الــفصل الرابع والثلاثون ..
لحظـآت ندم من المآضي
ندفنها بداخلنا ونطلب الغفران
لا يريد ان يخبرها عن مآضيه
لايريد ان يتذكر تلك التفاصيل
هوا شخص اخر
لماذا النآس لاتنسى ..؟!
لماذا عندمآ نريد التغير يدفعونا الى الخلف الف مره
حتى نرى انفسنــآ القديمه .!.
لاأريد ان أتذكر ذالك المآضي
" هل تساعدوني ..؟! "
لا
فنحن مجتمعك
" انا اصبحت شخص آخر "
لايهمنآ ذالك أنت اخطأت
" جميعنآ نخطأ .! "
نعم لكن جميعنآ يتذكر خطأ الاخر
" ماذا تستفيدو عندما تتغاضوا عن توبتي "
ألا تفهم نحن مجتمعك ...لسنا إله كي نقبل توبتك
سنذكرك بكل خطوه بمآضيك
سنذكرك ماذا فعلت
نحن مجتمعك لاتستطيع الهروب منآ
سانده جسمها على الجدار ومابتتنفس حتى وهوا يبـكي
فحضنها
الأنثى نقطه ضعفها دمعة رجـل
ممكن تقول انها سامحت بس هيا اكبر كذابه بديك اللحظه ...
الألم هوا اللي يحدد متى تقدري تسامحي مو إنتي
اكرهك
احبك
سامحتك
روحي
لاتسيبني
كلمآت كلها مبنيه على المشاعر صعب تنقآل بدون احساس
لأنك حتدخلي بدوآمه توجعك اكتر
مو قادره تتكلم .. مو قادره تتحرك
صوته وهوا يبكي على انها مجروحه بس حزنها
جسمها متصـلب وبس وهوا حاتط راسه على كتفها ومايبى يرفعه
قال الكلام اللي عنده وبـكي
بنسبه له مو سهل اللي قاله
ومو سهل انه يسمع منها " انا اكرهك "
قالتهاا بحقد واضح ف عينها
صممت مفجـع بدأ يهدي بس مابعد عنها
بين ألمها وضعفها
بعد بس دار جسمه ورفع يده وهوا يمسح دموعه مايباها تشوفـه كدا
مو متعود يكون ضعيف عند آحد
تطآلع في ظهره ودموعها بعينها
مشيت كم خطوه وجلست على سريرها
تمسك اظافيرها وعينها على الارض
"..كلامه يضحك صح ..؟ "
"اسلوبه يخليكي ماتقدري تزعله منو ..؟"
" عادي كانت مية وحده عاشت دي اللحظه اللي بتعيشيها "
" انا مو جايه اخرب اللي بينكم بس عدي مبسوط فيكي كلها فتره وحيرجع لبلاويه "
راااسها يوجعها وكل اللي يتعاد فيه المحادثـه
دقآت قلبها ضعيفـه انكسار واضح في شكلها
الحقيقه تفجـع
هوآ لدحين داير جسمـه اذا هيا منهاره مرا
هوا منهار من جوته الف مرا
انك تتحاسب على شي من سنين صعععععب
شي انتا سبتو وكآره نفسك عليه
حاول يتمآلك نفسـه خرجت منـه تنهيده بصوت مسموع
طالع فيـها
قدم بخطوآت هاديه وجلس جمبـها وكلهم بيطالعو في نفس المكآن
بعشوائيه وبس
ماتبى تسمع
مايبى يتكلم
كدا صممممت وبس
كم بيعدي من الوقت مو دارين
عدي اللي يضحك
عدي المبتسم من جلسته واضح قد ايش مكسور
اتكلم بصوت مهزوز : لمى انا اتغيرت .. والله والله _ سكت لما حس انو حيبكي حق كم ثانيه وبعدها كمل _ مسكت يد بنت جلست جمبهم بس ماقد كبر الموضوع اكتر من كدا
ماقدر يقلها احضنهم
يجلسو في حضني ويجرحها زياده
عدي كمل : كل اللي كآن براسي دايما الاشياء اللي تزبط مزاجي و
قاطعته بصوت متقطع : اسـ ـ كــت
دار جمسه طالع فيها كآن بيمسك يدها الا سحبتها : لمى لاتحاسبيني على شي سار قبل لاأعرفك
مابتطالع حتى فيه : مابى احاسبك بس بنفس الوقت مو قادره اطالع فيك ..مابى اظلمك بس بنفس الوقت _ بكيت _ مو متخيله انك تدلع احد غيري وتحضن احد غيري وتراضي احد غيري
عدي : والله ماقد حبيت احد زيك انتي غير ودولاك
: لاتجيب سريتهم
عدي سكت : طيب طالعي فيا
حركت راسها بالنفي
وهوا رفع يده بيمسك وجهها الا بعدت يدو : سيبني مابى اشوفك
عدي : امآنه لاتظلميني انا ظلمت نفسي زمآن واتغيرت ربي جازاني ليش تحاسبيني عل
طالعت فيه بقهر وقالت : مابحاااسبك ماتفهم ياعدي مابحاسبك _ اشرت على قلبها _ قللبي يوجعني اني اسمع فجأه دا الكلام وانا متخيله انو انا زي مآكنت اول شي بحياتك انتا نفس الشي زي ماخليتك تمسك يدي اول مرا انتا نفس الشي زي لما نطقت كلمه احبك لك اول مرا انتا نفس الشي ولاتقولي ماقد حبيت احد قبببلي عشان انا مو مجنونه ..تجي وحده تقولي اسلوبه يخليكي ماتقدري تزعلي منه يعني راااضيت احد يعني لما كآنت تبكي انتا تمزح وتضحكها لين ماترضى نفس اسلوبك معايا _ وقفت لما حست انو التفكير بس بيجننها _ خلاصص خلاااص اطلع
وقف بس ماتحرك من مكآنه : كل كلمه قلتلك هيا اليوم ماقد حسيتها مع احد غيرك ك
قاطعته : لأني مو وسسخه زيهم لأنك حابب دا الشي بس فتره وحتطفش بعد مانتزوج اكيد حتبدأ ت
قاطعها لما جا بااتجاهها واتكلم : للمى لا لا وربي مرا لا كآن كل واحد اتزوج طفش وساب مرته الحياه عمرها ماكانت كدا
لمى : لواحد عاش نفس حياتك الا كداا
عدي كسرته زياده بكلمتها طالع بعينها يبا يقول شي بس مو قادر
وبعد عنــها وهيا رجعت تجلس على السرير
مو قادره توقف على رجولها
صممت للمرا التآنيـه صوت بكاها الخفيف هوا اللي يسمعه
عارف انها بريئه لدرجه انو مستحيل تتقبل ماضيه
رجع وقف قبـآلها وهيا على السرير جالسه : سوي اللي يريحك يالمى معايا بس لاتجيبي سيره الطلاق ..ماتبي تردي عليا لاترددي ..ماتبي تكلميني لين ماتهدي لاتكلميني .. حديكي الوقت اللي تحتاجيه عشان ترتاحي
سـ
قاطعته : انا قلتلك كل شي عني عن تتتترف عن اخواني عن ماما وجنانها وانتا ماكلفت نفسك تقولي ولو شي بسيط من حياتتتك شي بسيييط لمحلي على الاقل
: ماببى اتكلم عن الموضوع اتكلم في حآجه انا دفنتها حاجه خلتني اكره نفسسي واخد فتره طويله عشان اقدر اعيش طبيعي
لمى : لو كنت اهمك ايوا
عدي : سواء قلتلك ولا عرفتي من برا انتي مآكآن اتقبلتي
لمى سكتت شتت نظرها ليش تكذب
صح الكلام جاه بطريقه تفجع من ميسا
بس حتى لو هوآ قلها كآن بكيت : يمكن انا غبيه لدرجه اني ماتقبل ماضيك
عدي جلس جمبها : مابقولك غبيه عارف الكلام صدمك لكن مو لدرجه انك تطلبي الطلاق انتي عليكي فيا انا ...لمى انا متغير من قبل لاأعرفك بفتره طويله لو كنت ابا الخراب كآن رجعتلو قبل لاأخطبك لمى سكتت عارفين اللي تبا تقتنع
بعدين تجي عند نقطـه في وحده حطت راسها بحضنه
في وحده باسها بخدها زي مايبوسها كل بعد كلمه
في وحده يمسك يدها ويضغط عليها لين ماتوجعها وتصرخ ويرجع يبوس يدها بديك الضحكه الشريره
في وحده اتغزل بعينها بشعرها بجسممها
في وفي وفييييي حاجااات مرا كتتتتتير
مجرد التفكير فيهها توجع ..
: لمى
: خللاص سيبني لوحدي
: ابا اقعد معاكي
: ماباك دحين ياعدي
مسك يدها : حقعد لين ماترضي
: رضيت خلاص
: لاتكدبي
: قولي ايش اللي تبا تسمعه
: مابى اسمع شي اباكي تخرجي اللي بنفسك
سحبت جسمها على ورى وحطت راسها عل ىالمخده وانسدحت عينه عليـها وهيا مابتطـآلع فيه
ترمش بهدووء
جسمها خدراان ومالها نفس تسوي شي
لين ماغمضت عينها
وهوا ولا اتحرك لنص سـآعه
ألم في قلبه وبس
المفروض يمشي خلاص .. يتفاهم معاها لما تصحى تكون هديت
قرب منها باسها ودوبـه بيمسك يدها ويدخلها تحت اللحاف الا هيا فتحت عينها
وسحبت يدها منو
غطت نفسها ورجعت غمضت عينها
ومآزالت حركآتها دي تجرحه زياده
خرج من الغرفـه اخد مفتاح الشقه قفل الباب من برا ودخلو من تحت البآب
واتوجـه لبيتهم
قبل ساعات كآن بقمه سعاادتـه
ودحيـن العكس تمآمآ
اتوجهه لغرفتـه وكعادتو ف دا الممود يطلع حرته بالنوم ..
أنآ لاأغآر انا أفقـد عقلي ..وانسـى رشـدي .. واتجآهل كبريائي .. وتنفجر براكيـن غضبي
إن اقتـرب احد منكـي ..هل فهمتي ياأنتي ..
ماشي في الممر الطويـل حاتط السمآعات وبيتكلم معاها .. : افتحيلي الباب خلاص
: طيب
طالعت في نفسها بالمرايـه وبعدها فتحت الباب وابتسمت من قلبها
دخـل حضننها وهوا مبتسم وكأنه دوبـه ماكآن حيموت واحد على يـدو
رفعها من الارض وهيا ضحكت بصوت واطي : روان نايمه
بشار: وحشتيني
هديل : وانتا كمان
نزلها ..مسك يدها وقفل الباب وراه : قوليلي ايش سويتي اليوم
هديل : ولاشي
بشار : ماقراتي الكتآب
هديل : الا مرا عجبني .. ايش سار مع سميـه
بشار جلس على الكنبـه وهيا جلست جمبـو : ماكلمتك ؟
هديل : لا قالتلي تبا تنآم فتحت الباب كدا مرا وهيا نايمه ولا بتسوي نفسها نايمه مدري حتى ناديتها مابترد
بشار : قالتلي انو ماتبى امها تحضنها وماتباها تقرب منها
هديل رفعت حاجبها بصدمه
وبشار كمل : وانها تبا تتعرف على امها حبه حبه
هديل : وامها ؟
بشار سكت شويا وبعدها قال : فعلا فعلا امها شاريتها طيبه وبتحاول ترضيها لو على حساب نفسها
هديل ابتسمت من ورا قلبها : كويس
بشار مسك يدها : ماحتبعد عنك
هديل : قلتلك اهم شي هيا مبسوطه لو اتقبلت امها فين ماتروح حكون مرتاحه
بشار : لأنك انتي حتكوني برضو مبسوطه ومشغوله بحياتك معايا
سند جسمو على الكنبه ودخل يده بجيبـه خرج جوالـه :فاكره يوم مارسلتي سميه تجبلي الجوال ._ حسها ماستوعبت _.يوم ماروحتي عند امك اول مرا
لانت ملامحها سيرة الموضوع بس قبضلها قلبها : ايوا ؟؟
بشار : اتجادلت انا وسميه وقالتلي على ههرجه سارتلك زمآن
هديل دقات قلبها بتزيـد وماعلقت
بشـآر سكت شويا وبعدها قال : موضوع كريم
ولا فيه اي تغيير بملامحها بس من جوتها حست بهبوووط
ايش تبااا روآن !.!!!
دارت راسها لما ماقدرت تطالع فيه كآنت حتقوم الا مسك يدها ..سحبها بحضنه
كآنت بترفع راسها من عليه الا حط يدو على راسـها : خليكي
تبا تتكلم بس مو قادره
اصعععب شعور في الحيآه انه وحده تتعرض للتحرش
حتى لو ربي انقذها ف اخر لحظه
بس الاحساس ماتنسآه
الترججي اللي كآنت تترجآه
نظرته كل شي كآن مقزز
كآنت حتبوس رجلـه وهيا تبـكي
كآنت حتبوس راسه عشان يسيبها .!
بشار مايدري عن تفاصيل كل للي يعرف انو امه على طول دخلت وهيا تبـكي ..
دا اللي روآن قالته ماحبت تديه تفاصيل عشان لايتجنن زيآده
رافع جوآاله وبيفتح الباسورد وهوا يكلمها بهدوء : سواء نسيتي ولا مانسيتي اللي ينزل دمعه منك اجيب حقك لعندك
عينها على الجوال ومرعوبـه
بشار فتـح المقطـع
وهيا وسعت عينها ورفعت رااسـها بشووويش
عدل جلسته
شككل كريـم
بس بيبكي
صوتــه مهزززوز
" سامحيـني انـ انآ غلطت بحقـك ..واستآهل إني ..اانذل وآندآس .. ووعد ووعد مني لو جيتي قدآمي لأنزل على ركبي واعتذرلك زي الكـلب "
خلص المقطع واتثبتت على وجهه الصوره ودمعتته بعينه
شككككله خآيف ومرعوب شكله بزببببط زي شكلها لما كآنت خايفه منـه
خلص المقطع بس مانزلت عينها من على الصوره لين مادموعها نزلت
دارت راسها وطالعت فيـه..مو عارفه ايش اللي سار .!
بشار حط جواله جمبـه
دار جسمـه عليه
مرر يده على خدها وهوا يتأمل عيونها : عارفه لو بيدي اقتله عشان انا ارتآح ... بس انتي اهم مني سويت الشي اللي حيخليكي مبسوطه
تخاف منــه .!!!
تعشقـه زيااده .!؟!
ااايش موقفها ماتدري
بس عارفه انو اللي قدآمها وآحد مجنــون
بس مجنوون فيـها
ومجنون بتصرفاته على غيرها
هوا معاها اضعف انسآن
كريم ..! ماتوقعت انها ممكن تآخد حقها منه في يوم
دعت عليـه وبس
ماتوقعت انو الدنيآ حتدور وحتشوفه بنفس شكلها
لا مو خايفه من بشاار
دوبها استوعبت انها مو خايفه
ايش تبآ امآن اكتر من كدا
هيا عاشت حياه وسخـه ولقت الانسآن المجنون اللي يقدر يديها انظف حيآه
بعد ماتبرد قلبها بالكل
عشان لايكون في قلبها حسـره
قربت وحضنته بكل قوتها
بككيت بصوتها : ليش سويت كدا
مارد عليها لين مابعدت وطالعت فيه وسئلتو تآني : افرض سرلك شي
بشار : ههههه هبله انتي
هديل تمسح دموعها : اييوا دا واحد وسخ ايش ت
بشار قاطعها : اهجدي ..لاتستفزيني لو يوم شافني والله ماحيقدر يرفع عينه بعيني
قلبها يدق بسـرعه لما يتكلم كدا
تحاول تشرد من الشعور اللي يخوفها وتفكر انو دا مستحيل يأذيها
مسكت يدو : اوعدني ماتسوي شي كدا تآني
وقف بشار : اكلتي ؟
هديل : انا بكلمك
بشار بحده بس بصوت هادي : اكلتتي ؟!
ماسبلها مجآل تدخل نفس يوم صآلح وبنتـه
لحظه صمت وبعدها قالت : ايوا
ودا اللي ماحتقدر عليـه لو حقـد مافي قوه تقدر تمنعه من انو يخرج الجنآن اللي براسه ..
حتى هديـل ..
هديل قامت وجات لحده مسكت يده : أحببك
بشار ابتسملها اتأملها لثواني وبعدها شال الشباصه اللي بشعرها : خلي شعرك كدا
هديل ضحكت واختفت ابتسامتها لما قالت : ايش سويتلو
بشار : خليتو يعرف انو ورآكي زوج
هديل بتفاجئ : منتا زوجي
بشار : ههههههه قلتلو اني زوجك
مرا مبسوطه لأنو كريم عرف : احسن
بشار : عشاني احبك ومابى ازعلك ماشوهت وجهه عارفه انك ماحتقدري تطالعي في المقطع _ مسك خده _ شايفه قد ايش احبك
هديل : هههههههههههههه والله حاسه اني ماعندي ضمير وانا اتناقش معاك بدا الموضوع
بشار : اخدتي حقك ماسويت شي غلط
هديل ابتسمتلو
بشار : تعالي نصحي سميه
هديل : هههههه تقوم معصبه دحين
بشار : مكسوحه ماحتقدر تستهبل وتسوي شي
هديل دفتو : حرام عليك
ضحك ومشي قدآمها ومتوجه لغرفـه سميه
هديل : بشااار والله نفسيه تراها
بشار ولا كأنه يسمعها وصل للباب : ادخلي قبلي شوفي عادي ادخل
هديل ضحكت
ولما دخلت روان نايمه اشرتلو وهوا فتح اللمبـه
وصل لحد السرير اتذكر يوم مآكآن نايم في السياره وفجعتـه
مشي بخطوآت لين ماوصل لحد رآسها حط ركبتـه على السرير
فيه حاجتين براسـه
يصــرخ ف ااذنها بكل صوتـه
يحس ماحيشفي غليله بالموقف اللي سوتـو فيه
وبنفس الوقت
خايف يعورها برجلها
اللحاف تقيــل ..
لو لفها ماحتقدر تحــرك رجلـها
وفجأه جات فكره حقيره براسـه
ضحك قبل لاييسويــها
بعد ركبته من على السرير ووقف على رجوله ويضحك
هديل ضحكت ومو عارفه ايش بــه
اييوا كدا حييبرد قلبــه
زفرر وهوا بيتمآلك نفسه ومايضحك
جا لعندها مسك بدآيــه اللحـآف ولفــها وهيا انفجعتت
مو شايفه شيييي لفها وشالها من السرير على كتفه
وهوا كآتم ضحكته
وهديل مفجوعه
خررج من الغرفــه
والمصيبـه انو خرج من المكآن بكبــره
روآن تعااافر وقلبها حيووقف وجهها محمر : مممممين
بشار ماقدر مايضحك وصل للمصـعد حطها في الركنيه وطلعت راســها
استوعبت انها بالمصعد
ضغط انو ينزل على اللوبي : مع سلامه ياقلبي
خرج وهوا يطالـع فيها وهيا مفجووعه تبا تخرج من الللحاااف الببببااب حينقفل : ب ببشــــــآر
وانقفل الباب وسمعها تقوول : ياااااااااااكلب
ضحك ..ضحككك من قلبـــه
متخيـل بس المنظر المصعد واجهته على كل اللوبي
وجهه محممممر من كتر الضحكك
سار يضحك من غير صووت وهوا بس يتخيــل شكلها
ووهديل واقفه مفجوووووعــه مابين الصدمه والضحكــه
طالع فيها قال وهوا بالقوه يتكلـم : بــسرررعه ..هاتي جووووالي ههههههههههه
ماسك بيده الجداار وداخل في دوآمه ضحككك ومية حاجه تخطر في بآلــو
ررروآآآن .!!؟؟؟!؟
مصدووومـه
مصدومه
صحيت وهيا ملفوفه بلحاف
فتحت عينها وهياا تترمي في مصعد
المصعد بينزل
الارقام بتتغير
المصعد حيووووقف
فين حيوقف
مين حيشوفها بدا المنظر
لحااف ياكبره مرمي في المصعد
ووحده جوتـه
راسها واكتافها بس اللي باينه
تحاول تعاافر وهيا تشوف الارقااام
تبا تبكي
لأول مرا تحس انها حتنحرج
لأول مرا تخاف انها تنحط بموقف بااايخ
خرجت اول يد ..ودوبــها خرجت تاني يد
والمصعد وقــف
وقلبها وقف معــآه
المصعــد انفتح
الساعه 12 الليل
بزبــط خمسه اشخاص
اضائــه اللوبــي الاصوات داخله في بعض واللي طالع في المصعد ماقدر يتحرررك
مو قادر يستوعب المنظر
رووان تتمنى تنشق الارض وتبلعها تطالع فيـهم وبصدمتهم
رمت جسمها على قدددآم ومشيت على ركبها واياديها
مدت يدها للأرقام وضغطت اللي يقفل الباب
دا كلللو وهيا تزحف والخمسه الاشخاص يطالعو فيها
ورجعت ضغطت رقم الدور ورمت جسمها على ورااا : حييييييييييييييوووووان
وجهها محمممر
من كتر مو محمر ومنحرجه تبا تبكي
فكت اللحاف بعصبيـه وخرجت رجولها ووقفــت
ببجامتها بشعرها الفوضوي وانفتــح الباب وبشار صوت ضحكتــه مستفزززززززززه
رافع جواله ويصورها : ههههههههههههههههه صباح الخيــر
تتنفس بصوووت مسموعع مو عارفه كيف تهجم عليــه
وجا ينقفل الباب وهيا ماتحركت وهوا حط يدو : يلا شيلي لحافك وادخلي نامي يلا يلاااا
وقف تصوير وهوا مازال يضحك
روان اشرت على نفسها وقالت بحقد : انا تسوي فيا كداا !!
