تاروت الفصل السادس وخمسون 56 - بقلم زينب علي

#تاروت

البارت «54» والأخير

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

من آخر شلونك وآنه مشتآك
ومن آخر لقآء لـ هسه بردآن
ومن آخر (حبيبي) وغربتي تفوح
ومن آول ليلة بعدك عمري خلصآن
تمنيتك هوى بـ فجريتي تنضآك !
ويمُر بيه الخريف ويآك بستآن !!

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

يمان"

حسيت بصوت حواليه وانتقلت من السجن الى غير مكان اجاني مثل صدى صوت يردد

بابا بابا

فتحت عيوني واتلفتت ادور مصدر الصوت ونفسي يلهث شفت حمامة بيضة حطت على ايدي واباوع ماشفتها حمامة صارت طفلة يطلع عمري 3 سنوات گلبي نغزني

يمان: البخت ؟

تقربت يمي گعدت وحطت ايديها على خدي تسولف وياي

البخت: بابا حبيبي اشتاقيتلك راح اكون وياك انا

يمان: باباتي البخت وينچ ليش رحتي

مسحت على وجهي تردد
البخت: بابا السيدة فاطمة الزهراء هي اجت واخذتني وحتى شوف هذيچ هي

گالتها وتأشر على مكان اشوف بي ملامح بشر بس ما اگدر اشوفه مجرد خيال

يمان: بختي ابقي يمي لا ترحين انا تعبان بدونچ

باست عيوني
البخت: بابا انا يمك دائمًا انا موجودة بكل وقت حواليك بس غمض عيونك تشوفني صرت يمك و

شفتها رگضت على شخص ولزمت ايده

ودخلت بمجلس باوعت مكتوب اسمه مجلس الطيبات وكفت بالباب وچان تدور عليه تصيح

البخت: انا بمجلس السيدة فاطمة زهراء هسه راح تمسح على گلبك

فزيت من حلمي مفزوع والرهبة كاتلتني گمت اردد بصلاة على النبي اجه يمي باتر لزمني يحچي

باتر: شبيك يمان شكو ترجف ليش هيچ حالك

درت بأنظاري شفت دائب متقزز وما طايق روحه وهذا أكبر عذاب الدائب احس گلبي عصرني اجه گعد يمنا

دائب: صدگ شبيك باع حالك عبالك جنت بحرب

يمان :احس بنسمة باردة بصدري ماعرف شبيه بس احس برهبة وشي بارد بصدري

دائب :خاف اخذت برد اغطيك ؟

يمان: البرد مو البرد الي بالكم نسمة باردة هدأت كل الم بروحي واحس البخت جاي تفتر حواليه جاي اشم ريحتها الحلوة ويا انفاسي

باتر: يمان ترى طفلة شبيك هلگد تعلقت بيها صرت اخاف عليك تدري يعني انا جهالي سنة وراح يصيرون سنة ونص ومو هيچ

يمان: هذا اختبار رب العالمين ان اتعلق بطفلتي وتروح راح يختبر صبري وايماني وانا صابر الحكم وقضاء رب العالمين

گمت أريد أصلي لان عندي يقين تام كل انواع الحب بيها نوع من الوجع إلا حب رب العالمين مستحيل تتأذى بحبه والتقرب إليه

بدأت أصلي وأكبر وماعرف شكد جاي أصلي الي اعرفة اصلي اربع ركع واسلم واحس روحي تريد الصلاة بعد تريد تبقى بين ايادي رب العالمين

لحد ما حسيت برجلي صار بيها تشنج وگعدت حسيت روحي سكنت ضليت اردد الأذكار الي حافظها والقرآن الي حفظته بهاي الفترة تقريبًا حفظت جزئين صح فترة قصيرة وماگدرت احفظ اكثر لكن سويت الاگدر عليه

چان بالسجن اكو مثل الفتحة الي فوگ اباوع حمامة بيضة وگفت عليها عرفتها البخت هاي بختي اجت نفس الحمامة الي بالحلم صفنت على عظمة وجبر رب العالمين حتى وانا بين قضبان السجن يدزلي رحمتة الوسعت كل شيء حسيت نفسي بعالم ثاني سرحت بشعور حب رب العالمين للعبد التواب

نزلت راسي شفت اخواني ناموا واسمع الحمامة تطلع صوت خفيف وكأنها جاي تحچي فد شي

يمان: ها يانضر عيني ها ام ابوها روحج الحلوة اجت الابوها

اباوع الها دور براسها
يمان: ياريت اعيش عمري كله بالسجن وتبقى روحچ البيضة گبالي يا محلى السجن والبخت يمي واحچي وياها

رحت تمددت على مكاني مر جم يوم وانا بعالم ثاني ويا رب العالمين وعبادتي وصيت علي بمعارفه وواساطته يطبب الي قرآن وجان قرآن صغير بس يفي بالغرض

من شفته جايبه بدون شعور حضنته حيل حسيت جابلي بر الأمان الي راح انتقل بي الغير عالم حسيت نفسي مأمن على روحي وبيتي ورزقي وعائلتي وراح أبقى بس انا والبخت وحدنا

وهيچ عشت بغيبوبة عبادة واحلى غيبوبة بحياتي الحد ما وعيت على أفكاري إحنا گبال القاضي وانصدمت من شفت فرات وخيال ثنينهم لازمين القضية احس الدم وكف براسي كتلها ما طبين وماتجين بس اخخخ اباوع عيونها تتوسلني ان ماگدرت تتركني

خفت خاف بشطارتهم ينزلون الحكم وما ناخذ حقنا الكامل ماردتهم يلزمون همَ القضية اعرف اثنينهم عواطفهم راح تجرفهم

بقيت اباوع الهم شلون مخبصوين وخايف خايف اخاف انحكم أقل من حقي ورب العالمين يحاسبني بهاي الجم يوم بالآخرة شلت راسي وماعرف شنو السبب الخلاني ارفع عيني على شباج قاعة المحكمة وهل مره شفت حمامتين بيض وثنينهن يباوعن الداخل القاعة

ضليت ارد

اللهم لا سهل الا ما جعلته سهلا وان شئت جعلت الحزن سهلا

اللهم انك عفو تحب العفو فاعفو عنا

واردد بصلاة على محمد وال محمد

وبعد كلام وخيال وفرات اشوفهم منين ما يطلع القاضي يطلعون اله افتخرت بمرتي والفخر ملا عيني وانا اشوفها شلون ذكية واثقة وقوية وصوتها قوي وجهوري وما اهتزت برغم انا رجلها وذول خوانها بس كل شوي تردد انا حريصة انهم ياخذون جزائهم العادل بس انا گلبي يم اخوتي تذكرت حچي ويا أبو دائب

عزيز: يمان شلون تشيل القضية وحدك وتريد تسوي إخوانك مجرد متسترين ؟!

يمان: انتَ ليش مجاي تفهمني همَ فعلًا متسترين وكلشي انا سويته وبأسمي مجاي اساعدهم لكن هذا الواقع

عزيز: صح بس متأكد ؟!

يمان: متأكد مليون بالمية

عزيز: بهاي الحالة راح يثگل عليك الحكم

يمان: المهم إخواني يطلعون

عزيز: باتر كلي نفس الكلام وگعد نفس هاي الگعدة
ودائب نفس الكلام ونفس الگعدة شنو الي زرعته بيكم أمكم بحيث تفدون بعضكم بروحكم بس فهمني ؟

يمان: زرعت بينا اذا اخوك طاح انت تطيح قبله وإذا النفس شح من صدره شيل النفس البصدرك وانطي اله واذا برد أخوك اشعل روحك بنار ودفي وإذا جاع اخوك اكطع من روحك وخلي يشبع

الي بينا رابطة روحيه فازت على رابطة الدم احنا روح وحدة ب ثلاث أجساد

عزيز: ربي يحفظكم ويديم خوتكم لو جان دائب متربي وياي ما راح يحصل سند مثلكم

يمان: أمين على العموم متفقين ومالك علاقة بحچيهم شيلني انا لان بالأساس كلها انا بأسمي الأوراق وكلشي

عزيز: هاي هي متفقين

انتبهت الصوت القاضي

وهو يگول الحكم

بهاي الأثناء رفعات عيني على الشباج شفت حمامتين يرفعون جناحتهم ويسدوها بتسمت الهم

غمضت عيوني وانا استمع حتى اذا إعدام انا متقبل حكمي مهما كان ...

خيال ...

طول الطريق للمحكمة اتذكر حچايته

يمان: راح ازعل منچ هواي اذا استلمتي القضية انتهى النقاش

فزيت على صوت فرات الي طول هاي الفترة هو ما رفع عينه عليه استغربت على شنو من علاقه بينه وبين الولد بحيث لهل درجة ما يرفع عينه ابد ابد حتى من يحچي وياي وهم شفته متغير ومتأثر حيل على حبس يمان والولد شكلة تعبان كلش وگوه تطلع الكلمة منه

فرات: أم شهم مابقى شي راح نوصل متأكدة تدخلين وياي وترافعين ؟

خيال: أكيد واهم شي مثل ما ذكرتنا مراح نساعد بنخفيف الحكم او اي شي فقط راح نحچي بالقانون وننطي كل الأدلة والقاضي يبقى شنو مايگول هاي هي حسب كلام يمان ادري بي حتى اذا تخفف عليه الحكم بمساعدتنا راح يبقى ياكل بروحه الآخر عمره

فرات: هاي هي الله يقدم الي بي الخير

انتبهت على ايد علي شايل بيها كتابين صغار

خيال: علي شنو هذا الي بيدك

علي: كتب يمان وصاني عليها مال أذكار وتسبيحات وهاي الأمور

صفنت على كلام علي شنو جاي يفكر يمان بحيث يريد هيچ اشياء بالسجن طلعت من صفنتي على فرات

فرات: وصلنا ام شهم ها ننزل

خيال: اي اي ننزل يالله

اباوع العلي وفرات شكد خايفين عبالك اخوانهم الجوه بحيث اباوع علي ايده ترجف فرات من گد ما مختنك كل شوي يرفع راسه ويعصر عينه ويردد

ربي استودعتك اخواني ربي خفف عليهم

علي يحجي ويا كل الضباط الموجودين ويستفسر گلبوا المحكمة گلب اباوع حتى صديقهم ابو بغداد الي رحنا يمه من طلعنا الاربيل موجودين ويا رجال وعلى جتفة رتبة كلش كبيرة استغربت الرهبان منيلهم هاي العلاقات كلها وحسيت شگد رب العالمين يحبهم بحيث كل هذول جايين علمودهم

صديقهم الي ببغداد وياي وياي حتى گلي ترحون وياي البغداد لحد ما يطلع ابو شهم حسيت نسمة باردة استقرت بصدري وانا اشوف كل هاي الناس موجودة علمود الرهبان رغم كلشي جانوا يساعدون غيرهم والناس تحبهم

دخلت شفتهم دائب وباتر تعبانين كلش بس يمان عبالك جان بمكان مليان راحة بحيث وجهه منور الى درجة ومبتسم طول الوقت واباوع عيونه على الشباك التفتت اباوع انا هم شفت حمامتين بيض واكفات وهو عيونه عليهن

بدأت المرافعه واحس نفسي جاي احارب بكل قوتي صح ماريد يطلعون وأريد يتحاسبون وياخذون حقهم وجزائهم العادل والجزائهم بالنسبة الي هو البراءة محد يعرفهم ويعرف گلبهم وطيبتهم گدنا نملة مايأذون

وعيون دائب وباتر عل اخوهم وما شفت اي نظرة خوف بعيونهم واحسهم بس يردون ياخذون حكم

اتذكرت كلام عزيز من گال
عزيز : باتر ودائب متسترين اخذت منهم اقول على انهم يعترفون بجريمة التهريب صارت قبل عشر سنوات يعني هما هسه بعتبار بس متسترين وهذا بطلب من يمان طبعًا

