر

بصتلو بغضب شديد وووو

↚

لؤي كان عايز يروح لنيره بس وقف مكانو بحرج لما افتكر الموقف اللي عمله معها في الفرح واتوتر جدا

بس فرحه ضربت كتفها في كتفه وابتسمت له عايزه تخفف عنه

لؤي ابتسم لما عملت كده وبقى يبص لعيونها بس انتبهوا على صوت نيره بتزعق معاهم وبتقول.... انا بقول لكم مش عايزه افضل هنا انتم جايبيني هنا ليه انتو اتجننتو

لؤي اخد نفس واتشجع وقرب منهم بسرعه وقال...في ايه ...ايه اللي بيحصل هنا جايبين البنت غصب عنها ليه

واحد منهم قال دي اوامر اكمل بيه هو عايزها

لؤي اتيعت عنيه بدهشه وقال....اكمل

عند اكمل فوق كانت الخدامه طلعت واسيا قربت عليه وقالت بغضب مكبوت.... عايزنا نتكلم راجل لراجل مش كده.. بس للاسف انا مش شايفه اي رجاله هنا

اكمل اتنهد وقال.... هنبتدي نخبط في بعض من اولها ...نهدى كده علشان نتفاهم

اسيا قالت بغضب شديد.... نتفاهم في ايه ....كل ما احاول اقول ان انت بني ادم واحاول اصدق انك عندك زرة دم او احساس الاقيك بتتصرف تصرف الحيوانات نفسها ما تعملوش

اكمل اتنهد وقرب عليها وقال.... ممكن تهدي طيب وتسمعيني

اسيا قالت بغضب شديد.... هتقول ايه..ها هتقول ايه... هتقول مكنتش تقصد او كنت مجروح او علشان اللي عمي عمله هتقول مبررات انا مش مقتنعه بيها... ازاي بني ادم لمجرد انه اتأذى يأذي كل اللي حواليه بالطريقه دي... واحده زي سهيله ذنبها ايه اصلا ...ما ترد اتكلم ولا مكسوف مثلا

اكمل اتنهد وقعد على السرير ببرود وقال.... لا مش مكسوف بس لو سكتي هتكلم اكيد... انتي مش سيبالي مجال علشان اتكلم

اسيا بصتلو بدهشه من بروده وهو اتكلم بجديه وقال.... اسمعي يا اسيا انا ما جيتش هنا علشان اسمع خطب ومحاضرات.... انا جاي هنا وحاطط في دماغي اني هخرب البيت ده على اللي فيه ....وعلى فكره ما فيش حاجه اتغيرت باستثناء حاجه بسيطه قد كده... اني فعلا نويت اطلعكم بره الموضوع مش علشان صعبتو عليا ولا علشان ملكمش ذنب لا.... بس لاني لقيت عمك احقر من انه يهتم ليكي او لاخوكي او حتى لاولاده ... من اول ما دخلت هنا وهو بيثبت لي ان ما فيش فايده في اللي بعمله...يعني انا قلعتك من عيون ابنه وكان هيموت عليكي وقدامه بس هو ما اهتمش كل اللي همه مابوظتش سمعته ورفعت قضايا ولا خسرتو فلوس كتير...و برده بنته جوزها بالغصب و حصل معاها كل اللي حصل والبيت كله عرف وهو لسه ومتاكد انو حتى لو سمع هيبقى اهم حاجه عنده انا الموضوع ما يتكشفش

ده بالنسبه لاولاده طبعا بالنسبه لك انت ولؤي اخر حساباته ...واحد مش موفر الاهتمام الكامل لاولاده هيوفره لاولاد الناس عشان كده قررت اخلي مشكلتي معاه هو وبس

اسيا كتفت ايديها بغضب شديد وقالت.... والله انا شايفه ان مشكلتك مع نفسك انت محتاج تعالج نفسك من جوه وهتبقى تمام لان عمي ما غلطش فيك ..كل واحد من حقه يحافظ على اهل بيته ....من حقه ما يدخلش حد غريب عليه وانت ما فيش حاجه تثبت انك مننا