بشار : ههههههههههههههههههههه بلله فيه ناس كتير ؟؟؟!
ومن غير ماتجاوب يرجع يضحك ههههههههههههه
وروان ولا اتحركت تبا تقتتتله
عينها لسى مورمه من البكى وودوبها غافيـه
مافي اي احترام لمودها الحزيــن
: حتخرجي ولا أنزلك تآني ههههههههههههههههه
مشيت خطوتين وهيا تعرج الا وقفت لما ناداها : سميه
طالعت فيه وعينها كلها حقـد
اشر على اللحاف : شيلي لحافك ياقلبي
ياأللللله هيا في راسها متخيله انها ماسكته في ركنيه وقاعده تخنقـه
خصـرته ورجعت تمشي وخرجت من المصعد ودوبـها بتعدي جمبـه الا قرب وجهه من اذنها بسـرعه
ورفع صوتـه : مــ
وقبــل لايكممل الجملـه انفجعت وكآنت حتتحرك بسـرعه طاحت في الااارض
دارت جسمها وصرخت بكل صوتها في المكآن : يااااااااااااحيوووووان
اتأثر ..!؟
ماات ضحككك كآن بيقولها " مو ااناااا اللي تصحيني على فجعه " بس مالحق ينطق الجمله
ماتوقع تنفجع
: هههههههههههههههههههههههههههه ااه ياقلبي
روآن سندت يدها على الارض وووقفت رفعت صباعها بتهديد : وووالله لاتندم والله يابشار
بشار : هههههههههههههههههههههههههههه _ فتح اياديه الاتنين وهوا يتكلم بصوت مستفز _ تعالي حضن حضن
جا لعندها ودفتتتو : انقللللع اقول
بشار : هههههههههههههههههههههههههههههههههههه
مشيت بعصبيـه وهيا تهررج وهوا رفع صوتـه : بشووويش على رجلك ههههههههههههههه
معصبــه
معععععععصبه
اخلاقها مقفله بشكل فضيـع
نفس موده لما صحته على ديك الفجعه
بس موقفها لايقارن بموقفه
هديـل اول مارجع المصعد يطلــع جريت على طول للغرفه تعرف رووآن
اول مادخلت تضحك بصووتها
مايحتاج يشوفو ردة فعلها بمجرد التخيل هما ميتين ضحك ..
اول ماسمعت صوت خطوآتها عدلت شعرها وكتمت ضحكتها ..
روآن دخلت ولما شافت هديل عصبت عليها : وانتتتتي ساكتتلو طبعا
هديل رفعت يدها باستسلام : انا مادخل بينكم قلتلو سيبها مارضي ..
بشار دخل وراها وهوا شايل اللحاف : سيبي مزتي ف حالها
روان طالعت فيه : والله لاأكرهك ف حيااااتك بس اصبر عليا
بشار رمى اللحاف بوجهها وقفل الباب : اسرري ياشيخه
تخيلي وانتي معصبه يترمي شي بوجههك ويطيح في الارض
برستيييج مااافي
مشي من جمبـها وراح لعند هديـل حوط يده حوليـن كتفها : تعالي حبيبي لاتزعلك المجنونه دي
هديل تمشي وهيا منكمشه على نفسها خااااايفه
يجيبولها الرعب الاتنين
حاسه روان حتجي تسحبها من شعرها
ججلس وهيا جلست جمبـه وروان واقفه مكآنها وتطالع فيـه
ومازآلت تفكر في مية شي وكلها اشياء ممكن تموتـه فيها من كتر الحقد
مشيت وهيا تضغط على رجلها اليسار وتمشي لين ماجات لحدهم
وهديل مضيقه عينها وتقولها ماليا صلاح بدون ماتتكلم
بشار :ارجعي نآمي
: حروح انام بس لمرا التآلته حقولك حتندم
بشار : يأللللللللله ماشيه دا كلو وتعرجي وحالتك حاله عشان تعيدي الجمله
هديل وسعت عينها مفجوعـه
مو ناوي اليوم يعدي على خير
روآن كل ماتحاول تمسك نفسها بحركاته يستفزها
خلاص مافراسها اي فكره
غير انها شايفه كوب شاهي جمبـها
حار
بارد
دافي
ايش وضعه ماهمها
بس نظررررررته مستفزززه ابتسامتـه كل شي
شالت وكبببته بوجهه بدوون تفكيــر
شههههق هوا وهديــل
وققف وراسه راخيـه وبينقققط
الشاهي بارد
روآن : مو انا اللي اصحى بداك الشكـل
بشار مرر يدو على وجهه لين ماوصل لدقنه جا لعنندهاا : انتي اللي بديتي اعرفي مع مين تستهبلي المرا الجايه
روان : عارفه عارفه والله لاأطلع عينك اصبر عليا
نبرتهم حآآآده مو مزح الموضوع
هديـل تبا تشرد مالها صلاح فيهم الاتنين
بس وقفــت الاتنين طالعو فيها وقالت بخوف وهيا تأشر : كـ كنت بروح الحمآم
لما ماعلقو جلست تآني : خلاص ماحروح مكآن
بشـآر : يعني ماتبي تهجدي
روآن : لا وحردلك هيا
بشار : طيب افتحي على نفسك ابواب
روآن : خلاص ولاتندم لو زعلتك وسويت شي يقهرك
بشار : ماحزعل
مدت يدها وهوا طالع بيدها ومشي يشطف وجهه
شمقت روآن وجلست قريب من هديـل : انا جيعانه
بشار غسل وجهه واخد مناديل : ايش تبيني اطلببلك
وقعدو يتكلمو وكأنو ماسار شي
وهديـل لدحين جالسه بزاويـه قائمـه ومن نظرتهم بس مجبسـه
تتخيل لو بشار كلمها بدا الاسلوب تقعد يومين تبكي
وتقاطعه كمآن
روآن تمسك رجلها : رجلي حسبيه الله عليك توجعني
بشار : هههههههههههههههههه بلله كيف بس الاحساس
روان ماسكه نفسها لاتضحك طالعت فيه : مرا غغغبي والله فيه عجوزه طالعت فيا مفجوعه وقامت تلبس نظارتها مسكينه من بعيد تطآلع ومو مستوعبه
بشار : ههههههههههههههههههههه انتي لحقتي تتأملي نظراتهم ليكي
روآن : هههههههههه والله احس كلهم محفورين براسي وكيف طالعو فيا مع انه اغلبهم العاملين بس برضو اتهنت
بشار : هههههههههههه _ طالع في هديل _ ايش بك حبيبي
هديل طالعت فيهم الاتنين : مني فاهمه انتو مسامحين بعض ولا لسى بينكم مشاكل !!
بشار عقد حوآجبه : مشاكل ايش ؟
روآن : ايش بها النفسيه دي
بشار اخدالمنآديل ورماها بوجه روآن : احترمي نفسك
روآن مسكت خشمها : آآآ
هديل : هههههههههههه احساس جميل انك تدافع عني من قبل لاأطلب
ارسلها بوسه على الهوى وقبل روان لاتهرج : ممكن تطلبلي اكل
بشار : سؤال نزلتلك التطبيق وعلمتك كيف تطلبي لنفسك وعندك فلوسك ايش تبي منننني
روآن : سبححححان الله وانتا كل ماكلمت الأميره حقتك تسئلهها ها اكلتي
بشار يستفزها : قلتيها اميرتي انآ اكلها بنفسي لو ماهتميت فيها اهتم ف مين انا
هديل ابتسمت وميلت جسمها بدلعع : آآآوه
روآن : وربي تجيبولي القرف جبلي اكل قبل لاتنسد نفسي
بشار : هههههههههههههههههه
هديل : هههههههههههههههه
سهـرو حـق ساعتيـن ..
هديـل كل شويـه تسرح وهيا تتذكر شكل كريـم اول شي يترسم في بالها عيونـه ودموعه بتنززل ماتوقعت انها تكون في يوم من الايام قاسيه لدرجه انو منظر كدا يشفي غليها ماتوقعت انها ممكن في يومك تتأمل واحد بدا الذل ونفسها ترجع تعيد المقطـع مستححيل تنسى اللي سواه بشار .
روآن جلستها معاهم تخليها ماتفكر بشار يستفزها بطريقه تخليها تخرج عن طورها وتنسى باإيش مرت طول اليـوم دخلت غرفتها اتصلت على تآمر ومارد مستغربه ماسئل عنها ورجعت جلست مع هديـل بيتكلمو كلام سطحي بعيد كل البعد عن سيره امها
هيا نسيت ولا بتتناسى هديل مو عارفه بس مو حابه تجيب سيرتها اما روآن كدا جمود وبـس تبا تشغل نفسها باأي شي عشان ماتتذكر دموعها ولا صوتهاا ولا حضنها ..
بشـآر رجـع لغرفتـه انسدح على سريره .. واخر شي ممكن يجيـه النوم بسـهولـه
ابوه حيصدر عليه الحكم قريــب عارف انو حيتسجن مؤبـد مع انو سمع بقضيه جديده اترفعت عليه بس مع هرجه كريم وام روآن وجلال اللي بيدور عليـه ماعرف ايش تفاصيـلها ..
غير انو بيتهم لازم بكرا يروحو بعد مالقى مشتري ..كيف حيدخلو كيف حيشوف اشياء حور بكل مكآن
دي الفكره لوحدها خلت قلبـه مقبوض
وكالعاده شرد من كل شي بالحبوب المنومـه وكآنت عشره دقآييق وغمض عينـه فيها .
_______________________
آه من النصيـب ... يأتي على غير هوآنآ.
يسرق تلك الأحلام والقصور اللتي بنيناها
ويرمينا في طريـق اخر ..
..
سـآمي دخل لغرفتـه اول ماشافهم جلسو في الصـآله ...
تميـم ساند اكوآعه على ركبـه ..ورآخي راسـه
مايبى يطـآلع فيـها
اصلا حركه يده تدل على انو مضاايق من الجلسـه
طالعت فيـه مو عارفه ايش تقولـو
ايش دخل بميسا وايش عرفو من الأساس برشـآ !!!!
بس مو وقت دي الاسئـله
صمت
ليـن مااززفر بصوت مسموع وسـآر يقول من ورا قلبه
بصوت مخنوووق : الحمدالله ... الحمدالله ... خيره
يقولها ويبا يبـكي
يقولها وكل كلمه توجعـه
ترف انخنقت بس وهيا تسمعه حاولت تقول اي شي : ربي يعوضك ان شالله
تميم ســكت
مو عشان يبا احد غيـرها
بس خآف ربي يعوضها باأحد غيره
بس الفكككره
كبتت على نفـــسو
مجرد التفكككير انو بجدد انتهى كل شي
خلاص هيا ممكن تكون ف يوم لغيره
اخد جوآله : دحيـن جي
دخل الغرفـه حقت خلـود وجلس على السرير
اتصـل ومتوقـع جوالها مقفـل بس دق
رنتين وردت
كآنت تبا تقفل جوآلها بس ماقدرت ربع ساعه وفكتـه
تبا تسمع صوتـه
محد اتكلم
انها تبـكي دا الشي اللي تقدر تسـويه
وهوا يسمعلها ودموعه بعينه وبالقوه قال : خلاص يارشا
رشآ : خلاص كل شي انتهى يعني ماحسير اكلمك ؟!!
تميم سكت شويا ويتكلم بصوت مو احسن منها : حتكلم مع ابوكي
رشا وسعت عينها بصدمه : انتا مجنون
تميم : مالك صلاح موضوع بيني
رشا قاطعته : تبا تفضحني انتا ايش حيقولو متمسك فيها ليشش
تميم : ناس محترمه عادي
رشآ : بابا كلمك بنفسه و قلك مافي نصيب
تميم : رشاا خلاص اخرجي من الموضوع انا حتكلم معاهم
رشا قلبها حيوقف : انتا ماتعرف بابا والله لو شك بشي والله حيقتلني
تميم : مو غبي انا حخليه يشك خلا
رشا قاطعته : تممميم لاتفجعني امااانه
تميم : ايش تبيني اسوي خلاص راضيه بللي سار
رشا : مني راضيه بس بنفس الوقت انا ععارفه انو ماحتلقى جوآب تآني اختك مرت طليق اختي
تميم : ايش يعنني ا
رشا بصوت كلو بكى : تمميم خلاص ارحمني لاتزيد اللي فيا
تميم : وانتي لاتخلي كلمه وحده تنهي كل شي
رشآ : رجائا ياتميم لاتزيد الموضوع عليا وتدخلني بمشاكل مع اهلي اللي فيا مكفيني
تميم سكت بصووت هاددي : مو مشكله ... خلاص ... الله يوفقك بحياتك
بككككيتتت
: مو عارف كيف اقولك مع سلامه ..حتصل عليكي بكرا ؟؟! ولا خلاص ماحتسيري تردي ؟!! مو عارف ايش اسوي ابا اصحى واسمع صوتك
هوا يهرج باانهيار وهيا تبككي من كلامـه
: تمـ يم خلاص الله يخليك خلااص
: انا ابا افهم حتكلميني بكرا ولا ماحتسيري تردي
: لو ماقدرنا بتدريج ياتميم نقلل من بعض نقلل مكآلمآت
ضحك ودموعه نزلت : حلو .. عادي كدا الواحد يقلل مككآلمات والمفروض ينسى صح ؟
رشا : خلااااص لاتحسسني انو ليا ذنب انا ماليا صلاح انا زيي زييك ماحقدر اتمسك فيك وانا عارفه انو ماليا نهايه معاك نكدب على بعض يعني !!!
تهرج بهجوميـه وهيا كداااابه تبا تتمسك فيه اكتر منوو
ويرجع يهرج بهدووء تآني : طيب ... فاكره لما قلتلك انو حياتي ماكآن لها معنى قبل لاأعرفك .. .. . طيب انا ايش اسوي دحين بدونك
مكآلمــه تقيـله على الاتنين
مكآلمه البكى هوا الشي الوحيد اللي معبر عن قد ايش كآنو متمسكين في بعض
كلمـه مع سلامه مو قادرين ينطقوها
ساعه
ساعتيــن
يهدو ويرجعـو مايستوعبـو
كيــف قفلت منـه .؟
قالتله ماما تبآني شويا اكلمك
كداابه
بس ماقدرت تقول مع سلامه
ماقدرت تنهي المكآلمه دي
نزلت جوآلها وبكيت باانهيااار
وهوا جآلس يستنآهآ
خمسه دقـآيق
عشـره دقآيق
ربع سـآعه
نص سـآعه
انسدح على المخده ويططـآلع بالجوال ..
ساعه الا ربـع
سـآعه
وغفت عينــه ...والجوال بيده
امـآ رشا ولا قدرت تنآم اتصـلت على علا وتبـكي
علا اللي ماتعرف ولاشي عن اهـل لمى وفجعتها بكــلام اول مرا تسمعه ... !!!
عدي ولا يفتح فمه بشي !!
مو عارفه تحزن على صحبتها
ولا على موضوع قاسم داود اللي طول اليوم يتكلمو فيـه
وعدي مر من جمبهم ولا كأنه سامع شي
امـآ تآمر ..
قاعد في مكآنه مو عـآرف ايش يسـوي ..
ماله نفس يتكلم مع احد
جـآه الدكتور واتكلم مع تآمر قلو انو حنقولها حالتـهآ
يطـآلع في الدكتور وقلبه يدق بسـرعه
مخنووووق مايبى يكون هنآ
مايبى هوا يتحط في الوجـه
خرج جوآله واتصـل على تميم مابيرد ورجع اتصـل على ترف قالتله دوبـه دخل الغرفـه
كآن بيقولها ناديلي تميم يجي الا قالتله ايش سار معـآه وسكــت
قفل منها وماقلهـآ شي ..
تعبب
تجي لحظظه للوآحد خلاص رااضي انو يكون ضعيف
هوا مايبى يتحمل مسئوليـه شي
خلاص موقف امـه لما اغمى عليـها لما جآبها فكرو بكل لحظه بوفـآة ابوه
وكيف شالو وكيـف دخلو المستشفى بنفسـه
وكيـف قلو الدكتور انو اتوفى
كآن للحظآت يحس انو امـه حيسرلها نفس الشي ..
خرج جوآله ولأول مرا حيتصل على ليـث ويقولو انا تعبــت خلآص
ليـث ..
قبلها بسـآعات
بيحآول يعوضـهم
بيحاول يكون الاب اللي حرمهم منـه
صح مو قادر يسوي حآجآت كتير
لسى ماحضنهم
لسى ماقلهم قد ايش يحبهم
في حاجات كتير مو قادر يتعدآهآ
بس بتصرافاته بيوضحها
ولأنهم اطفـآله ولأنها مرتـه شايفييين اللي بيسويه
شي مرا كبيـر ..
ودا شي يخليه يكره نفسـه لأنهم بدي البساطه
ف طريقـهم للشاليـه وقف سيـآرته : فيه احد يبا ينزل يشتري ؟
دآنه مافتحت فمها لأنو جملته المعروفه قوليلي وانا اجبلك : لا
أحمد طفل لساته صغير اخد على تغير ابوه بسـرعه ابتسم من قلبه : اناا
ابتسم ليث وفتح باب السياره وقبل لاينزل طالع في امل : تبي شي ؟
امل : لا ياقلبي
ليث : متأكده ؟
اشرت براسها وهيا مبتسمه برضو عآدتآ يسئلها من مرا ولو قالت لا يقول " كوويس "
نزل وجا احمد على طول مسك يده ويرفع راسـه ويطالع فيـه : انا مرا مبسوط
ليث : ليش ؟
احمد : عشان حنخرج نتمشى معاك وحنلعب
ليث لساته ماخرج كليا من شخصيته القديمه : لو ماسمعت كلامي حرجعك ترا
احمد : هههههههه والله والله ماأغلط ولا غلطه
ليث : ههههههههههههه ايش تبا تشتري
احمد : حشتري كل الاشياء اللي احبها انا ودانه عشان بعد المسبح ناكل وننبسط
ليث : هيا ماتبى شي
احمد : الا تبا بس خايفه تنزل عشان لاتصـرخ عليها
دوبـهم دخلـو ووقف ..
مايبى احد يخاف منـه خلاص : خليك هنآ
خرج واشر لدآنه تجيه من بعيـد
دانه مفجوعه وماتحرك لين امل ماقلتلها تنزل ..
نزلت من السياره وراحتلو وقلبها يدق بسرعه
ايوا مرعوبه اكيد فيه شي ..
حط يدو ورا ظهرها ومشي لين مارجعو لأحمد : يلا ادخلو خدو اللي تبوه
احمد : اي شي اباه اخدو ؟
ليث : هههههههههه شي حتاكلو مو تلملي المكآن كلو
احمد : طيب _ مسك يد دانه بحماس _ يلاا
ودانه واقفـه قالت بتردد : ماحتجي معانا
ليث : لا حستنآكم هنآ
اداها السله : خدي
زي امهـآ بزبـط ابتسامتها الهاديه اللي تعبر قد ايش مبسوطه
مو زي احمد مربوووش وياخد على اي وضع بسـرعه
هيا لسى ابوها القديم محفور جوتها ..
