رواية ذات العيون الناعسة الفصل السابع والعشرون 27 - بقلم روان آل عبدالله

قبل موتي بدقة قلبٍ واحدة ..
تذكرتُ ما دار بأولِ لقاء 💔...

كاتبه : روان آل عبدالله

علقو بين الفقرات + متابعه للحساب مالتي 🤍🧸
--------------------------------------------------

دكيت و اني ارجف و دمي ينزل على الموبايل و مسحته بطارف ملابسي انتظر اسمع صوته تا انفجر بجي و اكعد افرغ الي بكلبي اله و احجي اله ضيمي و تعبي بدونه

انتظر يدك كبل طلعلي الرقم المطلوب مغلق او خارج نطاق التقطيه

وكعت بل كاع و بجيت كمت اشلع بشعري و اضرب على رجليه و احجي بشهكه

مريم. ليش شاهين ليششش حبيبي هيج اهون عليك و بسهوله عفتني حبيبي باجر راح اصير بذمه رجال غيرك شاهين بداعتي تعال و خلصني من هايي الورطه شاهين ليشش هيج مو جنت واعدني ما تعوفني وين وعدك وين حبك معقوله تا تنتقم مني و هيج علقتني بيك و عفتني بسهوله بدون وداع لهل درجه اهون عليك على الاقل اجرحني سمعني كلام يخلي كلبي يتوب منك

ابجي و دموعي يختلطن بل دم الي بوجهي يعبر عن حزني و المي و وجعي و خيباتي

معرف ابجي على شاهين الي علقني بي و سافر معرف ابجي على نفسي الي راح اصير على ذمة رجال باجر، رجل ما اعرفه ولا شايفته هل راح يكون زين راح يحبني مثل شاهين راح يقدرني و يحسبلي حساب مثل شاهين

بهاي اللحظه عرفت اني يتيمه محد ساندني محد مسح على راسي محد ضمني لصدره محد كلي لا تبجين اني يمج... صارلي شكد ما سامعه هاذي الكلمه صارلي شكد ما حسيت بل امان

مشتاكه لحضن امي مشتاكه لحنانها و عطفها محتاجه تضمني على صدرها و تطمني انو اني بخير و محد يكدر يلمسني

صحيت على صوت عضام ضهري تطكطك من الوجع احس ضهري مكسور كل الضرب الي تعرضت اله صار عليه

كمت على الحمام و غسلت وجهي اباوع على المي ينزل دم من وجهي غسلت على السريع و اخذت كلنس و خليته على خشمي و حلكي و تمددت و رفعت راسي

غفيت بعالمي الأسود الوحيد الي انسه كلشي بي كعدت على دكه الباب كمت بتكاسل واني على عيوني النوم فتحت الباب و اجت بوجهي بتول

بتول. حضري نفسج راح يجون

مريم. يجون من صباحيه الله خير خما تا يعرس عليه

بتول. يا صباحيه الساعه وحده الظهر

مريم. اممم والمطلوب

بتول. المطلوب تتحظرين لان بل ثلاث العصر يجون

سديت الباب بوجها صحت

مريم. جيبي الي اكل اخاف انزل جوه و اشوف الوجوه و تنسد نفسي

بتول. لو اني منج و مغصوبه و مكتوله جان هسه منتحره

مريم. عشتو عليمن اذبح نفسي و ادخل النار بسبب أشخاص هما و نعالي سوه... يله روحي جيبي الي اكل جوعانه

كلت هيج و ما سمعت ردها كبل رحت على الحمام
باوعت على نفسي بل مرايه وجهي شاحب و تعبان و عيوني ناعسه و ذبلانه

صفنت على نفسي و همست

مريم. صكري هيج حياتي بدونك من عفتني نذليت ليش تخليت عني بسهوله

نزلت دموعي كبل غسلت ما اريد أضعف تعبت من الكسر و الضعف تعبت من البجي و النوح لو ابجي من هين الى باجر ما راح اغير شي

