تحميل رواية «سموم العشق» PDF

في ساحة الجامعة ماشية ملك بنت تخينة جدًا لابسة فستان قرب يتقطع من عليها. ماسكة كتاب. بتبص بغيظ للطلاب اللي بيضحكوا عليها.

ملك بغيظ

اللهي يارب اللي ما يبطل يضحك عليا يقوم الصبح يلاقي نفسه عامل زي الفيل.

الطلاب يضحكوا عليها أكتر، وتقف قدامها منه بنت جميلة أوي.

منه

بسخرية

ليه كده بس يا ملوكة، مش كفاية علينا فيل واحد معانا في الكلية، هنعمل مزرعة أفيال يعني؟

الكل يضحك، ملك تقول بغيظ

ملك

بت انتي غوري من وشي، أنا لو نفخت فيكي هتطيري، وانتي عاملة زي الخنفسة المبرقعة كده.

الكل ضحك على منه.. منه ترفع صباعها في وش ملك وهي بتقول بغضب.

منه

هي مين دي اللي عاملة زي الخنفسة المبرقعة يا حشرة؟

ملك بغيظ

الحشرة دي لو داست عليكي هتفعصك تحتها، لمي دورك أحسن ما نلم عضمك من تحتي.

منه تبص لها بخوف وبعدين تقول بغرور.

منه

أنا اللي غلطانة أصلًا علشان واقفة مع بهيمة زيك، انتي مش من مستوى أصلًا علشان أقف أتكلم معاكي.

ملك بغرور

ما هو اللي زيك محتاج منها ألف علشان تبقي من مستواي.

ملك تزق منه بمؤخرتها وهي ماشية وبتقول.

ملك

ويلا غوري من وشي يا معصعصة هانم.

منه تقع على الأرض والكل يضحك عليها، تبص لملك بغيظ.

ملك ماشية وهي باصه ناحية منه وبالصدفة تخبط في حازم.. حازم كان هيقع بس صحبه مراد يمسكة.. حازم شاب جميل جدًا عيونه عسلي، قمحي، شعره بني وعنده دقن خفيفة… ومراد صاحب حازم شاب جميل جدًا برضه.

ملك بكسوف

أنا آسفة اوى يا دكتور، ماخدتش بالي.

حازم بقرف

عادي ولا يهمك، اتفضلي شوفي انتي رايحة فين.

المكان ضيق، واقف حازم ومراد مضيقينه أكتر.

ملك

طيب ممكن انت والأستاذ اللي معاك ده تركنوا في جنب كده على ما أعدي؟

مراد يحط إيده على فمه علشان ما يضحكش، وحازم بيقول.

حازم

طيب إحنا هنطلع على السور على ما حضرتك تعدي.

مراد يضحك وهو بيقول.

مراد

يا لهوي هموت، مش قادر، دي محتاجة توسيع طرق علشان تعرف تمشي زي الآبني أدميين يابني.

حازم بزهق

طيب يلا يا خفيف، اطلع قدامي على السور على ما تعدي، مش ناقصين خفة دم على الصبح.

ملك تبص للأرض بخجل ودموعها تنزل، وحازم ومراد يطلعوا على السور..ملك تجري ودموعها نازله، ومراد يبص ناحيتها بزعل وهو بيقول

مراد

شكلنا زودناها أوي ورخمنا على البت.

حازم بزهق

يا عم فكك، دي منظر بت قول عشرة عشرين في بعض

حازم، بقولك هي دي مش ملك بنت الأستاذ صالح صاحب شركة استيراد وتصدير العربيات صح؟

حازم بشك

أيوه هي، بس بتسأل ليه مش فاهم؟

مراد بخبث

لا مافيش، بسأل عادي بس… قولي انت مش ناوي تتجوز؟

حازم بزهق

انت بتخرف ليه كده على الصبح؟ ثم أتجوز إيه، انت مش شايف الديون اللي أنا غرقان فيها دي؟ أنا البنك قرب يحجزوا على البيت، وكلها يومين وهطلع أقعد في الشارع أنا وأمي وخواتي.

مراد بخبث

ما علشان كده بقولك اتجوز..

حازم باستغراب

مش فاهم، عاوز توصل لإيه بالظبط؟ ثم جوازي ماله ومال الديون اللي أنا غرقان فيها دي؟

مراد يحط ايده علي كتف حازم

مراد

تعالي معايا وانا هفهمك كل حاجه علي رواقان.

————–

في كافتيريا

قاعدة ملك بتعيط، وقاعدة معاها شيماء صحبتها. بنت جميلة بيضا، عيونها بني، وشعرها أسود طويل.

