رواية ذات العيون الناعسة الفصل العاشر 10 - بقلم روان آل عبدالله

ليش تِعثر ؟!
مرّة ضُم روحَك بِـ روحك..🍂🖤

الكاتبه :روان عبدالله

"" "" "" "" "" "" "" "" "" "" "" "" ""
دفعني و دخل على الغرفه دخلت وراه هنه خاتلات بل زاويه وحده حاضنه الاخرى صاح بصوت عالي

محمد. منو كتلته بساع احجن لا هسه اذبحجن هنا و َما يرف الي جفن

مريم. الله عليك عوفهن كتلن منو شجاي تحجي ترا ما سون شي والله

محمد. زولي من يمي معليج لا تدخلين... يلههعه احجننن بساع

كامن يحلفن انو مو هنه الي سون هيج

تقرب عليهن و سحب السلاح صاح

محمد. احسب للثلاث الي ما تعترف هسه هنا كلجن اكتلجن برمشه عين

سحبتو من تيشيرته بس جان اقوه مني دفعني و كام يعد

محمد. 1...2....3

سحب أقسام صاحت وحده

- انيي والله انييي بس لا تكتلهن الله يخليك

باوعت عليها ترجفو شلون السعفه دموعها تنزل بغزاره

تقد عليها و سحبها ضربها بمقدمه المسدس وكعت و كصتها كامت تنزل دم تقدمت عليها

و سحبتها باتجاهي حضنتها و كمت ابجي وياها

اجه محمد و سحبها من حضني و كام يسحل بيها

صاح على دواعش اجو شالوها اسمعو يكول الهم

محمد. خلوها بغرفه وحدها هسه اجيها

تقدم باتجاهنا و كام يصيح

محمد. صبرن عليه تحسبن راح اسكت اوكفن اني الجن

تقدم و رفعني عن الأرض صاح

محمد. امشي على الغرفه و لا تشوفيني شكلج ابد

دفعتو و رحت على الغرفه كعدت واني منهاره من الي دا يصير مجاي استوعب ابد

بقت هاي الاسئله براسي منو قتل و شجاي يصير
قاطع تفكيري صوت الباب نفتح بقوه

اجه محمد باتجاهي و سحبني كبل فزيت و دفعتو

مريم. وين ماخذني ما عوفني

محمد. امشي بدون صوت

مسك ايدي و جرني و دخلني غرفه جبيره كلش

باوعت البنات كاعدات على ركبهن و مدنكرات روسهن و داعش منتشر بكل الغرفه

سحبني محمد و كعدني يمهن باوعت على هاي البنت الي عترفت مكعدها مقابيلنا و شادين عيونها و يدينها ترجف و تشهك من كل كلبها

كسرت خاطري دنكت على الي يمي و همست

مريم. شصاير فهميني عفيه

- هذي البنت الي انتِ عالجتيها ماتت

مريم. انا لله وانا اليه راجعون

- خلي اكمل الج.. من ماتت صديقتها هاي من القهر راحت على غرفه هذا الي عذبها و كتلته

مريم. شلون كتلته

- طعن حتى الموت هه

مريم. اششش نصي صوتج.. شسمه منين جابت سكين ولجج

- معرف والله هذا الي محيرني

رفعت راسي لكيت محمد يخزرني رجعت اله الخزره
هز راسه بتوعد

باوع عليهم خلو كراسي داير مداير الغرفه انفتح اباب و دخلو دواعش هواي مبين عليهم القاده

كعدو على الكراسي صار هدوء تقدم محمد و سحب البنت من شعرها كام واحد من القاده و بيده سيف جبير كلش تقدم و نطاه لمحمد أخذه و خلاه على رقبه البنت

اني هنا وكفت الدنيه بيه جسمي معد احركه اسمع الصوت البنات يصرخن و صوتهن شوي شوي يختفي
احس النفس كوه أجره عيوني معد أكدر ازولهن عن رقبه البنت

ذبحه و دمها كام يطفر بكل مكان موقف جان كلش بشع بمعنى الكلمه كامن البنات و طلعوهن من الغرفه

