رواية ذات العيون الناعسة الفصل الثاني والعشرون 22 - بقلم روان آل عبدالله

مريم تكول:
أبكي على ذراعي
كإنني طِفلة ، و أنا أمي .

الكاتبه : روان آل عبدالله

طلب دوسو على النجمه + علقو بين الفقره
_______________________________
شاهين. مريم عوفيني ما افيدج ورب الكعبه

مريم. شاهين صدك تحجي لو تتشاقه

شاهين. أي احجي جد

سكتت و صوت أنفاسي صارت عاليه وكعت بل كاع و خليت الموبايل على رجلي تهسترت و كمت اصيح

مريم. لك شلون تريد اعوفك انتَ صاحي شاهين ليش هيج تعبني ليش هيج تدمرني والله كلبي خلصان مابيه حيل افقد اهلي مره ثانيه شاهين... وين وعدك الي وين حبك هيج بسهوله عندك تعوفني ما شفت شصار بيه من دخلت غيبوبه ما شفت معاناتي عيوني راحت من البجي لهل درجه اني عندك رخيصه ليش علقتني بيك و هسه تريد تنتهي علاقتنه بكل سهوله شنو ذنبي اني

شاهين. مريم الوضع اكبر مما تتصورين ما أكدر اكمل وياج سمسمه اني احبج و عمري ما راح انساج بحياتي ما فكرت اتركج بحياتي ما فكرت اضحك عليج بس الضروف اقوه مني و اذا اخذتج راح تنضلمين هواي... مع السلامه سمسمتي ديري بالج على نفسج...احبچ

مريم. شاهين....

سد الخط بقيت صافنه على المكالمه و دموعي تنزل لا إرادياً حسيت توقف بيه الزمن حسيت روحي دخلت بمتاهه دارت الدنيه بيه و وكعت على الأرض اريد اكوم ما أكدر احس روحي مقيده احس احد مربطني بقيود

حسيت لعبت نفسي و اريد اتقيئ حاولت اكوم اكثر من مره بس محاولاتي بائت بل فشل رجليه بادن معد يشيلني تقيئت دم على الأرض

فتحت عيوني بصدمه و كمت ابجي بصمت اريد احد يجي ينقذني اريد يطلع صوتي اصرخ استنجد بس صوتي ختفه حسيت نفسي بكابوس ما أكدر احجي ولا اتحرك و حلكي يطلع منه دم بكثره

كمت ازحف باتجاه الباب و ملابسي و وجهي كلها دم
فتحت الباب و صار بوجهي جعفر تا يصعد فوك كبل من شافني اجه عليه يركض نزل لمستواي
و مخبوص و مصدوم بنفس الوقت ما يعرف شنوي يسوي

شالني و نزل بيه واني دخلت بعالمي الأسود الي احس براحه بي انسه كل وجعي و دمعي و اهاتي بهذا عالم ما بي شاهين و لا بي اخوي و كل شخص جرحني و اذاني عالمي خاص بيه فقط....

سمعت احد يهمس باسمي بس الصوت بعيد حاولت افتح عيوني بس الضلام جان مسيطر عليها.. بعد محاولات عده فتحت عيوني بضعف

وضحت عندي الرئيه باوعت خوالي و اكفين فوكي و وجوهم صفر كلش مبين خايفين

حجه خالي ابو سلمان

ابو سلمان. الحمد لله على السلامة بنتي شجاج ليش هيج صار بيج

حاولت احجي اكثر من مره بس ما كدرت احس روحي كد ما تعبانه ما بيه حيل انطق حرف

اجه الدكتور و فحصني و حاول يحجي ويايه بس ما كدرت احجي شي ندار على خالي و كال بتردد

_ البنت تعرضت لصدمه كبيره حيل و على اثر هذي الصدمه فقدت النطق و ثاني شي الي خلاها تتقيئ دم عدها لتهاب بل معده و على اثر الصدمه هيج صار

سمعت الدكتور و دموعي ينزلن بهدوء حجه خالي

ابو سلمان. يعني راح تبقه هيج ما تسولف

_ لا راح يرجع النطق مالتها بعد سبوعين و اذا ما رجع بعد شهر هذا الشي طبيعي و اي شخص يتعرض لهيج اشياء... وهسه تكدرون تطلعون بس لازم تلتزمون بل مراجعات لان معدتها كلش متئذيه

