رواية سليل للشيخ الفصل الثالث 3 - بقلم 313

# سليل للشيخ

#البارت الثالث

للكاتبة #زينب البديري 💡

ورا السحور بارت هم تعويض عل التأخير
___________________

اني ودا أنزل سمعت صوت سيف يخابر وجان الباب مفتوح شوية جان يحجي وي بتول وخطية فرحان يكللها بعد كم يوم واجيبج يمي ويضحك دعيتلهم من كل كلبي انو يضل حبهم للأبد وانشالله اللة يوفقهم ويحقق امنيتهم ، نزلت جوة اكلت ورجعت نمت كعدت ساعة2 نزلت جوة لكيتهم يتغدون

سيف.. نورتي ست سليل

سليل.. بنوراك ، جوعانة

سيف.. جا مومسوين اكل

ماما.. تعالي اكلي ويانة

سليل.. لا مااريد اريد بيض

ماما.. بكيفج روحي سوي بيضة واكلي

رحت سويت اكل واكلت بعدين كعدنة كلنة سوة

ماما.. أحمد هسة شكلت على خطوبة سيف

جان سيف يلعب بتليفونة من سمع ماما كالت هيج كبل رفع راسة

بابا.. هوة اذا يتحمل مسؤلية اني قابل

سيف.. اكلكم شو تحسسوني طفل وكاعد يمكم شنو كلساع كايلين مسؤلية

بابا.. شوف سيف الزواج مو بس حب الزواج مسؤلية ولازم تكون كد المسؤلية ياللة تزوج مو باجر عكبة تتعاركون على أقل شغلة وماتلبيلهة احتياجاتهة لمرتك لو ليل نهار طالع وي أصدقائك يعني احنة بت الناس راح تكون بأمانتنة وانتة لازم تحافظ عليهة

سيف.. انشاللة يابة انشاللة هسة كولو شقررتو حتى اكللها تكول لأهلها

بابا.. كللهة أسبوع الجاي يمكم احنة

سيف.. يايوم

بابا.. الجمعة انشاللة

كام سيف وباس راس ابوي ورجع على رأس امي وكال

سيف.. اللة يحفظكم الي صدكو راح أكون كد المسؤلية وما أنزل راسكم يوم

بابا.. اللة يحفظك ويرعاك بنيي

ماما.. اللة يوفقك وينور دربك

سليل.. جا بس لسيف وإني شنو طرطور واكف يمكم

بابا.. صدك جذب انتي الأصل خلي يولي سيف

رحت لبابا وشبكتة واجت ماما هم شبكتني وسيف هم يعني صارت شبكة عائلية اني بجيت بوقتهة

ماما.. يا سليل عليمن تبجين

سيف.. يمة شنو ماتعرفين سليل كتلة من مشاعر ماتتحمل واحد يفرح الة تخربهة علية

سليل.. سيف اسكت انتة

بابا.. ياللة روحو اريد انام

سيف.. رايحين تعاي سليل وراية

سليل.. خيرك لازم بيهة مصلحة

سيف.. تعاي وسكتي

سليل.. ترة ماناسية البارحة اطلبك اكل

سيف.. من عيوني بس تعالي نضفي الغرفة

سليل.. شنوووو لو تموت ما انضفهة

سيف.. سليل خطية امي ماتكدر تنضفهة

سليل.. أي وانتة ماعندك ادين

سيف.. راح اروح اني وانتي نضفي باااي

كال هيج وطلع من البيت اني ضليت اصيح ورا ما اهتم بس يباوعلي بنضرة خبث الخبيث

سليل.. ماما ماتحاجين سيف شنو هل سخافة

ماما.. يمة غير انتي اختة  قابل المن يكول

سليل.. يبووو منة

ماما.. ياللة مابقى شي وتجي مرتة

سليل.. أي واللة واخلص منة 

صعدت لغرفتة رتبتهة لاعب بيهة لعب الملابس كلهن بالكاع وكشور الحب بالكاع  كالبهة كلاب نظفتهة وطلعت شوية واجة سيف كعدت تعاركت ويا بعدين تصالحنة مر الاسبوع واجة يوم خطبة اخوية سيف كلش فرحان هوة اني من البارحة مانمت لأن قبلهة بيوم نمت كلش هواي مااجاني نوم ضليت كاعدة للصبح

سليل.. صباح الخير شلونك عريسنة

سيف.. هلة هلة باخت العريس

ماما.. زين ماكو عرك اليوم

سيف.. يمة اسكتي لاتذكريهة هسة تكعد تتعارك

سليل.. يمة اني اروح وياكم من تخطبون

سيف.. وليش باللة 

سليل.. ولك أمنيتي اروح واشوف شيحجون من يخطبون 

سيف.. يعني لأن تريدين تعرفين شنو يحجون مو علمود اخوج

سليل.. جا لو مو انتة مااروح

سيف.. امممم دياللة ياللة......

