رواية تاروت الفصل الثاني والعشرون 22 - بقلم زيـنـب علـي 🦢

#تاروت

البارت «22»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب  zainab_ali1 ♥️

Insta:zainab__.ali1

هسه آنه مآ آدري آعتذر لو آعذرك
مآ تدري حته بـ أبالي حافظ عطرك

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

رميم"

اجاني صوته رجني رج من قوته

باتر: هذا كلاامججج

اخذت نفس وحچيت بهدوء

رميم: اهدأ خلي افهمك ترى ماعرف بالموضوع

باتر: صوتج ماريد اسمعه وهسه تطلعين اشوفچ

رميم: وين اطلع باتر مسحيل ماگدر

باتر: لا عبالج مأمنة ماندل بيتكم ترى هسه اروح البيت هاي الـ**** افلشه على رأسها ورأس الخلفوهااا

رميم: هسه ليش صاير عصبي

باتر: تتراهنين عليه ريمممه انا تالي وكت اصير رهن ولعبة بدين البنات انااااا رميم

رميم: حشاك هاي شبيك كلتلك مو انا ويمكن المحادثة مفبركة

باتر: اشششش ماريد اسمعلج نفسس واحد ولا صوت يلااا اريد اشوفچ اطلعييي

الكلمة الاخيرة حجاها بصياح بعدت النقال من اذني حسيت صوته زرفها احتاريت شلون اهدي او على الاقل اقنعة على باچر نلتقي

رميم: ماكدر احجي شي ولا اگدر اطلع هسه ولا اكدر ادافع على نفسي بس انتظرني الباچر الصبح يلا اگدر اشوفك

باتر: لا هسه رميم هسه الج نص تقررين بيها ماكو انا رايح الاهلها انعل والديهم

سده وراح مسحت على وجهي بتعب رجعت فتحت الصور دازتله سكرينات المحادثة بيني وبينها نحچي عليه ومن ضمن الكلام دزتلي

طيف: " متأكدة يحبچ "

رميم: " مايشوف غيري "

طيف: " لا اذا شافني يلغي الفكرة"

رميم: " اليطلع بيدچ سوي انا موجودة وانتي موجودة "

طيف: " تتراهنين ان اذا شافني يلغي فكرته بيج "

رميم: " وشبيه اتراهن على واحد من قلة الزلم اييع "

طيف: " ماتردين تتراهنين وياي لان تدرين بروحچ خسرانة "

تدز مسجات ووياهن ايموجي يضحك نرفزتني وكتبتلها

رميم: " الساحة الج اليطلع بيدج سوي "

نفخت بحيرة ماعرف شسوي وشلون اطلع اصلا مستحيل طلعت من الغرفة نزلت لگيت خيال واگفه يم الدرج باوعت لي وگالت

خيال: جهزي نفسج حتى تطلعين وياي للمستشفى حتى اشيل الجبيرة

رميم: ان شاء الله هالمرة تكون طايبة مو مثل هذيج المرة شلناها وطول الليل مانمتي

خيال: صارلها اكثر الـ ٣ اشهر موتتني وبعدها ما طايبة

صرت الطم بداخلي مدري شسوي شلون اطلع اشوفه وهو متخبل كلشي يسوي خاف يروح البيت طيف وانفضح

طلعت حكمة من الاستقبال تحچي

حكمة: خلي رميم ترتاح الظهر رجعت من الشغل انا اخذج

فزيت احجي

رميم: لا لا حكوم انتي ارتاحي انا اخذها حتى نرجع بسرعة ماعندنا شي من البيت للمستشفى ، ثواني ابدل

عفتهن يحچن وصعدت للغرفة اتصلت عليه اجاني صوته اليرعد

باتر: ويينجج

رميم: بعد فد ساعة اشوفك

باتر: العنوان بسرعة

نطيته العنوان وانا محتارة شلون اشوفه او شلون اطلع من خيال بس لازم اشوفه بدلت ونزلت لگيت خيال جاهزة

رميم: يلا نطلع

خيال: ننتظر شويه خاله اتصلت على سيارة حتى تجينا

اجت حكمة تحجي بالتليفون واسمعها تگول

حكمة: ياا چا وين راح... لا والله اريد اودي البنيات ويا ما أمن بغيره

سدته باوعت علينا وحچت

حكمة: هذا حميد مدري وين مولي امشن انا اخذچن بتكسي

خيال: اذا تعبانة حكوم خليها على باچر

ويا حچايتها دخل يمان للبيت باوع علينا وحچه

يمان: هاا وين ؟

حكمة: الله جابك اخذ البنات للمستشفى خيال تعاين رجلها

خيال: لا انتي اخذينا

حكمة: بعد يمان اجه شيطلعنا هسه ندور تكاسي

بلا مايحچي فتح الباب وگال

يمان: يلا

تنهدت استندت عليه وطلعنا ويا ثنينا صعدنا ورا باوع علينا من المرايا حسيته يگول اشتغل عدجن وانا مادري نزلت گعدت يمه حچه ببتسامة