جعفر. إن شاء الله دكتور شكرا لك

راح جعفر ويه الدكتور على مود يسجل خروج

كمت و ستندت على خالي احس لحد هسه بيه الدوخه

صعدت بل سياره و خليت راسي على الجام نزلت دموعي واني اتذكر كلام شاهين البارد الي نزل على كلبي مثل الجمر احس روحي فقدت كل شي هسه عترفت اني صرت يتيمه عافني بكل برود ولا سئل عليه علقني بي و راح عتبرته ابو بس عرفت محد يستاهل اشبهه بابوي ، خليته كلشي بحياتي و سويت اله اهميه بحياتي و هوا بل مقابل تركني و خلاني ادخل بحاله كتئاب و خسرت نطقي و خسرت حياتي مستقبلي مجهول و خوالي مبين محد يريدني محد متقبلني احس روحي نكره بينهم.. فكره انو شاهين عافني مجاي اتقبلها مجاي تدخل بعقلي...

وكفت السياره و نزلت بهدوء صعدت لغرفتي لكيتها وصخه محد منضفها نزعت عبايتي و كعدت اعزل بيها كل شوي ادوخ اخذ ريست و ارجع اكمل

خلصت و فتت سبحت و صليت لبست تراك و نمت و اني الدمعه على خدي و كل شوي ارفع الموبايل و اشوف اذا شاهين متصل عليه اريده يرجع و يكول الي مقلب بس خاب ضني..

العوده الى الماضٍ

شاهين...

كاعد على المكتب و اكتب اريد اضيع تفكيري بالي مشتت و افكار مخربطه كل شوي يروح فكري لشغله مره لأمي الي دخلت المستشفى بسببي صار بيها سكر لو لصديقي و اخوي الي ما جابته امي ، سوو بي صدار و ذبحوه بدم بارد لحد هسه صامد و ما ابين لاحد اريد اخذ ثاره اريد افرح بي بس مع الأسف الداعشي الي چتله مات و ما لحكت عذبه و اخذ ثاري منه بس موجودين جماعته لذالك اني لحد هسه كاعد و ما اريد اتصرف بطيش و اضيع كل شي

صامد و قوي بداخلي حطام مدينه مهجوره أفكاري متزاحمه و مشتت افكر شلون جنت عايش حياتي قبل... اني شاهين ملقب بصگر لاني املك سرعه و تركيز فضيع ولدت بين عائله متفاهمه بين اب و أم و اخوات و اخوان عندي 5 خوات و عندي اخو واحد و اني الثاني ابوي جان انسان حيل قاسي ايده و الضرب اذا يغلط واحد من اخواني كلنا نتعاقب مو بس هوا... جنت ما ارسب بدراستي ابد جنت ادرس غصب عني خايف من الحزام و الصونده تخرجت من سادس بمعدل مقبول ما بي شي رحت امشي تا ارجع على البيت واني مهيوم خايف من ابوي صرت زلمه كامل عندي شوارب و لحيه و لحد هسه يضرب بيه

وصلت للبيت و سميت بس الله و دخلت لكيت البوب مال البيت مفتوحه و اخواتي كاعدات بل مطبخ و يبجن

رحت ركضت عليهن اريد اشوف شبيهن ما يرضن يحجن الي اخر شي صحت بيهن يالله حجت اختي كريمه

كريمه. ابوي وكع و ودوه على المستشفى صار الهم ساعه و ما نعرف عنهم شي

عفتهن و رحت ركض على المستشفى الي يمنه جان صغير و طابق واحد اول ما دخلت سمعت صوت صريخ عرفتها امي تصرخ رحت عليها اركض بكل سرعتي و شفتها بل كاع و مفرفحه روحها من البجي كاعده و تلطم على رجليها

رحت حضنتها و هيه تصيح ابوك ماتت بهاي اللحظه حسيت نكسر ضهري ما عندي سند حسيت المسئوليه كلها عليه و اني بعدني بسن المراهقه ابوي من راح خله فراغ جبير بداخلي

مرت ايام الفاتحه و خلصت و البيت مخيم عليه اللون الاسود و الحزن بكل ارجاء البيت

صرت اني رجال البيت معا انو عندي اخوي اكبر مني بس مو شد ابد ما يعتمد علي حاولت اكضبه المسئوليه بس جان يتهرب فا طريت اني اهتم بأمي و اخواتي

كرست حياتي بس الهن صرت ملازم و العسكريه علمتني هواي دروس و مواقف صرت انسان بارد و عصبي بنفس الوقت عندي علاقات عابره علاقاتي جانت كلها بل حلال بعمري ما دنيت على الحرام بس بحياتي ما حبيت وحده بيهن مجرد تسليه و اضيع وقتي جنت اي بنت تعجبني شكلٍ اجيبها و برضاتها لو حتى بنت بيوت

