رواية ذات العيون الناعسة الفصل الاول 1 - بقلم روان آل عبدالله

أخذنه المن صور باجر ورانه فراك غشمه الصور تكتل من تظل ذكرى

الكاتبه :روان عبدالله
______________________
مريم. محمد اكعد يله اتأخرت على الشغل مالتك يله حبيبي كوووم

محمد. ممممم هسه

مريم. يله عفيه اكعد اريد اروح على المدرسه تأخرت هسه احصل رزاله معدله من المديره

محمد. اخخخخ ضهري

مريم .سوده عليه يروحي عسى التعب بيه ولا بيك

كمت افرك بضهره حسيته ارتاح

باوعت على الساعه اففف هسه بده الدرس الاول يله خلص اغيب اليوم خميس ما عدنا شي

كام محمد و هوا لازم ضهره و كوه يمشي من الوجع حالته ما تسمح يشتغل بس شيسوي مجبور اذا ما يشتغل لازم انكضي اليوم كله بدون اكل بس نشرب مي

اني و محمد نكدر نتحمل الجوع بس امي مره جبيره و صاحبه امراض ما تكدر حتى تشتغل كلش منتهيه كل ما اشوفها هيج حالتها دا تزداد سوء يوم بعد يوم و احنى ما بيدنه شي انسوي

انجمع فلوس اني و محمد و كل شهرين او ثلاثه اشهر انطلعهن و نودي امي على الدكتور و كل مراجعه يكول بيها مرض شكل ما ثابت على شي و احنى حايرين و منعرف شنو انسوي

كمت بدلت ملابس المدرسه و لبست تراك قديم كلش صارله اكثر من الربعه سنوات يمي و كل ما ينشك امي تركعه بقطعه قماش

كمت شفت امي تحمي بل خبز على صوبه علاء الدين و الجاي على النار

مريم. ماما اكعدي هسه اني اكمل بدالج

امي. شنو ما تروحين على المدرسه

مريم. لا ماماتي راح عليه الوقت

امي. مايصير بنيتي هذا مستقبلج لازم تكونين حريصه عليه خلي بالج شغله شوفي اني تركت المدرسه و تزوجت اشو ما ستفاديت شي بل عكس شوفي حالتي لو موضفه جان مو هاي حالتي

مريم. خلص ماما لا تسويها قصه عليه والله راح الوقت و بعد اليوم ما عدنا شي

هزت راسها ما عاجبها شي هاي امي 24 ساعه تحجيلي على الدرس و لازم اخلص دراسه وسلاح البنت شهادتها تحارب بيها المجتمع

اجه محمد صبيت جاي و فرشت بل ارض و كعدنه ناكل جاي و خبز

هذا الريوك مالتنه اذا انسوي ويه الجاي و الخبز جبن او بيض اضل يوم كامل فرحانه و اطك اصبع

محمد خلص الجاي و الخبزه و حسيت بعده جوعان كبل انطيته الكلاص و الخبزه مالتي

مريم. هاك حمودي اني شبعت

محمد . خليهن الج اني هم شبعت

مريم. لا حبيبي ميخالف اكل انته دا تبذل جهد و يحتاج الك طاقه اني هنا بل بيت ما اسوي شي

كمت و هوا سحبهن و كعد ياكل

اعرف راح اضل جوعانه كل اليوم بس ميخالف فدوه اله

كمت ارتب بل فراشات و اصفن اكول لو الله خالقني بمكان صديقتي ايه ابوها ضابط جبير بل موصل و معروف بل عراق و بيتهم قصر تجي على المدرسه ملابسها تلمع من بعيد و مبايل اخر موديل و لابسه ذهب من فوك الى جوه

كل المدرسه صديقاتها لان عدها فلوس حتى المدرسات يتلوكن الها

اففف ستغفر الله ما لازم احسد الناس على عيشتها يجوز اني عندي شي هيه ما تملكه

صح هيه عدها فلوس و حلوه بس يجوز ما عدها عائله مثل عائلتي يحبوها و يخافون عليها

هزيت راسي ابعد الافكال السخيفه منه و كملت تنضيف لان بيتنه كلش صغير عباره عن غرفه وحده و حمام و مطبخ بس