يمان: رحم الله والديچ

رميم: ولو تدلل ابو النسب

خيال: تبقون تحجون لو نروح اذا تردون تحجون ارجعوا للبيت انا اروح وحدي

حرك اليسارة عدل المرايا عليها وحچه
يمان: اگلج ريمه اكو فد ناس حامية شكو

رميم: اعذرهم صار فتره مطالعيين للشغل وهاي ثاني مره يشيلون الجبيرة

يمان: والمايطلع للشغل ينچلب علينا

خيال: چلب الچلبك

يمان: البعبه صخل يمعمع انا قصدتچ

خيال: ماكو صخل غيرك هنا

رغم حالتي والخوف العايشته ماتحملت ضحكت هو باوعلها وحچه

يمان: اذا صخل وبعبچ هنيالي

خيال: وجع

يمان: اذا انتي وجعي يا هلا بيچ

خيال: مرض

يمان: حتى اذا يصير بيه مرض ابوسچ وأطيب

خيال: راح تجيك دفرة تگطع نفسك

يمان: اخخ الله اموت على عنيفتي تقربي ابوسچ

يحچي بهيام ويعض على شفايفه متناسين وجودي يعني شكد تدوس ببطنه اختي ولا مره اخذ كلامها بجديه كأنه حافظها ويعرف ماتحجي هذا الكلام من كل گلبها

اباوع التليفوني ماسكت ولا لحظة هذا هم متخبل اريد اسكته ماكو واصلا مادري شلون اطلع وبأي عذر

وصلنا للمستشفى وگعدنا يمان وراح حجز ورجع باوعت النقالي شفت مسج منه كاتب " الج عشر دقايق اذا ماصرتي گدامي انا اتصرف " متت من الخوف بسرعة گمت وحچيت

رميم: انا جعت راح انزل اشتري شي أكله

خيال: وين اگعدي هسه من نطلع واشتري

رميم: بعد مطولين عشر دقايق وارجع

يمان: انا انزل

بسرعة حچيت

رميم: انت خليك هنا خاف خيال تحتاج شي انا عشر دقايق اشتري وارجع

اباوع خيال تخزر بيه وانا احچي عبالها سويت هيج حتى يبقون وحدهم هي ويمان ؛ درت وجهي وبسرعة نزلت اركض ماشوف گدامي طلعت تليفوني واتصلت عليه بسرعة جاوبني

باتر: وينچ يلا انا بالمكان الگلتيلي عليه

رميم: دقايق انتظرني واوصل

باتر: بسررععهه

غلقته منه وصرت امشي سريع بيومها جانت مغيمة الجو كآيب مع زخات مطر خفيفة الشوارع مبللة

بس وصلت شفته منتظرني كاعد بالسيارة ومشغل الماسحات على الجامة اتقربت من السيارة بحذر مد روحه وفتحلي الباب ترددت اصعد وكفت يم الباب وحچيت

رميم: شبيك باتر

اباوع عليه هادئ  وحچه بنبرة طبيعية

باتر: صعدي

رميم: ماگدر أتأخر لازم اروح

باتر: تصعدين لو اتصرف غير تصرف

رميم: لا تهدد ماتخوفني ترى

باتر: گلت اصعدي يلا

اخذت نفس شجعت روحي وصعدت بس ما سديت الباب

باتر: سدي الباب منا الشارع

سديته وحچيت

رميم: شنو تلعب وياي اگلك مااگدر اتأخر

بلا مايحچي شي شمر تليفونه حيل عليه حسيته ضربني بي ضرب

باتر: شوفي ونطيني جواب مقنع

گلبت بالفون وشفت مو بس المحادثات الي دزهم الي حتى اكو هواي حچي اني نفسي ماعرف شوكت كاتبتة محادثات كلها مفبركة باوعت عليه وحچيت وانا مصدومة

رميم: باتر هاي مو انا

باتر: ريمه لا تلعبين بعصابييي

رميم: گلتلك ماعرف باتر ماعرف المحادثات مفبركة يعني اذا انا دازه هذا الكلام احچي ما خايفة

لوه رگبته يمسح على وجهة وصار احمر كل الاوردة الي برگبته بينت تحول غير شخص بثواني للحظة شكيت هو هذا نفسه باتر الي چنت احچي ويا ويخلص طول اليوم شقى وضحك ، بلعت ريگ وحچيت

رميم: لازم اروح تأخرت

احچه بصوت مرعب يگز على اسنانة حسيت رجفة سرت بكل أوردتي سديت على ايدي حتى اسيطر على رحفتها واباوع عليه بتحدي

باتر: واذا گلت ماتنزلين منا الحد ما اعرف شنو هذا الكلام البينچ وبين طيف وشني سالفة الرهن ريمه

حصرني بزاويه ما منها مخرج

رميم: گلت لك ماعرف هي هاي ثقتك بيه تحسبني متراهنة عليك ويا صديقتي شنو شايفني مراهقة لو بنت شوارع ؟؟

باتر: تمام انا حمار بس ركزي وياي هذا مو رقمچ!