مشيـو من قدآمه وهوا اخد سله تآنيـه وبيتذكر ايام الخطوبـه واول زوآجهم
اي شي تحبـو امل ياخدو
مايعرف ايش تحب حاليآ مآكآن مهتم ..
يطالع في احمد ودانه وهمآ يمسكو اي شي ودانه تقولو لااا وهوا يقولها عادي عادي
ويرميها في السله
اهببل يخليه يبتسم وبس
لين مانتبه لدانه ماسكه شي وبتطآلع في سعره
كل مايشوفها تمسك شي تطآلع في سعره
كدا يراااقبهم
يبا يشوف هوا لإيش حول اولاده ..
عمرها 11 سنـه وترجع شي عاجبها عشان سعره
ساب اللي بيده وراح لعندهم
واخد كل شي رجعتـه وحطها في سلتها :خدي اي شي تبيـه
احمد دخل في الهرجه : قلتلها بس مسويه كبيره كأنها مآمآ
ليث ضربو على راسه : احتررم نفسك
احمد مسك راسه وقال بصوت واطي : طيب انا اسف
ماخلى شي بنفسـهم اشترو كل شي يبـوه وخرجو من المآركت وهما يضحكو وينطنطو جمبـو
ردة فعلهم جابتلو السعآده
مبتسم ويمشي
بس فيه هنآك انسانه مبتسمه اكتـر منـه
ماسكه بقدر الامكآن انها ماتبكي
ماتخيلت في يوم تشوفه كدا
وطلعو السياره واحمد يقول ايش اشترى
ودانـه تسكتو عشان صوته عالي وتبا تقول لأمها ايش كمآن اخدت
وعلى دا الحآل مضاربـه لين ماوصلـو الشاليـه
دخلو على اصوات حماس دانه واحممد وليث بس بيضحك
وامل تقول : وطوو اصواتكم
ليث : خليهمم
خرج الاغراض من السياره ودخلها
واحمد من الحماس مو عارف ايش يسوي اول شي : باااااابااا يللا نلعب كوره هنآ
: طيب دحين اجيـك
دانه واحمد على العشب الاخضـر
وأمل جوآ بتفتح الاكيـآس وترتب الاغراض لين ماشافت الاشياء اللي جبلها هيا ليث
تخرجهم وهنآ ماقدرت تمسك دموعها ...
دخل ليث ووقف فمكآنه لما شافها تخرج الاشياء وتبكي واول ماشافته مسحت دموعها
مايبى يقول عنها نكديـه
سارت ترتب بسـرعه وهوا ماتحرك
يتمنى انو يسوي شي
فيه كلام كتير جوتـه
يبا يقول نصـه
حيتجرأ
دي أمل
ليش سار باني بينه وبينها حوآجز
فين ليث اللي كآنت علاقتهم مبينه على الصراحه
ليش دحين جزء صغير من اللي جوته مو قادر يعبرلها عنه ..
حاول يضغط على نفسه مشي باإتجاهها
وهيا زادت ارتباكها بالترتيب ..
ادتو ظهرها وهوا جا لعندها تحت الاغراض على الطآووله وحط يدو على يدها : سيبي
سابت اللي فيدها طالع برا لقى احمد ودانه مشغوليـن وبيلعبو
رجع طالع فيها وهيا منزله راسها : ايش بك
اشرت براسها بدون ماتتكلم
جات بتسحب يدها الا هوا شد عليها : اممل
كلمـه امممل بصوتـه الهاادي
من غير مايصرخ
من غير مايعصب
بكتتها زيااده
تشتت نظرها وماتبى تطالع فيه
: زعلتك في حآجه
: لا
: طيب ليش بتبكي
قالت بضعف : انا مبسوطـ ه
لانت ملامحه
وهيا كملـت : ليث لاترجع زي اول لاتخليني انبسط وترجع تكسرني انا وبزورتك تآني
اشر براسـه يعني طيب ماعرف يتكلم
وقال بصعوبـه : لاتبكي
مسحت دموعها : طيب _ ابتسمتلو بين دموعها _ شكرا على الاغراض
مارد بس حركه يدو على يدها وملامحه الهاديه كآنت معبره
موقف بسيــط بس بنسبه لهم يعنننننيلهم كتير
لها ولــه
عارفه انو مايعرف يعبر
عارفه انو حاليا بنسبه له بيحاول يرضيـها
وهيا حترضى بالقليل ..
بتمر السآعآت
وضحكآتهم هيا اللي بتطغى على المكآن
وبسبب اسلوب احمد ليث بيتعدى الحدود اللي حاتطها
يسحبو يلعب معاهم كورهـ
ودآنه تكون متوتره وبعدها تبدأ تلعب وتنسى نفسـها
نزل سبح معآهم ودانه بس تنآدي أمل لين مانزلت معآهم
انقسمو فريقين
احمد وليـث ودانه وامـل
ولعبو كوره في المسبح
ضحك من قلبـه
دااانه نسخه امل في كل شي
خوااافه زيها
خلصـو لعب وليث سبح لين ماوصل لأمل وهيا رفعت صبـآعها بتهديد : ليث امانه لاتقرب والله اخاف
ليث : هههههههه ماحيسرلك شي
: انا مبسوطه ف مكآني
ليث : مابردتي وانتي ماتتحركي
: لا
ليث ماتحرك ومن نظرته خافت : انا خارجه
دوبها بتبعد الا مسكها وهيا صرخت
احمد صرخ : ايووووووووووا يابااباا
ليث : هههههههه ماتثقي فيا
امل متعلقه برقبتـه : امانه لاتروح للغريق والله اخافففف
ليث : هههههههههههه
ولا كأنه تكلمـه
واستممر صريخ أمل
واستمرت ضحكآت ليث واولاده
وخرجو كلـهم من المسبـخ واخدولهم غفـوه وصحيـو كملو لعـب
وجآ اخر الليل والا تبآ تنزل دانه تسبح تآني
وهنآ امل واقفه تنتبهلها واحمد اتشجع ونزل تآني
وليث جالس على الكرسي خارج اسوار المسبـح
ومشغول ف جواله ويقرا عن قآسم داود
موووده كله انقلب
بيحاول بقدر الامكآن ماينكد عليهم ولما ينادوه يرفع راسه ويبتسم
ومن جوتتتته يبا يبكككي
النآس بتدافع عنها تعليقاتهم هجوم عنيف على قآسم
ساب جوآله جمبـه
جاتـه امل وابتسمتلو : حبيبي انا حروح اخدلي غفوه طيب ؟ تنتبه عليهم
ليث اشر براسـه : طيب
ودخلت تنآم وربع سـآعه ودانه خرجت وجالو اتصـآل من تآمر
وقـف ويطالع بالجوال قلبه مقبوض مالو نفس يرد
بس رد بعد صرااع طويل ..
: هلا تآمر ..
تآمر : فينك ياليث
ليث انفجع من صوته : فيه شي ؟!!!
تآمر : امي ف المستشفى
ليث طآح قلببه : اااايش !!!!
تآمر : هيا كويسـآ بس مو متذكره شي مو عارفتني وانا خلاص انخنقت
ليث ماستوعب شي : كيف كيف مو متذكرتك
تآمر جلس على الكرسي وقلـو بالتفصيل كلام الدكتـور : ودحين دخل يقولها حالتها بالتفصيل وانا مابى ادخل
ليث : طيب طيب انا جيك دحين عندك احد
تآمر : لا ماقلت لأحد
ليث : طيب ا
تامر قاطعه : أهدى مافي شي يخووف هيا طيبه وصحتها تمآم
ليث : ايش سرلها
تآمر : قرأتها موضوع ترف قلت يمكن تستوعب انو احنا ظلمناها بس ماتوقعت انو يسرلها كدا
ليث : انتا عارف انو دي المواضيع ماتنحل كدا ..امك اللي عندها مرض نفسي تجي تصدمها بمصيبه تآنيه
تآمر باانفعال : لحدد يقولي انا غلطان دي تاااني مرا اتحط بدا الموقف وتاخد اهلك ياليث وتمشي وانا اتحمل كل شي ترا اللي فيا مكفيني تبا تجي توقف معايا تعال تبا تطلعني غلطان خليك مع اهلك ولاتخليني اشوفك
ليث سمت ومارد ..لو كآن الوضع طبيعي المفروض يقفل بوجهه تآمر لأنو قلل احترامه
بس عارف انو يستاهل اي شي يجيـه وقال بعدم استيعاب : تآمر !
تامر مارد
ليث عرف انو بيبكي : انا جيك دحين
: طيب سلام
وقفــل على طول من غير مايسمع رد ليث
مضغوطططططين بشكل مو طبيعي
كل واحد الي بنفسه شي فوق طاقته احيانا كتر التفكير يدمر يتعببب اكتر من اي موقف
حاسين انهم عايشين بس مو مرتاحين من جوآ
مشي ليـث وهوا مسـرح
نظراته على الارض
مرتاح انو تآمر قلو انو صحتها كويسا
يبا يروح يطمـن بس مكسوف حتى يطالع باأخوانه
اتنهـد بضيـق
ورفع عدسـه عينه : احـ
واختفى صوتـه لما شاف جسم ولده دوبـه بيترفع على سطح المويـآ
ف ثآنيـه
اتوسعت عينـه
نادى بكللل صوتـه : احممممد
خطوآآآته السريـعه
يفتح باب السووور
جسمممه يتنآفض
رمـى نفسه في المسبح بدون تفكككير
سحببب جسم ولده وخـرج
ف نفسس الدقآآيق
دانه تخرج على صوت ابـوها وتوقف مكآنها مفجووعه
ماتحركت ماسووت اي شييي
خرج ليث وحط ولدو اللي مافتح عينه ولا أتحرك اي حركــه
جسمه ينننقط مويا على العشب الاخضرر
ماستوعب الا انو يححرك ولده بخوووف وينادي وقلبه حيوقف مع الفجعه: احمممد احممممد
امـآ امل صوت المسبـح واصل لعندها ... التكيف مركززي
تسمع كل شي حتى خطوآتهم
اندمج صوت المسبح مع صوت ليــث
صرختته الاولى كآنت مفججعه وحسبت انها تحلم
وبعدها سارت تسمع اسم احمد يتكرروصوت المسبح ولما حست انمها مابتحلم
جلسسست وطالعت حولينها بس سمعت احممممد تآني
بعدت اللحاف عن جسمها
مالبست شي برجلها
خرجت تجري زي المجننونه
مانطقت بلاشي شي غير الشهقققه لما شافت ليث بيسويلو تنفس اصطناااعي
حطت على قلللبها ومممشيت بخطوووات سريعه نزلت على ركببها
ليث رفع جسمه يطالع فيـه يطالع بعينه بيده
يبا اي شي يتحرك
يحس نبضات قلبـه
ويرجع يسويلو تنفس اصطنـآعي
أمل مازالت عيونها وتنفسها هوا اللي يعبر
كلمـه : ولددي ... ولدي ..ولدي
بصوت متقطع خفيييف
رفع ليث جسمه ونزلت دموووعه حط يده على صدر ولده ويضغط عليــه
مرا ومرتين وتلاته ويشيل يده
ويرجـع يسويلو تنفس اصطنـآعي
ويحس نبضـه
ورفع يده على صدره ويضغط عليـه مرا ومرتيـ
وجاااهم صووت تنفسـه
اللي كأنو واحد رجججع من الحيـــآه
صوووت بكككااهم من فجععتتهم
امل نزلت جسمها لولدها وتحضنه وتببببكي
ليث مثبت اياديه في الارض من كتر ماتتنافض ومو قااادر يتحررك
يبا يشيله
يبا يوديـه المستشفى
بس مو قادر يوقف على طووله
امـل تطالع بولدها شفايفه مزرقه تحسو بوعيه ومو بوعيه
اتكلمت بصوت متقطع : حبيبي ايش بك _ مررت يدها على خدو _ انتا كوويس
رفعت يدها التآنيه وضربت ذراع ليث وعينها على ولدها : ليث ايش بوو
لليث : روحي جيبلي مفتاح السياره _ ماتحركت ولساته تمسح المويا من وجهه ولدها _ قووومي
وقفت مشيت بخطوات على ورى وهيا تبكي وتطالع في احمد ورجعت دارت
جسمها بتشتت
امـآ ليث اول مارفع ولده اترمى راسـه الصغير على كتفـه
مو عارفين هوآ مرهق ولا ايش اللي بيسرلـه
بس مرعووبين
امل اخدت المفاتيح وعبايتها وخرجت جججري
سحبتتت دانه من يدها وخرجو برا الشاليه فتحت السياره وكآنت بتاخد احمد الا ليث صررخ : سيبيييه
ركــب ومخلي ولده ف حضنــه
شغل السيـآره وحررك ودموعه تنزززل
هوا غفل عنـه
لو سرلو شي لايتجنن
اول مرا يعرف اشياء كتير عن ولده
مايبى دي الذكريات بس يبا يعوضـه
لسى فيه حاجات كتير يبا يسويـها
حاجات كتير يبا يقوله هيآ
يبا يحكيـه
مايبى ينحرم من ولده
مايبى ينحرم منـه زي مانحرمت ترف من ولدها
خرجت شهقـه منـه فجعت امــل
امــل اللي ماده يدها وتمررها على رجول ولدها وتدعي بتكرار : اللهم اني مسني الضر وانت ارحم الراحمين ..اللهم اني مسني الضر وانت ارحم الراحمين
وسكتت اول مابكي ليث بصوتـه
ليث حوط يده حوليـن راس ولده ومثبتـه على صدررره بكل قوتـه
وبيده التآنيه ماسك الدركسون بالقوه
وجهه محممممر
دمووعه تنزززل
امل : للليث ووولدي ماحيسرله شي لاتتتبكي ...بقوووولك لاتتتتبكي
ولا كأنه تكلموو
سندت جسمها على الكنبه وبكيت باننهيااار
بس دعائها ماختفى طول الطريق تدعي بصوووتها
لدرجه انو ليث بدأ يهدا من بكآه بسبب دعاويـها
وبيكرر في قلبه وراها يطالع في الطريق ويرجع ينزل عينه على ولده
وكآنت اطول عشره دقايق عشان يوصلـه لأقرب مستشفى
بس اول مالمح الستشفى نزل يده على رقبـه ولده لما سار مو حاسس تنفسـه
ومافي اي نبـض
عينه على الطريق ويده على رقبه ولدو
ومو حاسس بشي
مو حاسس انو ولدو يتنفس
مو حاسس انو قلبه بيدق
الصمت
الجمووود
الدمووع اللي بعينه
مكممل طريقه وهوا عارف ولده ميت في حضنـه
ولا فتح فمـه بكلمـه
اول ماوصـل
نزلـه بسـرعه ودانه تلحق وراهم وهيا تبكي بصوتت هادي
ناسينها وهيا تبا تموت من الخووف
وسارو يسئلو ليث ايش سرلو
وفين غرق بزبـط
وقد ايش المده
اسئله كآن يجاوب عليـها وبعدها اختفو من قدآمه
ومممشي في الممر وهواعلى قد ماتتحرك شفايفه من البرد
على قد مو حاسس بالبرد اكتتر من الخوف اللي جوت قلبه انو يسير شي لولده
امل اتوجهت لليث : ليش مممشي بسـرعه فيه شي يخوف
ليث : مددري
امل : طيب اتصل على اصحابك الدكاتره قولهم ايش سرلو بعد ماغرق
ليث : امل امممل اسسسكتتتي الله يخليكي
امل وطت صوتها وقالت بقهر : دا الشي الوحيـد اللي اعتمدت عليك ف حياتي ف ساعه ياليث ماقدرت تهتم بولدكك
ليث شرد من كلامها على طول ماسبلها مجاال تقول كلمـه زااايده
انهياره مو من فراااغ عاارف دا الكلام كلللو
جلس على اقرب كررسي ومسك راسـه وخلل يده في شعره ويدعي بصوت هادي : اللهم لاتجعل ابتلائي ف اأبناائي اللهم لاتجعل ابتلائي ف اأبنائي اللهم لاتجعل ابتلائي فاأبنائي اللهم استودعتك ابنني
يدعععي ويدعـــي والوقت مازال يمر عليهم تقيل
لين ماجاه الدكتور وعلى طول قام ليـث ورحلـو وامل جمبـو
الدكتور يطالع فيهم مو عارف ايش يقول
يكره دي المواقف : الحمدالله سوينآلو انعاش .. لكن
عيونهم عليـه
الصمت دا اللي اخد منو ثانيتين قلوبهم كآنت حتوقف فيهم
حاول يكمل الدكتور : دخل في غيبوبه بسبب
امل بعدت على طوول وهيا تبـكي وليث واقف يسمعلو
الدكتور طالع في امل ورجع طآلع في ليث وكمل :بسبب الغرق الاكسجين ماوصل للمخ بشكل كفايه فافي مناطق بالمخ اتأذت وخلايا المخ ماتتجدد زي باقي الجسم ...فاالله واعلم اذا فاق من الغيبوبه اللي هوا فيها ايش حيكون ناقصه
ليث يطالع في الدكتور مو عارف ايش يقول
كآن عارف انو ولده احتمال كبيـر يموت
وعآش
دحين الكلام الي بيقوله برضو صعــب !..رمشش عينه بهدوء ..بلع ريقـه .. قال بصعوبه : ايش حيكون ناقصه .؟
الدكتور : ممكن لاقدر الله مايقدر يمشي ممكن يفقد حاسه من حوآسه السمع الكلام البصر إحنا مانقدر نحكم لين مايفوق
مافي اي رده فعـل من ليـث
الدكتور ابتسم باألم وحرك يدو على كتف ليـث مرتيـن ومشي من دا الموقف اللي محد يحب ينحط فيـه
رجولـه مو شايلته
الا الضنــى
دا اللي يكسـر الوآآآحد بجددد
امل بتبــكي وهيا مو عارفه تكملة الموضوع
عيونهم الاتنيـن تعبر عن وضعهم
صمت ليـث وبكاها وبنتها اللي مشتته بينهم
شكلهم المبهدل لابسـه عبايتها بالمقلوب
ملابسـه البااارده من كتر الهوى مايصقع فيه وبدأت تنشف
طيب حيقدر يشوف ولده ..؟!!!
رآح يدور على الدكتوور بدون وعي مر من جمبـه بس مانتبهلو
يطالع يمين ويسـآر
ولدي ممكن مايمشي تآني !
ولدي ماحيتحرك بسببي
ولدي ممكن ماسمع صوتـه
ممكن مايسمع احد
ممكن مايشووف النور تآآآني
ويمممشي ويدووور
لين ماخلاص
جلس باانهيااار في مممر النآس رايحين وجاايين فيـه
مسسك بيده الحديده اللي عالجدار
ونزل على ركبـه وبككككي
والنــآس تطآلع فيـه
وامـــل بعيد عنــه حاضنه بنتها وتبــكي .. واول ماخرجو احمـد
وشافت ولدها الصغيير على السرير بدون اي حركـه
كأنه ميت
انهآآآرت تآني
وبعدها اتصلت على اهلها تبا امها وابوهاا
امـآ تآمر سآعه مرت والدكتور سمحلو يدخل لأمـه وهوا مستني ليث
يرفع جوآله يبا يتصل بعدين يقول بكيفه عسا عمرو ماجا
وبعدين يرفع الجوال مو عوايده ليث يدي كلمه ومايسويها
مو عوايده يعرف انه امي تعبـآنه كدا ويخصرها ومايجي
يكون سآر شي لاقدر الله في الطريق
اتصـل عليه وجواله مقفـل
وهنآ اترعب
استنى خمسه دقايق
عشره دقايق
ربع سـآعه
نص سـآعه ورجع دق وجواله مقفـل
لو في الطريق كآن شحن جواله في السياره
ماحيخلي جواله مطفي حيسئلو فينكم بزبط
عشره دقايق تآنيه عاشها بصراع
وهوا يطالع بالوقت ويتصل على مرته ولا لا
" لا استحي على وجهك "
" جواله مقفـل وهوا مديني كلمه انو يجي ايش فيه سبب اقوى من كدا عشان اتصل "
" بس اطمن لو طلع ساحب علينا وقتها بكيفه ولا أبى شي منـه "
يمرر يدو على ذقنو وبيدو التآنيه الجوال وبيطالع في اسم " امل "
ودق لما قلقه زاد والشيطان يلعب في راسـه
وجآه صوت امل اللي خلاه يتأكد انو فيه شي : السلام عليكم
اخدت نفسها : وعليكم السلام
تآمر سكت شويا متأكد فيه شي ولا هيا صاحيه من النوم ماعرف ايش يقول : معليش على الازعاج
قالت بصوت عالي : تعالي يادانه هنا
واضح صوتها انها بتبكي ورجعت تتكلم وهيا ماسمعته ايش يقول : ايش قلت
تآمر باارتباك : جوال ليث قصدي ليث عندك
: مدري فينو
تآمر بددأ يتوتر سامع اصوات حوليها : معليش بس انتو فينكم
: احنا في المستشفى _ بككيت وكل ماتقول لأحد تبكي وكأنها مو مستوعبه _ احمد غرق في المسبح ودحين هوا في العنايه المركزه
تآمر بعدم استيعاب : ااايش !! ...انتو انتو في اي مستشفى
بس قالتله قفـل واتصل على تميم على طـول ..