بس اني بقيت عيوني معلكه على الجثه و ما تحركت ابد بس صافنه

حسيت احد سحبني ما شفته كبل غوشت عيوني و غمضت

كعدت باوعت على السقف ما أكدر اركز احس الدنيه تفتر بيه

تذكرت كل الي صار نزلت دموعي و كمت اشهك

حسيت احد يمي كام فتح الضوه باوعت هذا محمد

عصرت عيوني ما اريد اشوفه صرت اشمئز منه
صار بل نسبه الي شلون الكابوس المرعب الي احلم بي واني بنص الحلم واصيح يارب يطلع حلم  هيج شعوري

تقرب عليه و كعد يمي صرت ابجي اكثر و خليت ايدي على عيوني ما اريد اشوفه صاح

محمد. و تاليي مو نريد انام كافي تعوين

مريم. انجب روح من هنا ما اريد اشوفك ابد

لوه اصبعي و صاح

محمد. ديري بالج تتجاوزين بعد والله اذبحج مثل ما ذبحت الي قبلج سامعه لو لا

هزيت راسي بايي صاح

محمد. احجي اريد اسمع صوتج

مريم. أي سا.. سامعه و. اله.. الله

محمد. هسه اريد منج تسدين حلكج و ما اسمع صوت

نطاني ضهرو و راح نام

خليت ايدي على حلكي و كمت ابجي بصمت بقيت هيج نص ساعه و غفيت

حسيت احد يهمس باسمي فتحت عيوني لكيت بنات واكفه فوكي

مريم. هاا

همست بصوت ناصي كلش

- واحد من التنظيم دزني عليج يريدج

مريم. شنو تعرفين شسمه شيريد مني

- لا تخافين اهدي و امشي ويايه

كمت لبست العبايه و النقاب و طلعت وياها دخلنه على غرفه شفت محمد واكف و يمه دواعش و بل ارض زلم كلهم دم و شكلهم فاقدين الوعي

محمد. تعالي مريم

مريم. هاا شتريد

محمد. تكدرين تعالجيهم لو لا

باوعت عليهم شكلهم يكسر الخاطر ما يحركون لا ايد ولا رجل همست

مريم. أي أكدر بس ما عندي شي اعالجهم بي

محمد. ميخالف هسه يجيبون الج شتريدين

هزيت راسي و هما طلعو اخذو البنت وياهم  بقه محمد واكف فوكهم

تقدم عليهم خايفه من المنظر مالهم بس ما أكدر اعوفهم اكو شي بداخلي يمنعني

كعدت يمهم و رفعت النقاب دخل واحد و شايل صيدليه بيده خلاها يمي و راح رفعت راسي على محمد

محمد. يله عالجيهم

مريم. بس اريد اعرف منو ذوله

محمد. سجناء

هزيت راسي و صرت امسح الدم الي على وجههم

عالجتهم حسيتهم بدو يصحون

صحو و نطيتهم ماي شربو صاح محمد

محمد. كومي

كمت و وكفت يمه صاح على الحرس الي يم الباب و اجو شالوهم و راحو

بقيت على هذا الحال كرست وقتي كوله  اعالج بل سجناء و اعالجهم من كل كلبي هما صارو يحجون ويايه و تعودو عليه بس يحسبوني سبيه ما يدرون اني اخوي داعشي

جنت اعالج كا العاده دخلو داعش كبل نزلت النقاب على وجهي و دخلو مكتفين ثلاث اشخاص دفعوهم على الأرض وراحو كمت عليهم و صرت اكشف عليهم

