رواية تاروت الفصل العشرون 20 - بقلم زيـنـب علـي 🦢

#تاروت

البارت «20»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

Insta:zainab__.ali1

معتبرك وطن لتروح وتغربني تاليها
التفاصيل العشتها وياك
اوّل مرّة احس بيها..

اسفة على التأخير عمري بس والله داشتغل على ملف كتاب قصتي ( في قبضة الخيلع ) ولازم هذا الأسبوع اسلمة الدار النشر الموضوع صار فجأة والرواية هواي ينرادلها تعديل واضافات اتمنى تعذروني على التقصير والخربطة الداتصير بالنشر مثل متعرفون القصة ينرادلها كتابة وربط احداث وماريد استعجل بيها حتى لا اظلمها والثانية تدقيق وتعديل والله مدالحگ عليهم ثنينهم ان شاء الله الخميس اسلم الملف للدار ونرجع نكمل القصة

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

گاعدة على أعصابي منتظرة ياسين طول وهو بعده ماواصل شلت نقالي واتصلت بي مرة مرتين ماكو ميجاوب بدأت اقلق واتوتر رجعت اتصلت بي انفتح الخط وريته لا نفتح ولا احد جاوبني

خيال: ياسين

اجاني صوت غريب يحجي

- حضرتج تعرفين صاحب هذا الجهاز

خيال: ايي اعرفه وينه منو حظرتك انت

سكت شويه وبعدها جاوبني حسيت الخبر مثل الصاعقة

- انا ضابط جنايات المدعو ياسين هاشم عثر عليه مقتول بسيارتة برصاصة والسيارة مسويه حادث

صحت بصوتي

خيال: لااا فدوة لا شلوووون هيججج صااار شلون

- اذا تردون معلومات اكثر الجثة نقلت الدائرة الطب العدلي

حجاها وسد الخط تخبلت صرت ابجي بصوت عالي مثل المصدومة اجوني يمان ورميم يركضون قرفص گدامي يهز بيه ويحجي

يمان: شكوو خيال احجي شبيج شكو

لطمت على خدي وحجيت

خيال: ياسين كتلوا ياسين مات سوه حادث ومات

يمان: شنو مات شبسرعة شبيج منين سمعتي

خيال: اتصلت بي وگلولي يمان رواح ياسين كله من وراي راح بيها الولد

جنت احجي وروحي تتگطع من الالم مدري شسوي بروحي ورميم واكفة مصدومة وهو احتار مدري شيسوي طلع نقاله يريد يتصل لزمته وحجيت

خيال: انت وين جنت ويا منو جنت تحجيي

باوعلي مستغرب وحجه

يمان: شغل شكو

خيال: انت خلييتهمم يكتلون ياسين موو انت ايي طبعًا انت ماستبعدها منك ابد

نتر اديه منه وحجه بعصبيه

يمان: انتي اكيد تخبلتي اسألي رميم هي تحجيلج سمعت الاتصال كله

خزرني وطلع مدري على منو يتصل ورميم گعدت يمي تحجي بصدمة

رميم: يمان صح كلامه مكالمة مافهمت منها شي غير ثنين شاردين ويدورون عليهم

خيال: مادري رميم راح اتخبل صرت اشك حتى بروحي نسيتي شسوه بيناا

رميم: بس جرحتي

خيال: يستاهل

خليت ايدي على وجهي وصرت ابجي بحرگه وهي هم حضنتني حيل تبجي وياي دخلت حكمة شافتنا وحجت بخوف

حكمة: يمه شبيهن البنيات يبجن

خيال: خالة ياسين انكتل

لطمت على خدها تصيح

حكمة: يمه ياااع خيبه شنييي انكتل ياهو كتله

خيال: مادري هسه وصلني الخبر اخذيني نروحلهم فدوة

رميم: وين تروحين بهذا وضعج خلي نشوف اهله شيسوون احتمال يحملونج المسؤلية

خيال: شسوي فهميني الولد راح كله من وراي

حكمة: كتلج من هذيج المرة خلي هدي بعد لان انعرف مايعوفنه اگطعي منه بس انتي اااخخ انتي ماتسمعين حجايتي

خيال: شسوي خالة كلتله وتوسلت بي حتى يعوف ويمسح كلشي بس هو ماقبل وجان مصر حتى قطعت التواصل ويا بس بقى يلح عليه الا هو يحلهن ماسمع مني شسوي

دخل يمان للبيت بدل اخذ سويجه وطلع بلا ما يباوع علينا

عرفته راح يفهم الموضوع بقت حكمة كل شويه تتصل عليه وهو يكللها اهله مخبوصين ومحد يعرف السبب الحد الان غير اغتيال بطريقة غامضة وهاي هي بقيت طول اليوم الوب وبس افكر بياسين شنو ذنبه كله من وراي راح الولد

طلعت برا لليل حتى دخله للبيت ماكدرت ادخل احس روحي اختنگت وبس ابجي

حكمة: رحمي روحج موتيها جا انتي كلتيله عوف السالفة هو ماقبل وهو يدري الموضوع خطر وكل شويه يجي تهديد شكل

