رواية ذات العيون الناعسة الفصل الثاني عشر 12 - بقلم روان آل عبدالله

أنهَ المٌا سَومرتَّ روُحَي بـشمَس غيْرك💔❗

الكاتبه : روان آل عبدالله

سوو الي واهس و علقوو بين الفقرات+متابعه🤎
—-----------------------------------------------
باوعت على المكان شفت بيوت هواي واحد بصف الاخر

مريم. محمد هذني بيوت شجابنه هنا

ذب حسره و مسك ايدي و حجه

محمد. مريم هنا كرايبنه من بعيد و راح اعوفج يمهم ائمن الج الموصل وضعها خطر و ما ندري بيا ساعه انموت فا ما لكيت غير هذا الحل

مريم. محمد انتَ دا تحجي صدك لو شقه

محمد. مريم مو وكت الشقه

مريم. يعني راح تعوفني هنا

محمد. اي

مريم. الله عليك لا تعوفني ما اريد اروح لأي مكان أريد ابقه يمك و اذا تموت اموت وياك اني شكو باقيه ما عندي احد غيرك الله عليك لا تقهرني

محمد. مريم اسف ما لكيت غير حل اني ما جاي الكه مكان يحتويج ابد و هنا ائمن مكان اموت واني مرتاح

مريم. محمد لا تجيب طاري الموت فدوه ما اروح على اي مكان ابقه يمك معليه مااا

محمد. مريم لا تعاندين عفيه تعبان كلش

كمت ابجي و حجيت

مريم. شلون ينطيك كلبك تعوفني هنا يم ناس ما اعرفهم

محمد. هذول الناس راح يحافظون عليج و يحمونج اكثر مني

مريم. لا محمد انتَ غلطان ما راح احد يحميني و يحبني اكثر منك لا تعوفني فدوه اروحلك

ما رد عليه و نزل من السياره اجه من جهتي و فتح الباب

محمد. يله نزلي

مريم. مااا مااريد ما راح انزل ماااا

محمد. مريم نزلي يله كافي صبري اله حدود

هزيت راسي برفض سحبني من ايدي و طلعني سد الباب و كام يسحبني و اني احاول ابعده بس جان اقوه مني

وصلنا يم باب البيت دك الباب و انتظرنه دقائق و نفتح

طلع ولد جبير يطلع بكد محمد

سلم على محمد و دخلنه جوه كعدنه بل ستقبال راح الولد بقيته اني و محمد

مريم. محمد الله عليك

محمد. كافي ما اريد اسمع صوت

مريم. ف....

محمد. كلت كافي

نزلت دموعي و خليت ايدي على حلكي و كمت ابجي

باوع عليه و دنك طلع جكاره و كام يدخن مسح على لحيته اكثر من مره

حجه و الدخان يطلع من حلكه

محمد. كافي مريم عيونج راحن من البجي

مريم. محمد ما اريد ابقه هنا هيه كوه

ذب الجكاره بل كاع و داسها بحذائه رفع راسه و باوع عليه

محمد. انتِ شنو ما تفهمين مو كلت الج احنه حياتنه هناك مهدده بل خطر يعني بايي ساعه نموت

مريم. ماريد عفيه ماريد

صاح بصوت عالي

محمد. كافييي عاددد اسكتي هواي سكتتت الججج ماريدد اسمعع صوتجج ابددد تبقينن هنا و رجللج فوكك رااااسججج سامععه لوو لااا

هزيت راسي بايي عجزت ما بيدي شي اسوي

مسحت دموعي و صفنت على الأرض دخل الولد و ياه مره ورجال جبيرين مبين امه و ابوه

سلمو على محمد و كعدو مقابيلنه حجت المره

- هاي الحلوه راح تبقه يمنه

محمد. أي حجيه امانه يمج

- بعيوني اخليها شعدنه غيرك معزتها من معزتك

باوع على وجوههم شكلهم ما راضين بل سالفه ابد بس احسهم يجاملون و مجبورين

كام محمد و كال

محمد. يا الله اني اتوكل ام عمر ديري بالج عليها هاي اعز من روحي

كمت على السريع و مسكت ايده همست

مريم. راح تروح

محمد.اي

مريم. اخذني وياك الله عليك حباب

محمد. شكلنه هتو قبل دقيقه

قوست شفتي و بنزلت دموعي أشر بعيونه على أيديه

كبل تركتها و كمت ابجي بهدوء

دنك عليه محمد و حضني باسني من راسي و توجه على ام عمر و حجه وياها

محمد. مصروفها كل شهر راح يوصل الها و ما اريد اي شي ينقصها و شتريدين اني حاضر

ام عمر. ما نريد غير سلامتك يل غالي الله يحفظك

اني احس روحي بوخت من كثر الصبغ

محمد هز راسه و طلع زدت بجي واني اشوفه يختفي من كدامي

راح محمد سمعت صوت السياره شتغلت بقيت واكفه بمكاني ما تحركت اجت المره عليه و سحبتني من ايدي و فوتتني بل بيت