خلصت كشفت و كمت اعالجهم ركزت عليهم رجعت ذاكرتي هذول الي مره دخلت عليهم بل سجن

كومتهم و كعدتهم على الفراش

مريم. خلصت بس احجولي تحسون بوجع شي

صالح. بنتي جزاج الله الف خير

مريم. بل خدمه عمو تدلل

كمت و نطيتهم ماي واكل كعد ياكلون

رجعت اعالج الاخر

مريم. الله يقويك جاسم شلون متحمل هل ضرب

جاسم. يمعوده هذا زلاطه عندي ولا شي شفت اكثر منه

مريم. افف لو اني منك و ضاربيني هيج ضرب جان هسه تلكاني بل مكبره

جاسم. ولج انتِ براشدي يغمه عليج

مريم. انن مو لهل درجه هسه كوم يله كافي لحيت هواي

جاسم. خليني هنا والله الكاعده وياج ما تنمل

مريم. ادري غير اني ما احجي

جاسم. بطلي نرجسيه رجائاً

كلبت عيوني و رحت على الي يمه كعدت اغير بضماد الجرح

مريم. شلون صرت اليوم

- زين بس البارحه ما نمت بل ليل احس اكو شي بداخلي موتني الم

مريم. اففف شبيدي عليك... هاك اشرب هذا يفيدك يخفف الألم

بقيت اعالج بيهم و قسم اوكلهم و قسم ابجي عليهم و على حالتهم ما يكدرون يرفعون اصبع 

رحت على فهد اكثر واحد متئذي بس ما يبين ابد

مريم. فهد تمدد موزين على الجرح الي بطنيك.. لحظه خلي اجيب الفراش يمك

جبت الفراش و كعدت اعالج بل جرح مالته ضمدته و كمت اجيب اله اكل

حسيت الباب نفتح دخل محمد تقدم و سحبني من ايدي

مريم. اييي ايدي هاي شبيك

محمد. امشي احجي وياج

مريم. مااا عوفني

محمد. مريم مو وكته يله بساع

مريم. هسه بس اخلص الي بأيدي واجي

محمد. انتظرج بل غرفه

هزيت راسي هذا الي جنت خايفه منه صار شي اكيد هسه الكل عرف انو محمد اخوي

رحت جبت اكل لفهد و كعد يمه همس بصوت ناصي

فهد. هذا شيصر الج

مريم. ما يصير الي شي

فهد. لا تجذبين احجي الصدك

مريم. خلص كلت الك ما اعرف

فهد. جا شلون يكولج انتظرج بل غرفه

تهربت منه و ما رديت عليه دنكت و ضليت اباوع على الكاع رفعت راسي لكيته يباوع عليه

مريم. ليش مدا تاكل

فهد. هذا زوجج مو

مريم. لا

فهد. احجي الصراحه

دنكت و حجيت

مريم. اخوي

فهد. ليش ما كلتي انو أخوج داعشي من البدايه

نزلت دموعي و حجيت بشهكه

مريم. خفت خفت لا تحسبوني ويه داعش و ما تصدكون بيه اني هم نضلمت و شفت أشياء و مواقف المفروض الي بعمري ما يشوفها فا من ما كلت محمد اخوي ما ردت تكرهوني انتو الأشخاص الوحيدين الي تأمنون الي و نحبوني محد غيركم يعطف عليه

كمت ابجي حسيت احد حضني رفع راسي شفت عمو صالح بادلته الحضن

صالح. اششش كافي بنيتي اهدي احنه مصدكين بيج مستحيل نكرهج بيوم

مريم. صدك عمو

صالح. أي صدك يله كافي بجي

زولت من حضنه و همست

مريم. شكرا لانكم ما عفتوني و اوعدكم اني ما اعوفكم

حسيت احد يطبطب على كتفي باوعت فهد دنكت بخجل اول مره يلمسني جان حجي كوه يحجي ويايه

بتسملي و كال

فهد. يله ام دميعه مسحي دموعج صيري مو على كلشي تبجين

مسحت دموعي و بادلته الابتسامه

دخلو الحراس و اخذوهم و طلعو

عزلت المكان على السريع على مود باي لحظه يجيبون شخص فاقد و وجهو ما يبين من الضرب

خلصت و راحت على الغرفه تا اشوف هذا الملطلط شيريد مني

دخلت الغرفه لكيت متمدد كتفت ايديني و حجيت بنبره ضوجه

مريم. هاا نعم شراد مني

محمد. تعالي مريم احجي وياج كم كلمه

تقربت عليه مسكني من اذني و لواها و حجه بغضب

محمد. بعد خلي اشوفج تحجين ويه المرتدين ول خلقج اذبحج و ما يرفلي جفن انتِ هنااا بس تا تعالجيهم فهمتي لو لا

هزيت اراسي بخوف و كلت

مريم. خلص عوف اذني ايي والله معد احجي وياهم

عافها و كال تا انشوف.. تا اطلع و صاح

محمد. تعالي وين رايحه

مريم. غير اروح اكمل شغلي

محمد. كبل لا تروحين حبيت اكولج راح يحولون عليج هم قسم السبيات هم تعالجيهم

مريم. ليش مو اكو دكتوره

محمد. راحت بحح

مريم. يعني قتلتوها مووو

محمد. مو شغلج... هسه سمعتي لو لا

مريم. أي سمعت

محمد. خوش يله روحي

مر اسبوع ثاني و اني اعالج صار الشغل اكثر عليه و كلبي يتكطع واني اشوف السبيات بأيدي يموتن و ما أكدر اسوي شي بس ابجي فوكهن