خيال: ليش ليشش يمان هيچ سوه وانت

عزيز: لان همَ راحوا وقدموا اقوالهم ان همَ قدموا بلاغ على هيچ حالة وراح يتاحسبون فقط انهم ما حجوا طول هاي العشر سنوات الحكم الطبيعي حسب القاضي يمكن 5 سنوات او اكثر اذا ما حجوا بس لان حجوا اعتقد راح يتخفف بعد تبقى يم القاضي اذا جان رحيم يتخفف ويطلعون وحسب الجرائم المرت عليه

گلت وانا ارجف
خيال: شلون قبلوا هيچ يسوون

عزيز: هم مايعرفون ان اعترفوا على يمان حسبوا انا راح اشيلهم القضية اخذت منهم اقوالهم والا مستحيل يعترفون على يمان

خيال: بهالحالة يمان راح ينحكم مؤبد

عزيز: حسب ما شفت البضاعة الي جايبها هي مو اسلحة هي جليكانات بارود والاسلحة وين والبارود وين اكيد الحكم يختلف عليه ولان ما راحت الجهه ارهابية وراحت العشائر وهاي العشائر ما سبق وصار بينها وبين اي عشيرة نزاع عشائري يعني الأمور طيبة بس المهم ان التهريب مو اسلحة جان بالاضافه يمان ما يعتبر مهرب يمان يعتبر مساعد ساعد بتهريب او تستر مو هو الي هرب والبضاعة ما نزلت على الرصيف مالته نزلت بالمستودع مالته الاضافة الى المساعدة الي قدمها للدولة بتسليم خمس خارجين عن القانون بالبصرة والكفالة وحسن السيرة خلال هالعشر سنوات وغيرها من الأمور الي راح تخفف الحكم عليه بشكل كبير

رجعت الواقعي وخابت آمالي من شفت القاضي شكد معصب ومتشدد گلت يجوز كل واحد راح يشيل 15 سنه وأكثر لكن تفاجأت من گال القاضي نسمع اقوال الشاهد بسرعة التفتت اباوع وراي شفت زينة واگفة ولابسه نظارات وواكفين يمها مرا ورجال متوسطين بالعمر فتحت عيوني حيل وهي اتقدمت وگفت گبال القاضي قدمت ملف وبعدها قسمت ان تحچي الحقيقة

القاضي: تفضلي بابا عرفي على نفسچ وگولي شنو علاقتچ بالقضية

زينه: أنا ابنة المحكوم عليه الشاهين أبوي محكوم عليه إعدام بالسجن بتهمة قتل ومواضيع اخرى كلها خارجة عن القانون وهاي الأوراق لگيتها ببيتنا توضح أن المتهمين يمان وباتر ودائب مالهم علاقة بتنزيل البضاعع ومثل ما وضح يمك سيادة القاضي التوقيع والاسم كله بأسم الشاهين وأن يمان وباتر ودائب جانوا مجرد متسترين على جريمة وليس همَ الي هربوا لان حتى اذا تلاحظ يمك اكو محادثات توضح ان هو الي جاي يهرب مو هم وحتى انا سمعته يحچي ويهددهم وهمَ مجرد تستروا على الفعل الي سواه الشاهين وتوضح ان اي بضاعة غير براميل البارود ما تنزلة وانهم ما نقلوا اي اسلحة او مواد ممنوعة بالإضافة مثل ما واضح يمك بالمحادثات الي بين والدي واحد العصابات الي تم القبض عليهم بفضل يمان وخوانة ذاكر أن الرهبان وهذا لقبهم حتى مواد تالفه او منتهية الصلاحية ما نازل برصيفهم بالعكس كل شغلهم قانوني عدا قبل عشر سنوات تستروا على جريمة تهريب براميل البارود الي هربه الشاهين المحكوم عليه بالاعدام

اشوف القاضي باوع على اوراقنا وعلى اوراق زينة والي بصفه ضل يتناقشون تقريبًا خمس دقايق توتر يقرأ الف مصدومة بزينة شلون اجت وجابت هاي المعلومات كلها رغم هذا كله اشوف القاضي وجهه مابي ذرة رحمة

أجه وقت الحكم وكل احنا وكفنا بقيت اردد بوجهه

﴿وَجَعَلْنَا مِن بَيْنِ أَيْدِيهِمْ سَدًّا وَمِنْ خَلْفِهِمْ سَدًّا فَأَغْشَيْنَاهُمْ فَهُمْ لَا يُبْصِرُونَ﴾ سديت ايدي قريت قل هل هو الله احد ثلاثة مرات وفتحتها بوجه القاضي جانت امي تسويها من تريد تسكت أحد

رفعت راسي اباوع الحمامتين صاروا يرفرفون

رددت ( يا لطيف يالطيف الطف بيه )

غمضت عيوني استمع الحكم القاضي هو يحچي
القاضي: حكمت المحكمة حضوريًا على المتهم يمان صمد بالسجن لمدة سنتين مع الأعمال الشاقة كذلك حكمت المحكمة حضوريًا على المتهم باتر صمد بالسجن لمدة سنة كاملة مع اعمال شاقه
كما حكمت المحكمة حضوريًا على المتهم دائب شهاب الدين بالسجن لمده سنة مع الأعمال شاقة

جريت نفس الحمد لله الحمد لله توقعتهم مؤبد خاصة هذا القاضي اعرفة كلش زين ايده والأعدام والمؤبد اقل شي اذا صار رحيم يرگع الواحد بـ 15 سنة ماعرف شنو صاح بأذنه من صوت ونطاهم بس سنه وسنتين بس فعلًا هما مجرد متسترين وهذا حكم القانون واحنا ما خفينا ولا شي ولا حورنا اي شي بالعكس احنا قدمنا كلشي وخلينا الباقي على رب العالمين

والحمد لله صح صعبة هواي سنتين وسنة بس ميخالف الحمد لله لكن اكو غصة بداخلي على يمان واخواني نحرمت من ضرغام ماريد انحرم من باتر ودائب والله بمقام ضرغام واعز بس شنسوي سنة تمشي شلون ما كان

طلعت وشفت زينة بس شافتني اجت وحضنتني بادلتها الحضن ومسحت على رأسها احچي

خيال: زينة شرجعچ وليش هيچ سويتي

زينه: ماگدرت والله ماگدرت أدور ظهري الطيبتكم وياي ماگدرت اعض ايد امي حكمة الي سهرت علي وعلى دراستي وعلى مرضي انتم ما تتجازون لو اذب روحي گدامكم على الموت احتويتني وعمركم ما حسستوني انا غريبة لو ثقيلة عليكم بالعكس حسستوني وحدة منكم ورغم كلشي سويته محد هاني لو قلل مني مستحيل انسى أبوي يمان يمان مو شخص عادي يمان أب الي واضل طول عمري اعتبره أب الي ماكو منه وبحنانه مستحيل أنسى انا عاضة ايدهم الي نمدت المساعدتي دائمًا اتذكر شلون دخلني للمطار وكلي كلامة المحفور بذاكرتي حفر

يمان: بابا زينة كلنا نغلط ومحد معصوم المهم راح تبدين حياة جديد كوني قريبة من رب العالمين واهتمي بنفسچ وبدراستچ وتركي كلشي الماضي ورا ظهرج وانا ابوج وسند وعون الچ الي يرشچ بماي ارشه بدم بس يصير وياچ شي مكالمة وحده تلگيني يمچ شنو ماتحتاجين فلوس شغل بس گولي گبل احول الچ لا تتوقعين ماعندچ احد احنا كلنا بظهرج وانتِ بنتنا ولو شنو ماتسوين محد يضوچ من بنته وفراگچ صعب تعودنا عليچ بيناتنا بنيتي ديري بالچ على نفسچ ورقمي يمچ ورگبتي سداده بنيتي وحط بيدي ظرف بي فلوس وأنا بحياتي محد مسويها الي

وطول هاي المدة يسألني اذا خالتي زينة اذا رجل خالتي يسويلي شي ودائما يگلي خاف بيج شي ماعرفت ادور ظهري الهذا كله واتركه خيال ماكدرت

خيال: حبيبتي وانا امچ السويتي ماراح ننساه كلنا شنو ماتردين انا موجودة يمان بالسجن وانا هنا ونفس ماگلج يمان اي شي تردي بس اتصلي عليه وتلكيني يمچ واضمچ بروحي حبيبتي ميخالف انتِ عنون وكلنا يصير عدنا لحظة طيش

بست راسها وحضنتها واجت خالتها وسلمت عليه وشگد تشكرت من عدنا لان جانت يمنا وراحوا

راحت وانا گلت العلي
خيال: الي حق اشوف يمان دبروها منا ومنا فدوة علي لازم اشوفه

علي: گعدي هنا وانا هسه ادبرها الج

راحوا هو وفرات بعدها دخلوني حتى اشوفه بس شفته بغرفة تشبهه المكتب والكلبشات بعدهن بأيده أول ما شافني ابتسم وانا گبل ركضت حضنته ابچي

يمان: آخ ياروحي آخ يا هوى الله الترس ريتي شتاگيتلچ ام شهم

خيال: يمان راح اجزع راح اجزع احس مو ستحقاقك يمان راح اموت شلون سنتين اخلصهن بدونك يمان ماكدر ماكدر شلون أربي شهم وحدي شلون

يمان: اشش حرام انتِ هيچ تگولين انتِ مؤمنه بقضاء رب العالمين وبالعكس هذا أقل حكم ممكن انا اخذه حبيبي طول عمرچ صبورة ومؤمنه بحكم رب العالمين حرام الجزع ماريد رب العالمين يحاسبچ بابا شلون تجزعين صلي على محمد واخذي امي والبنات وروحي زوري الائمة راح تهدأ روحچ ولا تشيلين همي بختي يمي وياي بكل وكت انا مو وحدي بالعكس حبيبي تمام

رجعت حضنته اكثر ابچي رفع راسي وهمس
يمان: تمام خليل گلبي

هزيت راسي بقبول صار يمسح بدموعي ويحچي
يمان: خوش يلا ديري بالچ على البيت سُكرتي وشهم الأكبر والكرار بعيونچ ربيهم احسن تربية الجهال لا يجوعون ولا يحتاجون احد خيال لا يعيشون العشته عيشيهم مثل ما عشتي

خيال: لا تشيل هم بعيوني حبيبي والله انت هم دير بالك على نفسك وعلى الولد وانا راح احاول ندخللكم اي شي تحتاجوا ملابس وغيرها من هاي الأمور

عبر ديناته وحضني حيل يشم بيه بحيل صدرة ويهمس
يمان: ماشبعت منچ راح اشتاگ الهذا العطر الحلو فزة گلبي

خيال: وانا راح أشتاقلك هوايي كلشش وابنا هم

يمان: ديري بالچ عليه وشمي الي حيل ، يلا بنيتي صيري قوية انا هسه لازم اروح

زادت دموعي بالنزول راد يطلع لزمت ايده وگلت
خيال: اخر كلمة قبل لا تروح من زمان اريد اسألها الك

يمان: گول خليل گلبي

خيال: ليش تسميني فزة گلبي

صفن عليه شويه عيونه الحمر تعبانات صارت تتفحص ملامحي بتمعن من بعد ثواني صمت گال كلمة هزتني هز خلت گلبي ينبض كل قوته

يمان: گبلچ كلشي ميت بيه وأول ما شفتچ گلبي فز ورجع ينبض بالحياة

حضنت ايده وصرت ابچي بنحيب باس راسي حيل بعدني منه اخذوا وراحوا ...