دخلت على البيت جان صغير بس حلو و مرتب اول ما دخلت اجت بخشمي ريحه الاكل غمضت عيوني و ستنشقتها معرف ليش تذكر بيتنا معنا انو ما جنه انسوي اكل هواي بس احس مشتاكه لهيج أجواء عائليه و مشتاكه لأمي و لريحتها مشتاكه لحنانها كلش،

ام عمر. فوتي يمه نورتي البيت بيتج حبيبتي

صفنت و نزلت دموعي لا إرادياً مشتاكه لها الكلمه صارلي هواي ما سامعتها من سمعتها احس صارت بكلبي غصه كلش جبيره دنكت راسي وكلت الها

مريم. شكرا خاله البيت منور باهله

ام عمر. تعالي خلي اراويج غرفتج

سحبتني من ايدي وكفنه يم باب غرفه تقريبا تصير جوه الدرج ضحكت بخفه و كالت

ام عمر. صح هيه قديمه بس مو بيدي والله اعذريني

مريم. صدك جذب خاله عادي بل عكس اصلا انتو اعذروني اني الي اجيت غفل و دخلت حياتكم

ما ردت عليه عرفتها ضايجه مني بس دا تجامل

دنكت راسي مستحيه من الموقف الي انحطيت بي احس روحي تفشلت

فتحت الباب و دخلنه للغرفه جانت بيها كنتور صغير و بيها فراش ابو النفر خالينه بزاويه الغرفه

دخلت و حجيت بخجل

مريم. شكرا خاله والله هاي وكفتج ما راح انساها ابد

ام عمر. تدللين شتريدين اني موجوده بس دكيد الباب... و وو اريد اطلب منج طلب

مريم. أي اطلبي اعيوني الج

ام عمر. اريد منج ما تطلعين من الغرفه من تردين شي اني موجوده بس لا تطلعين

صفنت عليها خجلانه كلش واحس وجهي راح يطلع منه نار من الفشله كلت بتوتر

مريم. ماشي

هزت راسها و طلعت نزعت عبايتي و حجابي و ضليت صافنه من الفشله حتى دموعي تجمدن معقوله لهل درجه كارهيني ما يردوني اطلع و لا يردون يشوفوني

طكيتها صفنه و بقيت بدوامه افكار فكره تجيبني و فكره توديني

احس روحي دخت تمددت على الفراش وغفيت

كعدت على احد يهز بكتفي رفعت راسي شفت بنت يطلع عمرها بل ١٨ سنه

كمت على حيلي و كلت

مريم. هاا حبيبتي محتاجه شي

ما جاوبتني بس أشرت على الكاع باوعت لكيت صينية صغيره مال اكل

مريم. شكرا

ما ردت عليه كبل راحت تركض صفنت شبيها هاي العيله واحد اضرب من الثاني

انفتح الباب و دخلت ام عمر و بيدها بطل ماي و راها البنت و ماسكه ثوبها

ام عمر. اعذرينا حبيبتي هاي بنتي مريضه شوي  دزيتها تجيب الج اكل بس لا سوت شي الج

مريم. لا خاله بل عكس خطيه كلشي ما سوت

ام عمر. اكلي بل عافيه

مريم. الله يعافيج

تا تروح و البنت كامت تركض و كعدت يمي بتسمت ابتسامه صغيره وسحبت خصله من شعري و خلتهه على خشمها

ضحكت على تصرها الطفولي و بستها من خدها

مريم. اني مريم وانتِ

أشرت على نفسها بيدها حجت امها

ام عمر. حبيبتي هاي اسمها فاطمه و ما تحجي

مريم. اهاا الله يشفيها

اجت امها جرتها من ايدها تريد تكومها و هيه كامت تبجي شلون الطفل سحبتها من ايدها و كلت

