رواية ثارهم وبنت الفقير الفصل الثاني والعشرون 22 - بقلم الكاتبة ترانيم 🤎

الثأر السابع عشر

ثارهم وبنت الفقير

بقلمي_ترانيم هادي ♥️🕊️.

لاتنسون تصوتون عالبارت حلويني
.
وتعاليقكم بين الفقرات لاتنسوها
.
ومتابعه للحساب ♥️🕊️,
taranim_09

غيد... كسرت الباب وصوتي راح من العياط حتى بلعومي تجرح خفت لايأذيها اعرفه من عصبيته حتى مايشوف دربه

دكيت الباب بقوه لدرجه حسيت ايدي تكسرت وماحس غير بس صوت الطلقه وصرخه سيرين دوت المكان

سيرين...

السلاح موجه لراسي وروحي تنازع غمضت عيني واني اودع هالحياه

وبس دموعي تجري بدون صوت وعياط غيد ،ضليت ارجف مثل السعفه واني بهالحاله

ماحسيت غير شالني من ايدي حسيت روحي شاغت من الالم

حجى بكل غضب وتهديد ودمارات رقبته باينه

ضرار... حذرتج سيرين كل مره احذرج وتعيدين الغلط شسويلج اااااحجي شسويلج

جاوبته والكلمه بلكوا تطلع من ثغري

سيرين... اكتلني انت تخلص وانه اخلص

ضرار... اششش ماااتخلصين والخلقج اندمج

دفعني والمسدس موجهه على راسي

سيرين... اااااكتللللني يلللله اكتتتلني وخلللصني شمنتظر هاااا اي ضحكت عليك لعبت بمشااااعرك ومثلت الحب عليك

دار وجهي بكف حسيت فكي نكسر من قوه الضربه
_بكلامي استفزيته اكثر اشوفه بلكوا كاتم غضبه عليه

واكفه كدامه وماحس غير صوت الطلقه صرخت بصوت عالي وغمضت عيوني وايدي على أذني

اريد استوعب الموقف الاني بيه بالربع ساعه اني على هالحاله ارجف من الخوف عيوني مغمضتهن وحيلي انهد خايفه افتح عيوني من الرهبه والخوف

فتحت عيني عاينت عليه وعاينت وراي الطلقه ضاربها بالمرايه موعليه

وجهت نظري عليه شمر المسدس وكعد عالجربايه لزم راسه ويتنفس بسرعه

ضرار... غيييييد روحي منااا ماسويلها شي

عاط عليها وبعد ماسمعت صوتها ، وكعت على رجليه واتنفس بلكوا

حجى بعتب وتنهد بقوه

ضرار... كليلي شسويلج ؟

سيرين ببجي... والله ماردت هيج ردت ارد لاهلي ولحياتي متتخيل الموقف الخليتني بيه وأنت خطفتني وسجنتني هناه انه حياتي مووياك افهمني الله يخليك

ضرار... من بعد السويتي بالعباس اندمج خاف جان ابالي اردج هسه شيليها هالفكره من بالج

كام وكف على حيله وزفر بغضب

حضري روحج سيرين هسه من صدك جحيمج ابتدى وياي

_حجى اخر كلمه ومشى بكلامه حسيت روحي عطبت ضليت ادك والطم حرت شسوي

ساعات اني على هالحاله غفيت بمكاني من التعب وماحسيت بشي بعد

غير على صوت دكه قويه وكأن صاير اعصار
كمت فزيت بسرعه وايدي على كلبي

عاينت على ضرار واكف فوك راسي والغضب بعيونه اريد استوعب الموقف على فزيت على صوت عياطه

ضرار بعياط... فضيههها يله ورانه طريق

سيرين... شنو ياطريق

ضرار...  كومي بدلي خل نولي

سيرين... وين !!!