شيماء بزهق

ما خلاص بقى يا ملك، مش كل ما واحد يقولك كلمة تفضلي تعيطي كده.

ملك بدموع

صعبانة عليا نفسي أوي يا شيماء، كل ما أمشي في حتة الناس تضحك عليا، زي ما أكون أنا اللي عاملة في نفسي كده، وأكتر حاجة مزعلاني الشخص اللي قلبي متعلق بيه، كل ما يشوفني كأني سلة زبالة قدامه، مش بني آدمة زيه.

شيماء بحزن

ملك، انتي لازم تشيلي موضوع الدكتور حازم ده من دماغك، ده حب من طرف واحد، وانتي صدقيني بنوتة جميلة، وألف واحد يتمناكي، كفاية طيبة قلبك، وصدقيني مش كل الناس زي حازم وغيره بيبصوا للجسم، في ناس بتدور على الروح قبل الجسم، وانتي روحك جميلة، واللي يعرفك يحبك صدقيني.

ملك

أعمل إيه بس يا شيماء، ما هو غصب عني بحبه، أنا عارفة إنه مستحيل يحبني بمنظري ده، بس مش قادرة أشيله من قلبي وعقلي، صدقيني حاولت ما قدرتش.

شيماء

لازم تشيلي يا ملك، مسيره يتجوز، ولو فضلتي متعلقة بيه كده هتتعبي أوي، ومش هتقدري تشوفي اللي بيحبك بجد.

ملك تبص لها بدموع وهي بتقول.

ملك بكسوف

أنا ممكن أموت لو اتجوز غيري.

شيماء

ما توهميش نفسك يا ملك، علشان صدقيني هتتعبي أكتر وأكتر طول ما انتي موهمة نفسك إنه ممكن يحبك أو يفكر فيكي زي ما انتي بتفكري فيه.

ملك

أنا عارفة إني بكذب على نفسي، بس أملي في الله والقدر والنصيب أكبر من أي حاجة، وأنا حتى لو بحبه مش هغضب ربنا فيه، وأنا مش مستنية غير ربنا يحطني في قلبه ويكتبه من نصيبي، قلبنا في إيد ربنا، وربنا خالق الكون وأكبر من العالم كله.

شيماء بحزن

ونِعم بالله العلي العظيم، اتطمني وادعي يا ملك، وأنا هدعيلك، ربنا يكتبها من نصيبك يا رب، انتي أطيب قلب عرفته وتستاهلي كل خير والله.

————–

في مكتب حازم

قاعد حازم ومراد مع بعض… حازم يقوم فجأة وهو بيقول بغيظ:

حازم

انت اتجننت! ملك مين دي اللي عاوزني اتجوزها؟ دي لو آخر بنت، مستحيل أفكر فيها أصلًا.

مراد بخبث

اقعد بس واهدي علشان تفهم اللي بقولهولك صح. انت مش عاوز تسدد ديونك صح؟

حازم باستغراب

وأنا ديوني مالها ومال الهبل اللي بتقول عليه ده؟

مراد

طيب اقعد واهدي كده وانا هفهمك.

حازم يبص له بزهق وبعدين يقعد وهو بيقول:

حازم

ادني اتنيلت قاعد، هات اللي عندك، انا مش عارف مالك النهارده والله.

مراد

انا عايز اساعدك، والحل لكل مشاكلك قدامك وانت اللي مش شايفه..

حازم بزهق

وانت فاكر جوازي من البهيمة دي هو الحل؟

مراد بخبث

البهيمة اللي مش عجبك دي معاها اللي انت مش لاقيه. معاها فلوس تسدد كل ديونك في ساعة واحدة.. وأكيد البت زي أي بنت نفسها تحب وتتحب، وأهلها عايزين يجوزوها جوازه محترمة، وانت دكتور جامعة ما شاء الله، غير عندك شركة خاصة، وشكلين أي بنت تحلم بيك. اتجوز ملك ولما تبقى مراتك، فلوسها هتكون فلوسك وهتساعدك تسدد كل ديونك.

حازم يبص له بحيرة ويسكت شوية وبعدين يقول:

حازم

بس أنا ضميري مش هيسمحلي ألعب لعبة رخيصة زي دي على بنت مهما حصل.

مراد بخبث

وهو ضميرك هيسددلك ديونك، لازم نجي عليه شوية علشان الدنيا تمشي.

حازم بحيرة

طيب، انا إيه يضملي إنها هتوافق ولا أهلها ممكن يوافقوا، وأنا مديون كده؟

مراد

ومين هيعرفهم بس إنك مديون؟ انت هتدخل عليهم دكتور جامعة محترم وراجل أعمال ناجح، مش راجل غرقان في ديونه.