رميم: ايي هو

باتر: يعني هاي انتي الكاتبة

رميم: والله لا

باتر: زين كولي انا كلشي مافتهم مطي مربوط من اذني ويمكن هي لعبت هاي اللعبة حتى توگعچ خوش خلي نرجع للتواريخ

جرني من ايدي حيل حسيتها نخلعت سديت حلگي متألمة وجريتها منه بسرعة

رميم: اياك تلمسني مرة ثانية

صاح بيه

باتر: انتبهي ويااييي ، بهذا التاريخ بهاي الساعة انتي گلتي لها ماطلعت من البيت

راح على محادثتنا ورجع النفس التاريخ باوعلي وحچىه

باتر: وهنا كاتبتلي نفس الكلام بنفس الساعة يعني هذا كلامچ رمييممم

رميم: گلتلك مو انا وانت بعد بكيفك

حجيتها بهدوء صاح بيه

باتر: رميم منو كاتب لا تخبليني ولچ انا تلعبين عليه ويطلع كل البينا مجرد رهن بينچ وبينها وتلعبن علي ياهي التوگعني انا البتار وسفة مابلحيف

رميم: باتر

اتقرب مني بسرعة رجعتي نفسي الي ورى لزگت بالكشن عيونه تخوف صارت قريبة مني فتح الباب وحچه

باتر: يلا نزلي

باوعت للساعة كلش تأخرت ماكدر اتأخر اكثر ماصدگت يگلي نزلي حتى ارجع نزلت من السيارة اعدل بنفسي باوع عليه وحچه

باتر: انا الج ريمه اصبريلي لو مابچيتچ دم على هاي عملتج سهلة

عافتي وشخط السيارة وراح سيارته من سرعتها حسيتها تطير مو تمشي لزمت ايدي الجرها توجعني مثل المخلوعة غمضت عيوني ودموعي صارت تنزل مشيت ناحية الأسواق اشتري شي خاف يسألوني وين جنت

ادري ورطت روحي ويا واحد مو سهل ابد وملعب ويعرف كلشي يسوي بس مانسحب اكمل ووين تريد توصل خلي توصل هي روح وبايعتها شسوي بيها بعد امي وابوي ...

اشتريت اي شي صار بيدي ورجعت للمستشفى صارت ليل كلش صعدت لگيت خيال ويمان داخلين جاي يشيلون بالجبيرة الخيال دخلت باوعتلي وحچت

خيال: همزين اجيتي وين رحتي

رميم: ها هنا جنت گاعدة جوه الجو حلو

ماحچت شي بس يمان صار يباوعلي بتدقيق نزلت عيوني سويت نفسي منشغلة ويا خيال شالولها الجبيرة وسوولها اشعة طلعت رجلها سليمة طلعنا من المستشفى انتبهت على صوت يمان يحچي وياي

يمان: ريمه صاير وياج شي عيونچ حمر

رميم: هه لا شصاير بس جنت گاعدة بالمطر وو وطاح بيهم مي

سكت بس مبين مامصدگني رجعنا للبيت وهو طلع مدري وين ...

❛❛❛❛

يمان"

دخلت للمستودع شفت باتر گدامي يصيح على واحد من الحراس ويريد ينط من العصبية اتقربت منهم

باتر: حمير انتم ماتفتهمون اذا ماتريد تشتغل عليش جايني اگعد ببيتكم

يمان: شكو ؟!

باتر: حراسك الجايبهم طلعت نص ساعة ورجعت لگيتهم دايحين كل واحد لازم تليفونة على صفحة

يمان: وانت وين رحت

صاح بيه

باتر: الجهننممم الحمرة يعني شلون تحبسوني هنا ماطلع بعد ماعندي شغل غيركم

يمان: وشبيك صاير عصبي

باتر: يمعود دوخر

دفعني وطلع وهو يغلط ويصيح حاولت اربط السالفة بس مستحيل شجابه على رميم وهو حتى مايعرف خيال عدها اخت عايشه ويانا ما تبعدت الفكرة ولازم اتأكد

فتحت المخزن ودخلت شفت هذا الهسه بعده الجيس براسه من البارحة شلته منه باوع عليه يسد بعيونه ويفتحهن خلا رأسه بالارض وحچه ببتسامة

حسام: هذا انت يمان

يمان: حلو تعرفني يعني

حسام: عز المعرفة بس ليش انا هنا وشتريد مني

يمان: يعني بينا لغة حوار ونگدر نتفاهم

حسام: انطيني مي وشتريد انا حاضر الك

صحت على الشباب

يمان: وسام

وسام: گول استاذي

يمان: جيبوا اله اكل ومي خلي يتسمم وافتحوا اديه

وسام: ثواني

طلع وانا طلعت ورا اتصلت على دائب ماقبل يجي واجلها على الصبح وانا هم تعبان وصيت الشباب يوكلونه ويرجعون يربطونه بصف الشاهين انتظرت شويه على ما رجع باتر بس اليوم مگلوب گلب مايتحاجه وهو ما يوصل الهاي الحالة الا من اكو شي كلش مضوجه وجبير