زوجت خواتي عند ناس محترمه و خلفن و عدهن رواتب بس اني كل شهر مصروفن خاص بيهن و اخوي تزوج بنت جيرانه بقيت بس اني عاجبتني حياتي اريد ابقه طير حر

حياتي صارت عباره عن روتين ما بيها شي جديد

صحيت من صفنتي على العسكري يطكلي تحيه رفعت راسي و جابلي اسم بنت و كال انو ما عدها احد تسكن وياه ضجت لان هاذي مو شغلتي اكعد أدبر خيم للناس بس تغاضيت على الموضوع و طريت أدبر الها سكن

ذبيت القلم و طلعت علبه السمسم و خليت خاشوكه بحلكي غمضت عيوني و خليت راسي على الكرسي و كعت اتأمل طعم السمسم

احب السمسم حيل ومن اني و صقير ولحد هسه ما امل منه

جفلت (فزيت) صوت بل غرفه عبالي الحارس لحد هسه موجود تا ارزله

فتحت عيوني و رفت راسي شفت بنت صفنت بملامحها شكد شايف بنات بحياتي بس مثلها ابد مو شايف شكلها تعبانه و عضام و جهها مبينه و عيونها ناعسة من التعب

عجبني شكل عيونها بقيت مركز بيها شكلها و كلشي بيه يغري اكبر رجال، معروف ببنات الموصل يشيلن هيج جمال مو غريبه عليهن

دار حوار بيني و بينها اخذت اسمها و دكيته بل حاسبه طلعت معلوماتها كامل يمي و عرفت هيا اخت محمد الي ذبح صديقي

نقهرت حيل و تعصبت صرت معد اشوف كلشي جدامي حسيت اجت للموت برجليها حسيت الله جابها عليه

شوفتها الفيديو شلون مجتول اخوها واني ميت ضحك شلون نصدمت، بعد ما شافت مني شي هاذي البدايه فقط

ناديت الحارس و غيرت اسمها و سويتها ساكنه بغداد على مود ما يحققون بشغلتها

عاندت و صارت تصيح و مصره انو اسمها مريم مو شيهانه ضربتها راشدي خفيف اشو هاي وكعت بل كاع و كامت تتلوه من الوجع غلطت عليه ما رديت أصغر عقلي اكثر من هيج

اخذتها و صعدت بل سياره ادحج عليها مصدومه و خايفه مبين من وجهها اصفر

بقيت امشي ربع ساعه و دحجت عليها لكيتها نايمه شلون الطفل و مقوسه شفتها

ضحكت على شكلها و كصيت الها صوره

كملت طريقي و هيه كل شوي تصحه و ترجع تنام

دك موبايلي طلعته من جيبي دحجت عليه رقم امي تعجبت امي ما تتصل عليه بهيج وقت عدها وقت معين.. خفت لا بيها شي كبل فتحت الخط اجاني صوت مرت اخوي وهيه تتميع

حجيت وياها عبالي امي بيها شي طلعت ما بيها شي و متصله لواكه لا أكثر

تفلت عليها و سديت الموبايل دحجت على مريم جانت دحج عليه بصدمه من اجت عيني بعينها كبل دنكت ضحكت بكلبي على ترصفاته العفويه و الطفوليه

فتحت الجامه و لكحت(شمرت) الموبايل بل شارع

وصلت للسيطره عرفتها راح تلعب بذيلها و فعلا طلع احساسي بمحله.

سوت دراما و كعدت تشكي للعسكري عني طولت خلكي و نزلت وياهم اخذوني على النقطه طلعت الهم الهويه من شافوها طكولي تحيه و عتذرو مني

غلست عليهم جان فكري مشغول بهاي الطفله الي بل سياره جنت متحلف الها بچتله زينه

وصلت السياره و ما لكيتها فتريت ورا السياره لكيت آثار أقدام عرفتها وين رايحه

مشيت بل سياره بهدوء شفتها من بعيد تركض دست بنزين شفتها وكعت

دست بنزين اكثر جنت ناوي ادعمها و قررت اليوم اموتها و اروح و اخليها بس أكو شي دفعني و خلاني اوكف

نزلت عليها و هيه تبجي بعلات صوتها رفعتها كبل رادت تكع مسكتها و عرفت بيها خوفه و صدمه

جريتها و صعدتها بل سياره نطلقت لبغداد واني كاعد على نار كل الطريق افكر شلون انتقم منها و ابرد كلبي بيها و شلون اخذ شرفها شلون اكسرها و اعوفها بل شارع مذلوله

دحجت عليها شفتها نايمه و الدمعه على خدها وكفت السياره و كعدت اتأملها حجيت بهمس

شنو ذنبها هيه شنو الشي الي سوته.. شي اكيد ماكو جواب لان هيه ذنبها الوحيد اخوها القاتل مو هيه

كل ما اكول انتقم بس من اشوفها لو مجرد لمحه تروح هاي الأفكار من راسي و أتراجع الف خطوه ائنبني ضميري من ضربتها حسيت اني بشع لدرجه جاي اعاقبها لان اخوها داعشي متقبل فكره انو هيه ما عليها با اخوها و هيه ما الها دخل بي..

