ثأر مهري منهاا الفصل الخامس وخمسون 55 - بقلم اسماء ديمير

《《 البارت ال49》》

ثار_مهري_منها

بقلمي"أسماء ديمير "

اباوع دم ترسني ، اريد اكوم استند داصيح احد يلحكني ماكو ، مرت عمي عافتني وطلعت للمطبخ ، سمعت صوت سياره ..

عطت لج بيبي الحكيني فدووه داموت ..

طب رشيد يركض وجهه اصفر ، مرت عمي صاحت بي ماكو احد جدك مو هناا شكو جاي ..

واكعه بالكاع ولازمه بطني .. هو عاط بيها وهف باب المطبخ دفره فتحهاا بنت الكلب وخرري اليوم اشعل ابهاتكم ..

كبل بجيت كمت اشهك .. رشيد .. رشيد طفل مات ..

اجه ركض عليه كعد كباله مايعرف شلون يشيلني اديه ترجف .. اندار على مرت عمي كللها بالقرعان اذا صار بيها الا احرك عشايركم ولد الكلب ..

شالني كوه ، واني جسمي كله تبند مايتحرك ، بس اشوف قطرات دم الي تقطر ورانه .

ساحت روحي من منظر غمضت عيني كبل ، هو شالني يركض للسياره واسمع يغلط ويكللهن خلي بس يصير بيها شي بالقرعان الا اسويكم فرجه ..

بين ما وصلنه للمستشفه اني بين واعيه وبين لاا ، بس اسمع اصواتهم كلهم يمي ، وصوت نغم تبجي تكله شبيها شنو هالدم ، اصوات غريبه تصيح لغرفه عمليات كبل امبين عدها اسقاط ...

بعدها فقدت ماحسيت لابجسمي ولا بطني حتى الالم اختفه .. بس احس نفسي بمكان بيض ومغوش ، وجو بارد ، اطرافي متتحرك ..

فتحت عيوني وسديتها على كيف ، الرؤيه عدي مو واضحه ،الالم بطني فضيع ، ماكدر احجي واكول بس ضليت اوون ..

فتحت عيوني وبده الغواش يتلاشه ، امي صاحت ياايمه صلاوات كعدته كومي صيح رشيد كليله كعدت ..

خلت اديها على وجهي تبوس بيه وتبجي ..

اني من الالم مابيه احجي بطني اذتني حيل ، بس اوون منها ، اريد اكللها بطني ماكدر الالم ذبحني ..

دخل رشيد الوجهه احمر دم ، عبالك باجي حظن راسي ويبجي ، امي تصلي على نبي وتحمد الله ..

اسمع النشغه مال البجي مالته ، حاظن راسي ويهمس ، ياابعد رشيد واهله يااياابه عبالي خسرتج ..

الله كتبلج عمر جديد ، رفع راسه يبوس بوجهي ، رحمتك يااربي اشكرك واحمدك ..

همست كوه ، دموعي جرت ، بطني ..

رفع راسه لزم وجهي شبيها تاذيج موو ..

كام بسرعه ابتعد عني صاح دكتوره ، اجت هيه وياها ممرصه ، حاجاخا يرجف ، بطنها تاذيها البنج فكها موو ..

اجت وراه حاجتني ، مابيه احجي بس اون ..

كالتله على كيفك مابيها شي هسه انطيها مسكن ،

تالي ضربتني مسكن بالمغذي كالت ربع ساعه ويبدي مفعوله ..

نغم وامي مكابلات سرير صغير كبالي .. هو كاعد يمي لازم ايدي يبوس بيها ، جريت ايدي منه وغمضت عيني تعبانه . مااريد اتذكر الصارلي ابد ..

كرهت حياتي وكرهت نفسي ، حتى احس روحي مو تمام ابد مو زينه ، فتره الحمل جانت عذاب وهسه الولاده صح ماولدت مثل نسوان طبيعي ..

بس الي شفته قبل ولاده موت احمر ..

وره ماوعيت شوي وصحيت زين ، عرفت ولدت عمليه ، لو ما الله ستر جان تمزق الرحم من ضغط .. لاضال ماي راس ولا شي ،

طفل شوي ويختنك ، امي تسولف تكول خمس ساعات انتي بغرفه العمليات ، بس بطاله دم تبرعنه اربعه ،

ربي ستر وحفظني وحفظ الطفل ، رشيد من شايف حالتي وياها نزف كبل متجه لمستشفى خاص ، عرف مو مال حكومي واتبهذل نوب فاقده ..

وراه ها بثلات ايام ، كمت اكدر اكعد على حيلي ، لو اروح لتواليت بمساعده امي لو نغم ، طفل لا لزمته ولا شلته ، بس شوفنه الي من بعيد ، بس امي مكمطته بشالي ، تكول حتى يحب ريحتج ويحن عليج ومايبجي من تشيلي ..

مسمي رشيد ، شهم ..

وراها طلعت من مستشفه ، رشيد سندني خاف اوكع كوه امشي ، دفعته عني ماريد يلزمني ، الساني ماطخ بالسانه ، كاره الوضع كله ، والولاده ماقصرت بيه خاف جان بيه شوي مجال نتفاهم ، هسه لعبت نفسي كلش ..

ابتعدت عنه ، اجت نغم لزمتني ، صعدت بالسياره هنه يمي ، شايلات الطفل ، طريق كله اباوع بوجهه للطفل ، امبين من وجهه يشبه ابو ، لونه احمر والشعر اسود ليل ..

لو عليه جان طلع شعره اشكر شوي ، بس ماكو حتى حواجبه عاكدهن ، فرخ بط عوام ..

وصلنه للبيت علا فارشتلي بغرفه ام رشيد ، دخلت كبل بيها ، لكيت منزلات الكاروك جوه ووفارشه جربايه الي ، بيومها اخواني اجو وهند وجهالها وبيبي وجدي ، بس عمامي ونسوانهم ماجو ابد ،

نمت بالفراش شوي ارتاحيت ، من ريحه مستشفه ، الهوسه شوي فضت ، استغربت نسوان عمي ماشرفن ، والله نةيت اطردهن على الي سونه بيه ،

سالت امي كاعده كبالي شايله طفل تكمط بي ، كالت غير من انتي بالمستشفه رشيد هاد عليهم بالسلاح ..