حاولت احچي ويا ماقبل ما لحيت عليه عفته ورجعت للبيت صارت غرفتها گبالي اتقربت فتحت الباب شفتها ماكو والغرفة فارغة ، اكيد رجعت للغرفة الفوگ درت وجهي ردت اروح صارت گبالي

خيال"

نزلت للغرفة الجوه انقل باقي اغراضي شفته گبالي واكف يتأمل بالغرفة اتقربت منه وحچيت

خيال: إياك مره ثانية تحاول تتقرب من غرفتي

يمان: راح اخذها الي انتي مو رجعتي فوگ

خيال: لا راح ابقى بيها

حچيتها وكعدت على الچرباية ابتسم يحچي

يمان: يعني عناد هو

خيال: اطلع برا

يمان: وان ما طلعت ؟

خيال: تطلع بالغصب

اتقرب مني بسرعة گمت بأرتباك احچي

خيال: اطلع برا يمان

كأنه ماسمعني اتقرب مني كلش وانا لزگت روحي بالحايط اخذ نفس قوي وهمس

يمان: مشتاگلچ

خيال: ييـ ... يمان لا تسوي هيج

حجيتها وخليت ايدي على صدره احاول ابعده مني لزم اديه قربني عليه اكثر

يمان: اششش

رفع رأسي باوعت بعيونه جانن يلمعن وظاهر بيهن خطوط حمر غمضهن حيل وحچه

يمان: اجي مشتاگ لعيونچ وارد مشتاگلچ كلچ

خيال: يمان

يمان: فزة گلبه انتي

رفعت اديه جان قصدي ادفعه مدري شلون جذبني ناحيته بسرعة وحضن خصري حضني بكل قوته يحچي

يمان: الله ياراحتي الگاها بحضينچ ماكو مثلها راحة

حسيت گلبي صار يخفق سريع وهو يزيد يجذبني اله اكثر ويدخلني الحضنه بشرته صايره نار

مدري شنو ربط لساني صرت ماگدر احچي ولا أقاوم ورجليه رخن

خدر سره بكامل جسمي فجأة خله راسه برگبتي بدون وعي خرجت مني شهگه قوية مدري شصار من سمعها تجنن رفعني بين اديناته يحچي

يمان: افييشش اروح فدوه الهالصوت لا تسنحين خيال اموتچ

همست بصعوبة

خيال: يمان ابتعد نزلني احسن لك لا تشوف شي هسه عمرك ماشايفه

رفعني گعدني على الميز ولزم وجهي بثنين اديناته يرحفن حيل ، حتى من يحچي صوته يرجف

يمان: مشتاگتلي

حجيت ونفسي عالي
خيال: لا

يمان: جذابة لا مشتاگتلي وداعة انفاسچ

دفعته بحيل واهن بس اتقرب باسني بشفتي بوسه سطحية بعدها بخدي يطبع بوسات ويحچي

يمان: اموت عليج مشتاگتلي مو

حركت راسي برفض
خيال: لا

يمان: هسه نشوف

نزل رأسه الرگبتي وصار يطلع عليها بوسات متواصلة ابتسمت بخبث ورفعت ايدي ولزمت رأسه من ورا واصابيعي تغلغلت بشعرة حسيت ببتسامت النصر الي نرسمت على شفايفه صعد راسه وهمس بأذني

يمان: تحبيني

خيال: اكرهك

يمان: تموتين عليه

خيال: ماطيقك

يمان: ليش ذايبة بين احضاني

خيال: راح اثبتلك وانا بين احضانك ماتگدر توصلني ولا تگدر تخليني احس بيك وازيد نارك نار

رفع رأسه يباوع بيعوني وانا هم صرت اباوعله بجمود اتقرب بحذر طبع بوسه شويه عميقة على شفتي خلا وجه بوجهي يحچي

يمان: تحبيني بس ماتعترفين

قويت نفسي وحچيت بنبرة طبيعية

خيال: احبك وشنو الفائدة خليك متأكد لو صرت الهوى بالنسبة الي اموت وما اشتمك

رجع باسني

يمان: عنادچ يموتني

خيال: بعدك ماشاف شي

حضني اديناته تتلمس بظهري ويشدني اله

يمان: المهم هسه انتي بين احضاني

خيال: بس جسد لا روح ولا گلب

يمان: كلك يمي خليلي

خيال: اتأكد من هالحظة هاي آخر مره تلزمني بيها بعد هذا اليوم شعراية واگعة مني تحلم اخليك تلمسها

اخذ نفس مني بحيل صدره بلا مايحچي اخذني ببوسة عميقة بقيت جامدة بس بداخلي براكين غضب متفجرة غمضت عيوني احاول اسيطر على مشاعري وهو مواصل بكل شغف وجنون رفعت ايدي خليتها على گلبه حسيت بي بعد له شويه يتوقف دگاته مرعبة