خيال: بس من البداية المفروض اتخذ اجراء اذكى من هيج ومادخله بالموضوع

حكمة: هذا قضاء ربج يمه تعددت الاسباب والموت واحد هذا حد يومه شسوين تموتين روحج

اباوع للباب دخل يمان هستوه راجع اول ما وصل يمنا سألتة حكمة

حكمة: ها بشر شصار وياهم

گعد بتعب يحجي

يمان: مسكين والله اهله متخبلين عليه وابو يفطر الگلب وبس يصيح مايتوب من شغله

مسحت دموعي وحجيت

خيال: باجر اروحلهم

يمان: وين ويين ماكو تروحيلهم خلي الامور تهدأ يلا

خيال: بس لازم اروح ماگدر

حكمة: ناس مفجوعة كلشي يطلع منهم وانتي بهذا وضعج وين تگدرين ترحين صيري زينه واخذج بيدي

يمان: المشكلة راح وراحت كل الاسرار ويا وليش انقتل بهذا اليوم وتحديدًا بهاي الساعة

باوع عليه وحجه

يمان: اذن تليفونج مراقب ومكالماتج كلها مكشوفة

خيال: مستحيل شلون يعني

يمان: يعني لازم تغيرين رقمج

حجاها وعافنا ودخل جوا ورى شويه رجع طلع من البيت بس مبين مطايق روحه ...

❛❛❛❛

يمان"

وصلت للمستودع گبل بوجهي للشاهين دفرت الباب ودخلت فز جان مجنز تجنز دائب وباتر ما مقصرين بي اتقدمت عليه رفعت راسه محجيت

يمان: الشاهين تحجي الحقيقة لو هسه اطلع ضيم گلبي كله بيك

جاوبتي بصعوبة يحجي

الشاهين: بعد ياحقيقة تريد كلهن حجيتهن الك

كمت ابتعدت منه نزعت ساعتي حجيت وانا ارفع باكمام القميص

يمان: هاا هيج يعني ما راح تحجي شي

الشاهين: بيمن تريد احلفلك كل الحجيته الك هو هذا العندي ماراح تاخذ شي بعد لا تحاول

اول ماحجة الكلام لزگته دفرة

يمان: وهسه هم ماتريد تحجي

الشاهين: ماعندي شي احجي تريد اجذب عليك

رجعت ضربتها برجلي على وجه دوى بصوته المتوسل

الشاهين: اخخخ راح اموت حرام عليكم كافي

يمان: حرمت عليك عيشتك گـ*** شوف انا اليوم مفولة عندي الاخرها وحاقد على الدنيا كلها لو تحجي لو اكتلك خلص بدون مادري بروحي

الشاهين: كل الاعرفه حجيته الك

سحبت السلاح وحطيته برأسه صحت بصوت عالي

يمان: بـــاتـر

دخل تليفونه بيدة يحجي بنزعاج

باتر: ها

يمان: وين هذاك الثاني

باتر: مشمور جوا

يمان: جيبه

راح سحله وجايبة مسوينه جنازة اول ماشافني بقى يتوسل عوزه بعد شويه يدنگ على رجلي ويبوسها

سوداني: اسف والله اسف بعد ماسويها ولا اعيدها فدوه اروحلك ارحم بحالي

يمان: ارحم بحالك واخليك تطلع منا واحميك هم اذا حجيت هسة كل الحقيقة

سوداني: احجي والله احجي كلشي تريدة

يمان: عفيه عليك وهسه سولفلي شني جانت مهمتك وشني ردت تسوي

سوداني: دزني نضال ومن حجيت وياك جنت تحت التهديد والله مخلي السلاح براسي واحجي

يمان: ونضال شيريد وليش انت بالذات دزك النا

سوداني: يعرف بيك نبه وماتفوتك فايته دخلك من هذا الباب اتصل عليك حتى تحميني وهم يعرفون مكان الشاهين وين وانا اشرده

يمان: تعبر سوالفك عليه قشمر ادري بيك مدسوس منهم وللعلم يعني حتى لو شاردين ترجعون الي لان نضال مستحيل يخليكم عايشيين بعد ... احجييي ليش انت بالذات

سوداني: لان مرة من المرات جنت ببيت نضال والشاهين جان هناك كمت اسوي چاي ومن رجعت سمعتهم يحجون هو والشاهين واسمعه يگله

الشاهين: انت متاكد تگدر توگعهم بهاي السالفة

نضال: يا سالفة شبيك شاهين هم ذول يوگعون يرادهم هواي شغل وحفر وسالفة مثل هاي ماراح تطيحهم يگدرون يطلعون منها مثل الشعرة من العجين بكل سهولة

الشاهين: جا المن خططت الكل هذا

نضال: اريد اوكعهم بضربة ورى ضربة

ضحك الشاهين وكال

الشاهين: يعني مثل مايگولون كثرة الضرب على الحديد يلين

نضال: بالضبط وهالمرة نكتل خطيبته ونذبها براسه فوك التعب النفسي تهمة تتلبسة على الخالي بلاش

