رواية تاروت الفصل الثالث 3 - بقلم زيـنـب علـي 🦢

#تاروت

البارت «2»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

يقولون إن أمهر سفاحي العالم هم من صنيعة الظروف .... ماذا صنعت مني ظروفي ياترى ؟!

البصرة ( الحاضر )

يمان:

انتبهت من صفنتي على صوت الشاهين وهو يحجي

الشاهين: خربت عليهم شغل برأيك راح يعوفونك بحالك

يمان: ليش قابل انا بلغت عليهم احنا جنا گاعدين هناك حالنا من حالهم والشرطة داهمت المكان زائد انا طلعتهن ادري بيهن وين غير الشرطة خذتهن

الشاهين: هو انتم ياهو يگدرلكم

باوعت عليه صفح وحجيت محذره
يمان: حتى النوب لا تتصرف من دماغك شغلك الخاص ماندخل بي بس شغلنا المشترك مامسموحلك تخطي خطوة بلا ماترجعلي ، هالمرة اعديها الك بمزاجي المرة الثانية ماالك كل عذر شاهين سوالفك كثرانه

الشاهين: اگلك شني تهدد ترا انا ما اتهدد لو نسيت منو الشاهين

يمان: وكف السيارة وانزل

راد يحجي ماخليته حجيت بنفاذ صبر
يمان: بلا لغوه يلا كلت وكف السيارة ونگلع من وجهي

وكف السيارة على صفحة وهو ضايج نزلت اخذت السيارة ومشيت منه بقى يحجي ولا سمعتة ، مسافة واتصل بيه باتر خبرني البنات صارن بالمكان الآمن والصحيح...

رجعت للشقه وانا احس تعب الدنيا كله نايم بگلبي الى متى نستمر بهذا الوضع وياترى شني نهاية كل هذا

شمرت روحي على القنفة طلعت تليفوني شفتها حاضرتني من كل مكان

دزيتلها من غير رقم

" يگولون التحبه ضمه بالعين
انا بيا عين أضمك وأنت عيني ؟ "

وكالعادة ماكو رد ....

❛❛❛❛

(عودة الى الماضي)

البصرة عام 1997

يمان:

صار عمري 12 سنة صرت بصف اول متوسط  ومستمرة معناتنا ويا ابوي يمكن كل طفل بالعالم اذا عاش بنفس ظروفي مايتحمل يطگ ويموت اكثر من مرة وصلت بية الحالة افكر بالانتحار لو اقتله واخلص منه وخاصة من جنت اشوفه يدخل البيتنا أشكال وألوان وتصير مناظر مقززة گدام عيونا

بعدين صارت تتطور الامور صار يعزم رفاقة الحزببين ويا ويسوون سهرة بالبيت ويجيبون وياهم بنات ليل امي من شافت هيج الوضع جانت يومياً بالليل تگعدنا بغرفة وهي ويانا وتقفل الباب علينا وطبعا هو يحجي يدك الباب ويغلط يريد امي تطلع تخدمهم هو وجماعته ..

وبيوم كالعادة صار الليل وجماعته على جية يسهرون يمه واحنا امي قافلة الباب الغرفة وماتخلينا نطلع راد يفلش الباب علينا يصيح

صمد: نررججسس اطلعيي راح افلش الباب على راسج

اتقربت من الباب تبجي وتحجي
نرجس (ام يمان) : حرام عليك صمد تريد تطلعني للزلم اقدملكم سم ولك شنو من بشر انت حتى نخوة مابقت براسك

صمد: اطلعي بلا استشراف زايد يلااا بس حضري الميز ورجعي نگبري بغرفتج

جنت اسمع الكلام وانا افور اريد اسوي شي بس خايف على امي صار يدك الباب حيل ويدفر بي وامي تبجي رادت تطلع تخبلت تهسترت كلشي ولا امي وقررت اني اطلعله

اتقدمت للباب بعصبية اريد افتحه لزمتني تحجي

نرجس: وين طالع اگعد يمان لا تعذبني هسه يمل ويروح وانا بس احضرله السم وادخل قبل لا يجون

صحت بكل صوتي
يمان: لو على گص رگبتي ماتطلعييينن ، الى متى تبقينا عايشين تحت رحمته يمه كل ماتسكتين وتطيعينه راح يتمادى اكثر وخري خل افتح الباب واليريد يصير خلي يصير

وكفت گبال الباب تترجاني وتبجي واني اصيح
يمان: وخري يمه اريد اطلعله

اسمع صوته يصيح من ورا الباب
صمد: دطلع اطلع خلي اذب ضيم گلبي كله بيك اططللعع

گوه دفعت امي وتقدمت فتحت الباب هو بسرعة جرني من هدومي سحلني الخارج الغرفة وصار مثل الثور الهايج مثل واحد متعطش يضرب صار يضربني بكل قوته حيل