اكمل بصلها بضيق وهيه قالت..بتبصلي ليه انا طول عمري واقعيه وهتكلم معاك بمنتهى الصراحه الله واللي هقوله ده اللي انا حساه وبس مش لاني مضايقه منك لا ..ده اللي حساه واللي العقل بيقوله..الست والدتك الله يرحمها طبعا ما كانتش الست العفيفه اللي ممكن نديها الامان وتقول ده ابنكم نقوم نصدقها فورا...لان ببساطه احتمال هيه نفسها ما تبقاش عارفه انت ابن مين بالظبط

اكمل بلع ريقه بوجع شديد وحرج اشد وقال بالعافيه.... عارف احم...عشان كده طلبت اعمل التحليل اول حاجه واتأكدت قبل ما اتصرف اي تصرف معاكم

اسيا قالت بسرعه ....هعتبر ان كلامك صح وان التحليل ده حقيقي ولو انك رفضت انك تكرره مره ثانيه عشان نتاكد ....هنا بقى اللي زي عمي ذنبه ايه في انه مش مصدقك... زي ما قلت لك من حقه ما يصدقش

اكمل مسكها في ذراعها بغضب شديد وقال ....انتي بتحاولي تقنعيني انا ولا تقنعي نفسك بالكلام ده ...ده كلام اهبل تقعدي وتعيديه بينك وبين نفسك علشان تقتنعي انك مش غلطانه معايا وعشان تحاولي تبرري كلامك اللي بتسميني بيه بكل بساطه

اسيا قالت بغضب...انا مش بقول غير الحقيقه

اكمل قال بغضب ...الحقيقه طلب يعرفها كل اللي في البيت بس عمك رفض..قبل ما تبتدي كل المشاكل دي لما كان عمري 15 سنه وجيت هنا على البيت ابوكي الله يرحمه كان عايز يعمل تحليل ويتأكد... وحتى ابويا اللي بتقولوا عليه اهبل كان عايز يعمل كده بس اللي رفض عمك عشان ما كانش عايز حد غيره يتحكم في الاملاك والفلوس ما كانش عايز الراجل العبيط اللي مسيطر على كل املاكه يطلع له اولاد فهمتي بقى

بقلم...زهرة الربيع

اسيا اتفاجأت من كلامه وقالت..... بابا كان عايزك تعمل التحليل انت كداب..عمي قال ان كل اللي في البيت بما فيهم بابا مكانوش مصدقين لان عمي مبيخلفش

اكمل اتنهد وقال بسخريه...عمك يقول اللي عايزه...طالما لاقي اللي يسمعلو من غير تفكير حتى...ابوكي يا اسيا كان مصر جدا على التحليل و حتى ابويا فاكر كويس بقى يترجاه وبكى زي الاطفال الصغيره وقال انا حاسس انه ابني

واحتدت عنيه بغضب وكمل وقال...بس عصران بيه قال الولد ده هيطلع من البيت...واللي هيكتر كلام هيطلع معاه

مقالش غيرها...وكلهم نزلو عيونهم في الارض ..وقالو مش مهم بقى المهم نحافظه على العز اللي عايشين فيه

اسيا كانت مصدومه من اللي بتسمعه وعقلها مشتت عمرها ما فكرت تكدب عمها في اي حاجه....بس كل ما بتشوف الوجع اللي في عيونه بتتهز من جواها

اكمل حاول يهدى شويه ويسيطر على اعصابه وقال ... شوفي يا اسيا الله انا مش بحب اتكلم في المواضيع دي ..واي فكره عايزه تاخديها عني خديها وخدي عليها فكره هديه...مبقاش يهمني....انا جيت بس علشان اقول لك اني هصلح موضوع سهيله قريب

وقرب منها قوي وبص لعيونها وقال..... بس ما تسبنيش

اسيا رفعت عيزنها ليه بدهشه وهو قال بسرعه...قصدي متسبيش الاوضه ...انا هصلح الموضوع اوعدك هعمل كده علشانك...ودي اول مره اعمل حاجه علشان حد ..لو سمحتي متمشيش انا ما صدقت الاقي حد بيتنفس جنبي خليكي هنا ومتتكلميش معايا خالص لو زعلانه اعتبريني مش موجود بس ما تطلعيش ممكن