كعدت بل مطبخ و فتحت الباب و كعدت على الشمس طشرت كتبي و كعدت ادرس

خلصت دراسه رفعت راسي الساعه 11:44

كمت لميت الكتب و دخلت للغرفه شفت امي نايمه و وجها اصفر من ما نشتري الها علاج تضل نايمه على مود تنسه الالم اففف هذا الشهر ما عدنه فلوس ما كدرنه انجمع لان محمد شغله ضعيف

سحبت فراشي و نمت يمها افيش شكد طيبه ريحتها بقيت اباوع على وجهها و اتامل تفاصيله حست النوم تسلل على عيني غفيت كعدت على صوتها تكعدني على صلات العصر

اففف اني شكد نايمه كمت تمسحت وبطني موتتني توجعني كلش يمكن لان ما اكلت

صليت و احس كل شوي افقد توازني ما اكدر اسيطر على جسمي سلمت و بقيت كاعده على السجاده و ادعي ربي باوعت على ايديه يرجفن

كمت و رحت على امي لكيتها كاعده بل مطبخ و تقره قرآن

مريم. ماما اليوم عدنا عشه لو لا

امي. والله ما اعرف يا بنيتي اذا اخوج اليوم شغله زين يجيب مسواك واذا ما اكو شغل انام بدون عشه تنهدت و ضميت ايديه على مود ما تشوف الرجفه

كمت اشرب مي بكثره بلكي يعوض بقيت صافنه و مابيه حيل ادرس شفت امي ماسكه القرآن و كاعده تقره اني هم كمت طلعت القرءان الصغير من الجنطه مالتي و كمت اقره

سمعت صوت اذان المغرب كمت صدقت و صليت كعدت انتظر بمحمد يجي

شوي و اندك الباب كمت فتحته كوه انفتح مليان زنجار اخذ حيلي يالله نفتح دخل محمد كله تراب حتى رموشه سلم و دخل بيده مسواك شكله كلش منتهي ما شاف شي من حياته كضاها يشتغل و بل سوك من عمره 7 سنوات و لحد هسه صار عمره 19 سنه الي بكده هسه بل كليه و هوا ما يعرف لا يقره ولا يكتب مع ذالك ما يخلي امي تشتغل لا ما تكدر و لا يقبل ابطل من المدرسه و اشتغل على مود اساعده بل مصرف

يكول اني رجال البيت واني اتحمل المسئوليه عليج بدراستج و بس

كمت ركض حضرت الحمام اله فات سبح و طلع كبل تمدد و كعد يون من ضهره اني كبل اجيت و كمت اسوي اله مساج و هوا يون خلصت و شديت ضهره بشالي حسيت شوي ارتاح

شما اسوي بحياتي مستحيل اوفي محمد كل الي دا يسوي على مودي و هسه اني املهم الوحيد يتاملون انجح و اتخرج على مود انعيش مثل الناس

كمت و رحت على ماما لكيت جاي تسوي طماطه بدهن كمت اخذت عنها و خلتها تكعد كمت اسوي خلصت العشه و اني شوي واحس حيلي راح ينهد من الجوع

كمت ناديت محمد و كعدنا ناكل حست محمد ياكل بشراها من كد ما جوعان كمت اكل شوي شوي و امي هم سوت مثلي على مود يشبع

خلصنه و كمت غسلت المواعين كعدت بفراشي و كمت اراجع الي درستهن الصبح احس ماما غفت و باوعت على محمد مركز وياي بكل كلمه اكولها نقهرت عليه خطه كضه حياته يضحي ضحه بدراسته و بحياته على مودنا من مات ابوي هوا تكفل بكل المسئوليه

مريم بهمس. محمد اريد احجي وياك شي

محمد. احجي جاي اسمع

مريم. لا هسه ماما تفز شوفها نايمه يله تعال على المطبخ

كمت و هوا كام ورايه

محمد . احجي مريم خوفتيني

مريم. محمد امي وضعها كلش ما يطمن كلش خايفه عليها احسها تتوجع من داخل بس ما تظهر النه