فجأة ابتعد مني بخطوات مسح على شعرة باوعلي وحچه

يمان: عاقبيني بس مو بهاي الطريقة خيال هيج تخلين ناري تشتعل وماتطفه

نزلت من الميز مسحت حلگي باوعتله وحچيت

خيال: تستاهل انت الردتها

ردت اطلع جرني عليه حضني ورجع من جديد يبوسني ماسويت شي وحتى ماحاولت ادفعة راد يتخبل مايعرف شيسوي دفعني على الحايط حيل يصگ على اسنانه ويحچي بعصبيه

يمان: قااوومميي

بقيت ساكته اباوعله ببرود جذبني من رگبتي يهز بيه

يمان: لا تخبلينيييي قاومي جاي اگوول

سندت نفسي ميلت رگبتي اباوع عليه مسح على ذقنه صوت انفاسه الملتهبة عالي هز رأسه واتقرب مني رفع تيشيرت التراك الي لابسته يباوع بعيوني مانطيت اي ردة فعل صك على اسنانه يحچي

يمان: راح تكفريني شبيچ اليوم دفعيني قاومي

خيال: حتى اذا جنت بين أحضانك ما راح تگدر تتجاوز حدودك وياي تعرف ليش

يمان: لان احبچ ماگدر أأذيچ

دفعته حيل مني وحچيت

خيال: لا بس لان انا خيال مو سهل تگدر تثير مشاعري وتذوبني بين احضانك خلي هاي المعلومة وثبتها براسك المصفح زين

عفته وطلعت من الغرفة صعدت ركض فوگ كل جسمي يرتعد بصورة غريبة وكل ما اتذكر الصار جوه تصير عندي قشعريرة ودموعي تنزل من وحدهن مدري شلون قاومت وما نهاريت وانا يمه

ثاني يوم الصبح جان لازم ارجع افتح المكتب ورميم تروح الشغلها

نزلت جوه لكيته ماموجود باوعت الحكمة جان وجها مبين تعبان وكل شويه تگول يمكن سكري مرتفع احتارينا بيها انا ورميم ماقبلت اعوف شغلي وابقى يمها بقت تلح عليه الا اروح طلعت وعفت رميم يمها  ...

❛❛❛❛

يمان: هسه نحچي بالجد استاذ حسام النعمان منو انت وليش الشاهين يگول هو يعرف بسالفة الجريمة الي تلبست برأس اخوي

ضحك بصوت عالي دفره دائب وحچه

دائب: عليمن تضحك على طياح حظك دماغ سيز جاوب بلا هاي الحركات

حسام: مو يمان يگول تلبست براس اخوي للمعلومة هي ماتلبست براس اخوك لا لا ابد اخوك هو السواها

يمان: وانت وين تعرف وشني علاقتك بالموضوع ؟

حسام: بيوم الجريمة اخوك جان يمي واتفق وياي اوفرله الحماية حتى يدخل يكتل ضرغام ويطلع

دائب: اثبت انت تعرف باتر 

حسام: انطوني تليفوني اسمعكم التسجيلات بصوته

باوعت الدائب بحيرة وهو هم نظراته مستغربة معقولة التهمة تثبت على باتر رحت ركض السيارتي جبت تليفونه ورجعت خليته بيده بقى يدور بي شويه باوع لي وگال

حسام: هاك اسمع هاي قبل الجريمة بسويعات

گالها وضحك فتح السجيل وسمعت باتر يحچي

باتر: ايي حسام شوكت التنفيذ

حسام: الليلة انا احمي ظهرك وانت ادخل خلص عليه وخلصنا منه هم

باتر: والفلوس شوكت تريدهن

حسام: هو هسه بعد التنفيذ نتحاسب واخذ حصتي

اخذت التليفون من ايده وحجيت

يمان: زوج انا وتعبر سوالفك عليه مانذكر لا جريمة ولا غيرها

حسام: ليش مستعجل غير اكو بعد التليفون بيدك دور واسمع براحتك وهم شوف التواريخ بدربك خاف انا اچذب

رجعت فتحت بعد تسجيلات واركز على الاوقات والتاريخ وبقيت اسمع وفعلا باتر متفق ويا على كتل ضرغام وبصورة علينية ومباشرة وقبل اشهر هو يدبر ويخطط

انتبهت على صوت دائب شفته خانگ حسام ويحچي بصياح

دائب: انت منين تعرف باتر شجابك عليه ووين تعرفه

حسام: اووو اعرفه قبل ست سبع سنين وهواي اكو شغل بينا شغل انتم نفسكم ماتعرفونه سوالف لا على البال ولا على الخاطر

دائب: انت چذاب شلون تعرفه كل هالمدة وهو من جبناك ماتعرف عليك

حسام: ليش هو وينه ترى ماشفته ولا شافني جبتوني وشمرتوني كبل هنا معصوب العيون

بسرعة ركضت طلعت من المخزن رحت ركض الغرفة المكتب شفته متمدد على القنفة رحت عليه سحلته احچي

يمان: گوم وياي

باتر: وين شمالك تخبلت عوفني

يمان: دمشي

سحلته وياي للمخزن وهو يصيح وغلط دفعته گدامي وحچيت

يمان: منو هذا تعرفة

باوع عليه رفع حواجبة بذهول وگال بستغراب

باتر: سراي !!!