خيال رجعت للبيت طبيت لگيتهن لو تذبحيهم ما تلگين قطرة دم بروحهم

بسرعة خالة حكمة اجتني بسرعة وجهة أصفر صاير وحلگها أبيض حقها ولدها كبرتهم ومتعلقة بيهم الدرجة

حكمة: طمنيني گلبي راح يوگف ولدي يطلعون لو مؤبد لو إعدام

حضنتها وگعدتها
خيال: اهدي حبيبتي الحمد لله دائب وباتر نحكموا سنه ويمان نحكم سنتين

حكمه بشهكة
حكمة: ليش سنين شيصبرني بدونهم سنين شيكضيها خيال ما تگدرين سويها شهور يمه ولدي سنين بسجن يمه ولكم ربيتهم بدمع عيني اشوف الدنيا بضحكتهم خيال بروح ذاك الاب الطيب

گلت وانا احاول اهديها
خيال: اهدي حبيبي الحمد لله سنة وسنتين ولا مؤبد لو إعدام لو تعرفين القاضي الي عليهم شكد مشيولة الرحمة من گلبه أقل شي يحكمة 15 الكل مصدوم شلون طلعهم بسنتين

حكمة: الحمد لله ربي الحمد لله ماقصرت فدوة الاسمك يا ربي ما خيبت ضني الحمد لله والشكر ربي رحمتك اخ يايمة گليلي اكلهم نومتهم شربهم شلون بيه

خيال: كلهم ابو دائب وعلي بس هما رفضوا گالوا يردون ياخذون عقابهم بحذافيره مايردون اي مساعدة او اي وسائل راحة بالعكس هما يردون التعب حتى ضميرهم ما يظل يأنبنهم وخاصة بعد التحقيق ويا العشائر الي راحت الها البارود طلعت اصلا البارود فاشل واتالف اغلبه وهمَ ما مستخدمي ابد سبحان الله تحسي كلشي يمشي مثل مانريد الله يسخر النا ناس مااعرف منين يعني وين ما نجي رب العالمين يسخر الناس تساعدنا المحكمة نگلبت گلب نملت ضباط ومحامين وأشخاص عدهم نفوذ كلها تكول الرهبان ما يستاهلون وكلها تگول ان شاء الله ما ينحكمون هواي ابو علي گلهم ادفع فلوس واسويلهم اقامة جبريه بس الرهبان ما قبلوا اصروا على السجن يگله شنو اقامة جبريه واطلع واطب واتونس وين عقابي اذا هيچ

حكمة: بعد روحي روحهم هم اكو واحد ما واگفين ويا

خيال: حتى خطية صديقهم الي رحنا عنده يريد يجيچ يقنعچ نروح ويا يگول شلون اعوفكم وحدكم وعلي وفرات وصلوني وراحوا يجيبون ملابسهم ويگعدون هنا بالمشتمل وخطية فرات گلي شنو محتاجين مسواك بس كتبي الي بورقه انا اجيبه

اجوا علي وفرات ورتبنا الهم المشتمل وحطينا بس سراير اصلا رهبان مفكرين وجايبين الهم وسويناه غرفة وهو الاستقبال كلش كبير فا صار مثل السويت صالة وغرفة وكناتيرهم وحطوا مثل الفاصلة مال الملابس حطوها وحكمة توديلهم الغدا وهما اغلب الوقت بره البيت ...

رميم ...

كيفَ لقلبي أنْ يحبَ باترةً كلَ هذا الحبِ كيفَ ستمضي تلكَ الليالي السوداءِ المغلفةِ بهدوءِ مميتٍ دونَ النظرِ إلى عينيكَ التي أغرقَ بلونها القهوائي

دخلت للغرفة وشفت الأكبر جار اخو من بلوزته وهذا جاعص خد اخو وصايرين امالخ

رميم: تو تو تو لا ماما لا ليش اخوك

وخرت ايديهم من بعض
رميم: مايصير يااا شبيكم مجلوبين

حضنتهم ثنينهم يمه يمه ريحة البابا كلها بيكم شيصبرني سنه بدونه اباوع الهم يناغون بابا مستحيل يگولون ماما من بدوا شوي ها تبدي تطلع منهم احرف كله ببا

صارت عيني على الميز الي يم راسي صورتي انا بايسته من خده وهو حاضني راح فكري الذاك اليوم وسرحت بي

باتر: ريماي

رميم: همم

باتر: روحي الي راح يوديچ المكان يجنن ورومانسي شسويلة

درت عليه وابوس بي
رميم: انطي روحي وعيوني بتاري

باتر: اوف اوف شگد احبك باعي هاي العلاكة لبسي الي بيها ونزلي الي جوه خوش ؟

رميم: تمام حياتي

بسته وگمت طبيت وسبحت على سريع وايد على المقشر وايد على فرجة الاسنان بس اريد الحك طلعت رشيت عطوري وخاصه العطر الي يحبة هو

وحطيت كالعادة ميكب اسود وجريت ايلاينر طويل وسويت مقدمة عيني بحيث عيني طلعت كلش حادة وحطيت حمرا نود وكسرتها بشوي لون وردي بداخل الحلك لان بيضة ونود اطلع عبالك مريضة اكسرها شوي بوردي بداخل الشفايف مو على الاطراف ومايقبل احط عدسات يحب لون عيوني الاسود

طلعت اول ما شافني صفر وهو جان يجنن لابس قاط لون اسود وقميص نيلي وانا فستان اسود سمبل وبي خيوط رفيعة كلش وفوكه مثل البشت علمود من نطلع رحنا المكان بيت بمزرعة ويصير على شط وطاولة وأجواء رومانسية الى درجة وهذا الي احبه باتر صاحب كيف ويحب يسوي النفسه والي اجواء برأيه ان هاي الامور ماتسوي برود بالعلاقة

شفته صار وراي وبكل هدوء وبس على ضوء الشموع لزم اديناتي من ناحية الكتف غمضت عيوني همس بأذني

باتر: كيف لعيناك ان تكون حادة وقاسية الى تلك الدرجة والله اقسم ان رأيت سهامًا تخرج منها وتخترق قلبي مت بك عشقًا وحبًا وهوساً ومرضًا

رميم: تناقض رهيب بيني وبينك شلون حبيتك وانت باتر روحي وشلون حبيتني وانا حطام گلبك

باتر: أرواحنا ترابطت رغم عن كلشي مرينا بي جان حبچ الشي الوحيد صح بكل هاي السنين الفاتت ايديچ الباردة مو مثل ايديهم الدافية عيونچ القاسية الي تخفي وراها حب مو مثل نظرة عينهم البريئة احب الاحتيال الي يسكن عيونچ احب عطرچ الي يحبس انفاسي حتى احتفظ بي داخل صدري فترة اطول يختلف عن كل العطور الي يحطونها كل عمري ما اشوف امراة مثالية وجميلة غير امي نرجس وعمري كله اشوف الحنية والتضحية بس عد امي حكمة كل حياتي حبيبتي الاولى نرجس والاخيرة حكمة شلون كدرتي تقنعنيني ان انتِ تجمعين كل الصفات هاي بشخصية وحدة ؟

رخيت راسي على اكتافه

رميم: احبك لدرجة ما افرق الي ينبض بصدري گلبي لو گلبك

حسيت بشي بارد صار على بشرتي گال وهو يحط الخنجر على رگبتي

باتر: شنو الدليل حطامي

رميم بحركه مباغته سبحت السلاح من خصره وحطيتها على على گلبه

رميم: احبك ولا تسألني ما الدليل هل رأيت رصاصة تسأل القتيل ؟

حجه وهو يلوي ايدي ورا ظهري ويحط السلاح على ظهري من جهه كلبي

باتر: تمتلكين مكر مرعب يخليني احسب حساب لكل كلمة اگولها الچ بحياتي ما شفت كيد عظيم مثل كيدچ

ضربته على رجله الحد ما خليته ينحني اخذت السجينه من ايده ورفعت راسه بيها اهمس بحدة

رميم : مجرم بريئ مناور شرس قاتل عشقته بكل جواري

جرني من مقدمة فستاني عليه حيل وانا استقبلته بحضني وقبلته بهدوء

رميم: احبك مجرمي البريئ

باتر: احبچ رميم حطامي

باوعت الايدي الهسه بيها الاسوارة الي لبسها الي قبل لا يرحون يسلمون نفسهم فتحت الدرج وطلعت منه صندوق صغير بي صورنا وكارت صغير هو كاتبلي بي كلام وحرفي فضي وسچينة ومدالية اتذكر مره اخذتها منه بوحده من طلعاتنا

صحيت من صفنتي على الأكبر وهو يصيح بابا ويركص مو ابو دائمًا يشغل اله أغاني ويبقى يركص ويا شلته حضنته اشم بي

رميم: اخ اخ شلون انا بنسخة البتار شلون بيه واحد وراح اموت عليه شلون بيه بثنين نسخة منه ...

وتر ...

دائب حادٍ شرسٍ يخشى أنْ أفرَ منْ بينِ قبضتهِ المحكمةِ وأنا لستُ بفراشة ضالةٍ لمْ يكنْ يعلمُ معذبي أنا فراشتة منذُ نعومةِ أظفاري حتى هذهِ اللحظةِ

دموعي نزلت بغزارة وانا اباوع الملابسه الي معلكة بتعلاكة عطره مالي الغرفة صورنا بكل مكان بس الحمد لله سنه ولا اكثر گمت العب سُكرة الي برغم بعدها عمرها اشهر بس مشيبتني گمت جبت العابها وحطيتها بحضني

وانا جاي العب سُكرة بالالعاب اشوفها لابسه بلوزه خضره ضحكت وتذكرت موقف بالطفولة ابد ما انساه برغم چنت كلش صغيرة بس مترسخ ببالي حتى الكلام

بيوم الدنيا باردة وعدنا سفرة مدرسية ومرام نايمة وقبل بليلة شفت بالباب بوكس بابا نويل بعتقادي ان الي يجيب هاي البوكسات بابا نويل حتى لو بنص السنة المهم بابا نويل

وجانت لبسه تجننن بس انا گلت لا لازم اسوي تنسيق يخلي كل البنات يغارون مني جبت تخته الحمام وحطيتها على لمرايه صار كبالي الجل مال حكيم جبته ومشطت شعري وسويت كرون منا ومنا وجبت الجل وترست راسي ترس واحط جل وامشط الفرك اعوج بس كلي ثقة ولا اهتميت

ورا ما كملت ابعدت اباوع على نفسي بالمراية واحچي

وتر: واو شنو هالجمال وتر باع شعري شلون حلو صار ثابت

ورحت طلعت الي ملابس بلوزه خضره خضار مو طبيعي هيج لونها حشيشي حسيت بروحي ناصبة كمين للخروف

وبنطرون احمر وبي كرستالات بيض وحزام ابيض وجعصت روحي جعص بي والجنطه جانت من بابا نويل ( دائب ) تجننن جانت ماركة مال اطفال تخبل وجان قبلها بيوم صاير عرس وبقت الكولات براسي

وتر: على دلعوني وعلى دلعوني حبيبي راح ودلعوني وشافوني حلو وحبوني على دلعوني وعلى دلعوني

باوعت الوجهي بالمراية عجبني احط مكياج

طبيت على كيف وانا اشوف مرام الشخير مالتها واصل النهاية الشارع حاطة على الميز هاي الدائرية مال الشدو الي صير بيهن لمعة

وانا احچي بداخلي والله راح اطلع اجنن واكسر عليهم كلهم وجبت الحمرا البنفجسي وحطيته على حلكي ومكيجت وحطيت فوك عيني وكله لميع طلعت اجنن

وجان اكو عطر تستخدمه مرام للحمامات ريحته كلش ما طيبه جبته وترست روحي ترس

نزلت وشلت جنطتي وبيها جان خمسين جانت محطوطه ويا الهدوم مال بابا نويل

باوعتلي عبير وگالت
عبير: عزااا ايعع شمسويه بروحج

حچيت بثقة تامة
وتر: اول غيورة انتِ اجنن طالعة اصلا باعي ملابسي اجنن

عبير: جن الجنج ام جليل المخبلة

وتر: ام جليل التاكل راسج امشي خلي نروح مالچ علاقة خاف يرحون ويعوفنا

عبير: ايع امشي

طلعت ستوني مديت راسي وشفت هذا الرجال الي يوكف بالباب گبل خفت كلت خاف يشوفني هيچ حلوة ويخطفني