فرك وجهو و ذب حسره جبيره

محمد. شسوي مريم انطيني حل ما جاي الكي شغل تعبت والله تعبت

مريم. سلامتك يروحي انته عندي حل

محمد. شنو احجي

مريم. اشتغل اني

محمد. جم مره اكول الج هذا الطاري لا تجيبينه على لسانج مو كلت ماكو شغل كلت لو لا

مريم. خلص لا تعصب سديت الموضوع والله

محمد. يله حبيبتي روحي نامي و لا تفكرين اني راح الكه حل

باوعت عليه بحزن و رحت تمددت بفراشي و كمت ابجي نمت واني الدمعه على خدي كا العاده

كعدت على صوت محمد و هوا يصيح

محمد. يمممممه ولج يمممه اكعدي جبتلج علاج ولججج امي اكعدي

كمت مفراش و جيت تقربت بهدوء سحبت محمد

مريم. محمد عو ..عوفها ال..الله يخليك نايمه لا تكعدها

محمد. ولج مو نايمه مو نايمه ماتتت ولج امنه ماتت يمه كعدي يمه ولج منو يصبرني يوميه الصبح ويكول الي تهون وليدي ولج شلون اشم عطرج بعد يا بعد بيتي ولج يوووم اكعدي فدوه اروحلج يمه بجاه شكو من عنده جاه كعدي

حسيت محمد نهار و اني بقيت صافنه على امي ما اكدر ادير عيوني عنها اتامل تسوي حركه على مود اكول لمحمد ماما مو ميته

حست محمد يهز بيه واني صافنه اخر شي ضربني راشدي ياله صحيت و كمت ابجي و انصيح اني و محمد ما احجيلكم الالم الي عشته

من تفقد شخص عزيز عليك و تستوعب ها هيه خلص بعد ماكو هذا الشخص بحياتك بعد ماكو صوته و لا عطره خلص كلشي راح وياه كمت ابجي و اهز بماما عسى و لعل تفتح عيونها

حسيت الجيران يدكون الباب لان يسمعون صوت الصياح اخر شي دخلو ما اعرف شلون بس اني هنا احس هاي اللحظات حلم كوه اشوف من الدموع

اجتي مرت جيرانه سحبتني و اني حضنتها و كمت ابجي حسيت اخوي انهار كام يصيح بعلوو صوته

كمت و ركضت عليه و ذبيت نفسي بحضنه حسيت حضني بعدين معد احس بشي غمضت و دخلت بدوامه سوده كلش

حسيت على قطرات مي بوجهي
رفعت راسي شفت نفسي بحضن محمد همست

مريم. محمد هذا حلم مو امي ما ماتت مو الله عليك كول هذا حلم

هوا كام يبجي كمت من حضنه شفت مكان ماما فارغ كمت اصيح

مريم. ماااماااا لا لاتاخذون مني امي الله عليكم لا فدووه

اجت مرت جيرانه و كالت امي بل حمام دا يغسلوها

متت بجي كطعت نفسي تكطع
اجه محمد و حضني و كمنه نبجي سويه شوي و طلعو امي و بدت مراسيم الدفن رحنى على المقبره و دفنه امي الي البارحه جانت تسولف ويايه طول الوقت اني ابجي و اصيح و اعاتب بيها لان عافتني و محمد يذب عليها تراب

كمت من مكاني و مسكت محمد من ايده و كمت اصيح

مريم.لااا عوف امي هسه تخنكها شلون تحط عليها تراب عوفها فدووه الله يخليك

هوا كام يبجي و اني سحبوني بقه محمد يذب ترام واني اصيح عليه

خلصو و كامو يقرون و يصلون خلصو و بدت الناس تنسحب راحو بس بقينه اني و محمد

ذبيت نفسي على القبر و كمت اعاتب بيها بهمس محمد كاعد يباوع عليه و عيونه حمر

مريم. ليش عفتيني والله احبج منو الي بعدج منو يضمني بحضنه و يكول كل هاي الايام الصعبه تصير سوالف ماما اصحي راح بابا و يتمني اني وصغيره انتي هم تركتيني اني وصغيره هسه صرت يتيمه الام و الاب

بقيت ساعه اني نايمه على القبر اجه محمد وسحبني و كمت اني ما بيه حيل سندني عليه و كمنه نمشي اني اشهك و ابجي و محمد ساكت بس يتنهد

وصلنا للبيت هدوء و اضلم وحشه بدونها سحبني محمد و غسل وجهي و نزعني الصايه و الحجاب