طلعت لكيت جايبين اكل و مخلينه على الميز

اكلت شوي و نسدت نفسي

ضليت كاعده و اباوع على الساعه انتظر موتي

دكت الساعه ثلاث كلبي نقبض و دمعي نزلت حاره تجوي خدي

سمعت صوت السيارات و صوت خوالي يرحبون بيهم

خليت ايدي على حلكي امنع صرخاتي الي تريد تتحرر من قيود صدري

دخلت بتول و وياها البنات و الضحكه شاكه حلكها

من شافتني شهكت و خلت ايدها على صدرها

بتول.ليش لسه ما متحظره اجوو ترره

مريم. اطلعي من هين ما اتحظر ولا اسوي اي شي روحي خلي يعقد على وحده من بناتج اني ما اتزوج

بتول. هيه بكيفج دولي شو تعالي

مريم. زولي منيي لا تلمسيني

بتول. كصري صوتج النسوان لا يسمعن

مريم. وخلي يسمعن معليه بيهن اطلعيييي برررره

غمتني و طلعت ركضت و قفلت الباب و ضميت المفتاح بأيدي

ربع ساعه و شفت مقبض الباب يتحرك

ما نفتح دك الباب و صاح بصوت منخفض

ابو حسان. افتحي الباب و انزلي مثل الحبابه لا اجنزج و اوديج بدون زفه على عيلتج والله مثل الفصليه انطيج

مريم. ماااا افتححح الباببب ولا اتزوووج هيه بكيفكم

ابو حسان. بسيطه

راح و شوي و نفتح الباب رجعت إلى وره و ميته خواف و اني اشوف خالي علامات العصبيه و وجهه ما ناوي على خير

سحبني من ايدي بدون كلام فتح باب الاستقبال و دخلنه سوا

رفعت راسي و شفت نسوان ثلاثه و ولد كاعد و يمه حماده ما ركزت بشكلهم بس لمحتهم لمحه بسيطه
و كبل دنكت

كعد خالي و كعدت يمه حجت بيبي

بيبي. هاي بنتنه مريم بنت بنتي أعز من ضناي اني ربيتها شوفوها جنها اجنبيه تخبل

_ صلاوات شنو من جمال شايله سبحان الله عمي هنياله ابني بيج

رفعت راسي اريد اشوف ابنها منو هوا هذا

رفعت راسي و يا ريت ما رفعته اجت عيني على واحد محفحف و بنطرونه مشكك و لابس سلاسل بركبته و ايده، و شعره يوصل للسقف كد ما طويل و هوا مسوي تسريحه الديج ركزت بوجهه و نصدمت

خال حمره و كريم اساس كلش واضحات و مبينات

لعبت نفسي و كشت شعره جلدي واني اشوفه هيج

من شافني صافنه علي غمزلي عوجت حلكي دليل على الاشمئزاز

بقو يسولفن و يتفقون على المهر و اني دموعي تنزل بسكته

تفقو و صاحو على الشيخ دخل جعفر و ياه الشيخ

باوعت على جعفر بتوسل بس جان يتجاهل نظراتي

بده الشيخ يقره آيات و آخر شي صاح

_ اذا موافقه على الزواج كولي نعم انت وكيلي

خالي عصرني من زندي و نبت اضافره حسيت تكطع الجلد مالتي

قويت نفسي و همست اني كدها صحت

مريم. ما اوفق اني مجبوره ترضاها يا شيخ وين اكو بدين محمد تنجبر المرأه على الزواج

_ لا والله يا بنتي ما ارضاها

لوه ايدي خالي و همس بسيطه اني الج الظاهر تحبين واحد يهينج ما تمشين اله بل ضرب شلون الحمار بسيطه