عاط بعلو صوته حسيت طبله اذني تزرفت

ييييييييله كومممممي

حجاها ومشى كمت اطوطح مثل السكرانه دوخه مسيطره عليه ومعدتي تكلب عاينت عالمرايه حالتي حاله

الدم تارس وجهي ويابس واثار الضرب مطبوعه

سيرين... هوه هذا هم حال خرب حظي
عود كال مراح اسويلج شي وهوه مشوه وجهي الشويب هم بيك بله

_احجي بحدي وسمعت عيطته من الصاله

ضرار... سييييرين اذا ماسكتي انهيج بالعباس

عفته ورحت سحلت نفسي للحمام سحل سبحت وخلصت لبست صايه وخليت كريم حتى يخف اثار الضرب

خلصت ورحت للصاله لكيته منتجي ومخلي ايده على راسه والجكاره بايده

شافني وكام اجى تقدم عليه ووجه مليان غضب

ضرار... شنهي هذا الخ*** المخليته لوجهج

سيرين... خليته حتى اخفي اثار الضرب

ضرار... ابتسم بسخريه وهز راسه،ماكو داعي تخفيه كلشي حيكون علني منا وهيج

عافني وخلاني بحيرتي شنو قصده هذا ،مشيت وراه قفلنا الشقه ومرينا على شقه الحجيه

اول مادكينا طلعت غيد عيونها حمر ووجها شاحب اول ماشافتني طكتها بجيه وحظنتني وكأن ردتها حجه حتى ابجي

غيد... شلونج وشني هذا حالج

ضرار... حضلن واكفات لونولي

غيد... لا تعالو ادخلو

دخلنا جوا واني رحت لغرفه الحجيه لكيتها كاعده السبحه بايدها وتقرا قران

بمجرد ماشفتها نفسيتي ارتاحت كلش ودموعي لازالت تجري شافتني ابتسمت بوجهي واشرتلي اروحلها

رحت يمها وكعت بحظنها وبس صوت شكهاتي يدوي الغرفه

الحجيه... يايمه على كيفج على روحج

سيرين... حجيه كليلي شسوي حايره والله تعبت من الااني بيه

الحجيه... (إِنَّ اللَّهَ يُدَافِعُ عَنِ الَّذِينَ آمَنُوا ۗ إِنَّ اللَّهَ لَا يُحِبُّ كُلَّ خَوَّانٍ كَفُورٍ)،فقد أضاف الله سبحانه وتعالى في هذه الآية الخيانة إلى الكفر، وجعل الخائن كفوراً؛ أي شديد الكره

بنيتي التفتي لروحج واعرفي اغلاطج ماكلج ضرار ماغلطان بس يايمه هسه هوه رجلج كدام الله والقانون

اذا الله كاتبلج تكملين حياتج وياه لاعتراض على حكمه التفتي لحياتج وعيفي الماضي الله لورايدج تضلين وي التردي جان هيه اتي مريته واله

الحياه تمر كبل لانستوعبها واتي يايمه لاضيعين حياتج بالكره والحقد اطي فرصه لضرار وصلحي الخربتي اتي هسه رجعتي ضرار الي جان يكفخ ويعربد عليج بس عرفتي شلون تكسبي وتجيبي لصفج اكسبي من جديد عبن ماكو احد بظهرج غيره
بس مراح تعرفين هالشي الامن تخسري

بنيتي اتحملي واصبري عبن اتي حتعيشين حياه غير العشتيها اصبري علما الله يفرجها

سيرين... الجايني اسواء من العايشته ؟

الحجيه... الله يصبرج

سيرين... ضرار مايأذيني

الحجيه... وانتي شعرفج مايأذيج !!!

سيرين... لورايد يأذيني جان أذاني من قبل

الحجيه... ضرار هوه سندج خليج بظهره دومج وحيكون الج مثل الدرع اليحاميج ضرار يعرف شلون ياذيج ويندمج لابضرب ولابالتكفخ

ردت احجي وسمعت صوت الباب كمت من حظنها دخل ضرار وتلاحكته غيد اجى باسها ايدها وراسها
وهيه تشم بيه وتبوسه

الحجيه... يايمه دير بالك على رويحتج وعلى سيرين

ضرار... انشالله حجيه

الحجيه... الله يهديكم وليداتي

ضرار... حجيه حروحن انه وايشي يصير وياج خابريني ومازن كليوم يمرلجن يشوف شمحتاجات وانه بس ارتب اموري مابقيجن هيج بس هالكم يوم خليها تفظ

الحجيه... وليدي ماتقصر

ضرار... يله اودعناكم

الحجيه... الله وياك

سيرين... طلع قبلي واني كعدت حظنتها وابجي اجت غيد حظنتني وتشهك بدموعها

غيد... الله عليج لاتنسيني وديربالج على روحج وبطلي وكاحتج

سيرين... فدوه لكلبج انتي مستحيل انساج ادعيلي الله يخليج خايفه كلش

غيد... لاتخافين وضرار يمج يله كومي وربج يحلها

سيرين... ودعتهن وهاي صار ثاني مره اودع عزازي
ودعت اهلي بدموع ذليله وهسه ودعت غيد والحجيه بدموع مكسوره شودع بعد يربي