راد يحجي بابا قاطعة

بابا.. سيف لاتتعاركون واللة مالنة خلكم

سليل.. ماما راح اروح أحضر نفسي

ماما.. ولج بعد وكت مو هسة انروح العصر

سليل.. أي حتى لو اروح اسوي ماسكات واشوف شنو البس خو مو اروح مبهذالة

سيف.. ولج هية العروس ماراح تسوي هيج

سليل.. انتة شمدريك هسة تلكيهة كاعدة تسوي بكفشتها وكاتلهة الوصخ

سيف.. واللة عدج سوالف صدك يمة اني اوديكم مو

بابا.. لا لاتروح انتة

سيف.. ليش

بابا.. ولك عيب من العالم شعدك رايح عود انتة العريس

سيف.. بوية ما أنزل بس اوصلهم

بابا.. ولك اني ماعرف سوالفك

عفتهم يتناقشون وصعدت لغرفتي طبت سبحت وسويت ماسكات البشرة وكويت شعري ضليت بي ساعتين تقريبا لأن شعري طويل كملت ساعة 3 حتى غدة ماتغديد من كملت نزلت جوة اكلت وشوية وصعدت لغرفتي مطفية من النعاس وتعبانة حطيت راسي عل المخدة ونمت نوم عميق لأن تعبانة

حسيت بماما اجت كعدتني اريد اكوم ماكدر جنت كلش نعسانة كتلهة اي كايمة كمت من مكاني وامي طلعت من الغرفة باوعت لنفسي بالمراية عيوني مغوشة ونعسانة الغرفة جانت باردة باوعت لفراشي رحت نمت علية كلت شوية وابدل نمت وكعدت نزلت جوة ماكو واحد بالبيت بس بابا فرحتلة

سليل.. وين امي

بابا.. راحن كم مرة كعدنج بس ماكعتي

سليل.. ما ما شنو يعوفني مو كتلهم اريد اروح وياهم

بابا.. بابا أكثر من مرة كعدوج وانتي ماكعتي بعدين اكيد راح نروحلهم هواي وانتي روحي وياهم

سليل.. سيف وين

بابا.. راح وصلهم

سليل.. انتة مو كتلة لاتروح

بابا.. انتي تعرفين اخوج مايسوي إلا الي براسة

سليل.. بابا انتة مطي مجال هواي شجاك ماتحطة وتكتلة كتلة زينة يتأدب

بابا.. خيرج شو أليوم كالبة علية

سليل..هههه لا ماكو شي بس هوة خبيث

ضليت اسولف اني وبابا إلى أن اجو

سليل.. هلة هلة نورت شو تأخرتو 

سيف.. (يباوع الها نضرة خبث) آي مو رحنة للمطعم

سليل.. جذاب

سيف.. واللة

سليل.. واللة ما ما شنو تروحين تأكلون ما تأخذوني

سيف.. صدك جذب اكل وما اجيبلج تعاي جبتلج اكل

سليل.. صدك وين(تحجي وتضحك)

سيف.. يم امي

سليل.. صدك وين امي

سيف.. برة يم عمتي

سليل.. يااا عمتي هم هنا

سيف.. أي جا منو يروح وي امي

بابا.. خالتك لعد وين

سيف.. وديتها خالتي  للبيتها  

سليل.. امي و عمتي شعدهن برة

من حجيت طبت عمتي حميدة وامي رحت بتجاهة حتى أسلم عليهة 

سيف.. تدرين بعمتج ماشايفة شافت الأكل وهجمت علية والكجب تبدة عليهة (يحجي بكل جدية عود )

سليل.. هههه يا صدك عمة

عمتي.. ولك اجي اكتلك هسة ادبسز

سليل.. عمة شجاج بديتي الكجب

عمتي.. ولج هذا اخوج جذاب هوة بدا علية ياريت لو ما رايحة ولا اشوف خلقتها جنها صخل

كالت هيج وباوعتلي وغمزت اني ميتة من الضحك لأن دائما عمتي وسيف يتعاروكون

سيف.. هااااه اعصابج سندس شوفي وجهج...