مريم. خليها خاله يمي من تريد تجي اني ادك الباب و تجين تاخذينها

أم عمر. اخاف تضوجج

مريم. لا عادي شوفيها شلون حبابه خطيه

راحت ام عمر و باوعت عليها خلت اديها على شعري و كعدت تمسح على بحنيه

معرف حسيت بشعور الحنان هاي المساحه تذكرني بحنان امي

قوست شفتها و نزلت دوعها بصمت نزعت الطاكيه(كبوس) مالتها و أشرت على شعرها

باوعت عليها محلقيها صفر نقهرت عليها و نزلت دموعي مسكت راسها و كلت

مريم. الله شنو هل جمال يخبل شعرج الله

كامت تضحك من بين دموعها و أشرت على نفسها قصدها اني

هزيت راسي و كلت

مريم. أي انتِ يخبل شعرج

ضحكت و حضنتني بادلتها الحضن احسها محتاجه حنان و اهتمام مثلي معرف ليش بس احسها يتيمه

اليتيم مو شرط ابو او امه متوفين ممكن نلكه بعض الأشخاص أهلهم عايشين و هما فاقدين شعور العطف و الحنان فاقدين شعور الحب العائلي

زولت عنها وحجيت

مريم. تردين تاكلين

هزت راسها تقربت و كمت اوكل بيها اباوع عليها احسها فرحانه

تاخذ الاكل من ايدي و تبتسم

خلصنه الاكل و كامت نفضت ملابسها و راحت ضحكت على تصرفاتها تنحب و تدخل الكلب بسرعه

ثواني اجت و جايبه امها وياها شالت الصينيه حجت ويايه

ام عمر. بس لا اكلت وياج

مريم. لا خاله عادي شسالفه

هيه كبل ضربتها راشدي كامت تبجي البنت شلون الطفل تقدمت عليها ومسكت ايدها و حجيت

مريم. خاله كل عقلج تضربيها ترا اني ناديتها خليتها تاكل ويايه الأمر ما يستوجب تضربيها فدوه لا تعيديها مره ثانيه

ام عمر. اسمعي صح اني مدخلج بيتي بس مو معناها تدخلين بحياتي و بتربيتي الزمي حدودج سمعتي لو لا

هزيت راسي خايفه من صياحها سحلت البنت و طلعت

مريم. حسبي الله ونعم الوكيل على هاي البنت المضلومه الي ما تكدر تدافع على نفسها بين هذول الوحوش الي على هيأة اهل

تمددت بفراشي و كبل اجه على بالي حنيه امي من راحت ما لكيت احد يعطف عليه بعدها اقرب الناس الي تخله عني

مر ثلاث ايام واني بل غرفه ما طلعت ابد صارت حياتي عباره عن اكتئاب صرت احب العزله و احب اكعد وحدي

ما شفت البنت المريضه مره ثانيه بس امها تجي تخلي الاكل و تروح

تمددت و كمت اباوع على السقف كله عفن و شكله مقرف كلبت عيوني بشمئزاز مقترفه من الوضع الي اني بي ما اعرف يمته و لشكد راح ابقه هنا محبوسه

خليت ايدي على عيوني اجبر نفسي انام احس روحي عفنت من النوم

حسيت انفتح الباب رفعت ايدي و باوعت على الباب شفت ام عمر واكفه خلت ايدها على خصرها و كالت

ام عمر. يله عيني كومي اجه اخوج

كمت بفرح و بتسمت

مريم. صدكك... يعني راح ياخذني

ام عمر. معرف

سدت الباب و راحت نفضت نفسي و كمت على السريع فتحت الباب و طلعت على الاستقبال

دخلت شفت محمد كاعد و مدنك من دخلت رفع راسه باوع عليه و كام تقرب يمي و بأس راسي و كال

محمد. شلونج

مريم. مو زينه

كلت هيج و كمت ابجي

حضني و كال

محمد. ليش مو زينه اذوج لو ضربوج

هزيت راسي بلا واني اشهك

محمد. عجل احجي شبيج

مريم. محمد لا تعوفني هنا بعد الله عليك ما اريد

محمد. شنوو مريم خما هيه لعبه و بكيفج كافي عاد اسكتي عبالي شوف شبيج

دفعته من صدره و صحت

مريم. مووو بكيفككك ما اريددد ابقه هناااا

محمد. كافيي مريممم هممم رجعنه لنفس السالفه

بتعدت عنه و كعدت على الكاع كعد يمي و كال

محمد. مريم اني راح اروح..