ضحك بصوت عالي

حسام: حييل شگد قديم شريكي بعدك تتذكر هذا اللقب انقرض من سنين

دائب: يعني تعرفة باتر

باتر: اي شبيكم اعرفه بس علاقتنا انتهت من سنين وحتى تواصل مابينا استغربت اسمه بس هسه من شفته تذكرت جان يسمي روحه سراي هذا شجابه على الشاهين

يمان: اعترف عليك انت ويا نظمتوا جريمة قتل بيت حجي سليمان

باتر: شبيك تخبلت شني من شقه ماصخ هذا

يمان: موو شقه باتر اعترف عليك مع الادلة هم

دفعني وصاح

باتر: اهوو شبيكم انتم شجاي تحجون

دائب: هاك اسمع

فتحله التسجيلات وصار يسمع فتح عيونه متفاجئ  مسح على وجهة وحچه

باتر: شني هاي شوكت

حسام: افاا شبسرعة نسيت يوم گعدت واتفقت وياي انت تكتلهم وانا احميك واطلعك والشغل البينا القديم

اتقرب منه زنگة من ياخته وصاح بي

باتر: هييي هي انت شجاي تمسلت

حسام: مثل ماسمعت هاي الحقيقة الي انت ماتريد تعترف بيها انت المجرم صارح اخوك وفضنا

باوعلي وحچه

باتر: يمان هذا شجاي يحچي ولكم هذا اليحچي مو انا

دائب: اليحچي صوتك باتر قابل مفبركين الصوت وين گاعدين بفلم اجنبي

باتر: شلون اثبتلكم هسه هذا موو اناااا

يمان: لا تثبت كلشي واضح من البداية انت كتلتهم ماتدري بروحك الانتقام من ضرغام جان عاميك

راد يرجع على حسام لزمه دائب ماخلا يوصله بقى يصيح يغلط عليه وعلينا

دائب: اهدأ خلي نفهم الموضوع

دفعة وصاح

باتر: انا اعرف شلون اتصرف

اشر على حسام ويحچي بعصبيه شرايينه كلها برزت راد ينفجر

باتر: وانت سهلة تتلگاها بسيطة وين تروح مني بكل الاحوال انت محبوس يمي

عافنا وطلع من المستودع كله رجعت الحسام احچي

يمان: شني الشغل الچان بينك وبين باتر

حسام: كلشي يسوي انا اوفرله الحماية فقط حتى يدخل اي مكان يريده ، انت ما سألت نفسك فد يوم من الأيام ليش اخوك يدخل اي مكان ويروح الاي شخص بدون مايخاف ولا يرف له جفن

دائب: لا تاكل نعل هو باتر من زمان بايع روحه وحتى اذا مكان خطر يدخله بلا مايهتم

حسام: هذا كله بفضلي وفضل حمايتي اله

دائب: مستحيل ماصدگ انا اعرف باتر اكثر من روحي

حسام: مو بنفسه اعترف عنده شغل وياي

دائب: عنده شغل وياك ايي ممكن هو دائما يوسع شغلة بس مال توفر له الحماية لا بهاي مو وياك البتار يحميك ويحمي عشيرتك هم وما ينخاف عليه

يمان: غير هيج باتر انا ضميته بعد الجريمة وانلزم ونحبس سنه كاملة وطلع براءة وين جنت حضرتك