الشاهين: شلون مافهمت

نضال: هاي السالفة يم الحكومة وخليتله ناس تشهد ضدة وضد اخو مثل ما تعرف اخو سابقًا متورط بجريمة كتل اهل المحروسة وهي محامية ورجعت فتحت القضية وحتى يتخلص منها كتلها وجيب اليطلعهم بعد وشهود عيان موجودين

اخذ نفس من الارگيلة وگال

الشاهين: يا أخي ماعرف انت شعندك وياهم ليش مركز بيهم الهالدرجة سالفة وخلصت والبنات شردوهن يعني اعتبرها صفقة وخسرانة

نضال: خربولي اهم واكبر صفقة بحياتي من هربوا الاسيرات وانا حلفت اخذ منهم بثار صمد

الشاهين: بس ماتگدرلهم متحامين بظهر قوي

صمد: لهذا قررت اتخلص منهم كل الشغل ماخذينه خلي تفرغلنا الساحة شوية شني مانستاهل

ردت اطلع وارجع المكاني ماحسيت بروحي غير نجريت وصوت نضال يصدح يزمجر بوجهي

نضال: جنتتتت تنقل اخبار مو

سوداني: يمعود وين انقل اخبار كول يالله سمعتكم بالصدفة ...
توسلت بي ردت ماقبل يعوفني حبسوني يومين هو والشاهين ماخلوني اطلع الا بالشافعات وطلاع الروح اخر شي صاروا يهددون بيه وبعدين ونضال اول ماعرف الشاهين مختفي بسرعة گال يمان اخذه وخلاني اسوي هاي الخطة واجيتكم

يمان: شنو دليلك على هذا الكلام

سوداني: افتح تليفوني وشوف محادثات التهديد وحتى مكالمات مسجلة هم وانا ماردت اشرده ضليت اماطل واسوي روحي ماگدر اركض الحدما لگونا دائب وباتر وسحلونه هناك ورجعونا

يمان: يعني الشاهين ونضال هم الدبروا حادث مرتي

سوداني: ايي هم وحتى بيومها الشاهين راح بنفسه ونضال بقى بالبيت

صاح الشاهين وهو يضرب بروحة حيل

الشاهين: جذااب جذاب لا تصدگه هذا يشتغل الصالح نضال

سوداني: افتحلكم نقالي وشوفوا التواريخ قابل هو نضال شمدري انتم راح تخطفون الشاهين

باتر: هسه نشوف ونتأكد ليش لا

حجاها وخلا النقال بيده فتح اله الرمز اخذه يگلب بي طلعنا كل الحجي والمحادثات وفعلا كلامه مضبوط بالحرف الواحد ماتحملت رجعت على الشاهين خلصت عليه

يمان: ليش ردت تكتلهااا ليششش

الشاهين: تتذكر سالفة البنات الطلعتوهن بعد سالفة الجريمة

يمان: وهاي شجابها على هاييي

الشاهين: الصفقة جانت النضال وهو من هذاك اليوم لليوم حاقد عليكم ويريد يوگعكم بكل صورة وانا مشيت ورا بالتهديد غصب عليه

يمان: وجريمة اهل ضرغام هم مدبرة مووو

باتر: ايي اكيد مدبرة

رفع رأسه باوع عليه وحجه
الشاهين: لا اهل ضرغام اخوك كتلهم انا بيومها جنت خارج البصرة وانت تعرف

يمان: شنو اليثبت مو انتم مدبرينها هاااا

دفرته حيل ببطنه صاح بألم

الشاهين: انا تدخلت من وراكم ومنعت الشاهد الشاف باتر وهو يدخل بيدة سلاح البيت حجي سليمان ماخليته يحضر للمحكمة

يمان: وانت ليش هيج سويت!!!

الشاهين: ردت ارد شويه من معرفكم السويتوا وياي انا مو خاين للعشرة بس نضال يهددني وانا ماگدرله نفذت مال الحادث وشردت يم جمجمة

يمان: يعني جان عندك مشروع ان تقتل خيال ؟

الشاهين: مجبور يمان ماعندي غير حل

نهاريت عليه بالضرب فوخت گلبي الموجر بي وعفته

يمان: ننقلهم الغير مكان المستودع مكشوف

باتر: هسه يجي دائب وننقلهم للمستودع الثاني

بقيت انتظر على مااجه دائب نقلناهم الغير مكان

دائب: انا اروح

باتر: هسه اجيت وين مولي

دائب: ماكدر اتأخر على البيت

يمان: خوش ... واريدكم الشاهين تعلگة بالمگلوب من رجليه وتعوفه الحدما اجي مرة ثانية

باوعت للسوداني وحجيت
يمان: وانت ماراح اسويلك شي بس تبقى محبوس حالك من حالة الحدما اسحب كل الكلام منكم