صمد: والله وكبرت وطلعلك اللسان صايرلي رجااالل توكف بوجهيييي چللبب

شمرت امي روحها عليه بس هو ماخلاها جرها من شعرها ودخلهم هي واخوي للغرفة وقفلها عليهم ورجعلي بيده حزامه گطعة عليه وانا نفس ماطلع مني ومتصنم بمكاني احس جسمي خدر من الضرب وامي جوه بالغرفة ملخت نفسها عليه وهو يضرب ويحجي

صمد: گول بعد مااسويها انطق ترجانييي حتى ارحم بيك

يحجي ويشيل ايده حيل يضرب بيه بالحزام على راسي وانا حرف ماطلع مني اخر شي تعب من الضرب وانا صرت انزف من خشمي وحلگي سحلني  للحمام يريد يخلي راسي بالتواليت لان ماتوسل بي حتى يعوفني ماعرف منين اجتني القوة وگدرت ادفعه

يمان: لو تموت ماتوسل بيك لو يبقى اخر يوم بحياتي ماراح تسمعني اتوسل بيك حتى تعوفنيي

تخبل رجع يضرب بيه جنزني ردت اموت صرت مااحرك لا ايد ولا رجل وعافني بالحمام وطلع رجع ورا فترة شمر عليه سطل مي حتى اصحى وجرني طلعني ويا وهو يحجي

صمد: وهسه كالكلب تگوم تحضر الميز وتبقى تخدمنا الحد ما نخلص سهر وراها تشوف شسوي بحالك اليوم

يمان: عوفني وخر ماجبور انفذ كلامك لو هسه تموتني هنا

ضربني حيل ببطني وحجه صاك على أسنانه

صمد: اذا ماخدمتني انت معناها اطلع امك

بسرعه فزيت احجي يعرف منين يلزمني
يمان: لا لا كلشي ولا امي انا اسوي كلشي تريده

دفرني للمطبخ وحجه
صمد: حضر الميز يلااا

جسمي كله مكسر من الضرب استجمعت نفسي بيه مابيه وحضرت اله الميز وجماعته صاروا يجون بقيت اخدمهم للصبح وكل شويه اروح يم باب الغرفة اطمن امي عليه حتى لا يطلع صوتها
شفت مناظر مو طبيعية كمية القرف البيها وتصير علني وگدام عيني نسوان وزلم باوضاع تشمئز الروح منها

للفجر يلا صاروا يرحون وهما سكرانين طينه وهو هم دايخ ومابي حيل يشيل روحه

وانا احس حيلي باد من الضرب والسهر وفوگاها عندي مدرسة الصبح ماداومت بقيت طول اليوم نايم وامي تضمد بيه وتسويلي كمادات وتدعي عليه

مر اليوم وتوالت الايام وصرت يوميا انا الاخدمهم بمكان امي قررت انا اتحمل كلشي في سبيل هي واخوي مايتأذون والجابرنا عليه ماعندنا غير مكان بيت جدي انكس من ابوي وامي بس خالتها وهم هي ماتگدر تسوي شي غير كل مره تاخذها يمها

وامي كل ماتريد تعوفه هو يرجع يبجي يتوسل بيها ويحلفلها راح يتغير ويصير زين ويانا كم يوم ويرجع الطبيعته مخدرات وكبسله وشرب ونسوان ...

وبيوم مليت كلش ولعبت روحي من الفلم اليتكرر گدامي يوميًا وقررت لو انا لو هو بعد مابيها مجال لان تعبت سهر طول الليل اخدمهم واروح للمدرسة وراها وبعدها ارجع عود يلا انام شويه وكعد اقرأ قبل الليل مليت منه كلشش وقررت اسوي البراسي

انتظرتهم يطلعون الفجر وهو سكران مايدري بروحه نايم على التخم بسرعة ركضت للمطبخ بحرگه گلب وجبت سجينة اجيته ردت انومها بنص گلبه بس فجأة ايدي انكضت وصارت صرخة امي بأذني تحجي

نرجس: شتريد تسووييي يمان

يمان: وخري يمه خلي نخلص من عنده هاي فرصتنا وخري مني خلي انومها بگلبه

نرجس: تريد تضيع نفسك وتقتل ابوك تريد تضيعني وياك يماانن

صرت اجر بروحي منها واصيح
يمان: هدينييي يمه وخري عوفيني

اريدها بس تعوف ايدي ماتقبل على صوت صياحنا رفع راسه يباوع علينا تفاجأ من شافني لازم السجينه موجها عليه وامي كاضتني

صمد: هاي شجاي يصير هنااا

دفعتني وحجت بأرتباك
نرجس: ماكو شي احجي على يمان حتى يبدل يروح للمدرسة

بعدها تحجي ركضت عليه والسجينة بيدي مالحگت امي تلزمني رادت الضربة تجي بي بس هو تفاداها مدري شلون واجت بالقنفة لزمتني امي تصرخ وهو فتح عيونه حيل متفاجأ بالسويته بس استوعب الصار اتحول وحش گام عليه خنگني وهو يحجي