استغربت شصاير وراي ..

كالت تمالخ ويه عمج علي ولده ، لان مرته شايفتج تعيطين وبالجذب ماداكه عليه وكايله اله مرتك دتولد ،

مستلمتها بيد الله ، اتوسل بيها اكوللها دكي على بيبي جاي اولد ماعبرتني ، نوب مابيه اروح على هند بيتها بعيد ولا بيه امشي وارجع للبيت ،

هيه كبل عافتني ومشت للمطبخ خلتني اربش بالكاع بحدي ..

حسبي الله عليها الظالمه نفس ، بس والله رشيد برد كلبي بيهم ، مسح بيهم الكاع بذاك اليل خبلهم خرطهم بسلاحه ، لو ما جدج يفرعلهم ويهدي جان كتل واحد بيهم ..

، نوب هو هيج بيبتج عليهم ، شسوت بيهم غسلتهم غسل من رجلها والها والولدها ...

شيفيد يمعوده جان رحت بيها ، لو شفتي دم الذبيته بيت جدي والله كلت راح اموت ..

حمدي ربج جان انفجرت جاره وكتلتج انتي والي بطنج عبن عندج ولاده صار يومين وانتي ماتدرين ..

صدك اني من تعاركت وياه جان عدي الالم بس مادري بي ولاده عبالي من المغثه ..

كرهت عمامي ونسوانهم بالزايد ، بحيث حتى وجوهم مااطيق اشوفها ، حقاره تنكط منهم ومن نسوانهم ..

ضليت فتره بالفراش لا اتحرك ولا شي ، طفل حاولت مره مرتين ارضعه ماقبل نافر مني ، تالي عودو على حليب قواطي الطبي ، وثبت عليه ..

امي اول الاسبوع جانت يمي تحظن وتكمط وتسبح نوب نغم تجي شوي ، طفل ماوكع من ايديهم ابد ، رشيد اشوفه وياهن وياهن ، حتى بليل من يبجي يفتح باب ويوكف فوك راسهن ، يخاف عليه ..

نوبات يضل يبجي تالي ياخذه منهن ويفتر بي ، عبالك امه ، امي تباوعلي بطرف عيني مو عاجبها ، قابل شسوي مثلا غير ابوو ..

هو مايدخل يمي لو اسوي نفسي نايمه لو ، من يدخل ماباوع بوجهه ولا اعبره يمل ويطلع ضايج ..

اسبوعين على هالحاله لحد ماكدرت شوي اسند نفسي واكوم اعين نفسي اروح للحمام ..

بعدها امي رجعت يم جاسم واجت بيبي يمي بالنهار وبليل رشيد ..

حسيت بيبي علينه بينه شي ، لان حتى كلام بيني وبينه ماكوو ، حتى نظرات موده ورحمه ماكوو ..

من يدخل ادير وجهي ، لحد مابيبي سألت شبيكم جده توه صار عدكم طفل حك هسه طايرين ثنينكم من فرح شجاكم متنافرين ..

سكتت مقهوره بس احجي تلومني وتطبك وياي ..

مو احجي وياج بت حسنه ..

باوعت عليها بيبي لاتحجيني انتي مو حكانيه بس احجي ماتنطين بي وترزليني ..

هااا هااي اناا خلفله عليج اناا مصليه صايمه تكليلي مو حقاانيه ..

ممجذبه تحبي اكثر مني ..

احبه اي صدك اكثر منج عبن لا ام ولا اب وانظلم من دنيا كلها واجيتي انتي هساع كملتي عليه ..

هاج شوفي بعدني ماحاجيه كبل ذميتيني وحمدتي بي ..

احجي صدك يااجده والله عبالي خوش ادميه ، وتريحي للولد شلعتي افاده ، دشوف الوجهه اصفر كركم من وراج ..

هاي تاليها يجي لبيت عمه شايل سلاح ، ناوي يكتل مرت عمه لخاطرج ، عبن شنو والله جايه تولد ومرت عمي مموديتها ،

غير ماشفتي حقارتها وياي جيت اموت والله مارف كلبها علي ..

ادري بيها طايحه حظ بدون متكولي ، بس خما يجي بالسلاح جان تكاتل ويه ولد عمه وكتل واحد بيهم ، حتى العقل ماضل عده بسببج والله ..

ماحجيت سكتت ، درت وجهي على طفل ..

وانتي وياه شبلاكم جنكم ديوجه هراتي ..

باوعتلها بطرف عيني ..

مو احجي وياج ولج .

مزوج علي بيبي ارتاحيتي .هيه كبل شهكت وطبت على صدرهااا

.هم كولي صوجج جايفه ومامريحته ومن هالحجي وطبكي وياه عبن اعرفج مامتامله منج خير ..

عاطت عززااا العزاك يارشيد اليوم انعل ابيك مزوج على بت عمك .

كامت لحيلها تهد عليه وتغلط والله تفاجئت صفنت عليها يااا هااي منوو توه كعدت تحمد بي وطلعته خوش ولد ..

بس اسمعها تصيح وترزل بي هو ينتر تالي خسنو يسولفون عبالك تفاهمو ، شبيه لعد اني مااعرف اتفاهم وياهم ثنينهم ..

صايره مكفخه الهم .. وره نص ساعه اجت عكس ماطلعت تماما .. الوجهه يضحك ومرتاحه ..

رفعت الها تك حاجب ضايجه ..

كعدت كبالي يااا امداج ولج مطلكها هاي من زمان يالغربه شجاج ..

سكتت ولا اخذت كلمتها كلمه راس ، اذا مااسمعت باذاني ماارتاح ، واذا ماتأكدت الي بالي مو صدك مااطمن ..

بيومها نامت يمي وثاني يوم راحت ، كالت دبري نفسج شنو قابل انضل وراج احنه نداري ونربي ، عجل عليش خلفتي انتي .

دارت وجها وراحت نوب مادزت خبر الاحد يجي يمي ، اني هم سكتت ادبر نفسي لحال اكدر اتحرك ولا اتعب احد وياي ..

