رواية ذات العيون الناعسة الفصل السابع عشر 17 - بقلم روان آل عبدالله

بعد گلبي اشتعل بلكت يشوفوك
ينشاف الهوى من يصير دخان 💔

الكاتبه :روان عبدالله

كبل لا تبدون خلوو نجمه و علقو بين الفقرات لطفاً
------------------------------------------------------

وصلنه للشقه واني ميته تعب كد ما مشيت شاهين دك موبايله كبل راح على البلكونه و كعد يخابر

كبل اجه بالي حبيبته كلت هسه جاي يخابرها

ما اعرف ليش ضجت احس انقسمت نصين نص اضوج و انقهر و اكول ليش يخابر و النص الاخر يكول اني شعليه هذي حياته واني ما الي دخل باجر اروح و ينتهي كل اشي

رحت بدلت و خليت الكبوس على راسي و تمددت على الكنبه بقيت صافنه على السقف

خلص هاي هيه اليوم اخر يوم هنا بعد ما كو شاهين ولا عطره الي اكرهه اليترس الشقه من يجي و لا...

معقوله جاي افكر هيج لعد منو الي ستقلني و حاول يتحرش بيه منو الي اول ما شافني ضربني ليش جاي اوهم نفسي و أعجب بشخص ما يحبني و راح يتزوج الي يحبها لا و ناذر اذا يتزوجها يسوي اكبر عرس اني شكو اصلا ولا معبرني و من تحارش بيه مو حب مجرد رغبه

تهت و ضعت من كميه التناقض الي بداخلي تعبت من التفكير المفرط احس خلص لازم انهي هاي السالفه و اخلي لمشاعري المبعثره حد

غفيت بعد دوامه تفكير مفرط حسيت احد يحرك كتفي فزيت

باوعت شاهين حجيت بنعاس و فهاوه

مريم. هاا شاهين

صفن عليه و كال

شاهين. كومي نامي على التخت اذا بقيتي نايمه هينه راح تتعبين

مريم. شاهين اني دوم انام هنا مو اول مره

شاهين. ميخالف يله كومي ما يصير هسه ضهرج يكوم يوجعج

مريم. ما اريد مرتاحه احبها هاي الكنبه

شاهين. براحتج سمسمه تصبحين على خير

حجيت واني مغمضه عيوني

مريم. وانت بخير

غفيت كعدت الصبح على ريحه اكل تارسه الشقه

كمت بملل لميت شعري و لبست الكبوس دخلت غسلت وجهي و طلعت على المطبخ لكيت شاهين

بل شورت و الكيمونه و كاعد يسوي بيض ضحكت على شكله مركز كل قوته

مريم. ههه صباح الخير

شاهين. صباح النور شيهانه لا تضحكين امانه... تعالي اكعدي سويت اكل

مريم. انطيني اني اكمل وانت اكعد

شاهين. لا خليني اريد اشوفج ابداعاتي.. يله كعدي

كعدت على الطاولة لكيته خال جبن و باسطرمه و زلاطه

اباوع على الزلاطه أشكال هندسه مسويها ضحكت على شكلها

مريم. شاهين هذا شمسوي بل زلاطه

شاهين. شسوي هذا الي طلع معاي

مريم. اممم والله زين منك

جان البيض و كعد يمي كعدنه ناكل جان البيض بي ريحه زفر مو طبيعيه بس ما ردت افشله مبين اول مره يطبخ

باوع عليه بلهفه و كال

شاهين. هاا طيب شتكولين

مريم. امم كلش طيب عاشت ايدك

شاهين. بل عافيه

خلصنه ريوك و شلت المواعين و غسلتهن على السريع

خلصت و رحت لبست ملابس و لفيت شالي و كعدت انتظر شاهين

طلع شاهين لابس ملابس الدوام بس نازع القمصله باقي بل تيشيرت الأسود و البنطلون اخذ المسدس و الاسلكي اشرلي معنى يله

نزلنه و صعدنه بل سياره كل الطريق اباوع عليه خطف جان مبين متنرفز و حواجبه معكوده و ضايج

كل شوي يذب حسره و يرجع يستغفر و يمسح على وجهه

وكف السياره و باوع عليه شغل جكاره و خلاها بايده حجه بهمس

شاهين. ما جنت ادري راح توصل هل مواصيل بينه اني اعرف لحد هسه شايله بكلبج عليه... سمسمه هسه اني وأنتِ كل واحد راح يروح بطريق بعد لا اشوف ولا انتِ هم خلي انحط حد للزعل الي بينه واني اتمنى تعذريني و تسامحيني و كلت الج قبل ما جان قصدي سمسمه بحياتي ما نزلت نفسي لشخص بحياتي ما طلبت السماح و هاي اني جدامج جبروتي و شخصيتي و قوتي كلها تختفي يمج