صمد: تريد تكتلني ولك

نرجس: ابوس ايدك عوفه بعده جاهل شمفهمه بهاي السوالف

دفع امي حيل طيحها ورجع عليه يحجي وصوته يفح من العصبية

صمد: شردت تسوييي

رديت عليه بغيض
يمان: اكتلك حتى نخلص منك

بس حجيت الكلام دفرني مددني للگاع اباوع الامي شمرت روحها عليه وصارت تبوس بيده ورجله

نرجس: فدوه اروحلك اكتلني انا بداله فدوه ارحم بحاله ابنك هذا من لحمك ودمك حرام عليك ابوس رجلك عوف الولد

اتجاهل امي واخذني يسحل بيه للمخزن دخلني وقفل الباب جان منظر المخزن مرعب كله ادوات تعذيب وريحته بشعه بلا مايحجي جرني نزعني التيشيرت مالتي وربط اديه وصار يفنن بتعذيبي كتل جلد صعق بالكهرباء چوي وامي تخبلت تدگ بالباب واسمع صريخها يوصل يمنا وانا روحي بدت تنسحب وتطلع مني شويه شويه

عافني وطلع من صوت امي صار بعيد عرفها تريد تطلع بسرعة ركض وراها صرت اسمع بس صريخهم هي واخوي جاي يضرب بيهم ويغلط ويفشر صار صوتهم بعيد ورجع عليه من الضرب كل شويه ينغمي عليه ويرجع يصحيني مثل الواحد ولازمله مجرم ويحقق ويا مستحيل هذا الشخص انا طالع من ظهره ومن دمه ولحمه

جنت معلك فتح اديه وكعت للگاع جرني من شعري رفع راسي وحجه بغضب

صمد: راح تبقى محبوس هنا مثل الچلب ويوميا تاخذ المقسوم ولا اكل ولا شرب اريد اشوف روحك هيج تطلع گدامي تريد تكتلني خوشش انا الك

عافني وطفه الضوه وقفل عليه المخزن غمضت عيوني وبعدها مادريت شنو صار ...

گعدت على صوت ونين يجي من ورا الباب عرفتها امي صرت اگح بصوت عالي سمعت صوتها تدگ بالباب وتحجي

نرجس: يمه ابني حبيبي تسمعني فدوه جاوبني گلبي راح يوگف

صحت بصوت تعبان
يمان: يمه بردان تعاي غطيني

نرجس: سوده بوجه امك ينظر عيني محبوسه حالي حالك ولك يمه مايخلينا نطلع قافل الباب علينا ، شيوجعك يمه احجيلي

صحت بقهر
يمان: گلبي يوجعنييييي

حجيت الكلام وصرت ابجي وهي تبجي وياي واستمريت على هذا الوضع ليله ويوم نهار كامل بالليل كلش حسيت الباب انفتح عبالي هو هيأت نفسي للتعذيب وظلمه ماگدر اشوف بس حسيت على ايد ناعمة تمسح على وجهي عرفتها ايد باتر حجه بهمس

باتر: حبيبي تسمعني

يمان: باتر شلون دخلت لهنا امشي اطلع لا يشوفك يمي يأذيك

باتر: امي ودتني جبتلك وياي اكل

يمان: اريد بس مي راح اموت من العطش

سمعت خطواته راح شغل الضوه ورجع گعد يمي فتح بطل المي شربني شربته كله احس گلبي يبس من العطش فتحلي الثاني يشربني وبلل ايده يمسح بوجهي ويبجي

يمان: شلون گدرت تدخل امي وين

باتر: امي ويا بالغرفة انطتني المفاتيح وهي بقت يمه وجانت محضرتلك اكل ومي

گعدني گوه لان ماكدر اتحرك جسمي متكسر وصار يوكلني انتبهت على ايده بيها حرگ

يمان: هاي شبيها ايدك منو جاويك

باتر: هاي البارحة هو جواني

حجه الكلام وصار يشهگ بالبچي حضنته وحجيت

يمان: ميخالف بس هالفترة تحمل سبع انت ماتأثر بيك چويه

وكلني بيده وشربني مي واخذني للحمام گوه يسحل بيه ورجعني للمخزن ، لازم استغل هاي الفرصة لازم اسوي شي يطلعني منا فكرت بيها ماكو غيرها يگدر على ابوي باوعت الباتر وحجيت

يمان: دام المفاتيح عندك تگدر تطلع هسه ماتخاف مو

باتر: ايي اگدر بس وين اروح

يمان: تروح الخاله حكمة تندل بيتها

باتر: اندله

يمان: تروح وتحجيلها كلشي هي الوحيدة التعرف تصرف احنا مانگدرله وانا اذا بقيت هنا اموت