باوعت على محمد و كلت

مريم. محمد البيت ما يسوه من دونها والله

محمد كام يبجي

دخلت على الغرفه شفت فراش امي كبل ركضت و تلفلفت بي و كمت ابجي و اشم ريحتها غفيت

كعدت على محمد يكعد بيه

مريم . هااا محمد

محمد. مريم كومي اكلي شي ما اريد اخسرج هم انتي

مريم. ما اريد احس نفسي لعبانه كلش

محمد.مريم كومي لا تشلعين كلبي

مريم. كمت هاي شبيك تصيح

كمت غسلت و هوا كعد ياكل اجيت كعدت يمه صفنت و كلت

مريم. محمد

محمد. هااا

مريم. من وين اشتريت علاج امي مو ما عندك فلوس

ذب حسره محمد.تدينت من صديقي لان شفت امي ما تكدر تتحمل شهرين و تالي ما كدرت تتحمل يوم و ماتت

سكتت و دنكت اكل احس جوعانه بس مالي نفس

خلصنا و شلت المواعين و غسلتهم مر يوم عادي ما سوينه فاتحه بس كم واحد من الجيران اجه سلم و راح و اجه الاحد محمد كعدني تا اروح على المدرسه

مريم. ما اريد اريد ابطل

محمد. وحق هذا الله اذا سمعت عدتي هاي الكلمه اشوفج شي ما شايفته بحياتج يله كومي بدلي

كمت بدلت مالي نفس اكل لفيت شالي و شلت الجنطه و طلعت امشي وصلت المدرسه و كعدت برحلتي و صافنه على البنات شلون يضحكن و يتونسن

اني احس حياتي انطفت من ماتت امي

خلصت الدروس و رجعت للبيت فارغ و بارد كلش مابي روح اتذكر من اجي من المدرسه امي تتلكاني و ريحه البخور بل بيت و صوت القرءان هسه البيت و حشه بدونها

بدلت ملابسي و كمت ادرس بل تسعه بل ليل اجه محمد بس شكله مو نفس العاده يجي تراب لا شكله عادي و ملابسه نظيفه

كعد بل غرفه و طلع فلوس كومه و كعد يحسب بيهن واني صافنه عليه كلت

مريم. محمد

محمد. هااا مريومه

مريم. محمد من وين هاي الفلوس

محمد. شتغلت شغل جديد و نطوني هاي مقدمه

مريم. شنو هم لو موظف ماينطونك هيج فلوس

محمد. شبيج شغل جديد معليج لا تدخلين يله بدلي خل اروح اشتري ملابس الج و الي

مريم. ما اريد احس كلبي ما مطمن الفلوس احسهن مال حرام

محمد. اكول ليش ما تنجبين و تمشين كدامي شنو مال حرام يله كومي كافي عاد

كمت ولبست الصايه و الحجاب و طلعنه و صلنا للشارع العام و محمد اشر لسياره تكسي و وصلنا للسوك باوع عليه وكال

محمد. مريم اخذي شكو شي تردينه

مريم. ماريد

محمد. لا تخليني هسه اموتج هنا كافي عاد

اني هنا ابد ما مرتاحه لهاذني الفلوس احس اكو شي وراهن

كمنه نفتر بل سوك و اني صافنه صالي شكد ما رايحه على السوك من اني و عمري 7 سنوات

اشتريت تراكات و هواي اشياء و هوا هم شترى واني كل الطلعه يسحل بيه محمد

رجعنا وبدلت و كعدت اسوي عشى اكلنا و طول الكعده محمد يباوع عليه و يرجع يدنك احس اكو شي يريد يكوله بس ما يكدر

خلصنا و كمت محمد صاحني

مريم. محمد بس اخلص المواعين واجي هسه

محمد. تعالي مريم عندي موضوع مهم وياج اريد اكولج شي تلحكين على المواعين

غسلت ايدي و كعدت يمه

مريم. هااا حمودي احجي

محمد.....
********************
هلوو عمري طبعا هذا البارت الاول اذا عجبكم و شفت تفاعل زين ابدي انزل القصه

دوسو على النجمه على مود استمر وانطوني رئيكم بل قصه

يتبع.....