#سليل للشيخ
#البارت العاشر
للكاتبة#زينب البديري
__________________
غلست عنها ورحت للغرفة بس جنت ميتة جوع تحملت إلى أن اجة العشة واكلت ......
و مرت الايام وبقة يوم على أربعين اهلي بهذا اليوم جنت نايمة و كعدت على صوت عمتي
اول ماشفتهة شبكتهة حيل لأن جنت محتاجة لهذا الحضن
عمتي.. شلونج يكلبي
سليل.. زينة انتي شلونج مشتاقتلج كومة
عمتي.. زينة يكلبي شصار ماصار وياج
سليل.. ماصار شي عادية
عمتي.. يعني ماسوت سعدية خباثة وياج
سليل.. لا بس خلتني اغسل الملابس وسوي غدة بس
عمتي.. شنو بس
سليل.. عمة دائما اذا تأخرت بالنومة تكعدني بالدفرات ومرات ماتطيني اكل لأن انام ومااجي للغدة وعلى أقل شغلة تصيح علية وعايفة بتهة نايمة ليل نهار تكعد بس تأكل وترجع تنام
عمتي.. اللة لايطيهة انشاللة تسوي وي بنية يتيمة هيج زين و عمج مايردهة
سليل.. ساكت ومرات هم يصيح علية ترد بوجهة وصيح
عمتي.. زين انتي شوكت تنامين
سليل.. عمة اني الليل كلة كاعدة وانام ب5
عمتي.. ولج عمة موزين عليج شوفي نفسج صايرة عودة وعيونج حمر ووجهج اصفر
سليل.. عمة اذا نمت احلم أحلام تخوف
عمتي.. سليل حاولي اليوم واذا هم حلمتي اخذج للعلوية خاف عدج تابعة
سليل.. عمة ماآمن بذني السوالف
عمتي.. دكيتي اسكتي ماآمن هوة انتي شعرفج
شوفي جبتلج تليفون وياي وكم لبسة اخذيهن وضمي التليفون خاف تاخذة سعدية لو تسويلج سالفة بي خط وحطيتلج رقمي وإني كل مايخلص الرصيد ادزلج بس كليلي
سليل.. اوك
عمتي.. هاج كومي ضمي بمكان محد يدور بي هوة والشاحنة
كمت ضميتهن ورجعت كعدت يم عمتي ضليت اسولفلهة و اشكيلهة
احنة و نسولف طبت سعدية اجت كعدت يمنة حتى بعد ما نكدر نسولف
بعدين اشرتلي حتى اسوي الغدة
سليل.. عمة من رخصتج رايحة اسوي غدة
عمتي.. ليش انتي تسوين (تحجي وتباوع لسعدية)
كومي سعدية انتي سوي اريد اسولف وي بت أخوي
شفت سعدية خنزرت علية كلش خفت منها وخفت خاف تضربني من تروح عمتي
سليل.. لا لا اني اسوي احب اطبخ
كامت تضحك سعدية وكالت
سعدية.. هية مجلبتلي تريد تطبخ وإني عايفتهة على راحتهة
رحت للمطبخ وأفكر
كبر الي لو حاجية كبالهة جان عمتي تفضحهة وترزلهت كبر الي غبية مو عمتي يمي ليش حتى أخاف منها ضليت ألوم بنفسي وسويت اكل خلصت بقى بس التمن لازم يتهدر عفتة على نار ناصية ورحت يم عمتي لكيتهة تسولف هية وسعدية بس سعدية معصبة
عمتي.. كملتي حبيبتي
سليل.. أي
عمتي.. هاا لعد تعالي هنا يمي
سعدية كامت وضليت بس اني وعمتي نسولف بعدين رحنة تغدينة ورجعت للغرفة اني وعمتي نريد نام
سليل.. عمة اليوم تباتين
عمتي.. اي ابات لأن باجر نسوي أربعين لاهلج
سليل.. همزين راح تباتين لأن مشتاقتلج
عمتي.. وإني هم
طبعا الليل كلة كاعدين اني وعمتي ب4 اجوي الكصابين حتى يذبحون الذبايح عمتي مانامت كامت تساعد سعدية وإني ضليت شوية وياهن من صارت ب6 طفيت ونمت
حلمت
