رواية سليله الانتقام الفصل الثامن 8 - بقلم taratel

تعالي نعيد ترتيب العشق
بما حل وما وثق
تعالي نعيد ترتيل الشعر
دوماً،دهرا بلا ملل ولا كللل
تعالي نعطي للحب امل
واحبك حبا بكل ما احمل
تعالي واروي عطشي
هبي لي وصالاً منكِ لا ينتهي 💕💕
_______________

.. طلعنه نتمشي على كيف نشوف صار كبالي ضبع بس هوه ما شافنه جان كاعد يمه شرار ويحجيله شي وضبع عيونه حمر دم وقابض على ايده وفجاءه ضبع كام على حيله وصاح بصوت رج البيت رج

ضبع: ملاااااك

..لزمت باايدي
ملاك: حبابه الن لا تعوفيني والله لو لزمني ضبع يجرم بيه
... اني من يمي ضليت ارجف من الخوف اجا بااتجاهنه وجر ايد ملاك

ضبع: ولج اني كم مره كايلج لا تتنصتين علينه
.. ضلت الكلمه ماتعرف تطلعها من الخوف اجا شرار دفعه

شرار: هاي شبيك يمعود صدك تحجي عوف البنيه شسوت يعني وقابل شصار

حجه بعصبيه وبصوت
ضبع: هذاا طبعها متغيره تبقه دومها تحب تسنط

شرار: وشنو يعني واذا سمعت قابل راح تنباك خزينه الدوله العراقيه

.. خزر شرار وتقدم عليه وحجاله بهمس مسموع وهوه صاك على اسنانه

ضبع: شرار لا تصير مطي كلش زين تعرف شراح يصير بيها هيه اني مو مشكله خل اروح يطبني حمس

.. شرار اخذه يجر بي للصاله وهيه وكعت على رجليها لزمتها من ايدها ونزلت يمها

ملاك: ولج الن هوه بس شافنه نتسمعلهم هيج سوه شلون لو عرف

.. باوعتلي بعيونها المتروسه دموع

الن: خل يولي الله ياخذه ويخلصنه منه شحده يحاجيج بعد

.. اخذتها للغرفه ضلت تبجي ونامت اني هم اخذت مكان يمها
... كعدت لكيت الدنيا صايره غروب شلت نفسي بلكوه من الفراش باوعت على الساعه لكيتها ب٦ ونص طلعت للصاله ماكو احد ضليت افتر ادور ماكو ولا طير شويه وكعدت ملاك واجت يمي والقلق والحيره بعيونها

الن: هسه شراح تسوين
ملاك: ماعرف حايره
الن: ماتوقع بعد مادافعلج وكتل نفسه عليج راح يكعد ويحجيله شنو شاف
ملاك: مو هذا الي محيرني
الن: شنو لعد
ملاك: مكاعد احس هذا سيف الي يهدد
الن: شلون
ملاك : سيف حيل جبان حيل وجان دائما يريد يطلع من العلاقه لان يخاف من اهلي وخاصتا ضبع فا مو مال يكعد ويهدد بس الصور شوصلهن ؟؟

الن: منو تتوقعين
ملاك: مادري ماعرف منو اله مصلحه

..صفنت ثواني واردفت
ملاك: ماكووو غير اهل القصر
الن: معقوله يسووها يسون بيج هيج وانتي عايشه وياهم وبتهم

.. باوعتلي وضحكت
ملاك: اصلا عيب تحجين وادكولين معقوله
الن: يمه انتو عائله تخوف

..ثنت رجليها وصارت مقابيلي وحجت بنبره جديه
ملاك: احنه حيل نخوف حيييل ديري بالج من عدنه