مشيت وياه نحو المجهول ماسالته وين رايحين ووين ماخذني ولانطقت بحرف
مشينى وطول الطريق ساكتين ضليت كلساع اغفى واكعد وهوه مستمر يسوق

اخرها كعدني حتى اكل لكيته جايب اكل وصاف السياره واني احس راسي صاير طبله من الوجع وكان احد جاي يدك براسي

ضرار... كومي اكلي

سيرين... ضرار

ضرار... همم

سيرين... وين رايحين!!!

ضرار... اسممي خل نولي مووكت اسئلتج

حجاها بنتر عاف الاكل بحضني واخذ بطل المي راح يغسل ،عاينت للاكل مالي نفس احط لكمه بحلكي

لميته وعفته على صفحه ،اجى صعد عاين للاكل زفر بغضب ورجع يسوق

اباوع للطريق كلساع اغفى واكعد الطررريق طويل ساعات والشمس دك براسي ومعدتي صارت تكلب

لااكدر احرك ايد ولارجل اريد انطق بكلمه موكادره وكان كل جسمي مبنج

بس صوت ضرار وهوه يتردللي

ضرار... سيرينه افتحي عينج بويه شصابج

فتحت عيني على كيف راسي مصدع واريد اتقيا
جان فاتح باب السياره واكف كدامي وحاجب الشمس عني
بلل ايده وصار يغسلي واني احس روحي خاويه

ضرار... وجج لاتخوفيني عليج صحصحي

ضل يغسلي ويهفي عليه شوي استعاديت وعيي وهوه فوك راسي واكف

ضرار... سيرينه شمالج

سيرين... راسي يوجعني

زفر الهوى ومشى اجى فتح الباب اخذ قماشه واجى يمي فتح الجامه وثبتها بالجامه وسد الباب

صارت في والشمس جانت دك براسي نسطرت منها اجى صعد سحب الاكل وصار يسوي لفات

انطاني اثنين ووياهن عصير

ضرار... هاج اكلي والعباس اذا كلتي ماريد ادفنج بمكانج

_خفت من طريقه كلامه وتهديده وكعدت اكل مثل العاقله وهوه نزل يشرب جكارته وكلساع تخلص ويشرب غيرها

خلصت لميت الاكل وعفته على جهه هوه شافني واجى صعد

انطاني حبوب ومي وهوه مانطق ولاكلمه اعاينله عيونه حمر وايده ترجف

شربت الحبوب وهوه بس يزفر اخرها عاف راسه على ستيرن السياره ويعصر براسه

سيرين... ضرار شبيك !!!

رفع راسه واشوف الدم يجري من خشمه ،يااايمه ضرااار شهل دم

جاوبني واحسه بلكوا ينطق

ضرار... وجج اهدي شبيج

سيرين... دم يجري من خشمك

ضرار... هديتي حيلي عبالي صابج شي

كلبي عصرني عليه وبس دموعي تجري من الشهكه بلكوا احجي

سيرين ببجي... ضرار حتموت

ضحك بصوت عالي وهوه اخذ كلينس مسح الدم

ضرار... لامايصيبني شي

سيرين... وهذا الدم ليش يجري

ضرار... ارتفع ضغطي يمكن

ضل يمسح بالدم طلع حبوب وشربه ،حرك السياره وانه كلساع اعاينله الرجفه بعدها بأيده

_سكوته خلاني اتندم لان لعبت بمشاعره ومثلت عليه تمنيت لو مفرغ غضبه بيه ولاهالسكوت

اعاين للطرق كلها بساتين ومناطق زراعيه البيوت بسيطه والحلال مربوط

وكف السياره بمنطقه البيوت واحد بصف الاخ واكو كراج بس للسيارات

الدنيا جانت ظهريه ومحد طالع هوه اتصل على احد وبس ينافخ

ضرار... يله نزلي

سيرين... عفيه وين جبتني

ضرار... لاهلي

سيرين... ها

نزل هوه واني نزلت وراه قفل السياره واجى وكف كدامي يعدلي بشالي

ضرار... حنفوت واليسألج ايشي ديربالج تنطقين بحرف كليلهم ضرار موجود واسألو مشاكل ماريد طوله لسان ماريد واليسمعج حجي تعالي كليلي وانه اعرفن اتصرف وياه