بابا.. ولك سيف كافي

سليل.. بابا اني مو كتلك يرادلة كتلة

سيف..  هاااه

بابا.. كافي تعالو اكعدو كولو شكالو ماكالو أهل البنية
  
ماما.. كالو نردلكم خبر بعد أسبوع

بابا.. زين صدك البنية مو حلوة

ماما.. لا جذب البنية حلوة حتى أحلى من...

كالت هيج والبالنهاية سكتت وضربت يدهة علة راسهة على كيف اني كمزت من مكاني

سليل.. أي كملي كملي احلة من هااي الي جنهة صخل على كولة عمتي

سيف.. ولج

سليل.. انتة اسكت

عفتهم وصعدت لغرفتي كلش ضجت أصعب شي من واحد يكول لبنية اكو بنية أحلى منج ضليت كاعدة بالغرفة شوية واجة سيف كالي عمتي تصيحج
نزلت جوة لأن عيب منها

سليل.. هاا عمة شتريدين

عمتي.. تعالي اكعدي امج تشاقة وياج

باوعت لأمي بنضرة حزن صاحتني رحت شبكتها وكعدت بحضنهة

ماما.. اني ماكو واحد أحلى من بنيتي انتي أحلى وحدة عندي وماكو واحد يوصل لجمالج

سيف.. أي مو القرد بعين أمة غزال

باوعتلة صفح وشبكت امي

سيف.. ولج كومي كتلتي المرة

سليل.. معليك انتة

ضليت كاعدة بحضنهة على عنادة شوية وكمت رحت سويت عشة الهم لأن ماما كاعدة يم عمتي كملت وصحتلهم على العشة احنة ودا نأكل

سليل.. عمة هذا اني سويتة

عمتي.. أي عفية ببنيتي هاي الكبة هم انتي سويتيهة

سليل.. هاا اي اني سويتها

سيف.. عمة هية هااي بيهة حظ تسوي اكل

سليل.. دخلي نشوف مرتك شسوي

سيف.. تسوينة أشكال والوان

سليل.. احنة نريد اكل مانريد أشكال والوان

سيف.. سليل

سليل.. عيون سليل

سيف.. يبو منج ومن عيونج

باوعتلة صفح وكمت اكل كملت وكمت من الأكل صعدت لغرفتي ضليت العب بالتليفون بعدين نزلت لكيت عمتي تريد تروح

سليل.. عمتي ماتباتين يمنة

عمتي.. يعمة الجهال ماكدر اعوفهم وحدهم وخنزيري مايقبل

كالت هيج دك عليهة رجلهة

عمتي.. اهاا شوفي مو كتلج خنزيري مايعوفني

جانت كاتبة علية ساعتي السودة متت من الضحك علية رجل عمتي شوية عدة خباثة مايخليهة تجي يمنة هوااي ولا يخليهة تبات كلة من ورة عمامي لأن عدة خلاف وياهم مع انو بابا مالة دخل بعمامي لأن اصلا همة نكناكين ويتعاركون وهوة عازل روحة عنهم لأن كلش مزعجين وعمي الجبير شيخ وبابا ابد ما يحب سوالف الشيوخ فمبتعد عنهم

شوية وراحت عمتي صعدت لغرفتي من راحت خابرت صديقتي سولفت وياهة بعدين طلعت من الغرفة سمعت سيف يحجي وي بتول

سيف.. بتول حبيبتي شو مادري شبية احس اكو خنكة بصدري
.......
سيف.. لا مو مريض بس شو احس راح يصير شي وبعد ما اشوفج

يا هذا شبي سيف ، عفتة ونزلت شربت مي واخذت دولكة وياي وصعدت لغرفتي كاعدة شوية وسمعت صوت كلش عالي وطفت الكهرباء طلعت من غرفتي ركض ورجلية ما حاملتني بلكوة امشي ...........

●●●●●●●●●●●●●●●●●●●●●●●●●●●●●

ولهنا ويخلص البارت 😏

اشوفكم بالبارت الجاي 💃

احبكم يا أحلى ناس 😃❤❤

اختكم#زينب البديري 💡

بااااااي🙋😘