صبح كعدت ، تمشيت لكاروك طفل ، نايم اعرف اداري شوي اي ، بس مو خبره مثلهن خفت منه بالاول ، بس كلت مدامه نايم ابدله حفاظ وملابسه من يكعد مااسيطر عليه ..

على نومته غير اله هو ماتحرك ، شبعان ومرتاح شسويت بيه بحملي موتتني ، الي يشوفك هسه مايشوفك بطني ..

سمعت صوت باب وراي انفتحت مانداريات ، عرفته هو منو يجي قابل ..

تقرب عليه وكف بصفي يتفرج عليه واني ارتب بملابسه و غطاه ..

اجاني صوته : صباح الخير

مارديت خلصت الي بيدي ونداريت امشي لزمتي من زندي وكفني ..

دارني عليه صرت مقابليه ، وجهه ضايج كال وتااالي وياج ماتفكيها عاد ..

ضليت اباوع بوجهه ..

شتردين فهميني ..

رديت :- شنوو انته فهمني ؟؟؟!

كل مااكول عرفتك وفهمتك الكه نفسي كلشي مااعرف بيك ولا اعرف شي بشخصيتك ..

سكت ينتظر اكمل كلامي ..

من شوكت مزوجهاا ..

بلع ريك وندار على طفل ، امشي بره طفل نايم ..

مشه جدامي واني وراه .. دخل للمطبخ وكعد على كرسي ..

اسألي فضيني ..

سألتك توه ..

من زمان ماخذهاا ..

من شوكت يعني ..

من جنتي باربيل وطلكتها وره شهر ماكملت وياها ..

ليش اخذتها اصلا ليش ماعلنت زواجك بيها ..

هذا شي ميخصج هناء ، بنت اخذتها قبلج وعجبني اتزوجها ، واخذتها بزواج شيخ زواج شرعي يعني بس ماعرفت اهلي بيهاا ، هذا كل الموضوع وانتهه خلص لاتنطي اكبر من حجمه وتكلبين حياتنه ..

سكتت مقهوره والله كلبي اذاني ، عصرني عصر ، على شنو مادري ، هسه مو كلكها على شنو مغثوثه ..

وجهي جامد سالته هيه نفسها الي اجت لبيت جدي موو من فقدت الوعي ..

سكت وجهه بهت ، دار وجهه يتهرب ..

هيه موو جنت مزوجها اسمها سمرر .

والي اجت لبيت جدي كالت الي اسمي سمرمر ، ومن شافتك جنها تعرفك ولا خافت ولاستغربت اصلا ، وندلت بيت جدي بسهوله ..

سكتت يباوع بوجهي ضايج ،

دمعت عيني احجي ..

واذا عرفتي شراح تفرق ..

تفرق لان تعرفها ونفسها جانت تلعب بااعصابي دمرتني ودمرت صحتي وكرهتني بحياتي ..

يريح اذا كتلج اي نفسهاا .

دموعي وكعن ، صح شكيت من الاول ، بس جان شك ، وجنت ادعي كوم مو هيه ،

نترت بي ، لييش فهمني لييش ..مو كلت مأذيتج ولا كلبي نطاني ياذيج ، ليش جذبت علي ،

قاطعني اااش حدج ماجذب اناا بيش جذبت عليج ، كتلج هذا مو من حقج تعرفين بي لان مااضي مالج غرض بي ولا الج حق تزعلين ..

مرتك المصون شوادها لاسحاق شعرفها بي وبسكنه لو مااانته ..

كاام لحيله معصب عاط بيه .. موو مرتي طلكتهااا افهمي طلكتهاا من زمان .. وعلاقتها بااسحاق مالي غرض بيها والا الي ايد بيهاا ..

حسيت جسمي رجف ، وكع نفسه بنفسه ..شمدريك عدها علاقه باسحاق ..

شنوو ..

توك كلت ماالي ايد بعلاقتها باسحاق اني اصلا ماذكرت عدها علاقه بي ..

جر نفس فرك وجهه ، كعدت على كرسي اسمعي هناء وكبري عقلج ، مالي خلك دفاتر القديمه ، كلمتين ورد غطاهن راح اكولهن لان بيهن راحه بال الج ، اخذ بيهن وعيشي باقي ايامج بدون ذكر ماضي .. بس اذا عاجبج تعيشين بالماضي وطينين عيشتي هذا بقه يمج .. عليه سويته وزياده ..

سمر ازوجتها شهر واحد تساليني ليش هيج عجبني ، رجال والي مزاج بذاك الوكت ، وردت مكان ارتاح بي واخذتها ، الج عندي شي لاااا ...

وراها بشهر بدت تلعب بذيلها ، ولزمتها الدرب مو اناا المره تلعب عليه ، طلعتها من ديالى كلها حتى لاتوصل اهلي ولا تجي عليهم ..

سالفتها وياه ذاك الجحش مالي علاقه بيه لو بكد ذره .. مرت مره من مرات رحت الها لان لكيت الها شغل ببغداد ، حتى اطلع من خطيتها واحسن ماتمشي بدرب اعوج ، لمن وصلت للعماره ساكنه بيها ودخلت شفت اسحاق نازل منها ، استغربت وجوده لمن سألت عرفت نازل جديد وشقته بصف شقتها ، هناا عرفت وتيقنت سمر نفس ماوكفتلي راح توكفله ..

سمر مو هينه ، عرفت المثل اسحاق راح تلوف عليه وتحاول توكعه .. درت ظهري ورجعت لديالى وخلص فضت راحت ، اخر مره شفتها بيت الحجي من اجت وراه رحت لبيتها وهددتها ، اذا رجلها تعتب ديالى مره ثانيع .. لهناا فضت رااحت هاهيه .

صفك بديه اثنين ارتاحيتي ..

كلبي اجه يوكف عفته ومشيت للغرفه لزمتني دوخه سندت نفسي على حايط ..بس دخلت للغرفه بجيت ، شكد ناس ظلام وميخافون الله من عمامي لااخوي لهاي نذله البلا شرف ..

دخل وراي للغرفه مزنبر .. على شنوو تبجين هاا عليه هوو موو ..

ماحجيت درت وجهي عنه اداري دموعي ..

عاط بيه موو احجي ويااج بعده بالج بعدج تحبي مو عافج بنص درب علمود شرط واحد ماعرف يدبره ..