اسيا كانت بتحس باحساس غريب كل ما يبص لعيونها وارتباك شديد بيتمكن منها قالت بضعف بتحاول تداريه كأنها بتقنع نفسها .... انا بكرهك يا اكمل.... صدقني بكرهك

اكمل ابتسم ابتسامه جميله وهو بيبص لعيونها وقال.... انا مصدقك المهم انتي تصدقي

ولسه هيمشي اتفاجئ لما مسكت ايده وقالت بسرعه...طب..طب اعمل التحليل لو كلامك ده صح اعمل التحليل وانا وقتها هكلم عمي والموضوع ده كله هينتهي..وتعيش حياتك بدل اللي انت عامله في نفسك ده صدقني محدش بيخسر غيرك

اكمل رفع ايدها اللي مسكت بيها ايده وباسها بحنيه وقال... وحياة عيونك لو كانت حياتي لسه فيها حاجه تتعاش كنت وافقتك..... بس انا خلاص بقيت منتهي من جوايا....وبقاش عندي غير الهدف ده اللي عايش علشانو ومش هينفع اتراجع مستحيل اقدر

قال كده وخرج

وهي قعدت على السرير وجذبت شعرها لورا بتوتر شديد وقالت باضطراب... لا لا اكيد عمي بيقول انه اخوه ما بيخلفش عمي مستحيل يكون كذاب.... انت ايه جرى لك يا اسيا ده ما يستاهلش شفقه ...شفقه ايوه مجرد شفقه وبس

عند سهيله بعدت عن حضنه بتوتر واتكسفت جدا انها حضنتو كده قالت بتوتر.... اسفه..انا كنت انا

منتصر حط صباعو على شفايفها وقال بابتسامه ....لو تعرفي نفسك عملتي ايه دلوقت وقدمتيلي ايه كنتي تطلبي نجوم السماء قصاده مش تعتذري

سهيله نزلت عيونها في الارض وقالت .....رومانسي اوي يا حضره الظابط مع ان وضعنا ملوش دخل بالرومانسيه خالص

منتصر قال..ده بالنسبه لك انما بنسبالي قمة الرومانسيه ايه اللي ممكن يكون اجمل من اننا لوحدنا انا وانت وبس

↚

سهيله اتنهدت وقالت ... انت غريب قوي يا منتصر ايه سر تمسكك بيا ده كله..... من يوم ما قلت لك اني مش عايزه اتجوزك افتكرت ان الموضوع انتهى هناك....بس لقيتك بدون مقدمات بتدخل على حياتي بتحتلها وبتقف جنبي بطريقه ما حدش عملها معايا وانا معملتش اي حاجه علشانك في المقابل ومع ذلك لسه زي ما انت بالعكس تمسكك بيا بيزيد مش بيقل

منتصر ابتسم وهو بيبص لعيونها وقال..... صدقيني انا نفسي مش عارف ايه السبب ....لما كنا صغيرين وكنا نلعب سوا كنتي تقضي معايا اغلب وقتك.... كنت ديما اقول لك لما نكبر هتجوزك وكنتي تنبسطي قوي

ولما كبرت كنت افتكر الكلام ده واضحك عليه كنت فاكره هبل عيال تفاهة طفوله...بس الغريب لقيتك بردو بتحتلي كياني وافكاري لسه بفكر فيكي يوميا ...يا ترى بقى شكلها ازاي ..ياترى لو شافتني هتفتكرني...وكنت اسأل لؤي ديما عنك لدرجة اني في مره طلبت رقمك منو.....طلبت رقمك من اخوكي تخيلي

سهيله كانت مبهوره باللي بيقوله مش عيزاه يوقف

منتصر ضجك بخفه وقال...الرد بتاعو بقى كان اهبل من طلبي....قلي فكك منها والله بقت مقفله قوي ...مش عارف انا لو مكنتش مقفله تقريبا كان هيبقى عادي بس ما علينا