كام الشيخ و ترخص من طلع اجتي بيبي و ضربتني راشدي كمت و صحت

مريم. ديري بالج بعد تمدين ايديج عليه والله اكسرها الايد الي تنمد عليه

سحبني خالي و طلع الولد و حماده ورانه فتح باب السيارة الخلفي و ذبني بيها

صعد الولد من كدام و حماده يمي

باوع عليه حماده و هوا يضحك

كلبت عيوني و درت وجهي على الجامه

خايفه وين راح ياخذوني شراح يسوون بيه

وصلنه يم فرع كد ما كئيب يبين اسود ضلام و هدوء و البيوت قديمه و عليها عفن

نزلو اجه خالي و سحبني من ايدي دخلنه بفرع كلش ضيق صرنه نمشي واحد ورا الاخر

المكان يخوف و الريحه تكتل ريحه خيسه على عفن
لعبت نفسي و نقمت گلبي خايفه حيل

وصلنه يم محل صغير و الباب متروس أرقام و كتابات ما مفهومه

دخلنه و جان رجال جبير و لحيته بيضه كاض السباحه و كاعد يسبح و يهز براسه وجهه ما بي نور و شكله يخوف و مليان تضاريس جان لابس ملابس شيوخ معرف ملا و عمامه و خال عبايه على كتفه

كعدنه على الكراسي واني ارجف و حتى دموعي وكفت تنزل من الخوف

باوع عليه بتفحص و كال

_ جايين تعقدون

ابو حسان. أي شيخنه تعنينه عليك من مكان بعيد
سمعنه سمعتك طيبه و كل الزواجات الي تزوجها مباركه بيها

_ البنت قاصر

ابو حسان. أي شيخ ما تجاوزت 18 سنه

_ جيد ملاحظ هاي الفتره بنات من عمر 11 إلى 18 يجون يعقدن قليل يجون 20 و كف سوكهن صار ما يمشي هاذي النوعيه فا احسن خيار سويتوه انو زوجت ابنتك بهذا العمر الزواج مبارك و مرغوب من قبل الرجال

ابو حسان. صح شيخ تكدر تباشر

بده يسولف و يقره اخر شي حاول ياخذ موافقتي بس رفضت رفض قاطع

ابو حسان. شيخنا عادي اني اصير مكانها و انطي الموافقه بدالها

_ اي تكدر

حجه خالي و وافق بدالي واني كطعت نفسي من البجي دفع فلوس و طلعنه خالي يتحلف و حماده يسب بيه واني ما بيدي شي غير الدعاء و البجي

أعلنت موتي صرت جسد بدون روح صافنه على الطريق القاتم و اجه بين عيني طيف شاهين نزلت دموعي واني اتذكر كل تفصيله عشناها سوه اتذكر من يكول الي شيهانتي سمسمه اتذكر لهفته و خوفه و حرصه من جان يخابرني اول سؤال يكولي
خوالج سوو الج شي جان يعرف طينتهم شنو بمجرد من سافر كبل ستغلو الوضع

صرت على ذمه رجال غير حبيبي بمجرد ما افكر بيها توجع كلبي انوب صارت صدك

هسه صرت خاليه بدون شاهين صرت عدم بس جسد
زدت بجي و تعالت صوت شهكاتي

ضحك خالي و هوا يكول

ابو حسان. هاااا جاي تبجين على شاهين لان عافج لو على العقد لو على الكتله الي راح تاخذيها من نرجع هههه اي وحده

كلهم ضحكو و اني خليت ايدي على وجهي كعدت ابجي احسه داس على كلبي و هوا يذكرني

وصلنه للبيت صعدت لغرفت بدون كلام نكسرت واني اشوف كلها تتشمت بيه و تضحك عليه

دخلت لغرفتي و اني منهاره و جسمي يختض بشكل مو طبيعي رجله بادن كعدت بل ارض و ضميت راسي بين رجليه و كمت ابجي بهستيريا احس نفسي فقدت و نتهيت تعبت من البجي و جسمي منهك