شهكه بصدري اريد ابجي بس خفت منه ، ماابجي على اسحاق من حبي اله لا والله ابجي على ظلم الي تعرضت اله ، ونفسيتي الي تدمرت بسبب ناس اني ماذيتهم بكد شعره ..

الحقد والغل الي شمرو عليه جني عدوتهم ، عاط بيه فززني ..

ولج شكد حقيره انتي ، شكد ضحيت شكد مالخت ناس لاجلج تالي تكعدين كبالي تبجين عليه ..

ولج انتي راضعه ويه خنازير مايغزر بعينج ، عاديت اهلي وعمامي واختي الي روحي بيها لاجل عينج ...

دست على نفسي وكرامتي لخاطرج ، ليش ماسالتي نفسج ليش لو تعرفين احبج واستغليتي حبي الج ، حتى تحققين الي تردي .. حتى تخلصين من عمامج ومن ظلم اخوج ..

ماحجيت ولا رديت بس دموعي تجري ، عافني وركع باب وراه ، خليت اديه على وجهي ابجي ، والله دنيا عوجه ويه البشر الزين .

اني واسحاق ماذينه بشر بكد شعره على شنو البشر كلها نهشت بلحمنه .. لو هاي النذله بيش اذيتها اني وهج دمرتني ..

لو اسحاق المسكين والله مابي اذيه ، الكل شارك بتدمير حياته ، كعدت بجيت على حظنه ، كرهتهم كلهم والله خاصه عمامي ، شكد مايمر وقت احقد عليهم اكثر ..

كل مااكول بعد مايأذوني الكاهم الهم ايد بأذيتي ، مانقهرت على الي سواه رشيد بكد مانقهرت من غدر البشر ، اني هناا مالي مكان ، مايوم شفت خير بهل مكان ، اريد اهج سويها يهناء ،،

نفس ماسوتها امج قبل ، اخذت ابوج جهالها وطلعت منا ،،

اتتي هم ، اخذي رجلج وابنج وهجي لبغداد ، اني مو هند وتتحمل العيال والرجال ، ولا خالتي الي عدها مكر والي فرت رجلها فر ومشته على مزاجهاا ..

اني عشت مدلله وكبرت على دمغات لحد ماثقتي بنفسي انعدمت ماعندي قرار بحياتي ، كل الي سويته وصار غصب عني ..

هسه اني مو لوحدج وياج طفل ، كفي اذيه عنج عاد كبرتي ، لاتخلين لا رشيد ولا عمام ولا بيببتج ولا اخت ولا خاله يمشوج بكيفهم ..

شنو الي تردي سووي كافي اذيه ، الي يوصلج بعد مرعدي ، ملت روحي والله جسمي تدبغ على الصدعات منهم .. من كل الي حواليه ..

بيومها لليل يله دخل للبيت ، وجهه مزنبر ومايتحاجه اني هم ماتواجهت وياه ، بس دخلت عفته وطبيت للغرفه .. كظيتها ويه طفل ، الي لحد هسه شيل مااعرف اشيله ..

بيبي تجي صبح شوي وتروح ، لا اختلطت بيهم ولا سألت عليهم ولا على اخبار احد بعمامي ، عساهم بنار جهنم ، امي رجعت يم ياسر بعد ما رواء خانم رجعت مثل جلب من سمعت بيها زواج ، بعد ماشتت اطفالها سنه كامله وتعلمو علي وعلى هند ..

حتى هيه مايرغبولها ، لو جاسم الي تعود على غيابها ، حتى مايرجع للبيت العصر مثل عاده ، هو وال١٢ بليل يله يدخل بيته ،

اني ابتعدت عنهم ، التهيت بالطفل الي عمره صار توه شهر ، صح هادى حيل ، بس اليوم مدري شبي ، بده يتنعوص عليه المغرب ، نطيته اربع مميات وبعده يبجي ،

هيه بيبي كالت طفل مايبجي لو جوعان لو موصخ نفسه ، هو ماموصخ نفسه اكيد جوعان ..

شلته كوه ماكدر اهزه اخاف تتاذه عمليتي ، هو هم ماينشال يتلعوج بالايد نوب تقيئ عليه لعبها لنفسها ..

شبيك يااكلبي شبيك والله مووتني ، ذبيته بالكاروك رجعت غيرت اله ماابي شي على شنو البجي ..

لاساعه ولا ساعتين لليل هو يتنحس ، واني ازق بي بالحليب اريد يسكت ماكوو ، عبالك شلون انكرص ، ذبحني بالبجي مالته ...

بجي زرف راسي ومااكدرت عليه .. انفتحت باب واجاني صوته شبي صارله ساعه يصرخ ..

مالتفتت عليه رديت بضيجه خلك شمدريني ..

اجه بصفي وخرني وشاله ، وذاك بعده يصرخ ، طلع بي بره الغرفه خلاها على صدره ويطبطب على ظهره ..

هو بعده يبجي ، اني شايله ممه وافتر وراه ، من استفرغ وطلعت غازاته يله عاد سكت ..

اسمعه يتنهد ومرتاح ، دمر ملابس ابوو من استفرغ ، نطاا الي وكلي دير بالج تنطي ممه تخمتي للولد ناويه على موته شنو ..

راح وعافني يغير ملابسه ، خليته بحظني اهز بي ، سااكته وهادى وعيونه عليه يباوع ، ابو ضرطه ، ضحكت الا طلقهن يله ارتاحيت ،

بست ايده فدوه لهل وجهه ، وجهه اسمر وخدوده حمر وعيونه سود كبار ، نسخه من ابوو ، كاعده وصافنه بوجهه ، تلمسحت حواجبه ، اجه رشيد وكف فوك راسي يباوع عليه ..

مارفعت راسي ولا باوعت بوجهه ، كمت لحيلي اخذه وادخل جوه ..

صاحلي مااكافي ،

انداريت عليه ، شنوو ..

وكفلي مخصر وضايج .. مليت ترى هناء ، زودتها واناا صابر لخاطر الطفل ..

ابتسمت ، لخاطر طفل كتلي ،

سكتت ضايج حسيته راح ينفجر بوجهي ،،

الكالي حل لهااي العيشه ، لان ماريدهاا ..