باتر: هسه اطلع اروحلها بس خاف يحس عليه

يمان: اطلع على گيفك ماراح يحس وهو البيت مو كلش بعيد تروح وتحجيلها كل شي

عافني وطلع بعد ماسد عليه الباب ماكو اقل الساعة وسمعت الهوسه صارت برا عرفتها اجت وحتى صوت سيارات الشرطة هم صرت اسمع صارت هوسه وصياح والاصوات تتقرب مني وهي صوتها صار واضح اسمعها تحجي وتهدد

حكمة: والله ثم والله اذا مسوي للولد شي افلش البيت على راسك واخليك تخيس بالسجون

انفتح الباب دفعته ودخل شغلت الضوه واول ما عينها صارت عليه لطمت

حكمة: يعل ايدك بالكسر هاي شعامل بحال الوليد

يمان: خاله خلصيني فدوه اروحلج

گعدت يمي خلت راسي بحضنها وامي فقدت من البجي والصريخ وياها

حكمة: صخام بوجهك صمد الچلب ابن الچلب اريد من الباري كون يطلع حوبة هالوليد بيك اليوم گبل باجر

نرجس: فدوه خاله خلي ناخذه للمستشفى ابني راح يموت

حكمة: ميليي انت ابقي بس ابجي ونوحي وخليج مچلبه بذلايل صمد

جاوبتها وهي تبجي
نرجس: وين اروح خاله ادري بس اطلع من شوره يموتهم ويحرگ گلبي عليهم ولا يرفله جفن

شويه ودخلوا ولد من الجيران شالوني حتى ينقلوني للمستشفى وهناك سوولي الازم بعد ماعرفت الامن لزموا قدمت بي شكوى وكلتلهم هو الي سوه بيه كل هذا بس هو كلشي مايفيد ويا الناس اليشتغل وياهم وجماعته كلهم بالامن طلع ثاني يوم مثل الورد اسهل منها ماكو

طلعت من المستشفى واخذتني حكمة وياها سبوع ورجعت للبيت ماكدر ابقى اكثر اخاف على امي منه عدت هاي السالفة وتوالت بعدها الضرب والاهاين يوم زين ويتوسل بأمي وعشره ينگلب علينا طنطل جزعت ومليت وكرهت حياتي اروح يم حكمة شويه تصبر عليه وارجع للضيم من جديد ....

وبيوم صار الجنت خايف منه صار ابشع منظر ممكن اشوفه بحياتي كلها الحد هاي اللحظه مامستوعبه

جنت راجع من المدرسة لسا مادخلت البيت وسمعت صوت صياح باتر يجيب التايه دفعت الباب وطبيت شفته كالعادة مطلعة برا البيت وامي جوة يضرب بيها بس شافني باتر اجاني يركض مرفح من البجي

باتر: يمان الحگ امنا اول مارجعت من المدرسة وهو مايقبل يدخلني وامي بس تصرخ

دفرت الباب وانا اصيح
يمان: فتححح البااابب جبااننن افتحهه عوفف امييي

مايجاوب واسمع امي تحجي بصياح
نرجس: صار بعد وانا هسه حامل گلي شسوي غلطي لو غلطك

صمد: منين صار ادرييي بيج وحده **** مستحيل مني هذا البطنج امووتج اليووم اشرب من دمج

يحجي ويضرب بيها وهي تصرخ وانا ماعرف شسوي اريدلي طريقة حتى ادخللها ماكو

يمان: باتر روح صيح حكمة على ما انا اشوفلي طريقه افتح الباب

طلع يركض وانا بقيت الوب شلون افتح الباب لكيت الكرك مشمور بالترك جبته وصرت اضرب وافلش بالقفل بلكي يفتح اضرب بكل قوتي الحد ما انكسر والقفل كله طلع بيدي فتحته الباب ودخلت وياريتني مادخلت ولا شفت الي صار گدام عيوني

اول مافتحت الباب شفته دخل الحربة ( سكين عسكرية) ببطنها ومشاها على طولها فتح بطن امي بالنص وگدام عيوني يمكن هذا المشهد كبرني سبعين سنة فوگ عمري من الذهول وقوة الصدمة حسيت حتى شعر راسي وگف

الدم غرگها اباوعلها صارت تشهگ وهو اول ما شافني شمر الحربه من ايده وطلع من البيت يركض مدري وين راح وانا بقيت على وگفتي رجلي صارت بعد ماتعيني حتى الدموع تحجرت بعيوني اريد احجي اصرخ اروحلها اي ردة فعل مانطيت غير الذهول ومن هول الموقف حتى ماستنجدت صار بعد مايطلع