ندفع الباب و دخل خالي رفع أصبعه و حجه بتهديد

ابو حسان. راح اسكت و اغلس عن هاي الدكه الناقصه الي سويتها بينه و ما نسيت الكتله الي توعدتها الج بس زوجج كال عوفها و عفتج بخاطره بس... هاا و حضري نفسج الاسبوع الجاي عرسج و من تطلعين من هنا لا تجين و لا تشوفينه وجهج، بعد لا نعرفج و لا تعرفينه ما نتشرف بيج

كال هيج و طلع، بقيت اسبوع واني معتزله الحياه كاظيتها بس بجي و صلاه ما احجي ويه احد ما اسولف ويه احد اكلي يوصل يمي

اجه يوم الأحد ضليت صافنه على التاريخ اليوم زواجي اليوم عرسي بس مو من حبيبي

تعبت من البجي تعبت من النوح ماكو شي من هذول غير حياتي منع زواجي

باوعت على وجهي بل مرايه عيوني كد البجي داخلات لجوه و وجهي تعبان و طالع حبوب بي

بجيت واني اشوف شكلي رجعت مثل قبل من جنت يم داعش رجعت لضيمي و قهري بس هل مره مضاعف و حمل يكسر الضهر

طلعت الموبايل و فتحته جنت متأمله الكه مكالمات من شاهين بس ما لكيت اتصلت علي طلع كا العاده مغلق رحت على التلي طلع اخر ضهور منذ زمن طويل بجيت و طلعت الهديه مالته و خليتها على صدري حضنتها و كعدت ابجي هاي اخر مره احضن هديتك اخر مره اشم عطرك الي اكرهه جنت اتمنى ترجع و تنقذني.... شاهين ارجعلي

شجاني ما حضنتك قبل ما تروح عفتني و غيبتك صارت طويله

رفعت راسي على دك الباب كبل رجعت الأغراض لمكانها و كمت فتحته دخلت مرت خالي هيه و بناتها كل وحده شايله جنطه نفس الكصه

بتول. اووييي تعبت.. باوعي هذا جهازج زوجج جهزه الج و تحضري هسه راح تجي ام الصالون تمكيجج هل وجهج صاير جنه وجه ارمله مطلقه

مريم. انجبي

بتول. احترمي نفسج انتِ الظاهر ما تعرفين منو بتول

مريم. بتول لو بل عرض ههههه

بتول. عود تحشش دولي

مريم. هههههه خرب عرضج ضحكتيني واني الي جنت نفسيه

بتول. ترا ما يضحك

مريم. بتول لو بل عرض عاااااااههههههه

هزت ايدها و راحت و غسلت وجهي و لبست التراك
دخلت بتول و ام حسان و وياها مره

بتول ذبت فستان العرس على الجربايه من شفته نزلت دموعي و خيم الحزن على وجهي

ما فكرت بشي غير شاهين كعدت واني دموعي ينزلن بغزاره يعبرن عن مدا حزني و كسري كمت اعاتب بشاهين بداخلي

مريم. شاهين حباب تعال خلصني الله يخليك ما عندي غيرك ابوس ايدك و رجلك بس خلصني منهم مثل ما جبتني عليهم ما اريد منك كل شي بس تخلصني منهم و تعوفني تايهه بل شارع قابله والله قابله

صاحت ام الصالون

_ شنو حبيبتي إذا تبقين تبجين راح يخرب المكياج يله كافي بجي

مريم. وخلي يخرب على ساس اني مهتمه كلش

بتول. تنجبين لو انادي خالج يعرف شنو يتصرف وياج

مريم. ما خايفه منكم ابد يل كلاب

بتول. اوكفيلي

طلعت و شوي و اجت و جايبه خالي يرعد وكف يم الباب و صاح بتهديد

ابو حسان. تسكتين و تكعدين مثل الخوش ادميه على ما تحطلج هذا الزفت... ما اريد اسمعع صوتت

مريم. عبالك تخوفني هههه لا والله ما يخوفني لا ضرب و لا تهديد ولا اي شي مو انت الي تمشي كلامك عليه