شبيها عيشتج ماعاجبتج ناقصج شي ،

محتاجه مكان أمن بي على نفسي وعلى طفلي ، امن ما باجر عكبه اتصير الي كارثه اني وياه ، اريد ابتعد اخذه وامشي مناا ، عيشه بهل بيئه وبين هذول ناس مالي ..

اخر كلام عندج هناء ..

اي ، اريد راحه بالي تعبت ، مابيه حيل بعد ، كاافي الي صار بيه مايتحمله حيوان .. دمعت عيوني تعبت والله ، منطقتكم مااشفت منها بس الاذيه من يوم خليت رجلي هنا ويه بابا لحد هسه ..

شتردين يعني ..

نعوف ديالى ونروح بغداد ..

اعوف اهلي وناس واروح لبغداد الضيجه ، حتى نفس بيها بحساب ياابه ..

على الاقل مابيها نفاق واذيه ، بين ناسك واهلك مااشفنه لا رحمه ولا خوف من الله ،

هزز راسه متحلف .. خووش عجل ..

درت ظهري ومشيت ، بلعت ريك ، خايفه منه ، اني على نفس رأي ، وهذا انسب حل ، اذا اريد اعيش مرتاحه ابتعد عنهم ، والله ماراح اشوف يوم حلو هنا ابد ، حتى بيبي الي تحبني هم لاحني منها اذيه وكسران خاطر ..

رشيد اذا يحبني واذا متمسك بيه يعوف العيشه هنا ويجي وياي اني وابنه ..

بيومها نمت ولازمه كلبي ، خفت من قراري ، اغلب الي مر بحياتي كوارث ومصايب ، وجنت اني ضحيه مااعندي ذره حيل لمصايب جايه ابد والله . نوب وياي طفل ..

اريد اربي ابني بهدوء وراحه نفس ما بابا ربانه ، اخذه وامشي ،والله بس اخطي خطوه بره هذا مكان انسى كلشي واعيش حياتي ، بدون خوف بدون ضغوطات راحه بال ابديه ..

ثاني يوم من كعدت لكيته مموجود ، من يوم الي انولد شهم لحد هسه ، هو مياكل بالبيت يطلع فجر ويرجع باليل يلف راسه وينام ..

الكلام بعد ولادتي وياه شبهه انعدم ، جنت مصره على الي اريده ، خلي اسوي نفس امي بالكت هالمره تفلح وياي ويكعد حظي ..

ادري يمكن البعض يكلي كلبج شكد قاسي شهر كامل كلبج ماحن عليه ، وتشوفي مايلفي بالبيت ابد ماتنقهرين علي ، اكول جنت مصره اريد اخذ الي بالي واريده يصير ، انقهر عليه من اشوفه تعبان ومقهور كاعد بالحديقه بس اريد انقذ نفسي وابني ..

جنت قبل انتظر من فلان وعلان يخلصني منا هالمره اني راح اخلص نفسي ، ولكيت سالفه سمر حجه قويه هم حتى اطفش ..

بيوم جنت واكفه اغسل بالمميه مال شهم ، اجاني وتفاجئت بكلامه ، حجه وياي ، بنبره جافه ، كلي حظري نفسج ..

سالته بخوف ، وين ..

اندار عليه مو تردين تهجين مناا .. الي تردي راح يصير ، باوعلي بقهر ، بيت ابوج حظرته الج ، وكليتج رجعتج الها ، عيشي حياتج نفس ماتردين بت حسن مو هذا يريحج ..

عيشي الي جان بخاطرج ..

سألته ابني ؟؟؟

وياج يضل. . عافني وصعد فوك ..

ردت اسأله وانته .. بس عافني مانطاني مجال ، كعدت على ميز بجيت مقهوره ، شتردين بعد مو هذا الي بالج ، مو جنتي تردين هيج ، هاهيه راح تطلعين مناا ، خلصتي نفسج وابنج من هذول ناس ..

مسحت دموعي ، بس هوو شلون اعوفه بحده هناا ، منو اله ، بيت فارغ منو اله هوو اذا رحت اني وابني ، هو شنو عيشته ..

، شوي ونزل مغير ملابسه .. اجه يطلع من باب المطبخ صحتله ..

رشيد ..

اندار عليه وجهه احمر ، عيونه بيهن عتب ..

وانته ماتجي ويانه ،

كلمن يعيش بالمكان الي يريحه بت عمي ، طلع وطبك باب وراه ..

وراها بايام انتقلت لبيت بابا ، كبل لا اطلع كلت اسلم على هند وبيبي ، بيبي زعلانه ماحجت ولا باوعت بوجهي ..

سلمت وطلعت ، مانداريت ولا باوعت وراي بعد ،من وصلنه للبيت ، لكيته مأثثه من كلشي من الابره لغرفه نوم الي وللطفل ، امي جابها يمنه تضل وياسر بيته قريب علينه ..

كليتي رجعت الها ، واكو خط ياخذني ويرجعني ..

مرتب كلشي وحده ماخله شي ينقصه ، جنه يريد يحسسني بتأنيب الظمير ..

كليتي داومت بيها ، نفسيتي ارتاحت شوي ، لبسي التزمت بي جبه لو فستان طويل ماردت اطلع عن شوره لو استفزه ، طلع اربعين شهم ..

ورشيد اجه نص نهار وراح مالحكت عليه جنت بالكليه .. كلبي يوجعني ، مامعبرني ولا مهتم ، جنه كرهني رجعت لنقطه صفر وياه ، يجي كل سبوع ساعه زمن ويمشي ويحرص كون اني مموجوده ..

حتى من يسوك النه لو يمر يشوف شهم ، يتاكد كون اني مو هناا يله يجي ، مو عادته ابد مجان هيج قبل شجاه وهيج نفرني وكره شوفتي .

ردت مصلحتنه والله ، مرت شهرين وكلت هسه يحن وكلبه يلين ويجي ويلحكني ، بس جنه سمجه ماتكدر تطلع من مااي ، على كولته كلمن يعيش بالمكان الي يريحه ..

جنه مرتاح على فراكي ، بديت اضوج وامل صح مرتاحه لاقال ولا قيل ، وابني بحظني وامي متوليه تربيته ، وكليتي رجعت الها وملتهيه بالمحاظرات ودراسه ..