بقيت نص ساعه افكر اخر شي اتخذت قرار انو اتقرب منها و اذا ستجابت لهذا الشي اعرف شلون اتصرف وياها ... او اذا ما قبلت فا ابتعد عنها و اساعدها لان مبينه بنيه صقيره و فطيره و ما تعرف كل شي

تخذت قراري و ضليت ادحج عليها شلون نايمه شكلها و تصرفاتها شلون الطفل حتى نومتها ذبيت حسره و همست

شاهين. اني من ايمت ادمر طفله استغفرالله ربي امبينه كلشي ما تعرف

كعدت جوعانه تذكرت بجيبي نستله انطيتها الها و هيه وكحه لسانها أطول منها ابد ما تسكت صحت بيها يالله سكتت

حركت السياره و وصلت لبغداد تذكرت امي تتصل عليه بل 8 الصبح وكفت يم محل و شتريت موبايل و خط تذكرت هاي الطفله جوعانه شتريت الها نستله و مي و صعدت بل سياره

انطيتها الها و كعدت تاكل بيها دنچرت (دنكت) راسي على الستيرن احسه راح ينفجر كد ما تعبت خابرت امي و طمنتها سديت الخط و رحت على الشقه مالتي

كمت اختبرها و اشوفها كد الثقه حطيت فلوس كدامها و رحت على الدوام رجعت الفلوس باقية بمكانهن ما جايه حولهن خليت كذالك قطعه ذهب و هم باقيه بمكانها غرفتها كد الثقه و متربيه زين مو مال هيج سوالف اني من البدايه اعرفتها بس ردت اتأكد

كمت اراقبها بسكته اراقب حركاتها و تصرفاتها الطفوليه من تخليني اغمص على مود تمشط شعرها خايفه لا اشوفه و اني انفذ طلبها بس ما تجي عيني النوم و ابقه اراقب حركاتها الطفوليه كدام المرايه لو شعرها الي يجذب اكبر رجال سبحان الله احسها مو بشر مثلنه احسها حوريه و نازله من الجنه كد ما نازكه بكل شي

كعدت على الديوان و هيه كاعده تلعب بل بطل ناديتها و اجت تركض كيفت

كمت العب وياها و شبعتها راشديات فازت عليه و تقربت بحركه سريعه اني هنا تصرفت بطيش و سحبتها و بستها

زولت مني و هيه تبجي و مقهوره واني احس روحي صرت بغير عالم صحيت على بجيها تبجي بصوت عالي كمت و كعدت يمها حاولت أهديها بس جانت مصره على الطلعه من البيت حاولت أهديها و افهمها انو راح الكه خوالها بنفس الوقت و وعدتها انو راح اروح و ما اجي اله واني لاكي خوالها...

طلعت من البيت و اني محترك من العصبيه احس روحي لوثت فد شي صافي شي بريئ ما عبالي توصل لهل مواصيل

رحت على الانبار وصلت البيت لكيت كلها نايمه فتت على المطبخ و لكيت مرت اخوي فاطمه تشرب مي من شافتني جفلت

ما هتميت الها رحت فتحت الطباخ و خليت علي فحم اريد اسوي ناركيله سويتها و شلتها لفوك فتحت الباب و خليتها نزعت ملابسي بقيت بل شورت كعدت العب رياضه بس واهسي خربان كل تفكيري صار عباره عن سمسمه احس روحي ضايع بدونها تعودت عليها و على ريحتها و جنت يوميه كبل لا انام اشوف شعرها الي بلون الشمس

أخذت بملابسي و فتت على الحمام قفلت الباب و نداريت شفت....
_________________________________

عمري خلص البارت اذا عجبكم دوسو على النجمه

سؤال. تتوقعون شنو شاف شاهين

طلب تابعو حساب مصممه الغلاف هذا حسابها
qx_sh17اذكر المستخدم

احبكم عنونين مالتي انتو 🤎