سهيله ضحكت وقالت...تلاقيه بس كان متقل ربنا يصلح حاله...سيبك منو وكملي الحكايه

منتصر ضحك بخفه وقال...هيه بقت حكايه ماشي....بس يا ستي بعد كده لما اهلي اتوفوا قررت اخذ خطوه الجواز..كنت محتاج شريكه في حياتي لاني تعبت لوحدي .... فكرت فيكي اول واحده مع اني شوفت بنات كتير واتعرفت على كتير بس وقت ما جيت اخذ خطوه الجواز ما فكرتش برده غير فيكي...انتي الوحيده اللي شوفتها في حضني

سهيله نزلت عيونها بكسوف وهيه طايره بكلامو ومنتصر كمل وقال.... لما جيت طلبتك من عمي كان اصعب يوم عدى عليا....لما حكيتيلي عنو..معرفش حسيت بسكين في قلبي حرفيا...وبردو معرفتش السبب..بس قلت خلاص كده بقى مش نصيبي..و قررت ابعد

لحد ما جيتي لي في القسم وحكيتي اللي حصل معاكي حسيت ان في حاجه غلط لان زي ما قولت لك يومها ان هناك ما فيش اي صيدليات واللي فهمتو ان فيه حد قصد يورطك ما اعرفش ليه حسيت اني مسؤول عنك واني لازم انقذك منه يمكن لاني كنت بلاقي مبرر لقلبي علشان ابقى جنبك وبس ممكن جنان او تهور ...لكن اللي اعرفه ان العيون دي ما فرقتنيش ابدا يا سهيله

سهيله اتملت عيونها بالدموع وهي مش مصدقه اللي بتسمعه منه والحب اللي في عيونه قربت منو قوي وقالت.... لو ربنا اراد اني اخف وارجع زي الاول وابقى زوجه يعتمد عليها زي ما انت كنت بتتمنى هكون ملكك وبس ...وربنا هو الشاهد عليا اني هبقى النص اللي اتولد علشان يكملك واللي اتكتب على جبينك هبقى ليك و بس حتى لو انت مش عايز يا منتصر

منتصر ابتسم بسعاده من جواه وقال بحب شديد...مش عايز.

...دي امنيه حياتي يا سهيله

و قرب منها جامد وهي غمضت عينيها باستسلام ولسه هيلمس شفايفها فزعهم صوت التليفون بتاعو

سهيله بعدت بسرعه وتوتر ومنتصر مسح على وشه بخنقه وقال بغضب شديد ....من ساعه ما جينا وانا قافله دلوقتي فكرت اشحنه واشوف لو حد عايز حاجه... يا ريتني كنت كسرته وما شحنتوش

سهيله ضحكت من قلبها وقالت ....دي اشاره بس عشان تعرف اللي كنت هتعمله غلط يا قليل الادب....انا اصلا دايما اقول لك انه غلط ما بتسمعش الكلام

منتصر قال بزهول...هو ايه اللي غلط يا بنت انتي مراتي انتو متفقين عليا ده ايه الهم ده بس

وراح يرد على التليفون وقال بزهق..... دي جنات دي صديقه نيره في المدرسه

ورد وقال... ايوه يا جوجو عاملين ايه وحشتوني

سهيله رفعت حاجبها لما كلمها كده ودلعها بالشكل ده

بس استغربت اكتر من شكل منتصر اللي اتبدل لخضه وزهول وقال ...ايه اتخطفت ....اتخطفت يعني ايه ...انتي بتقولي ايه

عند اكمل كان نازل وسمع صوت نيره راح بسرعه عندهم وقال

...بس انت وهو سيبها سيبها اتفضلي يا انسه نيره

كلهم بصولو باستغراب ونيره دخلت معاه بتوتر وقالت باستغراب ....ممكن افهم انا هنا ليه... لان الموضوع بجد بقى مريب ولو جايبيني علشان تكلموني في موضوع البني ادم ده انا مش حابه اتكلم في الموضوع واصلا مش انا اللي قولت لمنتصر على موضوع الفرح و

بس اكمل قاطعها وقال بزهق... ايه ايه ايه يا حجه اهدي شويه علشان اكلمك ايه ده