بس من يجي اليل احن اله ، احن لفتحه باب بنص اليل حتى من زعلانه منه يفكدني ويجي بتالي اليل يمسد على راسي ويبوسني ، ادري عذبته هوواي بس والله كله جان ضغط علي وتعب ..

مجان عدي وقت اكعد واصفن واحاول احسن علاقتي بي ، كعدت بنص اليل بجيت هسه شنو حاله معقوله نساني لو خاف تزوج بالسر عليه ..

يمكن والله كلشي اتوقع منه ، فد يوم رجعت للبيت من وكت لان سمعت بي راح يجي يشوف شهم كلت احجي وياه احاول احسن علاقتي بي ..

تلكاني باب البيت توه يطلع من باب بيتنه من شافني صفن بوجهي . سالته شلونك ابو شهم ..

تهرب من نظراتي كلي هلا وعافني وطلع حتى ماخلالي مجال اساله لو احجي ..

درت ظهري عليه شخط سياره وراح ..

دخلت وجهي مكلوب وروحي طالعه ..

امي من شافتني مااحجت تدري بالي صاير بس ماتدخل ، بس تراقب ، ذبيت هدومي وكابلت شهم الي بده يكعد ، كعدت اوكل بي قطع فواكه وصافنه ..

امي حاجتني شبيج ..
نداريت عليها ضايجه . هزيت راسي ماكو شي ..

ماناويه تصالحينه ياامي ، لاتضيعينه من ايدج بعدين تندمين ..

سكتت مخنوكه ، شسوي مليت والله ماكو شي سويته ورتاحيت عليه . اريده هناا يمي بعيد عنهم ..

امشي وروحي اقنعي لا تعاندي وتخلين راسج براسخ ، هذا رجال مو جاهل وتعاقبي ويجر عدل .. رجال مايتعاند رجال يتسايس ويجي وياج على مرام ..

شلون يعني ..

اكعدي واحجي وياه فهمي من مصلحتج ومصلحه ابنج العيشه هناا وبعيد عن عمامج .. اضربي مثل بولادتج جيتي تموتين ومحد رأف بحالج واخذج للمستشفه ..

جريت نفس ضايجه ، ماتوقع يقنع ..

جربي وياه شخسرانه ،

احاول وياه وراه امتحاناتي هسه مشغوله خلي اخلص الي بيدي ..

دراستج اهم لو بيتج ..

ماحجيت ضليت سااكته ، ثاني يوم واني بالدوام دك موبايلي واني باامحاظره مارديت ..

وره ماطلعت شفت بيبي داكه ..

شعبجب صار اشهر من طلعت مناك بعد هيه ماحاجتني ولا سالت علي ولاعبرتني ..

بس دكيت عليها ، رديت هلا بيبي شلونج ..

وجعاا ابوي ، يالجلبه ..

فهيت عزاا شبيها .

ولج هنيوه صار اشهر صابره كلت راح تجرين عدل وتتعلمين بس مالج جاره انتي ..

شلون بيبي شخبارج ..

انجي ولج مو احجي وياج ..

شبيج بيبي اكلتيني وشربتيني داكه تسالين لو تهينيني ..

جرت نفس ياايمه ياحسن ياوليدي شخلفتلي انته شذبيت عليه مصيبه متت يايمه وارتاحيت وعفت الهم وظيم عليه كعدت نوب تبجي وتنوح لا عزاا شصاير ..

شبيج بيبي شصاير ..

كولي شنو ماصاير ..

خير بيبي والله كلبي يوجعني مابيه حيل اذيه ..

عجل انته رايحه هناك يايمه ، وعايفه رجال بحده لامره لاجاهل لاحد يونسه ، ولا يعينه وتكولين شصاير ليش هيج يمه اناا هيج علمتج ..

سكتت ، تمشيت اشوف مسطبه اكعد عليها ،

جريت نفس حايره ، جارتج بيبي ،

تعاي'شوفي زلمتج يمه لايضيع من ايدج ، بالقرعان لو مااكلبي يحبج فلا انقهر واغث روحي لخاطركم رجال راح يطير يمه منج ..

كمت لحيلي خير بيبي شسامعه ..

ماسامعه يايمه بس'شفت بعيني ..

احس بطني مغصتني . بيبي شفتي عزاا جايب وحده للبيت وياه موو .. ادري بي مايضل بدون مره شيصبره هو اعرف..

عمه العماج ولج ، شايفته بلا تربيه مثلج ، لايمه بس اكو من يحوم عليه صبح ومسيا ويجيب اله الاكل وينظف اله البيت ، ليش تكولين بيبي ماكالت هاا انا الي عليه سويته ..

وردت اعمر بيتج بعد انتي بكيفج تردين تهجني وتكعدين على ترابه بكيفج ..

منو هاي بيبي عليج الله سمرر موو ..

ياهي هااي ..

مره غريبه جان مزوجها قبل ..

لايمه مو هاي .. منه وبينه الي تدخل بيته ترى جدج راح يعلكها بركبته ليش تكولين كتلج اناا ..

يااا بيبي رقيه موو الكلبه ..

محد جلب غيرج والله ابن عمها تشوفه مرمط بالاكل الجاهز وماله احد يونسه توالي اليل عدها غيره احس منج ..

عزاا بيبي والله عيب عليج شنو تونسه بتوالي اليل ..

طايحه حظ ارجعي لابالقرعان الا ازوجه باجر ..

رده لذاك مكان مالي بيبي والله مااعيش يمكم بعد لو اموت ..

عجل وداعت ابوج الا ازوجه واكسر ظهرج ..

بيبي عليج الله اوكفي داحاجيج ..

سكتت تتنفس بعصبيه ..

مارتاح يمكم بيبي والله متت ، اخر مره لو ما الله شكفلي جان رحت بيها ..

عجل ياجده رجال شنو ذنبه صار اشهر لامره يمه ، لابشر يسأل عليه، دوم اشوفه بهل بستان مترب ، ماكله القهر والهم .. دروحي شوفي وجهه شداعي ، جلد وعظم ميت حتى اكل مثل الاوادم ماياكل ..