سوداني: قابل انت بس لا تكتلني ولا تطلعني حتى نضال لا يستفرد بيه

عفتهم وطلعت من المكان صاح وراي باتر وگال

باتر: شلون يعني انا ابقى هنا احرس

يمان: انت ماعندك شي انا امي ماتخليني اتحرك

باتر: انت ابقى حارس للخانم مالتك

باوعتلة بطرف عيني وحجيت

يمان: الاحسن مانحجي بهذا الموضوع لان يضوجك وانا ماريد اضوجك

باتر: لا تلعب نفسسييي يمان يعني انت تدري كلش زين انا مااسويها وبعدين مامعقولة اكتل عائلة كاملة وانا مادري بروحي

يمان: بس سويتها باتر سويتها وهذا الاحنا بي انت سببه

الكلمة الاخيرة حجيتها بصوت عالي

دفعني وطلع ضايج ودائب طلع ورى صعدت بسيارتي ورجعت للبيت بعدني بالطريق اتصل بية فرات جاوبتة

فرات: وين انت ؟

يمان: راجع للبيت ليش

فرات: هذا الجوكر لم غراضة وطلع من بيتي يكول انا انسحب ماكدر افك الشفرات وحدي

يمان: حقه وخاصة بعد مقتل ياسين مالومه

فرات: وهسة شنو الحل

يمان: ماعتقد الشفرات ينحلن هنا راح ادزهن الصديق عايش برا ونشوف

يقيت احجي ويا شويه وراح احتاريت راسي افتر كلشي ماجاي افهم بس اتمسك بشي واكول نحلت القضية بالنهاية اشوف روحي اركض خلف سراب الظاهر السالفة مطولة هواي بقيت افتر شويه وبعدها رجعت للبيت

❛❛❛❛

خيال"

تعشينا ورجعنا طلعنا للمكان المعتاد برا بالحديقة الهوى بي نسمات باردة بوادر الشتاء بدأت تظهر ريحة رطوبة الارض والعشب تتغلغل بالنفس تنطي راحة

حكمة كل شويه تطلعلنا بسالفة تحاول تنسيني بس هيهات انا ميتة قهر شعوري الذنب اتجاة ياسين يذبح بيه

باوعت الرميم گاعدة يمي من اول ما گعدنا وهي عيونها بالتليفون ما شالتهن

خيال: رگبتج راح تطگ التليفون ما شارد

حكمة: صدك خيبة عويناتج ولن من الصخمون عوفي شويه

رفعت راسها علينا شمرت التليفون وحجت
رميم: شبيجن وين اروح مليت من گعدة البيت

خيال: اي همزين ذكرتيني ميعاد اخت وسن صديقتي تعرفينها

حكمة: يااا بنات ناصر جانن هناك بالمنطقة القديمة

رميم: ايي حكوم جانوا جيرانا

خيال: المهم تريد وحدة تشتغل وياها بالصيدلية وخابرتني دام حسب اختصاصج ليش متشتغلين وياها على مايطلع تعيينج

رميم: ياريت احسن من گعدت البيت لان ملل

حكمة: باجر انا اخذج واروح نشوفها حتى اسويلج خط

رميم: ينرادلنا سيارة احسن من هاي الخطوط

حكمة: وشنهي السيارة ابوها چبير خلي خويله تصير زينة ونجيبلنا وحدة

خزرت رميم وحجيت

خيال: لا خالة انا مفكرة بهذا الموضوع ضامة فلوسها بس اصير زينة اشتري وحدة

بقت تحجي لان ماقبلت هي تشري السيارة گوه نسيتها بقت گاعدة شويه بعدها دخلت تنام وانا ورميم بقينا گاعدين بالحديقة

انتبهت على فتحتة الباب شفته دخل وصاح على رميم

يمان: ريمه تعاي لزمي الباب ادخل السيارة

راحت رميم فتحتله الباب ورجعت وهو وراها اتقرب يمشي بخطوات يخط برجليه مبين عليه التعب طلع مثل الضرف من جيبة عيوني جانت تراقبة بتقيق بدون وعي مني شمره بحضني وحجه

يمان: هذا خط جديد خطج القديم شمري لان مراقب

خيال: وانت شمدريك

يمان: سوي كشف وشوفي وهذا الخط مأمن خلي واذا ماتردين براحتج

جان يحجي وياي ببرود وحتى مايباوعلي اخذته ودرت وجهي على رميم حجيت

خيال: ريم ساعديني

ابتسمت بخبث باوع اليمان وحجت

رميم: ظهري يوجعني يعني كل شويه ناقلتج المكان يمان فدوة شيلها دخلها للغرفة

كرصتها وحجيت بحدة

خيال: رمييمم بس ساعديني اوكف وروحي

رميم: المنقذ موجود ماتحتاجين مساعدتي انا نعست يلا قايز ليلة سعيدة

باستني ودخلت للبيت تركض صحت وراها ولا كأنها تسمعني عافتني اصيح ودخلت رجعت نظري عليه جان واكف فوك راسي ومتخصر عضيت على شفتي وحجيت