مدري شلون اخذتني رجليه يمها

اباوع احشائها صار تطلع وهي متمدده على صفحتها احتاريت شسوي شلون اتصرف اديه يرجفن وعيوني صار تغوش وهي گدامي ترفرف مثل الحمامه ومذبوحه

گعدت يمها جريت راسها خليته بحضني ونزعت تيشيرتي وصرت احاول الم بطنها والجاي يطلع منها رغم الدم صارت تشهگ بصوتها وتمتمت بأخر كلام اسمعه منها

نرجس: يمان دير بالك على اخوك ضمه بروحك

همست بصوت مبحوح
يمان: يـ...يمه

نرجس: اخر وصية الي هي اخوك

شهگت بصوتها تحاول تاخذ نفس وصارت تحرك برجليها وتتلوه وانا ماعرف شسوي بس لازم راسها يمكن كل هذا الحجيته ماعبر دقايق بسيطة بس انا حسيته اعدال الف سنه عمر كامل عشته بهاي الكم دقيقة

فتحت عيونها حيل وسكنت عن الحركه ونفسها انقطع عرفت امي ودعت الدنيا وارتاحت من ضيمها  غمضت عيونها وبقيت امسح على وجها حتى دموع مانزلتلي وگلبي راد ينفجر

اندفع الباب ودخلت حكمة ووراها باتر اول ماشافتنا صرخت بكل صوتها

حكمة: يبووووو شني هااايي ولك شبيها امك

ماحجيت بقيت بس اباوع الامي

وهي طلعت برا تفزع وتصرخ

ورجعت گعدت گبالي وهي تلطم وتحجي

حكمة: كتلها يماااا نرجسسس كتلجج متتي حرمج من النفس هالظالم ولك يمان شني الصار

تحجي وتهز بيه حيل وانا بس ساكت اباوع الباتر واكف بالباب وبعده مامستوعب الصار ماعرف شنو صار بعدها مثل العايش بحلم مسرع ماحسيت بروحي غير وانا نايم على گبرها وحاضن ترابها وصوت القرآن بأذني

شلت اباوع الناس بدت تروح وباتر گوه شالته حكمة وگومته روحه رادت تطلع من البچي وبس يردد اريد امي

گوه سحبوا واخذوا وياهم ابتعدوا وانا صرت الوحدي ويا گبر امي حضنت گبرها حيل وشميت ترابها استجمعت نفسي وصحت بصوت يمكن فزز اهل الگبور وحجيت كلمة وحدة بس

يمان: يا يمه

ومن بعدها دخلت بنوبة بكاء هستيريه حضنت ترابها وحجيت

يمان: اوعدج اخذ حقج بيدي وهاي اخر مره تسمعين بيه ابجي واخر مره ينزلن بيها دموعي ، واخوي راح اضمه بروحي مثل ماوصيتيني ومااخلي يتأذه طول ماانا عايش

حسيت بأيد تمسح على ظهري وحجت بصوت مبحوح

حكمة: كوم يمه كوم وليدي وخليك على الوعد ويا امك وصير قوي اسند روح واسند اخوك وانا اسندكم

يمان: حكمة امي ماتت

حكمة: راحت يم الارحم مني منك عليها خليها ترتاح من ضيمها وسنين العذاب

گوه گومتني من گبرها گمت وانا احس روحي محمله فوك طاقتها صدك عمري مايتحاوز الـ 13 سنة بس حسيت روحي شايب كهل محمل جبال من الهموم والخيبات فوك ظهره

من بعدها خلصت الفاتحه وانفتحت قضية تحقيق بمقتلها بس هو جان شارد الاكثر من سبع اشهر وحكمة وكلت محامين لان تعرف بي ملعب وحتى اذا انلزم يطلع وبكل سهولة الحدما ثبتت التهمة عليه ولبستها اله وتم القاء القبض عليه ونحكم مؤبد ...

ومشت حياتنا واحنا يم حكمة عادية رجعنا الدوامنا ماتغير شي بس التغير انا صرت اكثر منطوي على نفسي وحتى كلامي قليل

گوه ايامي تمشي جزعت تمرمرت ولو ماوصية امي يمكن ماتحملت طگيت ومتت

وبيوم جنت طالع برا ورجعت البيت حكمة جنه گاعدين يمها شفت باتر گاعد بالباب ومخلي ايده على خده ضايج اتقربت من عنده استفسر

يمان: ياستار باتر ليش گاعد هنا شبي وجهك مگلوب

باتر: عمامك اجو يردون ياخذون بيتنا وحكمة تعاركت وياهم

يمان: شوكت هذا الحجي وهم هسه وين

باتر: ببيتنا

يمان: خوش ابقى انتظرني هنا

رحت ركض وصلت شفت سيارات بباب بيتنا عرفتها سياراتهم وهذول عمامي دخلت واسمعهم يحجون ويصيحون وصوت حكمة هم طالع اسمع عمي الجبير يحجي ويهدد