سكت و اخذ رشفه من الجكاره و باوع عليه بمعنى احجي حجيت بتوتر و خوف

مريم. شاهين اني مسامحتك و راح انسى الي صار بينه ما دام انت تعترف بخطئك معناها خلص معد تعيدها لا ويايه ولا ويه غيري.. راح افقدك هواي بحياتي راح انسه الشغلات السلبيه و ابقه اتذكر الشغلات الايجابيه الي سويتهن الي و من ساعدتي و دخلتني لبيتك لو ما انت جان هسه اني الله يعلم وين ... شكرا لكل اشي قدمته الي ما راح انسه فضلك عليه ابد

اندار لوره و طلع علاكه مال هدايه و خلاها بحضني

مريم. شنو هاي

شاهين. هديه مني اعتبريها ذكرى مني الج على مود كل ما تشوفينها تتذكريني

مريم. صدكني ما راح انساك بيوم

شاهين. واني هم راح ابقه اسئل عليج و اتواصل ويه خالج... و هسه لازم نروح على المركز الي اشتغل بي اني

مريم. ليش؟.

شاهين. لا تخافين بس اني كلت لخالج انو هيه اجت ويه النازحين و انطتنه اسمكم و لازم تجون تاخذونها من المركز

مريم. ليش هيج كلت اله

شاهين. شيهانه اني اخذت تقرير مفصل عن خوالج.. خوالج عايشين بمحيط عشائري فا اذا اكوله جانت يمي بل شقه تعرفين تفكيره شلون راح يصير و بل تالي محد يتاذه بس انتِ

مريم. اله تكوله بل شقه كوله جان بيتي يم امي

شاهين. شيهانه لا تستغبين يعني بله اكوله جانت بل بيت أو بل شقه ما راح يفرق شي انتِ ما تعرفين تفكيرهم شنو يا عيني.. اني درست الموضوع زين و كلت اله بل مركز اضبط شي على مود ما يسون شي بيج او لو حتى بس يحجون عليج كبل راح يعيرون بيج واني ادره بعد

هسه عوفيهم معليج اني مضبط الشغله و انزلي يله وصلنا

نزلت ما فهمت شي بس مئمنه بشاهين شيسوي اني امشي وراه

دخلنه للمركز و جان بي هواي ناس و جيش اني خايفه و لابده بضهر شاهين

و شاهين كل شوي واحد يسلم عليه و قسم ياخذون اله تحيه

وصلنه يم غرفه فتحها و دخلنه باوع عليه وكال

شاهين. هذا مكتبي شنو رئيج

مريم. كلش حلوو يخبل

كعدت على الكرسي و هوا كام يخابر و فتح الاسلكي

اكثر شي اكره صوته ما افهم شي من الي يحجونه و صوته يضرب بل راس

بقيت ربع ساعه كاعده و هوا يكتب كل شوي يرفع راسه يباوع عليه و يرجع يكمل

ندك الباب و دخل الحارس ضرب تحيه و كال اله

_ سيدي اكو شخص يريد يشوفك

شاهين. خلي يدخل حبيبي

طلع و دخل رجال جبير لابس ملابس جيش و على كتفه نجوم و سيف

كام شاهين و سلم عليه باوع عليه شاهين و كال

شاهين. هاي بنت اختك مريم

اول مره يصيحني باسمي بقيت مفهيه تقدم الرجال عليه و حضني بقه حاضني واني صافنه شجاي يصير معقوله هذا خالي

زول مني و كال

خالي. شلونج بنتي

مريم. زينه انت خالي لو شنو

خالي. أي بنتي اني خالج ابو سلمان

ابو سلمان. احجي بنتي وين امج أخوج أبوج وين اني اخر مره سمعت انو انتِ امج حامل بيج و انكطعت اخباركم و صكر الله يسلمه ما قبل يحجي الي يكول هاي خصوصيه ما لازم احجي بكيفي

مريم. خالو امي ماتت و اخوي صار داعشي ومات و ابوي قبل لا اجي للدنيا هم مات

اباوع عليه كام يرجف حجه برجفه صوت

ابو سالم. تحجين صدك امج ماتت و أخوج شلون صار داعشي

كمت ابجي و كعدت على الكرسي

مريم. خالو ركض ورا الفلوس غرته الفلوس

ابو سالم. انا لله وانا اليه راجعون.. ميخالف بنتي هاذي الحياه تمشي عكس ما نريد و هسه كومي خلي نروح