حرفين تدمرت نفسيتي و اني اشوف يوميه من ٣ إلى ٥ بنات يموتن بسبب التعذيب و الاغتصاب
و كل هذا الجاي اشوفه يتولد بداخلي كره و حقد اتجاه داعش

خلصت تنضيف الغرفه بعد ما راحو قسم للسجن و القسم الاخر للتعذيب مره ثانيه

طلعت واني منهكه حيل و بس اريد انام

دخلت للغرفه كا العاده لكيت محمد

ذبيت حجابي و عبايتي و رحت اخذت ملابس فتت سبحت هستو تا اطلع من الحمام جذبني حديث محمد

خليت اذني على الباب و كعدت اتسمع

محمد. قسم اليوم و قسم باجر مو كلهم

سكت يستمع الجواب

محمد. لا مو عدام ناخذهم على الخفسه هناك لا نصرف طلق ولا شي

رجع سكت شوي و حجه

محمد. القسم الأول بل خفسه و القسم الثاني هنا

.....

محمد. ماشي تفقنه

سد الخط و اني بقيت جامده بمكاني و حجيه يتردد براسي شنو إعدام شنو خفسه مجاي افهم شي

طلعت و كعدت امشط بشعري خلصت و كمت وكفت فوكه

مريم. زول اريد انام

محمد. ما

مريم. لا بربك وين اكو زلمه يكول ما

محمد. انجبي

مريم.هههههه

محمد. وجفن لهل حلك الاعوج

مريم. تروح فدوه لحلكي انتَ و جماعتك كلهم

نطاني ضهرو و نام سحبت الغطاء و دحست نفسي بظهره

بقيت اتكلب ما اجاني نوم صاح

محمد. وتالي تبقين هيج جنج دوده

مريم. اففف خلص حكوم

محمد. الله وياج ضلعي

مريم. ايعع

رحت اخذت المفتاح مال السجن مخليته بدفتري طلعت من الغرفه شفت حرس يم الباب بقيت اروح او ارجع اريد ادخل بس شلون هذا رحت وكفت يمه

مريم. شسمه دزوني عليك يكولن خلي يجي ياكل

- منو دزج

مريم. معرف روح اكل

باوعي بنظره توترت بس ما بينت

مريم. شبيك خير

- اذا طلعتي تجذبين شسوي بيج

مريم. ديله انجب لا تأخذ ميانه مو صوجك صوجي اجيت اكولك تعال اكل ان شاء الله أجلت سم و قز قرت

عيبت عليه و رحت وكفت بل ممر اراقبه

كبل راح رحت ركض على الباب و فتحته دخلت لكيتهم نايمين

مريم. فهدد عمو صالح اكعدوو

فهد. ها مريم شبيج

مريم. فهد سمعت محمد يكول خفسه و عدام و قسم اول و قسم ثاني يعني شنو

فهد. خفسه... لحظه احجيلي بل تفاصيل

كعد عمو صالح 

حجيتلهم السالفه كلها

صالح. يعني افهم من حجيج راح يذبونه بل خفسه او يعدمونه

مريم. لا اسم الله كول غيرها... زين عمو شنو خفسه

صالح. هاي حفر كلش عميقه توصل لاعماق الأرض كل ما يدموها ترجع تخفس و تكبر اكثر فا سموها خفسه

مريم. يعني انتو راح يذبوكم بيها

صالح. احنه بل حالتين ميتين بل خفسه او كتل

مريم. اسم الله عمو راح تطلعون من هنا و اني متأكده

فهد. منو كلج

مريم. باوع اني هسه عندي مفتاح السجن راح ابوك مفتاح الكلبشات و راح اطلعكم من هنا

فهد. صعبه هذول كو** ما ينكدرلهم

مريم. معليك اذا صرنه ايد بأيد محد راح يكدر النه
هسه اني راح اروح ادور على مفتاح القيود