بكلامه حسيت روحي بادت كلبي انعصر من الالم والخوف مسيطر عليه

جابني وين وشلون حعيش وياهم وانه يعتبروني بت جتال ابنهم

ترى شلون حتكون حياتي بهالبيت وممكن يرجعني لاهلي مره ثانيه

لزم ايدي ومشى اعاين من بعيد طلعو اثنين من بيت جبير نفسهم الاخذوني

واحد منهم شافنى وضحك اعرفه اسمه بسول بس الثاني اجى يطك اصبعه ويهز بجتفه

عرفته كاعد من النوم عيونه حمر وشعره واكف وهوسه ولابس فانيله تعلاكه وشورت

حيدري... جبناها واجت ويانه جبناها واجت ويانه

بسول... يهلا نورتينه خويه

_همه يحجون واني بس دموعي تجري وجن المشهد من خطفوني انعاد عليه وشلون اخذوني من اهلي يسوحلون بيه

ضرار... ياهو الموجود

حيدري... مجلس التعاون العربي كله موجود ياهو اليعجبك تلكاه

ضرار... وجدي وينه

بسول... منتظرك

وجه نظره عليه وحجى

حيدري... چا شبيج تعوين علينه

بسول... مالك دخل عوفها

ضرار... انه وتالي وياك

حيدري... خويه مرتك من هسه تضغب علينه خليج كويه يالعوره مايفيدن دموعج هناه

_راد ضرار يلزمه وهوه طكها ركضه بس التراب يتطاير وراه

ضرار... الس*** انه اعلمه

بسول... تضلون بالشمس اليوم لوشني

ضرار... يله امشينا

لزم ايدي ومشى واني كل خطوه اخطيها احس كلبي ينقبض

وصوت حجيهم واصل للشارع وهوسه دخلنى جوا جان اكو اثنين بنات صغار يجيبن بتراب الحديقه ويلعبن بيه

هنه شافنه واجت وحده منهن ايديها محنايات وضفايرها يمشن وياهه تمشي وتوكع وصفك بأيدها

هوه راحلها شالها وضمها لصدره ويبوس بيها لفها لف بأيديه وهيه ناعمه كلش

_ابه ابه ابه

ضرار... ياااروح ابوج ليش طالعه بالشمس

بسول... چا هيه تسمع تسمع الكلمه ياهو ابوها

سيرين... حسيت روحي راح اوكع من طولي يعني معقوله بنته

بنتك هاي ؟

التفتلي وهيه بيده وتبوس بخده

ضرار... اي بنتي

_حسيت واحد وكفخني على راسي يربي وفوكاها مزوج

ضلت بس دموعي تجري بدون صوت وبلكوا مسيطره على شهكتي احس كلبي تزرف من الألم

مشو همه كدامي واني جامده بمكاني ورجليه احسهن بلكوا مستنده عليهن

بسول... خيتي امشي لاضلين واكفه

جاوبته واني اشهك والكلمه بلكوا تطلع من ثغري

سيرين... فدوه اريد ابويه محتاجته

هزلي راسه واشرلي امشي وياه مشيت ودخلنى جوا اعاينلهم كومه ناس منجمعين

يمكن بالخمسين شخص يايمه شدعوه بس لاهذول كلهم اهله

همه ملتهين يسولفون ويضحكون شافونه وكلها وجهت نظرهم عليه

نزل بنته من ايده وهيه راحت تركض واني واكفه بظهره وكان جاي احتمي بيه وهوه نفسه أذيتي منه

لزمني من ايدي ووكفني بصفه وماحس غير شي انشمر عليه عوجيه رفعت راسي واشوف نظراتهم التتوزع عليه

سلافه بعياط... سويتها وجبت بت هالك*** ابيتي ولك جيت بت جتال ابوك

همه سمعو هيج وكلها ثارت العياط صار يدوي المكان والغلط الاسمعه منهن عليه وعلى ابوي

انه بنصهم وهمه وحوش ومحاوطيني احسهم على لحظه يهجمون عليه

وهوه ساكت وماحرك ساكن ولاحتى حجى ومخليهم يحجون بحدهم

حطام... كااااافي سكتو خل نفهم السالفه

حيان... شتفهم وانت حفيدك جايب بت جتال ابنك علينه ومفوتها الدار مانعرف منين ماوين جايبها