رد عليه وصوتـه كلو نوم مو مستوعب كيف نآم
مو مستوعب ايش سار معاه هوا كآن يحلم
هوا بجد حقيقه اللي سار بينه وبين رشـآ
بس رد وانتهينا : ايوا
تآمر : تممميم قوم وروح لليث
تميم : خير ايش فيه
تآمر : احمد في العنآيـه المركزه
تميم رفع جسمه من على السرير : ايش سرلوو
تآمر : امل قالتلي انو غرق في المسبح
تميم قام من على السرير هوا بيتكلم خرج بصربـعه وانتبه لمفاتيح الشقه
حاتطها على طاوله الصآله
اخده ولبس جزمـته وخرررج وهوا مفجوووع
تآمر جا لحد باب غرفه امه شافها تتكلم وتحكي المريضه اللي تشاركها بنفس الغرفه
يتكلمو ويضحكــو ..
ورجع خررج راح لدكتور واول ماوقف قباله قلو : اسئلك بلله امي طيبه ؟
الدكتور : والله شوفه عينك ماشالله
تآمر :يعني مافيها شي تآني لاقدر الله
الدكتور : لا الحمدالله سليمه وبصحتها ومافيها شي
تآمر حرك راسـه بتشتت وقال : طيب شكرا
خررج من المستشفى وعقلـه عند امــه وبنفس الوقت مو قادر يسيب اخوه
بس مطمن انه في احد شاغلها ..
كل وآحد في سيارته متوجههين لنفس الاتجاه
مفجوعين
خايفين
حتى لو كارهين اخوهـم
ف دي المصـآيب ماحيكون في قلبهم شي عليه
وصل تميم قبـل تآمر .. يتصل على جوال ليث مقفل
واتصل على امل اهلها معآهآ .. مافهم شي منها
حزنآن على دآنه وهيا كدا .. اخدها وجلسها بعيـد عن امل وكلامها
عارف انه مو بعقلها بس قلبه ضعيف عند الاطفآل ..
يمرر يده على شعرها ويكلمها : لاتبكي امك خايفه .ان شالله اخوكي مافيه شي طيب ؟
اشرت براسها وهوا مسحلها دموعها : خليكي هنآ
وقام واتصل على تآمر : ايوا تآمر ...ليث مدري فينـه ... والله مافهمت شي من امل .. طيب حدور عليه .. خلاص انا حنزلك
ونزل لتآمر
ودورو على ليث في المستشفى كلـها
تآمر : متأكد انو ماخرج ؟ يمكن راح يجيب شي !
تميم : والله مدري
وخرجو يدورو على سيارته
ويمشو ويمشو لين ماشافـو سيارته بس قربـو لقووه جالس
ساند جسمو على الكرسي وبيطآلع في سرحآن
دق الطآقه تميم ودار راسه بفجعه
واول ماشاف اخوانه فتح الباب من غير اي تفكيــر
نزل دوبـه وتميم بيهرج الا ليث حضنـه وبككي
اتكلم على طول باانهيآر : ولدي احتمآل مايمشي .. احتمال مايتكلم ويقولي اللي بنفسـه .. ولددي احتمال مايشوف بعد كداا
..آآآه انا ااايش سويت ااايش سوويت فييه
تميم مافتح فمو بكلمـه
تامر قرب منـه وحط يدو على ظهرو ومحد سئلو ايش الموضوع بزبـط : اذكر الله ياليث م
ليث بعد عن تميم وسار يضرب على صدرره بقهرر : كلوو بسببي انا ولدي حيروح مننني
وكآآن هنآآك الانهيـآر
صررخ اتكلم بندم بقههههر
نزل بمستوى جسمه للارض وهوا ساند جسمه للسياره وغطى وجهه وبككككي
واخوانه جلسه حولينه حاولو يقوموه
حاولو يكلموه
بس مابيسمع
بيتكلم ويقول كلام يحرققققهم
محد عارف ايش يعني ولدك من لحمك ودممك بس متصورين ألمه
بكيــو معآه لما سار يدعي بصوته " يارب خد من صحتتي واديه لوولدي "
" يارب خد سمعي وبصرري "
" انا مابى شي من الدنياا الا سلامتـه " ويرججع يبككي
ويرجععع يتكلم لييين ماختفى صوتـه
واختفى صوت بكآه
وبدأت تخاف دموعه
بدأت عينه تذبــل ومثبته بمكآن واحد
جالس على اللارض والانكسار واضح من جلسته ككل
تآمر مسكـو : قوم ياليث خلاص قوم وادعيلو
دي الحاله اللي لما توصلها ماتقول لأ لأحد قام وتآمر ماسكـه : تعال تبا تدخل
ليث هنآ سحب يده : مابى اشوف امل ولا دآنه خلوهم يرجعو البيت
تميم : ماحترضى ترجع دحين
ليث : ماحقدر اطالع فيهم والله ماقدر
تآمر : مو مشكله نقعد ف مكآن تاني
ودخلـو وجلسوه وتآمر مابين يبا يرجع لأمه
مابين مو قادر يسيب ليـث
ومرت سـآعه وساعتيـن
والوضع مافيه اي جديد امل عرفت من الدكتور كل شي
خلت دانه ترجع مع امها وابـوها
وجلست لوحدها بقسم مو قادره تمشي قالولها ماحتقدر تشوفه وبرضو مو قادره ترجع البيت
وليث في دور تآني اخوانه جمبـه
تآمر مسك تميم بعيد عن ليث وفجعه بموضوع امـه
واخر شي حيفكر فيه موضوع رشا وهوا مشتت بين فجعته باأمه
وخوفـه على احمد
ونفسية اخووه المدموره
اضطر تآمر يرجع ...وتميم مع ليـث لين ماقلو روح اشتري لأمل شي تآكلو واديها
وسوا زي ماطلب بس مارضيت تآخد شي
لاأمل تبا تشوف ليـث ولا فكرت تدور عليه وتقلو تعال
ولا هوآ يبا يطالع بعينها
تئنيب الضمير اللي يعيشه اقوى من انو يتحمل نظرتها
ورجـع تآمر لقـى امـه نايمه دخل وجلس على الكرسي اللي جمبـها .. وكل شويـا يتصل على تميم
انتهـى اليوم لأغلب اللنآس لكن ماحينتهي اليوم لأم وأب ولدهم بحآلة أحمد
ماحينتهي لأخوان عقولـهم مشتته بين امهم واخوهم وولد اخوهم
ماحينتهي لإنسآنه حطت كل احلامها وامالها وحياتها الجيـه على رجل وطلـع عكس توقعاتها
ماحينتهي لوحده خايفه من الانسانه اللي دخلت في حيآتها والمفروض تقولها ماما
ليـث جالس بنفس مكآنه ... امل ماسكه جوآلها وتقرا قرآن
تميم مع ليث بس نايم وهوا جالس بدون مايحس ... لمى على سريرها هدوئها سيد الموقف
تآمر على الكنبه المريحه بس مو حاسس من جوته باأي راحه
تـرف غير عنهم هيا حاليا صاحيه مبتسمه لما فتحت عينها وسـآمي واقف وشايل ف يدو فطور لها ..
رفعت جسمها
حست باإحسساس زمان لما تزعلو وهوا اللي يجي يراضيـها ..
حط الاكل وجلس جمبـها : ماما زعلانه مني
عيونها شبه مفتوحه حركت راسها بالنفي
وقال على طول : انا اسف _ وكمل بتردد _ امس كنت مرا خايف
ودي الجمله تكفيها انها تنسيها كل شي ...
بشـآر صحـي بالقوه مصددع من تأثير الحبوب اللي ياخدها
على قد مايرتاح في نومتـه على قد مايكره شعور اول مايفتح عينـه
وتبدأ كل الافكآر تجي برآسـه
سميه وامها
امـه وهديل
جلال
محاكمه جآسم
بيعة البيت ..إلخ
قآم واتوجه للتلاجه الصغير اخدلو عصيـر وشربـو وبعدها خرج
بشكله اللي يدل لساته انو دوبـه صاحي
وعيونه المنفوخه من كتر النوم
ولبسـه الشورت الابيض والتيشيرت الأزرق
دق عليهم وهوا كالعاده يدور على هديل اول مايفتح عيـنه
يبا الحضن اللي يخليه يبدأ يومه
بس سميـه فكت الباب وهوا كشـر : اعوذ بلله
شمقت بوجهه : ست الحسن والجمال نايمه تباني اهلا وسهلا ماتباني حقفل الباب بوجهك
لما مارد دوبها بتدف الباب وتقفل وحط يدو : امشي حالي فيكي كيفك
اتنرفزت وبرضو حاولت تقفل الا ضحك : بمزح معاكي سايره مستفزه
دخـل : ايش مصحييكي
سميه : الساعه 12
: ايش حتسوي طيب
جلس على الكنبـه وطالع ففيها
سميه : مدري
بشار بتردد : انتي عارفه انو اليوم دلال تبا تشوفك
سميه جلست : ايوا
بشار : اختاري المكآن اللي تبيه والوقت
سميـه : مو دحين ماليا خلص خليها في اللليل
بشار : طيب ..كيف رجلك
سميه : احسن ... ابا اخرج
بشار : على فين .؟
سميه : مافي مكآن معين بس بخرج مخنوقه من الجلسه
بشار : وطبعا تبي لوحدك
سميـه : ايوا
بشار سكت وبعدها قال : طيب على شرط
سميه رفعت حاجبها : ماجيت استئذن
بشار : لو ماتبي تمشي على شرطي والله مالكي خرجه
سميه : لا بلله
بشار : إنتي عارفه دا الشي
سميه : وانتا عارف لو ابا اخرج حخرج
بشار : وانتي عارفه لو ماباكي تخرجي فمحاتخرجي
سميه : حيطول الحوار دا ؟!
بشار : على كيفك تبي تسمعي شرطي ولا نقفل الموضوع ؟
سميه ضمت يدها : ايوا ايش هوا شرطك ؟
بشار : تروحي مع السواق
سميه : سواق مين ؟
بشار مايبى يقول سواق حور : سواق العيله
سميـه : وكم دا ياخد
بشار : ههههههههههه مالك صلاح ها تبيني اناديه ؟
سميه حركت عينها بشموخ وهيا ماتبى تطلع خسرانه في النهايه : يلا تريحني من المشاوير
بشار : اهم شي ياهبله لاتديه فلوس طيب
سميـه : احسن برضو
واتصـل على السوآق اللي قاعد عاطل بـآطل يشتري مقاضي امـه دا حدو ..
وقعد مع سميـه حق سآعه وبعدها هديل خرجت هوا ابتسم وسميـه وقفت : حرووح استحمى قبل لايترفع ضغطي ..
دخلت لغرفتها وهديل مبتسمه ف مكآنها ولساتها واقفه ..
اشرلها : تعالي ياعمري
مشيت بخطوآتها الهاديه واول ماجآت عندو وقف وحضنها : يومـي دوبو يبدأ لما اشوفك
ضحكت : احب افتح عيني واشوفك قدآمي
وأخدهم الكلام وسميـه بغرفتها ... متنرفزه من تآمر ماسكه جوالها ومو عارفه
ليش مو مهتم
ليش ماتصل يسئل عنها
مو قال حيتصل على مواعيد الدوآ
مو المفروض يعرف ايش سار مع امها
رمت جوالها بقهر لما حست انها حتبكي ودخلت تستحمـى ..
امآ بشآر . . .
ماسك يد هديل وبيلعب في الخآتم الي بيدها : هديل
:ايوا حبيبي
: خلاص
: فيه شي
زادت حركتـه وهوا يلعب بخاتمها : لا
سحبت يدها بشويش ودارت عليه بااهتمام : بشار ايش فيـه
جا يقوم الا مسكت يدو وماخلتو يتحرك : امانه قولي ايش بك
: كنت بسئلك اذا تقدري تجي معايا
هديل : فين ّ؟ّ!
هرج بتوتر : فيه واحد يبا يشتري البيت ولازم اروح ارتب الفوضى اللي سارت في اخر يوم ... ماليا نفس ادخل البيت وغصبا عني حدخل وماليا نفس اشوف شي .. كدا مخنووق وبس
هديل مسكت يدو : حجي معاك
بشار : على قد ماباكي معايا بس وربي مابى انكد عليكي انا عارف
قاطعته : حبيبي لو ماكنت معاك وقت ماتحتاجني متى حوقف جمبـك
بشار طالع فيها رفع يدها وبآسـها : بعد نص سآعه ححرك يادوب ارتب قبل لايجو .
هديل : انا حقوم اجل اتجهز
حرك راسـه وكآنت حتوقف بس قربت وحضنته : احبك
وقآمت من غير ماتسـمع رده مادخلت غرفتها راحت لغرفه سميـه ..
دخلت من غير ماتدق واتوجهت للحمآم : روووان
: هااا
: افك ؟ بتـ
وبنص كلامها فتحت الباب : ابا استحمى ممكن
هديل : بلا فجعتيني
روآن : فيه شي ؟
هديل : ايوا فاضيه تجي معانا ؟
روآن : لا انا خارجه
هديل : بشار رايح بيت اهله وحيرتبه عشان جاين نآس يشوفو البيت ومايبى يروح لوحده تعالي معانا نساعده ونغيرله جو
روآن سكتت كآن نفسها تخرج لوحدها بس بشار دايما واقف معاها : طيب
هديل ابتسمت : ان
وف نص كلامها قفلت الباب فوجهها : ياااحيوانه كنت بهرج
روان ضحكت في الحمام بالعنيه قفلــت تحب تنرفزها
راحـو اتجهزو وجآهم بشار شافهم الاتنيـن جاهزين
حسب روآن نازله للسواق بس لما ركبت ورا دار راسه : نعم !
روآن : بجي معاكم
بشار : ولسواق ؟
روآن : عادي خليه لو اباه قولي يجيني فين ماكون
بشار : هههههههههههههههه انتي تعيشي الجو على طول ... كل النآس في ثانيه يسيرو يشتغلو عندك
روآن : ههههههههههههه
وطــول الطريق عدا عليهم وهمآ يهرجو روان مدخله راسها بين الكنبتين اللي قدآم
وححاشره نفسها باأي هـرجه ..حتى لما يمد يدو يمسك هديل تضرب على يدو
سوتلهم ازمــه
بشار : ههههههه سميـه بلله ماتخليها تسافر
سميه : اقول لاشهر عسل ولا شهر بطيـخ وبعدين حتى حتى لو رضيت انا بروح معاكم
بشار : هههههههههههههههه يابت اسررري انا بسافر عشان اشرد منك تجي معانا ليش
سميه شهقت : بلله تسيبوني لوحدي
بشار : لا ححاول اشغلك في اي مصيبه
سميه : ههههههههههههههههههه بشار وربي ماحتروحو والله ابكي والله افضحكم واقول للكل انك خاطفها
بشار : ههههههههههههههه
هديل : ههههههههههه
بشار : ايش منظري وانا اخدك معانا
سميه : والله ماطفشكم واقعد عاقله
بشار : ههههههههههههههه هيا دي الجمله لوحدها تخليني اعرف انك كذابه
سميه : يعني حطفشكم شويا بس
بشار : على شرط
سميـه : ايوا
بشار : مالك صلاح في هديل امسكها اشيلها احضنها انتي اخر وحده تتكلمي
هديل طالعت فيه مفجوعه
وسميـه : لا بللللللللللللللللله
بشار : هيياااا خدلك حتكون مرررتي انا حررر
سميـه : خليني خليني افكر
بشار : كمااان هوا انتي اللي حتفكري
سميـه : طلع الموضوع صعب شويا
بشار : هههههههههههههههه
هديل كالعاده بينهم بس تضحككك
ماتحب تحشر نفسها بكلامهم تحب تسمعلهم تتطالع فيهم
دول الاتنين اللي يهموها في دي الدنيآ كلها وماعندها غيرهم ..
واول مادخلـو الحي التلاته بدأت تتمحي منهم الابتسآمه
روآن هنآ اكتشفت اكبـر فجعه بحياتها
هديـل على انها كآنت كذبه ادتها شي حلو بحيآتها بس تكره تتذكر تفاصيل الحآدث
بشـآر هنآ كل شي يوجعه الف والف قصـه
وقـف سيآرتـه واتوجه للبـآب الكبير فتحـو وكآنت اكبـر غصـه
وكأنها واقفه بنفس داك المكآن
عند باب الفلـه وتطالع فيه بديك النظره المقهوره لما رفـع صوته على امـه
نننسي كل ملامحها
ابتسامتها ضحكتها
ودا الشي الوحيد اللي محفور في بآله
ديك النظره اللي تدل على قهرها منـه
شتت نظره وفتحلهم البـآب ودخله
هديل اول مرا تدخـل
الصمت سيد الموقف مشيـو ورآه وفتح باب الفلـه
اشياء حور بكل مكآن
على الكنبه بلوزه
كتاب لها على الطآوله
عروسـه
كريم
شباصه
امها كآنت قبل لاتخرج تمسك اي شي
وتقول لأمها حق حور .. حق حور .. ياأمي حق حوور
اما بشـآر اشرلهم : خلاص اقعدو بس برتب
اخد لبس حور اغراضها اللي على الطاوله وكتآبها لمهم كلهم مرا وحده
ووقف عند باب غرفتها
ماقدر يدخل
الغرفففففففه ريحتتها حوور
اجوااء حووور
رجلـه تقيله مو قادر يدخل
سميـه جات لعنده مدت يدها : هات انا ارتبها
سحبت منو الاشياء وهوا اتوجه لغرفتـه
جلس على سريره وبكيي
اصعب شعور انك تدخل مكآن فيه كل الذكريات لشخص راح وماحيرجع
لشخص انتا نقصت بحقوو كتيــر
ومن بين افكـآره جات على يده ... يدها اللي تهون عليه كل شي
حضنتـه ورجع يبكي زي كل مررا يتذكر انها راحت وماحترجع
جلست معاآه نص قالتلو يجلس وهما حيسو كل شي رتبـه البيت
ونزل البيدروم جاب شنط كبيـره وكآن بيعبي اغراض امـه المهمه
وبرضو همآ اللي ساعدوه جالس بينهم ورتبـو كل شي في الشنط
مو بس هوا صعب عليه دخول البيت
امه رفضت تدخللله لو فيه كنوز الدنيا
ماتبى دا البيت لا بخيره ولا بشره
راحت حور وبنسبه لها دا البيت راح معاها
وجا اللي يبا يشوف البيت مع انو شاف صور بس برضو جآ يطل
وهديل وروان في السياره .. عجبـه البيت ودا اول شي اتخلص منـه بشار ..
حيخلي عمو يصرف اغراض اخته تجي مرته وبناتها ويحاولو يصرفو كل شي
هوا مايعرف ماحيقدر ...
امـآ لمى ... من امس بين الصحآن والنوم تشوف رسايل كل ساعتين من عدي
ونفس حالتها هوا يصحى وينآم
جووو كئيب كل شي مالو طعممم
ثقل في اليوم
وجججع
مابترد على الكلام تقرا وتبكي وتنآم
اتصلـت على تآمر وماعندها اي خبر على احمد محد قلـها اطمنت على امها ..
وبعدها كتبت لعدي كلمه وسابت جوالها ...