الن: يمه خوفتيني

...ضحكت وراها تقدمت عليه ولزمت ايدي
ملاك: الن الي راح احجي افتحي اذانج حيل زين واسمعيني
الن: شنو
ملاك: انتي تحبين ضبع
الن: ايييع
ملاك: لا تقاطعيني وسمعيني زين
الن: تمام
ملاك: ضبع الي مر بي شي مو بلهين ابدا حيل تاذه من هوه وصغير والشي الي مر بي صنع من عنده انسان حيل مو زين اذا وكعتي باايده بعد ما تخلصين كلها تخاف من ضبع ومن عقله

..شدت على ايدي حيل
ملاك:اسوء شخص راح تقابلي بحياتج ضبع
الن: هاي شبيج ملاك ترا ماعندي شي ويا !!
ملاك: ضبع ماعنده گلب والمكر والحيله عنوانه فهمتي عليه شدا اكول

.. هزيت براسي
ملاك: مثل الصندوك الجبير ومتروس اسرار  ومحد يكدر يوصله هذا ضبع
الن: هاي شبيج ترا خبلتيني ضبع ضبع خل يولي ترا والله مااحبه ولو يبقى اخر واحد بلدنيا هممم ما احبه

.. رجعت جرت ايدي وضغطت عليها اكثر
ملاك: لو اجا يوم وحبيتي اشلعي كلبج ودوسي عليه
الن: لا تخافين ميصير

...حضنتني وكالت
ملاك: احسج مثل اختي واريد احميج بروحي وماريد احد ياذيج

.. اني هم شبكتها وبوستها بخدودها بعدتني وباوعتلي بنضرات قلق وخوف اخر حجايه كالتها قبل لا يفتح ضبع الباب
ملاك: الضبع لو راد شي ينوله وهو هسه رايد شي ..

.. باوعنه اثنينه لطكه القفل وفتح الباب ودخل بزيه العسكري ويا شرار دخلو ووياهم العشا اجا حطو الاكل على الطاوله

..اجا شرار عليه
شرار: الصفره

عيبت عليه واني اكله
الن: الاصفر

.. طلع شرار مادري وين شويه ورجع مبدل ولابس تراكسود لون نيلي وبي خطوط لون ابيض يمكن جانت ماركه اديداس شرار حيل حلو ملامحه حاده وعيونه كانما مكحله من رب العالمين ورموشه حيل كثيفه ولونها اسود وشعره حتى عيونه لونهن اسود طوخ كانما ليل طوله وضخامته تقريبا بطول ضبع بس ضبع اضخم شوي

شرار: ولج الصفره شبيج صافنه عليه

..حركت حواجبي بااستهزاء
الن: عااجبني

...حسيت على ضبع يخزر بينه رحت اسوي نفسي دا احضر العشا وي ملاك وكعدنه تعشينه وضبع مدري شبي مطنكر وشرار بعد ما حجه بس شرب جاي وطلع وشويه وضبع طلع مدري وين ملاك كاعده بلغرفه كمت دخلت اسبح .. شويه وحسيت على باب الشقه انفتح وسمعت صوت بجي مادري شلون لفيت نفسي وطلعت لكيت ملاك بحضن ضبع وتبجي وهو يمسح على راسها

ضبع: اني اسف يروحي بس جنت حيل خايف عليج وتدرين شغلي شلون مزعج

.. رفع راسها ومسح دموعها
ضبع: بنيتي وصديقتي واختي شوفي شجبتلج
.. رفعلها بوكس كيك
ملاك: عزااا ضبع اذكرت
ضبع: كل عام وانتي بخير حبيبتي
.. شبكته وباسته وهيه فرحانه حيل

.. واكفه من بعيد واباوع عليهم شكد تمنيت عندي هيج اخ او اصلا تمنيت شخص يعاملني هيج ليش كبرت على الضرب ليش كبرت على الاهمال منو جان السبب بحياتي التعيسه الي عشتها اهلي؟؟ ليش فتحت عيوني ولكيت اخويه يتحرش بيه ومن كبرت ابويه كتل امي بحضني شلون راح اعيش حياتي طبيعيه بعدد..