خيال: بس ساعدني اگوم

بدون كلام انحنى عليه وشالني حجه

يمان: اشيلج حتى لا ينشلع گلبي ولا گلبج

خيال: رجلي 80٪ طايبة ماكو داعي اكدر امشي عليها

يمان: لا مايصير تضغطين عليها

سكتت ودرت وجهي منه تنهد بضيق ومشى بيه وهو شايلني كل شويه يقربني اله ويضمني اكثر الحدما حسيت انفاسه الحارة صارت تداعب بشرتي وعطره امتزج ويا انفاسي

درت وجهي اله ورأسي اخذ استقراره على صدرة وهو بدوره لمنه حتى حسيت بعظلات بطنه البارزة وهي تتحرك بتناغم مع مشيته غمضت عيوني ردت احس بي اكثر بهاللحظة هواي حسيت بروحي محتاجة اله دكات گلبه اشتياقي وحنيني العطره رجفة گلبي وانا ببين اديه ويا دفو جسمه وحرارة انفاسة فصلت عن العالم

ماحسيت غير على همساته بأذني يحجي

يمان: خيال

بسرعة فتحت عيوني ابتسم بجانبة وگال

يمان: وصلنا من زمان تردين تبقين هيج للصبح اليوم

انتبهت على روحي حاضنته ومحاوطه رگبته وراسي مرتاح ومستقر على صدرة ابتعدت واني احجي برتباك

خيال: نزلني شبيك مو وصلنا

ضحك بستهزاء ونزلني على السرير مددني وخلا مخده جوه رجلي غطاني وراح جاب العكازات خلاهم يم راسي بدون كلام وطلع ، انا اليوم مدري شبية عيوني متعلگه بي وين مايتحرك ، هزيت راسي اطرد الأفكار من رأسي واحجي ويا روحي

خيال: اكيد هذا الجاي يصير وياي كله من ورى حلم البارحة ايي اكيد ...

طول الليل بقيت اتگلب احاول انام ماگدر اريد عيني تاخذ نوم وتغمض ماكو بصعوبة گمت اخذت العكاز استندت عليهم وطلعت من الغرفة دخلت للحمام وطلعت ردت ارجع سمعت صوت جاي من الاسقبال

اتقربت على كيفي فتحت شويه من الباب ومديت انظاري للداخل شفته گاعد وظهره للباب يشتغل على الحاسبة ويدخن الي لفتني الاغنية المشغلها وكالعادة ذوقة يحب الاغاني القديمة

مرات اطلب منك تنسى
واطلب من روحي الحل نفسه
لكن وين ارحل الگاك
اهرب منك واتمناك
واسمع صوتك وي كل همسه
واهواك شگد ما اريد انسى

حاير بيك وحاير بيه
وحاير بالناس اللي تلوم
لا بيه اصبر بعد شويه
ولااريد اقبل بالمقسوم
انت بنار واني بنار ..
حتى الحب هم بينا احتار
الحب يريد ال يتساهل ..
واحنا المانقبل نتنازل
نتساهل بينا اللي صار

ادري بگلبي وادري بگلبك
وادري تحبني بگد ما حبك
لكن مدري شجاك وجاني
تغيرت انت تغيرت اني
ضيعنا اللي كان بلحظة
ما ظن روحي وروحك ترضى
ارجعلي وشوف انت شلون
بالروح مدفا ومصيون
واي حب لغيرك روحي ترفضه

سندت راسي على حافة الباب وصرت اشهگ بالبجي بصوت مسموع مثل الكاتم وبلحظة وخده انفجر حسيت اعلى ايده الخشنة على راسي همس بحسرة

يمان: شبيج گلبي

ماگدرت احجي ردت اروح ماخلاني لزمني من ايدي وحضني من ورا يحجي

يمان: ليش هيج تشلعين گلبي وگلبج ليش

خيال: لان ماتستاهل كل ذرة حب انطيتها الك

يمان: وهاي دموعج عليمن

سحبت ايدي منه حيل مسحت دموعي وباوعت عليه

خيال: على روحي على ايامي الضيعتها بحب واحد مثلك مايستاهل

يمان: تحجين شي وبداخلج غير شي اذكرج قبل شويه شلون جنت حاضني خليل گلبي لو نسيت

خيال: دوخر داتحلم انت

عفته ومشيت بتجاه الغرفة سمعت صوت قهقهته وحجه

يمان: يعني مثل حلمج من طول الليل تتحلمين برحج نايمة بحضني

بسرعة باوعتله يحجي ومرسومة على وجة ابتسامة خبيثة خزرته وحجيت

خيال: شتقصد

يمان: مااقصد شي كبدبد

شمرلي بوسة بالهوى ودخل للاستقبال رغم البداخلي مو شك وانا متأكدة من الي سوى بس ماهتميت وتجاهلته ودخلت للغرفة كوة يلا گدرت انام

❛❛❛❛

رميم"

مر كم يوم الوضع هادئ وبيوم جنت ابدل اريد اطلع اشوف سالفة الشغل بالصيدلية جنت ابدل بسرعة مستعجلة متأخرة على السيارة المأجرتها حكمة وهو يحجي بأذني