مسحت دموعي و كمت وكفت يمه باوع على شاهين و حجه

ابو سالم. مشكور صكر و هاذي وكفتك ما راح انساها بحياتي

شاهين. تدلل حبيبي بل خدمه

بقيت صافنه ليش يكول لشاهين صكر مو هوا اسمو شاهين شنو صكر

بقيت صافنه حسيت احد مسك ايدي فزيت و شفت خالو

رفعت راسي لشاهين لكيته يباوع عليه بنضرات غريبه معرف شنو افسرها

سحبني خالي و طلعنه لوحدت بأيدي لشاهين جان واكف بل باب و يباوع علينه وصلنه نهايه الممر وكف خالو يسلم على واحد باوعت عليه نصدمت و بقيت مفتحه عيوني متفاجه بقيت متصنمه و اباوع

حجيت بتوتر

مريم. فهد؟!

باوع عليه و بقه صافن و مفتح عيونه صاح

فهد.مريومه

حجه هيج و سحبني لحضنه بادلته بقه حاضني شوي و زول حجه بارتباك

فهد.مريومه وين جنتي دورت عليج جثير اني و صالح رحنه للنفق و لكيناه مقصوف كله و كالو كل الي جانو بي ميتين بوكتها صالح تخربط كلش نقهر عليج و طك من خشمه دم دورت عليج بل مخيمات و المستشفيات كلت عسى و لعل الكاج لو حتى اسمج بس اتأكد انتِ عايشه ما لكيت الج اثر اخر شي ستسلمت لأمر الواقع و قتنعت انتِ ميته.. وراها بفتره رحنى اني و صالح على النفق و شعلنه شموع على روحج

مريم. فهد اني عايشه ما متت هههه ليش تريد تموتني كوه

فهد. هههه هسه الحمد لله انتِ عايشه

ابو سلمان. شجاي يصير

مريم. خالو هذا فهد جان مختطف يم داعش و اني ساعدته فا يحسبني ميته و سوا هيج مو قصده ترا بس هوا لان فرحان

فهد. صح سيدي واني اسف على تصرفي بس والله ما جنت متوقع اشوفها مره ثانيه

ابو سلمان. عادي بويه ما صار شي.. بس كولي الي شلون طلعتيهم

مريم. سالفه طويله بعدين احجيها الك خالو

ابو سلمان. يله بويه فهد احنى نترخص مع السلامه عود تعال مره علينه انت و الوالده مشتاكيلكم

فهد. إن شاء الله عمي مع السلامه

نداريت و لوحت لفهد باوعت شاهين يشرب جكاير و يباوع علينه بطارف عين مو عاجبه الوضع شكله

طلعنه من المركز و صعدنه بل سياره و كعدت اسولف لخالو على مواقفي ويه السجناء و شلون جنت اعالجهم و هوا يضحك عليه تصرفاتي و شلون متحمسه بل كلام

ما حجيت اله شلون جان محمد يعاملني و ما جبت طاريه ابد هوا هم ما سئلني

مريم. خالو شيصير الك فهد اشو تكول اله جيب امك

ابو سلمان. ههه يصير ابو صديقي

مريم. اذا ابو صديقك ما تكول اله جيب ابوك علش تكول اله جيب امك هاااا

ضحك اله ما غص حجه و هوا يضحك

ابو سلمان. ولج شنو من لسان عليج ما تكولين من وين جايبته انه لو عندي بنت مثل لسانج 24ساعه مكابلها و ادك فج وياها

مريم. رحم الله والديك خالو سويتني ام لسان

ابو سلمان. و والديج

بقيت اباوع على الطريق لحد ما نمت كعت على خالو يكعدني

باوعت و اكفين يم بيت حلو و جبير نزلت من السياره و خالو فتح الباب و دخلنه

جان البيت هدوء كلش كام يصيح خالي

ابو سلمان. يمهه يمه وينج

طلعت مره عجوز من غرفتها وجها ابيظ كطنه و لابسه اسود زايد جمالها و مكحله عيونها

من شافتني كبل كامت ترحب بيه

_ هله بحفيذتي هله بنت الغاليه

مريم. هلا بيج بيبي

_ يا بعد روحي تعالي خلي احبنج

وكفت يمها كبل سحبتني لحضنها و كامت تبوس بيه و تنعي و تنبجي

ما فهمت شنو تحجي ولا اعرف شنو السالفه اول مره اصادف هيج موقف بحياتي

زولت مني و مسحت دموعها بشيلتها كالت

بيبي. يروحي وين امج

مريم. ماتت

بيبي. والله عرفت سوده بوجهي كلبي جان حاسني

سكتت و مسحت دموعها مسكتني من ايدي و كعدنه على الكنبه و رجعت مره ثانيه تنعي

هب الهوى و تحرك الباب
حسبالي يا يمه جيه الحباب
ثاري الهوى و الباب جذاب

كامت تبجي خلت شيلتها على عيونها اباوع جتافها يتحركون رفعت راسها عليه و كالت

بيبي. يمه امج كسرتني بهزيمتها كسرت ضهري ما أكدر على فراكها كلها نستها و كملت حياتها اله انه بقيت يوميه ابقه كاعده بره انتظر فتحه الباب و تدخل عليه تتحامه بيه تنام بحضني يايمه متي و ما شبعتي مني