باوعت العبير چانت لابسه لفاف جريته وغطيت وجهي وراسي ورحنا ركض للمدرسة شفته بسرعة ركب سيارته ورانا يمشي على كيف لحد ما طبينا للمدرسة

وتر: اركضي ولچ اركضي لا يبوگچ جليل

عبير: غبيه شبيچ جيبي لفافي باردة ويا جليل هذا

وتر: ولچ يگولون ام جليل ابنها ياكل الجهال وهي من تشوف وحدة حلوة تبوگها وياكلها جليل وما تشوفيني طالعه شكد حلوة خاف تشوفني وتبوكني

عبير: طبينا جيبي لفافي

جرته وخذته مني وراسي موتني بالحكة من ورا الجل ومن احك شعري يصير مثل لتراب الابيض واشوفهم يضحكون على هدومي وشكلي

رفعت حاجبي احچي
وتر: شنو هاي الغيرة يعني واذا طلعت احلى منهم والله ياربي

تجمعنا اجه وقت نصعد بالباصات

واول ما طلعت شفته هذا الرجال يوكفلي دائمًا لابس رسمي ومن النظافه تحسين بي لمعة وسيارته نقطة تراب ما عليها مجرد ما شافني نزل نضارته وفتح حلكه وعيونة وانا من الخوف گبل صعدت

صعدنا كلنا وصلنا وانا شفته نزل ورانا وابو البوابه ماقبل يدخله وجان اطكها بركضه ونسيت اكو مثل الباب خشب لازم افتحه جيت وگبل دخلت بنصه وجان انركع بي حيل شفته ضرب على كصته وسوه حركه ماكو فايدة

عفته وركضت مجرد طبيت وطلعت خمسة وعشرين ونطيتها للعامل وانطاني بطايق كومة وانا شدراني اجيت ونطيته وما ضلت لعبه خطرة ما لعبتها

ردت اصعد بالسفينة العامل ماخلاني گلي

- وين ادخلچ تگمزين من فوك شكدوتچ وين اصعدچ دروحي روحي لعبي غير شي

وتر: شنو مو بكيفك والله اطب واذا طحت انت شعليك

بعده محاچي نزلت روحي من جوه رجلية واطب ركض واگعد گعدت بين بنات ثنين

البنية الي يمي گالت
- اكلج انتِ صغيرونة توگعين باعي حتى الحديده ما لازمتچ

حچت البنية الي يمي من جهه ثانية

- اي صح توگعين

وتر: لا تخافن عليه ما اوگع

- زين باعي دخلي ايدچ وحطيها بيدنا ونتقرب عليچ حتى خاف شي ما توگعين

سويت مثل ما گالن اباوع عليه من بعيد فتح عيونه من شافني صاعدة بالسفينة وهلگدوتني جني فارة

صحت بكل ثقة اول ما بدأت
وتر: هييي راح اطيررررر هييييييي

من قوت وشفت روحي انشال من الكرسي لو ما البنات لا زمتني يمكن اطير گمت اعيط

وتر: يبوييييييي يا يمةةة يا حبيبةةةةةة ولكممم راح اموتتتتتت لحكونااايييي نزلنييي ولك نزلنيييي

اصرخ ومحتارة بالجنطة لا توگع نزلت وانا اصيح

وتر: ولك تفووو عليكككك نزلتييي جنطتي

واباوع الدائب من بعيد ميت ضحك ويصور بتليفونه وانا خفت بالزايددد

ورا ما خلصنا واخيرا نزلت بكل ثقة وشموخ ولا عبالك صارلي ساعتين طلعت بلاعيمي رحت للعامل احچي

وتر: شفت ما وگعت على عنادك

عفته ومشيت واشوف الاخطبوط وهلا هلا عيد وجابه العباس صعدت ومحد يقبل يصعد وياي بوكتها نقهرت لان ماعندي صديقات وحزت بنفسي بس مااهتميت هواي ظليت راكبه وحدي واباوع البنات كلها ويا صديقاتها الا انا

اجه العامل يريد يسد الحديد جان يباوع بوجهي ويضحك

العامل: هاي شمسويه بروحج

غميته احچي
وتر: گبر

بدأت اللعبة عادي ما مهتمه هي صعدت وضلت دور واشوف روحي انشمر يمين ويسار وكل شوي ينرگع راسي وبنص اللعبة وهي حامية وراسي حكنيي وبس افلت الحديدة انرگع

وتر: يبووو نزلنييي ولك راسي حكنييي راح اموتتتت لحكونااييييي

بس نزلت من الخوف ركضت العبير الي جاي تلعب ويا صديقاتها

وتر: ولچ عبير خلي ناكل جعت

عبير: وتر بعدين نلعب وراها ناكل لان نتقيئ

وتر: خوش

شفت لعبة تسوين اشكال بتراب ورحت وابسط بنص التراب وايدي تراب واحطها على راسي وكاعدة بنص التراب صرت تراب على جل على مادري شنو لعبان نفس شوية و ما اشوف إلا نرجيت من گصيبتي صاح بيه

دائب: هاي شمصخمة بروحچ الحيوانه وينها عنج من طلعتچ هيچ انا مو جبت الج ملابس هاي شلابسه طالعة من المتشردين

احچي وانا ادفع بيده
وتر: وخر ولك وخر تغار مني أدري كلكم تغارون مني لان طالعة احلى وحدة وخر

جرني گومني جان اكو بواري وصنبور ماي گعد ويثبتني برجليناته

فتح شعري وگصيبتي ويحچي

دائب: ايع ولچ الله أكبر شمسويه بروحچ الي يشوف الشكار مال شعرچ ما يكول لاعبة بس طوبه

نزل راسي جوه الصنبور وطاح بي غسل غسل غسل جان يمه علاكه بيها شامبو فرغ على شعري ويغسل بي لحد ما حسيت راسي برد وصار يدخل بي الهوى والحكة راحت رفع راسي كشول وجهة

حط ايده على خشمي
دائب: مخطي

وتر: وين ايع ما امخط

وهو يخزر بيه
دائب: مخطي ولج يلا فضيني

ما جذبت خبر بكل قوتي

دائب اباوع اله رفع راسه ومغمض عيونه مثل الي يتألم وغسل خشمي رفع راسي اشوفه ينظف خشمي وراها غسل وباس خشمي

دائب: افيش يمة شلون حلوة بنيتي

محد علمني ان غلط تخلين شخص يتقرب منچ ومحد علمني مايصير واحد يبوسچ ومايصير واحد يلزمج جايبيني وكأني حيوان يوكلوني ويشربوني حتى بعدين يذبحوني ويستفادون مني الهيج تصرفات دائب من باس خشمي او غسل الي اشوفها مو غلط من جنت طفلة لان كل طفل اهله يعلمونه لا تخلي احد يلزمك محد يبوسك وهواي من النصائح الا انا لا هيچ هاديني مايعرفوني شنو ما شنو بيه

غسل وجهي ونشف طلع مشط ومشط شعري وشده بقراصه وجنت ماخذه لفاف عبير لفني بي ولف ذاني وركبتي

دائب: هدومج شنو هاي يالله

وتر: شبيكم شنو هاي الغيرة كلكم غيرانين من ملابسي

دائب: اي صح بابا الغيرة كاتلتني من الجمال الخارق

طلع من العلاگة چاكيت بعده بعلامته ولبسني يا وگف البنطرون مالتي لان طويل ودخله بداخل البوت وطلع الي عطر ورشه علي فتح جنطتي شافها باقيه بس خمسه وعشرين حط وحده ثانية بجنطتي

دائب: اي هسه صار بيچ روح بابا مو مساع جنچ خراعة خضره

دفعني وگلي
دائب: يلا هسه روحي الله يطيح حظچ

دفعته وغميته
وتر: امداك اذا ما اشكتي عليك

عفته وركضت رجعت العب شفت ابو كشك يبيع ذرة رحت اشتري ذرة جان اوكف يم ابو الكشك وصاعدة متعلكه على شباك واصيح

وتر: عموو

واباوع على هذا يضحك گاعد على الكرسي الي يم الكشك عفته ودرت وجهي واصيح

وتر: ولك عمو جاوبني

مديت اله الفلوس كتله نطيني ذرة واخذته

ماعرف شصار ما وازنت نفسسي وانا انزل طحت وطين وزرع وذره وليمون كله عليه

اباوع اله حط ايده على وجههه ورفع راسه وحط ايده على خدة ويباوع الي بس ولا هتميت بقى من الذرة بالگلاص شفت واگعه الخاشوگة وگمت اكل بيدي واباوع عليه كل شوي يريد يتقيى

خلصت مسحت ايدي بهدومي وكمت اكمل العب

لحد ما گلولونا لعبوا اخير شي راح نرجع

ردت اصعد بديلاب الهوى بس ماقبل يصعدني لان عمري صغير وگعدت على المسطبه ابجي اباوع المعلمات صعدوا ويا طالبات وعافوني وحتى عبير صعدت

وتر: ليش كلهم صعدوا وعافوني وما گلولي اصعد وياهم

احچي وبس دموعي تصب وامسح بيهن هسه ماعندي صديقات لان مايحبوني ولا حتى گلولي تعالي ويانا شبيه والله انا احبهم

شفته نفسه الولد يباوع لي وعيونه تصب دموع اتقرب يحچي

دائب: دموعچ تغسلني وتجفني يموت دائب يلا تبجين اوتار ما عاش الي يكسر بخاطرچ وخشمي يشم الهوى تعاي انا اصعدچ

گمت وانا اضحك وامسح دموعي

وتر: صدك عمو تصعدني فتحت الجنطة ونطيته البطاقة

وتر: هاك هاي بطاقة بس اصعد وياي

شفته شالني وصعدنا گعدني بحضنه اباوع ايده ترجف ويحچي

دائب: وتر ديري بالچ تتحركين من حظني بس تتحركين توگعين ديري بالچ

تحركت اللعبة أنا كل شوي انزل من حظنه واريد اوكف على طرف ويجرني

دائب: ولج شلعتي گلبي كافي گعدي بابا راح توگعين وين انطي وجهي

وتر :شبيك عمر غير اشوف

رفع رأسه يصيح
دائب: صبرني عليها يا اخو زينب

بقينا الحدما وگفت من نزلنا اشترالي شعر بنات وجبس وعصير

دائب: ديري بالچ على نفسچ خوش يلا بابا روحي

ضحكت بوجه وگلت
وتر: باي عمو شكرًا

شلت سُكرة ابوس بيها تبچي

وتر: يبويي شبيچ تبچين وين اعرف شتردين
وين ابوج الي رباني يربيچ

بس شلتها سكتت بوستها احچي
وتر: يمه بنيتي شحلوها نسخة عمها يمهه

تمددت وخليتها بحضني انومها قبل شويه خيال رضعتها وشبعتها

خيال ...