أيوب: البيت هو بيت اخونا فوگ ماهو بالسجن من وراكم انتم گاعدين ببيته

حكمة: بيت بنت اختي وولدها هذا اسمع ولك خاف عبالك تخوفني وتشوفني مرا ارمله ووحيده ولا وحق علي بيه حيل اطبگلي سبع زلام حوكه وافصم ظهورتهم

دخلت وحجيت
يمان: شجاي يصير هنا

أيوب: اهلا واخيرًا شرفت

يمان: خير شسون هنا

حجه عمي الثاني

سماعيل: النا حگ اجينا ناخذه هذا بيت اخونا وهو گللنا البيت حصتكم وهم راح يسويلنا تنازل عليه

يمان: هو خلك بيت مفلش شبيك راح تموت ترجف عليه

أيوب: اذا هيج جاا اطلعوا منه بالتي هي احسن بلا صياح وشوشره

باوعت الحكمة وحجيت
يمان: يلا يمه امشينا

حكمة: وتنطيهم بيت امك

يمان: البيت التلوث بدمها وبي ريحة اخوهم المجرم ماريده ولا رجلي تخطي عتبته مره ثانية انا طالع يمه لحگيني

عفتهم وطلعت وحكمة طلعت وراي تلوم بيه وتحجي

حكمة: ليش تنازلت عن حقكم الهذول الشلايتيه

وكفت باوعتلها وحجيت بغضب
يمان: تردينا ننذل وننطرد لو تردين ابقى ببيت بي ريحة دم امي الماجاي تطلع من راسي

اباوع عليها سكتت واعرف بيها شايله همنا لان هي وحيدة شتكدر تسوي وهم بيتها ايجار وفلوس الخياطه صارت ماتكفينا لهذا قررت يوميا بعد المدرسة اطلع ادور شغلة اشتغلها ولا ابقى گاعد

وفعلا من يومها بديت ادور شغل وكل يوم اشتغل يم واحد مرات صانع يم فيتر مرات اغسل سيارات بمطعم ماخليت شغلة ماشتغلتها حتى علاليگ بعت بالسوگ شبعت ذل ومهانه الفيتر الاشتغل يمه يضرب ويغلط على ابسط الامور بالسوك اتعرض الاشكال الكلام وماگدر احجي علمود اطلع فلوس اللگمه وندبر فلوس ايجار البيت اخر الشهر جنت احترگ اموت باليوم الف موته واسكت باتر مااخلي يطلع وياي ردته يركز بدراستة وبس رغم يلح عليه

رغم كل الاشوفه بس بنهاية اليوم من ارجع الگه امي حكمة محضرتلي الحمام والاكل ومو بس هيج تگعد وياي تساعدني بدروسي وتدلك على رجليه وتبقى ساعات تواسي بيه

رغم الذل الي اشوفه لكن گدرنا نجمع الفلس على الفلس انا اشتغل وهي تخيط وتطبخ بالبيت وتبيع للناس واخيرًا گدرنا نشتري البيت الجنا گاعدين بي ونخلص من الايجار

وهيج مرت الايام الحدما صرت بصف الرابع إعدادي ...

وبيوم من الايام جنا طالعين انا وحكمة وباتر گاعدين بمنتزة العصريات كل فترة نگعد بي من يكون ماعندي شغل

فجأة صار صوت صياح قريب علينا انتهت عليه واحد لازم ولد يجي عمره تقريب بگد باتر وطايحله دگ ضرب بنص العالم

حكمة: ياا شماله هذا موت الولد من الضرب

يمان: خطيه انوب ايده شكبرها

رادت تگوم حجه باتر وهو يلزمها

باتر: يمه رحمة للعالمين اگعدي مو بكلشي مدخله روحج

حكمة: ولك وخر دشوفه راح يموت الولد

عافتنا وگامت راحتله رحت وراها خاف كلشي يصير اتقربت منهم خذت الولد من ايده وهي تحجي

حكمة: شجاك راح تموت الولد على كيفك وخر منه

حجه بعصبية
: شعليج انتي منين تعرفينه

حكمة: حتى اذا مااعرفه انكسر خاطري عليه ايدك جنها ايد بغل وانت طايحله دگ شبيك ويا

: دفع بنتي وهي گاعدة بالمرجوحة ووگعها لو صاير بيها شي انا منو يفيدني هذا المهتلف

بقت تردد وتحجي ويا ومخليه الولد ورا ضهرها اخر شي رزلت الرجال رزاله تسوه عمره گدام الناس واخذنا الولد وابتعدنا اباوع عليه صاير بركان من الغضب وكل شويه يريد يروح يهجم على الرجال وحكمة ماتخلي گعدته وحجت