.. تقربت عليها بوستها
الن: كل عام وانتي بخيررر حبيبتي ملوكه
ملاك: وانتي بخير يعمري

.. اخذت الكيكه وراحت تاخذلها صور وتقطعها

..ضبع صار قريب عليه حيل ردت ارجع للغرفه لزمني من ايدي ورجعني عليه صار ما يفصلني عنه بس سانتيمترات ولغاهن من لزك جسمي عليه حاولت ابعده عني ماكدر

الن: هاي شبيك ضبع هسه تجي ملاك وتشوفنه عيب وخر
..ادفعه بايدي ميتحرك عيونه مثبتهن عليه واني احاول ابعد وجهي عنه وابعده عني .. لزم وجهي قوي ودارني عليه دنك وجهه قريب عليه

.. رفع ايده جر الخاولي من شعري الي ينكط مي
قرب وجهه على شعري وهوه يشتم بي
..احاول ابعده ميتحرك حجاره والله حجاره

الن: ولك شتسوي وخرر عني ضبع شبييك
ضبع: اريد اشوف الشامبو مالتي خاف مخلص اكسباير اجيب غيره بس هسه لا تاكدت مابي شي

.. دفعته عني قوي وخر
الن: خبببل

ابتسم
ضبع: شبيج

رفعت اصبعي بتهديد
الن: والله ياضبع لو مديت ايدك عليه بعد عيب استحي اني بنيه جبيره مو طفله كلساع مشبكني لو شايلني وانت رجال غريب عني

..هز براسه وكال
ضبع: صار بس روحي هسه لبسي ملابسج كامله لان هذا الرجال الغريب بعد ما يتحمل

..باوعت على نفسي لابسه ملابسي هذا شبي رجعت باوعتله

الن: ليش لابستهن على الربع ومادري

..ضحكت ضحكه استهزاء وبنص الضحكه اجتني لحظه ادراك باوعتله لكيته واكف مبتسم ويباوعلي حطيت ايدي على صدري وركضت للغرفه قفلتها ونمت على السرير من الفشله واني اصيح

الن: الللله ياخذك يا ضبع ان شاء الله اللله ياخذك كون تلزكك تريله لزك هيج لزك وتخلصنه من شرك

جاوبني بصوت عالي
ضبع: فوك ماانبهج

..صحت بصوت على كيفي خفت يسمعني
الن:جلب

.. ما اسمع بس صوت ضحكاته العاليه المستفزه وصوت ملاك وهيه تحاجي

ملاك: شبيكم
ضبع: ماكو شي

.. ماعرف شسوي ضليت من الفشله بيومها شكد اجت ملاك رادتني اطلع يمهم ونحتفل سوه بس ما قبلت وبقيت نايمه شويه وحسيت عليها فتحت الباب ونامت بلسرير باوعتلها ولكيتها نايمه

... اجا بالي ليش هيه هيج حجتلي على ضبع ليش كالت هوه مو زين وهوه حيل يحبها ويداريها ..ممكن تبالغ .. طردت الافكار من بالي وحاولت اتناسى الموضوع .. وياريتني ما نسيته ياريت سمعت بكلامها لو سامعه بكلامها جان اني مو حالي هذا ..

..................

.. كعدت الصبح احضر نفسي اليوم راح اروح وي ضبع اكمل اجراءات التسجيل بلبدايه خفت بس بعدين كولشي سهل طلع كملنه كولشي ورجعنه بلطريق اتصل على ضبع شاله جان صوت بنيه بس ما واضح الي تحجي باوعتله ابتسم وسده بدون كلمه يمكن انتظرها تكمل كلامه وسده بوجها !!