حسام: لان بعد الجريمة صار بينا موقف وسحبت روحي منه

ماتحملت لزگته دفره وحچيت

يمان: ليششش ساعدته حتى تكتلون عائلة كاملة فنيتوا بيت بين ليلة ويوم

حسام: اخوك گال بس اكتل ضرغام

دائب: شوف هذا الخريط كله ماياكل عندي تكتهن كلهن لو اعلگك هنا هسه

حسام: هذا العندي

اتقدم عليه سحله يريد يعلگه سمعت تليفوني يدگ شفتها رميم بسرعة جاوبتها

يمان: ها ريمه

رميم: يمان الحگ حكمة كلش متخربطة لازم ناخذها للمستشفى بسرعة

اشرت الدائب وطلعت اركض واحچي

يمان: شبيها رميم يعني شصاير وياها

رميم: متخربطة اعتقد السكر فدوه تعال بسرعة لازمها مستشفى

يمان: مسافة الطريق

دائب: شبيك شصاير

يمان: الحگني بسرعة امي متخربطة نوبة سكر يمكن

عفته وصعدت بالسيارة وصلنا هناك دخلت لگيتها متمدده بالصالة على التخم ورميم يمها

يمان: شصاير رميم شبيها امي

رميم: من الصبح متخربطة وماتقبل اتصل بيك هسه ماتحملت واتصلت حتى ناخذها للمستشفى

اتقرب دائب رفعها وياي باوعت النا وحچت گوه يطلع صوتها

حكمة: اليوم السربتيه ثنينهم لافين عليه ناقصكم واحد وتكمل شلة السربته

دائب: يمه هسه انتي بيا حال

حكمة: انت اسكت هذا دولابي كله من وراكم شوفتكم تجيب اليهد والهبري

يمان: تمشين لو اشيلج شيل

حكمة: لا انت التهي تعالي بنصاص اليالي حضن وشبك وخلي الفرخة تنط من الصريخ علينا

دائب: تعاي انا اشيلج كبد

حكمة: ماريد تشيلوني من شالتكم سليمة ورگعتكم

ضحكت باوعت الرميم وحچيت

يمان: ريمه خوفتينا طلعت امي كلشي مابيها

رميم: فحصت السكر من الصبح معلگ 600

يمان: لبسي شي يدفيج وتعاي وراي

اخذنا امي للمستشفى جان سكرها شويه مرتفع سوولها الازم ورجعناها للبيت انا ودائب ومن بعدها رجعنا للمستودع بعدني بنص الطريق واتصل عليه وسام

يمان: هاا وسام

وسام: الحگ استاذ يمان هذه حسام لگينا ميت والشاهين مغمي عليه بصفه وفاقد الوعي

صحت بي

يمان: وينننن جنتوا شوكت هذا الكلام

وسام: قبل دقايق

يمان: باتر وين

وسام: باتر مو هنا من طلع بعد مارجع بس انا وغايب والشباب ظلينا واي حركه غريبة ماكو غير هسه من ردت انطي الاكل لگيته ميت

سديته منه حتى مالحگت اتصل على دائب اليمشي وراي بسيارته شخطتها بسرعة على ماوصلنا المستودع

دائب: شبيك ردت تطير بالسيارة تدري شكم مخالفة اخذت

يمان: مو وكتها حسام مات

حجيتها دخلت اركض وهو وراي يحجي

دائب: شموته شجاي تحچي

اتقربت لگيتهم ملتمين يم الباب دفعتهم ودخلت شفته گدامي مخنوگ بالحبل الي راد دائب يعلگه بي ومتمدد بالكاع والحبل بعده برگبته مسحت على راسي بحيره وگعدت يمه ودائب مد ايده عليه يتحسس النبض باوعلي وكال

دائب: هذا ميت

يمان: شلون مات هذا منو خنگه

دائب: خاف انتحر

يمان: دائب شلون ينتحر وهو مربط شوف الحبل شلون ملفوف على رگبته باحكام والشاهين هم مربط مايكدر يتحرك

باوع للشباب وصاح بيهم

دائب: وين جنتوا

غايب: هنا مرابطين استاذي وحتى ماسمعنا حركة غريبة واستاذ باتر طلع بعد مارجع دخلنا ننطي الاكل ولگينا مكتول

دائب: سهلة نعرفه وين يروح ، وســـااامم

وسام: تأمرني

دائب: ماريد واحد منهم يتحرك

عافهم رجع عليه باوعتله وحچيت

يمان: برأيك هذا الجاي نشوفه طبيعي سلسلة جرائم وحده ورا الخ بيت حجي سليمان محاولة قتل خيال قتل ياسين وهسه حسام النعمان وشلون نكتل محد يعرف وين عايشين متگلي

دائب: الموضوع كلش جبير يمان خايف من باتر

يمان: مادري ماعرف عقلي راح يوگف

دائب: الشاهين وين

وسام: نقلنا الغير مخزن بدأ يعيد وعيه

گمت رحت له اباوع عليه رأسه ينزف

يمان: شفت شي

الشاهين: كلشي ماشفت غير دخل واحد ملثم ضربني على راسي وفقدت كعدت لگيت روحي هنا

سكتت اباوع عليه عقلي وكف عن التفكير اتهم منو واعفي منو كلها متهمه صارت

باوعت الدائب وبسرعة تذكرت هي اليوم مداومة بالمكتب طلعت تليفوني واتصلت

يمان: فرات وين انت

فرات: شبيك يمان انا گبال مكتب خيال منتظرها تطلع حتى اوصلها وارجع للبيت

يمان: فرات لا تتحرك لا تغفل عينك منها وانا هسه جايك

فرات: صاير شي

يمان: من اوصل افهمك المهم لا تغفل عنها

سديته وطلعت مستعجل عفت دائب هو يتصرف وياهم رحت الفرات لگيته منتظرها بباب المكتب گعدت يمه احچيله بقى حاير وياي وهذا هم لغز جديد ...