حطام... ولاتنسا هالبت اتصير حفيدتك

سلافه... ولك ضرار لاتبط كليبي واحجي شسوي جايبها

ضرار... جده انه مزوجها

هيه ابتسمت بسخريه وعاينت للرجال

سلافه... هاك يحطام مزوجها

بس سمعو مزوجني كامت وحده من الكاعدات ضلت تصيح وتعيط خبصتهم خبص وتلطم

وهيه تعيط وصوتها عالي كلش
مياده... تزوووج عليه وفوكها مانعرف من يامجره جايبها لهالبربوك

ضرار... وروح ابوي اذا فكيتي حلكج احسب لله ماخلقج

مياده... والله افكنه واشوفك شسوي وجايب ضره عليه جايب طبق شرع الله وانت وياي تمشي عكس لساعه

هوه راد يروحلها ولزمه بسول ، اعاينلها رفعت اردانها واجت تريد تهد عليه وسحبنها النسوان ويهدن بيها طلعنها من الاستقبال وصوت عياطها يرن بأذني

باسمه... لابارك الله بيج اجيتي واجت المشاكل وياج

رحاب... والبت شعليها كلكم عليها واتي دنانير چا موبتج اشوفنج ضميتي راسج من شفتيها

سيرين... شتحمل بعد يربي، اشوفها عاينت لمره كاعده باريحه هزت ايدها وعوجت حلكها معاجبها

وكأن اني نسخه منها تشبهني كلش كاعده ومستريحه والذهب يخشخش بايديها والدك بحنكها والكحله راسمه عينها

يعني هاي امي نفسها الشمرتني وماسألت عليه ماعرفتني ميته لو عايشه وهيه الله جمعني بيها وليش حتى يجمعني بيها

حتى ينكسر كلبي اكثر واشوفنها ماحركت ساكن من شافتني ولاجن تعرفني

فززني من صفنتي عياط ضرار

ضرار... مييييس تعالي اخذيها جوا

ميس...
ماكو مخلوق على وجه الارض يقدم للانسان كل انواع الحب والتضحيات الا الاب

فتحت عيني عالدنيا وانه بدون اب بس اخوتي همه الي ملو هالفراغ الي بداخلي

عشت سنتين وي ابوي وماكو غير بس الصور اشوفه بيهن

وعشت بين خمس اخوان صارو الي اكثر من اب عيشوني وربوني بينهم مثل الاميره مابيوم قصرو وياي بشي عبن البت الوحيده عدهم

دوم جنت اسمعن جدتي وهيه تدعي وتنحب كل وكتها وهيه تكول

ربي لاتوفق جتال ابني وتخليه متهني احرمه من العافيه مثل ماحرمني من ابني

كبرت وكبرت اسئلتي وياي محد جان راضي يكلي ابوي شلون مات وليش !!!

والعرفته ابوي مات مكتول وعلى ايد رفيج عمره وصاحبه

وبسبب المشاكل التصير كضينا كل عمرنه واحنى بمشاكل وي الصوب المجاورنا وهوه صوب الحجي وهب والي ابنه يصير جتال ابوي

الايام جانت كفيله بنسيان كلشي بس الثار ضل ملاحكنه ومع انو السالفه فضت من زمان وحلوها

بس اخوي الوحيد الي جان حامي عليها وماناسيها
ضرار ابوي واخوي وعزوتي دوم اعاينله روحه معلكه بهذاك الصوب وروحه تلوب

وانه كبرت وهوه يحجيلي على( ريحانته )سنه ورى سنه وهيه بس اسمها ريحانه اعرفنه ماعرف لاشكلها ولاشلون صايره

ابد ماحملتها ذنب ابوها اذا هوه جتل ابوي هيه شعليها

ماحقدت ولاكرهتها وانه اسمعن اهلي كل عمرهم يدعون على جابر وبنته

_بيوم جانت العشيره منجمعه وتقريبا تعودنا على هالجمعه كل خميس

كاعدين ونسولف ودخل علينه اخوي ضرار واتبعته بنت جان الخوف باين عليها وترجف وبس دموعها تجري بحيث وجها صاير احمر دم من البجي