..رجعنه للبيت فتح الباب ولكينه الن متربعه وكاعده
تنتظرنه لافه على راسي وصله مال شنو ماعرف وحاطه يمها عوده الماسحه شكلهاا يخرب ضحك

الن: وين جنت استاااذ ضبع ردت انخطف من وراك

..راح ضبع كعد على الكرسي مقابليها وشبك ايديه وكال
ضبع: شمسويه يامصيبه نزلتلي من السما وهيج ركع على راسي شمسوووويه

.. حجه واخر كلمه صاح

.. خافت من صيح وشكلها فش وخرت الوصله من راسها ودنت عوده الماسحه من يمها
الن: هاي شبيك كولشي ما مسويه هوه بس كتلتها وطردتها برا والله مسويت شي بعد

ضبع: لا صدك جذب ما مسويه شي بس لامه المجمع السكني وهسه خابرولي امن المجمع يكلولي شيل غراضك وانقلع

..كامت على حيلها خايفه واصابعها بحلكها تعض بيهن من الخوف وتباوعله بعيونها الخضر بكل براءه وشعرها العسلي الي جان نازل على وجها تجنن تجننن  بقت هيه ويا واحد يجر طول واحد يجر عرض رحت للغرفه ابدل وانام لان حيل تعبانه وطالعين من الصبح بدلت ورحت دا اريد انام اجتني رساله ..

.. اخر ايامج تونسي عدل
.. منو انت

.. ماكو جواب خفت حيل وخفت اسولف لضبع حسبالي نفس الشخص ابو الصور ويشوفهن ويذبحني ماكدرت انام ضليت احوس بلغرفه منا لمن فتحت الن الباب

ملاك: الن
الن:ها
ملاك: شوفي اجتني رساله

..فتحت الرساله وقرتها باعتلي
الن: ملاك لازم تسولفين لضبع
ملاك: لا حبابه ماريد والله ياذيني يمكن حتى يذبحني وما يصدك
الن: صدك وله ما صدك جانن فعلا ذني صورج او لا صدكيني راح يساعدج
ملاك:خايفه حيل ضبع ما يتامن

.. شويه وصاح ضبع عليه طلعت اشوف شكو والن طلعت وريه

ضبع: حضري نفسج شويه ويجي شرار ياخذج للشقتكم اني عندي شغل ماكدر اوديج بس اني ماراضي على روحتج كتلج ابقي اهنا احسلج

ملاك: لا ضبع حباب شبيك هناك صديقتي ماعليه شي

الن: وانت وين طالع

.. غلس عليها اكثر شي يكرهه ضبع احد يسئله وين طالع لو وين تروح ميحب احد يعرف مكانه لو الوجهه الي يريد يروحلها

الن: هاي شبيك مو داحجي وياك

.. رفع وجهه وحجه بهدوء قاتل وهو ياشر باايده عليها
ضبع: امي

..هزت براسها نافيه

ضبع: ابوي

الن:لا

ابتسم
ضبع: مرتي؟؟

الن: هممم لا بس اريد اعرف لان اكو وحده مطيه كاعده هنا

..بدون ليباوعلها
ضبع : روحي ملاك حضري نفسج نص ساعه وشرار يجيج

ملاك: تمام
.. ماعرف شنو صاير بيناتهم بس الاجواء متكهربه شويه واجا شرار وودعت الن وحضنتها جان كلبي حاسني راح يصير شي بعد هذا الوداع بس شنو؟؟

حضنت الن وهمست بااذنها بعيد عن شرار وضبع الي جانو واكفين يسولفون

ملاك: بعد ما اوصيج الحذر الحذر
الن:راح ترحين وتعوفيني ويا ابحدنه

..رجعت همست بااذنها واني ابوسها
الن: تردين تعيشين كدامج طريقتين يا اما تشردين بروحج يا اما تتبعين طريقته..