كلنا تقبلنا الموضوع گوة علينا وخلينا ببالنا مثل ما خالة حكمة كالت نعتبرهم مسافرين كلها سنة ويرجعون عفتها جوه تصلي والبنات كل وحدة اخذت جهالها وراحت الغرفتها وانا هم اخذت ابني وصعدت الغرفتي

فرشت الصور الي عندي اباوع عليهم احس دموعي وحده وحده تنزل احتار عليمن ابچي وعليمن افقد

أبوي اخوي امي زوجي بنتي ؟

كم اه بروحي وكم خسارة ما تتعوض كلهم عندي وياهم ذكريات الا

البخت

رغم صغرها بس احس خسارتها بروحي ما تتعوض ماعندي صورة الها مالحكت اصور وياها عندي بس صورة قبرها باوعت عليها ورجعت بيه ذاكرتي اليوم اربعينها يمان ماقبل يسلم نفسه الا تطلع اربعينها ويروحلها يلا

بيومها لازمة ايد يمان وامشي لحد ما وصلت القبرها روحي طلعت

وصلنا وشفته بسرعة مشى بكل لهفة اول ما وصل ضحك

يمان: هلا هلا بنتي هلا يمه اشتاگيتلچ وعلي

مجرد ما حضن قبرها بجه

يمان: اخخ يا يابة اخ وجعچ حنى ظهري كسرتچ ما بعدها كسر باباتي شلون يهون عليه افراكج صعبة حيل صعبة

تقريت منها على كيفي خفت خاف اخوفها واخرب نومتها

حطيت ايدي على كيف

خيال :ها امي ها حبيبتي هيج يهون عليچ بنيتي هيچ تهون عليچ امج تعوفينها هيچ تكسريني ماما ليش ليش ختاريتي الجفن ماما جبتلج بدلات يخبلن ردت اسويج أميرة الگلبي ليش اختاريتي الجفن ماماتي

بست قبرها ورجعت گلت
خيال: خاف زعلتي مني يمة لان لزمتچ شويه وشلت اخوچ ماچنت ادري هاي اخر مرة اشم ريحتچ واتحسس ترافتچ يمة يالبنية بنتي كسرتي امچ رسمتلچ أحلام ومستقبل وحياة ليش دمرتي احلامي البخت بختي ليش دمرتي أحلامي ماما

طلعت من الجنطة بدله بيضة اشتريتها الها

خيال: شوفي ماما شلون حلوة عليچ البدلة راح تطلع ليش ختاريتي الجفن ماما

نزلت راسي على قبرها خليته على اديناتي ابچي واسمع يمان يگول

يمان: البخت ياكسرة سنين عمري

فزيت من سرحتي شهم مسك اصابعي لان جان بحضني حضنته

خيال: ها امي ما هان عليك ابچي يمهه حنية البابا كلها بيك يابعد عيني ونظرها

بعدني جاي احچي ويا شهم سمعت الباب يندگ واجاني صوت وتر فتحت الباب وگالت

وتر: خوخه بيبتچ وجدچ وعمامچ جايين يشوفونكم حكمة تگول خلي تنزل

خيال: ابدل وانزل وراج

شمرتلي بوسة بالهوى وطلعت شلت شهم من حضني وحطيته على الچربايه بدلت ملابسي ومسحت وجهي من الدموع وحطيت شوي تنت ماريد احد يشوفني مكسورة او حزينة بالعكس كلي فخر برجلي واخواني رجعت شلت شهم ونزلت بنزلتي شفت رميم على حباية ونص وجهالها هم باوعتلي وگالت

رميم: جاي يشمتون بينا عمامچ يخسون دخلي واحد يفتح حلگه ويحچي لو يمسنا بكلمة إلا اعبي حلكه رصاص سهلة

خيال: هل مره مراح اگلچ لا بالعكس زيدي وانا وياچ

نزلت قبلي شايلة جهالها ثنينهم واحدنا وواحد منا دخلنا للاستقبال ، شفتهم گاعدين بيبيتي وجدي مبين عليهم تعب الا عمي ضحكته من الأذن للأذن وجهة متفح

اول ما گلنا السلام عليكم گبل بيبي گامت وگالت

صفية: يمه يابعد روحي سوده عليه والله ما يستاهلون وردة مال الله ونعم الولد واخلاق الحمد لله سنه وسنتين ولا اكثر الحمد لله يرجعون الكم سالمين يبعد رويحتي

تحچي وتبوس بينا وبجهالنا وتحضن

خيال: شكرًا حبيبتي لا الحمد لله على الاقل زلم ويعترفون بغلطهم ويتحاسبون بالغلط عدهم خوف الله بس شنحچي على الي يصلي ويصوم وهو سواده وقذارته واصله الرأسه

جدو حضني وسلم عليه بعدها رجع حضن رميم هو متعلق برميم كلش

عدنان: ريمه حبيبتي ريحة الغالي خو ما محتاجة شي بنيتي بس گليلي تردن ترحن وياي گولي جدي ما يردچن بس لسانچن

عبد العزيز: طبعا مجرمين لازم يتحاسبون جا شنو متوقعين يشردون من العدالة

رميم: اسمع وافتح أذنك وياي زلمنا ما تشرد وتتخل ورا النسوان رياجيلنا زلم ونعم منهم ومشهودة الهم بس اويلي على الخناث الي يهددون بنات اخوهم

عبد العزيز: والله يا بنت اخوي على الاقل صايمين مصلين نخاف الله وهذا مو معنى واحد خايف بس على الاقل ناس كافين خيرنا شرنا وعلى الأقل ما معذبين نسوانه بالمحاكم

خيال: الصلاة عدهم عادة مو عبادة والي يخاف الله يعرف بصلة الرحم مو قاطعها والي يعرف الله يكفي الناس خيره وشره مو يسوي المصايب من جوه الجوه ويگول انا ما مسوي واروح للمحاكم بكرامتي ويا ورجال حاميني لو چان بنهاية العالم مو ويا ذكر ذابني بالشارع مايعرف شيصير بيه ما يصير

صفية: اكيد يمه وين اكو من زلمكم كل أسبوع يجيني واحد منهم مسواك كامل النا من غير النغصه بكلشي ويجيبون ويحطون على هالفلوس احسن من ولد بطني الي مايعرفون انا مريضه صاحية ما انسى يمان شلون يفتر بيه من دكتور الدكتور وما خلاني ادفع فلس احمر هو الحال ما محتاج بس نگول هو وين وولد دمنا ولحمنا وين

ظلت تبچي وتمسح بشيلتها وتحچي
صفية: والله ما انسى معروفهم طول حياتي ما انسى من تخربطت شلون رميم تلبسني شيلتي وباتر جوه رجلي يلبسني الشحاطتي وماقبل يگوم الا يلبسنياها

گامت رميم باستها تحچي
رميم: بيبي ماكو معروف انتِ بيبتنا وهذا واجبهم حبيبتي

حكمة: شنهي صفية انتِ هم امهم هم ولدي عون للكل يعرفونه والمايعرفونه مو عاد انتِ ام سليمان

گعدوا شويه وعبد العزيز كل شوية يذب سمه بس رميم ترد الحجاية بعشرة ولا سكتت اله الحد ما راحوا كسفت احواله وخالة حكمة كل شويه تعض ايدها تريدها تسكت ماكو منطلقة ، طلعوا وجدو يبوس ويوصي بينا اي شي نحتاج نبلغه سدينا الباب ورجعنا الحياتنا المنعزلة والمملة بعدم وجود الرهبان بيها ...

❛❛❛❛

يمان ...

دخلونا بزنزانة وكل واحد اخذ موقعه أيام متشابهه محد اله علاقة بأحد كل واحد لاهي بضيمه اكو بين المساجين علاقة بس احنا جنه عازلين نفسنا بوقت الصلاة نگوم نصلي ثلاثتنا وكل واحد يرجع يگعد بمكانه وانا كضيت اغلب وقتي على سجادتي احس اريد اعوض كل سنين الي ما صليت بيها صرت اصلي بدون حساب وبدأيت احفظ من القرآن والأدعية الي جابهم علي

وبليلة بعد ما كملنا كلشي وجينه نريد انام

حطيت راسي على المخده وشفت الفتحة الصغيرة يطلع صوت الحمامة رفعت راسي شفت الحمامة البيضة من شافتني باوعت الها سكتت وظلت ترفع بجناحاتها وترفرف بيهن ظليت اتأملها لحد ما غفيت ورجع الحلم نعاد تحولت المكان مثل الحديقة وتجنن والأنهار عينكم وما تشتهون وشفت البخت اجت الي تركض وهل مره شفت رجال وراها لابس مثل الملابس القديمة ودرع وعمامه خضره وجان سبحان طوله وضخامته بس وجهه ما ينشاف من النور الي بي اول ما اجت البخت حضنتها

البخت: بابا حبيبي شتاقيتلك اليوم اجيتلك لان گلبك تعبان واجه وياي سيدنا الحسين

وتأشر الجهة بعيدة

البخت: انت مو گلت يا أبا عبد الله توفت بتي وهي صغيرة بعمر عبد لله الرضيع صبرني مثل ما صبرت على مصيبة ابنك من مات بحضنك وبنتي ماتت بحضني

هو اليوم جابني واجاك

يمان: ليش مايجي هنا ليش واكف بعيد

البخت: مو هسه يجي بعدين

حطت ايدها على صدري
البخت: راح اروح بس گلبك هسه صار زين نزلت السكينه بي

باستني وحطت بيدي مثل الريحان او ياس وراحت

فزيت الرهبة الي بيه ما تخليني حتى اجر النفس معقولة شفته بالحلم معقولة هذا سيدي ومولاي ابا عبدالله الحسين معقولة احس ماعرف ماعرف بس من جاي امسح وجهي شميت بايدي ريحة ريحان طيبهه كلش قوية

توضيت وفرشت سجادتي صليت اربع ركع لوجهه رب العالمين

وكعدت على سجادتي

وبديت اسلم

اللهم بلغ منا نبينا محمد صل الله عليه وعلى آله وسلم السلام اللهم بلغ منا السلام السيدة فاطمة الزهراء والإمام علي عليهم السلام اللهم بلغ منا التحية والسلام على زينب الكبرى والإمام الحسن عليه السلام

السلام عليك يا ابا عبد الله الحسين السلام عليك ياسيد شباب أهل الجنة لك مني السلام ياسيد ومولاي

صاروا باتر ودائب گبالي سديت ايدي حيل وانا احچي

يمان: شلون تحملت أخوك العباس مقتول گدامك اي صبر واي عظمة عندك يا حبيبي حتى تصبر هذا الصبر اخواني گدام عيني وبصحة واحس روحي تطلع على منضرهم بالسجن السلام عليك وعلى ابنك عبد الله الرضيع اي صبر واي إيمان عندك وابنك ينذبح بي ايديك وتصبر بنتي ماتت بحضني وحسيت بجزع الحمد لله على كل حال من الأحوال اللهم لا تحملني ما لا طاقة لي به اللهم انك عفو كريم تحب العفو فاعف عنا
اللهم لا تقبض روحي الا وانت راضي عني اللهم اني استودعتك مالي وبيتي وعائلتي وذريتي ورزقي

قريت المعوذات ومسحت بيدي على راس دائب ورجعت قريتهم ومسحت على باتر

يمان: بحفظ الله ورعايته ولدي

رجعت تمددت واحس براحة وسكينه بروحي مو طبيعيه

سرحت بتفكيري وبالي راح هناك يم فزة گلبي احلى عوض بالدنيا هي واحلى توبه على ايدها هي احس روحي فرفحت عليها وعلى سوالفها ما تنام اذا ما نخلص باكيت جگاير وحتى بعد ما جابت تعودت الا جگاير مو شهر عليه هنا وماعرف شلون تكضي وحيل صعبة ايام السجن تحس بخنكه بس تنزل السكينه علينا مجرد ما نصلي فعلا السجن هو العقاب الي المفروض من زمان ناخذة

وهيچ تمر أيامي بين العبادة واحلامي بالبخت ...

خيال ...