ليش ياجده هو شذنبه شدخله بسوالف نسوان عمج وعمايلهن، شو جان مداريج جن ماي عينه ، حنني كلبج يابيبي وحافظي علي ، يابه وداعت ابوج وممحلفتني عمامج جاي يحومون عليه يردو ياخذ منهم ، بحجه مرتك وهجت لبغداد ماتاخذ الثانيه وانته معذور وحقك هذا واني كلبي مانطاني اشوفج مكسوره خاطر ..ادري بيج رعنه بس كلبج طيب ،

سكتت الله كريم بيبي ،

مافتهمت تجين لو لاا ..

شتردين بيبي اجي لو لاا ..

ولج هيوه والله اذا ماخليتي عقلج براسج وجريتي عدل تشوفين شي مايعجبج ..

لاتهددين حجيه ماخاف والله ..

هيج صارت بس حسنه ..

شو صرت بت حسنه توه تحمدين بيه ..

سدت موبايل بوجهي وراحت .. درت وجهي للحديقه ياالهي اريد شورتك ..

رجعت بيومها للبيت دمعتي بطرف عيني ، والله خايفه ارجع نوب اطمس هناك طول عمري ، توه حياتي تعدلت ومشت عدل ولا هم رقيه ولا خوف من عمامي ولاشي ..

خاف بس ارجع اخسر كل هذاا ، وارجع لنقطه الصفر اعض اصابعي ندم ، منو يطلعني مناك اذا رجعت هالمره برجليه ..

اليل كله مزهرمه هسه رقيوه النذله ، تجفت عليه للغرفه مثل ماسوت ويه جاسم ، وهم تبلي وتخلي يزوجها ، هو رجال شيلزمه صار اشهر بلا مره ..

اذا ضاع من ايدي منو الي ، يحبني وتحملني وماقصر عليه ، شو اخواني كلمن ملتهي بمرته وجهاله ، امي هم مره تعبانه تريد من يعينها ، خما تضل طول عمرها حايره بيه وبهمي ..

قررت وخلص ، توكلت على الله واتخذت قراري من صبح خليت ياسر يوصلني لديالى ، عافني بالباب البيت ورجع هو ، دخلت للبيت كبل ، اني وشهم وجنطتي اسحل بيها ام الجروخ ..

فتحت باب ودخلت ، بيت المنظف على حبايه ونص ، اكيد منافقه هيه جاي تنظف ، نوب الاكل مركب وخالي على طباخ ..

فتحته جداري تمن ومرك ، نذله نوب تركب ام وصخ على كوله رواء بايره ..

ذبيت ملابسي وشلهت ارداني اطبخ ، شلت ذاك الاكل وشمرته بالزباله .. نعمه الله تلفتها من وراها ، مال اشمره بوجهه ..

طبخت تمن برياني و ياه باميه وياها لحم ، ساعه ونص واني واكفه على طباخ ، كلت بين مايستوي ادخل اسبح وابدل ..

شهم خليته بالحجله وعفته كبالي يفتر بيها خفت لايروح للمطبخ ..

سبحت وطلعت ، طفيت جوه الاكل وخليته بعلب وخليته بالسله ، هيج وكت هو بالبستان . بس خاف ماكوو ..

دكيت على بيبي بس ردت كتلها ، وين رشيد ..

وجع احجي عدل شلج لازم خليج بكليتج الي كتلتي نفسج عليها رشيد تلكي بالبيت جايب هاي مدري شسمها سمر وكاعد يتسامر وياها ..

هاا هيج تكولين ..

اي شفته بعيني توه طبكت سيارته ونزلت وياه مره بعباا ..

هاا ..

عجل اجذب عليج ياول ..

بيبي ترى اني هسه بالبيت ورشيد ماكو على شنو تشمرين عليه تهايم والله عيب ..

بعد بيتي انتي بيتج ياجده موو ..

اي بيبي رجعت رشيد وين ..

يااا بالبستاج ياجده من صبح طلع ، روحي عليه الله يهدي سركم . ضلت تدعيلنه بالهدايه والله يحفظنا ، هزيت راسي منها ، مااكدرلها لا والله ، سديته منها ..

تمشيت اله شايله سله الاكل بيد وشهم باليد الثانيه ..

شفته من بعيد كاعد يحرث بالفاس بطرك فالينه تعلاكه ولاف راسه بالشماغ من شمس ، صار شكد مشايفته ، شكد اشتاقيت اله ...

مدنج ماشافنه تمشيت عليه كوه اخاف اوكع اني وجاهل والسله كوه متوازنه ..

وصلت قريب منه و التفت من سمع صوت ابنه ..

وكف شغل وبهت بوجهه باوع عليه متفاجئ ..

نزل نظره على سله ، جر نفس ، باوعلي بعتب زعلان ..

حجيت خجلانه منه ، شلونك ابو شهم

ماحجه بس رمش بهدوء مقهور ، نطاني ظهره وكمل شغل زعلان ..

اني هم ماحجيت ذبيت سله والطفل على صفحه ..

فرشت بالارض الفراش وكعدت ارتب بالاكل ، خليت مخده صغيره وكعدت شهم عليها ..

همست الغده ..

التفت عليه بسرعه برغم جان يشتغل بس جن اذنه يمنه يراقب وينتظر ..

ابتسمت يمكن جوعان خطيه .. اجه كعد هو وترابه وعركان انقهرت عليه ، من نوع حيل يتعب ويكتل نفسه على شغل ، وحريص على ماله واملاكه ، وحرص عليه وعلى ابني حيل ، امن علينه وعلى راحتنه ، فضلنه على نفسه وعلى راحته ،..

رفع عيونه لكاني اباوع عليه صافنه ..

ليش مااجيتي قبل هسه شمعنه اليوم ..

دنجت ساكته فشلانه منه ..

يااكبريائج وعنفوانه يابت حسن ..

رفعت عيونه عليه ابتسمت .. خجلانه منك مو كبرياء ..

ا تعلميني بيج يابه ، اذا ماصارلج سبوع تفكرين بهل جيه ماتجين ، اذا ماحد دفعج وزن براسج ماتجين ، اعرف من تقفلين على شغله ..