..قاطعنه شرار وهو يكول
شرار: خلصتي

..هزيتله براسي واخذ الجنط ونزلنه طول الطريق ما حجه بس يشرب جكاير ثعول السياره تثعول

ملاك: عفيه كافي

شمرها من الجامه وبقى ساكت لحد ما وصلنه
نزلت ونزلي الجنط

شرار: خل ندخل اول شي نشوف الوضع بعدين اذا عجبني الوضع تبقين

..هزيت براسي ودكينه الباب طلعتنه بنيه ايه من الجمال راويتها الورقه  وحاجتني يمكن من المحافظات الغربيه شويه لهجتها غريبه قريبه على الموصليه ودخلت لكيتها واكفه تحجي وي شرار وتمنعه يدخل

شرار: سويلي طريق ادخل
.. ميصير تدخل بيت وبس بنات
شرار:اي مو راح ادخل اغتصبجن هوه اجينه نشوف البيت ونطلع 

..حطت ايدها على حلكها بصدمه

..سمعت صوتها وهيه ادكله

...يا ما تستحي
وسدت الباب بوجهه واجت عليه
ملاك: العفو منج حبيبتي بس ممكن يدخل وياي ماكدر لازم يشوف الوضع جوه
..تمام هاي علمودج

..راحت فتحتله الباب ودخل واحد يخزر بلثاني شكلهم يموت من الضحك هوه شضخمه وهيه ناااعمه حيل واحد يريد ياكل الثاني دخل هوه وهيه ركعت الباب ركع اندار عليها

شرار: على كيفج عيني على كيفج سندس

.. تفضل رجاءً بدون كلام شوفو المكان وانت تطلع وهيه تبقى

..ضيك عيونه وهز باايده ودخل جان البيت عباره عن غرفتين وصاله ومطبخ باوعت للبنيه الي دخلتنه

ملاك: حبيبتي وين انام
.. اشرتلي على وحده من الغرف وكالت

..نضفتلج هاي الغرفه وعدلتها تكدرين ترتاحين بيها والغرفه الثانيه لبنيه ويانه هسه اصيحه تتعرفين عليها

..هزيت براسي وراحت وشويه اجت انفتح باب الغرفه الثانيه وطلعت من عنده بنيه اتجهت النه وسلمت عليه وعلى شرار الي ماخلا مكان بلبيت ما افتر بي كانما بيت الخلفه صحت

ملاك: يله شرار دخل الجنط

خزرني وكال
شرار: تعالي وياي دخليهن

..طلعنه برا وبدينه ندخل الجنط لحد اخر جنطه سلمها باايدي وورث جكاره وخلاها بين اصابعه

شرار: ملاك

.. اخذت الجنطه من عنده واردفت
ملاك : نعم
شرار: محتاجه شي بعد
ملاك: سلامتك
شرار: اي شي تردين اتصلي عليه
ملاك: شكرا الك تعبتك هواي
شرار: شوفي راح اكول حجايات وفتحي اذانج

.. خفت عرفته راح يحجي بلموضوع لو يلمحله
شرار: بعيده عن اهلج وناسج وكاعده وي بنات ما تعرفين هنه شنو ما شنو اهلج الي دازيج من مكان بعيد علمود تدرسين صوني ثقتهم واني كل فتره راح اجي واسئل عليج هنا وحق الحق لو سمعت حجايه طالعه عليج ادفنج بكاعج انتي وصيه ضبع وراح اخليج بعيني

.. هزيت راسي عرفته هوه شايف الرسائل وقاريهن
ملاك: شكرا شرار
شرار: ادخلي هسه الجو برد مو زين عليج لا تتمرضين
وديري بالج من البنيه الثانيه مو هاي الي طلعتنه بلبدايه لا الي وياها
ملاك:شرار
شرار:نعم
..ردت احجيله ردت التجئ اله بس ماكدرت ماطلعت من عندي الحجايه واني متاكده لو حاجيتله يكدر يساعدني وتنسد السالفه من البدايه جان تغير مصير حياتي ..

ملاك: ماكو شي هيج
..انداريت وردت ادخل صاح ورايه باوعتله
ملاك:نعم
شرار: حبيتج من اول يوم شفتج بي
............................