حازم

هنخدعهم يعني؟

مراد

ومين قاللك نخدعهم؟ احنا بس هنخبي الحقيقة، قولت إيه؟

حازم بحيرة

مش عارف، بس سبني يومين أفكر وأحسبها صح.

مراد يقوم وهو باصص لساعة وبيقول:

مراد

طيب، انا همشي بقى علشان عندي مشوار مهم، وانت ابقي عرفيني هتعمل إيه. سلام عليكم.

حازم بحيرة

وعليكم السلام ورحمة الله وبركاته.

مراد يسيبه ويمشي، وحازم يفضل قاعد في حيرة وقلق.

————

في بيت حازم

حازم داخل يلاقي سامية أمه قاعدة مع نسرين وحاتم أخواته، وبين عليهم القلق والخوف.

حازم:

السلام عليكم ورحمة الله وبركاته، خير مالكم قاعدين ليه كده؟

الكل يرد السلام:

وعليكم السلام ورحمة الله وبركاته.

سامية:

حمدالله على السلامة يا حازم يا بني..

تطلع ظروف وتناوله لحازم وهي بتقول:

سامية:

امسك الرسالة دي، وصله من البنك، باعتيلك إنذار لو مش سددت اللي عليك خلال شهر، هيحجزوا على البيت والشركة.

حازم يبص لها بصدمة ويفتح الرسالة بسرعة.

حازم بحيرة وخوف:

يارب، ده اللي كان ناقص! هجيب أنا نص مليون جنيه منين دلوقتي؟

حاتم:

ناوي تعمل إيه يا حازم دلوقتي؟

نسرين:

احنا خلاص هنقعد في الشارع كمان يومين.

حاتم:

ما كله بسبب أخوكي المحترم.

حازم بغيظ:

وأخوها المحترم كان بيعمل ده كله لمين؟ مش علشانكم برضو.

حاتم بحنق:

علشان؟ ولا علشان حلمك؟ الأهبَل زيك دينت ورهنت بيتنا وشركة أبوك وخسرت الفلوس في مشروع أهبل، ودلوقتي هنقعد في الشارع بسببك.

سامية بغضب:

تصدق إنك قليل الأدب ومش متربي؟ إنت إزاي تتكلم مع أخوك الكبير كده؟ ده جزائه ربكم، وعلمكم، وقاعد من غير جواز لحد دلوقتي علشانكم. وفي أول مشكلة، بدل ما تمسك إيده وتساعده، بتحمله هم فوق همه. ولما انت فالح كده وبقيت شاحط، وبتعرف تتكلم، ما تشتغل ولا تعمل حاجة تساعد أخوك شويه.

حاتم يبص للأرض بكسوف ويسكت. سامية تبص له بغضب وبعدين تبص لحازم.

سامية:

معليش يا بني، ما تزعلش من كلام أخوك، إنت مش تايه عنه وعارف لسانه أعمى.

حازم بحيرة:

أنا مش زعلان يا أمي، بس ما تقلقوش، أنا هتصرف وبإذن الله ربنا هيفرجها. أنا عندي مشوار مهما شويه، وهجي عن إذنكم.

حازم يتحرك علشان يطلع، وهو بيطلع التليفون ويتصل على مراد:

حازم:

مراد، تعال قبلني، عايزك.

———-

في بيت ملك

قاعدة سهام، مرات أبو ملك، مع أختها نبيلة وبنتها سميرة.. تدخل ملك، تبص ناحيتهم وهي بتكلم نفسها.

ملك

هو أنا اتصبحت في وش مين النهاردة بس، ياربّي.

سهام

مالك يا ملك واقفة عندك ليه كده؟

ملك تتحرك ناحيتهم وهي بتقول:

ملك

مافيش يا ماما، أنا أصلاً لسه داخل… (تبص لنبيلة وسميرة وتقول بحنق) إزيك يا طنط نبيلة، عاملة إيه؟

نبيلة

وانتي مالك؟ بتقوليها من منخيرك ليه كده؟

سميرة

شكلها زعلانة علشان قاعدين في بيتهم.

سهام

عيب الكلام ده يا سميرة يا حبيبتي، ملك عمرها ما تزعل من ضيف داخل بيتها، دي بنتي وأنا اللي مربيها وعارفها كويس.

ملك

ربنا يخليكي ليا يا ماما، وما تضييقيش نفسك، ومش أي حد يتكلم نرد عليه، في ناس ما تستهلش حتى نقف معاهم.