❛❛❛❛

وتر"

صار كذا يوم يطلع الصبح يرجع الظهر وانا كل ماريد اطلع اتردد بس اليوم خلص عقدت النية على الطلعة ورا ماطلع دخلت بدلت ملابسي وطلعت المفتاح من جوه الدوشك مال الچرباية واتقربت يم الباب ما خليت دعاء ما قريته فتحت الباب والتفتت وراي

اخذت نفس قوي من نسمات الهوى صارت تداعب بشرتي حسيت بالحرية خليت ايدي على گلبي اليدك بسرعة باوعت للسماء وهمست

وتر:  اللهم يا مسهل الشديد، ويا ملين الحديد، ويا منجز الوعيد، ويا من هو كل يومٍ في أمرٍ جديد، أخرجني من حلق الضيق إلى أوسع الطريق، بك أدفع ما لا أطيق، ولا حول ولا قوة إلا بالله العلي العظيم ، ربي دليني طريقي وختارلي الطريق الصحيح

عفت الباب مفتوح وطلعت امشي صح نهار بس المنطقة تخوف ريفية وكلها مزارع وبساتين لگيتلي طريق مفروش كله حصى ومبين مال سيارات لان الاثر عليه وصرت امشي بي بسرعة بسرعة واتلفت وراي البيت صار يبعد وانا امشي واقرأ ادعية وآيات قرآنية بس حتى اشوف ناس تنقذني على الاقل ماريد ارجع البيت الرعب الجنت محبوسة بي

اباوع صار گدامي مثل النهر جبير جاف من المي يسموا بزل صرت امشي بمحاذاته

بسرعة التفتت من سمعت صوت يحچي من وراي

- يبنيه وين رايحة منين انتي

التفتت شفتهم ثنين ولد شباب حچيت مرتبكة

وتر: بيتنا هنا انا رايحة البيتنا

اتقرب واحد منهم بتجاهي يتفحصني ويحچي

- بس احنا ما عدنا هيج عسل هنا كلهن وصخات انتي مبينه بنت مدينة

من كلامهم عرفتهم مو زينين ويحجون يباوعون عليه بنظرات مو حلوة ويضحكون بينهم حچيت

وتر: وخروا من طريقي اريد ارجع البيتنا اذا ابوي شافكم تحجون وياي يموتكم

- تعاي ويانا نخلصج من ابوج شني رأيچ

وتر: اذا مارحتوا هسه اصرخ والم العالم عليكم

- اهووو انتي من هذا النوع ياهو يسمعج هنا دشوفيها هيمة

بلعت ريگ ماگدامي غير اشرد وارجع للبيت نزعت النعال الجنت لابسته ودرت وجهي ركضت بلا ماباوع وراي بس حسيت بيهم صاروا يركضون هما هم

صرت اركض واعيط بفزع

وتر: ساعدوووننيييي منو يسمعني ساعدوننيي

- اوكفي ترى بجميع الاحوال تنلزمين

تعبت من الركض وحسيتهم راح يلحگون بيه ماگدامي غير حل وكفت على حافة البزل جانت كلش عالية وشمرت روحي منها طحت وصرت اتدحرج واعيط الحدما اتستقريت يم مثل الشجرة يسمزها (زور) مثل الشجرة بس صغيرة خفت ينزلون وراي گوه جريت نفسي وجسمي الي تكسر يون صرت بداخلها اختبأت بيها واسمع اصواتهم يدورون عليه ويحچون بينهم اخر شي اسمع واحد يگله

- طاحت كل هاي المسافة انت مخبل تريد تنزل وراها اكيد هسه صارت كل جزء وحد

- خلي ندور شخسرانين

- تريد تدور انت انزل انا رايح

انقطع صوتهم وصار يبتعد مني طلعت من الشجرة جسمي كله متكسر الدم ينزل من رجليه وجبيني وشفتي توجعني مشكوكه ملابسي متمزقات ماتحملت صرت الطم على وجهي فوگ الألم وابچي ماعرف وين اروح اكمل لو ارجع

جسمي ماكدر امشي كوه اضعط على الألم واتحرك مستحيل اگدر اكمل وقررت ارجع للبيت وعساني لا رجعت ولا تخذت هاي الخطوة

بقيت امشي بهذا البزل گوه عليه امشي الدم يسيل مني رجليه مزلغات ومجرحات ماهتميت كملت على ماشفتلي صعده صعدت منها لگيت روحي مسافة صغيرة واوصل البيت والباب بعده مفتوح بسرعة ركضت بيه مابيه دخلت جوه وسديت الباب ورجعت قفلته

ووگعت بالگاع اصرخ وابچي وجع ورعب وخوف من عنده اذا عرف بيه طلعت وحاولت اشرد شرايح يسوي وياي

مر الوقت والصار بعدها عمري ماتوقعته يصير....

    يتبع ...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

جدول التنزيل يبدي من باچر
احد
ثلاثاء
خميس
جمعة
الوقت مو محدد 😔♥️

شنو رأيكم بالقصة والاحداث

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

Insta: zainab__.ali1

متابعة ممتعة🦋