المسؤليات كثرت صح فرات وعلي بس مو مثل الرهبان واحنا هم ابد ما معتمدين عليهم بأي شي رميم طلع الها تعين بالصيدلة بمستشفى حكومي وانا قدمت على وظيفة وطلع الي بشركة مال نفط وغاز وصرت مسؤلة عن الشؤون قانونية بيها

فزيت على صوت منبة الساعة فزيت شفتها 6:30

اليوم اروح اسجل الوتر بكليتها راح تداوم علوم بايلوچي برغم معدلها 91 ضبط وتگدر تدخل مجال طبي اهليات بس هذا اختيارها وهي تحب هذا المجال ما توقعنا وتر راح تجيب هيچ معدل عالي بالرغم كل الظروف الي جنه عايشين بيها بس بالنهاية هي بنت حكمة ماكو شي يصعب عليها گمت بدلت ورتبت نفسي

توجهت الغرفة رميم فتحت الباب شفتها بسابع نومة وهي دوامها من 7 لـ 1 الظهر اتقربت گعدتها على كيفي

خيال: رميم ريمه يلا ماما گومي لا شلعين گلبي كومي بدلي حتى ترحين الدوامچ

فتحت الگلوبات عليها وطلعت رحت الغرفة وتر اگعدتها

خيال: اوتار ماما يلا حبيبي كومي كعدي نروح نقدم على جامعتچ حتى تبدين يلا بسرعة بسرعة ماكو وقت

وفتحت الها الكلوبات وشلت سُكرة الي جانت ستوها گاعدها

خيال: هلا بسُكرتي غلاتي ماما شتاقيتلك حقير

وابوس بخدودها جانت نسخة من يمان نسخة بس ماخذه شكار امها

بدلت السُكرة ورضعتها وغيرت حفاظتها ونزلتها حتى تبقى يم حكمة

رجعت الغرفة رميم شلت الأكبر وكرار وسويت نفس الشي وشهم ونزلتهم اربعتهم يم حكمة شفتها واگفه تسوي الريوگ

خيال: صباح الخير حبيبتي خالة شلونج

حكمة: هلا بخوتي هلا بالغالية صباح النور ها شني راح ترحين تودين وتر لو اوديها انا

خيال: لا انا اوديها هسه وبعدين اطلع الشغلي كتلهم اخذت إجازة زمنية

نزلوا كلهم وتريكنا وطلعت كل وحدة العملها ومجرد ما قدمت وتر ورجعتها

وتر ...

قدمت على تخصصي الاحبة واخيرًا ، بدأت اروح واجي للكلية بالبداية بعدها صارت احداث كورونا والحجر الصحي وتحول التعليم اون لاين وهالشي اجه من صالحي وجنت ما افوت محاضرة طول ما دكتور يحجي كل تفكيري ويا وحيل ذبيت نفسي على الدراسة خاصة المجال احبة واستمتع بكلشي ادرسة

فراغ دائب صعب والمشكلة مننوع نشوفهم اكيد الرهبان مايقبلون نروح هناك وهيج مرت أيامي

بعد ثلاث أشهر وتخلص السنة ويمان صار النكبه سنتين على رغم خيال سفرتنا الاربيل وغيرنا جو هناك بس تبقى غصة بگلوبنا عليهم ما مقصرة بس نگول ضايجين تاخذ السيارة ونطلع نفتر ومن غير الفلوس الي اشوفها تحطهم على الميز سواء الي او رميم او الامي حكمة الأطفال ما حاسين بيهم كله عدها هي المسؤولة عن كل شي صارت امنا وابونا

ورميم مسؤولة عن الحاجه الزايده الناقصة بالبيت شي يخرب شي يعطل مسواك كله عليها وهي هم اشوفها تحط فلوس الي والخيال والامي حكمة

بوقتها ادركت شگد الله يحبني وخلاهم بحياتي ما توقعت بيوم بيت حكيم يطلعون مو أهلي ولا توقعت راح اعيش بوسط عائلة كلها حنية من خواتي الامي للرهبان

وصرنا مره ورجال بالبيت وما احتاجينا احد وكلام يمان يدور ببالنا الأطفال ما يعشيون الي احنا عشنا شنو ما صار ما يجوعون ولا يحتاجون أحد

رميم ...

بعد مرور تسع أشهر على سجن الرهبان وما بقى غير ثلاث أشهر ويطلعون دائب وباتر بس يمان بعد اله سنه وثلاث شهور

وتر امتحنت الفاينل مال نهاية السنة وخلصت المرحلة الاولى بعد الحجر الصحي واحداث كورونا كلها گعدت بالبيت ماعدى احنا جماعة الصحة جانت فترة صعبة انا بمكان عملي الوضع خطر وجنت خايفة اجيب الفايروس وخايفين على حكمة اجت ايام مااشوفهم حتى جهالي من الغرفة للشغل من الشغل للغرفة عازلة نفسي منهم الحدما عدت الفترة الصعبة

الأكبر والكرار بعد شهر راح يصير عمرهم سنتين وحرفيًا گالبين البيت گلب وحكمة طايرة بيهم سُكرة وشهم اعمارهم ١١ شهر

ايام بطيئة برغم ما قاصرنا شي بس فراق الرهبان جان صعب الى درجة

يمان ...

فرحت الاخواني لان راح يطلعون تعبوا هواي دائب تدمر احسه كل يوم ينازع روحه ادري بي ما يتحمل كمية الوصخ يكضي اليوم كله يتقيىء من كد ما يغسل ايده صارت يابسه وكلها مجرحة بس الحمد لله خلصت مابقى شي

بهاي الفتره ما شفت البخت غير الحمامة الي طول الوقت هي موجودة بالشباك تعلقت روحي بيها حيل صارت اقرب شي الي اگعد اسولف وياها بالساعات بدون ملل

حسيت التعب اخذ من حيلي حيلين وأنا اشوف دائب شلون تعب بسبب الي جاي يعيشه لا يگدر ياكل ولا يشرب وحتى نومته يتقزز منها كلش ضعف وتغير

گعد يمه باتر يحچي يحاول يغير من موده

باتر: ايع شبيك بزر نستله شششد روحككك شددد السجن بس للزلم اخوويي

گال دائب وهو ينتجي على جتف باتر

دائب: ساعة سوده وسيرها مصخم يوم الي نزلت بي المجهوم البارود ولكم طاح حظي نغسلت غسل وحق العباس شيخلص هالشهرين واروح انام على فراشي النظيففف واكل من اكل امي يا يمة الحمد لله والشكر ربي شلون جنه عايشين لعبت حتى روحي

باتر: چا يمان شيگول بعد سنه وثلاث اشهر راح يدگ دگ السليمة

يمان: انا سهلة بنتي يمي

حچيت وانا أأشر على الحمامة

باتر: بعدك متوقع هاي البخت

يمان: أكيد مجرد ما اشوفها تهون عليه گعدت السجن لو چانت حمامة عادية جان ما رتاحيت بشوفتها

گال دائب وهو يلزم بطنه

دائب: جيبوا علي اريد بسكت جاي اموت بالحسين شهيد ويكرم طاريه بهل مكان

يمان: نجب شنو اجيب الك علي جاي تتونس لو تتعاقب هذا عقابك نجب وسكت ماكو شي يطب من بره

دائب: زين خلي يجيبلي جرجف صخام الوجهه أريد أنام رأسي راح يطك تكسرت من نومة على جتف باتر

يمان: ماكو هذا عقابكم تعيشونه وتسكتون

ماجاوبني هز ايده وتمدد على رجل باتر خلا تيشيرته على عيونه ونام وهو متقزز وباتر سند روحه على الحايط ونام وانا گمت رجعت السجادتي يمكن احلى شي صارلي بالسجن هي خلوتي مع ربي والتقرب منه والتعمق بديني ...

❛❛❛❛

خيال ...

اليوم المفروض يطلعون دائب وباتر واحس روحي مفرفحة عليهم على الأقل يبقى بس يمان شوي الحمل يخف

بيومها عفت حكمة والبنات مخبوصات بالبيت وانا رحت بسيارتي ويا فرات وعلي بمعارف علي وابو سهلولهم اوراق الافراج وگفنا برا السجن ننتظرهم واحس روحي رايحة اريده يطلع وياهم واخلص بس الحمد لله على كل حال گال فرات

فرات: يمان ممكن ينقصون اله المده راح يسونها 9 أشهر بسبب حسن سيرة سلوك

خيال: صدگ تحچي يعني بس تسع أشهر بعد وهاي هي

فرات: اي هسه گلولي بلكي يسوونها صدگ يلا الحمد لله هانت راح الصعب وبقى السهل

علي: دام گالوا يعني صدگ وابو دائب هم راح يشوف هذا الموضوع وحتى هو ماگدر يجي عدهم انذار بديالى اليوم

خيال: ان شاء الله يارب العالمين ان شاء الله خير

بقينا ننتظر لهناك ونفتح باب السجن وطلع باتر ودائب اول ما شفتهم انصدمت شكد دائب ضعفان ومتغير حتى باتر بس مو مثل دائب بسرعة علي وفرات راحوا عليهم وحضنوهم جان بودي احضنهم واحس بيهم شي من ريحة عافيتي بس يبقون محرمين عليه مو اخواني حتى لو اعتبرهم اخواني وروحي الثانية اتقرب باتر يمي يحچي

باتر: هلا بالغالية ام شهم الچ وحشة والعباس شلونچ غاليتي شلون امي والبنات الجهال

ماگدرت اسيطر على دموعي صارن ينزلن من وحدهن
خيال: الك وحشة والله تهنا وضعنا بدونكم

باتر: احنا الي تهنا بدونكم نعرف بيچن ذيابه وسبعات ماينخاف عليچن الأخبار توصلنا اول باول

اتقرب دائب يحچي بتعب
دائب: خيال بروح اهلج جوعان ميت اي شي أكله

علي: ولك طول هاي الفترة اجيبلكم اكل ويمان مايقبل يستلم اي شي

باتر: جزعنا بالعباس كل مانحچي وگال عقابكم وعقابكم

دائب: بلا خرطكم هسه خوخه ميت من الجوع طيريني للبيت

مسحت دموعي احچي ببتسامة
خيال: سوده عليه امي هسه انطيك كيك امي حكمة وصتني عليه

صعدنا بالسيارة ويا علي وفرات اخذ سيارتي جنت جايبه كيك حكمة وصتني تريد توزع طلعت اله قطعه ولفيتها بكلينكس ونطيتها اله

اكلها كلها بلكمة وحدة

باتر: دخيلك ياعلي

دائب: شكو ومرض

باتر: راح تاكل البنت

خيال: اسكت عنه باتر خلي ياكل شلت همه والله اعرفه يتقزز البيت جلفته الك جلف فراشك يلمع لمع من النظافه وحكمه مسويتلك كلشي تحبه اشوف وجهه ضحك

دائب :بعد روحي انتِ بالحسين بس حجيتي احس روحي رتاحيت نفسيًا

خيال: الف عافية أمي

دائب: امي اوتار شلونها مثل ماوصيتچ بيها خيال مو

خيال: بالحفظ والصون كلشي مانقصها بس للأسف رجعت تحچي ويا اخوانك

سكت ماحجه شي شويه ورجع گال
دائب: وينها موجودة ببيتنا

خيال: حكمة ماخلتها تحجي وتتحلف بس توصل تطردها ماتقبل تگابلها

ضحك وباتر گال

باتر: اولادي سر سعادتي شلونهم اكيد ثكل ورزانه وعقل على ابوهم

علي: شجابهم متگلي يوميه اشوف إبنك الأكبر شايل نعال وگاعد يم رأسي وركع ليش چذب انت ليش چذب

باتر: اخ بعد ايدي ابن ابو كون هيج وحيل وعلى راسك

طول الطريق هم سوالف وضحك وهم فرحانين بخبر يمان بعد له بس تسع شهور مو سنة كاملة وصلنا للبيت وهلاهل حكمة ترست المنطقه وطش بالچكليت عليهم وتبچي وتحضن وشم بيهم تريد توكف على رجلها ما تگدر وهم استقبلوها بحضنهم گعدوا بالگاع اثنينهم حاضنينها وهي تحچي بروح رايحه

حكمة: يمه نظر عيني يمه يمه يابعد امكم يبعد حيلي ولكم روحي نطفت على شوفتكم عيوني عمت على فراگكم يمه يا شمعة بيتي الدنيا بدونكم ما تنعاش يابعد روحي بعد گلب اميمتكم يا يمه

انتبهت الدائب يحضن بيها حيل احسه اكثر واحد متلهف عليها

دائب: يمه تعبت يا يمة عبن ريحتچ وحنيتچ ما محاوطتني كلش تأذيت ضميني بحضنچ مثل كل مره يمه ما اريد اعوفچ بعد حبيبتي روحي طلعت لحد ما شميت عطرچ اخخخ يايابه