ماما وبابا وسيف كاعدين مكان كلش حلو بس اكو فاصل بيني وبينهم اريد اروح يمهم بس مايقبلون
بس سيف كالي حضري نفسج اليوم راح نجيكم لاتبجين كدامنة ترة نزعل ومانجي ودير بالج على نفسج
وماما كالتلي ماما اصبري وتحملي لأن رب العالمين ماينسة عبدة
وبابا كالي بوية ديري بالج على نفسج راح تواجهين هواي ناس صيري قوية وانتصري عليهم
بعدين كلهم دارو وجهم وراحو
وفزيت من النوم مخترعة وخايفة وفرحانة بسرعة كمت ضحكت وباوعت لنفسي بالمراية
أخذت ملابس جديدة من الي جابتهن عمتي وطبيت للحمام سبحت وطلعت اضحك شافتني عمتي
عمتي.. بسم الله الرحمن الرحيم هااي شبيج ضحكين
سليل.. عمة اليوم أهلي يجون وكولي لاتبجين لأن اذا بجيت مايجون انتي هم لاتبجين
اجت عمتي حطت يدهة على كصتي
سليل.. عمة هااي شبيج واللة ما اجذب همة كلولي راح نجيج اليوم شوفيني طالعة حلوة
عمتي.. اي تخبلين (جانت تحجي وتباوع لسليل بنضرة صدمة)
سليل.. عمة انتي هم روحي بدلي وترتبي خطية صارهم هواي ماشايفيهم خلي يشوفونة حلوين هههه
اجت عمتي شبكتني وكامت تبجي
اني البجية جنت ضامتهة ومن عمتي بجت دمعت عيوني بس صيطرت على نفسي ومابجيت
سليل.. عمة ليش تبجين كافي اللة عليج
هدئتها وديتهة للغرفة وضليت كاعدة يمهة بلكوة سكتتهة بعدين نامت عمتي باوعت للساعة شفتهة ب11 الصبح
كلت بعد وكت القراية مسويهة ب2 خلي الف راسي وانام نمت وكعدت وحدي الساعة ب1
شفت عمتي نايمة كعدتة وكمنة نغدينة ورحت بدلت ملابسي لأن راح يجون العالم
بدلت ونزلت شفت اكو كم مرة سلمت عليهن وباوعت للبيت كلة فراشات وطلعت للحديقة شفت اكو فراشات
يكولون الفراشات من يجن من يموت واحد معناه روح الميت
ضليت اباوعلهن واضحك وكلساع يجن يفترن فوك رأسي وإني فرحانة كلش ، شوية وطلعت عمتي صاحت بية
عمتي.. ولج سليل شسوين هنا هسة يجون أولاد عمامج ويرزلوج تعاي طبي جوة
سليل.. عمة تعاي شوفي هذولة اكيد أهلي
عمتي.. يمة البت تسودنت تعاي ولج طبي
سليل.. شبيج عمة
اجت عمتي جرتني وطببتني جوة شفت كثرانات النسوان البيت متروس نسوان وعمتي تجر بية
كدام الناس
سليل.. عمة عوفيني اريد اطلع
العالم كلهة تباوعلي وإني اوخر بيدهة وهية تجر بيدي
طببتني للغرفة و سدت الباب
عمتي.. سليل شبيج تسودنتي كلهة كامت تحجي عليج شعدج تركضين ورة الفراشات زعطوطة انتي خليتهم يكولون عليج مسودنة
صح اني جنت فرحانة بس الوجع بكلبي ومن شفت الفراشات فرحت كلش عبالك طفل قشمرو علية بشغلة ، جنت مستعدة أي واحد يكلي شغلة اصدكهة بس كون يجون أهلي واشوفهم ويشوفوني لأن كلش مشتاقتلهم ضلت عمتي تحجي وترزل
بس اني عبالك غير عالم اصلا ما منتبهة الها بس صافة علة الحايط وتخيل أهلي كبالي والابتسامة ترسم على شفايفي لا ارادي
عمتي.. ولج تخبلتي سليل شبيج عمة ششوفين ولج (تحجي وتباوع على الحايط الي تباوعلة سليل )
عمتي.. سليل يمة شبيج شو حاجيني
ولج باوعيلي (تحجي ولازمة رأس سليل تريد ديرة بتجاهة)