..طلعوا ملاك وضبع للجامعه علمود اجراءات التسجيل
وبقيت بوحدي ضليت افتر بلشقه فتحت البلكونه علمود يتغير الجو شويه واندك الباب رحت اباوع بلعين السحريه لكيت بنيه واكفه فتحته وصارت بوجهي حطيت ايدي على يده الباب جني وحده عصابيجه

الن: نعم تفضلي منو رايده
..ضبع موجود
الن: لا طلع
..شوكت يرجع
الن: تعالي فوتي هسه شويه ويجي

..والله حتى هيه ما جذبتني راسا دخلت اللزكه شكلها يخوف كوله عمليات تجميل باوعتلي وسئلتني حبيت العب ضايجه وهو اصلا شمدري ....

.. شنو يقربلج ضبع
الن: زوجي

..باوعتلي بصدمه ورجعت اشرت عليه كانما تستهزء

.. شعجب ضبع ما عرفت ذوقه هيج
الن: ليش يمه اني غابه وهو بحر كلش متوالمين ومنو انتي علمود تجين وتقيميني

..لابس يعني كلش ما متوالمين

...اني منا طابكه عندي وكلتلها شو تعالي ولزمتها من شعرها ملختها تملخ وهيه تصيح جنها وحده بربو..

اجر بشعرها واصيح
الن: ليش عيني موذوقه لو تعرفين ذوقه كلش زين كله عمليات تجميل ايع طلع ذوقه خايس خايس يدور كوله تجميل الجلب

...اجر بشعرها واحجي بحركه كلب بس ليش اني شعليه؟؟

..دفعتني وطلعت من الباب ولمت العالم عليه كمت قفلت الباب وكعدت خايفه انتظر ضبع يجي يدكون بلباب ويرحون لشويه وحسيت على ضبع اجا كلت خل اكعد اسوي نفسي عصبيه علمود ميحجايني

..جريت وصله من المطبخ وجبت العوده مالت الماسحه خليتها يمي وانتظره يجي من انفتح الباب عرفتهم وصلو دخل عليه مثل المجلوب وبس يرزل دخلت ملاك تنام وبقى ينك على راسي اخر شي كتله

الن: شوف ترا دوختني اذا ما تسكت احط هاي العوده براسك

..تقرب عليه وعيونه حمر حسيت على نفسي جفصت
ضبع: شكلتي؟؟
الن: كلت الله طالع حلو اليوم

عاط بصوت خلاني ارجف والدمعه بعيني
ضبع: سنين واني كاعد هنا ما يوم حجيتلي وي احد لو تعاركت ويا ومحد يعرف عني شي وما جايه عليه شكوه وبس مريم جانت تروح وترجع عليه ووفضلها وياي ما انسى وهسه انتي هلكدوتج هيج تسوين وتفضحيني وخليتي سيرتي على كل لسان

..نزلت راسي والدمعه بعيني الجلب قهرني
الن: بس والله هيه كالت شي ونرفزتني

.. اتجتف وهو يباوعلي
ضبع: شكالت
الن: تاشر عليه وبااستهزاء وادكلي ذوق ضبع مو هيج
..
احجي وبحركه گلب جاوبني وبكل برود
ضبع: فعلا مو ذوقي
الن: ولا انت من ذوقي بس القهرني عود ادكلي انتي مو حلوه

.. غمض عينه وراح غسل ورجع
ضبع: حضري نفسج بليل ترحين تعتذرين من عدها
الن: شو بله الزم راسك
ضبع:شكو
الن: الزم راسك واجاوبك

..سوه مثل ماكلت باوعلي بااستغراب

الن:مالكيت النخله؟؟ اذا ماروح

.. كعدت مطنكره وهوه بعد ما حجه شي طلعت ملاك وودعناها ومثل كل مره تحذرني من ضبع ومثل كل مره اتهاون بكلامها ...