هز راسه و راح باوعت على الكوافيرة بطرف عيني و صحت

مريم. يله عيني انتِ الي خبصتينه بل مكياج حطي خلي نشوف بعد شتريدين اني شغلتي هنا بس البي طلبات ضلت عليج خلي البي طلبج

بدت تخلي الي مكياج واني طامسه بخيالي بعالمي الخاص الي ما بي شاهين ولا بي تعب و لا بي خوالي و لا بي ضرب و تعذيب، بس بي اني و امي و اخوي و بيتنه الصغير الي من جنكو

من ارجع من المدرسة واني اتحلف معد ارجع عليها اله ابطل وامي بس تباوع عليه و تضحك على عصبيتي الطفوليه و المغرب اكعد باب المطبخ انتظر محمد يجي جايب اكل كبل ابوسه يالله اخذ الاكل منه و اذا ما جايب اروح اختل بحضن امي و اكوم ابجي و اشهك اله ما انام شكد تذمرت من حياتي السابقه بس هسه ادفع نص عمري على مود ارجع الها و كل ما ابجي اختل بحضن امي و جان اكبر همي انو محمد يجيب اكل المغرب

صحيت على صوت الكوافيرة تكول كومي خلصنه صحيت على واقعي المقرف واني كوه لازمه روحي ما ابجي اريد ابقه عايشه بل احلام ليش صحيت اريد ابقه بحضن امي اريد اشكي الها اريد اشم عطرها ليش صحوني حتى على هاي لاحكيني

سوت شعري تسريحه بسيطه و خلته على طوله ما ردت ترفعه لبستني الفستان و الحذاء مسكت المسكه و تقدمت بحركه بطيء على المرايه

غمضت عيوني و اخذت شهيق و زفير فتحت عيوني و باوعت على نفسي المكياج بارز ملامح وجهي و محلي، و الأسود الي فوك عيوني خله عيوني لونها يعمق اكثر

بتسمت بتردد واني اتخيل هسه راح انزف لشاهين لأول حب بحياتي و آخر حب صحيت على صوت مرت خالي دخلت تركض

ام حسان. اجووو

نقبض كلبي و تسارعت دكاته هاي الكلمه خلتي توازني يختل و ترجعني لنقطه الصفر صحيت على نفسي و ستوعبت انو خلص صرت على ذمت رجال غير شاهين

أعلنت موتي و رفعت حدادي صرت جسد خالي بدون روح

اخذت الكبوس و المسكه من ايدي و نزلت، همست بتول

بتول. يله خلي ننزل ينتظرونج

باوعت عليها بعيون مدمعه و همست واني مقوسه شفتي

مريم. حبابه بتول سوي شي والله ما اريد اتزوج خايفه

بتول. شبيدي والله اني و ابو سلمان طلعنه منها ثنينه ما موافقين على زواجج بس بيبيتج و خالج هما الي زوجوج

مريم. بس خالي ابو سالم يكدر يقنع خالي

بتول. لا ما يكدر يله نزلي فشله من الاوادم.

مريم. حبابه

بتول. يلهه مريم مو وكته نزلي بعد صرتي حلاله عقدتي كافي

فتحت الباب واني ارجف و ميته رعب وصلت يم الدرج من شافني كبل كامن يهلهلن نزلت دموعي. دنكت راسي وصلت للنهايه الدرج مسكني من ايدي و لبسني الكبوس و انطاني المسكه

سحبني من ايدي و طلعنه من البيت

ما احس بكل شي صرت انسانه خاليه رغم الهوسه و صوت الطلق و الاغاني بس ما اسمع كل شي، وصلت للسياره احس رجليه بادن هم زين لحكت و كعدت دنكت راسي و كل الطريق ما رفعته ولا شفت هذا الي اسمه زوجي