اعاين لملامحها موغريبه عليه وجن شايفتها ،والي صدمنه من جدتي كالت بت جابر

هناه مثل واحد وضربنا كف كلها هاجت عليها وعلى ابوها وكان هيه الي كتلته

والي صدمنا اكثر من اخوي كال مزوجها هناه كلها ثارت عليها اعاينلها الخوف بعيونها

ودور بالوجوه تريد احد تحتمي بيه

ميس... ها خويه

ضرار... اخذيها جوا

لزمتها وهيه اتشبثت بأيد ضرار وتشهك بالبجي كلامها بلكوا ينفهم من بجيها

سيرين... فدوه لاتعوفني

هوه لزم ايدها ايطمنها ومستمره تشهك

ضرار... بويه ليش هالبجي روحي وي ميس ولاتخافين ماعوفنج

سيرين... اخذتني البنيه الصاحها ومشيت وياها دكت الباب ودخلنا شفت مره كاعده وبيدها القران

شافتنا وابتسمت

بديعه... تعالن يمه ياهي هالبت وشني الهوسه البرى

ميس... يمه اجى اخوي ضرار وهايه مرته ريحانه

_اعاين للمره انصدمت من سمعت اسم ريحانه عيونها دمعت بس مابينت ابتسمت بوجهي وصاحتني اروح يمها

بديعه... بنيتي ليش هالبجي

هيه كالت هيج واني دموعي مثل الشلال اريد احجي واجمع الاحرف موكادره احجي من شهكتي

ميس... لوشوفين شسوو بس شافوها حقها واكفه بنص هالعشيره وهمه يسبون بيها وبابوها

سيرين بشهكه... خاله رجعوني لاهلي انه هذا مومكاني الله يخليج احجي وي ضرار

بديعه... يمه ميس ابقي يم البت ولاتعيفيها وشوفيها شمحتاجه خل اشوفن شصاير وشعامل هالولد

كامت المره طلعت من الغرفه وضلينه انه والبنت

ميس... انه ميس اسمي واعتبريني مثل اختج ماشي

سيرين... هزيتلها راسي بدون ماجاوبها وهيه احسها متوتره وتريد تحجي

ميس... هسه اتي صدك ريحانه يعني مرت اخوي

سيرين... انه اسمي سيرين موريحانه

ميس... ماعرفن اخوي دومه يسميج ريحانه وتعودت على اسمج

سيرين... وانتي شلون تعرفيني

ميس... ممم كومي بدلي

ماجاوبتني وراحت كمت نزعت الصايه وافتر بالغرفه وصوت عياطهم يرج بأذني ماعرف منو اليحجي وهمه كلهم يحجون سوا

بس صوت ضرار ميزته وهوه صوته عالي وخشن اعرفنه حتى من يحجي بصوت هادئ

شوي واجت نفس البنت ابتسمتلي واجت كعدت يمي وماحس غير الباب يندفع ويدخلن اثنين نسوان علينه كل وحده شضخماتها

وحده منهن عرفتها تصير مرت ضرار والثانيه ماعرفها اشوفهن رفعن اردانات دشاديشهن سدن الباب ودخلن

كمت بسرعه وختلت ورى ميس هنه اجن دفعن ميس واستلمني دك ضرب

الضربه ماعرف منين اتلكاها وهنه يضربن بيه شعري اتكطع بأيدهن

وميس توخر بيهن متكدر والاصوات تعالت برى احس روحي تعبت من الضرب لااكدر ادافع على نفسي ولااكدر اضربهن

هنه طوال وخشنات صرت جواهن وهنه مستمرات بالضرب

ماعرف منو وخرهن مني واني روحي خوت من الضرب الدم ماعرف منين يجري وشعري كطعنه تكطع
اعاين لدشداشتي شاكاتها عليه من يم الصدر وملابسي داخليات ظاهرات والدم ينزل لجسمي

عاينتلهم كلهم برى وضرار وخرهن مني وبس ميس والمره الجانت يمي يغطن بيه ويمسحن بالدم

باوعتله واكف ومكور ايده وشرايننه بارزه اريد اصرخ بوجهه اريد اعاتبه عالا اني بيه

حجيت واني بلكوا صوتي يطلع حتى بلعومي احسه تجرح
عطت وصوتي بلكوا ينسمع
سيرين ببجي... موانه السبب موانه الي كتلته ثاركم مالي دخل بيه حتى تنتقمون مني بهالطريقه

اريد احجي بلكوا انطق النفس ضاك عليه وهنه ضلن يفركن بصدري وضرار يغسل بوجهي

فقدت وماحسيت على شي بعد .....

يـــتـــــــبــــــــع....

( توقعاتكم للبارت الجاي 🌚؟ )