نبيلة بغيظ

يعني إيه يا ست ملك؟ احنا مش قد المقام ولا إيه؟

سهام

في إيه يا نبيلة؟ انتي هتعملي عقلك بعقل العيال ولا إيه؟

نبيلة بحنق

انتي مش شايفة بنت جوزك بتلقح بالكلام؟ بتقول إيه؟

سهام

ملك بنتي يا نبيلة، مش بنت جوزي بس، وانتي يا ملك يا حبيبتي، عيب تتكلمي بالأسلوب ده مع ضيف في بيتك.

ملك

معلش يا ماما، أنا راجعة تعبانه ومضيقة شويه، ممكن اطلع أرتاح في أوضي على ما مزاجي يتغير. وانا علشان خاطرك بعتذر لو قولت حاجة زعلتك يا طنط نبيلة وانتي وسميرة. عن إذنكم.

ملك تسبهم وتمشي، سهام تبص ناحيتها بقلق، تقوم وهي بتقول:

سهام

عن إذنكم يا جماعة، خمس دقايق وهرجع، خدوا راحتكم، أنتم في بيتكم مش غرب.

سهام تطلع، وراي ملك.

———-

في أوضة ملك

ملك تدخل وهي بتعيط، ترمي نفسها على السرير وتفضل تعيط.. تدخل سهام وراها على طول، تجري عليها وهي بتقول بخوف.

سهام

ملك يا روحي، خير يا بنتي؟ مالك، حصل إيه؟

سهام تقعد جنبها، ملك تحضنها جامد وهي بتعيط.

ملك

أنا تعبت أوي يا ماما، بجد تعبت، ونفسيتي مدمرة، وبفكر أسيب الكلية، بجد ما بقتش قادرة أكمل ولا أختلط بالناس، ولا عاوزة حد يشوفني بمنظري ده.

سهام تملس على شعرها بحب وهي بتقول.

سهام

ليه كده يا حبيبتي؟ حصل إيه لكل ده؟ ثم أنا ربيتك على الضعف ده؟ أنا ملوكة حبيبتي قوية وما يهمهاش حد. ثم انتي عارفة إن اللي في جسمك ده من غصب عنك، والحمد لله إحنا كنا فين وبقينا فين، وانتي قوية ومؤمنة بالله يا حبيبتي، وعارفة إن كل حاجة في الدنيا قسمة ونصيب، وهو ده نصيبك منها، ولعله ربنا يكرمك بنصيب أحلي من كده وتتجوزي واحد يخليكي تبكي من السعادة طول عمرك.

ملك بتضحك بسخرية وهي بتعيط.

ملك

جواز إيه بس يا ماما؟ ومين أهبل ولا عنده حول هيبص لواحدة بالمنظر ده؟

سهام بحزن

ليه كده يا ملك؟ ده انتي قمر، وألف واحد يتمناكي يا عيوني والله، بس انتي اصبري وخلي أملك في الله يا حبيبتي، أكيد ربنا شايلك حاجة حلوة أوي شبه قلبك بالظبط.

ملك تبتسم بحب وتحضنها تاني وهي بتقول.

ملك

أنا بحبك أوي يا ماما، انتي وبابا والأهبل ابنك… (تبعد عنها بسرعة وهي بتقول) يا لهوي، أنا نسيت!

تقوم بسرعة، وسهام تبص لها باستغراب.

سهام

نسيت إيه يا ملك؟ حصل إيه؟

ملك تشد سهام تطلعها بره وهي بتقول.

ملك

معلش يا حجة، بره من غير مطرود، انتي ابنك هيعمل مني حواوشي قريب.

سهام تعمل نفسها بتقع، وملك مسكاها.

سهام

آه قلبي وقع! مش مطمنة، شكلكم مخططين لمصيبة انتوا الاتنين.

ملك

يا حجة، اجمدي كده، عيب عليكي، انتي وراكي رجالة.

سهام

الله يطمنك، يبقى أكيد في مصيبة جاية تجري.

ملك بصدمة

هااا؟ بابا جه؟ هناك أهو؟

سهام تبص بفرحة وهي بتقول.

سهام

بجد؟ هو فين؟

ملك تقفل الباب بسرعة.. سهام تضحك وتقول.

سهام

مستنياكم على نار علشان أعرف إيه المصيبة الجديدة اللي عملتوها انتي وأخوكي يا ولوكة..

صوت ملك من جوه الأوضة

ـ المصيبة الجديدة هتعجبك أوي، بس اثقي فيّ.

سهام بيأس

ربنا يسترها يا أختي، طالما فيها انتي وأخوكي…

(سهام تحط إيديها على راسها وهي بتقول)يا لهوي، نسيت نبيلة وسميرة تحت لوحدهم.