عدي نــزل شافهم ملموميـن تحت ومشي من جمبـهم بكل هدوء
يعرفووه لما يكون مخنووق بس دي الره عيونه حتى محمره
امـه : عدي
دوبـه طلع اول درجه وطالع فيها : نعم ؟
: ايش فيه
: ولاشي طالع انام
: مو دوبك _ وسكتت لما زوجها قلها سيبيه _ خلاص طيب
وطلـع عدي يفتح الواتس وقرا كلمتها وساب جواله من غير مايرد عليها ولا يتصل
امـآ علا جالسه بينهم ومو عارفه ايش تقولهم ..
ابوه : سيبيه خلاص
امـه :منتا شايف كيف وجهه
ابوه : عشان كدا بقولك سيبيه
علا بكل تردد هرجت : بابا تعرف قاسم داود
الاتنين طالعو فيـها ومستغربين من الهرجه الشاطحه : مين مايعرفو ..
اعلا قلبها يدق بسرعه لو ماعرفو منها حيعرفو من برا : تعرفو البنت اللي جاب منها الولد واترمت في السجن
: ايوا ؟!
معقدين حوآجبهم من توترها واضح انو الموضوع يخصها مع انو مالهم اي علاقه بقاااسم ..!!!
علا : البنت دي هيا اخت لمى
امها : لمى مين
علا : لمى لمى حقتنا
محد علق عليها ماستوعبو وبـس
لما ملامحها ماتغيرت قالت امها :تستهبلي انتي و
علا قاطعتها : والله من جد زيي زيكم امس عرفت اخر الليل انو همآ
ابوها : يااشيخه اخوان لمى ناس عاقله مستحيل مستحيل يسوو اللي سوه اهل ديك البنت
علا من رشا فهمت اكتر عن اهلها : اللي فهمتو يابابا انو ماكآنو يدرو عن شي ولما عرفو دحين اخدو حقها
يرجعو يسكتو تآني بصدمه
صدمـــه مفجوعين
علا رجعت تحكيهم نفس اللي مكتوب عنهم ووضحتلها انو اهلها ماكآنو يدرو عن شي
وانو همآ عانو وتعبو نفسيا كتير بسبب فضيحتها
ساعه ونـص ولااتحركو
ساعه ونص نقــآش ومصدوميـن
الناس ايش حيقولو اكيد دي اول جملـه قالوها
بس ماأخد حيز كتير لما ابوهم انهى النقاش بجمله " النآس ماترحم احد بلاشي ندخل بدي المواضيع "
فهمو كلهم كآنو خايفين على سمعة عدي زمآن والناس مارحمتهم
خرجت منها تنهيده : والله مو عارفه ايش اسوي كيف اتصرف اتصل على الام ولا نسوي نفسنا ماعرفنا شي
زوجها : مالنا صلاح لو رفعت سماعه وقالتلك شي اهلا وسهلا ماقالتلك خلاص يمكن مو حآبه
علا : ايوا ياماما الله واعلم كيف اصلا نفسيتهم حاليا
الأم اتقشعر جسمها :الله يلطف بحآلهم والله مو عارفه احزن على البنت اللي راح عمرها ولا على الام ...مع انو مدري كيف قلبها طاوعها ترمي بنتها دي السنين لو اخوانها انعمو بالشرف وبعرضهم كيف هان على امها تسوي كدا
علا : السؤال مو هنآ ..عدي كآن يعرف من زمآن ولا دوبـه عرف معانا !!!
ابوها : يكون زعلان عشان دا الموضوع ؟!؟!
علا : مدري مع انو اتوقع لو عرف معانا كآن حيتنرفز منها ماحيكون كدا
امها وقفت : استغفرالله منك خوفتيني خليني اروح اشوف ايش بو
زوجها : سيبيييه خلاص هوا يصطفل منه لها
: قلبي مو مرتآح
وطلعت على طول
علا : خليها تتكلم معاه
ابوها : خلاص هوا متى مايبى يتكلم حيجي يحكينا
علا : ههههه يابابا عادي ولدها ايش فيها لو سئلته بنفسها
ابوها : ماحب دا الاسلوب مدري متى حتبطلو
علا : مو دا اللي نحبو فيكم واحد يسيبنا على راحتنا والتاني مايقدر ويقعد ينكش
امـآ ام عدي دقت الباب وبعدها فكتو شال اللحاف عن وجهه : ها
فتحت شويا الاضائـه : قوم اجلس عارفه انك ماحتنام
عدي : فيه شي ؟
امه قفلت الباب وراها وسحبت الكرسي المكتبي لجمب السرير : اجلس عشان نتكلم
عدي جلس : ها !
امـه : ايش بينك وبين لمى
عدي : مافي شي !
امه : طيب مافي شي تبا تقولنا هوا !
عدي : شي زي ايش !
امه : انتا عارف !
عدي حرك راسه : مافي !
امه : وموضوع اختها وقاسم داود ؟
عدي في باله هرجه ام لمى ولمى نسي موضوع ترف : اهااا
امه : عشان كدا زعلان منها دوبك عرفت ؟
عدي : لا قالتلي من فتره
امه لانت ملامحها : اجل ليش مضاربين
عدي حرك راسه من غير مايهرج بولاشي
امه : عدي فيه شي
رفع جوآله : لمى دوبها طلبت الطلاق
شهقت بصدمممه : اااايش !!!!!
عدي حط لجوال جمبـه ومابيطالع في امه
امه : ااايش سار فهمني
عدي بصوت مخنوق : ماليا نفس اتكلم
امه : ياولدي فرحك بعد بعد تلات اسابيع وتقولي ماتبى تكلم
عدي : خلاص وربي مخنووووق
امه : البنت وانت مو متفقين يعني لو ماتباها قولنا و
عدي قاطعها لما رفع عينه عليها : ابااها بقولك هيا طالبه الطلاق ... ماعاد تباني
امه مفجوعه : ايش ساار مو مرتاحه معاك ؟
عدي حرك راسه بالنفي : والله يهون عليا الموضوع متفقين ولا مو مرتاحه خلاص كدا كل واحد يروح في حآله وانتهينا
امه : عدي والله قلبي حيوقف فهمني زي الأودام ايش الهرجه
عدي : امس وحده كلمتها وقالتلها كل البلاوي الللي كنت اسويها زمآن
امه عقدت حوآجبها : اعوذ بلله منها مين ديي !!
عدي : مددري بس لمى من يوم ماعرفت بتبكي وطلبت الطلاق جلست معاها اخر الليل وخرجت وهيا هاديه قلت حتصحى وحتستوعب الموضوع بس برضها كتبتلي طلقني .. مارديت ولا اتصلت
امه : من جدها دي تبا تطلق علشان ماضي هيا مالها علاقه فيه
عدي : امي هيا مفجوعه
امه : مفجوعه ولا مو مفجوعه ايش الكلام الفاضي دا مين مايغلط في حيآته ايش شغل الاطفآل كل وحده على اتفه موضوع حتنطق كلمه زي كدا
عدي : مو انا سايبها تهدى وبعدين البنت قالتلها تفاصيل انا حرقتني لأنه عرفتها لمى ..والله عارف صدمتها لأنها بريئه ولأنو خايفه اني ارجع لكل شي سار زمآن لمى عاشت حياه كلها توتر وتخاف من بكرا دحين رجعتها انا لنفس الشي ..عارفه انو انا حاليا انسان تآني بس خايفه ف يوم ارجع لداك الشخص بذات لأنو اخوها ليث كدا كآن .. فجأه اتغير عليهم
امه : انتا ليش بتديها مبررات
عدي : لأنو مقدر نفسيتها عارف انها مو علا ولا بنات خالتي .. ليومك دا مستحيل انسى يوم ماشوفتها مضروبه وسرت اتخيل انو حياتها كلها زي كداا تبيها تثق في واحد كآن حق مخدرات وحشيش كآ
امه قاطعته : عددددي فكر بعققل اوك البنت عاشت حياه صعبه بس الزوآج عمرو مآكآن يتقاس بنفسيه الشخص فيه منطق دا ماضي دا شي ماتحسابيني عليه نقطه نهايه السطر
عدي : ايش تبيني يعني اروح اقلها ماحطلقك وغصبا عنك اتقبليني
امه : انتا عارف انا ماحب دا الاسلوب لكن لاتجيها بالمسايسه وانك غلطت بحقها لا انتا ماغلطت بحقها حاول تفهمها انو انتا غلطت بحق نفسك فهمها انو تغيرك كآن خوف من ربك مافي اقوى من دا الشي لو عرفت انو انتا تخاف ربك فيها انتهى كل شي بكرا كلنا مو ضامنين ربنا ايش حيبلانا ف حياتنا بس وقفتها جمبـك دا دليل على حبها ...
عدي : برضو مو عارف ايش حقولها ! مو عارف اتصرف معاها بتبكي وانا بجد ماعرف اتعامل معاها وهيا كدا اتوتر وانخنق
امه : قلها طيب حديكي اللي تبيه
عدي : امممي ! مستحيـ
قاطعته : اصبـر لو تحبك حتتمسك فيك قلها الكلام اللي عندك وقلتلك اهم شي انها تفهم انك انتا اتغيرت دينيا وفي النهايه قولها لو مصره على الطلاق طيب
عدي : مابى اقهرها
امه : ماحتقهرها بعض الاحيان دي الكلمه تفوق الحرمه ف قرارها
عدي : ولو برضها خايفه وصممت على الطلاق
امه : وقتها مابيدك شي عندك دا الحل ولا إنك تسيبها في حالها تهدى يوم يومين تلاته
عدي حرك رآسه
امه : دحيين مين دي اللي لها مصلحه تسوي شي زي كدا
عدي : والله ولا فكرت كلام لمى صدمني بس اتوقع وحده تعرفها وحاقده عليها
امه : طيب سئلتها ؟!
عدي مسك جوآله : لا _ فتح الصوره اللي ارسلتلو هيا لمى _
انتي اخت ترف
الجملـه دي خلتو دوبه يستوعب انو الموضوع فيه ترف !!!
اتغيرت ملامحـه كليا
امه : ايش بك ؟!
: دقيقه
كتب اسم ميسا في الانستقرام وحسابها مفتوح شاف صورها
مو متذكر مين دي
بس شكلها مو غريب
شافها اخر مرا قبل 3 سنوآت : شكل البنت مو غريب عليا
: اشوف
دار جوآله
: وي دي اخت رشا !
: مين رشا
: صحبة اختك
عددددي تننننح
فضيحتتته وصلت من علا دا اللي فهمه ميسا حاقده عليه
ليش مايدري بس اكيد الموضوع فيه علا
وقف على طوول وفتح باب غرفته وامه وقفت : عددددي فين راايح
: علااااااا
نززل الدرج وبعد مآكآن الموضوع فارق معاه انححححرق
ولللع
حققققد
: علاااااا
علا انفجعت في نص هرجها طالعت بعدي اللي متوجه بكل هجوميه وامها تلحقه : ايش بك ؟!
عدي : انتتي متمشكله مع اخت رشا ؟!!
علا : لا بسم الله مابيني وبينها شي
عدي بعصبيه رفع جووواله : شوووفي شوووفي ايش راحت تقول للمى
علا وقفت واخدت الجوال تقرا والصدمه تطغي على ملامحها ورجعت رفعت عينها على عدي : والله مدري متأكد انو هيا ؟!
عدي : ااايوا متأكد
ععلا تبا تستوعب جمله انتي اخت ترف
ترف على كلام رشا متزوجه طليق ميسا عشان كدا اهلها ماوافقو على تميم
تبلع ريقها وقلبها يدق بسـرعه
عدددي : علا لاتستهبلي ايش مسوويه للبنت عشان تجي تتكلم عني كدا
علا : والله العظيم ماليا صلاح
امـه : عدي اهدى
عدي بعصبيه يهرج : فينننن اهدى البنت وطلعت نعرفها للليش ليششش تبا تسسسوي شي زي كدا
ابوه : ايش بكككم ياناس ايش قالت للمى
عدي طالع فيه : قالتلها اني واحد وسسخ وحق مخدرات وبنات ولمى تبا تتطلق والست علا ماتبى تهرج ا
علا قاطعته : بقووولك والله ماليا صلاح اخت لمى متزوجه طليق ميسا
الكل طالع فيها بصدمـه
علا بتوتر : امس ميسا عرفت انو زوجها مو زوجها قصدي طليقها اتزوج
عدي : يعننني مو زوجها كممان وسوت تحديد على الكل واختارت اضعف وحده عشان تأذيها
علا مفجوعه من عدي : والله مدري عنها وللإيش تبا توصل بحركتها دي
امه : استغفرالله العلي العظييم
عدي : اخوها اخوها مو _ طالع في ابوه _ مو انتا تعرفه
ابوه : ايوا ايش دخل اخوها
عدي اتوجه لأبوه وسحب جوال ابوه من على الطاوله : ايش اسموو
ابوه وقف : هات الجوال ياعدي
عدي : وررربي لاأروح اتفاهم مع ابوووها ولو إني مو رجآآآل حقفل الموضوع هنآ
ابوه : ياولدي المواضيع ماتنحل كدا
عدي : مرتتتي تباني اطلقها وبنتتت الكلبببب قاعده تبكبك على طليقها على قفففى اهللي الا كدا تنححل تباني اروح افضحها تباني اروح اسئل عنها اصحااابي وافضحلكم هيا زي مافضحتني
امه : ياااعدي تبا تنزل نفسك لسمتواها
عدي : سيبوني اجل اتفاهم مع اهلها ياتخلوني اتفاهم مع اهلها ولا والله لاأخلي سمعتها تنداس عليها وربيييي
ابوه : سيبني انا اتكلم مع لمى
عدي : حتى لو لمى رضيت انا ماحيشفي غليلي الا لو بردت قلبي
امه جات تمسكه وهوا بعددد بنرفزه : لاتمممسكيني الله يخليكي ياأمي
امه : الله يحفظك اهدى لاتسويلنا مشاكل مع الناس
عدي : ماحسوي شي اهلها وحيتفاهمو معاها ..ايش اسم اخوها
ابوه مارد
وععددي ولللع : اببووويا عارفني صححح عارفني اني ممكن افضح البنت عارفني اني حنزل لسمتواها الووسخ
ابوه اتتنهد موتره شكل عدي : مسجل باإسم رامي حامد
وهنـآ عدي انسحب على طول وطلع لفوق ..
: لا حول لاقوه الا بلله
علا محروق قلبها على رشا تحس اللي حيسويه عدي في ميسا حيشفي قلبها شويا
ابوه : ايش هررجه لمممى
امـآ فوق رايح جاي بغرفتـه ماتوقع انو الموضوع كدآ
انو وحده في النهايه يعرفها
حسبها من صحبات لمممى
: السلام عليكم
رامي : وعليكم السلام
:معايا رامي ؟
: ايوا هلا
: انا عدي ولد
رامي قاطعه : هلا هلا عاش من سمع صوتك
عدي مو متذكره حتى ولا رد على جملته : رامي ابا اتكلم معاك ومع ابوك في موضوع
رامي اتغير صوته : خير فيه شي
عدي : ابا اقابلكم
رامي : والله خوفتني فيه شي ساير
عدي : لما نتقابل حقولك
رامي : طيب حشوف ابويا ومتى يقدر
عدي : ابا دحين اجي
رامي ضحك بخوف : هههههه ايش بك
عدي : رامي من النهايه ماعندي رقم ابووك ابا اتفاهم معاكم ومسافه الطريق حكون عندكم
رامي عرف انو في مصيبه وكبيــره مايعرف عدي ومتصل يتكلم معاه بدا الاسلوب !! : طيب انا في بيتي حشوف ابويا في عمله ولا في البيت وحقولك فين تجي
عدي : طيب لاتتاخر بلله
وقفــل منـه غير ملابسـه اخد جواله وجوال ابـوه ومفاتيح سيارتـه وخرج
حاااااااااااقد على ميســآ
نززل وامه نادته وهوا مممشي طالعت في زوجها : كآن روووحت معااه
: بلااشي يغلط على الناس واسير انا اعتذرلهم
علا بعد مآكآنت مبسوطه استوعبت انو ابو رشآ شديد وبدأت تخاف
تقول لرشا
ولا تسكت
ولا ايش تسووي
مو عارفه
جلست بين اهلها وعقلها مو معاها
وامها بدأت تندم : ياريتني ماكلمه ..ياريتني صحيت عزآم يروح معاه ... لايسوو ولدي شي
وزوجها هادي عارف انهم نآس محترمه وهوا اللي انغلط عليـه ليش حيسوله شي ..
امـآ عدي اتوجه للموقـع اللي ارسله هوآ رامي ..
ورامي سبقه على بيت اهله اللي قريب منـه ... ابو رشآ مرا ماعجبه الموضوع
وشايفها قله ادب انو يجي بدا الاسلوب ايش مآكآن عندو مايلزم عليهم شي ...
واستنوه لين ماتصل على رامي وراح استقبله ودخــل
جلس وعيونهم الاتنين عليـه .
رسميات كيف وكيف الاهل دا الكلام اللي مايبوه بس غصبا عنهم انقـآل
عدي بعد مانقل في السياره رقـم رامي لجوآله ..رفع جواله : شووف حرسلك حآجه على جوالك وبعدها حتكلم
ارسل لرامي كلام اخته للمى ..
ورامي يقرا وملامح وجهه تتغير ..شايف اسم ميسا عارف صورتها في الانستقرام ..
رفع عينه على عدي وضايع الكلام منـه
وابوه لسى مو فاهم شي
عدي : انتو وصلكم هرجتي زمآن لما غلطت وشايفيني قدآمكم انسان تآني واتغيرت والحمدالله
رامي مكتووووم
ابو رامي : الله يهديك ويهدي الجميع
عدي : ان شالله يارب .. زوآجي المفروض _ شد على الكلمه وهوا يعيدها _ المفرووض بعد تلات اسابيع واقل كمآن ..انا دوبني عرفت انو طليق بنتك اتزوج .. ودا نصيب صح ولا لا ياعمي ؟!؟؟!
ابو رامي من ورا قلبه : اكيد !وقبل لايكون طليق بنتي دا ولد اخويا
عدي ولا يعرف صلة القرابه اللي بينهم : طيب حلللو ولد اخوك اتزوج اخت مرتي
كلهم اتفاجئو
عدي يحكيهم حببببه حبببه ورامي بدا خلاص يستوعب الموضوع : انا دوبني عرفت انو زوجها يسير طليق بنتك
ابو رامي : طيب انا مو فاهم ايش تبا ؟!