لوحت بأيد و طلعت قفلت السجن و رحت على الغرفه لكيت محمد بسابع نومه ستغليت الوضع و كمت ادور بل ملابس مالته على كيفي

لكيت بل جيوب مالته اربع مفاتيح

اخذتهم و حطيتهن  بنص الملابس

رجعت نمت ولا كان شي صاير

كعدت الصبح ما لكيت محمد غسلت لبست العبايه و طلعت ماكو احد بل ممرات عكس يوميه متروسه ترس

دخلت لغرفه البنات لاكيتهم كاعدات و وحده صافنه على الاخره

مريم. صباح الخير.. شبيجن يا ستار

-صباح النور.. اكعدي هسه احجيلج

كعدت يله احجي

- اليوم راح ياخذون قسم من السجناء و راح يذبحوهم و يذبوهم بل خفسه

مريم. عززه سوده عليه.. منو كلج

- اني سمعت واحد منهم يحجي بل موبايل و يكول هيج

طلعت بسرعه شفت وحده تشتغل ويه داعش

مريم. لحظه اوكفي.. شفتي محمد

-منو محمد

مريم. اقصد السفاح يمعوده شفتي

- هااا اي بذيج الغرفه

رحت ركض و دخلت الغرفه بدون مقدمات

شفت محمد واكف و يمه دواعش مبين عليهم قاده

دخلت و سديت الباب تقدمت خطوه هتو تا احجي نفتح الباب و دخلو داعش و مكتفين أشخاص و خالين على روسهم أكياس سود

صفطوهم يم الحايط رحت على محمد و مسكت ايده حجيت بخوف

مريم. محمد هذول راح تكتلهم

محمد. أي

مريم. لا فدوه ابوس ايدك عوفهم والله شتريد انطيك بس عوفهم فدوه اروحلك

محمد. مريمممم روحي من وجهيي لا اموتججج شجابجج هناااا

مريم. الله بخليككك فدووه لااا تقتلهممم فدووه

ما رد عليه و صاح

محمد. اخذوهم و صعدوهم بل سياره هسه اجي

نزلت على رجله و كمت ابجي و اتوسل بي

مريم. فدووه لا حمودي لا الله عليك لا تكتلهم والله خطيه شنو ذنبهممم لاااا

ما رد عليه ولا جنه يسمعني بدو يسحبون بيهمم

ركضت عليهم و مسكت ايد جاسم عرفته من تيشيرت مالته

مريم. جا.. جاسم الله عليك لا تروح مو كلت حبيبتي تنتظرني تا نتزوج لا تروح فدووه جاسم رد

ما رد عليه بس اشوف اكتافه تهتز طلعو و اني بقيت مجلبه بيهم حسيت جاسم خله بأيدي شي باوعت ورقه كبل خليتها بجيبي على مود ما يشوفها محمد

صحت بيهم اوكفو خلي احجي وياهم الله يخليك محمد بس احجي وياهم فدوه

محمد. اوكفو خلي تحجي

تقدمت عليهم و كمت أودع بيهم واحد واحد كلهم عندي وياهم مواقف حلوه كل واحد راح و خله ذكرى بكلبي

ودعتهم و بتعدت بهدوء بس داخلي إعصار اريد ابجي اصيح بس منو يسمع

اخذوه و راحو بقيت وحدي بل غرفه وكعت بل كاع و نهاريت حرفيا كلش صعبه عليه احسهم صارو جزء من حياتي 

واني غاطه بنوبه بجي كبل اجه على بالي فهد و عمو صالح كبل كمت اركض ما اريد اخسرهم

لكيت الحرس بل الباب رجعت رحت على غرفه البنات وكفت بل باب و صحت 

مريم. ماريا تعالي شوي

ماريا. ها مريم

مريم. ماريا اريد تسويلي خدمه صغيره

ماريا. اطلبي عيوني الج

مريم. تسلم عيونج.. امشي ويايه

مسكت ايدها و كمت امشي وكفت بل ممر

مريم. تشوفين هذا الحارس

ماريا. أي شبي

مريم. اريد تزولينه عن الباب

ماريا. شلون

مريم. بطريقتج الخاصه

ماريا. اوكي هاي سهله بس ليش

مريم. ما أكدر اكولج ليش لأن الوقت جدا قصير بس الي أريده منج تسوينه و بعدين افهمح كُل اشي