دنكن و كمت ابجي وياها صوتها من تنعي تبجي الصخر

بقينه كاعدين و شوي هدت بيبي و كعدت تسئلني و تحجي ويايه سوالف عاديه

نزلن من فوك نسوان و جهال يمكن عرفني كبل اجن سلمن عليه و هم يعرفن اسمي بعد

كعدن مقابيلي و كامت يباوعون عليه من فوك إلى جوه شلون الفحص حجت وحده بيهن

_ انتِ على منو طالعه ما تشبهين امج

مريم. على ابوي

_ وين اهلج اشو بس انتِ بوحدج

ما جاوبتها دنكت ما احب احجي بهذا الموضوع ابد
حجه خالو

ابو سلمان.كافي بتول مو وكته هاي الاسئله

بتول. حبيبي قابل شحجيت اني

ابو سلمان. خلي اعرفج على العائله.. بتول زوجتي و هاي ريم الي بصفها بنتي و هاي ام سيدرا مرت خالج الثاني ما تعرفينه لحد هسه و بناتها تقى و راما
و الولد ان شاء الله تتعرفين عليهم كلهم من يجون و تتعرفين على خالاتج

مريم. إن شاء الله خالو تشرفت بيكم

ابو سلمان. ريم كومي وديها لغرفتها خلي ترتاح

كامت ريم و رحت وراها صعدنه فوك حجت

ريم. شكد عمرج مبينه صغيره

مريم. عمري 16

ريم. يااا اني اول ما شفتج كلت هاي تطلع 12 او 13

مريم. ههه لا مو لهل درجه بعد كم اسبوع و اصير 17

ريم. ماشاء الله العمر كله

مريم. تسلمين.. وأنتِ شكد عمرج

ريم. عمري 21 مرحله اولى جامعه رسبت سنه بل سادس و بل دفرات طلعت اداره و قتصاد

مريم. الله يساعدج يكولون السادس صعب

ريم. ضيم لحد هسه متفاجه من نفسي شلون طلعت منه سلامات

ضحكت على كلامها كلش حلوو وصلنه يم باب غرفه

ريم. هاي غرفتج بابا جهزها الج

مريم. شكرا حبيبتي كلفتكم هواي

ريم لا عادي يله اخذي راحتج

راحت واني دخلت على الغرفه جانت كلش حلوه و بيها اشياء بنات و سرير ابو النفر وردي و ميز و كنتور كله راقي و حلو

ذبيت نفسي على الجربايه اريد بس انام كلش تعبانه

تذكرت العلاكه الي انطاني اياها شاهين

كبل ركضت عليها و فتحتها اجت بخشمي عطره القوي ابو الوراق حاقده على عطره معرف ليش

طلعت منها ملابس طلعه يخبلن كلش واني اكول البارحه خابص نفسه بل محل و يشتري طلع الي كل هذا ، طلعت الملابس باوعت بنهايه العلاكه علبه

طلعتها باوعت عليها كندر ياا ما ناسي اني احب الكندر جايبلي بمكان القطعه علبه كامله كلش فرحت

شلتهن و خليتهم بل كنتور باوعت على الكنتور مليان ملابس طلعه و بيت معقوله هذا كله الي

بحياتي محد شترا الي ملابس مثل هيج بحياتي محد خله الي غرفه خاصه و الأشياء الي احبها

طلعت تراك و لبسته نمت على الفراش احس براحه
و كلش فرحانه حسيت حياتي راح تتغير مبين خوالي يحبوني
---------------------------------------------
عمري خلص البارت اذا عجبكم دوسو على
النجمه

غلسو إذا شفتو اغلاط املائيه لان كتبته بل سياره

اليوم اني يم مينا تسلم عليكم يولو

الي ما يعرف منو مينا بطله قصه (الضابط ذيب)

علوش ابنها يسميني عنونه 😂
فا كبل تذكرت من زمان ما كلت الكم عنونين مالتي

سؤال اليوم، تتوقعون مريم راح تلتقي بشاهين مره اخرى لو بعد معد تشوفه

احبكم عنونين مالتي🤎❕