حكمة: جاا هسه يلا صار دمك حار وينك من جان يضرب بيك دتعال اگعد وسولفلي شنو اسمك

: اسمي دائب

حكمة: واهلك وين

دائب: ماعندي أهل جنت گاعد يم جماعة انا ومجموعة اطفال يطلعونا للتقاطعات نجدي وشردت منهم

ضرب على خدها وحجت
حكمة: يا يمه سوده عليه ووين تنام شتاكل

دائب: بالشارع

يحجي وعبالك متعود او الي يسولف عليه شي طبيعي حتى مامتأثر بس عينه على الرجال الجان يضرب بي ويباوعله بحقد وغيض

حكمة: وهذا شيريد منك ليش يضرب بيك

دائب: دفعت بنته ورادت توگع من المرجوحة بس هي مو بنته

حكمة: جا بت منو

حجه بثقه
دائب: بنتي

حكمة: يا يا سوده عليه الولد دايخ من الكتل وصار مايعرف يحجي گوم وياي يمه كوم جانوا عندي ثنين ولد وهسه صاروا 3 هم ماتبقى بالشارع وهم انا اكسب الاجر بيك

رجعنا للبيت ومن يومها دائب صار بنصنا وواحد من عدنا

وهو جان عنده مستمسكات كامله باسم ناس ميتين وواصل للسادس ابتدائي ومبطلينه من المدرسه وهي بمعرفتها گدرت ترجعه مره ثانية

من بعدها تعمقت علاقتنا وقوت وصرنا 3 نطلع نشتغل سوا اي شغل يطلع بيدنا نفر السوك فر يوم حماميل يوم نبيع مخضر يوم بسطيه واليحجي ويانا يبتلي على عمره الكل صار يتجنبنا بالسوك حتى صاروا يسمونا الرهبان بأسم اول كشك مخضر فتحنا سوا وكتبنا عليه اسم "الرهبان"

واي واحد يحجي ويانا ثاني يوم يرجع يلگه محله صاير تراب متفلش وهو نلزمله الدرب ونسلبه كل فلوسه والوارد مالته وهاي هيج خلصناها كل مانتعارك ويا واحد

منا جانت هاي اول عمليات الرهبان

مرت السنين وبدينا نكبر وبسنة 2002  طلع صمد من السجن بعد ماصدوا العفو العام واخلوا السجون العراقية

ورجع صمد بس هالمره غير لگانا اقوى ومعتمدين على نفسنا ومو بحاجته وحتى ماسأل ولا سألنا عليه

خلصت سادس اعدادي ودخلت كلية وتخرجت من قسم ادارة الاعمال وراي بسنتين باتر تخرج من قسم المحاسبة المالية ودائب بالدفرات جبرته حكمة يكمل دراسته خارجي واخذ شهادة الثالث متوسط وگعد

( تم التحفظ على بعض التفاصيل الخاصة )

وبدينا نتوسع بشغلنا وسمعتنا بالسوك هي الاقوى الحدما صرنا نأمن طرق البعض التجار الي دخلون بضاعات ممنوعة ومضروبة بالسوگ وجنا نحصل ارباح من ورا هالشغله تعمقنا اكثر بهذا الشغل وكدرنا نوكف على رجلينا ونخلص من الذله الجنا نعيشها واحنا نشتغل يم هذا وذاك ونتوسل

كدرنا نحسن نفسنا ونقلت حكمة بغير بيت وبمنطقة ارقى وهذا كله وهي عبالها صدك تعينا بشركة اهلية

من بعدها انتقل شغلنا للميناء وصار عدنا رصيف خاص بينا من خلاله كدرنا نأسس شركة نفط اهلية ومعارض سيارات ومحلات ذهب وسلسله محلات ملابس رجالية بأسم ماركه معينة

من هنا كلمن بدأ يأسس حياته واسم الرهبان صار اقوى ومعروف اكثر وخاصة بين التجار الغير شرعيين

2013/1/7

گاعد بالمصنع ودائب يمي نتناقش بعقد بضاعة اليوم بالليل تنزل بالميناء ومحتارين شلون نعبرها

دخل باتر وويا الشاهين يسولفون ويضحكون

باتر: بعدكم محتارين ترا انا لگيت الطريقة

يمان: اتحفنا بلا خلي نسمع ولو ادري كل الطرق مالتك تودينا بالف داهيه

اتقرب يمي لوه رگبته بزعل سوه روحه مسكين ضحكت بعده على نفس السوالفه من هو صغير لليوم مايبطلهن

يمان: دحجي يمعود فضني

دائب: لو تحجي لو تخلينا نشوف شغلنا

باتر: انطوني فلوس اشتري بينهن واحجي

ضحكت مديت ايدي نطيته الف دينار وحجيت
يمان: يلا خلصنا

گعد وحجه برود
باتر: خلولنا واحد عرف بسيطرة .... وكالعادة بس نگله راهب يگلك البضاعة تعبر راح يمشونا