..جاب عشا من برا تعشينه وسويتله جاي شرب ورحت للغرفه حايره شسوي ضبع كاعد بلصاله يباوع اخبار واجت على بالي فكره ليش ماروح ابحوش عن ضبع وارضي فضولي ليش هلكد ملاك حذرتني من عنده  رحت لغرفته اتسلل جني وحده حراميه خفت يشوفني غرفته دوم مسدوده فتحتها ودخلت تجنن غرفته احلا شي بلشقه باارده حيل لونها ابيض نازكه بشكل رحت فتحت الكنتور ادور على اي شي ممكن اعرفه عن ضبع اول مااجت عيني على مسدس بنص صندوك بي اوراق فارغه سديت الكنتور خفت من حسيته وراي

ضبع: شتسوين هنا

.. بذيج اللحظه ردت اموت من الخوف بقيت جامده بمكاني اتقرب عليه واني منطيته ظهري صارت انفاسه على ركبتي وهوه يهمس بااذني

ضبع:ثواني وتصيرين بعداد الاموات

..انداريت عليه بصدمه وخوف مالحكت اتحرك جر المسدس من الكنتور وخلا على راسي

.. نزلن دموعي بقهر وبترجي
الن: لا ضبع الله يخليك والله اخاف لا حباب والله اخاف من المسدس

.. ردت اتحرك قيدني باايدي ورجع خلا المسدس على اذني

ضبع: قريتي الاوراق
الن: وحق الله ماقريت شي ونبي ابد ما فتحت اصلا ردت اطلع بس حبيت استشكف غرفتك وصار عندي فضول والله مو غير شي

.. احجي واشهك وخايفه خايفه اموت مثل ما ماتت ماما نيران

الن:ضبع الله يخليك نزل المسدس والله اخاف حباب

..طبع بوسه خفيفه على ركبتي وهو يكول
ضبع: صيري حبابه خوش بنيتي؟؟

..هزيت براسي وترك ايدي رحت اركض للغرفه وقفلتها
بيومها حيل خفت من عنده بدت توضحلي شخصيه ضبع شنو انسان مريض ومو صاحي بس بعديش؟؟

..بقيت على نفس الوضعيه لايام يجي هوه ادخل لغرفتي وما اطلع ابدا من يطلع يله اخذ راحتي واطلع اكل واشرب مي وارجع ادخل عشت اسبوع كامل على هذا الروتين ملاك ماعرف شصار وياها لحد ما اجا اكثر يوم مشوؤم بلدنيا كعدت على اسوء صوت وهوه يحجي بااعلا ما عنده خفت اطلع بس من سمعت طاري ملاك ضليت ارجف وطلعت اسمع يخابر بلمبايل وكاب نار

...شلون ماهيه شلووون
... ولك لا تخبلني ماصارلها اسبوع من كعدت وياهن
... ٣ ايام مختفيه ومحد حجه وكال المن خليييتكم
.....ركع المبايل بلحايط فلشه تفلش خفت احجي ويا طلع على السريع مافتهمت شي بس ملاك مختفيه صارلها ٣ ايام وميعرفون وينها كعدت ادعي ترجع بسلامه ويلكوها
...................
مشهد من المستقبل

حجت وي نفسها بمكر
-تريد تلعب نلعب .. وبنفس الطريقه
.......................

مشهد ثاني من المستقبل

-غيرني حيل صرت انسانه عباره عن مكر صرت افتهمه من يسكت وماعرفه من يحجي

..............

مشهد ثالث من المستقبل

- عفيه تكدر تلكالي اهلي
-وينهن
-بمخيمات اللاجئين
.....................