ماريا. ماشي تدللين

راحت على الحرس واني بقيت اراقب بيها

ماريا. هيلاووو

- خير

ماريا. الصراحه انتَ عجبتني كلش فا ***

بتعدت ستحين من الي جاي تحجي صرت بس اشوفها تحجي وياه و هوا يضحك اخير شي جرته و سوتلي اشاره اوكي من وراه ضهره

دزيت الها بوسه بل هوا

ركضت على الباب و فتحته

فهد. هااا شبيج وليش باجيه

مريم. فهد مو وكته.. اجيت تا اطلعكم من هنا خلي نستقل الوكت راحو اغلبهم بقو كم حرس خلوهم بل مدخل و المخرج محد بي يله كومو بساع

طلعت المفاتيح من جيبي و نطيت كل واحد نسخه بدو يجربون المفاتيح

صاح عمو صالح. صار هذا المفتاح

تقدمت على السريع و بديت افتح برجليهم

كامو و طلعت كدامهم كمت امشي باتجاه المخرج و هما ورا وصلنا للنهايه وكفت باوعت عليهم حجه فهد

فهد. ما راح انسه وكفتج اخت ارجال انتِ

صالح. بنتي هاي وكفتج ويانه راح تبقه دين بركبتي اردلج اياه بعدين

مريم. عمو اني ما اريد شي غير سلامتكم الله يحفظكم و ترجعون لاهلكم سالمين

تقدم عمو و حضني بادلته الحضن

باسني من راسي تقدم فهد عليه و باسني من راسي

فهد. راح نشتاقلج و صدكي بيدي راح اجي و اطلع من هل مكان

مريم. إن شاء الله يله روحو كبل لا يجون.. هاي جنطه شيلوها بيها ماي واكل تفيدكم

اخذو الجنطه و راحو ركض نزلت دموعي واني اباوع عليهم يركضون.. ما تحركت اله ما اختفو من كدامي

اجت بالي ماريا كبل رحت اركض نسيتها

دخلت بل ما لكيتها دخلت بل غرفه الثانيه

لكيتها تسولف وياه من اشافني كبل كام صحت

مريم. هااا ولككك عايف شغلكك و كاعدد هناااا اوكفللي من يجيي محمدد اذا ما اكوله عليك اني مو اسمي مريم كاعد يضحك ابو سنون مزنجره اوكفللي

-لا الله عليج هسه اروح والله بس لا تكولين

مريم. يله ولي من وجهي خلص ما اكول

وأنتِ يله لحكيني

سحبتها من ايدها و رحنه على الغرفه

ماريا. هااا احجيلي ترا اني مثل الأطرش بل زفه كلشي ما فهمت منج بس كعدتيني يم هذا ابو ريحه خايسه احس خياشيمي ماعت من الزفر مالته

مريم. يااا ولج يا خياشيم خوما انتِ سمجه هههه

ماريا. هسه شمدريني سمجه مو سمجه بس احجي يله

مريم. اففف ما احجي تعبانه اريد انام

ماريا. أي اتهرب كولي ما اريد احجي و فضيها

مريم. أي ما اريد احجي ويله ولي

كلبت عيونها و راحت اني ما ردت احجيلها لان هاي براشدي تكت الأول و التالي و ما بيه حيل كتل اني

كمت تمسحت و كعدت اصلي و ادعي يوصلون بل سلامه

حسيت صوت عالي بره عرفتهم عرفو توترت حسيت جسمي بي رجفه خفيفه

كمت و طلعت لكيت الحرس مخبوص و يصيحون

دخلت على البنات ما لكيتهن موجودات

رجعت على الغرفه حسيت صوت سيارات و صياح

ركضت على ستاره و باوعت منها نزل من السيارات محمد و هواي دواعش علامات الغضب باينه على وجههم

سمعتهم يصيحون كبل طلعت تحمست اريد اشوف المسرحيه

لاكيتهم واكفين و ناس تصيح و.....
"" "" "" "" "" "" "" "" "" "" "" "" ""
هلو عمري انتو، البارت كُلش طويل ٣٠٠٢ كلمه إذا عجبكم دوسو على النجمه

يولو ادعولي باجر عندي امتحانين و كلشي ما دارسه
ادعولي بلكت أنجح احس نفسي راح ابجي ههه

بايي♥️🖐️