ما انتظرت ما يكمل حجيت بخوف

مريم. وين تروح

محمد. اسمعي... ما راح أكدر اجي بعد الموصل وضعها مو امان و الجيش جاي يتقدم هسه سيطر على القرى و النواحي و جاي يتقدمون على الجانب الأيمن هذي اخر مره اجي هنا يمكن اموت و يمكن اعيش بس الله اليعلم

مريم. لا تكول هيج اني منو الي

مسح على راسي و كام كمت وياه واني اترجاه بعيوني بس ما فاد

طلع من الباب ما تحملت مسكت ايده و كمت ابجي و اشهك

أشر بعيونه على ايده تركتها بحركه بطيأه طلع و سد الباب

انهاريت هاي هيه بعد فقدت ألامل الي جان واحد بل ميه هسه صار مصيري مجهول ما اعرف الحياه شضامتلي بعد

سحبت نفسي و كمت امشي باتجاه الغرفه دخلت و ذبيت روحي على الفراش و كمت ابجي بحسره

تعالت صوت شهكاتي و صرت ابجي بصوت عالي و مسموع حسيت الباب نفتح كمت و مسحت دموعي بحركه سريعه

دنكت راسي و اباوع على دموعي ينزلن على أيدي و صوت شهكاتي فاضحتني

حسيت احد كعد يمي رفعت راسي شفت فاطمه

رفعت ايدها و قربتها على خدي و مسحت دموعي

من سوت هيج لا إرادياً حضنتها و كمت ابجي بادلتني الحضن و كامت تمسح على شعري

زولت عنها و أشرت براسها بمعنى لا تبجين

ابتسمت و مسحت دموعي كلت

مريم. خلص ما راح ابجي

اشرتلي اوكي ضحكت على حركاتها

سحبت خصله من شعري و كعدت تشم بيها خليتها على راحتها

شوي و راسي كام يوجعني كد ما سحبت شعري بقت ماسكه الخصله ساعه كامله ما تقبل تعوفها جريت شعري وكلت

مريم. عوفيها حبابه راسي كام يوجعني

هزت راسها بلا.. بقيت محتاره شسوي وياها ما تتفاهم ابد شلون ربي

مريم. زين روحي جيبي مقص على مود انطيج اياها

خلت شعري و راحت تركض فركت راسي بانزعاج احسه تشلع كد ما سحبته

اجت تركض و هيه مبتسمه جابت المقص و كعدت كدامي

باوعت على شعري ما جنت ناويه اكص شعره وحده منه بس شسوي مجبوره امي جانت دائماً توصيني ابقه محافظة عليه واني وعدتها و اليوم اخلف الوعد بس فرحه هل مريضه اهم من شعري و كلشي املكه

تنهدت و جريت خصله من وره و كصيتها باوعت عليها  تناثرت بين ايديه نزلت دموعي

جريت شريط و شديتها من فوگ و جريت ايد فاطمه و خليتها

باوعت عليها كامت تبجي و تشهك مسكت الشعر و كامت تبوس بي اباوع على منظرها يكسر الگلب

مسحت دموعها وكلت

مريم. كافي تبجين مو صار عندج شعر هسه الشعر اذا يشوفج تبجين راح يكوم بعد ما يريدج

هزت راسه بلا و مسحت دموعها خلت الشعر على صدرها و طلعت من الغرفه

لميت شعري و لبست الحجاب

مريم. بعد هاي هيه معد افتحه اذا اني مو خايفه على شعري بس اخلي وصيه امي بين عيوني.. اسفه ماما بس مجبوره سامحيني هاي اخر مره والله

تمددت و نمت مر يومين و الوضع مثل ما كال محمد جاي يزداد سوء

باوعت على الشباك اشوف الشمس تغرب فزيت و اني اباوع على الكاع تهتز بيه ثواني و رجع الوضع طبيعي

حضنت نفسي و كمت ابجي احس راح اموت يمكن هاي نهايتي اسمع صوت صاروخ فات عبالك من فوكي هز البيت حاولت اكوم اكثر من مره بس محاولاتي بائت بل فشل رجليه احسهن صارن خيوط

صار الصوت بعيد هديت شوي بس لسه كوه اجر نفس و رجليه ما أكدر اوكف عليهن انفتح الباب و دخل ابو عمر

ابوعمر. امشي بنتي اكعدي ويانه بل غرفه ما يصير تبقين وحدج

هزيت راسي و قويت نفسي و حاولت اكوم بس ما كدرت

اجه و سندني و طلعنه من الغرفه دخلت بل استقبال لكيتهم كلهم كاعدين و كل واحد كاعد بزاويه و يدعي