مسك ايدي و كرصني من صدري لعبت نفسي و دفعت ايده بتوتر باوعت عليه

ما اعرف اسمه ولا اعرفه منو هوا بس الشي الوحيد الي اعرفه هوا زوجي

وصلنه للبيت و اني ما ادري بل دنيه بس صافنه و ما اسمع الي يحاجيني و فكري مشوش كل شوي يجي بالي مشهد من حياتي مره اني و صغير مره من محمد حاول يغتصبني مره من تعرفت على شاهين مره من عقدت اجه بالي مشهد من شاهين يعترف الي اجه باذني صوت شاهين و هوا يهمس

سمسمه احبج

فتحت عيوني و صحيت من صفنتي الطويله رفعت راسي و شفت الناس لازكه عليه و كلها لازمه موبايلاتها غطيت وجهي بسرعه و غمضت عيوني اشجع نفسي احجي وياه لأول مره

سحبته من جاكيته و قربته الي همست باذنه

مريم. ااا عفيه خليهم يشيلون الموبايلات اريد اخذ هوا

هوا ما قصر صاح عليهم و كلها بتعدت اجت بتول و نزعتني الكبوس و عدلت مكياجي و همست

بتول. احنى راح نروح ان شاء الله زواج الدهر

مريم. حبابه بتول على الإقل ابقي ويايه من يزفوني اخاف والله

بتول. والله مو بكيفي أوامر خالج... مع السلامة حبيبتي

مريم. مع السلامة

راحت واني كمت ابجي على الاقل جنت مأمنه اعرف احد هسه كلها صار غريبه عليه

هذا الما يتسمه شوي و راح على الزلم

جابو العشه و كلها كعدت تتعشه بس اني بقيت كاعده محد كال خلي انجيب الها شي تتسمم بي عشتو عود اكل ويه زوجي هوا بس شوفته تسد النفس ابو الحمره يمكن خال مكياج اكثر مني الناس تيهت ما تعرف منو العروس اني لو هوا

اجت امه و كومتني باوعت عليها بعلامه استفهام

_ يله امشي صعدي شوي و راح يزفون زوجج

مريم. حبابه خاله خايفه

خاله. ميخالف بس اول مره تتعودين بعدها

ما انطتني مجال للكلام سحبتني و صعدتني فوك

دخلت لغرفه عاديه كلش ما بيها شي حلوو

خاله. باوعي ملابس انتِ تعرفين شنو تلبسين ما اوصيج انتن جيل هل وكت كلشي تعرفن

مريم. أي

خاله. اكشخي و البسي اكثر شي مشلتح و لا تعاندين كلشي يكلج كولي اي

مريم. أي

خاله. عفيه اني هسه نازله انتِ تحضري على ما يجي زوجج

طلعت واني غميتها بثنين ايديه

مريم. كبر اليكبرج تريد مشلتح عشتو كل هذا لابو الحمره الخنيث

توجهت للكنتور طلعت تراك و دخلت الحمام سبحت واني صافنه و شارده افكر ما أريده يتقرب الي و لا يلمسني تقرف نفسي منه كلش

لبست التراك و طلعت مشطت و شسورت شعري كعدت على طارف السرير ادعي يموت يصير بي شي و ما يجي

فرشت المصلايه و كعدت اصلي و ادعي الله يخلصني منه و تعدي هاذي اليله بخير

بقيت انتظر ساعه مليت واني كاعده فرحت الله ستجاب دعائي و خلصني منه

رحت ركض على الفراش واني ميته فرح كون ما يجي، اول ما خليت راسي كبل نمت من التعب

فزيت على أنفاس حاره تضرب بوجهي فتحت عيوني شفت عيون حمره بلون الدم و وجه اسود و باين عليه علامات الغضب و الريحه البشعه الباعثه من أنفاسه

همس بفحيح و مكر

_ اريد اعذبچ

---------------------------------------------------
عمري انتو خلص البارت اذا عجبكم دوسو على النجمه و تفاعلوو

سؤال :شنو تتوقعون يصير بل بارت الجاي

احبكم متابعيني العنونين 🤍🧸