تحجي عمتي وإني اصلا ما منتبهة الها اباوع للحايط واتخيل أهلي امي و يضحكون
بعدين ما احس لأن راجدي أجاني رجعني للحاضر الي عايشة بي
سليل.. هاااي ليش
عمتي.. حتى تصحين كافي راح تتخبلين امشي اجت الملة عيب من العالم
لزمت يدي عمتي وطلعنة والناس كلهة تباوعلي
بدت تقرة الملة واني تذكرت سيف مرة جانت عدنة قراية بيتنة والملة تقرة واحنة نصفك فوك ونضحك
ضحكت وضليت اباوع النسوان شلون يلطمن بس وي الضحكة دموع
عمتي.. ولج سليل امشي طبي جوة فضحتينة
سليل.. ما ما ما اطب جوة
جانت اكو مرة بصف عمتي اجت جرتني على صفحة
-شبيج خالة ليش هيج تسوين بروحج مو ميصير
سليل.. خالة البارحة أهلي كلولي اليوم راح نجي ولاتبجين لأن اذا بجيتي انروح
-أي لاتبجين بس لا ضحكين واذا تريدين ضحكين طبي جوة
سليل.. اريد اضل
-شتباوعين مايصير هيج تسوين بروحج تعالي نسولف اني وياج جوة
طبيت اني وهاي المرة للغرفة وضلت تسولف وياي وتذكرني باهلي ماتحملت اني ضليت ابجي بعدين طلعت من الغرفة وإني طلعت كل الوجع الي بداخلي صيحت وكسرت وبجيت
بس احس بعدهة العبرة خانكتني وماتطلع كلهة
ضليت ابجي إلى أن صارت وقت وصبو اكل جانن النسوان قليلات بس الزلم كلش هواي وناس طابة وطالعة
وإني جنت نايمة و حاطة رأسي بحضن عمتي واباوعلهم وابجي بصوت ناصي
■■■■■■■■■■■■■■■■■■
صالح...
مرن هذني الأيام وماصار شي مهم نجلاء صالحتهة بس كل شوية دور الها عركة
أخوي عمار الأصغر من قاسم خطبنالة مرة وحنة من عاداتنة من نخطب ورة سبوع الملجة وراهة بسبوع العرس بس اجلناهة لأن عدنة ناس ميتين بالعشيرة وفشلة منهم من يطلع الأربعين مالتهم نسوي العرس
صار الأربعين مال ابن أبو حميد أحمد رحنة للفاتحة انة وابوي وامي وشهاب وام شهاب
رحنة من وكت لأن اكو قراية نسوان من وصلنة احنة طبينة للمضيف والنسوان طبن للعزة
كمنة اني وشهاب ساعدنة الولد بالطبخ
صار وكت العشة واكلنة ومن كملنة حاجيت أبو حسين
صالح.. أبو حسين بلا زحمة عليك ماتصيحلنة واحد من الولد يروح يكول للنسوان ياللة نريد نروح
فارس.. هسة اكول الواحد
راح ابو حسين وإني ضليت واكف شوية واجة شهاب سولفت ويا
شوية وطلعن رجعنة للبيت
جنت كلش تعبان حطيت راسي ونمت
مر أسبوع وحددنة موعد عرس عمار
وخابرنة أبو حسين وترخصنة منة
وعزمنا وقبل وكال راح اجي
صار العرس وسوينة عشة بس كلبي مامرتاح مادري ليش جنت واكف وي أبو حسين
دك مبايلة وجاوف
فارس.. شنو .. وليش .. اخذتوهة للمستشفى.. استغفر اللة.. ياللة جاي هسة
صالح.. خير أبو حسين شكو
فارس.. بت أخوي احمد المات ...............
●●●●●●●●●●●●●●●●●●●●●●●●●●●●●
انزا الكم صور الأبطال لو تضلون على مخيلتكم🙃
●●●●●●●●●●●●●●●●●●●●●●●●●●●●●
ولهنا ويخلص البارت 😏
اشوفكم بالبارت الجاي 💃
احبكم يا أحلى ناس 😃❤❤
اختكم#زينب البديري 💡
بااااااي🙋😘
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!