وباتر يحضنها ويبوس أيدها

باتر: يمة ياروحي انتِ شتاگيتلچ يا بعد حيلي على بالي خاف تعبين وما تلگينا يمچ يمه الدنيا المابيها حنيتچ ما تنعاش روحي لابت لحد ما صارت بحضينچ يمه جنتي وناري انتِ

يحچي ويبوس ويحضن بيها واحس دموعهم بالكوه لازميها وهي نهارت فد مره بالبچي

حكمه: يمه بجري اخوكم شلونه اخوكم سوده عليه يمه طلعوا اخوتك وبقيت وحدك يا يمة يعينك الله من سابع سماء نخيتك يا العباس احلفك بالعقلية تخفف على أبني نخيتك وگلبي محروگ

بقوا هواي على هالحال الحدما هدأت حكمة رفع رأسه دائب يدور بالوجوه الحدما استقرت عينه على وتر گام وگف اتقرب عليها چانت واكفة بصفي ومحد موجود بس احنا حتى على وفرات برا بقوا يسسون بالذبيحة الي ذبحوها جوه رجليهم

وتر: ماگدر اشوفه من كثر الدموع الرؤية مو واضحة عندي

حسيت بي لزم ايدي وهمس
دائب: رجعتلچ يبعد أهلي

گلت وانا اناشغ
وتر: حبيبي ابويه واهلي انت

شمرت نفسي عليه حضنته بكل قوتي

دائب: اخ بنوتي الحلوة اخ ولج اشتاگيت الريحتچ حيل دائب

يشم بيه حيل وحاضني قوي لدرجة تأذيت بحضنته بس ولا همني المهم هو حاضني

وتر: بعد ما تعوفني مو

دائب: اي هاي هي راح ابقى يمچ مستحيل نفترگ من بعد اليوم مستحيل بعد

وتر: ما تعوفني حبيبي ما تعوفني

دائب: مستحيل حبيبتي هاي هي انا هسه إنسان جديد ونظيف خلصت بقى بس ابوي يطلع ويرجع يلتم شملنا خلص كل تعب بروحنا خلص

شلت غلا ماقبل يحضنها ولا يبوسها الا يسبح يگول كلي جراثيم بس انا رجعت حضنته

رميم: اباوع عليه گام من خاله واتقرب عليه همس

باتر: كالعادة أي دموع ماكو بعينچ بس نظرتچ مليانة حنية وحب حسيت حبچ وحنانچ غلف تعب روحي ورممت كل كسر بگلبي حطامي

رميم: شنو تريد احضنك حالنا حال البقية

باتر: اكييد تعبير الحب مالتنا مو مثل مالتهم

گالها ويأشر على دائب وتر الي حضانين بعض

رميم :عيب عليك ابو الاكبر هاي مال اطفال بعدهم انا غير

جرني من ايدي دخلني الغرفة حكمة وسد الباب راد يحچي گبل ضربته بوكس على عينه على اثره رجع الي ورا

باتر :اخ اخ سلامج خطير

ضحكت وحضنته حاوطت رجليه خصره وهو من حضني شالني ورفعني اله

نزل حجابي وگال بضحكة

باتر: يابعد حيلييي ولج شتاگيتتت حطامي افعاي اخ اخخ ولج شلون بيه أمي انتِ شلون بيه بدونچ حبيبي افيششش على ريحتچ وعلى حضنچ حبيبتي انتِ چوية روحي

رميم: بتاري بتار روحي لو جاس التعب حيلي راحتي تصير بنظرة من عيونك ، تعب روحي حبيبي بعد ماكو تعوفني

باتر: وين اعوفچ ولچ هيج اريد الزگچ بيه وماشبع منچ

رميم: اليوم بغيابك يعادل سنه عندي بتاري

شد على حضني اكثر واكثر

باتر: بعد بعد سمعيني صوتچ وترافة حجيچ بعد ترسيني ترس من حنيتچ

رميم :اضمك بروحي مو بس انطيك حنية اعز من اهلي وجهالي أعز الي من روحي انت نظر عيني حبيب روحي أحبك هواي

من بعدها طلعنا گبل الولد للحمام سبحوا ورتبوا نفسهم ناس هواي عازمة حكمة وبيت جدي هم هنا كلنا مخبوصين بيهم وحكمة تمشي وتوصي اهم شي دائب يسبح ويرتاح لان كلنا نعرف بي مايتحمل وفعلًا من اسبح ارتاح اخذنالهم الجهال بقوا بالساعتين وياهم رغم التعب بس هم نسوا نفسهم ثنينهم ماتوا على سكرة وبقوا يتعاركون عليها

خيال ...

رجعوا الولد وراح الخطار وتاخر الوقت وكلمن راح الغرفته اخذت ابني وصعدت بعد ما تطمنت على خالة حكمة نامت واخذت علاجها دخلت الغرفتي رغم الجو حلو بس احسها بدونه باردة ثلج غيرت ملابسي وملابس شهم ورحت اتطنت على الجهال نايمين بغرفهم جبت غلا يمي لان تگعد بالليل تحتاج ارضعها ورجعت للغرفة نيمتها بالسرير الصغير وانا تمددت شهم بعده منايم خليته بحضني على صدري انوم بي وصورة يمان گبالنا اسولفله عليه الحدما ينام ماريد ابني ينسى أبو

صفنت من شفت اليوم البنات شلون متلهفات على ازواجهن وحسيت برميم شگد تحب باتر ومتعلقة بي مراح استغرب اذا رميم تحب باتر حتى اكثر مني حبها اله حب مخيف عجيب غريب بحيث تشم بي شم وتر حسيتها طفلة فاقده كلشي ودائب صار الها مصدر أمان متسمكة بي وكانه هو حبل النجاة الي بدونه تموت برغم صار عدها عائلة وتحبها بس بقت عدها دائب هو عائلتها الوحيدة برغم الفرحة ملتنا برجعتهم بس گلبي وروحي بعدها هناك بعدها بين قضبان السجن بعدهم البخت ويمان هناك ماگدر افرح ماگدر احس بالدنيا من دونه

وهيج مرت الايام رتيبه الولد رجعوا يلزمون شغلهم ويوكفون على حيلهم وحتى فتحوا شراكة ويا واحد بشركة بالاردن ورجعوا شغلهم مثل ماكان واحسن مثل ما موصيهم يمان

دائب امه بعدها موجودة بالبيت الي انطاه الها يروح ويرجع عليها بس مايطول وابو ماتصلحت علاقته بي ابدا ولا قبل يتقبله بس كوه من بعد الحاح حكمة عليه وحتى لا يضيع حقة قبل يسوي معاملة اثبات نسب وتحول بأسم أبو الحقيقي

وهيج مرت التسع شهور بطلاع الروح متت انتهيت على مااجه اليوم المنشود شهومتي صار عمرة سنه وثمن شهور بالتمام وغلا نفس الحالة لان مابينهم غير 3 أيام

بيومها كلنا گاعدين من الصبح حكمة ذبحت 3 ذبايح الوجه الله وسوت عزيمة شكبرها

رتبت نفسي قبل بيوم وبيومها لبسيت فستاني الاسود ويا كعب اسود مقبط وشال لون بني بدلت الشهم

زنزلت انطيته الخاله شفت كلهم مجهزين وحاضرين الأكبر وكرار عمرهم صار 3 سنوات اجوني يمشون ولسانهم نص السان واطول منهم

الاكبر: ماما

يأشر بايده حتى اشيله

خيال: هلا يماما هلا امي ابني

شلته وبقيت ابوس بي

الاكبر: روحين جيبين عمو يمان

خيال: اي اجيبه واجي انتضروا خوش

جرني الكرار من فستناني انتبهت عليه نزلت الأكبر وشلته ابوس بي

شفت دائب وباتر نزلوا من فوك

دائب: يلا ام شهم مرت اخوي تأخرنا

طلعوا وانا طلعت وراهم وحكمة نمشي وتوصي بينا بسرعة نرجع ومانطول

❛❛❛❛

يمان ...

اليوم أخير يوم الي هنا والبخت موجودة على شباك طول هاي السنتين ماتركتني ابد شگد شكيت الها وشگد حچيت وياها وشكد زارتني باحلامي وسكنتهن ومن اتعب تظل ترف بجناحاتها مدري ليش روحي صارت بهاي الحمامة احسها روح بنتي

اجه الجندي كلمة افراج جانت كفيلة بانها تكون القشة الي قسمت ظهر البعير حسيت تعب سنتين تجمع بروحي نقلوني الغير مكان كملت الاجراءات

وطلعت وشايل تعب سنتين مجرد ما طلعت عيوني ادور حمامتي وينها شفتها اجت وراي وحطت بالكاع شلتها وحضنتها على كيف وضليت ابوس بيها

يمان: اخ يا حبيبة روحي انتِ ما قصرتي ويا ابوچ يابعد روحي وگفتي وياي كفيتي ووفيتي ونستيني وخففتي وحشتي وانستي وحدتي يابعد روح ابوچ ديني وياج ثگل يابعد ابوچ شلون اجازيچ راح ابقى اشوفچ بعين كل طفلة اشوفها راح ابقى اتذكرچ بطاري كل بنت يجي گبالي

طارت البخت ومن يومها ما شفت هاي الحمامة البيضة بعد ابد

طلعت وشفتهم ذبيت جنطتي ورحت الها ملهوف والحمد لله الشارع فارغ دنيا ظهر والمكان شويه بعيد وشبه مقطوع

حضنتها بكل حيلي سنتين ما شام عطرها وما شايف وجهه ولا حاس بحنيتها ودفو جسمها

يمان: اخ اخ احبچ والبخت الجمعني بيچ احبج والبخت الي يرجعني الچ بكل مرة

خيال: ابو شهمي حبيبي بيتي انتَ

يمان: سنتين عايش على أمل راح يجي باجر ويزورني طيفچ حبيبتي ام شهم اخ مريتي اخ

صارت تبچي بصوت وتحضن بيه وتگول
خيال: حبيب روحي انت اخ ياگلبي واخيرًا خلصت ايامنا السوده حبيبي خلصت وخلص الماضي وانتهى وراح نبدي من جديد يروحي الحمد لله كلشي راح المهم صرت بحضنك امي وابويه انت يروحي

تحچي تشم بيه حيل وانا ابادلها وكأني ماشوف غيرها

باتر ودائب تقدموا عليه يصيحون ابعد ما ابعد عن خيال بس ضلت ماسك ايدها ماقبلت اعوفها

خيال ...
گوه بعدوني عنه بس ماتركي بقى لازم ايدي اتقدم باتر حضنه

باتر: السند شتاقيتلك الحمد لله على السلامة واخيرا رجعت يابعد روحي انت

اشتم باتر ويحضنه حيل

يمان: اخ يايمه ولدي متغيرين اشتاگيت الكم ابوي شتاگيت لرعونيتك وسوالفك الطايح حظها يابعد ابوك

اتقدم دائب وهو يدفع باتر حضن يمان يحچي

دائب: يابعد حيلي يا بوية تيهتنا وراك الحمد لله خلصنا ورجع التم شملنا

شويه يلا وكفت السيارة ونزلوا علي وفرات سلموا عليه وتحاضنوا وصعدنا بالسياره وعلي وفرات بسيارتهم وانا ودائب ويمان وباتر بسيارتنا

وصلنا حكمه واكفه بالباب تلكتنا بلهلاهل گعدت بالارض وهو نزل يم رجليها رفعته حضنته حيل تصيح

حكمة: هلا يابعد امك وروحها يمه چبيري وبجري يمه الروح راحت من رحت يمه ما چني عايشه هلا ريحتك يابعد اميمتك هلا بالي يرهن عيني بشوفتك يا ابو طول الحلو حبيبي امي انت امي وابوي واهلي كلهم انت