كعدت يم فاطمه اباوع عليها ترجف همست

مريم. شبيج

رفعت ايدينا بوجهي يرجفن حضنتهن و كمت احجي وياها سوالف عاديه على مود تنسه

صار ضرب طيارات و كل شوي انكول هسه يجي صاروخ طاير و يطشرنه، الاكل قل و على وشك يخلص ما بقه يمنه بس شي قليل

بقينه بغرفه الاستقبال كمنه ناكل بس دبس و راشي
خلصت المواد الغذائيه محمد من ذاك اليوم ما سمعت عنه شي ابد

جنت كاعده و بيدي دفتري و اكتب و فاطمه كاعده يمي و تباوع عليه شلون اكتب

رفعت ايدها و مسكت القلم

مريم. لا عوفيني اكتب حبابه

ميلت راسها و أشرت على القلم گلبت عيوني بانزعاج و نطيتها القلم

سمعت صوت طياره فتحت صوتها كبل دنكرت و حضنت فاطمه

غمضت عيوني واني اسمع صوت الصاروخ وكع بعيد

ابو عمر. لا تخافون هاي واكفه فوكنه يمكن و طلقت الصاروخ

مريم. عموو راح تبقه هيج

ابو عمر. لا بنيتي راح يحررونه الجيش انتِ بس ادعي احنه ما النه غير الدعاء

ابو عمر عنده موبايل صرصر يخابر بي أصدقائه من المحافظات و يكولوله الاخبار و تطورات الجيش و وين وصلو ماكو شبكه بل بيت لازم يصعد للطابق الثاني ياله يحصل شبكه و بعض ايام تختفي

خلصنه هاي الايام ندعي و نصلي صلاه جماعيه و بين القصف و الطلق تحررت الموصل

كل الجيران طلعو و رحبو بل جيش

طلع عمو و عمر (ابنهم) و شوي واجو يضحكون

تلكتهم ام عمر

ام عمر. هااا بشر من صدك الخبر

ابو عمر. ايي صدك الحجي و هسه احنه تحررنه بس ما خلونه نطلع رجعونه لان لسه داعش موجودين بل بيوت

تقدمت ام عمر باتجاه و سحبتني من ايدي جرتني وراها و فتحت باب الغرفه و خلتني بيها

سدت الباب و اسمع صوت القفل خفت كلش شراح تسوي بيه خصوصأ هسه اني ما عندي احد ما عندي سند

رجعت لفراشي و ضليت يومين واني نفس وضعي بس احس روحي منتهيه كلش ما أكدر احرك نفسي من الجوع  يجيبون الي اكل شي قليل كلش ابقه بل يوم بس اكل صمونه و ماي

قويت نفسي و كمت ستندت على الحايط و وصلت يم الباب كمت ادك بي بتعب سمعت قفل الباب رجعت إلى وره باوعت عليه ام عمر بمعنى شتريدين

مريم. حبابه اريد اكل راح اموت

ام عمر. والله اعذريني اني ما مفتحه دار أيتام و لا عبالج كل هل فتره اني اصرف عليج لا حبيبتي جان أخوج يدفع بس هسه انكطت اخباره يعني ينكطع الاكل 

سدت الباب بوجهي رحت كعدت على فراشي باوعت على أيدي دا ترجف سندت راسي على الحايط و بقيت افكر شراح يصير الي إلى متا حبقه هيج اني شنو ذنبي اتحاسب بمكان غيري شنو ذني ابقه بيد وحوش ما تخاف الله

اجه على بالي كلام محمد من يكول هذا المكان ائمن الج ضحكت بخفه وهمست

مريم. وين صفه بيك الدهر يخوي بعدك عايش لو متت ليش دمرت نفسك و دمرتني وياك ليش غروك بفلوس مجرد ورق ليش هيج

نزلت دموعي بللت خدي الشاحب الي ما شاف ماي صارله يومين و نص بين صفنتي و دموعي و اهاتي

حسيت انفتح القفل و ندفع الباب بقوه رجعت إلى وره خايفه من المنظر.....
________________________
هلوو يروحي شلونگم مشتاقه الكم ونبي بس الدراسه فرقتنه معليش خلصت امتحانات و رجعت الكم ان شاء الله يوميه راح انشر بارت اذا كدرت

اطلب منكم طلب و اتمنى ما تردوني ضيفو حساب مصممه الغلاف جوري

هذا حسابها _4xxa1 كلش حلوو و نزلت مشهد روحو شوفو

و بس احبكم هوايي 🤎🪐