- اول ماشفتج حبيتج
..انصدمت من كلامه ورجعت خطوه ليورا
  شرار:لا تخافين بس اسمعيني
ملاك: شرار شتريد
شرار: عمري وحياتي ماحبيت بشر كل الي جان هامني شغلي وما تقربت للحرام بيوم جنت انتظر الي راح يحبها گلبي وهلمره اختارج بعد كل هاي السنين اشتغل هسه من شفتج كلشي بلنسبه اليه تغير
ملاك: ماريد اكسر گلبك بس ماعندي اي مشاعر تجاهك
شرار: اخطبج ونتعرف واوعدج راح اخليج تحبيني واخليج بعيوني واحبج واحترمج راح ادللج واوفرلج كلشي تردي بس لا تكسرين گلبي وهو الرادج هلمره

..رجعت بخطواتي خايفه بعدني ما جاوبته وكال
شرار: راح اتركج تفكرين لا تنطيني جوابج هسه راح اسمعه من عندج بعدين ...

..راح شرار وبقيت برا على مادخلت الجنط كلهن واني حايره ما توقعت شرار عنده مشاعر تجاهي بعد الي شافه؟؟ ..دخلت والبنيه الحلوه ساعدتني مرت ٤ ايام وعلاقتي بيها حيل قوت وتعرفت عليها جان اسمها ريم من الموصل وعايشه يم بيت عمها باالانبار تدرس صيدله مرحله خامسه اما البنيه الثانيه اسمها يقين ما جانت تتوافر دائما بلبيت وحتى مرات تبات برا ومن اسئل ريم عليها ادكول ماعرف وين تروح لحد ما اجا اليوم الي راح يتغير بي حياتي وابدي مرحله جديده

يوم السبت / الساعه ٧ المغرب

.. كاعدين اني وريم انحضر شراح نلبس باجر قررنه واني حيل فرحانه باجر اول يوم اليه بلدوام واول خطوه جديده
ملاك: راح اكوم اسوي عشا
ريم : تمام اساعدج بشي
ملاك: لا حبيبتي اليوم العشا عليه
..رحت فتحت الثلاجه لكيت المواد شويه شويه بدت تخلص رحت لريم
ملاك: ريم عفيه تكدرين ترحين تجيبيلنه كم شغله من الاسواق كلشي ماكو بثلاجه

.. هزت براسها واخذت فلوس ولبست قمصلتها ولفافها وطلعت

..رجعت ادور شكو شي اكدر اسوي لكيت معكرونيه سلكتها واني اشتغل سمعت الباب نفتح

ملاك: ريم شنو رجعتي شو بساع

..انداريت لكيت ٣ ولد لابسين كوله اسود ومامبين شي بس عيونهم ابتعدت اركض دخلت للغرفه وركضوا ورايه قفلتها وادور على المبايل واتذكرن ناسيته بلصاله ماخليت شي بلغرفه ما كلبته ادور على شي اكدر انقذ نفسي من خلاله ماكو رحت فتحت الشباك وضليت اصيح ماحس اله الباب اتفلش واحد من عدهم لزمن من شعري وسد حلكي باايده ..اصعب موقف يمر بي الانسان ..جنت اتوقع اول خطوه بحياتي بس ما توقعت اول خطوه راح تنسحب بيها الحياه مني ...

___________________

لهنا نختم البارت اعذروني طولت عليكم بس البارت كاعد ياخذ من عندي وقت هواي💕 اوعدكم ان شاء الله على البارتات القادمه راح نطول البارتات وندخل باالاحداث الحقيقيه ..
شكرا لكلامكم كاعد اقرا التعليقات كولها واني فرحانه واكثر شي كاعد يسويلي حافز اكملكم القصه بااقرب وقت 🤭💕💕

اسئلتنه المعتاده 💕💕
-شنو رايكم بلمشاهد المستقبليه
-منو تتوقعون بطلتنه الثالثه؟؟
-ضبع شنو عنده بهاي الاوراق
..كتبولي اي شي تحسون ما فاهمي وراح اوضحه الكم 💕💕 قراءه ممتعه يحلوات 😘🔥