يمان: حبيبتي يمه على كيفچ لا تتأذين يا بعد روحي روحچ خلصنا يمه هاي هي رجع التم شملنا من جديد والأيام السوده خلصت ولت وراحت راح نعيش بسلام وهدوء لا قانون يلاحقنا ولا أحد يطلبنا بشي حبيبتي امي على كيفچ يابعد روحي انتِ

تعاي خلي نطب اشتاقيت الاكلچ وحنيتچ البنات وين

طلعوا اله باوعلهن يحچي

يمان: هلا هلا بالبنيات شلونكم ابوي شخباركم

رميم تمسح بدموعها وتحچي
رميم :يابعد گلبي ابونا الحمد لله على السلامة نورت الدنيا بطبتك علينا حبيبي بخير من شفناك گدامنا وراجع النا

وتر: باباتي فدوه الطولك الحمد لله على سلامتك ياگلبنا صرنا بخير من شفناك

يمان: بعد گلبي بناتي

گالها وگوم حكمة من الارض ودخلنا كلنا جوه

خيال اباوع عائلتنا التمت من بعد تعب ومعاناة من بعد الف كسر وخيبة وجروح اليوم احنا تحت سقف وواحد بيت كل افرادة يحبون بعض الدرجة الرابطة الروحية الي بينا ودعاء امي حكمة يخلينا شكد ما تصير مشاكل نرجع نلتم بحب ولهفه البعض كل واحد بينا عندة معاناة ويا اليتم شي تربه بشارع وشي تربه بمكان أقل ما يقال عنه عائلة وشي فقد أهله وعاش حياته بدون عائلة وكل واحد قصته مليانه جروح وبالاخير التمينا كلنا تحت مسمى

بيت الرهبان ( أولاد حكمة )

بعد مرور فترة

حكمة :

لديَ ثلاثةُ صقورٍ قويةٍ لا ينكسرُ لها جناحٌ غرستْ بداخلهمْ مبادئُ وقيما حتى وإنْ خالفوها يعودونَ إليها مجددا

انا حكمة بت نعيم بت ربيت بيئة ريفية عادية وتزوجت وطلعت من الريف ورحت للمدينة وحبيت رجلي والله مارزقني بذرية والحمد لله على كل حال ، توفى زوجي وهو ما شايف اله ضنه الوحدة كفيله بخنكتي اجوني شمسين الاول يمان واول شمس تضوي عتمه وحدتي

والثاني باتر ثاني شمس تضوي روحي بشوفتها اخذتهم لانهم ابناء نرجس بنية روحي وبنت أختي صاروا ولدي الي ربيتهم من هما وصغار واشوف الدنيا بعيونهم شمسين

وثالثهم قمر حول الليالي عمري گمرة ونور دائب ابني الي اخذته لان ردته ابن الي گمر يضوي سواد سنيني

احتويت بنات ثلاثة قويات وحنينات خيال ام البيت وامهم الي مأمنه على البيت بيدها وسلمتها كلشي ونعم ماقصرت بحق اي احد بالبيت احن مني عليهم ام شهم

رميم الوكحه اعرف لو شنو مايصير عدهم ذيبه تحميهم ويتجون عليها ولو دهرهم مال عليهم اكو قويه بظهرهم تعدل المايله دائمًا اشوف روحي بيها ام الاكبر والكرار

وتر بت گلبي المدللة روح البيت وضحكته اعرف شكد مايمر عليهم حزن وتر راح تغير حزن البيت وضحكته وشگد ما يمرهم الهم بضحكة وتر راح ينجلي حزنهم

همهم ثلاث ولد وثلاث بنات ربيتهم على الأخوة وان العائلة اساس والأخوة سند وحزام ظهر والمرأة احترامها من احترامك

والخوات هما روح وحدة ويتشاركن كلشي ربيتهم ماتفرقهم فلوس وجيبهم واحد والاخر يوم بحياتهم يبقون گلب على گلب وايد وحدة وجيبهم واحد ويقدم اخو قبل نفسه وان يستوصون بالنساء خير لانها ريحانة شگد مجانت قويه احتويها وعاملها بحب وحنية واحترام راح تشوفها سند الك بالشدة

اطفالهم يربون مثل ما ربيتهم وان انا خطار بهاي الدنيا ويجي يوم واروح الرب كريم

واتمنى من اوگف بين ايدين رب العالمين اكون أديت الامانه وسويت الي اكدر عليه وتكون رسالتي بالدنيا طيبة وعيت أفكار دارت براسي وانا اشوف ولدي وبناتي جاي يلعبون بالمزرعة طوبه وضحكتهم مالية المكان واصواتهم الفرحانة تسر گلبي وتريح عيني وجهالهم الي يفترون جواهم

رحت بتفكيري ان باتر المشيطن المهضوم من الدنيا كبر وصار عنده مره وبيت وطفال

ويمان العاقل الهادئ الي يخاف الله كبر وضل نفس ماهو وسبحان الله الي زيد تعلقه برب العالمين وكل مابي يزيد علم وفهم بالدين والله حاط كل النور بوجهه وصار عنده شهم خيال حبلت وجابت وصار عدهم بحر عمره ست شهور

دائب المكسور الي مايقبل يعترف بكسرته كبر وتزوج بنيته الي رباها وتعب عليها وكضه سنين عمره كلها يركض وراها وبنته تفتر جوه رجليه ونسخة من عمها يمان بشكل حسيت فعلا دائب اخوهم ومو غريب وان هما خوان صاروا بالدم بحيث بته تشبه عمها ومرته حبله بأشهرها الأولى
وعيت على سرحتي من شفتهم كلهم اجو يمي

الاكبر: يمه يمه يمه حكمة ابوي عصب علي حميني

صحت وانا اضمه ورا ظهري

حكمة: وعيوني يا بيتر اذا تقربت يمه الا اكسر ضلوعك بالعوجيه ميل عنه غدي ميل لا بارك الله بيك دخلي اشوف واحد يتقرب من جهالي لا اكسر العوجيه على ظهره

صاح الكرار وصوته عالي الدرجة مو طبيعيه

الكرار :الاكبررررررر ولك تعاللللل عيبببب تلبدددد صير زلمةةة ولككككككككككك

شهم: ولك الاكبررررر راح يفوزون علينا تعال جيب الطوبة

ركض الاكبر وهو يكوم من ورا حكمة

الاكبر: جيت جيتتتتتتت وخر بابا

راحوا يردون يلعبون وفرحانين

اجت الفوصه تتهدر هي وفستانها الابيض وبي وردات لون وردي وقراصاتها وحذائها الرياضي الاسود

شالت الطوبة وصاحت

غلا : لعبوني وياكم ولا ماكو توبة واروح اكول اليماني ما يلعبوني وياهم

گعدت بالكاع وحطت الطوبة بحضنها

الكرار: اهووو حطت لوحها انتِ ماعلفين تلعبين تخسرينا

شهم: لا ختيه ح تلعب ويانه

الاكبر: سبيج انتِ لزكة كل ما نريد لعب اجت

صاحت وهي تبچي

غلا: سبيكم محبوني حتكم ننا ( شبيكم متحبوني مو اختكم اني )

مجرد ما شافوها تبچي كلهم اجو يمها الأكبر يحضنها

الاكبر: اسف سُكرتي لا تبجين احنا نحبج مو قصدنا خلص كومي لعبي ويانه ونلعب العبة الي انت تحبيها

الكرار وهو يلزم ايدها ويبوس بيها

الكرار: حبيبتي جميلة انتِ لا تبجين انا ما اخليهم يفوزون عليج حبيبتي

شهم :وهو يلعب بشعرها اختي حبيبتي انت نلعب الي انتي ترديها بس لا تبجين وضوجين

گال يمان بضحكة

يمان: لو اموت هسه مطمن على سُكرة عدها ثلاث اسود تحميها

خيال: گلت وانا احط بحر بحضنه الي عمره 6 أشهر

خيال: قصدك أربعه شنوو ما حاسب ابني وياهم هذا بحر حبيب ماما

بس شاله بحر الي كبل هجم على ابو

يمان: لا ونعم منه شبل ابو وين اكو من وليدي دباعي الجمال يمههه ابن امه بنص روحي هو

دباعي ذول باعي

اباوع على دائب وتر

اكو مرجوحه وهو گاعد يمرجحها وكل ما توصل يمه يبوسها من راسها ويدفعها ومن شافنا نباوع عليهم صار بس دفعها بدون ما يبوسها صاحت

وتر: هاي شنو دودي ما بستني والله زعلت

ضحك دائب يحچي و يحضنها
دائب: اخ اخ اسف حبيبي اسف يابعد روحي وظل يبوس براسها

دائب: هاي تعويض اسف رضيتي سُكرتي

وتر: اي رضيت هاي هي أحبك حياتي

دغيت يمان دعوف الاب وبته شوف المجانين هناك

باتر ورميم جانوا جاي يحضرون بالمواد الي ينطبخ بيها وكل واحد بيده سجينه ويركض واحد ورا الثاني

رميم: السبع يطلع دم والفاهي يطلع زاهي

باتر يجرها من بلوزتها

باتر: دتعاي فحطتيني يلا نفذي بسرعة

تجت روحها عليه
رميم: افا ابو الكرار يهون عليك

باتر: اشتعلوا وما نطفوا لا هاي هي بس مو معناها ماكو شي

ما شفت الا نضربت بوكس بطنها
رميم: هاي كل قوتك

گالتها وهي ترجع تضربه بوكس على عينه لزم عينه يصيح

باتر : اي عيني اخ عيني

ركضت للمطبخ وتضحك

رميم: الزلم الخشنه الزم الزم الخشنه زلم

وهو هم يركض وراها ويصيح مثلها

فزيت على بوسه يمان باسني من ايدي مبتسم ورجع باس بحر وهمس

يمان: احبچ والبخت الجمعني بيچ

خيال: ياحظي الحلو انتَ

يمان: هنيالي

اِخْتر خليل قَلبِك بِحكْمة فَإِن بُترَت الأوْتار يَصعُب ترْميمهَا وَإذَا دَائِبة اَلقُلوب يَصعُب يُمْنُها

انتهت ...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

تمت 2023/3/2

لهنا اكون ختمت وياكم قصة تاروت

روايتي الثانية القريبة على قلبي عشت مع ابطالها بكل حدث بحياتهم بجيت وضحكت وفرحت وحزنت وياهم وعشت تفاصيلهم الصغيرة والكبيره مو بس مجرد أبطال بالنسبة الي بيت تاروت هما عائلتي الثانية والابطال الي مسانديني بكل خطوة بحياتي

نقلت الكم روايتهم بكل حب وقدمت كل جهدي حتى اوصل الكم ولو جزء بسيط من حياتهم ومعاناتهم وغايتي الاولى والاخيرة هي الاستفادة ان مهما غلطت ارجع الربك وان أبواب التوبة مفتوحة دائمآ وان مهما اخذ منك رب العالمين راح يقدملك الاحسن لازم كل شخص بينا يتعلم يرضى بقضاء وقدر رب العالمين وان ماكو حزن يدوم وكل دمعة وراها ضحكة وكل حزن ورا فرح وان فاقد الشيء يگدر ينطي وبقوة

ابطالي الي فقد اهله والي ربى بدار تشرد وكل واحد قصته مختلفة لكن السبب واحد وهو فقدان الاهل وهما حاليا افضل عائلة شافتها عيني من حبهم وحنيتهم على بعض

الشكر الاول والاخير المعثوراتي الي وياي بكل خطوة وبكل حرف جانوا وياي وساندوني بجينا بقصتنا سوه وضحكنا سوه واكيد الفضل الاول والاخير الهم وكل نجاح الي يعتبر نجاح كل معثورة عندي

المعثورات احبكم وربي لا يحرمني منكم 🕊️

واخيرا ما ننسى البخت وتبقى على بالكم
يمان يوصيكم دائمًا تذكروها بقصيدة ( ليالي الجروح) البخت ♥️🌿

دمتم في رعاية الله وحفظه حتى التقيكم بقصة جديدة وإبطال جدد 🦋