عدي : حقوولك ياعمي _ سحب نفسه لطرف الكنبه وهوا يتكلم بهجوميــه وبالقوه ماسك نفسه مايغلط _ بنتك لما عرفت راحت اتكلمت مع مرتي اللي ماتعرفها اصلا وقالتلها زوجك وسسخ وزوجك زمان كآن حق مخددددرات وحق بببنات وانتي كيف حتكملي حياتك معاه من النهايه فضحتنني وبعد مآكآنت مرتي مرتاحه معايا اهو طلبت الطلاق مني بسبب بنتك اللي قاعده منهاره على طليقها اللي مايحقلها من الاساس تنهااااار عليه ..بيتها هيا حره هدمته بيدها ولا كآن دا قرارها بس تجي تهدم بيتي باأي حححق باأي حق تتكلم مع مرتي عن ماضيا ... باأي حق تلعب بعقلها .. مرتي صغيره مو انسانه كبيره عشان بعد دا الكلام تفكر بعقل
ابو رآمي ورامي مكتوميـــن انو يجي واحد لبيتهم يقولهم بنتكم وبنتكم وبنتكم
شي يسود وجهههم
لو ولدهم حيقولو حقك علينا بس بنتنآآآ
اتعاطفو اممسس معاها بس يوصل فيها الهوس انها تهدم بيت احد
عدي طالع في رآمي : انتا يرضيك اني ارسل أختي لمرتك تقول عن شي سويتو ومرتك ماتدري عنو ؟؟
ابو رامي اتكلم بلكلكه : والله ..يمكن .. مو بنتي انا عارفها مو
رآمي قاطعه بصوت واطي وباإحراج: الا هيا
وعم الصممت
عدي : الشي اللي سوته في مرتي انتا ياعمي حتحاسبها عليـه وجيت لعندكم عشان انتو توقفوها عند حدها اكتر من الكلام اللي قالته ماباها تقول ومابى اي علاقه تربطها مع مرتي
ماقدرو ينطقو بشي كسرررهم بكلامه
وقـف وهوا يعتذرلهم برضو وهمآ هنآ ضاع الكلام منهم زيآده
عارف انو رآمي قبل ابوه بياخد بحقـو
شايف الحقد بعينه
حاسس انهم يبوه يمشي عشان يطلعو العصبيه والاحراج وكل شي
وبعد مآكآنو حزنانين
بعد ماحقدو على برااء امس
اليوم اخر همهم براء
انقفـل الباب من هنآ
ورامي زي المجنووون ينادي : ميساااااااااااا
بس محد وقفــه ابـوه كآن وراه
وهيا صاحيه من بدري من الهم اللي عايشته
وكأنه مافي بنتين بيبكو بسببها
اختها ولمى ضحيــه .. وهيا برضو المظلومه بعينها
ودخل رآمي زي المجنون ولأول مرا يصرخ بدا الجنون على اختتته قلها كل شي
واول ماوقفت ورفعت صوتــها وتبرر لنفسها اداها كــف وهيا رجعت لورا وحاطه يدها على خدها
وهوا يدفها من كتفها : اننننناااا ...اناااا تحطيني بدا الموووقف ..انااا وابويا تخلينا مانعرف نتكلم
رفعت عينها على ابوها تباه يسحببها بس نظرتو تفجع اكتر من رآمي
: انتو مو حاسين فياا
: برضضضك ياككلبــه _ مسكها من شعرها وقربها لعندو _ تجيبي سيررره برااء على فمك والله ادفففنكك دا طليقككك ماتفهممي ايش يعني طليقك
: سيببببني ياااباباا بعدوو عني
ولا اتدخل ابوها
ورامي من حركاتها يتنرفز زياده مو شايفه انها غلطانه واول ماقالت : هيا اخدتو مننني
وهوا اتجننن ايش دخل اخت البنت في براء
وبراااء هيا اللي جاتهم وقالتلهم ماباه هيا الي بدات المشكله
هيا اللي قالتلهم كرهت الحياه الزوجيه وطفشششت وانا ابا ارجع البنت اللي حريتها بيدها
ضربــها
مرا ومرتين وهيا تبببكي
رشااا جات مفجوعه واكتفت انها توقف عند الباب وتتفرج والصدمه طاغيه عليها
رااامي عمرو مارفع صوتـه عليهم
عمرو ماتدخل بحياتهم واليوم مو بس رافع صوته الا بيضربها كمآن كل ماتبررر كل ماتدخل بعينه
: انتتتي ماتستحي ماتبي تفهمي انك هدمممتي بيت واااحد بسبب تخللفك جا لعندنننا وهاننا ف بيتنا وماقدرنا نفك فمنننا
وميسا تببكي بصوتها : اطلللع براااا
رفع صباعه بتهديد : وربي مالك خرجه من البييييت الا لما تستوعبي المصيبه اللي سويتيها _ كان خارج الا شاف لاب توبها وجوالها سحبهمم وهيا زاادت بككككا_
ميسا : رااااااامي
ولا كأنه خررج والعصبيه طاغيه عليه قفل عليها الباب وطالع في رشاا : لو اشوفك تدخلي علييها والله لاأكسرلك رجلك
رشا حركت راسها بخوف وطالعت في رامي اللي راح ورا ابــوه ادالو بس اجهزه ميسا
ورجع لبيته مععععصب
متضااايق متنررفززز
اكتر شي يحرق الرجآل الموقف اللي تجيب فيه سيرة اختـه وتكون غلطآآآنه
ذل مابعدوو ذلللل
اما ميسا بكل صوتها تبكي في الغرفه
عارفه انها غلطت وماتوقعت انو اليوم التآني ينكفش الموضوع
ماتوقعت انها حتنفضح ويكبر لدي الدرجه من الحقد والعصبية اتمعت
بكيييت بالساعات خرجت من غرفتها بعد اربع ساعات كآنت بتتغدى معاهم وصرخه ابوها فجعت الكل : ياأنااا ياإنتي على دي الطاااوله
وعينه مثبته عليــه
ضغطت على رجولها وسحبت الكرسي لوراا
وقفت ودموعها بعينها
واتوجهت لغرفتـها وماخرجت طول اليوم
عدددي ماتوقع ماتوقع انو يرتآآآح
بس نظره رااامي
نظره ابوووها
ياأللله كيف يحسس انهم حيبردو قلبـه
صح ماحيرجع شي بينه وبين لمى
لكن
فيه شي طفى شويـآ من العصبيه اللي جوتـه
رفع جوآله واتصل على تآمر .. يبـآ يطمن على عمته ..
: ايوا هلا ..كيفك ياتامر .. تمام الحمدالله .. كيف حآل عمتي ؟ ... ياألله يلا اهم شي هيا طيبه .. لمى !! ..لا ماكلمتها فيه شي .. ولد ليث ! ... لاحول ولا قوه الا بلله .. طيب طمني بلله .. الله يشفيــه ... خلاص مو مشكله حجيبها عندك
قفـل وماينكر انو قلبه انقبض وحزن على ولد ليث
صح يكره ليث بس ولده ِطفل ماله ذنب
على قد مايبى يشوف لمى على قد مايبى يشوفها
كدا تناااقض جوتـه
يبا يحضنها
ويبا يسيبها تفكر
عارف انو كلام امه صح
بس لو ماكآن الشخص ضعيف في حبه متى حيكون ضعيف
دمعتهااا وكلامها مايستحمملهم
لو كآن عندو شي يبا يقولو بنظرتها بدمعتها خلاص يرتبك
ويقولها انا اسف
يفكر يفكر لين ماوصل لبيتهم
وطلع واقف قبال البـآب وعارف انها ماحتفكلو ..اخد جوآله
واتصل : ايوا تآمر .
عند تآمر وقبلها بسآعات ..
يصحى وينآم وعلى دا الحآل ...الحرمه اللي مشاركه امه بنفس الغرفه كل شويا تصحيه بصوت جوالها
وامه نآيمه بعمممق ..
ويخرج يتصل على تميم ولما يعرف انو وضعهم اسوء منهم يرجع يدخل الغرفه ويجلس وكل اللي يسويه انو يدعي
حالهم يتعدل وبـس ...
خطرت في باله روآن الف مرررا
وبدي الالف مرا كآن يشرد منها
لأنو ماحيكتفي انو يسمع صوتها بس
ف بعض المواقف الوآحد يقدر يحدد مشاعره
لما تمر باألف احساس وانتا برضك تفكر بنفس الشخص
هنآ تعرف انو دا الانسان بدأ يستولي على كل شي فيك
عقلك وقلبببك وكيآنك ..
هنا تبدأ تديـه المعامله اللي يستاهلها
والمكآنه اللي يستاهلها ..
فتحت عيونها وكل شي في باله اتبخر ..دقات قلبــه
متوتتتتر
وقف وجا لحدها وهيا طالعت فيـه
مررت لسانها على شفايفها الجآفه ..
ولما طول تأملها وسكوتها عرف انها مو متذكرته
قال: انا تآمر
لانت ملامحهآ عرفته من عيونه بس ماكانت قادره تستوعب
كيف كل شي متوقف بعينها وبعقلها
كيف ولدها واقف قدآمها وفاكرته وهوا لساته طالب ثنوي
وشنطته على كتفـه
جلس على السرير ومسك يدها : فيه شي يوجعك
اشرت راسها بالنفي وبعدها قالت بصوتها اللي كلو نوم : فين اخوانك ابا اشوفكم كلكم
تامر : حيجو كلهم حيجو ان شالله
: ولمى
تامر يمرر يدو على يدها ويتكلم : في البيت حقولها تجي
: هيا مسامحتني مو زعلانه مني ؟!
تامر سكت شويا بعدم استيعاب وبعدها قال : ليش حتزعل منك
امه : اتذكر اخر شي اني ضربتها ... مدري كيف ماحسيت بنفسي ... سمعتها اخر الليل تبكي وكنت حدخلها بس سبتها ونوم
اخر شي متذكرته اول يوم رفعت فيه يدها على لمـى ..
الللحظه اللي كآنت تقولهم انسو اختكم تــرف
وتدخل تبككي
اللحظه اللي توقف بشموخ انو هيا غلطططت بس تستنى الكل يخرج عشان تنهار
لأنها ام
ديك القويـه بس بنفس الوقت أم وقلبها عليهم
تامر دموعه اتجمعت بعينه قال بهدوء : ديك اول واخر مرا ضربتيها فيها ... وصحيتي اليوم التآني اعتذرتيلها ...عارفه انتي لمى هبله ونسيت الموضوع
بس قال جملته الاخيره ابتسمت ودموعها نزلت
وهوا كمل بصوته المهزوز : البيت مالو طعم بدونك _ مد يدو ومسح دموعها _ ليش بتبكي
: صوتك متغير وكل شي فيك متغير
تآمر ضحك : كبرنا ياأمي
ضحكت معاه وهيا لسى تتأمله بس بنظره حنوونه وكأنه عمرها ماشافتـه :فين ابـوك ..
تآمر اختفت ابتسامته : مسافر
قالها بدون مايستوعب ايش بيقول .. ماتكلم مع الدكتور !
خاف يصدمها
فاصرف الموضوع
مسك جواله بتوتر : خليني اتصل على تميم اشوف فينو .
وشرد من الغرفـه بسـرعه
زفر بتوتر ودوبـه بيتصل الا عدي اتصل وكلمه .. ودخل تآني عند امـه بعد ماتكلم مع الدكتور ..
جلس جمبـها واكلها من الفطور
يتكلمو ويحكيها
هوا ايش يشتغل
وتميم ايش يشتغل
وليث جاته بنت وولد
وكآن بيقولها وضع لمى الا
سئلت بتردد : ترف فينها
صدمتـــه .. جا يمد يدو يديها العصير الا قالت : الحمدالله شبعت ..
شال الفطور وهوا يحطو بعيــد
وبيفكر ايش يررررد
ردوو ممكن يعدل كل شي !
اذاا هيا مو متذكره دي الفتره كلها ايش سار
فاكره دخول ترف الاصلاحيه بس مو متذكره شي بعده
قلبه يدق بسـرعه
شال طاوله الاكل المرفوعه وجلس تآني ..
بلع ريقـه : ترف خرجت .. ومتزوجه ... وعندها ولد
انصدممت منها وبعدها بترد اكتر : بتجينا
اشر براسه وقال بكدددب وهوا يبا يبكككي ككدا خلااااص كل شي خااانقه الكككذبه
وضع اممه كل شي ويبدأ يتكلم عن احلامه : كل اسبوع ..كلنا نتلم نهايه الاسبوع يتغدو ويتعشو عندك
امه تسئل بكل صعوبـه : انا سامحتها .؟
تآمر سكت وبعدها قال : لما تخرجي من هنآ نتك
امه قاطعته : كمممل ريح قلبي وكملي
تآمر نزلت دموعه ونزل عينه على يدها وقلها الشي اللي يتمنآه برضو : سامحتيها لأنها مظلومه .. روحتيلها وهيا حكتك كل شي .. وخرجنآهآ ..ورجعنا عشنا مع بعض ... بس غيرنا بيتنآ ..غيرنا كل شي بسبب النآس
: كيف مظلومه ؟
تآمر ضيق على عينه : امي الله يخليكي لما تخرجي يسير نتكلم بالتفاصيل
: بقولك كيف مظلومه
تآمر سكت لثواني وبعدها حكآهآ الحقيقه بس الكذبـتين الوحيده انـه قاسم داود ماقدرنا ناخد حقنا منه الا دحيـن
بسبب مشاكل كتير ايش هيا مارضي يحدد خايف يتورط ..
والشي التآني انو ترف سابوها لمده سنـه
وهنآ بكيييت
بكيت لأنه مو قادره تستوعب انو بنتها مظلومه وعاشت سنه لوحدها : ياامي انتي عوضتيها لما خرجت
بس الجملـه ماريحتها ...تبا تشوفــها وهنــآ تامر مايدري يحس بالفرحه ولا خايف انها تتنكس حالتها
وترجع
وتتتترف ايش وضعها ..شاف المتصـل عدي
قام من مكآنه وحاول يغير نبرة صوته : ايوا عدي معليش دوبي انتبه للجوآال
عدي : مو مشكله انا من اول تحت تقدر تقول للمى تنزل
تآمر عقد حوآجبه : انا ماديتها خبر انك جآي انتا ماكلمتها
عدي عاد كلامـه من غير مايرد على تآمر : عارف حستنآهآ اتصل قولها انا تحت
تآمر سكت للحظـآت وعرف انو فيه شي بينهم ..لو يدري مآكآن حط اخته بدا الموقف
بس مافي احد غيره يجيبها : طيب ..
قفـل واتصل على لمى .. :ايوا لمى ايش بتسوي
: جالسه متى حتجو
تآمر : ايش بو صوتك
: دوبي صاحيه
:طيب .. امي تباكي
لمى كآنت تبا تشوفها بس خافت لأنها طلبتها : فيه شي
: عدي تحت انزليلو هوا حيجيبك واول ماتوصلي اديني خبر وانا حخرج اتكلم معاكي
لمى انكتممممممت
: طيب ؟
لمى : فين تميم ؟
: لما تجي حفهمك
لمى : طيب
وقفلت من تآمر مو قادره تقوم من مكآنها ...اصلا وجهها مورم من البكى
كيف حتنزل كدا ..دخلت الحمام وبعدها غيرت ملابسها ولبس عبايتها
رسمت حوآجبها .. حاولت بقدر الامكآن تبين شكلها طبيعي بس مرررا واضح ..
شالت شنطتها وجوالها وخرجت وكل ماتقرب لباب العمآره قلبها دقاته تزيـد
شافت سيارته اتوجـهت فتحت الباب وركبت بكل صمت وحطت شنطتها عليـها
ماطالعت فيه
اتوقعت يتكلم بس شغل السياره وحرك
فجعها
كل مايطول صمتـه تحس انها تبا تبكي
مو عارفه ليش مو هيا تبا الطلاق
مو دا قرارها اليوم يشوفها ومايتكلم بكره ماحتشوفو من الاساس
مرا مرا الوضع يخنق
الصمممت من بيتهم ليـــن ماقربت من المستشفى
اتصلت على تآمر : انا قريب .. طيب طيب . باي
نزلت الجوال وعينها على الطريق قالت بهدوء : تآمر يباك تجي
مارد عليها
بس وصل وقف سيارته هيا فتحت الباب ومادري ليش انبسطت لما طفى السياره
وبعدها فتح بابـه ..اشرلها ومشي قدامها وهيا تمشي بهدوء ورآه ..
لين مادخلو وشافو تآمر وقلهم حآله امـه بتفصيـل
لمى مفجوووووووووووووعه نسيت كل شي سوووته فيها !!!
نسيت انهم سابو ترف سنيييييييين
نسيت انو ابوهم مآت .!!!!
تآمر : انا فهمتها انك جآيه مع خطيبك ومنها _ طالع في عدي _ تشوفك مرا وحده
لمى لعبت في اصابيعها بتوتر : احس قلبي حيوقف مابى اشوفها
عدي ماطالع فيها بس نبرة صوتها دي مايحب يسمعها ومايمسك يدا ولا انو يهديها بكلمه منـه او يأذيها
بس ماسوا شي
اما تآمر ضحك وهوا اللي مسك يدها : امشي تعالي وبطلي دلـع
مشي ورآهم بس عينه على لمـى
وهيا لاصقه في تآمر
مابتسوي شي بس قلبه يوجعه وهوا يطآلع فيها
كاااره الوووضع مرا كارهه
ودخلو الغرفـه ..
وهنا لمى وقفت في مكآنها تآمر رجع سحبها وجآبها لحد السرير
لمى قربت سلمت على راسها
وامها تطـآلع فيها بصدمــــه
نفس نظرتها لتآمر اول ماشافتو اشرت على المكآن الفاضي جمبـها
ولمى جلست بتوتر
ابتسمت لمى باارتباك
وامها قربت وحضنتها وقالت بااسلوب اول مرا تسمعه : الله يحفظك كبرتتي وسرتي عروسه
كأأأأنها انسانه تانيه
لمى موسعه عينها ومحد شايفها كلهم شايفين ظهرها وبــس
وامها عكسها مبتسسسمه وتبا تبكككي من الفرحه
تمرر يدها على ظهر لمى ولمممى جسمها كلو يتناافض
شادتو وحاسه انها بحلم ..حاسه انه بحضن وحده غير امهااا
كيف نفسيـه شخخص ممكن تدممر انسااان كآمل
تدمر علاقاته
تدمر حتى علاقتـه مع بزورته
بعدت لمى ولساتها تبا تطالع فيـها واختفت ابتسامة امها لما شافت دموع لمى تنزل بصمت : ايش بك بتبكي
صوتها بكككى لمى زياده
متعوده على نبرة صوتها العاليه
متعوده تهزأها لما تبـكي
رخت راسها ودخلت في دوآمه بكى
وتآمر فاهمهاا قرب منها وحط يدو على ظهرها وامها تمسحلها دموعها
اما عدي انسسسحب خرج ووقف في اللمر
مايستحمل يشوفها كدا .. عارف انها مفجوعه من المعامله
امه طلبت منـه يعاملها بجمود ودا الشي الصح دام وضحلها انو ماغلط
لكن مايقدددر
جلس على اقرب كرسي وخلاهم لوحدهم شويآ .. وسرح في افكاااره
وفجاه دار راسه لما جلس جمبـه تامر .. : ايش مسويتلك اختي
عدي ضحك غصبا عنه : ولاشي
تامر : طيب انتا ايش مسويلها
عدي مارد بيدور شي يقوله بس مو عارف كيف
تامر : لو فيه شي تباني اتفاهم معاها فيه قولي
عدي : لا الموضوع سار ياطلاق يانكمل وهيا براحتها
تامر انفففففجع
لا كان يبى يسمع شي بسيط
عدي :شوف انا حتكلم معاها قبل لاأمشي اذا لساتها مقتنعه حقولك الموضوع من بدايته لنهايته وانتا وقتها اتفاهم معاها اذا مصممه خلاص وقتها انا سويت اللي عليا واتمسكت فيها بما فيه الكفايه
تامر خبط على ظهر عدي : قووم تعال معايا دحين
عارف انو لمى فصلت فصله غبيه مو عارف متأأأكد
دخل عدي سلم على ام لمى ولمى واقفـه مارضي يجلس اكتر من خمسـه دقايق
حس الوضع شويا غريب فاسلم وخرج
الا تامر طالع في لمى : روحي قوليلو لما يرجع البيت يتصل عليا
لمى تنحت ..مو عارفه ايش الموضوع
تامر : يلا ؟
لمى : طيب
وخرجت على طول ورااه وهيا مو فاهمه شي : عدي
طالع فيـها وقف مشي وهيا جات لعنده قالت بتوتر بس بصوت هادي : تامر يقولك لما ترجع البيت اتصل عليه
حسب حتقوله حاجه تخصهم : اها ..طيب
مامشي بيطالع فيها وهيا مامشيت
: مصممه على قرارك ؟
زاد توترها لأنه مو عارفه ايش تبا شتت نظرها
عدي : تبينا نخرج في اي وقت ونتفاهم تاني ؟
لمى حركت راسها بالايجاب
رجع اتكلم بجموووود : على العموم انا ماحتصل ولا حكلمك واتس الوقت اللي تحسيه مناسب كلميني وحجي اخدك
مع انو ماتبى تقول طيب بس قالت : طيب
ومشي من غير اي ابتسامه
من غير اي ضحكه
من غير مزآحه
تبااااا تبككككي
بعد ردة فعلو دي حست انها ماتقدر تسيبو
دخلت الغرفه تآني ولمى رجعت جلست جمب امها
وامها تتكلم مع تآمر وترجع تتكلم معاها
سئلت عن ترف كدا مررا ودا لوحده الموضوع راعبهم
تآمر : خلوني انا رايح عندي كدا مشوار وحرجعلكم
وراح وسابهم ... يبا يشوف ليـث ويطمن عليـه .
واخر الليل حيمر على ترف ويكلم برضو معاهاا ..
اما في الغرفـه لمى صبت لأمها مويا وجلست ..وبتسئلها بس عن خطيبـها وكيف هيا مبسوطه
ولمى ترد باأجوبتها البسيطه
لين مادتها جوآلها وتوريها صور ملكتها
لاشعوريا كآنت تبتسم كل ماتفتح كل صوره
تتذكر كلامه ومواقفه الهبله
وامها تعللق تعليقات ماتخيلت في يوم تقولها هيا على شعرها على فستانها
على مكيآجها جالسه تسمعلها ودمعتها بعينها وبتطالع بس بجوالها وتقلب الصور بيدها اللي تتنافض
_______________________
في أحد المطـآعم ..