باتر: لا تلبسين شي يطلعج حلوة

رميم: تريدني اطلع مبهذلة

باتر: جنج سيراميك مكة حتى لو تلبسين گونية هم تحلينها

رميم: لا تبالغ

باتر: وحزام الحمزة ما ابالغ

سكتت ارتب بوجهي رجع حجه بنبرة تعبانة يمد بالكلمة

باتر: گلـــيبي

رميم: هاا

باتر: يعني مااشوفج اليوم الصيدلية قريبة من المكان الي انا بي بس عشر دقايق وانا يمج

رميم: لا وين تشوفني ماكدر البنت تعرفنا وانا رايحة ويا السايق يعني مايضم على بابا شي خاف يشوفك وياي

باتر: جا شو صاحبتج الجگمة تگول وين ماتريد اطلع وياك انت بس اشر

حجيت مصدومة

رميم: ليش انت وطيف بينكم كلام ؟!

باتر: لا بس هي تلح وانا اريد اشوفها وين توصل

خفت واحتاريت شلون ممكن ابعد طيف أو شلون اخلي يبتعد عنها ومايحجي وياها

رميم: ها هيج اي يلا براحتك لازم اروح انا تأخرت

باتر: ها گلبنا الخلقة شبيج روح گلبي غير اگلج اريد اشوفها شتريد

رميم: يعني شتريد واضحة بس انت عاجبك الوضع ، الهم لازم اروح باي

حجيتها وسديته بوجه رجع اتصل خليته بقائمة الرفض دزلي مسج من الواتساب حظرته

سمعت صوتها تصيح عليه من جوا

حكمة: ولج رميممممه تأخرنا على الزلمة زحمة منه

نزلت وانا احجي

رميم: شو تأخرنا تحجينها بصيغة جمع

حكمة: غير اروح وياج اعوفنج ترحين الوحدج

رميم: واذا شتغلت تبقين هيج ترحين وترجعين وياي حكوم انا اروح الوحدي اتفق ويا البنية وارجع

خيال: لا حكمة وياج تروح دام بس تافقين وترجعين

رميم: ليش محسستني طفلة وبعدين انتي شلون تبقين بلا احتاجيتي مساعدة

جنت احجي هيج ومتأكدة بي راح يجي للصيدلية لان زعلت

خيال: اكدر اضغط على رجلي اصلا كم يوم وافتحها لا تخافين عليه ويلا الرجال منتظر

سكتت غصب عني ماخللي حجة طلعت انا وحكمة ورحنا للبنت طول الطريق اكل بروحي ماعرف شسوي اذا اجه انفضح ما بيها اي مجال

فتحت الحظر منه بسرعة اتصل رفضته وكتبتله

رميم: " بعدين نتفاهم "

باتر: " جايج للصيدلية "

رميم: " اذا تجي تحلم تشوفني مرة ثانية "

مادز شي ورا دقايق رجع كتبلي

باتر: " من ترجعين للبيت تتصلين بيه افهمج "

كتبتله

رميم: " ميخالف بس لا تجي "

باتر: " منتظرج "

سديت تليفوني مابقى دعاء ما دعيته بس حتى يعدي هذا اليوم على سلامات ومن ردت انزل گوة بطلاع الروح يلا قنعت حكمة تبقى بالسيارة ماتنزل وياي وهي هم جانت تعبانة بقيتها بالسيارة ونزلت

شفت البنية واتفقت وياها اباشر بالشغل من ثاني يوم ردت اطلع وانصعقت من شفت باتر وحكمة واكفين يحجون گبال الصيدلية بسرعة ركضت ختلت ورا دنگة جانت قريبة على السيارة صرت الطم بصمت حتى عيوني امتلن دموع وصارن يحرگني كلمة وحدة من حكمة كلشي ينكشف

اسمعه يگللها

باتر: اوفف ماتدرين شگد مشتاقلج حكومتي

حكمة: غدي تشتاقلك سليمة التطمك

باتر: ههههه ليش تفرقين ليش شو حبيب گلبج مگعدته ببيتج

حكمة: ما ميته عليه مخليته حارس حاله حال الچلاب وهذاك الثاني حتى رقمة مسويتلة بلوك

تجاهل كلامها وسألها

باتر: ماگلتيلي ليش هنا اليوم

غمضت عيوني حييل عبالي راح تنطق اسمي

حكمة: جاية اشتري علاج من وراكم ماخليتوا مرض ماصار بيه هي هاي امجازاتي ميل من وجهي ماريد اشوفكم سربتيه

اباوع عليه ضحك باس رأسها گوه وراح صعد بسيارته وبقى گاعد بيها رجعت ركض للصيدلية

ميعاد: ها ريم رجعتي ناسيتي شي

رميم: لا ميعاد فدوه ماعدكم باب خلفي يطلع الغير شارع

باوعتلي بستغراب بس ما سألت ليش

ميعاد: ايي عدنا تعاي وراي

رحت وراها دخلت بمثل المخزن وبي باب جان مقفول فتحته الي سلمت عليها وطلعت اتنفس بصعوبة من الخوف طلعت نقالي واتصلت بحكمة دليتها على المكان بقت تحجي عليه الطريق كله لان طلعت من غير شارع وانا صايرة خشبه من الخوف