دائب: تبقى السيطرة الثانية

يمان: لا هاي محلوله هم راح يجون يطلعون بضاعتهم منها

الشاهين: ولا تنسون انتم شغلتكم مو متاجره تأمنولهم الطرق وبس

گمت وحجيت
يمان: هاي هي باجر الساعة سبعة تنزل البضاعة بالميناء نحملها ونوصلها الهم وناخذ عمولتنا

اتفقنا وعفتهم وطلعت رايح البيت حكمة صار أيام مشايفها بس اتطمن عليها بالتليفون

جانت ضهريه طبگعت سيارتي يم الاسواق اريد اشتري جگاير اشتريتهم وطلعت شفت بنيه واكفه بباب الاسواق تتعارك ويا مكينة القهوة وتحجي عليها وكأنها تسمعها مدري ليش بقيت واكف اباوع عليها

: هسه غير هذا الألف انتي ثوله اريد گهوة ليش جاي ترجعينه عليههه

اتقربت يمها خليت ألف وحجيت
يمان: الألف مالتج مشگوك الميكينة ترجعه عليج

حجيت بلا ما اباوع عليها
يمان: يلا حددي شتردين

تخصرت وحجت بأنزعاج
: وانت منو حتى تدفعلي وشني شفتني حافية لو مجدايه گدامك ممكن اعرف

باوعتلها اويلي سبحان الخالق همست
يمان: ما شاء الله سبحان الله

: خير شبيك لگيت الهدايه بوجهي

تجاهلت كلامها وحجيت بقلة صبر
يمان: اعتبريني فاعل خير وحددي شتردين او اكلج هذا انا راح اختارلج شوكلاته موزين الگهوة عليج

: خير خير ومنو انت حتى تختارلي شنو اشرب ومنو سمحلك تقتحم خصوصياتي

يمان: وهو بس حددتلج شنو تشربين ليش تحسسيني داخل عليج للحمام واني تسبحين

اباوع عليها فتحت عيونها السود بتوسع وحجت بحده
: صدك انت واحد متستحي

بقيت اباوع بعيونها خدودها صارن حمر من العصبية مدري من خجلت انوب لون بشرتها خمري ويا خدودها الحمر دخيلك ياربي

عافتني ومشت ابتسمت واني اباوعلها تمشي وتدردم وتعدل بشعرها القصير الحد رگبتها صعدت بسيارتي ومشيت على ماوصلت بيت حكمة هي دخلت النفس الشارع بس نزلت من السيارة اجتني بعصبية تحجي

: انت صدك واحد متستحي شبيك ابني مشايف تلاحگ بنات العالم خير امي شكو

يمان: ياهو الاحگج بس لا انا

: لا امي منو غيرك جان يم الاسواق وهسه هنا بس اريد اعرف اهلك شنطوك اذا ماعرفوا ينطوك تربية المن خلفوك

خزرتها وحجيت بحدة

يمان: شكد صلفه انتي منو يگول لاحگج يجوز بيتي هنا

: تره صار عمر گاعدين هنا ولا مره شفتك واضح من شكلك انت واحد لاحوگ اصلا اني اجيت انطيك المقسوم واروح

بعدنا نحجي نفتح الباب وطلعت حكمة حجت
حكمة: ياستار استرنا ولج شمالج نرعصتي بنص الشارع

حجت بفخر
: خاله مو يمج سويت الازم لا يبقى بالج

ضحكت يستهزاء وتقربت بست راس حكمة وهي هم حضنتني تسلم عليه رجعت عيني على هاي البعدها واكفه وفاتحه عيونها بصدمه

حكمة: خيال ليش واكفه تعاي تفضلي يمنا

حجيت مستغرب
يمان: شسمها ؟؟؟!

حكمة: خيال اسمها شمالك يمه

رجعت باوعتلها صار وجها اصفر من الفشله

حكمة: خويله تدخلين لو تضلين بالشارع اليوم

حجت مرتبكه
خيال: لا لا ماكدر هسه الوالد ينتظرني

عافتنا وراحت اتقربت يم الباب ورجعت باوعت عليها ضحكت بستهزاء واشرتلها بمعنى باي عافتنا ودخلت للبيت بسرعة ...

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

اعرف هذا البارت احداثه مسرعة بس اشياء ضروري تنذكر حتى بعدين من تبدأ الامور تتوضح مندوخ ونعرف شنو دايصير وخليكم على درايه ان جميع ماذكر بهذا البارت هو غيض من فيض بعدنا ببدايتها 😂♥️

التنزيل المنتظم
حتى اكدر اسيطر على الاحداث
التنزيل حيكون بين يوم ويوم الساعه عشره بالليل ينزل بارت

شنو رأيكم بالاحداث

توقعاتكم للمستقبل

حلواتي لا تنسون التصويت + تعليق بين الفقرات ومتابعة الحساب

احبكم ♥️

متابعة ممتعة