ودآهم عشـآن يتغدو ..
قال وهيا تحرك الشوكه بالاكل ومابتاكلل من الاساس : خلاص خليها تجي
بشار رفع عينه عليها
وهيا كملت : ابا اقابلها عشان اخلص واكمل يومي مرتاحه حاستو زي الهم
بشار : دحين اتصل !
روآن مقعده حوآجبها وكأنها مغصوبـه : ايوا
بشار قبل لايتصل قال : انتي عارفه انها تبا تجلس معاكي لوحدها
روآن حركت راسـها بالايجآب
بشار : طيب
وخلص اكلـه وعلى طول قام واتصل بعيد عنها .. بس قالها نبرررة صوتها مافي زيها
يحسها زي امـو . طيبه وعلى نياتها
حددلها المكآن في كآفي .. وخلصو غدى وراح وصـل روآن
نزل معاها طلبلها حلى ومويآ ورجع لهديـل في السياره : ايش بك مانزلتي
هديل : خلاص مالو دآعي
بشار مد يدو وهيا حطت يدها عليـه : حأجل اليوم شغلي واقعد معاكي
هديل : ههههه حمدالله احد عبرني
بشار :هيا عشانك نآكره حكرهك بالخرجه
هديل : هههههههههه امزح حبيبي
بشار مسك جوآله : خلاص راحت عليكي
هديل : اما حنرجع البيت
بشار : لا حوديكي مكآن تآني
عينه على الطريق ويرخي عدسه عينه ويطـآلع بالجوآل
هديل : عادي دامك معايا ماحكره المكآن
بشار : ههههههههههههه شكرا ياعمري
_ ورفع جوآله على اذنه واتكلم مع وآحد بالانجليزي مافهمت هديل شي
بس واضح انو بيحاول ويطالع في الساعه ويرجع يتكلم _
وزادت ابتسامته لما قفل : كل شي جاهزززلك حتى الجوو يقولولي منآسب
هديل لانت ملامحها بخوف : على ايش
رفع يدها وباسها : دحين حتعرفي حبيبي
هديل : هههههههههه ترا والله مافيا حيل اسوي شي
بشار : ههههههههههههه ماحتسوي شي صدقيني
هديل خافت من جملته : ياااااااااربي
امـآ في الكآفي جابتلها البنت الحلى وقاروره المويآ وكآسـه ..
وهيآ لسى تستنى .
قوه ولا برود ولا ايش موقفها ماتعرف خلاص تبا تقابلها عشان تحس انها تتنفس براااحه
وتفكر ايش تسوي ببقيه اليوم
مسكت جوآلها وتطالع بااسم تآمر
واتصلت بدون تفكير .. ونفس الشي رد ولسى ماكتملت الرنـه
فجعها : بسم الله
تامر ضحك : هههههه
روآن لا سلام ولاشي على طول انفلتت عليه : كويس تعرف ترد بسرعه وماتعرف تتصل
تآمر : معلليش انشغلت
روآن اتنرفزت : في ايش
تامر : سايرتلي ظروف
روآن لسى تتكلم بااستهزاء : طيب ايش هيا ظروفك عشان اعرف انا وضعي
تآمر ف طريقه لليث وبيكلمها : تتوقعي في شي بسيط حيشغلني عنك
روآن : قولي وانا ححكم
تآمر : امي في المستشفى امس تعبت وبعدها بكم سآعه ولد اخويا غرق في المسبح وحالته مرا حرجه لدحين
روآن كل العصبيه اتبخرجت عدلت جلستها بتعاطف : اوه ايش سرلو
تآمر : لساته ماافاق لدحين
روآن : كبير ولا صغير
تآمر : عمرو 7 سنوآت
روآن : ياقلبي الله يشفيه وامك
تآمر : لساتهها برضو في المستشفى لكن الحمدالله صحتها كويسا
روآن : ايش سرلها
تآمر تفاصيل ماحيقدر يقولها حاليا : اغمى عليها فجأه وطاحت على راسها
روآن : سلامتها
تامر : الله يسلمك ..انتي فينك
روآن : ف كآفي
تآمر : لوحدك ؟
روآن : ايوا
تآمر : ايش لابسه
روان : هههههههه ماسئلتني كيفك ليش انتي هنآك همك لبسي
تآمر : اسئل عن لبسك عشان نفسيتي وبعدين اسئل عنك
روآن : ههههههههه ايش دخل لبسي في نفسيتك دحين
تآمر : قوليلي ايش لابسه اول
روآن : مو حابه ادمر نفسيتك
تآمر : اووه
روآن : ههههههههههه هو اانتا ليش كدا سطحي
تامر : دحين انا اللي سطحي !
روآن : ايوا ماسئلتني كيفها رجلك ولا مهتم باأي شي فيا
تآمر ابتسم غصبا عنه : وربي مهتم بس من كتر نفسيتي مو تعبانه حبيت اهتم بنفسي شويا
روان : ههههههههههههه اهنيك مو عارفه ايش ارد
تآمر : بجد ايش تسوي عندك
روآن : دلال جيه
تآمر : انتي امس ماشوفتيها
روآن : الا بس بنتقابل لين ماتقبل الوضع او ماتقبله
تآمر : اهاا .. ايش اللي خلاكي توافقي تشوفيها تآني ؟
روآن : مدري شوفتها تبكي حزنت
تامر : يعني سويتي دا الشي وانتي مو مقتنعه
روآن ماتبى تقول انو هيا تبا تشوفها : ايوا
تآمر : اهاا _ سكت شويا وبعدها قال _ راسي مصدع من كتر ماتحشري نفسك براسي وسط الف موضوع
روآن ماتدري هوا كدا رومنسي ولا ايش الهرجه بس ضحكتها : ههههههههه احب اتعبك عشان اشوف حتستحملني ولا لا
تآمر : طلع الموضوع مو بيدي
روآن خفت ابتسامتها ووجهها حمر : بيد مين اجل
تآمر ماعلق على سؤالها : اقولك بزبط ايش اللي كآن يسير انا واقف وعارف انو امي تعبانه وتجي لحظه كدا سريعه روآن رجلها توجعها طيب ولالا .. وارجع افكر في ولد اخويآ وتجي فكره براسي روآن ايش سوت مع امها .. وارجع اشوف امي وحالتها وابا افكر ايش اسوي معاها وتجيني لحظه افكر انتي تبكي ولا مبسوطه ولا مخنوقه ولا ايش تحسي دحين وامسك جوالي ابا اتصل عليكي واتذكر اخواني واتصل عليهم وانزل الجوال وتجي في بالي اني ماتصلت عليكي ويجي مية شي تشغلني وانتي شاغلتني من الاساس
روآن ضحكت بهدوء : هههههه كرهت نفسي
تآمر : شايفه كيف مو مخليتني مرتآح حتى وانتي بعيده
روان : لا بلله يعني لما اكون قريبه ايش بسويلك
تآمر : لبسك يضايقني
روان ضحكت من قلبها : يادااا لبسسسي الللي تدخلو في كل موضوع
تامر ابتسم : قلتلك نفسيتي متعلقه فيه
روآن كآنت بتهرج الا شافت امها داخله قلبها طااح
نبرة صوتها اتغيرت : تامر خلاص جآت بعدين اكلمك
: طمنيني عليكي
: طيب
وحتى ماقالت مع سلامه مع الفجعه رخت يدها وحطت جوالها على الطآوله
امها جات قبالها
تبا تسلم عليها
روآن رجلها مو شايلتها مو عارفه تقوم
حاولت تقوم بس ماقدرت
اما امها حسبت انها مماتبى تسلم ابتسمت باارتباك وجلست قدآمها ..
: كيفك
روآن بالقوه صوتها طلع
مرعوووبه مرتبكه متوتره كل شي تحس فيه .: تمام
رجعت شعرها ورا اذنها وشتت نظرها حولينها
امها دي اللحظه تكفيها انها تطالع في بنتها بدون ماتكلمها
تتأمل ملامحها
نفسها تجي تجلس جمبها بس حتسوي الكلام اللي قالو بشار :قررت اجلس هنآ
روآن طالعت فيها وقالت بجمود وهيا ماتبى تكون ساكته : لين متى
ماحبت ردها بس مازالت مبتسمه : لفتره بسيطه
: اهاا
قربت امها للطاوله : انا عايشه بعيد عن هنآ بين اخواني واخواتي نفسي تشوفيهم حتحبيهم
روان تطالع فيها وحركت راسسها وواضح انو مرا ممو مهتمه
امها مو عارفه كيف تتكلم معاها
تبا تكون طبيعيه
حتى لو ماعجب سميـه ..حتحاول ماتقرب منها بس حتقول الكلام اللي ف قلبها
الكلام اللي حابسته سنين من حقها تتكلم من حقها تفضفض : سميـه .. عارفه انك مو حابتني ..وخايفه اني اكدب عليكي .. انا مستعده اعيش هنا لو دا شي حيرجعك لحضني .. مستعده اسوي اي شي تبيه ...بس حاولي تآخدي راحتك معايا كلميني كأني صحبتك مو امك طيب .؟ .. عامليني زي الغريبه لو دا الشي حيخليكي تتكلمي معايا
مالقت منها اي رد فقالت : طيب .؟
روآن حركت راسها بالايجاب وامها ابتسمت
بسيطــه ودا اللي مجنن تآمر
تحسها تبا الشي ومو عارفه كيف توصله
امها حست انها اخدت راحتها اشرت على نفسها : انآ مدرسه لغه عربيه اتوقع اكتر ماده كرهتيها بدراستك و
روآن قاطعتها : انا مادرست
ماخختفت ابتسامه امها : يعني ماتعرفي حتى تكتبي ولا تقراي ؟ولا احد علمك
روآن اشرت براسها انو لا
امها : طيب عادي لساتك صغيره امي الله يرحمها اتعلمت القرائه وعمرها 49 سنه كآنت امنيتها تمسك القران وتقراه والحمدالله علمتها انا واخواتي ..وانتي لو شديتي حيلك حتقدري ان شالله ..قوليلي اي شي عنك
روآن سكتت وبعدها قالت : ماعندي شي اقولو
امها : طيب مين الشخص اللي قريب مرا منك ؟
روآن : هديل
امها ابتسمت اخيرا اتكلمت : من متى تعرفيها
روآن : من واحنا صغار ولدحين معايا
امها : تشوفيها كل يوم يعني
روآن : احنا عايشين مع بعض
امها : اهااا ماشالله ..وكيفها طيبه
روآن : ايوا
امها : المرا التانيه خليني اشوفها
وبيمر الوقت وكلامهم سطحـــي مررا
الام تسئل وروآن تجاوب لين مادق جوآلها وردت على هديل
وهنا ملامح وجهها اتغيرت : ايش بك
هديل تصررخ : يباااا يقتلني ياروان
روان ضحكت : ههههههههههه ايش بيسوي
هديل : الحقييييني والله حموت
بشار سحب الجوال وهوا ميت ضحك : ههههههههه معليش على الازعاج نكلمك بعد
روآن قاطعته : بشااار ايش بتسوي
بشار : ولاشي بنلعب انا وهيا
روآن : يااكداب
هديل تصرخ : رووووآآن يباا
وكتم فمها بيده : يلا بعدين اكلمك
روآن بهمس بس وهيا تشد على اسمو : بشااار ايش سوويت فيها
بشار : هههههههههههههه سلام سلام
وقفــل منها وروان مصدومـه وتطالع في الجوال ..
اما امهـآ ععشقتها وهيا تتكلم
كدا حستها طبيعيه
ماكانت معاها طبيعيه
: علاقتك مع بشار كويسا
روآن : ايوا
: ايش سوا عشان يخليكي تضحكي كدا
روآن : مو هوا هديل معاه وبيعذبها
: هديل صحيتك !!!
روآن حستها مرا مفجوعه قالت بتصريف : مو هما حيتزوجو
: اووه يعني خطيبها
روآن عقدت حوآجبها وقالت : ايووا !
وهنا جا ف بال امها سؤال
اذا هيا صحبت روآن من صغرها يعني عاشت عند جاسم
كيف ولده حيتزوجها !!!!
بس ماحبت تحسس وران بااي توتر فاخلت فضولها لنفسها : الله يتممله على خير شكلو طيب
: بس هيا اطيب منو
: هههههههه كوويس
ومسكت روان شوكتها ودوبها اتذكرت تآكل
اما ام روآن تطالع فيها وبعدهها جات في بالها فكره : ايش رايك بكرا تجيني انتي وهديل
روآن رفعت عدسه عينها عليها : فين ؟
ام روآن : انا اليوم حنقل لشقه عشان ابا اخد راحتي بالطبـخ فتعالولي نسوي الغدى مع بعض اي شي ف نفسكم حسويه
روآن : طيب
جلسه مهما حاولت امها تااخد وتدي معاها بالكلام لكن توصل لمرحله الصمت
بس بنسبه لها مبسوووطه
وروآن بدأ التوتر يخف لكن مع امها غير عن النآس كلهم
ماتبى تحكيها
ماتبى تتكلم
هرجها قليل
وكأنها وحده تآنيه
ةنص ساعه وروآن قامت امها شافتها تعرج وقـآمت مفجوعه
انتبهتلها من اخر مرا شافتها ومع الصدمه ماستوعبت
جات لحدها ومسكت يدها : ايش بك
روآن طالعت فيها تبا تسحب يدها
: اتعورتي برجلك
روآن : طحت
: لو ادري كآن انا جيتك
روآن حاولت تسحب يدها : مو مشك
امها شدت على يدها : فين رايحه اوصلك عادي
: السياره برا
: طيب تعالي
طالعت قدامها وماتبى تركز في امها
انتبهت للسياره اللي بشار وراها صورتها يعرفها ماحتفهم
لو قلها نوع السياره ..اشرت : ديك خلاص
وبرضو وصلتها للسياره ..فكتلها الباب وروان ركبت وامها
دخلت يدها ومسكت خدها : انتبهي على نفسك
وبعدت ..روان : طيب
: استودعتك الله
قفلت الباب ومشيت ...روان تحس انها تبا تبكي
شتت نظرها على جوالها وعقدت حوآجبها لما شافت اتصال لتآمر
ماتدري متى اتصل
اتصلت عليه على طول .. : ايوا هلا تآمر
: لوحدك ولا
: اييوا
: اتصلت ياشيخه واستوعبت انك معاها فقفلت على طول
روآن :خلاص دوبني مشيت
: فين رايحه ؟
: مدري
تامر : انا روحت لأخويا ورجعت دحين لعند امي بس اختي لمى معاها
: كيفو ولد اخوك
تآمر اتنهد : نفس وضعه والله المشكلـ _ سكت وبعدها قال _ تقدري تجي
روآن : فين ؟
تآمر : المستشفى ماقدر اخرج وبنفس الوقت بسيب امي مع اختي شويا
روآن طبعا ماعندها مانـع قفلت لما قلها فين تجيـه
____
طالب اكل من برآ والفوضى حوليـه ..شغل عزآبيه
صور المكآن وارسلها
" مدري متى حلقى احد يهتم فيا "
ترف مسكت جوالها لما شافت سامي منشغل
وكتمت ضحكتها
" ههههههههههه ياحرااام حزنتني"
براء " مافي ضممير ولا احساس "
ترف " هههههه "
براء " ترا حدك اسبوع وحتجي تعيشي انتي ولدك هنا "
ترف " لا بلله "
براء " يعني ايش اسويلك زواج وماتبي حنقعد كدا لمتى كل واحد فمكآن "
ترف " شويا كمان "
براء " يختي حخلي محمود يجي كمان عشان نفسيه سامي تبي اوامر تآنيه "
ترف خايفه " لما نتقابل نتكلم لاتوقفلي قلبي دحين "
براء اختفى شويا وبعدها كتبلها "احبك شويا حكلمك "
فتح بـآب البيت ودخل جوآله بجيبه
سلم على ابوه .. بس ابوه مافتح فممه بكلمه
دخل بكل صمت وهوا يطالع في القربعه وكأنه له اسبوع مو يومين
جلس على الكنبـه وبراء جلس : اتوقع عمي كلمك ؟
ابوه طالع فيه : كآن اديتني خبر انو عرف بدال ماتحطني بدا المنظر
: كنت حتصل وانشغلت
ابوه بااستهزاء : معذور والله
براء ماعلق
ابوه :امس اتصل وقال كلام ماينقال واحترمت موقفه لأنه وصلهم من برا والمفروض يكون مننا
براء : دا اللي انتو طلبتوه مني
ابوه : الشي اللي شافعلك انو رآمي اتصل دوبه يعتذرلي عن كلام ابوه .. وقالي انو ماقد شافو منك غلط وانتا حر بحياتك صح غلطنا بحقهم لما ماتكلمنا لكن احنا اهل
براء : فيه الخير طول عمرو حقاني
ابوه : اللي جاي اقولو انو انتا تبا تعرف ايش موقفنا من حياتك مع مرتك
براء : ايوا!
ابوه : امك لدحين ماتبى تشوفها وماتباها من الاساس لكن دي زوجتك وماسار لها رايي امك حاليا انا بعد مشكلتي مع اخويا للأمانه ماسار عاجبني الوضع ومو مرتاح وكل مابيزيد هرج النآس قلبي ينقبض واندم على اللحظه اللي وافقت على الموضوع
براء: ابوويا انتا جاي تنكد عليا فل
ابوه قاطعه : انتا الللي جحبتلنا دا الكلام لازم تسمع اي موقفنا ومنظرنا قدام النآس
براء : ياأبويا والله عارف انتا قبل لايطلع الكلام وقفت معايا وشجعتني حتى امي ماقدرت تتكلم بسببك ودحين بعد ماخلاص سارت زوجتي اتغير كل شي كيف ليش متىىىى ماليا حق اسئل عشان انتو بتتماشو مع كلام النآس والله لو النآس ماهرجو كآن لقيتكم اول ناس واقفين معايا بس لاااا معليش النآس بيقولو ويعيدو فاإحنا لنا حق نسمعلهم ونغير راينا متى مانبى
اببوه مرا اتنرفز من اسلوبه : اتكلم بااحترااام
براء : انتم مستوعبين ايش بتقولو احترموني على الاقل احترمو رغبتتي وانو دا الشي اللي اباه تبو تزعلو مني ازعلو بس لاتجي امي تهيينها قدام محمود وتقول عنها مغتصبه لاتجي ترفع سماعتك عليا وتقولي البنت انسجنت البنت اترمت البنت والبنت خلاص انا فاااهم ماتبو تكلموني والله لاأجي دايما عندكم واراضيكم لين مايروح اللي فيكم بس لاتخلوني اشرد منكم بسبب كلامكم
ابوه : المفروض احنا نتحمل الضغط من النآس عشان انتا تعيش مبسوط
براء: انتو اهههلي انا قلتلكم بالظروف اللي حعيشها من قبل لاأتزوجها وانتا سكت وماقلتلي لا
ابوه زفر بضيق : انا خلاص مو عارف كيف حيستمر دا الوضع
براء : انا اقولك ترف ماتبى زوآج وامي اتوقع نفس الشي لأنو اكيد البنت مو مشرفتها واهلها مالهم حكم عليها.. يعني خلال دا الاسبوع على بال اغير الشقه هيا حتجي تعيش معايا ومعاها ولدها
حجي ازوركم بدونها لأنو دي رغبتكم .. احد اتكلم معاكم عن المووضوع قولو البنت مظلومه وربي سخرلها ولدي ..خلاص جمله تنهي الف موضوع ايش سار كيف سااار نصيييب كيف رضي برضو البنت مظلومه وربي سخرلها ولدي تبو تدو مبررات لناس حتفتحو على نفسكم ابواب تبو تكونو واثقين فيا وبااختياري عندكم دا الرد وفللحظه اللي انتو تبو تقابلوها برضو انا حخليها تجيكم
وهنـآ انهى براء نقـآشه مع ابـوه متمسك بمرته ومتمسك في اهلـه
وحيرضى الطرفيـن وهوا اللي حيكون بالنص ...
ماسكه جولها بغرفتها وتتكلم وتبـكي ..