بلعت ريك الي جابني انته مو احد ثاني ، ماريد اخسر زوجي وابو ابني ، اريد احافظ على بيتي وعليك ، بس جنت اريد افكر اريد وقت ، اريد احسم قراري ..

وشقررتي باله ..

رجلي وابني ..

ابتسم ساكت ، سالته شلونك ..

الحمدلله صرت زين ..

هزيت راسي اباوع لشهم يلعب بالاكل لغمط نفسه ..

انداريت عليه لكيته مبتسم .. كتله تدري كل مايمر شهم يصير نسخه منك ..

يضوجج هالشي ..

ابتسمت تريد صدك ..

كولي يابه ..

لا والله جان مصبرني على فراكك هو ...

سكت صافن بوجهي ، رجعتي برجليج ياهناء لو هم احد ضاغط عليج .. .

جريت نفس اتمنه يفهمني . رجعت الك ، رايده حياتي وياك ، وغير شي ماريد ..

..جرني عليه وحظني حيل ، مشتااق ،

كال لوو اني عركان ، وجسمي مدبك خاف ضوجين ..

رفعت راسي من صدره وبسته من ركبته .. صفن بوجهي ، مانزلت عيوني ضليت اباوعله ..

جاي تتعب لخاطري واخاطر جهالنه وتريد استنكف منك لا والله مو بت حسن الي اتسوي هيج ..

عيونه لمعت وبيهن نظره هيام وفه واخلاص .. احسه ممنون مني واني مننونه منه اكثر لان اشوف حسن بعيونه ، حسن الي ماينام الا وهناء بحظنه ..

سمعت صوت ببه ااندارينه ثنينه مفزوعين على شهم ضحكنه على كلمته ببه .

كتله هاااك استلم اول كلمه كالها ببه ..

عبني حنين ، وكلب الطفل يعرف ياهو الكلبه رجيج بينه ..

ضحكت وهزيت ايدي عود ماااوصيكم سوو حزب عليه من هسه ..

ضلينه على كعدتنه اني وياه للمغرب نسولف ونتعاتب مرات نضحك ومرات ننقهر من مواقف صارت ويانه ، عاف شغله وكابلني يحجي وياي ، اني هم رخيت وياه ماريد اضل علاقتنه هيج مضطربه ومتشنجه ..

اجذب اذا اكول مااحبيته واريد اكظي العمر وياه ، لان بس هو تحملني بس هو ماترك ايدي وعافني بنص درب ، بس هو من جنت اوكع بشده الكاه كبالي ويمد ايده ويساعدني .

ساعدني بمواقف جان هو بامس الحاجه للمساعده ، داواني هو جان مجروح ، صد اذيه عمامي واخوي عني ، هيج بشر انام بحظنه واني مأمنه على نفسي وياه .

صح نوبات استرعن ، بس لمن يعوفني ويهجرني ليالي ، اصحه على نفسي ، واعرف غلطي وارجع اله ، وكالعاده مايوم رجعت ولكيته مال مني ، او نافرني دوم الكاه فاتح اديه ومسامحني ..

رجعه لبغداد ماصارت بشكل نهائي ، جنه نسكن بغداد بس بوقت دوامي ونرجع كل جمعه وسبت لديالى ، وقت دوام بغداد وبالعطله صيفيه بديالى ، امي وياي وياي ، ماكدرت اتخلى عنها هيه ماترتاح بيت واحد من اخواني بس يمي ..

بعد شهم ماسويت طفل نويت اتخرج ويله مابقه شي انشالله واتخرج ، ورشيد قبل لا اتخرج اتفق وياي ، تعين اي بس تشتغلين العصر بصيدليه لااا ..

اني هم ماكلت لاا ، قنعت وسكتت ، ادري بنفسي ماادبرها شغل صبح وشغل العصر وبيت وطفل ورجال .. راح اقصر ورشيد ماتنفع وياه مره مقصره ..

هند بدل طفل صار عدها اربع اطفال ، وياسر صار عده طفلين لارين وحسن ، جاسم اخوي ابن امي احبه واعزه بس ضلت علاقتي وياه محدوده ..

اشوفه نوبات مامرتاح ابد اضوج وانقهر عليه ، كلنه لكينه شريك حياتنه الي يحتوينه ويصبر ويانه على حلوه والمره ، الا هو رواء مرمرته شوفته نجوم الظهر ، هو هم مايقصر ايده وضرب ..

رقيه شوفتي الها نادره جدا ، لان ماختلطت ويه عمامي لا بالزين ولا بالشين ، سمعت من بيبي خاطبها واحد ارمل يشتغل كصاب، وعدها ثلاث جهال ، عمي منطيها اله ..

صح امها واخواها ماراضين ، بس بعد فوك كلمه عمي ماكوو ..

مانقهرت عليها على هيج قسمه ، انقهرت على الايتام ، الي راح تصير مرت ابوهم رقيه ، شلون عود هيه حنينه والعياذو باله منها ..

انتهت قصتي لهناا ، بحلوها وبمرها ، اذا تسالني شنو تعلمتي بهل ال٢٥ سنه من حياتج اكول ، ماانطي سري بس الامي ماادير ظهري بس لاختي ..

محد يحب الخير لاحد كلمن ونفسه ،خاصه بهل وقت ، محد يحب يشوفك احسن منه بس امك وابوك ..

اتمسك بالشخص الي كل ماتاذي وتجرحه يرجع يفتح اديه مبتسم ويسامحك ، هيج شخص مستحيل تلكاه الا ماندر ، الانسان بطبعه يحقد وماينسه اني من ناس مانسيت صح سامحت بس مانسيت ،

تعلمت مو كلشي يتمناه كلبي يصير ويجرالي ، يمكن الله كاتب الي الاحسن منه ، وعسى ان تكرهوا شيا فهو خير لكم ، اذا ماصار مو الازم ادور على سعادتي بمكان ثاني ، دورتها ولكيتها بمكان لا على بال ولا على خاطر ، ومشيت جوه جنحه اميره زماني ..

••••••••••••••••••••••••••••••••••••••••

بقلمي :أسماء ديمير ..

نلتقيكم انشالله بقصه جديده وره رمضان المبارك ..

راح افتقدكم وافتقد تفاعلكم الجميل وتعليقاتكم الحلوه ...