الحدما وصلنا البيت واتصلت بي اول مجاوبني گال

باتر: شگد انتظرت ردت اشوفج ولو من بعيد وما شفتج وين وليتي

تنفست براحة وحجيت

رميم: لا مارحنا للصيدلية اجلت الموعد على باجر لان البنت مشغولة وانا وامي مرينا على بيت خالتي وهسه رجعنا منهم

باتر: الحية ليش ما گلتي

رميم: لا تغير الموضوع واحجيلي ليش تحجي ويا طيف واحنا شنو اتفقنا

باتر: بس اريد اعرف ليش لحيتي بالموضوع وزعلتي

رميم: لا ليش حتى الح وازعل براحتك اذا تريد علاقتنا تخرب كيفك

باتر: اويلي على علاقتنا من تكولين هيج بودي ابوسج بحلگج

تجاهلت كلامة وحجيت بعصبيه
رميم: هسه المهم اذا تبقى تحجي وياها بعد ماريد تحجي وياي وخاف عبالك تضم عليه انت تعرف انا ماينضم عليه شي وكلشي اعرف

باتر: غير مسمومة طبعًا كلشي تعرفين

رميم: بالضبط وانت بكيفك بعد روح گلبي

ضحك بصوت عالي وحجه

باتر: وسيراميك مكة راح اسويلها بلوك اهم شي ماتزعلين وتضوجين

حجيت بضوجة
رميم: باتر

باتر: روح گلبه الباتر گليلي شتردين يجرالج

گلبت شعري وحجيت

رميم: هيج تحبني ؟

باتر: مدمن تفاصيلج انا

رميم: لازم اروح هاي اختي تصيحلي

باتر: ايي شردي ميخالف

غلقته منه ورى ثواني وصلني مسج منه كاتب

" خل يكثر عنادج بعد تاليتج تحبيني "

مرت الايام وانا افكر شلون ابعد طيف منه رغم هو حلفلي سوالها بلوك ومايحجي وياها بعد بس انا بقيت خايفة من هذا الموضوع وخاصة طيف ماعرف شبيها متغيرة وحتى صرت من اطلب منها شي الف حجه تخلي ....

❛❛❛❛

وتر"

فزيت من النوم على صوت طبطبة برا الغرفة باوعت الغرفة ضوها قليل باوعت للساعة صغيرة على الميز الي بصفي الوقت بـ 2:00 نص الليل رفعت روحي اجر بخطواتي مسطورة ودايخة من البجي والرعب العايشته هنا

طلعت من الغرفة شفته صار مقابيلي بنص الصالة نازع تيشيرته وباقي بس بالبجامة جسمة الرياضي بارزة تفاصيلة وگدامة لوحة كبيرة وگاعد يرسم نفس الرسمة المزقتها

تفاجأت من شفتها يعني اذا انا گباله هو شكو يرجع يرسمها

باوع عليه جنت واكفة بباب الغرفة حجه

دائب: صح النوم قلوب

مسحت على وجهي عفته وفتت اريد ادخل للحمام حجه

دائب: مرة الثانية اذا تجاهلتيني اطيح صبغج ادبسيز

ويا كل كلمة يگولها احس بالخوف يتملك گلبي دخلت وقفلت الباب عليه بقيت فوك النص ساعة انا بالحمام گاعدة وابجي ماعرف وين اروح واريد اخذ المفاتيح ماگدر صار ايام ادور طريقة حتى اخذهن منه

فتحت الباب وطلعت شفته مدري وين رايح ماكو اتقربت يم الوحة بتردد هالمرة راسمها بدقة واحتراف اكثر البنت كلش تشبهني احتاريت هو راسمني انا لو وحده غيري مديت ايدي على الرسمة ماحسيت غير نسحبت من خصري حضني من ورى مخلي راسه برگبتي ياخذ نفس ويحجي

دائب: اذا خربتيها هالمرة اخرب عمرج بنيتي

تحركت بنزعاج وحجيت بصعوبة يطلع صوتي

وتر: عوفني

دائب: ليش ترجفين

وتر: لان اخاف منك وماريد تلزمني وخر

دائب: مو انا بعبع

وتر: حتى البعبع ارحم

وخر شعري على صفحة على كيفه وهمس بأذني

دائب: وانا قررت اليوم تنامين بحضيني

دفعتة وانا احجي بدموع

وتر: لا فدوه الله يخليك ماريد ماريد عوفني

دائب: اشش ماكو ماريد تعاي

راد يسحبني ماقبلت تخبلت صرت ادفر بي واصيح حتى يعوفني ماكو مايسمعني جرني عليه حيل وشالني على كتفه دخلني الغرفته