لسى ماستوعبت : علاا من امس ولا سئئل شوفي الساعه كم ولا فكر يتصل
علا : ياقلبي تلقيه نفس حالتك انتي عارفته انو يباكي وبعدين خلاص ليش تبيه يتصل
رشا : مدددري مخنوووقه
علا : خلينا نخرج حتقعدي كدا بالبيت
رشا : تتتوقعي بعد اللي سوته ميسا حقدر اخرج
علا : طيب اجيكي ؟
رشا : لا برضو صعبه
علا : والله معليش على اللي سواه عدي بس
رشا قاطعتها : تستاهل كمااان ماكفاها اللي سوته راحت تكلم وحده ماتعرفها اعوذ بلله منها ومن نفسها الوسخه والله ياعلا لما اطالع فيها ماستوعب دايما انو دي اختتي انقهر وربي انقهر عليها ومنها نفسي اخليها تعدل نفسها بس بعد مارامي ضربها وبرضها ممصمه انو هيا ماغلطت انا غسلت يدي منها
علا : يااقلبي سيبيها ف حالها ميسا من صغرها كدا ماحتتغير
رشا : وتميم ؟!
علا : دا نصيب حاولي تشغلي نفسك باأي شي يارشا عشان لاتفكري واصحك تتصلي عليه
رشا رجعت تبـكي تبا تموت وتكلمــه ومحروووقه انو ماتصل ..
ولدحين ماستوعبت انو تميم مايختفي الا لما تسرله ظرووف اهله
قـد يجمع الله كسير قلب بكسيـرِ مثله فيلتئمآ ويكتملا ..
طول الطريق بتضحك ميلت جسمها وحطت راسها على ذراعه : بشااار ارجوك رجعني
بشار : هههههههههه انتي هبله لسى ماعرفتي فين رايحه ومفجوعه
هديل رفعت راسها : وجهك مو مريح
بشار : ههههههههههههههههه
: لاتتتتضحك ترا وربي بجد اهرج وديني البنت
: من عيوني ياعمري بس حرميكي من مكآن واخليكي تصرخي بكل صوتك وبعدين نرجع
هديل تنحت وهيا تبا تستوعب الجمله
وهوا مات ضحك
دار راسه عليها : والله شوفي ربي يحببك المفروض احجز من قبلها بس الرجال رد وقلي حيزبطني
هديل هرجت بشويش : حترميني من فين .؟
بشار ولا كأنه يسمعها وغنى : بعد مااكنت تاااخدني عن الدنيا ومافيها تنسييني هموم
ضربتتو على يدو وهوا يكممل ويضحك : الوقت واعيشك حاضر واتي خلاص ابعدد عن دروبي
: بشااااار
" اناااا دنياك مابيها خساره يوم ظنيتك سنع عمري ومسراتي بعددد ماكنت تاخدني عن الدنيااا ومافيها
: ياااااااربي
: هههههههه تنسييني هموم الوقت واعيشك حاضر واتييي خلاص ابعدد عن دروبي
هديل : تباني ابعد هاا
على طول سكت وطالع فيها : جربي وحكسرلك رجولك
هديل : هههههههه طيب يلا فين حتوديني
بشار : خلاص وصلنا
هديل طالعت
وتطالع في اللوحـه الكبيره مو فاهمه الكلام بس فيه طياااره
وفيه برااشوت وواحد بينط
وسعت عينها : تمززح صح
: ههههههههههههههههههههه
وشويا ووقف سيـآرته وهيا مسكت في المقعد : والله مااااحنزل
بشار : ههههههههه لاتحلفي عليا حجي اسحبك
هديل : يعننني بجددد من فين انتا تبا ترميني يامجنون
بشار وكأنه شي عادي : من الطياره
هديل : واللللللللللله مااااانزل واللله
بشار ميت ضحككك قفل الباب وجا لجهتها قفلت قفل الباب
وهوا يفتح بالسويتش وهيا ترجع تقفل وتصرخ : ابببعد عني يامجنون
بشار : هههههههههه هديل والله لاتدخلي بسرعه مافي وقت في ناس مستنين
هديل وسعت عينها وتهرج بسرعه : من جدككك !!!! بشااار امانه قول مقلللب اماانه
بشار : وربي من جد _ ويفتح بالسويتش وهيا تقفل وتأشر براسها _
:روووح عن وجهههي مابااك
بشار فتح الباب اللي وراها وهيا صرخت بكل صوتها : بشاااااارررر والله مابى انزل
دخل يدو ورا ظهرها وهوا بس يضحك ورجع فتح الباب وجاهاا
رده فعلها بطيئه فتح الباب وهيا مسكتو وسارت تسحبو : روووح لوحدك ماحنزل
: سيبي الباب ترا لو سحبتو حتطيحي على وجهك
: اطططيح على وجهي واتشوه و لا اطيح من طياره واموت
بشار : ههههههههههههههه يابت الناس مستنين
: لاااااااااا مااااح
وف نص كلامها سحب الباب ورجعت بجسمها مسك يدها وسحبها وهيا توسع عينها : اماااانه عشان خاطر امك يااابشار تسيبني الله يخليييك
بشار : هههههههههههههههه
ولا كأنه نزلها وهيا تضغط بروجولها في الارض : لاااا ماابى ادخل
بشار دار جسمه : والله حشيلك
جات حضنته على طول وتهرج بصوت كلو بكىى : مو انتا تحبني لاتدخلني
بشار يحب حركاتها دي بس بيتسمتع فيها : مو عشاني احبك حخليكي تدخلي
حضنته بقوه :والله قلبي حيووقف
ودخلها بالقوه وهيا تصرخ وانكتمت اول ماشافت المكآآآن الوسيـع
واتوجهه لصاحبـه وبيده التآنيه ساحبـه وهيا تمشي بالقوه
يسلم على الرجال بيد وبرضو يدو التآنيه ماسكها عشان لاتشرد
الرجال يطالع في هديل ويضحك وبشار يتكلم معاه
وهيا مو عارفه ولا كلمه غير انها في مكآن كلهم اشراااار
جآتها وحده بريطانيه مد يدو بشار سلم عليها وقرب هديل وهديل مدت يدها
كلمت هديل وهديل طالعت في بشار : دي مدربـه حتكون معاكي
هديل بهمس وسعت عينها : انتا من جدك
بشار : والله حتطلعي
ويسحبها وبدأت تسمع لأنو البنت بس بتضحك مع بشار وواضح انو مو اول مرا يشوفها ويعرفها
همستلو : ايش تبا الفله دي
بشار : هههههههه بتقول انك حلوه
: كداب
بشار لانت ملامحه : ليش حكدب
: مدري عنك قاعد تضحك وتتكلم معاها
بشار : دي اعرفها من تلات سنوآت هيا وزوجها
هديل : ياألللله
بشار ضغط على يدها : بطلي هبااله طيب
هديل : مستفزه
بشار : الحرمه مافراسها عندها بنتين
هديل : من اول ايش بتهرج
بشار : بقولها انك خطيبتي وسارت تمدحك
واخدهم الكلام وهديل المكآن كلو يضحكو عليها لما بدأو يجهزوها وهيا تقولهم
لا وبشار حاشرها وويمسك يدها ويلبسها الحبـآل وعلى ظهرها ويزبطها : والله مو مسامحتك
ولا كأنه يضحككك وبسسس
وقبل لايسحبها للطياره اتصلت على روان وماقدرت تقولها بسبب يد بشار اللي جات على فمها وكتمتها
وقفـلل من روآن حطو اغراضـهم في الصناديق
وجات المدربـه متحمسـه وشايله شنطتها السودا على ظهرها ادو لهديـل النظااره اللي حتلبسها وبشار ااتجهز ..ورجع يسحبها للمرا التآنيه للطيـآره
وقلبها طآح اول ماشافتها
كل شخص معاه مدرب .رككبت الطياره المقاعد قبال بعد بشار جمبــها ورجولها تتنافض : ياااربي والله لو سرلي شي ياويلك
بشار : ماتثقي فيا انتي
: لا طبببعا بعد دا المكآن مستحيل اثق فيك
بشار : ههههههههههههههه لو سميه معانا كآن انقذتك وماخلتك تركبي
هديل : اااه ياقلبي ياااسميه
بشار مات ضحك اول مرا يسمع منها سميه
واترفعت الطياره عن الارض وحطت راسها على بشار وهيا تخبي نفسها : بشااار حبكي
زنن زن زن طووول المسافه وهيا تزززن وهوا يضحككك
وجاتها المدربـه وخلت هديـل قدآمها وزبطت الحبـآل بينهم وهديل تتنااااافض
مفجووووعه
ووصلت لمرحله وجهها صفففر وماتبى تتكلم
لسانها تقيل
حلقها نااشف
شفايفه جاافه من الفجعه
المدرب التآني ياأشر لهديل انو تحط يدها زي الاكس على كتوفها
ووانفتح البابببب وهديل بكل صووتها لما الهوى خبببط فيها اتكلمت : بططططططططلتتتت
المدربـه مشيت خطوتين قبال الباب وهديل تمشي وخايفه انها تندفع على ورا ولا تسوي اي حركه ويطيحه
فالاستسلام هوا اانسب حل
لابسه النظااره
مغمضه عينها والباب مفتوح
وهيا بالوجه
المدربه رافعه اياديه وماسكه بالعامود : ون ... تووو
وهديل تفتح عينها تشووف السحاااب وترجع تقفل وتصرررخ : لاااا اماااانه
: هدددديل احببببك
بكل صوتها لما قالت المدربــه " ثررري " قالت : اكررررررررررررر
واختفففى صوتهااا ونط وراهم اللي شايل الكميرا
وبعدها بشار ووراه المدرب حقتـو
والرجال الغريب االلي بسببه قدر بشار وهديل يجوو من قبل لايحجزو ..
هدددديل مغمضه كل عينها
الهووا تحسو يخببط بوجهها
وجهها كلوو مشدوددد تفك عيينها تبا تصرخ ماتقدر الهوا يدخخخل بفمها
رافعه اياديها ورجولها زي ماعلموها ...
فتحت عينها وفيه واحد بالهوووى معااهم بيصوورها ويرفعلها يدو يعني " اوووك "
كأنهم في الارض وسعيدين ..
شافت بشـآر بدأت تطــآلع
بدأت تستوعب المكآآآن والجننااان اللي هيا فيه
تطالع في بشاار في الرجآل التآني
كلهم مستمتعييين
شعوور لايوووصف انك تبي تصرخي وماتتتتقدري
المنظظظر
الهووووى
انك طايره في السمآآ
البححر
المباااني
كل شي بااين صغغغغير
وغمضت عينها بااستمتآآع للحظه وفجأه اتررفع جسمها لفووق وصرخت غصبا عنها
فتحت البراشوت فابسبب الهوى اترفعو على فوووق ... وهنا سارت كأنها واقفه بالهوى
تطالع في كل شي تحتها وكيف كل ماتقرب كل مايكككبر
شعووور ف حياتها ماتخيلت تحسسه
وبدأو يقربـه من العشب الاخضر
وبدأت ترتخي عضلات جسمهااا
وواول ماجات رجوولها على الارض ماقدرو يوقفو على طول
والمدربـه فتحت الحبال اللي بينهم وهديل مو قادره توقف على رجوولها
نزلت على ركبها على طوول
حولينها يضحكو ويصوروها وهيا جسمها يتنااافض
عارفين لما تسوو شي مجننوون
اوك انتو حبيتووه
بس لسسى في مرحله الصدممه
بشار نزل وفك حبـآله وراح بااتجاهها :ههههه ها كيف
رفعت راسها وهوا مد يدو شعروو واااقف كلو من الهوى
بالقوه مدت يدها بالقوه شدت رجولها ووقفت بس قربت منه وحضنته : مو قادره اوقف
حوط يدو حولين ظهرها : ههههههههههه ندمتي
اشرت براسها بلا
حاسسها مرعووبه شال النظاره من على وجهها
وجهها متغيـر لونـه جلسها في الارض على العشب وجلس قدآمها
جابولها مويـآ وشربت نص القاروره وحطتها على الارض : آآآه ياقلبي
بشار : شايفه لو ماسحبتك بالقوه ماكان جربتي
هديل: ولاأتخيل اني اجربه تاآني حاسه راسي يوجعني من كتر ماكنت اصرخ وسط مخي
بشار : هههههههههههههههه
هديل : ههههه والله بجددد حاسه اني مرتاحه حاليا مدري ليش وكأني خرجت كل اللي جوتي
ولحظــآت مجنونه كالعاده تجمعها مع بشـآر
بعد مافاقت دخلو المبنى واخدو اغراضهم
وهيا تحس روح ورجعتلها كدا طاااقه غريبه جااتها
ابتسامه على وجهها مجنونه
مع انها ماتبى تعيد اللي سار
بس احلى شعور جربتو بعد الدبـآب
امـآ روآن جوها مرآ غيـر .. جالسه هيا وتآمر
تحس كأنها من زمآن ماتشوفه .. مرا اشتاقتلـه
وهوا وصـل لمرحله انو يقابلها بعز عيلته مو منهـآره
جنآآن اخدت عقلـه ولا ايش يسمي اللي بيسويه دحين مو عـآرف
بتمر السآعات بطيئه ليـن مآجآ الدكتور لليـث : الحمدالله على سلامته
ليث وتميم قـآمو على طول من مكآنهم والدكتورابتسم : دحين حينقلوه لغرفتـه وحجي اطمن عليه
ليث باارتباك يهرج : كيفه طيب يعني _ مرر يدو على جبينه مو عارف كيف يسئل عن صحه ولدو _
الدكتور : الحمدالله فتح عينه وكآن بيطالع فيا لكن لساته تعبان فابديه شوية وقت على بال يفوق
ليث حرك راسـه وجلس على طول لما ماقدر يوقف
غطى عينه: الحمدالله ...الحمدالله _ طالع في تميم _ فينها غرفتـه _
ليث هوا اللي حجز وسوا كل شي وناسي حتى الرقم ..تميم ودآه للغرفـه
لساتها فاضيـه وراح يدور على امل ويقولـها .. وكآنت دقايق ورجـع وقف
لما انفتح الباب
ودخل سرير ولده وهوا قـرب نقلو ولده للسرير التآني وبقيت الممرضه تعلق المحلول
وليث واقف في الجهه التآنيه ..قرب لما ولده نزلت دموعه
جا لحده رخى راسـه ويمررر يده على شعره : احمد
دار راسـه احمد على ابـوه وهنآ عرف انو يسمعه
فتح عينه وطالع : بابا
وهنآ سمـع صوتـه
ليث بككي : ها حبيبي
احمد لساته ينآم ويصحى ويتكلم بكلمات متقطعه : يعورني
: ايش هوا
مارد بس تنزل دموعه بصمت
قللب ليث اتقطع عليـه ومازال مرعووب ولده ايش ممكن يسرلـه
ودخلت امــل وليث بعد عن احمد ..
تبووسه تبككي
اطول وقت مر في حيآآآتها
وهوا يطالع فيها وشكلو يبكيهم زيآده لما يتشكي ومايقول ايش اللي يوجعه
ينقهرو انو مايقدرو يسوله شي وبس بيتفرجو ورجع نآم
ونص سـآعه ودخل الدكتور وتميم معاه ..
ولما جآ لحد السرير ونادى احمد وفتح عينـه : ها كيفك يابطل
احمد بس بيطالع فيه بدون اي ردة فعل
الدكتور ابتسملو : تبا ترجع البيت
احمد على طول اشر براسه
: بس تسير احسن حترجع ان شالله
كشـف عليـه ورفع الشرشف اللي على رجولـه : حرك رجولك
شويـآ اخد منو الموضوع وكلهم يطـآلعو .. وحـرك رجله اليمين بعدها اليسار
والدكتور زادت ابتسامته
ورجع لعند رآسـه مدلو القلـم : خد
احمد مد يدو اليميـن وجا ياخد القلم الا الدكتور قلو : لا بيدك التآنيه
يباه يحرك يدو اليسـآر
ممدوده على السرير وفيها المغذي
كآن بيحآول يرفعها بس ماقدر
دار راسـه يطالع في يده ونظرررته قتلت امل وليــث
ورجع طالع في ليث وقال بخوف : بابا خليهم يشيلو الابره
نوقــف هنـآ شويـآ ...
ونمر بالوقت بـ 12 سـآعه ..
مآزآالت حيآتها مافيها استقرار كل يـوم بيزيـد شي
لمى مسكت يدها : لاتخافي
ترف طالعا فيها خطوتين وتشوف امها
خطوتين بس مو قادره تخطيها
تقيله
صعببه
الخوف واضح فيها
تبا تشوفها
ومو قادره تشوفها
لو لمى ماسحبتها مآكآن اتحركت
اخوانها بالغرفه بس عينها على أمها
امها اللي اقنعوها انو ترف دايما كنتي تشوفيها
بس ردة فعلها ماتدل على كدا
قلبها يحس انو لاااا
دي غيــر
دي ماحضنتها من زمآآآن
دي غير عنهم كلــهم
ليش ماعندها جواب
بس من امس تطلبها
تباها غير عن الكل
وبرضو ماعندها جوآب
هيا اللي راحت تحضنها وبرضو ليش ماعندها جوآب
ترف بس حست بحضن امها بكككيت
هنآآآآآ يووووقف كل شي
هنآآآآآ حسست وصلت لأخر شي تتمنآآه
قالولها لاتبكي
بس بكككيت حق العمر كللو اللي انحرمت منها فيه
نفسها تتكلم
نفسها تقوللها
ليشش ياماما سبتيني
ليش ماجيتيني
ليش سمعتي كلامهم
ليش مامشيتي ورا قلببك
انا بنتك
انا حتى لو غلطت بنتك
كيف هان عليكي
بس شهقاتها اللي ورا بعض وكلام اخوانها مخليها ماتنطق باأي كلمه
تاخد الشهقه من قلبـها
ومآزالت تبا تقولها انا مظلومه
طول عمرها تتمنى توقف قدامها عشان تقولها ياماما والله مظلومه
بس انكتبلها توقف قدامها بس ماتفتح فمها بشي ..
خلاص يندفن كل شي جوتك ياترف كالعاده
وتكتفي بالحضن اللي اتمنيتيه
اما امها بكككيت معاها وعندها الف مبرر لبكى بنتـها
وهنآ الكل بكــي
هنـآ موقف استنووه من سنيييييييييين
وججآآ بعد تعب بعد صراااع طووووويل
بعدت عن حضن امها ورفعت يدها تمسح دموعها
رخت راسها ومازالت تبـكي
بس عقدت حوآجبها ومسكت ذراعها اليمين
امها بصوت هادي ودموعها لسى تنزل : ايش بك
ترف بكيت مو عارفه من الاألم ولا من صووت امها المهتم ...
ونقدم للوقـت 12 سـآعه تآنيـه
صممممت طول الطريــق
القضيـه الاخييره اللي قلو هيآ عمو جميـل موترته
مرر لساته على شفايفه " لا لا إن شالله سجن مؤبد "
راسه حينفجر مرعوووب وقاعد يعشم نفسـه
سميـه صمت بشار موترها ملامحه ككل شي
حتى هيا بتحس بشعور غريب شعور انك عارفه انو ابووكي بس تبيه يتسجن
ليش لما سمعت كلام عمهم جميـل خافت " ممكن يحكمو عليه اعدام ! "
" ايش يعني ..ايش حيفررق حيتسجن فتره ويتعذب وبعدين يقتلوه.. يقتلوه ؟!؟! ..ليش ماباه يموت !! "
بشاار
" كنت انا حقتلـو ! ...ايش حيفرق دحين ... هوا قتل حوور ... عادي ليش حتضايق اي حكم ينزل عليه هوا يستاهله .. دا ابويا ! ... اايوا ابويا اللي كنت حقتلـه "
ومشاااااععر محد فاهمها
صراع عايشين جوتهم
والرعب كاااسي على كل شي يحسـوه ..
وصلـو ودخلو المحكمـه عمهم جميـل مو احسن منـهم ..
ودخلو للقاعه وجآبو جآسم اللي رون كآنت تطآلع فيه وبشار مارفع عينه وشافـه ..
وانفتحت القضيـه
ومستنين الحكم
جميـل وجهه مصفر من الرعب
جآسم ومن امس بس بيدعي
لحظظظظه حتوقف قلوووبهم
وبيعدي الوقــت وهنآ القـآضي اتكلم
كل العيون عليـه :قررت المحكمه ..الحكم على المدآن جاسم محمد الرايد ..بالإعدام شنقا حتى الموت وذالك لـ
وســآر يتككككلم وهمآ وقف بنسبه لهم الصوووت
انتظروني الفصل القادم ..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!