وتر: شبيكككك انت تخبلتتتت مو كلت مالمسج مو كلتتتت

دائب: هو اليشوفج اربعة وعشرين ساعة گدامة حتى اذا جان گلبه حديد يلين

شمرني على الجرباية يحجي

دائب: لا تخافين بنيتي لازم تتعودين على هذا الوضع بعد ماكو نوم الوحدج

ردت اگوم سحبني من رجلي وصار فوگي كمت اصرخ بكل صوتي تهسترت وهو ولا مهتم يبوس بخدي ويحجي

دائب: كافي بابا ماسويلج شي بس تنامين بحضني

وتر: ماريد ماريد عوفني حقير

اول ماحجيت هيج ماحسيت غير براشدي قوي سطرني بي سطر زدت بالبجي والصياح سد حلگي يحجي

دائب: اذا ماسكتي تنربطين وتر خليني محترمج وصيري حبابه

اريد بس اگوم ماكو تهسترت ومن الخوف حتى صوتي صار مايطلع لزم اديناتي خلاهم فوگ راسي والتهم شفيفي طريقته حتى يسكتني لعبت نفسي وانتبهت عليه كل ما اقاوم يزيد ويتمادى اكثر

گوه عليه هديت روحي وسكنت ابتعد مني مسح على شفتي وهمس

دائب: ماريد اوخر منهن بس صرتي عاقله تجبريني اجر عدل وياج

درت وجهي منه بخوف ماگدر اباوع عليه وخاصة الضوء خافت احسه وحش مو ادمي مثلنا نزل نفسة المستواي اخذني الحضنه وحجه

دائب: كل ماتصيرين حبابه الج يمي مكافأة بنيتي الحلوة

باسني بخدي وبوساته نزلت الرگبتي اريد اثور واقاومة بس خايفة من ردات افعالة الماتنحزر وخايفة استفز الوحش البداخلة غمضت عيوني ادعي ربي يحفظني منه حتى وانا بين اديه

رفع رأسه خله ايده جوا راسي وسحب الشرشف غطانا ثنينا حضني حيل يهمس

دائب: غمضي عيونج ونامي يلا

غمضت عيوني حيل ماعندي غير حل حتى اتخلص منه ومن حركاته المقززه درت من عنده للصفحة الثانية

وبقيت على هاي الحالة الحدما حسيته نام وجسمه ثگل فوگي بصعوبة طلعت اديناتي وسحبت روحي منه وگمت طلعت من الغرفة بسرعة ركضت للمطبخ فتحت المي اغسل بوجهي بحرگه وابجي شفايفي هلگد ما مسحتهن حسيتهن تزلغن وصارن يوجعني

شيخلصني من هذا الوحش ياربي انت اعرف بحالي بعد ماگدر اتحمل ماگدر ... احجي وابجي وامسح بحلگي تعبت من البجي غسلت وجهي الاخر مره وردت اطلع من المطبخ عيني صارت على المفاتيح مال البيت ناسيهن على الكاونتر

وسعت عيوني بفرحة وحسيتها اشارة من رب العالمين يساعدني بيها حتى اطلع اتذكرت الباب الي شفته جوا الدرج اخذت المفاتيح ورحت اتسحب بخطواتي على كيفي وكلبي يريد يطلع من الخوف

رفعت البرده ودخلت جوا الدرج بقيت اجرب بالمفاتيح بسرعة بسرعة واحس بروحي اريد اتخربط هالگد ما گلبي تعب من الخوف والرجف جربت كذا مفتاح الحدما فتح وياي وكدرت افتحه مديت راسي باوعت المكان يخوف ظلام دامس مستحيل اگدر اطلع هسه رجعت سديته وقررت بالنهار ورى مايطلع اطلع انا هم

رجعت قفلته واخذت المفتاح ضميته بالمخبأ السري ورجعت المفاتيح للمطبخ اول ماطلعت جفلت من شفته گبالي عگد حواجبه وحجه

دائب: وين جنتي

بلعت ريگ بخوف ماعرفت شسوي اتقدمت عليه لزمته من ايده وحجيت بخوف

وتر: هنا جنت اشرب مي عطشت

باوع على لزمة ايدي وحجه

دائب: متأكدة تشربين مي

وتر: ايي خلي نرجع ننام نعست

دائب: شبيج بابا مصخنه

وتر: لا بس انت مو كلت من تصيرين حبابه وياي اصير حباب وياج

دائب: ايي

وتر: اي وانا قررت اسمع كلامك من اليوم الحد ما تثبتلي صحة كلامك الحجيته الي بس بشرط

رفع راسي بأطراف صابيعة يباوع بوجهي يتفحصني او يقراني ماكدرت اباوع عليه ملامحة ترعبني حجه بهمس

دائب: كملي

وتر: انام بالغرفة الثانية من تثبتلي كلامك صح وتشوفني دليل بساعتها انا كلي الك

بقى ساكت عضيت على شفتي بخوف وحجيت

وتر: متفقين

دائب: يجرالج بي لا تلعبين وياي لان العواقب وخيمة بنيتي

هزيت براسي وعفته ورحت دخلت للغرفة ركض قفلتها عليه افكر بالامل الي صار عندي للخروج منا ......

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

Insta:zainab__.ali1

متابعة ممتعة🦋